1 PEDRO

¹ Naya Pedrox Jesucriston apostolupätwa, khitinakatix markamat jayan utjasipkta, Ponto, Galacia, Capadocia, Asia, Bitinia uka suyunakana, taqi jumanakaruw aruntanipxsma. ² Jumanakarusti nayratpach Dios Awkix amtataparjam ajllisipxtam. Ajay tuqiw jupatak yaqhachasipxtam, ukhamat jupar jaysapxañamataki, Jesucriston wilapamp q’umachatäpxañamataki. Jumanakasti Diosan jilarkir waxt’äwinakap katuqapxam, suman sarnaqasiñ katuqapxarakim. ³ Jesucristo Tatitusan Awkipar yupaychañäni, jupaw jach’a khuyapayasiñapat Jesucriston jiwatanak taypit jaktatap tuqi machaqat yuriyistu. Ukaw jiwasanakarux suyt’añana jakayarakistu, ⁴ ukhamarakiw jumanakarux kuntix Tatitux alaxpachan suma churäwi imarapipktam uk katuqayapxätam, ukasti janiw tukjatäkaspati, janiw q’añuchatäkaspasa, janirakiw mä panqarjamas wañskaspati. ⁵ Tatitux jupar iyawsapxatamatxa, kawkïr qhispiyasiñtix jumanakatak wakichatäki uk katuqapxañamkamaw jach’a ch’amapampix taqi kunat imasipkaraktam, ukasti qhipa urunakan yatiyatäniwa. ⁶ Inas mä juk’a pacha kunayman yant’anakan t’aqhisipxañam wakisirakchi, ukampis jumanakax wal kusisipxam. ⁷ Jumanakan iyawsañamasti kunjämtix qurix ninampi yant’atäki ukham yant’atäñaparakiwa. Yant’ampi q’iwtasir iyawsäwix, tukusir qurit sipansa, juk’amp jila alaniwa. Ukhamat jumanakan iyawsañamax yant’atäsinxa, Jesucristox jutkani ukapachaxa, sumat uñt’atänixa, jach’arus aptatarakïnixa. ⁸ Jumanakax Jesucristor jan uñjkasas, juparux munapxtawa, jichhasa, jan uñjkas iyawsasin walrak kusisipxtaxa. Uka jach’a kusisiñanakamasti janiw arunakamp arsuñjamäkiti, ⁹ jumanakax iyawsapxatamat qhispiyasiñ jikxatapxta uka layku. ¹⁰ Nayra profetanakasti aka qhispiyasiñat wali sum yatxatapxäna, kuntix Tatitux khuyapayasiñapan jumanakar churkani ukanakat parlapxarakïna. ¹¹ Jesucriston Ajayuparakiw profetanakarux nayratpach Criston t’aqhisiñapxata, kuna jach’a kankañatix uka qhipatsa jutañapäkän ukanakat yatiyäna. Uka profetanakasti, Mesiasax khitïnisa, jutäwipax kunapachänisa taqi ukanak yatxatañ munapxarakïna. ¹² Ukampis Diosax jupanakaruxa, kuntix yatiyapkäna ukax jan jupanakatakïtapa, jan ukasti jiwasatakïtap amuyt’ayarakïna. Ukatpï jichhax, jumanakarux uka pachpa arunak khitinakatix parlapktam jupanak tuqi yatiyataxa. Jupanakasti alaxpachat khithanit Qullan Ajayun ch’amapampiw parlapxaraktamxa. Angelanakasti ukanak uñjañ munapxarakïnwa. ¹³ Ukatpï jilatanaka, kuntix lurapkäta ukanakat wal amuyt’asipxam, mä suma jakañan sarnaqapxarakim. Taqi chuyma suyt’apxam, kuntix Diosax khuyapayasiñapan jumanakar churapkätam Jesucristox jutkani ukkhaxa. ¹⁴ Ist’asir wawanakjamaxa, jan munañanakamarjam sarnaqapxamti, kunjämtix Tatitur janïra uñt’kasax sarnaqapkäyäta ukhama. ¹⁵ Ukampis jichhax kunjämtix