2 Tesalonika

Paulus me Tesalonika magaa kaa Yesus mikee gaata bagee paagoo wiyaagoo yaebeamaata kapogee

Mee kapogee mee ko Paulus me Tesalonika magaa kaa Yesus mikee gaata bagee yuwa paagoo petamanii kapogee yaebeamaata kaama apanaa yaebeano taa menaa asiino see naadi wiyaagoo to ma yaebeamaata. Kuwa menaa kuwa ko wodopasi yaato kisee ukuwaaniita, kisee ukuwaandaa taata yoka ikii makii taa see kaa umiwoo, toowoo taai naadi menaa kuwa ebeamaata. Mee kapogee wa me tahun 51 mee yiba mokoo ebeamaata.

Mee kapogee yiba mena kutuu yuwa kuwa ko kisee:

1:1-10 Petamanii menaa ma, paamee menaa ma

2:1-17 Wodopasi yaato ukuwaaniita menaa ma, makii taa see kaa umiwoo, toowoosi naadi menaa ma

3:1-5 Sembahyang inii mée yaukuwaai naadi menaa

3:6-15 Agiyoo se ukuwataa see bagee yuwa gaamaasi naadi menaa

3:16-18 Wodopasi menaa

¹Nii ko Paulus, bedaa Silas ma, Timotius ma inii wedo me ikii Tesalonika magaa kaa Iniitaagi Ogatamee ma, Tuhan Yesus Kristus ma Ekea mikee gaayaa bagee yuwa paagoo kiebeage. ²Iniitaagi Ogatamee ma, Tuhan Yesus Kristus ma Ekea me aii kiepa dimii ma, koogo adumeta dimii ma kuwa ikii ma epo enaataa kiitoowoosi naadi kiasege.

Mée me wegee-wegee see kaa se makiisi naadi menaa

³Neebee nokaa yuwa, inii ikii kaa paamee see dimii mee ebo. Mikee, ikii me Yesus mikee gaataa see dimii ma, epa aagaa see dimii ma kuwa maamaa ebo kiwooka yoka inii Ogatamee paamee, magiyaage see dimii too. ⁴Ikii mée me kiwegee-wegee naadi kaama ae-wae taakea kiya ikii makii taa see kaa Yesus mikee gaawoo, umiwoo see bagee yuwa. Kisee kemaata inii apanaa magaa kaa Yesus mikee gaayaa bagee yuwa paagoo peenaaka too ikii kisee bagee yuwa yoka see kiapaagee senaa see.

⁵Ikii Ogatamee Wa too ebo mée eetupi nao see menaa kuwa yawegawoo naadi kaama mée me kiwegee-wegee taakea. Kuwa me kemaata Ogatamee me mée wigintagaatagi kuwa topoo too kaata ii, see kuwa inii nekeenegea. Mée me kisee ikii kiwegee-wegee naadi kaama Wa me ebo mée eetoogee taa see yoo kiyoo ikii miya niitoono daamaa see kisiitagi. ⁶Wa me mée wigintagaano kuwa topoo too yoka pedeo bagee se wigineano ko iyo. Ikii kiwegee-wegee taa see bagee kuwa Wa me modee kimasiitagi, pedeo agiyoo yamiyaatagi, ⁷bedaa ikii me ae-wae taa see dimii mee miya kitaa kiyaatagi. Tuhan Yesus mee Wa me pesee yago malaikat bagee yuwa ma enaataa epoo to wodoo kaama isiitagea naagoo mée me ikii kiwegee-wegee taa siyaa yuwa ma, inii mée wegee-wegee taa siyaa yuwa miya uduma mée yataa kiyaatagi. Mee naagoo ebo biyaa gada ma eseemaata kaama ⁸okoo Ogatamee ipi kaano miya be, Tuhan Yesus me doometa menaa yayiino miya be see bagee kuwa pedeo kiyaatagi. ⁹Okoo me pedeo ukuwataa to mokoo da masiitagea. Tuhan me toogee yoo kaama beesekaa ekeasiitagea, Wa me disi ebo, esee omaago see agiyoo yuwa se diitagea, kisee too iminoo miya, iminoo miya pedeo too kiwoo taatagea.1:9 Mat 25:46, Plp 3:19, 2Pet 3:7¹⁰Mee naagoo Wa me daamaa wa too wigintaata bagee yuwa me Yesus mee yaapaagee taatagea, okoo Waa mikee nao see gaayaa bagee yuwa me dimi nagimaakee kaa Waa ebo ekee taatagea. Inii me kiiwegata menaa yuwa ikii miya mikee nao see gaata kemaata ikii miya kisee Waa ebo ekee, yaapaagee taatagea.

