1 CORINTIOS

¹ Corinto markan Diosan iglesiapankir munat jilatanaka, kullakanaka: Nayax Sóstenes jilatasamp chikaw jumanakar aruntanipxsma. Naya Pablox, taqi chuymaxampiw munta Dios Awkisampi, Jesucristo Tatitusampix munasiñapa, sumankañap jumanakar churañapataki. Diosaw nayarux Jesusan apostolupäñapatak ajllisitu, jumanakarusti jupamp chika jakapxañamataki, jupan ajllit markapäpxañamatakiw ajllipxaraktam. Ukhamat nanakampi, Jesucristo Tatitusar taqi akapachan yupaychapki, jach’añchapkaraki ukanakamp mayachatäpxäta. ⁴ Nayax jumanakat Diosarux yuspagarapuntwa, Diosax jumanakar Cristo Jesús tuqi munasiñap churatapata. ⁵ Jupa tuqiw Diosax ajay tuqin qamirïñ churapxtam, aru tuqina, yatiñ tuqina, ⁶ niyakixay jumanak taypin Cristo tuqit yatiyäwix ch’aman tukchixa. ⁷ Ukhamat Diosan luräwipax jan pist’apktamti, Jesucristo Tatitusax uñstankan uka uru suyäwimana. ⁸ Diosax jumanakarux tukuykamaw ch’amañchapxätam, ukhamat jan khitis jumanakar juchañchaskañapataki, Jesucristo Tatitusan kutiniñapkama. ⁹ Diosax arsutanakap phuqhapuniwa, jupaw jumanakarux jawsapxtam, Jesucristo Tatitusa Yuqapampi mayachat jakañataki. ¹⁰ Jilatanaka, Jesucristo Tatitusan sutipxaruw achikt’apxsma, taqinis mä amtañanikïpxam, jumanak taypin yaqhachasiñanakax jan utjkpati. Mä wawak jakasipxam, mä sapa amtañani, mä sapa amuyuni. ¹¹ Munat jilatanaka, Cloen utapankir wila masipaw yatiyapxitu, jumanak taypin ch’axwanak utjatapa, ukat ak sista. ¹² Nayax sañ munta, jumanakat yaqhipanakax akham sapxi: “Nayax Pablonktwa”; mayninakasti: “Nayax Apolonktwa”; mayninakasti: “Nayax Pedronktwa”; mayninakasti: “Nayax Cristonktwa” sasa. ¹³ Ukhamasti ¿Cristox jalanuqtatati? ¿Pablox jumanak laykut ch’akkatatänsti? Jan ukax ¿Pablon sutipxaruch bautismo katuqapxtaxa? ¹⁴ ¡Diosaruw yuspagarta, janiw nayax jumanakat khitirus bautiskti, jan ukasti Crispompiru Gayompir bautisataxakiw utji! ¹⁵ Ukhamat jan khitis saskañapataki: “Nayax Pablon sutipxaruw bautismo katuqta” sasa. ¹⁶ Estefanasan wila masiparuw bautisarakta, ukat uksarux janiw khitir bautisataxsa amtaskti. ¹⁷ Cristox janiw bautisir khithankituti, jan ukasti Diosan suma yatiyäwi arunakap yatiyiriw khithanitu, janiw yatiñ kankañampi arsut arunakampïkiti, ukhamat Criston cruzan jiwatapax jan ina ch’usar tukuskañapataki. ¹⁸ Criston cruzan jiwatapat yatiyäwixa, chhaqhañar sarir jaqinakatakix luqhi kankañäkaspas ukhamawa; ukampis jiwas qhispiyat jaqinakatakix aka yatiyäwix Diosan ch’amapawa. ¹⁹ Qillqatan siwa: “Yatiñan jaqinakan yatiñ kankañap chhaqtayä, ch’ikhi jaqinakan ch’ikhi kankañapsa tukjarakïwa” sasa. ²⁰ ¿Kawkinkarak yatiñani, yatichiri, akapach yänakat ch’axwir jaqisti? ¡Diosasti akapach yatiñ kankañ luqhi kankañaruw tukuyi! ²¹ Diosax yatiñ kankañap uñachaykäna ukapachaxa, janiw akapachankirinakax jaqin yatiñ kankañap tuqi Diosar uñt’apkänti, ukat Diosax munasiñapan jupar iyawsirinakarux yatiyäwip tuqi qhispiyañ amtäna, uka yatiyäwix luqhi kankañar uñtatäpasaya. ²² Judío jaqinakax muspharkañ luräwinak uñjañ munapxi, griego jaqinakasti yatiñ kankañarak thaqhapxi; ²³ jiwasanakasti ch’akkatat Cristot yatiyapxtan. Ukaw judionakarux chuymap ust’ayi, jan judiöpki ukanakatakisti luqhi kankañarakiwa; ²⁴ ukampis Diosan jawsatanakatakix judiöpas janis judiöpkpan, jupanakatakix Cristox Diosan ch’amapawa, yatiñ kankañaparakiwa. ²⁵ Diosan luqhi kankañapjam amuyaschi ukaxa, jaqin yatiñ kankañapat sipansa juk’ampi yatiñ kankañawa; Diosan jan chamanïtapjamak amuyaschi ukasa, jaqin ch’amapat sipansa juk’ampi ch’amaniwa. ²⁶ Jilatanaka, jumanakar Diosan jawsatapat amuyasipxañama, ukat sipana, jaqin amuyuparjamax jumanakat juk’anikiw yatiñanïpxtaxa, jumanakat juk’anikiw jilïr munañan jaqïpxtaxa, jan ukax wali aytat wila masit jutirïpxtasa. ²⁷ Diosax jaqinakan pisi amuyunit uñt’at jaqinakaruw jach’a amuyuninakar p’inqachañatak ajllisi, ukhamarakiw jaqinakan pisi ch’amanit uñt’atanakaru, jila ch’amaninakar p’inqachañatak ajllisi. ²⁸ Diosax jisk’achat jaqiru, akapachan jan yäqat jaqiruw ajllisi khitinakatix yäqatäpki ukanakar aynacht’ayañataki. ²⁹ Ukhamat jan khitis Diosan nayraqatapan jach’achasiskañapataki. ³⁰ Jumanakarusti Dios kipkaw Cristo Jesusampi mayachapxtam, uka kipkarakiw jupax Cristo tuqi jiwasan yatiñ kankañasa, chiqa kankañasa, qullanaptayir kankañasa, qhispit kankañasa tukuyi. ³¹ Kunjämtix Qillqatax siski ukarjama: “Maynitix jach’achasiñ munchixa, Tatitut jach’achaspan” sasa.

¹ Jilatanaka, kunapachatix jumanakar qhispiyasiñ arunak parlir jutkta ukkhaxa, janiw nayax yatiñ kankañampi, jan amuyt’kay arunakampi parlapkäyäsmati. ² Jumanak taypinkasasti, janiw yaqhanakat yatiñ munkäyätti, jan ukasti cruzan ch’akkatat Jesucristotak yatiñ munäyäta. ³ Jumanak nayraqatansti jan ch’amanjama, axsarañatsa khathatisaw uñstapxäyäsma, ⁴ ukatsti kunapachatix Diosan arunakap yatiyapksma ukkhaxa, janiw yatiñ arunakampi iyawsayañ munapkäyäsmati, jan ukasti, Ajayun uñacht’ayata, Diosan ch’amapampiw iyawsayapxsma, ⁵ jumanakan iyawsäwimax janiw jaqinakan yatiñ kankañapxar utt’atäñapäkiti, jan ukasti Diosan ch’amapxar utt’atäñapawa. ⁶ Iyawsañapan thurt’atäpki ukanak taypinxa, yatiñ kankañ arunakampiw parlapxta. Ukampis janiw akapach yatiñat parlapkti, janirakiw marka apnaqirinakatsa parlapkti, jupanakan munañanïñapax niyaw tukusiski. ⁷ Jan ukasti, Diosan imantat yatiñ kankañapat parlapxta, jupan imantat amtäwinak wiñaypachat jiwasan kusisiñasatak utjaykän ukat parlapxta. ⁸ Aksti janiw jichhür akapach apnaqirinakax amuyapkiti, jupanakatix amuyasapän ukax janiw alaxpach Tatiturux cruzar ch’akkatapkasapänti. ⁹ Kunjämtix Qillqatan siski: “Jupar munirinakatakixa, Diosax jan khitin uñjata, jan khitin ist’ata, jan khitin amtat yänak wakichi” sasa. ¹⁰ Taqi akanaksti Diosax Qullan Ajay tuqikiw uñacht’ayistu. Uka Ajayusti taqi kun uñakipi, Diosan jan amuyt’kay amtatanakapamppach uñakipi. ¹¹ ¿Khitirak jaqin chuymapan utjki uk yatispasti? Kawkïr ajayutix chuymapankki ukakiw yatispa. Ukhamarakipï Diosan amtäwipxa, Diosan Ajayupakiw yatixa. ¹² Jiwasasti janiw akapachankir ajay katuqktanti, jan ukasti Diosat jutki uka Ajay katuqtan, ukhamat kunanaktix Diosax munasiñapan churkistu uk amuyt’añasataki. ¹³ Taqi akanakatsti Diosan Ajayupax yatichapkitu uka arunakampiw parlapxta, janiw yatiñanakarjam yatiqapkta uka arunakarjam parlapkti. Ukhamat Dios chuyma jaqinakar ajay yatichäwinakat qhanañchasa. ¹⁴ Khititix jan Dios chuymäki ukax, janiw Diosan Ajayupankki uka yänak katuqkiti, jupatakix luqhi kankañäkaspas ukhamawa. Janirakiw amuyt’kisa, taqi ukanakax ajay tuqin taripatäñap wakisitap layku. ¹⁵ Ukampis khititix Diosan Ajayupanïki ukax taqi kunsa chiqaparuw amuyi, janiw khitis jupar taripkaspati. ¹⁶ Qillqatan siwa: “¿Khitirak Tatitun amuyup uñt’aspasti? ¿Khitirak Tatitur yatichaspasti?” sasa. Ukampis jiwasanakax Criston amuyupanïpxtanwa.

