1 Tesalonika

1 Tesalonika

Paulus me Tesalonika magaa kaa Yesus mikee gaata bagee yuwa paagoo petamanii yaebeamaata kapogee

Mee kapogee mee ko Paulus me Yesus me doometa menaa yadoonaa segee naadi kaama Tesalonika magaa kaa bagee paagoo miya eewegata. Kuwa wa me kiyoo ukuwanaa, peenaa seta menaa kuwa Kisah Para Rasul 17:1-9 yiba topa. Yesus mee mikee Ogatamee me ebo toowoosi naadi wigintaata Mée, idukaa kaama wegawoo seta Mée yoka, see menaa kuwa eewegagee naadi kaama Tesalonika magaa kaa bagee apanaa yuwa me kuwa menaa be kaa Paulus ma, waa ma epo enaataa bagee yuwa ma abagaapeata kaama Korintus magaa kaa peeta. Kiyoo kaama Paulus me kuwa Tesalonika magaa kaa Yesus mikee gaayaa bagee yuwa ikii paagoo kiitoga naaki ou see dimii mee ebo. Wa me okoo paagoo eewegaano taa menaa asiino see naadi mee kapogee mee yaebeamaata.

Yesus mee epoo to wodoo pakaa-seometa kaama wodoo tahun mée oga waa naa omemaata kaama tahun 51 mee yiba mokoo Paulus me mee kapogee yaebeamaata.

Mee kapogee yiba mena kutuu yuwa kuwa ko kisee:

1:1-10 Petamanii menaa ma, paamee menaa ma

2:1-12 Paulus nuwaa okoo me Tesalonika magaa kaa bagee paagoo eetoogee seta kuwa neke-nekee seta menaa

2:13–3:13 Paulus me okoo ou dimii ebo see kaa menaa ma, Timotius me pe-deegeeta eewegata menaa ma

4:1-12 Ogatamee me dimi wikii-wikii mée siwoosi naadi tupiino menaa

4:13–5:11 Tuhan meetagi yoka ipiipi diitoo siwoo taai naadi menaa

5:12-28 Wodopasi tupiino menaa ma, sembahyang menaa ma

¹Nii ko Paulus, bedaa Silas ma, Timotius ma inii wedo me ikii Tesalonika magaa kaa Yesus mikee gaayaa bagee yuwa paagoo kiebeage. Nagamee Ogatamee ma, Tuhan Yesus Kristus ma Ekea me aii kiepa dimii ma, koogo adumeta dimii ma kuwa ikii ma epo enaataa kiitoowoosi naadi kiasege.

