Kolose

Kolose

Paulus me Kolose magaa kaa Yesus mikee gaata bagee yuwa paagoo yaebeamaata kapogee

Mee kapogee mee ko Paulus waa digiyoo ee yiba toogeeki too ebeata kapogee. Waa Kolose magaa kaa poono taa kemaata kiyoo Yesus mikee gaata bagee kuwa ewo, aadee taano taa kiya okoo me bagee ena ekaa da ko Epapras mee waa ipi. Mee mée to me Yesus me menaa okoo paagoo eewegami. Okoo noonaa Yesus mikee gaata kemaata Paulus me mee kapogee okoo paagoo yaebeamaata.

Kolose magaa kaa koopoo see menaa weganaa see bagee agoo. Okoo me wegaano, "Kuwa magaa da kaa pesee yago agiyoo kuwa me inii mée pedeo kiyaayaa yoka kuwa pesee da taa kisi naadi apanaa menaa deewoo, ukuwawoo taano gaano pedeo. Kristus me menaa kuwa sikii taa" see menaa kuwa eeweganaakea. Paulus me kuwa menaa be. Kuwa ipi see menaa keenda kiya taa, mikee ipi see menaa kuwa uduma Kristus kaa too. Kristus mee too sikii, inii Kristus kaa too umina sikii mée kiyaata yoka inii Wa yiba too totaakea. Apanaa menaa kuwa mée me menaa too, aii wegawoo see menaa too yoka si yii, se aatabi siyaai, kisee gaamaasi naadi menaa kuwa Paulus me mee kapogee yiba yaebeamaata.

Yesus mee epoo to wodoo pakaa-seometa kaama wodoo tahun amaamo waa naa omemaata kaama tahun 60 mee yiba mokoo Paulus me mee kapogee yaebeamaata.

Mee kapogee yiba mena kutuu yuwa kuwa ko kisee:

1:1-14 Petamanii menaa ma, sembahyang kaa menaa ma

1:15-23 Kristus mee Asii-sege see Mée ii see nekeensi naadi menaa

1:24–2:5 Paulus me Kristus mikee gaata bagee yuwa okoo kaa omaago ma yaukuwagee seta menaa

2:6-23 Koopoo see menaa weganaa see bagee yuwa gaai naadi menaa

3:1-17 Inii Kristus ma dimi aagadi-maagadi naadi kaama dimi mena gipii see kaa umiwoo, toowoosi naadi menaa

3:18–4:18 Okoo daamaa agiyoo aaukuwagee siwoosi naadi menaa apanaa ma, wodopasi menaa ma

¹Nii ko Paulus, Ogatamee me gaata-gaata dimii kaa Kristus Yesus me menaa nadoonaasi naadi pooi see naseta mée. Bedaa inii ma Yesus yiba ena kenaa bagee Timotius mee ma ²enaa wiya me mee kapogee mee ikii Kolose magaa kaa Kristus yiba ena kenaa bagee yuwa paagoo kiebeataake, ikii Ogatamee me daamaa wa too kiwigintaata kemaata Kristus mee se ekeata mikee gaawoo see bagee yuwa paagoo kiebeataake. Iniitaagi Ogatamee Wa me aii kiepa dimii ma, koogo adumeta dimii ma kuwa ikii ma epo enaataa kiitoowoosi naadi kiasege.

Ogatamee yaapaagee seta menaa

³Inii ikii kaa sembahyang kitaaka too inii epoo Mée Tuhan Yesus Kristus Waataagi Ogatamee paagoo kiiboo, paamee kisee too maamaa kiasegeeke. ⁴Ikii me Kristus Yesus mikee gaayaa dimii mee ebo, bedaa ikii me okoo Wa me daamaa wa too wigintaata bagee apanaa yuwa uduma epa gaayaa dimii mee miya ebo, see menaa kuwa inii yeeta kaama wodoo inii Ogatamee paamee dimii mee ebo. ⁵Ikii kuwa etokaa mikee menaa kuwa daamaa yeeta kaama ikii Wa kaa dimi kotopiwoo, diitoo taakea. Ikii Ogatamee me daamaa inii mée kaa yaekeasiitagi agiyoo kuwa epoo to wodoo kaa kiyoo mée yaipiipii semaata topa nao naadi kaama ikii Yesus mikee gaawoo, mée epa gaawoo, kisee umiwoo, toowoo siyaa. ⁶Yesus me doometa menaa kuwa daamaa yaweganaa naadi kaama ikii paagoo daamaa kiiwegamea. Piya wodoo to daamaa iyawoo naadi kaama poo ekadaa siyaa see see kuwa Yesus me doometa menaa kuwa miya uwoo to, magaa to uduma yadoonaa naadi kaama daamaa poo maamaa ekayaabuu senaa siwooka. Ikii miya Ogatamee me mée esee epa see menaa kuwa petamanii yeeta kaama mikee menaa ii see nekeenemea. Ikii kisee nekeenta kaama wodoo kuwa menaa yuwa me ikii paagoo daamaa poo maamaa ekayaabuu siwooka. ⁷Kuwa menaa kuwa Epapras me kiiwegami. Waa ko inii me epa gaataa see mée, inii ma epo enaataa agiyoo kana ma ukuwataa see mée. Wa me Kristus me agiyoo se daata kisee too daamaa yaokageeki kuwa wa me ikii kaa miya kisee daamaa kiokageeki. ⁸Ikii Roh ma dimi aagadi-maagadi naadi kaama ikii epa aagaa siwookea kuwa Epapras me mée asimi.

