Roma

Roma

Paulus me Roma magaa kaa Yesus mikee gaata bagee yuwa paagoo yaebeamaata kapogee

Mee kapogee mee ko Paulus waa Roma magaa kaa poono see dimii agoo yoka waa poono taa kaboo kiyoo Yesus mikee gaata bagee yuwa paagoo mee kapogee mee keta yaebeamaata.

Mee kapogee yiba menaa kuwa ko mée tomaa uduma, Yahudi bagee miya, mée tomaa-tomaa apanaa yuwa miya okoo uduma pedeo dimii gaawoo, pedeo agiyoo ukuwawoo see bagee yuwa kemaata boota kaama wigintaayaa. Kiya Ogatamee me mée epa kemaata Yesus Kristus Waa mée yaboota. Eto ko inii Yesus mikee gaayaa bagee uduma Roh mee maseta kaama daamaa dimii gaawoo, daamaa agiyoo ukuwawoo see bagee yuwa mée kiyaata. Inii Musa me menaa deewoo naadi kaama Wa me okoo sikii, okoo miya nao see mée diino mee se kiya inii Yesus mee mikee gaata kaama Waa ma dimi aagadi-maagadi naadi okoo sikii, okoo miya nao see mée deeyaa. Mee ko inii Wa me Yesus doodoo kisee Waa ma mena taa see bagee mée kiyaata, kisee Wa me inii daba mée daagimaa peeyaata kaama totaakea. Kisee kemaata inii dimi mena gipii see bagee, Roh yago bagee, magaa da kaa iyee-payee kaa umiwoo, toowoo see bagee yuwa se, see menaa kuwa Paulus me mee kapogee yiba yaebeamaata.

Yesus mee epoo to wodoo pakaa-seometa kaama wodoo tahun mée oga ma idibi waa naa omemaata kaama tahun 57 mee yiba mokoo Paulus me Korintus magaa kaa kaama mee kapogee yaebeamaata.

Mee kapogee yiba mena kutuu yuwa kuwa ko kisee:

1:1-17 Petamanii menaa

1:18–3:20 Mée tomaa uduma pedeo dimii gaawoo, pedeo agiyoo ukuwawoo see bagee kemaata bogaano too see menaa

3:21–5:21 Inii Musa me menaa deewoo naadi kaama Ogatamee me okoo sikii, okoo miya nao see mée deeyaa se kiya inii Yesus mikee gaakee kaa okoo sikii see mée deeyaa see menaa

6:1–8:39 Inii ko Yesus mee mikee gaata kaama magaa da kaa iyee-payee kaa umiwoo, toowoo see bagee yuwa se kiya inii dimi mena gipii mée kiyaata kaama Roh ma enaataa umiwoo, toowoo siyaa menaa

9:1–11:36 Israel bagee yuwa kaa menaa

12:1–15:13 Yesus mikee gaata bagee yuwa daamaa umiwoo, toowoosi naadi menaa

15:14–16:27 Wodopasi menaa

¹Nii ko Paulus, Kristus Yesus Wa me agiyoo yaokagee see mée. Anii kuwa Ogatamee me etokaa daamaa menaa kuwa yadoonaa see mée kisi naadi Ni paagoo nameei see naseta, kisee daamaa nawigintaata. ²Kuwa etokaa daamaa doometa menaa kuwa ko idukaa Ogatamee me nabi bagee yuwa paagoo "Anii mée tomaa-tomaa kuwa kisee daamaa yaukuwaata, kisee daamaa yaukuwaaniyaabuu taata" see aseta. Okoo me kuwa menaa yuwa Ogatamee me daamaa wa too wigintaata kapogee yiba yaebeamaata, ³kuwa ko kisee: Wayoopaa mee má yaato gaayu ko mée ena keta, Waa Daud me asii-kaba-kaba seta bagee me kabata Mée mee. ⁴Bedaa Waa Ogatamee Yoopaa ii see kuwa miya nekeeniyaa. Waa boota kaama Roh Kudus me pesee kaa aya andoo peeyaata kemaata Waa pesee yago Mée, inii epoo Mée Tuhan Yesus Kristus ii see kuwa awee da kaa mée deeyaata. ⁵Inii Yesus me menaa yadoonaa see bagee kuwa inii Wa me mée epa kaa Wa me menaa inii kaa mée yadootaata. Mee ko inii me mée tomaa-tomaa uduma paagoo Wa ekaa da ogo pege-pege siyaabuu naadi kaama okoo me Waa mikee gaawoo, Wa me menaa daamaa yayeewoo, okoo kisee umiwoo, toowoosi naadi kuwa menaa inii kaa mée yadootaata. ⁶Ikii miya Yesus Kristus Wa me bagee kesea naadi Wa me ikii Ni paagoo nameei see kiseta bagee yuwa. ⁷Ikii Roma magaa kaa Ogatamee me kiepa see bagee yuwa, ikii Ni paagoo nameei see kiseta kaama daamaa kiwigintaata bagee yuwa kuwa uduma paagoo anii mee kapogee mee kiebeaga. Iniitaagi Ogatamee ma, Tuhan Yesus Kristus ma Ekea me aii kiepa dimii ma, koogo adumeta dimii ma kuwa ikii ma epo enaataa kiitoogeesi naadi kiasega.

Paulus me Ogatamee paamee dimii ma sembahyang menaa

⁸Eto ni me petamanii kiebeanaka menaa mee ko ikii me Yesus mikee gaano dimii mee ebo ii see menaa kuwa maga eebaa kaa ogo pege-pege siyaabuu senaakea kemaata anii ikii kaa paamee see dimii mee ebo, anii Yesus Kristus mee doodoo Ogatamee kiiboo, paamee asegee see. ⁹Mikee, Ni me sembahyang menaa yiba anii kisee too ikii kineke-nekee naadi kaama ikii kaa maamaa kiasiwooka mee makapaa se, Ogatamee miya kisee naipi. Wayoopaa me doometa menaa kuwa anii Wa kaa too daamaa omaago ma yadoonaa segeeka. ¹⁰Ni me sembahyang menaa yiba anii eto ikii paagoo kimeeno mee Ogatamee A me ede kiyu ko poono etaa daamaa nakiyaai see maamaa asegeeka. ¹¹Mikee, ni me kisee ikii kideega naaki ou see dimii mee ebo. Ikii dimi mena daamaa pesee kesea naadi anii Roh kaa agiyoo ikii kaa daamaa kiniino see dimii mee agoo. ¹²Mee ko anii ma, ikii ma inii paaya epo enaataa Yesus mikee gaano dimii mee me inii dimi mena daamaa pesee aakiyaabuu taano see naadi anii ikii paagoo kimeepa see dimii mee ebo.

¹³Neebee nokaa yuwa, idukaa kaama eto too anii kaagaa eebaa ikii paagoo kimeepa see dimii mee gaawooka kiya daadaa siyaa agiyoo agoo, see kuwa anii keipi kiyaano see naadi kisega. Mikee, anii miyoo taa apanaa tomaa kaa bagee me magaa kaa nawenaa seta kaboo okoo Yesus mikee gaata kaama daamaa dimii, daamaa agiyoo agoo kedaa semea. Kisee poo ota daamaa ekadaa siyaa mokoo anii ikii paagoo miya kisee daamaa poo agoo kedaasi naadi ikii paagoo kimega naaki ou see dimii mee ebo. ¹⁴Kuwa ni kaa nadootaata menaa kuwa anii eeweganaa taano gaano pedeo. Mee ko Yunani menaa ipi see bagee paagoo miya, Yunani menaa ewo see bagee paagoo miya, mena topeta bagee paagoo miya, tupiino taa bagee paagoo miya okoo uduma paagoo anii Wa me menaa eeweganaa taano gaano pedeo. ¹⁵Kisee kemaata anii ikii Roma magaa kaa bagee paagoo miya Yesus me doometa menaa kiiwegaano ou see dimii mee ebo.

Yesus me doometa menaa kuwa pesee see menaa yoka see nekeensi naadi menaa

¹⁶Yesus me doometa menaa mee ko pesee see menaa. Ogatamee me Yesus mikee gaawoo siyaa bagee kuwa uduma daba daagimaa peeyaayaa menaa yuwa ii naadi kaama anii kuwa menaa eewegaano ego weda see dimii mee taa. Wa me doometa menaa kuwa me Yahudi bagee okoo keta daba daagimaa peeyaa, kaama too mée tomaa-tomaa apanaa yuwa okoo daba daagimaa peeyaa.1:16 1Kor 1:18¹⁷Ogatamee me waa sikii, waa miya nao see mée deeyaa menaa kuwa Yesus me doometa menaa doodoo awee da kaa mée ipi kiyaata. Idukaa ebeamaata menaa ena mee ko kisee: "Okoo me mikee gaakee kaa Ogatamee me waa sikii, waa miya nao see deeyaa bagee kuwa okoo daamaa toowoo taapea" see ebeamaata.1:17 Hab 2:4 Kisee kemaata mikee gaawoo see dimii kaa Wa me waa sikii, waa miya nao see mée deeyaa, apanaa etaa taa.

Ogatamee Wa me kagoo see dimii mee mée tomaa yuwa paagoo awee da kaa deeyaata menaa

¹⁸Mée tomaa yuwa okoo me pedeo dimii, pedeo menaa kuwa maamaa eebaa kedaakea kuwa me okoo Ogatamee kaa mikee menaa kuwa taamegee siwoo siyaa. Kisee kemaata Ogatamee Waa epoo to wodoo kaama Wa me kagoo see dimii mee okoo paagoo awee da kaa deeyaabuu see.1:18 Ep 5:5-7¹⁹Mee ko Ogatamee me Anii kisee Mée to, kisee Mée to ii see kuwa Wa me okoo paagoo awee da kaa deeyaabuu siwoo seta. Kuwa me kemaata Ogatamee mee kisee Mée ii see ipi kiyaa yuwa kuwa mée tomaa uduma awee da kaa ipi kiyaa. ²⁰Mikee, Ogatamee mee se deeyaa Mée kiya petamanii agiyoo-pagiyoo uduma ogaataata kaama wodoo Wa me iyee-payee kuwa mée tomaa yuwa awee da kaa deewoo siyaa. Okoo Wa me ogaataata agiyoo-pagiyoo kuwa deeta kaama Ogatamee Waa mikee esee omaago, kisee too omaago too, Wa too asii-sege see Mée, kisee iyee-payee kuwa mée tomaa yuwa awee da kaa nekeeniyaa. Kisee kemaata okoo me "Ogatamee mee kaasee Mée, anii ewo, se nekeenega" see menaa kuwa iyo, se wegamaayaa. ²¹Okoo me Ogatamee mee kisee Mée to, kisee Mée to see kuwa nekeenegea kiya Ogatamee Waa ebo, Waa asii-sege nao see dimii mee okoo taa, Waa kiiboo, paamee dimii mee miya taa. Kuwa dimii kuwa taa kedaa seta otoopa dimii, otoopa menaa gaawoo naadi kaama dimi taa see bagee kedaa siwoo seta, dimi menaa da digiyoo too keepeata. ²²Okoo me "Anii dimi ipi yoka" see wegageekea kiya dimi taa see bagee too kedaa seta kaama ²³makapaa ogatamee ebea-ebea ipiipii seta yuwa kuwa too ebo ekee siwoo seta. Ogatamee mee Wa too ebo, Wa too asii-sege, Wa too se booyaa see Mée kiya okoo me Waa kisee ekeata kaama mée ebea-ebea waa, bedo ebea-ebea waa, bado wui see agiyoo ebea-ebea waa, magaa da taa peenaa see agiyoo ebea-ebea waa, kisee magaa da kaa booyaa agiyoo ebea-ebea yuwa ma aapeka taata kuwa agiyoo kaa too dimi maataata kaama yaapaagee siwoo seta.

²⁴Okoo kisee bagee kemaata Ogatamee me okoo me pedeo ou gaata-gaata yuwa kaa too gaawoo, umiwoosi yoka naadi kisee yaekeata. Yaekeata kaama okoo amoka aadoona-maadoona siwoo seta, kisee okoo me maa da esee pedeo aakiyaabuu taano agiyoo yuwa aaukuwagee siwoo seta. ²⁵Kuwa Ogatamee kaa menaa kuwa mikee menaa kiya okoo me kuwa wisintaata kaama aii makapaa menaa ma aapeka taata penee siwoo seta. Ogatamee Waa ebo ekee, yaapaagee see dimii mee ekeata kaama Wa me ogaataata agiyoo-pagiyoo kuwa too ebo ekee, yaapaagee siwoo seta. Kisee kiya agiyoo-pagiyoo uduma ogaataata Mée mee Wa too ebo ekee, kisee too iminoo miya, iminoo miya yaapaagee siwoo taano too. Amin.

²⁶Okoo kisee bagee kemaata Ogatamee me okoo me pedeo ou gaata-gaata yuwa doodoo ego weda kiyaa agiyoo yuwa ukuwawoo, umiwoosi yoka naadi kisee yaekeata. Kisee yaekeata kaama api yuwa okoo mée paagoo peeyaa, umiyaa kuwa wisintaata kaama api ou dimii kaa otoopa aadoonaa segee seta. ²⁷Bedaa paayogaa yuwa miya api ma eeumiyaa, tuyaa kuwa wisintaata kaama paayogaa ou dimii mee too ebo kedaa seta. Kisee mée me ego weda see agiyoo kuwa aaukuwagee seta. Okoo me kisee pedeo agiyoo ukuwagee setaa to doodoo okoo kaa maseta.

²⁸Okoo me Ogatamee Waa ipi kaano gaano pedeo see dimii mee ekeasegea naadi Ogatamee me okoo me esee pedeo dimii too gaawoo, esee pedeo agiyoo too ukuwawoo, kisee umiwoosi yoka naadi yaekeata. ²⁹Okoo se-pedeo, we-pedeo maamaa pudii. Kuwa ko koopoo see dimii ma, pedeo agiyoo ukuwaano ou dimii ma, kepe ou, agiyoo ou dimii ma, pedeo ou dimii ma, anii naaki ou see dimii ma, mée wugiino dimii ma, mée ma aawisii taano dimii ma, mée deebaa see dimii ma, mée pedeo yaukuwaano dimii ma kuwa maamaa pudii. Okoo mée me menaa koogo yayeenaa, yaweganaa, ³⁰mée badinaa, Ogatamee mee be gaataa, ani too ebo naadi apanaa bagee kagoo kaa peedi kiyaayu, pedeo agiyoo ukuwaano esee ipi, okonaka me menaa si yayeetaa, ³¹ipi kaa umiino, toono dimii mee ewo, okoo me anii kisee-kisee kaukuwaapa menaa kuwa si yaukuwataa, dimi aaseemee taano be, epa dimii ewo, okoo kisee bagee yuwa. ³²Ogatamee me kisee pedeo agiyoo-pagiyoo ukuwagee see bagee kuwa bogaano gaano pedeo see aseta menaa kuwa okoo ipi kiya kuwa agiyoo se ekeata kisee too ukuwagee siyaa. Kuwa too se kiya apanaa bagee me miya kisee pedeo agiyoo ukuwaano daamaa yoka see gaayaa.

Mée tomaa-tomaa uduma Ogatamee me wigintagaatagi see kuwa nekeensi naadi menaa

¹Kuwa me kemaata ikii miya daamaa nekeenii. Ikii me apanaa bagee paagoo asiino, "A me kisee ukuwape kemaata aa pedeo" see asiyaa kiya a me miya kuwa pedeo agiyoo ukuwageeke yoka a me kisee "Aa pedeo" see asiyu ko a me aa ekaato miya asiyaa mokoo. A me "Ni kaa pedeo taa" see kuwa wegaano ko iyo.2:1-3 Mat 7:1-5, Yoh 8:7²Mikee, kisee pedeo agiyoo ukuwagee see bagee kuwa Ogatamee me wigintaata kaama okoo kaa pedeo yadootagaatagi, Wa me topoo see dimii mee me kisee yadootagaatagi, see kuwa inii uduma ipi. ³A me apanaa bagee paagoo "Aa pedeo yoka" see asiyaa kiya kuwa pedeo agiyoo a me miya ukuwageeke yoka a me ’Ogatamee me anii se napedeo kiyaatagi, anii daba poota’ see dimii mee aa agoo ye? ⁴Ogatamee Waa dimi dapuu, Waa kisee too maamaa eebaa dimi animaata mée epa dimii mee esee ebo kiya a me pedeo yuwa se ekeata kuwa Wa me dimii kuwa peedi yaekeasiino uu ye? A me ’Wa me naepa kigi nao, ni me pedeo yuwa ekeasiinaka’ see dimii mee too aa gaawoose naadi Waa dimi dapuu kegeeki, see kuwa aa se nekeenege ye?2:4 2Pet 3:9

⁵Kiya aa dimi eboo, pedeo ukuwagee see agiyoo kuwa ekeasiino be kemaata Wa me aa kakagoo kiyaa dimii mee ebo kiwooka. Kisee ebo kiwoo naadi kaama iminookaa Ogatamee me topoo see dimii kaa mée tomaa wigintagaatagi naagoo Wa me kagoo kuwa awee da kaa keta a kaa pedeo kadootagaatagi. ⁶Mee naagoo ko mée gakata okoo me ukuwagee seta agiyoo doodoo Ogatamee me maniitagi.2:6 Mzm 62:13⁷Mée noonaa ko okoo makii taa see kaa daamaa agiyoo ukuwagee see bagee yuwa. Okoo me Ogatamee Wa me asii-sege siyaa agiyoo kuwa ni kaa nadootagaatagi naaki ou see dimii ma, Wa me ’Aa ebo yoka’ see nadeegi naaki ou see dimii ma, anii kisee too iminoo miya, iminoo miya toowooka naaki ou see dimii ma kuwa gaawoo, abawoo, umiwoo siyaa bagee yuwa. Wa me okoo iminoo miya, iminoo miya kisee too toowoo siyaatagi. ⁸Kiya mée noonaa ko ’Ni me gaayaa, peeyaa yuwa too ede’ see gaataa, mikee menaa si yayeetaa, pedeo dimii, pedeo menaa kuwa too obeewoo, umiwoo, toowoo see bagee yuwa. Ogatamee me okoo kagoo ebo kaatagi. ⁹Pedeo dimi gaawoo, pedeo agiyoo ukuwawoo see bagee kuwa uduma dimi gaagaa, ae-wae, sooi-wooi siyaa agiyoo kuwa maniitagi. Yahudi bagee keta maniitagi, kaama too mée tomaa-tomaa apanaa yuwa maniitagi. ¹⁰Kiya daamaa agiyoo ukuwagee see bagee kuwa uduma Ogatamee me okoo ebo ekeasiitagi, Wa me asii-sege siyaa agiyoo miya okoo kaa yadootagaatagi, bedaa okoo Waa ma emee kaatagea. Yahudi bagee keta kisee yaukuwaatagi, kaama too mée tomaa-tomaa apanaa yuwa yaukuwaatagi. ¹¹Ogatamee me mée tomaa-tomaa uduma endagii see deetaa see kemaata kisee yaukuwaatagi.2:11 "Ogatamee me mée tomaa-tomaa uduma endagii see deetaa" see menaa mee ko Wa me mee tomaa kaa bagee kuwa epa, mee tomaa kaa bagee kuwa be see se kiya mée uduma okoo me ukuwagee seta yuwa doodoo yaukuwaatagi, see kuwa nekeensi naadi menaa mee.

¹²Mikee, okoo Musa me menaa taa see bagee kuwa gaayu ko okoo kuwa menaa ewo kiya okoo me pedeo agiyoo ukuwagee seta kuwa kaa okoo miya pedeo kaatagea. Bedaa Musa me menaa agoo see bagee kuwa miya okoo kaa mena agoo. Okoo Musa me menaa ipi kiya si yayeetaa see bagee kemaata okoo miya wigintaata kaama okoo kaa pedeo yadootagaatagi. ¹³Mee ko Musa me menaa aii yeetaa see bagee kuwa Ogatamee me okoo sikii, okoo miya nao see kuwa se deeyaa. Kuwa menaa yaukuwawoo see bagee gaayu too Wa me okoo sikii see gaayaa yoka Yahudi bagee miya wigintaata kaama pedeo kiyaa. ¹⁴Mikee, mée tomaa-tomaa apanaa yuwa okoo Yahudi bagee me deewoo see menaa kuwa ewo see bagee kiya okoo dimi yiba kuwa see see menaa agoo, okoo me ukuwagee siyaa. Okoo miya kuwa see see menaa agoo naadi kaama okoo me kisee daamaa, kisee pedeo see kuwa okoo wigineano ipi see bagee yuwa. ¹⁵Okoo dimi yiba ’Anii pedeo ukuwaga yoka’ see dimii mee miya nekeeniyaa, bedaa ’Anii daamaa ukuwaga yoka’ see dimii mee miya nekeeniyaa. Okoo me kisee dimi yiba wiginiwoo naadi kaama mikee, Ogatamee me "Kisee ukuwaai, kisee se ukuwaai" see menaa kuwa okoo ewo kiya kuwa see see menaa yuwa okoo dimi yiba yaebeamaata topa kemaata ipi kegea. ¹⁶Epeekaa Ogatamee me mée tomaa wigintagaatagi naagoo okoo me koogo dimi yiba maapeta menaa yuwa kuwa uduma Kristus Yesus me deeta kaama okoo wa too, wa too wigintagaatagi. Anii Yesus me menaa yaweganaaka too anii kuwa menaa miya eeweganaa segee see.

