Epesus

Epesus

Paulus me Epesus magaa kaa Yesus mikee gaata bagee yuwa paagoo yaebeamaata kapogee

Mee kapogee mee ko Paulus waa digiyoo ee yiba toogeeki too ebeata kapogee. Wa me mee kapogee yiba yaebeamaata menaa kuwa ko kisee: Ogatamee Waa idukaa esee petamanii kaama ’Anii kisee ukuwaata, kisee ukuwaaniyaabuu taata’ see dimii gaata yuwa kuwa uduma mikee Wa me Yesus Kristus doodoo mée yaukuwaaniyaabuu siwooki ii see kuwa daamaa nekeensi naadi menaa yaebeamaata. Mee ko Ogatamee me kuwa Yahudi bagee yuwa too se kiya mée tomaa-tomaa apanaa yuwa miya okoo paaya Yesus mikee gaakee kaa mée kutuu ena too too kiyaabuu taata, see dimii gaata. Bedaa Wa me inii daba mée daagimaa peeyaano mee ko Wa me mée epa dimii mee kaa too, inii me daamaa ukuwaakee agiyoo kuwa kaa se. Wa me inii Yesus mikee gaata bagee yuwa daamaa mée wigintaata kaama gipii see dimii ma, gipii see iyee ma kuwa mée manta. Bedaa inii me umiyaa, tuyaa yiba inii Ogatamee me mée manta agiyoo kuwa maataata doonaa naadi kaama Iblis me mée gaadee segee siyaa agiyoo daba, peedi yakiyaabuu siwoo siyaa. Paulus me kuwa see see menaa mee kapogee yiba yaebeamaata.

Yesus mee epoo to wodoo pakaa-seometa kaama wodoo tahun amaamo waa naa omemaata kaama tahun 60 mee yiba mokoo Paulus me mee kapogee yaebeamaata.

Mee kapogee yiba mena kutuu yuwa kuwa ko kisee:

1:1-14 Petamanii menaa ma, Ogatamee me Kristus doodoo esee daamaa mée yaukuwaaniyaabuu seta agiyoo kaa yaapaagee seta menaa ma

1:15-23 Yesus Wa me asii-sege siyaa yuwa okoo daamaa ipi kisi naadi sembahyang yaseta menaa

2:1-10 Ogatamee me inii daba mée daagimaa peeyaano kuwa ko Wa me mée epa dimii mee kaa too see kuwa nekeensi naadi menaa

2:11-22 Ogatamee me Yahudi bagee yuwa ma, mée tomaa-tomaa apanaa yuwa ma okoo Kristus doodoo aaemee-emee yasiyaata kaama mée kutuu ena too too kiyaabuu seta menaa

3:1-13 Ogatamee me idukaa kaama awee da kaa kiyaano taa menaa kuwa Paulus me naweganaasi naadi wa kaa yadootaata menaa

3:14-21 Paulus me sembahyang menaa

4:1-16 Inii Yesus yiba mée kutuu ena too too kemaata ena dimii, ena menaa kaa umiwoo, toowoo taai naadi menaa

4:17–5:21 Idukaa iyee mee ekeata kaama gipii see iyee mee too doowoo taai naadi menaa

5:22–6:9 Ekea bogaa ma, ena ee kaa bagee ma okoo tupiino menaa

6:10-20 Ogatamee me inii Iblis me mée gaadee siyaa agiyoo daba, peedi yakiyaabuu siwoosi naadi mée manta agiyoo yuwa kaa ebea-ebea menaa

6:21-24 Wodopasi menaa

¹Nii ko Paulus, Ogatamee me gaata-gaata dimii kaa Kristus Yesus me menaa nadoonaasi naadi pooi see naseta mée. Mee kapogee mee anii ikii Epesus magaa kaa Ogatamee me ikii daamaa wa too kiwigintaata bagee yuwa paagoo, ikii Kristus mee se ekeata mikee gaawoo see bagee yuwa paagoo kiebeataaka. ²Iniitaagi Ogatamee ma, Tuhan Yesus Kristus ma Ekea me aii kiepa dimii ma, koogo adumeta dimii ma kuwa ikii ma epo enaataa kiitoowoosi naadi kiasega.

Ogatamee me Kristus doodoo esee daamaa mée yaukuwaaniyaabuu seta agiyoo kaa yaapaagee seta menaa

³Ogatamee mee, inii epoo Mée Tuhan Yesus Kristus Waataagi mee niiyaapaagee taai. Inii Kristus ma dimi aagadi-maagadi naadi Wa me Roh kaa agiyoo-pagiyoo uduma epoo to wodoo kaama inii kaa daamaa aii mée manta Mée mee.1:3-6 Rom 8:29-30, 2Tim 1:9-10⁴Mikee, esee idukaa uwoo to, magaa to ogaatagaano taa kaboo inii Kristus ma aatawa-maatawa mée siyaano see naadi daamaa mée wigintaata. Inii me pedeo yuwa wiginiwoo segee naadi kaama Wa emaa dagii da kaa pedeo ena ma taa see bagee yuwa kisi naadi kisee daamaa mée wigintaata. ⁵Esee idukaa petamanii kaama Wa me inii mée epa kaa ’Yesus Kristus doodoo okoo Ni me yogaa yuwa kiyaabuu taata’ see dimii gaata. Wa me esee ede kaa kisee daamaa mée yakoo seta.1:5 Rom 8:14-17⁶Inii Wa me epa see Yogaa mee ma dimi aagadi-maagadi naadi kaama Wa me epaa mee inii kaa daamaa aii mée manta. Wa me mée aii epa dimii mee esee ebo, esee asii-sege kemaata inii Waa yaapaagee siwoo see.

⁷Yogamee Wa me tadaa me inii daba mée peeyaata, Waa doodoo inii me pedeo yuwa epa mée yaekeata. Ogatamee me mée epa dimii mee esee maamaa ebo kemaata kaama kisee mée yakoo seta.1:7 Rom 3:24-25, 1Pet 1:18-19⁸Wa me epaa kuwa maamaa eebaa inii kaa mée yadegayaata, Wa me se-ipi, we-ipi dimii kuwa kaa aii mée yadootaata. ⁹Wa me idukaa kaama ’Anii kisee ukuwaata, kisee ukuwaaniyaabuu taata’ see dimii gaata yuwa kuwa Wa me awee da kaa kiyaano taa, eto too Wa me ede kaa inii awee da kaa ipi mée kiyaagi. Kuwa ko Wa me idukaa gaata dimii yuwa kuwa inii paagoo ’Mikee, Kristus doodoo ukuwaaniyaagi ii’ see kuwa awee da kaa ipi mée kiyaagi. ¹⁰Kuwa Wa me idukaa gaata dimii yuwa kuwa uduma ukuwaaniyaatagi monaa kaa kega kaboo epoo to wodoo agiyoo ma, magaa da kaa agiyoo ma, se-agiyoo, we-agiyoo kuwa uduma Kristus yiba kutuu ena too too kiyaata kaama Waa mumoo to mokoo ebo tuyaatagi.

¹¹Ogatamee Wa me ’Anii kisee ukuwaata, kisee ukuwaaniyaata’ see gaata-gaata doodoo too agiyoo-pagiyoo kuwa uduma ukuwaaniyaabuu siwoo taa see Mée. Idukaa esee petamanii kaama Wa me gaata-gaata doodoo inii daamaa mée wigintaata. Wa me inii Kristus ma aatawa-maatawa siyaata kaama Wa me agiyoo daamaa masiino bagee mée kiyaata. ¹²Mee ko inii petamanii inii keta Kristus kaa dimi kotopiwoo seta bagee kuwa inii me Waa ebo, Waa asii-sege nao see yaapaagee siwoosi naadi Wa me inii daamaa mée wigintaata.