⁹Inii kuwa menaa kuwa yeeta kaama ikii kaa se daata kisee too maamaa sembahyang kisiwoo segeeke. Inii me sembahyang menaa kuwa ko Roh me ikii esee ipi see dimii ma, nekeeniino dimii ma kuwa maamaa eebaa kiawiyaata kaama Tuhan Wa me kisee daamaa, kisee ede see gaayaa agiyoo kuwa ikii miya daamaa esee ipi kiwoosea naadi kiasegeeke. ¹⁰Ikii kisee ipi kiwoo naadi kaama Tuhan mikee gaayaa bagee yuwa daamaa umiwoo, toowoo siyaa doodoo ikii miya ikii me ukuwayaa, peeyaa yuwa uduma yiba Waa dimi mena kiwikimiwoosi naadi kiasegeeke. Mee ko piya poo daamaa ekadaa siyaa mokoo ikii miya daamaa agiyoo yaukuwawoo, Ogatamee ipi see dimii maamaa eebaa kiwoo, ikii kisee umiwoo, toowoosea naadi kiasegeeke. ¹¹Bedaa Wa me asii-sege see pesee see agiyoo kuwa me ikii daamaa pesee kikiyaata kaama ikii agiyoo-pagiyoo uduma yiba dimi mena animaata koogo makii taa see kaa toowoosea naadi kiasegeeke. ¹²Bedaa ikii me Nagamee kiiboo, paamee see dimii mee ebo kaa ede ma, ede ma yaapaagee siwoosea naadi kiasegeeke. Mee ko Wa me bagee taano masiitagea agiyoo kuwa ikii miya masesea naadi Wa me ikii sikii kikiyaata, Wa me ikii daamaa wa too kiwigintaata kaama awee yaato toowoo see bagee kikiyaabuu seta.1:12 1Pet 1:3-4¹³Idukaa inii uduma digiyoo yaato pesee da me mée peneata omegee, toogee seta kaboo Wa me inii mée pekageeta kaama Wa me epa see Yogaa ebo too toowoo see yoo kiyoo mée tuyaabuu seta.1:13-14 Kis 26:18¹⁴Yogamee me kemaata inii daba mée daagimaa peeyaata kaama daamaa topea, mee ko inii me pedeo yuwa epa mée yaekeata toogee siyaa.

Kristus mee Asii-sege see Mée ii see nekeensi naadi menaa

¹⁵Kristus mee ko emaa me se deeyaa Mée Ogatamee ma Ekea ena keenda, ena keenda see kuwa mée deeyaata.1:15 Yoh 1:18 Waa yagamee yagaaboo to mokoo, ogaataata agiyoo-pagiyoo uduma me Eboo mee. ¹⁶Mee ko Ogatamee me se-agiyoo, we-agiyoo uduma ogaataata kuwa Kristus me ogaataata, kuwa ko epoo to wodoo agiyoo ma, magaa da kaa agiyoo ma, emaa me deeyaa agiyoo ma, se deeyaa agiyoo ma, malaikat bagee ma, apanaa kisee pesee yago bagee, pesee yago agiyoo, se-pesee, we-pesee, kuwa uduma Kristus Waa doodoo ogaataata, bedaa Waa kuwa uduma me Eboo kisi naadi agoo kiyaabuu seta.1:16-17 Yoh 1:3, Ibr 1:2-3¹⁷Kuwa uduma agoo kiyaano taa kaboo Kristus mee tota, bedaa kuwa agiyoo-pagiyoo agoo kiyaata kaama wodoo kuwa agiyoo ukuwaandaa segee siyaa yuwa kuwa uduma Wa me too kemaata kuwa agiyoo kisee too daamaa yaukuwaaniyaabuu siwoo segeeki.1:17 Kuwa agiyoo yuwa ukuwaandaa segee siwoo siyaa yuwa see menaa mee ko kenoo to pakataa, esetaa, deka wetaa, agiyoo iyataa, mée ometaa, totaa, kisee ukuwaandaa segee siwoo siyaa yuwa kuwa uduma Kristus Wa me too kemaata se wudida-peeda seta daamaa yaukuwaaniyaabuu siwoo segeeki see kuwa nekeensi naadi menaa mee.¹⁸Waa ko Mumoo to mokoo, bedaa okoo Waa mikee nao naadi Waa ma aagadime seta bagee yuwa kuwa Wa me maa to mokoo. Bedaa Waa yagamee yagaaboo to mokoo kemaata se-agiyoo, we-agiyoo uduma peedi, Wa too ebo toowoosi naadi petamanii Wa keta aya andoo peeta kaama kisee too toowoo see Mée keta. ¹⁹Waa kisee Mée keta mee ko Ogatamee Wa me iyee, Wa yiba agoo kiyaa yuwa kuwa uduma Yogamee yiba miya daamaa toono too see kuwa Waa ede. ²⁰Bedaa Wa me Yogamee doodoo uduma agiyoo, uduma bagee uduma Waa ma emee-emee yasiyaano miya ede. Mee ko se-agiyoo, we-agiyoo, se-bagee, we-bagee uduma, magaa da kaa miya, epoo to wodoo miya kuwa uduma Yogamee piya bokoo to kaa tadaa mée yapeeta kemaata Ogatamee me kuwa uduma kagoo taa kiyaata Waa ma emee-emee yasiyaata.1:20 Rom 5:10-11, Ep 2:13, 2Kor 5:18