Musa me menaa deewoo see kaa daba mée se daagimaa peeyaayaa see kuwa nekeensi naadi menaa

¹⁷Kiya ikii Yahudi bagee gaayu ko ikii me gaano, ’Anii ko Yahudi bagee, Musa me menaa kuwa kaa dimi maawoo see mée, anii Ogatamee yaato bagee nao’ see gaayaa bagee. ¹⁸Bedaa Ogatamee me kisee daamaa, kisee ede see gaata-gaata yuwa kuwa ikii ipi, Musa me menaa kuwa ikii maamaa kitupimaata kaama daamaa ma, pedeo ma kuwa uduma wigineano ipi see bagee yuwa. ¹⁹Ikii me gaano, ’Apanaa bagee kuwa okoo mikee menaa ewo, emaa digiyoo kiyaa bagee yuwa mokoo kemaata mikee see etaawee ani me okoo daamaa eepoopa. Okoo digiyoo yiba tookee bagee yuwa kemaata anii agoo da mokoo daamaa awee yakiyaapa yoka’ see kuwa ikii gaayaa. ²⁰Bedaa ikii me gaano, ’Musa me menaa yiba se-ipi, we-ipi, mikee menaa kuwa uduma kiyoo topa yoka ani me dimi taa see bagee yuwa tupiyaa, yoga mokoo see bagee yuwa ani me ipi kiyaayaa yoka’ see kuwa miya ikii gaayaa. ²¹Ikii kuwa menaa kuwa mée topetaa see bagee gaayu ko ikii ekaato miya se tupiyaa ye? Ikii me "Oma se masii" see menaa mée tupiyu ko ikii naa oma masiyaa ye? ²²Ikii me "Tobaaka se taai" see menaa asiyu ko ikii naa tobaaka taayaa ye? Makapaa ogatamee kuwa ikii yaai, be see dimii gaayu ko ikii naa kuwa makapaa ogatamee me yaapaagee see ee kaa agiyoo ikii oma pee-yamasiyaa ye? ²³Ikii me wegaano, "Inii Musa me menaa agoo see bagee yuwa nao" see wegageekea kiya ikii kuwa menaa yuwa si yayeegeekea. Kisee kemaata ikii me Ogatamee mee peedi ekee siyaa. ²⁴Mikee, idukaa ikii Yahudi bagee yuwa ikii kaa kiebeamaata menaa ena mee ko kisee: "Ikii me pedeo ukuwagee see agiyoo kuwa kaa mée tomaa-tomaa apanaa yuwa okoo me Ogatamee ekaa da wisinegeekea" see menaa kuwa ikii kaa kiebeamaata.2:24 Yes 52:5

²⁵Kado ponee daapeasiino mee ko Ogatamee me ikii Yahudi bagee yuwa kineeta agiyoo kiya ikii Musa me menaa kuwa miya ipiipi deewoo siyu too kado ponee daapeasiino mee miya daamaa agiyoo kiyaa. Kiya ikii Musa me menaa tuunuu siyu ko kuwa kado ponee daapeasiino kuwa miya aii kisee otoopa agiyoo too kiyaa. ²⁶Kisee kemaata mée tomaa-tomaa apanaa yuwa okoo kado ponee se daapii see bagee kiya okoo me ukuwagee see agiyoo kuwa topoo, Musa me menaa doodoo kiyu ko Ogatamee me kuwa kado ponee se daapii see bagee ma, kuwa kado ponee daapii seta bagee ma okoo uduma endagii see yaekeasiipi, se maa? ²⁷Okoo kado ponee se daapii see bagee yuwa kiya okoo me ukuwagee see agiyoo kuwa topoo, Musa me menaa daamaa deewoo taa see mokoo kiyu ko okoo me ikii Yahudi bagee yuwa paagoo "Ikii tuunuu siyaa bagee yoka" see kisiyaa. Mikee, ikii kado ponee daapii seta bagee, ikii Musa me menaa miya agoo kiya ikii Musa me menaa tuunuu segeekea kemaata okoo me "Ikii kisee bagee yoka" see kisiyaa. ²⁸Mee ko Yahudi bagee ii see diino ko kisee kabata bagee kemaata kaama se kiya, maa to kaa kado ponee daapeata kemaata kaama miya se ²⁹kiya dimi mena yaato kaama too, Roh me inii dimi yiba kaama kado ponee mée yadaapeasiyaa ebea-ebea mokoo mée yaukuwamaata kemaata inii Yahudi bagee ii see mée deeyaa. Musa me ebeamaata menaa-panaa kuwa deewoo see kuwa kaa se kiya Roh Wa me too kisee daamaa mée yakiyaata kemaata inii Yahudi bagee ii see mée deeyaa.2:29 Plp 3:3, Kol 2:11 Kisee yakiyaata bagee kuwa Ogatamee me too daamaa yaapaagee siyaa, mée me se.

Yahudi bagee me Ogatamee si yayeeyaa kiyaa miya Ogatamee Wa too esee mikee dimii yago Mée yoka see gaasi naadi menaa

¹Kisee Yahudi bagee yuwa ma, mée tomaa-tomaa apanaa yuwa ma kuwa endagii kemaata Yahudi bagee kuwa keagoo se, see kuwa wegayaa ye? Bedaa kado ponee daapeasiino mee imi taa see agiyoo too, see kuwa miya wegayaa ye? ²Taa, Yahudi bagee kuwa okoo kaa daamaa asii-doge-doge siwoosi naadi yaekeata agiyoo eebaa. Petamanii esee daamaa yaekeata agiyoo mee ko Ogatamee me menaa mee. ³Kisee Yahudi bagee kaa daamaa yaekeata kiya okoo noonaa kuwa menaa mikee menaa yoka see gaano taa. Okoo Wa me menaa wisintaata kemaata Ogatamee me miya Wa me idukaa Yahudi bagee paagoo "Anii kisee daamaa kiukuwaaniyaabuu taata" see aseta menaa kuwa Wa me wisintagaapi ye? ⁴Kisee menaa kuwa peenaa ma taa, iyo. Se-bagee, we-bagee kuwa uduma makapaa menaa wegataa see bagee yuwa too kiyaa miya Ogatamee me kisee se. Waa mikee menaa too wegataa see Mée kemaata kuwa Wa me idukaa aseta menaa kuwa se wisintaayaa. Mee see see ebeamaata menaa ena mee ko kisee:

"A me wegayaa menaa kuwa uduma mikee, topoo too ii see kuwa mée me awee da kaa kanekeeniipea.

Bedaa Aa kawisiniyaa menaa kuwa uduma A me yataa kiyaabuu segee taape" see menaa ebeamaata. Mzm 51:6

⁵Kisee kiya inii pedeo ukuwagee see bagee kuwa me inii pedeo, Ogatamee Wa too daamaa, Wa too topoo see Mée ii see kuwa awee da kaa mée nekeeniyaayaa yoka inii kaasee wegayaa? Mée me aii wegayaa menaa ena mee ko kisee: "Inii me pedeo ukuwagee seta agiyoo kuwa me Ogatamee Wa too topoo see Mée ii see kuwa daamaa nekeeniyaa yoka Wa me inii me pedeo yuwa kaa mée kagoo kaa pedeo mée yadootagaakee kuwa se, kisee mée yaukuwaano koopoo, se maa?" Kisee menaa kuwa mée noonaa me aii wegayaa kiya ⁶kisee menaa kuwa peenaa ma taa, iyo. Ogatamee Waa dimi koopoo naaki magaa da kaa bagee kuwa okoo kaa daamaa, pedeo see kuwa Wa me kaasee yawegata kaama wigintaayaa? Iyo.

⁷Bedaa mée ena me wegayaa menaa ena miya kisee: "Anii makapaa menaa yago mée mee me anii pedeo, Ogatamee Wa too esee mikee dimii yago Mée, Wa too asii-sege see Mée ii see kuwa daamaa awee da kaa nekeeniyaa. Ni me makapaa menaa kuwa me Ogatamee Wa too mikee dimii yago Mée ii see nekeenta kaama Waa yaapaagee siyaa yoka kaasee kaa Wa me aa pedeo ukuwagee see mée yoka naadi anii napedeo kiyaayaa?" see menaa mee miya mée me aii wegayaa. ⁸Aii wegayaa menaa ena ma kisee: "Inii pedeo, Ogatamee Wa too daamaa ii see kuwa mée me awee da kaa daamaa nekeensi yoka inii pedeo agiyoo niiukuwaai" see wegayaa menaa kuwa inii miya wegaano daamaa ye? Taa, inii kisee menaa se wegayaa kiya mée noonaa me inii kuwa menaa weganaakea yaai, see menaa kuwa mée yakobanaakea. Kuwa mée yakobanaakea bagee yuwa kaa Ogatamee me pedeo yadootagaano daamaa.

Se-bagee, we-bagee kuwa uduma pedeo too see kuwa nekeensi naadi menaa

⁹Kisee kemaata inii mapea menaa wegayaa? Inii Yahudi bagee kuwa peenaa ebo see tomaa, mée tomaa-tomaa apanaa yuwa kuwa see see se, see kuwa wegayaa ye? Taa, kisee menaa se wegayaa. Anii yumakaa kiebeapa menaa see see Yahudi bagee miya, mée tomaa-tomaa apanaa yuwa miya mée uduma pedeo dimii gaawoo, pedeo agiyoo ukuwawoo, kisee umiwoosi naadi pesee da ma aagadi siwoo seta bagee yuwa keta. ¹⁰Mee see see menaa ebeamaata, mee ko kisee:

"Dimi mena topoo see bagee ena ma, ena ma taa,3:10-12 Mzm 14:1-3, 1Yoh 1:10

¹¹nekeeniino bagee ena miya taa,

Ogatamee Waa ou dimii gaayaa bagee miya taa.

¹²Mée uduma Ogatamee mee amaa kaa ekeasegea,

uduma otoopa umiwoo, toowoo see bagee yuwa too,

daamaa agiyoo ukuwagee see bagee taa,

mikee, mée ena ma taa.

¹³Mée bootaa da ogo maata yoo kabataayaa see see

okoo togaawee kaama pedeo menaa pakayaabuu see,

dabegea da me mée deebaa see menaa too,

pokoo to kaa wegayaa menaa kuwa otoogiyoo me tani uwoo mokoo.3:13 Mzm 5:10, 140:4

¹⁴Okoo ebeawee kaama pedeo ayaa mée yadootaayaa menaa miya agoo,

mée wisineekee menaa miya maamaa pudii,3:14 Mzm 10:7

¹⁵okoo mée tadaa peeyaano see naadi

bado mani-mani see peenaa siyaa.3:15-17 Yes 59:7-8

¹⁶Okoo me mée wegee-wegee taano see naadi metaa,

mée ae-wae siyaabuu taano see naadi peetaa,

¹⁷mée aaemee-emee siyaa etaa da mee okoo ewo.

¹⁸Ogatamee Wa too ebo, Wa too weda see dimii mee okoo taa"3:18 Mzm 36:2 see menaa ebeamaata.

¹⁹Kisee menaa ebeamaata yoka mée tomaa uduma dimi topoo see mée ena ma taa. Yahudi bagee miya, okoo Musa me menaa deewoo see bagee kiya okoo me "Anii kuwa menaa uduma daamaa deewoo see mée yoka anii sikii" see menaa wegaano kuwa iyo, se wegamaayaa. Kisee kemaata se-bagee, we-bagee uduma Ogatamee me wigintaata kaama pedeo kiyaayaa see bagee yuwa too, see kuwa inii ipi. ²⁰Musa me menaa deewoo naadi kaama Ogatamee me waa sikii, waa miya nao see deeyaa bagee ena ma taa. Musa me menaa kuwa ko inii sikii mée kiyaayaa menaa se kiya inii kuwa "Kisee ukuwaai, kisee se ukuwaai" see menaa kuwa doodoo inii me ’Anii pedeo agiyoo ukuwataa see mée ii’ see dimii mee awee da kaa mée nekeeniyaayaa menaa kuwa.3:20 Rom 7:7-8

Ogatamee mikee gaakee kaa too Wa me waa sikii, waa miya nao see mée deeyaa see kuwa nekeensi naadi menaa

²¹Musa me menaa deewoo naadi kaama Ogatamee me waa sikii, waa miya nao see mée deeyaa se kiya eto Wa me waa sikii, waa miya nao see mée deesi naadi menaa kuwa awee da kaa mée deeyaata. Kuwa menaa kuwa idukaa Musa ma, nabi bagee yuwa ma okoo me wegawoo seta, ²²kuwa ko kisee: Yesus Kristus mee mikee gaakee kaa Ogatamee me waa sikii, waa miya nao see mée deeyaa, inii Yesus mikee gaayaa bagee uduma kisee mée deeyaa. Mikee, inii mée tomaa uduma endagii, ²³inii uduma pedeo agiyoo ukuwagee seta bagee yuwa kemaata inii uduma sikii taa. Ogatamee paagoo asii-sege siyaa agiyoo yuwa mée kaa daamaa yaekeata yuwa kuwa taa kedaa seta kaama inii kisee totaakea.3:23-25 Ep 1:7, Tit 3:4-7, 1Yoh 2:2²⁴Mée tomaa kuwa uduma kisee toowoo siyaa bagee yuwa too kiya Ogatamee Wa me inii epa mée gaata dimii mee me Kristus Yesus doodoo inii Ogatamee ma menaa yuwa aii mée yataa kiyaata kaama daba mée daagimaa peeyaabuu seta. Kuwa me kaama Ogatamee me aii kisee inii sikii mée kiyaata. ²⁵Kristus Yesus Wa me tadaa me inii kaa menaa yuwa mée yataa kiyaata, inii me Waa mikee gaakee kaa Ogatamee me inii ma mée emee-emee siyaata. Mee ko Yesus bogaano taa miyoo mée tomaa-tomaa pedeo dimii gaawoo, pedeo agiyoo ukuwawoo, umiwoo seta kiya Ogatamee Waa dimi animaata okoo pedeo kiyaano taa, kisee too mée ekee siwoo seta. Kiya okoo me kisee too pedeo agiyoo ukuwawoo naadi kaama Waa ma menaa kuwa eebaa kiwoo siyaa see kuwa pedeo. Wa me okoo kisee too pedeo ukuwawoo, umiwoo siyaano kuwa topoo see taa, iyo. Kisee kemaata Ogatamee Waa topoo see Mée ii see deesi naadi Wa me kuwa Waa ma menaa eebaa kiwoo seta yuwa kuwa Yesus doodoo mée yataa kiyaata. ²⁶Wa me kisee daamaa mée yaukuwata mee ko eto Ogatamee Waa topoo see Mée ii see nekeeniyaa, bedaa Yesus mikee gaata bagee yuwa okoo Waa ma menaa yuwa yataa kiyaata okoo sikii kiyaabuu taa see Mée ii see kuwa miya awee da kaa mée deeyaano see naadi mée yaukuwata.

²⁷Kisee kemaata mée ena me ebo poga-poga dimii kaa "Anii Musa me menaa deewooka kuwa kaa anii sikii" see kuwa wegayaa ye? Kisee wegaano iyo. Kaasee kaa kisee se wegayaa? Inii Yesus mikee gaakee kaa too sikii kiyaa yoka ebo poga-poga menaa ena ma taa. ²⁸Mikee, inii me wegawoo siyaa menaa mee ko kisee: Ogatamee me waa sikii, waa miya nao see mée diino kuwa ko Musa me menaa deewoo see kaa se kiya Yesus mikee gaakee kaa too waa sikii see mée deeyaa, see menaa mee too mikee menaa. ²⁹Ogatamee mee ko Yahudi bagee me Eboo too ye? Waa mée tomaa-tomaa apanaa yuwa okoo me Eboo miya, taa ye? Mikee, Waa mée tomaa-tomaa apanaa yuwa okoo me Eboo miya. ³⁰Ogatamee mee ko ena too too, mée okoo uduma me Eboo kemaata Yesus mikee gaayaa bagee uduma, kado ponee daapii seta bagee miya, apanaa tomaa kaa kado se daapii see bagee miya uduma okoo sikii, okoo miya nao see mée diipi. ³¹Inii Yesus mikee gaakee kaa sikii kiyaa yoka Musa me menaa kuwa aii wisintaayaa ye? Kisee menaa kuwa peenaa ma taa, iyo. Inii Yesus mikee gaakee kaa kuwa Musa me menaa kuwa mikee menaa yoka naadi se wisintaayaa, see kuwa inii gaayaa.

Abraham wa me mikee gaata kemaata Ogatamee me waa sikii, waa miya nao see deeta menaa

¹Kisee kemaata inii Yahudi bagee yuwa asii-kaba-kaba seta mée Abraham mee gaayu ko kaasee kaa Ogatamee me waa sikii yoka see deemi ya? ²Ogatamee me Abraham waa sikii, waa miya nao see deemi mee ko Abraham wa me daamaa ukuwagee seta agiyoo kuwa kaa se. Wa me daamaa ukuwagee seta agiyoo kuwa kaa Abraham waa sikii see deemi naaki Abraham waa mée paagoo ebo poga-poga siyaa. Kiya wa me Ogatamee paagoo ebo poga-poga kaa "Anii kisee ukuwaga yoka anii sikii" see wegayaa menaa kuwa iyo. ³Mikee, Ogatamee me menaa yiba mena ena ko kisee: "Abraham me gaano, ’Ogatamee me nasigi yoka mikee kaapa ii’ see gaagi. TUHAN me wa me kisee mikee nagaagi kemaata waa sikii, waa miya nao see deegi" see menaa ebeamaata.4:3 Kej 15:6⁴Mée waa ena, mée me agiyoo yaukuwagi gaayu ko wa me yaukuwataa to mokoo da mee daamaa masiyaa, aii kisee masiyaa agiyoo se. Wa me kuwa agiyoo yaukuwapi kemaata waa maniino too. ⁵Kiya Ogatamee me waa sikii, waa miya nao see mée diino kuwa ko kisee taa. Mée waa ena ’Anii kisee ukuwaga yoka Ogatamee me waa sikii, waa miya nao see nadiipi’ see dimii mee ekeata kaama Ogatamee mikee nao see dimii mee gaayu too Wa me waa sikii, waa miya nao see deeyaa. Ogatamee mee ko pedeo bagee Waa ma menaa yuwa yataa kiyaata sikii mée kiyaabuu taa see Mée mee mikee nao see gaakee kaa Wa me waa sikii see mée gaayaa. ⁶Kisee bagee kuwa ede ma, ede ma siwoo siyaa. Kiya okoo me ni me daamaa ukuwaakee agiyoo kuwa kaa Ogatamee me waa sikii, waa miya see nadeegi nao naadi kaama ede ma, ede ma siwoo siyaa se. Daud me kisee nekeensi naadi ebeamaata menaa ena mee ko kisee:

⁷"Ede ma, ede ma siyaa bagee kuwa ko kisee:

okoo me pedeo ukuwata agiyoo yuwa TUHAN me epa yaekeata,

okoo Waa ma menaa yuwa yataa kiyaata.

⁸Okoo me pedeo yuwa uduma TUHAN me yawisintaata pedeo se kiyaayaa.

Kisee bagee kuwa naa kiiboo, daamaa, ede nao" see menaa ebeamaata. Mzm 32:1-2

⁹Kuwa okoo Waa ma menaa nataa kiyaagi nao naadi ede ma, ede ma siyaa menaa kuwa ko kado ponee daapii seta bagee yuwa okoo too ede ma, ede ma siwoosi naadi kaama yaebeamaata menaa ye? Taa, kado ponee se daapii see bagee yuwa miya ede ma, ede ma siwoosi naadi yaebeamaata menaa, se maa? Yumakaa inii me wegape menaa mee ko "Abraham wa me TUHAN mikee gaata kemaata Wa me waa sikii, waa miya nao see deeta" see wegape. ¹⁰Wa me Abraham waa sikii see deeta see menaa mee ko Abraham waa kado ponee daapeata kaama wodoo waa sikii see deeta ye? Kado ponee daapeasiino taa miyoo kaama waa sikii see deeta ye? Kado ponee daapeata kaama wodoo se kiya kado ponee daapeasiino taa miyoo kaama waa sikii see deeta. ¹¹Ogatamee me waa sikii see deeta kaama maamaa omegee naadi kaama Wa me Abraham paagoo kuwa kado ponee daapii siwoo taai naadi menaa da manta. Kado ponee daapeasiino mee ko Abraham wa me asii-kaba-kaba bagee kuwa Ogatamee me bagee yuwa ii see aanekeendaasi naadi ebea-ebea da mee. Abraham kado ponee daapeasiino taa miyoo kaama Ogatamee me waa mikee nao see nagaagi kemaata waa sikii, waa miya nao see deeta. Mee kaama wodoo too mee ebea-ebea da manta. Kisee kemaata Yahudi bagee okoo too se kiya kado ponee se daapii see bagee okoo Ogatamee mikee gaata bagee kuwa uduma miya okoo ataagi mee ko Abraham see wegayaa. Bedaa Ogatamee me okoo sikii, okoo miya nao see deeyaa. ¹²Kado ponee daapii seta bagee kuwa okoo miya Ogatamee mikee gaakee kaa okoo ataagi mee ko Abraham. Waa kado ponee daapeasiino taa miyoo kaama Ogatamee mikee gaata see see Yahudi bagee okoo miya okoo kado ponee daapii seta kiya okoo iniitaagi Abraham me Ogatamee mikee gaata dimii mee obeewookea kemaata Abraham mee okoo ataagi see wegayaa.

¹³Ogatamee me Abraham waa ma, wa me asii-kaba-kaba bagee yuwa ma "Ikii uwoo to, magaa to kuwa uduma epoo bagee kikiyaata" see aseta. Okoo kisee epoo bagee kikiyaata see aseta menaa mee ko okoo me deewoo siyaa menaa deewoo seta kuwa kaa se kiya okoo Ogatamee mikee gaakee kaa ikii sikii see deeta kaama "Ikii uwoo to, magaa to epoo bagee kikiyaata" see aseta. ¹⁴Okoo uwoo to, magaa to kuwa uduma epoo bagee kikiyaata see aseta menaa mee ko okoo Ogatamee mikee gaakee kaa se kiya Musa me menaa deewoo see kuwa kaa epoo bagee kiyaata see aseta naaki mikee gaawoo taai see menaa kuwa ekeata wisintaayaa, bedaa Ogatamee me Abraham paagoo kisee daamaa kiukuwaaniyaabuu taata see aseta menaa da mee miya taa kiyaa, wuutu-waatu siyaa. ¹⁵Mikee, Wa me Musa paagoo "Kisee ukuwaai, kisee se ukuwaai" see aseta menaa agoo kemaata inii kuwa menaa tuunuu segee siyaa, Ogatamee Wa me kagoo kuwa mée yamiyaayaa. Kuwa menaa taa naaki inii se tuunuu siyaa.

