2 TIMOTEO

¹ Munat Timoteo: Jumaruw aruntansma, taqi chuymaxampiw Dios Awkisaru, ukhamarak Tatit Jesucristosarux mayta munasiñapampi jumar phuqt’añapataki, taqi kunan yanapañapataki, samarañapsa churañapataki. Kunjämtix nayrax siskäyäsma, nayax Criston apostolupätwa sasa. Diosaw qhispiyasiñ arunakap yatiyañatak nayar khithitu, juparakiw Jesucristo tuqi wiñay jakañ katuqañaxatak arsuwayi. ³ Arumas urus Diosat mayiskasax jumat nayax amtasipuntwa, ukat Diosarux yuspagarta, juparurakiw q’uma chuymaxamp arkta, kunjämtix nayra awkinakaxax lurapkän ukhama. ⁴ Jachatamat amtasipuntwa, ukat uñjañ munirisma wal kusisiñaxataki. ⁵ Chiqpach iyawsäwinïtamat amtasipuntwa. Nayraqatax Loida awichamampi, Eunice taykamampiw uka iyawsäwinïnxa, jumas uka pachpa iyawsäwinirakïtawa. ⁶ Ukat nayax jumar maysma, Diosan aski churäwip juk’amp jach’aptayañamataki, uksti amparaxamp luqxatkäyäsma ukkhaw katuqtaxa. ⁷ Diosax janiw axsarañ ajay churkistuti, jan ukasti ch’amañchir ajayu, munasir ajayu, sum amuyt’ayir ajay churistu. ⁸ Tatitusat yatiyañ jan p’inqasimti, Jesucristo layku katuntat uñjasitaxatsa janirak p’inqasimti. Ukatsipana, Diosan ch’amapampix kuna t’aqhisiñanakatix suma yatiyäwi layku jumatak jutkan ukatakix wakicht’asim. ⁹ Diosaw qhispiyistu, ukatsti qullan markap sayt’ayañatakiw jawsistu, ukasti janiw jiwasan kuna aski luratas laykükiti, jan ukasti jupan amtäwip laykuwa, Diosasti aka uraqix janïra utjkän ukkhatpach munasistäna, ukkhatpacharak Jesucristompix mayachatäxtan. ¹⁰ Jichhasti, Qhispiyir Jesucristos tuqiw uka munasiñapax uñacht’ayasi, jupaw jiwan ch’amap t’unjawayi, suma yatiyäwinak tuqiw wiñay jakañ churawayi. ¹¹ Diosaw nayarux apostoluta, yatichirita, uka suma yatiyäwinak qhanañchir khithitu. ¹² Ukat taqi akanak t’aqhista. Ukampis janiw ukanakat p’inqaskti, nayax yattwa khitirutix iyawskta uka; tukuy urukam qhispiyasiñ arunak qhanañchañatak ch’amanïtapsa yatiraktwa. ¹³ Kuna suma yatichäwtix nayax churksma ukat janipun saraqamti, Diosarux taqi chuymapun katuyasim, Jesucristompi mayachatäktan uka munasiñarus katuyasirakim. ¹⁴ Jiwasanakan jakki uka Qullan Ajayun yanapapampix, kuntix Diosax katuyktam uk imapunim. ¹⁵ Niy yattawa, Asia suyunkirinakax taqpachaniw jaytanukupxitu; Figelo, Hermógenes jilatanakamppachaw sapak jaytapxitu. ¹⁶ Tatituy Onesiforon wila masipat khuyapt’ayaspan, jupasti walja kutiw chuymachitu, janirakiw nayan katuntat uñjasitaxat p’inqaskiti. ¹⁷ Ukatsipana, Roma markar purinisasti, jupax jan inakt’asaw nayar jikxatañkam thaqhitu. ¹⁸ Taripäwi urunxa Tatitux jupat khuyapt’ayaspan. Jumax askiw yattaxa, Éfeso markan yanapkistän ukanakxa.

