1 JUAN

¹ Kunatix qalltatpach utjkäna, kuntix nanakax ist’apkta, kuntix uñjapkarakta ukanakat qillqanipxsma. Nanakaw uñjapxta, amparanakaxampiw llamkt’apxarakta. Ukasti jakañ Aruwa. ² Aka jakañ Arusti uñstawayiwa: nanakasti uk uñjapxta, ukarak arsupxta; ukatsti jumanakaruw aka wiñay jakañat yatiyapxsma, khititix Awkimpiskäna ukat jiwasanakar uñstarakistu. ³ Nanakax kuntix uñjapkta, ist’apkarakta uk jumanakarux yatiyapxsma, ukhamat jumanakan nanakampi mayakïpxañamataki, kunjämatix nanakax Dios Awkimpi, Jesucristo Yuqapampis mayakïpkta ukhama. ⁴ Taqi akanak qillqapxta, ukhamat jiwasan kusisiñasax phuqhatäñapataki. ⁵ Jesucristox aka arunak nanakarux yatichapxitäna, uksti jumanakaruw yatiyapxsma: “Diosax qhanawa, janiw jupan kuna ch’amakas utjkiti” ⁶ Jiwasatix sañäni: “Jupampix mayakïtanwa” sasaxa, ukham arskasas ch’amakan jakaskañän ukkhaxa, k’arisipxtanwa, janiw chiqarjam lurapktanti. ⁷ Ukampis jiwasatix qhanan jakañäni, kunjämatix Diosax qhanankki ukhamxa, maynit maynikamax mayakïtanwa, Jesucristo Yuqapan wilapasti taqi juchanakasat q’umachistu. ⁸ Jiwasatix “Janiw juchanïkti” sañänixa, jiwaspachaw k’arintastan, janirakiw jiwasan chiqax utjkiti; ⁹ ukampis jiwasatix juchanakas arsusiñän ukkhaxa, jupax chiqawa, juchanakas pampachañataki, taqi jan walinakat q’umachañatakis askirakiwa. ¹⁰ Jiwasatix “Janiw kuna juchsa lurkti” sañänixa, Diosarux k’arïkaspas ukham tukuytan, chiqpachansa janiw arup katuqktanti.

¹ Munat wawanakaxa, jumanakan juch jan lurapxañamatakiw taqi akanak qillqanipxsma. Ukampis maynitix juchar purchixa, Awkisan nayraqatapan mä arxatiriw utjistu, jupasti chiqapar uñjir Jesucristowa. ² Jesucristox juchanakas qhispiyañ laykuw jakañap luqtasiwayi, janiw jiwasan juchas laykukiti, jan ukasti taqi akapachankir jaqinakan juchanakap laykuwa. ³ Diosan kamachinakaptix phuqhañän ukkhaxa, jupar uñt’atas yatisipxtan. ⁴ Ukampis maynitix saspa: “Nayax juparux uñt’twa” sasaxa, ukat janirak kamachinakapar phuqkixa, jupax k’ariwa, janiw chiqa arux jupan utjkiti. ⁵ Ukatsipana, maynitix arupar phuqhixa, jupan chuymapan Diosan munasiñapax chiqapar tukxi, ukhamat jiwasax Diosampi mayakïxatas yatxtan. ⁶ Khititix “Diosampix mayakïtwa” siski ukaxa, kunjämatix Jesucristox jakkän ukhamaw jakañapa. ⁷ Munat Jilatanaka, janiw jumanakarux machaq kamachi qillqanipksmati: jan ukasti, qalltatpach katuqapkta uka pachpawa. Aka nayra kamachisti ist’apkäyät uka arunakawa. ⁸ Ukatsipana, jichha qillqanipksma ukax machaq kamachiwa, ukasti Cristonsa, jumanakansa chiqapawa, ch’amakax chhaqtaskiwa, chiqpach qhanaw niy qhantasinki. ⁹ Khititix “Qhananktwa” siski ukaxa, ukat jilapar uñisiskarakixa, ch’amakankaskiwa. ¹⁰ Khititix jilapar munaski ukax qhanan jaki, janiw khitis jupar tinkuykaspati. ¹¹ Ukampis khititix jilapar uñisiski ukax ch’amakan jakaski, sarnaqaraki, janirakiw kawksar saratapsa yatiskiti, ch’amakaw juparux juykhu tukuyi. ¹² Wawanaka, Diosan Jesucristo tuqi juchanakam pampachatap