¹¹Kisee kemaata inii me Eboo Ogatamee paagoo ikii kaa maamaa sembahyang kisegeeke. Ikii ko Wa me Ni paagoo nameei see kiseta bagee yuwa kemaata Wa me ikii sikii, Ni me bagee yuwa ii see kigaawoosi naadi kiasegeeke. Bedaa ikii me daamaa yaukuwaano ede see gaayaa agiyoo yuwa ma, ikii me Yesus mikee gaakee kaa daamaa yaukuwagee siyaa agiyoo yuwa ma kuwa uduma Wa me pesee kaa daamaa too kikiyaabuu siwoosi naadi kiasegeeke. ¹²Inii me Eboo Ogatamee ma, inii epoo Mée Tuhan Yesus Kristus ma Ekea me epa mée gaano dimii mee ebo kemaata ikii miya Tuhan Yesus Wa ekaa da esee ebo nao naadi yaapaagee, bedaa Yesus Wa me miya ikii kiapaagee, kisee aaukuwagee siwoosi naadi inii kiasegeeke.

Yesus meeno taa kaboo ukuwaandaa taata menaa

¹Neebee nokaa yuwa, inii epoo Mée Tuhan Yesus Kristus mee meetagi menaa ma, inii Wa paagoo mée kutumaatagi menaa ma kuwa gaayu ko ²apanaa otoopa mega, peega see menaa agoo yoka nekeenii. Kuwa ko "Tuhan wiyaagoo meemaagi yoka" see menaa mee ikii yeeyu ko dimi se gaagaa taai, dimi se abaai. Kuwa see see menaa miya mée ena me "Roh me Waa meemaagi see wegapi yoka" see weganaa see menaa kuwa kaa miya dimi se gaagaa taai. Bedaa "Paulus me kapoge kaa Tuhan meemaagi yoka see menaa ebeamaagi" see weganaa see menaa kuwa miya dimi se oogaai, wisintagaai. ³Mée me kideebaa taapea yoka naadi mikee menaa kisiinake, mee ko Yesus meeno taa kaa mée eebaa Ogatamee wisintagaa taapea. Kuwa kaboo da mée ena, dimi umina pedeo too see mée mee, Ogatamee me umina pedeo kiyaapi mée mee awee da kaa kaatagi. Mee mée to awee da kaa kaano taa miyoo Yesus se meetagi yoka daamaa nekeenii. ⁴Mee pedeo yago mée to waa ni too ebo naadi kaama Ogatamee ma, mée me yaapaagee taa see eboo yuwa ma kuwa uduma maagiyoo ekeata Ogatamee me ee yiba pakaa-seemaatagi. Kiyoo animaata kaama "Anii ko Ogatamee yoka" see menaa da wegakumiitagi.2:3-4 Mat 24:15⁵Kuwa kisee ukuwaaniita, kisee ukuwaandaa taata menaa kuwa anii kiitoogee seta kaboo eebaa kiiwegagee seta kiya ikii nekeeniino taa, gaabuu sepea ye?

⁶Mee pedeo yago mée to awee da kaa kaatagi naagoo mee kiipaa se. Waa taamegee segee see agiyoo mee ikii ipi. Mona naagoo too waa awee da kaa kaatagi. ⁷Mikee, eto miya magaa da kaa pedeo ukuwaano pesee da mee koogo ukuwadaa taaka.2:7 1Yoh 4:3 Kisee kiya mee pedeo yago mée to taamegee see mée ena miya agoo yoka waa awee da kaa kaano taa. Mona naagoo ko mee taamegee see mée mee amooge taata kaama ⁸mee pedeo yago mée awee da kaa kaatagi. Kiya Tuhan Yesus mee omaago ma meetagi naagoo Wa me umina pedeo kiyaatagi, Wa me ebe noogaa da me kisee booyaatagi.

