2 PEDRO

¹ Nayax Simón Pedro, Jesucriston luqtiripätwa, apostoluparakïtwa. Aka qillqatsti, khitinakatix nanakjam mä suma iyawsañ jikxatapktas ukanakaruw qillqanipxsma, Qhispiyiri Jesucristo Tatitusan chiqätap layku. ² Munasiñampi, sumankañampix jumanak taypin jilarkir utjpan, Diosaru, ukhamarak Jesucristo Tatitusar uñt’apxatam layku. ³ Tatituw jach’a ch’amapampi churistu taqi kuntix jakañatak munktan ukanakxa, jupar munañsa churarakistu, khititix jach’a ch’amapampi, muspharkañ luräwinakapampi jawskistu ukar uñt’ayasa. ⁴ Ukanak tuqiw arsüwinakapsa churistu, uka arsüwinakapasti wali jach’anakawa, wali askirakiwa, ukhamat jumanakax Tatitun arsüwinakap tuqi, akapach q’añu luräwinakat jaltxasin Diosan aski kankañap katuqapxañamataki. ⁵ Ukatpï ch’amacht’asipxañamaxa, iyawsatanakamar suma luräwinakamp yapxatañataki; suma luräwinakarusti amuyt’asiñampi; ⁶ amuyt’asiñarusti, jumanakpach suma sarnaqañampi; jumanakpach suma sarnaqañarusti, llamp’u chuymampi; llamp’u chuymarusti, Diosar munañampi; ⁷ Diosar munañarusti, jilapurjam sarnaqañampi; jilapurjam sarnaqañarusti, munasiñampi. ⁸ Jumanakantix taqi akanakax utjani, ukatsti uk sum jilayapxarakïta ukkhaxa, jumanakan jakañamax janiw inamayatakïkaniti, janirakiw Tatiturus inamayatak uñt’apkätati. ⁹ Ukampis khitintix akanakax jan utjki ukaxa, mä juykhump sasiwa; nayra juchanakapat pampachatätapsa armxarakiwa. ¹⁰ Ukatpï jilatanaka, Diosax jumanakar markapankirïpxañamatakiw jawsapxtam, ajllisipxaraktam, wiñaya ukankirïñ munapxsta ukaxa, sum sayt’apxañamawa; jumanakatix taqi akanak lurapxätaxa, janipuniw aynacht’apkätati. ¹¹ Ukhamat Qhispiyir Tatit Jesucristosan markapar mantapxañamatakix punkunakax jist’aratäni. ¹² Ukatpï nayax taqi akanak jumanakarux amtayasinipkakïmaxa, yatipkta ukasa, yatichapktam uka chiqa arunakar iyawsas sayt’asipkta ukasa. ¹³ Nayan amuyataxatsti, wakisipuniw jakkasin jumanakar aka iwxa arunakampi amtt’ayañaxa. ¹⁴ Jesucristo Tatitusasti, jiwañaxan jak’ankxatap niy yatiyxarakituwa; ¹⁵ ukampis kunjämatsa wakisiyäwa, jiwatax qhipat jumanakax aka arunakat amtasisipkañamataki. ¹⁶ Kuna yatichäwinaktix jumanakar Jesucristo Tatitusan ch’amapxata, jutäwipxat yatichapksma ukanakax janiw jaqinakan aliq säwi arunakakïkänti, jan ukasti nanakaw nayranakaxamp Tatitun qhapaq kankañap uñjapxta. ¹⁷ Jesusaw Dios Awkit muspharkay aytat kankañ katuqäna, kunapachatix Diosan arupax jupar parlkäna qhapaq kankañapana, akham sasa: “Akaw munat Wawaxaxa, jupaw nayarux kusisiyitu” sasa. ¹⁸ Nanak pachpaw alaxpachat jutir uka aru ist’apxta, Tatitump chika qullan qullunkasipkäyäta ukapacha. ¹⁹ Ukhamat profetanakan yatiyäwipax juk’amp thurt’at uñjasi. Ukhamax uka arunakar ist’apxam, uka arunakaw Criston kuttaniñapkamax kunjämsa sarnaqapxäta ukanak yatichapxätam, jakañanakamsa sumaruw tukuyarakini. ²⁰ Ukampis nayraqatax aka tuqit amuyt’apxam: profetanakan qillqat arunakax janiw maynin aliq amuyt’apampiki qhanañchatäkaspati, ²¹ profetanakax janipuniw kunsa jaqin amuyuparjam parlapkänti, jan ukasti, jupanakax Dios tuqit parlapxäna, Qullan Ajayun amuyt’ayata.