²¹Ikii miya idukaa Ogatamee ewo kaa pedeo dimii gaawoo naadi kaama pedeo agiyoo ukuwagee siwoo seta kuwa me ikii Waa ma yape see tomaa yuwa keta.1:21-22 Ep 2:1-6, Tit 3:3-7²²Kiya eto ko Yogamee má yaato boota kuwa kaa Ogatamee me kuwa ikii Waa ma yape kuwa kitaa kiyaata. Mee ko ikii daamaa wa too kiwigintaata kaama ikii kaa pedeo menaa ena ma taa kaa Wa paagoo kimiyaano see naadi Waa ma kiemee-emee siyaata. ²³Kisee kiya ikii makii taa see kaa Yesus me menaa too peneata kisee too mikee gaawoo taano gaano pedeo. Bedaa Wa me doometa menaa kuwa me Wa me inii kisee Wa paagoo mée miyaatagi nao naadi kaama Wa kaa too dimi kotopiwoo, diitoo siwoo taai. Kuwa Yesus me menaa kuwa ikii miya yeemea, bedaa kuwa menaa uwoo to, magaa to uduma kaa yaweganaa naadi kaama mée tomaa-tomaa yuwa miya yeemea. Anii Paulus kuwa menaa yadoonaa see mée keta.

Paulus me kana ma yaokagee seta menaa

²⁴Anii Wa me menaa yadoonaa naadi kaama eto kiipaa ae-wae, gaagaa segeeka kuwa anii ikii kaa kikoo segeeka yoka anii ede ma, ede ma too totaaka. Mikee, anii Kristus mikee gaayaa bagee okoo kaa ae-wae yataano kuwa ko anii Kristus ma aagadi-maagadi naadi kaama apanaa ae-wae taapa yuwa miya topa yoka anii eto ni me maa da kaa okoo kaa ae-wae yasiwoo segeeka. Kristus mikee gaayaa bagee kuwa ko Kristus Wa me maa to ebea-ebea da mee. ²⁵Kuwa bagee kuwa Ogatamee me anii Wa me menaa uduma okoo paagoo daamaa pe-eewegaano mée nakiyaami, bedaa ikii miya kuwa menaa daamaa ipi kesea naadi ni kaa naekeasimi. ²⁶Kuwa menaa ena ko Wa me idukaa kaama mée paagoo awee da kaa kiyaano taa see menaa, kisee too mee kakadee kaa, mee egaa kaa booniwoo seta menaa da mee. Kiya etokaa Wa me daamaa wa too wigintaata bagee yuwa uduma paagoo awee da kaa daamaa ipi kiyaabuu siwooki. ²⁷Mee idukaa kaama booniwoo seta menaa mee esee ebo, esee asii-sege see menaa, mee ko kisee: Yahudi bagee too se kiya ikii apanaa tomaa kaa Kristus mikee gaayaa bagee yuwa miya Waa ikii yiba kiitoogee siyaa, see menaa mee. Waa ikii yiba kisee too kiitoogee naadi kaama ikii Wa me asii-sege siyaa agiyoo kuwa ni kaa miya nadootagaatagi nao naadi Wa kaa too dimi kotopiwoo, diitoo siwoo siyaa. Kuwa menaa kuwa Ogatamee me ede kaa Wa me bagee yuwa paagoo ipi kiyaabuuki. ²⁸Kuwa Kristus kaa menaa kuwa too inii mée uduma paagoo eewegakomee senaake. Inii okoo mée ena-ena gaamaasi naadi menaa miya ase-maneeke, bedaa inii esee ipi see dimii ma mée tupi-manee segeeke, kisee too okoo uduma daamaa iyawoo, ipi kiwoo naadi kaama sikii kegea. Mee ko okoo Kristus ma esee dimi aagadi-maagadi semaata kaama inii okoo mée gakata Ogatamee paagoo daamaa eepoono see naadi inii okoo daamaa tupi-manee segeeke. ²⁹Okoo uduma kisee bagee kisi naadi anii omaago ma yaukuwageeka. Kristus Wa me pesee da ani yiba topa, Wa me kisee napesee kiyaabuu segee naadi kaama anii kuwa agiyoo okoo kaa omaago ma yaukuwagee segeeka.1:29 1Kor 15:10