¹³Ikii miya Kristus Wa me mikee menaa kuwa daamaa yeemea. Wa me ikii daba kidaagimaa peeyaano see naadi doometa menaa kuwa ikii yeeta kaama Kristus mee mikee nao see gaamea. Ikii Kristus mikee gaata kemaata Ogatamee Waa nekee see bagee yuwa ii see awee da kaa nekeendaasi naadi Roh Kudus mee kineeta, Wa me "Roh Kudus mee kiniipa" see aseta menaa doodoo.1:13-14 2Kor 1:21-22¹⁴Mee ko Wa me bagee yuwa maniyaa agiyoo apanaa yuwa kuwa inii taa ma taa masiitagea ii see kuwa nekeensi naadi Wa me Roh Kudus mee keta inii mée manta. Roh mee inii ma epo enaataa toogeeki, kisee too Ogatamee Waa nekee bagee okoo daba peeyaatagi naagoo too. Kuwa me kemaata Waa ebo, Waa asii-sege see yaapaagee siyaa.

Paulus me okoo Kristus Wa me asii-sege siyaa yuwa daamaa ipi kisi naadi sembahyang yaseta menaa

¹⁵Wa me kisee daamaa mée yaukuwamaata kemaata eto ko anii ikii kaa paamee dimii ebo. Mee ko ikii me Tuhan Yesus mikee gaayaa dimii mee ebo, bedaa Wa me daamaa wigintaata wa too bagee apanaa yuwa uduma ikii me okoo epa gaayaa dimii mee miya ebo, see menaa kuwa anii yeema. ¹⁶Kisee yeeta kaama anii sembahyang siyaa kaboo ikii kineke-nekee naadi ikii kaa Ogatamee paagoo se daata kaama kisee too kiasegeeka. ¹⁷Mee ko anii inii epoo Mée Tuhan Yesus Kristus me Eboo Ogatamee mee, Asii-sege see Mée Nagamee paagoo Wa me Roh doodoo esee ipi see dimii mee ikii kaa maamaa kineesi naadi kiasegeeka. Kisee kineeta kaama ikii me Ogatamee mee kisee Mée, kisee Mée ii see kuwa awee da kaa daamaa keipi kiyaabuusi naadi kiasegeeka. ¹⁸Bedaa emaa me deeyaa mokoo ikii dimi mena kaa emaa yuwa kuwa Wa me daamaa awee kikiyaata kaama Wa me daamaa kiukuwaaniyaabuu siyaa agiyoo kuwa ikii daamaa ipi kesea naadi kiasegeeka. Kuwa ko ikii Wa me Ni paagoo nameei, Anii ikii kaa kisee daamaa kiukuwaaniyaabuu siwoo taata yoka, see kiseta menaa kuwa ikii daamaa ipi kiwoo, Wa kaa dimi kotopiwoo, kisee umiwoo, toowoosea naadi kiasegeeka. Bedaa Wa me daamaa wa too wigintaata bagee yuwa paagoo esee ebo, esee asii-sege see maniitagi agiyoo kuwa miya ikii daamaa nekeensea naadi kiasegeeka. ¹⁹Bedaa Wa me inii Kristus mikee gaayaa bagee yuwa kaa daamaa mée yaukuwaano pesee kuwa wa too, esee ebo, mee asii taa, see kuwa miya ikii daamaa ipi kesea naadi kiasegeeka. Kuwa Wa me esee ebo see pesee kuwa Kristus kaa miya yaukuwata, ²⁰mee ko Wa me pesee da kaa Kristus mee boota kaama aya andoo peeyaata kaama epoo to wodoo Wa me dagi yagaa yaato ebo tuyaa yoo animaayaata. ²¹Kristus Wa me ebo totaaki mee ko esee ebo, esee asii-sege. Ekaa yago bagee miya, ekaa yago agiyoo miya, se-ebo, we-ebo, se-pesee, we-pesee kuwa uduma peedi. Eto mee begaa kaa too se kiya bedaa kaama mee begaa kaa miya kisee too ebo toowoo taatagi.1:21-23 Kol 1:16-18²²Ogatamee me Kristus Wa too ebo tusi naadi se-agiyoo, we-agiyoo, se-bagee, we-bagee kuwa uduma peedi yaekeata kaama Kristus badoo da miyoo taa yaekeata. Bedaa kuwa uduma Kristus Wa too Mumoo to kisi naadi Ogatamee me Kristus mikee gaayaa bagee yuwa paagoo Waa manta. ²³Kristus mikee gaayaa bagee uduma ko Wa me maa to mokoo. Inii Waa ma aagadi-maagadi naadi Wa me iyee, Wa yiba agoo kiyaa yuwa kuwa uduma inii miya agoo, Wa me kisee pudii mée yasiyaayu. Wa me se-agiyoo, we-agiyoo uduma miya Wa yiba agoo kiyaa yuwa pudii siyaabuu siwooki.

Ogatamee me inii daba mée daagimaa peeyaabuu seta kuwa Wa me mée epa dimii mee kaa too see nekeensi naadi menaa

¹Idukaa ikii Wa me menaa si yayeeta kaama pedeo ukuwagee siwoo seta agiyoo kuwa me ikii boota bagee mokoo keta.2:1-9 Kol 1:21-22, Tit 3:3-7²Kuwa kaboo da ikii magaa da kaa pedeo iyee-payee kaa too umiwoo, toowoo seta. Epaawee da kaa ebo totaa see mée damaa to wa me menaa too ikii yayeewoo, obeewoo seta. Eto kiipaa mee ebo totaa see mée damaa to me kuwa Ogatamee me menaa si yayeetaa see bagee yuwa pesee kiyaabuu segeeki. ³Okoo see see inii uduma miya idukaa pedeo ou dimii kaa too omegee, toogee seta. Inii má yaato miya, dimi mena yaato miya pedeo ou, kiitoo ou, kaatoo ou naadi kaama Ogatamee me kagoo kaa mée aii pedeo kiyaayaa bagee keta, apa yuwa see see.

⁴Inii kisee bagee keta kiya Ogatamee Wa me inii mée epa dimii mee esee ebo, Wa me esee maamaa epa mée gaata. ⁵Inii me pedeo ukuwagee seta agiyoo kuwa me inii boota bagee mokoo keta. Kiya Wa me inii Kristus ma aagadi-maagadi naadi kaama mée aya andoo peeyaata totaakea. Mikee, Ogatamee me ikii daba kidaagimaa peeyaata mee ko Wa me ikii aii epa kigaata dimii mee kaa too. ⁶Wa me inii Kristus Yesus ma aagadi-maagadi naadi kaama mée aya andoo peeyaata. Kiyoo kaama Wa me inii epoo to wodoo yaato Kristus me ebo toogee yoo kiyoo inii Waa ma enaataa mée animaayaata. Inii eto kisee ebo totaakea bagee yuwa mée kiyaata. ⁷Wa me inii kisee bagee mée kiyaata mee ko Waa esee daamaa, Wa me Kristus Yesus doodoo inii aii kisee mée epa dimii mee esee ebo ii, see kuwa iminookaa yaato miya awee da kaa mée deeyaano see naadi Wa me inii kisee daamaa mée kiyaata. ⁸Mikee, ikii daba kidaagimaa peeyaata totaakea mee ko Ogatamee Wa me ikii aii kisee kiepa see dimii mee kaa too, ikii Kristus mikee nao see gaata kemaata Wa me kisee daamaa kikiyaata. Ikii ekaato daba daagimaa peeyaano iyo. Ogatamee Wa me too ikii aii kisee kiepa kaa kiukuwata agiyoo da. ⁹Ikii me daamaa ukuwata agiyoo kuwa kaa se. Kuwa me kemaata mée ena me ebo poga-poga see dimii mee iyo.2:9 Mée me ebo poga-poga menaa mee ko kisee: "Ni me daamaa deewoo siyaa agiyoo kuwa me kemaata Ogatamee me ni me pedeo yuwa epa naekeata Wa me bagee nakiyaagi" see menaa kuwa kiya kisee menaa iyo. Mée me ukuwayaa agiyoo kuwa me daba mée se daagimaa peeyaayaa. Ogatamee me naepa see dimii mee me too daba nadaagimaa peeyaata toowooka nao naadi kaama inii Waa yaapaagee siyaa.¹⁰Mikee, Wa me too inii Kristus Yesus ma dimi aagadi-maagadi naadi kaama inii gipii see bagee mée kiyaata. Inii daamaa agiyoo yaukuwawoo segeesi naadi Wa me inii kisee gipii see bagee mée ogaataata. Ogatamee me kuwa daamaa naukuwageesi naadi agiyoo kuwa Wa me idukaa kaama daamaa mée yaipiipii seta.2:10 2Kor 5:17

