Wahyu

Wahyu

Yohanes paagoo awee da kaa deeyaata menaa

Mee kapogee mee ko Yohanes me ebeamaata. Ogatamee me Yesus Kristus doodoo kisee ukuwaaniita, kisee ukuwaaniyaabuu taata see agiyoo kuwa Yohanes paagoo awee da kaa deeyaata. Mena noonaa wa paagoo aseta, mena noonaa dega-dega kaa malaikat bagee me waa deeyaabuu seta. Ogei menaa kaa wahyu see wegayu ko awee da kaa deeyaata menaa see mee.

Mée me Yesus mikee gaayaa bagee yuwa maamaa wegee-wegee seta kaboo Yohanes me mee kapogee ebeamaata. Kuwa kaboo da Yesus mee too pesee yago Mée, Wa too Tuhan, apanaa ebo tookee bagee kuwa se, see gaayaa bagee kuwa mée me wegee-wegee seta. Kiya mée noonaa me mée weda kaa Yesus ekeata. Yesus mikee gaayaa bagee yuwa Waa daamaa peneata makii taa see kaa toowoosi naadi mee kapogee mee yaebeamaata.

Mee kapogee yiba ebea-ebea menaa eebaa, kuwa ko kota Babel magaa ma, maga kuye petoo to ma, dimi pedeo see api damaa to ma, yoogi damaa to mokoo see agiyoo ma, apanaa pedeo see agiyoo dama yuwa miya agoo. Okoo uduma Ogatamee ma yape kiyaa bagee yuwa ebea-ebea.

Yesus mee ko domba wodaa ebea-ebea yoka mee kapogee yiba Domba Pooduu to see ekaa weeta. Mee ko Israel bagee okoo me domba wodaa wugimaata kaama Ogatamee paagoo ekega-manee seta see see Yesus Wa me inii Ogatamee ma menaa kuwa mée yataa kiyaasi naadi Waa ekaato mée yaekegataata boopi naadi kaama kisee ekaa munta. Wa me bagee yuwa mée me wegee-wegee segeekea kiya epeekaa Waa meemaata kaama Iblis ma, kuwa Waa ma yape kiyaa bagee apanaa yuwa ma uduma daba, peedi kiyaatagi. Kiyoo kaama agiyoo-pagiyoo uduma Wa me gipii kiyaabuu seta kaama Wa too ebo toowoo taatagi, bedaa inii makii taa see kaa toowoo siyaa bagee kuwa miya Waa ma ebo toowoo taatagea. Kisee menaa kuwa mee kapogee yiba ebeamaata.

Bedaa mee kapogee yiba kisee moga ukuwaandaa taata see menaa kuwa miya ebeamaata. Kuwa menaa noonaa mikee Wa me wegata-wegata ukuwaandaa seta kiya mena noonaa ukuwaaniyaano taa. Kapoge 2 Petrus 3:8 yiba ebeamaata menaa mee ko "Tuhan Wa me gaata dimii mee ko egapii ena too too gaayu ko seribu tahun mokoo" see ebeamaata yoka inii mée tomaa da me tahun egaano mee ena, Ogatamee me tahun egaano mee ena, ena mee too se. Mée me gaano, ’Yesus meeno epee’ see gaayaa kiya Ogatamee me kisee se gaayaa.

Mee kapogee yiba mena kutuu yuwa kuwa ko kisee:

1:1-8 Petamanii menaa

1:9–3:22 Yesus me Yohanes paagoo "Maga petoo to kaa Yesus mikee nao naadi kutuu taa see bagee yuwa paagoo kisee-kisee naebeai" see aseta menaa

4:1–5:14 Epoo to wodoo bagee me Ogatamee ma, Domba Pooduu to ma Ekea ebo ekee, yaapaagee seta kuwa deeta menaa

6:1–8:1 Bebenataata kapogee da kaa tabintaata agiyoo petoo to kuwa oseepii seta kaama pedeo agiyoo meanee seta kuwa deeta menaa

8:2–11:19 Puusee petoo to puu seta kaama pedeo agiyoo meanee seta kuwa deeta menaa

12:1–13:18 Yoogi damaa to mokoo see agiyoo ma, pedeo see agiyoo dama wiya ma kuwa wedo kuwa deeta menaa

14:1-20 Domba Pooduu to Wa me bagee yuwa daamaa kiyaata kuwa deeta menaa ma, pedeo see agiyoo damaa to wa me bagee yuwa kuwa pedeo kiyaata kuwa deeta menaa ma

15:1–16:21 Malaikat bagee me otaawee petoo to yiba pedeo agiyoo mée kaa yakabagekomeeta kuwa deeta menaa

17:1–19:5 Kota Babel magaa mee pedeo kiyaata kuwa deeta menaa

19:6–20:15 Domba Pooduu to Wa me apii goeta menaa ma, Waa ma yape kiyaa bagee yuwa pedeo kiyaata kuwa deeta menaa ma

21:1–22:5 Epoo to ma, magaa to ma, kota Yerusalem magaa ma kuwa gipii kiyaata kuwa deeta menaa

22:6-21 Wodopasi menaa

Yohanes me petamanii menaa

¹Eto kuwa ebeamaata menaa kuwa ko Yesus Kristus Wa me awee da kaa deeyaata menaa. Kuwa ko Ogatamee Wa me taa ma taa kisee moga agoo kedaa taata, kisee moga ukuwaandaa taata see aseta menaa kuwa Wa me agiyoo daamaa yaokagee see bagee yuwa okoo awee da kaa ipi kiyaasi naadi Kristus paagoo ase-manee seta. Kiyoo kaama Kristus Wa me malaikat bagee mée ena paagoo "Aa kuwa menaa yuwa doodoota Ni me agiyoo naokagee see mée Yohanes paagoo pe-naasii" see aseta. Kiyoo kaama kuwa menaa doodoota Yohanes paagoo daamaa awee da kaa pee-yakiyaata. ²Yohanes me kuwa Ogatamee me aseta menaa ma, Yesus Kristus Wa me daamaa yawegata menaa ma kuwa kaa deeta menaa kuwa uduma wa me daamaa yawegakomeeta. ³Kuwa kisee moga ukuwaandaa taapa see aseta agiyoo kuwa mee kapogee yiba ebeamaata topa. Ukuwaaniyaapi monaa da mee katu kega yoka kuwa menaa daamaa deetaa, yawegataa see bagee kuwa daamaa, ede nao. Bedaa kuwa ebeamaata menaa yuwa daamaa yayeeta kaama penee siwoo siyaa bagee kuwa miya daamaa, ede nao.

Maga petoo to kaa Yesus mikee gaayaa bagee yuwa paagoo epao see aseta menaa

⁴Nii ko Yohanes. Ani me ikii Asia wee kaa maga petoo to kaa Yesus mikee nao naadi kutuu taa see bagee yuwa paagoo mee kapogee mee kiebeataaka. Ogatamee Wa me aii kiepa dimii ma, koogo adumeta dimii ma kuwa ikii ma epo enaataa kiitoowoosi naadi kiasega. Mee ko Toono Too Mée Waa idukaa kaama toowoo seta, eto miya totaaki, bedaa Waa meetagi Mée Ogatamee mee ma, Wa me ebo animagaano yoo Wa ikigii to kaa toowoo see Dimi Noogaa Petoo to ma,1:4 Dimi Noogaa Petoo to see ekaa mee gaayu ko Roh ekaa da mee. Roh Waa ena too too kiya esee ebo, pedeo ena ma taa yoka naadi kaama Yohanes me Dimi Noogaa Petoo to see ekaa ebeamaata.⁵bedaa Yesus Kristus mee ma Okoo me kisee daamaa kikiyaasi naadi kiasega. Yesus Kristus Waa mikee menaa too peneata kisee too daamaa yawegawoo see Mée. Waa boota kiya petamanii Wa keta aya andoo peeta kaama toowoo taaki Mée kemaata Waa Ebo Wodoo Eboo, magaa da kaa ebo tookee bagee yuwa me Eboo.

Eto ko Waa niiyaapaagee taai. Wa me inii epa mée gaakee kaa Wa me tadaa me inii me pedeo yuwa mée yataa kiyaata kaama daba mée daagimaa peeyaata Mée mee.1:5 Tit 3:3-5, 1Yoh 4:10⁶Wa me inii ebo toowoo see bagee mokoo mée kiyaata, Waataagi Ogatamee me agiyoo daamaa yaokageesi naadi inii Wa me imam bagee mokoo mée kiyaata.1:6 Kel 19:6, 1Pet 2:9, Why 5:10 Wa too pesee, Wa too asii-sege see Mée yoka niiyaapaagee siweei, kisee too iminoo miya, iminoo miya. Amin.

⁷Deeweei, Waa sinu yuwa ma enaataa migi nao, see kuwa mée uduma diitagea, Waa nokogeta bagee yuwa miya awee da kaa diitagea.1:7 Dan 7:13, Mat 24:30 Magaa da kaa mée tomaa-tomaa yuwa uduma Wa kaa yege ma, yii-yii ma taatagea. Taa ma taa mikee ukuwaaniita. Amin.

⁸Tuhan Ogatamee Wa me aseta menaa mee ko "Anii ko Alpa ma, Omega ma kuwa" see menaa mee.1:8 "Anii ko Alpa ma, Omega ma kuwa" see menaa mee ko Yunani menaa kaa petamanii hurup mee ekaa da ko Alpa, bedaa wodopasi hurup mee ekaa da ko Omega. Mena nekeeniino yaato ko Ogatamee Waa esee petamanii kaama wodopasi kaa too Wa too pesee, Wa too ebo see Mée ii, see kuwa nekeensi naadi munta ekaa da mee. Waa ko Toono too Mée, idukaa kaama toowoo seta Mée, eto miya totaaki, bedaa meetagi Mée, Se-pesee, We-pesee yago Mée Ogatamee mee.1:8 Kel 3:14

Yohanes me Kristus mee awee da kaa deeta menaa

⁹Anii Yohanes mee ko ikii ma Yesus yiba ena kenaa bagee kemaata mée me inii mée wegee-wegee segee naadi kaama ae-wae, gaagaa segeekea. Kisee kiya inii paaya Yesus yiba epo enaataa ebo toowoo see bagee yuwa mokoo mée kiyaata kemaata inii Wa yiba epo enaataa makii taa see kaa toogeekea. Ogatamee me aseta menaa ma, Yesus me daamaa yawegata menaa ma kuwa anii yaweganaa seta kuwa kaa mée me anii Patmos maga okogoo to kaa nadogeamaamea. ¹⁰Kiyoo toogeeka too ko kaawaa ena, Tuhan mee ebo ekee taa see naagoo Roh me anii pesee nakiyaagi naaki anii oko yaato kaama ebo mena wuu ena, ebo puusee da mokoo menaaki keenda, kisee yeetaa. ¹¹Wa me naseta menaa ko "A me diipe agiyoo kuwa uduma kapoge kaa ebeai. Ebeamaata kaama maga petoo to kaa Yesus mikee nao naadi kutuu taa see bagee yuwa manii. Kuwa ko Epesus magaa ma, Smirna magaa ma, Pergamus magaa ma, Tiatira magaa ma, Sardis magaa ma, Piladelpia magaa ma, Laodikia magaa ma kuwa magaa kaa Yesus mikee gaayaa bagee yuwa paagoo a me diipe agiyoo kuwa yaebea-manii" see nasigi.

¹² Anii kuwa menaa naawegataaki Mée to diino see naadi Wa yaato ikigi maataata kaama deeyaa naaki emas kaa pelita biyaa maagee yoo petoo topa. ¹³Kuwa pelita biyaa maagee yoo petoo to yupii da taa Mée ena, Mée Yogaa mee keenda tupi. Wa me maata dokaa togoo, badoo da kaa too. Bedaa ikigii to taa ko emas kaa doka mokoo see agiyoo podataata tupi.1:13 Dan 7:13¹⁴Wa me edooyuu yuwa ko poodee, domba wodaa iyuu see see. Wa me emaa yuwa biyaa gadaa da keenda. ¹⁵Wa me badoo wiya kuwa ko tembaga pose biyaa kaa yuwimaata kaama wisi-wisi taaka keenda. Wa me mena wuu da mee ko yiino ebo, uwo megea tugu-tugu siyaa mokoo. ¹⁶Wa me dagi yagaa da kaa okadee petoo peneasigi. Bedaa mowai woonee ena, naayaato-naayaato ekea paaya uguu see mowai mee Wa me ebee to kaa kaama kisee topoo petaata topa.1:16 Kristus Wa me ebee to kaa uguu see mowai topa mee ko Wa me menaa da mee ebea-ebea.1:16 Ep 6:17, Ibr 4:12 Wa me ebeyumaa da ko diino ebo, keno kusi-kusii da mée mumoo to kaa deeyaa mokoo. ¹⁷Anii Waa deeta kaama Wa me badoo da kaa esee-gapuunega, boota mée to mokoo totaa. Kiya Wa me dagi yagaa da ni kaa naekeata kaama nasiino, "Aa se wedaai. Anii toono mee ko idukaa petamanii kaama kisee too usii da ewo, ¹⁸kisee toono too Mée. Anii boota kiya nadeede. Anii aya andoo peeta kaama eto topa, kisee too iminoo miya, iminoo miya toono too. Mée boowoo see pesee da mee Ani me peedi kiyaata kemaata boota bagee toogee yoo kiyoo kenee to mee kabaano kunci kuwa Ni me yagaa da kaa topa. ¹⁹Kisee kemaata a me deepe agiyoo kuwa kapoge kaa ebeai. Bedaa eto ukuwaandaa taaka menaa yuwa ma, eto wodoo ukuwaandaa taapa menaa yuwa miya kuwa uduma ebeai. ²⁰Kuwa Ni me dagi yagaa da kaa okadee petoo to kuwa ma, emas pose kaa pelita biyaa maagee yoo petoo to kuwa ma kuwa a me deepe kiya mena nekeeniino yaato awee da kaa kakiyaano taa yoka eto kasiinaka, mee ko kisee: Okadee petoo to kuwa gaayu ko maga petoo to kaa Yesus mikee nao naadi kutuu taa see bagee yuwa paagoo Wa me menaa yaasegee see bagee petoo to kuwa ebea-ebea.1:20 Wa me menaa yaasegee see bagee petoo to kuwa mena nekeeniino yaato ko mena kegaa wiya agoo. Mena kegaa ena mee ko malaikat bagee petoo to kuwa. Bedaa mena kegaa ena mee ko mée petoo to kuwa. Bedaa pelita biyaa maagee yoo petoo to kuwa gaayu ko maga petoo to kaa Yesus mikee nao naadi kutuu taa see bagee yuwa kuwa ebea-ebea" see nasigi.

Yesus me Epesus magaa kaa mikee nagaayaa bagee yuwa paagoo naebeai naadi aseta menaa

¹Kuwa menaa naawegagi Mée to me nasiino, "Epesus magaa kaa Anii mikee nao naadi kutuu taa see bagee yuwa paagoo mena naasegee see mée to paagoo kisee okoo kaa naebeai:

’Waa kuwa okadee petoo to kuwa dagi yagaa da kaa penee see Mée mee, Waa kuwa emas pose kaa pelita biyaa maagee yoo yupii da taa peenaa see Mée Wa me kisiino menaa kuwa ko kisee: ²Ikii me ukuwayaa agiyoo kuwa uduma Anii ipi. Ikii kisee koogo makii taa see kaa kana ma ukuwawoo, toowoo segeekea kuwa miya Anii ipi. Dimi pedeo bagee me iyee kuwa ikii me be kaa se masiyaa. Okoo mée noonaa me wegaano, ’Anii ko Yesus me menaa yadoonaasi naadi nakiyaata mée yoka’ see wegageekea kiya taa. Ikii me okoo me menaa mikee ye, taa ye naadi kisee apaadee, kisee gaadee siyaa naaki makapaa menaa wegataa see bagee yuwa too see kuwa ikii nekeenegea. ³Bedaa ikii ae-wae segeekea kiya ikii dimi mena koogo animaata toogeekea kuwa miya Anii ipi. Ikii me Yesus ekaa da ebo nao naadi kaama dimi mena makii taa, dabaa kaano taa. ⁴Kuwa uduma daamaa kiya Anii mena ena ikii kaa agoo. Mee ko ikii me petamanii epa dimii mee ebo kiya eto taa, ikii me ekeasegea. ⁵Kisee kemaata ikii me petamanii daamaa epa gaawoo, umiwoo semea yoo kaama eto okaagea yoo too kuwa ikii nekeenii. Eto ko ikii me pedeo yuwa ekeata ikii me petamanii daamaa ukuwagee seta agiyoo kuwa bedaa ukuwaai. Ikii kisee se ukuwayu ko Anii meedoota ikii paagoo mee ikii me pelita biyaa maagee yoo ikii paagoo kaama kimasigiipa.2:5 Mee pelita biyaa maagee yoo see wegayu ko Epesus magaa kaa Yesus mikee nao naadi kutuu taa see bagee kuwa ebea-ebea yoka Yesus me "Mee pelita biyaa maagee yoo ikii paagoo kaama kimasigiipa" see menaa mee ko okoo uduma enaataa kutuu segee siyaa yuwa kuwa wuutu-waatu kisiyaapa yoka nekeenii naadi menaa mee.⁶Kisee kiya ikii kaa kiapaagee siyaa menaa kuwa miya agoo. Kuwa ko Nikolaus yaato bagee me ukuwagee siyaa agiyoo kuwa ikii be kegea. Okoo me pedeo agiyoo kuwa Anii miya be kega.

⁷Apa agoo see bagee kuwa daamaa yii. Roh me Yesus mikee nao naadi kutuu taa see bagee paagoo asiyaa menaa kuwa daamaa nekeenii. Pedeo dimii, pedeo menaa peedi kiyaata makii taa see kaa toowoo siyaa bagee kuwa paagoo Ogatamee Wa me Pirdaus magaa kaa daamaa aya mée tuyaayaa piyaa poo okoo nusi naadi Ani me maniita’ see menaa kuwa uduma naebeai" see nasigi yoka naadi kiebeamaaga.2:7 Kej 2:9, Why 22:14

Yesus me Smirna magaa kaa mikee nagaayaa bagee yuwa paagoo naebeai naadi aseta menaa

⁸Bedaa Wa me nasiino, "Smirna magaa kaa Anii mikee nao naadi kutuu taa see bagee yuwa paagoo mena naasegee see mée to paagoo kisee okoo kaa naebeai:

’Toono too Mée mee ko Waa idukaa petamanii kaama kisee too usii da ewo. Waa boota kiya aya andoo peeta Mée Wa me kisiino menaa kuwa ko kisee: ⁹Ikii me ae-wae, dimi gaagaa segeekea kuwa Anii ipi. Bedaa ikii daba see bagee toogeekea kuwa miya Anii ipi. Ikii ko daba bagee kiya ikii mikee senawii see bagee mokoo. Bedaa mée me kiwisinegeekea kuwa miya Anii ipi. Okoo me ’Inii mikee Yahudi bagee’ see wegageekea kiya okoo Ni yaato bagee se. Okoo Iblis yaato bagee yuwa too. ¹⁰Ikii gaayu ko ikii ae-wae, dimi gaagaa siyaa agiyoo agoo kaapa kiya se wedaai. Daamaa nekeenii: Ikii mée noonaa kisee kigaadee, kisee kiukuwadee see kuwa ikii kaa kiukuwaaniyaasi naadi Iblis me ikii digiyoo ee yiba kitameamaapi. Ikii unu gaasi ae-wae segee taapea. Kisee kiya ikii makii taa see kaa toowoo taai, mikee menaa se ekeasii, kisee too booyaa yoo too. Ikii kisee ukuwawoo, umiwoo siyu ko mumo kaa onee mee Anii ikii kaa miya kimaatagaata. Mee ko ikii iminoo miya, iminoo miya toowoo taatagea.

¹¹Apa agoo see bagee kuwa daamaa yii. Roh me Yesus mikee nao naadi kutuu taa see bagee paagoo asiyaa menaa kuwa daamaa nekeenii.

Pedeo dimii, pedeo menaa peedi kiyaata makii taa see kaa toowoo siyaa bagee kuwa okoo se pedeo kaapea, wiyaagoo to ma se bogaapea’ see menaa kuwa uduma naebeai" see nasigi yoka naadi kiebeamaaga.2:11 Why 20:14, 21:8

Yesus me Pergamus magaa kaa mikee nagaayaa bagee yuwa paagoo naebeai naadi aseta menaa

¹²Bedaa Wa me nasiino, "Pergamus magaa kaa Anii mikee nao naadi kutuu taa see bagee yuwa paagoo mena naasegee see mée to paagoo kisee okoo kaa naebeai:

’Waa mowai naayaato-naayaato ekea paaya uguu see mowai agoo see Mée Wa me kisiino menaa kuwa ko kisee: ¹³Ikii me toogee yoo Anii ipi. Kiyoo ko Iblis me ebo totaa see yoo. Kisee kiya ikii me Yesus ebo nao naadi Ni ekaa da mee napenee siwookea. Ikii me Yesus mikee nao see dimii mee miya se naekeata doowookea. Ni me menaa se naekeata daamaa kisee too nawegagee seta mée Antipas waa ikii me magaa kaa mée me wugimaamea kiya ikii makii taa. Kiyoo ko Iblis me toogee see yoo kiya ikii naekeasiino taa. ¹⁴Kisee daamaa kiya Anii mena wiya waa naa ikii kaa agoo. Mena ena mee ko Bileam boota wa me makapaa topeta menaa yayeetaa see bagee ikii yupii agoo. Bileam mee ko idukaa Israel bagee yuwa pedeo ukuwasi naadi wa me Balak paagoo "Okoo kisee menaa tupii, kisee asii" see aseta. Kuwa me kemaata Israel bagee yuwa makapaa ogatamee paagoo kupi-manee seta agiyoo kuwa noogee seta, tobaaka miya taagee seta. Ikii mée noonaa miya kisee agiyoo ukuwageekea.2:14 Bil 31:16, 2Pet 2:15-16¹⁵Bedaa Anii ikii kaa mena ena miya agoo. Mee ko Nikolaus me topeta menaa da penee see bagee kuwa miya ikii yupii agoo. ¹⁶Kuwa me kemaata ikii me pedeo yuwa ekeata Ogatamee ma dimii menaa kaa too umiwoo taai. Kuwa pedeo ukuwagee see bagee yuwa kisee agiyoo se ekeasiyu ko Anii moga meedoota okoo paagoo Ni me ebee to kaa topa mowai da mee me kuwa bagee yuwa ma yape aawogee taapa.

