COLOSENSES

COLOSENSES

¹ Colosas iglesiankir munat jilatanaka, kullakanaka: Naya Pablompi, Timoteo jilatampiw aruntanipxsma. Jumanakax Cristor iyawsapxatamat Diosan aski markapäpxtawa. Nayasti Diosan munañapat Jesucriston apostolupätxa. Jiwasan Dios Awkisay jumanakarux munasiñapampi, sumankañapampi churpan. ³ Jumanakatak Diosat maykasaxa, Jesucristo Tatitusan Dios Awkiparux yuspagarapxapuntwa. ⁴ Jumanakan Jesucristor iyawsapxatam yatipxta, Diosan q’umachat markapankirinakar munapxatam yatipxarakta, ⁵ kawkïr suyt’äwitix jumanakatak alaxpachan imatäski uka layku. Uka tuqitsti niyaw ist’apxta kunapachatix Diosan suma yatiyäwi arunakapax arsutäkän ukkhatpacha, ⁶ ukasti jumanak taypinkiwa. Diosan aka arunakapasti taqi chiqan yatiyasiski, aski luräwinak jikxatasa, uka kipkarakiw jumanak taypin lurasïna kunapachatix Diosan munasiñapat ist’apkäyäta, uka munasiñapan chiqätap yatipkarakïyät ukkhaxa. ⁷ Epafras munat jilatasaw uk yatichapxäyätam, jupasti nanakamp chika irnaqirïnwa, Jesucristor munasitap laykuw jumanakarux Diosan suma yatiyäwi arunakap luqtapxtam. ⁸ Juparakiw nanakarux jumanakxat yatiyapxitu, kunjämtix Qullan Ajayux mayninakar munapxañamatak ch’amachapktam uka tuqita. ⁹ Ukat nanakax, yatipkta ukürutpach jumanakatakix jan qarjasisaw Tatitut mayipxta, Diosan jumanakar munañap uñacht’ayañapataki, kunayman yatiñ kankaña, ajay tuqin amuyt’a kankañ churañapatakiw mayipxarakta. ¹⁰ Ukhamat Tatitunkirjam sum sarnaqapxañamataki, taqi kunan jupar kusisiyasa, suma luräwinak uñacht’ayasa, Diosan yatiñapan jiltasa. ¹¹ Diosax alaxpach ch’amapampi jumanakar ch’amañchañapatakiw mayipxta, ukampiw jumanakax wali ch’amañchata, llamp’u chuymampi sayt’asipxäta, ukatsti kusisiñampiw ¹² Dios Awkir yuspagarapxäta, juparakiw jumanakar wakichapxtam uka waxt’asïwip qhanan katuqapxañamataki, uksti Diosax jupan qullan markaparuw churani. ¹³ Diosax ch’amakanakan munañapat qhispiyistu, Jesucristo Yuqapan qhapaq markaparuw irpantistu, ¹⁴ jupasti cruzan jiwatapampiw qhispiyistu, juchanakas pampacharakistu. ¹⁵ Cristox Diosan Yuqapawa, jupasti taqi kunatix utjki ukat nayrïriwa; jan uñjkay Diosan ajanupawa. ¹⁶ Jupa tuqiw Diosax taqi kunatix alaxpachansa, akapachansa utjki ukanak luri, uñjañäki, jan uñjañäki ukanaka, ch’amampi, munañamp apnaqir ajayunaksa luri. Taqi ukanakasti jupa tuqi luratawa, jupatak luratarakiwa. ¹⁷ Janïr kunas utjkän ukkhatpach Cristox utji, jupïpanarak taqi kunas chiqapar utjaski. ¹⁸ Jupaw iglesian p’iqipaxa, iglesiasti jupan janchipawa, juparakiw iglesiarux jakañ churi. Jupaw