¹Anii kisee ikii kaa miya omaago ma kiukuwageeka, bedaa Laodikia magaa kaa bagee okoo kaa miya, bedaa anii ma aadee taano taa bagee apanaa yuwa okoo kaa miya anii kisee omaago ma yaukuwageeka, see kuwa anii keipi kiyaano see naadi kisega. ²Anii kisee okoo kaa yaukuwageeka mee ko okoo dimi mena daamaa pesee keta kaama ena dimi, ena menaa kaa epa aagaa siwoosi naadi anii omaago ma yaukuwageeka. Bedaa kuwa idukaa Ogatamee me awee da kaa kiyaano taa menaa kuwa, Kristus kaa menaa kuwa okoo esee mikee ipi see dimii maamaa eebaa pudii kisi naadi miya anii omaago ma okoo kaa yaukuwagee siwooka. ³Dimi boko, mena boko, se-ipi, we-ipi kuwa uduma manii to ko Kristus Wa kaa too. Wa yiba too koogo maataata topa.

⁴Anii kuwa kisega kuwa ko apanaa menaa kuwa, mée me ipi see menaa keenda, kisee yiino daamaa menaa kuwa kaa ikii kideebaa siyaa naadi kisega. ⁵Mikee, anii eto kiipaa ikii paagoo kiitoono taa kiya dimi mena yaato ko ikii ma enaataa kiitoga yoka anii ikii kigaagaa ebo. Ikii ena dimii, ena menaa kaa too toogeekea, bedaa ikii Kristus kaa too dimi maataata se maki-makaa segeekea, ikii kisee ukuwageekea kuwa kideega yoka anii esee ede ma, ede ma taaka.

Kristus Wa yiba umiwoo, toowoosi naadi menaa

⁶Kisee kemaata ikii me Kristus Yesus mee inii epoo Mée Tuhan nao naadi Waa daamaa masemaamea kemaata eto miya kisee too Waa ma dimi aagadi-maagadi naadi umiwoo, toowoo taai. ⁷Piya mani maga yiba daamaa peeyaa mokoo ikii miya dimi menaa da Wa yiba daamaa seemiyaata kaama umiwoo, toowoo taai. Bedaa kaboo da kaa maataayaa mokoo Wa kaa too dimi maataata pesee kiwoo taai. Ikii kitupiwoo seta menaa kuwa mikee nao see gaawoo naadi kaama omaago ma peneata se makii siwoo taai. Bedaa Ogatamee kiiboo, paamee see dimii mee maamaa doonaa siwoo taai.

⁸Mée me otoopa menaa kuwa me ikii dimi mena kigoekeasiyaa yoka ipiipi dii. Kuwa ipi see menaa keenda kiya imii da taa see menaa too, mée deebaa see menaa too. Kuwa menaa da manii to ko Kristus kaa se kiya mée me asii-wega-wega menaa kaa too, magaa da kaa pesee yago agiyoo kaa too. ⁹Mikee, Ogatamee Wa me iyee, Wa yiba agoo kiyaa yuwa uduma Kristus Waa miya agoo. Waa mée ena keta kaama wodoo miya kuwa uduma agoo.2:9 Yoh 1:14¹⁰Ikii Kristus ma aagadi-maagadi naadi kaama Wa me iyee kuwa ikii miya daamaa pudii kisiyaata kaama totaakea. Kristus Waa mumoo to mokoo, se-ebo, we-ebo, se-pesee, we-pesee kuwa uduma me Eboo yoka apanaa menaa kuwa ipiipi dii.

¹¹Yahudi bagee me kado ponee daapeasiyaa see see mokoo Kristus me ikii kaa miya kisee kiukuwamaata kaama topea. Kiya mée me kado ponee daapeasiyaa mee se kiya ikii me maa da yiba pedeo iyee-payee kuwa Kristus me kitameepeata. ¹²Bedaa Kristus mee ogo maataata kaama aya andoo peeyaata see see ikii miya kisee kiukuwayaata kaama totaakea. Mee ko ikii uwo kitukumeta kaboo ikii Kristus ma aagadi-maagadi naadi enaataa boota kaama ogo kimaataata. Bedaa ikii Kristus ma enaataa aya kiandoo peeyaata kaama kisee totaakea. Ikii me mikee Waa boota kaama aya andoo peeyaata Mée Ogatamee Wa me pesee da kaa Kristus mee kisee aya andoo peeyaata ii see gaata kemaata ikii miya Kristus ma aagadi-maagadi naadi kaama enaataa kisee aya kiandoo peeyaata kaama totaakea.2:12 Rom 6:4-5¹³Ikii ko kado ponee se daapii see bagee, apanaa tomaa kaa bagee, idukaa pedeo dimii gaawoo, pedeo agiyoo ukuwawoo seta bagee kemaata boota bagee mokoo keta. Kisee kiya ikii Kristus ma enaataa aagadi-maagadi naadi Ogatamee me aya kiandoo peeyaata, ikii me pedeo yuwa uduma Wa me epa kiekeata.2:13-14 Ep 2:1-6¹⁴Inii me pedeo yuwa kaa menaa kuwa ko inii pedeo mée kiyaayaa menaa, kapoge kaa mée yaebeaii seta menaa mokoo. Kiya Ogatamee Wa me umina mée yawonakomeeta, inii Waa ma menaa uduma piya bokoo to kaa paku wugitaata kaama mée yataa kiyaata. ¹⁵Yesus mee piya bokoo to kaa boota kemaata se-pesee, we-pesee, se-ebo, we-ebo kuwa uduma Wa me daba, peedi ekeata. Wa me kuwa uduma awee da kaa daba, peedi kiyaata kaama Wa too ebo ii see mée deeyaata.2:15 Yoh 12:31, Ibr 2:14, 1Yoh 3:8

