1 Yohanes
Yohanes me petamanii yaebeamaata kapogee
Mee kapogee mee ko Yohanes me Yesus mikee gaata bagee paagoo petamanii yaebeamaata kapogee. Yohanes mee ko Yesus me topenaa seta bagee gaasi ma wiya kuwa mée ena.
Wa me yaebeamaata menaa kuwa ko Ogatamee Yoopaa mee idukaa kaama nabi bagee me "Ebo Kristus mee, Ogatamee me daamaa wigintaata Mée mee ebo tootagi" see wegawoo seta kiya mée noonaa me ’Yesus Waa Ebo Kristus mee se, Waa mée tomaa ena keta se’ see gaata kaama koopoo see menaa weganaa seta. Kisee kemaata Yohanes me kuwa koopoo see menaa gaamaasi naadi mee kapogee yaebeamaata.
Yesus mee ko inii aya mée tuyaabuu siwoo taa see Mée yoka inii epa aagaa taano ma, Wa me menaa yayiino ma kuwa daamaa ukuwawoo taano gaano pedeo, kuwa koopoo see menaa weganaa see bagee yuwa see see se, see menaa kuwa Yohanes me yaebeamaata.
Yesus mee epoo to wodoo pakaa-seometa kaama wodoo tahun bado ena waa naa omemaata kaama tahun 90 mee yiba mokoo mee kapogee yaebeamaata.
Mee kapogee yiba mena kutuu yuwa kuwa ko kisee:
1:1-4 Petamanii menaa
1:5–2:17 Ogatamee mee awee yago Mée kemaata inii miya awee da kaa umiwoo, toowoo taai naadi menaa
2:18-27 Kristus ma yape kiyaa see bagee yuwa gaamaasi naadi menaa
2:28–3:24 Inii Ogatamee me yogaa mée kiyaata yoka Waa ma dimii menaa kaa too umiwoo, toowoo taai naadi menaa
4:1-6 Roh me menaa ma, makapaa menaa ma kuwa wiginisi naadi menaa
4:7-21 Mée epa aagaa siwoo taai naadi menaa
5:1-12 Yesus Kristus mee ko mikee Ogatamee Yoopaa ii see gaakee kaa mée me magaa da kaa iyee-payee kuwa daba, peedi kiyaayaa menaa
5:13-21 Wodopasi menaa
1Aya mée tuyaabuu siwoo taa see Mée Yesus mee awee da kaa keta menaa
1Esee petamanii kaama umiwoo, toowoo see Mée, aya mée tuyaabuu taano menaa epoo Mée mee inii Wa me menaa yeegee seta, inii emaa me Waa deegee seta, bedaa inii deegee naadi kaama yagaa me Waa yaadee seta, inii me Waa kisee koo segee seta. Kuwa Wa me inii daamaa aya mée tuyaabuu taano see naadi mée ase-manee seta menaa kuwa kiebeataake.1:1 Yoh 1:12Aya mée tuyaabuu siwoo taa see Mée mee inii paagoo awee da kaa mée deeyaata. Inii me deeta-deeta yuwa eto kiiwegage. Waa ko iminoo miya, iminoo miya toono too Mée, esee petamanii kaama Nagamee ma enaataa toowoo seta Mée mee, see kuwa inii kiiwegage.1:2 Yoh 1:143Ikii ma inii paaya enaataa dimi aagadi-maagadi taano see naadi kuwa inii me deeta-deeta yuwa ma, inii me yeeta-yeeta yuwa ma kuwa uduma kisege. Nagamee ma, Yogamee Yesus Kristus ma, inii ma enaataa dimi aagadi-maagadi naadi topea. 1:3 Yoh 17:214Inii me ede see dimii mee esee ebo kisi naadi kuwa menaa yuwa kiebeage.1:4 Yoh 15:11, 16:24
Ogatamee mee awee yago Mée kemaata inii miya awee da kaa umiwoo, toowoo taano see naadi menaa
5Ogatamee Yoopaa Wa me mée aseta menaa yuwa kuwa inii bedaa ikii miya kisiinake, kuwa ko kisee: Ogatamee mee ko awee yago Mée, Wa kaa digiyoo miya taa, pedeo miya ena ma taa.1:5 Mzm 27:16Inii me "Anii Waa ma dimi aagadi-maagadi naadi umiwoo, toowoo see mée" see kuwa inii me wegayaa kiya inii dimi mena digiyoo yiba umiwoo, toowoo siyu ko kuwa inii me wegayaa menaa kuwa makapaa menaa too, bedaa inii me umiino, toono kuwa miya mikee see taa.1:6 1Yoh 2:4, 4:207Ogatamee Waa awee yago Mée kemaata Waa pedeo taa see kaa umiwoo, toowoo taa see mokoo see see inii miya kisee umiwoo, toowoo siyu ko ikii ma inii paaya enaataa dimi aagadi-maagadi siwoo siyaa, bedaa inii me pedeo dimii, pedeo menaa uduma Ogatamee Yoopaa Wa me tadaa me mée yawetogekomee siyaa.1:7 Yoh 12:35-36, Ep 5:8, Why 7:14