¹⁷Apa agoo see bagee kuwa daamaa yii. Roh me Yesus mikee nao naadi kutuu taa see bagee paagoo asiyaa menaa kuwa daamaa nekeenii. Pedeo dimii, pedeo menaa peedi kiyaata makii taa see kaa toowoo siyaa bagee kuwa paagoo Anii kuwa idukaa kaama booniwoo seta agiyoo manna mee okoo nusi naadi maniita. Bedaa okoo mée ena-ena poodee see omaa miya maniita. Kuwa omaa yuwa kaa gipii see ekaa yaebeamagaata. Kuwa omaa yuwa masiyaa bagee kuwa me too mee ekaa da ipi, apanaa bagee ewo’ see menaa kuwa uduma naebeai" see nasigi yoka naadi kiebeamaaga.2:17 Kel 16:14-15, Yoh 6:48-51

Yesus me Tiatira magaa kaa mikee nagaayaa bagee yuwa paagoo naebeai naadi aseta menaa

¹⁸Bedaa Wa me nasiino, "Tiatira magaa kaa Anii mikee nao naadi kutuu taa see bagee yuwa paagoo mena naasegee see mée to paagoo kisee okoo kaa naebeai:

’Ogatamee Yoopaa Wa me emaa mee ko biyaa gadaa da mokoo, bedaa Wa me badoo da miya tembaga pose biyaa kaa yuwimaata kaama wisi-wisi taaka keenda see Mée. Wa me kisiino menaa kuwa ko kisee: ¹⁹Ikii me ukuwayaa agiyoo kuwa uduma Anii ipi. Kuwa ko ikii me epa dimii ma, ikii me Anii mikee nagaayaa dimi ma, ikii me Ni kaa daamaa naukuwaano too dimii ma, bedaa ikii me makii taa see kaa toogeekea kuwa miya uduma Anii ipi. Mikee, ikii me petamanii daamaa ukuwagee seta agiyoo kuwa eebaa, bedaa mee wodoo miya ikii me eto daamaa ukuwageekea agiyoo kuwa esee maamaa eebaa see kuwa Anii kideega. ²⁰Kisee daamaa kiya Anii ikii kaa mena ena agoo. Mee ko mee Izebel see apii to mee ikii me wa me menaa kuwa daba wegayaata kaama yayeegeekea.2:20 Izebel see apii mee ko idukaa Israel kaa eboo Ahab me apii waa miya kisee ekaa agoo. Waa dimi pedeo see apii, Israel bagee yuwa Ogatamee me menaa si yayeesi naadi deebaa see apii.2:20 1Raj 16:31 Wa me "Anii nabi kaa apii" see wegageeka kiya pedeo menaa wegataa see apii too. Wa me pedeo menaa mée topegeeka kuwa me Ni me agiyoo naokagee see bagee yuwa deebaa segeeka. Wa me wegaano, ’Tobaaka taano dagu, makapaa ogatamee paagoo kupi-manee siyaa agiyoo kuwa miya naai’ see menaa kuwa mée topegeeka. ²¹Wa me pedeo dimii, pedeo menaa kuwa ekeasi naadi Ani me waa moga pedeo kiyaano taa. Kisee kiya wa me tobaaka kuwa ekeasiino be. ²²Kuwa me kemaata daamaa nekeenii. Mee apii wa me omegee see komoo da kaa kiyoo Ani me tameeyamaata kaama wa kaa boodi ebo yamiyaapa. Bedaa waa ma epo enaataa tobaaka taagee see bagee okoo miya kisee kaatagea. Okoo me kuwa waa ma pedeo ukuwanaa siyaa agiyoo kuwa se ekeasiyu ko okoo miya ae-wae, boodi ebo abaatagea. ²³Mee apii to wa sekaataa bagee kuwa miya Anii booyaapa. Anii kuwa wa me yogaa yuwa booyaata kaama kiyoo-kiyoo Yesus mikee nao naadi kutuu taa see bagee yuwa uduma me ’Mikee, Yesus Wa me mée me dimii, mée me menaa kuwa uduma ipiipi yadeetaa see Mée ii’ see kuwa nanekeeniipea. Anii ikii mée gakata ikii me ukuwagee seta agiyoo, daamaa agiyoo miya, pedeo agiyoo miya, kuwa agiyoo doodoo kiniita. ²⁴Kiya ikii Tiatira magaa kaa bagee apanaa yuwa kuwa mee apii to me mée topeta menaa yuwa peneasiino taa. Wa me wegaano, ’Inii Iblis me koogo boontaata menaa-panaa kuwa inii ipi see bagee kisi yoka niitupii’ see asegeeka kiya ikii mée noonaa me kuwa mée topeta menaa masemagaano taa. Kisee daamaa yoka Ani me kisiino ko: Ikii me kisee naukuwaai, kisee naukuwaai see menaa apanaa yuwa kuwa Anii ikii kaa se kidootagaapa. ²⁵Petamanii ikii paagoo daamaa kitupiwoo seta menaa kuwa too penee siwoo taai, kisee too Anii meeta yoo too.

²⁶Pedeo dimii, pedeo menaa peedi kiyaata kaama Ni me menaa too naukuwawoo, kisee too wodopasi yaato too umiwoo see mée to gaayu ko waa miya mée tomaa yuwa paagoo ebo tusi naadi pesee da mee Ani me waa maniita. ²⁷Mee ko kisee:

"Wa me pose tamoo da peneata mée tomaa yuwa paagoo omaago ma ebo toowoo taapi,

otaawee da kopaa tokoata gakumiyaa see see mokoo Waa kisee omaago ma ebo toowoo taapi" see menaa ebeamaata. Mzm 2:9

Neataagi me Anii mée tomaa yuwa paagoo ebo tusi naadi pesee da kisee neeta see see Ani me miya waa kisee ebo tusi naadi pesee da maniita.2:27 Kuwa idukaa ebeamaata menaa mee ko Israel magaa kaa ebo tota mée to kaa aseta menaa. Kuwa menaa wegawoo naadi kaama Yesus ebo tusi naadi Wa kaa uwa daata. Bedaa kuwa menaa wegawoo naadi kaama inii Yesus yaato bagee miya, inii pedeo dimii, pedeo menaa peedi kiyaata kaama Wa me agiyoo yaukuwawoo see bagee yuwa inii kaa miya uwa daata kaama ebo toowoo taatagea.²⁸Bedaa keno wogaa to see okadee to mee miya Anii maniita. ²⁹Apa agoo see bagee kuwa daamaa yii. Roh me Yesus mikee nao naadi kutuu taa see bagee paagoo asiyaa menaa kuwa daamaa nekeenii’ see menaa kuwa uduma naebeai" see nasigi yoka naadi kiebeamaaga.

Yesus me Sardis magaa kaa mikee nagaayaa bagee yuwa paagoo naebeai naadi aseta menaa

¹Bedaa Wa me nasiino, "Sardis magaa kaa Anii mikee nao naadi kutuu taa see bagee yuwa paagoo mena naasegee see mée to paagoo kisee okoo kaa naebeai:

’Ogatamee Wa me Dimi Noogaa Petoo to ma, okadee petoo to ma kuwa penee see Mée Wa me kisiino menaa kuwa ko kisee: Ikii me ukuwayaa agiyoo kuwa uduma Anii ipi. Mée me ikii aya topea ii see kideegea kiya ikii boota bagee mokoo. ²Kisee kemaata ikii anoogeedaa siweei. Ikii me daamaa ukuwayaa agiyoo kuwa Ni me Eboo Ogatamee emaa dagii da kaa sikii taa, daamaa ukuwatagaano taa, Anii kisee kideega. Ikii me daamaa ukuwayaa agiyoo kuwa imi taa kedaa naadi bogaano see koo taaka yoka kuwa agiyoo bedaa daamaa pesee ma ukuwagee taai. ³Ikii me daamaa ukuwayaa agiyoo kuwa sikii taa kemaata ikii me idukaa yeeta kaama daamaa masemaamea menaa kuwa neke-nekee taai, daamaa ukuwagee taai. Pedeo dimii, pedeo menaa kuwa ekeata Ogatamee ma dimii menaa kaa too umiwoo taai. Ikii se anoogeeyu ko Anii oma masenaa see mée to miyaa see see ikii paagoo kimeeta. Anii kimeeno mee ko ikii ewo yoka daamaa nekeenii.3:3 Luk 12:39-40, 1Tes 5:2⁴Kiya ikii Sardis magaa kaa bagee mée noonaa ko maga taa see dokaa maayaa mokoo okoo daamaa dimii, daamaa menaa kuwa maanaa siyaa, kisee okoo ekaato digimiyaano taa. Kisee bagee kuwa sikii see deega yoka Ani me okoo kaa poodee dokaa yamaataata kaama okoo Anii ma epo enaataa peenaa taatage. ⁵Pedeo dimii, pedeo menaa peedi kiyaata makii taa see kaa toowoo siyaa bagee kuwa okoo kaa kisee poodee dokaa yamaatagaata. Bedaa Ogatamee me tuyaabuu siwoo taatagi bagee yuwa ekaa yamaatagaa seta kapogee kaa okoo ekaa yuwa Anii si yawonaapeasiita. Okoo kisee bagee yoka Neataagi paagoo miya, Wa me malaikat bagee yuwa paagoo miya Anii okoo ekaa yuwa daamaa yawegaata.3:5 Mat 10:32⁶Apa agoo see bagee kuwa daamaa yii. Roh me Yesus mikee nao naadi kutuu taa see bagee paagoo asiyaa menaa kuwa daamaa nekeenii’ see menaa kuwa uduma naebeai" see nasigi yoka naadi kiebeamaaga.

Yesus me Piladelpia magaa kaa mikee nagaayaa bagee yuwa paagoo naebeai naadi aseta menaa

⁷Bedaa Wa me nasiino, "Piladelpia magaa kaa Anii mikee nao naadi kutuu taa see bagee yuwa paagoo mena naasegee see mée to paagoo kisee okoo kaa naebeai:

’Pedeo taa see Mée, mikee see Mée Wa me Daud me kunci mee peneasigi.3:7 Waa Daud me kunci mee peneasigi see mee mena nekeeniino yaato ko idukaa Daud mee Israel bagee yuwa paagoo ebo eetota. Mee mokoo miya Kristus mee Wa me bagee yuwa paagoo daamaa ebo eetoowoo see Mée. Wa me ebo toogee yoo kiyoo Wa me bagee yuwa kuwa too seemiyaayaa, kunci peneasigi mée to me seemiyaayaa mokoo see ebea-ebea mee. Wa me kene kabatayu ko mée ena me se munimaayaa, bedaa Wa me kene munitayu ko mée ena me kene se kabamaayaa, Waa kisee Mée. Wa me kisiino menaa kuwa ko kisee: ⁸Ikii me ukuwayaa agiyoo kuwa uduma Anii ipi. Ikii dabaa, ikii me pesee kuwa peenaa too, see kuwa miya Anii ipi. Kiya ikii Ni me menaa kuwa daamaa nayeetaa, naukuwataa segeekea, bedaa ikii me Ni ekaa da ebo nao naadi Anii nawisintagaano taa. Kisee kemaata daamaa nekeenii: Ani me kene ena kikabataata topa. Mee kenee to mée ena me se munimaayaa. ⁹Eto ko daamaa nayii. Iblis yaato kutuu taa see bagee yuwa agoo. Okoo me wegaano, ’Inii ko Yahudi bagee yoka’ see wegageekea kiya makapaa menaa too, okoo Ni yaato bagee yuwa se. Daamaa nekeenii: Kuwa bagee yuwa Ani me peedi kiyaata kaama okoo ikii me badoo yuwa kaa mumo esee-ekeata kaama ’Mikee, ikii Yesus me epa kigaayaa bagee yuwa ii’ see kisiipea. ¹⁰Ani me ikii paagoo ’Koogo makii taa see kaa toowoo taai’ see kiseta menaa kuwa ikii me daamaa nayeeta kaama makii taa see kaa toowookea. Kuwa me kemaata Anii ikii kitaamegee taapa. Mee ko magaa da kaa bagee uduma kaa mée gaadee siyaa agiyoo miyaabuu taano see koo taaka kiya Anii ikii emaa kaa kidogaapa. ¹¹Anii moga meeta yoka Ni me ikii kaa daamaa kidootaata yuwa kuwa uduma daamaa peneata doowoo taai. Taa gaayu ko Ni me ikii mumoo to kaa daamaa kimaatagaano see agiyoo mee ikii se masiipea. Mee agiyoo mee kimasegeeyaa yoka daamaa nekeenii.

¹²Pedeo dimii, pedeo menaa peedi kiyaata makii taa see kaa toowoo siyaa bagee kuwa Ni me Eboo Ogatamee Wa me ee yiba ee tukuu to mokoo Ani me daamaa weetagaata. Okoo kiyoo kaama se peeta kisee too Wa paagoo toowoo taatagea. Ni me Eboo Ogatamee Wa ekaa da Ani me okoo kaa yaebeamagaata, bedaa Ni me Eboo Ogatamee Wa me ebo kota magaa ekaa da mee miya Ani me okoo kaa yaebeamagaata. Mee ebo kota magaa mee ko Yerusalem gipii see magaa mee, epoo to wodoo Ogatamee paagoo kaama isiita magaa mee. Bedaa Ni me gipii see ekaa da mee miya Anii okoo kaa yaebeamagaata.

¹³Apa agoo see bagee kuwa daamaa yii. Roh me Yesus mikee nao naadi kutuu taa see bagee paagoo asiyaa menaa kuwa daamaa nekeenii’ see menaa kuwa uduma naebeai" see nasigi yoka naadi kiebeamaaga.

Yesus me Laodikia magaa kaa mikee nagaayaa bagee yuwa paagoo naebeai naadi aseta menaa

¹⁴Bedaa Wa me nasiino, "Laodikia magaa kaa Anii mikee nao naadi kutuu taa see bagee yuwa paagoo mena naasegee see mée to paagoo kisee okoo kaa naebeai:

’Wa ekaa da Ogatamee me Amin see ekaa munta Mée mee Waa mikee menaa se ekeata kisee too daamaa wegataa see Mée.3:14 Amin see ekaa da munta Mée mee ko Yesus mee. Ibrani menaa kaa Amin see wegayu ko kuwa mikee menaa ii see wegayaa. Ogatamee me ukuwaandaa siyaabuu taatagi agiyoo kuwa mikee Yesus doodoo ukuwayaabuu siwooki ii see kuwa nekeensi naadi kaama Amin see ekaa da mee Waa munta. Ogatamee me ogaataata agiyoo-pagiyoo kuwa uduma manii to mee Wa kaa too. Wa me kisiino menaa kuwa ko kisee: ¹⁵Ikii me ukuwayaa agiyoo kuwa uduma Anii ipi. Ikii gemoo miya taa, tani miya taa, yaayupii da kaa topea. Ikii gemoo too miya daamaa, ikii tani too miya daamaa, Anii kisee daamaa, ede. ¹⁶Ikii gemoo miya taa, tani miya taa, yaayupii da kaa topea kuwa me Ni me ebee to kaa kaama kiodeepeasiipa.3:16 "Ikii gemoo miya taa, tani miya taa, yaayupii da kaa topea" see mee mena nekeeniino yaato ko okoo me ukuwagee see agiyoo kuwa me Yesus dimi se wikimiyaayaa. Uwo naaki gemoo see uwoo miya daamaa, tani see uwoo miya daamaa kiya gemoo taa, tani taa, yaayupii da kaa uwoo kuwa me be kaa odeepeasiyaa, see ebea-ebea menaa mee.¹⁷Ikii me wegaano, ’Anii ko senawii, anii kepe yago mée yoka anii sikii taa agiyoo ena ma taa kaa toogeeka’ see wegageekea. Kiya taa, ikii pedeo yiba toogeekea yaai. Ikii ko daba bagee, emaa digiyoo, má tago, kisee toogee see bagee yuwa mokoo ii see kuwa ikii se nekeenegea. ¹⁸Ikii kisee bagee yoka Ni me kisiinaka menaa kuwa daamaa nayii, mee ko ikii mikee see senawii kesea naadi Ni paagoo emas kuwa naedaai. Ni me emas kuwa biyaa kaa yuwimaata kaama pedeo ena ma taa see emas kuwa. Bedaa ikii ego weda kaa má tago mokoo toogeekea kuwa awee da kaa se kideesi naadi poodee dokaa yuwa Ni paagoo naedaata kaama maatagaai. Kiyoo kaama ikii me emaa daamaa deesea naadi emaa kaa widimaano uwoo kuwa Ni paagoo naedaata kaama emaa kaa widimaai. ¹⁹Ni me kisee kisega kuwa ko Ani me epa gaayaa bagee kuwa okoo me pedeo yuwa gaamaasi naadi Ani me mena pesee kaa asetaa, okoo omaago ma topetaa siyaa. Kisee kemaata ikii me pedeo dimii, pedeo agiyoo kuwa anii taa kega naaki ou see dimii mee gaawoo taai. Ikii me pedeo yuwa uduma ekeata Nii ma dimii menaa kaa too daamaa umiwoo, toowoo taai. ²⁰Daamaa nekeenii: Anii kenee to kaa yiinaageeta tugu-tugu taaka. Ni me mena wuu da nayeeta kaama kenee to nakabataayaa mée to gaayu ko Anii wa paagoo seemeta kaama waa ma epo enaataa naano agiyoo naape.3:20 Luk 12:36-37

²¹Pedeo dimii, pedeo menaa peedi kiyaata makii taa see kaa toowoo siyaa bagee kuwa Ni me ebo animagaano yoo kiyoo Anii ma epo enaataa tuyaata. Anii miya kuwa pedeo yuwa peedi kiyaata makii taa see kaa toowoo seta kemaata Neataagi me ebo animagaano yoo kiyoo Anii miya Waa ma epo enaataa animaata topa. Mee see see okoo miya Ani me kisee ebo tuyaata.3:21 2Tim 2:12²²Apa agoo see bagee kuwa daamaa yii. Roh me Yesus mikee nao naadi kutuu taa see bagee paagoo asiyaa menaa kuwa daamaa nekeenii’ see menaa kuwa uduma naebeai" see nasigi yoka naadi kiebeamaaga.

Ogatamee mee yaapaagee seta kuwa dega-dega kaa deeta menaa

¹Kuwa menaa naseta kaama anii deeyaa naaki epoo to wodoo kene ena kabamaata topa. Ni me yumakaa yeepa mena wuu da mee see see anii bedaa yeetaa, ebo puusee da mee see see menaa naawegagi. Wa me menaa mee ko kisee: "Nakaayoo pakaanii. Eto asii taa ma taa ukuwaaniipa agiyoo kuwa anii kadeeyaanaka" see nasigi. ²Taka ena kisee ki Roh me anii pesee nakiyaata kaama epoo to wodoo ebo animagaano yoo komo ena agoo. Kiyoo ko Mée ena keenda animaata tupi. ³Kiyoo animaata totaa see Mée Waa diino ko esee ebo. Yaspis see omaa ma, sardis see omaa ma kisee epoo da esee diino daamaa see omaa mokoo wikiindaaka kuwa daamaa dimi nagi. Wa me ebo animagaano yoo kiyoo paatamo bobetaata topa, zamrud see omaa wikiindaa siyaa mokoo see see. ⁴Wa me ebo animagaano yoo geboo da taa ko apanaa ebo animagaano yoo komo mée oga ma wui kuwa miya topa. Kiyoo ko ebo bagee mokoo okoo mée oga ma wui animaata topea. Okoo poodee see dokaa maataata totaakea, mumoo to kaa emas kaa maayaa agiyoo miya agoo. ⁵Wa me ebo animagaano yoo yupii da kaa kaama bego-bego, ebo tukuu, keemuu kisee ukuwaandaa taaka agiyoo kuwa dimi nagi. Wa me ebo animagaano yoo ikigii to kaa peto petoo biyaa gada peetaaka. Kuwa peto petoo to kuwa ko Ogatamee me Dimi Noogaa Petoo to kuwa. ⁶Wa me ebo animagaano yoo ikigii to kaa uwo pikuu da keenda, uduma daamaa awee see kaca deeyaa mokoo, kristal omaa see see. Wa me ebo animagaano yoo kiyoo aya tookee agiyoo wui miya bobetaata topea. Okoo me maa to kaa ikigi yaato ma, okaato yaato ma emaa eebaa agoo. ⁷Aya tookee agiyoo petamanii mee waa ko singa wodaa mokoo. Wiyaagoo to mee ko sapi paiboo to mokoo. Wedaagoo to mee ko ebeyumaa da ko mée me ebeyumaa da mokoo. Wogeagoo to mee ko tokee see bedoo uwaanaa, peenaa siyaa mokoo. ⁸Kuwa aya tookee agiyoo wui kuwa ko kidikaa bedimi, maa to kaa emaa maamaa pudii, kidikaa yiba miya emaa agoo. Okoo egapi yaato miya, daatooyiba yaato miya se daata kisee too wegagee see menaa kuwa ko kisee:

"Pedeo taa, pedeo ena ma taa, kisee daamaa Wa too wigintaata pedeo ena ma taa see Mée, Se-pesee, We-pesee yago Mée Tuhan Ogatamee mee.

Toono Too Mée Waa idukaa kaama toowoo seta, eto miya totaaki, bedaa meetagi Mée mee" see menaa wegageekea.4:8 Yes 6:2-3

⁹Kuwa aya tookee agiyoo wui okoo me mee ebo animagaano yoo totaaki Mée mee, Waa iminoo miya, iminoo miya toono too Mée Wa too ebo, Wa too asii-sege, kisee kiiboo, paamee see menaa kaa yaapaageekea. Okoo me kuwa menaa yawegayaa kaboo ¹⁰kuwa ebo bagee mée oga ma wui kuwa okoo miya mee ebo animagaano yoo kiyoo totaaki Mée mee yaapaagee siyaa. Okoo Wa ikigii to kaa esee-gapuunta kaama mee kisee too iminoo miya, iminoo miya toowoo see Mée A too ebo nao naadi okoo me emas kaa mumoo to kaa maayaa agiyoo yuwa Wa me ebo animagaano yoo Wa ikigii to kaa beamaata ekeasiyaa. Okoo me wegayaa menaa ko kisee:

¹¹"O, Tuhan, inii me Eboo Ogatamee,

A too ebo, A too asii-sege, A too pesee yago Mée.

A me too se-agiyoo, we-agiyoo uduma ogaataata,

A me gaata-gaata doodoo kuwa uduma agoo kiyaata kaama topea kuwa me A too kaapaagee taano daamaa"

see menaa kuwa okoo me yawegageekea, see kuwa anii deepa.

Se kabasi naadi tabintaata agiyoo agoo see kapogee mee Domba Pooduu to me maseta kuwa deeta menaa

¹Kuwa kaboo da anii deeyaa naaki mee ebo animagaano yoo animaata totaaki Mée Wa me dagi yagaa da kaa bebenataata kapogee ena peneasigi. Mee kapogee da kaa naato miya, naato miya ekea paaya ebeamaata menaa agoo. Mée me mee kapogee se kabasi naadi tabintaata agiyoo petoo agoo. ²Bedaa anii deeyaa naaki malaikat bagee mée ena, omaago see mée mee tupi. Wa me mena ebo kaa wegaano, "Mee bebenataata kapogee da kaa tabintaata agiyoo kuwa oseepii naadi kabataayaa mée mee maamee naa ya? Aii bagee me ko peedi, sikii taa yoka" see wegagi. ³Mee kapogee kabataayaa mée taa. Epoo to wodoo bagee miya, magaa da kaa bagee miya, maga miyoo bagee miya okoo uduma sikii taa yoka mee kapogee kabataata kaama mee yiba diino bagee mée ena ma taa. ⁴Mee kapogee kabataata kaama mee yiba diino sikii kiyaa bagee mée ena ma taa naadi kaama anii yege ebo.

