Titus

Titus

¹ - ⁴ Pano di Titus, ang kupoänä’ si’da-si’da aka’ sinnoa kapampetahpa’anta. Hao mai di Paulus, ang naängkä’ Puang Alataala mendahi sabua’na anna rasulna Puang Yesus Kristus lambi’ la undakaiä’ ingkänna ang napillei Puang Alataala mendahi petauanna anna malai matoho kapampetahpa’annaii. Noa tunne’ anna malai la sika ungnginsang didiona pepakuhu ang tahpa’ ang la mebahanang untuhu’i pa’elo’na Puang Alataala. Ponna dipanoa la aha panghannuang katuhoang lambi’ sapano-panona, ang inang puha nadandi Puang Alataala akinna umpapia lino. Anna inang dai si loseng Puang Alataala. Dahi di tempo ang napillei, napakalesong inde bahtakaranna umpake sabua’na ang la mampepainsangnging. Di alla’naii kodi’ mesa ang napetahpa’ Puang Alataala to Pepasalama’ta ang la mampepainsangnging pano di hupatau. Ke la malai ullambi’o behe anna kamasahkeang yaho mai di Ambe’ Puang Alataala anna Kristus Yesus, To Pepasalama’ta. ⁵ Pahtuyungku anna kupelleio diting di Kreta anna malai ungngäto’o ang pahalluke’ diäto’. Londonang pahallu la umpilleio sangngaka-sangngaka tau ang la mendahi pebulle ada’ ang kähänganna undakai jumaa’ yaling di mesa boi bohto sinnoa ang puha kupahentaingko. Noa indee pengkerona ang la pahallu umpillei: ⁶ Pahallu dai kekasalaang, mesa supu bahinena, änä’na dai mala la membabe karake, ampo’ mala dipetahpa’ anna tuhu’-tuhu’ang pano di to baha’na. ⁷ Aka’ to pangngäto’ pengkähänganna Dehata, dahi supung ang mala mendahi pebulle ada’ yaling di jumaa’ dianto ang dai kekasalaang, dai ungngangka’-angka’ kalaena, bahtu’ pa’keaha’ang, dai ma’malango-lango, dai maromi’ ma’siba’di anna tadia to ungkailui maho doi’. ⁸ Ampo’ pahallu si untahimbo mapia to sulena, si ungkärä’i kamapiaang, matahhing inaha, maroho inaha yaling di pembabena, masero anna si undakai kalaena. ⁹ Tontong la umpentokei Bahtakara Dehata ang puha natahimbo. Aka’ monna noang yatoo, ya’ malantoo umpakuhu tau situhu’ inde pepakuhu ang mala dipetahpa’ anna mala umpalanda’ kasalaanna tau ang mampa’bali. ¹⁰ Aka’ mai’di to mampetahpa’ diting ang dai si untuhu’i yato pepakuhu ang tahpa’, londo-londona ang tontong umpentokei ada’ Yahudi. Si umbulitu’ tau senga’ yaling di kalosengannaii. ¹¹ Tau ang sinnoa indee pahallune’ dikapu’ suana aka’ si umpasala’ lalang sangngaka-sangngaka to pohapu yaling di pepakuhunna ang dai tahpa’. Napanoa indee aka’ pemala supu la ullambi’ pallolongang ang setonganna dai la sihatang nalambi’. ¹² Aha dolu mesa nabinna to Kreta toe’ mangngoatee, "To Kreta si loseng. Sinnoa toi kau’na olo’-olo’ mahaila aka’ dai aha atohanna, so’bäng anna tengkong bosi." ¹³ Ingkänna inde ang natula’, tahpa’ asang. Dianto anna pahallui sika ungkambaho manahpaing anna malai sika untokei lolo pepakuhu ang tahpa’. ¹⁴ Lambi’ dang la umpentokei tohodolunna to Yahudi sibaha atohang ang nababe to ungkahi’di’ katahpa’ang. ¹⁵ Ingkänna tau ang masero, masero asang ingkänna aka-aka ang naoloi; ampo’ ingkännane’ tau ang ma’pihki’ karake anna dai ma’petahpa’, la tahuhu asang ingkänna aka-aka ang naoloi, aka’ pihki’na sibaha inahanna tahuhu moinnakato anna nasanga mapiai. ¹⁶ Si ungngangka’ kalaena ungnginsang Puang Alataala, ampo’ dasiang nainsang napembabeing yaling di katuhoanna. Sika mehiri’-hiri’ liu, dai tuhu’-tuhu’ang anna dai aha pembabena ang mahasa, moi poro la mesa.