¹ Jilatanaka, nayasti janiw jumanakar ajay tuqin ch’aman jaqinakarjam parlapksmati, jan ukasti, pisi ch’aman jaqinakarjamakiw parlapxsma, Cristonkir asu wawanakäpkasmas ukhama. ² Jumanakarux jasa yatichäwik yatichapxsma, kunjämtix mä asu wawarux lecheki manq’a lanti churatäki ukhama, jumanakax janïraw ch’ama yatichäwinak katuqirjamäpkäyätati. ¡Jichhas janïraw katuqirjamäpktati, ³ jan ch’amanïpxatam layku! Jumanak taypin uñisisiñanaka, ch’axwañanak utjaskipansti, jan ch’amanïpxatam laykux jaqinakan amtäwiparjamakiw sarnaqasipktaxa. ⁴ Kunapachatix maynix arsusi: “Nayax Pablonktwa”, maynisti: “Nayax Apolosanktwa” sasaxa, jupanakax jaqinakan amtäwiparjamakiw arsusipki. ⁵ May sipansti, ¿khitirak Pablosti? ¿Khitirak Apolosti? Jupanakax irnaqirinakakïpxiwa, jupanak tuqiw jumanakax Tatitur iyawsapxta. Jiwasanakat sapa mayniw kuntix Tatitux luram siski uk luri: ⁶ nayaw yapuchta, Apolosti umampiw qarpxati, ukampis Diosaw uka yapuchatarux jiltayi. ⁷ Ukhamasti yapuchirisa, qarpiris janiw kunäkiti, jan ukasti, Diosaw taqi kunan jilankixa, jupaw yapuchatar jilayirixa. ⁸ Yapuchirinakasa, qarpirinakas kipkakïpxiwa, sapa maynirus Diosaw luräwipatjam churani. ⁹ Jiwasanakax Diosan luräwipan irnaqir masinakapäpxtanwa, jumanakasti yapuchat yapunakäpxtawa, Diosan utachat utäpxaraktawa. ¹⁰ Nayaw uta lurir jaqïtxa, nayaruw Diosax munasiñapan uta qalltañatak uchitu, ukatsti yaqhaw ukxarux pirqa sayt’ayaski. Ukampis sapa mayniw kunjämtix uka uta pirqa luraski uk amuyasiñapa, ¹¹ janiw khitis uta qallta uchatarux yaqha qalltxa uchkaspati, nayrïr uta qallta uchatäki ukax Jesucristowa. ¹² Uta qalltatxarusti, maynix qurimpi, qullqimpi, suma qalanakampi, lawampi, jichhumpi, suq’usampi, taqi ukanakampiw utachaspa; ¹³ ukampis sapa maynin luräwipax taripañ urun qhanpach uñstani; uka urux ninampiw jutani, ukatsti ninax sapa maynin luratap yant’ani. ¹⁴ Maynin luräwipatix suma luratächixa, payllap katuqani; ¹⁵ ukampis luratapatix nakhantanixa, luratap q’al apt’asini, jupax ninatsa jaltkaspa ukham qhispkan ukasa. ¹⁶ ¿Janit jumanakasti Diosan utapäpxatam yatipktasti? ¿Janit jumanakasti Diosan Ajayupan jumanakan jakatap yatipktasti? ¹⁷ Maynitix Diosan utap t’unthapinixa, Diosax jupar t’unthapirakiniwa, Diosan utapax qullanawa, uka utasti jumanak pachpäpxtawa. ¹⁸ Janiy khitis jupapach sallqjaspati: maynitix jumanak taypin akapach yatiñ kankañaparjam yatiñan tukchixa, jan kun yatirjamak tukpan, ukhamat chiqpach yatiñan tukuñapataki. ¹⁹ Akapach yatiñ kankañasti Diosatakix luqhi kankañawa. Qillqatax siwa: “Diosax yatiñaninakarux pachpa sallqa yatiñapampiw katunti” sasa. ²⁰ Ukatsti sarakiwa: “Yatiñaninakan amuyunakapan luqhi kankañätap Tatitux yatiwa” sasa. ²¹ Ukat jan khitis jaqin luratanakapat jach’a jach’ax tukuñapäkiti; taqi kunas jumanakankaskiwa: ²² Pablo, Apolo, Pedro, akapacha, jakaña, jiwaña, jichhüru, jutir urunaka; taqi kunaw jumanakanki, ²³ jumanakasti Cristonkapxtawa, Cristosti Diosankiwa.

¹ Jumanakasti nanakarux Criston yanapiripjamak uñjapxañama, Diosan jan amuyt’kay amtäwinakap yatichañataki. ² Jichhasti walikiwa, khititix lurañ katuqki ukax askïtap uñacht’ayañapa. ³ Nayasti, jumanakan taripatäñata, jilïrinakan taripatäñatsa janiw llakiskti. Janirakiw naya pachpas juchañchaskti. ⁴ Chuymaxan janiw kunas nayar juchañchirix utjkiti, ukax janiw sañ munkiti nayan jan juchanïtaxa. Khititix taripkitani ukax Tatituwa. ⁵ Ukhamasti, jumanakax jan kunatsa mäkix taripapxamti; Tatitun jutañap suyt’apxam, jupaw ch’amakankki uk qhanar apsuni, chuyman amtäwinakapsa qhanstayarakini. Ukatsti Diosaw sapaqat maynirux luräwipatjam jach’achaskani. ⁶ Jilatanaka, akanaksti jumanakan askimatakiw parlapxsma, Apolosampita naya pachpampit amuyt’ayasa. Nanakat yatiqasis kunatix qillqatäki ukat jumanakan jan saranukuñamatakiw sapxsma, ukhamat maynir munatap laykux jan khitis jach’achasiskañapataki, maynir jan walt’ayasa. ⁷ Ukampis, ¿khitirak jumarusti mayninakat sipan juk’ampi sum churtamsti? ¿Kunatix utjktam uksti, janit Diosasti churktamsti? Jupatix churstam ukasti, ¿kunatarak jach’a jach’a tukta jumas jikxataskasma ukhamsti? ⁸ Jumanakax amuyatax niy qamirïxapxtawa, munatamarjamax taqi kunanïxapxtawa, reyinakjam tukusax janiw nanakar munkxapxistati. ¡Añchakit chiqpach reyinakäpxasma, ukhamat nanakan jumanakampi chik markamankapxañaxataki! ⁹ Nayan amuyataxat Diosax nanak apostolunakarux qhiparjamakiw uchapxitu, jiwañatak juchañchat jaqinakjamäpxtwa. Angelanakansa, taqi jaqinakansa, uñch’ukitäñatakiw tukupxta. ¹⁰ Cristor iyawsapxatax laykux luqhinakarjamaw jaqinakax uñjapxitu; ukatsipana, jumanakarux Cristo laykux ch’ikhinakarjamaw jaqinakax uñjapxtam. Nanakax pisi ch’amanïpxtwa, ukampis jumanakax wali ch’amanïpxtawa. Nanakarux jisk’achapxituwa, jumanakarusti yäqapxtamwa. ¹¹ Jichhürkamas manq’at awtjata, umat pharjata, isit jalstataw sarnaqapxta; jaqis uñisipxituwa, janiw utanïpkaraktsa, ¹² ukatsti qariñkamaw amparanakaxampi irnaqapxta. Ñanqhachirinakarux sumampiw kutiyapxta; arknaqataw uñjasipxta, uksti amukiw mutupxta. ¹³ Nanakxat jan walinak parlapxi, ukampis llamp’u chuymampiw nanakax kunsa amuyt’ayapxarakta. Mä t’unarjamaw uñjapxitu, jan kunatak aski jaqirjamaw uñjapxitu. Jichhürkamas taqi jaqinakat sipansa wali jisk’achatäpxaraktwa. ¹⁴ Aksti janiw jumanakar p’inqachañatak qillqanipksmati, jan ukasti wawanakaxarjam amuyt’ayañatakiw qillqanipxsma, jumanakarux wal munasipxsma. ¹⁵ Jumanakax Cristor iyawsirjamax tunka waranqa yatichirinïsipkamsa, janiw walja awkinïpktati. Nayakiw jumanakan awkimätxa, nayaw jumanakarux Diosan suma yatiyäwi arunakap parlapxsma, uka tuqiw jumanakax Cristo Jesusamp mayakïpxtaxa. ¹⁶ Ukhamasti, nayat yatiqasis sarnaqapxañamatakiw achikt’apxsma. ¹⁷ Ukat Timoteorux khithanipxsma. Jupax Tatitunkir munat aski wawaxawa. Jupaw Cristo Jesusampi sarnaqäwixat amtayapxätam, kunjämtix taqi chiqansa iglesianakan yatichkta ukarjama. ¹⁸ Jumanakat yaqhipanakax jach’a jach’aw tukupxi; janis jumanakar uñjir purinkirista ukham amuyapxaraki; ¹⁹ ukampisa, Tatitun munañapächi ukaxa, jank’akiw jumanakar tumpt’ir jutä. Ukkhapï uñjäxa kuntix uka jach’a jach’a tukur jaqinakax lurapkani ukxa, janiw parlapki ukakxa. ²⁰ Diosampi jakañax janiw lakakïñapäkiti, jan ukasti, luräwimpi uñacht’ayañarakiwa. ²¹ ¿Kunsa jichhax jumanakax jutkä ukkhax munapxta? Purinisinxa, ¿mutuyapxämati, jan ukax, munasiñampi, suma chuymamp tumpt’ayasiñcha munapxtaxa?

¹ Jumanakat maynix awkipan qhipa warmipampi sarnaqatapaw yatisi. Ukham sarnaqañax janipuniw akch’as walïkiti, janiw Diosar jan uñt’ir jaqinak taypinsa ukham sarnaqirix utjkiti. ² ¡Ukhamäkasinsa jumanakax jach’achasisipkaktawa! ¡Ukhamïpansti llakitäsipkañamawa! Ukham sarnaqir jaqix jumanak taypit alisnukutäñapawa. ³ Nayax janis jumanak taypinkstxa, ajayun jumanakampi chikäsktwa; nayasti jumanak taypin jikxataskirista ukhamaw uka jan wali sarnaqir jaqirux juchañchta. ⁴ Kunapachatix jumanakax tantachasipkät ukkhaxa, nayax ajayun jumanakampi chikäskä, Tatit Jesusan ch’amapas jumanakampi chikäskarakini. Ukhamasti Jesús Tatitusan sutipxaruw ⁵ uka jaqix Supayar katuyatäñapa, ukhamat janchipan tukjatäñapataki, ajayupasti Tatitux jutkan ukkharaki qhispiyatäñapataki. ⁶ Jumanakasti janiw kunat jach’achasiñamas utjkiti. Aka säwi yatipxtawa: “Mä juk’a levadurax taqpach t’ant’a masaruw puqtayi” sasa. ⁷ Ukhamasti jumanakar jan walt’ayir nayra levadura jaqtapxam, ukhamat machaq masat lurat t’ant’aru uñtatäpxañamataki. Chiqpachansa jumanakax Pascua urunakan manq’añäkis uka jan levaduran t’ant’jamäpxtawa. Cristow jiwasan Pascua Corderosaxa, jupax jiwasanak laykuw jiwawayi. ⁸ Ukhamasti jiwasax jan levaduran t’ant’ampiw Pascua uruyañasa, ukaw chiqapaxa, janiw nayra levadurampi janirakiw jan walinak lurañampis uruyañasäkiti. ⁹ Apayanipksma uka maynïr qillqataxan sapxsmawa: “Wachuq jucha luririnakampix jan chikachasipxamti” sasa. ¹⁰ Ukampix janiw sapkäyäsmati akapachan wachuq jucha luririnakata, mich’anakata, lunthatanakata, yaqha diosar yupaychirinakat jan mayampitak jithiqtapxam sasaxa, ukhamäspa ukkhax, jumanakan aka uraqit mistxapxañamaw wakisispa. ¹¹ Jan ukasti, sapxäyäsmawa: Cristor iyawsirïkasin wachuq juchan sarnaqaski, mich’asiski, yaqha diosar yupaychaski, ñanqhachaski, machaski, lunthatasiski ukanakampix jan chikachasipxamti, sasa. Ukham jaqinakampix janipun manq’apxamsa. ¹² Janiw nayarux anqäxankirinakar juchañchañax wakt’kituti; Diosaw jupanakarux juchañchaskani. Ukampis jumanakax iglesiankirinakarux juchañchapxañamawa. Ukatpï uka juch luririrux jumanak taypit alisnukupxam sapxsmaxa.

