AMÓS

AMÓS

¹ Amós Profetax Judá uraqin, Tecoa sat mä jisk’a markankirïnwa, jupasti ovej awatirïnwa, ukhamaruw Tatitux jupan yatiyäwi arunakap Israel markar parlir sarañapatak jawsäna, Tatitusti uka arunakxa pä mara janïr uraqi khathati purinkipan parläna, uka pachasti Judá markanxa Oziasaw reyïskäna, Israel markansti Jeroboam sat Joás chachan yuqapaw reyïskarakïna. ² Amós profetax sänwa: Tatitux Jerusalén markana, Sión qullutpacha wali jach’a arumpi art’ki ukapachaxa, uywa manq’añ chhuxllanakas q’alaw pharsxi, Carmelo sat qullus wañsxarakiwa. ³ Tatitux akham siwa: “Damasco markankirinakax wali ñanqhanakpun lurapxi, ukat jupanakax mutuyatäpxani, Galaad markankirinakarux trigo jawq’añampiw jawq’supxi. ⁴ Ukat Hazael reyin utaparux ninampi phichkatäxa, uka ninasti Ben-hadad yuqapan jach’a utapsa q’al nakhantani. ⁵ Damasco markan punkunakap munkir jan munkir jist’arä; Bicat-avén chiqan jakirinakaruw tukjä, Bet-edén marka apnaqirirus t’unjarakïwa, Sirio jaqinakasti, Quir markar katuntata apatäpxaniwa.” Ukham siw Tatituxa. ⁶ Tatitux akham sarakiwa: “Gaza markankir jaqinakax wali ñanqhanak lurawayapxi, ukat jupanakarux mutuyarakï, mä markpachar katuntasaw apasxapxi, Edom markanxa, yaqhanakar luqtapxañapatakiw aljantapxi. ⁷ Ukat Gaza markan uyunakap ninampi phichkatä, uka ninasti reyi utanakapsa q’al nakhantarakini. ⁸ Asdod markan utjasirinakarux tukjäwa, Ascalón marka apnaqirirus q’al tukjrakï. ¡Taqi ch’amaxampiw Ecrón markatakix sartä, jan mayanipuniw filisteonakax jiwarapxani! Ukham siw Tatituxa.” ⁹ Tatitux akham siwa: “Tiro markankir jaqinakax wali ñanqhanakpun lurawayapxi, ukat jupanakarux mutuyarakï; mä markpachar t’aqhisiyat luqtiritak Edom markar aljantapxatapata, kawkïr markanakampitix jilapurjam jakasiñatak arust’äwix utjkäna ukar jan phuqhapxatapata. ¹⁰ Ukat Tiro markan uyunakapsa ninampi phichkatä, ninasti reyin jach’a utanakapsa q’al nakhantarakini.” ¹¹ Tatitux akham siwa: “Edom markankir jaqinakax wali ñanqhanakpun lurawayapxi, ukat jupanakarux mutuyarakï; israelita jilanakaparu jan khuyapt’ayasis espada ayt’at arknaqapxatapata. Jach’a phiñasiñapasa, uñisiñapas jilanakapatakix jan tukuskirïnwa. ¹² Ukat Temán markarux ninampi phichkatä, uka ninaw Bosrá markan reyi utanakapsa nakhantani.” ¹³ Tatitux akham siwa: “Amón markankir jaqinakax wali ñanqhanakpun lurawayapxi, ukat jupanakarux mutuyarakï, uraqip jach’aptayasiñatakix Galaad markankir usur warminakan purakanakap kharitatapxäna. ¹⁴ Ukat Rabá markan uyunakap ninampi phichkatä, jach’a utanakapasa qhillar tukuñkamaw nakhantani, ukasti nuwasiñ uruna, arnaqasiñanak taypin jach’a thaya urun lurasini. ¹⁵ Reyipasti, jaya markar apayataw uñjasini, jupampi chikasti taqpach jilïr jaqinakapaw sarani.” Ukham siw Tatituxa.

