Pangngitanna Yohanes

Pangngitanna Yohanes

¹ Ihsinna inde suha’ dianto didiona kaha-kaha ang la baha’ dahi ang napalanda’ Puang Alataala pano di Puang Yesus Kristus anna malai napepainsangnging pano di to pentindo’na. Puang Yesus unsuo malaeka’na pano di ta Yohanes sabua’na do napaitai yato kaha-kaha. ² Ya’ natula’ tunne’ ta Yohanes yato ingkänna ang naita didiona Bahtakaranna Puang Alataala ang nasa’bii Puang Yesus Kristus. ³ Menna ang la mambata inde suha’ didiona ang la dahi anna ang mampehingngii sibaha natuhu’i ihsinna dianto ang la ullambi’ kamasannangang yaho mai di Puang Alataala. Aka’ ingkänna indee dang la masae anna dahing. ⁴ Pano di pitu jumaa’ di hao di Poropensi Asia. Hao mai di Yohanes. Oa’ solasohongku, ke la malai nabehekoa’ anna napamasahkekoa’ Puang Alataala, dianto ang aha, ang inang ahang anna ang la sule. Noa toi yaho mai di pitu inaha ang aha yaho di olona ohko’ang katomarayaanna, ⁵ anna yaho mai di Puang Yesus Kristus sa’bi ang mala dipetahpa’. Dianto ang handang dolu tuho di hoi’ mai di alla’na to mate anna ungkuasai setomarayaang di lino. Puang Yesus mekalemui liu. Tandana yatoo naaku mate tibollo hahana anna malai nalahpa’ingkea’ di hao mai di dosanta ⁶ anna napakamesaingkea’ tama di mesa kapahentaang ang napatani mendahi imang ang la untahiai Puang Alataala dianto Ambena. Puang Yesus dianto ang handang matande anna ma’kuasa lambi’ sapano-panona. Aming. ⁷ Itaia’, mengeng la sule yaling di salehu’ anna ingkänna hupatau la mangngita moi yato ang puha mantobo’. Ingkänna ihsi bohto di lino la dumuseng napobua’. Tahpa’ si’daete’ inde la dahi. Aming. ⁸ Naoate Puang Alataala, "Kodi’mito indee Ang Handang Uhuna anna Ang Katämpä’, dianto To Handang Ma’kuasa ang aha anna ang inang aha anna ang la sule." ⁹ Kodi’ Yohanes, solasohommua’ yaling di kapampetahpa’ang, ang unsinnoaing didahha aka’ untindo’ Puang Yesus Kristus. Dahi sa’bara’ingkea’ madahha aka’ napakamesaingkea’ tama di kapahentaanna. Dihambaiä’ pano di Kalantanang Patmos aka’ umpepainsangngingkä’ Bahtakaranna Puang Alataala sibaha mangngakuä’ kuoate, Puang Yesus Kristus dianto Dehatangku. ¹⁰ Aha pihsang allo Dehata nakuasaiä’ Inaha Masero, ya’ unghingngimä’ kamaha ang handang käyyäng sinnoa oninna terompe’ ma’kara di hao di kebo’ku. ¹¹ Yato kamaha naoatee, "O Yohanes, uki’i aka ang ungngita, anna umpapebahaing ne suha’ pano di pitu jumaa’ dianto: to Efesus, to Smirna, to Pergamus, to Tiatira, to Sardis, to Filadelfia, anna to Laodikia." ¹² Tahpa mensailemä’ pano di kebo’ku unnenne’i yato ang mampa’karaiä’. Ungngitamä’ pitu pampatokoang lampu bulahang dibabe. ¹³ Di alla’na yato pampatokoang lampu aha ke’de’ mesa sinnoa liu hupanna tau. Umpake kaya’ kalambe’ ang lambi’ naung di bihti’na. Mesalempäng bulahang. ¹⁴ Bää’na sibaha beluhä’na mabuhsa’ sinnoa kapa’ bahtu’ dähko-dähko, matanna pähä’lä’ sinnoa api. ¹⁵ Bihti’na pangngillo’ sinnoa yato bahsi ang mane dihui’i yaling mai di ahha baya. Kamahanna sinnoa yato oninna sälänsäng ke buntu’i. ¹⁶ Teyye kuananna untokei pitu bintäng anna di suana sohong mesa pa’dang ang pahela sibali. Lindona mesilo sinnoa yato allo koro ke maloe bumi. ¹⁷ Tahpana kuita, ya’ tilumbäng siamä’ di olona salamang to mate. Ampo’ tahpa nasahpaä’ teyye kuananna anna ma’karai naoatee, "Daummahea’, Kodi’mito indee Ang Handang Uhuna anna Ang Handang Katämpä’. ¹⁸ Kodi’mito ang tuho moinnakato puhamä’ mate, ampo’ itai tuhoä’ lambi’ sapano-panona. Kodi’ ungkuasai kamateang anna ongeanna to mate. ¹⁹ Dahi uki’i samai kaha-kaha ang ungngita, dianto kaha-kaha dinoa anna kaha-kaha ang la dahi di allo ang la sule. ²⁰ Anna didiona bahtuanna inde pitu bintäng ang ungngita di teyye kuanangku anna yato pitu pampatokoang lampu bulahang, diantoo pitu bintäng bahtuanna pitu malaeka’ di pitu jumaa’ anna yato pitu pampatokoang lampu bulahang, bahtuanna pitu jumaa’."