8Inii me "Anii pedeo dimii, pedeo menaa ena ma taa kaa umiwoo, toowoo see mée" see kuwa inii wegayu ko inii ewo kaa wegayaa, inii ekaato deebaa siyaa, inii mikee menaa dimi yiba toono taa. 9Inii me pedeo yuwa kuwa "Anii kisee pedeo ukuwaga yoka" see awee da kaa wegayu ko inii me pedeo yuwa uduma Wa me epa mée yaekeasiyaa, Wa me mée yawetogekomee siyaa.1:9 Mzm 32:5, 51:2-4 Ogatamee Waa dimi topoo see Mée, Wa me "Ikii me pedeo yuwa epa kiekeasiipa" see mée aseta yoka taa ma taa epa mée yaekeasiyaa. 10Inii me "Anii pedeo agiyoo ena ma ukuwaano taa see mée" see kuwa inii wegayu ko inii Ogatamee Waa mée deebaa see Mée see yawegayaa mokoo,1:10 Rom 3:10-12 bedaa Wa me menaa inii dimi yiba seemaano taa keekee.1:10 Ogatamee me menaa yiba inii mée tomaa uduma pedeo agiyoo ukuwaano taa bagee ena ma taa see ebeamaata kemaata mée waa ena me "Anii pedeo agiyoo ena ma ukuwaano taa see mée" see wegayu ko Ogatamee me menaa kuwa makapaa menaa see yawegayaa mokoo.
2Kristus mee ko inii me pedeo yuwa Ogatamee paagoo mée yawegaano Mée kaa menaa
1Ni me yogaa yuwa, ikii pedeo se ukuwasea naadi anii kuwa menaa yuwa kiebeaga. Kiya inii pedeo agiyoo ukuwayu ko Nagamee paagoo inii mena mée yawegaano Mée agoo, mee ko dimi topoo too see Mée Yesus Kristus mee.2:1 Rom 8:33-34, 1Tim 2:52Inii me pedeo yuwa Ogatamee me epa mée yaekeasi naadi Yesus Kristus mée yaboota. Wa me mée yaboota mee ko inii me pedeo yuwa kuwa kaa too se kiya magaa da kaa bagee uduma okoo me pedeo yuwa kaa miya mée yaboota.2:2 Rom 3:25
3Inii mikee Waa ipi see bagee yuwa ii see kuwa inii nekeeniino mee ko Wa me mée aseta menaa yuwa inii daamaa yayeetaa, yaukuwataa see gaayu too nekeeniyaa. 4Mée ena me "Anii Waa ipi see mée" see wegayaa kiya Ogatamee me menaa si yayeeyu ko wa me wegayaa menaa mee makapaa menaa, waa mikee menaa yuwa dimi yiba taa.2:4 Tit 1:165Okoo kisee bagee kiya Wa me menaa daamaa yayeetaa see bagee kuwa mikee ki Ogatamee epa gaataa see bagee yuwa.2:5-6 Yoh 14:21, Ep 5:1-2 Inii Waa ma dimi aagadi-maagadi siyaa bagee yuwa ii see kuwa daamaa nekeeniino mee ko kisee: 6"Anii Waa ma dimi aagadi-maagadi naadi kaama umiwoo, toowoo see mée yoka" see wegayaa bagee kuwa Yesus me daamaa ukuwata peeta yuwa see see okoo miya yaukuwawoo taano gaano pedeo.
Etokaa Kristus me doowoo seta menaa
7Ni me epa see bagee yuwa, kuwa kiebeaga menaa kuwa ko eto too Wa me mée aseta menaa kuwa too se kiya ikii idukaa yeesekea menaa, ikii petamanii Yesus mikee gaata kaama doowoo seta menaa kuwa.2:7 Yoh 13:348Kuwa idukaa Wa me mée aseta menaa kiya etokaa menaa mokoo kiebeaga. Eto kiipaa digiyoo mee taa kedaa siwooka, bedaa Ogatamee me awee agoo da mee daamaa wogaamaayu siwooka yoka kuwa menaa yuwa mikee etokaa menaa miya ii see kuwa inii nekeeniyaa.2:8 Rom 13:11-12 Kuwa ko Kristus me ukuwata peeta kuwa kaa miya, bedaa ikii me daamaa agiyoo aaukuwagee taa see kuwa kaa miya mikee etokaa menaa yoka, see nekeeniyaa.
9Mée ena me wegaano, "Ogatamee me awee agoo da mee ani kaa nakimega, kisee omegee, toogee see mée to" see wegayaa kiya waa ma Yesus yiba ena kenaa bagee ena be kiyu ko kisee wa kaa nakimaano taa, waa digiyoo yiba too toowoo siyaa. 10Yesus yiba ena kenaa bagee epa gaawoo see mée mee ko awee da kaa umiwoo, toowoo siyaa, wa yiba pedeo kiyaayaa agiyoo ena ma taa.2:10-11 Yoh 11:9-1011Yesus yiba ena kenaa bagee ena be see mée gaayu ko waa digiyoo yiba toogee siyaa, dimi mena pedeo kedaa naadi kiyoo peega, kiyoo peega kisee ewo kaa peenaa siyaa bagee see see mokoo.