qalltaxa, jiwatanak taypit nayraqat jaktiriwa, ukhamat jupan taqi kunansa nayrankañapataki. ¹⁹ Diosax Criston taqi ch’ama utjañap munäna, ²⁰ ukatsti aka uraqpachpan Cristo tuqi sumankañ utjañap munarakïna, uka sumankañasti Criston cruzan jiwatap tuqikiw utjäna. ²¹ Jumanakasti nayrax Diosat jayarst’ataw jakapxäyäta, jan wali luratanakam laykusti, chuymanakaman jupan uñisiripäpxäyätawa, ²² jichhasti Criston jiwatap tuqiw Diosampix sumankthapipxtaxa. Uksti jumanakar jupa nayraqatan qullanar tukuta, jan q’añuni, jan juchan uñstayañatakiw luri. ²³ Ukatakisti iyawsañaman sum sayt’asipxañamawa, kuna suyt’äwitix Diosan suma yatiyäwi arunakap ist’asin utjapktam ukat jan jithiqtasa. Aka qhispiyasiñ arunakaw taqi chiqan parlasïna, naya Pablosti, uka arunak qhanañchañan yanapasirakta. ²⁴ Jichhax jumanak layku t’aqhisisax kusistwa, ukhamat pachpa janchixan kunatix Criston iglesiap layku t’aqhisiñax jan phuqhatäki uk phuqhaskta. ²⁵ Jumanakan askimatakisti, Diosax iglesiapar luqtir tukuyitu, ukatsti jupan arunakap taqi chiqan yatiyañaxatakiw khitharakitu, ²⁶ nayra pachatpach Diosan imxäsit arunakap yatiyañaxataki; uksti jichhax jupan ajllit markaparuw uñachayxi. ²⁷ Diosasti taqi markankirinakaruw aka suma amtäwi yatiyañ munäna, uka amtäwisti, Diosax Cristoruw jumanak taypir jakir khithanïna, juparakiw kuntix katuqapkäta uka suyt’äwisaxa. ²⁸ Nanakax Cristo Tatitut parlapxta, taqiniruw yatiñ kankañamp iwxt’as yaticht’apxta, ukhamat Tatit Cristjam chiqäpxañamataki. ²⁹ Ukatakiw nayax ch’am tukus irnaqta, kuna ch’amtix Tatitux churkitu uka ch’amampi.

¹ Nayax yatipxañam munta; jumanak laykux wali ch’am tukusaw irnaqaskta, Laodicea markan iglesiankirinak layku, ukhamarak khitinakatix jan uñt’apkitus ukanak layku. ² Jupanakax chuymapan wali ch’amañcht’atäpxañapataki, munasiñan mayakïpxañapataki, chiqpach amuyumpi phuqt’atäpxañapatakiw ch’am tukuskta, ukhamat Diosan amtäwip uñt’añataki, ukasti pachpa Cristowa, ³ taqi yatiñasa, amuyt’asiñasa Cristonak utji. ⁴ Uksti jan khitis jumanakar suma arunakampi sallqjaskañapatakiw sapxsma. ⁵ Nayax janis janchin jumanakampïktxa, ajayun jumanakampïskta, ukatsti jumanakan sum sarnaqapxatamata, Tatitur iyawsañanakaman sum sayt’apxatamat wal kusisirakta. ⁶ Jumanakax Tatituruw iyawsxapxtaxa, ukatpï kunjämtix Tatitux munki ukhamar jakapxañamaxa, ⁷ jupxan saphintata, iyawsäwi layku jupxan suma utt’ata, kunjämatix yatichatäpkäyät ukhamaru, ukatsti Diosar yuspagarasaraki. ⁸ Wal amuyasipxam: jan khitis sallqa arunakampi, jaqin amuyuparjam k’ari amuyunakampi, jumanakar