jumanakar jawsir Tatitux qullanäki, ukhamarakiy jumanakax q’uma jakañan jakxapxam. ¹⁶ Tatitun qillqatapan siwa: “Nayax qullanätwa, jumanakax qullanäpxarakimaya” sasa. ¹⁷ Jumanakatix taqi jaqinakar luräwinakaparjam taripir chiqa Diosarux “Awki” sapxtaxa, jumanakax aka uraqin jakkasax Jupar axsart’as jakapxañamawa. ¹⁸ Tatitusti, jumanakarux nayra awkinakamat katuqapkayäta uka ina ch’usa jakañatsa qhispiyapxtamwa. Jumanakax sum yatipxtaxa, uka qhispiyasiñax janiw tukusir qurimpis qullqimpis alatäkiti, ¹⁹ jan ukax Tatit Jesucriston suma wilapamp alatawa. Jupasti mä suma q’uma jan kamacht’at ovejar uñtat luqtatarakïnwa. ²⁰ Cristow ukham phuqhañapatak ajllitäna, aka uraqix janïra utjkän ukkhatpach ajllitänwa, ukampis aka qhipa urunakan jumanakatak askiw uñstxi. ²¹ Jumanakasti Cristo tuqirakiw Diosarux iyawsapxtaxa, uka Diosarakiw Cristorux jiwatanak taypit jaktayi, jach’arus aptaraki; ukatpï jumanakax Diosarux iyawsapxtaxa, suyt’apxaraktasa. ²² Jumanakasti, Tatitun arunakapar jaysasinxa, jilatanakar chiqpach munañatakiw q’umachasxapxtaxa. Ukhamax maynit maynikamax taqi chuymampi, taqi ch’amamp munasipxañamawa. ²³ Jumanakasti, janiw jiwir jaqit yuripktati, jan ukasti Diosan wiñay jakkir arunakap tuqiw wasitat yuripxtaxa. ²⁴ Diosan arunakapax siwa: “Taqi jaqix qurar uñtatakiwa, jach’a kankañapasti quran panqarapar uñtatakiwa. Qurax wañsukiwa, panqaras willirtxakiwa, ²⁵ ukampis Tatitun arunakapax wiñayatakiwa.” Aka arunakapï suma yatiyäwinakaxa, Jesucriston yatichat arunakaxa.

¹ Ukalayku, jumanakax apanukupxam: taqi jan wali luräwinaka, taqi sallqjasiñanaka, q’uma q’um tukuñanaka, munapayañanaka, jaqxat parlasiñanaka. ² Kamisatix asu wawax taykapan lechep thaqtasixa, ukhamarak jumanakax kunatix ajayumatak askïki uk thaqhapxam, ukhaman jiltapxañamataki qhispiyatäpxañamatakiraki, ³ Tatitun munasiñap niy uñt’apxatam layku. ⁴ Jesucristor jak’achasipxam, jupax jaqinakan apanukut jakkir qalawa, ukampis Diosatakix mä suma ajllit wali jila alan qalawa. ⁵ Ukatpï Diosax jakkir qalanak tukuyapxätamxa, uka qalanakampix ajay templo sayt’ayani, jumanakarux qullana sacerdotenak tukuyani, Jesucristo tuqi ajayun suma luqtäwinakam Tatitur churañataki. ⁶ Ukatpï Qillqatan sarakixa: “Nayaw Sionan mä qal uchta, ukax mä jach’a wakiskir qalawa, suma ajllit aski qalarakiwa; uka qalar iyawsirix janiw mayjt’askaniti” sasa. ⁷ Jumanakax Tatituruw iyawsapxta, ukat uka qalax aski qalar tuku; ukampis jan iyawsirinakatakix, kunatix Tatitun arupan siski ukaw phuqhasiski: “Uta luririnakan apanukut qalaxa, mä jach’a wakiskir qalaw tukuwayxi.” ⁸ Qillqatan saskakiwa: “Aka qalax waljaniruw liwisiyani; waljaniw aka qarqar lanktasipxani,” sasa. Jupanakasti Tatitun arunakapar jan iyawsapxatapat liwisipxi, ukatak