¹ Tatitux akham siwa: “Moab markankir jaqinakax walja ñanqhanakpun lurapxi, ukat jupanakarux mutuyarakï; Edom markan reyipan ch’akhanakap qhillar tukuyañkam phichhantapxatapata. ² Ukat Moab uraqirux ninampi phichhantä, uka ninax Queriot markan reyi utanakap nakhantani; moabitanakax wali ch’axwañ taypina, warariñ taypina, trompet phust’asiñanak taypin jiwarapxani. ³ ¡Nayaw reyiparux markap taypit alisnukü; reyimp chiksti taqi jilïr jaqinakaparuw jiwarayarakï!” Ukham siw Tatituxa. ⁴ Tatitux akham siwa: “Judá markankir jaqinakax walja ñanqhanak lurapxi, ukat jupanakarux mutuyarakï; Tatitun yatichäwinakap janiw katuqapkiti, janirakiw kamachinakaparus phuqhapkiti, jan ukasti kawkïr yaqha diosanakarutix awkinakapax yupaychapkän ukanakaruw yupaychapxi. ⁵ Ukat Judá markarux ninampi phichhantä, uka ninaw Jerusalén markan jach’a utanakapsa q’al nakhantani.” ⁶ Tatitux akham siwa: “Israel markankir jaqinakax walja ñanqhanak lurapxi, ukat jupanakarux mutuyä; jan juchan jaqirux qullqiruw aljantapxi, jan kunan wajcha jaqirusti mä paris wiskhuruw aljantapxi. ⁷ Jan kunan jaqinakarusti wali t’aqhisiyañampiw jisk’achapxi, llamp’u chuyman jaqinakarux janiw chiqapar uñjapkiti. Awkis, yuqas, pachpa warmimpiw ikintasipxi, ukhamat nayan Qullan sutix takichasipxi. ⁸ Manut jaytat isinakxar winkxatasaw yaqha diosanakar yupaychasax altaran manq’apxi; qullqinak apsusasti, diosanakapan utaparuw vino umirix sarapxi. ⁹ Nayasti, jumanak laykuw amorreonakarux q’alpun tukjta; cedro quqanakjam jach’anakäpkchïnsa, roble quqanakjam ch’ullqhïpkchïn ukasa. ¹⁰ Nayaw jumanakarux Egipto markat irpsunipxsma, pusi tunka maraw wasaran irpnaqapxsma amorreonakan uraqipsa jumanakaruw churapxsma. ¹¹ Israelitanaka, janiw jan yatirix tukupkasmati, jumanak taypit yaqhipanakarux profetanak tukuyta, mayninakarusti nazireonak tukuyarakta.” Ukham siw Tatituxa. ¹² “Jumanakax nazireonakar munkir jan munkir vino umayapxtaxa, profetanakarusti nayxat parlir jark’apxaraktaxa. ¹³ Ukat jichhax, israelitanaka, kunjämtix mä carretax trigo khumuntatax uraqir wal jatxattixa, ukhamaw jumanakarux jatxattapxäma. ¹⁴ Qawqhsa jaltasipkätawa, janiw atipapkätati; wali ch’aman jaqirusa ch’amax pist’aniwa, ch’amamp atipt’irïki uka jaqis qhispkaniti. ¹⁵ Mich’inak antutt’añ apnaqiris janiw sayt’askaniti, jank’aki t’ijtirinakasa, caballxat jaltirinakas qhispipkaniti. ¹⁶ Uka urunxa, wali ch’amamp nuwt’asir jaqisa, nuwasiñ yänakap apanukusaw jaltxani.” Tatituw uk arsuwayi.