¹⁶Kisee kemaata Ogatamee me Abraham paagoo kisee daamaa kiukuwaaniyaabuu taata see aseta menaa mee ko Musa me menaa deewoo siyaa bagee yuwa okoo kaa too aseta menaa se kiya Wa me okoo mikee nagaayaa bagee okoo uduma epa kaa Ni me taa ma taa aii kisee daamaa yaukuwaaniyaabuu taapa yoka naadi aseta menaa. Yahudi bagee too se kiya okoo Abraham me Ogatamee mikee gaata see see mikee gaayaa bagee kuwa uduma okoo miya Abraham me asii-kaba-kaba seta bagee mokoo kiyaa, Abraham mee inii uduma me ataagi mokoo kiyaa. ¹⁷Idukaa mee see see menaa ena ebeamaata, mee ko kisee: "Abraham aa ko mée tomaa eebaa asii-kaba-kaba seta mée kaape" see ebeamaata.4:17 Kej 17:5 Abraham waa mikee gaata kemaata waa Ogatamee emaa dagii da kaa iniitaagi keta. Abraham mee ko Ogatamee mikee Wa me boota bagee yuwa aya andoo peeyaano Mée ii see dimii gaata, bedaa taa agiyoo kuwa miya Wa me wegataayaa menaa kuwa me agoo kiyaabuu taa see Mée ii see dimii mee miya gaata mée mee. ¹⁸Waa taa ma taa yoga agoo kaano iyo see kaboo kiya Ogatamee kaa too dimi maataata kaama ’Waa mikee yoga ena niipi’ see gaata kemaata waa mée tomaa eebaa asii-kaba-kaba seta mée keta, Ogatamee me aseta-aseta doodoo, mee ko "A me asii-kaba-kaba seta bagee yuwa eebaa kaatagea" see aseta see see.4:18 Kej 15:5¹⁹Waa tahun ogei me badoo ena ometa see mée kemaata ’Ni me maa da mee boota maa to mokoo’ see gaata, bedaa Sara mee pai keta apii. Kisee kiya wa me Ogatamee mikee gaano dimii mee dabaa kaano taa, ²⁰Ogatamee me "A me asii-kaba-kaba seta bagee mée eebaa kaatagea" see naseta menaa mee mikee nao see gaata, Wa me kisee naukuwaaniyaapi ye, taa ye see dimii mee gaano taa, waa dimi wiya taa. Ogatamee mikee gaawoo naadi kaama pesee keta, ’Ogatamee Wa too ebo, Wa too asii-sege yoka’ see dimii mee miya gaata. ²¹Abraham me ’Mikee, Wa me naseta doodoo kisee Wa me pesee kaa naukuwaaniyaapi ii’ see gaata. ²²Kisee gaata kemaata Ogatamee me waa sikii, waa miya nao see deeta. ²³Kuwa "Waa sikii, waa miya nao see deegi" see ebeamaata menaa mee ko Abraham wa kaa too menaa se ²⁴kiya inii kaa menaa miya. Inii epoo Mée Tuhan Yesus mee boota kaama aya andoo peeyaata Mée Waa mikee nao see gaayaa bagee yuwa kuwa kaa miya Wa me okoo sikii see mée diipi. ²⁵Ogatamee me Yesus Waa inii me pedeo yuwa kaa mée yaboosi naadi yaekegataata, bedaa Wa me inii sikii mée kiyaano see naadi Waa aya andoo peeyaata.4:25 Yes 53:4-5, Ibr 10:12-14

Inii Ogatamee Waa ma mée emee-emee siyaata menaa

¹Inii Yesus mikee gaata kemaata Ogatamee me inii sikii mée kiyaata. Eto ko inii epoo Mée Tuhan Yesus Kristus doodoo inii Ogatamee ma mée emee-emee siyaata topea.5:1-2 2Kor 5:18-20, Kol 1:20²Bedaa inii Yesus mikee gaakee kaa inii Waa doodoo Ogatamee me epaa mee miya daba masiyaa. Eto ko inii Wa me epaa mee yiba umiwoo, toowookea. Inii kisee toowoo naadi kaama Ogatamee paagoo asii-sege siyaa agiyoo kuwa inii kaa miya mée yadootagaatagi nao naadi ede ma, ede ma Wa kaa dimi kotopiwoo see. ³Kuwa kaa too inii ede ma, ede ma siwoo siyaa se kiya inii ae-wae, dimi gaagaa siyaa kaboo miya ede ma, ede ma siyaa. Mikee, kisee ae-wae, dimi gaagaa siyaa agiyoo kuwa me inii me koogo se makii taapa see dimii mee pesee kiwoo siyaa, see kuwa inii ipi.5:3-5 Yak 1:2-4, 1Pet 1:6-7⁴Bedaa inii koogo makii taa see kaa umiwoo, toowoo naadi kaama Ogatamee me inii mée ede kaa okoo kisee bagee ii see mée deeyaa. Bedaa Wa me okoo kisee bagee ii see mée gaawoo naadi kaama inii Wa kaa too dimi kotopiwoo siyaa. ⁵Inii kisee Wa kaa dimi kotopiwoo, umiwoo naadi kaama usiyaato ko daamaa too. Wa me mée manta Mée Roh Kudus mee doodoo Ogatamee Wa me epaa mee inii me dimii yiba mée yakabagekomee seta kaama topea. Kisee kemaata inii kuwa Wa me mée aseta menaa kuwa mée yaukuwaaniyaano taa yaai see dimii mee inii kaa taa.

⁶Mikee, Wa me epaa mee ko kisee: Idukaa inii dabaa see bagee, inii ekaato daamaa kiyaano iyo see bagee kiya Kristus mee bogaano monaa kaa inii pedeo bagee yuwa kaa mée yaboota. ⁷Mée waa ena me apanaa bagee kaa yabogaano mee ko dimi topoo see mée to mee miya wa kaa yabogaanaka see dimii gaayaa kuwa miya kana. Bedaa dimi daamaa see mée ena waa naa miya wa kaa yabogaano uu see dimii gaayaa bagee ena waa naa too agoo kepa. Kisee yabogaano kuwa kana ⁸kiya Ogatamee mee kisee taa, Wa me inii mée epa dimii mee awee da kaa mée deeyaata. Mee ko inii mée tomaa pedeo dimii gaawoo, pedeo agiyoo ukuwawoo segee seta kaboo Kristus mee inii kaa mée yaboota.5:6-8 Yoh 3:16, 1Pet 3:18⁹Kisee kemaata eto ko Wa me tadaa kuwa me inii sikii mée kiyaabuu seta kaama topea. Waa mée yaboota kemaata taa ma taa Ogatamee me inii mée kagoo keta kuwa mée yataa kiyaata kaama daba mée daagimaa peeyaabuu taatagi. ¹⁰Mikee, inii Ogatamee ma aayape keta kaboo Wayoopaa mee inii kaa mée yaboota. Kisee mée yaboota kemaata inii Ogatamee ma mée emee-emee siyaata. Wa me kisee inii Ogatamee ma mée emee-emee siyaata kaama eto daamaa toowoo taaki kuwa me inii taa ma taa daba mée daagimaa peeyaabuu taatagi.5:9-11 Ep 2:1-6, Kol 1:20-22¹¹Kuwa too se kiya inii epoo Mée Tuhan Yesus Kristus doodoo inii Ogatamee ma mée emee-emee siyaata kuwa kaa inii Ogatamee paamee naadi ede ma, ede ma segee siyaa.

Adam ma, Kristus ma ekea kaa menaa

¹²Petamanii mée ena me pedeo koo seta kemaata magaa da kaa pedeo dimii, pedeo menaa medaa seta.5:12 Kej 3:6-7 Kuwa me kemaata mée bogaano too. Waa kaama asii bagee kuwa uduma pedeo dimii gaawoo, pedeo agiyoo ukuwawoo see bagee yuwa kedaa siwoo seta. Kuwa me kemaata mée uduma boowoo segeekea. ¹³Ogatamee me Musa paagoo mée deewoosi naadi menaa ase-maniino taa miyoo miya mée tomaa yuwa pedeo dimii gaawoo, pedeo agiyoo ukuwawoo seta. Okoo kisee umiwoo seta kiya kuwa Musa me menaa taa kaboo yoka Ogatamee me "Aa mena tuunuu sepe" see menaa wegaano taa. ¹⁴Adam gaayu ko Ogatamee me aseta menaa si yayeeta kemaata tuunuu seta. Adam tota mee kaama asii Musa tota yoo too yaayupi bagee kuwa gaayu ko Ogatamee me aseta menaa kuwa ewo naadi mena tuunuu taano taa kiya okoo uduma boowoo seta. Okoo me pedeo ukuwawoo seta agiyoo kuwa ena, Adam me Ogatamee me aseta menaa si yayeeta mee see see se kiya okoo miya boowoo seta. Adam mee ko idukaa kaama meetagi see wegawoo seta Mée Waa ma ena keenda, ena keenda.

¹⁵Ekea ena keenda, ena keenda kiya ekea ena mee too se. Ogatamee me daamaa aii mée yadootaata agiyoo kuwa ena, mée me pedeo kaa mée yadootaata agiyoo kuwa ena. Mee ko mée ena me si yayeeta kemaata mée maamaa eebaa boowoo seta. Kiya Mée ena Wa me mée epa kemaata Ogatamee Wa me esee daamaa aii mée yadootaayaa agiyoo kuwa esee ebo. Wa me epaa mee Yesus Kristus doodoo mée maamaa eebaa kaa aii yamiyaabuu seta. ¹⁶Kuwa daamaa aii mée yadootaata agiyoo kuwa ena, Adam me pedeo ukuwata agiyoo kuwa kaa mée yadootaata agiyoo kuwa ena, ena mee too se. Ena mee ko wa me pedeo agiyoo ena ukuwata kemaata mée eebaa wigintaata kaama pedeo kiyaata. Kiya ena mee ko mée tomaa yuwa pedeo agiyoo eebaa ukuwawoo seta kiya Wa me mée epa kaa daamaa agiyoo mée yaukuwata kemaata inii sikii mée kiyaata. ¹⁷Mée ena mee ko wa me si yayeeta kemaata waa doodoo mée tomaa boowoo seta kiya Mée ena mee, Yesus Kristus mee Wa me daamaa mée yaukuwata agiyoo mee esee ebo. Mee kaama Ogatamee me epaa mee maamaa eebaa inii kaa aii mée yadootaata kaama inii sikii mée kiyaata. Kuwa Wa me epaa kuwa daamaa maseta bagee yuwa okoo taa ma taa Waa ma ebo toowoo taatagea.

¹⁸Kuwa me kemaata mée ena me si yayeeta kemaata mée uduma pedeo kiyaano etaa da agoo kiyaata. Bedaa Mée ena me daamaa ukuwata agiyoo ena mee kaa mée uduma daamaa sikii kiyaata kaama kisee too toowoo taano etaa da agoo kiyaata. ¹⁹Ena mee wa me Ogatamee me menaa yayiino taa kemaata mée maamaa eebaa pedeo dimii gaawoo, pedeo agiyoo ukuwawoo see bagee kiyaata. Bedaa ena mee Wa me Ogatamee me menaa daamaa yayeeta kemaata mée maamaa eebaa daamaa sikii kiyaata. ²⁰Ogatamee me Musa paagoo kuwa deewoosi naadi menaa manta mee ko kuwa aseta menaa tuunuu seta bagee okoo kaa mena maamaa eebaa kisi naadi manta. Kuwa okoo kaa menaa eebaa kedaa siwoo seta kiya taa ma taa Ogatamee me mée epa dimii mee miya esee ebo kedaa seta.5:20-21 Yoh 1:16-17, Rom 6:23²¹Mee ko mée me pedeo dimii, pedeo menaa kuwa ebo kedaa, pesee kedaa naadi kaama mée boowoo seta. Kiya taa ma taa inii epoo Mée Yesus Kristus doodoo Ogatamee me inii sikii mée kiyaata. Mee kaama eto ko Wa me mée epa dimii mee ebo kedaa, pesee kedaa naadi kaama inii kisee too iminoo miya, iminoo miya toowoo taatagea.

Idukaa iyee kuwa boota kemaata eto Kristus ma dimi aagadi-maagadi siwoo taai naadi menaa

¹Wa me mée epa dimii mee ebo kedaa seta kemaata inii mapea menaa wegayaa? "Ogatamee me mée epa dimii mee bedaa ebo kedaa siwoosi naadi inii pedeo agiyoo ukuwagee taano daamaa" see menaa kuwa wegayaa ye? ²Kisee menaa kuwa peenaa ma taa, iyo. Inii ko kuwa pedeo dimii, pedeo menaa kuwa booyaata bagee yoka inii kaasee kaa kisee pedeo dimii kaa toowoo siyaa?6:2 1Pet 2:24³Inii Kristus Yesus ma aagadi-maagadi naadi uwo tukumaano ebea-ebea menaa kuwa naa ikii ewo ye? Mee ko Waa boota-boota kuwa inii miya kisee Waa ma aagadi-maagadi naadi uwo tukumeta. ⁴Kisee kemaata inii uwo tukumeta kaboo inii Kristus ma epo enaataa boota kaama ogo maataayaa mokoo. Mee ko Nagamee Wa me asii-sege see pesee da mee me Kristus Waa boota kaama aya andoo peeyaata see see mokoo eto inii miya gipii see dimii kaa too daamaa umiwoo, toowoosi naadi inii Waa ma epo enaataa boota kaama ogo maataamea.6:3-5 2Kor 5:17, Kol 2:12-13

⁵Mikee, Waa boota see see inii miya Waa ma aagadi-maagadi naadi boopea kepa ko taa ma taa Waa aya andoo peeta see see inii miya Waa ma aagadi-maagadi naadi aya andoo peeta kaama toowoo taapea. ⁶Inii me idukaa iyee kuwa me inii pedeo dimii gaawoo, pedeo agiyoo ukuwawoo, kisee umiwoosi naadi pesee da ma aagadi siwoo seta bagee yuwa kedaa seta. Inii kisee pedeo see iyee kaa umiwoo siyaa pesee da mee taa kisi naadi inii Waa ma aagadi-maagadi naadi epo enaataa piya bokoo to kaa boota, see kuwa inii ipi.6:6-8 Gal 2:19-20, 5:24⁷Mikee, kisee boota bagee gaayu ko okoo boota kaama wodoo kuwa pedeo iyee kaa umiwoo siyaa pesee da mee pekataata toogee siyaa. ⁸Inii Kristus ma epo enaataa boota kemaata inii Waa ma epo enaataa umiwoo, toowoo taapea, see kuwa inii mikee menaa yoka see gaayaa. ⁹Kristus Waa boota kaama aya andoo peeyaata kemaata Waa bedaa wiyaagoo to ma se bogaatagi, bogaano yaato pesee da kuwa Wa kaa taa, Wa me kisee daba, peedi ekeata, see kuwa inii ipi. ¹⁰Waa boota mee ko kaagaa ena too too sikii. Kuwa pedeo iyee kaa umiwoo siyaa pesee da kuwa taa kiyaano see naadi boota. Bedaa Waa eto aya tupi mee ko Ogatamee ma dimii menaa kaa too toowoo taaki. ¹¹Mee mokoo miya eto ko ikii me gaawoo see dimii mee ko kisee: "Ni me pedeo dimii, pedeo menaa kuwa booyaata kemaata kaama anii Kristus Yesus ma aagadi-maagadi naadi Ogatamee ma dimii menaa kaa too umiwoo, toowoo taapa" see dimii mee gaawoo taai.6:11 Kol 3:3-5

¹²Kuwa me kemaata pedeo dimii, pedeo menaa kuwa pesee kedaa siyaa yoka ikii yiba se tuyaai. Maa da mee booyaa agiyoo too yoka pedeo ou dimi-pami kuwa se obeai.6:12-14 Yoh 8:34, Rom 12:1¹³Ikii me maa to kaa takumeta agiyoo kuwa me pedeo agiyoo se ukuwaai. Ikii koopoo see agiyoo ukuwaano see naadi ekaato ekegatagaakee se kiya ikii ekaato Ogatamee paagoo daamaa ekega-manee siwoo taai. Ikii ko boota kaama aya andoo kipeeyaata bagee mokoo yoka ikii me maa to kaa takumeta agiyoo yuwa me mikee topoo see agiyoo kuwa too ukuwaano see naadi ikii ekaato Wa paagoo ekegatagaa siwoo taai. ¹⁴Mikee, idukaa ikii ko Musa me menaa ma aagadi seta bagee kiya eto ko ikii Ogatamee me epaa mee ma aagadi siyaa bagee yuwa. Kisee kemaata eto kaama wodoo ikii pedeo iyee kaa umiwoo siyaa pesee da kaa se umiwoo, toowoo siyaa.

Agiyoo yaokagee see bagee toma wiya kaa ebea-ebea menaa

¹⁵Eto ko inii Musa me menaa ma aagadi taano taa bagee kemaata inii mapea menaa wegayaa? "Inii Ogatamee me epaa mee ma aagadi seta kaama umiwoo see bagee yoka koosi, inii pedeo agiyoo daba ukuwayaa" see menaa kuwa wegayaa ye? Kisee menaa kuwa peenaa ma taa, iyo. ¹⁶Daamaa nekeenii: Mée me agiyoo yaokagee see bagee gaayu ko okoo me eboo wa me agiyoo too daamaa yaukuwaano see naadi wa paagoo too ekaato ekegataayaa, wa me menaa too yayeesi naadi okoo peneata bagee mokoo. Mee mokoo miya ikii pedeo agiyoo ukuwaano see naadi ikii ekaato ekega-manee siyu ko ikii kipeneata kaama mée bogaano yaato badaa kimaayaa. Kiya ikii Ogatamee me menaa daamaa yayiino see naadi ekaato Wa paagoo ekega-manee siyu ko ikii mikee topoo see bagee toogee taano yaato daamaa badaa kimaayaa, see menaa kuwa ikii ewo ye?6:16 Mat 6:24, 2Pet 2:19¹⁷Kiya Ogatamee mee kiiboo, paamee. Idukaa ikii ko pedeo agiyoo too ukuwageesea naadi kipeneata bagee kiya eto ko kuwa ikii kitupiwoo seta menaa kuwa ikii dimi yiba maamaa peneata yayeewookea yoka inii paamee dimii mee ebo. ¹⁸Idukaa ikii ko pedeo ukuwawoo, umiwoosea naadi kipeneata bagee yuwa kiya eto ko ikii daba kipekageeta kaama mikee topoo see agiyoo daamaa yaukuwawoo, umiwoosea naadi kipeneata bagee yuwa kegea. ¹⁹Ikii mena nekeeniino kuwa kana see bagee kemaata anii kuwa ebea-ebea menaa kuwa kaa kisega. Idukaa ikii pedeo agiyoo ukuwaano see naadi ikii ekaato maa to kaa takumeta agiyoo yuwa ekega-manee siwoo seta. Ikii kisee ekaato ekega-manee siwoo naadi kaama ikii esee pedeo agiyoo-pagiyoo ukuwageesea naadi kipeneata bagee yuwa keta. Ikii kisee too umiwoo, toowoo naadi kaama ikii me pedeo ukuwata agiyoo yuwa eebaa kega, eebaa kega siwoo seta. Kiya eto ko ikii mikee topoo see agiyoo kuwa too yaokagee see bagee kaano see yoka ikii ekaato maa to kaa takumeta agiyoo yuwa Ogatamee paagoo daamaa ekega-manee siwoo taai. Mee kaama ikii me pedeo yuwa kuwa wiginiwoo naadi kaama daamaa dimii, daamaa menaa kuwa too eebaa kedaa siwoo siyaa.

²⁰Idukaa ikii pedeo ukuwageesea naadi kipenee siwoo seta kaboo ikii mikee topoo see agiyoo too ukuwaano gaano pedeo see dimii mee taa. ²¹Ikii me kuwa idukaa pedeo ukuwawoo seta agiyoo kuwa kaa ikii eto ego weda nao see gaagea. Ikii kuwa agiyoo ukuwawoo naadi kaama daamaa agiyoo ena ma kiagoo kiyaata ye? Taa, kuwa agiyoo ukuwawoo naadi kaama usiyaato ko boota kaama wigintaayaa. ²²Kiya eto ko ikii kisee pedeo ukuwawoosea naadi kipeneata bagee yuwa se. Ogatamee me ikii kipekageeta kaama ikii daamaa agiyoo yaukuwawoosea naadi kipeneata bagee yuwa kegea. Eto ko ikii daamaa dimii, daamaa menaa, kisee daamaa poo eebaa ekayaabuu siwoo naadi kaama ikii kuwa pedeo yuwa wiginiwoo siyaa. Ikii kisee daamaa wiginiwoo, umiwoo naadi kaama usiyaato ko iminoo miya, iminoo miya kisee too toogee siwoo taatagea. ²³Pedeo dimii gaawoo, pedeo agiyoo ukuwawoo setaa to mokoo da mee ko mée boota kaama wigintaayaa. Kiya Ogatamee me aii mée yaekeata agiyoo mee gaayu ko inii epoo Mée Tuhan Kristus Yesus ma dimi aagadi-maagadi naadi kisee too iminoo miya, iminoo miya toogee siwoo siyaa kuwa.6:21-23 Gal 6:7-8, Yak 1:14-15

Api goeyaa kaa ebea-ebea menaa

¹Neebee nokaa yuwa, eto ko ikii Musa me menaa ipi see bagee kuwa anii mena ena kisiinaka. Mee ko Musa me menaa deewoo see bagee kuwa okoo bogaano taa miyoo too kuwa menaa ma aagadi siwoo seta, see kuwa ikii ipi. ²Ebea-ebea menaa ena ko kisee: Api ena, mée me goemaata kaama paimee ma enaataa aagadi naadi umiwoo taai see asiyaa. Paimee boota gaayu too kuwa waa ma enaataa aagadi naadi umiwoo taai see wegayaa menaa kuwa ekeasiyaa. ³Kisee kemaata paimee bogaano taa miyoo kuwa mee apii to me apanaa mée ena kaa pe-gadimiyu ko waa tobaaka taata see apii see wegayaa. Kiya paimee boopi kepa ko kuwa waa ma enaataa aagadi naadi umiwoo taai see wegayaa menaa kuwa taa kiyaa. Waa apanaa bagee kaa pe-gadimiyu ko tobaaka taata apii see kuwa se wegayaa. ⁴Neebee nokaa yuwa, ikii miya kisee. Idukaa ikii Musa me menaa ma aagadime siwoo seta bagee yuwa mokoo. Kiya ikii eto Kristus ma aagadi-maagadi naadi epo enaataa boota mokoo see see topea. Kisee kemaata kuwa Musa me menaa deewoo taai see menaa kuwa ekeasiyaa. Eto ko ikii Kristus Wa kaa pe-gadimemaata totaakea. Mee ko ikii Ogatamee kaa daamaa agiyoo yaukuwawoo, daamaa poo yaekayaabuu siwoosea naadi ikii Waa boota kaama aya andoo peeta Mée Wa kaa pe-gadimemaata toogeekea. ⁵Mikee, idukaa inii mée me iyee-payee kuwa kaa umiwoo, toowoo seta kaboo inii kuwa deewoo see menaa yuwa doowoo seta kuwa me inii me maa da yiba pedeo ou dimi-pami kuwa ebo kega, ebo kega siwoo seta. Kisee pedeo poo ekadaa siwoo naadi kaama inii usiyaato ko boota kaama wa too mée wigintaayaa. ⁶Kiya eto ko inii Kristus ma aagadi-maagadi naadi kaama epo enaataa boota mokoo topea. Kisee kemaata kuwa Musa me menaa deewoo taai see menaa kuwa inii ekeasiyaa, inii kaa kaama patagataata toogeekea. Eto ko inii Roh me etokaa gipii mée kiyaata dimii mee kaa daamaa agiyoo yaukuwawoo, umiwoo siyaa. Inii kuwa idukaa deewoosi naadi ebeamaata menaa yuwa doowoo, umiwoo siyaa se.

