2 CORINTIOS

¹ Conrinto iglesiankir munat jilatanaka, kullakanaka, ukhamarak Acaya chiqankir taqi jilatanaka: Naya Pablompi, Timoteo jilatampix aruntanipxsmawa. Dios Awkisampi, nayar apostolüñatak ajllisir Jesucristo Tatitumpix khuyapayasiñapsa, sumankañapsa jumanakar churpan. ³ Jesucristo Tatitusan Dios Awkipax jach’añchatäpan, jupax khuyapayir Awkisawa, jiwasar chuymachir Diosarakiwa. ⁴ Jupaw taqi t’aqhisiñanakasan chuymachistu, ukhamat jiwasanakan t’aqhisirinakar chuymachañasataki, Diosax churkistu uka pachpa chuymachasïwimpi. ⁵ Kamisatix Cristo layku wali t’aqhisiñanakax jiwasanakatak utjki ukkhaxa, jiwasanakax jupampiw t’aqhisipxtan, ukhamarakiw Cristo tuqi chuymachasiñax jilarkir jiwasanakatak utji. ⁶ Nanakan t’aqhisiñaxax chuymachasiñampi, qhispiyasiñampi jumanakatak utjayi; Diosatix chuymachapxchistuxa, jumanakan chuymachasiñax utjañaparakiwa, jumanakan nanakjam pachpa t’aqhisiñanak wali ch’amampi t’aqhisipxañamataki. ⁷ Nanakan jumanakat mä suyt’äwiw utji, kunjämtix t’aqhisipxtaxa, ukhamarakiw chuymachasipxäta. ⁸ Jilatanaka, Asia suyun kuna jan walt’añanakantix jikxatasipkäyät uk yatipxañam munta. Uka yant’ax jan atipjkayänwa, jiwañak suyxapxäyäta. ⁹ Nanakax jiwañar katuyatjam amuyasipxäyäta. Ukampis taqi ukax jiwatat jaktayir Diosar katuyasiñ yatichapxitu, janiw nanak pachpar alkatasiñ yatichapkituti. ¹⁰ Diosaw qhispiyapxitu, akat qhiparus axsarkañ jiwañat qhispiyasipkakitaniwa, ¹¹ jumanakatix nanakatak Diosat mayipxät ukkhaxa. Walja jaqinakatix nanakatak Diosat mayinixa, waljanirakiw katuqktan uka aski churäwinakapat Diosarux yuspagarapxani. ¹² Nanakax taqi jaqinak nayraqatana, juk’ampis jumanak nayraqatana, suma, ukhamarak q’uma chuyman sarnaqapxataxat kusisipxta. Uksti, janiw nanakan yatiñ kankañaxampi lurapkti, jan ukasti, Diosan yanapapampiw lurapxta, ukat munasiñapat jupar yuspagarapxta. ¹³ Qillqatanak apayanipksma ukansti, janiw jan ullarkaya, jan amuyt’kay qillqanipksmati, uksti sum amuyt’apxañam munta, ¹⁴ nanakat niyaw mä juk’anix amuyapxtaxa, kunapachatix Tatitux jutkan ukkhaxa, jumanakax nanakat wal kusisipxäta, nanakas uka kipkarakiw jumanakat kusisipxä. ¹⁵ Ukham amuyasaw nayax jumanakar nayraqat tumpt’ir jutañ munäyäta, ukhamat pä kuti jumanakar tumpt’añataki; ¹⁶ Macedoniar sarkasaw jumanakar nayraqat tumpt’añ munäyäta, ukat kuttanisax wasitat jumanakar tumpt’añataki. Ukhamat jumanakax Judear sarañaxatak nayar yanapt’apxitasma. ¹⁷ ¿Jan sum amuyt’asisakit uk lurañ amtpachätsti? ¿Jan ukax, “jïsa, janiwa” sas pä amtäwimpi amtkirista ukhamcha amuyapxtaxa? ¹⁸ Ukampis Diosax yatiskiwa, nanakax janiw jumanakar “jïsa, janiwa” sasax parlapksmati. ¹⁹ Diosan Jesucristo wawapasti, khitittix Silvanosa, Timoteosa, nayasa parlapksma ukax janiw “jïsa, janiwa” sirïkänti, jan ukasti, jupanxa Diosan arunakapax chiqapapunïnwa, ²⁰ jupanarak Diosan arsutanakapax phuqhasi. Ukatpï Diosar yupaychktan ukkhax “Ukhamäpan” sistanxa, Cristo Jesús tuqi. ²¹ Ukatsti Diosaw nanakarusa, jumanakarus Cristompi mayachasax sum sayt’ayistu, jupaw yaqhacharakistu. ²² Jupaw jiwasanakarux chimpt’istu, chuymasarusti Qullan Ajayu ucharakistu, kuntix churapxämaw siskistu uk katuqañax phuqhasiñapataki. ²³ Janis amtataxarjam Corintor sarksta ukasa, jumanakat khuyapayasisaw jan jutkti, uksti Diosaw yatiski. ²⁴ Janiw nanakax iyawsäwinakam apnaqañ munapkti; nanakax jumanakar yanapt’añak munapxsma, ukhamat kusisiñaman utjañapataki, jumanakasti iyawsañan niy thurt’atäxapxtawa.

¹ Ukat jumanakar wasitat tumpir sarañ jan amtkti, jumanakar jan llakisiyañ layku. ² Nayatix jumanakar llakisiyapxäm ukasti ¿khitirak nayar kusisiyitaspasti? Jumanakakiw kusisiyapxitasmaxa. ³ Ukat ukham qillqanipxsma, janiw nayax jumanakan llakisiyatäñatak sarañ munkäyätti, ukat sipan jumanakax nayar kusisiyapxañamawa. Nayan kusisiñaxat jumanakax kusisipxañam yatirakïyätwa, ⁴ ukampis kunapachatix uka qillqat apayanipksma ukkhax wali llakt’ata, mayjt’ataw jikxatasïyäta, llakisiñatsa jacharakïyätwa. Ukampis janiw llakisipxañamatak apayanipksmati, jan ukasti, kunja jach’äkitix munasiñaxax jumanakatak uk yatipxañamatakiwa. ⁵ Maynitix nayar llakisiychitu ukaxa, janiw nayaruk llakisiykituti, jan jiljañampi arsusasti, taqi jumanakaruw llakisiyapxaraktam. ⁶ Kuna mutuyäwtix uka jaqir jumanakax churapkta ukampix phuqhatakiwa. ⁷ Jichhasti uka jaqirux pampachaña, yanapt’añaw wakisi, ukhamat llakimpi jan atipjayasiñapataki. ⁸ Ukat jumanakar achikt’apxsma, jichhax wasitat jupar munapxatam uñacht’ayapxam. ⁹ Ukatakiw jumanakar qillqanipxsma, jumanakan chuymam uñt’añataki, ukhamaraki jumanakan jaysasir chuymam yatiñataki. ¹⁰ Ukhamasti jumanakatix khitirus pampachapxät ukaxa, nayas juparux pampacharakïwa. Nayatix kuna utjipansa pampachstxa, jumanakat khuyapt’ayasisaw Criston nayraqatapan pampachta. ¹¹ Ukhamat Supayax jiwasar jan atipjkistaniti, ñanqha amtanakap sum yattanxa. ¹² Kunapachatix Tróade markar Criston suma yatiyäwi arunakap yatiyir purkäyät ukkhaxa, Tatitutak irnaqañax uka markan walipuniw utjäna. ¹³ Ukampis Tito jilataxampi jan jikisitax laykux chuymaxan wali llakitaw jikxatasïyäta. Ukat jupanakampi jikisiwayasin, Macedonia markaruw sarxta. ¹⁴ Diosax yuspagaratäpan, jupasti Cristompi chika atipjañaruw irpistu, jiwasanak tuqirakiw arunakapsa yatiyi, uka arunakasti mä suma q’apkir qulläkaspas ukhamaw taqi chiqar puri. ¹⁵ Jiwasax Cristox Diosar luqtki uka suma incienson q’aphipjamätanwa. Ukasti qhispiyatanak taypiru, jan qhispiyatanak taypiruw puri. ¹⁶ Jan qhispiyatanakatakix uka incienso q’aphix jiwayir q’apjamawa, ukampis qhispiyatanakatakix jakañ churir q’apjamawa. ¿Khitirak ukatak wakicht’atasti? ¹⁷ Janiw nanakax Diosan yatiyäwi arunakap aljas sarnaqapkti, kunjämtix waljaninakax lurapki ukhama; jan ukasti, taqi chuymaw Diosan nayraqatapan yatiyapxta, Cristompi mayakïtanakax layku.