12Yoga yuwa, wae. Anii mee kapogee kiebeaga mee ko
Wa too ekaa yago Mée Yesus me ikii me pedeo ukuwata yuwa epa kiekeasigi kuwa me kiebeaga.
13Neataagi nokaa yuwa, wae.
Esee petamanii kaama toowoo see Mée mee ikii ipi kemaata kiebeaga.
Neebee nokaa yuwa, wae.
Pedeo yago mée Iblis mee ikii me daba kiyaagea kuwa me kiebeaga.2:13 Ep 6:10-12, 1Yoh 5:4-5
14Bedaa yoga yuwa,
Nagamee mee ikii ipi kemaata kiebeaga.
Bedaa neataagi nokaa yuwa,
esee petamanii kaama toowoo see Mée mee ikii ipi kemaata kiebeaga.
Bedaa neebee nokaa yuwa,
ikii Yesus mikee gaano dimii mee omaago, Ogatamee me menaa ikii yiba kiitoowoo naadi kaama pedeo yago mée Iblis mee umina daba, peedi kiyaagea kuwa me kiebeaga.
Magaa da kaa mée me ou gaata-gaata yuwa kuwa se gaasi naadi menaa
15Magaa da kaa iyee ma, magaa da kaa agiyoo ma kuwa ou se gaai. Kisee dimii gaayaa bagee kuwa Nagamee ou see dimii mee taa. 16Magaa da kaa agiyoo ou gaayaa dimii kuwa manii to ko Nagamee kaa se. Mée me iyee kaa ou see dimii ma, emaa me deeta kaama ’Anii naaki ou’ see dimii ma, taba deekee dimii ma kuwa uduma manii to ko magaa da kaa mée me dimi-pami kaa too.2:15-16 Rom 12:2, Kol 3:2, Tit 2:12, Yak 4:417Magaa da kaa iyee ma, magaa da kaa ou dimi-pami ma kuwa uduma taa kedaa taaka kiya Ogatamee me daamaa, ede see gaayaa agiyoo yuwa yaukuwawoo, umiwoo see bagee kuwa kisee too iminoo miya, iminoo miya toono too siyaa.
Kristus ma yape kiyaa see bagee yuwa agoo yoka see kuwa nekeensi naadi menaa
18Ni me yogaa yuwa, wodopasi yaato kaano see koo taaka yoka "Kristus ma ebo yape masiino mée mee agoo kaatagi" see menaa kuwa ikii yeemea. Eto miya Kristus ma yape kiyaa see bagee eebaa agoo kedaaka. Kuwa me kaama wodopasi yaato ekaapa ii see kuwa inii nekeenegea. 19Kuwa bagee yuwa idukaa inii Yesus mikee gaayaa bagee paagoo mée eetoogee seta kiya inii mée be kaa ekeata peemea, okoo inii yaato bagee se. Okoo mikee inii yaato bagee naaki se peeta inii ma epo enaataa mée eetoowoo siyaa. Okoo mée eetoono taa kemaata inii yaato bagee se yoka, see kuwa nekeeniyaa.
20Ikii gaayu ko Wa too wigintaata pedeo ena ma taa see Mée Wa me Roh mee ikii kaa kineeta kuwa me ikii uduma mikee menaa wigineano ipi see bagee. 21Anii kapoge kiebeaga mee ko ikii mikee menaa ewo naadi kaama se kiya ikii mikee menaa ipi kuwa me kiebeaga. Makapaa menaa ma, mikee menaa ma kuwa enaataa see kuwa iyo naadi kiebeaga.
22Kuwa makapaa menaa wegataa see bagee kuwa maamee? Okoo ko "Yesus mee Ebo Kristus mee se" see wegataa see bagee yuwa, Kristus ma yape kiyaa see bagee yuwa too. Okoo Nagamee ma, Yogamee miya wisintagaa see bagee yuwa.2:22 2Tes 2:723Kuwa Ogatamee Yoopaa se yoka naadi wisintaayaa bagee kuwa Nagamee miya wisintaayaa. "Mikee Ogatamee Yoopaa yoka" see menaa wegataa see bagee kuwa Nagamee miya epo enaataa daamaa peneasiyaa.
24Ikii gaayu ko kuwa petamanii kaama yeesekea menaa, Kristus Wa kaa menaa kuwa ikii dimi yiba daamaa kiitoono gaano pedeo. Kuwa menaa ikii yiba kiitoowoo siyu ko ikii Yogamee yiba miya totaa, Nagamee yiba miya totaa, kisee eeumiwoo, toowoo siyaa. 25Wa me mée aseta menaa mee ko kisee: "Ikii iminoo miya, iminoo miya toowoo taapea" see mée aseta.