¹ Kunapachatix jumanak taypit maynix yaqhampi ch’axwankchixa, ¿kamisarak Cristor jan uñt’ir taripirinakar yatiyasir saranisti?, ¿kunatarak Diosan qullan markapankirinakar jan yatiyasisti? ² ¿Janit jumanakasti yatipkta Diosan qullan markapankirinakan akapachar taripañapsti? Akapachar taripañatix jumanakar wakt’apxätam ukaxa, ¿janit uka jisk’a ch’axwanakamsti uñjapkasmasti? ³ ¿Janit yatipkta, jiwasanakax angelanakamppachar taripkañän uksti? ¡Ukhamächi ukasti juk’amp sum jiwasan ch’axwanakas uñjañasaxa! ⁴ Ukhamasti, jakäwiman ch’axwanakatix utjchixa, ¿kamisarak jan iglesiankirïpki uka jaqinakar ch’axwanak uñjapxañapatak uchapxtasti? ⁵ Aksti jumanakar p’inqachañatakiw sista: ¿Janit jumanak taypin utjki mayni amuyt’anisti, uka ch’axwañanak jilatanakap taypin uñjañatakisti? ⁶ ¡Janiw jilatanak purak ch’axwapkiti, jan ukasti Cristor jan uñt’ir taripirinakaruw ch’axwanakap yatiyanipxi! ⁷ Jumanak taypin ch’axwañanak utjatapax janipuniw akch’as walïkiti. ¿Kunatarak chiqapar jan uñjatasti amuk jan mutupxtasti? ¿Janit walïkaspa lunthatayasiñasti? ⁸ ¡Ukatsipana jumanakax janiw chiqapar lurapkaraktati, pachpa jilanakamat lunthatasipkaktawa! ⁹ ¿Janit yatipkta chiqapar jan uñjirinakan alaxpachar jan mantañapxa? Janiy sallqjayasipxamti, wachuq juchan sarnaqirinakax, janiw Diosan markapar mantapkaniti, janirakiw yaqha diosar yupaychirinakasa, wachuq jucha luririnakasa, q’iwsanakasa, chacha pura, jan ukax warmi pura q’añusirinakasa, lunthatanakasa, mich’anakasa, machirinakasa, ñanqhachirinakasa, lunthatanakas mantapkaniti. ¹¹ Jumanakat yaqhipanakax ukhamäpxarakïyätawa; ukampis jichhax q’umachatäxapxtawa, jumanakax Tatit Jesucriston sutipxaru, Diosasan Qullan Ajayup tuqiw qullana, aski jaqinakarus tukuyatäpxarakta. ¹² Mayninakax sapxiwa: “Nayax kuntix munkta uk luraskakiristwa” sasa. Ukax chiqakïskiwa, ukampis janiw taqi kun lurañas askïkarakiti. Jïsa, nayax taqi kunsa lurakiristwa, ukampis nayax janiw kunampis apnaqayasiñaxäkiti. ¹³ Sapxarakiwa: “Manq’ax purakatakiwa, purakasti manq’atakirakiwa” sasa. Ukax chiqakïskiwa, ukampis Diosaw paypach tukjani. Ukatsipana, janchix janiw wachuq jucha lurañatakïkiti, jan ukasti, Tatitutakiwa, Tatitusti janchitakirakiwa. ¹⁴ Kunjämtix Diosax Cristo Tatitur jaktaykixa, ukhamarakiw jiwasarux ch’amapampi jaktayistani. ¹⁵ ¿Janit yatipkta, janchinakamax Cristonkatapsti? ¿Criston janchipat apaqasin wachuq juchan sarnaqir warmirux churarakiristti? ¡Janiw ukhamäkaspati! ¹⁶ ¿Janit jumanakax yatipkta kunapachatix mä chachax wachuq juchan sarnaqir warmimpi mayachaski ukkhaxa, mä sapa janchik tukxapxatapsti? Qillqatan siwa: “Panpachanix mä sapa janchikiw tukxapxi” sasa. ¹⁷ Ukampisa, kunapachatix maynix Tatitur katuyasxi ukkhaxa, ajay tuqin Tatitumpix mayakïxiwa. ¹⁸ Ukhamasti, wachuq jucha lurañat jithiqtapxam. Kuna yaqha juchsay mä jaqix luraskpan, janiw janchiparux ñanqhachkiti; ukampis wachuq jucha lurañar katuyasirixa, pachpa janchipatakiw juchachasi. ¹⁹ ¿Janit yatipktasti jumanakan janchimax Diosan churata uka Qullan Ajayun utapätapsti, Qullan Ajayus jumanakan jakatapsa? Jumanakax janiw jumanakpachat munañanïpktati, ²⁰ Diosaw jumanakarux alasipxtam. Ukat jumanakax janchiman Diosarux waqaychapxañama.

¹ Jichhasti kuntix qillqanipkista uka jiskt’anakaruw arusxatañ munta. Walïspawa jan jaqichasiñaxa; ² ukampis wachuq jucha lurañ utjatap laykux, sapa mayni chachaw warminïñapa, sapa mayni warmirakiw chachanïñapa. ³ Chachax warmipatak taqi luräwinakap phuqhañapa, warmisa chachapatakix taqi luräwinakap phuqhañaparaki. ⁴ Janiw warmix janchipat munañanïkxiti, jan ukasti janchipax chachapankxiwa, janirakiw chachas janchipat munañanïkxiti, jan ukasti janchipax warmipankxiwa. ⁵ Ukalayku, jan jumanak purax “janiw” sasipxamti, wakischi ukax arust’asipxam mä juk’a pacha jan jak’asiñataki, uka urunakan Diosat mayisiñataki. Uka qhipatsti wakisiw mayachasipxañama; inampis maynix janchipar jan atipirjamäsax, Supayax juchar puriychispa. ⁶ Aksti mä iwxäkaspas ukhamak sapxsma, janiw kamachi arükiti. ⁷ Nayax taqinis nayjamäpxañam munirista; ukampis Diosax sapa mayniruw kunayman churäwinak churi, maynirux mayja, mayninakarusti mayjaraki. ⁸ Sapa waynanakampiru, ijmanakampirux saraktwa, walïspawa jan jaqichasisaki nayjam sarnaqapxañapa. ⁹ Ukampis janchin munañapar jan atipirjamäsax jaqichasipxpan. Jaqichasiñasti askiwa, janchin munañapampi atipjayasiñat sipana. ¹⁰ Ukampis khitinakatix jaqichatäxapxi ukanakarux sistwa, warmix chachapar jan apanukpati. Ukasti janiw nayan aruxäkiti, jan ukasti Tatitun arupawa. ¹¹ Jichhasti walikiwa, warmitix chachapar apanukchixa, sapakiw jakxañapa, jan ukax pachpa chachapampiw sumankthapxañapa. Uka kipkaraki, chachax janiw warmipampix jaljtañapäkiti. ¹² Mayninakarusti nayaw sista, janiw Tatitux siskiti, mayni jilatatix Cristor jan iyawsir warmimpi jaqichatächixa, warmisti uka chachapampi jakañatak amtaschixa, uka jilatax janiw uka warmimpix jaljtañapäkiti. ¹³ Cristor iyawsir warmitix Cristor jan iyawsir chachampi jaqichatächixa, ukat chachatix uka warmimpi jakañatak amtaschixa, janiw jupampix jaljtañapäkiti. ¹⁴ Cristor jan iyawsir chachaxa, Cristor iyawsir warmimpïxatap laykux, Diosan katuqatäxiwa; Cristor jan iyawsir warmisti Cristor iyawsir chachampïxatap laykux, Diosan katuqatäxarakiwa. Jan ukhamäkaspa ukasti, wawanakamax juchararäpxaspawa; ukampis jupanakax qullan markankirïxapxiwa. ¹⁵ Jichhasti, Cristor jan iyawsir chachampi warmimpitix jaljtañ munchixa, jaljtasipkpan. Ukhamïpansti jilatas kullakas sapar tukt’atakïxapxtawa, Diosaw jumanakarux sumankañ jakäwir jawsapxtam. ¹⁶ Cristor iyawsir warmi, ¿kunjämatarak chachamar qhispiyasma uk yattasti? Cristor iyawsir chacha, ¿kunjämatarak Cristor jan iyawsir warmimar qhispiyasma uk yattasti? ¹⁷ Kunjämäskpansaya, sapa mayniw Tatitun churäwinakaparjam jakañapa, kunjämtix Diosax jupar jawski ukhamarakïñapawa. Nayax aka yatichäwi taqi iglesianakar churta. ¹⁸ Diosatix mayniru, circuncisión katuqirir jawschi ukaxa, uka circuncisión katuqatap jan imt’pati; circuncisión jan katuqirirutix jawschi ukaxa, janiw circuncisión katuqañapax wakiskiti. ¹⁹ Circuncisión katuqañas jan katuqañas janiw kunäkisa, jan ukasti Diosan arunakapar jaysañaw askixa. ²⁰ Sapa mayniw kunjämtix Diosax jawsapktam ukhamakïsipkañama. ²¹ T’aqhisiyatäkäyat ukkhatix jawstamxa, jan llakisimti; qhispit sarnaqasiñatix jikxatañjamäxchi ukkhax, jan pis chuymt’amti. ²² Khititix t’aqhisiyatäkasin iyawsañar jawsatäxchi ukax, jichhax jupax Diosar luqtirïxiwa; khititix antutatäkasin jawsatächi ukax, jichhax Criston uywatapäxiwa. ²³ Diosaw jumanakarux alasipxtam; janiy yaqha jaqinakan uywataparux tukupxamti. ²⁴ Ukhamasti jilatanaka, sapa maynis kunjämtix Diosax jawsapkäyätam ukhamak nayraqatapan sarnaqapxam. ²⁵ Jan jaqichasit warminakatakisti, janiw Tatitun wakiskir arupax utjkituti; ukampis nayan amuyuxat sista, Tatitun khuyapayasiñapan nayax askïkta ukarjama. ²⁶ Nayatakix askïspawa, sapa maynix kunjämäkitix ukhamak qhiparañapa, jan walt’añ urunakan jakatas layku. ²⁷ Jumatix warminïstaxa, jan apanukumti; jan warminïksta ukasti, jan warm thaqhamti. ²⁸ Jaqichasisasti janiw juch lurktati; mä tawaqun jaqichasitapas janirakiw juchäkiti. Ukampis jaqichasirinakatakix janchi kankañapan llakisiñanakaw utjani, nayasti ukanakar jan purisipkañam munirista. ²⁹ Jilatanaka, nayax akham sañ munta: Juk’a pachakiw utjxistu. Ukalayku, warmin chachanaka, chachan warminaka, janis jaqichasitäpkasma ukhamaw jakapxañama; ³⁰ llakitanakax, kusisitäpkasmas ukhamakiw sarnaqapxañama, kusisiñankirinakasti, llakitäpkasmas ukhamakiw sarnaqapxañama; alasirinakax, janis kunas jumankkaspa ukhamakiw jakapxañama; ³¹ akapachan kuna aski jikxatirinakas, janis kunsa jikxatapkaspa ukhamakiw tukupxañapa, aka uraqin niy tukusiskatap layku. ³² Nayax jumanakan llakinakam apaqañ munirista. Kunapachatix maynix sapakïski ukax Tatitun yänakapata, ukhamarak jupar kusisiyañampit llakisi; ³³ ukampis warmin chachasti akapach yänakat llakisi, warmipar kusisiñ churañampit llakisiraki, ³⁴ ukhamat chuymapax payanki. Ukhamarakiw jan chachan warmisa, sapa tawaqus Tatitun yänakapat llakisi, janchinsa, ajayunsa qullanäpxañapataki; ukampis chachan warmix akapach yänakatak llakisi, chachapar kusisiyañampit llakisiraki. ³⁵ Aksti jumanakan askimatakiw sapxsma, janiw jumanakar jark’añ laykuti, jan ukasti, Tatitur taqi chuyma luqtas jaqjam jakapxañamataki. ³⁶ Ukampis maynitix parlatapampi jaqichasiñapax niyäxatap amuychixa, maranaksa phuqxarakchi ukaxa, jaqichasiskakpan kunjämaruy amuychi ukhamarjama, ukasti janiw juchäkiti. ³⁷ Ukampis maynitix chuymapan jan jaqichasiñ amtkchixa, uka amtapax walikïskiwa. ³⁸ Ukhamasti, parlatapampitix jaqichasinixa, walik luraski; janitix jaqichaskan ukkhasti, juk’amp sum luri. ³⁹ Chachan warmix chachapan jakañapkamax chachapamp jakañapawa; chachap jiwxatatsti, jupax khitimpitix munki ukampix jaqichasiskaspawa, iyawsirik Cristor iyawsirïpaxa. ⁴⁰ Amuyuxarjamax, janitix wasitat jaqichaskaspa ukaxa, juk’amp kusisitaw sarnaqasispa. Uksti, Diosan Ajayupan chuymaxankatapat arsta.