¹ Ampo’ dio Titus, pahalluo mampakuhu situhu’ pepakuhu ang setonganna. ² Ingkänna to baha’ ang muane pakuhui anna malai sika matahhing inaha, tuho maroho ang la sihatang la dipakeangka’ anna undakai kalaena. Pahallu toe’ la sika tontong mampetahpa’ si’da-si’da moi yaling di kamasuhsaang, anna ma’kalemu liu. ³ Noa tunne’ ingkänna to baha’ ang bahine, pahallu toe’ umpakuhu anna malai sika tuho mapia, situhu’ pepakuhu ang sule yaho mai di Puang Alataala. Dai mala sika untula’ tahuhu tau senga’ anna dai mala menu’ lambi’ malango. Pahallu sika umpepakuhuing didiona kamapiaang ⁴ anna mala toine’ sika umpakuhu bahine ang mahäti’ la ungkalemui muanena sibaha änä’na, ⁵ la matahhing inaha, tuho masero lella’ ungngäto’ mapia hapunna, marota’ anna tuhu’-tuhu’ang pano di muanena. Aka’ monna noang yatoo, ya’ dang aha tau ang la umpesalai pepakuhu ang tahpa’. ⁶ Noa tunne’ muane ang mahäti’ pahallu la umpakuhu, anna malai sika matahhing inaha. ⁷ Yaling di ingkänna kaha-kaha, pahalluo mendahi pohapangang la membabe mapia. Monna ke mampakuhuo, pahallu la umpesi’da-si’dai ang la sihatang dipakeangka’. ⁸ Pakei tula’ ang mapia ang la dai napesalai tau senga’, anna malai balimmu masili aka’ dai aha aka-aka ang la napolalang metula’ tahuhuing. ⁹ Ingkänna sabua’, pahallu tuhu’-tuhu’ang anna umpamasannang inahanna pongkahana yaling di ingkänna siamo. Dai mala sika pabali-bali, ¹⁰ damong la maboko. Pahallu sika la umpalanda’ lolo kamapiaanna lambi’ mala napetahpa’ pongkahana anna malai naaku tau mampehingngii pepakuhunna didiona Puang Alataala, dianto To Pepasalama’ta. ¹¹ Pahallu la umpakuhu inde sangngaka-sangngaka kombongang la tuho situhu’ pepakuhu ang setonganna aka’ Puang Alataala puhang umpalanda’ mana’ pa’kalemunna pano di ingkänna hupatau, dianto ang mepasalama’. ¹² Dianto indee ang mampaturuingkea’ anna malai daingkea’ ungkebo’i pa’elo’na Puang Alataala. Noa toi anna malaingkea’ dai untuhu’i pangngelo’na to lino. Dipakuhuingkea’ anna malai tuho matahhing inaha, maroho inaha yaling di pembabe anna untuhu’i pa’elo’na Puang Alataala. ¹³ Dinoa lella’ingkea’ ungngempei allo kamasannangang ang tahannuang ang la tapangngitai kasuleanna anna kamatandeanna Puang Yesus, dianto Dehata To Handang Ma’kuasa anna To Pepasalama’ta. ¹⁴ Puha umpebeaing Kalaena dipatei anna malai unsulängngi ingkänna hupatau di hao mai di kasalaanna. Napamaseroingkea’ anna malaingkea’ mendahi petaunna toboe’ ang bansa’ la si membabe mapia. ¹⁵ Moi umpakalesoing, moi ungkambahoing, pepakuhu asangnging indee pano di ingkänna ang la mampehingngiio sitonda kakuasaang ang nabeao Puang Yesus Kristus. Ampo’ daumpabeii moi poro la mesa tau ang la mangngita-ita naungngo.

