GÁLATAS

GÁLATAS

¹ Galacia uraqin utjir iglesianakankir munat jilatanaka, kullakanaka: Naya Pablompi, nayamp chikäpki uka jilatanakampiw aruntanipxsma. Dios Awkisana, Tatit Jesucriston aski waxt’äwipampi, sumankañapampix jumanakampïpan. Nayax aka suma arunak yatiyañatak khithat apostolütwa: ¡Jesucristox jiwatanak taypit jaktawayi! Janiw nayarux akapachankirinakat khitis khithankituti, jan ukasti, pachpa Jesucristompi, jupar jaktayir Dios Awkimpiw khithanitu. ⁴ Jesucristox Dios Awkisan munañaparjamaw juchanakas layku jakañap apt’asiwayi, aka jan wali jakañat jiwasanakar qhispiyañataki. ⁵ ¡Diosax wiñayan wiñayap jach’añchatäpan! Ukhamäpan. ⁶ Jumanakan Diosar mäki jaytanukupxatamat walpun muspharta, yaqha qhispiyasiñ arunakar jank’aki arkapxatamata, Jesucristo tuqiw jupax munasiñap uñacht’ayapxtam. ⁷ Chiqpachansa, janiw yaqha qhispiyasiñ arux utjkiti, jan ukasti, jumanak taypin yaqhanakaw jumanakar pantjayir utji, jupanakax Criston qhispiyasiñ arunakap maysaruw q’iwiñ munapxi. ⁸ Ukampis khititix jumanakar yatiyapxätam, kuntix nanakax yatiyapksma ukat yaqha qhispiyasiñ arunakxa, uka jaqix ñanqhachatäpan, khitïskpasa, naya pachpäyäsa, jan ukax, alaxpachat jutir angeläskpasa. ⁹ Nayratpachaw jumanakar sapxsma, jichhasa, wasitat sasipkaksmawa: Jumanakax katuqapktas uka suma yatiyäwit yaqha qhispiyasiñ arunaktix khitis parlapxstamxa, Tatitun ñanqhachäwipax uka jaqxar purpan. ¹⁰ Janiw nayax jaqinakampi walikiw sayasiñ munkti, jan ukasti Diosan nayar walikiw sañap munta. Janiw jaqin munataparjam kusisiyañ munkti. Nayatix jaqinakampi sumat uñt’ayasiñ muniristxa, janiw Criston luqtiripäkxiristti. ¹¹ Jilatanaka, jumanakax yatipxam: suma yatiyäwi arunak yatiyapksma ukaxa, janiw jaqin amtäwipakïkiti. ¹² Janiw nayax khiti jaqitsa katuqkti, janirakiw khitis yatichkituti, jan ukasti, pachpa Jesucristow nayar yatichitu. ¹³ Jumanakax parlir ist’apxpachätawa, judionakan saraparjam sarnaqataxax kunjämänsa nayrax uka, qhuru kankañampi Diosan iglesiapar tukjañ munasin arknaqataxsa ist’apxarakpachätawa. ¹⁴ Judionakan saraparjam sarnaqañ phuqtwa, naya mita walja judionakat sipan wali chiqaparuw phuqta, nayra awkinakaxat katuqat yatichäwinak jupanakat sipan phuqharakta. ¹⁵ Ukampis Diosaw nayarux janïr yurkta ukkhatpach ajllisitu, ukatsti jach’a munasiñap laykuw jawsarakitu. Diosax ukham munasin Yuqapar uñt’ayitu, qhispiyasiñ arunakap jan judiöpkis uka jaqinak taypin qhanañchañaxataki, ukapachasti janiw nayax khitir jiskt’asiris sarkti; ¹⁷ janirakiw nayat nayra utjir apostolunakar jiskt’asiris Jerusalenar sarkti. Jan ukasti, ukspachaw Arabia tuqir sarawayta, ukatsti Damasco markaruw kuttanxarakta. ¹⁸ Ukat kimsa mararuw Jerusalenar saraskta, Pedror uñt’añataki, jupampisti tunka phisqan urukiw qamaranta. ¹⁹ Jesucristo Tatitusan Santiago jilaparukiw uñjarakta, ukat uksarusti janiw yaqha apostolur uñjkti. ²⁰ Diosan nayraqatapan sapxsma, qillqanipksma ukax janiw k’arïkiti. ²¹ Uka qhipatsti, Siria, Cilicia uksa tuqinakaruw sarxta. ²² Judea uksa tuqin Criston iglesiapankir jilatanakax janïraw ukkhax nayar uñt’apkitänti. ²³ Uka jilatanakax parlirik ist’apxäna: “Khititix nayrax jiwayañatak arknaqapkistän ukax, kuntix nayrax tukjañ munkän uka pachpa iyawsañ arunak parlasaw sarnaqaski” sasa. ²⁴ Uk yatisasti Diosaruw nayat yupaychapxäna.

