2 Timotius

2 Timotius

Paulus me Timotius paagoo wiyaagoo yaebeamaata kapogee

Paulus waa Timotius paagoo petamanii kapogee yaebeamaata kaama tahun wiya, wedo waa naa omemaata Yesus me doometa menaa be see bagee yuwa me waa Roma magaa kaa digiyoo ee yiba tameamaata. Waa bogaano monaa ekaapa see kuwa waa ipi kemaata Timotius mee se wedaata Yesus me doometa menaa daamaa omaago ma doowoo, wegawoosi naadi mee kapogee yaebeamaata. Wa me tahun 67 mee yiba mokoo ebeamaata.

Mee kapogee yiba mena kutuu yuwa kuwa ko kisee:

1:1-2 Petamanii menaa

1:3–2:13 Yesus me doometa menaa makii taa see kaa mée tupiwoo taai naadi menaa

2:14–4:8 Mikee menaa too peneata mée me koopoo see wegawoo see menaa kuwa gaai naadi menaa

4:9-22 Wodopasi menaa

¹Nii ko Paulus, Ogatamee me gaata-gaata dimii kaa Kristus Yesus me menaa nadoonaasi naadi pooi see naseta mée, Kristus Yesus ma dimi aagadi-maagadi see bagee yuwa taa ma taa daamaa umiwoo, toowoo taatagea see aseta menaa kuwa yaweganaa see mée mee. ²Mee kapogee mee ni me dedee see yogaa mokoo Timotius a paagoo kaebeaga. Nagamee Ogatamee ma, inii epoo Mée Tuhan Kristus Yesus mee ma Ekea me aii kaepa dimii ma, mée epa dimii ma, koogo adumeta dimii ma kuwa aa ma epo enaataa kaatoowoosi naadi kaasega.

Yesus me doometa menaa weda taa ma mée tupiwoosi naadi menaa

³Anii egapi yaato miya, daatooyiba yaato miya se daata kisee too aa kaneke-nekee naadi kaama Ogatamee paagoo kiiboo, paamee see dimii ma sembahyang kasegeeka. Idukaa ni beemu nokaa yuwa dimi topoo, pedeo taa see kaa Ogatamee yaapaagee, Wa me agiyoo daamaa yaukuwagee siwoo seta see see anii miya kisee yaukuwagee siwooka. ⁴Anii peema naagoo a me nayegee seme kuwa anii kaneke-nekeeka yoka anii kadeeta kaama ede ma, ede ma taano see naadi anii kadeega naaki ou dimii mee ebo. ⁵A me Yesus kaa too esee dimi maatagaa siwoo seme kuwa anii kaneke-nekee taaka. Petamanii agaaba Lois wa me Yesus mikee gaata dimii mee ebo, bedaa abaayo Eunike mee miya kisee. Eto ko mee dimii mee a yiba mikee tope ii see kuwa kanekeenega. ⁶Kisee kemaata Ogatamee me agiyoo yuwa a me daamaa omaago ma yaukuwawoose naadi anii a kaa yagaa kamaama. Kuwa Ogatamee me pesee kakiyaata agiyoo kuwa modeeniyaa yoka kuwa moometaase naadi anii bedaa kasega. ⁷Ogatamee me Roh mee inii mée manta mee ko inii weda see dimii mée miyaakee se kiya Roh me pesee agiyoo ma, epa dimii ma, inii ekaato daamaa muniwoo, deewoo taano ipi see dimii ma kuwa mée yaagoo kiyaano see naadi Roh mée manta.