¹ Jichhasti yaqha diosanakar luqtat manq’anakat parlapxäma. Chiqpachansa sistanwa: taqiniw chiqpach yatiñ kankañanïtan; ukampis uka yatiñ kankañax jach’a jach’a tukuyi, munasiñasti Diosan markaparux jiltayiwa. ² Maynitix kunsa yatitap amuyaschixa, janïraw yatkiti kunjämtix yatiñapäki ukxa. ³ Ukampis maynitix Diosar munchixa, Diosax juparux uñt’iwa. ⁴ Yaqha diosanakar luqtat manq’anak manq’añxatxa, niy yattanwa, jaqin lurat diosax akapachan janiw kunäkisa, mä sapa Diosakiw utji. ⁵ Alaxpachansa, akapachansa, munañan yaqha diosanakas utjaskpan, ⁶ jiwasanakatakix mä sapa Dios Awkikiw utji, uka Dios Awkimpiw taqi kunas qallti, jupatakikiw jiwasanakax jakapxtan. Mä sapa Tatitukiw utjaraki, jupasti Jesucristowa, jupïpan taqi kunas utji, jiwasanakas utjaraktan. ⁷ Ukampis janiw taqin chiqa kankañat yatipkiti. Yaqhipanakax yaqha diosanakar yupaychañ yatitäpkän ukanakaxa, uka manq’anakat manq’asipkakiwa, diosanakar luqtatätap amuyasina; ajay tuqin t’ukhätap laykusti, chuymanakapan juchanjamaw amuyasipxi. ⁸ Chiqpachansa kuntix manq’ktan ukax janiw Diosat jayarst’aykistuti; janiw manq’asati askïkañänixa, janirakiw jan manq’asas jan askïkañänitixa. ⁹ Ukampis jumanakax amuyasipxam, ukham luratamampiw iyawsäwin pisïpki ukanakarux juchar puriyapxasma. ¹⁰ Ukhamasti jumatix ukanak yatkasina, yaqha diosanakar luqtañ chiqan qunt’asis manq’äta, ukatsti pisi iyawsañan jilatatix uñjätam ukaxa, uka jilatax uka yaqha diosar luqtat manq’a manq’arakispawa. ¹¹ Ukhamat jumax yatitamampix pisi iyawsañan jilamarux apt’asma, Cristox uka jilat laykuw jiwarakïnxa. ¹² Pisi iyawsañan jilatanakar ñanqhachasasti, jumanakax Cristo pachparuw ñanqhachapxtaxa. ¹³ Ukalayku, manq’ataxämpitix jilaxar juchar puriystxa, janiw aycha manq’añaxax wakiskxiti, juchar jan lanktayaskañataki.

¹ Nayax qhispiyat jaqïtwa, apóstol kankañanirakïtwa, uksti janiw jumanakax imt’apkitasmati, Tatit Jesusaruw uñjta, jumanakasti Tatitutak irnaqäwixan achupäpxtawa. ² Mayninakatakix inas nayax jan apostolüksti; ukampis jumanakatakix apostolütwa, jumanakan Tatitunkapxatamaw nayan apóstol kankañax uñachayi. ³ Nayar jisk’achirinakatakix akham arsusta: ⁴ Nanakan wakisiw manq’ampi, umampi katuqañaxa, ⁵ ukhamaraki Cristor iyawsir esposa nayamp chika irpañatakisa, kunjämtix maynïr apostolunakasa, Tatitun jilanakapasa, Pedros lurki ukhama. ⁶ Jan ukax ¿Bernabeampi nayampikich jakañatak irnaqañaxax wakisixa? ⁷ Ejercitonxa, janiw mä soldadox ukankatapat pachpa qullqip irsuskiti. Uva yapuchirinakasti, uva achunakapat manq’apxi. Ovejanak awatirinakasti, ch’awaqapki uka leche umapxi. ⁸ Aka arunakax janiw nayan arunakaxakïkiti, jan ukasti, Tatitun arunakapaw ukham yatichi. ⁹ Moisesan qillqatapansti siwa: “Trigo takir vacarux ñukumpix jan uskuntapxamti” sasa. Diosax janiw vacanakat llakisisakix uk siskiti, ¹⁰ jan ukasti, jupax jiwasanakat llakisi. Kamachix jiwasanak layku qillqatawa, uraq qhullirisa, trigo jawq’suris jupar wakt’ki uk katuqañ suyas irnaqañapawa. ¹¹ Ukhamasti, nanakatix jumanakan chuymamar ajay jatha phawantapxsta ukasti, jumanakat janchi tuqin yänak katuqañax wakisiwa. ¹² Mayninakatix jumanakat ukham katuqchixa, nanakatakix ukat juk’ampi katuqañaw wakisi. Ukampis janiw nanakax taqi ukat arsusipkti, Diosan suma yatiyäwi arunakap qhanañchañ jan jark’atäñap laykux amukiw mutupxta. ¹³ Jumanakax yatipxtawa, khitinakatix Tatitun utapan irnaqapki ukanakaxa, Tatitun utapat jakapxi. Ukampix sañ munta, khitinakatix altaran wilañchanak luqtapki jupanakax luqtat uywanakan aychap manq’apxi. ¹⁴ Uka kipkarakiw Tatitux sawayi, khitinakatix Diosan suma yatiyäwi arunakap qhanañchapki ukanakax, uka pachpa irnaqäwit jakapxpan sasa. ¹⁵ Ukampis janipuniw nayax kun katuqañatakis maykti, janirakiw mä kun nayar churapxañamatakis qillqanipksmati. Ukham lurkpachaxa, askïspaw nayan jiwxañaxaxa. ¡Janiw khitis uka kusisiñ apaqkitaspati! ¹⁶ Nayatakix Diosan suma yatiyäwi arup qhanañchañax janiw kuna jach’achasiñäkisa, uka qhanañchañan wakisipunitap amuyta. ¡Kunakïkan nayatakixa, Diosan arunakap jan qhanañchkirista ukaxa! ¹⁷ Nayatix amtañaxampik lurirista ukaxa, luräwixat katuqañax wakisispawa; ukampis nayatix jariyatat lurirista ukasti, kuntix Diosax siskitu uk phuqhañ laykuw lurirista. ¹⁸ Ukhamïpansti, nayar kusisiyir waxt’äwix Diosan suma yatiyäwip jan kun mayis qhanañchañawa; ukampix sañ munta, Diosan suma yatiyäwi arup qhanañchatat janiw kunsa katuqañatak maykti. ¹⁹ Nayax jan khitin uywatapäkasas taqinin uywataparuw tukta, Cristotak walja jaqinakar jikxatañ layku. ²⁰ Kunapachatix nayax judionak taypinkkäyat ukkhaxa, Cristor iyawsapxañapatakix judío jaqjamaw tukta; ukampix sañ munta, Moisesan kamachiparjam sarnaqirinakan Cristor iyawsapxañapatakix naya pachpaw uka kamachirjam sarnaqta, chiqpachansa janiw nayax uka kamachin apnaqatäkti. ²¹ Mä tuqitsti, khitinakatix Moisesan kamachiparjam jan sarnaqapki ukanakan Cristor iyawsapxañapatakix jupanakjamaw nayax tukta, chiqpachansa nayax Diosan kamachiparjamaw sarnaqta, Criston kamachiparjam niyak sarnaqasaxa. ²² Kunapachatix pisi iyawsañan jilatanakampi chikäkäyät ukkhaxa, jupanakjamarakiw tukta, jupanakan Cristor iyawsapxañapataki. Mä arunxa, jupanakjamaw tukta, ukhamat mä qawqhanis qhispitäpxañapataki. ²³ Diosan suma yatiyäwi arunakap arsuñ laykuw taqi kunsa lurta, ukhamat uka pachpat katuqañaxataki. ²⁴ Jumanakax yatipxtawa, mä atipasïwinxa, taqiniw jalapxi, ukampis maynikiw churäwi katuqi, uka kipkarak jumanakax churäwi katuqañkam jalapxam. ²⁵ Khitinakatix mä anatañan atipt’añatak wakichasipki ukanakax, kunatix jan walt’aykaspa ukanak q’al apanukupxi. Uksti, mä pillu katuqañatakiw lurapxi, ukat ukspachaw uka pillux pharsuwayxi; ukatsipana, jiwasax jan pharsur pillu katuqañ laykuw jaltanxa. ²⁶ Nayasti janiw juykhur uñtat jalkti, janirakiw nuwasiñansa ina ch’usarus ch’akuntkirista ukham nuwaskti. ²⁷ Jan ukasti, janchixarux mutuytwa, ukatsti jaysañapatakiw wayt’arakta, ukhamat yaqhanakar yatichkasin jan apanukutäñataki.