⁵Anii kisee yegee taaka too ko ebo bagee mée oga ma wui kuwa mée waa ena me nasiino, "Aa yegee see se. Deede, Yehuda apaa kaa Singa Wodaa see ekaa munta Mée mee, Daud ma apaa kaa Mée mee tupi. Se-pesee, we-pesee uduma Wa me daba, peedi ekeata yoka mee bebenataata kapogee da kaa tabintaata agiyoo petoo to kuwa oseepii semaata mee kapogee kabataayaa" see nasigi.

⁶Kisee nasigi naadi kaama anii deeyaa naaki mee ebo animagaano yoo geboo da kaa Domba Poodu ena yiinaageeta tupi. Kuwa aya tookee agiyoo wui kuwa ma, ebo bagee mée oga ma wui kuwa ma okoo me Domba Pooduu to gebo bobetaata topea. Mee Domba Pooduu to mee ko mée me wugimaata kaama totaaki keenda. Waa takuu apa petoo miya agoo, emaa masi petoo miya agoo. Kuwa emaa masi petoo to kuwa ko Ogatamee me Dimi Noogaa Petoo to kuwa. Kuwa Dimi Noogaa Petoo to kuwa Wa me uwoo to, magaa to uduma kaa peeyaata.5:6 Domba Pooduu to Waa takuu apa petoo to kuwa mena nekeeniino yaato ko Waa esee pesee yago Mée ebea-ebea. Kuwa emaa masi petoo to kuwa ko Roh mee, Ogatamee me kiyoo-kiyoo peeyaata Mée mee ebea-ebea.⁷Anii kisee deeta kaama mee Domba Pooduu to meedoota ebo animagaano yoo kiyoo animaata totaaki Mée paagoo Wa me dagi yagaa da kaa kapogee da mee masegeegi. ⁸Masegeeta kaama kuwa aya tookee agiyoo wui ma, ebo bagee mée oga ma wui ma kuwa uduma mee Domba Pooduu to Wa ikigii to kaa esee-gapumedaakea. Kuwa ebo bagee yuwa mée gakata musik kaa kecapi see agiyoo agoo, emas otaawee miya agoo. Kuwa emas otaawee yiba wunu daamaa peesi naadi agiyoo yeeyee topa. Kuwa agiyoo yeeyee kuwa ko Ogatamee me daamaa wa too wigintaata bagee okoo me sembahyang menaa ebea-ebea kuwa. ⁹Kuwa kaboo da kuwa Wa paagoo esee-gapumedaa sepea bagee yuwa okoo me gipii see yaayaa siyaa menaa ena yaayaakea, mee ko kisee:

"Mee kapogee da masegeeta kaama kuwa tabintaata agiyoo yuwa oseepeasiino kuwa

A me too daamaa, apanaa bagee me ko iyo.

Aa kawugimaata kaama A me tadaa uwoo kuwa me

Ogatamee me bagee yuwa kisi naadi Wa kaa yaedaamaata.

Mée tomaa gakata, mée apa gakata, mena tomaa gakata, maga gakata

kisee bagee yupii kaama A me edaamaata kaama daba peeyaabuu seta.5:9 1Pet 1:18-19

¹⁰A me okoo ebo toowoo see bagee mokoo kiyaata,

inii me Eboo Ogatamee Wa me agiyoo daamaa yaokageesi naadi imam bagee yuwa mokoo kiyaata.5:10 1Pet 2:5, Why 1:6

Okoo magaa da kaa ebo toowoo taatagea" kisee yaayaa taakea see kuwa anii deepa.

¹¹Bedaa anii deeyaa naaki malaikat bagee esee eebaa topea, se egamaayaa. Okoo me mee ebo animagaano yoo kiyoo aya tookee agiyoo yuwa ma, ebo bagee yuwa ma kuwa uduma bobetaata kaama mena wegataakea kuwa anii deetaa, yeetaa. ¹²Okoo me mena ebo kaa wegaano,

"Mée me wogeta Domba Pooduu to mee Wa too yaapaagee taano daamaa.

Waa pesee yago Mée, senawii ebo, ipi yago Mée, Wa too pesee,

Wa too ebo, Wa too asii-sege, kisee too ekee see Mée yoka Wa too yaapaagee siyaa" see wegagea.

¹³Kuwa kaboo da Wa me ogaataata yuwa kuwa uduma me Waa yaapaagee see menaa kuwa anii yeetaa. Kuwa ko epoo to wodoo topea yuwa ma, magaa da kaa topea yuwa ma, maga miyoo topea yuwa ma, maakaa piku yiba topea yuwa ma, kiyoo-kiyoo Wa me ogaataata yuwa kuwa uduma me wegaano,

"Ebo animagaano yoo animaata totaaki Mée mee ma,

Domba Pooduu to mee ma Ekea niiyaapaagee siweei.

Ekea too ebo, Ekea too asii-sege, Ekea too pesee kiwoo, ebo toowoo, kisee too iminoo miya, iminoo miya" see menaa wegagea.

¹⁴Kuwa kaboo da kuwa aya tookee agiyoo wui okoo me "Amin" see wegagea. Ebo bagee mée oga ma wui kuwa miya Wa paagoo esee-gapuunta kaama yaapaageekea, see kuwa anii deepa.

Kapogee da kaa tabintaata agiyoo yuwa oseepii seta menaa

¹Kiyoo kaama anii deeyaa naaki mee Domba Pooduu to me kuwa tabintaata agiyoo petoo to petamanii mee oseepeasigi. Kuwa kaboo da kuwa aya tookee agiyoo wui kuwa ena me mena ebo kaa "Meei" see wegagi menaa kuwa anii yeetaa, keemuu keenda. ²Kuwa kaboo da anii deeyaa naaki kuda wodaa ena tupi. Mee wodaa dagii da kaa animaata totaaki mée waa okaa ena peneasigi. Ebo bagee me mumoo to kaa magaakee agiyoo ena waa manegea. Yape tukuu see mée mokoo see see waa ma yape kiyaa bagee yuwa daba, peedi ekeasiino see naadi peegi.

³Kiyoo kaama Domba Pooduu to me kuwa tabintaata agiyoo wiyaagoo to mee oseepeasigi naaki kuwa aya tookee agiyoo wiyaagoo to mee me "Meei" see wegagi menaa kuwa anii yeetaa. ⁴Kuwa kaboo da kuda wodaa ena ma peegi, biyaa ipu epoo da keenda see wodaa. Mee wodaa dagii da kaa animaata totaaki mée wa me magaa da kaa mée aaemee-emee see dimii kuwa yataa kiyaata kaama okoo aawogeesi naadi pesee da waa manegea. Togoo mowai woonee da mee miya waa manegea.

⁵Kiyoo kaama Domba Pooduu to me kuwa tabintaata agiyoo wedaagoo to mee oseepeasigi naaki kuwa aya tookee agiyoo wedaagoo to mee me "Meei" see wegagi menaa kuwa anii yeetaa. Kuwa kaboo da anii deeyaa naaki digiyoo see kuda wodaa ena tupi. Mee wodaa dagii da kaa animaata totaaki mée wa me yagaa da kaa edo ye, etaa ye naadi deekee agiyoo ena peneasigi.6:5-6 Edo ye, etaa ye naadi deekee agiyoo peneasigi see mee mena nekeeniino yaato ko wa me naano agiyoo taa uwaa miyaapi. Miyaata kaama wodoo naano agiyoo kuwa kilo ena ko kepe eebaa kuwa me too edaayaa, see ebea-ebea mee.⁶Kuwa kaboo da kuwa aya tookee agiyoo wui kuwa yupii da taa kaama mena wuu da keenda anii yeetaa. Mee kuda wodaa dagii da kaa animaata totaaki mée to paagoo wegata menaa kuwa ko kisee: "Gandum poo kilo ena gaayu ko ebo kepee me too, agiyoo ukuwaano egapi ena kaa masiyaa kepee kuwa me too edaayaa. Bedaa jelai poo kuwa miya kilo wedo gaayu ko ebo kepee me too, agiyoo ukuwaano egapi ena kaa masiyaa kepee kuwa me too edaapea. Kisee kiya minyak zaitun poo ma, anggur poo ma kuwa a me se pedeo kiyaai, ekeasii" see asigi menaa kuwa anii yeetaa.

⁷Kiyoo kaama Domba Pooduu to me kuwa tabintaata agiyoo wogeagoo to mee oseepeasigi naaki kuwa aya tookee agiyoo wogeagoo to mee me "Meei" see wegagi menaa kuwa anii yeetaa. ⁸Kuwa kaboo da anii deeyaa naaki aguu epoo da keenda see kuda wodaa ena tupi. Mee wodaa dagii da kaa animaata totaaki mée ekaa da ko Bogaano. Bedaa Boota Bagee Toogee Yoo see ekaa yago mée uuto obeegi. Magaa da kaa bagee mée eebaa boosi naadi pesee da ekea manegea. Magaa da kaa bagee uduma se kiya mée tomaa kutuu wui wuditaata kaama kutuu wogeagoo to mee kutuu booyaapea. Okoo bogaapea kuwa ko mowai me miya, naadi kaa miya, mée kaa meaniyaa agiyoo kaa miya, mée daakee agiyoo kaa miya kisee agiyoo kuwa kaa mée eebaa boosi naadi pesee da ekea manegea.

⁹Kiyoo kaama anii deeyaa naaki Domba Pooduu to me kuwa tabintaata agiyoo idibeagoo to mee oseepeasigi naaki Ogatamee paagoo agiyoo ekega-manee taa see yoo miyoo taa kitaa mée me booyaata bagee okoo dimi noogaa yuwa topea. Okoo Ogatamee me menaa daamaa peneata yawegawoo seta kemaata booyaata. ¹⁰Okoo maamaa mena ebo kaa wegaano, "Se-pesee, We-pesee yago Mée, pedeo ena ma taa see Mée, mikee dimii yago Mée wae. Magaa da kaa bagee okoo me inii mée booyaataa to mokoo da A me mantaata kaama modee mée yamasiipe kuwa maadee mani kaapa naa ya?" see asegea. ¹¹Kuwa bagee mée gakata togoo see dokaa manegea, epoo da poodee see dokaa kuwa. Okoo paagoo aseta menaa kuwa ko kisee: "Ikii peenaa tooi. Ikii me Ni me agiyoo yuwa daamaa naukuwagee naadi kaama mée me ikii kibooyaamea see see ikii ma Yesus yiba ena kenaa bagee apanaa miya kisee booyaabuu siwoo taapea, kisee too Ani me ’Kuwa booyaata bagee kuwa sikii’ see dimii gaayaa naagoo too yoka ikii peenaa tooi" see asigi menaa kuwa anii yeetaa.

¹²Kuwa kaboo da anii deeyaa naaki Domba Pooduu to me tabintaata agiyoo bedimeagoo to mee oseepeasigi naaki maga pigii ebo mega, kenoo to mee digiyoo taki, woda iyuu me iyata digiyoo see dokaa epoo da see see, bedaa keno agoo da mee miya tadaa epoo da keenda kega.6:12-13 Mat 24:29¹³Epoo to kaa okadee yuwa magaa da kaa segeata eseaneekea. Ara piyaa poo duwo see otaa yuwa ebo boo me kisee ki daata eseanee siyaa see see okadee yuwa miya kisee eseaneekea. ¹⁴Epoo to ko kapoge iyee da bebenamaata totaaka see see taa keepeasega, ewo. Bedaa maga kuye-paye yuwa ma, maga okogo yuwa ma kuwa uduma okoo me totaa see yoo kaama bikimedoota amaa kaa doo-peega. ¹⁵Kuwa kaboo da magaa da kaa bagee yuwa ebo, peedi uduma weda kaa oodaakea. Ebo tookee bagee yuwa ma, ebo ekaa yago bagee yuwa ma, okaa yago bagee me eboo yuwa ma, senawii bagee yuwa ma, pesee yago bagee yuwa ma, hamba kiyaata bagee yuwa ma, hamba kiyaano taa see bagee yuwa ma okoo uduma oodoota beapa yiba pe-sekeendaakea, kuye kaa oma togaawee yiba miya kiyoo-kiyoo okoo ekaato boondaakea. ¹⁶Okoo me wegaano, "Mee ebo animagaano yoo animaata totaaki Mée Wa me ebeyumaa da kaa kaama mée booneano see yoka kuwa maga kuyee yuwa ma, oma yuwa ma kuwa me inii mée dapimaai. Bedaa Domba Pooduu to Wa me kagoo ebo kuwa me miya inii mée dapimaano too daamaa.6:16 Luk 23:30¹⁷Ekea me kagoo kuwa awee da kaa kiyaano see monaa kaa kega yoka daba toomaayaa see mée ena agoo ye?" see menaa wegagea, see kuwa anii deepa.

Israel bagee okoo mée seratus empat puluh empat ribu kaa menaa

¹Kuwa kaboo da anii deeyaa naaki malaikat bagee mée okoo wui topea. Bo se misi naadi maga butu yaato wui kiyoo okoo mée ena-ena yiinaageeta topea. Magaa da kaa miya, maakaa pikuu da kaa miya, piya yuwa kaa miya bo se misi naadi taamege-taamege see ukuwagea. ²Kuwa malaikat bagee wui kuwa Ogatamee me okoo magaa to ma, maakaa piku ma kuwa pedeo kiyaasi naadi pesee da manigi. Kuwa kaboo da anii deeyaa naaki malaikat bagee mée ena ma keno pakagi yaato kaama pakagi. Toono Too Mée Ogatamee me bagee ii see nekeensi naadi pe-tabeasiyaa agiyoo da mee malaikat see mée to me doopi. Wa me kuwa apanaa malaikat bagee okoo wui paagoo mena ebo kaa asiino, ³"Maakaa piku ma, magaa to ma, piya yuwa ma kuwa eto kiipaa se pedeo kiyaai. Inii me Eboo Ogatamee mee kuwa Wa me agiyoo yaokagee see bagee yuwa okoo Wa me bagee yuwa ii see nekeensi naadi agiyoo mee okoo me etaguu to kaa yatabeasiino taa yoka kuwa agiyoo eto kiipaa se pedeo kiyaai" see asigi. ⁴Kuwa kisee nekeensi naadi agiyoo yatabeata bagee yuwa okoo uduma egataayaa naaki mée seratus empat puluh empat ribu. Okoo kuwa ko Israel bagee mée apa gaasi ma wiya kaa bagee yuwa. ⁵Kuwa yatabeata bagee kuwa ko Yehuda apaa kaa bagee mée dua belas ribu, Ruben apaa kaa bagee mée dua belas ribu, Gad apaa kaa bagee mée dua belas ribu, ⁶Asyer apaa kaa bagee mée dua belas ribu, Naptali apaa kaa bagee mée dua belas ribu, Manasye apaa kaa bagee mée dua belas ribu, ⁷Simeon apaa kaa bagee mée dua belas ribu, Lewi apaa kaa bagee mée dua belas ribu, Isakar apaa kaa bagee mée dua belas ribu, ⁸Zebulon apaa kaa bagee mée dua belas ribu, Yusup apaa kaa bagee mée dua belas ribu, Benyamin apaa kaa bagee mée dua belas ribu. Kuwa ko Wa me bagee yuwa ii see nekeensi naadi agiyoo okoo kaa yatabeata bagee yuwa.

Mée eebaa kutuu seta kuwa deeta menaa

⁹Kuwa kaboo da anii deeyaa naaki mée eebaa kutuu semaata topea, se egamaayaa. Mée tomaa gakata, mée apa gakata, maga gakata, mena tomaa gakata kisee tomaa bagee kuwa okoo ebo animagaano yoo kiyoo Domba Pooduu to ikigii to kaa yiinaageeta topea. Okoo togoo see dokaa, epoo da poodee see dokaa maataata totaakea. Okoo me yagaa da kaa palem see piyaa kagoo yuwa peneata topea. ¹⁰Okoo me mena ebo kaa wegaano,

"Daba mée daagimaa peeyaano Mée mee ko ebo animagaano yoo animaata totaaki Mée inii me Eboo Ogatamee mee,

bedaa Domba Pooduu to Waa miya kisee Mée" see menaa wegagea.

¹¹Malaikat bagee kuwa uduma okoo ebo animagaano yoo kiyoo aya tookee agiyoo wui ma, ebo bagee mée oga ma wui ma kuwa gebo bobetaata topea. Okoo ebo animagaano yoo ikigii to kaa esee-gapuunta Ogatamee yaapaageekea. ¹²Okoo me wegaano,

"Amin! Inii me Eboo Ogatamee Wa too ebo, Wa too asii-sege, Wa too ipi yago Mée yoka inii kiiboo, paamee see dimii kaa niiyaapaagee taai.

Waa esee omaago, Se-pesee, We-pesee yago Mée mee, kisee too iminoo miya, iminoo miya. Amin" see menaa wegagea.

¹³Kiyoo kaama kuwa ebo bagee kuwa ena me nasiino, "Kuwa poodee togoo see dokaa maataata topea bagee kuwa maamee? Okoo kayoo kaama megea naa ya?" see nasigi. ¹⁴Ani me waa asiino, "Neataagi, a too ipi" see asega. Wa me nasiino, "Kuwa bagee kuwa ko mée me esee maamaa wegee-wegee seta kaboo makii taa see kaa toogee seta bagee yuwa. Okoo me togoo see dokaa yuwa kuwa Domba Pooduu to Wa me tadaa uwoo yiba wetogemaata kaama poodee kiyaata.7:14 Mat 24:21, 1Yoh 1:7, Why 22:14¹⁵Kuwa me kemaata okoo egapi yaato miya, daatooyiba yaato miya Ogatamee me ebo animagaano yoo ikigii to kaa yiinaageeta Wa me ee kaa agiyoo daamaa yaokagee siwoo see. Bedaa mee ebo animagaano yoo animaata totaaki Mée Wa me okoo taamegee taano see naadi okoo paagoo epo enaataa eetoowoo taapi. ¹⁶Mee kaama wodoo okoo naano agiyoo ma, uwo ma kuwa se naadi kaapea, bedaa keno tani kaa ae-wae siyaa kuwa miya taa, biyaa tani yaai see kuwa miya taa. ¹⁷Mee ebo animagaano yoo semoo to kaa Domba Pooduu to mee tupi yoka okoo gaagaa taa. Domba wodaa munitaa see mée mokoo Wa me okoo mée aya tuyaayaa uwoo mumaa to kaa kiyoo eepootagi. Okoo me emaa kaa yegee uwoo yuwa uduma Ogatamee me yawonaapeasiitagi" see kuwa wa me nasigi.7:16-17 Mzm 23:1-2, Yoh 4:14

Kuwa tabintaata agiyoo petaagoo to mee oseepeata menaa

¹Kuwa kaboo da Domba Pooduu to me kuwa kapoge kaa tabintaata agiyoo yuwa petaagoo to mee oseepeasigi naaki epoo to wodoo mena ena ma taa, kisee setengah jam mokoo kuwa koogo totaa see. ²Kuwa kaboo da anii deeyaa naaki Ogatamee ikigii to kaa malaikat bagee petoo to kuwa yiinaageeta topea. Ebo puusee petoo okoo gakata manegea.

³Kuwa kaboo da malaikat bagee mée ena ma peedoota Ogatamee paagoo agiyoo ekega-manee taa see yoo geboo da kaa kiyoo peemaata kaama yiinaageeta totaaki. Waa wunu daamaa peeyaa agiyoo yeeyee biyaa iyee taano see naadi emas otaawee ena peneasigi. Kuwa agiyoo yeeyee eebaa Ogatamee paagoo biyaa iyeesi naadi waa manegea. Bedaa kuwa Ogatamee me daamaa wa too wigintaata bagee uduma okoo me sembahyang menaa yuwa ma enaataa aatabi taagi. Aatabi taata kaama Ogatamee me ebo animagaano yoo ikigii to kaa emas kaa wunu daamaa peeyaa agiyoo yeeyee biyaa iyee taa see yoo kiyoo kuwa agiyoo yuwa enaataa biyaa iyeetaaki. ⁴Kuwa wunu daamaa peeyaa agiyoo yuwa ma, Ogatamee me daamaa wa too wigintaata bagee okoo me sembahyang menaa yuwa ma kuwa biyaa kaa yuwitaagi naaki biyaa utuu da mee malaikat see mée to wa me yagaa da kaa otaawee yiba kaama Ogatamee paagoo pakaamaaga. ⁵Kuwa kaboo da mee malaikat see mée to me mee biyaa yuwitaa see yoo biyaa masegeeta kaama emas otaawee da yiba awetaagi. Awetaata kaama magaa da kaa tamekomeegi naaki keemuu, tukuu ebo, bego-bego, maga pigii, kisee agiyoo eebaa kedaaka kuwa dimi nagi, kisee ukuwaanega see kuwa anii deepa.

Puusee wui kuwa puu seta menaa

⁶Kuwa kaboo da kuwa puusee petoo to agoo see malaikat bagee kuwa okoo puusee taano see naadi koo taakea.

⁷Malaikat bagee petamanii mee wa me puusee da puu asigi naaki es dekaa, oma patagu keenda see dekaa agoo kedaaka. Kuwa agiyoo ma, biyaa ma, tadaa ma kuwa uduma aatabi naadi kaama magaa da kaa tamekomeegi. Tamekomeeta kaama maga ena biyaa me poonooga, maga wiya kisee taa, maga ena biyaa me poonooga, maga wiya kisee taa, kisee magaa da kaa maga wedaagoo to yaato magaa kuwa biyaa me pooneepeasega. Piya yuwa uduma wedaagoo to yaato piyaa kuwa miya biyaa me poonooga. Boobaa yuwa uduma miya kisee biyaa me poonooga.

⁸Kuwa kaboo da malaikat bagee wiyaagoo to mee wa me puusee da puu asigi naaki apanaa agiyoo mokoo, biyaa ebo, maga bagoo to biyaa peetaaka keenda. Kuwa uduma maakaa piku yiba tamekomeegi naaki maakaa pikuu da wedaagoo to yaato uwoo kuwa tadaa kedaaka. ⁹Maakaa piku yiba aya tookee agiyoo uduma wedaagoo to yaato agiyoo kuwa miya boodaakea. Kapal komaa yuwa kuwa uduma miya wedaagoo to yaato kapal kuwa pedeo kedaaka.

¹⁰Kuwa kaboo da malaikat bagee wedaagoo to mee wa me puusee da puu asigi naaki okadee damaa to, peto gada peetaaka see deeyaa mokoo epoo to kaa kaama magaa da kaa eseanigi. Uwo yuwa uduma wedaagoo to yaato uwoo yuwa kaa eseanigi, uwo muma uduma wedaagoo to yaato uwo muma yuwa kaa miya eseanigi. ¹¹Mee okadee to ekaa da ko Uu. Kuwa uwoo yuwa kaa eseanigi naaki wedaagoo to yaato uwoo kuwa uu kedaaka. Kuwa uwoo yuwa uu kedaaka kemaata mée eebaa noomaata kaama boodaakea.

¹²Kuwa kaboo da malaikat bagee wogeagoo to mee wa me puusee da puu asigi naaki epoo to kaa ago peeyaakee agiyoo yuwa dakamegea mokoo. Dakamemaata kaama peenaa digiyoo takiinega. Kenoo to wedaagoo to yaato ma, keno agoo da wedaagoo to yaato ma, okadee yuwa wedaagoo to yaato ma kuwa se wikiindaakea naadi peenaa digiyoo takiinega. Egapi yaato awee kuwa wedaagoo to yaato ago se peega, daatooyiba miya wedaagoo to yaato ago peeyaakee agiyoo kuwa ago se peega.