Tesalonika magaa kaa bagee me Yesus mikee gaata kemaata paamee naadi menaa

²Inii ikii kaa Ogatamee paagoo kiiboo, paamee kisee too maamaa kiasegeeke, bedaa sembahyang miya ikii kaa maamaa kisegeeke. ³Inii ikii kineke-nekee see kaa Iniitaagi Ogatamee paagoo kiasegeeke mee ko ikii me Yesus mikee nao naadi kaama daamaa agiyoo yaukuwagee semea kuwa ma, ikii me mée epa kaa daamaa agiyoo aaukuwagee semea kuwa ma, bedaa inii uduma epoo Mée Tuhan Yesus Kristus mee kaa ikii dimi kotopiwoo, diitoo naadi kaama makii taa see kaa toogee semea kuwa ma uduma inii kisee kineke-nekee see kaa Waa paamee dimii mee ebo. ⁴Neebee nokaa yuwa, ikii ko Ogatamee me epa kigaayaa bagee yuwa, ikii Wa me daamaa kiwiginta bagee yuwa ii see kuwa inii ipi. ⁵Mikee, inii Yesus me daamaa doometa menaa yuwa ikii paagoo kiiwegagee seme kuwa ko mena me too se kiya inii esee mikee Roh Kudus me pesee kaa kiiwegagee seme. Ikii me kuwa mikee menaa yoka see gaata kemaata ikii Wa me daamaa kiwiginta bagee yuwa ii see kuwa inii kinekeeneme. Kuwa too se kiya inii daamaa dimii kaa kiiometaa, kiitotaa seme kuwa miya ikii mée deemea.1:5 1Kor 4:20⁶Inii ma, Tuhan ma inii me umiino, toono iyee kuwa ikii miya kisee obeewoo semea. Mee ko mée me ikii kiwegee-wegee semea kiya Roh Kudus Wa me ede see dimii mee ikii kineeta kemaata inii me ikii paagoo kiiwegata menaa kuwa ikii ede ma, ede ma masemaamea.1:6 Kis 17:5-9⁷Ikii kisee makii taa see kaa Yesus mikee gaawookea see menaa kuwa apanaa magaa kaa Yesus mikee gaayaa bagee yuwa miya yeemea. Makedonia wee kaa bagee yuwa ma, Akhaya wee kaa bagee yuwa ma okoo me kuwa ikii kaa menaa yuwa yeeta kaama ’Inii miya okoo see see umiwoo, toowoo taano daamaa’ see gaamea. ⁸Ikii me Yesus mikee gaano dimii mee ebo kemaata Makedonia wee kaa magaa ma, Akhaya wee kaa magaa ma kuwa magaa uduma kaa Tuhan me menaa mega, peega sekomeeta. Bedaa kuwa magaa kaa too se kiya woo maa apanaa magaa kaa miya. Kiyoo-kiyoo kuwa ikii me Yesus mikee gaano dimii mee ebo ii see menaa kuwa peeyaabuu senaa naadi kaama maga eebaa kaa bagee miya yeegea. Kuwa ikii kaa menaa yuwa okoo uduma yeemaagea yoka sikii, inii eto kaama wodoo kuwa ikii kaa menaa se eeweganaa taape. ⁹Okoo me ikii kaa kiweganaakea menaa kuwa ko ikii me inii daamaa badaa mée maamea see menaa kuwa miya ikii kaa kiweganaakea, bedaa ikii uduma makapaa ogatamee yuwa ekeata kaama mikee see Ogatamee mee kaa too, iminoo miya, iminoo miya toono too Mée Wa kaa too dimi maawookea yoka, see menaa kuwa miya ikii kaa kiweganaakea. ¹⁰Bedaa ikii me Ogatamee Yoopaa epoo to wodoo kaama moga isigi naaki ou see dimii kaa Waa maamaa diitoo taakea, see menaa kuwa miya ikii kaa kiweganaakea. Ogatamee me Waa boota kaama aya andoo peeyaata. Yesus mee ko epeekaa Ogatamee me kagoo kaa pedeo bagee ma enaataa inii se pedeo kisi naadi daba mée daagimaa peeyaatagi Mée mee.

Paulus nuwaa okoo me Tesalonika magaa kaa bagee yuwa paagoo eetoogee seta kuwa neke-nekee seta menaa