¹ Tunka pusin mara qhipatsti, wasitampiw Jerusalén markar sarta, Bernabé irpt’ata, Titorux nayamp chikaw irparakta. ² Diosaw sarañax munäna ukat sarta. Ukansti iglesia irpir wali uñt’at jilïrinakampikiw nayax tantachasta, jupanakarusti kuna qhispiyasiñ arunaktix jan judiöpkis ukanakar nayax yatichkta uk qhanañchta, nayan ch’amachasitaxan jan inamayatakïñapataki. ³ Jupanakax janiw khitirus circuncisión katuqayañ wayt’apkänti; Tito jilatarus janirakiw wayt’apkänti, griego jaqïkchïn ukasa. ⁴ Ukampis yaqhip k’ari jilatanakaw nanak taypir jamasat mantanitayna, Jesucristo tuqi qhispiyatäpktsa uk nanakar uñaqiri, ukat wasitampi judionakan kamachinakapar jaysapxañaxataki. ⁵ Ukampis janiw kunansa jupanakampix atipayasipkti, nanakasti munapxäyätwa chiqpach qhispiyasiñ arunakax jumanak taypit jan chhaqtañapa. ⁶ Ukampis aytat jilïrinakat uñt’atanakax janiw kuna jan uñt’at machaq yatichäwsa yapxatapkiti, nayax yatiykta uka suma yatiyäwi arunakxaruxa. Chiqpachan aytat jilïrinakäpxchi, jan aytat jilïrinakäpxchi uk yatiñ janiw munkti, Diosax janiw jaqin uñnaqap uñch’ukkiti. ⁷ Ukatsipana, jupanakax Diosan nayar jan judío jaqinakar qhispiyasiñ arunak parlañaxatak jawsatap uñjapxi, kunjämatix Pedror jawskatayna, judionakar pachpa qhispiyasiñ arunak parlañapataki ukhama. ⁸ Pachpa Diosaw Pedrorux khithäna judionak taypin apostolüñapataki, nayarusti jan judiöpkis ukanak taypiruw apostolüñatak khitharakitu. ⁹ Santiagompi, Pedrompi, Juanampix iglesian aytat jilïrinakat uñt’atanakasti, Diosan nayar uka luräwi churatap uñt’apxi. Ukatsti mayachasiñ amtäwimpiw nayampiru, Bernabeampirux amparanakax q’aphirapxitu, jupanakasti jan judiöpkis uka taypir nanakan irnaqir sarapxañaxatakix “walikiw” sapxänwa, ukchañkamasti jupanakax judionak taypin irnaqapxañaparakïnwa. ¹⁰ Jupanakasti jan kunaninakar tumpañ jan armasiñaxatakiw nanakar iwxt’apxitu, uksti nayax taqi chuymaw phuqta. ¹¹ Ukampis kunapachatix Pedrox Antioquía markar jutkän ukkhaxa, jan wali luratanakap ajanuparuw nayax irkatta. ¹² Pedrox jan judiöpkis ukanakampix manq’akirïnwa; ukampis Santiagon khithanit judionakan purinitapatsti, jan judiöpkis ukanakat jithiqtxänwa, janiw jupanak chika manq’kxänti, circuncisión katuqayirinakar axsaratap layku. ¹³ Pedrompi, Cristor iyawsir mayni judionakampisti ukham lurasax janiw chiqpach chuymanïkänti, pachpa Bernabeas jupanakan sallqjataw uñjasïna. ¹⁴ Nayasti suma yatiyäwi arunakarjam jan sarnaqatanakap uñjasin, Pedrorux taqpach jilatanak nayraqatan, ajanupar sista: “Jumax judiökasin, jan judiökasmas ukham jakasksta ukasti, ¿kunatarak