¹³Kuwa kaboo da anii deeyaa naaki tokee see bedoo ena epaawee da taa uwaanaa, peenaaka. Wa me mena ebo kaa wegaano, "Yaai, pedeo nao, pedeo nao. Kuwa malaikat bagee apanaa wedoo to okoo me puusee yuwa puusee taano see kookea yoka magaa da kaa bagee kuwa pedeo kaanakea yaai" see wegagi menaa kuwa anii yeetaa.

Puusee idibeagoo to mee puu seta menaa

¹Kuwa kaboo da malaikat bagee idibeagoo to mee wa me puusee da puu asigi. Anii deeyaa naaki epoo to kaa kaama okadee ena magaa da kaa eseanigi. Mee okadee to kunci ena manegea. Mee kunci mee me maga yiba paa yuwa dooyamoo taa see komoo to mee kabayaa. ²Mee esee togoo see komoo to kabataagi naaki biyaa utuu dimi nagi, ebo puu biyaa utuu pakadaa siyaa see see mokoo komo yiba kaama pakaga. Kuwa biyaa utuu kuwa me kenoo to ma, epaawee da ma kuwa uduma digiyoo aatakiika. ³Kuwa kaboo da kuwa biyaa utuu yuwa yiba kaama sebaaya ebo etaa magaa da taa peedaakea. Pesee see agiyoo okoo manegea, magaa da kaa kidimisi me boodi kiyaasi naadi pesee da mee mokoo manegea. ⁴Kuwa sebaaya yuwa paagoo aseta menaa mee ko kisee: "Magaa da kaa boobaa yuwa ma, piya yuwa ma kisee iyaakee agiyoo kuwa se pedeo kiyaai. Mée yuwa okoo me etaguu to kaa Ogatamee me bagee ii see nekeensi naadi agiyoo tabeasiino taa bagee kuwa too boodi abaayaai" see aseta menaa kuwa. ⁵Kuwa sebaaya yuwa paagoo "Kuwa bagee yuwa booyaai" see asiino taa. Keno idibi kuwa esee boodi ebo abaayaai see mee too ekeasegea. Kuwa boodi kuwa esee ebo, kidimisi me mée daayaa see see. ⁶Kuwa keno idibi yiba kuwa uduma mée me ’Yaai, bogaano too daamaa’ see gaawoo taapea kiya se bogaapea, ae-wae, boodi too abaawoo taapea. Okoo me ’Anii booga naaki ou’ see dimii mee gaawoo taapea kiya bogaano yaato ko katu se, togoo kaata.

⁷Kuwa sebaaya kuwa ko kuda wodaa yuwa yape paagoo pe-degaawee taano see naadi ipiipii semaata totaakea mokoo. Kuwa sebaaya yuwa okoo me mumoo to kaa ebo bagee me emas kaa magaakee agiyoo mokoo agoo. Okoo me ebeyumaa yuwa ko mée me ebeyumaa da mokoo. ⁸Okoo me edooyuu yuwa kuwa ko api me edooyuu mokoo. Okoo me ego yuwa kuwa ko singa wodaa me ego yuwa mokoo. ⁹Okoo ikigii to kaa toopusi naadi agiyoo maataata totaakea, pose dokaa mokoo. Okoo me kidikaa tukuu da mee ko esee ebo, kuda komaa eebaa yape kaa peeyaa mokoo tukuu da keenda. ¹⁰Pogaa da yaato ko kidimisi kapii to mokoo. Mée daayu ko boodi esee ebo. Kuwa okoo me kapi yaato pesee da kuwa me keno idibi kuwa mée esee boodi ebo kiyaabuu segee taapea. ¹¹Kuwa sebaaya okoo me eboo mee ko malaikat bagee mée ena, esee togoo see komoo yiba tuyaa bagee me eboo mee. Wa ekaa da ko Ibrani menaa kaa Abadon, Yunani menaa kaa ko Apolion.9:11 Abadon see ekaa ma, Apolion see ekaa ma kuwa wegayu ko mée pedeo kiyaabuu taa see mée see ekaa mee.

¹²Pedeo yamiyaayaa agiyoo kuwa petamanii etaa mee anii deepa yoka sikii. Mee kaama asii pedeo agiyoo eta wiya miya meepa.

Puusee bedimeagoo to mee puu seta menaa

¹³Kuwa kaboo da malaikat bagee bedimeagoo to mee wa me puusee da puu asigi naaki Ogatamee ikigii to kaa emas kaa biyaa yuwitaa see yoo kiyoo butu wui yuwa kaa takuu apaa to mokoo see see takumeta agiyoo kuwa kaa kaama mena wuu ena anii yeetaa. ¹⁴Mee mena wuu da me mee puusee yago malaikat bagee bedimeagoo to mee paagoo asiino, "Ebo uwoo Eprat dee kaa kiyoo one gadimetaata malaikat bagee wui kuwa one pee-yaekegatagaai" see asigi. ¹⁵Kisee asigi naadi wa me kuwa malaikat bagee wui to kuwa one pee-yaekegataagi. Yaekegataata kaama okoo me mée tomaa uduma wedaagoo to yaato bagee pe-booyaasi naadi peeyaagi. Kisee ukuwaanega mee ko idukaa kaama Ogatamee Wa me epeekaa mee jam kaa, mee naagoo, mee kenoo kaa, mee tahun yiba kisee ukuwaaniyaabuu taata see gaata-gaata doodoo ipiipii seta kemaata kuwa malaikat bagee wui to kuwa one pee-yaekegataagi. ¹⁶Kuwa kaboo da anii deeyaa naaki kuda wodaa dagii da kaa animaata yape paagoo peetaakea bagee mée esee maamaa eebaa. Kuwa yape paagoo peetaakea bagee uduma egataayaa naaki mée dua ratus juta, see wegagea menaa kuwa anii yeetaa. ¹⁷Kuwa ni me dega-dega kaa kuda wodaa yuwa ma, kuda wodaa dagii da kaa animaata totaakea bagee yuwa ma kuwa diino ko kisee: Kuwa kuda wodaa dagii da kaa animaata totaakea bagee okoo ikigii to kaa pose dokaa maataata totaakea. Kuwa agiyoo kuwa epoo yuwa ko kapoo, biyaa ipu epoo da mokoo, bedaa dadi poo see see epoo da ma, keenaa ma kisee epoo yuwa mokoo. Kuda wodaa kuwa mumo yuwa ko singa wodaa me mumoo to keenda. Okoo ebeawee kaama biyaa ma, utuu ma, wunu pedeo see biyaa noogaa ma wedo kuwa peetaaka. ¹⁸Kuwa mée pedeo kiyaayaa agiyoo wedoo to kuwa me mée tomaa uduma wedaagoo to yaato bagee kuwa booyaagea. Kuwa kuda wodaa yuwa biyaa ma, utuu ma, wunu pedeo see biyaa noogaa ma wedo kuwa okoo ebeawee kaama peetaaka agiyoo kuwa me ¹⁹okoo me mée booyaano pesee da agoo. Okoo ebe yaato ma, poga yaato ma kiyoo okoo me pesee da topa. Okoo me poga yuwa ko mée daakee otoogiyoo mumoo to mokoo yoka okoo me poga yuwa me mée pedeo kiyaayaa.

²⁰Mée tomaa yuwa wedaagoo to yaato bagee yuwa okoo kuwa mée pedeo kiyaayaa agiyoo kuwa me booyaagea, apanaa yuwa ko booyaano taa. Kisee kiya kuwa booyaano taa bagee okoo me pedeo yuwa ekeasiino taa. Okoo me paa yuwa ma, makapaa ogatamee yuwa ma kuwa ebo ekee, yaapaagee siyaa kuwa ekeasiino taa. Kuwa ko okoo me emas pose ma, perak pose ma, tembaga pose ma, oma ma, piya ma kuwa agiyoo kaa okoo me yagaa me makapaa ogatamee ebea-ebea ipiipii siyaa agiyoo kuwa ebo ekee, yaapaagee segeekea. Kuwa ipiipii seta agiyoo kuwa ko emaa me diino naka, apa me yiino naka, bado me peenaa taano naka, kisee se ukuwamaayaa agiyoo kiya okoo me ekeasiino taa. ²¹Bedaa mée wugiino, deo, tobaaka, oma masiino, kisee agiyoo kuwa miya kuwa booyaano taa bagee yuwa me ekeasiino taa.

Malaikat see mée to me bebenataata kapogee ena Yohanes nusi naadi manta menaa

¹Kuwa kaboo da anii deeyaa naaki pesee yago malaikat bagee mée ena ma epoo to wodoo kaama isigi. Waa sinu uwaa da me podamaaga, mumo dagii da kaa paatamo ena topa. Wa me ebeyumaa da ko keno kusi-kusi peetaaka keenda, wa me badoo yuwa ko maga tukuu yuwa biyaa peetaa siyaa mokoo. ²Wa me yagaa da kaa peedi see kapogee ena, bebenataata kapogee ena kegataata topa. Wa me bado dagi yaato ko maakaa piku dagii da kaa batageasigi, bado eka yaato ko maayoo kaa batageata totaaki. ³Waa omaago ma ebo menaa-menaaki, singa wodaa menaa siyaa mokoo. Waa menaaki naaki keemuu kaagaa petoo miya tukuuka, mena wuu keenda. ⁴Kuwa keemuu petoo to me wegapea menaa kuwa anii ebeanaka dimii mee agoo kiya epoo to wodoo kaama mena wuu ena anii yeetaa, mee ko "Kiipaa se, kuwa keemuu petoo to me wegapea menaa kuwa eto awee da kaa se kisi yoka koogo boontagaai, kiipaa se ebeai" see nasigi.

⁵Kuwa kaboo da mee malaikat see mée to mee, waa bado ena maakaa pikuu da kaa, bado ena maayoo kaa kisee weetaata totaaki mée wa me dagi yagaa da epoo to yaato yagaataata kaama wegaano, ⁶"Anii Ogatamee ekaa weega yoka taa ma taa kisee ukuwaaniipa, kisee ukuwaaniyaapi" see menaa kuwa wegagi. Mee ko Waa iminoo miya, iminoo miya toono too Mée, epoo to ma, magaa to ma, maakaa piku ma kuwa ogaataata Mée, bedaa kuwa yiba tuyaa agiyoo-pagiyoo yuwa miya uduma ogaataata Mée Wa ekaa da weakee kaa wa me wegaano, "Monaa da mee asiige se tagaa siwoo taapa. ⁷Malaikat bagee petaagoo to wa me puusee da puu asiitagi naagoo kuwa Ogatamee me ’Anii kisee ukuwaaniyaabuu taata’ see koogo dimi yiba gaata yuwa kuwa awee da kaa ukuwaaniyaabuu taatagi. Mikee, Wa me agiyoo daamaa yaokagee see bagee, nabi bagee kuwa paagoo aseta-aseta kuwa uduma uwa daaniyaabuu taatagi" see wegagi.

⁸Kuwa kaboo da mee yumakaa epoo to wodoo kaama yeepa mena wuu da mee kaagaa ena ma nasiino, "Mee malaikat see mée to mee, waa bado ena maakaa piku dagii da kaa, bado ena maayoo kaa kiyoo batageata totaaki mée mee wa me yagaa da kaa kegataata topa kapogee da mee pe-masii" see nasigi.

⁹Kisee nasigi naadi kaama anii peedoota mee malaikat see mée to paagoo "Mee kapogee peedi to mee nii" see asega. Wa me nasiino, "Mee kapogee masegeeta naai. A me daabaa to boodi, uu kakiyaapa kiya a me ebee to kaa ko gii daamaa agiyoo, degee kegoo uwoo nuyaa mokoo kaapa" see nasigi. ¹⁰Anii mee wa me yagaa kaa peedi kapogee mee masegeeta nuyaa naaki mikee, ni me ebee to kaa gii daamaa, degee kegoo uwoo mokoo. Kiya nookomeeyaa naaki daabaa to boodi, uu kega. ¹¹Mee kapogee nookomeeta kaama ni paagoo naseta menaa kuwa ko kisee: "Ogatamee me mée eebaa okoo kaa kisee yaukuwaapi, kisee yaukuwaaniyaapi see menaa kuwa aa kaagaa ena ma eewegaai. Kuwa ko Wa me mée tomaa-tomaa yuwa ma, maga tomaa-tomaa yuwa ma, mena tomaa-tomaa yuwa ma, magaa da kaa ebo tookee bagee yuwa ma kuwa uduma paagoo kuwa okoo kaa yaukuwaaniyaapi menaa kuwa eewegaai" see nasigi.

Ogatamee me aseta menaa yaweganaa see bagee ekea wiya deeta menaa

¹Kuwa kaboo da tamo ena, togoo-katu ebeadee siyaa tamoo da mokoo ena anii neeta kaama naseta menaa ko "Anoogeeta peedoota Ogatamee me ee kaa peemaata kaama mee ee ma, Wa paagoo agiyoo kupi-manee taa see yoo ma kuwa mee tamoo da me ebeadee taai. Bedaa kiyoo Ogatamee ebo ekee, yaapaagee see bagee kuwa miya egadee taai. ²Kiya Wa me ee yoo da kaa tapaato yaato kuwa se ebeadii. Kuwa yoo da kaa tapaato yaato magaa kuwa uduma Waa ewo see bagee yuwa paagoo ekegataata magaa kemaata keno mée wiya ma wiya kuwa okoo me mee Wa me daamaa wa too wigintaata kota magaa mee bado batagi-patagi segee naadi pedeo kiyaabuu taatagea.11:2 Luk 21:24³Okoo me kisee ukuwataakea kaboo mée ekea wiya, mena naweganaa see bagee wiya kuwa unu seribu dua ratus enam puluh Ni me menaa naweganaasi naadi pesee da ekea maniita. Ekea dimi boodi kaa karung see see ponee yuwa maataata kaama mena nawegagee taatagea" see nasigi.11:2-3 Keno mée wiya ma wiya (42) kuwa ko tahun wedo ma ebe kuwa. Bedaa unu seribu dua ratus enam puluh kuwa miya tahun wedo ma ebe see kuwa.

⁴Kuwa mée wiya kuwa ko zaitun piya wodo wiya ebea-ebea, bedaa pelita biyaa maagee yoo wiya kuwa miya ebea-ebea. Ekea ko magaa da kaa se-agiyoo, we-agiyoo uduma me Eboo Tuhan mee ikigii to kaa totaa see bagee wiya.11:4 Kuwa zaitun piya wodo wiya ma, pelita biyaa maagee yoo wiya ma kuwa ko idukaa nabi Zakharia wa me miya kuwa agiyoo yuwa dega-dega kaa deeta. Mena nekeeniino yaato ko mée ekea wiya Roh pesee da kaa Ogatamee me agiyoo daamaa yaukuwataa, Wa me menaa daamaa yawegataa see bagee wiya kuwa ebea-ebea.11:4 Zak 4:3,11-14⁵Kuwa mée wiya kuwa mée me wegee-wegee taano see dimii mee agoo kiyu ko ekea me ebeawee kaama biyaa gada pudumega naaki ekea ma yape kiyaa bagee yuwa uduma poonooga siyaa. Mée me ekea wegee-wegee taanaka see dimii gaayaa bagee kuwa kisee taa ma taa bogaapea. ⁶Pesee agiyoo kuwa ekea kaa manta kemaata ekea Ogatamee me aseta menaa kuwa yaweganaaka too deka se wisi naadi epoo to yaato muntagaa siyaa pesee da mee miya ekea agoo. Uwo yuwa kuwa tadaa kiyaayaa pesee da mee miya ekea agoo. Magaa da kaa se-pedeo, we-pedeo miyaabuu siyaa pesee da mee miya ekea agoo. Ekea me kisee ukuwaanaka see dimii gaayaa kaboo kisee agiyoo agoo kiyaayaa.

⁷Ekea me mena yaweganaa siyaa kuwa uduma sikii, daamaa yawegataagea kaboo paa yuwa dooyamoo taa see komoo yiba kaama pedeo see agiyoo damaa to pakaatagi. Pakaamaata kaama waa omaago yoka kuwa bagee wiya ma yape aawogee naadi kaama ekea peedi kiyaata booyaatagi. ⁸Ekea booyaata kaama ekea boota kopaya wiya kuwa ebo kota magaa kaa etaa da kaa aii kisee ekeasiitagea. Mee ebo kota magaa mee ko ekea epoo Mée Tuhan mee piya bokoo to kaa paku wugitaata magaa mee. Mee magaa mee ko Sodom magaa ma, Mesir magaa ma kuwa magaa wiya ebea-ebea kuwa.11:8 Sodom magaa ma, Mesir magaa ma kuwa Ogatamee me bagee yuwa wegee-wegee seta magaa wiya. Kota Yerusalem magaa kaa miya mée me nabi bagee yuwa ma, Yesus ma kuwa wogeta.⁹Ekea boota kopaya wiya kuwa mée me ogo se magaai naadi kaama unu wedo ma ebe etaa da kaa aii ekeasiitagea. Kuwa kaboo da mée tomaa-tomaa yuwa ma, mée apa tomaa-tomaa yuwa ma, mena tomaa-tomaa yuwa ma, maga tomaa-tomaa yuwa ma kisee tomaa-tomaa bagee kuwa uduma me ekea boota kopaya wiya kuwa aii deegee taatagea. ¹⁰Ekea wiya boogea naadi kaama mée tomaa-tomaa uduma esee ede kaatagea. Kuwa mée wiya bogaano taa kaboo ekea me kuwa magaa da kaa toogee see bagee yuwa okoo kaa ae-wae, boodi abaataa see agiyoo eebaa yamiyaabuu semea kuwa me okoo ede ma, ede ma ebo pesta noogee taatagea, maniyaa agiyoo miya ede kaa aii aamanee taatagea. ¹¹Kisee kiya unu wedo ma ebe omemaata kaama Ogatamee me ekea aya tuyaano see naadi dimi noogaa da ekea yiba seemiyaagi naaki ekea anoogeegea. Ekea deeta bagee uduma weda ebo kegea. ¹²Kuwa kaboo da epoo to wodoo kaama ebo mena wuu ena ekea yeegea, mee ko "Nakaayoo pakaai" asigi naaki ekea sinu yiba epoo to wodoo pakagea. Ekea be kepea bagee yuwa me pakaa-diitookea.

¹³Kuwa kaboo da taka ena maga pigii ebo mega. Mee kota magaa kuwa gaaseagoo to yaato magaa pedeo kedaaka. Ee yuwa bugumedaa naadi kaama mée eebaa, tujuh ribu kuwa boogea. Bogaano taa bagee yuwa weda ebo kaa epoo to wodoo Ogatamee yaapaageekea.

¹⁴Pedeo yamiyaayaa agiyoo wiyaagoo to etaa mee anii deepa yoka sikii. Wedaagoo to etaa mee miya moga meepa.

Puusee petaagoo to mee puu seta menaa

¹⁵Kuwa kaboo da malaikat bagee petaagoo to mee wa me puusee da puu asigi naaki epoo to wodoo kaama ebo mena wuu yuwa kuwa anii yeetaa, kuwa ko kisee:

"Eto kaama wodoo uwoo to, magaa to uduma

inii epoo Mée Tuhan mee ma, Wa me wigintaata Mée Ebo Kristus mee ma Ekea too ebo mée eetoowoo taatagea,

kisee too iminoo miya, iminoo miya" see wegagea.

¹⁶Kuwa kaboo da kuwa ebo bagee mée oga ma wui kuwa okoo me ebo animagaano yoo komoo yuwa kaa kaama esedoota Ogatamee ikigii to kaa esee-gapuunta kaama yaapaageekea. ¹⁷Okoo me wegaano,

"Se-pesee, We-pesee yago Mée Tuhan Ogatamee mee inii kiiboo, paamee see kasege.

Aa ko Toono too Mée, idukaa kaama toowoo see Mée, eto miya totaake Mée.

Eto ko A me ebo pesee da mee me

uwoo to, magaa to uduma A too awee da kaa ebo mée eetoowooke kuwa me inii kaapaageeke.

¹⁸Mée tomaa-tomaa yuwa okoo me Aa kakagoo kegea

kiya eto A me kagoo kuwa awee da kaa kega.

Eto ko boota bagee yuwa wigintagaa see monaa kaa kega,

bedaa daamaa kaukuwagee setaa to mokoo da maniino monaa kaa kega.

Kuwa ko A me agiyoo kaokagee see bagee yuwa, nabi bagee kuwa ma,

A ekaa da ebo kaekee see bagee yuwa ma, kisee A me daamaa wa too wigintaata bagee uduma

ebo miya, peedi miya okoo me daamaa kaukuwagee setaa to mokoo da maniino monaa kaa kega.

Bedaa uwoo to, magaa to pedeo kiyaabuu siyaa bagee kuwa miya okoo pedeo kiyaano monaa kaa kega" see kuwa okoo me yaapaageekea menaa.

¹⁹Kuwa kaboo da epoo to wodoo kiyoo Ogatamee me ee mee kene kabataata kaama piya gupumaa to awee da kaa topa. Mee ko idukaa Ogatamee me mena kamu gaasi kuwa oma tabegea wiya kaa ebeamaata menaa kuwa kiyoo awemaata topa see gupumaa to mee. Kuwa kaboo da bego-bego dimi nagi, tukuu da esee ebo, keemuu, maga pigii, oma patagu keenda see es dekaa, kisee agiyoo kuwa uduma agoo kedaaka, see kuwa anii deepa.

Apii to ma, yoogi damaa to mokoo see agiyoo ma kuwa deeta menaa

¹Kuwa kaboo da epoo to kaa agiyoo ena, mée me awee da kaa nekeensi naadi diino ebo see agiyoo agoo kega. Mee ko api ena, doka maayaa mokoo wa me maa to kaa kenoo to maataata totaaka. Wa me badoo da miyoo taa keno agoo da topa, bedaa wa me mumoo to kaa ebo bagee me maayaa agiyoo mokoo okadee gaasi ma wiya kuwa miya maataata topa. ²Waa yoga kadapoo. Yoga kabaano see koo taaka yoka boodi esee ebo kaa ebo menaa-menaa taaka. ³Kuwa kaboo da epoo to kaa mée me awee da kaa nekeensi naadi agiyoo ena ma agoo kega. Mee ko esee ebo see agiyoo ena, yoogi damaa to mokoo, biyaa ipu epoo da mokoo. Mee agiyoo da mumo kegaa petoo, takuu apa gaasi. Mumo petoo to kuwa gakata kaa ebo tookee bagee me maayaa agiyoo maataata totaakea. ⁴Wa me pogaa da me epoo to kaa okadee yuwa kuwa wedaagoo to yaato okadee yuwa magaa da kaa eseaniyaabuuki, kisee tamekomeeki. Kiyoo kaama mee agiyoo damaa to me mee yoga kabaano see koo taaka apii to mee ikigii to yaato yiinaageeta totaaki. Mee apii to wa me yogaa to kabamaaga kaboo yogaa to nootagaano see naadi toomuu taaki. ⁵Mee apii to yoga kabamaaga naaki paayogaa yogaa. Mee yogaa to mee ko pose tamoo da peneata mée tomaa uduma paagoo omaago ma ebo eetoowoo taatagi Mée mee. Yoga kabamaata kaama mee yogaa to kisee ki yaageeta Ogatamee paagoo Wa me ebo animagaano yoo kiyoo Waa miya ebo tusi naadi dogeatoo. ⁶Kuwa kaboo da mee apii to ebo mee maga ugii da kaa ooga. Kiyoo ko unu seribu dua ratus enam puluh mee apii to daamaa deewoo, muniwoosi naadi Ogatamee me yaipiipii seta magaa mee.