Ogatamee me Yahudi bagee yuwa ma, mée tomaa-tomaa apanaa yuwa ma okoo aaemee-emee yasiyaata kaama kutuu ena too too kiyaata menaa

¹¹Kisee kemaata eto ko ikii daamaa nekeenii. Ikii ko Yahudi bagee me kikabata bagee yuwa se. Yahudi bagee kuwa okoo me ’Inii ko kado ponee yadaapeata bagee yoka’ naadi okoo me ikii kado ponee daapii taano taa bagee see ekaa mee kiweewookea. Kado ponee yadaapeasiino mee ko mée me maa to kaa ukuwaakee agiyoo too kiya mikee, idukaa ikii Ogatamee yaato taa see bagee. ¹²Kuwa kaboo da ikii Ebo Kristus mee ewo, bedaa Israel bagee yuwa okoo daamaa wigintaata see see ikii miya kisee daamaa kiwigineano taa see bagee yuwa. Bedaa idukaa Ogatamee me Israel bagee yuwa paagoo "Ani me kisee daamaa kiukuwaaniyaabuu taata" see aseta menaa kuwa ikii paagoo miya asiino taa see bagee. Ikii magaa da kaa toogee seta kaboo kuwa ikii Ogatamee ewo, Wa kaa dimi kotopiwoo see miya taa, ikii kisee umiwoo, toowoo seta bagee yuwa. ¹³Ikii ko idukaa Waa ewo naadi kaama dimi mena beesekaa see bagee yuwa. Kiya eto ko ikii Kristus Yesus ma dimi aagadi-maagadi naadi kaama Wa me tadaa me ikii ekaapa kimiyaata.2:13-14 Yoh 10:16, Kol 1:20¹⁴Mikee, Kristus mee ko inii mée aaemee-emee yasiyaano Mée mee. Idukaa Yahudi bagee yuwa ma, mée tomaa-tomaa apanaa yuwa ma kuwa aayape kiwoo naadi kaama yaayupii da taa oma wagee wugitaata mokoo, Yahudi bagee wa too, mée tomaa-tomaa apanaa yuwa wa too kisee kutuu wiya wuditaata. Kiya Wa me mee oma wagee to bugumiyaata kaama inii kutuu ena too too mée kiyaata. ¹⁵Mee ko Yahudi bagee yuwa ma, mée tomaa-tomaa apanaa yuwa ma inii paaya uduma Wa yiba gipii see tomaa ena too too mée kiyaano see naadi Waa mée yaboota. Mee kaama Yahudi bagee yuwa me deewoo siyaa menaa-panaa kuwa amoo-yaekeata. Amoo-yaekeata kaama Wa me kuwa kutuu wiya kuwa aaemee-emee siyaata. ¹⁶Waa piya bokoo to kaa boota kemaata kuwa kutuu wiya kuwa aaemee-emee siyaata kaama toma ena too too mée kiyaata. Toma ena too too mée kiyaata kaama inii paaya Ogatamee ma emee-emee mée siyaata. Kuwa kutuu wiya aayape kiwookea kuwa Wa me piya bokoo to kaa mée yataa kiyaata. ¹⁷Kristus Waa meemaata kaama kisee aaemee-emeesi naadi menaa kuwa daamaa eeweganaa seta. Ikii idukaa Ogatamee ewo naadi dimi mena beesekaa see tomaa yuwa paagoo miya kiiwegata, bedaa ikii Yahudi bagee yuwa, Waa ipi naadi dimi mena ekaapa mokoo see bagee yuwa ikii paagoo miya daamaa kiiwegata. ¹⁸Kristus mee doodoo Yahudi bagee yuwa ma, mée tomaa-tomaa apanaa yuwa ma inii paaya Nagamee paagoo daba poono etaa da mée yaagoo kiyaata. Inii paaya Roh ena too too mee ma dimi aagadi-maagadi naadi kaama Nagamee paagoo daba peeyaa.2:18 Yoh 14:6

¹⁹Kisee kemaata ikii apanaa tomaa kaa bagee gaayu ko eto kaama wodoo ikii aii tomaa kaa bagee yuwa se, ikii wa too wigintaata tomaa kaa bagee yuwa se. Kiya ikii ko Wa me daamaa wigintaata tomaa kaa bagee yuwa ma enaataa toma ena too too kikiyaata bagee yuwa, ikii Ogatamee ma ena tukuguu see bagee yuwa keta. ²⁰Ee maayaa mokoo Wa me ikii miya kisee daamaa kimaataata topea. Mee ko Yesus me menaa yadoonaa see bagee yuwa ma, nabi bagee yuwa ma okoo me menaa kaboo da kaa ikii kuwa wodoo taa kimaataata topea. Ee kaboo da miyoo tuku omaa to mee gaayu ko Kristus Yesus Waa. ²¹Ikii Kristus yiba daamaa aatakumetagaa semaata topea. Ee to kuwa uduma asii-maga-maga naadi Ogatamee me daamaa wa too wigintaata ee to mokoo kedaaka. Kisee ikii Tuhan ma dimi aagadi-maagadi naadi kaama daamaa iyawoo, pesee kiwoo siyaa.2:21-22 1Kor 3:16-17, 1Pet 2:5²²Ikii ma, apanaa bagee ma ikii paaya Kristus ma aagadi-maagadi naadi Ogatamee mee ikii ma enaataa kiitoogee taano see ee to mokoo daamaa kimaatagaa siwooki. Mee ee yiba Roh mee kiitoowoo segeeki.