laykuw jumanakar qillqanipxsma. ¹³ Awkinaka, taykanaka, qalltatpach utjkän ukar uñt’apxatam laykuw jumanakar qillqanipxsma. Waynanaka, Supayar atipt’apxatam laykuw jumanakar qillqanipxsma. ¹⁴ Wawanaka, alaxpachankir Awkir uñt’apxatam laykuw jumanakar qillqanipxsma. Awkinaka, taykanaka, qalltatpach utjkän ukar uñt’apxatam laykuw jumanakar qillqanipxsma. Waynanaka, ch’aman sayt’apxatamata, Diosan arunakap chuymanakamar katuqapxatamata, Supayar atipt’apxatam laykuw jumanakar qillqanipxsma. ¹⁵ Jan akapacharux munapxamti, kunatix akapachan utjki ukanakarus janirak munapxamti. Khititix akapachar munki ukax janiw alaxpach Awkirux munkiti. ¹⁶ Akapachax kuntix uñacht’ayki ukax janiw Dios Awkit jutkiti, jan ukasti akapachat sarti. Ukatsti akapachax akhamanak uñacht’ayi: janchin munañap lurañanaka, nayrampi uñtas munapayañanaka, qamir yänakat jach’a jach’a tukuñanaka. ¹⁷ Ukampis akapachax jan wali munañanakapampiw tukusiski; ukatsipana, Diosan munañap luririx wiñayatakiw jaki. ¹⁸ Wawanaka, qhipa urunakankxtanwa. Jumanakax “Anticristow jutani” sir ist’apxäyätaxa; ukhamasti jichhax walja anticristonakaw uñstxi, ukhamat yatipxtan qhipa urunakätapa. ¹⁹ Jupanakax jiwasanak taypit mistuwayapxi; ukampis janiw jiwasampïkänti; jiwasampïsäpan ukasti, jiwasampi chikäskasapänwa. Ukampis ukhamaw lurasiwayi, ukhamat taqpachan jan jiwasankirïtap qhanar mistuñapataki. ²⁰ Cristo Tatitux Qullan Ajayu churasaw jumanakarux yaqhachapxtam, uksti taqi jumanakaw yatipxta. ²¹ Janiw nayax janis chiqar uñt’apkasma ukham qillqanipksmati, jan ukasti jumanakax yatipxtawa; janiw kuna k’aris chiqäki ukat jutkaspati. ²² ¿Khitirak k’aristi? Khititix “Jesusax janiw Cristökiti” sas arski ukaw anticristoxa, jupax Awkirus Yuqarus jan uñt’iriw tuku. ²³ Khitinakatix Yuqar jan uñt’ir tukupki ukaxa, janirakiw Awkirux uñt’kiti; ukampis khititix Yuqar katuqki ukax Awkirux katuqarakiwa. ²⁴ Uka layku, jumanakax qalltatpach ist’apkta uka arunak chuymanakamar imapxam; qalltatpach ist’apkta uka arunaktix chuymanakamar imapxstaxa, jumanakax ukhamarakiw Yuqampi Awkimpix mayakïpxäta. ²⁵ Chiqpachansa Jesucristox uk churañatakiw arsuwayistu: ukasti wiñay jakañawa. ²⁶ Khitinakatix jumanakar pantjasiyañ munapxtam ukanakxat qillqanipxsma. ²⁷ Ukampis jumanakan Qullan Ajayuw utjapxtam, Jesucristox ukampiw jumanakar luqtapxtam, janiw jumanakar khitin yatichañapas munaskxiti, kawkïr Ajaytix jupax churapktam ukaw jumanakarux taqi kun yatichapxtam, yatichäwinakapasti chiqapawa, janiw k’arïkiti. Ukhamay Tatit Jesucristompix mayak jakapxam, kunjämtix Qullan Ajayux yatichapktam ukhamarjama. ²⁸ Jichhasti wawanaka, Cristompix mayak jakapxam, ukhamat kunapachatix uñstankan ukkhax iyawsañasax utjañapataki, ukatsti kunapachatix jutkan ukkhax, jupan nayraqatapan jan mä p’inqa tukuskañasataki. ²⁹ Jumanakatix Tatit Jesucriston chiqapar uñjirïtap yatipxstaxa, jumanakax yatipxañamarakiwa, kunatix askïki uk lurapki ukanakax Diosan wawanakapawa.