jan judiöpki ukanakar judiöpkaspas ukham sarnaqayañ muntasti?” sasa. ¹⁵ Jiwasanakax yuritatpach judío jaqinakäpxtan, janiw jiwasax yaqha markanakjam juchararäpktanti. ¹⁶ Ukampis jiwasanakax yatipxtanwa, janiw khitis Diosan nayraqatapan Moisesan kamachip phuqhatap layku askit katuqatäkiti, jan ukasti, Jesucristor iyawsatap laykukiw katuqatäni. Ukatarak jiwasanakax Jesucristor iyawsapxtan, Diosan jiwasanakar askit uñt’añapataki, aka iyawsañ tuqi katuqatäñataki, janiw kamachi phuqhatas layku. Janiw khitis kamachinak phuqhatap laykux Diosan nayraqatapan askit katuqatäkaniti. ¹⁷ Jichhasti, jiwasanakax Cristo tuqi Diosampi askit katuqayasiñ thaqhasatix, juchararjam uñjatakïskañänixa, ¿Cristot jiwasanakar jucharar tukuyistusti? ¡Janiw ukhamäkiti! ¹⁸ Nayatix kunsa t’unjirista, ukat wasitamp sayt’ayarakirista ukaxa, naya pachpaw juchanïrista. ¹⁹ Kamachi tuqinxa, uka pachpa kamachi laykuw jiwatäxta, Diosatak jakañaxataki. ²⁰ Chiqpachansa, nayax Cristomp chikaw ch’akkatat uñjasta, janiw nayax jakxtti, jan ukasti, Cristow nayan jakxi. Jichhasti janchin jakaskasaxa, Diosan Yuqapar iyawsatax laykuw jakaskta, nayar munasin jakañap naya layku apt’asiwayi. ²¹ Janiw Diosan khuyapayasiñap apanukuñ munkti; kamachinakar ist’atas laykukitix Tatitux katuqistaspaxa, janiw kunatakis Criston jiwatapax askïkaspati.

¹ ¡Galacia markankir pisi amuyt’an jaqinaka! ¿Khitirak jumanakar sallqjapxtamsti? Jumanakar yatiyapksma ukapachax, naya pachpaw jumanakar sum qhanañchapxsma, kunjämättix Jesucristox cruzan ch’akkatat jiwkän uka. ² Jichhax sapxitaya: ¿Moisesan kamachip phuqhatanakam laykuti Diosan Ajayup katuqapxtasti, jan ukax, suma yatiyäwir iyawsapxatam laykuch katuqapxtaxa? ³ Ukatix ukhamächi ukasti, ¿kunatarak pisi amuyt’an jaqir tukupxtasti? Diosan Ajayupan ch’amapampi machaq jakañ qalltkasina, ¿kunatarak jichhasti uk jumanakan ch’amamampik phuqhachañ munapxtasti? ⁴ ¿Ukataq t’aqhisitanakamax inamayakïxiti? ¡Janiw ukax inamayatakïkaspati! ⁵ Diosax Ajayup jumanakar churapktam ukapacha, jumanak taypin muspharkay luräwinak lurki ukapachasa, ¿kunatsa ukham luri? Janiw kamachirjam phuqhatanakam laykuti, jan ukasti, ist’apkta uka suma yatiyäwi arunakar iyawsatanakam laykuw luri. ⁶ Abrahamax Diosar iyawsänwa, Diosasti iyawsatap laykukiw askit katuqarakïna. ⁷ Yatipxam, iyawsäwi layku jakir jaqinakaw, Abrahaman chiqpach wawanakapaxa. ⁸ Qillqatax nayratpach qhanañchäna, Diosax jan judiöpkis uka jaqinakar iyawsäwi laykuw katuqarakini sasa. Nayratpacharakiw Abrahamarux aka suma yatiyäwi yatiyatayna: “Jumïpan taqpach markanakax