¹⁶Kisee kemaata eto ko mée me ikii paagoo kuwa agiyoo kuwa naano daa, kuwa uwoo kuwa naano daa, kisee kisiyaa menaa kuwa emaa se wugii. Bedaa ebo naagoo yee, keno poogee da awee da kaa meemaagi see naagoo yee, Sabat naagoo yee kuwa naagoo yuwa deewoo taano ko ikii miya se deewookea kuwa mée me kaasee naadi pedeo-pedeo see kisiyaa menaa kuwa miya wisintayu. ¹⁷Kuwa idukaa deewoo seta menaa kuwa okaa da menaa se, Kristus meeno taa kaboo ayayaa da deeyaa-deeyaa mokoo. Kuwa menaa imi yaato ko Kristus kaa too, Waa meemaata kaama Wa kaa uwa daata menaa.2:16-17 Rom 10:4, Ibr 13:9¹⁸Bedaa mée noonaa ko okoo ekaato dimi daba, peedi ekeasiyaa poga-poga naadi kaama malaikat bagee yuwa ebo ekee, yaapaagee see bagee kuwa miya gaai. Okoo me malaikat bagee yuwa kisee yaapaagee naadi kaama "Ani kaa namaadaa naadi kisee-kisee deepa" see menaa eebaa ede kaa eewegaamoo siyaa. Kiya okoo magaa da kaa otoopa dimi gaawoo naadi ebo poga-poga see bagee yuwa too. Okoo me ikii miya kisee se ukuwagea kuwa kaasee naadi ikii daba, peedi kiekeasiyaa menaa kuwa emaa se wugii. ¹⁹Kisee bagee kuwa Mumoo to kaa daamaa peneasiino taa. Mee ko maa to kaa mani-pani yuwa enaataa daamaa aagadi-maagadi naadi mumoo to kaa takumedaa siyaa. Kisee daamaa takumedaa siyaa kemaata maa da uduma daamaa iyawoo, ebo kiwoo siyaa. Kuwa iyawoo siyaa yuwa kuwa Ogatamee me daamaa yakiyaabuu siwoo siyaa.2:18-19 Kuwa bagee kuwa ko naano agiyoo se notaa, apanaa kisee okoo ekaato daba, peedi ekee siyaa agiyoo yuwa ukuwagee naadi kaama malaikat bagee yuwa ebo ekee, yaapaagee seta kemaata okoo me Mumoo to mee patagaanta bagee yuwa. Mumoo to mee ko Kristus mee ebea-ebea da. Maa to kaa mani-pani kuwa ko Wa me bagee yuwa ebea-ebea.

²⁰Ikii ko Kristus ma aagadi-maagadi naadi epo enaataa boota kemaata kuwa magaa da kaa pesee yago agiyoo yiba kaama kipekageeta bagee yuwa. Kisee kemaata ikii kaasee kaa Kristus ma epo enaataa bogaano taa kaa mokoo kuwa magaa da kaa menaa yuwa wegawoo, deewookea ya?2:20-22 Gal 4:8-11, 1Tim 4:3-5²¹Kuwa menaa kuwa ko kisee: Kuwa agiyoo kuwa se peneasii, se noodee taai, si yaadee taai, kisee deewoo siyaa menaa-panaa kuwa. ²²Kuwa agiyoo kuwa keedaa agiyoo too, kisee noomaata kaama imi taa kedaa siyaa agiyoo yuwa, kisee agiyoo kuwa ikii deewookea. Kuwa menaa kuwa mée me aii wegawoo, deewoo see menaa yuwa doodoo. ²³Kuwa deewoo see menaa kuwa ipi see menaa keenda kiya taa. Kisee menaa deewoo see bagee kuwa okoo me ebo ekee, yaapaagee siyaa kuwa ko okoo me otoopa gaata-gaata dimii kaa too. Okoo ekaato dimi daba, peedi ekeasiyaa poga-poga naadi kaama okoo ekaato maa to pedeo-pedeo siyaabuu segeekea kiya iyo. Okoo kisee agiyoo ukuwayaa miya okoo me magaa da kaa pedeo ou dimi-pami kuwa se taa kiyaayaa.