¹ Jumasti wawaxa, Diosax Cristo Jesús tuqi munasiñap uñacht’ayktam ukamp ch’amañchasim. ² Kuntix walja jaqinak nayraqatan arsur ist’kista ukanakxa, phuqhañatak wakicht’atäpki, yatichañatakis wakicht’atäpki ukanakar yaticht’am. ³ T’aqhisiñanakamansti Jesucriston chiqpach soldadopjam t’aqhisim. ⁴ Janiw khiti soldados cuartelankkasin yaqha luräwinakar uchaskiti, jan ukasti jilïripan arsutaparjam sarnaqañapawa. ⁵ Uka pachparakiwa, khititix anatañar uskuski ukax, churäwi katuqañatakix anatañ kamachinakar phuqhañapaw wakisi. ⁶ Khititix yapun irnaqki ukax, wakisiw irnaqatapat nayraqat achu katuqañapaxa. ⁷ Sisksma uka arunakat lup’ipunim, Tatitusti taqi ukanak amuyt’añamatakiw yanapt’ätam. ⁸ Jesucristot amtasim, aka qhispiyasiñ arunak yatichataxarjamasti, Jesusax David reyin wila masipat jutirïnwa, jupasti jiwatanak taypit jaktawayarakïna. ⁹ Tatitun arunakap laykuw nayax t’aqhisiskta, jaqi jiwayirïkiristsa ukhamaw cadenamp chinuntat uñjasta; ukampis Diosan arunakapax janiw chinkatatäkiti. ¹⁰ Ukat taqi kunsa t’aqhista Diosan ajllitanakapar munasitax layku, jupanakan qhispiyasipxañapataki, Jesucristo tuqi wiñay jakañ katuqapxañapataki. ¹¹ Akax chiqawa: Jupampitix jiwstanxa, jupampirakiw jakañäni; ¹² t’aqhisiñänitixa, jupampirakiw jakañäni; jan uñt’iritix tukuñänixa, jupax jan uñt’iriw tukurakistani; ¹³ janitix chiqa chuymamp arkkañänixa, Cristox janiw armaskistaniti, jupa pachpa jan armasirïtap layku. ¹⁴ Tatitun nayraqatapan jan ch’axwapxañapatak iwxt’as amtayam. Ch’axwañax janiw kunatakis askïkiti, jan ukasti khitinakatix ist’apki ukanakar mayjt’ayirikiwa. ¹⁵ Kunäkipansa, Diosan nayraqatapan suma irnaqirjam uñstañatak ch’amachasim, jan kunat p’inqa tukur irnaqir jaqjama, Tatitun chiqa arunakap yatichirjama. ¹⁶ Ñanqha arunak arsuñanak apanukum, uka parlirinakax jan wali luräwinakaruw jalantapxi, ¹⁷ yatichäwinakapasti janchir tukjir usjamaw tukunti. Ukapï Himeneompiru, Filetompirux tukuntixa, ¹⁸ jupanakasti chiqa arut maysaruw saranukupxi: “Jiwatat jaktañax niyaw lurasiwayxi” sasa, uka arunakampiw mayninakan iyawsäwinakap mayjt’ayas sarnaqapxi. ¹⁹ Ukampis Diosax mä suma jan unxtkay qalltäwi uskuwayi, ukansti akham sas qillqantatawa: “Tatitusti jupankirinakarux uñt’iwa”; ukatsti “Taqi khitinakatix iyawsirïpki ukanakax, taqi jan wali luräwinakat jithiqtañapawa” sasa. ²⁰ Mä jach’a utanxa janiw qurit qullqit lurat yänakakit utjkixa, jan ukasti lawata, ñiq’it lurat yänakax utjarakiwa; mayanakax jach’a urunakan apnaqañatak uchatawa, mayanakasti inürunakan apnaqañatak uchatarakiwa. ²¹ Khititix jan wali lurañanak apanukunixa, jach’a urun apnaqañ yänakar uñtatäniwa; Tatitutak qullanaptayat aski lurir jaqïniwa, aski lurañatakis jasakirakïniwa. ²² Waynanakan jan wali amtäwinakapat jithiqtam, ukatsti aski kankaña, iyawsaña, munasiña, sumankañ thaqham, khitinakatix Tatitur q’uma chuymamp mayipki ukanakamp chika. ²³ Luqhi ch’axwanakarux jan yäqamti, ukanakax jan kunatak askiwa, nuwasiñanakar puriyirikiwa. ²⁴ Tatitun luqtiripax janiw nuwasiñanakan sarnaqañapäkiti, jan ukasti, taqinimpis sumankañapawa. Yatichañatakix suma wakicht’atäñapawa; llamp’u chuymanïñapawa, ²⁵ jan ist’asirinakarus llamp’u chuymamp iwxt’añaparakiwa, inampis Diosax jan wali luräwinakapat kuttayasinkaspa, ukhamat jupan chiqa arunakap uñt’apxañapataki, ²⁶ p’arxtapxañapataki, ukatsti supayan sipitapat jaltapxañapataki, khititix katuntasin munañapar apnaqki ukata.