Yoogi damaa to mokoo see agiyoo da mee daba, peedi kiyaata menaa

⁷Kuwa kaboo da epoo to wodoo kaama yape aawogeekea. Mikhael mee ma, wa yaato malaikat bagee yuwa ma okoo enaataa mee yoogi damaa to mokoo see agiyoo da ma, wa yaato malaikat bagee yuwa ma aawogeekea. ⁸Kiya mee agiyoo damaa to dabaa naadi kaama waa ma, wa yaato bagee yuwa ma epoo to wodoo se tusi naadi abagakomeegea. ⁹Mee agiyoo damaa to mee ko idukaa miya tota otoogiyoo da mee. Wa ekaa da ko paa damaa to mee, Iblis see ekaa mee miya munta mée mee, magaa da kaa bagee uduma deebaa see mée. Waa ma, wa yaato malaikat bagee yuwa ma okoo enaataa magaa da kaa tamekomeegea.12:9 Kej 3:1, Yoh 8:44

¹⁰Kuwa kaboo da taa ko epoo to wodoo kaama ebo mena wuu ena anii yeetaa, mee ko kisee:

"Iblis waa kisee tamekomeegea kemaata eto ko inii me Eboo Ogatamee Wa me bagee yuwa daba daagimaa peeyaano monaa kaa kega.

Wa too pesee, Wa too ebo toono kuwa eto awee da kaa kiyaagi.

Bedaa Wa me wigintaata Mée Ebo Kristus mee miya pesee kiwoo, ebo toowoo taapi.

Okoo inii ma Yesus yiba ena kenaa bagee yuwa kaa pedeo yawegaa-wegaa see mée mee ko

waa Ogatamee ikigii to kaa egapi yaato miya, daatooyiba yaato miya kisee too pedeo menaa okoo kaa yawegawoo segeeki kiya waa epoo wodoo kaama tamekomeegea.

¹¹Domba Pooduu to tadaa peeta kuwa me Yesus yaato bagee yuwa me waa daba, peedi kiyaagea,

bedaa okoo me Yesus kaa daamaa yawegawoo seta menaa kuwa me miya waa daba, peedi kiyaagea.

Kuwa bagee kuwa ko okoo ekaato okoo me gaata-gaata kuwa kaa too obeewoo, umiwoo taano ou see dimii mee gaano taa,

mée me nabooyaapea kaapa miya koosi see dimii mee too gaawoo, umiwoo see bagee yuwa.12:10-11 Kis 20:23-24, 1Yoh 5:4-5

¹²Iblis mee kisee tamekomeegea yoka ikii epoo to wodoo topea bagee yuwa ede ma, ede ma siweei.

Kiya ikii magaa da kaa bagee ma, maakaa piku kaa bagee ma kuwa uduma ikii pedeo kaapea nao.

Iblis mee ikii paagoo eseemaagi yoka yaai.

Wa me pesee kuwa taa kiyaano monaa da katu kega see kuwa waa ipi kigi yoka kagoo ebo" see wegagi menaa kuwa anii yeetaa.

¹³Mee yoogi damaa to mokoo see agiyoo da wa me magaa da kaa natamekomeegea nao see gaata kaama paayogaa kabata apii to mee obeenaaki. ¹⁴Mee agiyoo damaa to mee, otoogiyoo damaa to mokoo see agiyoo da wa me kisee obeenaaki kiya mee apii to tokee damaa to kidikaa wiya manegea. Waa ebo mee maga ugii da kaa mee agiyoo damaa to se peemaayaa see yoo kiyoo daba oosi naadi kidikaa goo-maneegea. Kiyoo ko tahun wedo ma ebe kuwa waa daamaa deewoo, muniwoosi naadi Ogatamee me daamaa yaipiipii seta magaa mee. ¹⁵Kuwa kaboo da mee otoogiyoo damaa to mokoo see agiyoo da ebeawee kaama uwo ebo, uwo dee isiyaa mokoo mee apii to gaada-gaada uwo yaisiyaagi. Mee apii to uwo me doosi naadi kisee ukuwagi. ¹⁶Kisee kiya mee apii to daba peesi naadi magaa to kabaanta kaama mee agiyoo damaa to me isiyaagi uwoo yuwa maga yiba seomega. ¹⁷Kuwa me kaama mee yoogi damaa to mokoo see agiyoo da me mee apii to mee kagoo kaa apii to me asii-kaba-kaba seta bagee apanaa yuwa ma yape eemasiino see naadi peegi. Apii to wa me yogaa kuwa ko Ogatamee me menaa daamaa yayeewoo, yaukuwawoo see bagee yuwa, Yesus kaa yawegataa see menaa kuwa daamaa peneata doowoo see bagee yuwa. ¹⁸Kiyoo kaama mee agiyoo damaa to maakaa piku geboo da kaa yiinaageeta totaaki, see kuwa anii deepa.

Maakaa piku yiba kaama pedeo see agiyoo damaa to pakaanta menaa

¹Kuwa kaboo da anii deeyaa naaki pedeo see agiyoo dama ena, takuu apa gaasi, mumo kegaa petoo see agiyoo damaa to maakaa pikuu da yiba kaama pakaanigi. Wa me takuu apa kuwa gakata kaa ebo tookee bagee me maayaa agiyoo agoo. Mumo yuwa kaa Ogatamee wisineekee ekaa yuwa ebeamaata topa. ²Mee ani me deeta agiyoo damaa to mee ko esee omaago. Diino ko macan tutul see wodaa deeyaa mokoo. Badoo da ko beruang wodaa badoo da mokoo. Ebee to ko singa wodaa ebee to mokoo.13:2 Dan 7:4-6 Mee pedeo see agiyoo damaa to mee miya ebo tusi naadi mee yoogi damaa to mokoo see agiyoo da me waa pesee yakiyaagi, wa me ebo animagaano yoo kiyoo waa animaayaagi. ³Waa mumo kegaa petoo to kuwa mumo ena ko abuu esee ebo agoo, mée booyaa see abuu keenda kiya abuu taa kega. Magaa da kaa bagee uduma dimi nagimeamoo naadi kaama mee agiyoo damaa to wa sekaataa peegea. ⁴Mee yoogi damaa to mokoo see agiyoo da me mee apanaa agiyoo damaa to ebo tusi naadi pesee yakiyaagi kemaata magaa da kaa bagee yuwa me waa yaapaageekea, bedaa mee wa me pesee yakiyaagi agiyoo damaa to mee miya yaapaageekea. Okoo me wegaano, "Mee pesee yakiyaata agiyoo damaa to mee see see bagee waa ena agoo ye? Waa ma yape masiyaa bagee maamee naa ya?" see wegageekea.

⁵Mee agiyoo damaa to ebo poga-poga kaa Ogatamee wisineekee menaa wegasi naadi pesee da wa kaa mantaata topa. Bedaa waa keno mée wiya ma wiya kuwa ebo toogeesi naadi pesee da mee miya wa kaa mantaata topa.

⁶Kisee pesee da wa kaa topa kemaata waa pedeo menaa wegageeki. Wa me Ogatamee ma, Wa ekaa da ma, Wa me toono yoo ma, epoo to wodoo totaa see bagee yuwa ma okoo uduma wisinegeeki. ⁷Wa me kuwa Ogatamee me daamaa wa too wigintaata bagee yuwa ma yape masegee naadi kaama okoo daba, peedi kiyaayaa pesee da mee miya wa kaa mantaata topa. Bedaa mée tomaa gakata, mée apa gakata, mena tomaa gakata, maga gakata kuwa bagee uduma paagoo mee agiyoo damaa to ebo toogeesi naadi pesee da mee miya wa kaa agoo. ⁸Magaa da kaa bagee uduma okoo me mee agiyoo damaa to ebo ekee, yaapaagee taatagea. Kiya Domba Pooduu to mee, mée me wugitaata Mée Wa me kapogee kaa okoo ekaa yuwa yamaata bagee yuwa okoo me kisee se ukuwaatagea. Okoo ko Ogatamee me okoo aya toowoosi naadi idukaa petamanii agiyoo-pagiyoo uduma ogaataata kaboo kaama ekaa yamaata bagee yuwa. Okoo ekaa yuwa yamagaano taa bagee yuwa me too mee agiyoo damaa to ebo ekee, yaapaagee taatagea.

⁹Apa agoo see bagee daamaa yii. ¹⁰Okoo yape bagee me yaadoo peesi naadi ipiipii seta bagee kuwa taa ma taa yape bagee me okoo yaadoo poopea. Bedaa okoo mowai me daapiisi naadi ipiipii seta bagee kuwa miya taa ma taa mowai me daapii taapea. Kuwa me kemaata Ogatamee me daamaa wa too wigintaata bagee yuwa kuwa okoo miya kisee ae-wae siyaa kaboo okoo koogo makii taa, Yesus mikee gaawoo, umiwoo, toowoo taano gaano pedeo.

Pedeo see agiyoo apanaa ena ma maga yiba kaama pakaanta menaa

¹¹Kuwa kaboo da anii deeyaa naaki ebo agiyoo dama apanaa ena ma maga yiba kaama pakaanigi. Waa takuu apa wiya agoo, domba poodu takuu apa mokoo kiya mena wuu da ko yoogi damaa to mokoo see agiyoo da me wegataa see mokoo wegataaki. ¹²Mee wiyaagoo to agiyoo damaa to mee ko mee petamanii agiyoo damaa to me waa ebo tusi naadi pesee yakiyaagi. Pesee yakiyaata kaama mée me mee pedeo see agiyoo damaa to petamanii mee yaapaageesi naadi wa me pesee ma agiyoo yaukuwageeki. Kuwa agiyoo yaukuwagee naadi kaama magaa da kaa bagee uduma okoo me mee petamanii agiyoo damaa to, mee ebo abuu meanta kaama taa keta agiyoo damaa to mee ebo ekee, yaapaageekea. ¹³Mee wiyaagoo to agiyoo damaa to wa me mée me mikee gaasi naadi dimi nagii-nagii agiyoo ukuwayaabuuki. Wa me mée uduma emaa dagii da kaa biyaa epoo to kaa kaama magaa da kaa isiyaagi. ¹⁴Wa me mee petamanii agiyoo damaa to waa ebo ii see gaasi naadi dimi nagii-nagii agiyoo yaukuwaano pesee da kuwa wa kaa manta kemaata wa me magaa da kaa bagee yuwa deebaaki. Wa me kuwa magaa da kaa bagee yuwa asiino, "Mee agiyoo damaa to yaapaagee taano see yoka waa see see ebea-ebea agiyoo ena niiipiipii taai" see asigi. Mee petamanii agiyoo damaa to mee ko mowai me daata abuu mee agoo, mée booyaa see abuu kiya bogaano taa. ¹⁵Mee waa see see ebea-ebea agiyoo da ipiipii semaata kaama mee pedeo see agiyoo damaa to wiyaagoo to mee pesee agiyoo wa kaa manegea. Wa me pesee da me wa me mee petamanii agiyoo damaa to see see ebea-ebea ipiipii seta agiyoo da mee aya tuyaata kaama mena wegayaagi. Mee ebea-ebea ipiipii seta agiyoo mee ebo se ekee see bagee kuwa uduma wa me booyaai see menaa asigi kaboo okoo booyaagea. ¹⁶Bedaa mee wiyaagoo to agiyoo damaa to wa me kuwa magaa da kaa bagee yuwa okoo mikee, mee petamanii agiyoo damaa to wa yaato bagee yuwa ii see nekeensi naadi pe-tabeasiyaa agiyoo mee masisi naadi wa me omaago ma okoo asiino, "Ikii uduma, ebo miya, peedi miya, senawii miya, daba miya, hamba kiyaata bagee miya, hamba kiyaano taa see bagee miya ikii uduma mee pe-tabeasiyaa agiyoo mee masii. Dagi yagaa da kaa masiino miya daamaa, etaguu to kaa masiino miya daamaa" see asigi. ¹⁷Kisee asigi naadi mee agiyoo damaa to petamanii mee wa yaato bagee ii see nekeensi naadi tabeata agiyoo masiino taa bagee gaayu ko okoo agiyoo edaano miya iyo, agiyoo pe-doogee taano miya iyo. Mee agiyoo damaa to wa ekaa da okoo kaa ebeata bagee kuwa too waagii. Mee ko wa ekaa da hurup yuwa doodoo nomor egayaa yuwa kuwa okoo kaa ebeamaata bagee yuwa me too agiyoo daba edaagee, pe-doogee siyaa.

¹⁸Kuwa ni me deeta agiyoo kuwa dimi ipi see bagee yuwa daamaa nekeenii. Mee agiyoo damaa to wa ekaa da doodoo hurup egayaa yuwa kuwa ko mée ena ekaa da doodoo yoka ikii dimi yago bagee yuwa daamaa egaai. Kuwa egayaa yuwa kuwa ko 666 kuwa.13:17-18 Mee agiyoo damaa to wa ekaa da hurup yuwa doodoo nomor egayaa yuwa kuwa mena nekeeniino yaato ko wa ekaa da hurup ena kisee nomor egataa, bedaa hurup ena kisee nomor egataa. Kuwa wa ekaa da hurup doodoo nomor yuwa kuwa uduma egataayaa naaki mee agiyoo damaa to Wa me nomor mee ko 666.

Domba Pooduu to ma, Wa me daba daagimaa peeyaata bagee yuwa mée seratus empat puluh empat ribu ma kuwa deeta menaa

¹Kuwa kaboo da anii deeyaa naaki Domba Pooduu to mee Sion Kutuu to kaa yiinaageeta tupi. Mée eebaa, seratus empat puluh empat ribu kuwa miya Waa ma epo enaataa topea. Wa ekaa da ma, Waataagi ekaa da ma kuwa okoo me etaguu to kaa yaebeamaata totaakea. ²Kuwa kaboo da epoo to kaa kaama tuku ebo see kuwa anii yeetaa, uwo megea tugu-tugu siyaa mokoo, ebo keemuu tukuu da mokoo. Kuwa mena wuu da yiino ko mée me kecapi see agiyoo baa-baa siyaa mokoo. ³Kuwa okoo mée eebaa kuwa etokaa gipii see menaa ena yaayaa taakea. Okoo me Ogatamee Wa me ebo animagaano yoo ikigii to kaa kiyoo aya tookee agiyoo wui ma, ebo bagee mée oga ma wui kuwa ma okoo ikigii to kaa kisee yaayaa taakea. Mee gipii see yaayaa taakea menaa mee ko mée me se ipi kiyaa, kuwa mée seratus empat puluh empat ribu kuwa me too topemaata kaama yaayaa siyaa. Okoo ko Ogatamee me magaa da kaa bagee yupii da kaa kaama daamaa pekageeta kaama daba peeyaata bagee yuwa. ⁴Okoo pedeo taa see bagee yuwa, api ma epo enaataa toono taa see bagee yuwa.14:4 "Okoo api ma epo enaataa toono taa see bagee yuwa" see mee mena nekeeniino yaato ko mena kegaa wedo agoo. Mena kegaa ena mee ko api tapoo toogee seta bagee. Mena kegaa ena mee ko tobaaka taano taa bagee yuwa. Bedaa mena kegaa ena mee ko makapaa ogatamee si yaapaagee see bagee yuwa ebea-ebea. Mee pedeo see agiyoo damaa to ma, makapaa ogatamee apanaa yuwa ma kuwa yaapaagee taano mee ko inii Yesus me apii mokoo bagee kemaata tobaaka taayaa mokoo. Okoo kisee api ma epo toono taa bagee mokoo ebea-ebea mee. Domba Pooduu to Wa me kiyoo-kiyoo peenaa siyaa kuwa uduma okoo miya Wa sekaataa peenaa see. Okoo ko Ogatamee me mée tomaa yuwa yupii da kaa kaama daamaa pekageeta kaama daba peeyaata bagee yuwa. Bugi kaa agiyoo petamanii daagee siyaa yuwa kuwa Ogatamee paagoo daamaa ekega-manee siyaa see see kuwa daamaa pekageeta kaama daba peeyaata bagee yuwa okoo miya Ogatamee ma, Domba Pooduu to ma Ekea paagoo daamaa ekega-manee seta bagee yuwa. ⁵Okoo ebeawee kaama makapaa menaa ena ma taa, okoo kaa pedeo menaa ena miya taa, okoo kisee bagee yuwa.

Malaikat bagee okoo wedo me wegata menaa

⁶Kuwa kaboo da anii deeyaa naaki malaikat bagee mée ena miya tupi. Waa epaawee da taa uwaanaa, peenaaki. Wa me weganaa see menaa kuwa ko Yesus me daamaa doometa menaa, Wa me iminoo miya, iminoo miya toono too menaa kuwa. Wa me kuwa menaa yuwa magaa da kaa bagee uduma paagoo ase-maniino see naadi uwaanaa, peenaaki. Wa me maga gakata, mée tomaa gakata, mena tomaa gakata, mée apa gakata kuwa bagee uduma paagoo aseeyamooki. ⁷Wa me mena ebo kaa asiino, "Ikii Ogatamee Wa too weda, Wa too ebo ekee siweei. Wa me mée tomaa yuwa wigintagaano monaa kaa kega yoka Waa yaapaagee siweei. Epoo to ma, magaa to ma, maakaa piku ma, uwo muma yuwa ma kuwa uduma ogaataata Mée mee ebo ekee, yaapaagee siweei" see menaa weganaa, peenaa segeeki.

⁸Kuwa kaboo da malaikat bagee petamanii mee wiyaagoo to mee waa uuto migi. Wa me wegaano, "Bogomega nao, ebo kota magaa Babel mee bogomega nao. Tobaaka ou see apii ena me boomagaa see uwoo mée nuyaayaa mokoo miya mee kota magaa kaa mée me ou dimii kaa pedeo ukuwagee siyaa yuwa kuwa me apanaa magaa kaa bagee uduma okoo dimi mena pedeo kiyaabuu segee seta. Kuwa me kemaata ebo kota magaa Babel mee bogomega nao" see wegagi.14:8 Ebo kota magaa Babel mee ko pedeo see api damaa to ebea-ebea. Tobaaka taayaa mokoo idukaa Babel magaa kaa bagee me makapaa ogatamee ou dimii ma, apanaa pedeo agiyoo ou dimii ma kuwa gaawoo seta. Apanaa magaa kaa bagee miya okoo ma epo enaataa kuwa pedeo agiyoo ukuwagee seta. Pedeo see apii to wa me pedeo iyee-payee kuwa kaa pedeo kiyaa see see idukaa Babel magaa mee miya pedeo keta. Mee see see epeekaa miya mée me kisee magaa da kaa pedeo iyee-payee kuwa me mée tomaa wigintaata pedeo kaatagea, see ebea-ebea mee.14:8 Yes 21:9, Why 18:2

⁹Kuwa kaboo da malaikat bagee ekea wiya wedaagoo to mee uuto migi. Wa me mena ebo kaa wegaano, "Mee pedeo see agiyoo damaa to mee ma, waa see see ebea-ebea ipiipii seta agiyoo mee ma kuwa yaapaagee see bagee kuwa yaai. Okoo mee agiyoo damaa to wa yaato bagee ii see nekeensi naadi tabeata agiyoo da mee okoo me etaguu to kaa masiyaa bagee miya, yagaa da kaa masiyaa bagee miya okoo kisee bagee gaayu ko ¹⁰Ogatamee me okoo kagoo ebo kaapi. Esee uu see boomagaa see uwoo otaawee yiba kabagekomeeta kaama nuyaa mokoo okoo miya Ogatamee me kagoo kuwa maamaa naatagea. Ogatamee me daamaa wigintaata malaikat bagee yuwa ma, Domba Pooduu to ma okoo ikigii to kaa okoo esee boodi abaatagea. Okoo biyaa ma, pedeo noogaa peeyaa see biyaa ma kuwa me boodi ebo abaagee taatagea. ¹¹Okoo biyaa me boodi abaagee siyaa utuu da mee pakaga, pakaga kisee too iminoo miya, iminoo miya. Okoo mee pedeo see agiyoo damaa to mee ma, waa see see ebea-ebea ipiipii seta agiyoo mee ma kuwa yaapaagee see bagee kuwa egapi yaato miya, daatooyiba yaato miya se daata kisee too boodi abaawoo taatagea. Mee pedeo see agiyoo damaa to wa ekaa da okoo kaa tabeata bagee kuwa kisee boodi abaawoo taatagea" see wegagi menaa kuwa anii yeetaa.

¹²Kisee kemaata kuwa Ogatamee me daamaa wa too wigintaata bagee yuwa kuwa makii taa see kaa toowoo taano gaano pedeo. Okoo ko Wa me menaa daamaa peneata Yesus mikee gaawoo, umiwoo see bagee yuwa.

¹³Kuwa kaboo da epoo to wodoo kaama mena wuu ena anii yeetaa, mee ko kisee: "A me mee menaa mee ebeai, mee ko: Eto kaama wodoo okoo Tuhan ma dimi aagadi-maagadi naadi boota bagee kuwa naa daamaa, ede nao, see ebeai" see wegagi.

Bedaa Roh me wegaano, "Mikee, kuwa boota bagee okoo me kana ma, kana ma yaukuwawoo sepea menaa kuwa doodoota Ogatamee paagoo awee da kaa daamaa yawegaatagea. Okoo boota kaama wodoo kuwa kana ma ukuwagee seta agiyoo kuwa uduma ekeata daamaa koogo umiwoo, toowoo taatagea yoka ede nao" see wegagi.