Ogatamee me idukaa kaama awee da kaa kiyaano taa menaa kuwa Paulus me naweganaasi naadi wa kaa yadootaata menaa

¹Kisee kemaata anii Paulus me kisiino ko: Anii ikii apanaa tomaa-tomaa kaa Ogatamee ewo see bagee yuwa paagoo Kristus Yesus kaa menaa kiiweganaa see mée kemaata mée me digiyoo ee yiba nadogeamaamea. ²Mikee, Ogatamee Wa me mée epa dimii mee ebo kaa menaa kuwa anii ikii apanaa tomaa kaa bagee paagoo kiiweganaasi naadi ni kaa daamaa nadootaami. Anii kisee mée see kuwa ikii miya nayeemea. ³Mee ko Wa me idukaa kaama mée paagoo awee da kaa kiyaano taa menaa kuwa ni paagoo daamaa naipi kiyaami. Kuwa menaa kuwa anii yumakaa mee kapogee mee kaa peenaa kiebeamaaga. ⁴Ikii kuwa ni me Kristus kaa kiebeamaaga menaa kuwa daamaa deeyu ko ikii me mikee, kuwa idukaa kaama awee da kaa kiyaano taa see menaa kuwa waa nekeenigi ii see kuwa ikii nanekeeniipea.3:4-6 Kol 1:26-27⁵Kuwa menaa kuwa Wa me idukaa mée paagoo ase-maniino taa. Kiya eto ko Roh me awee da kaa mée ipi kiyaagi. Yesus me menaa yadoonaa see bagee yuwa ma, nabi bagee yuwa ma, kuwa daamaa wigintaata bagee yuwa paagoo Wa me kuwa menaa eto awee da kaa daamaa ipi kiyaabuuki. ⁶Kuwa menaa kuwa ko kisee: Ogatamee me "Yesus me menaa doodoo Anii mée tomaa-tomaa apanaa yuwa okoo miya Yahudi bagee yuwa ma aatabi seta kaama okoo mee tomaa too kiyaabuu taata, okoo mee maa to too mokoo kiyaabuu taata" see menaa mee. Mee kaama Wa me bagee miya masiyaa agiyoo kuwa mée tomaa-tomaa apanaa yuwa kuwa miya masiipea. Bedaa Ogatamee me idukaa Yahudi bagee paagoo "Anii kisee daamaa kiukuwaaniyaabuu siwoo taapa" see aseta menaa kuwa Kristus Yesus doodoo mée tomaa-tomaa apanaa yuwa okoo kaa miya "Kisee daamaa yaukuwaaniyaabuu taata" see menaa kuwa. Wa me kuwa menaa daamaa awee da kaa mée ipi kiyaagi.

⁷Ogatamee me kuwa menaa nadoonaasi naadi anii aii kisee naepa kaa daamaa ni kaa nadootaata. Wa me pesee da ni kaa maamaa neeta kemaata anii Yesus me menaa yadoonaa see mée keta. ⁸Ogatamee Wa me daamaa wa too wigintaata bagee kuwa uduma anii ko esee daba, peedi see mée kiya Wa me anii aii kisee naepa kaa kuwa menaa daamaa ni kaa nadootaata. Mee ko Kristus Wa me senawii wodoo senawii kiyaa yuwa kuwa esee ebo naadi kaama mée me se nekeeniyaa. Kuwa Wa kaa menaa kuwa anii mée tomaa-tomaa apanaa yuwa paagoo miya eeweganaasi naadi anii Wa me menaa yadoonaa see mée nakiyaata. ⁹Bedaa se-agiyoo, we-agiyoo uduma Ogaataata Mée Wa me esee idukaa kaama kisee-kisee daamaa yaukuwaaniyaabuu taata see dimii gaata yuwa kuwa eto Wa me anii mée paagoo awee da kaa ipi kiyaabuusi naadi ni kaa nadootaata. Kuwa menaa kuwa ko petamanii kaama awee da kaa kiyaano taa, Ogatamee Wa yiba kisee too booniwoo seta menaa kuwa. ¹⁰Wa me kisee ukuwata mee ko Wa me eto kiipaa Yesus mikee gaayaa bagee yuwa kaa daamaa yaukuwaaniyaabuuki doodoo Ogatamee mee se-ipi, we-ipi yago Mée ii see kuwa awee kaa ipi kiyaano see naadi ukuwata. Epoo to wodoo ebo-ebo yuwa ma, pesee yago agiyoo yuwa ma kuwa uduma okoo me ’Mikee, Ogatamee Wa me idukaa dimi gaata yuwa kuwa eto daamaa esee dimi ipi kaa ukuwaaniyaabuu taaki ii’ see kuwa gaasi naadi anii Wa me menaa yadoonaa see mée nakiyaata. ¹¹Kuwa Wa me esee petamanii kaama ’Anii kisee taa ma taa ukuwaaniyaabuu taata’ see gaataata yuwa kuwa Wa me inii epoo Mée Tuhan Kristus Yesus mee doodoo daamaa mée yaukuwaaniyaabuu seta. ¹²Eto ko inii Waa doodoo Ogatamee paagoo daba poono etaa agoo. Inii Kristus mikee gaakee kaa Waa ma dimi aagadi-maagadi naadi kaama dimi weda taa ma Ogatamee paagoo daba peeyaa. ¹³Kisee kemaata anii eto ae-wae segeeka kuwa ikii me ani kaa dimi se nagaagaa taai see kisega. Ogatamee Wa me asii-sege siyaa agiyoo kuwa ikii kaa miya kidootaasi naadi anii ikii kaa ae-wae segeeka yoka dimi se nagimaai.

Paulus me sembahyang menaa

¹⁴Wa me kisee Yesus doodoo inii daamaa mée yaukuwaaniyaabuu seta kemaata anii Nagamee paagoo kagu maga kaa sibu. ¹⁵Epoo to wodoo bagee miya, magaa da kaa bagee miya okoo me Eboo mee ko Nagamee too, okoo tukuguu uduma ekaa muntagaa seta mee manii to ko Wa kaa too kemaata anii Wa paagoo ¹⁶eto ikii kaa sembahyang kitaaka, mee ko kisee: Wa me esee asii-sege siyaa agiyoo maamaa eebaa kuwa doodoo da taa Wa me Roh me ikii dimi mena daamaa pesee kikiyaabuu siwoosi naadi kiasetaaka. ¹⁷Ikii kisee pesee kikiyaabuu siwoo naadi kaama Kristus mikee gaakee kaa Waa ikii dimi yiba daamaa kiitoogeesi naadi kiasetaaka. Bedaa piya mani maga yiba daamaa peeyaa mokoo ikii me epa dimii mee miya pesee kikiyaata kaama ikii Wa me epa dimii kaboo da kaa umiwoo, toowoosea naadi kiasetaaka. ¹⁸Mee ko ikii ma, Wa me daamaa wa too wigintaata bagee apanaa yuwa ma ikii paaya enaataa Kristus me epa dimii mee amoo-yamoo da, woo-yamoo da, togoo-katuu da kuwa ebeadeeyaa naaki esee ebo ii see kuwa ikii daamaa nekeensea naadi kiasetaaka.3:18 Mzm 103:11-13¹⁹Wa me epa dimii mee asii-sege kemaata mée tomaa se nekeeniyaa. Ikii Wa me epaa mee esee ipi kedaa naadi kaama Ogatamee Wa me iyee, Wa yiba agoo kiyaa yuwa uduma ikii yiba miya pudii kisiyaasi naadi kiasetaaka.

²⁰Eto ko Ogatamee mee niiyaapaagee taai. Waa ko Waa inii yiba pesee ma ukuwagee naadi kaama daamaa agiyoo-pagiyoo uduma inii kaa mée yaukuwamaayaa see Mée. Kuwa Wa me mée yaukuwayaa agiyoo kuwa uduma esee ebo kemaata kaama inii se nekeeniyaa. Inii Wa paagoo "Kisee naukuwaai, kisee naukuwaai" see idimiyaa agiyoo kuwa uduma mee asii ebo agiyoo yuwa miya mée yaukuwaaniyaayaa. ²¹Inii Yesus mikee gaayaa bagee yuwa me Ogatamee Waa ebo, Waa asii-sege, kisee niiekee siwoo taai. Bedaa Kristus Yesus mee doodoo miya Ogatamee yaapaagee siwoo siyaa, mee kakadee kaa, mee egaa kaa kisee too iminoo miya, iminoo miya. Amin.