Musa me menaa kuwa ipi keta kaama pedeo dimii, pedeo menaa kuwa miya awee da kaa nekeeniyaa see kaa menaa

⁷Kisee kemaata inii mapea menaa wegayaa? "Musa me menaa kuwa pedeo menaa yoka" see menaa kuwa wegayaa ye? Kisee menaa kuwa peenaa ma taa, iyo. Musa me menaa kuwa daamaa menaa kiya kuwa menaa yuwa doodoo "Kisee pedeo ii" see kuwa anii awee da kaa nekeeniyaa. Kuwa menaa taa naaki anii kisee awee da kaa se nekeeniyaa. Mee ko kuwa menaa yiba mena ena ko kisee: "Mée me agiyoo kuwa anii naaki ou see dimii mee se gaai" see menaa mee agoo.7:7 Kel 20:17, Rom 3:20 Mee mena kamuu da mee taa naaki mée me agiyoo anii naaki ou see dimii mee ko pedeo yoka, see kuwa anii se nekeeniyaa. ⁸Anii mee mena kamuu da mee ipi keta kemaata mée me agiyoo anii naaki ou see dimii mee eebaa agoo kedaa seta. "Kisee pedeo yoka se ukuwaai" see aseta menaa kuwa taa naaki anii pedeo kotoo ukuwaanaka dimii mee se agoo kedaa siyaa, kuwa ou dimii yuwa se anoogeeyaa, kuwa dimii kuwa boota mokoo kiyaa. ⁹Anii Musa me menaa ewo see kaboo ni me dimi mena daamaa toogee seta kiya kuwa menaa ipi keta kaama wodoo ni me pedeo ukuwaanaka see dimii mee anoogeedaa naadi ¹⁰anii mée bogaano yaato peanta. Musa me menaa kuwa ko anii deewoo naadi kaama daamaa natuyaabuu siwoo taapa menaa yoka see gaata kiya taa, anii kuwa menaa doodoo bogaano yaato badaa namaata menaa yuwa. ¹¹Mikee, mee "Kisee pedeo yoka se ukuwaai" see menaa mee anii ipi keta kaama wodoo Ni me pedeo ukuwaanaka dimii mee anoogeeta kaama kisee anii nadeebaa seta. Kuwa se ukuwaai see aseta menaa doodoo ni me pedeo ou dimii mee me anii mée bogaano yaato peanta.7:11 Kej 3:13¹²Kisee kemaata Musa me menaa kuwa pedeo se, daamaa wa too wigintaata menaa, bedaa kuwa mée aseta menaa yiba mena gakata uduma miya daamaa wa too wigintaata menaa, uduma topoo, uduma daamaa menaa too.

Mée yiba dimi wiya kuwa kaa aawisii segee siyaa kaa menaa

¹³Musa me menaa kuwa daamaa see menaa kiya anii mée bogaano yaato badaa namaasi naadi menaa yuwa too, see menaa kuwa wegayaa ye? Kisee menaa kuwa peenaa ma taa, iyo. Anii mée bogaano yaato badaa namaata kuwa ko Musa me menaa kuwa me kaama se. Kuwa daamaa mée manta menaa kiya kuwa menaa kuwa doodoo mée me pedeo iyee-payee kuwa awee da kaa deeyaano see naadi mée manta. Kuwa pedeo iyee-payee kuwa kaa ukuwagee seta agiyoo kuwa me anii mée bogaano yaato badaa namaata. Mee ko Musa me menaa yiba "Kisee pedeo yoka se ukuwaai" see menaa yuwa anii ipi keta kaama ni me pedeo iyee-payee kuwa miya esee pedeo nao see nekeeniyaa. Kisee awee da kaa nekeensi naadi kuwa Musa me menaa mée manta.7:13 Gal 3:21-22¹⁴Mikee, Musa me menaa kuwa ko Roh kaa kaama menaa, see kuwa inii ipi. Kiya anii dabaa see mée ena. Mée me agiyoo yaokageesi naadi peneata bagee see see mokoo anii miya pedeo agiyoo ukuwageesi naadi napenee segee see mée. ¹⁵Mee ko anii daamaa agiyoo too ukuwaano ede kiya anii kisee daamaa agiyoo se ukuwataa, anii ukuwaano be see agiyoo kuwa ukuwagee see mée kemaata ni me ukuwayaa, peeyaa yuwa kuwa yaai, anii se nekeenega. ¹⁶Ani me kisee pedeo yoka ukuwaano be see agiyoo kuwa anii ukuwayu ko Musa me menaa yiba "Kisee pedeo yoka se ukuwaai" see menaa da mee mikee daamaa menaa yoka, see dimii mee anii gaayaa. ¹⁷Kisee kemaata eto ko ni me ukuwaano be see agiyoo ukuwageeka kuwa ani me se kiya ani yiba pedeo dimii, pedeo menaa kuwa me ukuwageeka. ¹⁸Mikee, mée me iyee-payee kuwa ani yiba topa, anii dimi yiba daamaa too see kuwa taa, see kuwa anii ipi. Anii daamaa agiyoo ukuwaano ede kiya se ukuwayaa. ¹⁹Anii daamaa ukuwaano ede see agiyoo yuwa se ukuwataa, anii kuwa esee pedeo naadi ukuwaano be see agiyoo kuwa ukuwageeka. ²⁰Anii ukuwaano be see agiyoo ukuwayu ko ani me se kiya ani yiba pedeo dimii, pedeo menaa kuwa me ukuwayaa.

²¹Kuwa me kemaata ani yiba gaayaa, peeyaa yuwa kuwa ko kisee: Anii daamaa agiyoo ukuwaano ede see gaayaa kaboo da pedeo agiyoo ukuwaanaka dimii mee miya epo enaataa topa, kisee ukuwaandaa segeeka ii, see kuwa anii deegeeka. ²²Mikee, anii dimi yiba Ogatamee Wa me "Kisee ukuwaai, kisee se ukuwaai" see mée aseta menaa kuwa anii ede nao see gaayaa ²³kiya ni me maa to kaa takumeta agiyoo yuwa yiba apanaa iyee agoo. Mee iyee da mee ni me dimi menaa da ma aawisii segeeka, see kuwa anii deegeeka. Kisee aawisii segee naadi kaama ni me maa to kaa takumeta agiyoo yiba pedeo iyee da mee me anii napeneata pedeo dimii gaawoo, pedeo agiyoo ukuwawoo, kisee umiwoo, toowoo siyaa. ²⁴Yaai, anii pedeo keta see mée. Kuwa anii napeneata kaama maa da yiba toogee see iyee kuwa me anii mée bogaano yaato badaa namaayaa yoka anii daba nadaagimaa peeyaano mée mee maamee naa ya? ²⁵Kiiboo, paamee Ogatamee! Wa me inii epoo Mée Tuhan Yesus Kristus Waa doodoo daba nadaagimaa peeyaano Mée.

Kisee kemaata eto ko anii dimi menaa da me Ogatamee me "Kisee ukuwaai, kisee se ukuwaai" see mée aseta menaa kuwa yayeewoo taano dimii mee anii ede. Kiya ni me maa da kaa iyee da mee me anii pedeo dimii gaataa, pedeo agiyoo ukuwataa, kisee dimii wiya kuwa kaa omegee, toogee siyaa.

Roh mee ma epo enaataa umiwoo, toowoosi naadi menaa

¹Ogatamee me kisee daamaa mée yakiyaata kemaata eto ko okoo Kristus Yesus ma dimi aagadi-maagadi naadi umiwoo see bagee kuwa Ogatamee me okoo kaa pedeo kisi naadi menaa kuwa peenaa ma taa, okoo se wigintaayaa, okoo kisee bagee yuwa kiyaata.8:1-2 Yoh 8:36, Gal 5:1²Mikee, kuwa ikii pedeo dimii gaawoo, pedeo agiyoo ukuwawoo naadi kaama mée bogaano yaato badaa kimaasi naadi pesee da kuwa me ikii kipenee siwoo seta. Kisee kiya Roh me ikii daamaa kituyaabuu siwoosi naadi pesee kuwa me ikii Kristus Yesus ma dimi aagadi-maagadi naadi kaama daba kidaagimaa peeyaata yoka eto ikii pedeo kikiyaasi naadi menaa ena ma taa. ³Mee ko mée me iyee kaa ou gaata-gaata kuwa me mée penee siwoo naadi kaama dabaa see bagee mée kiyaata. Kisee kemaata Musa me menaa deewoo see kaa daba mée se daagimaa peeyaayaa, iyo. Kisee mée me se ukuwamaayaa agiyoo kiya Ogatamee me mée yaukuwata, mee ko Wa me Yogaa mee isiyaata kaama mée tomaa ena keta. Waa má yaato ko inii pedeo see bagee inii me maa to see see agoo keta. Inii me pedeo yuwa kuwa kaa inii boota kaama mée wigintaayaa kiya Waa mée yaboota kemaata inii Ogatamee ma menaa yuwa taa keta, kisee Wa me maa to kaa mée yataa kiyaata.8:3-4 2Kor 5:21, Gal 4:4-5⁴Mee ko idukaa Musa me menaa yiba ikii daamaa, topoo see dimii kaa umiwoo, toowoo taai see aseta see see inii miya Ogatamee me inii topoo, inii sikii mée kiyaano see naadi Yesus mée yaboota. Eto ko inii mée me iyee kaa umiwoo, toowoo siyaa se kiya Roh me iyee kaa umiwoo, toowoo siyaa.

⁵Mikee, mée me iyee kaa umiwoo, toowoo siyaa bagee kuwa okoo me ou gaayaa agiyoo kuwa kaa too dimi maawoo siyaa. Kiya Roh me iyee kaa umiwoo, toowoo siyaa bagee kuwa Roh me ou gaayaa agiyoo kuwa kaa dimi maawoo siyaa.8:5-8 1Kor 2:14, Gal 5:16-17, Yak 4:4⁶Mée me iyee kaa ou gaawoo, umiwoo naadi kaama usiyaato ko boota kaama wigintaayaa. Kiya Roh me iyee kaa ou gaawoo, umiwoo naadi kaama usiyaato ko mée daamaa toowoo siyaa, Ogatamee ma emee-emee see kaa umiwoo, toowoo siyaa. ⁷Mee ko mée me iyee kaa ou gaawoo, umiwoo siyaa bagee kuwa Ogatamee ma yape kiyaa bagee. Okoo Wa me "Kisee ukuwaai, kisee se ukuwaai" see menaa kuwa si yayeetaa. Mikee, okoo yayiino ko iyo. ⁸Mée me iyee kaa ou gaawoo, umiwoo siyaa bagee kuwa Ogatamee Waa dimi wikimiyaano iyo.

⁹Kiya ikii gaayu ko ikii mée me iyee kaa ou gaawoo, umiwoo siyaa bagee se. Ogatamee me Roh mee ikii yiba esee mikee kiitoogee siyu ko ikii Roh me iyee kaa umiwoo, toowoo see bagee. Kristus me Roh mee taa see bagee kuwa Wa me bagee se. ¹⁰Kristus mee ikii yiba tupi gaayu ko pedeo ukuwayaa agiyoo kuwa kaa má yaato bogaapea kiya Ogatamee me ikii sikii kikiyaata kemaata Roh me ikii aya kituyaabuu siwoo taapi. ¹¹Yesus boota kaama aya andoo peeyaata Mée Wa me Roh mee ikii yiba kiitoogee siyu ko Kristus aya andoo peeyaata Mée Wa me ikii me maa da mee miya aya kituyaabuu siwoo taatagi. Maa da mee ko booyaa agiyoo too kiya Ogatamee Wa me Roh mee ikii yiba kiitoogee naadi kaama kisee aya kituyaabuu siwoo taatagi.

¹²Neebee nokaa yuwa, Wa me kisee daamaa mée yaukuwaatagi kemaata inii ukuwaano gaano pedeo agiyoo agoo. Kiya kuwa agiyoo kuwa mée me iyee kaa ukuwaakee agiyoo kuwa se, inii me ou gaata-gaata doodoo umiwoosi naadi agiyoo kuwa se.8:12-13 Kol 3:5, Gal 5:24, 6:8¹³Ikii mée me iyee kaa umiwoo, toowoo siyu ko ikii boota kaama kiwigintagaatagi. Kiya kuwa ikii má yaato pedeo ukuwaano see agiyoo kuwa ikii me Roh pesee kaa booyaabuu segee siyu ko ikii daamaa toowoo taatagea. ¹⁴Ogatamee me Roh mee Wa keta eepeetaa see bagee kuwa okoo uduma Ogatamee me yogaa yuwa. ¹⁵Mee ko idukaa ikii me Ogatamee me napedeo kiyaapi, kisee weda see dimii mee ma aagadi taata umiwoo, toowoo seta bagee yuwa. Kiya eto ko ikii Roh mee maseta bagee yuwa kegea. Eto ko ikii mee idukaa weda see dimii mee kaa umiwoo, toowoo see bagee yuwa se kiya Roh me ikii Ogatamee me yogaa kikiyaata kemaata ikii me Roh pesee kaa "Abba, Neataagi wae" see asiyaa bagee yuwa. 8:14-17 Gal 4:6-7, Ep 1:5¹⁶Roh mee inii ma dimi aagadi-maagadi naadi kaama Wa me inii dimi yiba "Aa mikee Ogatamee me yogaa yoka" see mée asegee see. ¹⁷Inii Ogatamee me yogaa yuwa kemaata Wa me yogaa yuwa daamaa maniyaa agiyoo kuwa aii masiitagea. Kristus Waa miya kuwa agiyoo maseta see see inii miya Waa ma aagadi-maagadi naadi inii me see yuwa masiitagea. Mee too se kiya Kristus Wa me ae-wae see agiyoo doogee seta see see inii miya Waa ma aagadi-maagadi naadi kisee agiyoo doogee siyu ko inii me see yuwa daamaa masiitagea. Waa kisee ae-wae segee seta kemaata Ogatamee me Waa ebo, Waa asii-sege siyaata see see inii miya kisee kaatagea.

Eto kiipaa inii ae-wae, dimi gaagaa segee siyaa kiya usiyaato ko daamaa kaatagea see kuwa nekeensi naadi menaa

¹⁸Mikee, iminookaa yaato inii asii-sege see mée siyaabuu taatagi kuwa esee daamaa, esee ebo, inii kisee diitagea yoka inii eto kiipaa ae-wae, dimi gaagaa segee siyaa yuwa kuwa esee peedi, see kuwa anii gaaga.8:18 2Kor 4:17-18, 1Pet 1:6-7¹⁹Mee ko Ogatamee Wa me yogaa yuwa ii see kuwa awee da kaa mée deeyaabuu taatagi. Inii kisee mée deeyaabuu taatagi naagoo mani kega naaki ou naadi maamaa diitoo siwookea. Inii mée tomaa yuwa me too se kiya Wa me ogaataata agiyoo-pagiyoo kuwa uduma me miya mee naagoo maamaa diitoo siwookea. ²⁰Mikee, idukaa Wa me ogaataata agiyoo-pagiyoo kuwa uduma kaa pedeo ayaa yadootaata kemaata kuwa agiyoo-pagiyoo me umiino, toono yuwa uduma otoopa pedeo kedaa seta. Kuwa agiyoo-pagiyoo me inii kisee mée yakiyaano daamaa, ede see gaata se kiya Ogatamee me Anii iminookaa kuwa agiyoo-pagiyoo uduma bedaa daamaa yakiyaabuu taata yoka naadi kaama idukaa kuwa uduma umiino, toono pedeo yakiyaata.8:20-22 Kej 3:17-19²¹Mee ko kuwa agiyoo-pagiyoo uduma pedeo kiwoo, umiwoosi naadi pesee da kuwa iminookaa Ogatamee me yataa kiyaata kaama kuwa agiyoo-pagiyoo uduma daba peeyaabuu taatagi. Daba peeyaata kaama Wa me yogaa yuwa okoo ebo, okoo asii-sege siyaabuu taatagi see see mokoo Wa me kuwa agiyoo-pagiyoo yuwa miya kisee daamaa yakiyaabuu taatagi. ²²Mikee, kuwa ogaataata agiyoo-pagiyoo kuwa uduma idukaa kaama eto too kisee epo enaataa aa-waa, gaagaa siwoo segeekea, yoga kabaano see kaboo apii to me boodi ebo abaayaa mokoo, see kuwa inii ipi. ²³Kuwa agiyoo-pagiyoo kuwa too se kiya inii Roh maseta bagee yuwa miya kisee dimi yiba aa-waa siwoo segeekea. Mee ko Ogatamee me Roh mee inii daamaa mée aii manta kiya Wa me mée maniyaa agiyoo apanaa yuwa kuwa miya mée maniitagi. Kisee kemaata inii Wa me yogaa yuwa ii see kuwa awee da kaa mani mée deeyaagi naaki ou see dimii mee gaawookea. Bedaa kuwa má yaato pedeo ukuwasi naadi mée penee siwoo siyaa yuwa kuwa mani mée yapatagaaniyaata kaama toowookea naaki ou see dimii mee miya gaawookea. Kisee mée yakiyaano taa kemaata inii kisee too aa-waa siwoo segeekea. ²⁴Mee ko petamanii Ogatamee me inii daba mée daagimaayaata kaama wodoo kisee Wa me inii daamaa too mani mée yakiyaagi naaki ou see dimii mee gaawoo, Wa kaa dimi kotopiwoo siyaa. Wa me inii kisee mée yakiyaano taa, inii diino taa kemaata inii kisee ou dimii mee gaawoo siyaa. Kisee inii Wa me mée yakiyaata topea naaki Wa me inii kisee mée yakiyaagi naaki ou see dimii mee se gaayaa, se maa? ²⁵Kiya kuwa inii diino taa agiyoo kuwa inii ou gaawoo, Wa kaa dimi kotopiwoo siyu ko inii kisee Wa me mani mée yakiyaagi naaki ou see dimii kaa koogo diitoo, umiwoo siyaa.8:23-25 2Kor 4:18, 5:1-7

²⁶Inii kisee diitoo, umiwoo naadi kaama Roh mee inii kaa mée tabogetaa siyaa. Mee ko inii dabaa see bagee yuwa kemaata inii me sembahyang menaa kuwa mapea menaa daamaa, see kuwa inii ewo. Inii ewo kiya Roh me inii me sembahyang menaa yuwa mée yamasegeeta kaama Ogatamee paagoo mée yaasegeeki. Roh Waa aa-waa see kaa menaa keenda, kisee mée me ewo, se wegayaa see menaa kaa mée yaasegee see. ²⁷Inii me dimii yiba ipiipi mée deetaa see Mée mee Waa Roh me dimii mee miya ipi. Roh me Ogatamee me bagee yuwa me idimegee siyaa menaa yuwa yeeta kaama Ogatamee me daamaa, Anii yaukuwaapa see gaata-gaata doodoo too Roh me Wa paagoo okoo kaa yaidimegee siyaa. ²⁸Ogatamee epa gaayaa bagee yuwa okoo kaa yaukuwaandaa siyaa agiyoo kuwa uduma usiyaato ko daamaa too. Wa me kuwa agiyoo yuwa uduma enaataa okoo kaa daamaa-daamaa yakiyaabuu siwooki. Mikee, okoo Wa me gaata-gaata doodoo daamaa wigintaata kaama Ni paagoo nameei see aseta bagee kuwa Wa me okoo kaa kisee daamaa yaukuwaaniyaabuu siwooki, see kuwa inii ipi. ²⁹Mee ko idukaa esee petamanii kaama Ogatamee me kuwa Ni me bagee kisi naadi daamaa wigintaata bagee kuwa okoo Niyoopaa me iyee da mee see see bagee yuwa kiyaabuu taata, see menaa wegataata. Wayoopaa mee ko yagamee yagaaboo to mokoo, bedaa menaanii yuwa kuwa eebaa kisi naadi okoo daamaa wigintaata.8:29 2Kor 3:18, Ep 1:3-5³⁰Bedaa kuwa idukaa kaama Wayoopaa me iyee da mee see see kiyaabuu taano see naadi daamaa wigintaata bagee kuwa Wa me okoo Ni paagoo nameei see aseta. Kiyoo kaama kuwa Ni paagoo nameei see aseta bagee kuwa Wa me okoo sikii kiyaabuu seta. Bedaa kuwa Wa me sikii kiyaabuu seta bagee kuwa Wa me okoo ebo, okoo asii-sege siyaabuu taata see gaata. Wa me okoo kisee bagee daamaa kiyaabuu seta.

