2 TESALONICENSES

¹ Tesalónica iglesiankir munat jilatanaka, kullakanaka: Naya Pablompi, Silvanompi, Timoteo jilatampiw aruntanipxsma, Dios Awkiru, Tatit Jesucristor mayachatäpkta ukanakaru. Taqi chuymaw sapxsma, Dios Awkisay munasiñapampi jumanakar phuqt’pan, sumankañapsa churarakpan. ³ Munat jilatanaka, jumanakat Diosar yuspagarañax wakisipuniwa, kunatix askïki ukarjam lurasina, jumanakan iyawsäwimax jiltaskiwa, maynit maynikam munasiñas juk’amp juk’ampiw utjaskaraki. ⁴ Ukhamax Diosan iglesianakapan nanakpachaw kusisiñamp jumanakxat parlapxta, llamp’u chuymanïpxatamata, iyawsäwinakam t’aqhisiñ taypin uñacht’ayapxatamata, ukhamarak llakisisin t’aqhisipxatamatsa. ⁵ Taqi ukanakax, Diosan chiqapar uñjirïtap uñachayistu; Diosan qhapaq markapar mantañatak askïpxañamataki, uka laykuw t’aqhisisipkaraktaxa. ⁶ Ukampis khitinakatix jumanakar t’aqhisiyapktam ukanakar Diosan mutuyañapax wakisiwa, ⁷ ukat jumanak t’aqhisirinakar samarañ churañapataki, kunjämtix nanakar churapkitu ukhama. Ukasti kunürutix Tatit Jesusax ch’aman angelanakapampi uñstankan ukkhaw phuqhasini, alaxpachat nina lawranak taypinjam jutkan ukapacha. ⁸ Khitinakatix Diosar jan uñt’apki ukanakaru, Jesucristo Tatitusan suma yatiyäwi arunakap jan jaysapki ukanakar mutuyiriw jutani. ⁹ Jupanakasti wiñay t’unjañampi mutuyatäpxaniwa, ukatsti Tatitun nayraqatapatsa, jach’a kankañapatsa, ch’amapatsa jayar jaqunukutäpxaniwa, ¹⁰ kunapachatix Tatitux khä urun qullan markap taypin jach’añchayasir jutkani, Cristonkirinakas jupat muspharapkarakini ukapacha; jumanakasti kawkïr arunaktix churapksma ukarux iyawsapxtawa. ¹¹ Aka amtäwimpiw Diosarux jumanakatak mayipxapunta, Diosasarux aski jawsatapar tukuyañapatakiw mayipxta, ch’amapampisti kuntix jumanakax munapkta ukax phuqhaspan, kuna luräwinaktix iyawsäwi tuqi lurapkta ukas phuqhasirakpan. ¹² Ukhamat Jesucristo Tatitusan sutipax jumanak tuqi jach’añchatäni, jupasti Diosasana, Jesucristo Tatitun khuyapayasiñap tuqiw jumanakar jach’añchapxätam.

¹ Jichhasti jilatanaka, Tatit Jesucriston jutañapampita, jupampi jikisiñampit achikt’apxsma, ² janiy mäki amuyunakam mayjt’ayasipxamti, janirak kuna ajayun uñanchäwi arunakapampis mulljayasipxamti, janirak kuna arunak ist’asinsa, janirak kuna qillqat katuqasinsa “Tatitun urupaw purinxi” sas qillqatäki ukatsa mayjt’asipxamti. ³ Kunäkipansa jan sallqjayasipxamti. Ukampis janïr uka uru purinkipanxa, Diosar kutkatasirïñaw jutañapa, kunapachatix ñanqha jaqix uñstankan ukapacha, khititix t’unjañatak juchañchatäki uka. ⁴ Jupax Diosan sutip apki ukanakatak sayt’ir uñisiriwa, janiw Diosan yupaychatäñap munkiti, ukhamarus jupax Diosan utapan qunuñap utt’ayasi, Diosäkaspas ukham tukusa. ⁵ ¿Janit amtasipkta, jumanak taypinkasin ukxat parlataxsti? ⁶ Jichhasti jumanakax kunatix katxäski uk yatipxtawa, ukhamat pachapax janïr purinki ukapach uñstaniñapataki. ⁷ Ukampis jamasankir ñanqha amtäwix niy qallantaskiwa; jichhasti, uka taypin jark’xäsiski ukat apaqatäñapakiw wakisxi. ⁸ Ukatsti uka ñanqha jaqiw uñstanini, juparusti Tatit Jesusax lakapampi phust’asakiw tukjani, ukatsti kunapachatix k’ajkir jutäwipampi jutkan ukkhax jisk’aruw tukuyani. ⁹ Uka ñanqha jaqisti Supayan yanapt’ataw jutani; wali ch’amampi, uñanchäwinakampi, k’ari muspharkañ luräwinakampiw purinini. ¹⁰ Ukatsti kunayman ñanqhanak lurani, ukhamat khitinakatix ñanqhachäwir sarki ukanakar sallqjañataki, jupanakax qhispiyasiñ katuqañatakix janiw chiqa kankañar jaysañ munapkänti. ¹¹ Ukat Diosax pantjasiñampi sallqjayasiñatak katuyi, kunatix k’arïki ukar jaysapxañapataki, ¹² ukhamat taqi khitinakatix chiqa kankañar jan jaysapkän ukanakan juchañchatäñapataki, jan ukasti ñanqha luratanakapampi kusisirinaka. ¹³ Ukampis nanakan jumanakat Diosar yuspagarañax wakisipuniwa, Tatitun munat jilatanaka, Diosaw jumanakarux qalltatpach qhispiyatäpxañamatak ajllisipxtam, jupaw jumanakarux Qullan Ajay tuqi qullananakar tukuyapxtam, chiqa kankañar iyawsapxatamata. ¹⁴ Ukatakiw Diosax jawsapxtam, nanakax yatiyapksma uka Diosan suma yatiyäwi arunakap tuqi: ukhamat Jesucristo Tatitusan qhapaq kankañap katuqapxañamataki. ¹⁵ Ukhamasti jilatanaka, ch’aman sarantasipkakim, kuna yatichäwinaktix naya kipka yatichapksma, qillqat tuqis yatichapksma, ukanak jan armasipxamti. ¹⁶ Pachpa Jesucristo Tatitusasa, Dios Awkisasa khuyapayasiñap laykuw munasistu, ukatsti wiñay chuymachäwi, suyt’äwi churarakistu, ¹⁷ jupay chuymanakamar ch’amachpan, ch’aman sayt’ayarakpan, kunatix askïki uk arsupxañamataki, lurapxañamatakiraki.

