Pilipi

Pilipi

Paulus me Pilipi magaa kaa Yesus mikee gaata bagee yuwa paagoo yaebeamaata kapogee

Mee kapogee mee ko Paulus waa digiyoo ee yiba totaaki too ebeamaata kapogee. Paulus mee idukaa Parisi kaa mée kiya Yesus mikee gaata kaama wodoo Wa me menaa too yadoonaa seta. Wa me menaa yadoonaa naadi kaama Pilipi magaa kaa bagee paagoo eewegata. Kiyoo wa me ukuwanaa, peenaa seta menaa kuwa Kisah Para Rasul 16:12-40 yiba topa. Paulus waa apanaa magaa kaa peenaa, weganaa naadi kaama Yesus me menaa be see bagee yuwa me Roma magaa kaa digiyoo ee yiba dogeamaata. Waa digiyoo ee yiba toogee seta kaboo Pilipi magaa kaa Yesus mikee gaata bagee yuwa Paulus wa me gaano pedeo agiyoo edaano see kepee kuwa sikii ye, taa ye naadi kepe manemea. Kuwa me kemaata Paulus me paamee see menaa asiino see naadi mee kapogee mee okoo paagoo yaebeamaata.

Pilipi magaa kaa koopoo see menaa weganaa see bagee agoo yoka gaai naadi menaa kuwa mee kapogee yiba ebeamaata. Okoo me weganaa seta menaa kuwa ko kisee: "Yesus mikee gaayaa bagee yuwa okoo miya kado ponee daapeasiino gaano pedeo, Yahudi bagee okoo me ukuwawookea see see" see menaa weganaa seta. Kiya Yesus yaato bagee kaano kuwa ko kado ponee daapeata kemaata se, see kuwa Paulus me gaamaasi naadi yaebeamaata menaa.

Yesus mee epoo to wodoo pakaa-seometa kaama wodoo tahun amaamo waa naa omemaata kaama tahun 60 mee yiba mokoo Paulus me mee kapogee yaebeamaata.

Mee kapogee yiba mena kutuu yuwa kuwa ko kisee:

1:1-11 Petamanii menaa ma, paamee dimii ma sembahyang menaa ma

1:12-26 Paulus mee digiyoo ee yiba toogee seta kaboo Yesus mikee gaata bagee eebaa kedaa seta menaa

1:27–2:18 Yesus mikee gaata bagee yuwa Waa see see daamaa umiwoosi naadi menaa

2:19-30 Timotius ma, Epaproditus ma ekea kaa yaapaagee seta menaa

3:1–4:9 Koopoo see menaa gaamaasi naadi menaa ma, wodopasi tupiino menaa ma

4:10-20 Neeta agiyoo kuwa me kiiboo, paamee aseta menaa

4:21-23 Wodopasi menaa

¹Kristus Yesus me agiyoo yaokagee see bagee yuwa ko Paulus ma, Timotius ma wiya enaa me Pilipi magaa kaa ikii Kristus Yesus ma dimi aagadi-maagadi naadi daamaa wa too kiwigintaata bagee yuwa uduma paagoo mee kapogee mee kiebeage, bedaa ikii Yesus mikee gaayaa bagee tuku-tuku yuwa ma, mikee gaayaa bagee kaa tabogetaa see bagee yuwa ma ikii uduma paagoo kiebeage. ²Iniitaagi Ogatamee ma, Tuhan Yesus Kristus ma Ekea me aii kiepa dimii ma, koogo adumeta dimii ma kuwa ikii ma epo enaataa kiitoowoosi naadi kiasege.

Paulus me paamee dimii ma sembahyang seta menaa

³Ani me ikii kineke-nekee siyaa kaboo uduma ni me Eboo Ogatamee paagoo kiiboo, paamee see kiasegeeka. ⁴Ni me ikii kaa sembahyang menaa kuwa uduma esee ede ma, ede ma kiasegeeka. ⁵Kuwa ko anii idukaa petamanii kaama eto too kuwa Yesus me doometa menaa kuwa yaweganaa siwoo siyaa yiba ikii me nadeegee, epo niiukuwagee siwookea kuwa kaa anii Ogatamee kiiboo, paamee dimii mee esee ebo. ⁶Idukaa Ogatamee me ikii yiba petamanii daamaa kikiyaabuu seta yuwa kuwa Wa me daamaa-daamaa kikiyaabuu siwoo taapi, kisee too Kristus Yesus wiyaagoo meetagi yoo too, kuwa Wa me mikee kisee kiukuwawoo taapi ii see kuwa ani me kisee kigaaga.1:6 1Tes 5:23-24⁷Anii kisee ikii uduma kigaaga mee ko ni me kiepa dimii mee mikee ebo kemaata kisee kigaano daamaa. Mikee, anii digiyoo ee yiba toomuu taaka too miya ikii me naekeasiino taa, bedaa anii okoo Yesus me doometa menaa yuwa wisineekee bagee yuwa paagoo mikee gaasi naadi daamaa ipiipi see eewegataaka too miya ikii nagaabuu taano taa. Ogatamee me mée epa dimii mee ikii paagoo miya topa kemaata ikii me kisee too anii nadeegeekea. ⁸Kristus Yesus me mée epa kuwa see see anii miya ikii uduma epa kigaaga, ikii ma epo kiitoga naaki ou see dimii mee ebo. Anii kisee kigaaga kuwa makapaa se, mikee, Ogatamee me miya kisee naipi.

