ESDRAS

ESDRAS

¹ Ciro reyin Persia marka nayrïr mara apnaqäwipana, ukhamarak Jeremías profeta tuqi Tatitun arupa yatiyatäkäna ukan phuqhasiñapatakisti, Tatitux Ciro reyiruw ch’amañchäna, taqpach markachirinakar aru tuqi, qillqat tuqi, aka kamachi yatiyañapataki: ² “Persiankir Ciro reyix akanak arsu: Alaxpachankir Tatitu Diosaw aka uraqinkir taqi markanak apnaqañaxatak amparaxar katuyitu, Judá uraqinkir Jerusalén markan jupan utap lurayañaxatakiw iwxarakitu. ³ Ukhamïpansti, jumanak taypin khitinakatix Tatitun markapankirïpkta ukanakaruxa, Dios yanappan, Judá uraqinkir Jerusalén markar Tatitun utap lurir sarxpan, Israel markan Tatitupawa, Jerusalén markan jakaraki. ⁴ Kawkha chiqanakantix judeankirinakax jakasipki uka chiqat sarxirinakaruxa, uta jak’a masinakapax yanapt’apxpan, qullqimpi, qurimpi, yänakampi, uywanakamp kuna, Jerusalenankir Diosan utapatakisti waxt’äwinak churawayapxarakpan.” ⁵ Ukatsti Judänkirinakana, Benjaminankirinakan jilïrinakapasti, sacerdotenakasa, levitanakasa, khitinakatix Diosan ch’amañchatäpkän ukanakaxa, Jerusalenar sarañatakiw wakichasipxäna, Tatitun utap wasitat sayt’ayañataki. ⁶ Uta jak’ankirinakapasti yanapt’apxänwa: qullqimpi, qurimpi, yänakampi, uywanakampi, wali jila alan yänakampi, ukxarusti kunayman waxt’äwinakampi. ⁷ Ciro reyisti, kuna yänaktix Nabucodonosor reyix Jerusalén markat Tatitun utapat apsunkatayna, ukatsti diosanakapan utapar apkatayna uka yänak churxänwa. ⁸ Ciro reyix Mitrídates sat qullqi apnaqir tuqiw uka yänak kutt’ayxäna, ukatsti, uka jaqix Sesbasar sat Judá markan jilïr apnaqiriparuw jakt’asa katuyxarakïna. ⁹ Jakt’at yänakax akanakänwa: qurit lurat kimsa tunka jach’a qiru, qullqit lurat waranq jach’a qiru, pä tunka llätunkan cuchillo, ¹⁰ qurit lurat kimsa tunka qiru, aliq qullqit lurat pusi patak tunkan qiru, ukhamarak walja yänakampi. ¹¹ Qurita, qullqit lurat taqpach yänakax phisqa waranq pusi patakänwa. Taqi ukanakxa, Sesbasar chachaw Jerusalenar apxäna, apanukut jaqinakamp chik Babiloniat kutt’ankäna ukkha.

¹ Nabucodonosor reyix walja judionakaruw Babilonia markar katuntat apäna. Jerusalén markar kutt’anirinakax uka katuntat judionakan wawanakapänwa. Jilïr irpirinakax Zorobabel chachan p’iqichataw Jerusalén markaru, ukhamarak Judá uraqin utjir markanakar kutt’anxapxäna. Jilïr irpirinakan sutinakapax akanakänwa: Josué, Nehemías, Seraías, Reelaías, Mardoqueo, Bilsán, Mispar, Bigvai, Rehúm, Baaná, ukanaka. Maynïr kutt’anir judionakasti akanakänwa: ³ Parós chachan wila masinakapatxa, pä waranqa patak paqallq tunk payani; ⁴ Sefatías chachan wila masinakapatxa, kimsa patak paqallq tunk payani; ⁵ Árah chachan wila masinakapatxa, paqallq patak suxta tunk phisqani; ⁶ Pahat-moab ukankir Josué, Joab chachanakan wila masinakapatxa, pä waranqa kimsaqallq patak tunk payani; ⁷ Elam chachan wila masinakapatxa, waranqa pä patak phisqa tunk pusini; ⁸ Zatú chachan wila masinakapatxa, llätunk patak pusi tunk phisqani; ⁹ Zacai chachan wila masinakapatxa, paqallq patak suxta tunkani; ¹⁰ Binuy chachan wila masinakapatxa, suxta patak pusi tunk payani; ¹¹ Bebai chachan wila masinakapatxa, suxta patak pä tunk kimsani; ¹² Azgad chachan wila masinakapatxa, waranqa pä patak pä tunk payani; ¹³ Adonicam chachan wila masinakapatxa, suxta patak suxta tunk suxtani; ¹⁴ Bigvai chachan wila masinakapatxa, pä waranqa phisqa tunk suxtani; ¹⁵ Adín chachan wila masinakapatxa, pusi patak phisqa tunk pusini; ¹⁶ Ater, Ezequías chachan wila masinakapatxa, llätunk tunk kimsaqallquni; ¹⁷ Besai chachan wila masinakapatxa, kimsa patak pä tunk kimsani; ¹⁸ Jorá chachan wila masinakapatxa, patak tunka payani; ¹⁹ Hasum chachan wila masinakapatxa, pä patak pä tunk kimsani; ²⁰ Guibar chachan wila masinakapatsti, llätunk tunk phisqani; ²¹ Belén markatxa, patak pä tunk kimsani. ²² Netofá chiqatxa, phisqa tunk suxtani. ²³ Anatot markatsti, patak pä tunk kimsaqallquni. ²⁴ Bet-azmávet chiqatxa, pusi tunk payani; ²⁵ Quiriat-jearim, Quefirá, Beerot chiqanakatxa, paqallq patak pusi tunk kimsani; ²⁶ Ramá, ukhamarak Gueba markanakatsti, suxta patak pä tunk mayani. ²⁷ Micmás markatxa, patak pä tunk payani; ²⁸ Betel, ukhamarak Ai markanakatxa, pä patak pä tunk kimsani. ²⁹ Nebo markatxa, phisqa tunk payani; ³⁰ Magbís markatsti, patak phisqa tunk suxtani; ³¹ Elam chiqatxa, waranqa pä patak phisqa tunk pusini; ³² Harim chiqatxa, kimsa patak pä tunkani; ³³ Lod, Hadid, ukhamarak Onó chiqanakatsti paqallq patak pä tunk phisqani; ³⁴ Jericó markatxa, kimsa patak pusi tunk phisqani; ³⁵ Senaá chiqatsti, kimsa waranqa suxta patak kimsa tunkani. ³⁶ Josué chachat saraqirïkäna uka Jedaías wila masitxa, llätunk pataka paqallq tunk kimsani; ³⁷ Imer chachan wila masipatxa, waranqa phisqa tunk payani; ³⁸ Pashur chachan wila masipatxa, waranqa pä patak pusi tunk paqallquni; ³⁹ Harim chachan wila masipatsti waranqa tunka paqallquni. ⁴⁰ Hodavías chachat saraqiri Josué, ukhamarak Cadmiel wila masinakapatxa, paqallq tunk pusini. ⁴¹ Asaf chachan q’uchuri wila masinakapatsti patak pä tunk kimsaqallquni. ⁴² Punku uñjirinakasti Ater, Talmón, Acub, Hatitá, Sobai, Salum, uka chachanakan wawanakapänwa, jupanakasti taqpachanix, pataka kimsa tunka llätunkani jaqinakänwa. ⁴³ Tatitun utapan yanapasirinakasti: Sihá, Hasufá, Tabaot, ⁴⁴ Querós, Siahá, Padón, ⁴⁵ Lebaná, Hagabá, Acub, ⁴⁶ Hagab, Salmai, Hanán, ⁴⁷ Guidel, Gáhar, Reaías, ⁴⁸ Resín, Necodá, Gazam, ⁴⁹ Uzá, Paséah, Besai, ⁵⁰ Asná, Meunim, Nefusim, ⁵¹ Bacbuc, Hacufá, Harhur, ⁵² Baslut, Mehidá, Harsá, ⁵³ Barcós, Sísara, Temá, ⁵⁴ Nesíah, Hatifá, uka chachanakat saraqir wawanakapänwa. ⁵⁵ Salomonan luqtirinakapan kutt’anir wila masinakapasti: Sotai, Soféret, Perudá, ⁵⁶ Jaalá, Darcón, Guidel, ⁵⁷ Sefatías, Hatil, Poquéret-hasebaím, Amón, uka chachanakat saraqir wawanakapänwa. ⁵⁸ Tatitun utapan yanapasirinakampi, ukhamarak Salomonan luqtirinakapat saraqirinakapampixa, taqpachanix kimsa patak llätunk tunka payanïnwa. ⁵⁹ Khitinakatix Tel-mélah, Tel-harsá, Querub, Adón, Imer sat markanakat purinipkäna ukanakax, janiw israelitätapsa, kawkïr wila masïpxatapsa yatisipkänti, jupanakasti akanakänwa: ⁶⁰ Delaías, Tobías, Necodá uka chachanakan saraqirinakapa, jupanakasti suxta pataka phisqa tunka payanïnwa. ⁶¹ Sacerdotenakan wila masinakapatsti: Hobaías, Cos, Barzilai chachan saraqirinakapa, Barzilai chachax Galaadankir Barzilai chachan maynïri phuchhapampi jaqichaskäna ukawa, jupax awkch’ipan sutipat sutinïnwa. ⁶² Jupanakasti, wila masinakapan qillqatanakan sutinakap thaqapxäna, ukampis janiw jikxatapkänti, ukhamïpan jupanakax sacerdote kankañatxa apanukutäpxäna. ⁶³ Ukhamarusa, mark apnaqirix jupanakar Tatitur luqtat manq’anakat jan manq’apxañapatakiw yatiyäna; mä sacerdoten Urim, Tumim sat qalanak tuqi kunjämänis uk yatiñapkama. ⁶⁴ Uka tantachat jaqinakasti, taqpachanix pusi tunka payan waranq kimsa pataka suxta tunkanïnwa, ⁶⁵ luqtiri uywatanakapax chachatsa, warmitsa, paqallq waranqa kimsa pataka kimsa tunk paqallqunïnwa. Ukatsti jupanakan utjarakïnwa pä patak q’uchurinaka, chachatsa, warmitsa. ⁶⁶ Ukxarusti jupanakanxa, paqallq pataka kimsa tunka suxtan caballonaka, pä pataka pusi tunka phisqan mulanakaw utjäna, ⁶⁷ ukhamaraki pusi patak kimsa tunka phisqan camellonaka, suxta waranq paqallq patak pä tunkan asnonaka. ⁶⁸ Wila masinakan yaqhip jilïrinakapaxa, churäwinak Jerusalenar apapxäna, Tatitun utap wasitat lurañataki. ⁶⁹ Jupanakasti Tatitun utap lurañatakix utjatanakaparjamaw qullqi churapxäna, pusi pataka kimsaqallq tunka kimsaqallqun kilo quri, pä waranq paqallq patak phisqa tunkan kilo qullqi, ukhamaraki patak sacerdote isinaka. ⁷⁰ Ukatsti sacerdotenakasa, levitanakasa, yaqhip judionakasa Jerusalenaruw utjasiñatak qhiparxapxäna, ukampis q’uchurinakasa, punku uñjirinakasa, ukhamarak Tatitun utapan irnaqirinakasa, ukat ukxar utjir israelitanakasa markanakaparuw qhiparxapxäna.

¹ Paqallqür phaxsi purinxäna ukkhaxa, israelitanakax markanakapan utjnuqatäxapxänwa, ukatsti taqiniw Jerusalenan tantachasipxäna. ² Ukatsti Josadac chachan Josué yuqapasa, sacerdote masinakapasa Israelan Tatitupan altarap lurañ qalltapxäna, Salatiel chachan Zorobabel yuqapampi, wila masinakapamp chika, kunjämtix Diosan jaqipa Moisés tuqi kamachix arskäna ukarjam uka patxan nakt’at luqtäwinak luqtañataki. ³ Altarsti suma utt’ayat lurapxäna, uksa tuqin jakir jaqinakar jupanakan axsarapxatapata, sapa willjtanaka, sapa jayp’unakaw uka patxan Tatitur jach’añchas luqtäwinak luqtapxäna. ⁴ Ukatsti, Chhujllanak lurañ phunchhäwi uruyapxäna, kunjämatix kamachin qillqatäkäna ukarjama, sapüruw waxt’äwinak qawqhatix wakt’käna ukhamarjam churapxäna, ⁵ sapüru luqtañ nakt’at luqtäwinaka, ukhamaraki machaq phaxsi amtäwi uruta, Tatitur luqtat phunchhäwi lurañanakax utjki ukanakata, ukhamarus khitinakatix chuymanakapatjam Tatitur churapkäna ukanakata. ⁶ Tatitun utapax janïra lurañ qalltaskäna ukasa, paqallqür phaxsin nayrïr urutpach nakt’at luqtäwinak Tatitur churañ qalltapxäna. ⁷ Ukatsti, Ciro reyiruw mayipxäna, Tiro, Sidón markankir jaqinakan Líbano qullut cedro lawanak barconakat qutanjam Jope markar apapxañapataki, uka jaqinakarusti irnaqäwinakapat manq’añanakampi, umañanakampi, aceitemp kun churapxäna; utachirinakampiru, carpinteronakampirusti, qullq churapxarakïna, irnaqäwinak qalltapxañapataki. ⁸ Zorobabel chachampi, Josué sacerdotempisti Jerusalén markar purinipxatapatxa payïr marana, payïr phaxsi saraqataruw Tatitun utap wasitat lurañ qalltapxäna. Jupanakarux sacerdotenaka, levitanaka, Jerusalenar kutt’anipkatayna taqi uka judío jaqinakaw yanapapxarakïna, irnaqäwinak sarayapxañapatakisti, pä tunk maranit uksar levita chachanak ajllipxäna. ⁹ Ukhamaw Josué chachax yuqanakapampi, wila masinakapampi Tatitun utap lurañ irnaqäwinak sarayapxäna, Cadmiel chachan wawanakapamp kuna, jupanakax Hodavías chachan wila masipänwa. Henadad chachan wila masinakapas yanaparakïnwa. ¹⁰ Ukatsti, uta luririnakax Tatitun utapatak nayrïr qala jaquntapkäna ukkhaxa, sacerdotenakax sayt’asipxänwa, jupanakax sacerdote isin isthapitäpxänwa, trompetanakap phust’asaw Tatitur yupaychapxäna. Asaf chachat saraqir levitanakax platillonakampirakiw Tatitur yupaychapxäna, Israelan David reyipan arsutaparjama. ¹¹ Mayninakax yupaychañ q’uchunak q’uchupxäna, mayninakasti sapxarakïnwa: “Tatitur yuspagarapxam, jupax askiwa, munasiñapas Israel markapatakix wiñayatakiwa” sasa. Tatitun utap wasitat lurañ qalltasitapatsti markpachaw kusisiñat arnaqasis Tatitur yupaychapxäna. ¹² Tatitun nayrïr utap uñt’ir sacerdotenakatsa, levitanakatsa, wila masinakan jilïr jaqinakatsa, machaq uta lurañ qalltasipan jach’at jachapxäna. Ukapachasti waljaniw kusisiñat art’asipxarakïna. ¹³ Jaqinakan jachatanakapasa, kusisiñat jach’at arnaqasitanakapas mayakïnwa, jupanakax walpun arnaqasipxäna, uxutanakapas jayatpach ist’asirakïna.