¹ Kunapachatix akanak sapkta ukkhasti, jumanakan amuyatamat nanakpachatsa jach’achasiñ wasitat qalltapkirista ¿ukhamati? ¿Jan ukax, nanakax jumanakar mä sumat uñt’atäñatakix qillqatampich uñstapxämaxa? ¿Jan ukax mayninakjamach mä sumat uñt’atäñatak qillqat mayisipxämaxa? Janiwa. ² Jumanakäpxtaw nanakatakix mä sumat uñt’atäñ qillqataxa. Uka qillqatasti chuymanakaxan qillqatawa, taqi jaqirakiw uka qillqat uñt’i, ukat ullart’arakispa. ³ Ukax qhanakïskiwa, uka qillqatax jumanakäpxtawa, pachpa Criston qillqantata, nanak tuqi churataraki; uka qillqatax janiw tintampi qillqatäkiti, jan ukasti jakkir Diosan Ajayupampi qillqatawa; uka qillqatax janiw sillp’a qalanakar qillqatäkiti, jan ukasti, jaqinakan chuymanakapar qillqatawa. ⁴ Uka iyawsañaw Cristo tuqi Diosan nayraqatapan utjistu. ⁵ Janiw nanakpach kun lurañatakis yatiqatäpkirista ukhamäpkti; jan ukasti, taqi kuntix lurapkta ukax Diosat juti, ⁶ jupaw machaq arust’äwin luqtiritak yatichapxitu. Uka machaq arust’äwisti janiw mä kamachiru jaysañäkiti, jan ukasti Ajayun luräwiparjam jakañawa. Kamachix jiwañaruw puriyi, ukampis Diosan Ajayupax jakañ churi. ⁷ Moisesan kamachipax mä sillp’a qalanakar qillqsutänwa, qhapaq qhanampi muyuntatänwa, israelita jaqinakas janiw uka qhana laykux Moisesan ajanup uñkatirjamäpkänti, ukampisa, uka qhanax chhaqtawayxakïnwa. Uka jiwañatak juchañchañataki kamachitix qhapaq qhanampi muyuntatächïnxa, ⁸ ¡Diosan Ajayupxar utt’ayat machaq arust’äwin yatiyäwipax, juk’amp k’ajkirïniwa! ⁹ Ukampix sañ munta, jiwañatak juchañchatäñatak kamachitix qhapaq qhanampi muyuntatächïnxa, ukatsa juk’ampi k’ajkir kankañampiw jiwasar Diosax aski jaqit katuqkistu ukax yatiyatäni! ¹⁰ Nayra qhapaq qhanampi churat kamachix, janiw machaq qhapaq kankañampi churaski ukatakix kunäkisa. ¹¹ Tukusiñapäkän uka kamachitix qhapaq kankañampi jutchïnxa, wiñayatakïki ukasti juk’ampi jach’äniwa. ¹² Uka suyt’añaw nanakan utjapxitu, ukatarakwa taqi iyawsañamp parlapxta. ¹³ Janiw nanakax Moisesjam lurapkti, jupax mä velompiw ajanup imt’asïna, ukhamat israelitanakan uka tukusir qhana jan uñjapxañapataki. ¹⁴ Ukampis jupanakax janiw uk amuyt’añ munapkänti, jichhas kunapachatix nayra arust’äwi qillqat ullart’apki ukkhax, janiw amuyt’apkiti. Jupanakan amuyunakapax mä velompis imt’atäkaspa ukhamawa. Cristokiw jupanakar amuyt’añ yanapt’aspa. ¹⁵ Jichhürkamas kunapachatix Moisesan qillqatanakap ullart’apki ukkhaxa, mä velow jupanakan amuyunakap imt’aski. ¹⁶ Ukampis kunapachatix mä jaqix Tatitur makhatki ukkhaxa, uka velox apaqatäxiwa. ¹⁷ Tatitusti Ajayuwa; kawkhankkitix Tatitun Ajayupaxa, ukkhanxa qhispiyat sarnaqasiñaw utji. ¹⁸ Ukatpï taqi jiwasanakax, ajanunakasan uka velompi jan imantatäxatap laykux, mä lirphur uñtatjamaw Tatitun qhapaq kankañapat k’ajtanxa, ukatsti jupar uñtataw tukupxaraktan, jupan qhanapax jiwasankatap layku, uksti Ajayükis uka Tatituw jiwasanakatak luri.

