EFESIOS

EFESIOS

¹ Éfeso iglesiankir munat jilatanaka, kullakanaka: Jumanakaruw aruntanipxsma, Diosan aski markapankirinakaru, Jesucristor iyawsapkta, jupampi mayar tukt’as jakapkta uka jilatanakaru. Naya, Pablox Diosan munañapat Jesucriston apostolupätxa. ² Jiwasan Dios Awkisay jumanakarux munasiñapampi, sumankañapampi churpan. ³ Jesucristo Tatitusan Dios Awkipax jach’añchatäpan, Cristonkatas laykux jupaw alaxpachat ajay waxt’äwinak churanistu. ⁴ Diosax Cristo tuqiw ajllisistu, aka uraqix janïr utjkän ukkhatpacha, ukhamat q’umachata, jan akch’a q’añuni jupan nayraqatapankañasataki. Munasiñap laykuw, ⁵ jupax nayratpach ajllisiwayistu, Jesucristo tuqi wawanakapat katuqatäñasataki, kunjämäkitix amtäwipax ukhamarjama. ⁶ Diosan muspharkañ khuyapayasiñapat jach’añchañasataki, uka pachpa khuyapayasiñapampiw munat Wawap tuqi askinak waxt’istu. ⁷ Criston wila wartatap tuqiw juchanakat qhispitäñasa, pampachatäñas utjistu. Diosasti phullch’irkir khuyapayasiñap jiwasatak utjayi, taqi yatiñ kankaña, amuyt’a kankañ jiwasar churasa, ⁹ ukatsti jan amuyt’kañ amtäwipat uñt’ayistu. Jupax khuyapayasiñapan amtatayna, Cristo tuqi uka amtäwip lurañataki. ¹⁰ Uka amtäwiparjamaw Diosax phuqhani kunapachatix uka urux purkani ukkhaxa, jupasti taqi kun mayachthapini, alaxpachansa aka uraqinsa, Criston munañapankañapataki. ¹¹ Cristo tuqiw Diosax qalltatpach ajllisiwayistu, ukhamat waxt’äwip katuqañasataki, pachpa Diosan amtäwiparjama, taqi ukanak munañaparjamaw luri. ¹² Jupasti jiwasanakan nayrïrïñas muni, Criston suyt’äwi tuqi jakañasataki, ukhamat taqpachani muspharkañ ch’amapat jach’añchañasataki. ¹³ Cristonkasaw jumanakax suma yatiyäwin chiqpach arunakap ist’apxtaxa, qhispiyasiñ suma arupa, iyawsañat katxarusipxtaxa, ukatsti Cristox arsuwaykistu uka Qullan Ajay katuqapxaraktaxa. ¹⁴ Qullan Ajayuwa jiwasanakan arxatirisaxa, Diosax waxt’äwip jiwasar churkistani uk katuqañasataki, uksti kunapachatix jupankirinakan qhispiyasiñapax phuqhatäxani ukkhaw katuqañäni, taqpachani jupan jach’a muspharkañ ch’amapat jach’añchañasataki. ¹⁵ Ukalayku, Jesucristo Tatitur jumanakan iyawsapxatam yatisina, qullan markankirinakatak munasiñanïpxatamat ist’asaxa, ¹⁶ jumanakat Diosar yuspagarañ janiw armaskti, janirakiw jumanakatak mayiñsa armaskti. ¹⁷ Tatit Jesucristosan muspharkañ Dios Awkiparuw mayta, ajay tuqin yatiñ kankañ jumanakar churañapataki, Diosan uñacht’äwip sum amuyapxañamataki, jupar juk’amp uñt’apxañamataki. ¹⁸ Jumanakan amuyunakam qhanjtayañapatakiw Diosarux mayirakta, kuna suyt’äwirutix jawskistu uk yatipxañamataki, kunja muspharkaña, jilarkir waxt’äwtix Diosax qullan markapankirinakar churki uk yatipxañamatakiraki, ¹⁹ ch’amapax kunja jach’asa, jan tukuskirisa, uka ch’amaw Cristor iyawsirinakarux ch’amañchaskistu. Aka ch’amasti Diosax taqi ch’amapampi uñacht’aykän uka pachpawa, ²⁰ kunapachatix Cristor jiwatat jaktayki ukapacha, ukatsti alaxpachan jupan kupïxapar qunt’ayki ukapacha, ²¹ taqi munañaninakxar utt’ayasa, jilïrinakxaru, marka apnaqirinakxaru, taqi kunatix jichhürunakansa, qhipa urunakansa utjkani ukanakxaru. ²² Taqi kunsa Criston munañanïñaparuw utt’ayi, pachpa Cristoruw iglesian p’iqipat uchawayi. ²³ Ukhamasti iglesiax Criston janchipar uñtatawa, iglesiax Cristot aski kankañap katuqi, Cristox taqi kun phuqt’araki.