Ogatamee Wa me bagee yuwa Wa me epa dimii mee se patagataayaa naadi menaa

³¹Wa me inii kisee bagee daamaa mée kiyaabuu seta kemaata inii mapea menaa wegayaa? Inii me wegatagaano see menaa mee ko kisee: Ogatamee Waa inii yaato gaayu ko maamee inii ma aawisii semaayaa ya? ³²Ogatamee Wa me Yogaa kiya yaku gaano taa, inii mée uduma kaa mée yaekegataata. Wa me Yogaa mee inii aii mée manta kemaata bedaa se-agiyoo, we-agiyoo kuwa uduma miya inii aii mée se maniyaa ye?8:32 2Kor 6:10, 8:9

³³Ogatamee me daamaa wigintaata bagee kuwa okoo kaa pedeo menaa Wa paagoo yawegaano bagee ena agoo ye? Ogatamee me inii sikii mée kiyaata kemaata kisee menaa kuwa iyo.8:33-34 1Tim 2:5, 1Yoh 2:1-2³⁴Inii pedeo kisi naadi menaa mée yawegaano bagee ena agoo ye? Kristus Yesus Waa mée yaboota. Mée yaboota kuwa too se kiya bedaa aya andoo peeta kaama Ogatamee me dagi yagaa yaato totaaki. Waa kiyoo kaama kuwa inii pedeo kisi naadi menaa yuwa mée yataa kiyaabuu taaki.

³⁵Kristus me mée epa dimii mee inii mée yapatagataayaa bagee ena agoo ye? Dimi gaagaa siyaa agiyoo kuwa me Wa me mée epa dimi mee inii mée yawasetaayaa ye? Ae-wae siyaa agiyoo kuwa me ye? Mée wegee-wegee siyaa kuwa me ye? Naano agiyoo taa kaa kuwa me ye? Doka taa kaa kuwa me ye? Mée pedeo kiyaayaa agiyoo kuwa me ye? Mée wugiyaa kuwa me ye? ³⁶Mee see see ebeamaata menaa ena mee ko kisee:

"Inii A me bagee kemaata pedeo komaa kaama kisee too daatooyiba yaato uduma mée me mée wogeeiikea,

domba wodaa wogeei-wagaai siyaa mokoo mée me inii kisee mée koo taakea" Mzm 44:23

see menaa ebeamaata.

³⁷Kisee kiya inii me umiino, toono yiba kuwa yaai-yaai agiyoo agoo kiyaa miya inii mée epa see Mée Waa doodoo inii taa ma taa kuwa agiyoo uduma daba, peedi ekeata pesee ma umiwoo, toowoo siyaa.8:35-37 Yoh 10:27-29, Why 12:10-11³⁸Anii mena ena mee esee mikee menaa ii see gaawoo see dimii mee ko kisee: Ogatamee me mée epa dimii mee inii mée yawasetagaano iyo. Inii booyaa miya, inii se booyaa miya mée si yawasetaayaa. Malaikat bagee yuwa ma, paa yuwa ma, etokaa kotoo yuwa ma, epeekaa kotoo yuwa ma kuwa me miya Wa me mée epa dimii mee inii mée si yawasetaayaa. Bedaa se-pesee, we-pesee uduma, ³⁹asiyaato pesee see agiyoo yuwa me miya, yamuyaato pesee see agiyoo yuwa me miya, Wa me ogaataata agiyoo-pagiyoo apanaa yuwa uduma me miya mée si yawasetaayaa. Inii epoo Mée Tuhan Kristus Yesus ma dimi aagadi-maagadi naadi kaama Ogatamee me epa dimii mee inii mée yapatagatagaano iyo.

Israel bagee yupii Ogatamee me daamaa wigintaata bagee yuwa kaa menaa

¹Anii ko Kristus Wa yaato bagee kemaata mikee menaa ena kiiwegaanaka. Mee menaa mee ko Roh Kudus me mee mikee menaa yoka see kuwa anii dimi yiba nasigi kemaata makapaa menaa se. ²Mee ko kisee: Anii dimi mena boodi ebo, gaagaa dimii mee kisee too se sikiinega. ³Mikee, anii ma tomaa kaa bagee kuwa okoo nii ma gadimani bagee yuwa kiya Israel bagee mée eebaa Kristus yaato taa. Anii Ogatamee me okoo Kristus yaato namiyaagi naaki ou see dimii mee esee ebo. Wa me ni kaa too pedeo ayaa nadooyaayaa, kisee anii Kristus ma napatagataayaa kuwa koosi, kuwa anii ma tomaa kaa bagee kuwa Kristus yaato namiyaai, kisee okoo ma, anii ma aapeka natagaai, kisee ukuwaano daamaa see gaaga. ⁴Okoo miya Israel bagee, Ogatamee me idukaa kaama okoo daamaa wigintaata kaama Wa me yogaa kiyaata bagee yuwa. Idukaa kaama okoo paagoo Wa me asii-sege siyaa agiyoo yuwa deeyaabuu siwoo seta. Bedaa okoo paagoo Wa me asiino, "Anii miya kisee daamaa kiukuwawoo taapa, ikii me miya kisee daamaa naukuwawoo taai" see menaa miya aseta, okoo paagoo deewoo siyaa menaa miya Musa doodoo manta, okoo paagoo Ogatamee Waa kisee ebo ekee, kisee yaapaagee siwoo taai see menaa kuwa miya manta. Bedaa Wa me "Anii kisee daamaa kiukuwaata, kisee daamaa kiukuwaaniyaabuu taata" see menaa kuwa miya Israel bagee paagoo aseta. ⁵Okoo ko Abraham ma, Isak ma, Yakub ma okoo me asii-kaba-kaba seta bagee yuwa, bedaa okoo kaama asii-kaba-kaba siwoo naadi kaama Ebo Kristus mee kabata. Waa ko se-agiyoo, we-agiyoo uduma Ebo Wodoo Eboo see Mée Ogatamee mee. Kiiboo, paamee, magiyaage kisee too iminoo miya, iminoo miya yaapaagee taano too. Amin!

⁶Israel bagee okoo mée eebaa Kristus yaato taa see bagee kiya Ogatamee me petamanii okoo paagoo "Anii kisee daamaa kiukuwaaniyaabuu taata" see aseta menaa kuwa mikee uwa daaga, kuwa menaa wuutu-waatu seta see taa. Mee ko Israel bagee uduma mikee ki Israel bagee yuwa se, okoo mée gakata Wa me daamaa wigintaata bagee yuwa se, ⁷bedaa Abraham me asii-kaba-kaba seta bagee okoo uduma Ogatamee me yogaa yuwa se. Idukaa Ogatamee me Abraham paagoo aseta menaa ena mee ko kisee: "Kuwa mikee a me asii-kaba-kaba seta bagee yuwa see ekaa weewoo taatagea kuwa ko Isak mee doodoo too kaata, apanaa yogaa doodoo se" see aseta.9:7 Kej 21:12⁸Wa me aseta menaa mee kaa kaama inii nekeeniino ko kisee: Abraham wa me maa to kaa kaama asii-kaba-kaba seta bagee yuwa kuwa uduma Ogatamee me yogaa yuwa ii see deeyaa see se kiya Ogatamee me Isak mee doodoo too yoka see aseta-aseta kabawoo seta bagee kuwa too mikee ki Abraham me asii-kaba-kaba seta bagee kiyaa, see kuwa inii nekeeniyaa. ⁹Mikee, Ogatamee me aseta menaa mee ko kisee: "Ni me wegata monaa da kaa Anii meeta naagoo Sara mee paayogaa yogaa ena agoo kaata" see aseta.9:9 Kej 18:10

¹⁰Mee too se kiya idukaa inii me bagee Isak mee wa me yogaa yuwa miya kisee. Ribka me kadapoo mee Isak wa me kadapoo too. ¹¹Kadapoo yiba wiya yogaa. Kabaano taa kaboo kuwa yogaa yuwa daamaa agiyoo miya, pedeo agiyoo miya peenaa ma ukuwaano taa kaa Ogatamee me yoga ena too too daamaa wigintaata. Ogatamee me wiginiyaa-wiginiyaa mee ko mée me daamaa ukuwata agiyoo kuwa kaa se kiya Wa me gaata-gaata kuwa ukuwaaniyaano see naadi kaama too mée wiginiyaa, kisee Ni paagoo nameei see mée asiyaa. ¹²Kisee yoga ena daamaa wigintaata kaama Wa me mee apii to asiino, "Yagamee yagaaboo to mee peedi kaatagi, menaamee me agiyoo yaokagee see mée kaatagi" see aseta.9:12 Kej 25:23¹³Kuwa yogaa wiya kuwa kaa menaa ena ko kisee: "Anii Yakub waa epa, Esau mee be" see ebeamaata.9:13 Esau mee ko yagamee, Yakub mee menaamee. Yagamee mee peenaa ebo ekeasiyaa kiya Ogatamee Wa me gaata-gaata doodoo menaamee daamaa wigintaata kaama ebo kiyaata.9:13 Mal 1:2-3

¹⁴Wa me kisee wigintaata kemaata inii mapea menaa wegayaa? "Ogatamee Wa me mée wigineano kuwa koopoo" see menaa kuwa wegayaa ye? Kisee menaa kuwa peenaa ma taa, iyo. ¹⁵Idukaa Wa me Musa aseta menaa ena mee ko kisee:

"Ni me aii epa kaano ede see bagee kuwa Anii aii epa kaapa,

bedaa Ni me aii epa ekeasiino ede see bagee kuwa Anii aii epa ekeasiipa" see menaa aseta. Kel 33:19

¹⁶Wa me kisee aseta kemaata Wa me mée wiginiyaa-wiginiyaa kuwa ko mée me ede gaata-gaata doodoo se, bedaa mée me omaago ma ukuwata-ukuwata doodoo miya se kiya Ogatamee Wa me aii epa gaata-gaata doodoo too mée wiginiyaa. ¹⁷Mee see see menaa ena mee idukaa Ogatamee me Piraun paagoo aseta. Ebeamaata menaa ena mee ko kisee: "Anii aa ebo katuyaaga mee ko Ni me pesee agiyoo yuwa awee da kaa mée uduma deeyaabuu taano see naadi ebo katuyaaga. Ni me pesee agiyoo kuwa kaa Ni ekaa da uwoo to, magaa to uduma ogo pege-pege siyaabuu taano see naadi Anii ebo katuyaaga" see ebeamaata.9:17 Piraun mee idukaa Mesir magaa kaa eboo. Ogatamee me waa ebo tuyaata mee ko wa me Ogatamee wisintagaa segee seta kemaata Ogatamee me pedeo agiyoo Mesir magaa kaa yamiyaabuu taano see naadi Piraun me dimi menaa da eboo yakiyaata. Kisee kemaata Piraun me miya Ogatamee wisintagaa siwoo seta, bedaa Ogatamee me miya pedeo agiyoo yamiyaabuu segee seta. Kisee ukuwagee naadi kaama mée tomaa uduma Ogatamee mee esee omaago see Mée ii see gaata. Mée me kisee gaasi naadi Piraun mee ebo tuyaata kaama dimi menaa da eboo yakiyaata.9:17 Kel 9:16¹⁸Kisee kemaata Ogatamee me gaata-gaata kuwa doodoo too Wa me mée ekee siyaa. Mee ko Wa me aii epa kaano ede see bagee kuwa Wa me okoo aii epa gaayaa, bedaa Wa me dimi mena eboo yakiyaano ede see bagee kuwa Wa me okoo dimi mena eboo yakiyaayaa, kisee Wa me mée yakiyaayaa.

¹⁹Ani me kisee wegayaa kiya mée waa ena me anii aii nasiyaa menaa mee ko kisee: "Ogatamee Wa me gaata-gaata doodoo too kisee mée yakiyaayu ko ’Wa me anii nakiyaata doodoo anii se umiwoo, toowoo taapa’ see gaayaa bagee naa agoo ye? Taa yoka inii pedeo ukuwamaata kaama Wa me yaai, kisee pedeo yoka, see mée gaayaa kuwa kaasee kaa ya?" see kuwa mée ena me aii nasiyaa. ²⁰Kiya ani me waa asiyaa menaa mee ko kisee: Aa miya magaa da kaa bagee ena yoka aa kaasee mée to? Aa kuwa menaa me Ogatamee wisineano uu ye? Ipiipii sipi agiyoo da me ipiipii sipi mée to paagoo "Aa kaasee kaa anii kisee ukuwasi naadi naipiipii sepe?" see menaa kuwa asiyaa ye?9:19-20 Mée me gaano, ’Ogatamee Wa me gaata-gaata doodoo mée waa ena, wa me dimi mena eboo yakiyaata kaama wodoo waa pedeo agiyoo ukuwayu ko Ogatamee Wa me mee mée to pedeo bagee yoka see diino ko pedeo, bedaa Wa me mee mée to pedeo kiyaano kuwa miya pedeo’ see kuwa mée me gaayaa kiya taa. Mee mokoo miya Ogatamee me Israel bagee noonaa okoo dimi mena eboo yakiyaata, Wa me Piraun yaukuwata see see mokoo kiya mée me Ogatamee wisineekee kaa kisee pedeo yoka, see wegayaa menaa kuwa iyo.9:20 Yes 29:16²¹Otaawee ipiipii taa see mée gaayu ko daki magaa dukuu to masegeeta kaama wa me gaata-gaata doodoo too ipiipii siyaa, se maa? Wa me ipiipii siyaa agiyoo kuwa ko noonaa ebo agiyoo kaa ukuwaano see naadi ipiipii siyaa, noonaa aii agiyoo kaa ukuwaano see naadi ipiipii siyaa, se maa?

²²Kisee miya Ogatamee me okoo pedeo kisi naadi ipiipii seta bagee kuwa gaayu ko Wa me kagoo ma, Wa me pesee ma kuwa okoo kaa awee da kaa mée deeyaabuu taano see dimii agoo kiya kiipaa se yoka naadi kaama Waa dimi mena koogo animaata toogee seta. ²³Mee ko Wa me aii epa kaa daamaa ipiipii seta bagee yuwa paagoo Waa esee ebo, Waa asii-sege nao see kuwa deeyaabuu taano see naadi Wa me kuwa apanaa ipiipii seta bagee yuwa moga pedeo kiyaano taa. Okoo Wa me asii-sege siyaa agiyoo yuwa masisi naadi idukaa petamanii kaama aii epa kaa ipiipii seta bagee yuwa kuwa gaayu ko ²⁴Wa me inii miya kisee bagee daamaa mée kiyaano see naadi Ni paagoo nameei see mée aseta. Inii mée noonaa Yahudi bagee kiya kuwa too se kiya noonaa mée tomaa-tomaa apanaa yuwa miya Ni paagoo nameei see aseta. ²⁵Mee mokoo mée tomaa-tomaa apanaa yuwa okoo kaa menaa ena idukaa Ogatamee me nabi Hosea aseta, mee ko kisee:

"Okoo Ni me bagee taa see bagee kuwa

epeekaa okoo Ni me bagee yuwa see ekaa weata,

bedaa okoo Ni me epa gaano taa see bagee kuwa

Ni me epa see bagee yuwa see ekaa weata. Hos 2:22

²⁶Bedaa idukaa okoo kiyoo-kiyoo tota bagee yuwa paagoo Ogatamee me ’Ikii ko Ni me bagee taa’ see aseta bagee kuwa

epeekaa kiyoo tuyaa bagee yuwa okoo Toono Too Mée Ogatamee me yogaa yuwa see ekaa weatagea" see menaa aseta. Hos 1:10

²⁷Bedaa idukaa nabi Yesaya wa me miya mena ebo kaa Israel bagee yuwa okoo kaa menaa ena wegata, mee ko kisee: "Israel bagee kuwa uduma egataayaa naaki maakaa pikuu da kaa ea ponee eebaa kuwa see see kiya okoo eebaa taa yaato daba daagimaa pootagea.9:27-28 Yes 10:22-23²⁸TUHAN Wa me kisee magaa da kaa bagee yuwa wigintagaapi kuwa Wa me ipiipi yaukuwatagaapi, kisee moga yaukuwatagaapi" see wegata. ²⁹Bedaa idukaa nabi Yesaya me wegawoo seta menaa ena miya kisee:

"Pesee Wodoo Pesee TUHAN mee Wa me inii me asii-kaba-kaba bagee yuwa mée tuyaano taa naaki

inii Sodom magaa mokoo see see kiyaa,

inii Gomora magaa see see kiyaa" see wegata.9:29 Nabi Yesaya me wegawoo seta menaa mee ko Ogatamee me Israel bagee okoo mée noonaa daamaa wigintaata daba daagimaa peeyaatagi see kuwa nekeensi naadi menaa mee.Yes 1:9

Israel bagee yuwa okoo eebaa yaato me Ogatamee wisintaata kemaata wigintaata menaa

³⁰Kisee Israel bagee yuwa kaa yaebeamaata menaa agoo yoka eto ko inii me wegayaa menaa mee ko kisee: Mée tomaa-tomaa apanaa yuwa kuwa gaayu ko okoo Ogatamee me sikii nakiyaagi naaki ou see dimii mee okoo gaano taa kiya eto ko okoo Yesus mikee nao see gaata kemaata Wa me okoo sikii kiyaata. ³¹Kiya Israel bagee kuwa gaayu ko kisee taa. Okoo idukaa kaama Ogatamee me okoo sikii, okoo miya nao see mée deegi naaki ou see dimii mee gaawoo seta kiya Musa me menaa maamaa deewoo naadi kaama Ogatamee me okoo sikii, okoo miya nao see gaano taa. ³²Kaasee kaa ya? Okoo Kristus mikee nao see dimii mee taa, okoo me ’Inii Musa me menaa deewoo siyu ko inii sikii kaapea’ see dimii mee too gaawoo seta. Kisee kemaata Wa me okoo sikii, okoo miya nao see gaano taa. Okoo Ogatamee me pee-yaekeata omaa to mee badoo da kaa kepoto naadi kaama okaata. ³³Kuwa Kristus kaa ebea-ebea menaa kuwa ko kisee:

"Yeeweei, Anii Sion magaa kaa kiyoo oma ena kiyoo pe-ekeasega.

Mée me badoo da kaa kepoto naadi okaamaayaayaa omaa to mee,

mée me Wa kaa toowage-taawage naadi okaapea.

Kiya Waa mikee gaayaa bagee kuwa ego weda taa kaapea" see menaa ebeamaata. Yes 28:16

¹Neebee nokaa yuwa, eto ko anii ma tomaa kaa bagee kuwa okoo daba daagimaa peegea naaki ou naadi kaama anii okoo kaa Ogatamee paagoo sembahyang yasegeeka. ²Okoo ko "Ogatamee me menaa niidoowoo, niiukuwawoo taai" see omaago ma wegawoo see bagee kiya okoo mikee menaa doodoo se ukuwawoo siyaa, see kuwa mikee kisega. ³Ogatamee me inii Kristus doodoo too mée sikii kiyaayaa menaa kuwa okoo ewo. Okoo me "Inii Musa me menaa deewoo naadi kaama mée sikii kiyaayaa" see menaa kuwa doowookea. Okoo Ogatamee me Kristus mee doodoo too mée sikii kiyaayaa see menaa kuwa yayiino taa. ⁴Mikee, Musa me menaa kuwa manii to ko Kristus kaa too, Wa kaa too uwa daata kemaata Waa mikee gaayaa bagee kuwa Ogatamee me sikii kiyaayaa.10:4 Mat 5:17, Kol 2:17

Yesus mikee gaayaa bagee kuwa uduma daba daagimaa peeyaa menaa

⁵Musa me menaa kuwa Kristus kaa uwa daata kemaata idukaa Ogatamee me "Kisee ukuwaai, kisee se ukuwaai" see aseta menaa doodoo mée sikii kiyaayaa see kaa menaa ena Musa me ebeamaata, mee ko kisee: "Kuwa menaa yuwa ukuwawoo siyaa bagee kuwa daamaa toogee taapea" see menaa ebeamaata.10:5 Im 18:5⁶Kiya Kristus mikee gaawoo naadi kaama mée sikii kiyaayaa menaa mee ko kisee: "’Asiyoo epoo to wodoo maamee pakagiipi naa ya?’ see dimii mee se gaai" see menaa ebeamaata.10:6-8 Ul 30:12-14 Mena nekeeniino yaato ko ’Ani me Kristus Waa asiyoo kaama magaa da kaa badaa pakaa-maagiinaka’ see dimii mee se gaai. ⁷"Bedaa ’Yamokiyoo boota bagee toogee yoo maamee esegiipi naa ya?’ see kuwa miya se wegaai" see menaa ebeamaata. Mena nekeeniino yaato ko Kristus Waa yamokiyoo kaama badaa maawaanaka see dimii mee miya se gaai.10:6-7 Mena nekeeniino yaato ko Kristus Waa magaa da kaa boogeeta metaki Ogatamee paagoo pakata yoka inii Waa mikee gaawoo naadi kaama mée sikii kiyaayaa menaa kuwa inii Yesus doodoo agoo, apanaa mée sikii kiyaayaa menaa kuwa kiyoo-kiyoo se abanaa taai naadi menaa mee.⁸Kisee se kiya mapea menaa ebeamaata naa ya? Mee ko kisee: "Okaa da ebo menaa kuwa ekaapa, beesekaa se, ikii me ebee to kaa miya topa, ikii me dimii yiba miya agoo" see kuwa idukaa ebeamaata. Eto ko kuwa okaa da ebo menaa kuwa inii yaweganaakea, Yesus mikee nao see gaai naadi menaa kuwa. ⁹Kisee ikii me ebee to kaa "Yesus mee ko Tuhan yoka" see wegataa, bedaa dimi yiba ’Yesus mee boota kaama Ogatamee me mikee aya andoo peeyaata ii’ see kuwa miya gaataa, kisee ukuwayu ko ikii daba daagimaa pootagea. ¹⁰Yesus me menaa kuwa dimi yiba awimaayu naadi kaama Ogatamee me mée sikii kiyaayaa, bedaa ebee to kaa Yesus mikee nao see wegamaayu naadi kaama mée daba daagimaa peeyaa. ¹¹Ogatamee me menaa yiba ebeamaata menaa ena mee ko kisee: "Waa mikee gaayaa bagee ego weda see dimii mee se gaatagea" see ebeamaata.10:11 Yes 28:16¹²Mikee, Yahudi bagee wa too, mée tomaa-tomaa apanaa yuwa wa too see kuwa se kiya okoo uduma endagii. Okoo uduma epoo Mée mee ena too too, mee ko Tuhan mee. Wa paagoo Tuhan nao see asiyaa bagee kuwa uduma Wa me okoo kaa daamaa agiyoo maamaa yaukuwaaniyaabuu siyaa. ¹³Mee ko "Tuhan nao naadi Wa ekaa da weeyaa bagee uduma daba daagimaa pootagea" see menaa ebeamaata kemaata mée uduma ena doodoo.10:13 Yl 2:32

¹⁴Kisee kiya okoo Waa mikee gaano taa see bagee kuwa gaayu ko okoo me kaasee Tuhan nao see asiyaa? Bedaa Wa me menaa yiino taa see bagee kuwa kaasee mikee nao see gaayaa? Bedaa Wa me menaa okoo paagoo eewegaano bagee taa gaayu ko okoo kaasee kuwa menaa yeeyaa? ¹⁵Bedaa kuwa menaa pe-eeweganaa taai see asiino taa gaayu ko kuwa menaa kaasee eeweganaa siyaa? Ogatamee me menaa ena mee ko kisee: "Daamaa menaa yadoonaa see bagee yuwa meemaagea kuwa daamaa, ede nao" see menaa ebeamaata.10:15 Yes 52:7¹⁶Kiya Yesus me doometa menaa kuwa mée uduma daamaa masemagaano taa. Mikee, kisee menaa da idukaa nabi Yesaya me wegata, mee ko kisee: "TUHAN, inii me kadoota menaa kuwa daamaa eewegamaage kiya maamee me mikee nao see gaayaa?" see wegata.10:16 Yes 53:1¹⁷Kisee kemaata Kristus me menaa kuwa yeekee kaa mikee nao see gaayaa. Bedaa Wa me menaa eewegaakee kaa yeeyaa.