¹ Ukat nanakax jan qarjasipkti, Diosaw khuyapayasiñapan aka luräwi katuyapxitu. ² Janiw kunatsa p’inqasipkti, janirakiw kunsa jamasanakan lurapkti; janiw jan wali amtañanakampi sarnaqapkti, janirakiw Diosan arunakapsa maysar q’iwipkti. Jan ukasti, kunatix chiqäki ukak arsupxta, ukhamat taqinimpis Diosan nayraqatapan askit uñt’ayasipxta. ³ Diosan suma yatiyäwi arunakap parlapksma ukanakatix mä velompjam imt’ata jan qhanäkchixa, khitinakatix chhaqhañar sarapki ukanakatakikiw ukhamäski. ⁴ Jupanakax janiw iyawsapkiti, ukat akapachankir supayax amuyunakap ch’amakt’ayi, Criston qhankir suma yatiyäwi arunakap jan uñjapxañapataki, Cristosti Diosan jakkir uñanaqapawa. ⁵ Janiw nanak pachpat yatiyasipkti, jan ukasti Jesucriston Tatitütap yatiyapxta; nanakax Tatitur munatanakax laykuw jumanakan yanapirimar tukupxta. ⁶ Diosax qhanap ch’amakan qhantaykän uka pachpa Diosarakiw chuymanakasan qhantayi. Uka qhanampisti Diosan k’ajkir kankañapax Jesucriston ajanupan qhankis uk uñt’apxañasatakiwa. ⁷ Diosan uka jach’a churäwipasti janchinakasanxa mä ñiq’i phukhun imatjamawa, ukhamat uka jach’a ch’amax jan jiwasat jutatapa, jan ukasti Diosat jutatap yatisiñapataki. ⁸ Jan walt’añanakax taqi tuqit muyuntapkchitu ukasa, janipuniw atipjayasipkti; llakisiñanakas utjkchixa, janiw ayñacht’apkti. ⁹ Uñisiñampis arknaqapkchitu ukasa, janiw sapa irpanukutäpkti, uraqirus takisipkchitu ukasa, janipuniw tukjatäpktsa. ¹⁰ Kawkharutix sarapkta ukkhanxa, janchinakaxan Criston jiwatap apapxapuntwa, ukhamat jupan jakatapax nanak tuqi qhanstañapataki. ¹¹ Nanakasti jakkasinxa sapürus Cristo laykux jiwañat qhispipxta, ukhamat Jesusan jakañapax jiwir janchinakaxan uñstañapataki. ¹² Ukhamat jiwañax nanakampïñapataki, jakañasti jumanakampïñatakiraki. ¹³ Qillqatax siwa: “Iyawstwa, ukat arsurakta” sasa. Ukhamarakiw nanakax iyawsasin parlapxarakta. ¹⁴ Diosan Jesucristo Tatitur jiwatat jaktayatap yatipxtanwa, ukhamarakiw jiwasarux Jesusamp chika jaktayistani, jumanakampi chikarakiw jupan nayraqataparux irpxistani. ¹⁵ Taqi ukanakasti jumanakan askimatakiw lurasiwayi, ukhamata, Diosan munasiñap katuqirinak utjatapatxa, waljaniraki Diosar yuspagarapxañapataki, Diosan qhapaq kankañapataki. ¹⁶ Ukat nanakax janipuniw mayjt’asipkti. Janchinakaxax sapürus aynacht’aski ukasa, ajayunsti urut urutjamaw machaqar tukusipkta. ¹⁷ Aka uraqin t’aqhisitasax janiw kunäkisa, tukusirikiwa; ukampis mä jach’a aski jilarkir wiñay kusisiñ apani. ¹⁸ Janiw kuntix uñjktan ukar chuyma churktanti, jan ukasti, kuntix jan uñjktan ukaruw chuym katuyastan; kunatix uñjaski ukanakax tukusirikiwa, ukampis kunatix jan uñjaski ukanakasti janiw tukusirïkiti, wiñayatakiwa.

¹ Jiwasanakax akapachankir utar uñtatakïtanwa, apnaqañ utar uñtata, ukax janiw wiñayatakïkiti; ukampis yattanwa, uka utatix tukusinixa, Diosax alaxpachan wiñay uta wakicharapistu, ukasti janiw jaqinakan amparapampi luratäkiti. ² Ukatpï aka utan jakkasax ayqtanxa, mäpit alaxpach utasar sarxañ muntan; ³ uka jakañampisti isimpjamarakiw isintayatäñäni jan q’alaläskañasataki. ⁴ Akapachankir utan jakkasax t’aqhistanwa, ayquraktanwa, janiw q’alaläñ munktanti, jan ukasti isthapitäñ muntanxa, ukhamat kunatix jiwirïki ukax, machaq jakañamp chhaqtayatäñapataki. ⁵ Diosaw ukham wakicharapistu, uk phuqhañatakisti jupaw Qullan Ajayu churistu. ⁶ Ukatpï iyawsañampi jakasktanxa, aka janchin jakkasasti, janïraw alaxpachan Tatitumpi chikäktanti. ⁷ Janiw jichhax jupar uñjktanti, jan ukasti, iyawsañampi ch’amañchataw jakasipktan; ⁸ ukampis taqi iyawsañasaw utjistu, ukatsti Tatitumpi jakir sarxañatakix jiwxañak munsnaxa. ⁹ Ukatpï Tatitur kusisiyañatakix sapür ch’amachastanxa, janchin jakkasinsa, jan ukax jiwxasinsa. ¹⁰ Taqiniw Criston taripäwip nayraqatar uñstañäni, sapaqat maynis luräwipatjam katuqañapataki, janchinkkasin walsa jan walsa lurataparjama. ¹¹ Ukalayku, Tatitur axsartañ wakisitap yatisaxa, jaqinakar amuyt’ayañatakiw ch’amachasipxta. Diosax nanakar sum uñt’apxitu, ukhamarakiw jumanakan nanakar sum uñt’apxañam munta. ¹² Janiw nanakpachat jach’achasipktxa, jan ukasti, jumanakan nanakat kusisipxañamatakiw parlapxsma, ukhamat khitinakatix jupanakpachat jach’a jach’a tukupki uka jaqinakar arusxatapxañamataki. Uka jaqinakasti laqäxak uñch’ukipxi, janiw kunatix jaqin chuymapan utjki uk amuyapkiti. ¹³ Nanakatix luqhir uñtatäpxsta ukaxa, Dios laykuw ukham sarnaqapxta; janitix luqhinakjamäpkstxa, jumanakan askimatakirakiwa. ¹⁴ Criston munasiñapaw nanakan utjantasi, maynin taqinitak jiwatap yatxasina, ukhamïpansti, taqiniw nayra jakäwinakar jiwapxaraki. ¹⁵ Cristox taqinitakiw jiwawayi, khitinakatix jakasipki ukanakax jan jupanakpachatak jakañapataki, jan ukasti Cristotak jakapxañapataki, jupaw jupanak layku jiwasin jaktawayi. ¹⁶ Ukat nanakax jan khititsa akapachan amtäwinakaparjam lup’kxapxti; nayrapachax uka amtäwinakarjam Cristot lup’ipkchïyäta ukasa, jichhax janiw jupat ukham lup’kxapxti. ¹⁷ Ukhamasti, khititix Cristompi mayachatäxchi ukax, machaq jaqïxiwa. Nayra luräwinakax tukusxiwa; jichhax taqi kunas machaqar tukutawa. ¹⁸ Taqi akanakax Diosan luräwipawa, jupaw Cristo tuqi jupamp sumankthapiyistu, ukatsti sumankayañ arunak yatiyañatakiw jaytarakistu. ¹⁹ Chiqpachana, Diosax Cristo tuqiw akapachampi sumankthapiskäna, jaqinakan juchanakap jan amxäsisa; jiwasanakarusti uka sumankayañ yatiyäwi arunak mayninakar yatiyiriw jaytarakistu. ²⁰ Ukhamasti nanakax Criston khithanit arsuripäpxtwa, ukasti Dios kipkas jumanakar nanak tuqi achikt’apkiristam ukhamawa. Ukhamasti, Criston sutipxaruw achikt’apxsma, Diosampi sumankxapxañamataki. ²¹ Cristox janiw kuna juchsa lurkänti; ukampis Diosax jiwasanak laykuw juchan jaqirjam uñjäna, ukhamat jiwasanakan Cristonkasin askit katuqatäñasataki.