⁹Anii sembahyang kiasegee see menaa kuwa ko kisee: Ikii me epa dimii mee ebo kiwoo naadi kaama mikee menaa ipi see dimii ma, pedeo menaa wigineano ipi see dimii ma kuwa ikii kaa eebaa kiwoosea naadi kiasegeeka.1:9-10 1Tes 3:12-13¹⁰Kuwa dimii ikii kaa eebaa kiwoo naadi kaama ikii me "Kuwa mikee, kuwa daamaa" see ipiipi wiginiwoo, kisee too Kristus wiyaagoo meetagi naagoo ikii esee daamaa dimii too, pedeo taa see bagee ii see kideesi naadi kiasegeeka. ¹¹Bedaa ikii Yesus Kristus ma dimi aagadi-maagadi naadi kaama ikii dimi topoo see kaa daamaa agiyoo yaukuwawoo, daamaa poo yaekawoo, ikii kisee umiwoo, toowoo see kaa mée me Ogatamee ebo ekee, yaapaageesi naadi kiasegeeka.

Paulus mee digiyoo ee yiba toogee seta kaboo Yesus mikee gaata bagee eebaa kedaa seta menaa

¹²Neebee nokaa yuwa, anii mena ena ipi kikiyaanaka, mee ko ni kaa ukuwaandaa seta agiyoo yuwa kuwa pedeo too see se. Anii nakaayoo digiyoo ee yiba toogeeka too Yesus me doometa menaa peneata bagee eebaa kedaa segeekea yoka daamaa see gaaga. ¹³Anii Kristus yaato bagee kemaata kaama nakaayoo natameamaamea see kuwa mée uduma naipi kegea. Nakaayoo magaa da kaa tookee eboo wa me ee yadiitoo taa see bagee yuwa ma, apanaa bagee eebaa miya okoo me kisee nanekeenegea. ¹⁴Anii nakaayoo digiyoo ee yiba toogeeka kuwa me mee magaa kaa Tuhan mikee gaayaa bagee okoo mée eebaa miya uu kegea.1:14 Mee magaa kaa Tuhan mikee gaayaa bagee uu kegea see mee ko Tuhan Waa Paulus ma daamaa enaataa eetoogeeki kemaata okoo miya Tuhan ma naatoogee taapi yoka naadi dimi uu kedaakea, mée me kisee nakoo taapea miya Wa me menaa yaweganaa taapa, see dimii gaagea see mee. Okoo Wa kaa too dimi maataata kaama Ogatamee me menaa weda taa ma yaweganaakea.

¹⁵Okoo mikee kisee yaweganaakea kiya mée noonaa me nakagoo kegea, okoo me ’Anii eboo mee too miya’ see dimii kaa Kristus kaa menaa eeweganaakea. Kisee dimii bagee yuwa agoo kiya mée noonaa daamaa dimii kaa eeweganaakea. ¹⁶Daamaa dimii kaa mena eeweganaa see bagee kuwa gaayu ko anii Yesus me doometa menaa wisineekee bagee paagoo ipiipi see ase-maneesi naadi Ogatamee me nakaayoo tuyaagi ii see nanekeenegea. Okoo me anii naepa kaa Yesus kaa menaa yaweganaa see bagee yuwa. ¹⁷Nakagoo kegea bagee kuwa gaayu ko okoo Kristus mee too ebo ekeasiino see naadi mena weganaakea kuwa se kiya okoo ekaato ebo ekeasiino see naadi weganaa see bagee yuwa. Okoo obeegea bagee eebaa kemaata okoo me anii gaagaa ebo see dimii ni kaa namiyaano see naadi eeweganaakea.1:17 "Okoo me anii gaagaa ebo see dimii ni kaa namiyaano see naadi yaweganaakea" see menaa mee ko Paulus me ’Anii digiyoo ee yiba toogeeka kiya okoo mena daba weganaa naadi mée eebaa okoo sekaataa peegea yaai’ see dimii mee wa kaa yamiyaano see kiya kisee dimii mee Paulus waa taa naadi kaama ebeata menaa mee.¹⁸Kiya maa agiyoo se. Mée noonaa mikee see dimii kaa eeweganaakea, noonaa ebo poga-poga see dimii kaa eeweganaakea. Kisee kiya Kristus kaa menaa kuwa eeweganaakea yoka anii ede kega. Mikee, anii kisee too ede kegeeka. ¹⁹Mee ko anii digiyoo ee yiba pedeo totaaka kiya ikii me ni kaa sembahyang nasegeekea kuwa kaa miya, bedaa Yesus Kristus me Roh mee naatoogeeki kuwa kaa miya anii daamaa kaapa, daba daagimaa poopa see kuwa anii ipi yoka anii kisee too ede kiwooka. ²⁰Idukaa kaama eto too anii Kristus ebo ekee siwooka see see, bedaa eto kaama wodoo miya anii ego weda see taa, uu see dimii mee too ebo. Anii tuyaa miya, booyaa miya koosi, ni kaa naukuwaaniyaabuu segee siyaa yuwa doodoo Kristus mee too ebo ekee siwooka naaki ou see dimii mee too gaawooka. ²¹Anii toopa miya Kristus mee too ebo ekee siwoo siyaa, bedaa anii booyaa miya daamaa.1:20-23 Kis 20:23-24, Rom 14:8, 2Kor 5:8-9²²Kisee anii omegee, toogee siyu ko daamaa agiyoo yaukuwawoo siyaa yoka anii toono too daamaa ye, bogaano too daamaa ye, kamee? Anii ewo. ²³Ekea paaya daamaa yoka anii dimi wiya agoo. Anii boomaata kaama Kristus paagoo Waa ma epo enaataa toono mee esee daamaa, ede ²⁴kiya anii magaa da kaa ikii ma epo enaataa kiitodogaano kuwa daamaa, gaano pedeo. ²⁵Anii kisee nekeenega yoka anii moga se boota ikii me Yesus mikee gaano dimii mee ede ma, ede ma pesee kiwoosea naadi anii ikii uduma paagoo kiitoowoo taapa ii see gaaga. ²⁶Bedaa anii ikii paagoo kiitoowoo taapa kuwa kaa miya ikii me Kristus Yesus ede ma yaapaagee see dimii mee ebo kaapea.