¹ Nalombungnging yato tula’na naoatee, "Pano di malaeka’na jumaa’ Efesus, noa indee ang la ungnguki’: Dianto inde pepasanna ang untokei pitu bintäng di teyye kuananna, anna mellao di alla’na pampatokoang lampu bulahang. ² Kuinsang samai ang umbabea’, umpengkähäng si’da-si’daingkä’ anna sa’bara’koa’ ungngolai kamadahhaang. Kuinsang toi dakoa’ umbea inaha pano di to karake. Anna tau ang ungngangka’ kalaena rasul ampo’ setonganna tadia, puhangnga’ unsändä’i, ya’ ullambi’mi kalosengannaii. ³ Masuhsakoa’ anna sa’bara’koa’ aka’ kodi’, dakoa’ ungnginsang lupu umpengkähängngingkä’. ⁴ Ampo’ ahake’ ang kusallaingkoa’, dianto dang aha pa’kalemu yaling di inahammu sinnoa dolu. ⁵ Kalehaii, makahao liungnga’ ungngongei manaho! Pengkatoba’koa’ di hao mai di dosammu, anna umpembabeing yato aka ang puha umbabea’ dolu. Ponna daia’ umpanoa, ya’ la suleä’ kualai yato pampatokoang lampu. ⁶ Ampo’ aha ang mapiaa’ di kalaemu, dianto: ungkahi’di’koa’ pembabena to pentindo’na Nikolaus ang kukahi’di’ tou kodi’. ⁷ Ponna ke pemalakoa’ ungnginsang manahpa, ya’ pehingngii si’da-si’dai samai ang natula’ Inaha Masero pano di pitu jumaa’! Tau ang patalo la kupabeine’ ungngande boana poang kayu ang mepatuho ang tuho yaling di bela’na Puang Alataala." ⁸ Nalombungnging yato tula’na naoatee, "Pano di malaeka’na jumaa’ Smirna, noa inde ang la ungnguki’: Dianto inde pepasanna ang sule yaho mai di To Handang Uhuna anna Katämpä’na, Ang puhang mate ampo’ tuho sumule. ⁹ Kuinsang kamasuhsaammua’. Kuinsang memase-masekoa’ ampo’ setongnganna to makakakoa’ di mendehatanna. Kuinsang umba noa kara-kara ang napatanda’ikoa’ ang unsanga kalaena to Yahudi, ang napillei Puang Alataala, ampo’ setonganna kuangka’ tadia to Yahudi. Yato tau petauanna Pongkahana setang. ¹⁰ Daungkahea’a’ kamadahhaang ang dang masae anna ullambi’mi. Inang la ahaete’ sangngaka-sangngaka di alla’mua’ ang la napatama Pongkahana setang di tahungkung nasändä’i. Sampulo allona naongei madahha. Pahallukoa’ umpamatoto’ lolo kapampetahpa’ammu di Kodi’ lambi’ mate. Ponna umpanoang, ya’ la kubeamokoa’te’ saho kapataloang dianto katuhoang lambi’ sapano-panona. ¹¹ Ponna ke pemalaia’ ungnginsang manahpa, ya’ pehingngii si’da-si’dai samai ang natula’ Inaha Masero pano di pitu jumaa’! Tau ang patalo danne’ la unsa’ding kamadahhaang di kamateang kapendoanna. " ¹² Nalombungnging yato tula’na naoatee, "Pano di malaeka’na jumaa’ Pergamus, noa inde ang la ungnguki’: Dianto inde pepasanna ang sule yaho mai di tau ang kepa’dang pahela sibali. ¹³ Kuinsang ang ungngongei tohho, dianto ongeanna Pongkahana setang ma’kuasa. Ampo’ inang umpetahpa’ä’a’, lambi’ daia’ tora’ aha umbahoi’ä’ yato naonge dipateii ta Antipas diting ang naonge tohho Pongkahana setang. Indee Antipas dianto mesa sa’bingku ang tontong lolo kapampetahpa’anna di Kodi’. ¹⁴ Moinnakato noa, ahake’ sangngaka-sangngaka