¹Neebee nokaa yuwa, inii ikii paagoo kiitoogee seme kuwa ko ketaa-ketaa see se, see kuwa ikii miya ipi. ²Mikee, inii ikii paagoo peemagaano taa kaboo Pilipi magaa kaa kaama mée me maagiyoo mée ekeata mée wegee-wegee semea.2:2 Kis 16:19-24, 17:1-9 Inii ikii paagoo meemaata kaama bedaa kiyoo bagee me miya kisee mée ekeasemea. Kisee kiya Ogatamee me inii weda taa see dimii mée manta kemaata inii Wa me etokaa daamaa menaa kiiwegagee seme see kuwa miya ikii ipi. ³Yesus mikee gaasi naadi menaa yuwa inii mée paagoo eeweganaa segee see mee ko inii ewo kaa makapaa menaa weganaa see se, inii pedeo ou see dimii kaa weganaa see miya se, mée deebaa see dimii mee miya inii taa. ⁴Ogatamee me inii Yesus me doometa menaa naweganaa taano daamaa yoka naadi kaama kuwa menaa yuwa inii kaa mée yadootaata. Inii kuwa menaa yaweganaa see kuwa ko mée me mée ede kisi naadi se. Inii me dimi menaa kuwa daamaa ye, pedeo ye see kuwa Ogatamee me mée nekeenigi yoka Wa too ede kisi naadi inii mena yaweganaa see. ⁵Mikee, Ogatamee me inii me dimi menaa kuwa mée ipi yoka inii ikii kideebaa see kaa mée ede kisi naadi menaa kuwa kiiwegaano taa, ikii me mée manegeekea naaki ou see dimii mee miya koogo kimaapeano taa see kuwa ikii miya ipi. ⁶Bedaa ikii me inii mée yaapaageekea naaki ou, apanaa bagee me miya inii mée yaapaageekea naaki ou, kisee ou dimii kuwa miya taa. Inii ko Kristus me menaa yadoonaa see bagee kemaata inii me ikii paagoo "Kisee mée yaukuwaai, kisee mée manii" see menaa omaago ma kisiyaa.2:4-6 Yoh 5:41-44, Kis 20:33, Gal 1:10⁷Kiya kisee dimii, kisee menaa kuwa miya inii taa. Okooto wa me yogaa yuwa daamaa muniyaa see see mokoo inii miya dimi mena adumeta kaa ikii paagoo kiitoogee seme. ⁸Inii me ikii kiepa dimii mee ebo kemaata inii Ogatamee me etokaa daamaa menaa kiiwegaano ede see dimii mee too se kiya inii me dimi mena ikii kaa kiekegatagaano ede see dimii mee miya ebo. ⁹Neebee nokaa yuwa, inii kuwa Ogatamee me etokaa daamaa menaa kiiwegagee seme kaboo inii me naano agiyoo, kisee gaano pedeo agiyoo yuwa ikii me mée manegee segee taano kuwa kana kaapea yoka naadi inii me too egapi yaato miya, daatooyiba yaato miya inii me gaano pedeo agiyoo edaano see naadi agiyoo kana ma, kana ma too ukuwagee seme see kuwa ikii miya ipi.2:9 2Tes 3:7-9

¹⁰Inii ikii Yesus mikee gaayaa bagee yuwa paagoo kiitoogee seme kaboo inii dimi topoo, inii kaa pedeo menaa taa, Ogatamee ma dimii menaa kaa too umiwoo, toowoo seme kuwa ikii miya mée deegee semea, Ogatamee Wa me miya kisee mée deegee simi. ¹¹Nagamee me yogaanii yuwa paagoo mena daamaa eewegataa, daamaa eetotaa siyaa mokoo inii miya ikii mée gakata kiitoogee seme see kuwa ikii ipi. ¹²Inii me maamaa kisegee seme menaa kuwa ko kisee: Ogatamee mee ko Wa too ebo mée eetoowoo naadi kaama Wa me esee ebo, esee asii-sege siyaa agiyoo yuwa kuwa ikii kaa kisi naadi mena kiogetaa see Mée yoka ikii Waa dimi mena kiwikimisi naadi umiwoo, toowoo taai, see menaa kuwa inii maamaa kisegee seme.