¹ Qhipa urunakan jan wali urunakaw jutani, uksti yatiñamawa. ² Jaqinakax mich’aw tukupxani, qullqi munirinaka, jach’a jach’a tukurinaka, kunsa jilamp munirinaka. Diosat jan wal parlirinaka, awkir taykar qallasirinaka, sallqanaka, Diosar arkañarus jan yäqirinaka. ³ Jan munasirinaka, jan khuyapayasirinaka, arunak apnaqirinaka, ñanqha lurañanak jan apanukurinaka, qhurunaka, aski luräwinakar uñisirinaka. ⁴ Aljantasir ch’uxña chuymaninaka, jan p’inqaninaka, jach’a jach’a tukurinaka, Diosar thaqhañat sipansa, jupanakan kusisiñap thaqhirinakäniwa. ⁵ Jupanakax Dios chuymäkaspas ukhamaw tukupxani, ukampis luräwinakapampix Diosar chiqpach arkañ apanukupxani. Uka jaqinakampix janipun chikachasimti. ⁶ Jupanakasti, uka jucharara, luqhi warminakar sallqjiriw utanakapar mantañ yatipxi, uka warminakasti janchin munañap lurañamp phuqhantatäpxiwa, ⁷ yatiqasipkiwa, ukampis janiw kunapachas chiqa arunak amuyt’añar puripkiti. ⁸ Kunjämatix Janes, Jambrés uka jan wali jaqinakax Moisesar saykatapkatayna, uka pachparakiw uka jaqinakax Tatitun chiqa arunakapar saykatapxi. Uka jaqinakasti ñanqha lurañar jichuntat jan wali amtanïpxiwa, iyawsäwin aynacht’at jaqinakäpxarakiwa. ⁹ Ukampis janiw nayrar juk’amp sarantapkaniti, taqi jaqiw jupanakan pisi amuyun jaqinakätap amuyapxani, kamisatix Moisesar saykatapkän uka jaqinakan pisi amuyupax qhanstkän ukhama. ¹⁰ Ukampis jumax yatichäwixar arkapuntawa, ukhamarak sarnaqataxaru, amtäwixaru, iyawsäwixaru, llamp’u chuymanïtaxaru, munasiñaxaru, ch’amampi sayt’asiñaxaru, ¹¹ jumax askiw yatta kunatix Antioquía markana, Iconio markana, Listra markan t’aqhiskäyät ukanakxa. ¡Ukataq arknaqataw uñjasiyäta! Ukampis Tatitux taqi ukanakat qhispiyitu. ¹² Cristo Jesusar katuyat jakañ munapki ukanakax ukham t’aqhisiyatäpxaniwa; ¹³ ukampis salqjir jan wali jaqinakax jan walit juk’amp jan waliruw puripxani, sallqjasina, ukhamarak sallqjayasisina. ¹⁴ Ukampis jumax kuntix yatiqkta, ukat iyawskarakta ukarux jan pächasis arkam. Jumax askiw yatta khititix yatichkäyätam uka. ¹⁵ Ukhamarus jumax wawatpach Tatitun arunakap yattaxa, uka arunakaw yatichätam, Cristo Jesusar iyawsatam laykuw qhispiyasiñar irparakïtam. ¹⁶ Taqi Qillqatax Diosan amuyt’ayat arunakawa, ukasti yatichañataki, iwxt’añataki, chiqachañataki, q’uma jakañan sarnaqañ yatichañatak wali askiwa, ¹⁷ ukhamat Diosar luqtirinakan wali yatiñanïpxañapataki, aski luräwitak suma wakichatäpxañapataki.