askinakampi phuqt’at uñjasipxani” sasa. ⁹ Ukhamasti iyawsañanïpki jupanakax Abraham tuqiw askinakampi phuqt’at uñjasipxani, Abrahaman iyawsañan jaqïtap layku. ¹⁰ Ukampis kamachin luräwipar alkatirinakax, ñanqhachatäpxiwa. Qillqatansti akham siwa: “Kamachin qillqatäki uka arunakarjam jan phuqhirinakax, ñanqhachatäpan” sasa. ¹¹ Qhanakïskiwa, janiw khitis kamachi phuqhatap laykux Diosan nayraqatapan askit katuqatäkiti; Qillqatan akham siwa: “Aski jaqix, iyawsäwi laykuw jakani” sasa. ¹² Kamachi tuqitix wiñay jakañ jikxatañax utjaspaxa, Diosar iyawsañax janiw wakiskaspati; kamachi arunakar jaysañakïspawa. Qillqatan siwa: “Kamachinak phuqhirix, jaysatap laykuw qhispiyasini” sasa. ¹³ Cristow kamachin ñanqhachäwipat qhispiyistu, jupax juchanakas laykuw ñanqhachäwi katuqi, Qillqatan akham siwa: “Taqi khititix mä lawaru warkkatat jiwki ukax, ñanqhachatäpan” sasa. ¹⁴ Ukatpï, kuna askinaktix Diosax Abrahamar arskäna ukax jan judiöpki ukanakatakirakixa. Ukhamasti, Jesucristorutix iyawsañänixa, Diosan arsutaparjamaw Ajay katuqañäni. ¹⁵ Jilatanaka, jakañxat amuyt’ayapxäma: Kunapachatix mä jaqix yaqha jaqimpi mä arust’äwi lurki ukapachax, sutipampiw qillqanti, uksti janiw khitis ina ch’usar tukuykaspati, janirakiw yapxatkarakispasa. ¹⁶ Diosax Abrahamar arsuwaykän ukanakax, Abrahamampitaki, jupat saraqirimpitakïnwa. Qillqatan janiw “Saraqirinakat” parlkiti, walja jaqïkaspas ukhama, jan ukasti mayni sapatak parli: “Juman saraqirimaru” sasa, ukasti Cristowa. ¹⁷ Nayasti sistwa: Diosax Abrahamampiw mä arust’äwi lurawayi, uksti qhanañchawayiwa. Diosan arsutapax janiw ina ch’usar tukuyatäkaspati, uka arust’äwis janirakiw pusi patak kimsa tunkan mara qhipat Moisesar churat kamachimp inamayar tukuyatäkaspati. ¹⁸ Diosax churañ arski ukatix Moisesan kamachipar jaysañ laykukïspaxa, janiw mä arust’äkxaspati; chiqpachansa Diosaw Abrahamar inak churañatak arsuwayi. ¹⁹ Ukhamasti, ¿kunatakirak kamachisti askïspasti? Abrahamar arsutap qhipatxa, Diosax kamachi arunak churistu, jan wali lurapkäyätansa uk jiwasanakar uñacht’ayañataki. Ukampis uka kamachix Diosan arsutap katuqkatayna uka Abrahaman saraqirip jutañapkamakiw askïnxa. Diosax angelanak tuqiw kamachinak Moisesar churäna, ukat jiwasanakar uka kamachinak churañapataki. ²⁰ Ukampis mä sapa jaqikïtap laykux janiw yaqha sumankthapiyirix munaskxiti, Diosasti mä sapakiwa. ²¹ Ukhamasti, ¿janit Moisesan kamachipasti Diosan arsutanakap yäqkpachasti? ¡Janiw kunäkipansa ukhamäkiti! Kamachinakatix wiñay jakañ churasapän ukaxa, kamachir phuqhatas laykuw Diosax katuqistasapäna. ²² Qillqatan