Paulus me ede ma, ede ma seta menaa

¹³Bedaa inii Ogatamee paamee dimii mee ebo. Inii Ogatamee me menaa kiiwegagee seme kaboo da ikii me kuwa menaa yuwa mée me menaa too see gaano taa kiya Ogatamee me menaa yoka naadi daamaa masemaamea. Mikee, kuwa menaa kuwa ko Wa me menaa too. Kuwa menaa kuwa me ikii Yesus mikee gaayaa bagee yuwa ikii dimi mena daamaa kikiyaabuu siwooka yoka inii se daata kisee too Ogatamee yaapaagee siwoo segeeke. ¹⁴Neebee nokaa yuwa, mée me ikii kiwegee-wegee semea mee ko Yudea wee kaa bagee yuwa, kiyoo Ogatamee me daamaa wigintaata kaama Kristus Yesus ma dimi aagadi-maagadi see bagee kuwa Yahudi bagee me wegee-wegee seta see see ikii miya ikii me magaa kaa bagee yuwa me kisee kiwegee-wegee semea.2:14 Kis 17:5-9¹⁵Kuwa Yahudi bagee yuwa me Tuhan Yesus ma, nabi bagee yuwa ma kuwa patameta, bedaa inii miya mée be kaa kisee mée wegee-wegee semea. Kuwa bagee kuwa Ogatamee dimi wikii-wikii siyaano dimii mee taa see bagee yuwa too, mée uduma okoo ma yape see bagee yuwa too. ¹⁶Inii me mée tomaa-tomaa apanaa yuwa paagoo eeweganaa seta menaa kuwa okoo me be. Mée tomaa-tomaa okoo daba daagimaa peesi naadi menaa kuwa eewegaano be kaa taamege-taamege mée segeekea. Kisee kemaata okoo me pedeo ukuwagee siyaa yuwa eebaa kedaa siwoo naadi kaama Ogatamee me kagoo dimii mee okoo kaa esee ebo kega.

Paulus me okoo pe-deega naaki ou see dimii gaata menaa

¹⁷Neebee nokaa yuwa, inii ikii paagoo kiitoogeeka too mée me mée abagaapeata kaama eto inii beesekaa tope kiya dimi mena yaato beesekaa se, ikii ma enaataa tope. Inii ikii ma aawode seta kaama eebaa umiino taa kaboo inii esee kineke-nekee naadi kaama ikii pe-kiitoge naaki ou dimii mee esee ebo keme. ¹⁸Mikee, inii ikii paagoo pakaano dimii mee ebo, Paulus anii miya kaagaa wiya waa naa pakaapa see dimii mee gaageeka kiya Iblis me mée taamege-taamege segee simi. ¹⁹Kisee kiya inii epoo Mée Tuhan Yesus Waa wiyaagoo meetagi naagoo inii Wa ikigii to kaa ede ma, ede ma taatagea nao naadi eto diitoo siwooke kuwa ko ikii kaa, se maa? Bedaa mee naagoo inii mumo kaa onee ede ma, ede ma masiitage kuwa miya ikii kaa, se maa? ²⁰Mikee, ikii kaa inii esee ede ma, ede ma siwooke.

Timotius me mena pe-yeegeeta kaama Paulus me ede keta menaa

¹Kisee kemaata inii kineke-nekee taano ebo, ikii daamaa topea ye, pedeo topea ye naadi kaama Silas ma enaa too Atena magaa kaa toogee taano daamaa see gaama, ²Timotius wa too ikii paagoo pooi see aseme. Waa inii ma Yesus yiba ena kenaa bagee, inii ma epo enaataa Kristus me doometa menaa daamaa yaweganaa see mée. Ikii me Yesus mikee gaano dimii mee makii taa, daamaa pesee kesea naadi waa ikii paagoo pooi see aseme. ³Kuwa mée me inii ae-wae mée siyaayaa kuwa ko Ogatamee me inii kuwa agiyoo miya doosi naadi mée daamaa wigintaata see kuwa ikii miya ipi. Ikii kuwa agiyoo kuwa kaa se makiisea naadi waa ikii paagoo pooi see aseme.3:3-4 Plp 1:29, 2Tim 3:12⁴Inii ikii paagoo kiitoogeeka too inii me ikii paagoo "Mée me kisee inii mée yaukuwaapea, kisee mée wegee-wegee taapea" see kisegee seme, bedaa mikee, kuwa wodoo kisee mée yaukuwamea, see kuwa ikii miya ipi. ⁵Kisee kemaata ikii me Yesus mikee gaano dimii kuwa pesee ye, mée gaadee see mée me kigaadee naadi ikii mikee menaa wisintaagea ye naadi kaama anii ikii kaa kigaagaa ebo.3:5 2Kor 11:2-3 Inii me kitopegee seta menaa kuwa ketaa-ketaa taapa naadi Timotius mee ikii paagoo pooi see aseme.