¹ Israelitanaka, Tatitun arunakap ist’apxam, Egipto uraqit irpsunki uka markar arsut arunaka: ² “Taqi markanak taypitxa, jumanak saparukiw ajllisipxsma. Ukat taqi jan wali ñanqhanak lurapxatanakamat taripapxäma”. ³ Mä amtakïsipki ukkhaw jaqix panini suma sarnaqapxixa; ⁴ kunsa katjki ukkhaw leonax ch’umin jach’at warari; manq’añax utjki ukkhaw león qallunakax putupan uxupxi; ⁵ kuna sipitarus jalt’ki ukkhaw jamach’ix uraqir jalaqtani; kunsa katthapki ukkhaw sipitax uraqin unxti; ⁶ trompetan phust’asitap markan ist’aski ukkhaw jaqix wal sustjasi; Tatitux kuns apayanki ukkhaw jan walinakax markan utji. ⁷ Tatitux janipuniw kunsa lurkaspati profeta luqtirinakapar jan yatiykasaxa. ⁸ ¿Khitirak jan sustjaskaspa leonan wararitap ist’asasti? Tatitutix parlam saspaxa, ¿khitirak jutir urunakat jan yatiykaspasti? ⁹ Asdod markankir reyi utanakapan yatiyapxam, Egipto markankir reyi utanakapan yatiyapxarakim: “Samaria uraqin qullunakapar jutapxam; uka markan utjir jan walt’añanakampi, t’aqhisiyañanakampi uñjapxam.” ¹⁰ Tatitux akham siwa: “Janiw jupanakax chiqa lurañ yatipkiti, reyi utanakapan ch’amamp lunthatat yänak imapxi.” ¹¹ Ukat Tatitux akham arsu: “Mä uñisir markaw uraqimarux taqi tuqit muyuntani, jach’a uyunakam t’unthapini, reyi utanakamatsa yänakam q’alak apsusiwäpxani.” ¹² Tatitux akham siwa: “Kunjämatix awatirix leonan lakapat pä chhuchhulliksa, jan ukax mä chikat jinchuksa aparasixa, ukhamaw Samaria markan jakir israelitanakat juk’aniki qhispipxani, Damasco markat apanit suma qunuñan qunt’asipki ukanakaxa.” ¹³ Taqi ch’aman Tatitux siwa: “Ist’apxam, Jacobun markapar qhanañchapxam, ¹⁴ Israel markaru jucha luratanakapat wayt’kä uka uruxa, Betel markan utjir yaqha diosanakar yupaychañ altaranakapsa t’unthapïwa; altaran uchat waxranakapsa, uraqirkamaw willthapirakï. ¹⁵ Thaya pachan qamañ utanaka, jallu pachan qamañ utanaksa t’unthapïwa, marfilat lurat utanaksa ch’usaruw tukuyä, reyi utanakapsa q’al tukjarakï.” Ukham siw Tatituxa.

¹ Samariankir qamir warminaka, aka arunak ist’apxam, jumanakax wajchanakaruw jachayapxtaxa, jan kunaniruw t’aqhisiyapxtaxa, chachanakamarusti, machañatak vino mayipxtaxa. ² Tatitux qullan kankañapan juramentompiw arsu: “Chinuñanakampi chinuntat apapkätam uka urux jutaskiwa; wawanakamas chawlla katuñampi katuntat apatäpxaniwa. ³ Pirqa p’iysutanak tuqi siqikiw mistuwayapxäta, ukatsti Hermón qullu tuqir aparpayatäpxätawa.” Tatitux ukham siwa. ⁴ “Betel markampiru, Guilgal markampir sarapxam, ¡ukansti juk’amp juchanak lurapxam! Qhantatitpach luqtäwinakam apapxam, sapa kimsa ururak tunkat maya churañäki uksa churapxam. ⁵ Jan levaduran t’ant’a nakt’ayas yuspagarasin waxt’äwi luqtasipxam, waxt’a churapkäta ukanaksa taqi chiqan yatiyapxarakim, ukham lurañaw jumanakatakix askixa.” Tatitux ukham siwa. ⁶ “Nayaw jumanakar taqi markanakaman manq’at awtjayapxsma; nayaw taqi chiqanakan jaqinakatak manq’añ pist’ayta, ¡ukampis jumanakax janiw nayan ukarux kuttanipktati!” Tatitux ukham siwa. ⁷ “Yapu apthapitak kimsa phaxsïkipan jallxa jan apayanipksmati. Mä markan nayax jallu puriyta, yaqha markansti janiw puriykti; mä chiqan jallux puriwa, mä chiqansti umatjamax uraqix wañsuwa. ⁸ Jaqinakax markat marka uma thaqhasax sarapxäna, umat pharjayasitanakapax janipuniw apaqtkänti; ¡ukampis jumanakax janiw nayan ukarux kuttanipktati!” Tatitux ukham siwa. ⁹ “Junt’u thayanakampiw mutuyapxsma, kunayman usunakampiw t’aqhisiyapxsma; panqar yapunakamsa, uva yapunakamsa pharsuyaraktwa; higo quqanakamsa, aceituna quqanakamsa t’iju t’ijunakaw manq’suwayxi; ¡ukampis jumanakax janiw nayan ukarux kuttanipktati!” Tatitux ukham siwa. ¹⁰ “Egipto markar apaykäyäta uka pachpa t’aqhisiñ jumanakarux apayanipxsma, waynanakarusti nuwasïwinakan jiwarayta, caballonakapsti uñisirinakaruw katxaruyta; nuwasïwin jiwaratanakan q’aphinakapsa mukhirayaraktwa, ¡ukampis jumanakax janiw nayan ukarux kuttanipktati!” Tatitux ukham siwa. ¹¹ “Kamisatix Sodoma markampiru, Gomorra markampir nayax tukjkta, ukham jumanakarux tukjapxaraksma; ninat apsut sank’ar uñtatäpxayätawa, ¡ukampis jumanakax janiw nayan ukarux kuttanipktati!” Tatitux ukham siwa. ¹² “Ukhamïpan, Israel marka, jumarux ukhamarak mutuyäma; uksti nayax lurapunïwa, ¡Diosamampi jikisiñatak wakicht’asim!” ¹³ Khititix qullunaksa sayt’ayki, thaysa lurki, jaqirus amtäwinakap yatiyki, qhansa ch’amakt’ayki, jach’a qullunak patanakansa sarnaqkaraki, ukan sutipax Taqi ch’aman Tatituwa.

