2 Petrus

2 Petrus

Petrus me wiyaagoo yaebeamaata kapogee

Mee kapogee mee ko koopoo see menaa weganaa seta bagee yuwa me Yesus mikee gaayaa bagee yuwa deebaa seta kaama okoo yaato peeyaa yoka naadi kaama Petrus me mee kapogee yaebeamaata. Kuwa koopoo see menaa weganaa see bagee kuwa ko okoo me pedeo ou dimii kaa umiwoo, toowoo see bagee. Okoo me Yesus mee wisineekee kaa Waa wiyaagoo se meetagi yoka see menaa weganaa seta bagee yuwa. Kiya Yesus mee wiyaagoo meetagi naagoo Wa me kuwa pedeo menaa, pedeo agiyoo kuwa uduma yataa kiyaata kaama se-agiyoo, we-agiyoo uduma daamaa too kiyaabuu taatagi. Kisee kemaata kuwa koopoo see menaa weganaa seta bagee kuwa wisintaata inii kaa daamaa mée yadootaata menaa kuwa too doowoo taai naadi menaa kuwa yaebeamaata.

Mee kapogee yiba mena kutuu yuwa kuwa ko kisee:

1:1-2 Petamanii menaa

1:3-15 Inii Wa me mée wiginta bagee yuwa daamaa iyawoo, ebo kiwoosi naadi menaa

1:16-21 Kristus me asii-sege siyaa agiyoo kuwa deeta menaa

2:1-22 Koopoo see menaa weganaa see bagee yuwa gaai naadi menaa

3:1-16 Tuhan mee wiyaagoo meetagi yoka see menaa kuwa neke-nekee siwoo taai naadi menaa

3:17-18 Wodopasi menaa

¹Anii ko Simon Petrus, Yesus Kristus me agiyoo yaokagee see mée, Wa me menaa nadoonaasi naadi pooi see naseta mée mee. Yesus Kristus mee ko inii me Eboo Ogatamee mee, inii mée daagimaa peeyaano Mée mee. Waa dimi topoo see Mée kemaata Yesus mikee gaano dimii mee inii kaa daamaa mée yadootaata see see ikii kaa miya kisee daamaa kidootaata. Ikii miya kisee bagee yuwa paagoo mee kapogee mee kiebeaga.

²Ikii me Ogatamee ma, inii epoo Mée Tuhan Yesus ma Ekea daamaa ipi keta kaama Ekea me epa dimii ma, koogo adumeta dimii ma kuwa ikii maamaa kineesi naadi kiasega.

Inii Wa me wiginta bagee yuwa daamaa iyawoo, ebo kiwoosi naadi menaa

³Ogatamee Waa esee daamaa, esee asii-sege see Mée kemaata Wa me Ni paagoo nameei see mée aseta. Inii me Waa daamaa ipi keta kaama inii Waa ma dimii menaa kaa umiwoo, toowoosi naadi agiyoo kuwa uduma Wa me pesee da kaa inii daamaa aii mée manta. ⁴Wa me kuwa agiyoo inii aii mée manta kemaata Wa me "Anii kisee daamaa kiukuwaata, kisee daamaa kiukuwaaniyaata" see mée aseta. Kuwa esee daamaa, esee ebo see menaa kuwa doodoo ikii kuwa magaa da kaa pedeo ou dimii kaa pedeo mée kiyaayaa agiyoo kuwa kaa kaama ikii daba peeta kaama Wa me iyee kaa ikii ma aagadi-maagadi siwoosea naadi kuwa menaa mée manta.1:4 2Kor 7:1⁵Kisee kemaata ikii daamaa omaago ma ukuwawoosea naadi kisiino menaa mee ko kisee: Ikii me Yesus mikee gaano dimii mee kaa esee daamaa see dimii mee ma pe-tabeasii, bedaa esee daamaa see dimii mee kaa ipi see dimii mee ma pe-tabi, ⁶bedaa ipi see dimii mee kaa ekaato daamaa muniwoo, deewoo taano ipi see dimii mee ma pe-tabi, bedaa ikii ekaato daamaa muniwoo, deewoo taano ipi see dimii mee kaa makii taa see kaa toowoo taano see dimii mee ma pe-tabi, bedaa makii taa see kaa toowoo taano see dimii mee kaa Ogatamee ma dimii menaa kaa umiwoo, toowoo taano see dimii mee ma pe-tabi, ⁷bedaa Ogatamee ma dimii menaa kaa umiwoo, toowoo taano see dimii mee kaa Yesus ma ena kenaa bagee epa aagaa see dimii mee ma pe-tabi, bedaa Yesus ma ena kenaa bagee epa aagaa see dimii mee kaa mée uduma epa gaayaa dimii mee ma pe-tabi. ⁸Ikii kuwa aatabi see dimii kuwa daamaa gaawoo, doowoo naadi kaama maamaa eebaa kedaa siwoo siyu ko inii epoo Mée Tuhan Yesus Kristus mee ikii me Waa daamaa ipi see dimii mee miya ebo kaapa, bedaa ikii daamaa agiyoo maamaa ukuwawoo, daamaa poo maamaa ekawoo, kisee umiwoo, toowoo taapea. ⁹Kiya kuwa aatabi see dimii kuwa taa see mée to gaayu ko waa emaa digiyoo see mée to mokoo. Mee ko wa me idukaa kaama pedeo ukuwawoo seta agiyoo yuwa kuwa nawonakomee seta yoka, see dimii kuwa waa gaabuu seta kemaata waa emaa daamaa se deeyaa see mée to mokoo.