¹ Judionakan uñisirinakapaxa, Babiloniar apatäkäna ukanakan kutt’anxasin Tatitun utap wasitat lurapxatap yatisinxa, ² Zorobabel chacharu, Josué chacharu, jilïr irpir judionakar jikxatiriw sarapxäna; jupanakarusti sapxänwa: —Tatitun utap lurañan yanapt’apxäma, nanakax jumanakjamarakiw pachpa Diosar yupaychapxta. Asiria markankir Esarhadón reyix aka chiqan jakañatak irpanipkitu uka urunakatpach wilañchanaksa luqtapxarakta —sasa. ³ Ukampis Zorobabel chachampi, Josué chachampi, maynïr jilïr irpir judionakampix ukxarux sapxänwa: —Janiw jumanakampi chik lurapkiristti. Nanak sapakiw Tatit Diosaxatakix utap lurapxä, Persiankir Ciro reyix ukham sapxarakitu —sasa. ⁴ Ukhamasti, uka tuqin jakir jaqinakax judionakar mayjt’ayapxänwa, Tatitun utap jan utachapxañapataki. ⁵ Ukat juk’ampi, mark apnaqirinakan yaqhip yanapirinakaparux qullq chilltapxäna, utachañ irnaqäwinak aynacht’ayañataki. Uksti, Ciro reyina, Darío reyin Persia mark apnaqäwi maranakapan ukham lurapxäna. ⁶ Asuero machaq reyix Persia mark apnaqañ qalltaskäna ukapachaxa, judionakan uñisirinakapax jupanakar juchañchañatakiw reyir mä qillqat luqtapxäna. ⁷ Uka qhipatsti, Artajerjes reyiw Persia mark apnaqarakïna. Apnaqäwip qalltkän ukkhaxa, Bislam, Mitrídates, Tabeel sat chachanakampi, mayni masinakapampixa, mä qillqat reyir qillqapxäna, uka qillqatasti arameo arut persa arur jaqukipatänwa. ⁸ Rehúm sat comandantempi, Simsai sat qillqirimpisti, mä qillqatarak judío jaqinakat jan wal parlas Artajerjes reyir apayapxäna. ⁹ Uka qillqatasti, Persia, Érec, Babilonia, Susa, uka markanakan apnaqirinakapana, taripirinakapana, yanapirinakapan sutinakapampi qillqantatänwa, ukhamaraki, kawkïr markanakarutix wali uñt’at jach’a Asnapar sat reyix uraqinakapat jaqunukuykatayna uka jach’a markanakan yanapirinakapan sutinakapampi qillqantatänwa. Uka markanakax Samaria markanakana, Éufrates jawirat inti jalant tuqin utjir uka suyunakan jakapxarakïna. Reyir apayat qillqatasti akham sänwa: “Artajerjes jach’a rey, Éufrates jawirat inti jalanta tuqin utjasir luqtirinakamaw aruntanipxtam: ¹² “Juma jach’a reyiruw yatiyañ munapxsma, kawkïri judionakatix Babilonia markat mistunisin Jerusalenar kuttanipki ukanakaxa, wasitat uka saykatasiri, jan wali markxa lurasipki. Jupanakax pirqanak sayt’ayañsa qalltxapxiwa, uta qalltanakap wasitat askichañsa. ¹³ Ukxarusti juma jach’a munañan reyirux yatiyanipxaraksmawa, uka markatix wasitat luratäxani, pirqanakapas sayt’ayatäxarakini ukkhaxa, janiw kuna impuestonaksa churañ munkxapxaniti, ukatsti reyin markapan utjir qullqipas aynacht’aniwa. ¹⁴ Nanakax juma jach’a munañan reyin luqtirinakamäpxtwa, janiw jumar ukham ñanqhachapxañap munapkiristti, ukat juma jach’a munañan reyir yatiyanipxsma, ¹⁵ ukhamat juma reyin nayra awkinakaman qillqatanakapax uñjatäñapataki. Juma reyisti uka qillqatanakan qhanañchaskiri jikxatäta, uka markan reyinakapatakisa, suyunakapatakis kutkatasiri, jan walt’ayir markätapa, uka markansti nayra pachanakanxa sayt’asiñanak utjayäna, ukat t’unjat uñjasirakïna. ¹⁶ Ukat juma jach’a munañan reyir yatiyapxsma, uka markatix wasitat sayt’ayatäni, pirqanakapas tukuyatarakïni ukaxa, juma reyix janiw apnaqäwiman Éufrates jawirat inti jalant tuqinkki uka markanakxarux munañanïkxasmati” sasa. ¹⁷ Ukatsti, Artajerjes reyix akham yatiyäwi apayarakïna: “Aruntanipxsmawa Rehúm comandanteru, Simsai qillqiriru, Samaria markan jakapki uka masinakaparu, Éufrates jawirat inti jalant tuqinkirinakaru, ukat ukxar utjir suyunakaru: ¹⁸ Kawkïr qillqattix jumanakax nayar apayanipkista ukxa, jaqukipat arun nayax ullarta, ¹⁹ ukanakxat yatxatayaraktwa. Uka markax nayra pachatpach yaqha reyinakar saykatirïtayna, jan walt’añanakas utjapunirïtaynawa. ²⁰ Ukatsti, Jerusalén markan ch’aman reyinakan utjatapas uñstarakiwa, uka reyinakax Éufrates jawirata inti jalant tuqin utjir markanakxar munañanïpxänwa, khitinakarutix impuestonaka, kuna churañanakatix wakt’ki ukanak churapxirïna. ²¹ Ukhamasti, uka marka wasitat lurañanakax suyt’ayatäpan nayan arsutax yatiyañkama. ²² Nayan arsutax jank’ak phuqhayapxam, apnaqäwixan jan aynacht’añapataki” sasa. ²³ Kunapachatix Artajerjes reyin qillqatap ullarapxäna ukkhaxa, ukspachaw Rehúm chachasa, Simsai qillqirisa, masinakapasa, Jerusalenar sarapxäna, ukatsti axsarayasaw judionakar munkir jan munkir lurañanak suyt’ayapxäna. ²⁴ Ukhamat Jerusalén markan Tatitun utap lurañax suyt’ayatäxäna, Persia markankir Darío reyin payïri mara apnaqäwipkama.