¹ Israelitanaka, arunakax ist’apxitaya; jumanak tuqi arsuta llakisiñ arunaka: ² Suma q’uma Israel markax tinkxiwa; jan mayampi sartkiriw liwisxi. Pachpa uraqipxar liwitattataw qhipari, janiw khiti waytiris utjkiti. ³ Tatit Diosax israelitanakar akham siwa: “Mä markatix waranqa chachanaka nuwasiñar khithanixa, patakanikiw kutt’anxani; mä markatix patak chachanaka khithanixa, tunkanikiw kutt’anxarakini.” ⁴ Tatitux israelitanakar akham siwa: “Nayar thaqhapxita, ukatsti jakasipkätawa. ⁵ Betel markar jan thaqhapxamti, Guilgal markarus jan sarapxamti, janirak Beerseba marka chiqsa sarakipapxamti, Guilgal markasti katuntat apatäniwa, Betel markasti q’ala t’unjatarakïniwa”. ⁶ Tatitur thaqhapxam, ukatsti jakasipkätawa; jan ukham lurapkäta ukasti, jupax Israel markarux nina apayanini, janirakiw uk jiwayirix khitis Betel markan utjkaniti. ⁷ ¡Ay kunakïkan jumanakatakixa, chiqa kankañsa k’allk’uruw tukuyapxtaxa, aski kankañarusa takichasipxaraktawa! ⁸ Tatituw jan jakt’kay warawaranak luri, jupaw ch’amak arumar qhanjtayi, uru qhansti ch’amak arumar tukuyaraki; qutankir umanaksa qinayanak tuqiw waña uraqir warxati; jupaw ch’aman jaqinakarux atipji, markan jach’a pirqanakapsa allinuku. Sutipasti, Tatitu Diosawa. ¹⁰ ¡Ay kunakïkan jumanakatakixa, chiqap uñjirirux uñisipxtawa, chiq qhanañchañatak sayt’irirus ñanqhachapxtawa! ¹¹ Janiw qalat lurasipkta uka suma utanakan jakapkätati, janirakiw uka suma uva yapunak yapuchasipkta ukatsa vino umapkätati, wajchanakar jisk’achapxatamata, trigotsa impuestonak apsupxatamata. ¹² Nayax ñanqha luratanakam yattwa, walja juchanakamsa uñt’araktwa: aski jaqirux qullqi chilltayasisaw t’aqhisiyapxtaxa, taripañ utanakansti wajchanakan aynacht’añap thaqhapxtaxa. ¹³ Urunakan jan walïxatapatxa, yatiñan jaqinakax janiw parlañ munkxapxiti. ¹⁴ Kunatix askïki uk thaqhapxam, jan walïki uksti apanukupxam, ukhamat jakapxañamataki. “Taqi ch’aman Tatitux jiwasampïskiwa” sasa parlapxatamas ukhamat chiqarakïni. ¹⁵ ¡Jan walïki uk uñisipxam! ¡Sumäki uksti munapxam! Taripañ utanakan chiqapar uñjañax utjpan; inach taqi ch’amani Tatitux Israel markat jilt’irinakarux khuyapt’ayasispa. ¹⁶ Taqi ch’aman Tatitux akham siwa: “Taqi plazanakan jachañax utjani, marka thakhinakansti warariñanakaw utjani, pampan utjasirinakarusti llakisiñat jachiritakiw jawsapxani, jachañatak jawsatanakasti juk’ampiw jachapxani. ¹⁷ Kunapachatix nayax mutuyir jutkä ukkhaxa, taqi uva yapunakan jachapxani.” Ukham siw Tatituxa. ¹⁸ ¡Ay kunakïkan Tatitun urup puriniñap munirinakatakixa! ¿Kunjämäkanitix jumanakatak uka urux uk yatipxtati? Uka urux ch’amakäniwa, janiw qhanäkaniti. ¹⁹ Kunjämatix mä jaqix leonan nayraqatapat jaltkasax mä osompirak jalthapki ukhamäniwa, jan ukax, maynix utapar mantasin amparap pirqar aykatasa katarimpi mich’intayaski ukhamäniwa. ²⁰ Jïsa, Tatitun urupax ch’amakäniwa; janiw qhanäkaniti; laxa ch’amakaruw tukuni, janiw akch’a qhanas utjkaniti. ²¹ “Nayax jumanakan uruyañ urunakam uñistwa, janiw yäqkaraktsa, jach’a tantachasïwinakamas janiw