Kristus ma aagadi-maagadi naadi daamaa umiwoo, toowoosi naadi menaa

¹Kisee kemaata ikii Kristus ma aagadi-maagadi naadi enaataa boota kaama aya kiandoo peeyaata bagee yuwa mokoo totaakea yoka ikii asiyaato kaa agiyoo kuwa abaai. Kristus mee Ogatamee ebo tuyaa yoo dagi yagaa yaato kiyoo animaata tupi yoka kuwa asiyaato agiyoo kuwa ou dimii gaawoo taai. ²Asiyaato agiyoo kuwa kaa dimi mena gaagaa siwoo taai, yamuyaato magaa da kaa agiyoo kuwa kaa se. ³Mee ko ikii me idukaa iyee mee boota. Eto ko ikii me umiyaa, tuyaa kuwa ikii Kristus ma enaataa Ogatamee yiba koogo boonemaata kaama daamaa omegee, toogeekea.3:1-4 Rom 6:11-13, Plp 3:18-21, 1Yoh 2:15-17⁴Kristus mee ko ikii me umiino, toono gipii kikiyaabuu segee see Mée. Waa awee da kaa kaatagi naagoo ikii miya kisee Waa ma enaataa daamaa awee da kaa kaatagea. Bedaa Waa ebo, Waa asii-sege see diitagea see see ikii miya kisee kaatagea.

⁵Kisee kemaata kuwa ikii yiba magaa da kaa dimi-pami kuwa uduma booyaai. Kuwa ko tobaaka, otoopa api doonaa, paayogaa doonaa, pedeo ou, kiitoo ou, kaatoo ou dimi-pami kuwa uduma booyaai. Bedaa kepe ou, agiyoo ou dimii mee miya kisee booyaai. Kepe ou, agiyoo ou see dimii mee ko makapaa ogatamee kaa dimi maayaa mokoo.3:5 Rom 8:12-13, Gal 5:24⁶Kuwa ou dimi-pami kuwa kaa Ogatamee Wa me kagoo dimii mee Waa si yayeetaa see bagee yuwa paagoo yamiyaatagi. ⁷Ikii miya idukaa kuwa dimii yuwa ou gaawoo, umiwoo seta. ⁸Kiya eto ko ikii pedeo tomaa-tomaa uduma tameepeasii, kuwa ko kisee: aakago-maakago, kagoo yuwii, mée bee-bee, mée badeekee, bedaa ebeawee kaama pedeo yawegaa-wegaa see menaa kuwa miya tameepeasii. ⁹Makapaa menaa miya se aasee taai. Mee ko ikii me idukaa kisee pedeo iyee kaa ukuwawoo seta yuwa kuwa uduma beamaata kaama3:9-10 Ep 4:22-24¹⁰gipii see iyee mee maataata totaakea. Ikii kisee gipii see bagee kikiyaata Mée Ogatamee Wa me ikii miya Waa see see kikiyaabuu siwoo segeeki. Ikii ipi see dimii mee maamaa eebaa kedaa siwoosea naadi ikii dimi mena gipii kisiyaabuu siwoo segeeki. ¹¹Mee kaama ko mée wigineekee se. Mee ko Yahudi bagee okoo too, apanaa tomaa kaa bagee okoo too, see wigintagaakee se. Kado ponee daapii seta bagee okoo too, se daapii see bagee okoo too see mee miya taa. Mee tomaa kaa bagee okoo too, mee tomaa kaa bagee okoo too see miya taa. Hamba kiyaata bagee yuwa okoo too, hamba kiyaano taa see bagee okoo too see miya taa. Kuwa uduma taa. Ikii uduma manii to ko Kristus mee kaa too, Waa ikii uduma yiba toogee see Mée.3:11 Kis 10:34, Gal 3:28

