1 TESALONICENSES

¹ Tesalónica iglesiankir munat jilatanaka, kullakanaka: Naya Pablompi, Silvanompi, Timoteo jilatampiw aruntanipxsma, Dios Awkiru, Tatit Jesucristor mayachatäpkta ukanakaru. Taqi chuymaw sapxsma, Dios Awkisay munasiñapampi jumanakar phuqt’pan, sumankañapsa churarakpan. ² Taqi jumanakat Diosarux yuspagarapxapuntwa, Diosat mayiskasasti jumanakat amtasipxapuntwa. ³ Dios Awkisan nayraqatapan iyawsañampi irnaqapxatamata, munasiñampi yanapapxatamata, t’aqhisiñanakan Jesucristo Tatitusar suyt’atanakamat sapa kutiw amtasipxta. ⁴ Diosan munat jilatanaka, jupan jumanakar ajllisitap yatipxtwa. ⁵ Kunapachatix nanakax Diosan suma yatiyäwi arunakap yatiyapksma ukkhasti, janiw aru tuqikïkänti, jan ukasti Diosan ch’amapa, Qullan Ajayun luräwip tuqiw taqi iyawsañampi uñacht’ayapxsma. Kunjämtix jumanak taypin askinakamatak nanakax sarnaqapkta uk sum yatipxtaxa. ⁶ Jumanakasti nanakar uñtasa, Cristor uñtasaw arkapxtaxa, ukatsti wali jach’a t’aqhisiñanak taypinsa, kusisiñampiw Qullan Ajayun yatiyäwip katuqapxtaxa. ⁷ Ukhamat jumanakan sarnaqäwimax Macedonia, Acaya chiqanakan Cristor taqi iyawsirinakatakix uñtkayänxa. ⁸ Jumanakat qalltasaw Tatitun yatiyäwipax taqi chiqar puri, janiw Macedonia, Acaya uka chiqanakarukiti, jan ukasti taqi chiqanakaruw puri, Tatitur iyawsapxatamat yatisiwa, ukhamïpansti janiw nanakan kun arsuñanakaxas wakiskxiti. ⁹ Jan ukasti jupanak pachpaw nanakan purinitaxat arsusipki, kunjämtix jumanakax yaqha diosanak apanukusax jakkir chiqpach Diosar luqtañatak kutikipstapkta, ¹⁰ Diosan Jesús Yuqapar alaxpachat kutiniñap suyapkta ukanakata, juparusti Diosaw jiwatanak taypit jaktayäna. Jesusasti, jutkani uka axsarkañ mutuñat qhispiyistu.

¹ Jilatanaka, jumanak pachpaw yatipxtaxa, janiw nanakan jutatanakaxax inamayäkänti. ² Ukat juk’ampsa, jumanakax niyaw yatipxtaxa, nayrapachax Filipos markan wali jisk’achjata, jan wali uñjatäpxayätwa, nanakarux Diosaw suma yatiyäwi arunakap jumanakar yatiyañatakix yanapapxitäna, taqi ch’amampi, kunayman ch’axwanak taypina. ³ Yatichäwinakaxanxa janiw pantjatäpkäyätti, janirakiw khitirus jan wali amtäwinakampi, sallqjañ amtäwimpis parlapkti. ⁴ Jan ukasti, Diosax askit katuqapxitu, Diosan suma yatiyäwip parliriw khithapxitu, ukhamarjamaw parlasipkta. Janiw jaqir kusisiyañatakïkiti, jan ukasti chuymanakas uñakipir Diosar kusisiyañatakiwa. ⁵ Kunjämtix jumanakax niy yatipxta, janiw kunapachas suma arunakampix sumachapksmati, janirakiw qullqi laykus parlapksmati. Diosaw taqi uk uñjaski. ⁶ Janiw khitin jach’achatäñsa thaqhapkti; janiw jumanakampi jach’achayasiñsa, yaqhanakampi jach’achayasiñsa munapkti. ⁷ Nanakax Criston apostolupjamax, jilïrjam uñjayasiñ munapxiriskäyäta, ukampis nanakax wali amuyumpiw jumanakar uñjapxsma, kamisatix mä taykax wawanakapar munasis uywki ukhama, ⁸ ukhamarak jumanakarux munasipxsma, janiw Diosan suma yatiyäwi arunakapakti churapkiriskäyäsma, jan ukasti nanakan pachpa jakañanakaxsa churapxarakiriskäyätwa. ¡Sintipuniw jumanakar munasipxsma! ⁹ Jilatanaka, janchin jakañatakix jan inakt’as irnaqapxatanakax yatisipktawa. Nanakax uruy arumaw irnaqapxta, ukhamat