kusisiykituti. ²² Nayar jach’añchasa wilañchanak luqtäwinakam janiw munkti, janirakiw granonakat waxt’anak luqtapkista ukanak munkti; janiw katuqkäti lik’i vaca qallunak sumankthapiñ wilañcha luqtatanakamsa. ²³ ¡Q’uchutanakaman uxutap nayat jithiqayapxita! ¡Janiw arpa jat’itanakamsa ist’añ munkti! ²⁴ Ukat sipana, chiqapar uñjäwix walja umanakjam jalpan, askin sarnaqañasti jalsur umjam jan tukuskirïpan. ²⁵ “Israelitanaka, jumanakax pusi tunka mara wasaran sarnaqkasaxa, janipuniw waxt’äwinaksa, wilañchanaksa luqtapkistati. ²⁶ Ukampis jichhax Sicut, Quiiún, jumanakan lurat uka diosanakam apasxapxañamäniwa. ²⁷ Jumanakarux Damasco markatsa juk’amp jayaruw jaqunukupxäma.” Taqi ch’aman Tatitux ukham siwa. Ukarakiw sutipaxa.

¹ “¡Ay kunakïkan Jerusalén markan samarat jakirinakatakixa! ¡Ay kunakïkan Samaria markar katuyasit jakirinakatakixa, wali aytat markan jach’a jilïrinakaparu khitinakarutix israelitanakax yanap mayipki ukanakataki! ² Calné markar sarasin uñjapxam; uka chiqat Hamat jach’a markar sarapxam, ukatsti filisteonakan Gat markapar saraqapxarakim. ¿Jumanakasti uka markanakat sipan juk’ampi sumäpxtati? ¿Jumanakan uraqinakamax, uraqinakapat sipan juk’ampi sumacha? ³ Jumanakax uka jan wali urutxa janiw amuyt’añ munapktati, jumanakpachaw jach’a t’aqhisiñanak mayisisipktaxa. ⁴ Jumanakax marfilat k’achachat suma ikiñanakan winkurapxtaxa, jach’a manq’äwinakansa suma qunuñanakxaru qunurata; ovej qallunakampi, lik’i vaca qallunakampi kharsuyasin manq’asa; ⁵ pinkill phust’asax kunayman jayllipxtaxa; Davidjamaw yaqha phust’añanak lurasipxtaxa; ⁶ jach’a tilinkinakat vino umapxtaxa, suma q’apkir qullanakampiw jawsusipxtaxa, ¡ukampis markan t’unjäwipat janiw akch’sa llakt’asipktati! ⁷ Jumanakaw katuntatanakat nayraqata, jayar apayata uñjasipxäta jach’a manq’äwinakaman uxuñanakasti tukusxarakiniwa.” ⁸ Taqi ch’amani Tatit Diosaw qhanpach arsu akham sasa: “Jacobun markapan jach’a jach’a tukutap uñistwa, reyi utanakapsa uñistwa; marksti uñisirinakaparuw katxaruyä, kunatix ukan utjki ukanakamppach katxaruyäxa.” ⁹ Ukapachasti, tunka chachatix mä utan qhiparanixa, tunkanpachaw jiwarani. ¹⁰ Axsarañasti wali jach’apunïniwa, maynitix wila masipan jiwat janchipa waytas utat anqar apsuni ukkhaxa, utankiriruw jiskt’ani: “¿Khitimpich utjaski?” sasa. Utankiristi: “Janiw utjkiti” saniwa. Maynïristi sarakiniwa: “¡Amukt’am, Tatitun sutipraki akatjamat arsuskasma!” sasa. ¹¹ Tatitun mutuyäwipax jach’a utanakxarusa, jisk’a utanakxarus purininiwa, ukanakasti q’ala tukjatarakïniwa. ¹² ¿Caballonakax qarqanak patanjam jalapxaspati? ¿Quta taypin qhulliñax wakisispati? ¡Jumanakax chiqa kankañxa jiwayir qullaruw tukuyapxtaxa, aski luräwin achupsti k’allk’uruw tukuyapxaraktaxa! ¹³ Jumanakax jan kunatak kusisipxtaxa, sapxaraktawa: “Munañanïñxa kipka ch’amasampiw jikxatastanxa” sasa. ¹⁴ Israelitanaka, sum amuyt’asipxam; Taqi ch’amani Tatitux siwa: “Nayax jumanakar jan walt’ayir yaqha marka sartayä, uka markaw jumanakarux t’aqhisiyapxätam, amsta tuqit qalltasa, aynach tuqir tukuyasa.”