¹ Idó sat chachan yuqanakapa Hageo, Zacarías uka profetanakasti, kuntix Tatitut katuqapkäna uka yatiyäwinak Judá uraqinkiri, Jerusalén markankir judionakaruw yatiyapxäna. ² Uka yatiyäwinak ist’asasti, Zorobabel chachampi, Josué chachampix Tatitun utap wasitat lurañ qalltapxäna, profetanakasti jupanakarux yanapapxarakïnwa. ³ Ukampis Éufrates jawirat inti jalant tuqinkir suyun Tatenai apnaqiripampi, Setar-boznai chachampi, mayni masinakapampix Jerusalenar purisax judionakar akham jiskt’apxäna: “¿Khitis sapxtam aka uta wasitat lurayañataki, pirqanak sayt’ayañatakisa? ¿Kuna sutinïpxis aka ut lurayirinakaxa?” sasa. ⁵ Ukampis Tatituw lurañanak sarayir judionakarux imaskäna, ukhamasti lurasipkakïnwa, Darío reyir yatiyäwinak apayañkama, ukhamat jupan arup katuqañkama. ⁶ Darío reyir qillqat apayapkäna ukat qillqaqatasti akawa, uksti apayapxänwa, Éufrates jawirat inti jalant tuqinkir suyu apnaqir Tatenai chachampi, Setar-boznai chachampi, masinakapampi, khitinakatix Éufrates jawirat inti jalant tuqinkapki uka marka apnaqirin yanapirinakapamp kuna, ⁷ ukansti akham sänwa: “Darío rey, suma askin jikxatasiñam munasaw aruntanipxsma. Yatiyapxaraksmawa: nanakax Judá uraqiruw sarapxta, ukansti jach’a Diosan utap wasitat lurasipkir uñjapxta, ch’iyat jach’a qalanakamp luratawa. Jichhasti lawanakampiw pirqanakap apakipasipki, ukhamarus jank’akiw lurapxi, luratasti mäkiw sarantaraki. ⁹ Ukatsti, sarayapki uka judionakaruw nanakax jiskt’apxta, khitis jupanakar uka ut lurapxañapataki, pirqanaksa lawanakamp apakipañatak sapxpacha uk yatiñataki, ¹⁰ jupanakar sarayki uka jaqinakan sutinakapsa jiskt’apxaraktwa, ukhamat sutinakap qillqasin juma reyir yatiyaniñataki. ¹¹ Jupanakasti sapxituwa: ‘Nanakax taqi ch’aman Tatituruw yupaychapxta, kawkïr uttix wasitat lurapkta ukax nayra maranakan Israelan mä jach’a reyipaw taqpach luräna’ sasa. ¹² Sapxarakiwa: ‘Nayra awkinakaxaw alaxpachankir Tatitur phiñasiyapxatayna, ukat jupax Babiloniankir Nabucodonosor reyin amparapar jupanakar katuyäna, uka reyirakiw Tatitun uka utap t’unjatayna, ukatsti jaqinakaparux Babiloniaruw jaqunukurakitayna. ¹³ Uka qhipatsti Ciro reyix Babilonia marka nayrïr mara apnaqäwipan arsüna, Tatitun utapax wasitat luratäñapataki’ sasa. ¹⁴ “Sapxarakituwa: ‘Ciro reyix Babiloniankir templot kuntix Nabucodonosor reyix Jerusalenan Tatitun utapat Babiloniar apkatayna uka qurita, qullqit lurat yänak apsu. Ukanaksti jupax Judá marka apnaqir Sesbasar chacharuw katuyarakitayna. ¹⁵ Ciro reyisti Sesbasar chacharuw uka yänak Jerusalenan Tatitun utapar kutt’ayxañapataki sarakitayna, ukatsti pachpa chiqan Tatitun utapa wasitat lurañapataki. ¹⁶ Sesbasar chachax Jerusalenar purisinxa, Tatitun utapatak nayrïr qalap jaquntäna; jichhax ukkhatpach wasitat lurasiskaraki, ukampis janïraw tukuyatäkiti’ sasa. ¹⁷ “Jichhasti, juma reyitak askïchi ukax mayipxsmawa, Babiloniankir reyinakan qillqatanakapan thaqtayam, yatxatayarakim, Ciro reyix chiqpachapunit Jerusalenan Tatitun utap wasitat lurañatak arspachäna, jan ukax janicha uka, ukatsti uka tuqit juma reyix amtäwim yatiyanipxarakita” sasa.

¹ Darío reyisti qillqatanak thaqtapxañapatakiw arsüna, kawkhantix Babiloniankir qillqatanakapax imatäkäna ukana. ² Ukatsti, Media suyunkir Ecbatana markan utjir jach’a utan mä qillqata jikxatapxäna, uka qillqatansti, aka arunakaw utjäna: ³ “Persia markankir Ciro reyix nayrïr mara apnaqäwipan aka arunak arsüna: ‘Tatitun utapax Jerusalenan wasitat luraspan, ukan waxt’äwinakax luqtatäñapataki. Uka utasti sayt’urux pä tunk paqallqun metronïniwa, iram tuqirusti llätunk metroni, alay tuqirusti tunka kimsa chikatan metroniraki; ⁴ ukxarusti, jach’a qalanakat kimsa siqi luraspan, mä siqisti machaq lawata luratäpan. Taqi ukanakasti reyin qullqipamp alatäniwa. ⁵ Ukatsti, kawkïr qurita, qullqit lurata yänaktix Nabucodonosor reyix Jerusalenan Diosan utapat Babiloniar apankäna uka yänakax kutt’ayatäxpan. Uka yänakasti Tatitun utapan kawkhankirïkitix ukkhar uchatäxarakpan’ ” sasa. ⁶ Ukatsti Darío reyix Éufrates jawirat inti jalant tuqinkir suyun Tatenai apnaqiriparu, Setar-boznai chacharu, maynïr jilïrinakampirux akham iwxarakïna: “Jerusalén markat mistupxam, ⁷ judionakan apnaqiripampiru, sarayirinakapampir jan jark’xäsipxamti, Diosan utap wasitat lurapxpan. ⁸ Nayan arsüwixax akawa: judionakan sarayirinakapar yanapt’añatakisa, uka luräwin jan sayantañapatakisa, kuna impuestonaktix reyix Éufrates jawirat inti jalant tuqinkir suyut katuqki ukanakxa, wakisitapar churatäpan. ⁹ Ukatsti sapürurak jan armasis Jerusalenankir sacerdotenakar churaspan, vaca qallunakäpasa, mä maran ovejanakäpasa, jan ukax trigöpasa, jayüpasa, vinöpasa, aceitëpas jupanakan mayitanakaparjama, alaxpachankir Diosar nakt’at luqtäwinak luqtapxañapataki. ¹⁰ Uka waxt’äwinakax alaxpachankir Diosan chuymapar purt’kirïñapawa, ukhamaraki nayan jakäwixatakisa, wawanakaxatakis mayipxpan. ¹¹ “Arsuraktwa, khititix aka arsüwixar jan ist’kanixa, utapat mä viga lawa apaqasin ukar warkkatatäpan; utapasti q’ala tukjatarakïpan. ¹² ¡Diosay t’unjpan kawkïr reyitix, jan ukax kawkïr markatix aka arsüwi jan jayskani, ukhamaraki Diosan utap t’unjañsa yankarakini ukaruxa! Naya Darío reyiw aka arunak arsta. Qillqatarjam phuqhaspan” sasa. ¹³ Ukatsti, Éufrates jawirat inti jalant tuqi suyun apnaqiripasa, Tatenai ukasa, Setar-boznai chachasa, masinakapas Darío reyin arsutaparjamaw phuqhapxäna. ¹⁴ Judionakan sarayirinakapasti Hageo, Zacarías uka profetanakan ch’amañcht’atax irnaqäwinak lurasipkakïnwa. Israelan Tatitun arsutaparjamaw wasitat pirq lurañax tukuyasïna, ukhamaraki Persia markankir Ciro, Darío, Artajerjes uka reyinakan arsüwinakaparjama. ¹⁵ Tatitun utap lurañasti tukuyatäxänwa, Adar phaxsita, kimsa uru saraqataru, Darío reyix Persia marka suxta mara apnaqaskäna ukapacha. ¹⁶ Ukatsti kusisiñampiw Tatitun utap luqtapxäna, israelitanakasa, sacerdotenakasa, levitanakasa, ukhamarak khitinakatix jaya markar apanukut uñjasipkatayna ukanakasa. ¹⁷ Ukürusti, wilañcha luqtapxäna: patak vaca qallunaka, pä patak khariñ ovejanaka, pusi patak mä maran ovejanaka, ukxarusti, tunka payan chivonaka, israelitanakan sapa ayllunakapatxa mayakama, Israel markpacha juchanakapat pampachat uñjasiñataki. ¹⁸ Ukxarusti sacerdotenakampiru, yanapirinakapampirux lurañanakaparuw uchapxäna, kunjämtix Moisesax Jerusalenan Tatitur yupaychañataki yatichkatayna ukarjama. ¹⁹ Ukatsti, khitinakatix jayar apayatat kutt’anipkatayna ukanakax Pascua uruyäwi amtapxäna, Abib sat qallta phaxsita tunka pusin uru saraqataru. ²⁰ Sacerdotenakasa, levitanakasa kamachinakarjam taqiniw q’umachasipxäna. Ukxarusti, Pascua wilañcha luqtapxarakïna, Babiloniat kuttanirinakata, yaqha sacerdote masinakapata, ukhamarak jupanak pachpatsa. ²¹ Pascuan manq’añäki uka manq’atxa, Babiloniat kutt’anir judionakaw manq’apxäna, ukhamaraki khitinakatix ukan jakapkäna, jucharar markan jan wali luräwinakap apanukunipkatayna ukanakamp chika. Israel markan chiqpach Tatitupar taqiniw yupaychapxäna. ²² Paqallq uruw jan levaduran t’ant’a manq’añ phunchhäwi, kusisiñamp uruyapxäna, Tatituw jupanakarux kusisiñamp phuqt’atayna, Persia markankir reyin aski luratapata, Israelankir Tatitun utap wasitat lurañanakan yanapt’asitap layku.