¹ Jumanakax nayrax ñanqha lurañanakana, jucha lurañanakan jakasax ² jiwatäsipkäyätawa, akapach amtäwinakaparjamaw arkasipkäyätaxa, kawkïr ajayutix alaxan apnaqki, Diosar jan jaysirinakar ch’amañchki ukan munañap lurasipkäyätaxa. ³ Taqi jiwasanakax uka kipkarakiw nayrapachax jakäyätan, ñanqha amtäwinakasar arkasa, janchisan munañanakaparjama, amtäwinakasarjam phuqhasa. Uka laykusti, Diosan axsarkañ mutuyäwip mayninakjam katuqañasaw wakisïna. ⁴ Ukampis Diosax jach’a khuyapayasiriwa, jach’a munasiñap uñachayistu. ⁵ Ukat Cristompi chika jakañ churistu, juchanakasan jiwataskchïyätan ukasa. Jumanakax Diosan khuyapayasiñapat qhispiyasiñ katuqapxtaxa. ⁶ Diosax Cristo Jesusamp chikaw jiwatat jaktayistu, jupampi chikarakiw alaxpachan qunt’ayistu. ⁷ Aksti jutir urunakan jupan munasiñapa, khuyapayasiñap uñacht’ayañatakiw luri, jiwasatak Cristo Jesús layku utjatapata. ⁸ Diosan munasiñapat jumanakax, iyawsañ tuqi qhispiyasiñ katuqapxtaxa. Aksti janiw jumanak pachpat jikxatapktati, jan ukasti Diosan churäwipawa. ⁹ Uksti janiw luräwinakam layku jikxatapktati, ukhamat jan khitis jach’achasiskañapataki. ¹⁰ Diosaw jiwasanakar irnuqistu; Jesucristo tuqi aski luräwinak lurañasataki, nayratpach wakichat thakhin sarañasataki. ¹¹ Ukhamasti amtasipxam, jumanakax nayra pachan janiw janchirjam judío jaqïpkäyätati, circuncisión katuqirinakasti, circuncisión jan katuqirit uñt’apxäyätam. ¹² Khä urunakasti jumanakax jan Cristoniw jakapxäyätaxa, janirakiw Israel markankirïpkäyätati, Diosan arust’äwip jan uñt’asa, aka uraqin jan kuna suyt’äwini, jan Diosaniw jakasipkäyätaxa. ¹³ Ukampis jichhax Cristo Jesusan wila wartatap laykuw jupampix mayakïxapxtaxa, nayrax jayankapxäyätawa, jichhasti jak’ankxapxtawa. ¹⁴ Cristow jiwasan sumankañasaxa. Jupax judionaksa jan judionaksa mä sapa markaruw tukt’ayi, kawkïr uñisiñatix mä pirqjam jaljkän uk t’unjasa. ¹⁵ Cristox kunatix kamachin arsutäkäna ukanak chhaqtayawayi, ukatsti jupa tuqiw uka pä tamatxa, mä sapa machaq marka utt’ayawayi. Ukhamat sumankañax utjawayi. ¹⁶ Cristox cruzan jiwasin paypach markan ch’axwanakap t’unjawayi, Diosampis sumankayaraki, jupanakat mä sapa markar tukuyasa. ¹⁷ Cristox jutasin taqiniruw sumankañ suma yatiyäwinak yatiyi, Diosat jayankapkäyät uka jan judionakaru, ukhamarak jupa jak’ankapkän uka judionakarusa. ¹⁸ Taqiniw Cristo tuqi, judionakasa jan judionakasa, mä sapa Ajayu tuqiki Awkirux jak’achastan. ¹⁹ Ukhamasti, janiw jumanakax yaqha markankirïpktati, janirakiw jan uraqinïpktasa, jan ukasti jichhax qullan markampix mayakiw jakasipxtaxa, Diosan utapankirïpxaraktawa. ²⁰ Jumanakax mä jach’a utar uñtatäpxtawa, uka utasti apostolunakana, profetanakan yatichäwipxar utachatawa, pachpa Jesucristorakiw utar thurxäsir jach’a qalaxa. ²¹ Jupaw uka jach’a uta thurxäsiski, juparakiw jiltayaski, ukhamat Tatitun qullan utapar tukuñapataki. ²² Jumanakasti Cristonkasaw mayachatäpxtaxa, taqinimpis mayachasisa mä utar tukuñataki, uka utan Diosax Qullan Ajayup tuqi jaki.