¹ Jilatanaka, nayax jumanakan amtapxañam munta: Nayra awkinakasax mä qinayan ch’iwxatataw Mar Rojo sat quta taqpachan makhatapxäna. ² Ukham tuqiw taqi jupanakax Moisesampi mayachasipxäna, qinay tuqi, quta tuqi bautisatäsina. ³ Uka kipkarakiw jupanakax pachpa ajay t’ant’a manq’apxäna, ⁴ pachpa ajay uma umapxarakïna. Jupanakax ajay qarqat umapxäna, uka qarqaw jupanakamp chik saräna. Uka qarqasti Cristo Tatitünwa. ⁵ Ukampis jupanakat waljaniw Diosarux jan kusisiykänti, ukat wasaran jiwarapxäna. ⁶ Taqi akasti jiwasan amuyt’asiñasatakiw lurasïna, ukhamat jan jiwasanakax jupanakjam jan walinak munapayaskañasataki. ⁷ Janiy jumanakax yaqha diosanakar yupaychapxamti, kunjämtix jupanakat mä qawqhanix lurapkän ukhama, Qillqatasti siwa: “Jaqix manq’añataki, umañatakiw qunt’asïna, ukatsti thuqhupxarakïnwa” sasa. ⁸ Jiwasax wachuq q’añu jucharux jan katuyasiñäniti, kunjämtix jupanakat yaqhipanakax katuyasipkän ukhama, ukham luratapatsti mä urukiw pä tunka kimsan waranqa jaqinakax jiwarapxäna. ⁹ Janirak Tatiturux yant’kañäniti, kunjämtix jupanakat yaqhipanakax lurapkän ukhama, ukham luratapatsti katarinakan achjataw jiwarapxäna. ¹⁰ Janirak Diosatakix arusipxamti, kunjämtix jupanakat yaqhipanakax arusipkän ukhama, ukat jiwayir angelax jupanakar jiwarayäna. ¹¹ Taqi akanakaw nayra awkinakasampix lurasitayna, jiwasatak mä uñtasïwïñapataki, ukanakasti, aka urunakan jakapktan ukanakar iwxt’añatak qillqatawa. ¹² Ukhamasti maynitix ch’amanjam amuyaschixa, wal amuyaspan, ukatarak tinkuskaspa. ¹³ Jumanakan janiw kuna yant’as jan atipjkayax utjapktamti. Jumanakasti Diosaruw katuyasipxañama, jupasti janiw jumanakarux jan atipkay yant’anakamp t’aqhisiyapkätamti. Jan ukasti, kunapachatix yant’ax jutkan ukkhaxa, Diosaw jumanakarux kunjämat uka yant’ar atipjañsa yanapt’apxätam, ukhamat atipt’apxäta. ¹⁴ Munat jilatanaka, yaqha diosanakar yupaychañat jithiqtapxam. ¹⁵ Nayax amuyt’ir jaqinakarjamaw parlapxsma: kuntix sapksma uk jumanak pachpa amuyt’apxam. ¹⁶ Kunapachatix Diosar yuspagarasin qullan qirut umktan ukkhaxa, Criston wilapan mayakïtas uñacht’aytan. Kunapachatix t’ant’a pachjtan ukkhasti, Criston janchipan mayakïtas uñacht’ayaraktan. ¹⁷ Waljanïpktan ukasa, taqiniw mä sapa t’ant’at manq’apxtan, ukatarak mä sapa janchikïpxtan. ¹⁸ Israel markat amuyapxam: Wilañcha luqtat uywanakat manq’irinakaxa, Diosampi, altaran luqtapki ukanakampix mayakïpxiwa. ¹⁹ Ukampix janiw sañ munkti, jaqin lurat diosax askïtapa, janirakiw uka diosar luqtat aychas yaqha aychat sipan juk’amp askiw sañ munkti. ²⁰ Nayax sistwa, Diosar jan uñt’irinakax supayanakaruw wilañcha luqtasipki, janiw Diosar luqtapkiti, nayax janiw jumanakan uka ñanqha supayanakamp chikachasipxañam munkti. ²¹ Janiw Tatitun qirupat umasax supayanakan qirupat umapkasmati; janirakiw Tatitun manq’äwipan manq’kasax supayanakan manq’äwipan manq’apkasmati. ²² Jan ukax ¿Tatituruch q’apisiyañ munasipkaktanxa? ¿Jiwasax Tatitut sipan juk’ampi ch’amanïtanti? ²³ Jumanakat yaqhipanakax sapxiwa: “Maynix kuntix munki uk lurakispawa” sasa. Ukax chiqawa, ukampis janiw taqpachapun askïkiti. Jïsa, maynix kuntix munki uk luraspawa, ukampis janiw ukax taqinir ch’amañchkiti. ²⁴ Janiw khitis jupa pachpan askipatakik kunsa thaqhañapäkiti, jan ukasti, mayninakan askipatakiw thaqhañapa. ²⁵ Kunatix aycha qhathun aljañatak uskutäki uk alasisax manq’asipkakim, chuymaman jan mayjt’asiskañapatakix jan kunsa jiskhimti; ²⁶ taqi akapachasa, kunanakatix ukan utjki ukas Tatitunkiwa. ²⁷ Cristor jan iyawsir jaqitix manq’asir jawsayapxätam, ukat jumanakax sarañ munapxarakït ukaxa, kunanaktix churapkätam uk manq’asipkakim, chuymaman jan mayjt’asiskañapatakisti jan kunsa jiskt’apxamti. ²⁸ Ukampis maynitix sapxätam: “Aka aychax yaqha diosanakar wilañcha luqtatawa” sasaxa, ukhamax jan uk manq’apxamti, uk arsuriru jan mayjt’ayañataki, jumanakas jan mayjt’asisipkañamataki. ²⁹ Uksti maynin chuymapat parlaskta, janiw jumanakan chuymanakamat parlkti. Mayni jaqin chuymap laykusti, janiw nayan munañaxar lurataxat juchañchatäñapäkiti. ³⁰ Diosar yuspagarasatix manq’sta ukax, ¿kunatarak manq’ataxat k’umipxitanisti? ³¹ Ukhamasti manq’apxamsa, umapxamsa, jan ukax kunsay lurapxam, Diosar jach’achañatak lurapxam. ³² Jan khitirus lanktayapxamti; judionakarusa, jan judionakarusa, janirak Diosan iglesiapankirinakarus lanktasiyapxamti. ³³ Nayasti, taqi kunan taqinir kusisiyañatakiw ch’amachasta, janiw nayan askïñaxak thaqkti, jan ukasti mayninakan askïñap thaqta, ukhamat qhispiyasiñ jikxatapxañapataki.

¹ Jumanakax nayat yatiqasis sarnaqapxam, kunjämtix nayax Cristot yatiqasis sarnaqkta ukhama. ² Jilatanaka, nayat amtasipxatamata, yatichäwinakaxar ist’apxatamat walikiw sapxsmawa. ³ Ukampis nayax amuyt’apxañam munta, Cristow taqi chachan p’iqipaxa, chachasti warmipan p’iqipawa, kunjämtix Diosax Criston p’iqipäki ukhama. ⁴ Mä chachatix p’iqip ch’uqt’asis Diosat mayischixa, jan ukax yatiyäwi arunaksa arschixa, Cristoruw p’inqachayi. ⁵ Ukat sipana, kunapachatix mä warmix p’iqip jan ch’uqt’asis Diosat mayischixa, jan ukax yatiyäwi arunaksa arschixa, chachaparuw p’inqachayi. Ñik’utapsa q’al mururaskaspa ukhamawa. ⁶ Ukampis mä warmitix p’iqip jan ch’uqt’askchixa, walïspawa mäpit ñik’utap q’al mururasxañapa. Ukampis warmitix ñik’ut mururasiñan p’inqätap amuychixa, p’iqip ch’uqt’aspan. ⁷ Chachax janiw p’iqip ch’uqt’asiñapäkiti, jupaw Diosan uñtasitapaxa, ukatsti Diosan jach’a kankañap uñacht’ayi. Warmisti chachan jach’a kankañap uñacht’ayaraki, ⁸ ukampis janiw chachax warmit luratäkiti, jan ukasti warmiw chachat lurataxa. ⁹ Chachasti janiw warmïpan luratäkänti, jan ukasti warmiw chachïpan luratänxa. ¹⁰ Ukalayku, angelanak laykuw warmix jaysasir kankañ chimpu piqipxarux apañapa. ¹¹ Ukampis Cristonkxasax janiw chachax jan warmïpan utjkaspati, janirakiw warmis jan chachäpan utjkaspati. ¹² Chiqpachansa, warmix chachat luratänwa, chachasti warmit yuriraki, ukax chiqäskapuniwa; taqi kunas Diosan luratawa. ¹³ Jumanak pachpa amuyt’apxam, ¿warmin p’iqi jan ch’uqt’asis Diosat mayisiñapax walikïskiti? ¹⁴ Pachpa sarnaqäwisaw yatichistu, chachan ñik’ut jilayasiñapax mä p’inqätapa; ¹⁵ ukatsipana, warmitakix ñik’utap jilayasiñax jach’at uñt’atäñawa, juparuw jach’a ñik’utax p’iqip imxatasiñapatak churasi. ¹⁶ Ukampis maynitix aka tuqit ch’axwañ munchixa, yatiñapawa, janiw nanakasa, janirakiw Diosan iglesianakapas yaqha saräwi uñt’apkti. ¹⁷ Jichhasti jumanakar qillqankasax “janiw wal lurapktati” sapxsmawa, amuyatatxa tantachasïwinakamax jumanakar aski lurkpachax janjamakiw walt’ayapktamti. ¹⁸ Nayraqataxa, kunapachatix jumanakax tantachasipkta ukkhaxa, jumanak taypin t’aqanuqtañanakaw utji sapxituwa; ukasti amuyatax chiqätapjamawa. ¹⁹ ¡Jumanak taypin t’aqanuqtañanak utjañapax wakisiwa, ukhamat yatiñataki khitis chiqpach Cristor arkirix uka! ²⁰ Ukham t’aqanuqtañanak utjipansti, manq’añatak tantachasipkta ukkhax janiw Tatitun Manq’äwipjam amtatäkxiti. ²¹ Manq’asiñäki ukkhasti, sapa mayniw manq’ap nayraqat manq’asxi, ukchañkamasti mayninakax manq’at awtjatäskiwa, mayninakasti niyaw macharatäxapxi. ²² ¿Janit jumanakasti utanakanïpkta utaman manq’apxañamataki, umapxañamatakisti? ¿Kunatarak ukham lurasasti Diosan iglesiap jisk’achayapxta, jan manq’añaninakar p’inqa tukuyasasti? ¿Kamsapxarakïmasti? ¿“Walikiw” sapxämati? ¡Uka luratanakamax janiw walïkiti! ²³ Nayax yatichapksma ukxa, Tatitut katuqta. Tatit Jesusax aljantatäñapäkän uka arumaw t’ant’a irtäna, ²⁴ ukatsti Diosar yuspagarasaw uka t’ant’a pachjäna, ukat säna: “Akax nayan janchixawa, jumanak layku katuyatawa. Aksti nayat amtasis lurapxam” sasa. ²⁵ Uka pachparakiw manq’añ tukuyasax qiru astäna, ukat sarakïna: “Aka qirux machaq arust’äwiwa, wilaxampi chimpuntata. Sapa kuti umapkät ukkhaxa, nayat amtasisaw lurapxäta” sasa. ²⁶ Ukhamasti, jumanakax sapa kuti aka t’ant’a manq’apkäta, aka qirut umapkät ukkhaxa, Tatitun jutañapkamax jiwatap qhanañchasipktaxa. ²⁷ Ukhamasti khititix jan askïkas Tatitun t’ant’ap manq’ki, qirut umkaraki ukaxa, Tatitun janchipata, wilapat juchañchataw uñjasini. ²⁸ Ukalayku, janïr uka t’ant’a manq’kasa, uka qirut umkasax sapa mayniy chuymap uñantaspan. ²⁹ Tatitun janchipätap jan amuyasis manq’asa, qirupat umasax, jupa pachpa mutuñapatakiw manq’aski umaskaraki. ³⁰ Ukat jumanakat yaqhipanakax usutäsipki, pisi ch’amanïsipki, yaqhipanakasti jiwarasipkaraki. ³¹ Jiwaspachpatix chuymas uñantasiñän ukaxa, Tatitux janiw juchañchkistaspati, ³² kunapachatix Tatitux juchañchkistu ukkhaxa, yatiqañasatakiw mutuyistu, jan jiwasax akapachankir jaqinakampi chika juchañchatäñasataki. ³³ Ukhamasti munat jilatanaka, kunapachatix manq’añatak tantachasipkät ukkhaxa, maynit maynikam suyasipxam. ³⁴ Maynitix manq’at awtjatächixa, utapan manq’anpan, ukhamat Diosax ukham tantachasitanakamat jan mutuyapkätamti. Yaqha jiskt’anakamarusti, jumanakan ukar purinkä ukkhaw qhanañchapxäma.