¹ Uñjapxam, Dios Awkix walpun munasistu, Diosan wawanakapaw satäñasatakixa, jïsa, wawanakapapunïsktanwa. Ukatpï Diosar jan iyawsirinakax jan uñt’kistutixa, jupanakan Diosar jan uñt’apxatap layku. ² Munat jilatanaka, jichhax Diosan wawanakapäxtanwa. Ukampis tukuy urunakan kunäkañänitix ukax janïraw qhanstkiti, kunapachatix Jesucristox uñstankan ukapachax jupjam tukkañän uk yattanwa, kunjämäkitix jupax ukhampach uñkatatas layku. ³ Khitinakatix Jesucriston suyt’äwinïki ukax jupa pachpaw q’umachasi, kamisatix Jesucristox q’umäki ukhama. ⁴ Ukampis khititix juch lurki ukax Diosan kamachi arup p’akinti, ukhamasti jucha lurañax Diosan arup p’akintañawa. ⁵ Jumanakax niyaw yatipxta, Jesucristox juchanak q’umachiriw akapacharux juti, jupansti janiw kuna juchas utjkiti. ⁶ Ukhamasti taqi khitinakatix jupampi mayak jakapki ukanakax janiw juchan sarnaqkxiti; ukampis juchan sarnaqirix janiw jupar uñjkiti, janirakiw uñt’kisa. ⁷ Munat wawanakaxa, janiy khitis jumanakar k’arintpati: khititix chiqapar uñjki ukax askiwa, kamisatix jupax askïki ukhama, ⁸ ukampis juch luririx supayankiwa, supayasti qalltatpach juch luri. Ukatakiw Diosan Yuqapax juti: supayan luräwip t’unjañataki. ⁹ Khititix Diosan wawapäki ukax janiw juch lurkiti, Diosat yuritätap layku; Diosan wawapätap laykusti janiw juch lurkaspati. ¹⁰ Ukhamat yatisi khitinakas Diosan wawanakapaxa, khitinakarakis supayan wawanakapaxa. Kawkïritix jan aski lurki, janiraki jilaparus munaski ukaxa, janiw Diosankkiti. ¹¹ Jumanakax qalltatpach ist’apkta uka arunakax akham siwa: “Maynit maynikam munasipxañasawa” sasa. ¹² Janiw Caín chachjamäñasäkiti, jupax supayankatap laykux jilaparuw jiwayi. ¿Kunatsa jiwayänxa? Cainan luratanakapax janiw walïkänti, jilapan luratapasti askïnwa. ¹³ Munat jilatanaka, akapachankirinakatix uñisipxstam ukaxa, jan mayjt’asipxamti. ¹⁴ Jiwasax jiwañat jakañaruw sarakipxtan, uksti jilanakasar munatas laykuw yattan. Khititix jan munki ukax jiwatäskiwa. ¹⁵ Taqi khititix jilapar uñiski ukax jaqi jiwayiriwa. Jumanakax niyaw yatxapxta, jaqi jiwayirix janiw wiñay jakañanïkiti. ¹⁶ Jiwasax kunäkitix munasiñax uk yatxtanwa, Jesucristox jiwas laykuw jakañap apt’asiwayi; jiwasanakasti uka pachparakiw jilanakas layku jakañas apt’asiñasa. ¹⁷ Ukampis mayni qamiritix jilapan pist’ayasitap yatkasin jan khuyapt’ayaskchi ukaxa, ¿kunjämarak Diosan munasiñapasti chuymapan utjaspasti? ¹⁸ Munat wawanakaxa, jiwasan munasiñasax janiw lakakïñapäkiti; jan ukasti luräwinak tuqiw uñacht’ayasiñapa. ¹⁹ Jiwasax ukhamat chiqankatas yatisiñäni, ukatsti Diosan nayraqatapan chuymas chuymaw jikxatasiñäni; ²⁰ chuymasatix kuna tuqinsa juchañchistan ukaxa, Diosax chuymasat sipansa juk’ampi jach’awa, ukatsti jupax taqi kun yatiraki. ²¹ Munat jilatanaka, chuymasatix jan juchañchkistan ukaxa, Diosan nayraqatapan iyawsañaw utjistu; ²² kuntix maykañän uk jupax churistani, arunakaparjam phuqhatas layku, munataparjam luratas laykuraki. ²³ Jupan kamachipax Jesucristo Yuqapar iyawsañawa, maynit maynikam munasiñawa, kunjämtix jupax munkistu ukhama. ²⁴ Khitinakatix kamachiparjam phuqhapki ukanakax Tatitumpiw jakapxi, Tatitusti jupanakampiw jakaraki. Qullan Ajayup churkistu uka tuqiw jiwasampi jakatap yattan.