¹⁰Kisee kemaata neebee nokaa yuwa, ikii ko Ogatamee me Ni paagoo nameei see kiseta bagee, Wa me daamaa kiwigintaata bagee yuwa. Ikii me ’Anii kisee bagee ii’ see kuwa nekeensea naadi kuwa aatabi see dimii kuwa maamaa gaawoo, doowoo taai. Ikii kisee daamaa ukuwawoo, umiwoo siyu ko ikii taa ma taa se okaapea.1:10-11 Yud 1:24¹¹Ikii kisee daamaa ukuwawoo, umiwoo naadi kaama inii epoo Mée Tuhan mee, inii daba mée daagimaa peeyaano Mée Yesus Kristus Wa me kisee too iminoo miya, iminoo miya ebo mée eetoowoo taano yoo kiyoo esee kiede kaa daba kiseemiyaatagi.

¹²Kisee kemaata anii kuwa menaa yuwa kisi-manee siwoo taapa. Ikii ko kuwa menaa ipi see bagee, kuwa mikee menaa daamaa masemaata kaama makii taa see kaa toowoo see bagee yuwa. Kiya ikii kuwa menaa gaabuu taapea naadi kaama ¹³ni me keedaa toogee see maa da mee ekeasiino taa kaboo anii kuwa menaa yuwa daamaa kisi-manee siwoo taano mee daamaa see gaaga. ¹⁴Mikee, anii eebaa umiino taa kaa ni me keedaa toogee see maa da mee ekeasiipa see kuwa anii ipi. Kuwa menaa kuwa inii epoo Mée Tuhan Yesus Kristus Wa me kisee ni paagoo awee da kaa naawegami.1:14 Yoh 21:18-19¹⁵Kisee kemaata anii pakaa-seometa kaama wodoo ikii kuwa menaa yuwa se gaabuu seta daamaa neke-nekee siwoosea naadi anii eto omaago ma kisi-manee siwoo taapa.

Kristus me asii-sege siyaa agiyoo kuwa deeta menaa

¹⁶Inii epoo Mée Tuhan Yesus Kristus mee pesee ma meetagi kaa menaa kuwa inii mée me unukade menaa wegaa-wegaa see see kiiwegagee seme se kiya Wa me asii-sege siyaa agiyoo kuwa inii emaa me deeta bagee yuwa.1:16-18 Mat 17:1-5¹⁷Mikee, Nagamee, Asii-sege see Mée Ogatamee me Wayoopaa mee ebo, Waa asii-sege see ekeasiino see naadi menaa kuwa Wa paagoo aseeyamaata, mee ko kisee: "Mee ko Niyoopaa. Ni me Yogaa esee epa yoka Anii Waa dimi wikii-wikiika" see aseta menaa mee. ¹⁸Mee wa too esee daamaa wigintaata maga kutuu to kaa kiyoo inii Waa ma epo enaataa toomuu taaka too kuwa epoo to wodoo kaama aseeyamaata menaa kuwa yeeta.