siski ukarjamax, taqiniw juchan katuntat jakapxi, ukax ukhamaw khitinakatix Jesucristor iyawsapki jupanakan, Diosan arsutap katuqapxañapataki. ²³ Iyawsäwi janïr jutkipan, kamachin munañapar katuntataw jakäyätan, iyawsäwin yatiyasiñap suyasa. ²⁴ Ukhamasti kamachix yatichirir uñtataw irpawayistu, Cristor irpkatañkama, jupar iyawsatas layku Diosampi katuqatäñasataki. ²⁵ Jichhax Jesucristor iyawsañ urunakan purinxatapatxa, janiw kamachin jiwasar irpañapa, yatichañapas wakiskxiti. ²⁶ Jumanakax Tatit Jesucristor iyawsatanakam laykux Diosan wawanakapäpxtawa. ²⁷ Bautismo katuqasinxa, Cristompi mayachatarakiw uñjasipxtaxa, Cristompix mä isimpi isthapitäpkasmas ukhamäpxtawa. ²⁸ Tatit Jesucristor mayachatäxasin, janiw judío jaqïñasa, griego jaqïñasa, t’aqhisiyat jaqïñasa, antutnukut jaqïñasa utjkxiti, chachasa, warmisa yaqhäkiti; taqi jumanakax mayakïxapxtawa. ²⁹ Jumanakatix Cristonkapxstaxa, Abrahaman wawanakapäpxaraktawa, Diosax jupar arsuwaykän uksa katuqapxarakïtawa.

¹ Akampix akham sañ munta: Yänak katuqiritix wawäskchixa, utankir uywatampi sasiwa, taqi yänakax jupankchi ukasa. ² Uywir jaqinakaw jupar uñjapxi, yatichapxaraki, awkipan arsut urukama. ³ Ukapachparakiw jiwasanakampix lurasi, Ajayu tuqin wawakäyätan ukapachax, akapach irpirinakan munañaparjamaw sarnaqäyätan. ⁴ Ukampis arsut urux phuqhasiwayki ukapachaw, Diosax Yuqap khithani, mä warmit yurisa, judío jaqjamaw kamachi arunakar phuqhas jakarakïna. ⁵ Diosaw jupar khithani kamachirjam jakañat jiwasanakar qhispiyiri, ukatsti jupan wawanakapat jiwasanakar katuqistu. ⁶ Ukhamax jupan wawapa tukutas laykusti, Diosax Yuqapan Ajayup chuymanakasar khithani; uka Ajayuw art’asi: “¡Awkixay!” sasa. ⁷ Ukhamasti, jumax janiw uywat jaqïkxtati, jan ukasti, Diosan wawapäxtawa; wawapäxasinsti, Diosan munasiñap laykuw tuti katuqarakïta. ⁸ Nayrax, jumanakax Diosar janïr uñt’apkäyät ukkhaxa, k’ari diosanakaruw luqtapxäyätaxa. ⁹ Ukampis jichhax Diosar uñt’xapxtawa, chiq sasinsa, Diosax jumanakar uñt’xapxtamwa. Ukhamasti, ¿kunatarak wasitampi uka pisi ch’amani, t’ukhasirinakan luqtirinakapar tukuñ munapxtasti? ¹⁰ Jumanakax yäqasipkaktawa: yaqhip urunaka, phaxsinaka, pachanaka, maranaka. ¹¹ Inas nayan lurataxax jumanak taypin inamayakïchi, uk amuyasax llakistwa. ¹² Jilatanaka, nayat yatiqasipxañamatakiw achikt’apxsma, nayax jumanakjamaw tukuwayta. Janiw nayarux kuna jan walsa jumanakax lurapkistati, ¹³ jan ukasti, janchin usuta uñjasitax laykuw Galacia markan mä qawqha pacha ukankawayta, suma yatiyäwinak jumanakar yatiyasa. ¹⁴ Uka usuxax jumanakatak mä yant’äkaspas