¹ Munat jilatanaka, janiy kawkïr ajayurus iyawsapkakimti, jan ukasti uñakipapxam, Diosan ajayupati janicha uk yatiñataki. Akapachax walja k’ari profetanakamp phuqhantatawa. ² Jumanakax akham tuqikiw maynin Diosan Ajayunïtap yatipxasma: Khititix siski: “Jesucristox janchir tukusaw juti” sasa, ukax Diosan Ajayupaniwa. ³ Ukampis khititix siski: “Jesucristox janiw janchir tukus jutkiti” sasa, ukax janiw Diosan Ajayupanïkiti, jan ukasti anticriston ajayupaniwa. Jumanakax uka ajayun jutañapat ist’apxtawa; jichhasti niyaw akapachankxi. ⁴ Wawanaka, jumanakax Diosankirïpxtawa, uka k’ari profetanakarus atipjapxtawa; khititix jumanakampïki ukax akapachankki ukat sipan juk’ampi ch’amaniwa. ⁵ Jupanakax akapachankirïpxiwa; ukat jupanakax akapach yänakat parlapxi, akapachankir jaqinakasti jupanakarux ist’apxiwa. ⁶ Ukampis jiwasanakax Diosankirïpxtanwa. Khititix Diosar uñt’ki ukax ist’istuwa; jan Diosankirïki ukasti janiw ist’kistuti. Ukham tuqikiw chiqa ajayunirux uñt’sna, khititix k’ari ajayunïki ukarus uñt’araksna. ⁷ Munat jilatanaka, maynit maynikam munasiñasawa, munasiñax Diosat juti. Taqi khititix munaski ukax Diosan wawapawa, Diosarusti uñt’arakiwa. ⁸ Khititix jan munaski ukax janiw Diosarux uñt’kiti, ukampis Diosax munasiñawa. ⁹ Diosax jupan mä sapa Wawap akapachar khithanisaw munasiñap uñacht’ayistu, ukhamat jiwasax jupïpan wiñay jakañanïñasataki. ¹⁰ Munasiñax akan uñsti: janiw jiwasanakat Diosarux munapkäyätan, jan ukasti jupaw jiwasanakar munistu, ukat Wawap khithani, juchanakas layku jakañap luqtasiri. ¹¹ Munat jilatanaka, Diosatix ukham munaschistuxa, jiwasanakax maynit maynikamaw munasiñasa. ¹² Diosarux janipuniw khitis uñjkiti, ukampis jiwasatix maynit maynikam munasiñäni ukkhaxa, Diosax jiwasan jaki, munasiñapasti jiwasan uñstaraki. ¹³ Diosax Ajayup jiwasar churistu, jiwasax uka tuqikiw Diosan jakatasa, jupasti jiwasan jakatap yatistan. ¹⁴ Jiwas pachpaw uñjtan, Dios Awkix akapachar qhispiyirix Yuqapar khithanitap arsuraktan. ¹⁵ Khititix “Jesusax Diosan Wawapawa” sas arski ukax Diosan jaki, Diosasti jupan jakaraki. ¹⁶ Jiwasax ukham tuqiw Diosan jiwasar munasitap yattan. Diosax munasiñawa; khititix munasiñan jakki ukax Diosan jaki, Diosasti jupan jakaraki. ¹⁷ Ukham tuqiw chiqpach munasiñax jiwasan phuqhasi, ukhamat taripäwi urun jan axsarañasataki, jiwasasti akapachan kunjämäkitix Jesucristox ukhampachätanwa. ¹⁸ Kawkhantix munasiñax utjki ukkhanxa, janiw axsarañax utjkiti. Ukatsipana, chiqpach munasiñaw axsarañarux apanuku, axsarañasti mutuñaruw irpi. Uka layku, maynitix axsarchi ukaxa, janiw chiqpach munasiñanïkiti. ¹⁹ Diosaw nayraqat jiwasanakar munasistu, ukat jiwasax jupar munasipxañasa. ²⁰ Ukampis maynitix saspa: “Nayax Diosaruw munasta” sasa, ukat jilapar uñisiskarakchi ukax k’ari jaqïskiwa. Maynitix jilapar uñjkasin jan munaskchixa, ¿kunjämarak Diosar jan uñjkas munasispasti? ²¹ Jesucristox aka kamachi churistu: “Khititix Diosar munaski ukax jilaparux munasirakpan” sasa.