sallqantpati, jupanakasti janiw Tatitur jaysapkiti, jan ukasti jaqinakan sarnaqäwiparu, amtäwiparukiw jaysapxi. ⁹ Kunäkitix Diosax ukasti Criston uñsti, ¹⁰ jupa tuqirakiw Diosax ch’amap phuqhantapxtam, Cristow taqi munañaninakana, ajayu ch’amanakan p’iqipaxa. ¹¹ Cristonkxapxatam laykuw jumanakax circuncisión katuqxapxtaxa, janiw jaqin circuncisión luratapampiti, jan ukasti Diosax Cristompi mayachapktam uka layku, ukatsti jucha lurañanakat qhispiyapxaraktam. ¹² Kunapachatix jumanakax bautismo katuqapkta ukkhasti, Cristomp chik p’amp’antataw uñjasipxtaxa, ukatsti jupamp chika jaktayatäpxaraktawa, Tatitur jiwatat jaktayir ch’aman Diosar iyawsapxatam layku. ¹³ Jumanakasti nayra pachanxa, juchanakam laykuw ajayun jiwat uñjasipxäyätaxa, jucha lurañ jan apanukupxatam layku; jichhasti Cristompi chikaw Diosax jakañ churapxtam taqi juchanakat pampachasa. ¹⁴ Kamachin qillqatax jiwasanakar juchañchirïnwa, ukampis Diosaw Criston cruzan jiwatapampix taqi ukanak phuqhantawayi. ¹⁵ Dios Awkix taqi ajayunakan ch’amanakaparuw atipjawayi, taqi jaqin uñjkañaw Cristo tuqi jupanakar p’inqachjawayi, katuntatanakarjam atipjäwipan apasa. ¹⁶ Ukhamasti janiy khitis manq’apxatamata, umapxatamatsa jumanakar jisk’achpati, janirak jisk’achpati jach’a urunak jan yäqatamatsa, machaq phaxsinak jan yäqatamatsa, samarañ urunak jan yäqatamatsa. ¹⁷ Taqi akanakasti mä ch’iwjam jutañapäki ukhamakiwa, ukampis Cristow chiqpachaxa. ¹⁸ Jan khitis llamp’u chuymanjam tukus jumanakar juchañchpati, khitinakatix angelanakar yupaychapki ukanakaxa, jupanakasti unañchäwinak uñjapxta sapxiwa, ukampis ukax k’arikamakiwa, jan wali amuyunakapatsti jach’a jach’aw tukupxi. ¹⁹ Jupanakax khititix p’iqïki uka Cristompix janiw mayachatäpkiti, Cristow ch’am churas iglesiarux apnaqi, juparakiw iglesiarux wakiskirinak churi, ukatsti iglesiankirinakarux Diosan amtataparjam mayarukiw tukt’ayi. ²⁰ Jumanakax Criston cruzan jiwatap laykuw jupampix mayachatäxapxta, janirakiw akapachar apnaqki uka ajayunakampix apnaqatäkxapxtati. Ukhamasti, ¿kunatarak jichhasti akapach jaqinakjam jakasipktasti jaqin amtatanakapar ist’asasti, ²¹ kunjämtix jupanakax sapki: “Jan uk llamkt’amti, jan khay manq’amti, janirak amparamampis aptamti” sasasti? ²² Taqi aka yatichäwinakasti tukusirikiwa, jaqin arsutapakïtap layku, jaqin yatichäwipakïtap layku. ²³ Chiqpachansa uka yatichäwinakax sumäkaspas ukhamawa, jaqirux Diosar sum arkañapat yatichatap layku, alt’at chuymanïñ yatichatap layku, ukhamarak janchi apnaqañ yatichatap layku, ukampis janchin munañapar atipjañatakix inamayakiwa.