¹ Ukampis Israel marka taypin k’ari profetanakax utjarakïnwa; ukhamarakiw jumanak taypin k’ari yatichirinakax utjani. Jupanakasti jan wali amtäwinakap jamasanakan yatichapxani, qhispiyir Tatituparus jan uñt’iriw tukupxani; ukham yatichapxatapatsti, mäkhi t’unjatäpxaniwa. ² Waljanirakiw uka k’ari yatichirinakjam jakani, kuntix lurañ munapkani ukanak lurasa, jupanak laykuw chiqpach aski thakhit jan walinak parlapxani. ³ Uka k’ari yatichirinakan qullqir sinti munapxatap laykuxa, k’ari yatichäwinakampix jumanakat q’al taqi kunsa apsupxätam; ukampis Diosax nayratpach jupanakar juchañchxi, janirakiw mutuyäwit qhispipkaniti. ⁴ Diosax janiw angelanakarus juch lurapxatapat pampachkänti, jan ukasti, manqha pacharuw jaquntäna, jupanakarusti ch’amakanakaruw cadenanakamp ñach’antat jaytäna, taripäwi uru puriniñapkama. ⁵ Janirakiw Diosax nayra jaqinakarus pampachkänti, jan ukasti, uka jan wali jaqinakxarux uma taripäwi puriyanïna. Noé saparukiw qhispiyäna, chiqa arunak parlatapata, jupamp chikasti paqallqunikiw qhispipxäna. ⁶ Sodoma, Gomorra markanakarusti, Diosax qhillar tukuyañkamaw ninamp nakhantayäna, qhipa urunakan jakir jan wali jaqinakan amuyt’asiñapataki. ⁷ Ukampis Lot chacharux suma jaqïtapat qhispiyäna. Uka markan utjir jaqinakan jan wali luräwinakap uñjasinsti, Lot chachax llakisïnwa. ⁸ Uka aski chachasti jupanak taypin jakäna, sapürurakiw uka jaqinakan jan wali luratanakap uñjäna, ist’arakïna, ukat chuymapan wal llakisïna. ⁹ Ukhampï Tatitux wawanakapar yant’anakat qhispiyañ yatixa, ukhamarak jan wali jaqinakarus taripäwi urun mutuyañatak yaqhachixa. ¹⁰ Khitinakatix ñanqha munañanakaparjam sarasipki ukanakarux Tatitux mutuyaniwa, jupan arunakapar jan ist’apki ukanakarus mutuyarakiniwa. Jupakanakasti jan ist’asiri, wali munañan jaqinakäpxiwa, janirakiw jupanakax angelanakar jan wali arunakamp tuqiñsa axsarapkiti. ¹¹ Ukampisa, angelanakax uka k’ari yatichirinakat sipan ch’amanïkasasa, munañanïkasasa, janiw Dios nayraqatan jan wali arunakampix k’ari yatichirinakar kuns sapkiti. ¹² Uka jaqinakax jan amuyt’asirïpxiwa, taqi kunsa munañaparukiw lurapxi, jan amuyt’asisaw kuns parlapxi; jupanakasti animalanakjam katurayasisin jiwarayatäñatakiw yuripxi. ¹³ Mayninakar t’aqhisiyapxatapat jupanakax t’aqhisipxani, urpach ukham lurasax kusisitäpkaspas ukham amuyasipxi. ¡Mä p’inqa jan walipuniw jupanakan luratanakapaxa, kunapachatix jumanakamp chika uka suma phunchhäwinakaman jikxatasipki ukkhaxa! ¹⁴ Mä warmirus janiw aliqak uñtapkiti, janirakiw jucha lurañampis sist’asipkiti. Pisi amuyt’aninakarusti jucharuw puriyapxi; wali mich’äpxiwa; ñanqha jaqinakäpxapuniwa. ¹⁵ Chiqpach thakhit saranukupxi, chhaqhañ thakhin sarnaqapxi. Beor chachan Balaam yuqapan lurataparuw arkapxi, khititix ñanqha luras walja qullqi jikxatañ munkäna ukaru, ¹⁶ jucha luratapatsti, mä qachu asnomp tuqinuqataw uñjasïna, uka asnosti juparux jaqjamaw parlxayäna, ukhamat luqhi kankañap jan luraykänti. ¹⁷ Uka k’ari yatichirinakax jan uman phuch’ur uñtatäpxiwa, thayan apnaqat qinayar uñtatäpxarakiwa; jupanakasti wiñayan wiñayapatak ch’amakankañatak juchañchatäpxiwa. ¹⁸ Jupanakasti jaqinakampi yäqayasiñatakix suma arunak sapxi, ukasti chiqpachansa inamayakiwa. Ukatsti yaqhipanakarux jan wali lurañanakap lurañapatakiw wayt’apxi, jucha lurañanakat jaltirinakarux wasitat uka jan walinakar irpapxi. ¹⁹ “Qhispita sarnaqasiñ churapxäma” sapxiwa, ukampis jupanakpachaw juchan t’aqhisiyat sarnaqasipki; sapaqat jaqirakiw kuna juchampitix atipjayaski uka juchampi t’aqhisiyat sarnaqaski. ²⁰ Khitinakatix Tatit Jesucristo Qhispiyirisar uñt’asin uka jan wali luräwinakat jaltxapxi, uka qhipatsti juchar kutt’asina jucha lurañanakampi atipjayasipkaraki ukanakax, nayra jakañanakapat sipansa juk’ampi jan walïxapxiwa. ²¹ Jupanakatakix, Tatitun arunakapa, uka chiqa thakhi jan uñt’apxañapax askïsapänwa, uka qullan kamachinak uñt’kasin jan jaysañat sipansa. ²² Ukampis mä säwiw jupanakampix phuqhasiski, ukasti siwa: “Anux waq’aqsutaparuw kutxatasxi, jichha jariqat khuchhisti wasitat ñiq’ir sunt’intxaraki” sasa.