¹⁸Kisee kiya ni me apaadee see menaa ena mee ko kisee: Kuwa Kristus kaa menaa kuwa Israel bagee yuwa yeemaagea ye, yiino taa ye? Okoo mikee yeemaagea. Kisee menaa ena idukaa ebeamaata, mee ko:

"Okoo me menaa kuwa uwoo to, magaa to peeyaabuu taa see,

okoo me menaa yuwa maga otoo to kaa too peemaaga" see menaa ebeamaata kemaata Mzm 19:5

¹⁹Israel bagee yuwa mikee yeemaagea. Kiya anii bedaa kaagaa ena ma apaadee see menaa agoo, mee ko kisee: Kuwa Kristus kaa menaa kuwa Israel bagee yuwa nekeeniino taa ye?10:19 Mena nekeeniino yaato ko mena kegaa ena ma agoo, mee ko "Ogatamee me kuwa Kristus kaa menaa kuwa mée tomaa-tomaa apanaa yuwa okoo paagoo miya peeyaabuu taata see kuwa Israel bagee yuwa nekeeniino taa ye?" see menaa mee. Okoo mikee kisee nekeenegea ii see menaa kuwa petamanii Musa me ebeamaata. Ogatamee me menaa ena mee Musa me Israel bagee paagoo yaaseta, mee ko kisee:

"Ani me mée tomaa-tomaa apanaa yuwa miya epa kaapa kuwa kaa ikii me Anii nabe kaapea,

Ani me dimi ewo see tomaa kaa bagee yuwa kaa daamaa agiyoo yaukuwaapa kuwa kaa ikii me Anii nakagoo kaapea" see yaaseta. Ul 32:21

²⁰Bedaa kisee miya nabi Yesaya me Ogatamee me wegata menaa weda taa ma yaaseta, mee ko kisee:

"Okoo TUHAN mee ou see dimii mee taa kaa Anii naabanaa taano taa see bagee yuwa kuwa Anii nadeemaagea,

okoo TUHAN mee ipi kega naaki ou see dimii mee taa see bagee yuwa paagoo Anii ekaato ipi kiyaaga" see wegata. Yes 65:1-2

²¹Kiya Israel bagee gaayu ko Ogatamee me okoo kaa yawegata menaa ena mee ko kisee: "Kuwa Ni me menaa se nayeetaa, Anii nawisintaa see bagee kuwa Anii kisee too egapi yaato miya, daatooyiba yaato miya uduma Ni paagoo nameei naadi Ni me yagaa wiya kegataata kisee too toomuu segeeka" see menaa yawegata.

Israel bagee okoo eebaa yaato kuwa Yesus me menaa si yayeeta kiya okoo noonaa Wa yaato daamaa wigintaata bagee kiyaata menaa

¹Israel bagee yuwa me Ogatamee mee kisee si yayeeta kemaata anii apaadee see menaa ena mee ko kisee: Ogatamee me kuwa Wa me bagee yuwa be kaa tameepeata ye? Kisee menaa kuwa peenaa ma taa, iyo. Anii miya Israel bagee, Abraham me asii-kaba-kaba seta bagee ena, toma ko Benyamin apaa kaa mée yoka ²Israel bagee kuwa, Ogatamee me petamanii kaama daamaa wiginta bagee kuwa be kaa umina wisintagaano taa. Idukaa nabi Elia wa me Israel bagee okoo kaa Ogatamee paagoo yawegata menaa mee ikii ewo ye? Mee ebeamaata menaa mee ko kisee: ³"TUHAN, wae. Okoo me A me nabi bagee kuwa kawogeepeasegea, ani too topa. Bedaa A paagoo agiyoo kupi-manee taa see yoo uduma miya kakabaapi-paapi semaagea. Eto ko okoo anii miya nawugiino see dimii mee agoo" see aseta. ⁴Kiya Ogatamee me Elia aseta menaa mee mapea menaa? Wa me asiino, "Okoo mée tujuh ribu Ni yaato daamaa wigintaata topea. Okoo Baal paagoo kagu sibumaano taa, waa ebo ekeasiino taa see bagee yuwa" see aseta.11:3-4 1Raj 19:10-18⁵Mee mokoo miya eto mee begaa kaa Israel bagee noonaa Wa yaato daamaa wigintaata bagee yuwa topea, Wa me okoo aii epa kaa daamaa wigintaata bagee yuwa. ⁶Wa me okoo Wa yaato daamaa wigintaata mee ko okoo me daamaa ukuwagee seta agiyoo kuwa kaa wigintaata se kiya Wa me okoo aii epa dimii kaa too Wa yaato daamaa wigintaata. Wa me mée me daamaa ukuwagee seta agiyoo kuwa kaa mée wigintaata naaki Wa me okoo aii epa kaa too wigintaata ii see menaa kuwa se wegamaayaa.11:5-6 Ep 2:4-9

⁷Wa me mée kisee aii epa kaa daamaa mée wigintaayaa kemaata Israel bagee kuwa kaasee? Israel bagee okoo Ogatamee me inii sikii mée kiyaagi naaki ou see dimii mee gaawoo seta kiya Wa me okoo kisee sikii kiyaano taa, Wa me daamaa wigintaata bagee yuwa okoo too kisee sikii kiyaata. Kuwa apanaa Israel bagee daamaa wigineano taa yuwa kuwa Wa me dimi mena eboo yakiyaata. ⁸Mee see see okoo kaa menaa ena yaebeamaata, mee ko kisee:

"Ogatamee me okoo toomoo dimii yakiyaata,

diino naka see emaa manta,

apa togo me yiino naka see miya yakiyaata,

idukaa kaama kisee too eto miya okoo ewo kedaa siwookea" see menaa ebeamaata.11:8 Ul 29:4, Yes 29:10

⁹Bedaa mee see see okoo kaa menaa ena Daud me miya yawegata, mee ko kisee:

"Kuwa bagee kuwa okoo me naano agiyoo eebaa noogee siyaa yoo kiyoo kupi kaa booyaa yoo mokoo yakiyaano daamaa,

okoo kisee boodaa taano daamaa.

Bedaa okoo okaata kaama okoo me pedeo ukuwagee seta doodoo okoo kaa kisee yaukuwayaabuu taano miya daamaa.

¹⁰Okoo emaa se deesi naadi emaa digiyoo yakiyaano miya daamaa,

bedaa okoo ae-wae siyaa agiyoo eebaa okoo kaa yadootagaa naadi kaama

okoo me doogaa da kudiinta kisee too toowoo taano miya daamaa" see yawegata. Mzm 69:23-24

¹¹Okoo kaa yawegata menaa kuwa kisee gaayu ko anii bedaa apaadee see menaa ena miya kisee: Israel bagee kuwa okoo eebaa yaato Yesus mikee gaano taa kemaata okoo kisee okaata kaama umina pedeo kedaa seta ye? Kisee menaa kuwa peenaa ma taa, iyo. Okoo me Yesus me doometa menaa si yayeeta kemaata kuwa menaa doodoota mée tomaa-tomaa apanaa yuwa paagoo eeweganaa seta, mée eebaa daba daagimaa peeyaabuu seta. Mee ko Israel bagee yuwa me kuwa deeta kaama inii miya kisee mée kiyaagi naaki ou see dimii mee misi naadi kuwa apanaa tomaa kaa bagee yuwa daba daagimaa peeyaabuu seta. ¹²Israel bagee yuwa me Yesus me menaa kisee si yayeeta kemaata Ogatamee me mée tomaa-tomaa okoo kaa esee daamaa agiyoo aii yaukuwaaniyaabuu taaki. Eto ko Israel bagee yuwa daba kedaa seta kemaata Ogatamee me mée tomaa-tomaa apanaa yuwa okoo kaa esee daamaa agiyoo yadootagaa segeeki. Wa me kisee mée tomaa-tomaa okoo kaa daamaa yaukuwawoo segeeki kiya epeekaa Israel bagee yuwa okoo miya Yesus mikee gaayaa bagee mée eebaa kedaa naadi kaama kuwa Wa me mée tomaa-tomaa apanaa yuwa kaa daamaa yaukuwaaniyaabuu siyaa agiyoo kuwa bedaa mee asii esee maamaa eebaa kedaa taata.

Mée tomaa-tomaa apanaa yuwa daba daagimaa peeta menaa

¹³Eto ko anii ikii Yahudi bagee paagoo se kiya apanaa tomaa kaa bagee yuwa paagoo mena ena kisiinaka, mee ko kisee: Anii Yesus me doometa menaa mee ikii paagoo kiiweganaasi naadi Wa me anii pooi see nasimi kuwa esee ebo agiyoo yoka anii ede ma yaukuwanaa segeeka. ¹⁴Apanaa tomaa kaa bagee Yesus mikee gaagea kemaata anii ma tomaa kaa bagee kuwa noonaa me kuwa deeta kaama okoo me anii miya kisee daba daagimaa peega naaki ou see dimii mee misi naadi anii kuwa menaa eeweganaaka. ¹⁵Mee ko Yahudi bagee me si yayeeta kemaata Ogatamee me okoo ekeata kaama mée tomaa-tomaa apanaa yuwa Waa ma daamaa emee-emee siyaata. Kuwa mikee daamaa agiyoo okoo kaa yaukuwata kiya epeekaa Ogatamee me Yahudi bagee yuwa okoo miya Wa yaato miyaatagi kuwa ko mee asii esee daamaa agiyoo yaukuwaatagi, boota bagee daamaa aya andoo peeyaa mokoo okoo miya daamaa kaatagea.

¹⁶Roti kaa ebea-ebea menaa mee ko kisee: Ogatamee paagoo maniyaa roti petamanii mee pataguu to mee ko Waa taano kisi naadi daamaa wa too wigintaata see roti mee. Kisee kemaata mee kaama wodoo Wa paagoo maniyaa roti apa yuwa kuwa uduma miya kisee daamaa wa too wigintaata roti kiyaa. Piya manii da ebea-ebea mee miya kisee. Piya mani yuwa daamaa wigintaata kaama Ogatamee Waa taano kiyu ko piya kago yuwa miya daamaa wigintaata kaama Waa taano kiyaa.11:16 Roti ebea-ebea ma, piya mani yuwa ebea-ebea ma kuwa mena nekeeniino yaato ko roti petamanii maniyaa yuwa ma, piya mani yuwa ma kuwa Abraham ma, Isak ma, Yakub ma kuwa ebea-ebea. Roti apanaa yuwa ma, piya kago yuwa ma kuwa Yahudi bagee yuwa ebea-ebea. Petamanii Abraham daamaa wa too wigintaata see see wa me asii-kaba-kaba seta bagee yuwa okoo miya wigintaata Ogatamee Wa yaato bagee yuwa kiyaata, okoo aii bagee se, see kuwa nekeensi naadi ebea-ebea menaa wiya kuwa.

¹⁷Mee mokoo miya ebea-ebea menaa ena miya kisee: Zaitun piyaa wodoo to weetaata kaama daamaa iyawoo naadi kago yuwa noonaa daageeta kaama kisee eke. Ekeata kaama peedoota aii weeno taa zaitun piya wodoo to kaa kago ena pe-daageeta kaama mee weta piya wodoo to kaa kago daageeta otoo to kaa kuwa kagoo yuwa yupii daamaa pe-taku. Mee daamaa weta piya wodoo to mani yuwa kuwa daamaa kemaata mee aatakutaata kagoo da mee daamaa iyataa. Mee mokoo miya ikii mée tomaa-tomaa apanaa yuwa kisee daamaa kitakumetaata topea. ¹⁸Kiya ikii apanaa tomaa kaa bagee kuwa ebo poga-poga se taai. Ikii me ’Anii ko daamaa natakumetaata kagoo da mokoo, okoo daageeta ekeata yuwa kuwa aii bagee yoka’ see mee se gaai. Ikii kisee ebo poga-poga bagee yuwa daamaa nekeenii: Piya kagoo yuwa kuwa me piya mani yuwa pesee kiyaakee se kiya piya mani kuwa me kago yuwa pesee keta kaama daamaa iyaakee.11:17-18 Mee zaitun see piyaa daamaa weta wodoo to mee ko Israel bagee ebea-ebea. Kagoo yuwa noonaa daageeta kuwa ko Israel bagee Yesus mee mikee gaano taa yuwa ebea-ebea, bedaa mee pe-takumetaata kagoo da mee ko mée tomaa-tomaa apanaa yuwa Yesus mikee gaata yuwa ebea-ebea. "Piya mani kuwa me kago yuwa pesee keta kaama daamaa iyaakee" see mee mena nekeeniino yaato ko petamanii Ogatamee me Abraham paagoo "Aa doodoo mée tomaa-tomaa yuwa uduma okoo kaa miya daamaa agiyoo yadootagaata" see aseta kemaata waa manii to mokoo, bedaa mée tomaa-tomaa apanaa yuwa kuwa Israel bagee doodoo daamaa kiyaata. Kisee kemaata mée tomaa-tomaa apanaa yuwa kuwa inii ebo, Yahudi bagee okoo peedi, kisee ebo poga-poga se taai naadi ebea-ebea menaa kuwa.¹⁹Kisee kemaata ikii mée tomaa-tomaa apanaa yuwa me wegayaa menaa ena ko kisee: "Ogatamee Wa me anii mee weta piya wodoo to kaa pe-natakumaano see naadi kaama kuwa kagoo yuwa noonaa daageeta ekeata" see wegayaa. ²⁰Kuwa mikee menaa kiya okoo Yesus mikee gaano taa kemaata Wa me daageeta ekeata. Ikii gaayu ko ikii Yesus mikee gaata kemaata daamaa kitakumetaata topea. Kisee kemaata ikii ebo poga-poga se kiya weda dimii ma daamaa nekeenii, mee ko kisee: ²¹Ogatamee Wa me daamaa weta piyaa kagoo yuwa noonaa daakomeeta see see ikii mée tomaa-tomaa apanaa yuwa miya kisee kiukuwayaa yoka ikii miya daamaa gaamagaai.

²²Kisee kemaata Ogatamee Wa me dapuu see dimii mee too se kiya Wa me mée kagoo kiyaa dimii mee miya nekeenii. Kuwa Ogatamee me ekeata bagee kuwa Wa me kagoo kaa ekeata kiya ikii mée tomaa-tomaa apanaa yuwa gaayu ko Wa me dapuu see dimii kaa kiekee segeeki. Kisee kiya ikii daamaa nekeenii: Ikii me Wa me naepa kigi nao see dimii kaa umiwoo, toowoo siyu ko daamaa. Taa gaayu ko Wa me okoo kago daageeta ekeata see see mokoo ikii miya kisee kiukuwayaa yoka daamaa nekeenii. ²³Yahudi bagee kuwa okoo si yayeeta bagee kiya okoo miya Yesus mikee nao see gaapea kepa ko Ogatamee me okoo daamaa Wa yaato miyaayaa. Daageeta ekeata piya kagoo da mee bedaa masegeeta mee weta piya wodoo to kaa pe-takumiyaa see see mokoo Wa me okoo miya kisee pe-takumiyaa. Wa me kisee yaukuwaaniyaayaa. ²⁴Mikee, ikii mée tomaa-tomaa apanaa yuwa kuwa ko aii zaitun piyaa kagoo da mokoo, mée me weeno taa piya wodoo to mee kagoo da mokoo. Kisee aii piya kagoo da mee daageeta kaama daamaa weta see zaitun piyaa wodoo to kaa pe-takumeekee kuwa mée me se ukuwayaa agiyoo kiya Ogatamee me ikii kisee daamaa kiukuwata. Kisee Wa me kiukuwata agiyoo mee esee daamaa maa diya Yahudi bagee kuwa Wa me mee asii esee daamaa agiyoo okoo kaa yaukuwaaniyaayaa. Mee ko okoo miya zaitun piya wodoo to kiya daamaa weta piyaa wodoo to mokoo yoka mee piya wodoo to piya kago noonaa daageeta kaama bedaa mee piyaa wodoo to kaa daamaa pe-takumetaayaa, Ogatamee me okoo kaa kisee daamaa yaukuwaaniyaayaa.11:24 "Piya kago noonaa daageeta kaama bedaa mee piyaa wodoo to kaa daamaa pe-takumetaayaa" see mee mena nekeeniino yaato ko Yahudi bagee yuwa okoo Yesus mikee gaata kaama okoo bedaa idukaa see see Ogatamee yaato bagee kiyaa, see kuwa nekeensi naadi ebea-ebea menaa mee.

Ogatamee me mée tomaa uduma epa gaata menaa

²⁵Neebee nokaa yuwa, ikii mée tomaa-tomaa apanaa yuwa ebo poga-poga taapea yoka naadi eto ko anii kuwa idukaa kaama awee da kaa mée ipi kiyaano taa menaa ena daamaa keipi kiyaanaka, mee ko kisee: Israel bagee kuwa eebaa yaato okoo dimi mena eboo kegea. Okoo kisee dimii kaa umiwoo, toowoo naadi kaama mée tomaa-tomaa apanaa yuwa okoo Ogatamee yaato peaneekea, kisee too okoo eebaa kega yoka sikii see dimii gaatagi naagoo too. ²⁶Mee naagoo Israel bagee yuwa kuwa uduma daba daagimaa pootagea. Mee see see menaa ena ebeamaata, mee ko kisee:

"Sion magaa kaa kaama daba mée daagimaa peeyaano Mée mee meetagi,

Yakub me asii-kaba-kaba seta bagee yuwa okoo me pedeo yuwa yataa kiyaatagi. Yes 59:20

²⁷Ogatamee me ’Anii kisee daamaa kiukuwaaniyaabuu taata’ see aseta menaa mee doodoo

Anii okoo me pedeo yuwa epa yaekeasiita" see wegata menaa mee ebeamaata. Yer 31:33-34

²⁸Yahudi bagee kuwa Yesus me doometa menaa be kaa wisintaata kemaata okoo Ogatamee ma aayape see bagee yuwa keta. Kisee kemaata ikii mée tomaa-tomaa apanaa yuwa paagoo kuwa menaa kiiweganaa seta. Okoo yape see bagee keta kiya okoo idukaa kaama Ogatamee me daamaa wigintaata bagee yuwa. Mee ko idukaa petamanii okoo me bagee yuwa paagoo Ogatamee me "Anii kisee daamaa kiukuwaaniyaabuu taata" see aseta menaa kuwa me okoo Wa me epa see bagee yuwa. ²⁹Mikee, Ogatamee me okoo idukaa kaama kisee daamaa wigintaata, bedaa okoo paagoo Anii kisee daamaa aii kiukuwaaniyaabuu taata see menaa kuwa aseta. Kisee kemaata Wa me kuwa menaa yuwa se ekeasiyaa. ³⁰Idukaa ikii mée tomaa-tomaa apanaa yuwa kuwa Ogatamee me menaa si yayeeta bagee kiya eto Yahudi bagee okoo Yesus me menaa yayiino taa kemaata ikii Wa me kiepa see bagee yuwa keta. ³¹Yahudi bagee yuwa okoo miya kisee kaata. Eto ko okoo Wa me menaa si yayeegea kemaata Wa me ikii kiepa kaa daamaa kiukuwami. Kisee kiya ikii see see Wa me okoo miya epa kaa daamaa yaukuwaatagi. ³²Mikee, idukaa Ogatamee me mée tomaa uduma okoo Wa me menaa si yayeeta pedeo ukuwawoo siyaata. Mee ko bedaa Wa me epeekaa okoo uduma epa kaa daamaa yaukuwaano see naadi okoo idukaa kaama kisee yaekeata.

Ogatamee yaapaagee seta menaa

³³Ogatamee Wa kaa senawii agiyoo kuwa se egamaayaa, Wa me dimi bokoo to mee esee ebo, Wa me ipii kuwa asii-sege. Wa me too dimi daataata ukuwawoo siyaa menaa kuwa mée ena me gaamagaano iyo, bedaa Wa me ukuwayaa, peeyaa yuwa miya se nekeeniyaa. Kisee menaa ena ebeamaata, mee ko kisee:

³⁴"TUHAN me gaayaa dimii mee ipi see mée ena agoo ye?

Wa paagoo ’Kisee ukuwaano daamaa, kisee ukuwaano pedeo’ see tupiyaa mée maamee ya? Yes 40:13

³⁵Bedaa Ogatamee paagoo ’Ani me miya kisee kaneega yoka

A me miya kisee nii’ see menaa ena ma asiyaa ye?" see menaa ebeamaata. Ayb 41:11

³⁶Se-agiyoo, we-agiyoo kuwa uduma Wa me too ogaataata, uduma Wa me pesee da kaa too toowoo siyaa, kuwa uduma me Wa too ebo ekee siwoo siyaa. Eto ko Wa too asii-sege see Mée mee niiyaapaagee siwoo taai, kisee too iminoo miya, iminoo miya! Amin.