¹ Diosan nayraqatapana, Tatit Jesucriston nayraqatapana, khititix jiwatanakaru, jakirinakaru taripir Reyjam jutkani ukan nayraqatapan wal iwxt’sma, ² Tatitun arunakap parlam; wakiski ukkhasa, jan wakiski ukkhas parlapunim. Amuyt’ayam, iwxt’arakim, taqi llamp’u chuymamp yatichas ch’amañcham. ³ Jaqinakax, aski yatichäwir jan ist’añ munapkan uka urux purininiwa; jupanakax munañaparjamakiw kunayman yatichirinak thaqhasipxani; kunjämtix jupanakax yatichayasiñ munapkan uk ist’añatakiki. ⁴ Chiqa arunak ist’añ janiw munapkaniti, k’ari arunakarukiw ist’apxani. ⁵ Ukampis jumax aski amuyumpipun sarnaqam, t’aqhisiñanak amuk mutum, qhispiyasiñ arunak parlañar uchasim, lurañanakamsa sum phuqharakim. ⁶ Nayan jiwañaxax niy jak’ankxiwa, jiwäwixax Diosatak mä wilañcha luqtäniwa. ⁷ Taqi kunan Diosar jaysañ laykux walpun ch’amachasiwayta, jichhasti jikxatawaytwa; jalañaxan tukuyäwiparuw purta, janipuniw iyawsañax chhaqhayasiwaykti. ⁸ Jichhax mä suma pilluw suyt’askitu, chiqapar taripir Tatituw khä urun churitani. Janiw naya saparukit churkitani, jan ukasti, taqi khitinakatix munasiñampi Tatitun jutañap suyt’asipki ukanakarux churarakiniwa. ⁹ Nayar uñjirix jank’akiy jutam; ¹⁰ Demasax jaytanukuwayxituwa, jupasti aka uraqin yänakaparuw juk’amp munäna, ukat Tesalónica markar sarawayxi. Crescentex Galacia tuqiruw sarxi. Titosti Dalmacia tuqiruw sarxaraki. ¹¹ Lucasakiw nayampïski. Marcosar thaqtam, ukatsti jumamp chik irpanim, jupasti irnaqäwixan yanapitaniwa. ¹² Tíquico jilatarux Éfeso markaruw khitta. ¹³ Jutkät ukkhasti patxar uchasiñ isi apanirapitäta, Tróade markan Carpon utapan jaytatäskiwa, ukatsti qillqatanakampi, ukanakat sipan, pergaminonak apanirapitäta. ¹⁴ Jiru liq’i Alejandrox jan walinakpun lurawayitu; Tatituw juparux kuntix nayar lurawaykitu ukat uñjaskani. ¹⁵ Jumasti uka jaqit walpun amuyasim, jupatakix jiwasan yatichäwinakasax janiw kuna askïkisa. ¹⁶ Kunapachatix jilïrinakan nayraqatapan arsuskäyät ukkhasti, janiw khitis yanapt’kitänti; taqiniw jaytanukuwayapxitu. Diosax janik uka luratapat juchañchaspati. ¹⁷ Ukampis Tatituw yanapt’itu, ch’am churarakitu, qhispiyasiñ arunak parlañaxataki, khitinakatix Tatitur jan uñt’apki uka jaqinakan ist’apxañapataki. Tatitux jiwañat qhispiyitu, leonan lakapatsa qhispiykitaspa ukhama. ¹⁸ Tatituw taqi jan walinakat imaskitani, alaxpach qhapaq markapar irpasaw qhispiyitani. ¡Jupax wiñayan wiñayapatak jach’añchatäpan! Ukhamäpan. ¹⁹ Priscilampiru, Aquilampir aruntarapita, ukhamarak Onesiforon wila masinakaparusa. ²⁰ Erasto jilatax Corinto markaruw qhipari, Trófimo jilatarusti Mileto markaruw usut jaytaniwayta. ²¹ Janïr jallu pachäkipan jutam. Akïrinakaw aruntanipxtam: Eubulo, Pudente, Lino, Claudia kullaka, maynïr jilatanakamp kunaw aruntanipxtam. ²² Tatit Jesucristox jumampipunïpan, Diosasti khuyapayasiñap taqi jumanakxar churpan.