¹ Nanakasti Diosan luräwipan irnaqirinakarjamax jumanakaruw achikt’apxsma, kuna khuyapayasiñtix Diosax jumanakar uñacht’ayapktam uk jan ina ch’usar tukuyapxamti. ² Jupax Qillqatanakan siwa: “Wakiskir pachan ist’sma; qhispiyasiñ urun yanapt’araksma” sasa. Jichhaw uka wakiskir pachaxa. ¡Jichhaw qhispiyasiñ uruxa! ³ Janiw khitirus jan wali sarnaqäwimpi uñacht’ayapkti, nanakan luräwinakaxax jan jisk’achat uñjasiskañapataki. ⁴ Ukat sipana, taqi kunan nanakax Diosan irnaqiripäpxatax uñacht’ayapxta, wali llamp’u chuymampiw t’aqhisipxta, pist’ayasiñanakana, jan walt’añanakansa. ⁵ Jawq’jasin carcelar uskuntapxitu, jaqinakan uxutanakap taypin usuchjapxitu, wali ch’ama tukusaw irnaqapxta, jan ikini, jan manq’atarakiw sarnaqapxta. ⁶ Taqi ukanaksti q’uma jakäwinakaxampi, kunatix chiqäki uk uñt’atanakaxampiw uñacht’ayapxta, ukhamarak llamp’u chuymanïpxataxampi, khuyapayasirïtanakaxampi, chiqa kankañ uñt’atanakaxampi, Qullan Ajayux nanakampïtap layku, chiqpach munasiñanïpxatax layku, ⁷ ukatsti Diosan chiqa arunakap jupan ch’amapampi parlapxatax laykuraki, kunatix chiqapäki uk arsupxta, ukampipuniw sayt’asipxarakta. ⁸ Yaqhip urunakax jach’ar aptatäpxtwa, yaqhip urunakasti ñanqhachatäpxtwa; yaqhip urux nanakat sum parlapxi, yaqhip urusti jan walirak nanakat parlapxi. Chiqap parlapkta ukasa, k’ari jaqinakarjamaw uñjapxitu. ⁹ Jan uñt’at jaqinakarjamaw uñjapxitu, wali uñt’atäpkta ukasa. Nanakax niy jiwirpachjamäpxtwa, ukampis jakasipkaktwa; Jawq’japxituwa, ukampis janiw jiwayapkituti. ¹⁰ Llakitäpkirista ukham uñjasipxta, ukampis kusisitakipunïsipktwa; jan kunanïpkirista ukham uñjasipxta, ukampis waljaniruw qamiriptayapxta; janis kunanïpkirista ukhamäpxtwa, ukampis janiw kunas pist’apkituti. ¹¹ Corintonkir jilatanaka, chuymanakaxan jan kunsa imt’asaw taqi kunsa qhana arumpi jumanakar parlapxsma. ¹² Janiw kunsa jumanakar imt’apksmati; jan ukasti, jumanakaw nanakar imt’apxistaxa. ¹³ Ukhamasti, mä awkir uñtataw wawanakarjam achikt’apxsma, nayampix qhana chuymanïpxam, kunjämtix nayax jumanakampi qhana chuymanïkta ukhama. ¹⁴ Janiy jumanakax Cristor jan iyawsirinakampix chikachasipxamti. ¿Kamisarak aski kankañampi ñanqha kankañampisti mayachasispasti? Jan ukax ¿kamisarak qhanampi ch’amakampisti chikachasispasti? ¹⁵ Cristompi Supayampix janiw suman sarnaqapkaspati, janirakiw Cristor iyawsirimpi jan iyawsirimpix suman sarnaqapkaspati. ¹⁶ Janiw Diosan utapampi yaqha diosanakan utapampix mayakïkaspati. Jiwasax jakkir Diosan utapätanwa, kunjämtix Dios kipka siski ukhama: “Jupanak taypin jakä, sarnaqarakï; nayaw jupanakan Diosapäyä, jupanakasti nayan markaxäniwa” sasa. ¹⁷ Ukat Tatitux sarakiwa: “Jupanak taypit mistupxam, jithiqtapxarakim; kunatix q’añüki uk jan llamkt’apxamti. Nayasti jumanakar katuqxapxämawa, ¹⁸ nayax jumanakan Awkimäyäwa, jumanakasti nayan yuqanakaxa, phuchhanakaxäpxätawa, uksti naya taqi ch’aman Tatituw arsta” sasa.

¹ Ukhamasti munat jilatanaka, Diosan taqi aka arsutanakapax jiwasatakiwa. Ukatpï taqi kunatix q’añuchkistaspa ukat jithiqtañasaxa, ukatsti janchisana, ajayusansa q’uma sarnaqañasaw wakisi; Diosar axsart’asasti q’uma jakäwi jikxatañatak ch’amachasiñäni. ² ¡Chuymanakamaruy uskt’asipxita! Janiw khitirus jan chiqapar uñjapkti; janirakiw khitirus kuna jan walsa lurapkti; khitirus inaki irnaqayasipkti. ³ Aksti janiw jumanakar jisk’achañatak sapksmati, niy sapxsmawa: jakañatakisa, jiwañatakis jumanakax nanakan chuymaxankapxtawa. ⁴ Jumanakar qhana arumpi arsuñaxaw utjitu, wali kusisiñaw jumanakat utjarakitu. Taqi t’aqhisiñanakax taypinsti, ch’amañchataw uñjasta, kusisiñan phuqt’ataw uñjasirakta. ⁵ Macedoniar purinipkta ukat aksarux janipuniw samarapkti, jan ukasti, taqi chiqan jan walt’añanakan uñjasipxta: Ch’axwañanakaw nanakar muyuntapxitu, chuyma manqhansti axsarañaraki. ⁶ Ukampis ch’ama thayjtatanakar ch’amañchir Diosax, Titon purinitapampiw ch’amañchapxitu; ⁷ janiw jupan purinitapampikiti, jan ukasti, jumanakat yatisaw chuymachasipxarakta. Jupasti nanakar uñjañ munapxatamat parlapxitu, nayat llakisipxatamat yatiyapxarakitu, taqi ukanak yatisax juk’ampiw kusista. ⁸ Qillqanipksma ukampitix llakisiyapxsmaxa, janiw ukat jichhax llakiskti. Uka Qillqatan mä juk’a pacha jumanakar llakisiyatap uñjasax nayax llakisirakïyätwa, ⁹ jichhasti kusistwa; janiw llakisitanakamatti, jan ukasti uka llakisiñaw Diosarux irpkatapxtam. Uka llakisiñax Diosan munañaparjamänwa, ukhamasti nanakax janiw kuna jan walsa lurapksmati, ¹⁰ Diosan munañaparjam llakisiñax qhispiyasiñ utjayi, janiw kunat llakisiñas utjkiti. Ukampis akapachan llakisiñapax jiwañ utjayi. ¹¹ Jumanakan llakisitamax Diosan munañaparjamänwa, ¡kunanaktix utjayki uk uñjapxam! Jumanakarux wal amuytatayapxtam, ukatsti nayar arxatañ chuym churapxtam; q’apisiyapxtamwa, axsarañ chuyma utjayapxaraktam. Ukatsti nayar uñjañ munapxarakïyätaxa, nayat arxatasisasti juchanirux mutuyapxtawa. Taqi ukanakampisti jumanakan jan kuna juchanïpxatam uñacht’ayi. ¹² Ukhamasti kunapachatix uka qillqat apayanipksma ukkhasti, janiw nayax chuyma usuyir jaqit lup’isa qillqankti, janirakiw chuyma usuchjat jaqit lup’isas qillqankti, jan ukasti, Diosan nayraqatapan nanakat llakisipxatam uñachayañatakiw qillqanipxsma. ¹³ Ukat nanakax chuymachat jikxatasipxta. Titox wali kusisitawa, taqi jumanakaw machaq ch’amañch’äwi juparux churapxtaxa. Ukasti nanakarux juk’amp kusisiyapxitu. ¹⁴ Nayax jumanakat kusisitax Titor yatiyta, uk sasax janiw pantjaskti. Jan ukasti, kuntix jumanakar sapkäyäsma ukax chiqawa, Titor sapkta ukas chiqarakiwa: nanakax jumanakat wal kusisipxta. ¹⁵ Jupasti jumanakar walpun munasipxtam, jumanakan jaysasirïtanakam amtasisa, wali yäqañamp jupar katuqapxatät ukatsa. ¹⁶ ¡Nayasti jumanakar taqi chuyma alkatasitaxat wal kusista!