¹ Ukat naya Pablox Cristo Jesús layku katuntatäta, jan judiöpktas ukanakatak aski. ² Niy yatipxpachätawa, Diosax khuyapayasiñapan kuntix amtki uk jumanakar qhanañchañatak khithankitu ukxa. ³ Diosax mä unañchäwi tuqiw nayarux imantat amtäwip yatiyitu, ukxat qalltan yatiyapksma mä juk’a arunak qillqanisa. ⁴ Uka qillqat ullart’asax amuyapxasmawa, kunjämtix Diosax Cristo tuqi uka imantat amtäwip phuqki uk nayan amuyt’ataxa. ⁵ Uka imantat amtäwisti janiw jiwasat nayra jakirinakar yatiyatäkänti, ukampis jichhax Diosax Ajayup tuqiw qullan apostolunakaparu, profetanakapar uñacht’ayi. ⁶ Uka jan amuyt’kañ amtäwix akawa: Tatitun qhispiyasiñ arunakap tuqiw jan judiöpkis ukanakax judionakamp chik pachpa waxt’äwi katuqapxani, ukhamarak mä sapa markar tukutakïpxani, kuntix Diosax Jesucristo tuqi arsuwaykäna uksa, katuqapxarakini. ⁷ Diosan khuyapayasiñapa, munasiñap tuqiw nayax uk yatiyañatak uchatäta, ukham jupax jach’a ch’amap uñacht’ayi. ⁸ Nayasti qullan markapankirinakat wali sullkakïtwa; ukampis jupaw aka suma irnaqäwi churitu, jan judiöpkis ukanakar Criston jan jakt’kay qamir kankañapat suma yatiyäwi yatiyañaxataki. ⁹ Ukatsti taqi kun lurir Diosax wiñayatpach imxäskatayna uka amtäwipat taqinir yatiyañaxatakiraki. ¹⁰ Ukhamat jichhax iglesia tuqix alaxpachankir taqi munañaninakasa, jilïrinakas Diosan yatiñ kankañap uñt’apxani, ukasti kunayman tuqit uñacht’ayasi. ¹¹ Diosasti taqi akanak wiñay amtäwiparjamaw Jesucristo Tatitus tuqi luri. ¹² Cristo tuqiw Diosar jan axsaras jak’achasiñasax utji, jupar iyawsañatak churkistu uka iyawsañampi. ¹³ Ukat jumanakarux achikt’apxsma, jumanak layku t’aqhisitaxat jan ch’am laq’ayasipxamti, ukatsipana ukax jumanakatakix mä jach’añchäwiwa. ¹⁴ Ukat nayax Dios Awkin nayraqatapan killt’asta, ¹⁵ kunatix alaxpachansa, akapachansa utjki ukanak lurir Dios nayraqatana. ¹⁶ Nayax Dios Awkiruw mayta, muspharkañ qamir kankañapat Qullan Ajayup tuqi jumanakar ch’am churañapataki, ¹⁷ Cristox chuymanakaman iyawsañ tuqi jakpan, munasiñasti jakäwinakaman saphipäpan, utt’äwiparakïpan. ¹⁸ Ukhamat jumanakax qullan markampi mayachat amuyt’apxäta, Criston munasiñapax taqi tuqir jach’ätapa. ¹⁹ Uka munasiñap uñt’apxañamatakiw mayta, ukasti taqi kuna yatiñat sipan juk’ampi jilankiwa, ukhamat Diosan kankañapampi phuqt’atäpxañamataki. ²⁰ Jichhasti Diosax jach’añchatäpan, jupax ch’amaniwa kuntix mayktan, lup’karaktan ukanakat sipan juk’ampi lurañataki, jiwasanakan luraski uka ch’amapat yuspagaratäpan. ²¹ ¡Iglesiansti Diosax Jesucristo tuqi jach’añchatäpan, wiñayansa wiñayapataki! Ukhamäpan.