¹ Uka qhipa maranakatsti, Artajerjes reyin Persia mark apnaqäwipana, mä chachaw Jerusalén markar purïna, Esdras sata, jupasti Aarón chachat saraqirïnwa, Israelan nayrïr sacerdoteparakïnwa. Jupan nayra awkinakapax akanakänwa: Seraías, Azarías, Hilquías, ² Salum, Sadoc, Ahitub, ³ Amarías, Azarías, Meraiot, ⁴ Zeraías, Uzí, Buquí, ⁵ Abisúa, Finees, Eleazar, ukanaka. ⁶ Esdrasax mä sacerdotënwa, Diosax Moisés tuqi kamachinakap churkatayna ukanak sum uñt’ir yatichirirakïnwa; uka kamachinak yatxatapunïnwa, ukarus jaysarakïnwa, ukatsti judionakaruw yatichäna. Tatituw Esdrasarux yanapaskäna, kunanaktix jupax maykäna ukanak Artajerjes reyix churäna. Ukhamat Esdrasax Babilonia markat ⁷ Jerusalenar mä tama israelitanakamp kutt’anïna, uka tamansti: sacerdotenaka, levitanaka, q’uchurinaka, punku uñjirinaka, ukhamarak Tatitun utapan yanapasirinakaw utjäna, ukasti Artajerjes reyin paqallq mara marka apnaqäwipan lurasïna. ⁸ Esdrasax Tatitun khuyapayasiñapampi, yanapapampixa Artajerjes reyin paqallq mara marka apnaqäwipana, qallta phaxsita mä uru saraqataruw Babilonia markat mistunïna, ukatsti, uka pachpa marana, phisqïr phaxsita mä uru saraqataruw Jerusalén markar purxäna. ¹⁰ Esdrasax taqi chuymaw Tatitun kamachipxat yatxataña, ukhamarjam phuqhañsa amtasïna, ukatsti israelit jaqinakar Tatitun kamachinakapa, arsüwinakap yatichañaraki. ¹¹ Akax Artajerjes reyin Esdrasar churat qillqaqatawa, jupax sacerdote, ukhamaraki Israel markar Tatitun churata kamachi arunakapa, kamachinakapa suma yatirirakïnwa; uka qillqaqatasti akhamänwa: ¹² “Artajerjes jach’a reyix taqi ch’aman Tatitun kamachip yatichir Esdras sacerdoteruw arunti. ¹³ “Nayax arstwa, kawkïr judiotix markaxankki, ukatsti jumamp chik Jerusalenar sarxañ munchi ukax sarxpan, levitäpasa, sacerdotëpasa. ¹⁴ Jumarusti, nayampi paqallqu amuyt’ayirinakaxampiw Jerusalenar khithapxsma, Judá uraqina, Jerusalenan kunjämäskis uk uñjañamataki, kunjämäkitix Tatituman kamachipax ukhamarjama. ¹⁵ Jumasti kuntix nayampi, amuyt’ayirinakaxamp Jerusalenan jakir Israelan Diosapar churapkta uka quri, qullqi apawayam, ¹⁶ ukhamaraki, qawqhtix qullqi, quri Babilonia suyun apthapirjamäkäta uksa, sacerdotenakasa, markankir jaqinakas churäwinakap Tatitun utapatak chuymanakapatjam churapkätam ukanaksa apawayarakim. ¹⁷ Uka qullqimpisti vaca qallunaka, khariñ ovejanaka, mä maran ovejanak aläta, ukhamaraki, trigompi, vinompi, Tatitun utapan altar patxan luqtañataki. ¹⁸ Ukat ukxar quri, qullqi jilt’ampixa, kunjämaruy wakischini ukarjam uñjapxam, Tatitun munañaparjama. ¹⁹ Ukampis Tatitun utapan yupaychañatak yänak katuyatäkta ukanakxa, juma pachpaw Tatitur katuyxäta. ²⁰ “Taqi kunanaktix Tatituman utapatak wakiskani ukanakxa, reyin qullqipamp alatäniwa. ²¹ Naya Artajerjes reyix Éufrates jawirat inti jalant tuqinkir qullqi katurinakaruw arsta: ‘Taqi ch’aman Tatitun kamachip uñt’iri, yatichir Esdras sacerdotetix kuns mayipxätamxa, jan pist’ayas churapxam. ²² Jupax mayipxätamwa, kimsa waranqa kimsa patakan kilo qullqi, tunka waranqa kilo trigo, pä waranqa pä patakan litro vino, pä waranqa pä patakan litro aceite, ukatsti qawqha jayu maykani uk churapxam. ²³ “Taqi kuntix alaxpachankir Tatitux utapatak maykani ukanakax ukspach churatäñapawa, jan kuna mutuyäwis markxaru, reyxaru, wawanakapxaru jutañapataki. ²⁴ Yatipxañamarakiwa, janiw wakiskiti kuna impuestonaka, churäwinak mayipxañamasa taqi sacerdotenakaru, levitanakaru, q’uchurinakaru, punku uñjirinakaru, templon yanapirinakarusa. ²⁵ “Esdras, jumarusti saraksmawa, Tatitumaw jumar yatiñ kankañ churtam. Uka yatiñ kankañamamp marka apnaqirinakampi, taripirinakamp utt’ayam, jupanakax Tatituman kamachinakap uñt’apxañapawa, Éufrates jawirat inti jalanta tuqinkir suyun utjasir jaqinakar chiqa kankañamp apnaqapxañapataki; kamachinak jan uñt’ir judionakarux yaticharakim. ²⁶ Khititix Tatituman kamachipar jan jayskani, ukhamarak reyin arsüwiparus jan phuqkani ukanakaxa, jiwañapatak juchañchatäpan, markapatsa jaqunukutäpan, jan ukax qullqi churpan, jan ukax carcelar uchantatäpan.” ²⁷ Uka qillqat ullarasinsti Esdrasax akham sänwa: “Awkinakasan Tatit Diosapax yupaychatäpan, reyir ch’amañchatapata, Jerusalenan Tatitun utapar jach’añchatapata, ²⁸ nayaru reyi nayraqatana, wali aytat jaqinak nayraqatana, amuyt’ayirinakapan nayraqatansa khuyapayasiñap uñacht’ayatapata; nayarux ch’amañcharakituwa, jupan yanapapampisti wali aytat israelit jaqinak tantachta nayamp chik kutt’anipxañapataki” sasa.