¹ Ukhamasti, niyakixay jumanakax Cristomp chika jakatatxapxstaxa, jichhax alaxpach yänakay thaqhapxam, kawkintix Cristox Diosan kupïxapan qunt’atäski uka. ² Alaxpach yänakat lup’ipxam, jan akapach yänakat lup’ipxamti. ³ Jumanakasti akapachatakix jiwxapxtawa, jichhasti, Diosax Cristo tuqiw chiqpach jakañ churxapxtam. ⁴ Pachpa Cristow jumanakan jakañamaxa. Kunapachatix jupax uñstankan ukkhasti, jumanakax jupamp chikaw qhapaq kankañapan phuqt’at uñstapxarakïta. ⁵ Jumanakan jan wali amtanakam jiwayapxam: jan khitis wachuq jucha lurpati, q’añu luräwinaksa jan lurpati, janchin munañanakaparusa, jan wali amtanakarus jan arkpati, janirak jupatakik taqi kunsa munpati, ukham lurañanakasti k’ari diosanakar yupaychañäkaspas ukhamawa. ⁶ Ukatpï Diosan jach’a mutuyäwipax khitinakatix jupar jan ist’apki ukanakxarux jutixa; ⁷ jumanakasti nayra jakäwiman ukanak lurapxäyätaxa. ⁸ Jichhasti taqi akanak apanukxapxam: phiñasiña, janchin munañap luraña, ñanqha arunakampi arsuña, q’añu arunak arsuña. ⁹ Jumanakpurax jan k’arintasipxamti, jucha luräwin sarnaqañanak apanukxapxatam layku, ¹⁰ jichhasti machaqar tukutäxapxtawa, uka machaqar tukuñasti, sapürunjamaw irnuqt’ir Diosan munañapat machaqar juk’amp tukuski, ukhamat jupar sum uñt’añaskama. ¹¹ Jichhax janiw wakiskirïkxiti judío jaqïñasa, griego jaqïñasa, circuncisión katuqat jaqïñasa, janirakiw wakiskirïkxiti jaya jaqïñasa, jan amuyt’anïñasa, uywat jaqïñasa, jan uywat jaqïñasa; jan ukasti Cristow taqi kunaxa, jupaw taqi kunankaraki. ¹² Diosaw jumanakarux munasipxtam, jupan qullan markapankañatakiw ajllisipxtam. Ukhamax khuyapayasiñampi, suma jaqïñampi, jisk’ar tukuñampi, llamp’u chuymanïñamp isthapit sarnaqapxam. ¹³ Purapat llamp’u chuymampi uñjasipxam, jan wal lurasipxsta ukkhasti, maynit maynikam pampachasipxam. Kunjämtix Cristox jumanakar pampachapxtamxa, ukhamarak jumanakax pampachapxam. ¹⁴ Taqi ukanakat sipansti, munasiñan phuqt’atäpxam, uka munasiñaw mayar tukuyirixa. ¹⁵ Criston sumankañapay chuymanakam apnaqpan, Diosasti uka amtäwimpiw mä janchir tukupxañamatak jawsapxtam. Ukatsti yuspagarapxapunim. ¹⁶ Ukhamasti Tatitun arunakapax chuymanakamar phuqhantpan. Jumanakkamax taqi amuyt’a chuymampi yaticht’asipxam, iwxt’asipxarakim. Chuymanakaman Diosar yuspagaras ajay q’uchunak q’uchupxam. ¹⁷ Kuntix lurapkäta, arsupkäta ukkhasti, Tatit Jesusan sutipar lurapxam, Jesucristo tuqi Dios Awkir yuspagarasa. ¹⁸ Warminaka, chachanakamar ist’apxam, Diosankirjamax ukham lurapxañamaw wakt’apxtam. ¹⁹ Chachanaka, warminakamar munasipxam, janirak jupanakatakix qhurüpxamti. ²⁰ Wawanaka, awkimar taykamar taqi kunan ist’apxam, ukham luratanakamasti Diosarux wal kusisiyi. ²¹ Awkinaka, taykanaka, wawanakamampix jan sinti qhurüpxamti, jupanakan jan mayjt’asipxañapataki. ²² Uywatanaka, uywirinakamar aka uraqin taqi kunan ist’apxapunim, janiy sumat uñt’ayasiñatakik lurapxamti, janirak jupanakan uñjkañak kunsa lurapxamti, jan ukasti, Tatitur axsartas qhana chuymampi lurapxam. ²³ Taqi kuntix lurapkäta ukkhasti, taqi chuymapin lurapxam, jan jaqinakatakjamaxa, jan ukasti, Tatiturus luqtapkasma ukham lurapxam. ²⁴ Niy yatipxtawa, aski luratamat churäwi katuqañamax wakt’apktam uk Tatitut katuqapxäta. Jumanakasti khititix chiqpach Tatitüki uka Cristoruw arkapxtaxa. ²⁵ Ukampis khititix jan wal lurki ukax, jan wali luratapat kunatix katuqañapäki uk katuqani, Diosan taqinirus jan yaqhachas taripatap layku.