uchatarakïnwa. ⁹ Ukampis jumanakax Tatitunkiritak ajllitäpxtawa, reyir luqtir sacerdotenakäpxtawa; mä q’uma markäpxtawa; Diosan ajllisit markapäpxtawa. Ukatpï, Diosan muspharkañ luräwinakap yatiyapxañamaxa, Diosaw jumanakarux ch’amakat irpsusinxapxtam, suma muspharkañ qhanapar mantxapxañamataki. ¹⁰ Jumanakax nayrax janiw mä markäpkayätati, jichhasti Diosan markapäxapxtawa. Nayrax jupax janiw jumanakat khuyapayaskänti, ukampis jichhax khuyapayasxapxtamwa. ¹¹ Munat jilatanaka, sarir jaqinakarjamaw achikt’apxsma, janchin munañaparjam jan jakapxamti, uka janchin munañapasti ajayusampiw nuwasi. ¹² Diosar jan uñt’ir jaqinak taypin sum sarnaqapxam. Jichhas jupanakaxa, jumanakat jan wal parlapkchi ukasa, jumanakan aski luratanakam uñjasasti, Diosaruw jach’achapxani kunürutix jupax luräwinak wayt’ir jutkani ukkha. ¹³ Tatit Jesusxat jan khitinsa jan wal parlaskañapatakixa, marka apnaqir jilïrinakarux jaysapxam. ¹⁴ Roma marka apnaqir jach’a jilïrirus jaysapxam, uka jach’a jilïrin utt’ayat marka apnaqirinakarus jaysapxarakim, jupanakax jan wal lurir jaqinakar mutuyañataki, aski luririnakar jach’ar aptañatak utt’ayatäpxiwa. ¹⁵ Diosasti jumanakan aski lurañanakam muni, ukhamat pisi amuyun jaqinakan parlatanakap amukt’ayapxañamataki. ¹⁶ Qhispiyat jaqinakjam sarnaqasipxam, ukampis uka qhispiyat sarnaqañ tumpampix janirak jan walinak lurapxamti, jan ukasti Diosan iyawsirinakapjam sarnaqapxam. ¹⁷ Taqinirus suman uñjapxam. Tatitun utapankirinakar munapxam, Diosar jach’añchapxam, reyirus ist’apxarakim. ¹⁸ Uywatanaka, uywirinakamar ist’apxam, janiw suma jaqinakäki ukanakarukiti, jan ukasti qhurunakäki ukanakarus ist’apxarakim. ¹⁹ Maynitix lurañanakap phuqhañ layku t’aqhischi ukkhaxa, Dios nayraqatan askiwa. ²⁰ Maynitix jan wal luratanakapat t’aqhisiyatächi, ukatsti llamp’u chuymampi t’aqhischi ukaxa, janiw kuna asksa lurkiti. Ukampis, maynitix aski luratapat llamp’u chuymamp t’aqhischi ukaruxa, Tatitux jach’a waxt’äwip churani. ²¹ Ukatakipï Diosax jawsapxtamxa, Cristox jumanak laykuw t’aqhisiwayi, jumanakar mä suma uñacht’äwi jaytasa, ukhamat kayup arkapxañamataki. ²² Jupax janiw kuna juchsa lurawaykiti, janirakiw khitirus sallqjawaykiti. ²³ Chuyma usuyir arunakamp tuqipkän ukkhaxa, janiw pachpa arunakamp kutt’aykänti; t’aqhisiyapkän ukanakatakisa, janiw achuskänti, jan ukasti chiqapar taripir Diosaruw katuyasïna. ²⁴ Jesucristo pachpaw cruzan jiwasin juchanakas janchipxar apawayxi, ukhamat jiwasanakax jucha jan luras jakxañasataki, jan ukasti askinak luras jakañasataki. Jupax jumanak k’umaräpxañamatakiw chhuxriñchjatänxa. ²⁵ Nayrax jumanakax chhaqhat ovejanakar uñtataw sarnaqapxayätaxa, ukampis jichhax Cristoruw kuttanxapxtaxa, jupasti mä awatirir uñtataw jumanakar imapxtamxa.