Wisineekee bagee paagoo ena dimii, ena menaa kaa makii taa see kaa toowoosi naadi menaa

²⁷Anii maamaa kisiino ko: Ikii me umiino, toono kuwa Kristus Wa me doometa menaa kuwa doodoo umiwoo taai. Ikii kisee umiwoo, toowoo siyu ko anii pee-kidiipa kaapa miya, ikii kaa menaa yuwa doodoota ni paagoo me-nasiipea kaapa miya ikii ena dimii, ena menaa kaa Wa me doometa menaa kuwa too peneata makii taa see kaa epo enaataa omaago ma doowookea ii see kuwa kinekeeniipa. ²⁸Kuwa ikii kiwisintagaa segee see bagee kuwa ikii peenaa ma se wedaai. Ikii me kuwa bagee weda taa see dimii mee me kuwa bagee yuwa me ’Yaai, Ogatamee me inii pedeo mée kiyaatagi’ see kuwa nekeeniipea, bedaa Wa me ikii daba kidaagimaa peeyaatagi ii see kuwa miya nekeeniipea, ekea paaya Wa me yaukuwaatagi agiyoo ii see kuwa nekeeniipea. ²⁹Mikee, Kristus mee ogo peesi naadi Waa mikee gaawoo see dimii mee too ikii kaa kidootaata se kiya mée me ikii ae-wae kisiyaabuu siyaa agiyoo kuwa miya.1:29 Yoh 15:20, 1Tes 3:3, 2Tim 3:12, 1Pet 2:21³⁰Kuwa ikii eto ae-wae, dimi gaagaa segeekea kuwa anii miya kisee ae-wae, gaagaa segeeka. Mee ko idukaa anii kiitoogee seta kaboo mée me kisee nawisinegee seta yuwa kuwa ikii me nadeemea, bedaa eto miya anii nakaayoo kaama kisee ae-wae segeeka see kuwa ikii me nayeegea.

Kristus Wa me dimii masisi naadi menaa

¹Ikii ko Kristus ma dimi aagadi-maagadi naadi dimi mena daamaa pesee kikiyaata bagee yuwa, ikii Wa me mée epa dimii mee me daamaa dimi kiasimiyaata bagee yuwa, ikii Roh ma dimi aagadi-maagadi naadi umiwoo, toowoo see bagee yuwa, ikii dimi dapuu, dimi epa aagaa siyaa bagee yuwa. ²Ikii kisee kikiyaata bagee yuwa yoka ikii ena dimii, ena menaa see kaa epa aagaa naadi kaama dimi aagadi-maagadi siwoo taai. Ikii kisee ukuwawoo siyu ko ni me ede dimii mee pudii eebaa nasiyaapea. ³’Ni too ebo, ni too ipi’ see dimii mee se gaai. Ikii ekaato peedi ekeata kaama apanaa bagee yuwa paagoo ’Anii peedi, waa ebo’ kisee aagaa siwoo taai. ⁴Ikii mée gakata ’Ni me gaayaa-gaayaa yuwa too’ see dimii mee se, apanaa bagee me gaayaa-gaayaa kuwa miya aayee taai.2:3-4 Yak 3:13-17⁵Kristus Yesus Wa me dimii mee ikii miya masiino gaano pedeo, mee ko kisee:

⁶Waa ko Ogatamee ma Ekea ena keenda, ena keenda,2:6 Yes 9:5, Yoh 1:14, 8:58, Kol 1:15-16 Ogatamee ma endagii kiya

Wa paagoo ebo too umiwoo, toowoo taano too dimii mee gaano taa kemaata

⁷mee dimii ekeata mée ena mokoo,

agiyoo yaokagee see mée ena mokoo keta.2:7 Mat 20:28, 2Kor 8:9, Ibr 2:14-17

⁸Mée ena keta kaama Waa ekaato dimi peedi kiyaata

Ogatamee me gaata-gaata dimii too yaukuwawoo naadi kaama boota,

piya bokoo to kaa paku wugitaata boota.

⁹Kisee kemaata Ogatamee me Waa esee ebo ekeata kaama

asii-sege wodoo asii-sege see ebo ekaa yago Mée kiyaata,2:8-9 Mat 26:39, 2Kor 13:4, Ibr 12:2

¹⁰se-bagee, we-bagee uduma me Waa ebo ekee siwoosi naadi kisee yakiyaata.

Epoo to wodoo topea yuwa miya, magaa da kaa topea yuwa miya, maga miyoo topea yuwa miya uduma

ebo ekaa yago Mée Yesus paagoo kagu sibumedaa naadi

¹¹Yesus Kristus Waa mée uduma epoo Mée ii see wegaatagea,

kisee Nagamee Ogatamee yaapaagee see kaa wegaatagea.

Ogatamee me menaa daamaa yayeewoo, yaukuwawoosi naadi menaa

¹²Kisee kemaata ni me epa see bagee yuwa ikii Wa too weda, Wa too ebo ekee see dimii kaa Wa me menaa esee yayeewoo, yaukuwawoo taai.2:12 2Kor 7:1 Ikii ko Wa me daba kidaagimaa peeyaatagi bagee yuwa kemaata kisee yaukuwawoo taai. Anii idukaa ikii paagoo kiitoogee sema kaboo ikii kisee daamaa yaukuwawoo semea. Eto ko anii ikii paagoo kiitoono taa kaboo miya daamaa yaukuwawoo, umiwoo taai. ¹³Ogatamee mee ko ikii yiba ’Wa me ede gaayaa yuwa too daamaa yaukuwawoo taapa’ see dimii mee kiawitaa see Mée, bedaa Wa me kuwa agiyoo naukuwawoosi naadi ikii pesee kikiyaabuu taa see Mée yoka daamaa yaukuwawoo taai.2:13 Ibr 13:21¹⁴Ikii kisiyaa menaa kuwa gaayu ko mena dukumeawee see se, aawisi-maawisi kuwa miya se kiya uduma yayiino too. ¹⁵Ikii kisee daamaa ukuwagee siyu ko eto mee begaa kaa bagee me ikii kisee bagee yuwa ii see kidiipea. Ikii okoo dimi koopoo, dimi pedeo see bagee yuwa yupii umiwoo, toowoo naadi kaama okoo me ikii mikee Ogatamee me yogaa yuwa, pedeo dimii, pedeo menaa taa, daamaa too umiwoo see bagee yuwa ii see kuwa kinekeeniipea. Okadee yuwa digiyoo yiba deeyaa-deeyaa mokoo kisee miya ikii mée paagoo ago kusi-kusii da wogaamaayaa see see bagee kidiipea.2:15 Mat 5:14-16¹⁶Anii idukaa ikii paagoo kana ma, kana ma kitopegee seta kuwa ketaa-ketaa see kaapa naadi kuwa mée daamaa toowoo siyaabuu taano menaa kuwa daamaa peneasii. Ikii kisee daamaa peneata umiwoo siyu ko Kristus meetagi naagoo anii ikii kaa ede ma, ede ma taata. ¹⁷Ikii ko Yesus mikee gaayaa bagee yoka anii esee ede kega, eto koa ko anii booyaa miya daamaa. Ikii Yesus mikee nao naadi ikii ekaato Ogatamee paagoo ekega-manee taakea mee ma, bedaa nii ekaato ekegataata kaama mée me napeeyaapea tadaa kuwa miya ekea paaya enaataa Ogatamee paagoo daamaa ekega-manee siyaa agiyoo mokoo.2:17 2Tim 4:6 Ikii kisee ekaato ekegataata ede ma, ede ma segeekea kuwa mokoo anii miya ede ma, ede ma segeeka, ¹⁸bedaa anii ekegataata ede ma, ede ma segeeka kuwa mokoo ikii miya ede ma, ede ma niisegee taai.