¹ Jilatanaka, kunanakäkitix ajayun churäwipax ukxat yatipxañam munta. ² Jumanakax yatipxtawa, kunapachatix Cristor jan iyawsapkäyät ukkhaxa, jumanakax juykhur uñtataw jan parlir yaqha diosanak arkasipkäyätaxa. ³ Ukat jichhax yatipxañam munta, janiw khitis Diosan Ajayupan ch’amapampix siskaspati: “Jesusax ñanqhachatäpan” sasa. Janirakiw khitis jan Qullan Ajayun ch’amapampix siskaspati: “Jesusax Tatituwa” sasa. ⁴ Iglesiansti kunayman churäwinakaw utji, ukampis pachpa Ajayuw ukanak churi. ⁵ Kunayman tuqit luqtañanakaw utji, ukampis taqi ukanakax pachpa Tatituruw luqtapxi. ⁶ Kunayman lurañanakaw utji, ukampis pachpa Diosaw ch’amapampix taqi kun sapa maynin luri. ⁷ Diosax sapa mayniruw Ajayun unañchäwip churi, taqinin askipataki. ⁸ Yaqhipanakarux Qullan Ajay tuqiw yatiñ kankañampi arsuñapatak churi; yaqhipanakarusti uka pachpa Ajay tuqiw taqi kun yatiñampi arsuñ churi. ⁹ Yaqhipanakax pachpa Ajay tuqiw iyawsañ katuqapxi, yaqhipanakasti usutanakar qullañatakiw ch’am katuqapxi. ¹⁰ Yaqhipanakax muspharkañanak lurañatakiw ch’am katuqapxi, yaqhipanakasti profecía arunak yatiyañatakiw mä churäwi katuqapxi. Yaqhiparux Diosax aski ajayunaka, ñanqha ajayunak uñt’añ ch’ama churi, yaqhipanakarusti yaqha arunakat arsuñ ch’ama churaraki; ukhamarus yaqhipanakarux uka yaqha arunakat arsutanak qhanañchañ ch’ama churi. ¹¹ Taqi akanaksti, mä pachpa Ajayukiw ch’amapampi luri, jupasti kunjämarutix munki ukhamaruw sapa maynir lakinuqi. ¹² Jaqin janchipax walja chiqanakat luratäkchi ukasa, mä sapa janchikiwa. Cristox ukham mayakirakiwa. ¹³ Uka kipkarakiw taqi jiwasanakax judionakasa, jan judionakasa, t’aqhisiyat jaqinakasa, jan t’aqhisiyat jaqinakas bautismo katuqapxtan, mä sapa Ajay tuqi, mä janchik tukuñasataki; taqinis uka pachpa Ajayut katuqaraktan. ¹⁴ Mä janchix janiw maya sapat luratakïkiti, jan ukasti, waljanakat luratawa. ¹⁵ Kayutix saspa: “Janiw nayax amparäkti, ukat jan janchinkti” sasaxa, janiw uk satapampix janchit yaqhäkaspati. ¹⁶ Jinchutix saspa: “Janiw nayax nayräkti, ukat jan janchinkti” sasaxa, janiw uk satapampix janchit yaqhäkaspati. ¹⁷ Taqpach janchitix nayrakamakïspa ukax ¿kunampirak ist’snasti? Taqpach janchitix jinchukamakïspa ukas ¿kunampirak mukt’snasti? ¹⁸ Ukampis Diosaw munataparjam janchirux taqi kun uchi. ¹⁹ Taqpachatix mä sapakïsapän ukaxa, janchix janiw utjkasapänti. ²⁰ Chiqpachansa, janchix walja chiqanakanïkchi ukasa, janchix maya sapakiwa. ²¹ Nayrax janiw amparar siskaspati: “Janiw munksmati” sasaxa; janirakiw p’iqis kayunakarux siskaspati: “Janiw munapksmati” sasaxa. ²² Ukatsipana, janchinkki ukanakat jan yäqañjamäki ukasa, ukanakan utjañapax wali askiwa. ²³ Janchisansti, kawkhawjarutix jan yäqapktan, ukawjanakaruw sum isthapiytanxa. Kawkhanakatix jan yäqañax wakiski ukawjanakaruw wal yäqtanxa, ²⁴ janchisan wali yäqatäki ukanakarux janiw ukham yäqañax wakiskiti. Diosax ukham janchis luratayna, jan yäqat chiqanakan juk’ampi yäqatäñapataki, ²⁵ ukhamat janchisan jan jaljtañanak utjaskañapataki, jan ukasti, janchisan utjki uka chiqanakax maynit maynikam yanapt’asipxañapataki. ²⁶ Janchisan mä chiqatix t’aqhischixa, taqi chiqaw t’aqhisiraki, mä chiqatix yäqatächixa, taqpachaniw kusisipxi. ²⁷ Ukhamasti jumanakax Criston janchipäpxtawa, jumanakat sapa maynix uka janchinkirïpxtawa. ²⁸ Diosax iglesian utjañap munäna, nayrïrinxa apostolunaka; payïrinsti profetanaka; kimsïrinsti yatichirinaka; ukxarusti muspharkañ luririnaka, mayninakax usutanakar qullirinaka, yanapasirinaka, sarayirinaka, yaqha arunakat parlirinaka. ²⁹ Janiw taqinix apostolüpkiti, janirakiw taqinis profetäpkiti. Janiw taqinix yatichirïpkiti, janirakiw taqinis muspharkañ luräwinak lurirïpkiti, ³⁰ janiw taqinix usutanakar qullañatak ch’amanïpkiti. Janirakiw taqinis yaqha arunakat parlapkiti, jan uñt’at arunak qhanañchirïpkisa. ³¹ Jumanakasti juk’ampi suma churäwinak katuqañ munapxam. Nayasti juk’ampi suma thakhi uñacht’ayapxäma.

¹ Nayatix jaqinakana, angelanakan arunakap parlirista, ukat janitix munasiñax utjkitaspaxa, nayax mä latar uñtatakiw tuxuqirista, jan ukax mä platillor uñtatakiw chhulluqirista. ² Jutir urut yatiyañatix utjitaspa, Diosan imantat amtäwiptix amuyt’irista, taqi kun yatirista, qullunak unxtayañatakis iyawsañanïrista, ukat janitix munasiñax utjkitaspaxa, janiw nayax kunäkiristsa. ³ Ukatsti taqi yänakaxtix jan kunaninakar lakinuqirista, pachpa janchixtix nakhantatäñatak katuyirista, ukat janitix munasiñax utjkitaspaxa, uka lurataxax janiw kunatakïkaspasa. ⁴ Munasiñanïñax llamp’u chuymanïñawa; khuyapayasirïñawa; janiw uñisisiñäkiti, janiw jach’achasiñäkiti, ⁵ janiw jan walinak parlañäkiti, janiw jupan jaqïñapak munañäkiti, janiw amuk thithiñäkiti; ⁶ janiw jan chiqapar uñjatat kusisiñäkiti, jan ukasti chiqapar uñjatat kusisiñawa. ⁷ Munasiñanïñax taqi kun t’aqhisiñawa, taqi kun iyawsañawa, taqi kun suyt’añawa, taqi kun mutuñawa. ⁸ Munasiñax janipuniw tukuskaniti. Mä urux profecía arunak yatiyañax tukusiniwa, janiw yaqha arunakat parlaskxaniti, janirakiw yatiñ kankañas munaskxaniti. ⁹ Yatiñ kankañasa, profecía arunakas janiw chiqäkiti, ¹⁰ kunapachatix chiqa kankañax purinkan ukapachaw ukanakax tukusxani. ¹¹ Nayax wawäkasax wawjamaw parläyäta, lup’ïyäta, amuyt’äyäta; ukampis kunapachatix jach’a jaqïxta ukkhasti, wawa kankañ qhiparuw apanukxta. ¹² Jichhasti Diosarux chhayphuk uñjtan; ukampis mä uruw ajanuy ajanu uñkatapxañäni. Jichhasti nayan yatiñaxax janiw phuqhatpachäkiti, ukampis mä uruw Diosarux uñt’ä, kunjämtix jupax nayar uñt’kitu ukhama. ¹³ Jan tukusirinakax kimsaw utji: iyawsaña, suyt’aña, munasiña; uka kimsatsti, munasiñaw wali wakiskirixa.