⁶Eto ko Timotius mee ikii kideegeeta tupi. Ikii me Yesus mikee gaano dimii ma, epa dimii ma kuwa ebo, kisee menaa daamaa mée eewegagi. Ikii me inii mée epa kaa mée neke-nekee, inii mée deega naaki ou, kisee dimii mée gaataakea see menaa kuwa miya mée eewegagi. Mikee, inii miya ikii kideega naaki ou see dimii mee ebo. ⁷Neebee nokaa yuwa, ikii me Yesus mikee gaano dimii mee ebo see menaa kuwa mée eewegagi naaki inii me ikii kaa kigaagaa taa see dimii mee siki. Mée me inii mée wegee-wegee naadi ae-wae taakea kiya kuwa mée eewegagi menaa kuwa kaa inii dimi mena mée tamooniyaagi. ⁸Ikii mikee Tuhan ma dimi aagadi-maagadi naadi makii taa see kaa totaakea kuwa me inii miya dimi mena anoogeedaa naadi kaama daamaa totaake. ⁹Mikee, inii ikii kaa ede see dimii mee esee ebo kemaata Ogatamee paagoo kiiboo, paamee asiino menaa kuwa se sikiiniyaayaa. ¹⁰Inii ikii kidiino see naadi maamaa egapi yaato miya, daatooyiba yaato miya sembahyang segeeke. Bedaa inii ikii paagoo apanaa menaa kitupimaata kaama ikii me Yesus mikee gaano dimii mee ebo kisi naadi miya Ogatamee paagoo maamaa asegeeke.

¹¹Iniitaagi Ogatamee ma, inii epoo Mée Tuhan Yesus ma Ekea me inii ikii paagoo kimeeno etaa mee daamaa mée yamasisi naadi kaama asegeeke. ¹²Inii me ikii epa kigaano dimii mee ebo kega see see ikii miya ikii me epa aagaa taano dimii mee ebo kiwoosi naadi, bedaa apanaa bagee uduma paagoo miya ikii me epa dimii mee ebo kiwoosi naadi, kisee Tuhan me daamaa kikiyaabuu siwoosi naadi inii sembahyang kisegeeke. ¹³Bedaa Wa me ikii dimi mena daamaa pesee kikiyaabuu siwoo see, kisee too Tuhan Yesus Wa me daamaa wigintaata bagee yuwa ma epo enaataa meetagi naagoo ikii Iniitaagi Ogatamee ikigii to kaa ikii kaa pedeo dimii, pedeo menaa ena ma taa kesea naadi sembahyang kisegeeke.

Ogatamee me dimi wikii-wikii mée siwoosi naadi tupiino menaa

¹Neebee nokaa yuwa, kuwa mee wodoo menaa gaayu ko inii paaya Tuhan Yesus ma dimi aagadi-maagadi see bagee yoka eto inii maamaa kisiino ko kisee: Inii me ikii Ogatamee me dimi wikii-wikii kisiwoosi naadi kitopegee seta menaa kuwa doowoo, ukuwawoo taano gaano pedeo naadi kisege. Mikee, ikii kuwa menaa eto daamaa doowoo, ukuwawookea kiya eto kaama wodoo miya ikii kisee too esee maamaa ukuwawoo, umiwoo taai see kisege. ²Kuwa inii me Tuhan Yesus me pesee da kaa kisi-manee seme menaa kuwa ikii ipi. ³Ogatamee me kisee daamaa, kisee ede see gaayaa agiyoo kuwa ko kisee: Ikii umiino, toono kuwa ikii ekaato wigintaata pedeo see taa, otoopa api doonaa, paayogaa doonaa, kisee koo senaa see kuwa taa.4:3-6 1Kor 6:18-20, Ibr 13:4⁴Dimi topoo see bagee ii see kigaasi yoka wa me apii, wa me apii ma too enaataa pedeo taa, daamaa too umiwoo, toowoo taai, ⁵mée tomaa Ogatamee ewo see bagee yuwa me api ou, paayogaa ou see dimii kaa otoopa omenaa, peenaakea see see se. ⁶Ikii Yesus yiba ena kenaa bagee yoka kisee pedeo agiyoo se aakoo taai, mée me apii yaekeasii, se deebaa taai. Tuhan Wa me okoo kisee agiyoo koo senaa see bagee yuwa kaa pedeo yadootaayaa Mée yoka kuwa agiyoo ikii gaamaasea naadi inii idukaa miya omaago ma kisegee seta. ⁷Ogatamee Wa me Ni paagoo nameei see mée aseta mee ko inii otoopa pedeo dimi-pami kaa umiwoosi naadi se kiya daamaa too, pedeo taa see dimii kaa too umiwoo, toowoosi naadi inii Wa me bagee mée kiyaata.4:7 1Pet 1:14-16⁸Kisee kemaata kuwa inii me kisege menaa wisintagaa see bagee kuwa ko okoo me inii mée wisintagaakee se kiya Roh Kudus kineeta Mée Ogatamee mee wisintagaakee.