Timotius ma, Epaproditus ma ekea pooi see asiino see naadi menaa

¹⁹Tuhan Yesus mee anii ma enaataa kemaata eebaa se umiipa Timotius mee ikii paagoo "Mena pe-naayeegii" see asiipa dimii agoo. Ni me omegee, toogee see kaa menaa kuwa kaa ikii ede kaapea see see ikii me omegee, toogee see kaa menaa kuwa anii miya yeemaata kaama ede kaano see naadi waa ikii paagoo pooi see asiipa. ²⁰Apanaa waa see see bagee nakaayoo taa. Anii ma ena dimii see bagee wa too, bedaa ikii daamaa topea ye naadi kineke-nekee taa see bagee kuwa miya wa too. ²¹Apanaa bagee uduma okoo me ede gaayaa-gaayaa kuwa too ou, Yesus Kristus me ede gaayaa-gaayaa kuwa ou see dimii mee okoo taa, Timotius wa too. ²²Anii Yesus me doometa menaa yaweganaaka too waa miya kana ma, kana ma naaukuwagee simi. Ekea seepuguu enaataa daamaa eeukuwataa siyaa see see mokoo waa miya kisee daamaa naaukuwataa see mée to ii see kuwa ikii miya ipi. ²³See kemaata anii daba napeeyaapea ye, se napeeyaapea ye see kuwa ipi keta kaama anii waa moga ikii paagoo pooi see asiipa. ²⁴Tuhan me naapoopi ii see gaaga yoka anii miya moga ikii paagoo meeta.

²⁵Eto kiipaa ko Epaproditus mee, anii naiye-iyeesi naadi ikii me ni paagoo pooi see naaseta mée mee, waa ikii paagoo bedaa metaki pooi see asiipa gaaga. Waa ko mikee Yesus yiba ena kenaa bagee, anii ma enaataa agiyoo epo omaago ma naaukuwagee see mée, makapaa menaa kuwa anii ma epo omaago ma yataa kiyaabuu segee see mée. ²⁶Waa ikii paagoo kiitoga naaki ou see dimii mee kigaataaki, bedaa ikii me Epaproditus waa ikiyoo ebo meanigi nao see menaa kuwa ikii yeegea kuwa kaa wa me sooi, okoo dimi nagaagaa taakea ye naadi waa dimi mena kigaagaa ebo totaaki. ²⁷Mikee, waa ikiyoo kaa bogaano see koo simi kiya Ogatamee me epa kaa deegee simi. Wa too epa gaami se kiya waa booyaa kuwa kaa anii gaagaa dimii mee ebo kiyaa naadi anii miya epa nagaami. ²⁸Kisee kemaata anii waa ikii paagoo moga pooi see asiipa dimii mee ebo. Waa ikii paagoo daamaa peemaata kaama ikii ede ma, ede ma taapea, bedaa ni me gaagaa dimii mee miya taa kaapa. ²⁹See kemaata Tuhan yiba ena kenaa bagee yuwa daamaa badaa aamagaa siyaa mokoo see see waa miya ikii me daamaa ede ma, ede ma badaa magaai. Waa see see bagee kuwa ebo ekeasii. ³⁰Ikii me anii naiye-iyee taano see naadi ni paagoo niitoono taa yoka wa too naatoogee simi. Mikee, waa ekaato ekegataata Kristus kaa yaukuwaano agiyoo kuwa anii ma epo eeukuwageeka too bogaano see koo simi yoka waa see see bagee ebo ekeasii.

Yesus mikee gaakee kaa too Ogatamee me inii sikii mée kiyaayaa see kuwa nekeensi naadi menaa

¹Neebee nokaa yuwa, mee wodoo menaa ena mee ko kisee: Ikii Tuhan nao naadi ede ma, ede ma siweei.

Anii idukaa kisema menaa kuwa eto bedaa kiebeanaka. Kiebeano ko kana se kiya ikii makapaa menaa si yayeesea naadi bedaa kiebeanaka.