¹ Chachan warminaka, chachanakamar ist’as sarnaqapxam, ukhamata, kawknïr chachatix Tatitur jan iyawskchi ukax, jumanakan sarnaqäwinakam tuqi Tatitutak jikxatatäñapataki, ² jan kuna arumpiki, jan ukasti jumanakan sum sarnaqatam uñjasaki. ³ Jumanakan k’achachasiñanakamax jan patxakïkpati, ñik’utanak k’achachasiñanakampi, quri yänakampi, wali jila alan isinakampisa, ⁴ jan ukasti suma chuymanïpxam, ukaw jan tukuskiri, suma munkañaxa. Dios nayraqatansti ukax wali askiwa. ⁵ Nayra pachanakanxa, Diosar axsartir warminakax ukham k’achacht’asipxäna. Jupanakax Diosaruw iyawsapxäna, chachanakaparus ist’apxarakïnwa. ⁶ Sara warmix ukham ist’asirïnwa, Abraham chachaparux “tatay” sarakïnwa. Jumanakatix ukham ask lurapxätaxa, janirak kunarus axsarapkäta ukaxa, Sara warmjamäpxätawa. ⁷ Chachanakasti warminakamampix suma chuymanïpxam. Kunjämarutix wakiski ukhamar jupanakar jach’ar aptapxam, jupanakax janiw jumanakjam wali ch’amanïpkiti, ukampis Tatitux wiñay jakañ churarakini. Jumanakatix ukham lurapxätaxa, Tatitux mayisitanakam ist’apuniniwa. ⁸ Ukhamasti jumanakax jumanakkam munasisa, suman sarnaqas jakapxam. Khuyapayasirïpxam, llamp’u chuymanïpxarakim. ⁹ Ñanqhat ñanqha jan kutt’ayapxamti, jan wali arutsa jan pachpa arump kutt’ayapxamti. Jan ukasti, jupanakar aski waxt’äwinak churañapatak Tatitur mayipxam, jupasti jumanakarux uka waxt’äwinak katuqapxañamatakiw ajllisipxtam. ¹⁰ Kunjämtix qillqatan sixa: “Khitinakatix chiqpach jakañ munapxchi, kusisitäñsa munapxarakchi ukanakaxa, jan k’ari arunak parlapkpati, janirak jaqi masipatsa jan wali arunak parlapkpati; ¹¹ kunatix askïki ukanak lurapxpan, jan wali lurañanak apanukupxpan taqinimpis suman sarnaqasipxpan. ¹² Tatitusti aski jaqinakarux imiwa, mayisitanakaparus ist’arakiwa, ukampis jan wali lurir jaqinakarux janiw ist’kiti.” ¹³ Jumanakatix aski lurañanakan sarnaqasipksta ukkhaxa, ¿khitirak jan walinak lurapxiristamsti? ¹⁴ Ukampis chiqa luratanakamattix t’aqhisipxstaxa, ¡kusisiñanïpxtawa! Jan khitirus axsarapxamti, janirak sustjasipxamsa, ¹⁵ jan ukasti chuymanakaman Tatitur jach’achapxam. Khitinakatix jumanakar suyt’añanakamxat jiskt’apkätam ukanakar arsuñatak wakicht’atäpxam, ¹⁶ suma chuymamp parlxt’ayapxarakim. Cristor arkirinakjamax sum sarnaqapxam, ukhamat jan kunatsa juchanchatäpxañamataki. Jumanakan askinak luratanakamat jan wali parlirinakax jupanakpachaw p’inqasipxani. ¹⁷ Diosatix ukham munchixa, ñanqha luräwinakat t’aqhisiñat sipansa, aski lurasin t’aqhisiñaw juk’amp sumaxa. ¹⁸ Cristox mä kutikiw juchanakas pampachañatak jiwawayi. Jupax aski jaqïnwa, ukampis juchararanak laykuw t’aqhisiwayi, ukhamat jiwasanakar Diosan ukar irpkatañataki. Jupax janchin jiwawayi; ukampis ajayun jakxañatakiw jaktaniwayi, ¹⁹ Ukhamat katuntatäpkis uka ajayunakar jupan jiwañar atipatapat yatiyir saräna. ²⁰ Uka ajayunakasti nayrax jan ist’asir tukupkäna ukanakänwa, kunapachatix Noé chachax arca lurkän ukkhaxa, Diosax jupanakaruw suyt’askäna jupar jaysapxañapataki. Uka arcansti kimsaqallqunikiw umamp mutuyatäñat qhispipxäna. ²¹ Uka umasti bautismo umaruw uñtasïna, uka tuqit jichhax qhispitätanxa. Uka bautismosti janiw janchir q’umachañatakïkiti, jan ukasti Diosar juchanakasat q’umachañapatak mayiñatakiwa; jichhasti Jesucriston jaktäwip tuqirakiw qhispiyistuxa, ²² jupasti alaxpachar makhatxasaxa, Tatitun kupïxaparuw qunt’asxi, angelanakarusa, taqi jilïr ch’aman ajayunakarus jupaw apnaqxi.