¹ Taqi khititix Jesusan Cristötap iyawski ukaxa, Diosan wawapawa; khititix awkir munaski ukax uka awkin wawanakaparux munasirakiwa. ² Kunapachatix Diosar munasitasampi arsutapar phuqhapktan ukkhaxa, Diosan wawanakapar munasitas yatiraktan. ³ Diosar munasiñax kamachinakapar phuqhañawa; kamachinakapasti janiw ch’amäkiti, ⁴ khitinakatix Diosan wawapäpki ukanakax akapacharuw atipji. Iyawsañasasti akapacharuw atipt’ayistu. ⁵ Khititix Jesusarux Diosan Wawapätap iyawski ukax akapacharuw atipji. ⁶ Jesucristox uma tuqi, wila tuqiw juti; janiw uma sapatakti, jan ukasti umampita, wilampit juti. Diosan Ajayupaw qhanañchi, uka Ajayusti chiqapawa. ⁷ Kimsaniw qhanañchirixa: ⁸ Ajayumpi, umampi, wilampi; kimspachasti mayar tukt’atakiwa. ⁹ Jaqinakan qhanañchatapsti iyawstanwa, ukampis Diosan qhanañchäwipaw juk’ampi jilanki, Diosax Wawapxat qhanañchatap layku. ¹⁰ Khititix Diosan Yuqapar iyawski ukaxa, uka qhanañchäwix chuymapankiwa. Jan iyawsiristi Diosarux k’aritjam uñt’ayi, Diosan Yuqap tuqi qhanañchäwi jan iyawsatap layku. ¹¹ Aka qhanañchäwix akhamawa: Diosax wiñay jakañ churistu, uka wiñay jakañasti Yuqapan utji. ¹² Khititix Diosan Yuqapar katuqki ukax wiñay jakañaniwa; ukampis khititix Diosan Yuqapar jan katuqki ukasti, janiw wiñay jakañanïkiti. ¹³ Aksti Diosan Yuqapar iyawsirinakaruw qillqanipxsma, wiñay jakañanïpxatam yatipxañamataki. ¹⁴ Diosar iyawsañaw utjistu, jiwasax yattanwa, jupan munañaparjamatix mayiñän ukkhaxa, jupax ist’istuwa. ¹⁵ Ukhamat yattan, Diosan mayitasar ist’atapa, uka kipkarakiw yattan, kuntix mayktan ukax niyaw utjxistu. ¹⁶ Maynitix jilapar jiwañar jan puriyir jucha lurir uñjkchi ukaxa, Diosar mayiñapawa, Diosasti uka jilarux jakañ churani, janitix uka juchax jiwañar apkchi ukapacha. Jiwañar puriyir juchaw utji, janiw uka juchatak mayipxañamäkiti. ¹⁷ Kunatix jan walïki ukax juchawa, ukampis jiwañar jan puriyir juchaw utji. ¹⁸ Khititix Diosat Awkinïki ukax, juchan jan sarnaqxatap yattan, Diosan Jesucristo Yuqapaw juparux imi, supayasti janiw jupar llamkt’kiti. ¹⁹ Jiwasax Diosankatas yattan, taqi akapachankirix supayan apnaqatawa. ²⁰ Diosan Yuqapan jutatapsa yatiraktanwa, ukatsti chiqpach Diosar uñt’añatakix amuyt’ap churistu. Uka chiqpach Jesucristo Yuqapampix mayakiw jakapxtan, jupaw chiqpach Diosaxa, wiñay jakañasa. ²¹ Wawanaka, k’ari diosanakat amuyasipxam.