¹ Ukat nayax, Tatit layku katuntatäsin achikt’apxsma, khitinakatix Diosan jawsatäpkta ukanakasti, kunjämtix lurapxañamäk ukhamar sarnaqapxam. ² Alt’at chuymanïpxam, munasirïpxarakim; llamp’u chuymanïpxam, maynit maynikamasti munasiñampi uñjasipxam; ³ Qullan Ajayut jutki uka mayacht’asiñ katxäsipxam, sumankañ tuqiw taqinir mayachapxtam. ⁴ Mä sapa janchikiw utji, mä sapa Ajayukiw utjaraki, kunjämtix Diosax mä sapa suyt’añar jawsapktam ukhama. ⁵ Mä sapa Tatitukiw utji, mä sapa iyawsäwi, mä sapa bautismokiw utjaraki; ⁶ mä sapa Diosakiw utji, jupasti taqinin Awkipawa, taqiniruw apnaqi, taqi jaqinak tuqiw luri, taqinin chuymapankarakiwa. ⁷ Ukampis Cristox churañ munki uka luräwinakat sapa mayniw katuqtan. ⁸ Ukat Qillqatax saraki: “Alaxpacharux katuntatanak irpt’ataw makhati, jaqinakarusti luräwinak churi” sasa. ⁹ ¿Kamsañarak muni “makhatiw” sasasti? Nayraqatax uraqi manqharuw saraqi sañ muni. ¹⁰ Khititix manqhakam saraqki ukasti, alaxpachat juk’amp alayar makhatki uka pachparakiwa, ukhamat taqi phuqhantañataki. ¹¹ Ukatsti jupa kipkaw sapa maynirus churawayi, yaqhipax apostolüñapataki, yaqhipax profetäñapataki, yaqhipax Diosan suma yatiyäwi arup qhanañchañapataki, yaqhipasti awatirinaka, yatichirinakäñapataki. ¹² Ukham qullan markaparux wakicht’i, luräwin irnaqañapataki, Criston markap jiltayañataki, ¹³ taqinis iyawsäwina, ukhamarak Diosan Yuqapar uñt’añansa mayakïñasataki, ukhamat aski jaqir tukuñasataki, kunjämäkitix Cristox ukhamar puriñataki. ¹⁴ Janiy wawanakar uñtat sarnaqxañäniti, kawksarus jank’ak irpataki, ukatsti jan wali thakhi sarnaqir k’ari yatichirinakan yatichäwipampis sallqjataraki. ¹⁵ Jan ukasti muñasiñan chiqapar lurasaw Cristor uñtas jiltañasa, jupan iglesian p’iqipätap layku. ¹⁶ Cristo tuqiw iglesiankirinakax luräwinakaparjam mayachat uñjasi, jupa tuqirakiw mayar tukt’as sumankañan irnaqapxi; ukhamat munasiñ layku iglesian jiltañapataki, ch’amañchasiñapataki. ¹⁷ Ukhamasti ak jumanakar Tatitun sutipxar iwxt’apxsma: Janiy juk’ampi Diosar jan uñt’irinakjam jakxapxamti, jupanakax pantjat amuyunakaparjamakiw jakapxi, ¹⁸ amuyupas ch’amakt’atawa. Jupanakasti janiw Diosat jutki uka jakäwit kusisipkiti, chuymanakap qalarayasipxatap laykusti, janiw kunsa yatipkiti. ¹⁹ Jan p’inqanïpxiwa, jan wali lurañaruw katuyasipxi, jan axsarasaw q’añu lurañanak lurapxi. ²⁰ Ukampis jumanakax janiw ukham jakañatak Cristor uñt’apktati, ²¹ chiqpachansa jumanakax jupat yatiyäwi ist’apxtaxa, ukat jumanakax kunjämtix jupax munki