¹ Tatitux aka uñjäwi uñacht’ayitu: Tatituruw uñjta t’iju t’ijunak luraskiri, kunapachatix qhipa sata yapux alinuqaskäna ukkha, ukasti reyin yapup apthapitat qhiparuw lurasïna. ² Kunapachatix t’iju t’ijunakax qhipa ch’uxñanakamppacha manq’antkäna ukkhaw sista: —¡Tatay, pampacht’apxita! ¿Kamisarak taqi akanak mutupxästi? Nanakax mä jisk’a markakïpxstxaya —sasa. ³ Ukatsti Tatitux uka amtäwip phuqhañ suyt’xiwa, ukat saraki: —¡Janiw kuna mutuyañsa apayankxäti! —sasa. ⁴ Tatitux aka uñjäwi uñachayarakitu: Jiwasar mutuyañatak mä nina sank’a apayanir uñjta, uka ninasti jach’a qutxa manqhatpach q’al wañsuyäna, yapunaksa q’al nakhantäna. ⁵ Ukat Tatitur mayta: —Tatay, suyt’akim, ¿kamisarak Jacob jisk’a markamasti uka taripäwim mutunisti? —sasa. ⁶ Tatitusti uka amtäwip phuqhañ suyt’xiwa, ukatsti sarakiwa: —¡Janirakiw uka ninsa apayanipkämati! —sasa. ⁷ Tatitux ak uñacht’ayarakitu: Jupasti mä uyu pirqa jak’ankaskänwa, uta luririn plomadap apt’ata. ⁸ Ukatsti jiskt’ituwa: —¿Amós, kuns uñjta? —sasa. Nayasti jupar sistwa: —Uta luririn plomadap uñjta —sasa. Ukatsti sarakituwa: —Uñtam, nayax uta luririn plomadapampiw Israel markaxan sarnaqäwip uñjä. Janipuniw mayampsa juchanakap pampachkäti. ⁹ Isaacan utjir yaqha diosanakapar yupaychañ altaranakapas tukjatäniwa, Israel markan yupaychañ utanakapas laqayar tukuyatarakïniwa. ¡Nayasti Jeroboaman utapar tukjañatakiw sartä! ¹⁰ Betel markan Amasías sacerdotepaxa, Israel markan Jeroboam reyipar yatiyiriw khiti: “Amós chachax israelita jaqinakaruw jumar ñanqhachañatak amtayaski. Markasti janiw juk’ampi ukham parlaykaspati. ¹¹ Amós chachax akham sasaw sarnaqaraki: ‘Jeroboam reyix ch’axwäwin jiwayatäniwa, israelitanakasti jaya markar apanukutäniwa’ ” sasa. ¹² Ukatsti Amasías sacerdotex Amós profetarux sarakïnwa: —¡Profeta, akat jayar sarxam! Jumatix jutir urunakat parlas sarnaqañ munsta ukaxa, Judá markar sarxam; ¹³ ukampis Betel markan jan juk’amp parlkxamti, akax reyin qullan utapawa, markpachan waqaychañ jach’a utaparakiwa —sasa. ¹⁴ Amós profetasti akham sasaw aruskati: —Janiw nayax profetäkti, janiw profetan wawapäkaraktsa. Nayax ovej awatirikïtwa, pampa higonak apthapisis jakasirikïtwa, ¹⁵ ukampis Tatituw ovej awatiskirit nayar jawsitu, ukat sarakitu: ‘Saram, Israel markar nayan sutixampi parlanim’ sasa. ¹⁶ Ukhamasti jichhax Tatitun arup ist’am. Jumax akham sistawa: ‘Jan kunsa Tatitun sutipxar Israel markatak parlamti, janirak Isaacat saraqir wawanakapatakis parlamti’ sasa. ¹⁷ Ukat Tatitux akham sixa: ‘Warmimasti markan uñjkataw yaqha chachanakampi sarnaqani, yuqanakamas phuchhanakamas espadampi jiwarayatäpxaniwa; uraqinakamsa yaqhanakaw katuntasipxani, jumasti Tatitur jan uñt’ir jaqinakan uraqipan jiwarakïta, israelitanakasti katuntata, uraqipat jayar apatäpxarakiniwa’ sasa.