26Kuwa "Waa Ebo Kristus mee se" kisee makapaa menaa me kideebaa taakea bagee kuwa ikii gaamaasea naadi mee kapogee kiebeaga. 27Ikii gaayu ko Kristus Wa me Roh mee ikii yiba kiawiyaata kaama kiitotaaki yoka mée me apanaa menaa kitopeekee se kiya ikii nekeeniino gaano pedeo menaa kuwa uduma Wa me kisi-manee taaki. Kuwa menaa kuwa mikee menaa too, makapaa menaa ena ma taa yoka kuwa Roh me kitopegee see menaa yuwa daamaa peneata Kristus ma dimi aagadi-maagadi siwoo taai.2:27 Yoh 14:26
Inii Ogatamee me yogaa mée kiyaata yoka Waa ma dimii menaa kaa umiwoo, toowoo taai naadi menaa
28Ni me yogaa yuwa, Kristus meetagi naagoo inii Wa paagoo weda taa uu kaano see naadi Waa ma dimii menaa kaa umiwoo, toowoo taai. 29Kristus mee ko Ogatamee me menaa uduma yayeetaa see Mée see kuwa ikii ipi yoka Ogatamee me menaa yayeetaa see bagee kuwa uduma Wa me kabayaa yogaa yuwa mokoo kiyaata see kuwa miya ikii ipi.
31Iniitaagi me inii mée epa dimii ebo kaa Ni me yogaa yuwa nao see mée gaataa see kuwa inii niigaagaa taai. Inii mikee ki Ogatamee me yogaa yuwa kiya magaa da kaa bagee gaayu ko okoo me inii kisee bagee see kuwa mée se nekeenegea. Okoo Ogatamee Yoopaa Waa miya ewo kemaata kaama okoo me inii Wa me yogaa yuwa ii see kuwa miya mée nekeeniino taa.3:1 Yoh 1:122Ni me epa see bagee yuwa, inii mikee Ogatamee me yogaa yuwa kiya inii iminookaa mapeagiyoo see see kaatagea, inii maagiyoo gakadeatagea see kuwa eto kiipaa inii mée ipi kiyaano taa. Kiya inii ipi see menaa mee ko inii mikee Kristus mokoo kedaa taatagea see menaa mee inii ipi. Waa meetagi naagoo Waa kisee Mée, kisee Mée see kuwa inii awee da kaa diitagea, kaama too inii miya Waa see see kaatagea.3:2 Plp 3:20-21, Why 22:43Okoo Anii Waa see see kaata nao see dimii gaawoo see bagee kuwa okoo ekaato pedeo dimii, pedeo menaa uduma wisintagaa siwoo siyaa. Kristus Waa miya pedeo taa see Mée see see okoo miya okoo ekaato pedeo uduma taa kiyaabuu siwoo siyaa.3:3 2Pet 3:13-14
4Pedeo ukuwaano kuwa ko Ogatamee me mée aseta menaa kuwa omeekee yoka pedeo ukuwagee see bagee kuwa Ogatamee me menaa kuwa daimeekee. 5Inii me pedeo ukuwata yuwa Kristus me mée yawonakumiino see naadi magaa da kaa meta see kuwa ikii ipi. Wa kaa pedeo dimii, pedeo menaa ena ma taa see Mée.3:5 Mat 1:21, Yoh 1:296Kisee kemaata Kristus ma dimi aagadi-maagadi siyaa bagee yuwa kuwa pedeo agiyoo se ukuwagee siyaa.3:6 1Yoh 5:18 Pedeo agiyoo ukuwagee see bagee gaayu ko Kristus mee ewo, nekeeniino taa.
7Ni me yogaa yuwa, mée me "Taa ke, daba ukuwaai" kisee kideebaa taapea yoka gaai. Daamaa agiyoo ukuwawoo see bagee kuwa dimi topoo. Kristus Waa dimi topoo see Mée see see okoo miya Waa mokoo bagee kiyaa. 8Pedeo agiyoo ukuwagee see bagee kuwa manii to ko Iblis, wa yaato bagee yuwa. Iblis waa miya petamanii kaama pedeo too ukuwawoo see mée yoka okoo miya waa mokoo bagee. Ogatamee Yoopaa meta mee ko Iblis me ukuwanaa, peenaa see agiyoo yuwa yataa kiyaano see naadi meta.3:8 Kej 3:15, Kol 2:15, Yoh 8:44, 12:31, Ibr 2:14-159Ogatamee me yogaa yuwa okoo yiba Wa me dimi mena seemeta kaama umiwoo, toowoo siyaa kuwa me pedeo agiyoo se ukuwagee siyaa. Okoo Ogatamee me yogaa kiyaabuu seta bagee yoka pedeo agiyoo ukuwagee taano iyo. 10Kuwa Ogatamee me yogaa yuwa, kuwa Iblis me yogaa yuwa mikee ii see kuwa nekeeniino mee ko kisee: Ogatamee me menaa si yayeetaa, si yaukuwataa see bagee kuwa Wa me yogaa yuwa se, bedaa Yesus yiba ena kenaa bagee epa taa see bagee kuwa miya Wa me yogaa yuwa se, see kuwa nekeeniyaa yoka kuwa kideebaa see bagee yuwa gaai.