⁹Mee pedeo yago mée to booyaano taa kaa ukuwanaa taatagi agiyoo yuwa kuwa ko Iblis me agiyoo tawata kaama mée yuwa paagoo dimi nagii-nagii agiyoo tomaa-tomaa ma, apanaa wa yaato misi naadi makapaa agiyoo ma kuwa ukuwaaniyaabuu senaa taatagi.2:9 Mat 24:24¹⁰Se-pedeo, we-pedeo agiyoo ukuwaaniyaabuu senaa naadi kaama okoo mikee menaa ou dimii taa see bagee yuwa deebaa taatagi. Okoo daba daagimaa peesi naadi mikee menaa masemagaano taa bagee yuwa kemaata pedeo kedaa taatagea. ¹¹Okoo kisee bagee yoka Ogatamee me okoo kuwa deebaa see menaa kuwa mikee menaa yoka see gaasi naadi dimii mee okoo kaa maamaa yamiyaatagi. ¹²Okoo mikee menaa se gaata pedeo agiyoo yuwa too ou naadi kaama ukuwagee see bagee kuwa uduma Wa me pedeo kiyaatagi.2:12 Yoh 3:19-21

Makii taa see kaa toowoosi naadi menaa

¹³Neebee nokaa yuwa, ikii ko Tuhan me epa kigaataa see bagee yuwa kemaata inii ikii kaa maamaa Ogatamee paagoo kiiboo, paamee see asiino gaano pedeo. Mikee, Ogatamee me idukaa esee petamanii kaboo ikii daba kidaagimaa peeyaano see naadi daamaa kiwigintaata. Roh me ikii me pedeo dimii, pedeo menaa kuwa taa kikiyaabuu naadi kaama ikii mikee menaa nao see gaakee kaa Wa me bagee kikiyaabuu seta yoka inii Ogatamee kiiboo, paamee see dimii mee ebo.2:13-14 Rom 8:29-30, Ep 1:4-5¹⁴Ikii Wa me bagee kikiyaata kuwa ko inii Yesus me doometa menaa kiiwegagee seme kuwa kaa Wa me Ni paagoo nameei see kiseta. Inii epoo Mée Tuhan Yesus Kristus Wa me asii-sege see ebo agiyoo kuwa ikii miya masesea naadi Wa yaato kimiyaata. ¹⁵Kisee kemaata neebee nokaa yuwa, ikii se makii taai, inii me kiiwegagee seta menaa yuwa ma, inii me kapoge kaa kiebeamaata menaa yuwa miya kuwa uduma daamaa peneata doowoo taai.

¹⁶Inii epoo Mée Tuhan Yesus Kristus ma, Iniitaagi Ogatamee ma Ekea paagoo ikii kaa sembahyang menaa mee ko kisee: Iniitaagi mee, inii esee epa mée gaakee kaa inii dimi mena kisee too daamaa mée pesee kiyaabuu taa see Mée mee, bedaa inii Wa kaa too dimi kotopiwoosi naadi daamaa menaa kuwa mée manta Mée mee ¹⁷Wa me ikii me daamaa agiyoo ukuwataaka too miya, ikii me daamaa menaa wegataaka too miya kuwa uduma yiba Wa me ikii pesee kikiyaabuu siwoosi naadi inii kiasegeeke.

Sembahyang mée yataai naadi menaa

¹Neebee nokaa yuwa, eto ko mee wodoo kisiino menaa gaayu ko inii kaa sembahyang mée yataai. Idukaa inii Tuhan me menaa ikii paagoo kiiweganaaka too ikii me kuwa ebo menaa yoka naadi peneasemea. Kuwa see see bedaa inii eto apanaa bagee paagoo kuwa menaa moga eeweganaa siyaa naaki okoo miya kuwa ebo menaa yoka naadi daamaa peneata doowoo see bagee eebaa kedaasi naadi sembahyang mée yasegee taai. ²Bedaa dimi koopoo, dimi pedeo see bagee kuwa mée yapekataasi naadi miya sembahyang mée yataai. Yesus mikee se gaayaa bagee agoo yoka naadi kisege. ³Kisee bagee agoo kiya Tuhan Wa me taa ma taa ikii dimi mena pesee kikiyaata kaama Iblis mee kiwasitagaa siwoo taapi.3:3 Yoh 17:15, 1Yoh 5:18⁴Ikii Tuhan ma dimi aagadi-maagadi taa see bagee yoka inii me kisiyaa menaa yuwa ikii daamaa ukuwataakea, bedaa kisee too ukuwawoo taapea ii see kuwa miya inii kigaage. ⁵Inii Tuhan paagoo kiaseekee menaa kuwa ko Ogatamee me epa mée gaataa see dimii mee Wa me ikii daamaa ipi kikiyaasi naadi kiasege. Bedaa Kristus Waa mée me wegee-wegee seta kiya makii taa see kaa toowoo seta see see ikii miya makii taa see kaa kituyaabuu siwoosi naadi kiasege.