¹ Pakalehai santosahanimmu anna malai tuhu’-tuhu’ang pano di to pa’pahenta anna ingkänna pongkaha di umba-umba naongei. Pahallu toi la sadia umbabe ma’kahupa-hupa kamapiaang. ² Sika painsangngi toi nei’ anna malai dai sipesalai bahtu’ siba’di mesa anna mesa. Ampo’ la pahallu makara anna mahempo’ inaha pano di ingkänna tau senga’. ³ - ⁴ Aka’ Puang Alataala, To Pepasalama’ta, umpalanda’ pa’kalemunna anna kamapiaanna pano di kita’, moinnakato dolu noaingkea’ to maho sibaha daingkea’ tuhu’-tuhu’ang anna nakuasaiingkea’ ma’kahupa-hupa pampemalaang ang tahuhu, sinnoanna ma’kau’ karake, ma’sinuhung anna ungkahiri’ tau sola. ⁵ Napasalama’ingkea’ tadia aka’ puhamingkea’ umbabe kamapiaang, ampo’ aka’ pa’kalemunna pano di kita’. Napasalama’ingkea’ umpake kakuasaang Inaha Maserona ang mepadahi sumule anna mebea katuhoang bakahu sibaha umbahahsii ingkänna kasalaanta. ⁶ Nabea liuingkea’ Inaha Maserona Puang Alataala yaling di sanganna Puang Yesus, To Pepasalama’ta. ⁷ Napanoa indee anna malaingkea’ naangka’ maroho aka’ mana’ pa’kalemunna anna malaingkea’ tuho masannang lambi’ sapano-panona, aka’ inang dianto ang tanaha-naha la tatahimbo. ⁸ Indee ang mane kutula’ tahpa’ si’da-si’da. Pahallu umpengnginsangngi si’da-si’da indee anna malai ingkänna ang mampetahpa’ dai’ di Puang Alataala napoinaha umbabe ingkänna pengkähängang ang mapia, aka’ la kekuna pano di ingkänna tau. ⁹ Kahaoii kasitelängang ang la dai ma’bahtuang, ma’nene, siba’di didiona atohanna ada’. Aka’ ingkänna indee dai aha kunanna anna datoe’ aha kauntunganna. ¹⁰ Monna aha tau ang umpadahi kasiba’diang, kambahoing meämpä’ sipendoang. Ampo’ monna dao napehingngii, ya’ kahaoii. ¹¹ Aka’ tau ang noa indee, inang danne’ ungngakui pepakuhu ang tahpa’, anna pembabena ang inang nainsang tahuhu dianto ang mantumäng lambi’ ditahungkung. ¹² Ke haling kusuoingko mating ta Artemas bahtu’ ta Tikhikus, ya’ baha’ poinahai sule umpellambi’iä’ di lau’ di Nikopolis aka’ pahtuyungku la tohhoä’ di lau’ yaling di uhangngallo indee di tempona masahhu’ bombang. ¹³ Poinaha si’da-si’dai undului ta Zenas, dianto to manähäng yaling di pambohtuang kaha-kaha ada’, anna ta Apolos ke mengkalaong anna malai dai kakuhangang aka-aka. ¹⁴ Petauanta pahallu mellaya’ si’da-si’da umbabe kamapiaang anna malai umpasundung ang la napokatuhoang. Daa-daa sika tuho takekuna. ¹⁵ Ingkänna solasohong ang kusibahaing dinne umpalambi’ salama’ mating di dio. Palambi’ingkang salama’ki’ pano di ingkänna santosahaninta ang mekalemui. Puang Alataalarang ang la tontong mambeheingkea’ para-para.