Diosan suma yatiyäwip parlañanakaxanxa jan khititakis llakïskañataki. ¹⁰ Jumanakaw uñjasipkistaxa, Diosasti uñjasipkarakituwa, nanakasti qullan kankañana, chiqapana, jan kamskayaw jumanak Cristonkirinakampix sarnaqapxta. ¹¹ Sapa mayni jumanakar ch’amañchatanakaxsa, chuymachatanakaxsa yatipxaraktawa, kunjämtix mä awkix wawanakapampi lurki ukhama. Diosankirinakjam sarnaqapxañamatakiw iwxt’apxsma, jupaw qhapaq markapankañamatakix jawsapxtam. ¹³ Ukat nanakax Diosar sapa kuti yuspagarapxta, kunapachatix nanakax Diosan yatiyäwip yatiyapksma ukkhaxa, jumanakax Diosan yatiyäwipjam katuqapxtaxa, janiw jaqinakan yatiyäwipjamak katuqapktati. Chiqpachansa uka Diosan yatiyäwipaw juma iyawsirinak tuqix qhansti. ¹⁴ Jilatanaka, kunapachatix jumanakax marka masinakamampi arknaqatäpkäyät ukkhaxa, uka pachparakiw Judeankir Cristo Jesusar iyawsirinakampix lurasïna, jupanakasti judío marka masinakapampi arknaqatäpxänwa. ¹⁵ Uka judionakaw Tatit Jesusarux jiwayapxäna, kunjämtix nayrapachax profetanakar jiwayapkatayna ukhama, nanakarusti jaqunukupxituwa. Diosarux janiw kusisiyapkiti, taqi jaqinakan timaparuw tukupxi, ¹⁶ kunapachatix jan judiöpkis ukanakar qhispiyasiñat parlañ munapkta ukkhaxa, janiw parlayapkituti. Ukhamat juchanakapampix yapt’asipxi. Ukampis uk tukjañatakix Diosan axsarkañ mutuyäwipaw jupanakxar juti. ¹⁷ Jilatanaka, kunapachatix jumanakat mä qawqha urunak jayankapkäyät ukkhaxa, janis uñjapksmaxa, jumanakax nanakan chuymaxankapxapuntawa, ukatsti jumanakar uñjirix walpun sarañ munapxäyäta. ¹⁸ Sarañ amtapxäyäta, naya Pablos qawqha kutiw jutañ munäyäta, ukampis supayaw jark’apxitu. ¹⁹ Jesucristo Tatitusan nayraqatapana, kunapachatix jupax jutkan ukkhasti, ¿khitirakïn nanakan suyt’äwixampi, kusisiñaxampi, jach’achasiñaxampisti? Jumanakäpxtawa, janiw khitïkaspasa. ²⁰ Jïsa, jumanakäpxtaw nanakan qhapaq kankañasa, kusisiñasa.

¹ Ukhamasti, jan juk’ampi suyañ munasax Atenas markar qhiparañatakiw amtasipxta, ² ukat Timoteo jilatar khithaniñataki, jupasti Criston suma yatiyäwi arunakap parlañan Diosan yanapiripawa. Juparusti jumanakan iyawsäwim thurt’ayañataki, ch’amañchañatakiw khithanipxta, ³ ukhamat jan maynis uka jan walt’añanakampi mayjt’asiskañapataki. Ukampis jumanak pachpaw ukanakampi t’aqhisiñ wakisitap yatipxtaxa. ⁴ Ukhamarus kunapachatix jumanakampïskäyät ukkhaxa, llakisiñanakaw utjistani sasax sapxäyäsmawa; ukasti phuqhasiwa, uksti niy yatxapxtawa. ⁵ Ukat nayax janiw juk’ampi suyañ munkti, jumanakax kunjämäsipktas iyawsäwin uk jiskt’añatakiw khithanta, inampis yant’irix yant’apxiristam ukat wal llakisïyäta, ukhamäspa ukasti nanakan irnaqataxax inamayakïspawa. ⁶ Jichhasti Timoteox Tesalónica markat kutt’anxiwa, jupaw jumanakan iyawsäwimampita, munasiñamampit wali suma yatiyäwinak puriyani. Jumanakan nanakat taqi munasiñampi amtasipxatamat yatiyapxitu, ukhamarak nanakampi jikisiñ munapxatamata, kunjämtix nanakax jumanakampi jikisiñ munapkta ukhama. ⁷ Jilatanaka, jan walt’añanakaxana, llakisiñanakaxana, nanakax wali chuymachasïwi katuqapxta, jumanakan iyawsäwin ch’aman sayt’apxatam yatisina. ⁸ Jumanakan Tatitumpi