Gipii see dimii doonaa see bagee okoo me daamaa ukuwawoo siyaa menaa

¹Neebee nokaa yuwa, Ogatamee me mée epa dimii mee kisee ebo kemaata anii esee maamaa kisiino ko: Ogatamee paagoo ekega-manee siyaa agiyoo see see mokoo ikii miya Waa dimi kiwikimiwoosi naadi ikii ekaato maa da daamaa wa too wigintaata kaama aya kaa Wa paagoo ekega-manee siwoo taai. Mee ko ikii mikee Ogatamee mee ebo ekee, yaapaagee taano see naadi ukuwayaa agiyoo.12:1 Rom 6:12-13, 1Kor 6:19-20²Magaa da kaa bagee me iyee-payee kuwa ikii miya obeakee se. Kiya ikii me gipii see dimii kaa too daamaa gaagaa siwoo taai. Mee kaama ikii me dimi mena daamaa kikiyaabuu siwoo taapi, bedaa ikii me ’Inii kisee ukuwaano daamaa, kisee Ogatamee me ede kiyaa agiyoo yoka’ see kuwa ikii daamaa nekeeniipea. Ikii kuwa Wa me esee daamaa too, pedeo ena ma taa see ede kiyaa agiyoo kuwa ikii dimi ipi kaa daamaa wa too wiginiwoo segee taapea.12:2 Ep 4:22-24, 1Yoh 2:15-17

³Eto ko Ogatamee Wa me epaa mee ani kaa aii kisee naekeata kemaata anii mena ena ikii uduma kisiino ko: Ebo poga-poga dimii mee se gaai. Ikii Yesus mikee gaano dimii mee Ogatamee Wa me too waa ena kisuwa, waa ena kisuwa, kisee ikii kaa aii kiwuditaata yoka ’Anii ebo, apanaa bagee kuwa peedi’ see dimii mee se gaai. Ogatamee me ikii a doodoo, a doodoo kisee Wa me aii kiwuditaata doodoo too gaawoo taai, ebo dimii mee se.12:3-5 1Kor 12:12-14⁴Mee ko mée maa da gaayu ko maa da ena too too kiya takumeta agiyoo yuwa eebaa. Maa da kaa takumeta agiyoo kuwa okoo me ukuwagee siyaa agiyoo mee too se kiya waa ena wa me ukuwaano agiyoo wa too, waa ena wa me ukuwaano agiyoo wa too, kisee ukuwawoo see. ⁵Mee mokoo miya inii Kristus ma aagadi seta bagee kuwa inii mée eebaa kiya inii má ena too too, inii mée gakata kisee aatabi taata topea. ⁶Ogatamee Wa me kisee daamaa naukuwawoosi naadi inii mée kaa aii yadootaayaa agiyoo kuwa ena mee too se kiya mée waa ena kaa kisee yadootayu, mée waa ena kaa kisee yadootayu, Wa me kisee mée aii yawuditagaa see. Wa me kisee agiyoo yuwa mée yawuditagaa siyaa kemaata inii daamaa niiukuwagee taai, mee ko kisee: Wa me mée waa ena paagoo ase-manee siyaa menaa yuwa bedaa mée yuwa paagoo eewegasi naadi wa kaa yadootayu ko wa me mikee gaayaa dimii doodoo eewegaano gaano pedeo.12:6-8 Ep 4:11-13, 1Pet 4:10-11⁷Bedaa Wa me mée noonaa paagoo apanaa bagee me agiyoo daamaa aii yaukuwasi naadi yadootayu ko kuwa agiyoo yuwa daamaa aii yaukuwagee taai. Bedaa mée topegeesi naadi yadootaata bagee gaayu ko okoo mée daamaa topegee taai. ⁸Kiyoo kaama apanaa bagee dimi mena daamaa pesee kiyaasi naadi yadootaata bagee gaayu ko okoo me apanaa bagee yuwa dimi mena daamaa pesee kiyaabuu segee taai. Kiyoo kaama kepe, agiyoo aii manisi naadi yadootaata bagee gaayu ko yaku taa kaa manegee taai. Kiyoo kaama tuku-tuku bagee kisi naadi yadootaata bagee gaayu ko okoo daamaa dimi-dimi ukuwagee taai. Kiyoo kaama epa nao see gaata kaama daamaa yaukuwasi naadi yadootaata bagee gaayu ko okoo ede dimi kaa yaukuwagee taai.

Daamaa epa kaa aaukuwawoosi naadi menaa

⁹Ikii esee epa aagaa taai, mée epa poga-poga see dimii mee se. Pedeo dimii, pedeo agiyoo kuwa uduma be kaai, daamaa kiyaa yuwa too penee siwoo taai.12:9-10 1Pet 1:22¹⁰Ena kenaa bagee epa aagaa siyaa mokoo ikii miya epa aagaa siwoo taai, ’Anii peedi, waa ebo’ kisee aaekee siwoo taai. ¹¹Pekoo, paayaa kuwa se kiya ukuwaano too dimii kaa Tuhan me agiyoo ede ma, ede ma yaukuwawoo taai. ¹²Wa kaa too dimi kotopiwoo naadi kaama ede ma, ede ma siwoo taai.12:12 Ogatamee kaa dimi kotopiwoo taano mee ko Wa me "Anii kisee daamaa kiukuwaaniyaabuu taata, Anii kisee daamaa kiniita" see mée aseta kemaata inii kuwa uduma taa ma taa masiitagea nao naadi Wa kaa too dimi kotopiwoo, diitoo siwoo siyaa. Ae-wae, gaagaa siyaa agiyoo miyaa kaboo koogo dimi mena animaata se makii taai. Sembahyang se daayaata kisee too ukuwawoo taai. ¹³Yesus mikee gaayaa bagee okoo me gaano pedeo agiyoo sikii taa gaayu ko daamaa manii, bedaa meekee bagee yuwa miya ee kaa daamaa badaa magaai.12:13 Ibr 13:2,16

¹⁴Ikii kiwegee-wegee see bagee okoo daamaa menaa too eewegaai, daamaa agiyoo too okoo kaa yamiyaasi naadi yaidimaai, pedeo ayaa yadogaakee se.12:14 Luk 6:27-28, 1Pet 3:9¹⁵Ede ma, ede ma taakea bagee kuwa ma epo enaataa ede ma, ede ma eetaai, bedaa yegee taakea bagee kuwa miya epo enaataa eeyegee taai. ¹⁶Ikii ena dimii, ena menaa kaa too eeumiwoo, toowoo taai. Ebo dimii mee se kiya ekaato dimi peedi ekeata kaama ’Peedi see bagee paagoo miya eetoopa’ see dimii mee masii.12:16 Mena nekeeniino yaato ko mena kegaa ena ma agoo, mee ko kisee: Ekaato dimi peedi ekeata kaama ’Peedi agiyoo kuwa miya ukuwaanaka’ see dimii mee masii, see mee. ’Ni too ipi’ see dimii mee se gaai.12:16 Plp 2:2-4, Yak 3:13-17¹⁷Ikii pedeo kikiyaayaa bagee kuwa bedaa pedeo se kiyaai, mée uduma emaa dagii da kaa daamaa agiyoo too ukuwaai.12:17-19 Mat 5:38-42, 1Tes 5:15¹⁸Ikii mée ma emee-emee see dimii kaa umiwoo taai. Okoo me ikii ma kiemee-emee taano dimii mee okoo miya agoo kiyu ko ikii okoo uduma paagoo kisee koogo daamaa umiwoo taai. ¹⁹Ni me epa see bagee yuwa, ikii me mée modee se masii. Pedeo kikiyaayaa bagee gaayu ko Ogatamee Wa me kagoo kuwa okoo kaa yadootagaapi yoka ekeasii. Mee see see menaa ena ebeamaata, mee ko kisee: "TUHAN me wegaano, ’Modee masiino mee ko Ani me too yoka Ani me modee masiipa’" see menaa ebeamaata yoka12:19 Ul 32:35²⁰modee maseekee se kiya "Aa ma yape kiyaa mée to waa namo naadi kiyu ko naano agiyoo daamaa manii, bedaa waa uwo naadi kiyu ko uwo daamaa nusi yoka manii. A me kisee daamaa yaukuwayu ko waa ego weda kega see dimii mee yamiyaape, okomoo yuwa wa me mumoo to kaa yadookomeeyaa mokoo" see menaa ebeamaata.12:20 Ams 25:21-22²¹Ikii modee pe-masiyu ko ikii ekaato miya daba, peedi kiyaayaa. Kisee se kiya ikii me okoo kaa daamaa yaukuwayaa agiyoo kuwa me okoo me pedeo kikiyaano see agiyoo kuwa daba, peedi kisi yoka daamaa agiyoo too yaukuwaai.

Magaa da kaa eboo kuwa paagoo dimi peedi ekeasi naadi menaa

¹Ikii mée gakata kuwa magaa da kaa ebo tookee bagee yuwa paagoo ikii ekaato dimi peedi ekee taano gaano pedeo. Mee ko kuwa pesee yago bagee kuwa Ogatamee me too tuyaata, apanaa Wa me ebo tuyaano taa bagee taa, kuwa uduma Wa me too ebo tuyaata.13:1-7 Tit 3:1, 1Pet 2:13-14²Kisee kemaata kuwa bagee yuwa wisiniyaa bagee kuwa Ogatamee me ebo tuyaata bagee kuwa wisiniyaa yoka okoo ekaato okoo kaa hukuman miyaayaa. ³Daamaa agiyoo ukuwataa see bagee kuwa okoo me kuwa ebo tookee bagee yuwa weda taa, pedeo agiyoo ukuwataa see bagee kuwa too hukuman masiipa naadi weda gaayaa. Ikii me kuwa ebo tookee bagee yuwa weda taa kaa umiwoo, toowoo taano see dimii mee agoo ye? Kisee gaayu ko daamaa agiyoo too ukuwagee taai. Kisee daamaa agiyoo ukuwagee siyu ko okoo me ikii kiapaagee taapea. ⁴Kuwa magaa da kaa eboo kuwa ko Ogatamee me Ni me agiyoo naokageesi yoka naadi ebo tuyaata bagee yuwa. Okoo me ikii kaa miya daamaa agiyoo kiukuwageesi naadi tuyaata. Kiya ikii pedeo ukuwayu ko kuwa bagee yuwa wedaai. Okoo me pedeo bagee yuwa hukuman maniino kuwa aii kisee agiyoo se. Okoo ko Ogatamee me agiyoo yaokageesi naadi tuyaata bagee yoka kuwa pedeo agiyoo ukuwagee see bagee yuwa paagoo Ogatamee me kagoo kaa pedeo yadootaayaa agiyoo kuwa okoo me yamantaa see. ⁵Kisee kemaata ikii ekaato okoo paagoo dimi peedi ekee taano gaano pedeo. Mee ko ikii me ’Yaai, nakagoo kaa hukuman neeyaa yoka’ see dimii mee too se kiya ikii dimi yiba ’Kisee okoo paagoo dimi peedi ekeasiino kuwa daamaa yoka’ see dimii mee miya gaawoo taai.

⁶Ikii mee dimii mee okoo magaa da kaa eboo paagoo agoo naadi kaama ikii pajak kepee okoo daamaa edaagee siyaa. Mikee, okoo ko Ogatamee me agiyoo yaokagee see bagee yuwa yoka okoo me ukuwagee siyaa agiyoo daamaa ukuwageesi naadi ikii pajak kepee edaano daamaa.13:6-7 Mat 22:17-21⁷Okoo ikii me kisee maniino gaano pedeo bagee uduma paagoo daamaa manii. Mee ko okoo pajak kepee maniino gaano pedeo bagee kuwa okoo paagoo daamaa manii. Okoo paagoo ekaato dimi peedi ekeasiino gaano pedeo bagee kuwa okoo paagoo dimi peedi ekee taai. Bedaa okoo ebo ekeasiino gaano pedeo bagee kuwa okoo ebo ekee taai.

Mée epa aagaa taai naadi menaa

⁸Ikii me okaayoo yuwa kuwa yakadiino gaano pedeo kiya okaayoo ena mee si yakademaayaa, mee ko epa aagaa taano mee. Mée epa gaataa see bagee kuwa gaayu ko Musa me menaa kuwa uduma miya okoo sikii, okoo daamaa yaukuwataata mokoo see bagee kiyaa yoka ikii miya kisee too epa aagaa taano gaano pedeo.13:8-10 Mat 7:12, 22:39-40, Gal 5:13-14⁹Mee ko Musa me menaa yiba tobaaka se taai, mée se wugii, oma se masii, ni me agiyoo naaki ou see dimii mee se gaai, bedaa apanaa kuwa see see menaa miya kuwa uduma aatabi taayaa naaki mena kamu ena too too keepeasega, mee ko "Aa ekaato miya epa kiyaa see see apanaa bagee miya epa kaai" see menaa mee.13:9 Kel 20:13-17, Im 19:18¹⁰Mée epa kaano mee ko mée si yapedeo kiyaayaa yoka mée epa gaayaa bagee gaayu ko Musa me menaa uduma miya okoo sikii, daamaa yaukuwataata mokoo see deeyaa.

¹¹Inii daba mée peeyaano monaa da mee ekaapa kega see kuwa inii ipi yoka kuwa kisega menaa kuwa daamaa doowoo, ukuwawoo taai. Inii petamanii Yesus mikee gaamea kaboo mee monaa da peenaa beesekaa mokoo kiya eto ekaapa kega. Eto ko inii toomoo umiyaa kaboo se kiya antukiiniyaa kaboo kega.13:11-13 Ep 6:11-13, 1Tes 5:5-8¹²Daatooyiba yaato taa keepeasiino see kooka, bedaa egapi yaato kuwa awiino see koo taaka yoka digiyoo yaato ukuwanaa siyaa agiyoo kuwa niiekeasii, egapi yaato bagee me maanaa siyaa agiyoo yuwa kuwa niimagaai. Yape kaa toopusi naadi maayaa agiyoo kuwa see see niimaatagaa siwoo taai. ¹³Egapi yaato bagee me daamaa ukuwanaa, peenaa siyaa agiyoo kuwa too niiukuwagee taai. Boomagaa see uwoo noomaata kaama otoopa-otoopa see se. Bedaa otoopa api doonaa, paayogaa doonaa, kisee otoopa ou dimii kaa ukuwanaa siyaa agiyoo miya se. Aawisi-maawisi, aakago-maakago kuwa miya taa, anii naaki ou see dimii mee miya taa. ¹⁴Ikii kuwa uduma ekeata kaama Tuhan Yesus Kristus Wa me iyee kuwa doka maayaa mokoo daamaa maatagaai, magaa da kaa bagee me ou dimi-pami kuwa ou se gaai.13:14 Gal 5:24, Ep 4:22-24

Yesus yiba ena kenaa bagee yuwa pedeo menaa se aasee taai naadi menaa

¹Ikii mée noonaa ikii me mikee gaano dimii mee pesee kaano taa kiya kuwa bagee yuwa miya daamaa badaa magaai, wigineekee se. Kisee dagu, kisee daa see kuwa kaa se aawisi-maawisi taai.14:1-21 1Kor 8:7-13²Mée noonaa ko agiyoo-pagiyoo kuwa uduma daamaa nuyaa see gaayaa kiya mée noonaa okoo me mikee gaano dimii mee pesee kaano taa kemaata weekee agiyoo kuwa too naano daamaa see gaayaa, agiyoo tomaa se nuyaa. ³Agiyoo uduma nuyaa bagee kuwa me okoo agiyoo uduma se nuyaa bagee yuwa se wisineai, bedaa agiyoo uduma se nuyaa bagee kuwa me miya okoo agiyoo uduma nuyaa bagee paagoo "Kisee pedeo yoka" see kuwa se asii. Agiyoo uduma nuyaa bagee okoo miya Ogatamee me ede kiyaa bagee yoka pedeo menaa si yawegaai. ⁴Apanaa bagee me agiyoo yaokagee see bagee yuwa okoo pedeo see aseekee kuwa yaai, kaasee bagee ya? Okoo miya Tuhan me agiyoo yaokagee see bagee yoka okoo kaa daamaa, pedeo see kuwa okoo epoo Mée Tuhan Wa me too asiyaa, mée me se. Tuhan me okoo miya makii taa see kaa too tuyaabuu siwoo siyaa yoka okoo se okaata daamaa makii taa see kaa umiwoo, toowoo taapea.14:1-4 Mée noonaa okoo me mikee gaano dimii mee pesee kaano taa see wegayu ko kisee dagu, daa see taa, see kuwa okoo daamaa nekeeniino taa. Okoo me nuyaa-nuyaa, ukuwayaa-ukuwayaa kuwa ena. Okoo kisee bagee kiya Tuhan me okoo miya epa kigi, okoo se okaayaapi, okoo me mikee gaano dimii mee se dabaa kiyaapi, okoo miya kisee too pesee ma tuyaabuu siwoo taapi yoka naadi wegata menaa mee.

⁵Bedaa mée noonaa me "Mee naagoo ebo, mee naagoo peedi" see kuwa wiginiyaa. Kiya mée noonaa me egapii uduma mee too yoka naadi mee naagoo ebo, mee naagoo peedi see kuwa se wiginiyaa, ena mee too ekeasiyaa. Ikii me kisee wigineano mee mikee see gaayaa bagee miya, ikii kisee se wigineano mee mikee see gaayaa bagee miya, ikii mée gakata ikii me gaayaa-gaayaa doodoo daamaa deewoo, umiwoo taai. ⁶Mee naagoo ebo yoka deewoo taapa see gaayaa bagee kuwa Tuhan ebo ekeasiino see naadi deewoo siyaa. Bedaa agiyoo uduma nuyaa bagee kuwa miya Ogatamee kiiboo, paamee see dimii kaa Tuhan ebo ekeasiino see naadi nuyaa. Bedaa agiyoo uduma se nuyaa bagee kuwa miya Ogatamee kiiboo, paamee see dimii kaa Tuhan ebo ekeasiino see naadi agiyoo noonaa se nuyaa, kisee okoo paaya Wa kaa too ukuwawoo, deewoo siyaa, okoo ekaato kaa se. ⁷Mikee, inii uduma inii tuyaa miya, inii booyaa miya inii ekaato kaa ukuwawoo, deewoo siyaa se. ⁸Inii tuyu ko inii Tuhan kaa too omegee, toogee siyaa, bedaa inii booyu ko inii Tuhan kaa too booyaa. Kisee kemaata inii tuyaa miya, inii booyaa miya inii uduma Wa me bagee. ⁹Kisee kemaata Kristus mee boota bagee miya, aya tuyaa bagee miya okoo uduma me epoo Mée Tuhan mee kaano see naadi Waa boota kaama aya andoo peeta.14:8-9 Plp 1:20-21, 1Tes 5:10

¹⁰Ikii uduma Yesus yiba ena kenaa bagee yoka ikii mée noonaa me "Kisee pedeo, aa ewo" see aseekee kuwa kaasee kaa ya? Ikii ena kenaa bagee kiya ikii mée noonaa me kisee daba, peedi ekeasiyaa kuwa kaasee kaa? Inii uduma Ogatamee ikigii to kaa yiinaageeta kaama inii kaa daamaa, pedeo see kuwa uduma Wa me mée apaadee taatagi yoka ikii me pedeo see aasee siyaa menaa kuwa nekeenii.14:10-12 2Kor 5:10¹¹Kisee ebeamaata menaa ena agoo, mee ko kisee:

"Tuhan me wegaano, ’Taa ma taa se-bagee, we-bagee kuwa uduma Ni paagoo kagu sibumedaa taatagea,

bedaa mée gakata Aa mikee Ogatamee yoka see nasiitagea’ see wegata" Yes 45:23

see menaa ebeamaata.

¹²Kisee kemaata inii mée gakata inii me ukuwawoo, umiwoo seta kuwa kaa Ogatamee me mée apaadee taatagi yoka inii mée gakata Wa paagoo ase-manee taatagea.

Inii me kisee dagu, kisee ukuwaano daamaa see dimii gaayaa kuwa me apanaa bagee me gaagaa siyaa yoka gaai naadi menaa

¹³Ogatamee me inii kisee mée apaadee taatagi kemaata inii eto kaama wodoo "Kuwa agiyoo kuwa pedeo, aa ewo" see kuwa se niiaasee taai. Inii Yesus yiba ena kenaa bagee yoka inii me niigaawoo taano mee ko kisee: ’Mée noonaa okoo okaata kaama dimi mena pedeo kiyaa naadi kaama anii ipiipi diipa’ see dimii mee too niigaawoo taai. ¹⁴Anii Tuhan Yesus ma dimi aagadi-maagadi naadi kaama ani me ipi see menaa ena mee ko kisee: Naano agiyoo kuwa uduma nuyaa, mée pedeo kiyaayaa agiyoo ena ma taa, see kuwa nekeenega. Anii kisee nekeenega kiya mée noonaa me ’Mee ko mée pedeo kiyaayaa agiyoo da yoka’ see gaayaa. Okoo me kuwa naano pedeo yoka naadi se nuyaa.14:14 1Tim 4:4¹⁵Eto ko aa naano agiyoo uduma naano daamaa see wegayaa see mée to aa gaayu ko apanaa bagee ena, waa kisee naano pedeo see gaayaa mée to waa a me wegayaa menaa kuwa kaa gaagaa ebo see dimii wa kaa yamiyaayu ko aa apanaa bagee epa taa see mée to kiyaa. Waa ma ekea Yesus yiba ena kenaa bagee. Kristus mee wa kaa miya yaboota yoka a me naano agiyoo nuyaa-nuyaa kuwa me wa me mikee gaano dimii mee pedeo kiyaa naadi daamaa dii. ¹⁶Kisee kemaata ikii me ’Kisee daamaa too, pedeo taa yoka’ see gaata kaama pe-ukuwayaa yuwa kuwa apanaa bagee me kideeta kaama ’Kisee pedeo yoka’ see kigaayaa naadi ikii me nuyaa-nuyaa, ukuwayaa-ukuwayaa kuwa ipiipi dii. ¹⁷Ogatamee Wa too ebo mée eetoono mee ko mee agiyoo mee naano daamaa, mee uwoo mee naano daamaa, kisee menaa kuwa wegawoosi naadi se kiya inii daamaa agiyoo yaukuwawoo taano ma, daba koogo aasee siwoo taano ma, Roh Kudus ma enaataa ede ma, ede ma toowoo taano ma kuwa inii ukuwawoo, umiwoosi naadi Ogatamee Wa too ebo mée eetotaaki. ¹⁸Kisee ukuwawoo, umiwoo see bagee kuwa okoo Kristus Wa me agiyoo daamaa yaokagee see bagee kemaata okoo Ogatamee miya dimi wikii-wikii siyaa, mée me miya kuwa daamaa bagee yoka, see yawegayaa.