⁸Kisee kemaata inii epoo Mée Tuhan kaa menaa kuwa aa yawegaano ego weda see dimii mee se gaai, bedaa anii miya, anii Yesus me doometa menaa yaweganaa see kaa digiyoo ee yiba natameamaamea kuwa miya aa ego weda see dimii mee se gaai. Ogatamee me aa kapesee kiyaapi yoka mée me anii kisee dimi nagii-nagii ebo gaagaa nasiyaabuu segee see agiyoo kuwa see see aa miya daamaa masii, daamaa dogaai.1:8 Kis 5:41, 2Tim 2:3⁹Wa me inii daba mée daagimaa peeyaata, inii dimi pedeo taa see kaa umiwoosi naadi Ni paagoo nameei see mée aseta. Inii Wa me bagee mée kiyaata mee ko inii me daamaa ukuwata agiyoo kuwa kaa se kiya Ogatamee me gaata-gaata kuwa kaa too. Idukaa esee petamanii epoo to, magaa to ogaatagaano taa kaa Wa me epaa mee Kristus Yesus doodoo inii aii mée manta.1:9 Ep 1:3-5, Tit 3:4-5¹⁰Eto inii daba mée daagimaa peeyaano Mée Kristus Yesus meta kaama wodoo inii Wa me mée epa dimii mee mikee ebo ii see nekeenegea. Yesus me doometa menaa kuwa me inii umina se bogaatagea. Wa me kuwa mée umina bogaano too menaa kuwa mée yataa kiyaata inii kisee too iminoo miya, iminoo miya toowoo siyaa menaa kuwa awee da kaa mée deeyaata. ¹¹Kuwa menaa kuwa anii yaweganaa, mée topenaa, kisee yaukuwanaasi naadi nawigintaata. ¹²Anii kisee yaukuwanaa naadi kaama nakaayoo digiyoo ee yiba pedeo totaaka. Anii kisee ae-wae, gaagaa taaka kiya anii ego weda see dimii mee taa. Anii mikee gaayaa Mée mee anii Waa ipi, bedaa Wa me kuwa eeweganaasi naadi ni kaa nadootaata menaa yuwa se pedeo kaapa see kuwa miya anii mikee ipi. Kuwa ni me yaweganaa see menaa kuwa makapaa menaa ma se aatabisi naadi Ogatamee me kuwa menaa daamaa taamegee siwoo taapi, kisee too Yesus meetagi naagoo too, see kuwa anii mikee ipi yoka anii ego weda see dimii mee taa.

¹³Ni me katupiwoo seta menaa kuwa daamaa peneata doowoo taai. Aa Kristus Yesus ma dimi aagadi-maagadi naadi kaama a me Waa mikee gaano dimii ma, epa dimii ma kuwa gaawoo see kaa kuwa katupiwoo seta menaa yuwa daamaa doowoo, umiwoo taai. ¹⁴Ogatamee me naweganaasi naadi a kaa kadootaata menaa kuwa makapaa menaa ma aatabi siyaa yoka daamaa nekeenii. Inii yiba totaa see Mée Roh Kudus Wa pesee da me kuwa menaa yuwa ipiipi taametagaa siwoo taai.

¹⁵Asia wee kaa bagee Pigelus mee ma, Hermogenes mee ma, apanaa bagee miya anii naekeata umina peemea see kuwa aa miya ipi. ¹⁶Onesiporus waa anii digiyoo ee yiba totaaka too nadeegee simi kuwa waa ego weda see dimii mee gaano taa. Waa kaagaa eebaa ni paagoo naatoogee simi, bedaa anii dimi mena daamaa pesee nakiyaabuu segee simi yoka Tuhan me waa tukuguu miya epa gaasi naadi yaasegeeka. ¹⁷Waa Roma magaa kaa peemaata kaama anii naabanaa segee naadi nadeemaami. ¹⁸Anii idukaa Epesus magaa kaa toogee seta kaboo miya wa me nadeegee simi kuwa aa miya ipi. Yesus meetagi naagoo Tuhan me epa dimii mee maamaa wa kaa daamaa deemaasi naadi yaasega.