Agiyoo se ukuwataa see bagee yuwa gaamaasi naadi menaa

⁶Neebee nokaa yuwa, inii epoo Mée Tuhan Yesus Kristus mee ekaa yago Mée yoka inii Wa me pesee kaa kisiino ko kisee: Ikii paagoo Yesus mikee gaayaa bagee kiya ukuwaano agiyoo se ukuwataa, aii totaa, inii me kitopegee see menaa yuwa si yeetaa, kisee bagee kuwa wigineai. ⁷Idukaa inii ikii paagoo kiitoogeeka too ukuwata-ukuwata kuwa ikii miya ipi. Kuwa mokoo ikii miya ukuwawoo, umiwoo taano gaano pedeo. Kuwa ko inii me agiyoo omaago ma ukuwagee seta, inii otoopa kiitoono taa. ⁸Mée me niinuyaa agiyoo kuwa inii aii kisee yamasegee taano taa. Ikii me mée manegee segee taano kuwa kana kaapea yoka naadi inii me too egapi yaato miya, daatooyiba yaato miya inii me gaano pedeo agiyoo edaano see naadi kaama agiyoo kana ma, kana ma too ukuwagee seta.3:7-9 1Tes 2:9⁹Inii me kisee omaago ma ukuwagee seta kuwa ko inii me gaano pedeo agiyoo kiidimaano mee pedeo yoka see gaata kuwa me se kiya inii me agiyoo omaago ma ukuwagee seta see see ikii me agiyoo miya kisee omaago ma ukuwawoosea naadi ikii paagoo omaago ma ukuwagee seta. ¹⁰Inii ikii paagoo kiitoogee seta kaboo inii me kiseme menaa ena mee ko kisee: "Ukuwaano agiyoo ukuwaano be kiyaa bagee kuwa okoo naano agiyoo miya se eenaai" kisee menaa kitopegee seta.

¹¹Ikii paagoo mée noonaa aii toogeekea, okoo me agiyoo, okoo me menaa kuwa ekeata apanaa bagee me menaa yuwa too otoopa yayeenaakea, see menaa kuwa doodoota inii paagoo niiwegagea. ¹²Kuwa bagee yuwa nekeensi naadi inii me Tuhan Yesus Kristus pesee kaa okoo omaago ma asiino menaa ko kisee: "Ikii me naano agiyoo yuwa too noogee taano see yoka agiyoo daamaa koogo ukuwawoo taai see kisegea" see naasii.3:12 1Tes 4:11-12

¹³Neebee nokaa yuwa, ikii me "Anii daamaa agiyoo ukuwagee taano kana, be" see dimii mee se gaai. ¹⁴Inii me mee kapogee kaa kiebeage menaa kuwa yiino be see bagee agoo kiyu ko kuwa bagee yuwa nekeenii. Okoo ego weda kisi naadi okoo sekaataa se peenaa taai, se eetooi. ¹⁵Kisee kiya okoo miya Yesus mikee gaayaa bagee yoka okoo yape bagee mokoo ekee see se kiya daamaa ase-manee taai.

Wodopasi menaa

¹⁶Eto ko dimi koogo mée adumiyaayaa Mée Tuhan Wa me ikii me ukuwayaa, peeyaa yuwa uduma yiba koogo adumeta dimii mee kineewoosi naadi kiasege. Tuhan mee ikii ma enaataa kiitoowoo taapi. ¹⁷Eto ko anii Paulus me ni me yagaa kaa mee mena ponee to mee too kiebeataaka. Mee kiebeataaka mena ponee to mee ko Paulus me kapogee ii see nanekeensea naadi mena ponee to. Ni me kapogee yuwa uduma wodopasi yaato kuwa ni me yagaa da me ebeataaka mee see see too anii ebeagee siyaa.

¹⁸Inii epoo Mée Tuhan Yesus Kristus Ogatamee Wa me aii kiepa dimii mee ikii ma epo enaataa kiitoowoosi naadi kiasega. Kiyoo too.