ukhamänwa, ukampis janiw janchin usuta uñjasitax layku jisk’achapkistati, janirakiw apanukupkistasa. Ukatsipana, Diosan angelapäkiristsa, jan ukax, pachpa Jesucristökiristsa ukham katuqapxistaxa. ¹⁵ Nayax yattwa, wakisisäpän ukax, nayranakamsa nayar churañatak apsusipxasämänwa. ¿Kawkinkarak uka kusisiñamasti? ¹⁶ Jichhasti, ¿kunatix chiqäki uk sataxatakti jumanakan uñisirimar tukuwayxtxa? ¹⁷ Judío kamachirjam phuqhapxañam wayt’ir jaqinakax, jumanakat wali amtapxi, ukampis amtäwinakapax janiw walïkiti. Jupanakax nanakat t’aqaqtapxañam munapxtam, ukhamat jupanakar makhatapxañamataki. ¹⁸ Mayninakat llakiñax walikiwa, ukampis uk suma amtäwimpi lurapxam; janiy jumanak taypin nayax jikxataskta ukapachakïkpati, jan ukasti, ukhampun lurapxam. ¹⁹ Wawanakaxay, wasitampiw t’aqhisiñan jikxatasta, kamisatix mä taykax wawachasiñatak t’aqhiski ukhama, Criston jumanak taypin sayt’añapkamasti t’aqhisiskakïwa. ²⁰ ¡Jichhpach jumanakamp chika ukan jikxatasiñ munirista, taqi tuqit jumanakar parlañataki, ukampis janiw kunsa jumanakat amuyt’irjamäkti! ²¹ Moisesan kamachiparjam sarnaqañ munirinaka, sapxita: “¿Janit ist’apkta kamachix siski uksti? ²² Abrahamax pä wawanïnwa siwa: Nayrïr wawapax uywatapan wawapänwa; maynïr wawapasti warmipan wawapänwa. ²³ Uywat warmin wawapax janchin munañapat yurïna; warmipan wawapasti Diosax arskatayna ukarjam phuqhasiñapatakiw yurïna. ²⁴ Akax mä uñacht’äwiwa. Uka pani warminakax pä arust’äwiruw uñtasi. Agar sat warmix, Sinaí qullun arust’atäkän ukampi sasiwa; jupat saraqirinakax t’aqhisiyat jaqïñatakiw yuripxi. ²⁵ Agar warmix Arabia uraqinkir Sinaí qullumpi sasiwa, ukax jichhürun Jerusalén markawa, wawanakapamp chika kamachin t’aqhisiyat jakapxatap layku. ²⁶ Ukampis Sara warmix machaq arust’äwiruw uñtasi, uka tuqiw jiwasanakax alaxpachankir Jerusalén markan wawanakapäpxtan. ²⁷ Qillqatan siwa: “Jan wawani, jan wawachasir warmi, kusisim; wawachasiñamp t’aqhisiñ jan uñt’ir warmi, kusisiñat art’asim. Apanukut warmin wawanakapax waljanïniwa chachan warmin wawanakapat sipana.” ²⁸ Jilatanaka, jumanakax Isaac chachjamäpxtawa, Diosax arsuwaykatayna uka wawanakäpxtawa. ²⁹ Kamisatix khä urunakan janchin munañapat yurir wawax, Ajayun munañapat yurir wawar uñisis arknaqkäna, uka pachparakiw jichhax jiwasanakampix lurasiski. ³⁰ Ukampis ¿kamsis Qillqatanxa? Akham siwa: “Uka uywat warmir wawapamp chika anqar jaqunukum, uywatan wawapax janiw chachan warmin wawapjam tuti katuqkaspati” sasa. ³¹ Ukhamasti jilatanaka, janiw jiwasanakax uywatan wawanakapjamäktanti, jan ukasti chachan warmin wawanakapjamätanwa.