Dimi nagii-nagii agiyoo agoo kiyaa miya makii taa see kaa toowoosi naadi menaa

¹Kisee kemaata ni me yogaa aa Kristus Yesus ma dimi aagadi-maagadi naadi Wa me mée aii manegee see pesee kaa umiwoo, toowoo taai. ²Ni me mée eebaa yoo eeweganaa seta menaa kuwa aa miya nayeegee seme. Kuwa menaa kuwa bedaa a me dimi topoo see bagee yuwa paagoo, kuwa menaa daamaa doowoo taapea bagee paagoo daamaa eewegataa, daamaa topetaa. Kiyoo kaama bedaa okoo me miya apanaa bagee paagoo daamaa topetaa, kisee ukuwawoosi naadi mée tupiwoo taai.

³Anii dimi nagii-nagii nasiyaabuu segeekea kuwa miya anii Kristus Yesus obeano too, see kuwa mokoo aa miya kisee dimii doowoo, obeewoo taai.2:3 2Tim 1:8–4:5 Ebea-ebea menaa kuwa ko kisee: Okaa yago bagee gaayu ko okoo dimi nagii-nagii agiyoo kuwa eebaa kiyaa miya okoo me eboo obeano too dimii mee agoo. ⁴Okoo me eboo ede kisi naadi agiyoo kuwa too yaukuwagee siyaa, okoo ekaato kaa umiyaa, tuyaa agiyoo kuwa se ukuwayaa.2:4 Luk 8:14⁵Bedaa ’Aa moga ye, nii moga ye’ naadi yiibaga peetaa see bagee kuwa miya kisee. Okoo paagoo kisee pookee, kisee pookee see asiyaa-asiyaa kuwa ipiipi yeetaa, obeetaa siyaa. Kisee ukuwayu too mumo kaa onee da masiyaa. Kuwa menaa yuwa amedoota peeyu ko se masiyaa. ⁶Bedaa bugi yaataa see mée waa miya kisee. Waa bugi omaago ma yaagee siyu ko bugi kaa agiyoo kapoo keta kaama bugi yaata mée me ukuwataa to mokoo da mee wa keta masiyaa. ⁷Kuwa kasega menaa kuwa daamaa dimi gaagaa taai. Tuhan me kuwa uduma aa nekeeniino dimii mee kaniipi.

⁸Yesus Kristus mee, Daud me asii-kaba-kaba seta Mée mee Waa boota kaama aya andoo peeta see menaa kuwa ko ni me yaweganaa see menaa yuwa. Kuwa menaa aa daamaa neke-nekee siwoo taai. ⁹Anii kuwa menaa yaweganaa see kaa mée me anii pedeo see mée yoka naadi one nagadimemaata digiyoo ee yiba natameamaamea. Anii ae-wae, sooi-wooi taaka kiya Ogatamee me menaa mee one se gadimemaayaa. ¹⁰Kisee kemaata Ogatamee me daamaa wigintaata bagee yuwa okoo miya Kristus Yesus mikee nao naadi daba daagimaa peesi naadi, bedaa okoo Wa me asii-sege see agiyoo iminoo miya, iminoo miya masiwoo, umiwoosi naadi miya anii kuwa dimi nagii-nagii nasiyaabuu siyaa agiyoo kuwa uduma makii taa see kaa koogo dimi animaata doowoo, umiwoo taaka.2:10 Kol 1:24¹¹Mikee naadi daamaa wegawoo siyaa menaa ena mee ko kisee:

"Inii Waa ma enaataa booyu ko

inii Waa ma enaataa eetoowoo taatagea.2:11 "Inii Waa ma enaataa booyu ko inii Waa ma enaataa eetoowoo taatagea" see menaa mee nekeeniino yaato ko inii me pedeo dimii, pedeo iyee kuwa booyaabuu siwoo siyu ko inii miya Waa boota-boota see see booyaa mokoo. Kuwa dimii, kuwa iyee booyaabuu segee naadi kaama inii daamaa dimii, daamaa iyee agoo kedaa siyaa, inii miya Yesus aya andoo peeta see see aya andoo peeyaa mokoo, see kuwa ebea-ebea menaa yuwa.2:11 Kol 3:3-4, Rom 6:8, Gal 2:19-20

¹²Inii makii taa see kaa toowoo siyu ko

inii Waa ma epo enaataa ebo toowoo taatagea.2:12 Why 3:21

Inii me Waa umina wisintayu ko

Wa me miya inii umina mée wisintagaatagi.