⁹Yesus yiba ena kenaa bagee yuwa epa aagaa taano mee ko Ogatamee me ikii epa aagaa siyaa menaa kuwa kitupimaata yoka inii kuwa menaa bedaa se kiebeanake.4:9 Yoh 13:34¹⁰Neebee nokaa yuwa, Makedonia wee kaa magaa uduma kiyoo-kiyoo Yesus mikee gaayaa bagee kuwa ikii me mikee epa kegea kiya ikii bedaa esee maamaa epa kiwoo taai see kuwa inii maamaa kisege. ¹¹Bedaa inii me kisiino menaa ena miya kisee: Ikii daamaa koogo umiwoo, toowoo taai, a doodoo, a doodoo yuwa too daamaa dii. Ikii nekee agiyoo kuwa ’Ni me too ukuwaapa’ see dimii gaawoo, umiwoo taai. Inii idukaa kuwa menaa kisegee seme.4:11-12 2Tes 3:12¹²Ikii kisee dimii gaawoo, umiwoo siyu ko Yesus yaato taa see bagee yuwa me miya ikii "Dimi topoo see bagee yuwa ii" see kigaayaa, bedaa ikii nekee agiyoo kuwa sikii kiyaa, apanaa bagee paagoo se idimenaa siyaa, inii kisee kisegee seme.

Tuhan meetagi naagoo badaa mée magaatagi menaa

¹³Neebee nokaa yuwa, eto ko ikii me ’Boota bagee kuwa kaasee ukuwaaniitagea?’ see dimii mee gaayu ko apanaa bagee okoo me mée boota kaama wodoo ewo, se diipea naadi kaama maamaa yegee siwoo siyaa. Ikii miya kisee ewo kaa ukuwayaa naadi inii me ipi kikiyaanake. ¹⁴Kuwa ko Yesus mee boota kaama aya andoo peeta see menaa kuwa inii mikee menaa yoka see dimii gaawookea. Bedaa kisee miya okoo Yesus mikee gaawoo naadi kaama boota bagee kuwa Yesus meetagi naagoo Ogatamee me okoo aya andoo peeyaabuu seta kaama badaa magaatagi see menaa kuwa miya inii mikee menaa yoka see dimii gaawookea. ¹⁵Eto ko Tuhan me mée aseta menaa ena inii kisiinake, mee ko kisee: Waa meetagi naagoo inii topea bagee yuwa inii keta pakaatagea, kuwa boota bagee yuwa uuto kisee se kiya ¹⁶mee naagoo Tuhan me mena ebo kaa menaa ma, malaikat bagee yuwa okoo me tuku mée me menaa ma, bedaa Ogatamee me ebo puusee menaa ma kuwa ebo menaa-menaa taatagea. Kuwa kaboo da Waa epoo to wodoo kaama isiitagi, bedaa Kristus mikee gaawoo naadi kaama boota bagee yuwa okoo keta aya andoo peedaa taatagea.4:15-16 1Kor 15:51-52¹⁷Mee kaama wodoo inii eto tuyaa bagee yuwa miya okoo ma enaataa badaa mée maadoota epoo to yupii, magaa to yupii sinu uwaa yiba Tuhan ma aadee taatagea. Badaa mée maageeta kaama inii Tuhan ma enaataa kisee too iminoo miya, iminoo miya toowoo taatagea. ¹⁸Kisee kemaata ikii dimi mena daamaa pesee aakiyaabuu taano see naadi kuwa menaa yuwa daamaa aasee siwoo taai.