¹ Tatitux akham uñacht’ayitu: Puqurat achunakaw mä walayan utjäna, ² jupasti jiskt’arakituwa: —¿Amós, kuns uñjtaxa? —sasa. Nayasti jupar sistwa: —Mä walayan puqurat achunak uñjta —sasa. Tatitusti sarakituwa: —Israel markax uka achunakjam puquratäxiwa; janipuniw mayampsa juchanakap pampachkxäti. ³ Uka urux reyin jach’a utapan q’uchutanakax llakisiñaruw tukuni. Walja jaqinakaw jiwarapxani, jiwat janchinakapasti anqar jaqtatarakïniwa. Tatituw ukham arsu. ⁴ Ist’apxam, llamp’u chuyman jaqinakar t’aqhisiyirinaka, markankir jan kunaninakar tukjirinaka; ⁵ jumanakax sapxtawa: “¿Kunapacharak wawa phaxsi phunchhäwi urusti tukusxani trigo aljasiñasatakisti? ¿Kunapacharak samarañ urusti tukusxani, balanza tupunak jisk’aptayas jilar aljañatakisti? ⁶ ¡Jan kunaninakarux aynacht’ayapuniñäni, jupanakpacha jiwasar luqtirit aljasiñapkama, ukhamat manunakap phuqhañataki, mä paris wiskhuksa manüsipkpan ukasa! ¡Trigo achunaksti jipimppach aljañäni!” sasa. ⁷ Tatitusti, Israel markan jach’a kankañap laykuw juramento luri: “Janipuniw markaxan jan wali luratanakap armkäti” sasa. ⁸ Ukhamïpansti, ¿janit uraqisti khathatkanisti? ¿Janit jaqinakasti jachapkanisti? ¡Kunjämtix Nilo jawiran umax jilxataraki wañaqaraki, ukhamaw uraqix uñstani, chhaqtarakini! ⁹ Tatitux siwa: “Uka urunsti, chika uruw intirux ch’amakt’ayä, qhanaskir urunpach uraqir ch’amakt’ayä. ¹⁰ Phunchhäwi urunakamxa jiwatanakat jachañaruw kipstayä, q’uchutanakamasti, amaya imäwi llakinakaruw tukuyarakï; llaki isimpirakiw isthapisiyapxäma, llakisiñat p’iqinakam q’ararasipxäta. Sapa yuqall wawap jiwayasir jaqir uñtataw jachapxäta, taqi kunaw jachañar tukuni. ¹¹ Urunakasti jutaskiwa siw Tatituxa. Uka urunakaw uraqirux mach’a apayanï; janiw manq’añ mach’äkaniti, umat pharjayasiñ mach’äkanisa, jan ukasti Tatitun arupat ist’añ mach’äniwa. ¹² Tatitun arup thaqhasaw jaqinakax, inaki maysat maysa sarnaqani, mä qutat mä qutakamaw sarapxani, inti jalsu tuqit qalltasa, inti jalanta tuqikama, amstat aynachkamaw thaqhapxani, ukampis janiw jikxatapkaniti. ¹³ Uka urux, suma tawaqunakampi, ch’aman waynanakampix, umat pharjayasis jan ch’amaniw thayjtawayapxani. ¹⁴ Samaria markankir k’ari diosanakan sutipxar juramento luririnaka; khitinakatix sapki: ‘Dan markan diosap layku’, ‘Beerseba markan diosanakap layku’ sasa, ukanakax jan mayampi sartañatakiw jiwarapxani.”