kaha-kaha ang kusallaingkoa’. Ahakoa’ sangngaka-sangngaka ang untuhu’i pepakuhunna Bileam. Inde Bileam umpakuhu ta Balak dolu ang la napanoa umpatinaho to Israel tama di dosa. Napaturui ungngande andeang ang puha dipopenomba pano di dehata lino anna ungngindä’-indä’ pa’bannetauang. ¹⁵ Noa toi aha di alla’mua’ ang untuhu’i pepakuhunna to pentindo’na Nikolaus. ¹⁶ Dahi pengkatoba’mokoa’ di hao mai di dosa. Ponna dai umpanoa, ya’ dante’ masae anna tamamä’ di alla’-alla’mu anna kutolla’i yato tau umpakeä’ pa’dang ang aha di suaku. ¹⁷ Ponna ke pemalakoa’ ungnginsang manahpa, ya’ pehingngii si’da-si’dai samai ang natula’ Inaha Masero pano di pitu jumaa’! Tau ang patalo kupabeine’ ungngande dehpa manna ang tibuni, anna pantang la sika untahimbo mesa batu mabusa di Kodi’. Di hao yato di batu aha tiuki’ mesa sanga ang bakahu, ang dai aha moi poro la mesa tau mangnginsang supung ang mantahimbo toboe’." ¹⁸ Nalombungnging yato tula’na naoatee, "Pano di malaeka’na jumaa’ Tiatira, noa inde ang la ungnguki’: Dianto inde pepasanna ang sule yaho mai di Änä’na Puang Alataala, ang pähä’lä’ matanna sinnoa api, anna bihti’na pangngillo’ sinnoa bahsi ang mane dihui’i yaling mai di ahha baya. ¹⁹ Kuinsang samaia’ ang umbabe. Ungkalemuikoa’ para-parammu hupatau, mampetahpa’koa’, mengkähäng, anna sa’bara’koa’ ungngolai kamasuhsaang. Kuinsang mai’di puhane’ ang ungkähäng dinoa andana dolu. ²⁰ Ampo’ ahake’ ang kusallaingkoa’, dianto umbearakoa’ dio inaha ta Izebel, mesa bahine ang unsanga kalaena nabinna Puang Alataala. Mai’ding petauangku ang napasähsä’ lalang anna napaturui ungngindä’-indä’ pa’bannetauang sibaha ungngande andeang penombaang pano di dehata lino. ²¹ Puhang kubea tempo mengkatoba’ ampo’ dasiang aha nabolinna ungngindä’-indä’ pa’bannetauang. ²² Dahi la kupamakorong. La sika kudahha si’da-si’da sibaha tau ang nasikamahoiing. Supung tora’ ke naboling ungngindä’-indä’ pa’bannetauang, ya’ dai la kupanoa. ²³ Ingkänna to pentindo’na la kupatei asang, anna malai nainsang samai jumaa’ naoatee, Puang Yesus ang ungnginsang anna ullosa ihsi inahanna hupatau. La kubala’koa’ situhu’ pembabemu. ²⁴ Ampo’ senga’na to Tiatira ang dai untuhu’i yato pepakuhu salao-laona anna dai umpellaya’i aka ang dioaintee, ’kamanähänganna Pongkahana setang,’ kuoane’te tora’ daine’ la kupahoai durungang ang matingngi, ²⁵ supung pahallua’ umpatontong kapampetahpa’ammu di Kodi’ lambi’ suleä’ dako’. ²⁶ - ²⁷ Tau ang patalo anna umpembabeing samai pa’elo’ku lambi’ mate, la kubea kakuasaang sinnoa ang kutahimbo yaho mai di Ambeku. La sika sundung kakuasaanna umpahenta bohto-bohto käyyäng anna untallangngi yato bohto sinnoa unghämu-hämu kohing tampo. ²⁸ La sika untahimbo bintäng pambaha allo di hao mai di Kodi’. ²⁹ Ponna ke pemalakoa’ ungnginsang manahpa, ya’ pehingngii si’da-si’dai samai ang natula’ Inaha Masero pano di pitu jumaa’!"