Tuhan meetagi yoka maamaa diitoo siwoosi naadi menaa

¹Neebee nokaa yuwa, eto ko Yesus mee epee meepi ye, moga meepi ye, see menaa kuwa inii se kiebeanake. ²Tuhan me mona naagoo ko inii ewo, oma maseekee bagee daatooyiba yaato miyaa see see Waa miya kisee meetagi kaata see kuwa ikii miya ipi. ³Mée me "Inii daamaa-daamaa umiwoo, toowoo taakea, weda agiyoo taa" see menaa wegaatagea kaboo kisee ki pedeo kiyaano agiyoo okoo kaa agoo kedaa taata. Kadapoo yago apii yoga kabaano see kaboo kisee ki yoga boodi abaayaa see see okoo kaa miya pedeo agiyoo kisee ki meanee taatagea, daba se daagimagaatagea.5:2-3 Luk 12:39-40, 2Pet 3:10, Why 3:3, 16:15⁴Kiya neebee nokaa yuwa, ikii gaayu ko kisee taa. Ikii digiyoo yiba ewo kaa toogee see bagee yuwa se. Mee naagoo ko oma masiyaa mée kisee ki miyaa mokoo kaata kiya ikii mee naagoo dimi se oogaatagea. ⁵Ikii uduma dimi mena awee da kaa toogee see bagee, egapi kaa toogee see bagee mokoo. Inii dimi mena digiyoo yiba toogee see bagee se, daatooyiba yaato bagee se. ⁶Kisee kemaata inii ko apanaa bagee see see se. Okoo mee naagoo ewo kaa toomoo umiyaa bagee yuwa mokoo. Inii gaayu ko daamaa ipi kaa dimi gaamaata kaama daamaa niideewoo taai.5:5-6 Yoh 12:36, Rom 13:11-13, Ep 5:8-9⁷Toomoo ometaa see bagee kuwa daatooyiba yaato toomoo omegee siyaa, bedaa boomagaa see uwoo notaa see bagee kuwa daatooyiba yaato boomaga-baamaga siyaa. ⁸Kiya inii gaayu ko dimi mena awee da kaa toogee see bagee yuwa, egapi kaa toogee see bagee kemaata inii ipi kaa daamaa niideewoo, umiwoo taai. Toopusi naadi agiyoo maanaa siyaa see see inii miya dimi mena toopusi naadi agiyoo niimaanaa taai. Kuwa ko ikigii to kaa maanaa siyaa mokoo inii miya Yesus mikee gaawoo see dimii ma, mée epa dimii ma kuwa niimaanaa taai. Bedaa mumoo to kaa maanaa siyaa mokoo inii miya ’Ogatamee me daba nadaagimaa peeyaatagi nao’ see dimii mee miya niimaanaa taai.5:8 Ep 6:13-18⁹Inii ko Ogatamee me inii pedeo mée kiyaano see naadi mée wigintaata bagee yuwa se kiya inii epoo Mée Tuhan Yesus Kristus doodoo inii daba mée daagimaa peeyaano see naadi daamaa mée wigintaata bagee yuwa. ¹⁰Waa meetagi naagoo inii boota kaama miya, bogaano taa kaa miya inii Waa ma enaataa umiwoo, toowoo segeesi naadi inii kaa mée yaboota.5:10 Rom 14:8-9¹¹Kisee kemaata ikii dimi mena daamaa pesee aakiyaabuu taano see naadi kuwa menaa yuwa daamaa aasee siwoo taai. Mikee, ikii kuwa menaa daamaa aasee taakea yoka bedaa kisee too aasee siwoo taai.