¹³Kiya inii Wa me menaa daamaa si yayeeyu ko

Wa me mée se ekeasiipi,

Wa me ’Ikii se kiekeasiipa’ see mée aseta menaa kuwa ekeasiino ko iyo yoka"

see menaa kuwa wegawoo siyaa.

Mikee menaa too peneata apanaa menaa kuwa ekeasi naadi menaa

¹⁴Kuwa menaa uduma mée yuwa daamaa ase-manee taai. Okoo me aawisi-maawisi menaa kuwa imi taa menaa too, yiino bagee yuwa miya pedeo kiyaayaa yoka omaago ma ase-manee taai. Ogatamee emaa dagii da kaa a me okoo omaago ma aseekee kaa "Ikii me mena kamu peedi ena kaa too miya aawisi-maawisi segeekea kuwa ekeasii" see asii. ¹⁵Mikee menaa maamaa ipiipi mée tupiwoo taai. Kisee okoo mena daamaa yawegagee, agiyoo daamaa yaokagee see bagee kuwa Ogatamee paagoo ego weda se gaatagea. "Aa ko Ni me agiyoo daamaa naokagee see mée ii" see kasiitagi. ¹⁶Ogatamee ewo see bagee me otoopa menaa, imi taa menaa kuwa yaekeasii. Kuwa menaa wegataa see bagee okoo Ogatamee ma dimii menaa kaa too omegee taano be, okoo dimi pedeo kiwoo naadi kaama ¹⁷pigupode abuu baboo noopegee siyaa mokoo okoo me menaa yuwa miya kisee peeda-paada siyaa yoka nekeenii. Himeneus ma, Piletus ma ekea miya ¹⁸mikee menaa ekeata kaama apanaa otoopa menaa weganaa see bagee wiya. Kuwa bagee me wegaano, "Boota bagee aya andoo poono kuwa ukuwaandaa seta, okoo aya andoo peedaa seta" see menaa weganaakea. Kuwa menaa kuwa me Yesus mikee gaayaa bagee mée noonaa dimi gaagaakea, kaasee ukuwaandaa seta menaa naadi dimi nagimegeekea. ¹⁹Kiya inii mikee Ogatamee me bagee yoka kisee makapaa menaa kuwa inii dimi nagii-nagii see taa. Mee ko ee kaboo da daamaa maataata kaama ee se makii siyaa mokoo Ogatamee me bagee yuwa miya kisee. Mee kaboo da kaa inii se maki-makaasi naadi mena ena ebeamaata mokoo, mee ko kisee: "Tuhan nekee bagee kuwa Waa ipi".2:19 Bil 16:5 Bedaa mena ena miya kisee: "Okoo Tuhan nao naadi Wa ekaa weeyaa bagee uduma pedeo menaa, pedeo agiyoo wisintagaano gaano pedeo" see menaa kuwa miya ebeamaata yoka inii kuwa makapaa menaa dimi nagii-nagii see taa.

²⁰Ebea-ebea menaa ena mee ko kisee: Ebo ee yiba mookii otaawee, piring, kisee agiyoo tomaa-tomaa agoo. Noonaa emas kaa agiyoo, noonaa perak kaa agiyoo. Apanaa otaawee, apanaa kisee agiyoo miya agoo. Noonaa piya kaa agiyoo, noonaa aii daki magaa kaa agiyoo kuwa miya agoo. Kuwa daamaa agiyoo yuwa kuwa ebo naagoo taano agiyoo yoka ee epoo mée me kuwa agiyoo daamaa wa too wigintagaakee, apanaa aii agiyoo kuwa aii naagoo taano too. ²¹Inii mée miya kisee. Okoo ekaato dimi yiba pedeo yuwa taa kiyaabuu segee siyaa bagee kuwa gaayu ko ee epoo mée me daamaa otaawee da mokoo yoka daamaa wa too wigintaayaa. Mee mée mee waa ekaato ipiipii naadi kaama ee epoo mée me agiyoo uduma daamaa yaukuwagee siyaa.2:21 2Kor 7:1