¹ Nalombungnging yato tula’na naoatee, "Pano di malaeka’na jumaa’ Sardis, noa inde ang la ungnguki’: Dianto inde pepasanna ang sule yaho mai di tau ang umpahenta pitu inaha ang aha yaho di olona ohko’ang katomarayaanna Puang Alataala anna untokei pitu bintäng. Kuinsang ang umbabea’. Boheng untindo’ä’ anna naoate tau, ’tuho’ ampo’ setonganna matekoa’. ² Dahi kalehakoa’ anna pamatohoi ang ahake’ di kalaemu akinna pa’da. Aka’ samai pengngoya’mu ang kulambi’, dake’ sundung di olona Puang Alataala. ³ Dahi, pengkakalehaii sumule samai ang puha dipakuhuingkoa’ anna ang puha unghingngi. Pembabeing yatoo anna mengkatoba’koa’ di hao mai di dosammu. Ponna dakoa’ madaka, la suleä’ kudahhakoa’, sinnoa to paboko kasuleangku daia’ la ungnginsang. ⁴ Moinnakato noa, ahake’ tau diting di Sardis ang madaka anna malai pengngoya’na tontong mapia sinnoa kaya’ ang mabahahsi. Ingkänna yatoo la kusibahaing mellao umpake kaya’ mabusa ang mabahahsi, aka’ sihatang nei’. ⁵ Tau ang patalo dipakei noa nei’. Sangannaii dai la kukoso’i yaling di suha’ pantekenganna to tuho lambi’ sapano-panona. Anna di olona Ambeku anna samai malaeka’na kuakune’ kuoate to pentindo’ku. ⁶ Ponna ke pemalakoa’ ungnginsang manahpa, ya’ pehingngii si’da-si’dai samai ang natula’ Inaha Masero pano di pitu jumaa’!" ⁷ Nalombungnging yato tula’na naoatee, "Pano di malaeka’na jumaa’ Filadelfia, noa inde ang la ungnguki’: Dianto inde pepasanna ang sule yaho mai di To Masero ang tahpa’. Dianto ang untokei pekilinna Tomaraya Daud. Ponna diang mantungka’i, dante’ aha moi poro la mesa tau ang la mala mantutu’i. Ponna diang mantutu’i, dante’ aha moi poro la mesa tau ang la mala mantungka’i. ⁸ Kuinsangnga’ pembabemu. Kuinsang toi dai umba sama kamatohoammua’, ampo’ untuhu’imokoa’ pepakuhungku, anna umpetahpa’ä’. Puhang kubuhkeiingkoa’ baba ang la dai mala natutu’i moi poro la mesa tau. ⁹ Itai, tau ang mendahi to pentindo’na Pongkahana setang la kusuo sule malimuntu’ di olomu. Anna la nainsang pa’kalemungku mating di dioa’. Yato tau to pa’loseng-loseng ang si unsanga kalaena to Yahudi ang napillei Puang Alataala, ampo’ setonganna tadia. ¹⁰ Untuhu’imokoa’ pahentaku, dianto sa’bara’ ungngolai kamasuhsaang, dahi la kudakaikoa’ di tempona kamasuhsaang ang la unghoa inde lino. Inde la dahi anna malai unsändä’i ingkänna tau di lino. ¹¹ Dang masae anna sulemä’. Pahallua’ umpatontong kapampetahpa’ammu di Kodi’, anna malai dai aha tau manghampa’ikoa’ saho kapataloammu. ¹² Tau ang patalo la kupadahi ahhi yaling di Dasang Ada’na Puang Alataala, anna la tohho yaling lambi’ sapano-panona. Pano yato di kalaena tau la kuuki’ bohto mahoa’na Dehatangku dianto Yerusalem Bakahu ang la tuhung yaho mai di Dehatangku di suruka. La kuuki’ toi sanganna Dehatangku anna sangangku ang bakahu. ¹³ Ponna ke pemalakoa’ ungnginsang manahpa, ya’ pehingngii si’da-si’dai samai ang natula’ Inaha Masero pano di pitu jumaa’!" ¹⁴ Nalombungnging yato tula’na naoatee, "Pano di malaeka’na jumaa’ Laodikia, noa inde ang la ungnguki’: Dianto inde pepasanna ang sule yaho mai di To Tontong Aha, Sa’bi ang tahpa’ ang mala dipetahpa’, ang nakasulei ingkänna siamo ang napadahi Puang Alataala. ¹⁵ Kuinsang samai ang umbabea’. Dakoa’ masumanga’ di Kodi’ anna datoukoa’ masumanga’ mambaliä’. Malae’ ke la poro ahai mesa, masumanga’ di Kodi’ bahtu’ bilang masumanga’ mambaliä’. ¹⁶ Ampo’ aka’ noang babemua’ makuhtu, dahi la kupentibeingkoa’ yaling mai di oloku. ¹⁷ Ungngoaa’tee, ’To makakaang anna sundung; daang aha kalala’.’ Ampo’ daia’ ungnginsang kalaemu meuho-uho anna masuhsa diita katuhoammu. To pemase-masekoa’, dai paita anna mohobeläng. ¹⁸ Dianto suhunna anna kupainsangngikoa’ anna malai ungngalli bulahangku, dianto bulahang ang dai aha mampenghaui, lambi’ malakoa’ mendahi to makaka. Noa toi pakeang mabusa la umpake anna malai dakoa’ mohobeläng ang mepakasili. Noa tunne’ minnä’ la unsuhsu’ing matammu anna malai paita. ¹⁹ Tau ang kukalemui dianto ang kukambahoing anna kupaturu. Dahi pahallukoa’ suhaka anna mengkatoba’ di hao mai di dosammu. ²⁰ Itai, ke’de’ä’ di hao di olo baba anna ma’karaä’. Ponna aha tau ang manghingngi kamahangku, anna umbuhkei baba, la tamaä’ kupellambi’i. La mandeang sibaha-baha. ²¹ Tau ang patalo, la kupabeine’ mohko’ang sibaha di ongeang katomarayaangku, sinnoa Kodi’ puha patalo anna dinoa mohko’mä’ sibaha Ambeku di katomarayaanna. ²² Ponna ke pemalakoa’ ungnginsang manahpa, ya’ pehingngii si’da-si’dai samai ang natula’ Inaha Masero pano di pitu jumaa’!"

¹ Tahpana kupahandang bou, aha bumi kuita mesa baba tibuhke yaho di suruka. Pihsananna aha bung yato kamaha sinnoa terompe’ ang puha kuhingngi dolu. Yato kamaha naoatee, "Maio done indee anna kupainsangngio didiona ang la dahi dako’." ² Nakuasai siamä’ Inaha Masero. Ungngitamä’ ohko’ang tomaraya yaho di suruka anna aha mesa tau mohko’ yaho. ³ Yato tau pangngillo’ sinnoa batu masuli’ anna maleke, mamata anna malea hupanna. Mesa tahauhe ullikoi yato ohko’ang tomaraya. Inde tahauhe pangngillo’ sinnoa mesa batu melälähäng ang mamata hupanna noa lala’ upe. ⁴ Di aneanna inde ohko’ang tomaraya aha dompulo uhpa’ ohko’ang senga’ mallipu’i. Pantang naongei mesa to dipakeangka’ umpake kaya’ mabusa anna mesongko’ bulahang. ⁵ Yato di ohko’ang tomaraya aha kila’ anna ma’kundäng-kundängngi. Aha toi pitu ballo ang meleä’-leä’, dianto pitu inahanna Puang Alataala ang aha yaho di olona ohko’ang tomaraya. ⁶ Aha toi di olona yato ohko’ang tomaraya noa le’bo’ mahändäng mala dipodahammeng. Ohko’ang indee nalipu’i uhpa’ hupanna ang menanaha ang napunnoi mata di olona anna di kebo’na. ⁷ Lindona hupanna ang menanaha ang uhuna sinnoa singa. Ang kaderuanna sinnoa saping laki. Katallunna sinnoa lindona tau. Ang kauhpa’na sinnoa sahebaki ang lella’ lumolo’. ⁸ Uhpa’ inde hupanna ang menanaha pantang unnung pani’na anna napunnoi mata moi ang nasamboi pani’na. Allo bengi dai aha natohhoi ma’penani-nani naoatee, "Masero, Masero, Masero Puang Alataala, To Ma’kuasa, Ang aha, anna ang inang ahang anna ang la sule." ⁹ Inde hupanna ang menanaha umpopenani pampudiang, malimuntu’ anna menau-nau pano yato ang mohko’ di ohko’ang tomaraya, dianto ang tuho lambi’ sapano-panona. ¹⁰ Lella’ menani malimuntu’ asammi yato to dipakeangka’ pano di olona yato ang tuho lambi’ sapano-panona. Mane umpentibeing yato songko’ bulahanna pano di olona yato ohko’ang, tandana umpakeangka’ puha yato ang mohko’ di ohko’ang tomaraya, lella’ siang menani naoatee, ¹¹ "O Puang Alataala Dehatangki’, Dio supu ang sihatang untahimbo pampudiang anna kakeangka’ang aka’ ma’kuasao. Aka’ dio ang umpadahi ingkänna siamo, anna aka’ pa’elo’mu toi nasuhung mala dahi anna tuho."