¹⁹Inii kuwa menaa yeeta kaama kuwa idukaa nabi bagee yuwa me wegawoo seta menaa kuwa mikee menaa ii see nekeenta. Ikii miya daamaa nekeenii: Digiyoo see yoo peto wakeata kaama daamaa deeyaa mokoo see see okoo me wegawoo seta menaa kuwa miya kisee wakimiwoo siyaa. Ikii kuwa menaa yuwa ipiipi gaagaa siwoo taai, kisee too Waa meetagi yoo too. Waa meetagi mee ko pedeo komaa yaato aweepeasiyaa see see kaata. Bedaa keno wogaa to see okadee mee awii yaato kaama pakaamaayaa see see inii dimi yiba miya kisee awee kaata.1:19 Luk 1:78-79²⁰Esee ebo menaa ena mee ikii nekeeniino gaano pedeo, mee ko kisee: Ogatamee me kapogee yiba nabi bagee me wegawoo seta menaa yuwa mena nekeeniino yaato kuwa gaayu ko mée me gaata-gaata doodoo too se nekeeniyaa. ²¹Nabi bagee yuwa me menaa kuwa manii to ko okoo me gaata-gaata kuwa kaa se kiya Ogatamee Wa kaa too. Okoo Wa me menaa Roh Kudus me pesee kaa yawegawoo seta.1:20-21 1Pet 1:10-11, 2Tim 3:16

Makapaa menaa wegataa see bagee yuwa gaamaasi naadi menaa

¹Idukaa Ogatamee me bagee yuwa paagoo nabi poga-poga see bagee agoo keta see see ikii paagoo miya makapaa menaa kitopetaa see bagee agoo kaapa. Okoo me doomeepea menaa kuwa koopoo, mée pedeo kiyaayaa see menaa yuwa too kaapa. Okoo me Eboo mee, okoo edaata kaama daba daagimaa peeyaata Mée mee miya okoo me wisintagaapea. Kuwa me kemaata okoo ekaato kaa pedeo agiyoo moga miyaapea.2:1 Mat 7:15, Kis 20:29-31, 1Tim 4:1²Okoo me pedeo ou dimii kaa umiwoo, toowoo siyaa kuwa mée eebaa obeewoo taapea. Okoo kisee ukuwaapea kemaata inii me mikee see etaa yaato daamaa umiwoo, toowoosi naadi mée topeta menaa kuwa mée me wisineapea.2:2-3 1Tim 6:3-5³Kuwa makapaa menaa topetaa see bagee kuwa okoo kepe ou see bagee kemaata kepe neesi naadi okoo me aii gaata-gaata dimii kaa otoopa menaa kiiwegaapea. Idukaa kaama okoo pedeo kiyaabuu taata see menaa mee okoo kaa yawegataata topa. Okoo pedeo kiyaano monaa mee asiige si yatagaapi.