¹ Artajerjes reyin marka apnaqäwipan Babilonia markat Esdrasamp chik kutt’anipkäna uka wila masinakan jilïrinakapan sutinakapax akanakawa: ² Finees wila masit saraqir Guersón; Itamar wila masit saraqir Daniel; David wila masit saraqir Hatús; Parós wila masit saraqir Zacarías, jupamp chikasti patak phisqa tunka chachanakan sutinakapaw qillqatäna. ⁴ Pahat-moab wila masit saraqir Eliehoenai, jupamp chikasti pä patak chachanaka; ⁵ Zatú wila masit saraqir Secanías, jupamp chikasti kimsa patak chachanaka; ⁶ Adín wila masit saraqir Ébed, jupamp chikasti phisqa tunkan chachanaka; ⁷ Elam wila masit saraqir Isaías, jupamp chikasti paqallq tunkan chachanaka; ⁸ Sefatías wila masit saraqir Zebadías, jupamp chikasti kimsaqallq tunkan chachanaka; ⁹ Joab wila masit saraqir Abdías, jupamp chikasti pä pataka tunka kimsaqallqun chachanaka; ¹⁰ Baní wila masit saraqir Selomit, jupamp chikasti pataka suxta tunkan chachanaka; ¹¹ Bebai wila masit saraqir Zacarías, jupamp chikasti pä tunk kimsaqallqun chachanaka; ¹² Azgad wila masit saraqir Johanán, jupamp chikasti patak tunkan chachanaka; ¹³ Adonicam wila masit saraqir Elifélet, Jeiel, Semaías, jupanakamp chikasti suxta tunka chachanakaw qhipar purinipxäna. ¹⁴ Bigvai wila masit saraqir Utai, Zabud, jupanakamp chikasti paqallq tunka chachanakaw purinipxäna. ¹⁵ Naya Esdrasax Ahavá jawirar jikxatki uka jawir lakxan taqi jupanakar tantachthapta, ukawjan kimsa uruw utjnuqtapxarakta. Ukatsti, jaqinakampiru, sacerdotenakampir sutipatkam jawskäyäta ukkhasti, ukanak taypin janiw mayni levitarus jikxatkti. ¹⁶ Ukatwa Eliézer, Ariel, Semaías, Elnatán, Jarib, Elnatán, Natán, Zacarías, Mesulam uka aytat jilïrinakar khitta, ukhamarak Joiarib, Elnatán yatichirinakaru, ¹⁷ Casifiá sat chiqan Idó sat jilïripar tumpanipxañapataki; ukatsti jupampiru, masinakapampiru mayipxañapataki, Tatitusan utapan yanapasir jaqinak khithanipxañapataki. ¹⁸ Tatitusti yuspagaratäpan, Serebías wali q’apha chacharuw irpanipxäna, wawanakapampiru, jilanakapampir kuna; jupax Mahli sat mä Levitat saraqirïnwa, taqpachanix tunka kimsaqallqunïnwa. ¹⁹ Ukxarusti, Merarí wila masit saraqir Hasabiasaru, Isaiasaru, yuqanakapampiru, jilanakapampiruw khithanipxarakitu, taqpachanix pä tunkanïnwa. ²⁰ Ukhamarus jupanakxarux pä patak pä tunkan jaqinaka, Tatitun utapan yanapasirinak khithanipxitu, jupanakan nayra awkinakapax Davidan utt’ayatänwa, sacerdotenakan yanapirinakapar yanapt’añataki. Ukatsti, sapa maynin sutinakapaw qillqantasïna. ²¹ Uka qhipatsti, Ahavá sat jawir jak’an tantacht’asipxta, ukawjansti, mä ayuno lurañatakiw arsurakta, ukhamat Tatitun nayraqatapan alt’at chuymamp juchanakax uñt’asiñataki, ukhamarak nanakar sumaki irpañapataki, wila masinakaxarusa, nanakan yänakaxarus Jerusalenar puriñkam imañapataki. ²² Nayax p’inqasiyätwa reyit caballería soldadonak mayiña, nanakar thakhin uñisirinakat imañapataki, nanakax reyirux sapxayätwa: “Diosax imiwa taqi khitinakatix jupar thaqhapki ukanakaruxa, ukampis jupar apanukupki ukanakarux jach’a phiñasiñapampiw mutuyi” sasa. ²³ Ukhamasti ayuno lurapxta, taqi ukanakat nanakar imañapatakiw Tatitur achikt’asipxta, jupasti ist’apxituwa. ²⁴ Ukxarusti aytat jilïr sacerdotenakat tunka payaniruw yaqhachta: Serebías, Hasabías ukanakaru, jupanakan tunka masinakapampiru. ²⁵ Ukatsti qullqimpi, qurimpxa, tupt’asaw churta, ukhamaraki kawkïr yänaktix reyisa, amuyt’ayirinakapasa, ukan jikxatasir taqi israelitanakas Tatitun utapatak churapkitäna ukanaksa. Taqi ukanak sacerdotenakaruw katuyxayäta, ²⁶ ukanakasti akanakawa: Pä tunk mayan waranqa pusi patak phisqa tunkan kilo qullqi, qullqit lurat patak yänaka, ukhamarak kimsa waranqa kimsa patakan kilo quri; ²⁷ ukxarusti kimsaqallqu kiloni qurit lurat pä tunka qirunaka, ukhamarak broncet suma lurat pä yänaka, uka yänakasti qurïkaspas ukham wali jila alanïnwa. ²⁸ Ukatsti, jupanakarux sistwa: “Jumanakax Tatitur luqtatäpxtawa, uka yänakas Tatitur luqtatarakiwa. Qullqimpi, qurimpix nayra awkinakasan Diosapatakiwa. ²⁹ Sum uñjapxam, Jerusalenan Tatitun utapar puriyañkama, ukan sacerdotenak nayraqatana, yanapirinakap nayraqatana, Israelan wila masinakap nayraqatan tupt’atäñapataki” sasa. ³⁰ Ukatsti sacerdotenakaxa, yanapirinakapasa uka qullqi, quri, ukhamarak yänak tupt’apkäna ukanak katuqapxäna, ukatsti Jerusalenankir Diosan utaparuw apxapxäna. ³¹ Abib sat qallta phaxsina, tunka payan uru saraqataruw Ahavá jawirat Jerusalén marka tuqir sartanxapxta. Tatitusaw thakhin uñisirinakata, lunthatanakatsa imapxitu. ³² Jerusalén markar purisax kimsa uruw samarapxta. ³³ Pusïri urunsti Tatitusan utaparuw sarapxta, ukan qullqimpi, qurimpi, yänakampi tupt’apxta, ukatsti Uriasan yuqapa Meremot sacerdoteruw taqpach katuyxapxta. Ukankapxarakïnwa Finees chachan Eleazar yuqapa, Leví wila masit saraqir Josué chachan Jozabad yuqapa, ukhamarak Binuy chachan Noadías yuqapasa. ³⁴ Uka pachpa uruw uka yänakax taqpach tupt’atäxäna, jakhutäxäna, ukatsti qillqantatäxarakïnwa. ³⁵ Uka qhipatsti, Babilonia markat kuttanipkatayna ukanakaxa, tunka payan vaca qallunaka, llätunk tunka suxtan khariñ ovejanaka, paqallq tunka paqallqun mä maran ovejanaka, tunka payan chivonaka apanipxäna, israelitanakan sutipxaru nakt’at luqtäwinaka Israelan Tatitupar luqtatäñapataki. Tatitur jach’añchasaw uka uywanak nakt’ayapxäna. ³⁶ Ukatsti, reyin arsüwip qillqat katuyapxarakïna, Éufrates jawirat inti jalanta tuqinkir suyun jilïr apnaqirinakaparu, jupanakasti: “Walikiwa” sasaw markarusa, Tatitun utaparus yanapapxäna.