Magaa da kaa poo ota yuwa daageeta kaama maseta kuwa deeta menaa

¹⁴Kuwa kaboo da anii deeyaa naaki poodee sinuu ena topa. Mee sinuu dagii da kaa Mée ena, Mée Yogaa mee mokoo animaata tupi. Wa me mumoo to kaa ebo bagee me emas kaa maayaa agiyoo ena topa, bedaa uguu see sabit woonee da Wa me yagaa da kaa agoo. ¹⁵Kuwa kaboo da malaikat bagee mée ena ma wa me Ogatamee me ee yiba kaama pudumigi. Wa me mee sinu dagii da kaa animaata totaaki Mée paagoo mena ebo kaa asiino, "Magaa da kaa poo yuwa kapoo, ota daano kaboo kega yoka A me sabit posee da mee me poo ota yuwa daageeta masii" see asigi.14:15-19 Magaa da kaa poo ota yuwa daano kaboo kega see mee mena nekeeniino yaato ko magaa da kaa bagee yuwa wigintagaano monaa kaa kega see ebea-ebea mee.¹⁶Kisee asigi naadi mee sinu dagii da kaa animaata totaaki Mée Wa me sabit posee da me kisee magaa da kaa poo ota yuwa daageeta masegeegi.14:15-19 Mat 13:39-41

¹⁷Kuwa kaboo da malaikat bagee mée ena ma waa epoo to wodoo Ogatamee me ee yiba kaama pudumigi. Waa miya uguu see sabit pose ena agoo. ¹⁸Kuwa kaboo da malaikat bagee mée ena miya migi. Waa Ogatamee paagoo agiyoo kupi-manee taa see yoo kiyoo kaama migi. Waa ko Ogatamee paagoo yuwitaa see biyaa diitoo taa see eboo mee. Wa me mee uguu see sabit posee da agoo see malaikat see mée to paagoo mena ebo kaa asiino, "Magaa da kaa anggur poo kuwa kapoo kega yoka a me sabit posee da mee me kuwa anggur poo ota yuwa daageeta masii" see asigi. ¹⁹Kisee asigi naadi mee malaikat see mée to wa me sabit posee da me magaa da kaa anggur poo ota yuwa daageeta kaama masegeegi. Masegeeta kaama anggur poo uwoo kisi naadi bado me tagimeamoo taa see yoo tameamaayaa mokoo Ogatamee me kuwa uduma kagoo kaa tagimeamoo taa see yoo kiyoo tameamaagi. ²⁰Mee anggur poo tagimeamoo taa see yoo ko kota amoo yaato. Kiyoo bado me tagimedaa naadi kaama tadaa peega. Tadaa uwoo kuwa ebeadeeyaa naaki togoo-katuu da mee ko meter wiya waa naa. Kuwa tadaa uwoo kuwa kilometer ogei me badoo wedo waa naa peega, see kuwa anii deepa.

Okoo koogo makii taa see kaa toowoo seta bagee yuwa me yaayaa seta menaa

¹Kuwa kaboo da anii deeyaa naaki epoo to kaa mée me awee da kaa nekeensi naadi dimi nagii-nagii agiyoo dama ena ma topa. Mee ko malaikat bagee okoo petoo, okoo me mée kaa pedeo meaniyaa agiyoo wodopasi petoo to kuwa doopea. Kuwa pedeo agiyoo petoo to kuwa mée kaa meaniyaata kaama wodoo sikii, Ogatamee me kagoo kuwa taa kaata.

²Kiyoo kaama anii deeyaa naaki uwo piku ena. Uwo uduma daamaa awee see kaca deeyaa mokoo. Mee uwo pikuu da ma, biyaa ma enaataa aatogo-maatogo, kisee peetaaka. Mee piku geboo da kaa mée kutuu ena yiinaageeta totaakea. Kuwa bagee kuwa ko mee pedeo see agiyoo damaa to ma, waa see see ebea-ebea ipiipii seta agiyoo ma kuwa wisintaata daba, peedi kiyaata bagee yuwa. Okoo wa ekaa da hurup yuwa doodoo nomor egayaa yuwa kuwa miya okoo kaa se tabeata koogo makii taa see kaa toowoo seta bagee yuwa. Okoo Ogatamee yaapaageesi naadi kecapi see agiyoo agoo. ³Okoo me yaayaa taakea menaa epoo bagee kuwa ko idukaa Ogatamee me agiyoo daamaa yaokagee see mée Musa ma, Domba Pooduu to ma kuwa.15:3 Kel 15:1-18 Okoo me yaayaa taakea menaa mee ko kisee:

"Se-pesee, We-pesee yago Tuhan Ogatamee mee, A me ukuwataa see agiyoo kuwa esee ebo, esee dimi nagi.

Mée tomaa yuwa paagoo ebo tookee Mée mee, A me ukuwayaa, peeyaa yuwa uduma topoo too, uduma mikee.

⁴Pedeo ena ma taa see Mée mee ko Tuhan A too yoka

A too weda, A ekaa da too ebo, kisee se kaekee see bagee maamee naa ya?

A me mée wigintagaano see naadi wegata menaa kuwa koopoo se, uduma topoo too see kuwa awee da kaa deegee seta kemaata

mée tomaa yuwa uduma okoo mée eebaa A paagoo meetagea, A too kaapaagee taatagea" kisee menaa okoo yaayaa taakea, see kuwa anii deepa.15:4 Mzm 86:9

Ogatamee Wa me kagoo kaa pedeo agiyoo kuwa malaikat bagee petoo to me mée kaa meansi naadi manta menaa

⁵Kuwa kaboo da anii deeyaa naaki epoo to wodoo Ogatamee me ee mee kene kabataata topa. Mee ee mee ko doka ee, Ogatamee me Musa paagoo manta menaa kiyoo pe-maata ee mee. ⁶Wa me ee yiba kaama malaikat bagee petoo to mée kaa pedeo meanee see agiyoo petoo to doodoota peegea. Okoo me dokaa kuwa ko pedeo ena ma taa, diino disi ebo, wisi-wisi taaka see dokaa. Bedaa okoo ikigii to taa ko emas kaa doka mokoo see agiyoo podataata topea. ⁷Kuwa kaboo da kuwa aya tookee agiyoo wui okoo ena me kuwa malaikat bagee petoo to paagoo emas otaawee okoo mée ena-ena manigi. Kuwa otaawee yiba iminoo miya, iminoo miya toono too Mée Ogatamee Wa me kagoo kuwa awemaata topa. ⁸Kuwa kaboo da Ogatamee Wa me pesee da ma, Wa me asii-sege siyaa agiyoo ma kuwa kaa kaama utuu da kuwa ebo, Wa me ee yiba takiinega, mée ena ma seemaano naka. Kuwa malaikat bagee petoo to okoo me mée kaa pedeo meanee see agiyoo petoo to kuwa meaniyaano taa miyoo se seemiyaa.

Ogatamee Wa me kagoo kuwa magaa da kaa kabagekomeeta kuwa deeta menaa

¹Kuwa kaboo da Ogatamee me ee yiba kaama mena wuu ena anii yeetaa. Mee mena wuu da me kuwa malaikat bagee okoo petoo to paagoo mena ebo kaa asiino, "Ikii kuwa otaawee petoo to kuwa doodoota Ogatamee me kagoo kuwa magaa da kaa kabagekomeesea yoka pooi" see asigi.

²Malaikat bagee petamanii mee peedoota wa me otaawee da magaa da kaa kabagekomeegi naaki esee pedeo kudipii mée kaa meaneekea. Kuwa ko okoo mee pedeo see agiyoo damaa to wa yaato bagee ii see nekeensi naadi agiyoo mee okoo me maa da kaa maseta bagee kuwa ma, waa see see ebea-ebea ipiipii seta agiyoo mee yaapaagee see bagee kuwa ma okoo kaa kisee pedeo kudipii meanee naadi boodi ebo kedaakea.

³Kiyoo kaama malaikat bagee wiyaagoo to mee peedoota wa me otaawee da maakaa pikuu da kaa kabagekomeegi naaki maakaa pikuu da tadaa uwoo keepeasega, boota bagee tadaa keenda. Uwo yiba aya tookee agiyoo-pagiyoo kuwa uduma boodaakea.

⁴Kiyoo kaama malaikat bagee wedaagoo to mee peedoota wa me otaawee da uwo yuwa kaa miya, uwo muma yuwa kaa miya kabagekomeegi naaki uwo yuwa uduma tadaa too keepeasega. ⁵Kuwa kaboo da malaikat bagee mée ena, uwo yuwa diitoo taa see eboo wa me wegagi menaa kuwa anii yeetaa, kuwa ko kisee:

"Toono too Mée, idukaa kaama toowoo see Mée, pedeo ena ma taa see Mée,

A me okoo me pedeo ukuwagee setaa to mokoo da manege kuwa me kemaata Aa mee ko kisee ukuwayaa agiyoo uduma topoo see Mée.

⁶Okoo me A me daamaa wa too wigintaata bagee yuwa ma, nabi bagee yuwa ma okoo me tadaa peeyaata kemaata

A me okoo me uwoo yuwa tadaa yakiyaata nusi naadi manege. Kuwa tuu kamaagi" see wegagi.

⁷Kuwa kaboo da Ogatamee paagoo agiyoo kupi-manee taa see yoo kiyoo kaama mena wuu ena anii yeetaa, mee ko kisee:

"Mikee, Se-pesee, We-pesee yago Mée Tuhan Ogatamee mee,

A me okoo me pedeo ukuwagee setaa to mokoo da manisi naadi wegayaa menaa kuwa uduma mikee, topoo too" see wegagi.

⁸Kiyoo kaama malaikat bagee wogeagoo to mee peedoota wa me otaawee da kenoo to kaa kabagekomeegi naaki kenoo to pesee kiyaata kaama mée yuwa biyaa me poondaakea. ⁹Kisee mée yuwa keno tani ebo kaa poondaakea. Okoo Ogatamee ekaa da wisinegea. Kuwa pedeo agiyoo mée kaa yadootagaano pesee da kuwa Wa me yagaa da kaa kiya okoo me pedeo ukuwagee see agiyoo kuwa ekeasiino taa, Waa yaapaagee taano miya taa.

¹⁰Kiyoo kaama malaikat bagee idibeagoo to mee peedoota wa me otaawee da mee pedeo see agiyoo damaa to wa me ebo animagaano yoo kiyoo yakabagekomeegi naaki wa me peneata ebo toogee see magaa kuwa uduma digiyoo takiinega. Kuwa magaa kaa toogee siyaa bagee yuwa boodi ebo kaa okoo ekaato dabegea yuwa daageekea. ¹¹Okoo boodi ebo, kudipii kuwa miya ebo kemaata okoo epoo to wodoo Ogatamee mee wisinegeekea. Okoo me pedeo ukuwagee see agiyoo kuwa ekeasiino be.

¹²Kiyoo kaama malaikat bagee bedimeagoo to mee peedoota wa me otaawee da ebo uwoo Eprat dee kaa kabagekomeegi naaki mee uwoo deepeasega. Mee ko awii yaato kaama ebo tookee bagee yuwa okoo yape bagee paagoo daba peesi naadi kuwa uwoo yuwa deeyaata kaama eta yamasetaagi. ¹³Kiyoo kaama anii deeyaa naaki maayoo kaa dogee keenda see paa wedo agoo. Kuwa paa wedoo to kuwa ko mee yoogi damaa to mokoo see agiyoo da ma, mee pedeo see agiyoo damaa to ma, bedaa mee pedeo see agiyoo damaa to wa me makapaa menaa yaweganaa see mée to ma okoo wedoo to ebeawee kaama paa wedo kuwa pudumegea. ¹⁴Kuwa paa kuwa ko dimi nagii-nagii agiyoo ukuwataa see paa yuwa. Okoo peedoota uwoo to, magaa to ebo tookee bagee yuwa paagoo okoo Ogatamee ma yape eemasiino see naadi kutuu senaakea. Mee yape aawogee taano naagoo mee ko esee ebo, Se-pesee, We-pesee yago Mée Ogatamee mee okoo paagoo yape degaawee see monaa mee.

¹⁵Tuhan me menaa ko kisee: "Eto ko daamaa yii. Anii oma masenaa see bagee miyaa mokoo see see meeta. Okoo maamaa ipiipi nadiitoo siwoo naadi kaama okoo me dokaa se ekeata dimi-dimi maawoo, umiwoo see bagee kuwa daamaa, ede nao. Okoo má tago se peenaa taapea, okoo ego, weda se gaapea" see asigi.16:15 Luk 12:35-40, 1Tes 5:2-3

¹⁶Kuwa kaboo da kuwa paa wedoo to kuwa me kuwa yape aawogee taano see bagee kuwa maga ena kaa kutuu semaagea. Mee magaa ekaa da ko Ibrani menaa kaa Harmagedon see ekaa mee.

¹⁷Kiyoo kaama malaikat bagee petaagoo to mee peedoota wa me otaawee da epoo to kaa kabagekomeegi naaki Ogatamee me ee yiba Wa me ebo animagaano yoo kaama mena ebo kaa mena wuu da mee ko "Eto ko sikii, ukuwaanega" see wegagi menaa kuwa anii yeetaa. ¹⁸Kuwa kaboo da bego-bego, keemuu, ebo tukuu, kisee agiyoo agoo kedaaka. Maga pigii miya mega. Mee maga pigii mee ko esee ebo, mée tomaa magaa da kaa ogaataata kaama wodoo ewo, meeno taa agiyoo, kisee ogo pege-pege see maga pigii mee. ¹⁹Mee ebo kota magaa Babel mee maga kabadaa naadi gakee wedo wodeenega. Uwoo to, magaa to ebo kota magaa yuwa kuwa miya bogomedaaka. Kuwa Babel magaa kaa bagee okoo me pedeo yuwa kuwa Ogatamee Wa me gaabuu taano taa kemaata Wa me kagoo kuwa okoo kaa esee maamaa yamiyaabuuki. Anggur poo uwoo nuyaa see see Wa me kagoo kuwa otaawee yiba awemaata kaama okoo maamaa nuyaagi. ²⁰Kuwa kaboo da maga okogoo yuwa uduma egadaaka, maga bago-pago kuwa miya taa kedaaka, ewo. ²¹Es dekaa, oma patagu keenda see dekaa kuwa epoo to kaa kaama eseaneeka naaki mée yuwa dapimedaaka. Kuwa es dekaa kuwa kopa ena edo-etaa ebeadeeyaa naaki esee edo, lima puluh kilo mokoo. Kuwa es dekaa weegeeka kuwa esee pedeo naadi kaama mée tomaa yuwa okoo me be kaa Ogatamee wisinegea, see kuwa anii deepa.

Pedeo see api damaa to see ekaa weeta magaa, Babel magaa mee pedeo kaata see wegata menaa

¹Kiyoo kaama malaikat bagee mée ena, kuwa otaawee petoo to doopea malaikat bagee petoo to kuwa waa ena meedoota ni paagoo nasiino, "Aa meei. Otoopa kepe masenaa see api damaa to mee pedeo kiyaano kuwa kadeeyaanaka. Mee pedeo see api damaa to mee uwo eebaa see yoo animaata toogeeka. ²Magaa da kaa ebo tookee bagee yuwa mee apii to ma otoopa aadoge-maadoge segeekea. Magaa da kaa bagee okoo boomagaa see uwoo maamaa noomaata see see okoo mee apii to ma maamaa tobaaka taagee naadi kaama boomagaa taakea mokoo" see nasigi.

³Kiyoo kaama Roh me anii pesee nakiyaata kaama mee malaikat see mée to me anii ebo mee maga ugii da kaa nadoogi. Peemaata kaama anii deeyaa naaki api ena topa. Waa biyaa ipu epoo da see see agiyoo damaa to dagii da kaa animaata totaaka. Mee agiyoo damaa to wa me maa to kaa Ogatamee wisineekee ekaa yuwa maamaa ebeamaata topa. Waa mumo kegaa petoo, takuu apa gaasi see agiyoo damaa to. ⁴Apii to mee diino esee daamaa. Wa me dokaa yuwa ko dadi poo epoo da ma, tadaa epoo da ma see see dokaa maataata topa. Wa me maa to kaa emas ma, kepe ebo edaakee omaa yuwa ma, mutiara keepa yuwa ma kuwa wasi-wasi taaka. Wa me yagaa da kaa emas otaawee ena agoo. Mee otaawee yiba wa me tobaaka taagee naadi esee pedeo agiyoo maamaa agoo, mée pedeo kiyaayaa agiyoo-pagiyoo kuwa pudii. ⁵Wa me etaguu to kaa ekaa ena ebeamaata topa. Mee ekaa da mee mena nekeeniino yaato idukaa kaama boonemaata awee da kaa kiyaano taa, mee ko kisee: "Ebo kota magaa Babel mee ko tobaaka omaago see api damaa to mee, pedeo kiyaa apii yuwa uduma me baayo mee ebea-ebea, magaa da kaa pedeo agiyoo-pagiyoo uduma manii to mee" see menaa kuwa mee apii to kaa ebeamaata topa. ⁶Uwo noomaata kaama boomaga-baamaga siyaa mokoo mee apii to miya kisee. Wa me Ogatamee me daamaa wa too wigintaata bagee yuwa ma, Yesus kaa menaa yaweganaa see bagee yuwa ma kuwa wa me okoo me tadaa peeyaata kaama ede ma, ede ma boomaga-baamaga taaka mokoo. Anii kisee deeta kaama dimi nagimaano ebo.

⁷Kuwa kaboo da mee malaikat see mée to me nasiino, "Aa kaasee kaa dimi nagimeamoo taake? Mee apii to ma, bedaa mee mumo kegaa petoo, takuu apa gaasi kisee mee apii to doonaa see agiyoo damaa to mee ma ekea kaa boonemaata menaa nekeeniino yaato kuwa anii awee da kaa kasi-maniinaka, mee ko kisee: ⁸Mee apii to doonaa see agiyoo damaa to a me deepe mee ko waa idukaa tota kiya eto toono taa. Waa eto toono taa kiya eebaa umiino taa kaa waa paa yuwa dooyamoo taa see komoo to yiba kaama pakaatagi. Pakaamaata kaama waa pedeo kiyaano yoo pootagi. Mee agiyoo damaa to pakaamaagi kaboo magaa da kaa bagee me deeta kaama okoo me ’Ei, waa idukaa tota kiya mee wodoo diino taa, eto too bedaa awee da kaa kigi nao’ naadi dimi nagii-nagii taatagea. Kuwa bagee kuwa ko Ogatamee me kapogee kaa okoo ekaa yamagaano taa bagee yuwa. Mee ko Ogatamee me idukaa petamanii agiyoo-pagiyoo uduma ogaatagaano taa kaboo Wa me tuyaabuu siwoo taatagi bagee okoo ekaa yuwa yamaataata kiya kuwa okoo ekaa yamaatagaano taa bagee yuwa me mee agiyoo damaa to deeta kaama dimi nagii-nagii taatagea. ⁹Kuwa menaa kuwa nekeeniino yaato ko dimi ipi see bagee yuwa daamaa nekeenii, kuwa ko mumo kegaa petoo to kuwa ko maga kuye petoo to ebea-ebea mee. Kiyoo ko mee apii to animaata toogee yoo. ¹⁰Bedaa kisee miya kuwa mumo kegaa petoo to kuwa ko magaa da kaa ebo tookee bagee okoo petoo kuwa ebea-ebea. Kuwa ebo tookee bagee petoo to kuwa ko okoo idibi yaato ebo toono kuwa taa kiyaata. Okoo mée waa ena eto ebo totaaki, petaagoo to mee eto ebo toono taa kaboo. Waa meemaata ebo tootagi mee ko peenaa too, waa taa ma taa keedaa too ebo tootagi. ¹¹Mee mumo kegaa petoo see agiyoo damaa to a me deepe mee gaayu ko waa ebo tookee bagee wagaagoo to mee ebea-ebea. Waa idukaa ebo tota kiya eto ebo toono taa. Waa ko okoo ebo tookee bagee petoo to kuwa mée waa ena. Waa bedaa kaagaa ena ma ebo tootagi kiya waa pedeo kiyaano yoo pootagi. ¹²Mee agiyoo damaa to kaa takuu apa gaasi a me deepe kuwa ko okoo epeekaa magaa da kaa ebo tookee bagee gaasi ebea-ebea. Okoo eto kiipaa ebo toono taa kiya okoo mee agiyoo damaa to ma epo enaataa jam ena too too ebo tusi naadi pesee da mee masiitagea. ¹³Kuwa ebo tookee bagee gaasi kuwa okoo uduma ena dimii, ena menaa kaa mee agiyoo damaa to wa too ebo tusi naadi okoo me ebo tusi naadi maseta pesee da kuwa waa maniitagea. ¹⁴Okoo epo enaataa Domba Pooduu to ma aawogee taano see naadi yape masiitagea. Kiya Domba Pooduu to mee Waa Ebo Wodoo Eboo, magaa da kaa tookee eboo yuwa uduma miya okoo asii Eboo yoka Wa me okoo uduma daba, peedi kiyaatagi. Bedaa kuwa Waa ma epo enaataa bagee okoo me miya kisee ukuwaatagea. Okoo ko Wa me Ni paagoo nameei naadi kaama daamaa wigintaata bagee yuwa, Wa me menaa daamaa yayeetaa see bagee yuwa" see kuwa mee malaikat see mée to me nasigi menaa.

¹⁵Bedaa mee malaikat see mée to me nasiino, "Mee otoopa kepe masenaa see api damaa to waa uwo eebaa see yoo animaata totaaka see a me deepe mee ko kuwa uwoo yuwa kuwa gaayu ko mée ebea-ebea. Kuwa ko mée tomaa-tomaa yuwa ma, maga tomaa-tomaa yuwa ma, mena tomaa-tomaa yuwa ma kisee mée eebaa ebea-ebea kuwa. ¹⁶Mee agiyoo damaa to waa takuu apa gaasi ebea-ebea see a me deepe mee gaayu ko kuwa bagee gaasi kuwa ebo tuyaata kaama okoo ma, mee agiyoo damaa to ma okoo paaya enaataa mee pedeo apii to be kaa wa me agiyoo-pagiyoo uduma oma yamasegeeta kaama má tago ekeasiitagea. Okoo me wa me ponee yuwa noomaata kaama waa biyaa kaa pooniyaatagea. ¹⁷Okoo me kisee ukuwaatagea kuwa ko Ogatamee me gaata-gaata doodoo too. Wa me okoo me dimii yiba ’Kisee ukuwaai’ see dimii mee mantaata kaama okoo uduma ena dimii, ena menaa kaa mee agiyoo damaa to wa too ebo tusi naadi okoo me ebo toono pesee da waa maniitagea. Mee agiyoo damaa to magaa da kaa ebo tootagi, kisee too Ogatamee me kisee ukuwaaniita, kisee ukuwaaniyaabuu taata see aseta menaa kuwa uduma sikii, uwa daaniita yoo too. ¹⁸Mee a me deepe api damaa to mee gaayu ko ebo kota magaa mee ebea-ebea. Mee magaa mee too ebo, pesee, apanaa magaa kaa ebo tookee bagee kuwa uduma me eboo" see kuwa mee malaikat see mée to me nasigi menaa.

Babel magaa mee pedeo kiyaata kuwa deeta menaa

¹Kiyoo kaama anii deeyaa naaki malaikat bagee mée ena miya epoo to wodoo kaama isigi. Wa me pesee da mee esee ebo, wa me asii-sege siyaa agiyoo agoo da kuwa me uwoo to, magaa to uduma wogaamaaga. ²Wa me mena ebo kaa wegaano,

"Bogomega nao, ebo kota magaa Babel mee bogomega nao.

Mee api damaa to mee ko paa totaa see yoo kega, esee pedeo see paa tomaa-tomaa yuwa me koogo ometaa see yoo kega,18:2 Babel magaa mee ko pedeo see api damaa to ebea-ebea, magaa da kaa pedeo iyee-payee ebea-ebea mee. Mée tomaa yuwa mée eebaa okoo kuwa pedeo iyee-payee kuwa me okoo me ou-ou dimi kaa umiwoo, toowoo taatagea, bedaa Yesus yaato bagee wegee-wegee taatagea. Kiya kuwa uduma Ogatamee me taa kiyaatagi, ebo kota magaa bugumiyaayaa see see mokoo, see ebea-ebea mee.

se notaa bedoo yuwa ma, se notaa wodaa yuwa miya kisee be gaayaa agiyoo kuwa uduma me omegee yoo kega.