sayt’asipxatam yatisax chuymsa qhanartayapxituwa. ⁹ ¿Kunjämatarak Diosasar juk’ampi yuspagarapxirista, jupan nayraqatapan jumanakat wali kusisiñ utjatapatsti? ¹⁰ Jumanakar uñkatañatakix uruy arumaw Diosat mayipxta, ukhamat kunatix iyawsäwiman jan phuqhatäki ukax phuqhachatäñapataki. ¹¹ Pachpa Dios Awkisampina, Jesucristo Tatitusampin jumanakar uñjir sarañatak nanakar yanapt’añap munapxta. ¹² Tatitusti jumanakar jiltaypan, maynit maynikam munasiñan juk’ampi utjañapataki, kunjämtix nanakax jumanakar munasipksma ukhama. ¹³ Jupay chuymanakaman utjir iyawsäwir thuruñchpan, Jesucristo Tatitusax taqpach qullananakapampi jutkani ukapachasti, Dios Awkisan nayraqatapan jan kuna juchani, qullanaptat uñstapxañamataki. Ukhamäpan.

¹ Jichhasti jilatanaka, aksti Tatit Jesusan sutipxaruw achikt’apxsma, iwxt’apxaraksma: nanakat yatiqapkista ukarjamay Diosar kusisiyañatak jakapxam, kamisatix niy jakapkta, ukat juk’amp sum jakapxarakim. ² Kuna yatichäwinaktix Tatit Jesusan munañapat jumanakar churapksma ukanak yatisipktawa. ³ Diosax jumanakan qullan kankañan jakapxañam muni, wachuq jucha lurañanak apanukupxam, ⁴ sapa maynis qullan kankañana, axsart’añampi janchip apnaqañ yatiqpan, ⁵ jan khitis inamst’añ chuymampi, jan wali amtañanakampi apayaspati, kunjämtix Diosar jan uñt’ir jaqinakax lurapki ukhama. ⁶ Janiy khitis uka tuqin jila masipar jan wal lurpati, janirak sallqantpasa, uk luririrusti Tatitux ch’amampiw mutuyi, kunjämtix niy iwxt’apksma ukhama. ⁷ Diosax janiw juchan jakañasatak jawskistuti, jan ukasti q’uman jakañasatakiw jawsistu. ⁸ Ukhamasti khititix aka yatichäwir jisk’achki ukax janiw khiti jaqirus jisk’achkiti, jan ukasti Diosaruw jisk’achaski, khititix Qullan Ajayup churkistu ukaru. ⁹ Jilatanak pura munasiñxatsti janiw jumanakar qillqaniñax wakiskxiti, pachpa Diosaw jumanakar maynit maynikam munasiñ yatichapxtam. ¹⁰ Jumanakasti Macedonia markan jakir jilatanakarux ukham munasisipktaxa. Ukampis jilatanaka, nanakax achikt’apxsmawa, munasiñamax juk’amp jilxatpan. ¹¹ Sumankañan jakasiñatak ch’amachasipxam, jumanakan lurañanakam phuqhasa, amparanakamampi irnaqasa, kunjämtix iwxt’apksma ukhama, ¹² ukhamat Diosar jan iyawsapki ukanakax jumanakar suman uñjapxañapataki, jumanakan pist’ayasiñanakas jan utjañapataki. ¹³ Jilatanaka, jiwatanakat sum yatipxañam munapxta, ukhamat jumanakan jan suyt’añan jaqinakjamax jan llakisisipkañamataki. ¹⁴ Kunjämtix jiwasax Jesusan jiwatapa, jiwatanak taypit jaktatap iyawstanxa, uka pachparakiw iyawstan Diosax Jesusampi chik jupar iyawsas jiwapki ukanakar jaktaykan ukxa. ¹⁵ Ukat jumanakarux Tatitun yatichäwinakaparjam sapxsma, jiwasanakax khitinakatix Tatitun jutañapkam jakasipkañän ukanakax, janiw jiwatanakat nayrt’kañäniti. ¹⁶ Mä jach’a aruw ist’asini, mä arcangelan arupa, Diosan trompetapan phust’atapampi, ukatsti pachpa Tatituw alaxpachat saraqanini. Cristor iyawsas jiwirinakax nayraqat jaktani; ¹⁷ ukatsti jakirinakax jupanakamp chikaw qinayxar aptatäñäni, ukhamat Tatitump alayan jikisxañataki, ukhamaw Tatitumpix wiñayatak jakxañäni. ¹⁸ Ukhamasti aka arunakampiy maynit maynikam ch’amañchasipxam.