¹ Jichhax jilatanaka, kunjämtix Diosan munasiñapax Macedonia iglesianakan uñacht’ayaski ukxat yatiyañ munapxsma. ² Jupanakax yant’anakan jikxatasipkchïn ukasa, wali kusisitäpxiwa; jan kunanïpkchi ukasa, qamirinakäkaspas ukham taqi chuymaw waxt’äwinakap churapxi. ³ Nayaw uñjta, jupanakax chuymapatjam qawqhatix churañax wakiski ukatsa juk’amp churapxi. Jan khitin kamskataw chuymapatjam ⁴ nanakarux achikt’apxitäna, Diosan markapatak yanapt’a apthapipkta ukan yanapasiñataki. ⁵ Nanakax suyapkäyät ukatsa juk’ampi yanapt’anak apthapipxäna, jupanakpachaw Diosar katuyasipxäna, ukxarusti nanakaruraki, Diosan munañaparjama. ⁶ Ukat nanakax Titor achikt’apxta, jumanak taypin aka munasiñ yanapt’a apthapiñapataki, jupaw janïr apthapkasax churañ qalltäna. ⁷ Jumanakaw taqi kunan jilankapxtaxa: iyawsañana, arunak parlañana, yatiñana, q’apha chuymampi lurañ phuqhañana, nanakat yatiqasipkta uka munasiñana, uka kipkarakiw aka yanapt’a apthapiñan jilankapxañama. ⁸ Uksti janiw jumanakar mä kamachjam churapksmati; jan ukasti, mayninakan suma chuymampi apthapt’apxatap yatipxañamak munta, ukhamat jumanakan munasiñamax chiqat janich uk yatisiñapataki. ⁹ Jumanakasti yatipxtawa, Jesucristo Tatitusax munasiñapan qamirïkasin jumanak laykux jan kunanir tukuwayi, ukhamat jupan jan kunan tukutapampix jumanakan qamirkipstapxañamataki. ¹⁰ Jumanakan askimatakiw ukxat sañ munapxsma. Jumanakax maymäratpachaw aka luräwxa sum qalltapxtaxa, janiw aliq apthapisakiti jan ukasti kusisiñampirakiw apthapipxtaxa. ¹¹ Jichhasti kamisatix taqi chuymampi yanapt’a apthapiñ qalltapktaxa, ukhamarak jumanakan wakisitarjam yanapt’a apthapiñ tukuyapxam. ¹² Maynitix taqi chuyma churañ munchi ukaxa, Diosax churirin utjiripatjam katuqi. Jupax janiw kunsa maykiti, maynin jan utjkchi ukkhaxa. ¹³ Janiw mayninakar yanapt’añ laykux, pist’at jakapxañam munkti, jan ukasti taqinin khuskhak utjañapaw munasixa. ¹⁴ Jichhax jumanakan utjasipktamwa kunatix mayninakan jan utjki uka churapxañamataki; qhipürusti jupanakanarak utjani kunatix jumanakan jan utjkani ukaxa, ukatsti churapxarakïtamwa, ukhamat taqininsa utjapxarakïtam. ¹⁵ Qillqatan siski ukhamarjama: “Walja apthapisirinakarux janiw jilt’känti, juk’ak apthapisirinakarus janirakiw pist’känti” sasa. ¹⁶ Diosax yuspagaratäpan, kuna llakisiñatix nayan jumanakatak utjkitu ukarak Titon chuymaparux uchi. ¹⁷ Jupasti nayan mayitaxarux iyawsänwa, jupa pachpaw jumanakat wal yatiñ muni, jichhasti taqi chuymaw jumanak uñjir sarani. ¹⁸ Titompi chikasti mayni jilataruw khithanipxsma, uka jilatatsti taqi iglesianakan wali sum parlapxi, Diosan suma yatiyäwi arunakap yatiyañan wali sum irnaqatap layku. ¹⁹ Ukhamarus juparux iglesianakaw ajllisipxi, nanakampi chika sarañapataki, taqi akanaksti Tatitur jach’añchañatakiw lurasipkta, ukhamarak yanapt’añ munatanakax uñacht’ayañataki. ²⁰ Uka yanapt’a apthapipkta ukat janiw khitimpis jisk’achayasiñ munapkti, ²¹ ukat nanakax sum apnaqañatak ch’amachasipxta, janiw Tatit nayraqatanakti, jan ukasti jaqinak nayraqatanaraki. ²² Jupanakampi chikasti yaqha jilatasaruw khithanipxaraksma, jupasti taqi kunan q’apha chuymap uñacht’ayapxitu, jichhasti jumanakat yatisin wali k’uchikiw juti. ²³ Titosti nayampi chik sarnaqiriw sañ munapxsma, jupasti jumanakan askimatakiw nayampi chika irnaqi. Maynïr pä jilatanakax iglesianakat khithanitawa, jupanakasti Cristoruw jach’añchapxaraki. ²⁴ Iglesianakan yatipxañapatakisti, jumanakax jupanakar chiqpachapun munapxatam uñacht’ayapxam, ukhamarak nanakan jumanakat kusisitanakaxatsa.

¹ Jilatanakatak yanapa apthapiñatsti, jumanakar qillqaniñaxax janiw wakiskiti, ² jumanakan suma chuymanïpxatam niy uñt’xapxsmawa. Macedoniankir jilatanakarux kusisitaw arsta: “Acayankir jilatanakax maymäratpach jank’akïpxiw yanapt’asiñataki” sasa, ukatsti Macedoniankir jilatanakatxa waljaniw jumanakan suma chuymanïpxatam laykux yanapt’asiñ munapxaraki. ³ Ukampis aka jilatanakaruw khithanta, jumanakat kusisitaxax jan inamayäskañapataki. Ukampix sañ munta, jumanakan chiqpachapun wakicht’atäpxañamataki, ⁴ inampis Macedoniankirinakat yaqhipanakax nayampi chik jutasin jan wakicht’at jikxatapxiristam. Ukax nanakatak mä p’inqäspawa, nanakan jumanakar wal alkatasitaxata, jumanak pachpatakis mä p’inqarakïspawa. ⁵ Ukat nayatakix waljamäna uka jilatanakan jumanakan ukar nayraqat jutañapaxa, ukatsti churañatak arsupkta uka yanapt’a phuqhachañ jumanakar yanapañapataki. Ukhamat jumanakan yanapt’a churatanakamax munasiña uñacht’äwïñapataki, jan mich’asiñampi churapxatam uñacht’ayarakini. ⁶ Aka tuqit amtasipxam: Juk’ak yapuchirix juk’ak apthapi; walja yapuchiristi waljarak apthapi. ⁷ Sapa mayniw kunjämtix chuymapan amtki ukarjam churañapa; janiw pä chuymampi churañapäkiti, janirakiw maynin jariyatakis churañapäkiti, Diosax kusisit chuymampi chuririruw munasi. ⁸ Diosax jumanakar kunayman walja yänak jilarkir churapxiristam, ukhamat jumanakax munaski ukampi phuqt’ata sarnaqapxañamataki, ukat taqi aski luräwinakan yanapt’asiñamataki. ⁹ Qillqatax siwa: “Jan kunaninakarux jilarkir churi, khuyapayasiñapasti jan tukuskiriwa” sasa. ¹⁰ Yapuchañatak jatha churiri, manq’añatak manq’a churir Diosaxa, yapuchañamatakix kunatix wakiski uk churapxätam, ukarusti waljaptayaniwa, ukat yanapt’atanakamat yapux walipuniw achuni. ¹¹ Ukhamat jumanakan kunayman qamir yänakamax utjani, ukatsti munasiñampi mayninakar yanapt’apxañamataki. Kuna yanaptix nanakar jilatanakatak apayapkät ukatxa, jilatanakax Diosaruw yuspagarapxarakini. ¹² Aka yanap jilatanakatak apkasasti, janiw kunatix jupanakan jan utjki ukak churktanti, jan ukasti ukampix Diosar yuspagarañ chuyma jupanakar utjaytanxa. ¹³ Aka yanapasti jupanakarux Criston suma yatiyäwi arunakarjam sarnaqapxatam uñacht’ayani, ukatsti jupanakax Diosaruw yupaychapxani, jumanakan ukham kusisit chuymampi jupanakatakisa, taqinitakis yanapanak apthapipxatamatxa Diosarux jach’añchapxarakiniwa. ¹⁴ Ukhamarus taqi munasiñampiw jumanakatak Diosat mayipxani, jach’a khuyapayasiñ Diosan jumanakar uñacht’ayatapata. ¹⁵ ¡Diosax yuspagaratäpan, uka jan tukuskir churäwipata, ukasti jan amuyt’kayawa!