¹⁹Kisee kemaata inii aaemee-emee see dimii mee miyaayaa agiyoo yuwa ma, dimi mena daamaa pesee aakiyaabuu siyaayaa agiyoo yuwa ma kuwa too ukuwawoo taapa see dimii mee maamaa niigaawoo taai. ²⁰Ogatamee me ikii daamaa pesee kikiyaabuu siwooki kuwa ikii me pedeo yakiyaayaa yoka naano agiyoo nuyaa-nuyaa menaa kuwa kaa se aakago-maakago taai. Se-agiyoo, we-agiyoo kuwa uduma dagu, mée se pedeo kiyaayaa kiya mée waa ena, wa me naano agiyoo nuyaa-nuyaa kuwa kaa apanaa bagee me yaai naadi okaata kaama dimi mena pedeo kiyaa. Kisee waa yakiyaano kuwa pedeo. ²¹Ikii Yesus yiba ena kenaa bagee kemaata ikii me nuyaa-nuyaa kuwa daamaa dii. Mée noonaa okoo me yaai naadi okaata kaama dimi mena pedeo kiyaa yoka ikii bedo woda, anggur poo uwoo, kuwa see see agiyoo se naano miya daamaa. ²²Ikii me nuyaa-nuyaa kuwa ko ikii mée gakata waa ena me kisee agiyoo naano daamaa, waa ena me kisee agiyoo naano pedeo, kisee ikii mée ena-ena ikii me gaayaa-gaayaa doodoo too Ogatamee emaa dagii da kaa daamaa koogo noowoo taai. Ikii dimi wiya taa kaa ’Kisee ukuwaano daamaa ii’ see gaayaa dimii mee doodoo noogee, ukuwagee siyu ko ikii ede ma, ede ma umiwoo, toowoo taapea. ²³Kiya mée waa ena me ’Mee agiyoo mee daamaa nuyaa ye, se nuyaa ye’ kisee dimi wiya ketaaki too mee agiyoo nuyu ko waa pedeo kiyaa. Mee mée to me ’Mee agiyoo naano pedeo’ see dimii agoo yoka waa mee agiyoo noomaata kaama wa kaa pedeo menaa yadootaayaa. Mikee, mée ena me kisee agiyoo ukuwaano mikee daamaa, kisee agiyoo ukuwaano mikee pedeo, kisee dimi yiba wigineano taa kaa pe-ukuwayaa agiyoo kuwa uduma pedeo dimii kaa too ukuwayaa.

Mée noonaa okoo me mikee gaano dimii kuwa pesee kaano taa yoka daamaa aasee siwoo taai naadi menaa

¹Inii Yesus mikee gaano dimii mee pesee see bagee kuwa me apanaa okoo mikee gaano dimii pesee kaano taa bagee kuwa se wisintaata kaama daamaa aasee taai. Inii me ’Ni me gaayaa-gaayaa yuwa too’ see se kiya ²inii mée gakata apanaa bagee miya okoo ede kisi naadi agiyoo niiukuwaai, okoo me dimi mena daamaa iyawoo, pesee kiwoosi naadi agiyoo daamaa yaukuwagee taai. ³Mikee, Kristus Waa miya kisee Mée. Wa me ’Ni me gaayaa-gaayaa yuwa too’ see dimii mee taa. Wa me kisee dimii taa see menaa kuwa idukaa Wa kaa ebeamaata, mee ko kisee: "Ogatamee, wae, mée me Aa kawisineekee menaa kuwa Ni kaa miya naekeata" see menaa da mee.15:3 Mzm 69:10⁴Kisee idukaa ebeamaata menaa kuwa uduma inii mée tupisi naadi ebeamaata. Inii kuwa menaa daamaa tupiwoo naadi kaama inii makii taa see kaa toowoo siyaa, dimi mena daamaa pesee kiwoo siyaa. Kisee pesee kiwoo naadi kaama inii Ogatamee kaa too dimi kotopiwoo siyaa. ⁵Eto ko inii dimi mena makii taa, daamaa pesee mée kiyaabuu taa see Mée Ogatamee Wa me ikii Kristus Yesus Wa me gaata-gaata doodoo ena dimii, ena menaa kaa kituyaabuu siwoosi naadi kiasega. ⁶Mee ko inii epoo Mée Tuhan Yesus Kristus Waataagi Ogatamee mee ikii me Waa ebo ekee see menaa kuwa epo enaataa daamaa wegagee siwoosea naadi kiasega.

⁷Kisee kemaata ikii Ogatamee Waa ebo ekee, yaapaagee siwoosea naadi Kristus me ikii daamaa badaa kimaata see see ikii miya daamaa badaa aamagaa taai.15:7 Rom 14:1-3⁸Daamaa nekeenii: Ogatamee me idukaa petamanii Yahudi bagee yuwa paagoo "Anii kisee daamaa kiukuwaata, kisee daamaa kiukuwaaniyaabuu taata" see aseta. Kuwa mikee menaa kuwa Kristus Waa Yahudi bagee yuwa kaa daamaa yaukuwaaniyaabuu taano see naadi meta. ⁹Mee ko mée tomaa-tomaa apanaa yuwa miya okoo Ogatamee Wa me mée epa dimii mee esee ebo nao naadi kaama yaapaageesi naadi meta. Okoo me kisee yaapaagee siwoo taapea see kaa menaa kuwa idukaa ebeamaata, mee ko kisee:

"Kuwa me kemaata anii mée tomaa-tomaa apanaa yuwa paagoo kaapaagee senaa taapa,

A ekaa da ebo nao naadi kayaayaa taapa" see ebeamaata. Mzm 18:50

¹⁰Bedaa mena ena miya kisee ebeamaata:

"Ikii mée tomaa-tomaa apanaa yuwa miya Wa me bagee yuwa ma epo enaataa ede ma, ede ma segee taai" see wegata. Ul 32:43

¹¹Bedaa mena ena miya kisee:

"Ikii mée tomaa-tomaa apanaa yuwa uduma Tuhan yaapaagee taai,

se-bagee, we-bagee, se-tomaa, we-tomaa kuwa uduma Waa yaapaagee taano too" see menaa miya ebeamaata. Mzm 117:1

¹²Bedaa nabi Yesaya me wegata menaa mee miya kisee:

"Epeekaa Isai see mée to wa me asii-kaba-kaba bagee ena agoo kaatagi,15:12 Isai mee ko Daud ataagi yoka wa me asii-kaba-kaba seta Mée mee ko Ebo Kristus, Yesus mee.

Waa mée tomaa-tomaa apanaa yuwa paagoo miya ebo toowoo taatagi.

Apanaa tomaa kaa bagee yuwa Wa kaa too dimi kotopiwoo taapea" see wegata. Yes 11:10

¹³Ogatamee mee ko inii Wa kaa dimi kotopiwoo taa see Mée. Waa kisee Mée kemaata ikii Kristus mikee gaawoo naadi kaama ede ma, ede ma dimii ma, koogo adumeta dimii ma kuwa Wa me ikii dimi yiba maamaa eebaa kiawisi naadi kiasega. Kisee ikii yiba kiawidaa siwoo naadi kaama Roh Kudus me pesee kaa ikii Ogatamee kaa kotopiwoo see dimii mee maamaa eebaa kikiyaabuu siwoosi naadi kiasega.15:13 Rom 5:2-5

Paulus me ebeata menaa kuwa kisee kaa, kisee kaa kiebeaga see kuwa nekeensi naadi menaa

¹⁴Neebee nokaa yuwa, ikii daamaa dimii, daamaa menaa kuwa maamaa pudii, bedaa ikii me ipi see dimii mee miya esee ebo yoka ikii aatopee taano ipi, ikii kisee bagee yuwa ii see kuwa anii kinekeenega. ¹⁵Ikii kisee bagee kiya ikii mena noonaa gaabuu taapea naadi anii kuwa menaa omaago ma awee da kaa kiebeaga. Anii ko Ogatamee me aii naepa kaa nawigintaata mée kemaata kiebeaga. ¹⁶Ogatamee me anii naepa kaa nawigintaata mee ko anii Kristus Yesus Wa me agiyoo kuwa mée tomaa-tomaa apanaa yuwa paagoo daamaa yaukuwanaa segeesi naadi nawigintaata. Mee ko imam bagee me Ogatamee paagoo pedeo taa see agiyoo daamaa wigintaata kaama ekega-manee taa see see mokoo ani me miya Ogatamee me daamaa etokaa menaa kuwa mée tomaa-tomaa apanaa yuwa paagoo eeweganaa naadi kaama ani me okoo Ogatamee paagoo daamaa ekega-manee see. Roh Kudus me okoo me pedeo dimii, pedeo menaa yawigintaata kaama okoo Ogatamee paagoo daamaa ekega-maneesi naadi anii nawigintaata.

¹⁷Kisee kemaata anii Kristus Yesus ma dimi aagadi-maagadi naadi kaama ni me Ogatamee kaa yaukuwanaa see agiyoo kuwa kaa anii esee ede kega. ¹⁸Kristus Wa me anii doodoo mée paagoo kisee agiyoo daamaa ukuwanaa siwoo simi, kisee agiyoo daamaa ukuwaaniyaabuu siwoo simi see menaa kuwa too anii uu ma kiiwegaga. Kuwa ko ni me yadoonaa seta menaa ma, ni me yaukuwanaa seta agiyoo ma kuwa me mée tomaa-tomaa apanaa yuwa okoo Yesus me menaa yayeewookea, ¹⁹bedaa anii Ogatamee me Roh pesee kaa nekeensi naadi agiyoo ma, apanaa dimi nagii-nagii agiyoo ma kuwa yaukuwanaa seta kuwa me miya okoo me Wa me menaa daamaa yadoowookea. Anii Yerusalem magaa kaa kaama masegeeta amoo Ilirikum magaa kaa too yaayupii da kuwa magaa uduma anii Kristus Wa me doometa menaa kuwa uduma daamaa yadoonaa segee sema. ²⁰Anii kisee yadoonaa segee naadi kaama Kristus Wa ekaa da ewo see magaa kaa anii Wa me doometa menaa eeweganaaka naaki ou see dimii mee ebo. Apanaa bagee yuwa okoo me kuwa menaa yaweganaa seta magaa yuwa kaa anii se poopa. Mee ko okoo me kabo maatagaa sepea yuwa kuwa kaa anii wodoo taa maatagaano kuwa be, ewo see bagee yuwa paagoo too poono ede. ²¹Kisee idukaa ebeamaata menaa ena mee ko kisee:

"Wa kaa menaa mée me ase-maniino taa bagee kuwa okoo daamaa diitagea,

bedaa mena yiino taa bagee kuwa okoo daamaa nekeeniitagea" see menaa ebeamaata. Yes 52:15

Paulus mee Roma magaa kaa poota see dimii gaata menaa

²²Anii Kristus ewo see magaa kaa eeweganaa taapa dimii mee agoo kemaata kaama anii ikii Roma magaa kaa bagee paagoo kimeeno taa. ²³Kiya eto ko nakaa yaato magaa kuwa uduma sikii, mena eewegaano taa magaa taa yoka anii ikii paagoo kimeepa see dimii mee agoo. Mikee, ni me idukaa kaama tahun eebaa gaawoo seta dimii mee ko ²⁴anii Spanyol magaa kaa peetaaka too ikii paagoo keta kiiumiipa see dimii mee gaawoo seta. Anii ikii paagoo peemaata kaama ikii ma epo enaataa ede ma, ede ma segee naadi kaama anii poono see kaboo ikii me anii eta maa da kaa gaano pedeo agiyoo yuwa sikii nakiyaata kaama anii poopa see dimii gaaga.

²⁵Kiya eto kiipaa anii Yerusalem magaa kaa keta poonaka. Mée me kiyoo Yesus mikee gaayaa bagee yuwa namanisi naadi manta kepee yuwa kuwa anii yadogaanaka. ²⁶Okoo noonaa agiyoo taa, kepe taa kemaata Makedonia wee kaa magaa ma, Akhaya wee kaa magaa ma kiyoo Yesus mikee gaayaa bagee yuwa okoo me ede kaa manta kepee yuwa kuwa yadogaanaka. ²⁷Okoo me kuwa Yahudi bagee yuwa kepe maniino kuwa ede ma manemea. Mikee, okoo me kisee maniino gaano pedeo. Mee ko epoo to wodoo kaama daamaa mée yaukuwaaniyaabuu seta agiyoo kuwa Yahudi bagee doodoo mée tomaa-tomaa apanaa yuwa paagoo miya nakimedaa seta. Okoo me kisee epoo to kaa agiyoo yuwa daamaa masemaagea kemaata kepe, kisee magaa da kaa agiyoo kuwa Yahudi bagee yuwa paagoo miya epa kaa maniino daamaa. ²⁸Kuwa okoo me magapea kepee kuwa ani me doodoota Yerusalem magaa kaa bagee paagoo yamantaata kaama wodoo bedaa anii peedoota Spanyol magaa kaa peetaaka too eta mana kaa ikii paagoo kiiumiita. ²⁹Anii Kristus Wa me inii daamaa mée yaukuwaaniyaabuu siyaa agiyoo kuwa maamaa eebaa kidoomeeta, see kuwa anii ipi.

³⁰Neebee nokaa yuwa, inii paaya inii epoo Mée Tuhan Yesus Kristus ma dimi aagadi-maagadi taa see bagee yuwa, inii Roh me epa dimii maseta bagee yuwa yoka ikii anii ma epo enaataa ani kaa Ogatamee paagoo maamaa sembahyang nasegee taai, see maamaa kisega. ³¹Mee ko Yudea wee kaa Yesus me menaa yayiino be see bagee yuwa agoo yoka Wa me anii nadeegeesi naadi sembahyang nasegee taai. Bedaa anii Yerusalem magaa kaa peemaata kaama kiyoo Yesus mikee gaayaa bagee yuwa me ni me okoo yadoopa kepee yuwa daamaa masisi naadi miya naasegee taai. ³²Ikii me kisee ni kaa naasegee naadi kaama Ogatamee Wa me anii ikii paagoo kimeeno mee daamaa, ede see gaayu ko anii ikii paagoo kimeeta. Anii ede ma, ede ma ikii paagoo kimeemaata kaama kiiomegee naadi kaama anii dimi mena daamaa pesee kedaa taata. ³³Koogo adumeta dimii mée maniyaa Mée Ogatamee mee ikii uduma paagoo daamaa kiitoogeesi naadi kiasega. Amin.

Paulus me epao see menaa

¹Anii Pebe see apii mee keipi kiyaanaka. Waa ko inii paaya Kristus yiba ena kenagaa see apii, Kengkrea magaa kaa Yesus mikee gaayaa bagee kaa tabogetaa see apii mee. ²Yesus yiba ena kenaa bagee yuwa daamaa badaa aamagaa siyaa see see ikii miya waa Tuhan yaato apii yoka naadi daamaa badaa magaai, bedaa wa me gaano pedeo agiyoo kuwa miya daamaa manegee taai. Waa apanaa bagee mée eebaa manegee see apii, anii miya neegee sema yoka ani me keipi kiyaaga.

³Priskila see apii ma, Akwila see mée ma ekea epao see naasii. Ekea Kristus Yesus Wa me agiyoo anii ma epo enaataa daamaa ukuwagee see bagee wiya. ⁴Anii bogaano see koo sema kaboo ekea bogaano uu dimii kaa napekageemea. Ani me ekea kaa kiiboo, paamee see dimii mee ebo. Ni me too se kiya apanaa tomaa kaa Yesus mikee gaayaa bagee okoo uduma miya kisee dimii agoo. ⁵Yesus mikee gaayaa bagee yuwa ekea me ee kaa kutuu segeekea bagee kuwa miya epao see naasii. Ni me epa see mée Epenetus mee epao see naasii. Waa Asia wee kaa Kristus mikee gaata bagee petamanii mée. ⁶Maria mee epao see naasii. Waa ikii me agiyoo maamaa kana ma daamaa kiukuwagee see apii. ⁷Nii ma tomaa kaa bagee Andronikus ma, Yunias ma epao see naasii. Ekea wiya ma inii digiyoo ee yiba epo toogee seme. Yesus me menaa yadoonaa see bagee yuwa yupii ekea ebo. Anii Kristus mikee gaano taa kaboo ekea keta Waa mikee nao see gaata bagee wiya. ⁸Ampliatus mee Tuhan yiba ni me esee epa see mée mee epao see naasii. ⁹Urbanus mee inii ma epo enaataa Kristus me agiyoo yaukuwagee see mée. Waa ma, ni me epa see mée Stakis mee ma ekea epao see naasii. ¹⁰Apeles mee epao see naasii. Waa gaadee siyaa kaboo Kristus yiba se maki-makaa see mée. Aristobulus wa me ee kaa bagee kuwa epao see naasii. ¹¹Nii ma tomaa kaa bagee Herodion mee epao see naasii. Narkisus wa me ee kaa Tuhan mikee gaayaa bagee kuwa epao see naasii.

¹²Tripena ma, Triposa ma ekea epao see naasii. Ekea Tuhan me agiyoo kana ma daamaa yaukuwagee see bagee wiya. Ni me epa see apii Persis mee epao see naasii. Waa Tuhan me agiyoo maamaa eebaa kana ma yaukuwagee see apii. ¹³Rupus mee epao see naasii. Waa Tuhan me esee daamaa wigintaata mée. Wabaayo miya epao see naasii. Waa nibaayo mokoo see apii. ¹⁴Asinkritus ma, Plegon ma, Hermes ma, Patrobas ma, Hermas ma, bedaa okoo ma Yesus yiba ena kenaa bagee yuwa miya uduma epao see naasii. ¹⁵Pilologus ma, Yulia ma, Nereus ma, wa ukuyogaa mee ma, Olimpas ma, okoo paagoo Yesus mikee gaayaa bagee kuwa miya epao see naasii. ¹⁶Ikii epao aasee siyaa kuwa ko pedeo taa see dimii kaa ebe aanuunuu taai. Kristus mikee gaayaa bagee kuwa uduma epao see kisegea.

Wodopasi nekeensi naadi menaa

¹⁷Neebee nokaa yuwa, mée me menaa kuwa me ikii ukuu kibaaniyaayaa yoka gaai. Ikii me Yesus mikee gaano dimii mee pedeo kikiyaayaa bagee agoo yoka ipiipi nekeenii, see maamaa kisega. Okoo me mée tupiyaa menaa kuwa ena, ikii daamaa kitupiwoo seta menaa kuwa ena yoka okoo too wigintagaai.16:17 Tit 3:10¹⁸Kuwa see see bagee okoo inii epoo Mée Tuhan Kristus Wa me agiyoo yaokagee see bagee yuwa se kiya okoo me otoopa ou dimi-pami kuwa too ede naadi ukuwagee see bagee yuwa. Okoo daamaa poga-poga see dimii kaa wegataa see bagee yuwa too. Okoo me menaa kuwa ipi see menaa keenda kiya okoo kuwa menaa yuwa me ewo see bagee deebaa siyaa. ¹⁹Ikii gaayu ko ikii Yesus me menaa daamaa yayeewoo see bagee yuwa ii see kuwa ikii kaa ogo pege-pege naadi kaama mée uduma yeegea yoka anii ede ma, ede ma segeeka. Ikii daamaa dimii, daamaa menaa kuwa too ipi, pedeo dimii, pedeo menaa kuwa ewo, ikii kaa taa see kuwa anii ede. ²⁰Dimi mena koogo daamaa mée yakiyaabuu taa see Mée Ogatamee Wa me Iblis mee ikii me badoo yuwa miyoo taa moga kitagimekumiipi. Inii epoo Mée Tuhan Yesus Kristus Wa me aii kiepa dimii mee ikii ma epo enaataa kiitoogeesi naadi kiasega.

²¹Timotius mee, anii ma epo enaataa agiyoo ukuwataa see mée wa me epao see kisigi. Nii ma tomaa kaa bagee Lukius ma, Yason ma, Sosipater ma okoo miya epao see kisegea. ²²Anii Tertius mee, Paulus me menaa yuwa eto mee kapogee da kaa yaebeataaka mée to anii miya Tuhan yiba epao kisega. ²³Gayus mee miya epao kisigi. Inii wa me ee kaa omegeeke, bedaa nakaayoo Yesus mikee gaayaa bagee yuwa miya wa me ee kaa kutuu segeekea. Mee magaa kaa kepe penee taa see mée Erastus me epao kisigi. Kwartus me miya epao kisigi. Waa inii ma Yesus yiba ena kenaa bagee. ²⁴[Inii epoo Mée Tuhan Yesus Kristus Wa me aii kiepa dimii mee ikii ma epo enaataa kiitoogeesi naadi kiasega. Amin.]

Wodopasi Ogatamee yaapaagee seta menaa

²⁵Ogatamee mee niiyaapaagee taai. Waa ko Yesus Kristus kaa menaa kuwa, ni me daamaa yaweganaa see menaa kuwa doodoo ikii dimi mena daamaa pesee kikiyaabuu taa see Mée. Kuwa menaa kuwa idukaa awee da kaa kiyaano taa, kisee too maamaa eebaa omemaata kaama ²⁶eto too awee da kaa daamaa mée yakiyaabuuki. Kuwa menaa kuwa ko idukaa nabi bagee me wegawoosi naadi ebeamaata menaa. Mée tomaa-tomaa okoo Kristus mikee gaata kaama kuwa menaa yayeewoosi naadi Toono too Mée Ogatamee Wa me kuwa menaa kuwa mée tomaa-tomaa yuwa paagoo nadoonaa taai see aseta, kisee Wa me okoo ipi kiyaabuu siwooki. ²⁷Wa too ipi dimii yago Mée Ogatamee mee inii Yesus Kristus doodoo da taa Waa ebo, Waa asii-sege see niiekee siwoo taai, kisee too iminoo miya, iminoo miya! Amin. Kiyoo too.