Yesus yiba ena kenaa bagee epa aagaa taai naadi menaa
11Ikii petamanii kaama yeesekea menaa mee ko kisee: Inii epa niiaagaa taai see menaa mee.3:11 Yoh 13:3412Idukaa Kain me pedeo dimii mee ikii miya se masii. Waa pedeo yago mée Iblis yaato bagee yoka menaamee patameta. Kaasee kaa patameta? Wa me ukuwagee seta agiyoo yuwa pedeo, menaamee me ukuwagee seta agiyoo yuwa daamaa naadi kaama patameta.3:12 Kej 4:4-8
13See kemaata ikii Yesus yiba ena kenaa bagee yuwa, magaa da kaa dimi-pami yago bagee yuwa me kibe kegea gaayu ko okoo kisee bagee yuwa too yoka dimi se nagimaai.3:13 Yoh 15:18-1914Inii miya idukaa mée umina bogaano yaato omegee, toogee seta bagee kiya inii eto epa aagaa see bagee yuwa kemaata mée umina bogaano yaato kaama esegedoota kisee too iminoo miya, iminoo miya toowoo see yaato peanta umiwoo, toowoo see bagee yuwa kegea, see kuwa inii ipi. Epa se aagaa siyaa bagee kuwa umina bogaano yaato too umiwoo, toowoo siyaa. 15Mée waa ena me waa ma Yesus yiba ena kenaa bagee ena be kiyu ko waa mée wugiino dimii gaataa see mée mokoo. Mée wugiino bagee gaayu ko okoo iminoo miya, iminoo miya toowoo see yaato peanta toogee see bagee yuwa se, see kuwa ikii ipi.3:15 Mat 5:21-2216Mée epa dimii mee inii nekeeniino mee ko kisee: Kristus Waa ekaato ekegataata mée yaboota mee. Mee kaama mée epa dimii mee inii nekeenta kaama epa aagaa siwoo siyaa. Wa me inii mée epa kaa ekaato ekegataata mée yaboota kemaata Waa see see inii miya inii ekaato ekegataata Yesus mikee gaayaa bagee yuwa epa nao naadi yaku see taa see dimii mee gaawoo, doowoo taano gaano pedeo.3:16 Yoh 15:12-1317Mee ko agiyoo agoo kiyaa bagee me Yesus yiba ena kenaa bagee ena agiyoo taa see deegi kiya wisintaata kaama agiyoo se maniyu ko Ogatamee me epa dimii mee waa agoo ye? 18Ni me yogaa yuwa, epa aagaa taano mee ko mena me too se, ebe me too se kiya daamaa agiyoo aaukuwagee, aii aamanee see kuwa mikee epa aagaa taano kuwa naadi kisega.3:17-18 Mat 25:35-40, Yak 2:15-16
Inii Ogatamee paagoo asiyaa kaboo weda taa kaano see naadi menaa
19Inii mée epa aagaa siyu ko inii Ogatamee me yogaa yuwa, inii mikee menaa yaato bagee yuwa ii see kuwa inii nekeeniyaa, bedaa inii Ogatamee paagoo asiyaa kaboo weda taa, koogo dimi adumegee siyaa. 20Mee ko inii Ogatamee paagoo ’Anii pedeo nao’ see weda dimii mee ebo kiya Ogatamee me mée epa dimii mee esee ebo. Inii me gaayaa yuwa Waa ipi yoka inii ’Yaai, anii pedeo yoka’ see dimii miyaa kaboo Ogatamee me inii dimi mena mée tamooniyaayaa. 21Ni me epa see bagee yuwa, inii me ’Yaai, anii pedeo yoka’ see dimii mee taa kega kaboo inii weda taa ma Ogatamee paagoo ekaapa pe-asiyaa. 22Inii Wa me mée aseta menaa yuwa yayeewoo, Waa ede kiyaa agiyoo yaukuwawoo, see kuwa kaa inii me Wa paagoo asiyaa agiyoo yuwa uduma masiyaa.3:22 1Yoh 5:1423Wa me mée aseta menaa kuwa ko kisee: Wayoopaa, ekaa yago Mée Yesus Kristus mee mikee nao see gaai, bedaa mee mokoo miya ikii epa aagaa taai, see kuwa mée aseta.3:23 Yoh 13:34, 15:12,1724Kuwa mée aseta menaa yuwa daamaa yayeetaa, yaukuwataa see bagee kuwa ko Waa ma dimi aagadi-maagadi naadi umiwoo, toowoo see bagee yuwa, bedaa Waa miya okoo ma dimi aagadi-maagadi eetaa see. Waa inii ma dimi aagadi-maagadi naadi inii yiba mée eetupi ii see kuwa inii nekeeniino mee ko Wa me Roh mee inii mée manta kemaata nekeeniyaa.3:24 Yoh 14:23
4Roh me menaa ma, Kristus ma yape kiyaa menaa ma kuwa wiginisi naadi menaa
1Ni me epa see bagee yuwa, makapaa menaa weganaa see bagee mée eebaa agoo yoka gaai. Kisee kemaata "Roh me kisee nasigi, kisee nasigi" see weganaa see menaa kuwa moga si yayii. Wa me wegagi menaa kuwa mikee Roh me menaa ye, makapaa menaa too ye, kaasee, see maamaa gaagaa taai, daamaa nekeenii.4:1 1Tes 5:20-212Okoo me wegayaa menaa kuwa ’Mikee, Ogatamee me Roh me asigi menaa ii’ see kuwa inii nekeeniino mee ko kisee: Okoo me "Yesus mee mikee Ebo Kristus yoka, Waa mikee mée ena meta yoka" see menaa kuwa wegagee siyu ko okoo Ogatamee yaato bagee kemaata okoo me menaa kuwa ’Mikee, Roh me menaa ii’ see kuwa inii nekeeniyaa. 3Okoo me "Yesus mee mikee Ebo Kristus yoka" see menaa kuwa wegaano be kiyu ko okoo Roh yago bagee se. Okoo Kristus ma yape kiyaa bagee yuwa too. "Kristus ma yape see dimii mee agoo kedaa taata" see menaa kuwa ikii yeemea. Eto miya Kristus ma yape see dimii mee magaa da kaa topa.