ukham jakañ yatiqapxtaxa, Jesusankki uka chiqa kankañaparjama. ²² Ukat jumanakax nayra sarnaqäwim apanukupxañama, uka sarnaqäwix sallqantir amtäwinakampi tukjatawa. ²³ Ajayunsti machaqar kipstapxañamawa, ²⁴ machaq jaqi kankañampi isthapisisa, Diosan uñtasitaparjam irnuqt’ata, ukatsti chiqa, q’uma jakäwimpi uñacht’ayasa, chiqa kankañxar utt’ayatätap layku. ²⁵ Ukhamasti jichhax jan juk’amp k’ariskxapxamti, jan ukasti sapa maynis chiqapak jaqi masinakamarux parlapxam, taqinis pachpa janchinkirïtas layku. ²⁶ Phiñasisinxa, jan juchachasipxamti; uka phiñasiñax jan jayp’ukamäpanti. ²⁷ Janiy supayampi jak’ayasipxamti. ²⁸ Lunthatasirix jan juk’ampi lunthataspati, jan ukasti amparapampi irnaqañar uchaspan, ukhamat jan kunaninakar yanapt’añatakis utjarapini. ²⁹ Jan wali arunakax lakamat jan mistpati, jan ukasti mayninakar ch’amañchir suma arunak mistpan, ukhamat ist’irinakatak askïñapataki. ³⁰ Diosan Qullan Ajayuparux jan llakisiyapxamti, jumanakax uka Ajayumpi chimpuntatäpxtawa, ukhamat kunürutix jupax phuqhat qhispiyasiñ churapkätam ukürun Diosankirjam uñt’atäpxañamataki. ³¹ Jumanak taypitsti apanukupxam: k’allk’usiñanaka, jan wali munañanaka, thithiñanaka, arnaqjasiñanaka, tuqisiñanaka, kunayman ñanqha lurañanaka. ³² Ukatsipana jumanakax suma chuymanïpxam, maynit maynikam khuyapt’ayasisa, purapat pampachasipxam, kunjämtix Diosax jumanakar Cristo tuqi pampachapktam ukhama.

¹ Jumanakasti, Diosan munat wawanakapjamax jupat yatiqasipxam. ² Taqinirus munasiñampi uñjapxam, kunjämtix Cristox munaskistu ukhama, jiwasanak laykuw jakañapsa katuyasiwayi, Diosatak mä suma q’apkir luqtäwïkaspas ukhama. ³ Jumanakasti qullan markankirjamaw sarnaqapxañama: wachuq jucha lurañatsa, yaqha q’añu lurañanakatsa, mich’asiñatsa janipun parlapxamti. ⁴ Q’añu arunaksa, luqhi kañkañ arunaksa, jan yäni arunaksa janipun arsupxamti, janiw wakiskit taqi ukanakat parlañaxa, ukatsipan Diosar yuspagarapxam. ⁵ Jumanakax yatipxam, janiw wachuq juchanakan sarnaqirisa, ñanqhanak luririsa, mich’asirisa, Cristompina, Diosampin qhapaq markapar mantapkaspati. Ukasti yaqha diosanakar yupaychañampi sasiwa. ⁶ Jan khitis jumanakarux k’ari arunakapampi sallqantkpati, chiqpachansa ukham tuqiw Diosan axsarkay mutuyäwipax juti, khitinakatix Diosar jan jaysapki ukanakataki. ⁷ Jumanakasti jupanakampix jan chikachasipxamti. ⁸ Nayrax jumanakax ch’amakan jakapxäyätaxa, ukampis jichhax Tatitumpi mayakïxasax qhanan jakxapxtaxa. Ukhamasti qhanankirinakjam sarnaqapxam, ⁹ uka qhanax