¹ Naya Pablow jumanakar Criston suma munasiñap layku achikt’asipxsma, jumanak taypin jikxataskta ukkhax “wali axsarir jaqiw” sapkchitu ukasa, jumanakat jayan jikxataskta ukkhasti “wali qhuru jaqiw” sapkchitu ukasa. ² Ukhamasti jumanakaruw achikt’apxsma, kunapachatix jumanakar tumpir jutkä ukkhaxa, amtäwiparjam nayar juchañchirinakampix jan qhurutasiñax munapxamti, ukanakasti nanakat jan walinak parlapxi, munañanakaxarukis sarnaqapkirista ukhama, nayax jupanakampi katjasiñatakisti jank’akïtwa. ³ Chiqpachansa nanakax jaqinakakïpxtwa, ukampis janiw akapachankir jaqinakjam nuwasipkti. ⁴ Nanakan nuwasiñ yänakaxax, janiw akapachankir yänakäkiti, jan ukasti nanakan nuwasiñ yänakaxax, taqi ch’amanaksa tukjirpacha Diosan ch’amapawa. Ukhamat jan wali arunak utjatap t’unjapxta, ⁵ ukhamarak Diosan arunakapax jan uñt’atäñapatak jark’ir jach’achasiñ arunakarusa. Jaqin janchi amtatanakapsa Cristoruw katuyapxta, ukhamat jupar jaysapxañapataki, ⁶ ukatsti taqi jan jaysasir chuymar mutuyañatakix jank’akïsipktwa, chiqpach jaysañar puriñataki. ⁷ Jumanakax laqäxaki taqi kunsa uñjapxtaxa. Maynitix chuymapan Cristonkat amuyaschixa, nanakax jupjama Cristonkapxatanakax amuyañaparaki. ⁸ Inas nayax jilïr kankañanïtaxat jilpach jariyapxsma, ukat janiw kunat p’inqasiñaxas utjkiti; Tatituw jilïr kankañ churitu, iglesiar jiltayañataki, janiw tukjañatakiti. ⁹ Janirakiw jumanakar qillqatanakaxamp axsarayapkirisma ukham amuyapxañam munkti. ¹⁰ Yaqhipax nayan qillqatanakaxax wali ch’aman qhuru arumpi qillqataw sapxiwa, ukampis jupampi parlañax arsutapas jan yäqañjamakiwa, sasa. ¹¹ Ukampis khititix ukham nayxat parlki ukax ak amuyasiñapa, kunjämtix qhuru arunakampi qillqat tuqi parlktxa, ukhamarakiw purinisinxa qhuru tuküxa, uksti luräwinakax tuqi uñacht’ayarakï. ¹² Chiqpachansa janiw jupanak pachpa jach’achasirinakampix kikipasiñ munapkti. Jupanakax mä pisi amuyunir uñtataw lurapxi kunsa jupanakan pachpa amuyupampi tupt’asa, maynit maynirus chikachasipxatapampixa. ¹³ Nanakax janiw kun jiljasas jach’achasipkäti. Diosaw nanakan kawkhakamatix irnaqañäki uksa uñacht’ayapxitu. Jupaw nanakan Corinto markar puriñatakis wakichi. ¹⁴ Ukat nanakax kunatix lurañanakaxäki ukat juk’amp jan lurapkti, janis nayrax jumanak taypir purinipkirista ukhama. Nanakaw jumanak taypir Criston suma yatiyäwi arunakap nayraqat puriyanipxta. ¹⁵ Janirakiw yaqhanakan luratanakapat jach’achasipkti nanakan luratanakaxäkaspas ukhama. Jan ukasti, nanakax jumanak taypin juk’ampi irnaqañ munapxta, iyawsañanakaman jiltañapkama, kawkhakamatix wakiski ukkhakama. ¹⁶ Ukatsti jumanakat jayan utjirinakar Criston suma yatiyäwi arunakap yatiyañ munapxarakta, ukampis janiw yaqhanakan irnaqatanakapar mantaranttañ munapkti, yaqhanakan luratanakapat jan jach’achasiskañataki. ¹⁷ Maynitix jach’achasiñ munchixa, Cristot jach’achaspan. ¹⁸ Khititix jupapachpat jach’achaski ukax, janiw aski jaqit uñt’atäkiti, jan ukasti khitirutix Tatitux jach’achki ukaw aski jaqit uñt’ataxa.