¹ Cristox qhispiyat jakasiñ churistu, jiwasanakan qhispiyat sarnaqasiñasataki. Ukalayku, jumanakax ch’amampi uka qhispiyat jakañan sarantapxam, jan wasitampi t’aqhisiyat jakañar kutt’apxamti. ² Ist’apxita. Naya, Pablow sapxsma, jumanakatix circuncisión luräwi phuqhapxätaxa, Criston luratapax janiw kunatakis jumanakatakix askïkxaspati. ³ Circuncisión katuqir jaqinakaruw wasitat sista: Moisesan kamachiparjam taqpach phuqhas sarnaqañapawa. ⁴ Jumanaka, kamachinak phuqhas Diosampi katuqayasiñ munapkta ukanakax, Cristot saraqtapxtaxa, Diosan khuyapayasiñap apanukupxtaxa. ⁵ Ukampis jiwasanakanxa, Ajayu tuqi, iyawsañ tuqitarakiw, Diosan nayraqatapan katuqatäñ suyt’äwisax utjistu. ⁶ Cristo Jesusampi mayakïstanxa, janiw kunatakis wakiskiti circuncisión katuqañasa, jan katuqañasa. Jan ukasti, iyawsañanïñaw juk’amp askixa, uka iyawsañasti munasiñan jakayarakistani. ⁷ Jumanakax walik sarantasipkäyätaxa: ¿Khitirak chiqar jaysañ apanukuyapxtamsti? ⁸ Uka amuyux janiw Diosat jutkaspati, jupa pachpaw jumanakar jawsapxtam. ⁹ “Mä juk’a levadurax taqpach jak’u chaputaruw puqtayi” ¹⁰ Tatitur iyawsañaxaw nayan utjitu, janiw jumanakax mayja amtapkätati; ukampis Diosax jumanakar pixtuntas sarnaqir jaqirux, khitïskpansa, mutuyaniwa. ¹¹ Jilatanaka, nayatix jumanakaru: “Circuncisión katuqapxañamawa” sapxirismaxa, judionakax janiw jiwayañatak arknaqapkitaspati. Ukhamäspa ukasti Criston cruzapat parlañax janiw jupanakar mayjt’aykaspati. ¹² Ukampis khitinakatix jumanakar pixtuntas sarnaqasipki: “circuncisión lurayasipxañamaw” sasa, ukanakax, ¡mäpit jupanakpach taqpach khariqasipxpan! ¹³ Jilatanaka, Tatitux jumanakar qhispiyat sarnaqasiñaruw jawsapxtam; jumanakasti jan uka qhispiyat sarnaqasiñ tumpanix janchin munañaparjam sarnaqapxamti, jan ukasti, munasiñ laykuy maynit maynikam yanapt’asipxam. ¹⁴ Tatitun taqpach kamachipax mä sapa kamachir tukutakiwa: “Jaqi masimarux juma kikparjamaw munasïta” sasa. ¹⁵ Amuyasipxam, jumanakatix nuwasipxäta, maynit maynikam jan walinaksa lurasipxäta ukaxa, jumanakkamaw tukjasipxäta. ¹⁶ Ukat sapxsma: Ajayun munañaparjam sarnaqapxam, ukhamat janiw janchin munañaparjam sarnaqkxapxätati. ¹⁷ Janchin munañanakapax janiw Ajayun munañapjamäkiti, Ajayun munañapasti janirakiw janchin munañapjamäkisa. Purapat janiw jaysasipkiti, ukat jumanakax munatamarjam jan kunsa lurapkasmati. ¹⁸ Ukampis Tatitun Ajayupatix jumanakar irpapxstamxa, janiw kamachir chinkatat jakxapxätati. ¹⁹ Janchin munañaparjam arkirinakan luräwinakapax qhanaw uñsti, ukanakasti akanakawa: wachuq jucha lurañanaka, q’añu lurañanaka, jan wali amtäwinaka, ²⁰ idolonakar yupaychañanaka, layqasiñanaka, uñisisiñanaka, ch’axwanakan sarnaqañanaka, jan wali amtañanaka, phiñasiñanaka, jupatakik munañanaka, t’aqaqtañanaka, yaqhachasiñanaka, ²¹ yaqhankir munapayañanaka, jaqi jiwayañanaka, machañanaka, jiljas manq’añanaka; ukanakar uñtat yaqha lurañanakampi. Iwxt’apxsmawa, niy satäpxaraktawa, ukanak luririnakax, janiw Diosan markapan katuqatäpkaniti. ²² Ukatsipana, Qullan Ajayun achupax akanakawa: munasiña, kusisiña, samaraña, llamp’u chuyma, taqimpis sumankañ chuyma, khuyapayasiñ chuyma, taqi kunansa phuqhañ chuyma, ²³ alt’at chuyma, janchin munañapar atipjañ chuyma. Ukanakar juchañchir kamachisti janiw utjkiti. ²⁴ Tatit Jesucristonkirinakax, janchin munañanakapar wayusir chuymap ch’akkatxapxiwa, ñanqha amtañanakampiru, munañanakapampiru. ²⁵ Ajayu laykutix jichhax jakstanxa, uka Ajayumpirak kuna luräwinakasansa irpayasipxañäni. ²⁶ Janiy jach’a jach’a tukurïñäniti, jiwasanak pachpas tuqisiñanak utjayañäniti, janirak jiwasanakkam uñisisiñäniti.