¹²Kisee kemaata ikii ko Ogatamee Wa me bagee kikiyaata kaama daamaa wa too kiwigintaata bagee, Wa me epa kigaayaa bagee yoka eto ko ikii epa nao see dimii ma, dapuu see dimii ma, peedi see dimii ma, adumeta dimii ma, dimi mena animaata kagoo taa see dimii ma kuwa dimii uduma daamaa maataata kaama doowoo, umiwoo taai. ¹³Mena agoo kiyu ko dimi mena animaata epa aaekee taai. Tuhan me miya ikii me pedeo yuwa epa kiekeata see see ikii miya kisee epa aaekee taai. ¹⁴Ikii kuwa dimii uduma maataata kaama bedaa kuwa dimii wodoo taa mée epa dimii mee daamaa maatagaai. Mée epa dimii mee ko ikii daamaa enaataa podamaata kaama ena dimii, ena menaa see maamaa kikiyaayaa dimii mee.3:14 1Kor 13:1-13, Ep 5:2¹⁵Ogatamee me ikii Kristus yiba má ena too too mokoo aaemee-emee siwoosea naadi Ni paagoo nameei see kiseta yoka Kristus me ikii aaemee-emee kisiyaayaa dimii mee ikii yiba tuyaabuu siwoo taai. Bedaa Ogatamee kiiboo, paamee dimii mee miya doonaa siwoo taai. ¹⁶Kristus me menaa kuwa ikii yiba daamaa maamaa eebaa seemiyaata kaama dimi ipi kaa aatopegee taai, gaamaasi naadi menaa miya aasee segee taai. Wa me menaa kisee ikii yiba daamaa toogee naadi kaama mazmur menaa ma, yaapaagee see menaa ma, kisee Roh me inii yaayaasi naadi mée manta menaa tomaa-tomaa kuwa kiiboo, paamee dimii kaa Ogatamee paagoo yaayaa siwoo taai. ¹⁷Bedaa ikii me ukuwayaa, peeyaa yuwa yiba miya, ikii me wegayaa menaa yiba miya kuwa uduma Tuhan Yesus nao naadi Wa ekaa yiba yaukuwawoo, yawegawoo segee taai. Ikii kisee yaukuwawoo segeeka too Yesus doodoo Iniitaagi Ogatamee paagoo kiiboo, paamee see asegee taai.3:17 1Kor 10:31

Mée okoo tukuguu to paagoo tupiyaa menaa

¹⁸Ikii api yuwa gaayu ko ikii me pai to paagoo ekaato dimi peedi ekee taai. Tuhan nao see gaayaa apii kuwa kisee ukuwayaa yoka ikii miya kisee ukuwaai.

¹⁹Ikii pai yuwa gaayu ko ikii me apii epa kaai, pesee menaa se asii.3:18-19 Ep 5:22-28, 1Pet 3:1-7

²⁰Ikii yoga yuwa gaayu ko ikii okonaka me menaa uduma daamaa yayii. Kuwa Ogatamee me dimi kiwikimiyaayaa agiyoo yoka kisee ukuwawoo taai.

²¹Ikii nagaanii yuwa gaayu ko ikii me yogaa yuwa pesee menaa kaa maamaa aseekee se. Okoo be kaa gaagaa dimii ebo kiyaa yoka se ukuwaai.

²²Ikii hamba kikiyaata bagee yuwa gaayu ko ikii magaa da kaa epoo mée wa me kisiyaa menaa uduma daamaa yayeewoo taai, wa me emaa kiwugiyaa kaboo too yaukuwaakee se.3:20-25 Ep 6:1-7 ’Wa me nadeetaaki yoka waa ede kisi naadi yaukuwaapa’ see dimii mee se kiya daamaa topoo see dimii kaa yaukuwaai, Tuhan Wa too weda, Wa too ebo ekee see dimii kaa okoo me agiyoo yaokagee taai. ²³Ikii okoo me agiyoo yaokagee siyaa kuwa Tuhan Wa me agiyoo yaokagee siyaa mokoo yoka, see dimii kaa omaago ma, ede ma yaokagee taai, mée me agiyoo yaokagee siyaa see see mokoo too se. ²⁴Mikee, kuwa agiyoo daamaa yaokagee setaa to mokoo da mee ikii masiitagea. Ikii epoo Mée mee ko Tuhan Kristus yoka Wa me bagee yuwa maniitagi agiyoo kuwa ikii miya kiniitagi, see kuwa ikii ipi yoka mée me agiyoo yuwa daamaa yaokagee taai. ²⁵Pedeo ukuwagee see bagee gaayu ko okoo kaa pedeo agiyoo dogeeniitagea. Ebo, peedi okoo uduma, Ogatamee me kisee yaukuwaatagi yoka daamaa nekeenii.

¹Bedaa kuwa hamba kiyaata bagee yuwa okoo epoo bagee ikii gaayu ko ikii me Eboo agoo, Waa epoo to wodoo tupi see kuwa ikii miya ipi yoka ikii me agiyoo kiokagee see bagee yuwa kuwa daamaa dimii kaa too yaekee taai, se deebaa taai, topoo see dimii kaa too yaukuwaai.4:1 Ep 6:9

Apanaa ase-manee seta menaa

²Eto ko ikii uduma sembahyang mee se ekeasii, kisee too maamaa ipiipi nekeenta kaama kiiboo, paamee see dimii ma enaataa sembahyang segee taai. ³Bedaa inii kaa miya sembahyang mée yataai. Inii Kristus kaa menaa kuwa daamaa eewegageesi naadi Ogatamee paagoo kene yakabatagaai see kuwa mée yaasegee taai. Kuwa Kristus kaa menaa kuwa idukaa mée paagoo awee da kaa kiyaano taa menaa. Anii kuwa menaa eeweganaa see mée kemaata digiyoo ee yiba totaaka. ⁴Anii kuwa menaa ipiipi eewegaano gaano pedeo yoka anii mée paagoo daamaa awee da kaa ipi kiyaabuusi naadi sembahyang nataai.