¹ Munat jilatanaka, akampix payïr qillqat apayanipxsma. Paypach qillqatansti iwxanak tuqiw wal amuyt’ayañ munapxsma. ² Amtasipxam, kuna yatiyäwi arunaktix nayra pachanakan Diosan profetanakapax churkistu ukanakata. Jan armasipxamti, Tatitu Qhispiyir Jesucristosax churkistu uka kamachi arunakata, uka arunaksti apostolunakaw jumanakarux yatichapxtam. ³ Nayraqatax ak amuyt’asipxam: Qhipa urunakan jan wali jaqinakaw sartapxani, jan wali amtataparjamaw sarnaqapxani, jumanakat phiskasisasti, ⁴ akham jiskt’apxarakïtam: “¿Kawkirak Criston ‘jutäwa’ satapasti? Awkinakasas jiwarawayxiwa, aka uraqix utjki ukkhatpach taqi kunas pachpakïskarakisä” sasa. ⁵ Uka jaqinakax janiw amuyañ munapkiti, Diosax nayra pachatpach alaxpachsa, akapachsa luratapata, arsutapampiki aka uraqiru umanakat jaljtayatapatsa. ⁶ Ukhamarak uma taripäwimpi uka urunakan utjir jaqinakar Tatitun mutuyatapsa. ⁷ Ukampisa, Tatitun arunakaparjamax aka uraqimpi alaxpachampix, ninampi t’unjatäñatak imatäskiwa. Uka ninaw taripäwi urun q’al nakhantani, jan walinak lurir jaqinakarus tukjarakini. ⁸ Ukhamarusa, munat jilatanaka, jumanakax jan armasipxamti, Tatitutakix mä urux waranqa marampi sasiwa, waranqa marasti mä urumpi sasirakiwa. ⁹ Tatitux janiw arunakapar phuqhañ armt’askiti, kunjämtix mayninakax jan phuqhasitap amuyapki ukhama, jan ukasti, jupax llamp’u chuymampiw suyt’asipktam; Diosax janiw khitin jiwañapsa munkiti, jan ukasti, taqinin jupan ukar kutkatxañap muni. ¹⁰ Ukampis Tatitun jutañap urux akatjamat lunthatar uñtataw purinini. Alaxpachanakasti mä jach’a axsarkañ uxuñampiw t’unthaptani, kunanakatix alaxpachan utjki ukanakax ninamp tukjatäniwa, uraqisti, kunanakapatix utjki ukanakamppach Diosan taripäwipar katuyatäniwa. ¹¹ Niyakitix taqi kunas ukham tukjaschinixa, jumanakax Tatit chuyma, jupar katuyasit jakapxañamawa. ¹² Tatitun jutañap urun jank’akïñap munas suyt’apxam. Uka urusti alaxpachanakax ninampi nakhantatäniwa, taqi kunas ninampi umatatayatarakïniwa; ¹³ ukampis jiwasax arsutaparjamaw mä machaq uraqimpi, mä machaq alaxpachampi suyt’asktan, kuntix Diosax: “Churapxämaw” siskistu uka, ukansti taqi kunas askïniwa, chiqapapunïniwa. ¹⁴ Ukatpï munat jilatanaka, akanak suyt’kasaxa, Tatitumpi sumankañatak ch’amachasipxam, taqi kunsa askpun lurapxam, ukhamat jupan jumanakar jan juchani, jan q’añucht’at jikxatañapataki. ¹⁵ Amuyasipxam, Jesucristo Tatitusax suma chuymapampiw uñjaskistu, ukax jiwasan qhispiyasiñasatakiwa. Ukhamarak Pablo jilatasas Tatitun amuyt’ayataparjamaw jumanakar ukxat qillqt’anipxtam. ¹⁶ Jupasti taqi qillqatanakapan akanakxat yatiyapxtam, yaqhip arunakas jan amuyt’añjamäkchi ukasa, jan amuyt’ir jaqinakampi, pisi iyawsañan jaqinakampix uka arunak amuyunakaparjamaw maysar uñtayapxi, kamisatix jupanak pachpa juchañchayasiñatak yaqhawja Qillqatanak maysar uñtayapki ukhama. ¹⁷ Ukatpï munat jilatanaka, niyakitix jumanakax akanak jichhatpach yatxapxstaxa, amuyasipxam, uka sallqjirinakampi jan apayasiñataki, ukhamat walïkasin jan aynacht’añataki. ¹⁸ Ukampis Qhispiyiri Tatit Jesucristosar uñt’apxam, munasiñapan jiltapxarakim. ¡Jupasti jach’añchatäpan, jichhasa, wiñayataki! Ukhamäpan.