²²Kisee kemaata aa eto ko egaanaa yuwa me ou gaayaa dimi-pami kuwa wisintaata beesekaa ekeasii. A me ou dimii kuwa ko kisee: topoo see dimii ma, se daata Yesus mikee gaawoo see dimii ma, epa dimii ma, koogo adumeta see dimii ma kuwa uduma se masega ou naadi abawoo, umiwoo taai. Kuwa dimii yuwa kuwa ikii Tuhan nao naadi pedeo taa see dimii kaa yaapaagee see bagee yuwa epo enaataa obeewoo taai. ²³Imi taa menaa, otoopa dimii kaa wegaa-wegaa menaa kuwa yawisintagaai. Kuwa menaa kuwa kaa aawisi-maawisi see menaa too agoo kiyaayaa see kuwa aa miya ipi yoka kuwa menaa emaa se wugii. ²⁴Tuhan me agiyoo daamaa yaokagee see bagee gaayu ko apanaa bagee ma aawisi-maawisi se siyaa kiya mée uduma paagoo adumeta dimii, adumeta menaa kaa too aasee siyaa. Waa mée tupiino ipi, kagoo dimii taa, ²⁵waa ma aawisii siyaa bagee paagoo "Kisee daamaa, kisee pedeo" see koogo dimi adumeta kaa asiyaa, waa kisee dimii kaa mée topetaa see mée. Kuwa waa ma aawisii siyaa bagee yuwa gaayu ko okoo ’Ni me pedeo dimii, pedeo agiyoo kuwa ekeasiinaka’ dimii mee Ogatamee me daamaa yamiyaapi kepa, mikee menaa ipi see dimii okoo maniipi kepa naadi waa dimi animaata okoo daamaa topegee see.2:24-25 Tit 3:2²⁶Okoo Iblis me kupi kaa gadiinta booyaa mokoo, wa me pedeo gaata-gaata yuwa naukuwasi naadi goeki-goeki segeeki. Okoo me ’Iblis me kisee nakoo taaki ii’ see dimii mee nekeenta kaama daba oosi naadi aa dimi animaata okoo daamaa tupii.

Wodopasi yaato mée tomaa pedeo dimii, pedeo menaa maamaa agoo kedaa taata see nekeensi naadi menaa