¹ ¡Nayan pisi chuyman jaqjam parlataxat jan mayjt’asipxamti! Llamp’u chuymampiy ist’apxita. ² Jumanakat llakiskta uka llakisiñax Diosat juti. Nayasti jumanakar mä sapa chachampi jaqichasiñatakiw katuyapxsma, jupasti Cristowa, jupa nayraqatarusti q’uma jan chach uñt’ir mä tawaqurjamaw uñstayapxsma. ³ Ukampis axsarañaxaw utjitu, kunjämatix katarix Eva warmir k’arinakapampi sallqantänxa, ukhamach jumanakan chuymanakam sallqantarakispa uk amuyta, ukhamäspa ukasti Cristor q’uma chuymampi arkañat saraqtayapxiristam. ⁴ Jumanakax wali sum katuqapxtaxa khitinakatix yaqha Jesusxat parlasis purinipki ukanakaruxa, kawkïr Jesusattix nanakax parlapksma ukat sipana. Ukhamarakiw yaqha ajaysa sum katuqapxtaxa kuntix nanakat katuqapkäyätas uka Ajayut sipansa, ukatsti yaqha arunak sum katuqapxaraktaxa qhispiyasiñ arunak churapksmas ukat sipan juk’ampi. ⁵ Ukhamasti janiw nayax qhipat jutapki uka jach’achasir apostolunakat sipan jan yäqañäkti. ⁶ Parlataxax jan sumäkchi ukasa, yatiñanak tuqin janiw ukhamäkti; aksti jumanakarux taqi luräwinakaxan uñacht’ayapxsma. ⁷ Criston suma yatiyäwi arunakap jan kun mayisak yatiyapksma, nayapach jisk’ar tukus jumanakan jach’ar aptatäpxañamataki, ¿ukati jan walïkisti? ⁸ Yaqha iglesianakaruw yanap mayta, jupanakaw jumanakar yanapañatak qullqi waxt’apxitu. ⁹ Jumanak taypinkkasasti pist’añan jikxatasta, ukampis janiw khitirus maykti; Macedoniat jutir jilatanakaw kunatix jan utjkitän uk churapxitu. Janiw nayat llakisipxañam munkäyätti, akat qhiparus janipuniw mayipkämati. ¹⁰ Criston chiqa kankañap uñt’ataxat janiw pächaskti, janiw Acaya chiqanakan khitis uka kusisiñ apaqkitaniti. ¹¹ ¿Kunatarak ukham parlañaxasti wakisisti? ¿Janich jumanakar munasipksmaxa? ¡Diosaw jumanakar munasitax yati! ¹² Ukampis kuntix lurkta uk luraskakïwa, ukhamat khitinakatix nanakjam tukuñ munas aytayasiñ thaqhapki ukanakax, jan uka amuyunakapan sarnaqasipkañapataki; ¹³ jupanakax k’ari, sallqjir apostolunakakiwa, Criston apostolunakapäkaspas ukhamaw tukupxi. ¹⁴ Ukasti janiw kunäkisa, pachpa Supayaw k’ajkir angeläkaspas ukham tuku; ¹⁵ ukat luqtirinakapax chiqa kankañsa arxatapkaspa ukham tukupxi. ¡Ukampis jupanakax luratanakaparjamaw tukusini! ¹⁶ Mä kutimpiw sapxsma, jan khitis nayan luqhïtax amuypati; ukampis ukhamtix amuyapxstaxa, luqhi jaqjam parlam sapxita, ukhamat nayan mä juk’a jach’achasiñaxataki. ¹⁷ Akxa janiw Tatitun parlayatati sisktxa, jan ukasti mä luqhir uñtataw parlaskta, ukatarakwa jach’a jach’a tukuñ munasktxa. ¹⁸ ¡Niyakixay walja jaqinakax luräwinakapat jach’a jach’a tukt’apxchixa, nayan jach’achasiñaxax wakisirakiwa! ¹⁹ Jumanakax wali yatiñan jaqïkasinsa, taqi chuymampiw luqhi jaqinakarux katuqapxtaxa, ²⁰ khitinakatix ch’amampi t’aqhisiyapktam, sallqjapktam, uñisiñat ajanut t’axllipktam ukanakarusa. ²¹ Akanak arsutaxax p’inqasiykchitu ukasa, chiqpachansa nanakax jumanakatakix sinti alt’at chuymaniw tukupxäyätxa, uka jaqinakjama jumanakaru lurañatakixa. Ukampis mayninakatix jach’achasiñ munchixa, nayas jach’achasiñ munaraktwa, ukax luqhi lurañäskpasaya. ²² ¿Jupanakax hebreo jaqinakäpxiti? Nayax hebreo jaqirakïtwa. ¿Jupanakax israelita jaqinakäpxiti? Nayax israelita jaqirakïtwa. ¿Jupanakax Abrahamat saraqirïpxiti? Nayax Abrahamat saraqirirakïtwa. ²³ ¿Jupanakax Criston irnaqiripäpxiti? Nayax jupanakatsa juk’ampïtwa, ukham parlasax inas mä luqhi jaqjam parlsta. Nayax jupanakat sipan juk’ampi irnaqawayta, nayarux jupanakat sipan walja kutiw carcelar jist’antapxitu, nayax jupanakat sipan juk’ampi jawq’jataw uñjasta, walja kutiw jiwayat niy uñjasta. ²⁴ Judionakax phisqa kutiw kimsa tunka llätunkan jawq’antasax mutuyapxitu. ²⁵ Kimsa kutiw lawampi jawq’japxitu, mä kutisti qalampiw k’upjapxitu. Kimsa kutiw barcox qutanjam sarasax jalantäna, ukat niyapuniw axskatta, jach’a qutan mä arumampi mä urumpiw qhantatta. ²⁶ Taqi tuqi sarkasax walja kutiw jawiranakampis niy apayasta, lunthatanakampis jalxatayasta, marka masinakax taypina, jayankir jaqinak taypin chijinakan uñjasta. Markansa, pampanakansa, k’ari jilatanak taypinsa, quta taypinsa chijinakan uñjasirakta. ²⁷ Walja kutiw irnaqäwinakan jan walt’añanakan uñjasta; walja kutiw jan ikin uñjasta; manq’atsa awtjata umatsa pharjataw sarnaqta; walja kutiw jan manq’atäkti; thayansa thayjata, isitsa jalstataw sarnaqta. ²⁸ Taqi akanakatsa, yaqhanakatsa, sapürupuniw iglesianakat llakista. ²⁹ Maynitix usuntchixa, nayax usuntaraktwa; maynirutix tinkuyapxchixa, nayax wal llakista. ³⁰ Mä kunat jach’achasiñatix utjchixa, nayax uka t’ukha kankañaxat jach’achasirakï. ³¹ Jesucristo Tatitun Dios Awkipaxa, wiñayatak yupaychatäñapax wakisiwa, jupax nayan chiqa arsutax yatiwa. ³² Damasco markan jikxatasïyät ukkhaxa, Aretas sat reyin marka apnaqiripax marka punkunakaruw nayar katuntañatakix uñjirinak uchäna; ³³ ukampis mä jilatanakaw mä canastar nayar uchasin, jach’a uyu pata ventanat warkuqapxitu, ukhamat jupanakan amparapat jaltxäyäta.