⁵Ikii kuwa Yesus yaato taa see bagee yuwa ma epo enaataa aatoomuu siyaa kaboo kaagaa gakata ikii me ukuwayaa, peeyaa yuwa uduma yiba dimi ipi kaa daamaa umiwoo, toowoo taai.4:5 Ep 5:15-17⁶Ikii me eewegayaa menaa kuwa ko okoo daamaa ede ma yeesi naadi menaa kaa too, kisee dega gii kiyaa mokoo kisi yoka eewegaai. Ikii kisee daamaa eewegagee, eetoogee naadi kaama ikii kiapaadee siyaa bagee okoo mée ena-ena paagoo ikii me ’Kisee eewegaano daamaa, kisee eewegaano daamaa’ see menaa kuwa ikii daamaa ipi kaapea.

Wodopasi menaa

⁷Ni paagoo kaama menaa kuwa uduma Tikikus me doodoota ikii paagoo kiiwegaapi. Waa ko Yesus yiba ena kenaa bagee, inii me epa see mée, Tuhan me agiyoo se ekeata daamaa yaokagee see mée, Wa me agiyoo inii ma epo enaataa daamaa ukuwagee see mée mee. ⁸Anii waa ikii paagoo pooi see asiinaka, mee ko inii paagoo kaama menaa kuwa ikii ipi kesea naadi miya, bedaa ikii dimi mena daamaa pesee kikiyaayaa menaa kuwa kiiwegasi naadi miya pooi see asiinaka. ⁹Ikii me bagee ena, Onesimus mee miya ikii paagoo pooi see asiinaka. Waa ko inii me esee epa see mée, Yesus mikee nao naadi daamaa agiyoo too yaokagee see mée. Nakaayoo kaama menaa uduma ekea me kisi-manee taapea.

¹⁰Anii ma epo enaataa digiyoo ee yiba totaake mée Aristarkus me epao kisigi. Markus me miya epao see kisigi. Waa Barnabas ma ekea kenaaya. Markus mee ikii paagoo daamaa badaa magaai see kisema menaa kuwa ikii ipi yoka waa ikii paagoo mipi ko daamaa badaa magaai. ¹¹Bedaa Yesus mee, wiyaagoo to ekaa da ko Yustus see ekaa miya weetaa see mée wa me miya epao see kisigi. Kristus mikee gaayaa bagee anii ma enaataa tope yuwa kuwa Yahudi bagee gaayu ko kuwa okoo wedoo to kuwa too. Okoo ko Ogatamee ebo mée eetoowoo taatagi nao naadi anii ma enaataa omaago ma mena epo wegataa, agiyoo epo ukuwataa see bagee wedoo to, anii dimi mena daamaa pesee nakiyaabuu segee see bagee yuwa.

¹²Ikii me bagee ena, Epapras mee, Kristus Yesus me agiyoo daamaa yaokagee see mée to me epao kisigi. Waa ikii kaa sembahyang omaago see mée. Wa me ikii daamaa iyawoo, ebo kiwoo naadi kaama omaago ma makii taa see kaa daamaa toowoosea naadi kiasegeeki. Bedaa Ogatamee Wa me kisee daamaa, kisee ede see gaayaa agiyoo kuwa miya ikii esee ipi kiwoosea naadi wa me sembahyang maamaa kisegeeki. ¹³Mikee, wa me ukuwayaa, peeyaa yuwa kuwa ikii kaa kana ma kiukuwageeki, bedaa Laodikia magaa kaa bagee ma, Hierapolis magaa kaa bagee ma okoo kaa miya kisee daamaa agiyoo kana ma yaukuwageeki, see kuwa anii deegeeka kemaata kisega. ¹⁴Inii me epa see mée dokter Lukas mee ma, Demas mee ma ekea me epao kisegea.

¹⁵Laodikia magaa kaa Yesus mikee gaayaa bagee kuwa epao kisigi see naasii. Bedaa Nimpa ma, wa me ee kaa Yesus mikee nao naadi kutuu taa see bagee okoo miya epao kisigi see naasii. ¹⁶Mee kapogee mee ikii paagoo kiiwegamaata kaama Laodikia magaa kaa bagee paagoo miya eewegasi naadi okoo manii. Bedaa ni me Laodikia magaa kaa Yesus mikee gaayaa bagee yuwa paagoo yaebeamaata kapogee mee miya ikii daamaa wegaai. ¹⁷Arkipus mee kisee naasii: "Tuhan me naukuwasi naadi a kaa kaekeata agiyoo kuwa se ekeata uduma daamaa yaukuwatagaai see kasigi" see kuwa naasii.

¹⁸Eto ko anii Paulus me epao kisega. Kuwa ni me epao see mena ponee to kuwa ni me yagaa da me too kiebeataaka. Anii digiyoo ee yiba toogeeka kuwa se nagaabuu taai. Ogatamee Wa me aii kiepa dimii mee ikii ma epo enaataa kiitoogeesi naadi kiasega. Kiyoo too.