⁴Mee ko malaikat bagee noonaa yuwa okoo pedeo ukuwata bagee kuwa Ogatamee me okoo se pedeo kiyaapa see dimii mee gaano taa kiya okoo neraka magaa kaa tameeyamaata kaama digiyoo yiba ekeata, kisee too Wa me mée tomaa wigintagaatagi naagoo too.2:4 Yud 1:6⁵Bedaa kisee miya idukaa Nuh tota kaboo Ogatamee me kuwa magaa da kaa dimi pedeo see bagee yuwa okoo se pedeo kiyaapa see dimii mee gaano taa. Wa me kuwa pedeo iyee kaa too umiwoo see bagee yuwa okoo kaa ebo uwoo yamiyaata. Mikee menaa eeweganaa seta mée Nuh mee ma, waa ma epo enaataa totaa see petoo to ma kuwa too daba daagimaa peeyaata.2:5 Kej 6:1–7:24⁶Bedaa kisee miya Ogatamee me Sodom magaa ma, Gomora magaa ma wiya kuwa kaa biyaa isiyaata kaama pedeo kiyaata. Mee ko kuwa magaa kaa bagee yuwa pedeo kiyaata wodoo apanaa bagee, okoo pedeo dimii kaa umiwoo, toowoo taapea bagee kuwa ’Wa me inii kaa miya kisee mée ukuwaapi yoka’ see dimii gaamaasi naadi okoo pedeo kiyaata. ⁷Mee naagoo Ogatamee me Lot mee daba daagimaa peeyaata. Lot mee dimi topoo see mée kemaata kuwa okoo mena si yayeeta pedeo ou dimii kaa too omegee, toogee seta bagee kuwa kaa waa ae-wae, dimi gaagaa siwoo segee seta.2:6-7 Kej 19:1-26⁸Mee dimi topoo see mée Lot mee okoo yupii da kaa omegee, toogee seta kaboo okoo me pedeo ukuwagee seta agiyoo kuwa egapii gakata wa me deetaa, yeetaa segee naadi kaama waa yaai-yaai, dimi mena gaagaa siwoo segee seta. ⁹Kisee kemaata okoo dimi topoo see bagee kuwa okoo gaadee siyaa kaboo Tuhan me okoo daba daagimaa peeyaano kuwa Waa ipi. Bedaa dimi pedeo see bagee kuwa Wa me pedeo kiyaano kuwa miya ipi. Wa me mée wigintagaatagi naagoo kisee ukuwaano see naadi eto miya pe-wigintagaa siwooki see kuwa inii daamaa nekeeniyaa. ¹⁰Wa me pedeo kiyaatagi bagee kuwa ko okoo me pedeo ou gaayaa dimii kaa too umiwoo see bagee yuwa ma, Ogatamee Waa ebo mée eetoono kuwa be gaataa see bagee yuwa miya kuwa uduma.

Kuwa ikii paagoo makapaa menaa wegataa see bagee kuwa miya dimi uu, dimi ebo poga-poga see bagee yuwa. Epoo to wodoo bagee ma, magaa da kaa pesee yago agiyoo ma kuwa uduma okoo me wisineano weda see dimii mee miya taa see bagee yuwa. ¹¹Okoo me kisee wisineano omaago kiya malaikat bagee yuwa me kisee wisineano menaa kuwa taa. Malaikat bagee kuwa esee ebo, esee pesee kiya okoo me kuwa apanaa pesee yago agiyoo kuwa pedeo kiyaasi naadi menaa Tuhan paagoo si yawegayaa. ¹²Kiya kuwa makapaa menaa wegataa see bagee kuwa ko dimi mena taa see agiyoo see see okoo me otoopa dimi gaata-gaata doodoo too ukuwanaa see bagee yuwa, mée me peneata wugimaasi naadi kabawoo siyaa agiyoo yuwa mokoo. Okoo mikee menaa ewo, se nekeeniyaa yoka okoo me wisineekee too. Bogaa yiba yago tookee agiyoo boowoo siyaa see see okoo miya pedeo kedaa taatagea.2:10-12 Yud 1:8-10¹³Okoo me pedeo ukuwagee siwookea doodoo pedeo ukuwawoo setaa to mokoo da masiitagea. Okoo me pedeo ou gaayaa dimii doodoo awee da kaa otoopa ukuwanaa taano ede see bagee yuwa. Okoo ma ikii paaya epo enaataa animaata naano agiyoo kiinotaaka too okoo me ou dimi-pami kuwa eebaa kedaa naadi kaama otoopa ede ma, ede ma siyaa, kisee diino ko pedeo see bagee yuwa. ¹⁴Okoo tobaaka taano see dimii kaa api emaa daano omaago. Okoo pedeo agiyoo ukuwagee taano kana see taa. Okoo me kuwa mikee gaano dimii mee pesee kaano taa see bagee kuwa okoo me pedeo agiyoo ukuwasi naadi deebaa senaa siyaa. Okoo me kepe ou, agiyoo ou, kisee dimii kuwa esee ebo, okoo kisee tupiwoo, umiwoo see bagee yuwa. Okoo kaa pedeo ayaa yadootaata toogeekea. ¹⁵Okoo mee mikee topoo see etaa da mee ekeata otoopa peenaa see bagee yuwa. Okoo idukaa Beor yoopaa Bileam wa me koopoo see etaa da obeewoo seta bagee yuwa. Bileam mee ko wa me pedeo agiyoo ukuwataa to kaa kepee kuwa ou see dimii gaata mée mee. ¹⁶Waa nabi bagee ena kiya wa me pedeo pe-ukuwaano see agiyoo mee kaa Ogatamee me waa mena pesee kaa aseta. Mee ko keledai wodaa ena, mena taa see agiyoo kiya Ogatamee me mee wodaa da ebee to taa mée me menaa kaa waa pesee ma menaa aseta. Mee kaama wa me dimi taa kaa pedeo pe-ukuwaanaka see gaata dimii mee yataametaata.2:15-16 Bil 22:4-35, Why 2:14