³Kisee ukuwaanega mee ko tobaaka ou see apii ena me boomagaa see uwoo mée nuyaayaa mokoo

mée tomaa yuwa okoo me mee api damaa to me uwoo kuwa noomaata kaama pedeo kedaa seta.

Bedaa tobaaka taayaa mokoo magaa da kaa ebo tookee bagee kuwa miya okoo me mee apii to me pedeo ou gaayaa agiyoo kuwa epo enaataa ukuwawoo seta.

Bedaa uwoo to, magaa to agiyoo-pagiyoo pe-doogee taa see bagee kuwa miya okoo me mee apii to me ou dimi-pami kuwa maseta kemaata senawii keta.

Kisee kemaata mee ebo kota magaa mee bogomega nao" see menaa wegagi.18:3 Why 14:8

⁴Kuwa kaboo da epoo to wodoo kaama mena wuu ena miya anii yeetaa, mee ko kisee:

"Ikii Ni me bagee kuwa mee apii to paagoo kaama peeweei,

wa me pedeo ukuwayaa agiyoo kuwa ikii miya epo enaataa se ukuwasea yoka se eetooi,

wa kaa pedeo meaniyaa agiyoo kuwa ikii kaa miya kisee meaniyaa yoka wa too pe-wigintagaai.18:4 Yes 52:11, 2Kor 6:17

⁵Wa me pedeo ukuwagee seta agiyoo kuwa maamaa eebaa, asii-kutu-kutu taa see epoo to kaa too nakimega.

Kuwa uduma Ogatamee me se gaabuu seta waa pedeo kiyaapi yoka ikii wa paagoo kaama peeweei.

⁶Eto ko mee apii to me mée tomaa pedeo ukuwayaabuu seta see see kisee miya wa me pedeo ukuwataa to mokoo da manii,

wa me pedeo ukuwagee seta agiyoo yuwa doodoo kaagaa wiya ma waa modee masii.

Bedaa wa me otaawee yiba mée pedeo kiyaayaa uwoo aatogo-maatogo naadi kaama mée tomaa nuyaabuu seta see see

kisee miya otaawee yiba pedeo uwoo kaagaa wiya ma aatogo-maatogo naadi kaama waa nuyaai.

⁷Waa ekaato ebo ekeata wa me ou see gaayaa agiyoo-pagiyoo yuwa kaa too ede ma, ede ma omegee, toogee seta doodoo

eto ko waa ae-wae, boodi abaayaa agiyoo kuwa waa manii.

Wa me dimi yiba gaano, ’Anii ko ebo tookee apii, anii miyaa apii to se,

anii ae-wae, dimi gaagaa see kaa se umiwoo taapa’ see gaawoo seta.

⁸Kuwa me kemaata egapii ena too too yiba se-pedeo, we-pedeo eebaa wa kaa medaa taata.

Mée booyaa ikiyoo ma, ae-wae, dimi gaagaa ma, naadi ebo, kisee agiyoo kuwa wa kaa meanee naadi kaama biyaa kaa pooneepeasiita.

Mee api damaa to wigintaata pedeo kiyaayaa Mée Tuhan Ogatamee Wa me pesee da mee ebo kemaata

kisee yaukuwaatagi" see wegagi.

⁹Mee apii to biyaa pooneano see utuu pakaga kaboo magaa da kaa ebo tookee bagee yuwa me kuwa deeta kaama okoo me wa kaa yege ma, yii-yii ma taatagea. Okoo me waa ma tobaaka, kisee pedeo ou see gaayaa agiyoo kaa ede ma, ede ma eeukuwagee seta kuwa me okoo wa kaa dimi boodi ebo kaatagea. ¹⁰Waa boodi abaaga kuwa esee ebo yoka kuwa ebo tookee bagee yuwa me weda kaa beesekaa mokoo kaama yiinaageeta wegaatagea menaa kuwa ko kisee:

"Yaai, pedeo nao, ebo kota magaa mee, pesee, omaago see magaa Babel magaa mee.

Jam ena yiba too kisee ki pedeo keepeasega" see menaa wegaatagea.

¹¹Bedaa magaa da kaa okoo agiyoo-pagiyoo pe-doogee taa see bagee kuwa miya mee apii to wa kaa yege ma, yii-yii ma taatagea. Kuwa okoo me pe-doogee siyaa agiyoo yaedaano bagee kuwa eto taa kega nao naadi kaama dimi boodi ebo kaatagea. ¹²Okoo me pe-doogee siyaa agiyoo kuwa eebaa, kuwa ko emas pose ma, perak pose ma, kepe ebo edaakee omaa apanaa yuwa ma, mutiara keepa yuwa ma, esee atokaa see dokaa ma, dadi poo epoo see dokaa ma, tadaa epoo see dokaa ma, apanaa daamaa dokaa tomaa-tomaa yuwa ma, wunu daamaa see piyaa kaa ukuwataa see agiyoo tomaa-tomaa yuwa ma, gading wodaa me egoo to kaa gepetaa see agiyoo tomaa-tomaa yuwa ma, kepe ebo edaakee piyaa kaa ukuwataa see agiyoo tomaa-tomaa yuwa ma, tembaga pose ma, besi pose ma, pualam omaa ma kisee agiyoo kaa ukuwataa see agiyoo tomaa-tomaa yuwa miya. ¹³Kiyoo kaama wunu daamaa piya kado ma, gii ebo kisi naadi agiyoo yeeyee ma, wunu daamaa see agiyoo yeeyee ma, apanaa wunu daamaa agiyoo tomaa-tomaa mur ma, kemenyan see piya bakaa ma kuwa. Kiyoo kaama anggur poo uwoo ma, zaitun minyak uwoo ma, roti yeeyee ma, gandum ma, sapi wodaa ma, domba wodaa ma, kuda wodaa ma, kuda komaa yuwa ma, hamba kiyaata bagee, api miya, paayogaa miya. Mee apii to pedeo kiyaano taa kaboo mée me kisee agiyoo, kisee bagee kuwa maamaa pe-doogee, edaagee seta.

¹⁴Mee apii to paagoo wegaatagea menaa kuwa ko kisee: "Kuwa a me ou dimii kaa kepe ebo edaagee seta agiyoo-pagiyoo kuwa uduma taa kedaaka. Kuwa a me senawii agiyoo yuwa ma, diino daamaa see agiyoo ma kuwa uduma egadaaka yoka eto kaama wodoo kuwa a paagoo se diipea" see wegaatagea. ¹⁵Kuwa agiyoo-pagiyoo pe-doogee segee seta kaama senawii kedaa seta bagee okoo me mee apii to ae-wae, boodi abaaga kuwa yaai, weda nao naadi beesekaa kaama yiinaageeta yege ma, yii-yii ma taatagea. ¹⁶Okoo me wegaatagea menaa ko kisee:

"Yaai, pedeo nao, ebo kota magaa mee.

Mee api damaa to waa esee atokaa see dokaa ma, dadi poo epoo see dokaa ma, tadaa epoo see dokaa ma kisee daamaa dokaa kuwa maawoo seta.

Bedaa waa emas pose ma, perak pose ma, kepe ebo edaakee omaa ma, mutiara keepa yuwa ma kuwa miya maatagaa naadi disi ebo, wisida-watada siwoo seta.

Kiya jam ena yiba too kuwa wa me senawii agiyoo-pagiyoo kuwa uduma taa kedaaka yaai, weda nao" see wegaatagea.

¹⁷Apanaa bagee miya kisee menaa wegaatagea. Kuwa ko kapal komaa doonaa see bagee yuwa ma, okoo kaa tabogetaa see bagee yuwa ma, kapal komaa taa peetaa see bagee apanaa yuwa ma, kisee maakaa pikuu da kaa kepe abanaa see bagee yuwa kuwa uduma okoo beesekaa kaama yiinaageeta diitoo taatagea. ¹⁸Okoo me mee api damaa to biyaa utuu pakaga see deeta kaama mena ebo kaa wegaano, "Mee ebo kota magaa mee see see magaa ena ma agoo ye?" see wegagea. ¹⁹Okoo maga ponee masegeeta okoo dagii da kaa sigimeatoo naadi kaama yege ma, yii-yii ma wegaano,

"Yaai, pedeo nao, ebo kota magaa mee.

Kuwa maakaa pikuu da taa peenaa see bagee uduma miya mee api damaa to me senawii agiyoo yadoonaa seta kuwa me senawii kedaa seta.

Kiya jam ena yiba too waa pedeo kega yaai, weda nao" see menaa wegagea, see kuwa anii deepa.

²⁰Eto ko ikii epoo to wodoo topea bagee yuwa ede ma, ede ma siweei. Bedaa ikii Yesus mikee nao naadi daamaa wa too kiwigintaata bagee yuwa ma, Wa me menaa yadoonaa see bagee yuwa ma, nabi bagee yuwa ma ikii uduma miya ede ma, ede ma siweei. Mee apii to me ikii pedeo kikiyaabuu segee seta kuwa kaa Ogatamee me wa kaa pedeo agiyoo yamiyaagi yoka ede ma, ede ma siwoo taai.

Babel magaa mee taa kedaa taata see wegata menaa

²¹Kuwa kaboo da pesee yago malaikat bagee mée ena me ebo omaa ena, gandum poo ikii beendaasi naadi omaa mee see see omaa masegeeta kaama maakaa piku yiba tamekomeegi. Tamekomeeta kaama wa me wegaano,

"Anii kisee omaago ma ukuwaga mee see see ebo kota magaa Babel mee miya

tamekomeeta kaama wodoo ewo, se diipea.

²²Mee kaama wodoo ko aa apii to aa, a me magaa kaa musik baa-baa siyaano bagee okoo me menaa kuwa taa kaapa.

Kuwa ko kecapi see agiyoo baa-baa taano ma, yaayaa taano ma, ebo puusee taano ma, peedi puusee taano ma kuwa uduma si yiipea.

Eto kaama wodoo a me magaa kaa agiyoo tomaa-tomaa ipi kaa ukuwataa see bagee kuwa miya se diipea.

Eto kaama wodoo a me magaa kaa gandum poo yeeyee kisi naadi tagimetaa see menaa kuwa miya si yiipea.

²³Eto kaama wodoo a me magaa kaa peto ena ma ago se poopa, digiyoo too kaapa.

Eto kaama wodoo a me magaa kaa api goeyaa naagoo pesta siyaa kaa menaa kuwa miya si yiipea.

Kuwa a me magaa kaa agiyoo-pagiyoo pe-doogee taa see bagee kuwa esee ebo bagee keta, magaa da kaa pesee yago bagee keta.

A me paa me pesee kaa ukuwayaa agiyoo-pagiyoo kuwa me mée tomaa yuwa deebaa siwoo seta.

Kisee kemaata aa katamekomeeta kaama pedeo kaatage" see wegagi.

²⁴Kuwa mee apii to wa me booyaabuu seta bagee yuwa okoo me tadaa yuwa wa me magaa kaa yapeeyaata kuwa awee da kaa topa. Kuwa ko nabi bagee me tadaa ma, Yesus mikee nao naadi daamaa wa too wigintaata bagee apanaa yuwa okoo me tadaa yuwa ma, bedaa uwoo to, magaa to booyaabuu seta bagee apanaa yuwa miya uduma okoo me tadaa yuwa wa me magaa kaa topa kemaata waa pedeo kaata.

Ogatamee me Babel magaa mee pedeo kiyaagi nao naadi yaapaagee seta kuwa yeeta menaa

¹Mee wodoo taa epoo to wodoo kaama mée maamaa eebaa epo enaataa ebo menaa-menaa taakea keenda see kuwa anii yeetaa, kuwa ko kisee:

"Haleluya, inii me Eboo Ogatamee,

Wa too pesee, Wa too asii-sege, Wa too daba mée daagimaa peeyaano Mée mee.

²Wa me mée kaa pedeo kiyaano see naadi wegayaa menaa kuwa uduma mikee, topoo too yoka kiiboo, paamee.

Mee ko Wa me mee otoopa kepe masenaa seta api damaa to mee pedeo kiyaagi.

Mee apii to wa me otoopa ukuwanaa see agiyoo kuwa me magaa da kaa bagee pedeo kiyaata kemaata Ogatamee me waa wigintaata pedeo kiyaagi.

Bedaa mee apii to me Ogatamee me agiyoo daamaa yaokagee see bagee yuwa okoo me tadaa yapeeyaata kuwa me

Ogatamee me modee yamasigi" see wegagea.

³Kiyoo kaama bedaa wiyaagoo to ma okoo me mena ebo kaa wegaano,

"Haleluya! Mee api damaa to biyaa me poonooga yoo kaama utuu da pakaga, pakaga kisee too iminoo miya, iminoo miya" see wegagea.

⁴Kuwa kaboo da kuwa ebo bagee mée oga ma wui kuwa ma, aya tookee agiyoo wui kuwa ma okoo paaya mee ebo animagaano yoo animaata totaaki Mée Ogatamee Wa ikigii to kaa esee-gapuunta Waa ebo ekee, yaapaagee see kaa "Amin, Haleluya" see wegagea.

⁵Kuwa kaboo da ebo animagaano yoo kaama mena wuu ena anii yeetaa, mee ko kisee:

"Ikii Wa me agiyoo daamaa yaokagee see bagee ebo miya, peedi miya kuwa uduma inii me Eboo Ogatamee mee yaapaagee siweei.

Ikii Wa too weda, Wa too ebo ekee taa see bagee kuwa uduma Waa yaapaagee taai" see wegagi.

Domba Pooduu to Wa me apii goeta kaama ebo pesta nuyaa yoo yaapaagee seta menaa

⁶Kuwa kaboo da ebo mena wuu ena anii yeetaa, mée esee maamaa eebaa menaakea mokoo. Mee mena wuu da mee ko yiino esee ebo, uwo megea tukuu da mokoo, ebo keemuu tukuu siyaa mokoo, mee ko kisee:

"Haleluya! Inii me Eboo, Se-pesee We-pesee yago Mée Tuhan Ogatamee mee Wa too ebo totaaki yoka kiiboo, paamee.

⁷Domba Pooduu to Wa me api goeano naagoo kega yoka inii ede ma, ede ma, oogita ma niisiweei.

Wa me goeano apii to waa ekaato daamaa ipiipii semaata topa yoka Ogatamee ebo niiekee siweei.19:7 Ep 5:27

⁸Mee apii to esee atokaa see dokaa, pedeo taa see poodee dokaa da mee waa maasi naadi manegea" see wegagea.19:8 Mat 22:12, Ep 5:26-27

Esee atokaa see dokaa mee ko Ogatamee me daamaa wa too wigintaata bagee okoo me daamaa yaokagee siyaa agiyoo kuwa ebea-ebea.19:8 Mee apii to mee ko Yesus mikee gaayaa bagee yuwa, Ogatamee me daamaa wa too wigintaata bagee kuwa uduma Wa me goeano apii to ebea-ebea. Okoo ko Wa me agiyoo daamaa yaokagee see bagee kemaata Wa me okoo poodee see dokaa mantaata kaama Wa paagoo pedeo taa see kaa toowoo taatagea, see menaa mee.

⁹Kiyoo kaama mee malaikat see mée to me nasiino, "Ni me kisiinaka menaa kuwa ebeai, kuwa ko kisee: Domba Pooduu to me api goeano see naadi pesta nuyaa yoo kiyoo meei see menaa aseta kaama miyaa bagee kuwa daamaa, ede nao see menaa kuwa ebeai" see nasigi. Bedaa wa me nasiino, "Kuwa menaa kuwa mikee menaa, Ogatamee me menaa kuwa" see nasigi.19:9 Mat 22:1-14

¹⁰Mee malaikat see mée to me kisee nasigi naadi kaama anii waa ebo ekee, yaapaagee taano see naadi wa me badoo da kaa esee-gapuunega. Kiya wa me nasiino, "Kisee se ukuwaai. Aa ma, ikii Yesus yiba ena kenaa bagee yuwa uduma ikii me Yesus kaa yawegataa see menaa kuwa daamaa peneata Wa me agiyoo yaokagee siyaa see see anii miya kisee Wa me agiyoo yaokagee see mée yoka Ogatamee mee too ebo ekee, yaapaagee taai. Mikee, Yesus kaa menaa yawegataa see kuwa ko Roh me menaa doodoo too yoka inii paaya Yesus kaa menaa yawegataa see bagee yuwa" see nasigi.

Ogatamee Me Menaa see ekaa munta Mée mee yape masiino see naadi peeta kuwa deeta menaa

¹¹Kuwa kaboo da anii deeyaa naaki taka ena epoo to kabaanta kaama kuda wodaa ena, poodee see wodaa tupi. Mee wodaa dagii da kaa animaata totaaki Mée Wa ekaa da ko Mikee Menaa Se Ekeata Doowoo See Mée see ekaa ma, Mikee Topoo See Mée see ekaa ma kisee ekaa munta Mée mee. Wa me mée wigintaata pedeo kiyaano ma, Wa me yape masiino miya kuwa uduma topoo too see kaa ukuwataa see Mée. ¹²Wa me emaa ko biyaa gadaa da mokoo. Wa me mumoo to kaa ebo tookee bagee me maayaa agiyoo eebaa topa. Wa me maa to kaa ekaa ena ebeamaata topa. Mee ekaa da mée me ewo, Wa too ipi. ¹³Waa togoo see dokaa ena, tadaa yiba tokoata see dokaa maataata totaaki. Wa ekaa da ko Ogatamee Me Menaa see ekaa munta.19:13 Ogatamee Me Menaa see ekaa munta Mée mee ko Yesus mee. Waa ko Ogatamee me kisee ukuwaaniyaata see aseta menaa kuwa uduma yaukuwaaniyaabuu taa see Mée kemaata kisee ekaa munta.19:13 Yoh 1:1¹⁴Epoo to wodoo okaa yago bagee ebo etaa Wa sekaataa obeegea. Okoo esee atokaa see dokaa, pedeo taa see poodee see dokaa maataata kaama poodee see kuda wodaa dagii da kaa animaata peetaakea. ¹⁵Wa me ebee to kaa kaama uguu see mowai petaata topa. Mee mowai da me mée tomaa yuwa daba, peedi ekeasiino see naadi dootaaki. Waa pose tamoo da peneata okoo paagoo omaago ma ebo toowoo taatagi. Waa ma yape kiyaa bagee yuwa kuwa ko anggur poo uwoo kisi naadi poo tagimeamoo taa see yoo kaama poo yuwa bado batagi-patagi siyaa see see Wa me kisee okoo yaukuwaatagi. Se-pesee, We-pesee yago Mée Ogatamee Wa me kagoo ebo see dimii kuwa doodoo kisee yaukuwaatagi. ¹⁶Wa me togoo dokaa da ma, motaa da ma kiyoo ekaa ena ebeamaata topa. Mee ekaa da mee ko magaa da kaa tookee eboo kuwa uduma me Eboo, bedaa magaa da kaa ebo bagee kuwa uduma me Eboo Tuhan see ekaa mee.

Pedeo see agiyoo damaa to mee ma, wa me menaa yawegataa see mée mee ma ekea daba, peedi kiyaata kuwa deeta menaa

¹⁷Kuwa kaboo da anii deeyaa naaki malaikat bagee mée ena kenoo to yibaa taa yiinaageeta totaaki. Wa me epaawee da taa peenaa see bedoo yuwa paagoo mena ebo kaa asiino, "Ogatamee me ebo pesta ena ikii taano kiipiipii semaagi yoka naano ke me-kutumeeii taai. ¹⁸Kuwa ko magaa da kaa ebo tookee bagee ponee yuwa ma, yape tukuu bagee ponee yuwa ma, omaago see bagee ponee yuwa ma, kuda wodaa ponee yuwa ma, kuda wodaa dagii da kaa peetaa see bagee ponee yuwa ma, se-bagee, we-bagee uduma, ebo miya, peedi miya, hamba kiyaata bagee ma, hamba kiyaano taa see bagee miya uduma okoo me ponee yuwa naano ke meei" see asigi.

¹⁹Kiyoo kaama bedaa anii deeyaa naaki mee pedeo see agiyoo damaa to mee ma, magaa da kaa ebo tookee bagee yuwa ma, okoo me okaa yago bagee yuwa ma kuwa topea. Okoo mee poodee see kuda wodaa dagii da kaa animaata totaaki Mée ma, Wa me okaa yago bagee yuwa ma okoo ma yape eemasiino see naadi kutumemaata totaakea. ²⁰Kisee kiya mee pedeo see agiyoo damaa to ma, wa me makapaa nabi see mée to ma ekea okoo me peneasegea. Mee makapaa nabi see mée to mee ko wa me mée tomaa yuwa okoo mee pedeo see agiyoo damaa to wa yaato misi naadi dimi nagii-nagii agiyoo yaukuwaaniyaabuu seta mée mee. Wa me kuwa dimi nagii-nagii agiyoo kuwa me mée tomaa yuwa deebaa seta kaama okoo mee pedeo see agiyoo damaa to wa yaato bagee ii see nekeensi naadi agiyoo okoo kaa tabeata. Bedaa okoo me waa see see ebea-ebea ipiipii seta agiyoo mee miya ebo ekee, yaapaagee seta. Mée tomaa yuwa kisee deebaa seta kemaata mee pedeo see agiyoo damaa to ma, mee makapaa nabi see mée to ma ekea paaya peneata kaama wunu pedeo see noogaa ma biyaa gada peetaa see piku yiba aya kaa tamekomeegea. ²¹Ekea yaato yape maseta bagee apanaa yuwa kuwa ko mee poodee see kuda wodaa dagii da kaa animaata totaaki Mée Wa me ebee to kaa petaata mowai da me daapiiki. Kisee booyaata kaama bedo yuwa uduma okoo me ponee yuwa maamaa noomaata kaama bekagea, see kuwa anii deepa.

Seribu tahun ebo toowoo seta kuwa deeta menaa

¹Kuwa kaboo da anii deeyaa naaki malaikat bagee mée ena epoo to wodoo kaama isigi. Wa me yagaa da kaa paa yuwa dooyamoo taa see komoo to kene kabaano kunci ma, ebo pose onee ena ma kuwa doopi. ²Wa me mee yoogi damaa to mokoo see agiyoo da mee peneata one gadimetaagi. Mee agiyoo damaa to mee ko Iblis mee, idukaa miya tota otoogiyoo da, paa damaa to ekaa da Satan see mee.20:2 Kej 3:1 Waa seribu tahun daba se peesi naadi one gadimetaata kaama ³paa yuwa dooyamoo taa see komoo to yibaa taa tamekomeeta eke. Wa me mée tomaa yuwa seribu tahun yiba se deebaasi naadi kenee to kunci taata kaama se kabasi naadi agiyoo tabeata eke. Seribu tahun omemaata kaama too waa keedaa peenaasi naadi taa ma taa daba peeyaatagea.