¹ Ukatpï jilatanaka, kunjämtix Cristox janchipan t’aqhisiwayixa, jumanakax jank’akïpxañamaw ukham t’aqhisiñatakixa. Janchin t’aqhisirixa, juch apanukuwayxi, ² jan janchin munañaparjama, jan ukax Diosan munañaparjam taqi jakäwipan jakxañapataki. ³ Jumanakasti kunjämtix Tatitur jan uñt’ir jaqinakax lurapki ukanak lurapxäyätaxa, jan walinak lurasa, jan walinak amtasa, manq’äwinak wakichasa, machantasisa, k’ari diosanakar yupaychasa. ⁴ Jumanakan uka jan wali luririnakamp jan chikachasxapxatamatxa, jupanakax mayjt’asxapxiwa, ukat jumanakat jan walinak parlapxi. ⁵ Ukampis jupanakax, khititix jiwatanakaru, jakirinakar taripañatak wakichaski, ukaruw luratanakapat arsupxani. ⁶ Ukatakipï Cristox jiwatanakarus arunakap yatiyänxa, jakapkäna uka pach luratanakapat taripatäsaxa, ajayunakapax Tatitump jakañapataki. ⁷ Taqi kunan tukusiñapax jak’ankxiwa, ukatpï jumanakax wali amuyt’amp sarnaqapxañamaxa, Tatiturus mayisipxañamaxa. ⁸ Taqi kunat sipansa, jumanakkamax munasipxapunim, munasiñax walja juchanak pampachi. ⁹ Jumanakkamax mä suma chuymamp qurpacht’asipxam, janirak jupanakat jan walinak parlapxamti. ¹⁰ Sapa mayniw Diosat kuna luräwinaksa katuqapxtaxa. Uka luräwimpix taqinir yanapt’apxam. ¹¹ Maynitix sum parlirïchixa, Diosan arunakap parlpan. Maynitix khitirus kunjäm yanapt’añsa yatchixa, Diosan ch’amapamp lurpan. Taqi kuntix lurapkäta ukax jupanakan Jesucristo tuqi Diosar yupaychañatakïpan, jupankiw jach’a kankañaxa, munañanïñasa wiñayan wiñayapataki. Ukhamäpan. ¹² Munat jilatanaka, uka jach’a yant’anak jumanakxar jutatapatxa, jan mayjt’asipxamti, mä kuna jan walis jutkaspa ukhama. ¹³ Jan ukasti Jesucristjam t’aqhisipxatanakamat kusisipxam, ukhamat kunapachatix jupax qhapaq kankañapamp jutkan ukkhax kusisiñan phuqt’atäpxañamataki. ¹⁴ Cristo laykutix jumanakar jan wali arunakamp tuqipxätamxa, kusisiñanïpxtawa, Diosan Ajayupax jumanakampïskiwa. ¹⁵ Jumanakat maynitix t’aqhischixa, janiy jaqir jiwayatapata, lunthatasitapata, jaqi masipar jan wal luratapatsa t’aqhispati. ¹⁶ Ukampis maynitix Cristor arkirïtapat t’aqhischixa, janiw t’aqhisitapat p’inqasiñapäkiti, jan ukasti, Criston arkiripätap laykux Diosar yupaychañapawa. ¹⁷ Diosax markapar taripañ qalltkani uka urux purinxiwa. Uka taripäwitix jiwasampi ukham qalltchinixa, khitinakatix Diosar jan iyawsapki ukanakan tukuyäwipax, ¿kunjamäpachanisa? ¹⁸ Aski jaqitix ch’ama tukuñamp qhispiyaschixa, ¿kunjämarakïn jucharar jaqitakisti? ¹⁹ Ukhamaxa, Diosan munañaparjam t’aqhisirinakaxa, askinak lurasipkañapakiwa, jupanakar irnuqt’ir Diosaruw ajayunakapsa katuyasipxañapa, jupasti kuntix arski uk phuqhapuniniwa.