4Ni me yogaa yuwa, ikii ko Ogatamee yaato bagee. Kuwa magaa da kaa Kristus ma yape kiyaa bagee kuwa okoo me dimii, okoo me menaa kuwa pesee kiya ikii yiba kiitotaa see Mée Roh mee esee umina pesee yoka Roh pesee da kaa ikii kuwa dimii, kuwa menaa umina daba, peedi kiyaabuu taakea.4:4 1Yoh 2:13, 5:195Kuwa Kristus ma yape see bagee kuwa ko magaa da kaa iyee-payee dimii yago bagee yuwa too yoka mee dimii kaa mena weganaakea naaki magaa da kaa bagee yuwa miya daamaa yayeenaakea.4:5 Yoh 15:19, 2Tim 4:36Inii gaayu ko Ogatamee yaato bagee. Ogatamee Waa mikee ipi see bagee kuwa inii me menaa mée yayeegee see. Ogatamee yaato taa see bagee kuwa inii me menaa mée si yayeegea. Kuwa me kaama "Mee ko Roh me menaa, mee ko makapaa menaa" see kuwa inii daamaa wiginiyaa.4:6 Yoh 8:47, 10:26-27
Epa dimii mee manii to ko Ogatamee kaa yoka mée epa aagaa taai naadi menaa
7Ni me epa see bagee yuwa, epa dimii mee manii to ko Ogatamee Wa kaa yoka inii esee epa niiaagaa taai. Mée epa gaataa see bagee kuwa okoo Ogatamee me yogaa kiyaata bagee yuwa, okoo Ogatamee mikee ipi see bagee yuwa. 8Ogatamee Waa mée epa dimi yago Mée, epa dimii mee manii to ko Wa kaa too yoka mée epa taa see bagee kuwa Ogatamee ewo see bagee yuwa. 9Ogatamee Wa me mée epa dimii mee inii mée nekeeniyaata mee ko kisee: Inii se pedeo keta iminoo miya, iminoo miya toowoosi naadi Wa me ena too too Yogaa magaa da kaa mée yaisiyaata.4:9 Yoh 3:1610Epa kaano mee ko inii me Ogatamee epa kiyaa mee se kiya Ogatamee me inii epa mée gaata mee too. Inii me pedeo yuwa Ogatamee me epa mée yaekeasiino see naadi Wa me Yogaa magaa da kaa pooi see aseta, Waa mée yaboogeesi naadi mée yaisiyaata. Mee ko mikee epa dimii mee.4:10 Rom 5:8-10, Why 1:5
11Ni me epa see bagee yuwa, Ogatamee me kisee epa mée gaata kemaata inii miya epa aagaa taano gaano pedeo. 12Ogatamee deeyaa bagee mée ena ma taa kiya inii epa aagaa siyu ko Ogatamee inii yiba toogee siyaa, bedaa Wa me epaa mee miya inii yiba ebo kedaa siwoo siyaa.4:12 Yoh 1:1813Inii miya Ogatamee yiba toogee see, bedaa Ogatamee miya inii yiba tupi ii see kuwa nekeeniino mee ko Wa me Roh mee inii mée manta kemaata nekeeniyaa. 14Nagamee me mée tomaa daba daagimaa peeyaano see naadi Yogamee magaa da kaa isiyaata see kuwa inii deeta. Kuwa menaa inii yaweganaake. 15"Yesus mee mikee Ogatamee Yoopaa yoka" see menaa da peneata wegawoo see bagee kuwa okoo yiba Ogatamee toogee see, bedaa okoo Ogatamee yiba toogee siyaa, kisee dimi aagadi-maagadi siwoo segee siyaa. 16Ogatamee me mée epa dimii mee inii yiba topa see kuwa inii ipi. Wa me inii mikee mée epa nao see dimii mee inii gaawoo, doowoo siyaa.