¹ Munasiñanïñatak ch’amachasipxam, ukhamarus ajayun churäwinakap Diosat katuqañ munapxam, ukat juk’ampsa profecía arunak yatiyapxam. ² Khititix jan uñt’at arunakat parlki ukax Diosaruw parlxayi, janiw jaqinakar parlxaykiti, janiw khitis arsutap amuyt’kiti. Ajayupasti imantat arunakat arsu, ukampis janiw khitis arsutap amuyt’kiti. ³ Ukatsipana, khititix profecía arunak yatiyki ukax iglesiar jiltayañatakiw parli, ukampiw ch’amañchi, chuymacharaki. ⁴ Jan uñt’at arunakat parlirix jupan askipatakikiw parli; ukampis khititix profecía arunak yatiyki ukax iglesiaruw jiltayi. ⁵ Nayax taqi jumanakan jan uñt’at arunakat parlapxañam munirista; ukampis profecía arunak yatiyapxañam munirista; ukaw jan uñt’at arunak arsuñat sipan askixa, uka arunakax kun sañtix munki uktix qhanañchapxasma ukkhakiw iglesiar yanapt’añatakix askïspa. ⁶ Jichhasti jilatanaka, nayatix jutasin jan uñt’at arunakat parlapxäm ukax janiw jumanakatak askïkaspati, janitix Diosan yatiyäwinakap parlapkirisma, yatiñ kankañat jan parlapkirisma, profecía arunak jan yatiyapkirisma, yatichäwinak jan yatichapkirisma ukaxa. ⁷ Toct’añ yänakatix mä kipkak jachsupxaspa ukaxa, ¿kunjämatarak pinkillumpina, arpampin jachsutapsti mayja mayjätap amuysnasti? ⁸ Mä nuwasiñantix trompetax jan suma qhana phust’askaspa ukasti, janiw khitis nuwasiñatak wakichaskaspati. ⁹ Ukhamarakiw jumanakampix lurasi: jumanakatix jan khitin amuyt’kañ jan uñt’at arunakat parlapxätaxa, ¿kunjämarak kuntix sapkta ukasti yatisispasti? ¡Ina ch’usarukiw parlasipktaxa! ¹⁰ Aka uraqinsti walja jan uñt’at arunakaw utji, ukanakasti arsutap tuqikiw uñt’atäspa. ¹¹ Ukampis nayatix uka arunakan kuntix sañ munki uk jan yatkirista ukaxa, nayampi parliritakix mä jaya markankir jaqjamakïristwa, jupas nayatakix mä jaya markankir jaqjamakïspawa. ¹² Ukalayku, niyakixay jumanakax ajayun churäwinakap katuqañ munapxstaxa, kunanakatix iglesiar jiltaykaspa ukanakan utjañapay munapxam. ¹³ Ukhamasti jan uñt’at arunak parlirixa, uka arunak qhanañchañatakix Diosat ch’am maypan. ¹⁴ Ukampis nayatix jan uñt’at arut Diosat mayiristxa, chiqpachansa ajayuxampiw Diosat mayiskta, ukampis amuyuxan janiw kuna asksa jikxatkti. ¹⁵ Ukhamasti ¿kuna lurañaxarak wakisisti? Ajayumpi, amuyumpi Diosat mayiñaxaw wakisi. Ajayumpi, amuyumpi q’uchuñaxaw wakisi. ¹⁶ Jumatix ajayumampik Diosar yupaychstaxa, ukat mä aliq jaqitix ist’ätamxa, janiw juman yuspagaratamampix chikachaskaniti, janirakiw juman parlatamsa amuyt’kaniti. ¹⁷ Juman yuspagaratamax wali sumäskaspawa, ukampis maynitakix janiw askïkaspati. ¹⁸ Nayax Diosaruw yuspagarta, jumanakat sipan jan uñt’at arunakat juk’ampi parlataxata; ¹⁹ ukampis iglesian mä phisqa arunaksa, amuyt’kay arunak arsuñ munta, ukhamat mayninakar yatichañataki, tunka waranqa jan uñt’at arunak arsuñat sipansa. ²⁰ Jilatanaka, janiy jumanakax wawanakjam lup’ipxamti. Jan ukasti, jan walinak lurañatakik wawjamäpxam; amuyt’asiñansti jach’a jaqinakjamäpxam. ²¹ Tatitux Qillqatan siwa: “Aka markarux yaqha markankir jaqinak tuqiw jan uñt’at arunakamp parlä, ukampis janiw ist’apkitaniti” sasa. ²² Ukhamasti jan uñt’at arunakat parlañax Cristor jan iyawsirinakatakix mä chimpuwa, iyawsañanïpki ukanakatakisti janiw ukhamäkiti. Ukampis profecía arunak yatiyañax khitinakatix iyawsañanïki ukanakatakikiw mä chimpuxa, Cristor jan iyawsirinakatakix janiw ukhamäkiti. ²³ Kunapachatix iglesiax tantachatäki ukkhaxa, taqpachanitix jan uñt’at arunak parlasipkätaxa, ukat yaqha aliq jaqixa, jan ukax Cristor jan iyawsir jaqis mantaninixa, jupax jumanakan luqhir tukupxatam amuyani. ²⁴ Ukatsipana, taqinitix profecía arunak yatiyapxätaxa, ukat Cristor jan iyawsiri, jan ukax mä aliq jaqitix mantanin ukkhaxa, jumanakan arsutam ist’asax, jupa pachpaw amuyt’asisin chuymap uñantasini. ²⁵ Ukhamat chuyma manqhapan utjki ukax qhanar mistuni, ukatsti killt’asisaw Diosar yupaychani, ukat chiqpachapun Diosan jumanak taypinkatap yatini. ²⁶ Ukhamax jilatanaka, kunapachatix tantachasipkät ukkhaxa, mayninakax q’uchunak q’uchupxasma, mayninakasti yatichapxasmawa, jan ukax kuntix Diosax sapktam uk qhanañchapxasma, jan ukax jan uñt’at arunakat parlapxasma, uka arunakat qhanañchapxarakisma. Taqi ukanakax purapat jiltañatakïñapawa. ²⁷ Kunapachatix jan uñt’at arunakat arsupxät ukkhaxa, paniniki jan ukax kimsanikiw maynit maynit arsuñapa; ukhamarus mayniw ukanakan arsutanakap qhanañchañapa. ²⁸ Ukampis janitix qhanañchirix utjkchi ukaxa, jupanakax iglesia nayraqatan uka jan uñt’at arunak jan parlapxpati, jan ukasti, jupa sapatakiki, ukhamarak Diosatakik parlapxpan. ²⁹ Ukhamaraki, profetanakatix utjchi ukaxa, paniniki, jan ukax kimsanik parlapxpan, mayninakasti kuntix parlapki uk amuyt’apxpan. ³⁰ Ukampis Diosatix mä kunsa mayni qunt’atäskirir yatiyani ukaxa, nayraqat parlirix amukt’añapawa. ³¹ Ukhamat taqpachanix maynit maynit parlasax profecía arunak yatiyapxani, ukat taqpachan yatiqañapataki, ch’amañchasiñapatakiraki. ³² Profecía arunakat yatiyañax profetan sarayatäñapawa; ³³ Diosax janiw pixtuntir Diosäkiti, jan ukasti, sumankañ utjayir Diosawa. Criston iglesianakapan saräwiparjamasti, ³⁴ warminakax iglesian tantachasïwinakapan amukïpxañapawa, janiw parlañapax wakiskiti. Jupanakax chachanakapar jaysapxañapawa, kamisatix kamachix siski ukhamaru. ³⁵ Jupanakatix kunsa yatiñ munapxchixa, chachanakapar utan jiskt’asipxpan; mä warmin iglesia tantachasïwinakan parlañapax janiw askïkiti. ³⁶ Jumanakax yatipxam, Diosan arunakapax janiw jumanakampi qalltaskiti, janirakiw jumanakakis katuqapktati. ³⁷ Maynitix profetjam amuyaschixa, jan ukax Ajayun amuyt’ayatas amuyaschixa, kuntix qillqanipksma ukax Tatitun kamachipätap amuyani. ³⁸ Janitix katuqkan ukasti, janirakiw Tatitux juparux katuqkaniti. ³⁹ Ukhamasti munat jilatanaka, jumanakax profecía arunak yatiyañar ch’amachasipxam, janirak jan uñt’at arunak arsuñsa jark’apxamti; ⁴⁰ taqi kunsa chiqaparu, ukhamarak yäpar lurapxam.