Inii Yesus yiba kutuu ena too too kemaata ena dimii, ena menaa kaa umiwoo, toowoosi naadi menaa

¹Ogatamee mee inii kaa kisee mée daamaa yaukuwaaniyaabuu taa see Mée kemaata eto ko anii maamaa kisiinaka. Anii Tuhan me menaa yaweganaa see mée kemaata digiyoo ee yiba nadogeamaata kaama kisee totaaka too kisiino menaa kuwa ko kisee: Ikii ko Wa me Ni paagoo nameei see kiseta bagee yuwa kemaata Wa me kisee daamaa wiginta bagee yuwa daamaa umiyaa, tuyaa yuwa doodoo ikii miya kisee umiwoo, toowoo taai, ²kuwa ko kisee: Ikii dimi peedi, dimi dapuu, aakagoo see se kiya dimi animaata epa aagaa siwoo taai. ³Roh me ikii dimi aagadi-maagadi naadi kaama aaemee-emee kisiyaata kemaata ikii se daata kisee too maamaa ena dimii, ena menaa kaa too umiwoo, toowoo taai. ⁴Inii paaya maa da ena too too mokoo, Roh mee miya ena too too. Mikee, ikii ko Ogatamee me Ni paagoo nameei see kiseta bagee yuwa kemaata ikii uduma Wa me taa ma taa kisee daamaa mée yaukuwaaniyaabuu taatagi nao see gaawoo see dimii mee miya ena too too. ⁵Tuhan Waa miya ena too too, inii uduma Yesus mikee gaano mee miya ena too too, uwo tukumaano mee miya ena too too, ⁶bedaa inii uduma Ataagi Ogatamee mee miya ena too too. Waa ko inii uduma me Eboo, uduma doodoo ukuwataa see Mée, uduma yiba totaa see Mée.4:4-6 Yoh 17:20-21

⁷Inii paaya ena too too mokoo kiya inii mée gakata Kristus Wa me kisee-kisee naokageesi naadi pesee agiyoo kuwa inii aii mée manta, inii daamaa mée ena-ena kisuwa-kisuwa yawuditaata. ⁸Kisee kemaata idukaa ebeamaata menaa ena mee ko kisee:

"Waa ma yape kiyaa bagee yuwa peneata badaa maadoota peegi. Waa asii maa kaa pakaamaata kaama

agiyoo-pagiyoo mée paagoo aii manigi" see menaa ebeamaata. Mzm 68:19

⁹Mee "Waa asii maa kaa pakata" see mee mena nekeeniino yaato ko kaasee? Mee ko Waa magaa da kaa yamopasi yaato keta eseta see kuwa nekeensi naadi menaa mee. ¹⁰Magaa da kaa eseta Mée mee Waa kiyoo-kiyoo uduma ebo toono see naadi epoo to wodoo asii-sege see yaato pakata. ¹¹Waa ko Wa me bagee yuwa okoo kisee-kisee daamaa naokageesi naadi kaama pesee agiyoo aii mée maniyaa Mée mee. Wa me mée noonaa Wa me menaa yadoonaa see bagee kiyaata, mée noonaa nabi bagee kiyaata, mée noonaa Wa me menaa ewo see bagee paagoo yaweganaa see bagee kiyaata, mée noonaa Wa me bagee yuwa daamaa yamuniino ma, mena daamaa yatupiino ma kisee yaukuwataa see bagee yuwa kiyaata.4:11-12 1Kor 12:27-28¹²Mee ko okoo Wa me daamaa wa too wigintaata bagee kuwa uduma, kuwa ko okoo Kristus Wa me maa to ebea-ebea mokoo bagee yuwa uduma okoo daamaa natupii, daamaa naipiipii taai naadi kaama Wa me kuwa bagee yuwa agoo kiyaata. Okoo me kuwa Wa me bagee kisee daamaa yaipiipii siwoo naadi kaama mée uduma Wa me agiyoo daamaa yaukuwawoo, daamaa iyawoo, kisee too ¹³inii uduma Ogatamee Yoopaa mikee nao naadi ena dimii, ena menaa kaa epo enaataa Waa esee ipi kiyaa yoo too. Inii kisee iyawoo, ebo kiwoo naadi kaama inii uduma Kristus Wa me iyee, Wa yiba agoo kiyaa yuwa kuwa uduma inii miya agoo kaapa. ¹⁴Mee kaama wodoo inii dimi ewo see yogaa yuwa see see mokoo taa kaapea. Mée me dimi ipi kaa mée deebaa taano see naadi topenaa see menaa kuwa me inii mée se deebaa semaayaa. Okoo me mée deebaa see menaa kuwa ko uwo biku-biku kiyaato-kiyaato wogeedapii segee naadi kaama bo me mée kitaa aii me-dogeamaaga, dogeewaaga senaa siyaayaa mokoo see menaa too. ¹⁵Kiya inii mée epa dimii kaa mikee menaa maamaa peneata wegawoo naadi kaama inii daamaa iyawoo, ebo kiwoo siyaa, inii me umiyaa, tuyaa uduma yiba inii miya Kristus Waa see see kedaa siwoo siyaa. Waa ko inii me Mumoo to mokoo. ¹⁶Mee ko maa da kaa mani-pani yuwa enaataa aagadi-maagadi naadi mumoo to kaa daamaa takumedaa siyaa. Mani-pani yuwa ena-ena daamaa epo enaataa aaukuwagee naadi kaama maa da uduma daamaa iyawoo, ebo kiwoo siyaa. Mee mokoo miya inii Wa me maa da mokoo bagee kemaata inii mée ena-ena ukuwageesi naadi inii kaa mée yadootaata agiyoo kuwa daamaa aaukuwagee siyaa. Inii kisee daamaa aaukuwagee siwoo naadi kaama inii uduma epa aagaa see dimii kaa epo enaataa daamaa iyawoo, ebo kiwoo siyaa.

Idukaa iyee mee ekeata kaama gipii see iyee mee too doonaa taai naadi menaa

¹⁷Kisee kemaata anii Tuhan pesee kaa ikii omaago ma kisiinaka, mee ko Ogatamee ewo see bagee okoo me otoopa dimii kaa umiyaa, tuyaa kuwa see see ikii miya eto kaama wodoo kisee too se umiwoo, toowoo taai.4:17-19 1Pet 4:3¹⁸Okoo me dimi gaayaa yuwa kuwa digiyoo. Okoo dimi taa, dimi eboo see bagee kemaata okoo Ogatamee Wa me daamaa mée tuyaabuu siyaa menaa kuwa ewo see bagee yuwa. ¹⁹Okoo me ’Anii pedeo ukuwayaa yoka ipiipi diipa’ see dimii mee taa kedaa seta kemaata okoo se-pedeo, we-pedeo ukuwaano see naadi okoo ekaato otoopa ekegatagaa segee siyaa. Okoo otoopa aadoonaa segee naadi kaama okoo me pedeo ou dimi-pami kuwa eebaa kedaa siwoo siyaa.