khuyapayasiña, chiqapar sarnaqaña, chiqa kankañ utjayi. ¹⁰ Kunatix Diosar kusisiyki ukay lurapxam. ¹¹ Ch’amakankirinakan jan wali sarnaqäwipampix jan chikachasipxamti, jan ukasti, uka jan wali luräwinak qhanar apsupxam. ¹² Jupanakan jamasan luräwinakapat arsuñas p’inqasiñjamawa; ¹³ ukampis kunapachatix taqi kunanakas qhanar uskutäk ukkhax, taqi kunas qhanawa, ¹⁴ taqi kunatix qhanankki ukax qhanaruw tuku. Ukat akham sixa: “Juma ikirix p’arxtasim; jiwatanak taypit sarthapim, Cristow qhant’ätam” sasa. ¹⁵ Ukhamasti wali amuyumpi sarnaqapxam. Janiy pisi amuyunjamax jakapxamti, jan ukasti ch’ikhi kankañampi jakapxam. ¹⁶ Kunatix askïki uk jan inakt’as lurapxam, urunakan jan walïxatap layku. ¹⁷ Jan kunsa luqhir uñtat lurapxamti; kunäkitix Tatitun munañapax uk amuyt’añatak ch’amachasipxam. ¹⁸ Jan machjasipxamti, machjasiñax jan waliruw puriyi; ukatsipana Qullan Ajayumpi phuqhantasipxam. ¹⁹ Maynit maynikam q’uchunakampi, ajay q’uchunakampi chuymachasipxam, ukatsti taqi chuymampi Tatitur q’uchupxam, jach’añchapxarakim. ²⁰ Dios Awkirux taqi kunanakat Jesucristo Tatitusan sutipxar yuspagarapxapunim. ²¹ Cristor axsarasax maynit maynikam jaysasipxam. ²² Chachan warminakax Tatiturjam chachananakapar jaysapxpan. ²³ Chachax warmin p’iqipawa, kunjämatix Cristox iglesian p’iqipäki ukhama, iglesiasti jupan janchipawa; Cristosti jupan Qhispiyiriparakiwa. ²⁴ Kamisatix iglesiax Cristor jaysixa, ukhamarakiw warminakax chachapar taqi kunan jaysañapa. ²⁵ Warmin chachanaka, warminakamar munasipxam, kamisatix Cristox iglesiar munaski ukhama, jakañapsa iglesiap laykuw apt’asiwayi. ²⁶ Uksti qullanar tukuyañatakiw ukham luri, uma jariqäwimpi arup tuqi q’umachasa, ²⁷ ukhamat q’umachat iglesia irpkatañataki, jan q’añucht’ata, jan kuna sip’uni, jan kunan kamacht’ata, ukat sipansti suma qullanaptata, jan kamskayaraki. ²⁸ Uka pachparakiw warmin chachanakax warminakapar pachpa janchiparjam munasiñapa. Warmipar munasir chachax jupa pachpaw munasi. ²⁹ Janiw khitis pachpa janchiparux uñiskiti, jan ukasti janchiparux manq’ayiwa, sum uñjasiraki, kunjämtix Cristox iglesiampi lurki ukhama, ³⁰ iglesiaw Criston janchipaxa. Jiwasanakasti uka janchinkirïpxtanwa. ³¹ “Ukat chachax awkip taykap jaytanukuni, ukhamat warmipampi mayachasxañataki, panpachanisti mä janchirukiw tukuni”. ³² Akax wali jach’a jan amuyt’kañawa. Nayasti Cristompita, iglesiampit ukham arsta. ³³ Ukhamasti, sapa mayni jumanakay warmipar jupa pachparjam munaspan, warmisti chachaparux yäqarakpan.