¹ Jichhasti jilatanaka, Diosan suma yatiyäwi arunak yatiyapksma ukat amtasipxañam munta. Jumanakax uka suma yatiyäwi arunak iyawsapxta, ukarjamarakiw sayt’atäsipktaxa. ² Aka suma yatiyäwi arunak tuqirakiw qhispitäpxäta, uka arunakarjam sayt’apkäta ukapacha, kunjämtix nayax jumanakar yatiyapksma ukarjama; jan ukhamäkani ukasti, iyawsatamax inamayakïniwa. ³ Nayraqatasti, kuna yatichäwinaktix nayax yatiqkta ukarak jumanakarux yatichapxsma, ukasti akhamawa: Qillqatanakarjamax Cristox juchanakas laykuw jiwawayi; ⁴ janchipax p’amp’antatänwa, Qillqatanakarjamasti kimsa urut jaktäna; ⁵ ukatsti Pedroruw uñstäna, ukhamaraki tunka payan apostolunakampiru. ⁶ Uka qhipatsti phisqa patakat juk’ampi jilatanakaruw uñstäna, jupanakat waljaniw jakasipki, yaqhipanakasti jiwarxapxiwa. ⁷ Uka qhipatsti Santiagoruw uñstäna, ukhamarak taqpach apostolunakaru. ⁸ Qhip qhiparusti nayaruw uñstarakitu, nayax jan yuriñat yurir wawäkirista ukhama. ⁹ Nayax apostolunakat sipan jan yäqatakïtwa, janirakiw apóstol satäñatakis askïkti, Diosan iglesiapar arknaqatax layku. ¹⁰ Ukampis Diosan khuyapayasiñap laykukiw kunäktix ukätxa; munasiñapasti nayatakix janiw inamayäkiti. Jan ukasti, nayax taqi apostolunakat sipan juk’amp irnaqawayta; janiw nayat irnaqktxa, jan ukasti, Diosawa, jupasti munasiñapan nayarux yanapitu. ¹¹ Ukhamasti nayasa, jupanakasa, kuntix yatiyapksma uka yatiyäwiruw iyawsapxtaxa, ukaw wakiskirixa. ¹² Criston jiwatat jaktataptix jiwasax yatiystanxa, ¿kunatarak jumanakat yaqhipanakasti jiwatanakax janiw jaktapkiti sas parlapxisti? ¹³ Jiwatanakatix jan jaktapkchixa, Cristox janirakipï jaktkpachatixa. ¹⁴ Cristotix jan jaktkchixa, yatiyktan uka arunakax janiw kunatakis askïkiti, jumanakan iyawsäwimas inamayakirakiwa. ¹⁵ Ukhamächi ukaxa, nanakax Diosan k’ari qhanañchiripäpxiristwa, janis Diosax Cristor jaktaykaspa ukhamak yatiyapxirista, janitix jiwatanak taypit jaktañax utjkaspa ukaxa. ¹⁶ Jiwatanakatix jan jaktkchixa, Cristox janirakipï jaktkpachäntixa. ¹⁷ Cristotix jan jaktkchïnxa, jumanakan iyawsäwimax inamayakiwa: juchanakaman sarnaqasipktaxa. ¹⁸ Ukhamächi ukasti, khitinakatix Cristor iyawsas jiwapki ukanakax chhaqtatäsipkiwa. ¹⁹ Cristor suyt’añasatix akapachan jakañatakikïchixa, taqi jaqinakat sipan sinti llakkañätanwa. ²⁰ Ukampis janiw ukhamäkiti. Chiqpachansa Cristox jiwatanak taypit jaktawayi. Jupax nayrïr achükaspas ukhamawa: jupaw jiwatanak taypit nayraqat jaktawayi. ²¹ Kamisatix jiwañax mä sapa jaqit qalltixa, ukhamarakiw jiwatat jaktañax mä sapa jaqit qallti. ²² Kamisatix Adanankasin taqi jaqix jiwixa, ukhamarakiw Cristonkxasin taqi jaqinakax jakapxani. ²³ Ukampis sapa maynitakiw wakisitarjam lurasini: Cristow nayraqat jakti, nayrïr achur uñtata, ukxarusti kunapachatix Cristox kuttankan ukkhaxa, jupar iyawsirinakaw jaktapxarakini. ²⁴ Uka qhipat aka uraqin tukusiñapax purinini, ukapachaw Cristox taqi munañaninakaru, marka apnaqir jilïrinakaru, ch’aman kankañaninakar t’unjani, ukatsti Dios Awkiruw marka apnaqañ katuyxani. ²⁵ Cristox reyïñapawa, taqi uñisirinakapar atipjañapkama; ²⁶ qhipïr uñisiristi jiwawa, ukas q’ala t’unjatarakïniwa. ²⁷ Diosax taqi kunsa Criston munañaparuw katuyi. Ukampisa, kunapachatix Qillqatanakax: “Taqi kunsa Criston munañaparuw katuyi” sixa, ukax janiw Diosas Criston apnaqatäkaspa ukham sañ munkiti, jan ukasti, Diosaw taqi kunsa apnaqi. ²⁸ Ukatsti kunapachatix taqi kunas Criston munañapar katuyatäxani ukkhasti, Cristo pachpaw Yuqapäkasin Dios Awkir katuyasxani, Diosax taqi kunsa jupar katuyatap layku. Ukhamat Diosax taqi kunxarus munañanïni. ²⁹ Mä tuqitxa, yaqhipanakax jiwatanak lantiw bautismo katuqapxi, ¿kunatakirak uk lurapxisti? Jiwatanakax jan jaktkchini ukasti, ¿kunatakirak jiwatanak lanti bautismo katuqapxisti? ³⁰ ¿Kunatarak jiwasanakasti sapa kutis jan walt’añankasktansti? ³¹ Jilatanaka, sapüruw nayax jiwañ jak’an jikxatasta. Ukasti chiqapunïskiwa, nayasti chuymaxan wal kusista jumanakan Cristor iyawsapxatamata. ³² Nayax Éfeso markan jaqi manq’an animalanakampjamaw jaqinakamp nuwasta. Jiwatanakan jaktañapatix jan chiqäkchi ukasti, ¿uk lurasin, kunarak jikxatsti? Kunjämtix yaqhipanakax sapki ukhamarak lursnaxa: “¡Manq’asiñäni, umt’asiñäni, qharürux jiwxchiñänixaya!” sasa. ³³ Jan sallqjayasipxamti. Kunjämtix säwix siski: “Jan wali jaqinakampi sarnaqañax, aski saräwinak chaqtayi” sasa. ³⁴ Jumanakax sum amuyasipxam, janirak juch lurkxapxamti, jumanakat yaqhipanakax janïraw Diosar uñt’apkiti. Uksti jumanakan p’inqa tukuñamatakiw sapxsma. ³⁵ Inas yaqhipanakax jiskt’aschini: “¿Kunjämarak jiwatanakasti jaktanisti? ¿Kunjäm janchinïpxanisa?” sasa. ³⁶ ¡Uka jiskt’ax pisi amuyunin jiskt’apawa! Kunapachatix jatha phawantktan ukkhaxa, uka jathax jiwañapawa, ukhamat alin mistuñapataki. ³⁷ Yapuchktan ukkhax, janiw mistunkani uka ali yapuchktanti, jan ukasti jathakwa usktanxa, trigöpasa, jan ukax yaqha jathäpasa. ³⁸ Ukatsti Diosaw uka jatharux kumjämarutix munki ukhamarjam tukuyi, sapa jatharusa wakisitaparjamaw ali tukuyi. ³⁹ Janiw taqi janchinakax kipkakïkiti; jaqin janchipax mayjawa, uywanakansa, jamach’inakansa, chawllanakan janchipas mayjarakiwa. ⁴⁰ Ukhamarakiw, alaxpachan uchatanaka, aka uraqin uchatanakas utji; ukampis alaxpachan uchatanakäki ukanakax, aka uraqin uchatanakat sipan sinti sumt’atawa. ⁴¹ Intin qhanapax phaxsin qhanapat sipan mayjawa, warawaranakan k’ajatapas mayjarakiwa; pachpa warawaranak taypinsa, sapa warawaran k’ajatapax mayjawa. ⁴² Ukhamarakiw jiwatanakat jaktañampix lurasi. P’amp’antatäki uka janchix ñusantirikiwa; jaktki uka janchisti jan ñusantiriwa. ⁴³ P’amp’antatäki uka janchix jan kunatak askiwa; jaktki uka janchisti wali jach’añchatawa. P’amp’antatäki uka janchix jan ch’amanikiwa; jaktki uka janchisti ch’amaniwa. ⁴⁴ P’amp’antatäki ukax tukusir janchikiwa; jaktki ukasti ajay janchiwa. Tukusir janchitix utjchixa, ajay janchix utjarakiwa. ⁴⁵ Qillqatan siwa: “Nayrïr chachax Adanawa, jupax jakkir jaqiw tukuwayi” sasa; ukampis qhipïr Adanasti jakañ churir ajayuw tukuwayi. ⁴⁶ Ukampisa, janiw ajayüki ukax nayrankkiti, jan ukasti, janchïki ukaw nayrankixa. ⁴⁷ Nayrïr chachax laq’at luratänwa; payïr chachasti alaxpachat jutiriwa. ⁴⁸ Aka uraqin jakir jaqinakan janchipasti, uka nayrïr jaqin janchipjama laq’at luratawa; alaxpachankirinakasti, kunjämäkitix alaxpachankirix ukhamarakiwa. ⁴⁹ Kunjämtix uka laq’at lurat jaqir uñtasitätanxa, ukhamarakiw mä urux alaxpachankirir uñtasitäñäni. ⁵⁰ Jilatanaka, sañ munapxaraksma, akapach janchix janiw Diosan markapar mantkaspati, tukusirïki ukasti janirakiw wiñay markankkaspati. ⁵¹ Ukampis Diosan imantat amtäwip yatipxañam munta: Janiw taqpachan jiwkañäniti, ukampis taqiniw ⁵² mä ch’ipxtanaki machaqar tukuñäni, kunapachatix trompetan qhipa phust’asitapax ist’askani ukapacha. Trompetan phust’ataparusti, jiwatanakax jan mayampi jiwañatakiw jaktapxani. Jiwasanakasti machaqar tukutäxañäniwa. ⁵³ Jiwasan ñusantir janchisax, jan ñusantirïki uka janchimpiw isthapisini, jiwir janchisasti jan jiwiri janchimpiw isthapisirakini. ⁵⁴ Kunapachatix jiwasan ñusantir janchisax, jan ñusantir janchimpi isthapitäxani, jiwir janchisasa, jan jiwir janchimpi isthapitäxarakini, ukapachaw Qillqatan siski ukax phuqhasini: “Jiwax wiñayatak t’unjataw uñjasi. ⁵⁵ Jiwa, ¿kawkinkarak atipjir ch’amamasti? Jiwa, ¿kawkinkarak mich’imasti?” sasa. ⁵⁶ Jiwan mich’ipax juchawa, nayra kamachiw jucharux uka ch’am churaraki. ⁵⁷ ¡Diosax yuspagaratäpan, jupaw Jesucristo Tatitus tuqi atipjayistu! ⁵⁸ Ukhamasti munat jilatanaka, jumanakax Tatitumpi sum sayt’asipxam, janirak saraqapxamti. Tatitun luräwipan juk’ampi juk’amp irnaqasa; jumanakax yatipxtawa, Tatitumpi mayaki irnaqapxatamax janiw inamayäkiti.

¹ Diosan markapankirinakatak qullqi apthapt’añ tuqitxa, kunjämtix Galacia suyunkir iglesianakar yatichankta ukarjam lurapxam. ² Sapa domingo urusti, jumanakat sapa mayniw irnaqatapat qawqhtix katuqki ukhamarjam iraqapxañama, uksti imapxañamawa, ukhamat kunapachatix nayax purinkä ukkhax jan irthapisipkañamataki. ³ Mä qawqha jilatanakar ajllipxam, Jerusalenar uka irthapitanak apapxañapataki. Nayax purinkä ukkhasti, jupanakar mä qillqatampiw khithä, ukhamat Jerusalenankir jilatanakax sum katuqapxañapataki. ⁴ Nayan sarañaxatix wakischini ukasti, jupanakax nayampiw sarapxani. ⁵ Nayax jutkä ukapachasti, Macedonia chiqa sarañaxawa; uka qhipat Corinto markarux purinï. ⁶ Inas jumanakampi mä qawqha urunak qhiparañaxax wakischini, jan ukax, thayapacha urunak ukankañ wakisirakchini; ukhamat jumanakax yanapt’apxitasma kawkharutix sarañaxäkani ukkhar puriñaxataki. ⁷ Janiw sarkasaki mä juk’atak ukankañ munkti, jan ukasti Tatitux munchi ukkhaxa, mä qawqha urunakaw jumanakamp qamart’añ munta; ⁸ ukampis Éfeso markanxa, Pentecostés urukamaw qamaraskä, ⁹ ukansti Tatitutak lurañax waliw utjarakitu, waljanis nayar uñisir utjkchi ukasa. ¹⁰ Timoteotix purininixa, janiw kunatsa llakisiyapxätati; jumanak taypin jikxatasisax k’uchikïpan; jupasti nayjamarakiw Tatitun luräwipan irnaqi. ¹¹ Ukhamasti jan khitis jumanakat jupar jisk’achpati; jan ukasti, saräwipan sumäñapatak yanapt’apxam, nayar uñjir jutañapataki, nayasti mayni jilatanakamp kunaw jupar suyaskta. ¹² Apolos jilatasarux walpun achikt’ta, mayni jilatanakampi chika jumanakar tumpt’ir sarañapataki, ukampis janiw jichhax jutañ munkiti. Kunapachay wakischini ukkhakiw jutani. ¹³ Suyapxapunim, iyawsañanakamansti ch’aman sayt’apxam, qamas katxatapxam, ch’amañchasipxarakim. ¹⁴ Kuntix lurapkät ukxa, munasiñampi lurapxam. ¹⁵ Jilatanaka, jumanakax yatipxtawa, Estéfanas jilatan utapankirinakaw nayraqat Acaya chiqan Diosan suma yatiyäwiparux iyawsi, jupanakasti Cristor iyawsiri jilatanakaruw yanapapxi. ¹⁶ Nayasti muntwa jumanakax jupanakjam yanapt’asiri, irnaqiri jilatanakar ist’apxañama. ¹⁷ Estéfanas, Fortunato, Acaico jilatanakan purinipxatapat wal kusista. Jupanakampïñax, jumanakampïkirista ukhamänwa. ¹⁸ Jupanakax ajay tuqin wal yanapt’apxitu, jumanakar yanapapktam ukhama. Ukham jilatanakatakix chuymanïñawa. ¹⁹ Asia suyunkir iglesianakax aruntanipxtamwa. Aquilampi Priscilampi, ukhamaraki utapan tantachasipki uka jilatanakampix, Tatitun sutiparuw aruntanipxtam. ²⁰ Taqi jilatanakan aruntanakap katuqasipxam. Jumanak purasti qullan jamp’atimpi aruntasipxam. ²¹ Naya Pablosti, aka aruntxa pachpa amparaxampiw qillqanipsma. ²² Khititix Tatitur jan munkchixa, ¡Diosan ñanqhachäwipax jupxar purpan! ¡Nanakan Tatituxay, jutam! ²³ Tatitu Jesucriston khuyapayasiñapax jumanakampïpan. ²⁴ Munasiñaxax Cristo Jesusankasin jumanakampipunïskiwa.