¹ Pihsananna kupahandang bou ungngitamä’ sallolongang suha’ di teyye kuananna yato tau ang mohko’ yaho di ohko’ang tomaraya. Suha’ yatoo keuki’ yalinna anna di aneanna sibaha dipadehke’i pitu ang ma’hupa katahpe ang mampatandaang dake’ aha dibuhkei. ² Mane ungngitaä’ mesa malaeka’ matoho kakoha-koha napekäyyängngi naoatee, "Menna ang sihatang ullohka’i katahpena inde suha’ tilolong anna nahuhka’i?" ³ Ampo’ moi ang yaho di suruka, yaling di lino anna di hoi’ di apa’ tampo, dai aha ang sihatang mambuhkei anna nanenne’i ihsinna. ⁴ Tahpa musemmä’ tora’ masuhsa, aka’ dai aha mesa tau ang la sihatang mambuhkei anna mannenne’i ihsinna. ⁵ Ampo’ naoamingkä’te yato mesa to dipakeangka’, "Mahtangngo! Itai! Ang disangai ’Singa sule yaling mai di alla’-alla’na to Yehuda’ anna ’Peänä’anna Tomaraya Daud ang lele sau tama,’ puhang patalo. Sihatanne’ ullo’bä’i yato pitu katahpena suha’ anna nabuhkeii." ⁶ Ungngita bumä’ mesa Änä’ Domba ke’de’ sitehe yato ohko’ang tomaraya ang nakulimboi yato uhpa’ hupanna ang menanaha anna ingkänna yato to dipakeangka’. Yato Änä’ Domba noaranne’ ang puhang dikehe’. Pitu tandi’na anna pitu matanna dianto yato pitu inaha ang puha nasuo Puang Alataala tama di lino. ⁷ Panong inde Änä’ Domba untahimbo yato suha’ di tau ang mantokei ang mohko’ yaho di ohko’ang tomaraya. ⁸ Lella’ untahimbo suha’ inde Änä’ Domba, ya’ malimuntu’mi yato uhpa’ hupanna ang menanaha sibaha yato dompulo uhpa’ to dipakeangka’ di olona. Pantang sika untokei mesa katapi anna mesa kahti bulahang ang napunnoi kayu-kayu bomammi’ dianto sambayanna petauanna Puang Alataala. ⁹ Sika umpopenani mesa penaniang bakahu, ang naoatee, "Sihatangngo ungngala ne suha’ anna ullohka’i katahpena. Aka’ puhamo dipatei. Anna kamateammu puhang ungngalliing Puang Alataala yato hupatau di hao mai di ingkänna bohto di lino. ¹⁰ Puhang sika umpakamesa tama di mesa kapahentaang ang napatani la untahiai Dehatanta, sibaha ma’pahenta yaling di lino." ¹¹ Pihsananna kupahandang bumi anna kuhingngii kamahanna malaeka’ ang ma’sa’bu-sa’bu masoona. Sika ungkulimboi yato ohko’ang tomaraya anna yato uhpa’ hupanna ang menanaha sibaha to dipakeangka’. ¹² Sika menani napekäyyängngi naoatee, "Änä’ Domba ang puha dikehe’ ma’kuasa anna sihatang untahimbo katomakakaang, kamanähängang anna kamatohoang; Sihatang dipakeangka’, dipamatande anna dipudi!" ¹³ Mane unghingngiä’ ingkänna ang menanaha ang aha yaho di langi’, di lino, di hoi’ di apa’ tampo anna ang aha yaling di le’bo’. Ingkänna indee menani asang naoatee, "Ke la malai Ang mohko’ yaho di ongeang kamatandeang, anna yato Änä’ Domba dipudi anna dipakeangka’ sibaha dipamatande anna ma’kuasa lambi’ sapano-panona!" ¹⁴ Puhai yatoo, natimba’mi yato uhpa’ hupanna ang menanaha naoatee, "Aming!" Tahpa malimuntu’ tunne’ yato samai to dipakeangka’ menomba.