²Eto ko pedeo kamenoo mokoo bagee kuwa nekeenii. Okoo pedeo agiyoo koo senaa see bagee yuwa, okoo kado ponee daapeasiino gaano pedeo see weganaa see bagee yuwa yoka gaai.3:2 Kuwa bagee yuwa me weganaa see menaa kuwa ko kisee: "Yesus mikee gaayaa bagee yuwa okoo miya kado ponee daapeasiino gaano pedeo, Yahudi bagee me ukuwawookea see see. Kisee daapeata kaama Ogatamee me aa sikii see kagaayaa" see menaa weganaakea.³Mee ko kado ponee daapeata kemaata Ogatamee me bagee kiyaa see kuwa se kiya3:2-3 Rom 2:29, Kol 2:11 inii ki mikee Ogatamee me bagee yuwa. Inii ki Roh pesee kaa Ogatamee yaapaagee, ebo ekee taa see bagee. Inii Kristus ma dimi aagadi-maagadi naadi kaama ede ma, ede ma taa see bagee. Israel bagee me tapaato yaato ukuwaa-ukuwaa kuwa ukuwawoo siyu too Ogatamee me bagee kiyaa see dimii mee inii taa. ⁴Apanaa bagee okoo kuwa tapaato yaato ukuwaa-ukuwaa kuwa ukuwawookea kemaata "Ogatamee me aa sikii see nadeegi" see menaa kuwa wegageekea. Okoo me kisee wegageekea menaa kuwa anii miya wegayaa. Anii kuwa menaa too se kiya anii sikii see nagaasi naadi menaa maamaa eebaa miya wegayaa. Anii miya kisee menaa wegayaa kiya pedeo, kuwa menaa uduma anii dookomeega. ⁵Kuwa ko anii nakabata yoo kaama wagaagoo to naagoo kado nadaapeata mée. Anii miya Israel bagee, toma ko Benyamin apaa kaa mée yoka anii esee mikee Ibrani bagee. Musa me menaa yayiino ko anii Parisi kaa bagee yoka dimi-dimi yayeewoo seta mée. ⁶Bedaa Ni me omaago ma ukuwagee seta agiyoo kuwa gaayu ko idukaa anii Ogatamee ebo nao naadi Yesus mikee gaata bagee yuwa wegee-wegee segee seta mée.3:6 Kis 8:3 Musa me menaa gaayu ko kuwa menaa uduma anii sikii. "Mena ena waa naa aa tuunuu sepe" see kuwa se nawegamaayaa. ⁷Idukaa anii kisee mée to yoka anii sikii see dimii gaata kiya eto ko taa. Anii Kristus kaa too dimi maataata kaama wodoo mee idukaa dimii mee anii taa. Kuwa ni me ukuwawoo seta agiyoo kuwa uduma anii daamaa nakiyaano iyo yoka imi taa agiyoo yuwa too see gaaga.3:7-8 Ibr 11:24-26⁸Bedaa kuwa agiyoo kuwa too se kiya anii kisee sikii see nakiyaasi naadi dimi maataa siyaa agiyoo apanaa yuwa uduma miya wisintaaga. Anii epoo Mée Tuhan Kristus Yesus Waa esee ipi kaano mee too ebo yoka anii Kristus ma aagadime siwoo taano see naadi kuwa apanaa agiyoo kuwa uduma aii tameekee agiyoo too mokoo yoka naadi dookomeega. ⁹Ogatamee me anii Kristus mikee gaayaa bagee kemaata sikii see nagaasi naadi anii kuwa apanaa agiyoo uduma wisintaaga. Anii Musa me menaa yuwa deewoo naadi kaama Ogatamee me anii sikii see nagaakee se kiya Kristus mee mikee nao see gaakee kaa too Wa me bagee kiyaa. ¹⁰Anii Kristus mee esee ipi kega naaki ou see dimii mee ebo. Waa boota kaama aya andoo peeyaata pesee da kuwa anii miya kisee napesee kiyaabuu siwooki naaki ou, bedaa Waa boodi abaata-abaata see see mokoo anii miya kisee Kristus ma aagadi-maagadi naadi kaama boodi abaaga naaki ou, bedaa Waa ekaato ekegataata mée yaboota see see mokoo anii miya kisee booga naaki ou.3:10 1Pet 4:13-14¹¹Anii boota kaama daamaa aya andoo napeeyaasi naadi anii kuwa ou dimii yuwa gaawoo, umiwoo segeeka.

¹²Anii Waa esee ipi kega naaki ou, kisee ou dimii apanaa yuwa kuwa miya gaawoo, umiwoo segeeka kiya eto kiipaa anii kuwa nakimaano taa. Kuwa uduma anii nakimeta kaama pedeo ena ma taa see mée kega yoka, see menaa kuwa anii se wegamaayaa. Kisee kiya anii Kristus Yesus Waa esee ipi kega naaki ou see dimii mee ebo. Ani me Kristus esee ipi kisi naadi Wa me anii napeneata kemaata anii miya Waa peneata esee ipi kega naaki ou see dimii mee too gaawooka. ¹³Neebee nokaa yuwa, anii kuwa uduma nakimemaata topa see dimii mee anii taa kiya anii ou gaawoo see dimii mee ena too too, mee ko kisee: Kuwa ni me eto miyoo ukuwagee seta yuwa kuwa anii emaa okaato se wugitaata anii ikigi yaato too emaa wugiwoo naadi yiibaga pakadoota ¹⁴Ogatamee me Ni paagoo nameei see nasetaa see yoo kiyoo anii Kristus Yesus mee peneata ipi ketaa to mokoo da kuwa anii se masega ou dimii mee maamaa gaawoo, umiwoo, toowoo segeeka.3:13-14 Luk 9:62, 1Kor 9:24-27, 2Tim 4:7-8

¹⁵See kemaata inii Kristus mikee ipi see bagee yuwa yoka inii kisee ou see dimii kuwa niigaawoo, umiwoo taai. Anii kisega menaa kuwa ena waa naa ikii me "Kisee se" see nagaata kaama apanaa dimii gaayu ko Ogatamee me ikii daamaa kinekeeniyaapi. ¹⁶Wa too dimii, wa too dimii agoo kiyaa miya inii me idukaa petamanii kaama eto too daamaa mée tupiwoo siyaa menaa kuwa se ekeata daamaa doowoo, umiwoo taano gaano pedeo.