¹ Jichhasti iglesia irpirinakaruw iwxt’añ munta, Nayasti jupanakjam irpirirakïtwa, Criston t’aqhisitanakapsa sum uñjarakta, Cristox kuttankan ukapachaxa, jupamp chikarakiw jach’a k’ajkir qhanapankäxa. ² Diosan arkirinakaparux sum uñjapxam, jupanakasti jumanakar katuyatawa. Kunjämtix Diosax munki ukhamarjam taqi munasiñamp lurapxam, janiw ukham luram satakisa, qullqi munañ laykukisa, jan ukasti, taqi chuymapun lurapxam. ³ Jumanakax jupanakxarux janiw kuna munañanïpktasa, jan ukasti jupanakarux mä sum uñacht’ayas sarnaqapxam. ⁴ Ukhamat kunapachatix jach’a Awatirix uñstankan ukkhaxa, jumanakax mä suma churäwi katuqapxäta, ukasti wiñayatakïniwa. ⁵ Ukhamaraki, jumanakax waynanaka, Diosan markap irpirinakarux ist’apxam. Taqiniw maynit maynikam llamp’u chuymamp ist’asipxañama, qillqatan siwa: “Diosax jach’a jach’a tukurinakarux jisk’achiwa, llamp’u chuymaninakarusti munasiñapampiw yanapi.” ⁶ Diosatakix alt’at chuymanïpxam, ukhamat jupax jumanakar wakiskir urun jach’ar aptañapataki. ⁷ Taqi llakisiñanakamsti Diosan amparapar jaytapxam, jupasti jumanakarux imasipkätamwa. ⁸ Wal amuyt’asipxam, jank’akïpxarakim, jumanakar uñisir supayasti mä leonar uñtataw warart’asis khitir manq’antañatak thaqhaski. ⁹ Iyawsañanakaman uka supayatakix wal sayt’asipxam, maynïri jumanakjam Cristor arkirinakan taqi chiqan t’aqhisitanakapsa yatipxtawa. ¹⁰ Ukampis uka mä juk’a urunakan t’aqhisipxatamatsti, Diosax jumanakarux chiqap tukuyapxätam, ch’amani jan unxtkay sayt’ayapxarakïtam. Uka Dios pachpaw jach’a munasiñapan jawsistu, Jesucristomp wiñayatak chikäñasataki. ¹¹ ¡Diosax wiñayatak ch’amapamp apnaqpan! Ukhamäpan. ¹² Silvanox nayatakix mä suma aski jilatat uñt’atawa, juparakiw aka qillqat lurañatak yanapt’itu, jumanakar iwxt’añataki, ukhamaraki kuna waxt’äwinaktix katuqapkta ukanakan Diosan chiqa munasiñapätap yatiyapxaraksma. Jupar churatäpan qhapaq kankañasa, munañan kankañasa, wiñayan wiñayapataki. ¹³ Roma markankir Cristor arkirinakasti aruntanipxtamwa. Jupanakax jumanakjam Diosan ajllitäpxarakiwa. Marcos wawaxas aruntanipxaraktamwa. ¹⁴ Jumanak purasti Cristonkirinakjam mä suma jamp’att’asiñamp aruntt’asipxam. Taqi jumanaka, khitinakatix Jesucristonkapkta ukanakasti suman sarnaqasipxam.