¹⁷Kuwa ikii paagoo makapaa menaa wegataa see bagee kuwa ko muma uwoo mumaa to kiya uwo deeta mokoo, bedaa sinu yuwa ebo bo me kiyoo-kiyoo deeda-peeda siyaa mokoo.2:17 Muma uwoo mumaa to kiya uwo deeta mokoo, see mee mena nekeeniino yaato ko okoo me mée tupiino menaa kuwa imi taa see menaa too naadi ebea-ebea menaa mee. Okoo kisee bagee yuwa too kemaata okoo esee digiyoo yiba toowoo see yoo yaipiipii semaata topa. ¹⁸Okoo me ebo poga-poga menaa kuwa imi taa menaa too. Okoo me pedeo ou dimi-pami kaa wegayaa menaa kuwa me okoo yeetaa see bagee yuwa deebaa naadi kaama pedeo ukuwagee siyaa. Kuwa yeetaa see bagee kuwa okoo mée me pedeo ukuwagee siyaa agiyoo kuwa miyoo taa ekeata kiya kuwa menaa kuwa me deebaa seta kaama bedaa pedeo pe-ukuwagee siyaa. ¹⁹Kuwa makapaa menaa wegataa see bagee kuwa okoo me apanaa bagee paagoo wegaano, "Koosi, daba ukuwayaa, mée pedeo kiyaayaa agiyoo da se" see wegayaa kiya okoo miya pedeo kedaa siyaa, okoo miya kuwa pedeo agiyoo yuwa ma aagadi siyaa. Mee ko mée me dimi peeyaa agiyoo kuwa me okoo daba, peedi kiyaata kaama kuwa agiyoo ma aagadi siyaa.2:19 Yoh 8:34, Rom 6:16²⁰Kisee mée me inii daba mée daagimaa peeyaano Mée Tuhan Yesus Kristus mee ipi keta kaama magaa da kaa mée pedeo kiyaayaa agiyoo kuwa uduma ekeata kiya mee wodoo taa bedaa kuwa agiyoo yuwa ma tawata kaama okoo daba, peedi kiyaayu ko yaai. Okoo petamanii Kristus mee ewo see kaboo okoo me umiino, toono kuwa pedeo kiya okoo me Kristus mee ekeata kaama umiino, toono kuwa ko mee asii esee pedeo kiyaa. ²¹Mee ko umiino, toono mikee topoo see etaa da mee okoo ipi kegea kiya mee kaama wodoo ekeasiyu ko mee etaa da mee ewo naaki daamaa. Kristus me kisee ukuwaai, kisee ukuwaai see mée daamaa aseta menaa kuwa okoo paagoo eewegagee seta kiya okoo kisee oko maataata metaki peeyu ko esee pedeo.2:20-21 Ibr 6:4-6, 10:26-27²²Okoo me kisee ukuwayaa yuwa kuwa Ogatamee me menaa ena mee mokoo, mee ko kisee:

"Kameno me udita yuwa bedaa metaki me-nuyaa" see menaa ebeamaata.