Yesus mikee gaayaa bagee yuwa daamaa nekeensi naadi menaa

¹⁷Neebee nokaa yuwa, ni me ukuwaa-ukuwaa, umii-umii kuwa ikii miya ukuwawoo, umiwoo taai. Apanaa bagee miya inii see see daamaa ukuwawoo, umiwoo taakea yoka ikii miya kisee okoo deeta kaama daamaa ukuwawoo, tupiwoo taai. ¹⁸Kuwa kisega kuwa ko mée eebaa me Kristus piya bokoo to kaa mée yaboota menaa kuwa wisintaata kaama otoopa omegee, toogeekea. Kuwa bagee yuwa ikii nekeensea naadi anii idukaa kaama maamaa kisiwooka, eto miya yege ma kisega. ¹⁹Okoo usiyaato ko pedeo kaatagea. Makapaa ogatamee kaa dimi maayaa mokoo okoo me otoopa ou naadi ukuwagee see agiyoo kuwa kaa dimi maawookea. Okoo naano agiyoo naano dimii too. Okoo me ede ma, ede ma siyaa agiyoo kuwa pedeo, mée me ukuwaano ego weda kiyaa agiyoo kuwa too. Okoo magaa da kaa agiyoo kuwa kaa dimi maawoo see bagee yuwa too.3:19 Rom 8:5-6, Kol 3:1-4²⁰Okoo kisee bagee kiya inii gaayu ko inii me toono too magaa mee epoo to wodoo. Kiyoo kaama inii daba mée daagimaa peeyaano Mée Tuhan Yesus Kristus mee moga migi naaki ou see dimii kaa diitoo taakea.3:20-21 Tit 2:13, 1Yoh 3:2²¹Waa Pesee Wodoo Pesee see Mée yoka Waa meemaata kaama inii me dabaa see maa kuwa Wa me asii-sege see maa to mee see see inii daamaa mée kiyaabuu taatagi.

¹See kemaata neebee nokaa yuwa, ni me epa see bagee yuwa, anii kineke-nekee naadi kiitoga naaki ou see dimii mee ebo. Ikii ko anii dimi wikii-wikii nasiyaabuu taa see bagee yuwa, mumo kaa onee masiyaa see see anii ikii kaa ede ma, ede ma segeeka. Eto ko kuwa kiebeaga menaa kuwa daamaa peneata Tuhan ma dimi aagadi-maagadi naadi makii taa see kaa umiwoo, toowoo taai.

Wodopasi tupiino menaa

²Eto ko ani me Euodia ma, Sintike ma ekea paagoo maamaa kisiino menaa mee ko "Ekea Tuhan yiba ena kenagaa see apii yoka ena dimii, ena menaa kaa kesea" naadi kisega. ³Bedaa anii ma enaataa agiyoo daamaa naaukuwagee see mée Sunsugos aa miya kasiino ko "Kuwa apii wiya ekea me aawisi-maawisi segeekea kuwa ekeasi naadi daamaa pe-eewegaai" see kasega. Mikee, idukaa Klemen mee ma, apanaa bagee miya anii ma enaataa Yesus me doometa menaa yaweganaa semea kaboo kuwa apii wiya miya kana ma agiyoo epo enaataa mée eeukuwagee semea. Okoo kuwa bagee uduma Ogatamee me tuyaabuu siwoo taatagi bagee yuwa ekaa yamaatagaa seta kapogee da kaa okoo ekaa yuwa miya yamaata bagee yuwa.

⁴Eto ko ikii Tuhan nao naadi ede ma, ede ma siwoo siweei! Bedaa anii kaagaa ena ma ikii ede ma, ede ma siwoo siweei see kisega. ⁵Ikii me koogo adumeta dimii kuwa mée uduma kideesi yoka kisee umiwoo taai. Tuhan meeno mee ekaapa. ⁶Ikii me umiyaa, tuyaa yiba uduma dimi se gaagaa taai, dimi se abaai. Kuwa dimii ekeata ikii me gaagaa siyaa yuwa uduma Ogatamee ase-manee segee taai, kiiboo, paamee see dimii kaa idimegee taai.4:6 Mat 6:31-34, 1Pet 5:7⁷Ikii kisee ukuwagee naadi kaama Ogatamee me kuwa gaagaa siyaa dimii yuwa kitaa kiyaata kaama daamaa koogo adumeta dimii mee kiniipi. Mee dimii mee mée tomaa se nekeenegea. Ikii Kristus Yesus ma dimi aagadi-maagadi naadi kaama ikii dimi mena koogo kituyaapi, bedaa ikii me dimi gaayaa yuwa miya kitaamegee siwoo taapi.4:7 Yes 26:3, Yoh 14:27