¹Wodopasi yaato Yesus wiyaagoo meeno see kaboo yaai-yaai agiyoo agoo kedaa taata yoka daamaa nekeenii.3:1 1Tim 4:1, 2Pet 3:3²Kuwa kaboo da mée tomaa dimi pedeo see bagee agoo kedaa taatagea. Okoo ekaato too epa gaawoo, kepe ou dimii gaawoo, ebo dimii gaawoo, anii ebo yoka naadi apanaa bagee maagiyoo eke, okonaka me menaa si yayeetaa, paamee see dimii mee taa, Ogatamee ebo ekee see miya taa, ³epa dimii ewo, mée emee-emee taano be, mée badiino too, okoo ekaato daamaa muniwoo, deewoo taano ewo, kagoo ebo, daamaa menaa, daamaa agiyoo kuwa be, ⁴mée me wugisi naadi yaekegatagaa, dimi se gaata otoopa ukuwanaa, peenaa, ’Ani too ipi’ see gaataa, Ogatamee ou dimii mee wisintaata okoo me ede gaata-gaata yuwa kuwa too ou gaataa, kisee umiwoo, toowoo see bagee yuwa agoo kedaa taatagea. ⁵Okoo tapaato yaato deeyaa naaki Ogatamee ma dimii menaa kaa umiwoo, toowoo taa see bagee keenda kiya semoo yiba yaato taa, Ogatamee me pesee agiyoo kuwa okoo me wisintaagea.3:5 Mat 7:15, 23:27-28 Okoo kisee bagee yoka aa se eetooi, okoo too wigintagaai. ⁶Okoo noonaa dimi ipi see bagee keenda yoka naadi mée me ee yiba okoo badaa maayaa. Badaa maata kaama mee ee kaa makapaa menaa wigineano ewo see apii agoo yoka kuwa bagee yuwa me okoo moga deebaa see. Kuwa apii yuwa me ’Anii idukaa kisee pedeo agiyoo ukuwata, kisee pedeo agiyoo ukuwata’ see dimii gaagaa segee see apii yuwa, ou dimi-pami gaawoo see apii yuwa. ⁷Okoo mena tupiwoo see kiya mikee menaa ii see wigineano ewo see apii yuwa. Kisee apii kuwa okoo me deebaa senaa see. ⁸Idukaa Yanes ma, Yambres ma ekea me Musa ma aawisii seta see see eto kuwa bagee yuwa miya mikee menaa ma aawisii segee see too.3:8 Kel 7:11 Okoo dimi koopoo kemaata Ogatamee me okoo umina wisintaagi. ⁹Okoo kisee ukuwanaa see bagee kiya okoo me mée topetaa see menaa kuwa taa kaapa. Idukaa Yanes ma, Yambres ma ekea dimi taa see bagee yuwa too ii see nekeenta see see mokoo eto miya kuwa mée deebaa senaa see bagee yuwa kuwa mée uduma me okoo kisee bagee yuwa too ii see kuwa nekeeniipea.

Timotius wa paagoo topeta menaa kuwa daamaa doowoosi naadi menaa

¹⁰Okoo kisee bagee kiya aa ko ni me ukuwata peeta yuwa aa miya naobeetaa see mée. Ni me daamaa mée topenaa see menaa ma, ni me daamaa umiyaa, tuyaa yuwa ma, ni me gaayaa, peeyaa yuwa ma, ni me Yesus mikee gaawoo see dimii ma, ni me koogo adumeta dimii ma, ni me epa gaataa see dimii ma, bedaa mée me nagaadee siyaa kaboo se maki-makaa taapa see dimii ma kuwa uduma aa ipi, a me naobeewoo segeeke. ¹¹Idukaa anii Antiokia magaa kaa ma, Ikonium magaa kaa ma, Listra magaa kaa ma kiyoo omegee, toogeeka too ko mée me nawegee-wegee segee naadi kaama anii dimi nagimegee seta yuwa kuwa miya aa ipi.3:11 Kis 13:50–14:19, 2Tim 4:17-18 Okoo me kisee naukuwagee semea kiya Tuhan me daba napeeyaami. ¹²Mikee, Kristus Yesus ma dimi aagadi-maagadi naadi Ogatamee ma dimii menaa kaa umiwoo taano ou see bagee kuwa uduma mée me wegee-wegee taapea,3:12 Yoh 15:20, Kis 14:22, 1Tes 3:3¹³bedaa dimi pedeo see bagee yuwa ma, mée deebaa see bagee yuwa ma okoo esee dimi pedeo kedaa siwoo taapea. Okoo me apanaa bagee miya deebaa taapea, bedaa okoo miya mée me deebaa taapea, kisee aaukuwawoo segee taapea. ¹⁴Kiya aa gaayu ko kuwa daamaa katupiwoo seta menaa kuwa a me kuwa mikee menaa ii naadi kaama dimi yiba aweta yoka kisee too daamaa peneata doowoo taai. Aa kuwa menaa daamaa katupiwoo seta bagee kuwa aa ipi. ¹⁵Aa peedi kaa kaama Ogatamee me ebeamaata menaa kuwa ipi kiwoo seme. Kuwa menaa kuwa ko aa dimi katupiwoo naadi kaama Kristus Yesus mikee nao see gaakee kaa daba kadaagimaa peeyaano menaa yuwa kuwa. ¹⁶Kuwa ebeamaata menaa kuwa uduma manii to ko Ogatamee kaa too, Wa me too agoo kiyaata. Kuwa menaa kuwa me inii daamaa mée tupi-manee taano ma, kisee pedeo, kisee ekeasii see ase-manee taano ma, koopoo kiyaa yuwa topoo kiyaano ma, bedaa mikee topoo see dimii kaa umiwoo, toowoosi naadi tupi-manee taano ma, kisee daamaa ukuwawoosi naadi mée manta menaa kuwa.3:16 2Pet 1:20-21¹⁷Ogatamee me bagee yuwa sikii, ipi, daamaa agiyoo uduma ukuwamaayaa see bagee kisi naadi kuwa ebeamaata menaa yuwa mée manta.