¹ Jilatanaka, urunakatsa, pachanakatsa, janiw jumanakar qillqaniñaxax wakiskiti. ² Jumanakax askiw yatipxtaxa, Tatitux kutinkan uka urux jan suyat urüniwa, kunjämatix mä lunthatax arum jutki ukhama. ³ Kunapachatix jaqix akham siskani: “Taqi kunas sumakïskiwa, janiw kunas kamachkaniti” sasa, jupanakxarux ukkhaw t’unjäwix akatjamat jutani, kunjämtix usur jaqi warmin wawachasiñap urux purinki ukhama; ukatsti janiw jaltapkaniti. ⁴ Ukampis juma jilatanakax janiw ch’amakankapktati, ukhamat Tatitun kutiniñap urux lunthatar uñtat jan katjayasiskañataki. ⁵ Taqi jumanakax qhanankirïpxtawa, urunkirïpxaraktawa. Janiw arumankirïpktanti, janirakiw ch’amakankirïpktansa; ⁶ ukat mayninakjam jan ikiñasäkiti, jan ukasti taqi amuyusan p’arxtatäñasawa. ⁷ Ikirinakax arumaw ikipxi, machirinakasti arumaw machapxaraki; ⁸ ukampis jiwasanakax urunkirjamax amuyasiñasapuniwa. Iyawsäwimpi, munasiñampix mä qhawampjam uskuntataw jark’aqasiñasa, qhispiyasiñ suyt’äwimpisti mä cascompjamaw asxatasiñasa. ⁹ Diosasti janiw mutuyäwi katuqañatak uchaskistuti, jan ukasti Tatit Jesucristo tuqi qhispiyasiñ jikxatañatakiw uchasistu. ¹⁰ Jesucristox jiwasanak laykuw jiwawayi, jakañänisa, jiwañänisa, jupampi chikt’ataw jakañäni. ¹¹ Ukhamasti maynit maynikamay ch’amañchasipxam, kamisatix jichhakam lurasipkta ukhama. ¹² Jilatanaka, jumanak taypin irnaqapki, sarayapki, Tatitun sutipar iwxapkaraki ukanakar yäqapxañamatakiw achikt’apxsma. ¹³ Jupanakan irnaqatapatsti, munasiñampi sum uñjapxam. Maynit maynikamasti sumankas jakasipxam. ¹⁴ Jilatanaka, jumanakaruw iwxt’apxaraksma, jan ist’asirinakar tuqinuqapxam, mayjt’atanakarus ch’amañcht’apxam, t’ukhachasitanakar yanapt’apxam, taqinimpis llamp’u chuymanïpxam. ¹⁵ Amuyasipxam, jan khitis ñanqhat ñanqha kutt’aypati. Jan ukasti, aski lurañatakipun ch’amt’apxam, jumanak taypinsa, taqinimpisa. ¹⁶ Kusisitäpunïpxam. ¹⁷ Jan inakt’as Diosat mayisipxam. ¹⁸ Taqi kunat Diosar yuspagarapxam, jupax Cristo Jesusankirïpxatamat ukham muni. ¹⁹ Ajayun aqkir ch’amapsti jan jiwt’ayapxamti. ²⁰ Jutir urunakat arsuñanaksti jan jisk’achapxamti. ²¹ Taqi kun yant’apxam, askïki uk katxäsipxam. ²² Taqi ñanqha lurañat jithiqtapxam. ²³ Sumankañ churir Diosax jumanakarux qullanar tukuypan, juparak taqpach jakañam impan, ajayumsa, almamsa, janchimsa jan akch’a q’añuni, Jesucristo Tatitusan jutañapkama. ²⁴ Jumanakar jawsirix chiqa chuymaniwa, ukatsti taqi akanak phuqhapuniniwa. ²⁵ Jilatanaka, nanakatakix Diosat mayirapipxita. ²⁶ Taqpach jilatanakarux qullan jamp’atimpi aruntapxam. ²⁷ Tatitun sutipxaruw iwxt’apxsma, aka qillqat taqpach jilatanakatak ullart’apxañamataki. ²⁸ Jesucristo Tatitusan khuyapayasiñapax jumanakampïpan.