¹ Tatiturux altar jak’ankaskir uñjta, jupasti situwa: “Uta pirqar k’uphantam piläranakap unxtayañkama; ¡ukhamat jaqinakxar allxattasin jiwaraypan! Qhiparapkani ukanakarusti espadampiw jiwarayä: inakiw jaltañsa munasipkani, janipuniw maynis qhispkaniti; ² inakiw manqhapachkam saraqasin imantasisipkani, ukawjatsa waysusinkakïwa; inakiw alaxpachkamas makhatasipkani, ukawjatsa wayuqasinkakïwa. ³ Carmelo qullu patarus imantasisipkpan, ukakamas thaqhirix saraskakïwa; quta manqharus nayat imantasisipkpan, quta manqhankir laq’ur khithasaw nayax tukjayä; ⁴ uñisirinakapas yaqha markar katuntat apasipkpan, ukansa espadampi jiwarayatäpxañapatakiw mayirakïxa. ¡Jupanakarux uñch’ukiskakïwa, nayranakaxax jan walitakiw jupanak uñch’ukini, janiw askitak uñch’ukkaniti!” ⁵ Taqi ch’aman Tatit Diosax uraqiruw takt’i, uraqisti umatatiwa, jaqinakapax uk uñjasax taqiniw jachapxi. Kunjämatix Nilo jawiran umax jilxatti, wañaqaraki, ukhamaw uraqix uñstani, chhaqtarakini. ⁶ Tatitux alaxpacharuw utap sayt’ayi, qalltapsti uraqxaruw utt’ayi, juparakiw qutat umanak jutayi, uka umanakampiw uraqirux warxati. Sutipasti Tatituwa. ⁷ Tatitusti israelitanakarux akham siwa: “Nayatakix jumanakasa, etiope jaqinakas mayakïpxtawa. Kunjämtix jumanakar Egipto markat irpsunipksma, ukhamarakiw filisteonakarux Creta wat’at irpsunta, arameonakarusti Quir sat markat irpsunirakta.” ⁸ Tatitux aka jucharar markarux wal uñch’ukiski, ukatsti sarakiwa: “Aka uraqit jupanakarux q’al chhaqtayä, ukampis Jacobun utapankirinakak jilt’ayä. Uksti, naya, Tatituw arsta. ⁹ Israel markan jawq’sutäñapatakix nayaw arsü, susuñampi susurpayañataki, kamisatix mä susuñat sususax, mä trigosa uraqir jan jalaqtayaski ukhama. ¹⁰ Markaxan taqi jucharar jaqinakax espadampi jiwarayatäpxaniwa; khitinakatix sapki: ‘Janiw ukanakax ukham luraskaniti, janirakiw kuna jan walis katjkistaniti’ sasa. ¹¹ “Davidan tinkut utap wasitat sayt’ayañ urux jutaskiwa. Pirqa p’iysutanaksa phuqhantäwa, pirqa tinkutanaksa wasitat sayt’ayä, kunjamäkäntix nayrapachax ukham lurt’arakï, ¹² Edom markan jilt’irinakasa, taqi markanakasa, sutix aytasipki ukanakasa, wasitat Israel markan apnaqatäpxaniwa.” Tatituw ukham arsu, ukasti phuqhasipuniniwa. ¹³ “Urunakasti jutaskiwa, ukkhaw trigo yapu apthapisipkani ukapachax yapux qhulliñäxarakiniwa, janïraw uva apthapisax ch’irwañ tukuyapkaniti, ukkhasti trigox phawañäxarakiniwa. Jach’a qullunaka, jisk’a qullunak tuqsa vinox umjamaw jalani. ¹⁴ Ukkhaw Israel markarux jaya markar apanukutat kuttayanï. Jupanakaw t’unjat markanak wasitat sayt’ayapxani, ukan jakasipxarakini; uva alinak ayruntapxani, jupanakan vinop umapxani, yapuchasinsti, achunakap manq’apxarakini. ¹⁵ Nayaw jupanakarux kipka uraqinakapar ayruntä, ukatsti janiw mayampis jupanakar churat uraqit jik’suta uñjasipkaniti.” Tatitu Diosaw uk arsu.