²⁰Kiya kuwa iyee kuwa ikii Kristus kaa kitopeta menaa yuwa doodoo taa. ²¹Mikee, ikii kuwa Yesus kaa menaa kuwa daamaa yeemaamea. Waa mikee kisee Mée, Waa kisee iyee, see menaa kuwa ikii daamaa kitupimaamea. ²²Kuwa kitopeta menaa kuwa ko kisee: Ikii me idukaa iyee-payee kuwa beamaata tameepeasii. Kuwa iyee kuwa ko mée me pedeo ou dimii kuwa me okoo deebaa naadi kaama dimi mena pedeo kedaa siwoo siyaa. Ikii kuwa iyee kuwa beamaata kaama4:22-24 Rom 12:2, 13:14, Kol 3:9-10²³ikii me dimi menaa da ma, ikii me dimi gaayaa yuwa ma kuwa daamaa gipii kikiyaabuu segeesi naadi ²⁴gipii see iyee mee maatagaai. Mee iyee mee ko Ogatamee Wa me iyee doodoo ikii kaa kiogaataata. Waa see see ikii miya mikee menaa doodoo dimi topoo, pedeo see taa, kisee daamaa wiginiwoo, umiwoosea naadi kiogaataata iyee da mee. Ikii kisee menaa kuwa daamaa kitupimaamea.

²⁵Kuwa me kaama makapaa menaa aasee siyaa kuwa ekeasii. Inii mée ena-ena kutuu ena too too mée kiyaata bagee yuwa kemaata ikii mée gakata mikee menaa kuwa too aasee taai. ²⁶Ikii kagoo dimii miyu ko pedeo se ukuwaai. Kagoo kuwa kenoo to seomaano see koo taaki yoo too se ekeata taa kiyaai. ²⁷Kagoo kuwa se taa kiyaayu ko Iblis meeno etaa da yamasiyaa yoka gaai.4:26-27 Yak 1:19-20, 4:7²⁸Oma maseekee bagee gaayu ko eto kaama wodoo oma se masii. Waa ekaato wa me yagaa da me daamaa ukuwayaa agiyoo yuwa kuwa too ukuwagee taano daamaa. Wa me masiyaa agiyoo yuwa noonaa okoo agiyoo tapoo omegee see bagee yuwa paagoo wudiino see naadi waa agiyoo ukuwagee taano daamaa. ²⁹Pedeo yawegaa-wegaa see menaa kuwa ikii ebeawee kaama se peeyaai. Yeekee bagee yuwa okoo dimi mena daamaa pesee ma iyawoosi naadi menaa kuwa eewegaai. Okoo me kisee yiino daamaa, kisee yiino gaano pedeo see menaa kuwa daamaa eewegaai. Okoo daamaa dimii, daamaa menaa kuwa yamiyaasi naadi menaa kuwa too eewegaai. ³⁰Ogatamee Wa me Roh Kudus mee ikii me Waa dimi boodi kiyaakee se. Roh mee ko ikii Ogatamee me bagee yuwa ii see kuwa nekeensea naadi kineeta Mée mee. Ikii Roh ma daamaa umiwoo, toowookea kuwa kisee too wodopasi daba kidaagimaa peeyaatagi naagoo too yoka Roh mee dimi gaagaa se siyaai. ³¹Eto ko ikii nugi-nugi see dimii ma, kagoo ebo see dimii ma, aakago-maakago, aawisi-maawisi, aabade-maabade, kisee aabee-bee see dimii kuwa uduma ikii tameepeasii. ³²Ikii dapuu see dimii ma, epa see dimii ma kuwa daamaa aagaa siwoo taai. Ogatamee me Kristus doodoo ikii me pedeo yuwa epa kiekeata see see ikii me miya kisee epa aaekee siwoo taai.4:32 Mat 18:32-35, Kol 3:12-13

Awee yaato umiwoo, toowoo taai naadi menaa

¹Ikii ko Ogatamee me kisee esee kiepa see yogaa yuwa kemaata Wa me iyee mee ikii miya doonaa siwoo taai, ²bedaa epa see dimii mee miya doonaa siwoo taai. Mee ko Ogatamee paagoo kupi-manee siyaa agiyoo daamaa wunu peeyaa see see mokoo Kristus Waa miya inii mée epa kaa Waa ekaato mée yaekegataata. Kisee kemaata ikii miya mée epa see dimii mee kaa umiwoo, toowoo taai.5:2 Yoh 15:12-13, Gal 2:20, 1Yoh 2:6

³Ikii ko Ogatamee me daamaa wa too kiwigintaata bagee kemaata tobaaka, otoopa api doonaa, paayogaa doonaa, kepe ou, agiyoo ou, kisee dimii kuwa uduma ikii peenaa ma se dogaai. Mée me ikii kisee dimii agoo see bagee yuwa see kidiino ko pedeo. ⁴Bedaa yiino ego weda kiyaa menaa ma, dimi taa see bagee me wegaa-wegaa menaa ma, otoopa ebaa-ebaa see menaa ma kuwa uduma ikii peenaa ma wegaano ko pedeo. Kuwa menaa wegaakee se kiya Ogatamee kiiboo, paamee see menaa maamaa wegagee taai. ⁵Ikii daamaa nekeenii: okoo tobaaka, otoopa aadoona-maadoona, kepe ou, agiyoo ou, kisee bagee kuwa okoo uduma Kristus ma, Ogatamee ma Ekea too ebo mée eetootagea naagoo okoo se tootagea, masiyaa agiyoo kuwa miya peenaa ma se masiitagea. Mee kepe ou, agiyoo ou see dimii mee ko makapaa ogatamee kaa dimi maayaa mokoo yoka daamaa nekeenii.5:5 1Kor 6:9-10, Gal 5:19-21

⁶Mée me otoopa imi taa see menaa kuwa me ikii kideebaa taapea yoka gaai. Okoo Ogatamee Wa me menaa si yayeetaa see bagee yuwa kemaata Wa me kagoo kuwa okoo kaa yamiyaatagi. ⁷Kisee kaata kemaata okoo me ukuwanaa, peenaa siyaa yuwa kuwa ikii ma epo enaataa se. ⁸Mikee, ikii miya idukaa digiyoo yiba toogee seta kiya eto ko ikii Tuhan ma dimi aagadi-maagadi naadi kaama awee yaato peanta toogee see bagee yuwa. Ikii kisee bagee kemaata awee yaato too daamaa umiwoo, toowoo taai.5:8 Yoh 12:35, Kol 1:12-14⁹Awee yaato umiwoo, toowoo naadi kaama ekadaa siyaa poo kuwa ko daamaa, topoo, mikee menaa doodoo ukuwayaa agiyoo-pagiyoo kuwa. ¹⁰Ikii Tuhan me ede kiyaa agiyoo kuwa maagiyoo, maagiyoo, kisee daamaa gaagaa naadi ipi kaai.5:10 Rom 12:2¹¹Okoo digiyoo yaato otoopa ukuwagee see bagee kuwa okoo daamaa poo se ekayaa yoka ikii miya okoo ma epo enaataa se ukuwaai. Kuwa agiyoo kuwa pedeo too ii see kuwa nekeensi naadi kuwa agiyoo awee da kaa kiyaai. ¹²Okoo me koogo ukuwagee siyaa agiyoo kisee-kisee see menaa kuwa aasee taano pedeo. Asiyaa mée to me ego weda kaapa naadi se wegayaa. ¹³Kiya agoo da wogaamaata kaama kuwa okoo me ukuwayaa, peeyaa agiyoo kuwa uduma awee da kaa kiyaa.5:11-13 Yoh 3:19-20¹⁴Kuwa me kemaata wegayaa menaa ena ko kisee:

"Ei, aa toomoo ometaa see mée to mee anoogii.

Aa boota kaama aya andoo pooi.