¹ Jach’achasiñax janiw wakiskiti. Ukampis Tatitut katuqat unañchäwinakata, qhanañchäwinakat arsuñaxawa. ² Cristor arkir mä jaqiruw uñt’ta, jupasti kimsïr alaxpachar apatänwa, ukat akarusti niya tunka pusin maräxiwa. Janchina, jan ukax ajayunaki apatächïn uk janiw yatkxti, Diosakiw uk yati. ³ Ukampis yattwa, uka jaqix ⁴ kusisiñ chiqar apatänwa, ukansti jan amuykay arunak ist’äna, uka arunaksti janiw khiti jaqirus “arsum” satäkänti. ⁵ Nayax ukham jaqit jach’achasiristwa, janiw naya pachpatxa, inas t’ukhachasitanakaxat jach’achasirista. ⁶ Nayatix jach’achasiñ muniristxa, ukax janiw kuna luqhi luräwïkaspasa, jan ukasti chiqak arsuskiristxa; ukampis janiw ukham lurkti, ukhamat jan khitis nayat juk’ampi sumätax amuyaskañapataki, kuntix nayat ist’ki ukanakata, ⁷ ukhamarak jan khitinsa uka muspharkañ qhanañchäwinakat nayar taripaskañapataki. Ukat nayan jan jach’achasiñaxatakix mä t’aqhisiñ katuqta, janchir mä ch’aphimpi jununtatäkaspas ukhama, ukasti Supayan mä khithapjamaw nayar t’aqhisiyitu. ⁸ Kimsa kutiw Tatiturux achikt’asta, uka t’aqhisiñ nayar apaqañapataki; ⁹ ukampis Tatitux situwa: “Munasiñaxampix phuqhatakïtawa; ch’amaxax t’ukhasiñan qhanpach uñsti” sasa. Ukhamasti t’ukhasiñaxat jach’añchastwa, ukhamat Criston ch’amapax nayan uñstañapataki. ¹⁰ Ukat t’ukhasiñanakaxat kusista, jisk’achayasitanakaxata, pist’ayasiñanakaxata, Cristo layku arknaqat uñjasitaxata, jan walt’añanak t’aqhisitaxat kusista, kunapachatix wali t’ukha uñjaskta ukkhasti, juk’ampi ch’amaniw tukta. ¹¹ Nayax mä luqhir uñtataw tukta, ukampis jumanakaw ukham tukuyapxista. Jumanakaw nayat sum parlapxañamäna, janiw nayax uka jach’achasir apostolunakat sipan aynacht’at uñjaskti, janis kuna jan yäqatjamäktsa ukasa. ¹² Jumanakaw uñjapxista, llamp’u chuymampi t’aqhisiñanak mututaxampi, ukhamarak uñacht’äwinakampi, muspharkañ luräwinak lurataxampix nayan chiqpach apostolütax uñacht’ayi. ¹³ Jumanakarux janiw yaqha iglesianakat juk’äpkasmas ukham lurapksmati, jan ukasti, jakañaxatak jumanakat jan kun mayitaxakiw utji. Ukham jan kun mayitaxat khuyapt’ayasipxita. ¹⁴ Nayax jumanakar kimsïr kuti tumpañatakiw niy wakichasta, janirakikiw jichhas kunsa mayipkämati, janiw jumanakan utjki uksa thaqkti, jan ukasti jumanak pachparuw thaqhapxsma; janiw wawanakat awkitak qullqi jikxatañapäki, jan ukasti awkiw wawanakapatak qullqi jikxatañapa. ¹⁵ Nayax taqi chuymaw qawqhatix utjkitu ukamp sarnaqaskä, naya pachpas jumanakan askimatakiw katuyasï. Nayax jumanakar walpun munasipxsma, ¿kunatarak jumanakasti juk’ak munasipxistasti? ¹⁶ Jumanakax yatipxtawa, janiw nayar qullqi churañ layku jumanakan llakisipxañam munkäyätti. Ukampis yaqhipanakax nayat sapxiwa: “Amtañampiw ukar jalt’ayasin sallqjistu” sasa. ¹⁷ Jan ukax ¿khithanipksma uka jilatanakampich waljanak apaqayapsmaxa? ¹⁸ Titoruw jumanakar tumpt’ir sarañapatakix mayta, jupampi chikasti mayni jilataruw khithanirakta, ¿Tito jilatach jumanakar sallqjapxtamxa? ¿Janit nanakasti panpachani mä amtañanik jumanak nayraqatan sarnaqapktsti? ¹⁹ Inas jumanakax uka arunakampik jariqasiñ munapkirista ukham amuyapxsta, ukampis janiw ukhamäkiti. Jan ukasti, Cristonkirinakjamaw Diosan nayraqatapan parlasipkta. Munat jilatanaka, taqi ukanakasti jumanakan ajayun jiltapxañamatakiwa. ²⁰ Mä tuqitxa axsararaktwa, jumanakar tumpir jutkä ukkhax, inas jan kunjämtix nayax munkta ukham jikxatapkchïmati, janirak jumanakas kunjämtix munapkta ukham nayar jikxatapkchitätati. Jumanak taypin inas utjaskchi ch’axwañanaka, uñisisiñanaka, thithiñanaka, sapak kunsa munirïñanaka, k’umisiñanaka, jach’a jach’a tukuñanaka, pixtusiñanaka. ²¹ Axsararaktwa, inas jutirin wasitat tumpapkäma ukapachaxa, Diosax jumanakat mä p’inqa uñjasiychitani, ukat inas jumanakat waljani nayratpach juch lurasipkatamat jachañaxächini, q’añu jakañanaksa, wachuq juchan sarnaqañanaksa, jan wali lurañanaksa janirak apanukupktati uka layku.

¹ Akampix kimsïr kutiw jumanakar tumpxapxäma. Taqi kunas pani, jan ukax kimsa jilatanakan arsutaparjamaw askichatäni. ² Nayra juchañchasirinakaru, ukatsti taqiniru, jichhax jayankkasin kuntix payïr kutin tumpapksma ukkhax iwxt’apkäyäsma uk amtayapxsma: wasitat purinkä ukkhax janiw khititsa khuyapt’ayaskäti. ³ Cristow naya tuqix parli, sapxsmawa. Ukan chiqätap yatiñatakisti jumanakax mä unañcha thaqhasipktaxa. Cristox janiw jumanakatakix t’ukha kankañanïkiti, jan ukasti jumanak taypin ch’aman kankañap uñacht’ayi. ⁴ Chiqpachansa pisi ch’aman jaqjamaw ch’akkatat uñjasïna, ukampis Diosan ch’amap laykuw jakaski. Uka kipkarakiw nanakax jupankasax pisi ch’ama kankañanïpxta, ukampis jupampi mayakïxasax Diosan ch’amap laykuw jakapxta, ukhamat jumanakar yanapt’añataki. ⁵ Jumanakpacharak chuyma uñantasipxam, ukhamat iyawsäwiman ch’amanïpxatam yatiñataki. ¿Janit amuyasipkta Jesucriston jumanakampïskatapsti? ¡Yant’ampi atipjayasisakiw jan amuyasipkasmati! ⁶ Ukampis nayax muntwa, jumanakax nanakan jan aynacht’atax yatipxañama. ⁷ Diosat mayipxarakta, jumanakan jan kuna ñanqhsa lurasipkañamataki; ukasti janiw nanakan sumat uñt’ayasiñ laykükiti, jan ukasti jumanakan aski lurapxañamatakiwa, nanakar aynacht’atjam amuyapkitasma ukasa. ⁸ Nanakax janiw kunsa chiqa kankañ aynacht’ayañatakix lurapkiristti, jan ukasti, chiqa kankañan askipatakiw lurapxirista. ⁹ Ukat nanakax t’ukha kankañankasax kusisipxta, jumanakan ch’amanïpxañamax wakisipuniwa; nanakasti Diosat mayisipkakïwa, jumanakan aski jaqir tukupxañamataki. ¹⁰ Aka qillqatsti jumanakar janïr tumpir jutkasaw apayanipxsma, kunapachatix purinkä ukkhax jan munañanïñax kankañampi qhuru tukuñaxataki, uksti Tatituw churitu, janiw jumanakar tukjañatakiti, jan ukasti ajayu tuqin jumanakar ch’amañchañatakiw churitu. ¹¹ Jilatanaka, kusisitäpxapunim. Jakañanakamansti chiqapapunïpxam. Ch’amañchasipxam, sumankañan jakasipxam; ukatsti munasiñani, samarañ churir Diosax jumanakampïskaniwa. ¹² Jumanak purasti qullan jamp’atimpi aruntasipxam. Cristor iyawsir jilatanakax taqiniw aruntanipxtam. ¹³ Tatit Jesucriston khuyapayasiñampi, Diosan munasiñapampi, Qullan Ajayupampix taqi jumanakampïpan.