¹ Ukanak tukt’ayatarusti, marka apnaqir jilïrinakax nayar jak’achasisin sapxitu: “Esdras, yatiyañ munapxsma; israelitanakasa, sacerdotenakasa, levita jaqinakasa, janiw aka markankir jaqinakat yaqhachat jakapkiti: cananeonakata, hititanakata, ferezeonakata, jebuseonakata, amonitanakata, moabitanakata, egipcionakata, amorreonakatsa, ukanakan axtkañ idolonakar luqtas sarnaqäwinakapatxa. ² Jupanakasa, yuqanakapasa uka markankirinakan phuchhanakapampiw jaqichasipxi; ukhamasti Tatitun markapax yaqha markanakankir jaqinakampiw mayachasxapxi. Nayraqatax jilïrinakampi, marka apnaqirinakampiw juch lurapxi” sasa. ³ Uka arunak ist’asinsti, chuyma ust’ataw isix ch’iyanuqasta, ñik’utaxsa, sunkhaxsa mitharasirakta, wali llakt’at jikxatasisaw uraqir qunt’asta. ⁴ Jayp’thapiñkamaw ukham jikxatasiskäyäta. Nayamp chik kutt’anirinakasti naya jak’ankapxänwa, jupanakax uka israelitanakan juchanakap layku kuna mutuyäwtix Tatitux apayankani uk axsarapxäna. ⁵ Ukatsti, jayp’u tuqir wilañcha luqtañäki ukkhaw llakisiñaxat kutitatta. Ch’iyanuqat isinpachaw Tatituxan nayraqatapan qunqurt’asta, amparanakax luqtasaw ⁶ jupar sarakta: “Tatituxay, Tatituxay, nayax wali p’inqasitätwa, chuymaw chhaqtarakitu, janiw kunjämsa jumamp parlirjamäkti. Nanakan jucha luratanakaxax sintipuniw utjapxitu, juchanakaxas alaxpachkamarakiw puri. ⁷ Khä urunakatpach jichhakamaw wali jucha lurañan jakapxta. Juchanakax laykuw nanakasa, reyinakaxasa, sacerdotenakaxas yaqha markanakankir reyinakan munañanakapar katuyat jikxatasipxta. Ukatxa chhuxriñchjata, jayar apanukuta, lunthatjata, jisk’achjata jikxatasipxäyäta, jichhasti uka pachpa luräwiruw puripxarakta. ⁸ Ukampis jichhax nanakan Tatit Diosaxay, juman khuyapayasiñamat nanakat mä tamax antutat jikxatasi, ukhamat nanakatak yaqhacharapipkista uka uraqin jan kuna llakin jakañataki; jumaw machaq qhana jakañanakaxaru churapxista, t’aqhisiñanakax taypin mä juk’a samarañ churapxarakista. ⁹ Nanakax t’aqhisiyatäpkta ukasa, janiw jumax t’aqhisïwixan apanukupkistati; Persia markankir reyinak tuqiw khuyapayasiñam uñacht’ayapxista, pampar tukut utam wasitat sayt’ayapxañaxatakiw jakañ churapxista, ¡Judá uraqina, Jerusalén markansa imapxarakistawa! ¹⁰ “Ukampis jichhax nanakan Diosaxay, taqi jan wali luratanakaxat ¿kamsapxiristsa? Nanakax janiw juman arsüwinakam ¹¹ jumar luqtir profetanakam tuqi churapkista ukanakarux phuqhapkti. Jumasti nanakarux iwxapxistawa, kawkïr uraqirutix katuntañatak mantapkäyäta ukaxa, uka chiqankiri jaqinakan ñanqha lurañanakapampi phuqhantat uñjasitapa, jupanakan axtkañ luräwinakapamp phuqhantatätapa. ¹² Sapxarakistawa, phuchhanakaxax uka jaqinakan yuqanakapamp jan jaqichasipxañapataki, janirak jupanakan phuchhanakapas yuqanakaxamp jaqichasipxañapataki. Janipun kunapachas uka jaqinakan samarañanakapsa, sumankañapsa munañanakaxa, ukhamata nanakax ch’aman sarantañataki, aka uraqin utjir suma achunakapat manq’asiñataki, kusisit jakañatakiraki, ukatsti wawanakaxampiru, allchhinakaxampir tutipäkaspas ukham wiñayatak jaytañataki. ¹³ “Nanakan juchachasitanakaxata, ñanqha luräwinakaxat taqi uka jan walt’añanakarux puripxta. Nanakan Tatituxay, janiw juchanakaxatjam mutuyapkistati, jan ukasti, jan kuna llakin sarnaqasiñak churapxistaxa, ¹⁴ ¿wasitampit kamachi arunakam p’akintapxirista, ukatsti axtkañ saräwini warminakapampit jaqichasipxirista? Janiw ukhamäkaspati, ¿Janit jumasti nanakar q’al tukjañkam phiñaskasmasti? ¹⁵ “¡Tatay, Israel markan Tatit Diosapa, jumax chiqaparuw uñjapxista! Jumarakiw wakt’ayarakta nanak taypit mä tama qhispiyasina jakañapsa, kunjämatix jichhürux uñjapkta ukhama. Nanakasti chiqpachan juma nayraqatan wali juchanïpxtwa; jumar jak’achasiñatakis janiw askïpkti” sasa.