Epa dimii manii to mee ko Ogatamee Wa kaa too yoka epa dimii kaa umiwoo, toowoo siyaa bagee kuwa Ogatamee yiba toogee see, bedaa Ogatamee miya okoo yiba toogee siyaa. 17Kuwa me kemaata inii mée epa aagaa see dimii mee ebo kiwoo, umiwoo, toowoo naadi kaama Wa me mée tomaa wigintagaatagi naagoo inii se wedaatagea. Kristus Waa umiwoo, toowoo seta see see inii miya eto magaa da kaa umiwoo, toowookea yoka inii mee naagoo weda taa kaatagea. 18Epa dimii yago bagee kuwa Ogatamee yaai weda see dimii mee taa. Wa me epaa mee esee seemiyaa bagee kuwa ’Ogatamee me napedeo kiyaatagi’ see dimii mee okoo taa. Ogatamee yaai, weda see dimii gaayaa bagee kuwa Wa me mée epa dimii mee ewo, dimi yiba seemaano taa.4:18 Rom 8:15
19Ogatamee Wa me keta inii epa mée gaata kuwa me inii miya epa gaawoo see. 20Kisee mée ena me "Anii Ogatamee epa" see wegayaa kiya Yesus yiba ena kenaa bagee mée waa ena be kiyu ko wa me "Anii Ogatamee epa" see wegayaa menaa mee makapaa menaa. Yesus yiba ena kenaa bagee kuwa epa gaayu too wa me Ogatamee miya epa see wegayaa menaa kuwa mikee menaa. Mee ko wa me Yesus yiba ena kenaa bagee kuwa emaa me deetaa see kiya wa me okoo epa see dimii taa kiyu ko emaa me se deeyaa see Mée mee epa gaayaa dimii mee waa iyo.4:20 1Yoh 3:1721Kristus me inii mée aseta menaa mee ko kisee: "Ogatamee epa gaataa see bagee kuwa okoo ma Wa yiba ena kenaa bagee kuwa miya epa kaano gaano pedeo" see mée aseta.
5Magaa da kaa pedeo dimii, pedeo menaa kuwa uduma wisintaasi naadi menaa
1Yesus mee ko Ebo Kristus ii see gaataa see bagee kuwa uduma Ogatamee Wa me yogaa kiyaata bagee yuwa, bedaa yoga kiyaata Mée Ogatamee mee miya epa gaataa see bagee kuwa uduma Wa me yogaa yuwa miya epa gaataa see. 2Ogatamee me yogaa kiyaata bagee kuwa inii me epa gaataa see bagee ii see kuwa inii nekeeniino mee ko inii Ogatamee epa gaano ma, inii Wa me menaa daamaa yayiino ma kuwa ukuwagee naadi kaama inii mikee kisee epa gaataa see bagee ii see kuwa inii nekeeniyaa. 3Inii Ogatamee epa gaano mee ko kisee: Wa me mée aseta menaa yuwa inii yayeewoo, yaukuwawoo see mee. Wa me menaa kuwa yaukuwaano kana see taa, se ukuwamaayaa see taa.5:2-3 Mat 11:30, Yoh 14:154Ogatamee me agoo kiyaata yogaa yuwa okoo uduma ukuwamaayaa. Inii magaa da kaa pedeo dimi-pami, pedeo iyee-payee kuwa daba, peedi kiyaayaa. Mee ko inii Yesus mikee gaakee kaa wisintagaa siyaa.5:4 Why 12:115Magaa da kaa pedeo dimi-pami kuwa daba, peedi kiyaabuu siyaa bagee kuwa maamee ya? Okoo ko ’Yesus mee mikee Ogatamee Yoopaa yoka’ see dimii mee gaataa see bagee yuwa too.
Yesus Kristus mee mikee Ogatamee Yoopaa ii see gaasi naadi menaa
6Yesus Kristus Waa magaa da kaa eseemaata kaama uwo miya tukumeta, tadaa miya mée yapeeta, ekea paaya. Uwo tukumeta mee too se kiya tadaa miya mée yapeeta. Kuwa menaa wiya kuwa Ogatamee me Roh me "Mikee menaa yoka" see mée ase-manee see. Roh mee mikee dimii yago Mée yoka makapaa menaa taa. 7Yesus Kristus mee mikee Ogatamee Yoopaa ii see kuwa nekeensi naadi menaa wedo topa, 8kuwa ko Roh me menaa ma, Waa uwo yatukumeta menaa ma, Wa me tadaa peeta kaa menaa5:8 Mat 3:17, 27:54 ma kuwa menaa wedo. Kuwa menaa wedoo to kuwa ko ena mee too, Ogatamee Yoopaa ii see kuwa nekeensi naadi menaa yuwa.5:8 Kuwa mena wedoo to kuwa ko kisee: Roh me kisee mée ase-manee see menaa ma, Yesus mee uwo yatukumeta kaboo Nagamee me aseeyamoo seta menaa ma, bedaa Yesus tadaa mée yapeeta kaboo dimi nagii-nagii agiyoo yuwa ukuwaandaa seta kaa menaa ma kuwa Ogatamee Yoopaa ii see nekeensi naadi mena wedoo to kuwa.