Ogatamee me naukuwasi naadi Timotius kaa yadootaata agiyoo kuwa ukuwagee taai naadi menaa

¹Ogatamee ma, Kristus Yesus ma Ekea emaa dagii da kaa ni me kasiino menaa ko kisee: Kristus mee awee da kaa ebo mée eetoowoo taano see naadi meetagi naagoo mée uduma wigintagaatagi, boota bagee yuwa miya, bogaano taa bagee yuwa miya uduma. Kisee kemaata anii omaago ma kasiino ko:4:1-2 2Kor 5:10-11²Ogatamee me menaa yiino bagee kuwa ede kaapea miya, be kaapea miya se gaata ipiipi eewegaai. "Kisee pedeo, kisee ekeasii" see omaago ma tupii, pedeo dimii, pedeo agiyoo ekeasi naadi menaa kuwa ase-manee taai, bedaa "Kisee daamaa yoka niiukuwaai" see menaa kuwa miya wegawoo taai. Kuwa menaa uduma koogo dimi animaata ipiipi mée tupiwoo taai. ³Mée tomaa yuwa mikee see topeekee menaa kuwa yiino be kedaa taapea yoka mée tupii see kasega. Okoo otoopa menaa ou dimii kaa too gaawoo taapea, mikee menaa yuwa be kaapea. Okoo me ede kiyaa menaa yuwa too yiino see naadi kuwa ede kiyaa menaa mée topetaa see bagee yuwa too abanaa taapea. ⁴Okoo mikee menaa yiino be kaa apa takimetaata idukaa egaa kaa bagee me unukade see see menaa yuwa too yiinaka ou naadi kaama apa kaagoo naadi yiitoo taapea. ⁵Kiya aa gaayu ko agiyoo-pagiyoo uduma yiba aa ekaato daamaa muniwoo, deewoo taai, aa ae-wae siyaa kaboo makii taa see kaa toowoo taai, Yesus me doometa menaa yaweganaa taai, Ogatamee me a kaa kadootaata agiyoo uduma dimi-dimi yaukuwawoo taai.4:5 2Tim 2:3-4

⁶Kuwa menaa kuwa anii bogaano monaa ekaapa kega naadi kaama kasega. Mée me napedeo kiyaabuu segeekea kuwa Ogatamee paagoo daamaa ekega-manee siyaa agiyoo mokoo.4:6 "Mée me napedeo kiyaabuu segeekea kuwa Ogatamee paagoo daamaa ekega-manee siyaa agiyoo mokoo" see mee mena nekeeniino yaato ko idukaa Israel bagee okoo me domba wodaa ena wugimaata kaama Ogatamee ekega-manee taa see yoo anggur poo uwoo yuwa miya enaataa kabagekomee seta. Mee mokoo Paulus waa miya mée me wa me tadaa yapeeyaata booyaapea kuwa Ogatamee paagoo daamaa ekega-manee siyaa agiyoo ebea-ebea mee.4:6 Plp 2:17⁷Yiibaga peeyaa bagee yuwa peemagaano yoo omaago ma peemaayaa see see anii miya Ogatamee me ani kaa naekeata agiyoo kuwa uduma anii daamaa omaago ma yaukuwataata topa. Anii Kristus se ekeata Wa me menaa daamaa penee siwooka yoka4:7 Kis 21:13, Plp 3:13-14, Ibr 12:1⁸eto ko mumo kaa onee ena naipiipii semaata Tuhan paagoo topa. Kuwa Wa me ani kaa naekeata agiyoo kuwa anii topoo see dimii kaa yaukuwataa to mokoo da mee anii niitagi. Waa wiyaagoo meemaata kaama mée tomaa topoo-topoo see kaa wigintagaatagi naagoo mee mokoo da ni kaa namagaatagi. Kiya ani too se, Waa moga migi naaki ou see gaawoo siyaa bagee kuwa uduma kaa miya yamagaatagi.4:8 1Kor 9:24-25, Yak 1:12