Bedaa mena ena miya kisee:

"Ekenaa to me uwo wetogemaata kaama bedaa metaki peedoota tapaa pe-tukumiyaa" see menaa mee miya ebeamaata. Ams 26:11

Tuhan mee wiyaagoo meetagi kaa menaa

¹Ni me epa see bagee yuwa, mee kapogee mee ko ani me wiyaagoo to kiebeaga kapogee mee. Anii kuwa kapogee wiya kuwa ikii mikee menaa yuwa se gaabuu seta daamaa dimii, daamaa menaa eebaa kikiyaabuu taano see naadi kiebeaga. ²Mee ko idukaa Ogatamee Wa me daamaa wigintaata bagee, nabi bagee kuwa okoo me wegawoo seta menaa yuwa ma, bedaa mée daagimaa peeyaano Mée Tuhan Yesus Wa me mée aseta menaa yuwa ma kuwa menaa uduma ikii daamaa neke-nekee siwoosea naadi kiebeaga. Yesus Wa me menaa yadoonaa see bagee yuwa okoo doodoo Wa me kuwa menaa ikii paagoo daamaa kisi-manee seta. ³Esee ebo menaa ena mee ikii nekeeniino gaano pedeo, mee ko kisee: Yesus meetagi menaa wisineekee bagee kuwa wodopasi yaato agoo kaata. Okoo me pedeo ou gaayaa dimii doodoo too umiwoo, toowoo taatagea.3:3 1Tim 4:1, 2Tim 3:1⁴Okoo me wisineekee kaa kisiitagea menaa kuwa ko kisee: "Wa me ’Anii metaki meeta’ see menaa da aseta kiya Waa kayoo baa? Inii beemu nokaa yuwa uduma boowoo seta kiya Waa meeno taa. Petamanii agiyoo-pagiyoo ogaataata yoo kaama eto too kuwa agiyoo-pagiyoo kuwa uduma kisee too umiwoo, toowoo taaka" see menaa kuwa okoo me kisiitagea. ⁵Okoo Ogatamee me agiyoo-pagiyoo ogaataata menaa kuwa okoo ipi kaano dimii mee taa kaa wisintagaakee. Mee ko idukaa Ogatamee Waa mena ena wegataagi naaki epoo to kisee ogaanega. Bedaa Wa me menaa da me magaa to kuwa uwo yiba kaama pakayaata kaama wa too wigintaata.3:5 Kej 1:6-9⁶Kiyoo kaama kuwa uwoo yuwa me magaa to uduma pedeo kiyaata, ebo uwoo miyaata kaama magaa to pedeo keta.3:6 Kej 7:21⁷Kiya eto kiipaa miya Ogatamee Wa me menaa me epoo to ma, magaa to ma kuwa uduma daamaa muniwoo taaki, kisee too biyaa kaa uduma yuwitagaatagi monaa kaa too. Mee naagoo pedeo bagee yuwa miya wigintaata pedeo kiyaatagi.

⁸Kiya ni me epa see bagee yuwa ikii gaayu ko mena ena mee se gaabuu taai, mee ko kisee: Tuhan Wa me gaata dimii mee ko egapii ena too too gaayu ko seribu tahun mokoo, bedaa seribu tahun kuwa ko egapii ena too too mokoo, kisee Tuhan Wa me gaataa see.3:8 Mzm 90:43:8 "Tuhan Wa me gaata dimii mee ko egapii ena too too gaayu ko seribu tahun mokoo" see mee mena nekeeniino yaato ko mée me egaano mee ena, Ogatamee me egaano mee ena, ena mee too se. Kisee kemaata mée me Yesus wiyaagoo meeno epee see wegayaa menaa kuwa ko mée me egayaa-egayaa doodoo wegayaa menaa too see kuwa nekeensi naadi menaa mee.⁹Mée noonaa me gaano, ’Tuhan Wa me Anii meemaata kaama kisee ukuwaata, kisee ukuwaaniyaata see mée aseta kiya ukuwaaniino yaato epee yaai’ see gaageekea kiya kisee taa. Ikii mée waa ena ma pedeo kigi see kuwa Waa be. Waa meeno taa kaboo mée uduma okoo me pedeo yuwa ekeata Ogatamee ma dimii menaa kaa too umiwoo, toowookea see kuwa Waa ede. Kisee kemaata Waa moga meeno taa, kisee koogo dimi mena animaata totaaki.3:9 Rom 2:4