9Mée me "Anii kisee deepa, kisee deepa" see wegataa see menaa kuwa inii yayeetaa see maa diya Ogatamee me wegayaa menaa kuwa esee ebo menaa kemaata yayiino too. Mee ko Wa me "Mee Niyoopaa yoka" see kuwa nekeensi naadi menaa kuwa ebo, inii yayiino too. 10See kemaata Ogatamee Yoopaa mikee gaayaa bagee kuwa ko Wayoopaa kaa wegayaa menaa kuwa okoo me dimii yiba topa. Ogatamee mikee se gaataa see bagee gaayu ko okoo Wayoopaa kaa menaa kuwa mikee menaa yoka see kuwa se gaayaa. Ogatamee me "Waa Niyoopaa yoka" see wegata menaa kuwa okoo me "Kuwa mée deebaa see menaa yoka" see menaa yawegataa see bagee yuwa too. 11Mikee menaa kuwa ko kisee: Ogatamee me inii iminoo miya, iminoo miya toowoo taano bagee mée kiyaata. Wayoopaa ma inii dimi aagadi-maagadi naadi kaama kisee too toowoo siyaa. 12Ogatamee Yoopaa mee dimi yiba agoo see bagee kuwa iminoo miya, iminoo miya toowoo siyaa. Ogatamee Yoopaa dimi yiba taa see bagee kuwa ko taa, kisee too se toowoo siyaa.
Wodopasi menaa
13Ikii me Ogatamee Yoopaa mikee nao, Waa ko ekaa yago Mée yoka see gaataa see bagee kuwa ikii kisee too iminoo miya, iminoo miya toowoo taatagea ii see kuwa ikii ipi kesea naadi anii kuwa menaa kiebeaga.5:13 Yoh 20:3114Inii Ogatamee paagoo idimegee siyaa kuwa ko inii Wa me daamaa, ede see gaayaa dimii doodoo idimiyu ko Wa me mée yayeeyaa. Wa me inii mée yayeeyaa kemaata inii pesee uu ma idimiyaa.5:14 Yoh 15:7, 1Yoh 3:2215Bedaa kuwa inii me idimiyaa menaa kuwa Wa me mée yayeeyu ko kuwa uduma mikee mée yaukuwaapi ii see kuwa inii ipi kiyaa.
16Yesus mikee gaayaa bagee ena me pedeo agiyoo ukuwataaki see ikii me deeyu ko sembahyang yataai. Wa me pedeo ukuwataa see agiyoo mee kaa usiyaato ko Ogatamee me waa boota kaama se wigintaayaa see agiyoo gaayu ko Ogatamee me waa epa ekeata kaama daba toowoo siyaapi. Mée me pedeo ukuwataa see agiyoo noonaa kuwa kaa okoo usiyaato ko boota kaama wigintaayaa. Kuwa see see agiyoo ukuwataa see bagee yuwa okoo kaa sembahyang yataai see kisega se. 17Pedeo dimii, pedeo agiyoo kuwa uduma pedeo too kiya pedeo ukuwayaa agiyoo noonaa kuwa kaa okoo usiyaato ko boota kaama wigintaayaa, pedeo ukuwayaa agiyoo noonaa kuwa kaa mée se wigintaayaa.
18Ogatamee Wa me yogaa kiyaata bagee yuwa pedeo agiyoo se ukuwagee siyaa. Okoo yoga kiyaabuu seta Mée Wa me yataamegee naadi kaama pedeo yago mée Iblis me okoo se peneasiyaa, okoo se pedeo kiyaayaa, see kuwa inii ipi.5:18 Yoh 17:14-1919Inii Ogatamee yaato bagee. Magaa da kaa dimii gaawoo siyaa bagee kuwa uduma pedeo yago mée Iblis Wa yaato bagee yuwa, wa me pesee tawata bagee yuwa see kuwa inii ipi.5:19 2Kor 4:420Mikee menaa yago Mée Ogatamee inii daamaa ipi kisi naadi Wayoopaa magaa da kaa eseta kaama mée ipi kiyaata. Inii mikee menaa yago Mée mee ma dimi aagadi-maagadi naadi Wa yiba toogee see, bedaa Wayoopaa Yesus Kristus mee ma inii dimi aagadi-maagadi naadi kaama Wa yiba toogee siyaa. Yesus Kristus mee ko mikee Ogatamee, inii kisee too iminoo miya, iminoo miya mée tuyaabuu siwoo taatagi see Mée, see kuwa inii ipi.5:20 Yoh 18:37, 2Kor 4:621Ni me yogaa yuwa, ikii nekeenii: makapaa ogatamee kaa dimi se magaai.5:21 Kel 20:3 Kiyoo too.