Wodopasi menaa

⁹Aa ni paagoo moga meede. ¹⁰Demas waa magaa da kaa agiyoo ou naadi kaama anii naekeata Tesalonika magaa kaa peemi. Kreskes waa Galatia wee kaa peemi, Titus waa Dalmatia wee kaa peemi. ¹¹Lukas wa too ni paagoo naatupi. Markus waa ni me ukuwaano agiyoo yuwa daamaa naaukuwataa see mée yoka badaa maadoota aa ma moga eemeei. ¹²Tikikus mee anii Epesus magaa kaa pooi asema. ¹³Ni me togoo dokaa mee anii Troas magaa kaa Karpus me ee kaa ekeasema yoka nadoomeei. Ni me kapogee yuwa uduma miya nadoomeei. Kuwa woda kado kapogee yuwa anii esee gaano pedeo.

¹⁴Tembaga pose tagimetaa see mée Aleksander me pedeo agiyoo eebaa nakoo simi. Wa me ukuwata-ukuwata kuwa bedaa Tuhan me pedeo wa kaa yadootagaapi. ¹⁵Inii me weganaa see menaa kuwa wa me maamaa wisinegee simi yoka aa miya nekeenii.

¹⁶Anii daba napeeyaasi naadi menaa naasiipea ye naadi hukum bagee paagoo nadogeamaamea petamanii etaa kaa ni yaato mena nawegaano bagee ena ma taa, mée uduma ni too umina naekeasemea. Kisee naekeasemea kuwa Tuhan me okoo kaa pedeo si yadootaasi naadi yaasegeeka. ¹⁷Okoo kisee naekeasemea kiya Tuhan mee ni yaato naatumi. Anii Yesus me doometa menaa uduma mée tomaa-tomaa apanaa yuwa uduma paagoo ipiipi eewegasi naadi Tuhan me anii pesee nakiyaami. Singa wodaa ebee to kaa kaama daba napekageemi.4:17-18 Luk 21:12-19¹⁸Mikee, anii napedeo kiyaano see agiyoo uduma kaa kaama Tuhan me napekatagaa siwoo taapi, kisee too epoo to wodoo Wa too ebo totaa see yoo daamaa badaa namagaatagi yoo too. Asii-sege see Mée mee iminoo miya, iminoo miya yaapaagee siwoo taano too! Amin.

¹⁹Priskila ma, Akwila ma bogaa ma, Onesiporus tukuguu ma okoo epao see naasii. ²⁰Erastus waa Korintus magaa kaa tupi. Tropimus waa ikiyoo meanigi kaboo anii waa Miletus magaa kaa ekeasema. ²¹Uwo biku-biku, deka bo kuwa ebo kaano taa kenoo kaa meei. Ebulus ma, Pudes ma, Linus ma, Klaudia ma, Yesus mikee gaayaa bagee apanaa yuwa miya uduma me epao kasegea.

²²Tuhan mee aa dimi yiba kaatoowoosi naadi kaasega, bedaa Wa me aii kaepa dimii mee miya aa ma epo enaataa kaatoowoosi naadi kaasega. Kiyoo too.