⁸Neebee nokaa yuwa, wodopasi menaa mee ko kisiinaka. Ikii dimi yiba daamaa gaawoo see menaa kuwa ko kisee: Mikee see menaa ma, daamaa wegaa-wegaa see menaa ma, umiino, toono topoo see menaa ma, pedeo taa see menaa ma, dimi wikiinsi naadi menaa ma, kisee esee daamaa naadi yaapaagee siyaa menaa kuwa uduma ikii dimi yiba daamaa gaawoo, doowoo taai. ⁹Bedaa Ni me kitopegee seta menaa ma, ni me ikii paagoo kiiwegagee seta menaa ma kuwa ikii nayeewoo seta, bedaa ni me daamaa ukuwaa-ukuwaa kuwa miya ikii nadeewoo seta yoka kuwa uduma ikii miya daamaa ukuwawoo taai. Ikii me kisee ukuwawoo naadi kaama koogo adumeta dimii mée maniyaa Mée Ogatamee Waa ikii ma kiitoogee taapi.

Neeta agiyoo kaa kiiboo, paamee see aseta menaa

¹⁰Ikii kaagaa ena ma ni me gaano pedeo agiyoo sikii ye naadi kaama aii neeta kepee kuwa kaa anii Tuhan paamee see dimii mee ebo kaa esee ede ma, ede ma segeeka. Mikee, idukaa ikii me kisee maniipa dimii mee agoo kiya iyo, kepe neeyaa etaa mee too taa see kuwa anii kinekeenega. ¹¹Kuwa kisega kuwa ko ni me gaano pedeo agiyoo sikii taa naadi kisega se. Ni me umiyaa, tuyaa yiba kuwa anii sikii nao see dimii mee anii ekaato tupimaata topa.4:11 1Tim 6:7-8¹²Agoo kiyaa agiyoo eebaa taa kaa omegee, toogee see miya anii ipi, agiyoo eebaa miya ipi. Ni me umiyaa, tuyaa yiba kuwa anii sikii nao see dimii mee anii nekeenta topa. Anii naano agiyoo agoo kiyaa naagoo pesee ometaa, totaa see miya, bedaa taa kiyaa naagoo naadi ebo kaa ometaa, totaa see miya ¹³kuwa uduma anii pesee nakiyaabuu taa see Mée Kristus mee kaa too pesee ma umiwoo, toowoo segeeka. 4:13 2Kor 12:9-10¹⁴Anii kisee dimii gaawooka kiya anii gaano pedeo yiba totaaka too ikii me neemea yuwa kuwa esee daamaa, ede see kigaaga. ¹⁵Anii petamanii Makedonia wee kaa Yesus me doometa menaa yaweganaa semaata kaama apanaa magaa kaa peema kaboo apanaa magaa kaa Yesus mikee gaayaa bagee yuwa me anii niino taa, ikii Pilipi magaa kaa bagee yuwa me too kepe neemea see kuwa ikii miya ipi. ¹⁶Bedaa anii Tesalonika magaa kaa peemaata kaama gaano pedeo agiyoo sikii taa kaboo miya ikii kaagaa wiya waa naa kepe neemea. ¹⁷Ni me kisega menaa kuwa ko ikii kisee neesea naadi menaa kuwa se kiya ikii me aii mantaata kaama daamaa see poo ekayaabuu setaa to mokoo da mee Ogatamee me maamaa kiagoo kiyaabuu siwoo taapi kuwa kaa too kisega. ¹⁸Eto kiipaa anii sikii taa agiyoo taa. Ikii me Epaproditus kaa dooyaata kepee kuwa uduma anii masemaaga yoka eto esee eebaa mee asii miya agoo. Ikii me aii neeta kepee kuwa ko Ogatamee paagoo wunu daamaa ekega-manee siyaa agiyoo see see mokoo, Wa me esee daamaa nao naadi dimi wikii-wikii siyaayaa agiyoo. ¹⁹Ni me Eboo Ogatamee Waa ko senawii wodoo senawii yoka Wa me asii-sege see agiyoo kuwa Yesus Kristus doodoo ikii paagoo kineegee taapi. Kisee kineegee naadi kaama ikii me gaano pedeo agiyoo yuwa uduma sikii kikiyaabuu segee taapi.4:19 Mzm 23:1, 2Kor 9:8²⁰Iniitaagi Ogatamee mee kisee too iminoo miya, iminoo miya niiyaapaagee siwoo taai! Amin.

Epao see menaa

²¹Kristus Yesus ma aagadi-maagadi naadi kaama daamaa wiginta bagee yuwa uduma epao see naasii. Nakaayoo Yesus mikee gaayaa bagee anii ma epo enaataa yuwa me miya epao see kisegea. ²²Bedaa nakaayoo magaa kaa Ogatamee me daamaa wiginta bagee uduma me miya epao see kisegea. Kaisar me ee kaa agiyoo yaokagee see bagee kuwa Yesus mikee gaayaa bagee yuwa me miya epao see kisegea. ²³Tuhan Yesus Kristus Wa me epaa mee ikii ma enaataa dimi yiba kiitoogeesi naadi kiasega. Kiyoo too.