¹⁰Kiya Tuhan Wa me meeno monaa mee ko oma masenaa see bagee miyaa see see kaata. Mee naagoo ebo tukuu tukuuka naaki epoo to taa kaata. Agiyoo-pagiyoo uduma miya ebo biyaa me pooneepeasiita, bedaa magaa to ma, kiyoo agiyoo-pagiyoo uduma miya taa kedaa taata.3:10 Mena nekeeniino yaato ko mena kegaa ena ma agoo, mee ko magaa to ma, mée me ukuwata agiyoo yuwa ma kuwa uduma pedeo kedaa taata, see menaa mee.3:10 Mat 24:42-43, 1Tes 5:2-3¹¹Agiyoo-pagiyoo uduma kisee pedeo kedaa taata kemaata ikii me umiino, toono kuwa pedeo taa see kaa Ogatamee ma dimii menaa kaa too umiwoo, toowoo taano gaano pedeo. ¹²Ikii kisee daamaa umiwoo, toowoo taaka too Ogatamee Wa me mona naagoo moga meei, moga meei see dimii kaa diitoo siwoo taai. Mee naagoo epoo to biyaa me pooneepeata kaama agiyoo-pagiyoo yuwa uduma miya tani kaa deeda-peeda taata. ¹³Kisee kaata kiya inii gaayu ko Ogatamee me epoo to ma, magaa to ma kuwa gipii kiyaabuu taata see mée aseta kemaata inii kuwa daamaa diitoo siwoo segeekea. Kiyoo ko mikee topoo see menaa kuwa too yayeewoo, yaukuwawoo taa see yoo.3:13 Why 21:1

¹⁴Kisee kaata kemaata ni me epa see bagee yuwa ikii kuwa ukuwaandaa taata agiyoo yuwa diitoo siwooka too ikii Ogatamee emaa dagii da kaa pedeo dimii, pedeo menaa taa see mée ii see nadeegi naaki ou see dimii mee kaa umiwoo, toowoo taai. Ikii Waa ma mena taa see kaa umiwoo, toowoo taai.3:14 1Yoh 3:2-3¹⁵Inii epoo Mée Tuhan Waa moga meeno taa, kisee koogo dimi mena animaata totaaki mee ko ikii keta ikii me pedeo dimii, pedeo menaa ekeata daba daagimaa peesea naadi moga meeno taa see kuwa nekeenii. Kuwa inii mée daba daagimaa peeyaano menaa kuwa ko Paulus wa me miya kapoge kaa kiebeamaami. Waa ko inii me Yesus yiba epa see mée, Ogatamee me waa esee ipi see dimii manta mée. ¹⁶Kuwa menaa kuwa wa me kapogee yuwa uduma yiba ebeagee see. Wa me ebeamaata menaa noonaa nekeeniino kana. Kuwa wa me menaa se nekeeniyaa bagee yuwa okoo me Yesus mikee gaano dimii mee pesee kaano taa, okoo kisee maki-makaa naadi kaama Paulus me menaa kuwa otoopa bebenataata koopoo kiyaayaa. Ogatamee me kapoge kaa menaa apanaa yuwa miya okoo me kisee kiyaabuu segee siyaa. Okoo kisee bagee kemaata okoo ekaato kaa pedeo menaa, pedeo agiyoo miyaabuu see.

Wodopasi menaa

¹⁷Kiya ni me epa see bagee yuwa ikii gaayu ko okoo kisee bagee ii see kuwa ikii ipi yoka daamaa nekeenii. Kuwa mikee menaa si yayeetaa see bagee yuwa okoo me koopoo see menaa kuwa ikii miya yayeeta kaama okoo yaato peeyaa yoka gaai. Ikii me eto pesee ma makii taa see kaa totaakea yoo kaama ikii okaayaa yoka ipiipi dii. ¹⁸Kisee kemaata inii daba mée daagimaa peeyaano Mée, inii epoo Mée Tuhan Yesus Kristus Wa me mée epa dimii mee kaa pesee kiwoo taai. Bedaa ikii me Waa ipi see dimii mee kaa miya daamaa iyawoo, ebo kiwoo taai. Waa ki niiyaapaagee siwoo siweei, eto kaama kisee too iminoo miya, iminoo miya. Amin. Kiyoo too.