¹ Jilatanaka, maynirutix kuna juchar tinkutap uñjapxstaxa, jumanakax Diosankirinakjamax jupan sayt’asiñapatak yanapt’apxam, llamp’u chuymampi parlxayapxam, taqi amuyumpiraki. Ukampis sapa mayni amuyaspan, jupas yant’ataw uñjasirakispa. ² Jan walt’añanak utjapxätam ukapachasti, maynit maynikam yanapt’asipxam. Ukham lurasaw Criston kamachip phuqhapxäta. ³ Maynitix jan kunäkasin jach’achaschixa, jupa pachpaw sallqjasi. ⁴ Sapa mayniw sarnaqäwip uñjasiñapa, luratapatix walikïskchixa, jupa pachpaw ukat kusisini, ukampis janiw mayninakatakïkiti. ⁵ Sapa mayniw luräwinakapat llakisiñapa. ⁶ Tatitun arunakap katuqirix, yatichiripar askinak katuqatapat churañapawa. ⁷ Jan sallqjasipxamti; janiw khitis Diosat sawkaskaspati. Kuntix jaqix yapuchki ukarak apthapini. ⁸ Janchin munañaparjamatix arkaskakiñänixa, wiñayatakiw jiwañäni; ukampis Ajayun munañaparjamatix jaysañänixa, wiñay jakañ katuqañäni. ⁹ Ukhamasti janiy aski lurañan qarjasiñäniti, luraskakiñäni ukaxa, Diosax wakisitaparuw waxt’äwip churistani. ¹⁰ Ukalayku, wakisini ukax, taqinir aski lurapxañäni, juk’ampis iyawsir jilatanakasaru. ¹¹ Aka arunak naya pachpaw qillqta. Uñjapxam, jach’a qillqanakampiw jumanakar qillqanipxsma. ¹² Jaqinakampi askit uñt’ayasiñ laykukiw circuncisión luräwi phuqhapxañamatak wayt’añ munapxtam. Criston cruzap layku jan arknaqayasiñataki. ¹³ Janiw circuncisión katuqirinakasa kamachinakarjam phuqhapkiti. Ukampis jupanakax jumanakan circuncisión katuqañam munapxi, ukat janchin uka luräwi jumanakar lurayasin jach’achasipxañapataki. ¹⁴ Ukampis nayax janiw kunatsa jach’achasiñ munkti, jan ukasti, Tatit Jesucristosan cruzan jiwatap iyawsataxat jach’achasiñaxax utjitu. Criston cruzap tuqiw nayatakix akapach luräwinakax jiwatäxi, nayasti akapach luräwinakatakix jiwatäxaraktwa. ¹⁵ Ukhamasti, circuncisión katuqañasa, jan katuqañasa, janiw kunatakis askïkiti; ukatsipana, machaq jaqir tukuñasaw askixa. ¹⁶ Taqi aka arunakarjam sarnaqirinakax samarañampi khuyapayasiñampi katuqapxam, Diosan Israel markapankir taqpach wawanakapas katuqapxarakim. ¹⁷ Jichhat uksarusti, jan khitis nayar llakisiyitpati; walja chhuxrinakaw janchixan utji, ukanakaw Tatit Jesucristonkatax layku t’aqhisitax uñacht’ayi. ¹⁸ Jilatanaka, Tatit Jesucristosax taqi jumanakar askinakapampi phuqt’pan. Ukhamäpan.