Kristus Wa me agoo da a kaa kawogaamagaapi yoka" see menaa mee wegayaa.5:14 "Toomoo ometaa see mée to" see mee mena nekeeniino yaato ko dimi mena digiyoo see mée to ebea-ebea. "Aa boota kaama aya andoo pooi" see menaa mee gaayu ko mee idukaa iyee mee boota yoka ekeata gipii see iyee mee kaa too umiwoo, toowoo taai naadi ebea-ebea.

¹⁵Kisee kemaata ikii me umiino, toono kuwa ipiipi dii. Dimi ewo see bagee yuwa see see mokoo se kiya dimi ipi see bagee mokoo daamaa umiwoo, toowoo taai. ¹⁶Eto mee begaa kaa pedeo dimii, pedeo menaa maamaa eebaa kedaaka yoka ikii daamaa agiyoo ukuwaano etaa da agoo kiyaa kaboo daamaa agiyoo ukuwaai. ¹⁷Ikii dimi taa see bagee yuwa see see se kiya Tuhan Wa me kisee daamaa, kisee ede see gaayaa agiyoo kuwa daamaa ipi kaai, daamaa nekeenii. ¹⁸Ikii anggur poo uwoo noomaata kaama boomaga-baamaga see se. Kuwa uwoo kuwa me pedeo ou dimii mee ebo kedaa siyaa yoka kuwa se kiya Roh mee ikii yiba pudii siyaai.5:18 Mena nekeeniino yaato ko mena kegaa ena ma agoo, mee ko Roh me ikii pudii siyaai. Mee ko Roh me Ogatamee Wa me iyee, Wa me pesee, Wa yiba agoo kiyaa yuwa kuwa ikii yiba miya pudii kisiyaasi naadi menaa mee.¹⁹Ikii kisee daamaa pesee kikiyaabuu siwoo naadi kaama mazmur menaa ma, yaapaagee see menaa ma, Roh me inii yaayaasi naadi mée manta menaa kuwa ma aawegaa siwoo taai. Esee dimi menaa da kaa maamaa ede ma, ede ma Tuhan paagoo yaayaa segee siwoo taai. ²⁰Agiyoo-pagiyoo kuwa uduma kaa inii epoo Mée Tuhan Yesus Kristus Wa ekaa yiba Nagamee Ogatamee paagoo kiiboo, paamee see menaa se daata kisee too asegee siwoo taai. ²¹Bedaa ikii Kristus Wa too ebo, Wa too weda see dimii mee kaa ikii ekaato dimi peedi aaekee siwoo taai.

Ekea bogaa kaa tupiyaa menaa

²²Ikii api yuwa gaayu ko ikii Tuhan paagoo ekaato dimi peedi ekee segee siyaa see see paimee paagoo miya ekaato dimi peedi ekee taai.5:22-24 1Pet 3:1-6²³Mee ko Kristus mee Waa mikee gaayaa bagee yuwa uduma me mumoo to see see paimee miya wa me apii to me mumoo to. Kristus Waa mikee gaayaa bagee kuwa ko Wa me maa to mokoo, bedaa Waa ko okoo daba daagimaa peeyaano Mée. ²⁴Kisee kemaata Kristus mikee gaayaa bagee yuwa okoo Wa paagoo ekaato dimi peedi ekee segee see see mokoo ikii api yuwa miya agiyoo-pagiyoo kuwa uduma yiba a me pai to paagoo ekaato dimi peedi ekee segee taai.

²⁵Ikii pai yuwa gaayu ko ikii me apii epa kaai. Kristus me Waa mikee gaata bagee yuwa epa kaa Waa ekaato okoo kaa yaekegataata mokoo see see ikii me apii miya daamaa epa kaai.5:25-29 Kol 3:19, 1Pet 3:7²⁶Mee ko Kristus Wa me menaa kuwa me inii daamaa uwo mée yawetogekomeeta kaama inii daamaa wa too mée wigintaata. ²⁷Inii Waa mikee gaata bagee yuwa kisee daamaa mée wigintaata kaama inii esee daamaa too, pedeo taa, mena taa, kisee ena ma taa kaa Wa paagoo mée miyaano see naadi Waa ekaato mée yaekegataata.5:27 Why 19:75:27 Yesus mikee gaata bagee uduma ko Wa me apii to mokoo. Mée me api goeyaa-goeyaa see see mokoo Yesus me inii pedeo taa kaa Wa paagoo mée miyaano see naadi Waa ekaato inii kaa mée yaekegataata kaama mée yaboota. Paimee miya kisee wa me apii to esee epa kaa waa ekaato wa me apii to kaa yaekegataasi naadi ebea-ebea menaa mee.²⁸Mee mokoo pai yuwa miya kisee. Paimee me waa ekaato maa to epa kiwoo, deewoo siyaa see see wa me apii to mee miya epa kaano gaano pedeo. Wa me apii to epa kiyaa see mée to mee ko waa ekaato miya epa kiyaa mokoo. ²⁹Mikee, waa ekaato maa to be see bagee ena ma taa. Waa ekaato maa to mee daamaa munitaa, daamaa deetaa segee siyaa, Kristus me Waa mikee gaayaa bagee yuwa kaa daamaa yaukuwagee siyaa see see. ³⁰Mee ko inii Wa me maa to kaa takumeta agiyoo mokoo bagee kemaata Wa me inii kisee daamaa mée yaukuwagee siwoo see. ³¹Idukaa ebeamaata menaa ena mee ko kisee: "Kuwa me kemaata paayogaa gakata waataagi ma, wabaayo ma kuwa ekeata kaama wa me goeyaa apii to ma ekea bogaa má ena too too mokoo kiyaa, kisee too umiwoo, toowoo siyaa" see menaa ebeamaata.5:31 Kej 2:24³²Mee menaa mee ko ebo menaa, idukaa kaama manii to awee da kaa kiyaano taa menaa. Mena manii to mee ko inii Kristus mikee gaayaa bagee yuwa kaa menaa, Waa ma aagadi-maagadi naadi toowoo siyaa menaa mee. Anii kuwa kaa menaa kisetaaka. ³³Bedaa mee menaa mee ikii ekea bogaa kaa miya kisetaaka. Mee ko ikii mée gakata aa ekaato epa kiwoo siyaa see see mokoo a me apii to mee miya kisee epa kiwoo taai. Bedaa apii to mee miya wa me pai to ebo ekee siwoo taai naadi kisega.

Mée okoo tukuguu to kaa tupiyaa menaa

¹Ikii yoga yuwa gaayu ko ikii Tuhan me menaa yayeegeekea see see ikii me okonaka me kisiyaa menaa kuwa miya daamaa yayeewoo taai. Ikii kisee ukuwaano daamaa.6:1-8 Kol 3:20-25²Idukaa Ogatamee me "Ikii kisee-kisee ukuwaai. Ikii kisee ukuwagee siyu ko Anii kisee-kisee kiukuwaaniyaabuu siwoo taapa" see mée aseta menaa kuwa petamanii mee mee ko kisee: "Agaataagi ma, abaayo ma kuwa ebo ekee siwoo taai.6:2-3 Kel 20:12³A me ekea kisee ebo ekee siwoo siyu ko aa daamaa ede ma toogee taape, aa magaa da kaa eebaa umiwoo, toowoo taape" see aseta menaa mee.

⁴Ikii nagaanii yuwa gaayu ko ikii me yogaa kuwa kagoo ebo kiyaakee se kiya okoo peedi kaa kaama Tuhan me menaa daamaa ase-manee, daamaa tupi-manee, kisee daamaa muniwoo taai.