¹ Uywirinaka, uywatanakamar chiqapar uñjapxam. Amtasipxam, jumanakax alaxpachan uywirinïpxaraktawa. ² Tatitut mayisipxapunim, yuspagarapxarakim. ³ Nanakatakis Diosat mayipxarakim, Tatitun punkunak jist’arañapataki, ukat arunakap parlañataki, Criston imantat amtäwip qhanañchañataki, uka laykuw jichhas nayax katuntatäskta. ⁴ Diosat mayipxam nayan uka arunakap sum qhanañchañaxataki. ⁵ Tatitur jan iyawsirinakampisti, suma amuyt’ampi sarnaqapxam, sapa kuti ukham lurañ utjkipansa, askinak lurapxam. ⁶ Parlatanakamasti sumäñapapuniwa, sapa maynir kunjäm arusxatañsa yatipxañamarakiwa. ⁷ Jiwasan Tíquico munat jilatasaw nayxat yatiyapxätam, jupasti nayan aski yanapirixawa, nayamp chika Tatitur luqtirirakiwa. ⁸ Ukat jumanakan ukar khithanta, kunjämäpktix nanakax uk jumanakar yatiyiri, ukhamarak jumanakar ch’amañchiri. ⁹ Jupamp chikasti, munat Onésimo jilataw jutaraki, jupasti jumanakat maynïriwa. Jupanakaw taqi kunatix akan luraski ukanak yatiyapxätam. ¹⁰ Nayamp chika katuntatäki uka Aristarco jilataw aruntanipxtam, ukhamarakiw Bernabé jilatan Marcos primo jilapas aruntanipxtam. Jumanakax Marcosat niy yatxapxtawa; jupatix jumanakar tumpiri purininixa, sum katuqt’apxam. ¹¹ Justo, sutini, Jesús jilataw aruntanipxtam. Judeankir iyawsirinak taypitxa, jupanakakiw Diosan qhapaq markapat yatiyañan nayar yanapas irnaqasipki, nayarusti jupanakax walpun ch’amañchapxitu. ¹² Epafras jilata, khititix Criston luqtiripäki, jumanakat maynïrïkaraki, jupas aruntanipxtamwa. Jupasti jumanakatakix walipuniw Diosat mayiski, Diosan munañap phuqhirinakjam thuruñchat sayt’asipxañamataki. ¹³ Naya pachpaw uñjta kunjämtix Epafras jilatax jumanakat llakiski uka, ukhamarak khitinakatix Laodicea, Hierápolis markanakankapki ukanakatsa. ¹⁴ Munat Lucas qullirin aruntap katuqasipxam, Demas jilatan aruntap katuqasipxarakim. ¹⁵ Laodicea iglesiankirinakar aruntt’apxam. Ninfaru, utapan tantachasipki uka jilatanakar aruntapxam. ¹⁶ Aka qillqat ullart’asinsti, Laodiceankir iglesiar apayapxam, ukan ullart’atäñapataki; Laodiceat purinir qillqatsti jumanakax ullart’apxarakim. ¹⁷ Arquipo jilatarusti akham sapxam: “Kuna lurañtix Tatitux churktam uk sumpun phuqham” sasa. ¹⁸ Naya, Pablow aka arunta pachpa amparaxampi qillqanipxsma. Amtasipxam, nayax katuntatätwa. Diosan munasiñapay jumanakampïpan.