¹ Wawanaka, kunjämtix Tatitux munki ukhamaruy awkimar taykamarux jaysapxam, ukham jaysañaw askixa. ² Aski katuqañatak nayrïr arsut kamachix akawa: “Awkimar taykamar jach’añcham, ³ ukhamat aka uraqin walja maranak kusisit jakasiñamataki.” ⁴ Jumanakasti awki taykanaka, wawanakamarux jan thithiyapxamti, jan ukasti Tatitun yatichäwiparjam chiqapar yatichas uywapxam. ⁵ Uywatanaka, aka uraqin uywirinakamäki ukarux jaysapxam. Uksti yäqañampi, axsarañampi, qhana chuymampi phuqhapxam, Cristorus yanapapkasma ukhama. ⁶ Janiy uywiriman uñjkatakix lurapxamti, ukhamat jupanakampi sumat uñt’ayasiñatakiki, jan ukasti Criston irnaqirinakapjamax Diosan munañap taqi chuyma lurapxam. ⁷ Taqi chuymampiy irnaqapxam, Tatitutakjama, jan jaqinakatakjamaxa. ⁸ Ukampis yatipxañamawa, uywatäpasa, jan uywatäpasa, sapa mayniw suma luratanakapatjam Tatitut katuqani. ⁹ Jumanakasti uywirinaka, ukhamarakiy uywatanakamarux sum uñjapxam, janirak axsarayapxamti. Amtasipxam, jumanakasa, jupanakasa alaxpachankir Tatitunkirïpxtawa, jupax janiw khitirus yaqhachnukkiti. ¹⁰ Jichhasti jilatanaka, Tatitunkasin ch’amañchasipxam, jan atipjkay ch’amapampi. ¹¹ Diosax churapktam uka nuwasiñ yänakampi jark’aqasipxam, ukhamat sallqantir supayarux saykatañäni. ¹² Janiw jaqinakan ch’amanakapampi nuwasipktanti, jan ukasti alaxankir ñanqha ajayunakan ch’amapampiw nuwasipxtan, jupanakasti jilïrïñampi, munañanïñampiw aka ch’amak uraqin axsarayistu. ¹³ Ukalayku, Diosax churapktam uka nuwasiñ yänak katxarupxam, ukhamat jan wali urunakar saykatañataki, ukham sum wakicht’asisasti ch’aman sayt’asipxam. ¹⁴ Ukhamasti ch’aman sayt’asipxam, chiqa kankañampi isintata, aski kankañampi isthapitaraki. ¹⁵ Sumankañ arunak qhanañchir sarañatakix wakicht’atapunïpxam. ¹⁶ Taqi kunat sipansti, iyawsäwimax supayan nina mich’inakap jiwarayañatak jark’aqasiñjamäpan. ¹⁷ Qhispiyasiñasti mä cascor uñtat p’iqir asxatasiñatakïpan, Diosan arupasti Qullan Ajayun churat mä espadar uñtatäpan. ¹⁸ Diosat mayisiñ jan armasipxamti: Qullan Ajayun irpatax Diosar mayipxapunim. Jank’akïpxam, jan ch’am laq’ayasipxamti, qullan markatakix taqinitak Diosat mayipxam. ¹⁹ Nayatakis Diosat mayipxarakim, kuna arsuñaxatix wakiski uk Diosax nayar churañapataki, ukhamat Diosan imantat amtäwip ch’amampi parlañaxataki, ukasti Diosan suma yatiyäwi arunakapawa. ²⁰ Diosaw nayarux aka yatiyäwi uñt’ayañatak khithitu, ukatarak jichhas katuntat uñjasta. Diosat mayipxam, nayan jupat jan axsaras parlañaxataki. ²¹ Tatitun irnaqäwipan wal yanapasir munat Tíquico jilatasaw nayxat taqi yatiyapxätam, kunjämsa nayax jikxatasta ukanak yatiyapxarakïtam. ²² Ukatakiw khithanta, kunjämäsipktix nanakax uk jumanakar yatiyiri, ukhamat jumanakar ch’amañcht’añataki. ²³ Dios Awkisampi, Tatit Jesucristosampix jilatanakar sumankaña, munasiña, iyawsañ churpan; ²⁴ khitinakatix Jesucristo Tatitusar jan pächasis munapki ukanakarux jupax khuyapayasiñap churpan.