Hamba kiyaata bagee yuwa ma, okoo epoo bagee yuwa ma okoo kaa tupiyaa menaa

⁵Ikii hamba kikiyaata bagee yuwa gaayu ko ikii Kristus me menaa daamaa yayeewookea see see ikii magaa da kaa epoo mée wa me kisiyaa menaa uduma miya weda ma, ebo ekee see dimii ma daamaa yayeewoo taai. ⁶Okoo me emaa kiwugiyaa kaboo too yaukuwaakee se. ’Wa me nadeetaaki yoka waa ede kisi naadi yaukuwaapa’ see dimii mee se. Kiya ikii Kristus me agiyoo daamaa yaokagee siyaa see see ikii okoo me agiyoo kuwa miya ’Ogatamee me gaata-gaata doodoo yaukuwaanaka’ see dimii mee kaa omaago ma daamaa yaokagee taai. ⁷Ikii okoo me agiyoo yaokagee siyaa kuwa ko ’Anii Tuhan Wa me agiyoo yaokagee taaka mokoo yoka’ see dimii mee kaa okoo me agiyoo miya daamaa ede ma yaokagee taai, mée me agiyoo yaokagee siyaa see see mokoo too se. ⁸Mee ko mée gakata, hamba kiyaata bagee yuwa miya, apanaa kisee kiyaano taa bagee yuwa miya Tuhan me okoo mée gakata daamaa agiyoo ukuwagee setaa to mokoo da maniipi, see kuwa ikii miya ipi yoka daamaa yaokagee taai.

⁹Bedaa kuwa hamba kiyaata bagee yuwa okoo epoo bagee ikii gaayu ko ikii me Eboo ma, okoo me Eboo ma ena mee too, Waa epoo to wodoo tupi, see kuwa ikii miya ipi yoka daamaa nekeenii. Inii ebo, peedi uduma Ogatamee me mée epa, inii uduma endagii see mée deetaa see yoka hamba kiyaata bagee yuwa kuwa ikii me okoo daamaa dimii kaa too asiwoo taai, omaago ma wedaasi naadi menaa aseekee se.6:9 Kol 4:1

Ogatamee me inii Iblis me mée gaadee siyaa agiyoo daba, peedi kiyaasi naadi mée manta agiyoo yuwa kaa ebea-ebea menaa

¹⁰Ni me wodopasi yaato kisiinaka menaa mee ko kisee: Ikii Tuhan ma aagadi-maagadi naadi Wa me pesee da me daamaa pesee kikiyaata kaama umiwoo, toowoo taai. ¹¹Yape paagoo poono see naadi dooyaa agiyoo-pagiyoo kuwa uduma Ogatamee me ikii kineeta yoka maatagaai. Iblis me dimi ipi kaa kideebaa seta pedeo kikiyaano see agiyoo kuwa ikii makii taa, waa wisiniwoosea naadi kuwa Ogatamee me kineeta agiyoo kuwa maanaa siwoo taai.6:11-17 Rom 13:11-13, 1Tes 5:8¹²Mee ko inii ma yape masiyaa bagee kuwa tadaa agoo, mogee agoo see bagee kuwa se kiya pesee yago agiyoo yuwa ma, magaa da kaa digiyoo yaato ebo-ebo yuwa ma, epoo to yaato pedeo yago agiyoo yuwa ma, kisee agiyoo kuwa ma inii aawisi-maawisi segeekea. ¹³Kisee kemaata Ogatamee me kuwa pedeo agiyoo toopusi naadi kineeta agiyoo kuwa maatagaa taai. Ikii kisee daamaa ipiipii semaata kaama pedeo agiyoo miyaa naagoo ikii me kuwa uduma daamaa wisintagaa taapea, ikii daamaa yiinaageeta koogo se makii taapea. ¹⁴ Kisee kemaata eto ko kuwa agiyoo kuwa maataata kaama daamaa makii taa see kaa toowoo taai, kuwa ko kisee: Epmoonee da yupigapii da taa daamaa maayaa mokoo ikii mikee menaa mee daamaa maatagaai. Bedaa ikigii to kaa toopusi naadi agiyoo da mee maayaa mokoo Ogatamee Wa me mikee, topoo see kikiyaata dimii mee daamaa maataata kaama se makii siwoo taai. ¹⁵Kiyoo kaama bado doko maayaa mokoo Yesus me mée tomaa Ogatamee ma emee-emeesi naadi doometa menaa kuwa mée paagoo eeweganaa taapa dimii mee miya maataata doonaa taai. ¹⁶Bedaa yagaa da kaa toopusi naadi agiyoo da mee masegeeta doonaa siyaa mokoo ikii me umiyaa, tuyaa yiba uduma Yesus mikee nao see gaawoo siyaa dimii mee daamaa maataata kaama se makii siwoo taai. Ikii me mikee gaano dimii mee me pedeo yago mée Iblis wa me biyaa mapedaa kuwa uduma yadeeyaayaa.6:16 1Pet 5:8-9, 1Yoh 5:4-5¹⁷Kiyoo kaama mumoo to kaa toopusi naadi agiyoo da mee masegeeta maanaa siyaa mokoo ’Yesus mee anii daba nadaagimaa peeyaano Mée nao’ see dimii mee maataata doonaa taai. Bedaa ikii Roh Wa me mowai mee masegeeta doonaa taai. Mee mowai mee ko Ogatamee me menaa mee.6:17 Ibr 4:12

Ikii kuwa dimii, kuwa menaa kuwa uduma maataata doonaa siwooka too ¹⁸sembahyang siwoo taai. Ikii Roh ma aagadi-maagadi naadi sembahyang se daata maamaa asegee, maamaa idimegee siwoo taai. Ikii kisee too se ekeata maamaa ipiipi nekeenta kaama Yesus mikee gaayaa bagee yuwa uduma kaa sembahyang yasegee siwoo taai.6:18 Kol 4:2, 1Tes 5:17, 1Pet 4:7¹⁹Ani kaa miya anii mena eewegayaa kaboo Ogatamee me kisee wegaai, kisee wegaai see menaa kuwa daamaa nase-maneesi naadi sembahyang nasegee taai. Anii Kristus me doometa menaa yuwa, idukaa mée paagoo awee da kaa kiyaano taa menaa kuwa anii uu ma eeweganaasi naadi sembahyang nasegee taai. ²⁰Anii kuwa menaa eeweganaa see mée kemaata digiyoo ee yiba nadogeamaata totaaka. Anii kuwa menaa uu ma eewegaano gaano pedeo yoka anii kisee eewegasi naadi ikii sembahyang nasegee taai.

Wodopasi menaa

²¹Ni paagoo kaama menaa kuwa uduma Tikikus me doodoota ikii paagoo kiiwegaapi. Waa ko Yesus yiba ena kenaa bagee, inii me epa see mée, Tuhan me agiyoo se ekeata daamaa yaokagee see mée. Nakaayoo kaama menaa uduma wa me keipi kiyaapi. ²²Anii waa ikii paagoo pooi see asiinaka, mee ko inii paagoo kaama menaa kuwa ikii ipi kesea naadi miya, bedaa ikii dimi mena daamaa pesee kikiyaayaa menaa kuwa kiiwegasi naadi miya pooi see asiinaka.

²³Nagamee Ogatamee ma, Tuhan Yesus Kristus ma Ekea me ikii Yesus mikee gaayaa bagee uduma daamaa aaemee-emee kisiyaayaa dimii mee ma, epa dimii ma, mikee gaano dimii ma kuwa maamaa kineesi naadi kiasega. ²⁴Ikii me inii epoo Mée Tuhan Yesus Kristus mee se daata kisee too epa kiwoo see bagee kuwa uduma Ogatamee me epaa mee ikii ma epo enaataa kiitoowoosi naadi kiasega. Kiyoo too.