¹ Jilatanaka, tukuyañatakix sapxsmawa, nanakatak Diosat mayipxam, ukhamat Tatitun yatiyäwi arunakapan jank’ak taqi chiqanakar puriñapataki, ukatsti kusisiñampi katuqatäñapataki, kunjämtix jumanak taypin katuqapkista ukhama. ² Ñanqha jaqinakat qhispitäpxañaxatak Diosat mayipxarakim, taqinin jan iyawsañanïtap layku. ³ Ukampis Tatitux phuqhiriwa, jupasti ch’amañchapxätamwa, taqi ñanqhatsa imapxarakïtamwa. ⁴ Tatitur iyawsañaw utjapxitu, kuntix jumanakar sapksma uk lurasipktaxa, jichhas lurasipkakïtawa. ⁵ Tatituy jumanakarux munasir tukuypan, kunjämtix Diosax munasiñapampi t’aqhisiñanakasan Cristo tuqi ch’amañchkistu ukhama. ⁶ Jilatanaka, Jesucristo Tatitusan sutipxaruw sapxsma, kawkïr jilatatix jan irnaqañ munki ukat jithiqtapxam, kuntix nanakax yatichapksma ukarjam jan sarnaqañ munirinakat jithiqtapxarakim. ⁷ Ukampis jumanakax yatipxtawa, kunjämtix nanakat yatiqasis jakapxañamäki uka: nanakax janiw jan irnaqas jumanak taypin jakapkti. ⁸ Janirakiw khitin manq’apsa inak manq’apkti, jan ukasti uruy arumaw ch’am tukupxta, jumanakatak jan llakïskañataki. ⁹ Chiqpachansa, jumanakat yanap mayiñax wakisïnwa, ukampis nanakax irnaqañaruw uchasipxta, ukhamat jumanakan nanakat yatiqasis sarnaqapxañamataki. ¹⁰ Kunapachatix jumanakampïpkäyät ukkhaxa, aka yatichäw churapxsma: “Khititix jan irnaqañ munki ukax janirak manq’kpati” sasa. ¹¹ Ukampis jumanakat yaqhipanakan jan kun lurasak sarnaqapxatap yatipxta, jan kun luras sarnaqasa. ¹² Ukham jaqinakarusti Jesucristo Tatitusan munañapxaruw iwxt’apxta: “Jakañatak llamp’u chuymamp irnaqapxpan” sasa. ¹³ Ukampis jumanakax jilatanaka, janiy aski lurañan qarjtapxamti. ¹⁴ Maynitix aka qillqatan sapksma ukar jan yäqkchixa, jupar sum uñt’apxam, janirak jupampix chikachasipxamti, ukhamat jupa pachpa p’inqasiñapataki. ¹⁵ Ukampis jan uñisirimpjam katxatasipkamti, jan ukasti mä jilatarjam iwxt’apxam. ¹⁶ Pachpa sumankañan Tatitux jumanakar sumankañ churpan, taqi pachana, kunayman tuqita. Tatitux taqi jumanakampïpan. ¹⁷ Naya, Pablox aka arunta pachpa amparaxampiw qillqanipxsma, taqi qillqatanakaxsa sutixampiw ukham qillqta. ¹⁸ Jesucristo Tatitusax khuyapayasiñap taqi jumanakar churpan.