Wodopasi tupiino menaa

¹²Neebee nokaa yuwa, ikii paagoo tuku-tuku see bagee yuwa kuwa ebo ekeasii see kisege. Okoo Tuhan Wa me agiyoo omaago ma yaukuwataa, gaamaasi naadi menaa daamaa kitopetaa, kisee kiukuwagee see bagee yuwa yoka ¹³okoo me kiukuwagee see agiyoo kuwa kaa okoo kiiboo, epa nao naadi ebo ekeasii. Ikii aaemee-emee see kaa umiwoo, toowoo taai.

¹⁴Neebee nokaa yuwa, bedaa inii maamaa kisiino ko: Ikii paagoo agiyoo ukuwaano be see bagee kuwa okoo gaamaasi yoka asii. Weda, gaagaa see dimii agoo see bagee kuwa miya dimi mena daamaa pesee kiyaai, dabaa see bagee yuwa okoo kaa tabogeai, bedaa ikii mée uduma paagoo dimi animaata kaama daamaa omegee taai. ¹⁵Mée me kipedeo kiyaayu ko modee se masisi yoka dii. Ikii daamaa agiyoo too aaukuwagee siwoo taai, apanaa bagee kaa miya daamaa agiyoo yaukuwagee taai.5:15 Rom 12:17-21, 1Pet 3:9

¹⁶Dimi menaa da ede ma, ede ma siwoo taai,5:16 Plp 4:4¹⁷sembahyang se daayaata kisee too ukuwawoo taai,5:17 Rom 12:12¹⁸bedaa agiyoo-pagiyoo uduma yiba Ogatamee kiiboo, paamee see asegee taai. Kuwa uduma Ogatamee me ede kiyaa agiyoo yoka ikii Kristus Yesus ma dimi aagadi-maagadi naadi kaama yaukuwagee siwoo taai.5:18 Ep 5:20

¹⁹Roh mee se modeai.5:19 "Roh mee se modeai" see menaa mee ko Roh me asiyaa menaa ma, Wa me mée kaa daamaa pesee mée yaukuwayaa agiyoo yuwa ma kuwa si yawisintagaai, se taamegee taai, see menaa mee.²⁰Roh me mée paagoo kisee eewegaai naadi ase-manee siyaa menaa kuwa aii menaa yoka naadi kaama wisintagaakee se. ²¹Kuwa kiiwegayaa menaa kuwa uduma mikee Roh me menaa ye, mée me menaa too ye naadi daamaa wigineai. Wigintaata kaama mikee menaa yuwa too peneasii,5:20-21 1Yoh 4:1²²pedeo menaa, pedeo agiyoo uduma ekeasii, wisintagaai.

²³Koogo adumeta dimii mée maniyaa Mée Ogatamee Wa me ikii daamaa wa too kiwigintaata pedeo ena ma taa see bagee kikiyaasi naadi kiasegeeke. Ikii dimi menaa da ma, dimi noogaa da ma, maa da miya uduma daamaa too kikiyaabuu siwoo see kisee too inii epoo Mée Tuhan Yesus Kristus meetagi yoo too kisee daamaa kiukuwawoosi naadi kiasegeeke. ²⁴Waa ko ikii Ni paagoo nameei see kisetaa see Mée yoka Wa me taa ma taa kisee daamaa kiukuwawoo taapi.5:23-24 Plp 1:6-10, 1Tes 3:12-13

²⁵Neebee nokaa yuwa, ikii inii kaa sembahyang mée yasegee taai. ²⁶Ikii paagoo Yesus yiba ena kenaa bagee yuwa uduma epao see mée yaasii, okoo ebe mée yanuunuu taai.

²⁷Mee kapogee kaa menaa kuwa Yesus yiba ena kenaa bagee uduma paagoo eewegaai. Anii Tuhan me neeta pesee da kaa anii omaago ma kisega.

²⁸Inii epoo Mée Tuhan Yesus Kristus Wa me aii kiepa dimii mee ikii ma epo enaataa kiitoowoosi naadi kiasega. Kiyoo too.