⁴Bedaa anii deeyaa naaki ebo animagaano yoo komoo yuwa topa. Kiyoo animaata totaakea bagee yuwa okoo me mée tomaa yuwa okoo kaa daamaa, pedeo see kuwa yawegamaata kaama pe-wigintaasi naadi pesee da okoo manegea. Bedaa anii deeyaa naaki apanaa bagee miya topea. Okoo Yesus kaa menaa ma, Ogatamee me menaa ma kuwa yaweganaa seta kemaata ogo daata bagee okoo me dimi noogaa yuwa topea. Kuwa bagee kuwa ko mee pedeo see agiyoo damaa to ma, waa see see ebea-ebea ipiipii seta agiyoo yuwa ma kuwa ebo ekee, yaapaagee taano taa bagee yuwa. Okoo mee pedeo see agiyoo damaa to wa yaato bagee ii see nekeensi naadi agiyoo mee masiino taa. Okoo me etaguu to kaa miya, yagaa da kaa miya tabeasiino taa. Kuwa bagee yuwa aya andoo peeta kaama Kristus ma epo enaataa seribu tahun ebo toowookea. ⁵Okoo aya andoo peegea mee ko boota bagee yuwa aya andoo poono kuwa petamanii etaa. Boota bagee apanaa yuwa gaayu ko aya andoo poono taa, seribu tahun omemaata kaama too aya andoo pootagea. ⁶Kuwa petamanii etaa kaa aya andoo peeyaa bagee kuwa daamaa, ede nao. Okoo ko Ogatamee me daamaa wa too wigintaata pedeo taa see bagee yuwa. Mée bogaano wiyaagoo to mee okoo kaa taa kaata, se deemagaatagea. Okoo Ogatamee ma, Kristus ma Ekea me imam bagee yuwa kaatagea. Okoo Waa ma epo enaataa seribu tahun ebo toowoo taatagea.

Iblis mee daba, peedi kiyaata kuwa deeta menaa

⁷Seribu tahun omemaata kaama Iblis mee waa one gadimetaata tamekomeeta yoo kaama daba peeyaatagea. ⁸Daba peeyaata kaama wa me mée tomaa yuwa deebaa taano see naadi peedoota uwoo to, magaa to uduma kiyoo-kiyoo peenaa taatagi. Iblis me magaa da kaa bagee yuwa yape eemasiino see naadi kutumeeii senaa taatagi. Kuwa mée tabaa da kuwa ekaa da ko Gog ma, Magog ma kisee ekaa kuwa.20:8 Gog ma, Magog ma kuwa ekaa wiya kuwa ko idukaa ebo bagee ena ekaa da ko Gog wa me Magog magaa kaa bagee yuwa Israel bagee yuwa ma yape eemasiino see naadi kutumeeii taatagi, see menaa kuwa nabi Yehezkiel me wegata.20:8 Yeh 38:1-15 Okoo mée maamaa eebaa, maakaa pikuu da kaa ea ponee eebaa kuwa see see. ⁹Okoo kutuu semaata kaama uwoo to, magaa to yape degaawee naadi kaama Ogatamee Wa me ou see gaata kota magaa kaa Wa me daamaa wa too wigintaata bagee yuwa me toogee yoo kiyoo bobetaagea. Kiya epoo to wodoo kaama biyaa isiyaagi naaki kuwa bagee yuwa pooneepeasegea. ¹⁰Kuwa kaboo da mée deebaa see mée Iblis mee wunu pedeo see noogaa ma biyaa gada peetaa see pikuu da yiba tamekomeegea. Kiyoo ko pedeo see agiyoo damaa to ma, wa me makapaa nabi see mée to ma ekea miya tamekomeeta yoo. Okoo egapi yaato miya, daatooyiba yaato miya kisee too iminoo miya, iminoo miya boodi abaawoo taatagea.

Boota bagee yuwa wigintaata menaa

¹¹Kuwa kaboo da anii deeyaa naaki ebo animagaano yoo ebo komoo ena topa, epoo da poodee. Kiyoo animaata totaaki Mée Waa miya tupi. Taka ena epoo to ma, magaa to ma kuwa Wa paagoo kaama egaapeasega, ewo. ¹²Kuwa kaboo da anii deeyaa naaki boota bagee yuwa, ebo, peedi uduma ebo animagaano yoo ikigii to kaa yiinaageeta topea. Kapoge yuwa miya topa. Kuwa kapogee yuwa kabataagea. Kabataata kaama apanaa kapogee ena miya kabataagea, mee ko Ogatamee me tuyaabuu siwoo taatagi bagee yuwa ekaa yamaatagaa seta kapogee mee. Boota bagee yuwa okoo me ukuwagee seta yuwa kuwa kapogee yiba yaebeamaata doodoo wigintagaakea. ¹³Mee ko maakaa piku yiba boota bagee topea yuwa miya pakaaneekea, bedaa mée boowoo siyaa pesee da kaa boota bagee toogee yoo topea yuwa miya pakaaneekea. Okoo mée ena-ena okoo me ukuwagee seta yuwa doodoo wigintagaakea. ¹⁴Kiyoo kaama mée boowoo siyaa pesee da ma, boota bagee me toogee yoo miya kuwa uduma biyaa piku yiba tamekomeegea. Mée bogaano wiyaagoo to mee gaayu ko biyaa pikuu da mee. ¹⁵Ogatamee me tuyaabuu siwoo taatagi bagee okoo ekaa yuwa yamaatagaa seta kapogee yiba ekaa taa see bagee yuwa kuwa biyaa piku yiba tamekomeegea, see kuwa anii deepa.

Gipii epoo to ma, gipii magaa to ma kuwa agoo kedaa seta kuwa deeta menaa

¹Kuwa kaboo da anii deeyaa naaki gipii see epoo to ma, gipii see magaa to ma kuwa topa. Epoo to ma, magaa to ma petamanii yuwa kuwa taa kega, maakaa piku mee miya taa kega.21:1 2Pet 3:10-14²Bedaa anii deeyaa naaki daamaa wa too wigintaata magaa mee, Yerusalem gipii see magaa mee epoo to wodoo Ogatamee paagoo kaama esega, diino esee ebo. Api ena paimee paagoo poono kaboo disi ebo agiyoo yuwa maatagaa siyaa see see mee magaa mee miya kisee daamaa ipiipii semaata esega.21:2 Ibr 13:14³Kuwa kaboo da Wa me ebo animagaano yoo kaama ebo mena wuu ena anii yeetaa, mee ko kisee: "Deede, Ogatamee me totaa see yoo kiyoo ko eto mée paagoo kega yoka Waa mée yupii toowoo taatagi. Okoo Wa me bagee yuwa kaatagea, bedaa Waa okoo me Eboo Ogatamee kaatagi.21:3 2Kor 6:16-18⁴Okoo me yegee uwoo yuwa kuwa uduma Wa me yawonaapeasiitagi. Mee kaama asii bogaano miya taa, yege ma, yii-yii ma kuwa miya taa, boodi miya taa. Kisee ukuwawoo seta yuwa kuwa uduma eto taa keepeasega" see wegagi.

⁵Kuwa kaboo da ebo animagaano yoo animaata totaaki Mée Wa me wegaano, "Deede, eto Anii se-agiyoo, we-agiyoo uduma gipii kiyaabuu taaka" see wegagi. Bedaa Wa me nasiino, "Kuwa menaa kuwa ko mikee nao naadi daamaa masiyaa menaa yoka ebeai" see nasigi. ⁶Bedaa kaagaa ena ma Wa me nasiino, "Eto ko sikii, ukuwaanega. Anii ko Alpa ma, Omega ma kuwa, bedaa manii to ma, usii to ma kuwa ko Ani too. Uwo naadi kiyaa bagee kuwa Ani me mée aya tuyaabuu siwoo siyaa uwo mumaa to kaa kaama okoo aii nuyaabuu siwoo taapa.21:6 Yes 55:1, Yoh 4:10⁷Pedeo dimii, pedeo menaa peedi kiyaata makii taa see kaa toowoo siyaa bagee kuwa okoo me kuwa Ni me aii maniita see aseta agiyoo kuwa uduma daamaa masiitagea. Anii okoo me Eboo Ogatamee mee kaata, bedaa okoo Ni me yogaa yuwa kaatagea. ⁸Kiya apanaa bagee kuwa pedeo kaatagea. Kuwa ko weda gaayaa bagee yuwa ma21:8 Weda gaayaa bagee kuwa ko okoo daba toono ede, makii taa see kaa toowoo taano taa, mée me nawegee-wegee taapea yaai naadi kaama Yesus sekaataa kisee too poono weda see bagee yuwa., Anii mikee se nagaayaa bagee yuwa ma, pedeo dimii gaawoo, ukuwawoo see bagee yuwa ma, mée wugiyaa bagee yuwa ma, tobaaka taayaa bagee yuwa ma, deo peneasiyaa bagee yuwa ma, makapaa ogatamee ebo ekee, yaapaagee siyaa bagee yuwa ma, makapaa menaa wegataa see bagee yuwa ma kuwa uduma okoo wunu pedeo see noogaa ma biyaa gada peetaa see piku yiba kiyoo toowoo taatagea. Mee biyaa piku mee ko mée bogaano wiyaagoo to mee" see nasigi.

Kota Yerusalem magaa gipii mee eseta kuwa deeta menaa

⁹Kuwa kaboo da malaikat bagee mée ena, kuwa mée kaa pedeo meaniyaa agiyoo petoo to wodopasi yuwa kuwa otaawee yiba doota bagee ena ni paagoo migi. Wa me nasiino, "Meei, Domba Pooduu to Wa me goeano see apii mee anii kadeeyaanaka yoka" see nasigi. ¹⁰Kiyoo kaama Roh me anii pesee nakiyaata kaama mee malaikat see mée to me anii nadoodoota maga bago ena kaa, esee ebo see maga bagoo to kaa. Kiyoo pakaamaata kaama kota Yerusalem magaa mee, Ogatamee me daamaa wa too wigintaata magaa mee epoo to wodoo Wa paagoo kaama esega. Mee malaikat see mée to me kisee nadeeyaagi. ¹¹Mee kota magaa mee kusi-kusi peedaaka yuwa diino esee daamaa dimi nagi. Ogatamee me asii-sege siyaa agiyoo maamaa pudii, kepe ebo edaakee omaa mokoo, yaspis omaa mokoo, diino esee daamaa awee, kristal omaa wikiiniyaa mokoo. ¹²Oma wagee to miya esee ebo. Oma wagee to kaa kene gaasi ma wiya agoo. Kuwa kenee gaasi ma wiya kuwa kaa malaikat bagee gaasi ma wiya miya agoo. Kene yuwa kaa ko Israel bagee mée apa gaasi ma wiya kuwa ekaa yuwa ebeamaata topa. ¹³Oma wagee to awii yaato kene wedo, yamuyaato kene wedo, wuyaato kene wedo, keno seomigi yaato kene wedo. ¹⁴Mee kota magaa kaa oma wagee kaboo da mee ko oma gaasi ma wiya kuwa dagii da kaa maataata topa. Kuwa omaa yuwa kaa Domba Pooduu to Wa me menaa yadoonaa seta bagee gaasi ma wiya kuwa ekaa yuwa ebeamaata topa. ¹⁵Kuwa menaa naawegataaki malaikat see mée to wa me mee kota magaa ma, oma wagee to ma, oma wagee kenee yuwa ma kuwa ebeadee taano see naadi ebeadee see agiyoo ena agoo, emas tamoo da mee. ¹⁶Mee magaa mee butu wui. Wa me mee tamoo da me butu ena kaa kaama butu ena kaa too ebeadeeyaa naaki dua ribu empat ratus kilometer. Amoo-yamoo da ma, woo-yamoo da ma, togoo-katuu da ma kuwa uduma kisee. Naayaato miya, naayaato miya uduma mee too. ¹⁷Wa me mee oma wagee to mee miya ebeadeeyaa naaki enam puluh meter waa naa. Mee malaikat see mée to me ebeadee sipi kuwa ko mée me miya agiyoo ebeadee siyaa doodoo. ¹⁸Mee oma wagee to mee ko yaspis see omaa me ukuwata. Mee kota magaa mee miya diino esee ebo, emas me ukuwata, daamaa awee see kaca deeyaa mokoo. ¹⁹Mee kota magaa kaa oma wagee kaboo da kaa kepe ebo edaakee oma tomaa-tomaa yuwa topa, diino esee daamaa. Oma wagee kaboo da petamanii mee kaa ko yaspis see omaa tabeata topa. Oma wagee kaboo da wiyaagoo to mee kaa ko nilam see omaa. Wedaagoo to mee kaa ko mirah see omaa. Wogeagoo to mee kaa ko zamrud see omaa. ²⁰Idibeagoo to mee kaa ko unam see omaa. Bedimeagoo to mee kaa ko sardis see omaa. Petaagoo to mee kaa ko ratna cempaka see omaa. Wagaagoo to mee kaa ko beril see omaa. Iyaagoo to mee kaa ko krisolit see omaa. Gaaseagoo to mee kaa ko krisopras see omaa. Gaasi ma ena mee kaa ko lazuardi see omaa. Gaasi ma wiyaagoo to mee kaa ko kecubung see omaa, kisee oma tomaa-tomaa yuwa kuwa mee oma wagee kaboo da kaa tabeata topa. ²¹Bedaa mee magaa kaa oma wagee to kene gaasi ma wiya kuwa ko mutiara keepa gaasi ma wiya kuwa. Kene gakata mutiara keepa ena too too me ukuwata. Mee magaa kaa etaa da mee ko pedeo ena ma taa see emas me ukuwata, diino ko awee see kaca deeyaa mokoo.

²²Mee kota magaa kaa Ogatamee me ee mee anii diino taa. Mee magaa kaa Ogatamee me ee mee ko Se-pesee, We-pesee yago Mée Ogatamee Tuhan mee ma, Domba Pooduu to mee ma Ekea kiyoo toogeekea kemaata Ekea ko Wa me ee mokoo, idukaa oma ee to mee kiyoo taa. ²³Mee kota magaa kaa Ogatamee me asii-sege siyaa agiyoo agoo da wogaamaaga, Domba Pooduu to Waa miya kisee peto agoo da mokoo. Kisee kemaata kenoo to ma, agoo to ma kuwa mee magaa kaa ago wogaamagaano gaano pedeo see taa. ²⁴Mée tomaa yuwa mee wogaamaaga agoo da taa daamaa peenaa taatagea. Magaa da kaa ebo tookee bagee yuwa okoo me ebo ekeasiino see naadi ebo agiyoo yuwa kuwa mee magaa kaa doomeetagea. ²⁵Kiyoo digiyoo peenaa ma taa, awee too kemaata kaagaa gakata oma wagee kene yuwa kuwa se munitagaapea, kisee too ekeasiipea. ²⁶Mée tomaa yuwa okoo me senawii agiyoo yuwa ma, kisee ebo ekeasiino see agiyoo apanaa yuwa miya kiyoo doomeetagea. ²⁷Kiya mée pedeo kiyaayaa agiyoo ena ma kiyoo se seemaapa. Ogatamee me be kiyaa agiyoo ukuwataa see bagee ma, makapaa menaa wegataa see bagee ma kuwa miya kiyoo taa kaata. Domba Pooduu to Wa me tuyaabuu siwoo taatagi bagee ekaa yamaatagaa seta kapogee yiba ekaa agoo see bagee yuwa too seemaatagea.21:27 Luk 10:20

¹Kuwa kaboo da mee malaikat see mée to me mée aya tuyaabuu siwoo siyaa uwoo kuwa nadeeyaagi. Kuwa uwoo kuwa ko esee daamaa, awee, kristal omaa deeyaa mokoo. Kuwa uwoo yuwa Ogatamee ma, Domba Pooduu to ma Ekea me ebo animagaano yoo kaama peetaaka. ²Kuwa uwoo kuwa mee kota magaa kaa etaa da taa peetaaka. Kuwa uwoo naayaato-naayaato ko mée aya tuyaabuu siwoo siyaa piya wodoo to topa. Mee piya wodoo to tahun gakata kaagaa gaasi ma wiya poo ekagee see, keno gakata kisee too poo daamaa ekawoo siyaa. Mee piyaa iyee yuwa me mée tomaa-tomaa yuwa kaa meanee see agiyoo yuwa yataa kiyaabuu see.22:2 Kej 2:9, Yeh 47:12³Mee magaa kaa Ogatamee me pedeo ayaa yadootaayaa agiyoo ena ma taa kaata. Ogatamee ma, Domba Pooduu to ma Ekea me ebo animagaano yoo kiyoo agoo kaata. Wa me agiyoo daamaa yaokagee see bagee yuwa me Waa ebo ekee, yaapaagee siwoo taatagea. ⁴Okoo me Wa me ebeyumaa da diitagea. Wa ekaa da okoo me etaguu to kaa yaebeamagaatagi.22:4 Mat 5:8, Ibr 12:14⁵Digiyoo kuwa kiyoo taa kaata. Tuhan Ogatamee Wa me agoo da mee okoo kaa wogaamaayaabuu siwoo taatagi kemaata peto agoo da miya taa, keno miya taa, kisee ago peeyaano agiyoo kuwa okoo gaano pedeo see taa kaata. Okoo kisee too iminoo miya, iminoo miya ebo too toowoo taatagea, see kuwa mee malaikat see mée to me nadeeyaagi.

Yesus mee moga meetagi yoka see kaa menaa

⁶Kuwa kaboo da mee malaikat see mée to me nasiino, "Kuwa a me deepe, yeepe menaa kuwa ko mikee nao naadi daamaa masiyaa menaa kuwa. Tuhan mee, Waa nabi bagee paagoo Roh maniyaa Mée Ogatamee mee Wa me malaikat see mée to paagoo asiino, ’Ni me agiyoo daamaa naokagee see bagee yuwa paagoo pooi’ see asigi. Kuwa moga ukuwaandaa taapa agiyoo kuwa deeyaasi naadi okoo paagoo peeyaagi" see nasigi.

⁷Yesus me menaa mee ko "Daamaa nekeenii: Anii moga meeta. Eto mee kapogee yiba kisee ukuwaandaaka, bedaa kisee ukuwaandaa taata see menaa kuwa miya okoo daamaa peneata doowoo see bagee kuwa daamaa, ede nao" see wegagi.

⁸Anii ko Yohanes, kuwa menaa kuwa yeetaa, deetaa sepa mée to. Anii kuwa menaa yuwa yeetaa, deetaa semaata kaama anii mee malaikat see mée to ebo ekee, yaapaagee taano see naadi wa me badoo da kaa esee-gapuunega. ⁹Kiya wa me nasiino, "Kisee se ukuwaai. Aa ma, nabi bagee yuwa ma, ikii Yesus yiba ena kenaa bagee yuwa uduma ikii Wa me agiyoo yaokagee siyaa see see anii miya kisee mée. Bedaa mee kapogee yiba menaa kuwa daamaa peneata doowoo siyaa bagee kuwa miya inii paaya uduma Wa me agiyoo yaokagee see bagee yuwa yoka Ogatamee mee too ebo ekee, yaapaagee taai" see nasigi. ¹⁰Bedaa wa me nasiino, "Monaa da katu yoka mee kapogee yiba ukuwaandaa taata menaa kuwa se booneai. ¹¹Pedeo agiyoo ukuwaano too ede see bagee kuwa okoo pedeo agiyoo ukuwawoosi yoka ekeasii. Bedaa pedeo dimii kaa too umiwoo see bagee kuwa okoo pedeo dimii kaa umiwoosi yoka ekeasii. Dimi topoo see bagee kuwa okoo daamaa, topoo see agiyoo ukuwawoo taapea, bedaa kisee okoo daamaa wa too wigintaata pedeo taa see kaa umiwoo see bagee kuwa okoo daamaa wa too wigintaata pedeo taa see kaa umiwoo, toowoo taapea" see kuwa wa me nasigi.

¹²Yesus me menaa mee ko "Daamaa nekeenii: Anii moga meeta. Anii mée gakata okoo me ukuwagee seta yuwa doodoo okoo me ukuwataa to mokoo da maniino see naadi doomeeta.22:12 Mat 16:27¹³Anii ko Alpa ma, Omega ma kuwa. Anii toono mee ko idukaa petamanii kaama kisee too usii da ewo. Manii to ma, usii to ma kuwa ko Ani too" see wegagi.

¹⁴Okoo me dokaa wetogemaata kaama pedeo taa see bagee kuwa daamaa, ede nao. Okoo mee kota magaa kaa oma wagee kenee to taa daba seemiyaata kaama mée aya tuyaabuu siwoo siyaa piyaa poo kuwa aii naatagea.22:14 Mat 22:13, Why 2:7, 7:14¹⁵Kiya mee magaa kaa kaama amaa kaa tapa yaato ekeata bagee kuwa ko kameno mokoo otoopa ukuwanaa see bagee yuwa ma, deo peneasiyaa bagee yuwa ma, otoopa aadoona-maadoona see bagee yuwa ma, mée wugitaa see bagee yuwa ma, makapaa ogatamee ebo ekee, yaapaagee see bagee yuwa ma, makapaa menaa ou, makapaa agiyoo ou, kisee gaawoo, ukuwawoo siyaa bagee yuwa ma okoo uduma mee kota magaa kaa kaama amaa kaa ekeata bagee yuwa.

¹⁶"Eto ko Anii Yesus mee me kisiino ko: Ni me malaikat see mee to wa me ikii Yesus mikee nao naadi kutuu taa siyaa bagee yuwa paagoo kuwa ukuwaandaa taata menaa yuwa kisiino see naadi pooi see aseta. Anii ko Daud wa kaa kaama asii-kaba-kaba seta Mée, awii yaato keno wogaa to see okadee mee wikiindaa siyaa mokoo see Mée mee" see kisega.

¹⁷Roh mee ma, Domba Pooduu to Wa me goeano see apii to mee ma kuwa me "Meei" see wegagea. Bedaa mee menaa yeeyaa bagee kuwa miya "Meei" see kuwa asiino daamaa. Uwo naadi kiyaa bagee uduma meei. Uwo naano ede kiyaa bagee yuwa uduma kuwa mée aya tuyaabuu siwoo siyaa uwoo kuwa aii kisee naano ke meei.22:17 Yes 55:1, Yoh 4:10, 7:37-38

Wodopasi menaa

¹⁸Eto mee kapogee yiba kisee ukuwaandaaka, bedaa kisee ukuwaandaa taata see menaa kuwa yeetaa see bagee paagoo ani me asiino ko: mée waa ena me kuwa menaa yuwa kaa wa me too gaayaa menaa noonaa ma tabeasiyu ko mee kapogee yiba mée kaa pedeo meanee see agiyoo ebeamaata yuwa kuwa Ogatamee me mee mée to kaa pe-tabeasiitagi. ¹⁹Bedaa mée waa ena me mee kapogee yiba menaa kuwa noonaa wisintaata ekeasiyu ko mee kapogee yiba Ogatamee me kisee daamaa aii maniita see ebeamaata agiyoo kuwa mee mée to se masiitagi. Kuwa ko Wa me kuwa mée aya tuyaabuu siwoo siyaa piyaa poo kuwa wa me see yuwa se nuyaatagi. Bedaa mee daamaa wa too wigintaata kota magaa kaa wa me toopa see gaata komoo mee miya se tuyaatagi.

²⁰Kuwa menaa kuwa uduma anii daamaa naseta Mée Wa me wegaano menaa ko "Mikee, Anii moga meeta" see wegagi. Amin. Tuhan Yesus Aa meei.22:20 1Kor 16:22

²¹Tuhan Yesus Wa me aii kiepa dimii mee ikii uduma epo enaataa kiitoowoosi naadi kiasega. Amin. Kiyoo too.