¹ Esdras sacerdotex killt’ataw Tatitun utapan markan juchanakap jacht’asis arsuskäna, ukchañkamasti walja chachanaka, warminaka, wawanakaw tantachasïna, wali jacht’asisarakiw jupar muyuntapxäna. ² Ukatsti, Elam wila masinkir Jehiel chachan Secanías yuqapaw Esdrasar parlxayäna akham sasa: “Nanakax janiw chiqa chuymamp Tatitusar arkapkti, kunayman diosanakar luqtir yaqha markanakankir warminakampiw jaqichasipxta; ukampis Israel markatakix suyt’añax utjaskiwa. ³ Jichhasti nanakax uka yaqha markankir warminakaxaru, wawanakapamppachar jaqunukxañatakiw arsupxä, kamachix phuqhaspan, kunjämtix jumasa, Tatitun kamachi arunakap jaysirinakas iwxt’apkitu ukarjama. ⁴ Sayt’asim, ak lurañax jumaruw wakt’tam; nanakasti yanapapxämawa. ¡Ch’amañcht’asim!” sasa. ⁵ Esdrasasti sayt’asïnwa, ukatsti sacerdotenakana, levitanakan jilïrinakaparu, ukhamarak taqpach israelitanakaruw arsutanakap phuqhapxañapatak juramento lurayäna, jupanakasti ukham lurañatakiw arsupxarakïna. ⁶ Ukxarusti Esdrasax Tatitun utapat mistuwayxäna, Eliasib chachan Johanán yuqapan utaparuw sarxäna, ukansti uka arumax jan manq’ata, jan umt’ataw qhantatïna, jupax wali llakitapunïnwa, Babilonia markat kutt’anir jaqinakan jan jaysasirïpxatap layku. ⁷ Ukxarusti Judá uraqina, Jerusalén markan taqiniruw yatiyasïna, khitinakatix Babilonia markat kutt’anipkatayna ukanakan Jerusalén markan tantachasipxañapataki. ⁸ Khitinakatix kimsa urukam jan purinipkaspa ukanakaruxa, jilïrinakana, amuyt’ayirinakan amtataparjamaxa, kutt’anirinakan tamapat jaqunukuta, uraqinakapas apaqataw uñjasipxaspa. ⁹ Ukatsti Judá, Benjamín uka uraqinakankir taqi jaqinakaw Jerusalén markan tantachasipxäna, llätunkïr phaxsita pä tunka uru saraqataru, kimsa uru phuqhatarupuni. Jupanakasti taqiniw Tatitun utapan utjkäna uka plazan khathatt’asis qunt’asipxäna, uka arunak yatisina, ukhamarak jallun purintatapata. ¹⁰ Ukatsti Esdras sacerdotex sayt’asisin jupanakaruw säna: —Jumanakax yaqha diosanakar yupaychir warminakamp jaqichasisaw juch lurapxtaxa, ukhamat Israel markasan juchap jilxatayapxtaxa. ¹¹ Ukhamasti awkinakaman Tatit Diosap nayraqatan juchanïpxatam uñt’asipxam, Tatitun munañap phuqhapxarakim. Yaqha diosanakar yupaychir jaqinakatsa, anqa markanakankir warminakatsa jithiqtapxam —sasa. ¹² Ukxarusti jaqinakax taqiniw jach’at arsupxäna: —Walikiwa, kuntix jumax sapkitäta uk lurapxäwa. ¹³ Ukampis nanakax waljanïpxtwa, ukhamarus jalluskakiwa; janiw anqan qhiparapkiristti; uka lurañax janiw mä urutakiki, pä urutakïkisa, uka juch luririnakax waljanïpxtwa. ¹⁴ Jilïrinakaxana akanak askichañatak nanak lanti Jerusalenan qhiparapxañapax askïspawa, ukatsti khitinakatix yaqha markanakankir warminakamp jaqichasipki ukanakax markapankir jilïrinakapampi, taripirinakapamp chikt’ataw mä uru jutapxañapa. Ukhamat uka jucha layku Diosan jach’a phiñasiñapax jiwasat apaqtañapkama —sasa. ¹⁵ Ukatsti jaya markat kuttanirinakax “Walikiw” sapxänwa, ukampis Asael chachan Jonatán yuqapaxa, Ticvá chachan Jahazías yuqapasa, janiw kamsapkänsa, ukatsti Leví wila masinkir Mesulam chachampi Sabtai chachampix jupanakaruw jaqkattapxäna. Esdras sacerdotesti wila masinkirinakat yaqhip jilïrinakapar ajllisinxa, sapa mayni jaqin juchap yatxatapxañapatakiw utt’ayäna. Ajllitanakasti lurañanakap qalltapxäna Tébet sat tunkïri phaxsina, qallta uru saraqataru. ¹⁷ Ukat qhipa marana, Abib qallta phaxsita, qallta uru saraqataruw yaqha markanakankir warminakamp jaqichasirinakar taripañ tukuyxapxäna. ¹⁸ Sacerdotenakat yaqha markanakankir warminakamp jaqichasirinakax akanakänwa: Josadac chachan Josué yuqapan wawanakapa, ukhamarak wila masinakapata Maaseías, Eliézer, Jarib, Guedalías, ¹⁹ jupanakasti taqi chuymaw warminakapar khithanukxañatak arsupxäna, ukatsti mä oveja uchapxäna juchanakapat waxt’äwi luqtañataki. ²⁰ Imer chachan wawanakapatsti: Hananí, Zebadías ukanaka. ²¹ Harim chachan wawanakapatsti: Maaseías, Elías, Semaías, Jehiel, Ozías ukanaka. ²² Pashur chachan wawanakapatsti: Elioenai, Maaseías, Ismael, Natanael, Jozabad, Elasá ukanaka. ²³ Levitanakan wawanakapatsti: Jozabad, Simí, Petahías, Judá, Eliézer, Quelaías ukanaka, jupax Quelitá sutimp uñt’atarakïnwa. ²⁴ Q’uchurinakatsti: Eliasib ukaraki. Punku uñjirinakatsti: Salum, Télem, Urí ukanaka. ²⁵ Ukat ukxar utjir israelitanakat yaqha markankir warminakamp jaqichasirinakax utjarakïnwa, jupanakasti akanakänwa: Parós chachan wawanakapata: Ramías, Jezías, Malquías, Mijamín, Eleazar, Malquías, Benaías ukanaka. ²⁶ Elam chachan wawanakapatxa: Matanías, Zacarías, Jehiel, Abdí, Jeremot, Elías ukanaka. ²⁷ Zatú chachan wawanakapatsti: Elioenai, Eliasib, Matanías, Jeremot, Zabad, Azizá ukanaka. ²⁸ Bebai chachan wawanakapatxa: Johanán, Hananías, Zabai, Atlai ukanaka. ²⁹ Baní chachan wawanakapatsti: Mesulam, Maluc, Adaías, Jasub, Seal, Ramot ukanaka. ³⁰ Pahat-moab chachan wawanakapatxa: Adná, Quelal, Benaías, Maaseías, Matanías, Besalel, Binuy, Manasés ukanaka. ³¹ Harim chachan wawanakapatsti: Eliézer, Isías, Malquías, Semaías, Simeón, ³² Benjamín, Maluc, Semarías ukanaka. ³³ Hasum chachan wawanakapatxa: Matenai, Matatá, Zabad, Elifélet, Jeremai, Manasés, Simí ukanaka. ³⁴ Baní chachan wawanakapatsti: Madai, Amram, Uel, ³⁵ Benaías, Bedías, Queluhu, ³⁶ Vanías, Meremot, Eliasib, ³⁷ Matanías, Matenai, Jaasai ukanaka. ³⁸ Binuy chachan wawanakapatxa: Simí, ³⁹ Selemías, Natán, Adaías, ⁴⁰ Macnadbai, Sasai, Sarai, ⁴¹ Azarel, Selemías, Semarías, ⁴² Salum, Amarías, José ukanaka. ⁴³ Nebo chachan wawanakapatsti: Jeiel, Matatías, Zabad, Zebiná, Jadau, Joel, Benaías ukanakaraki. ⁴⁴ Taqi uka chachanakaw yaqha markankir warminakamp jaqichasipxatayna, ukampis jupanakax warminakaparusa, wawanakaparus khithanukxapxänwa.