¹ Pihsananna ungngitamä’ yato Änä’ Domba ullohka’i katahpena suha’ ang uhuna sibaha kuhingngi kamahanna mesa yato uhpa’ hupanna ang menanaha salamang kundäng naoatee, "Maio!" ² Kupahandang bumi anna ungngitaä’ mesa arahang mabuhsa’ anna yato tau ang mampensakei untokei pana anna dipasongko’i bulahang, pano sihapang mesa tau ang inang si patalo ang mao bou umpealai sala kapataloang. ³ Tahpana ullohka’i bung yato katahpena suha’ ang kaderuanna yato Änä’ Domba, unghingngi bumä’ kamahanna yato hupanna ang kaderuanna naoatee, "Maio!" ⁴ Ya’ sohong bung mesa arahang ang senga’. Inde arahang pähä’lä’ anna ang mampensakei dibea kakuasaang la umpadahi pa’tolla’ang yaling di lino, anna malai hupatau sipate-patei. Dibeang mesa pa’dang kalambe’. ⁵ Ullohka’i bung yato Änä’ Domba katahpena suha’ ang katallunna. Unghingngimä’ yato hupanna ang katallunna naoatee, "Maio!" Kuita burang landa’ mesa arahang maloteng. Ang mampensakei untokei sahpasang timbangang anna dibea kakuasaang ungkarakei pinamula. ⁶ Ahang kuhingngi noa kamaha di alla’-alla’na yato uhpa’ hupanna ang menanaha naoatee, "Sallite’ gandum mahasa pa’sangngalloang disaho allinna, anna tallu lite’ gandum tahuhu pa’sangngalloang toe’ disaho allinna tandana kabuhohangang. Ampo’ daungkarakei bela’ zaitun anna bela’ angkoro’ anna malai dai liba’ maho yato kabuhohangang." ⁷ Pihsananna ullohka’i bung yato Änä’ Domba katahpena suha’ kauhpa’na. Unghingngi bumä’ yato hupanna ang kauhpa’na naoatee, "Maio!" ⁸ Ungngitamä’ mesa arahang alla’na mamata anna mahihi anna ang mampensakei disanga Kamateang. Mane napelolaii ang disanga Ongeang Kamateang. Sika dipakuasa umpatei sambahe uhpa’na tau yaling inde di lino ungngolai pa’tolla’ang, kabuhohangang, kamakorongang anna olo’-olo’ peande. ⁹ Puhanna, yato Änä’ Domba ullohka’i bung katahpena suha’ kalimanna. Ungngitamä’ di hoi’na yato pantunuang penombaang aha sungnga’na tau ang dipatei aka’ umpepainsangnging Bahtakaranna Puang Alataala anna mampetahpa’ dai’ di Puang Yesus. ¹⁰ Sika koha naoatee, "O Puang, To Handang Ma’kuasa ang masero anna tahpa’, sangngakake’ masaena mane umpahehsai to lino anna umbala’i aka’ napateiang?" ¹¹ Sika pantang dibea kaya’ kalambe’ mabusa anna disuoi mangngempei sämpäi’, lambi’ sundung yato solana ang la dipatei sinnoa inde maiii. ¹² Mane ungngita bouä’ yato Änä’ Domba ullohka’i katahpena suha’ kaunnunna. Tahpa dahi siang lino’ ang käyyäng liu. Mataallo malilling sinnoa kaya’ maloteng, anna bulang malea sinnoa haha. ¹³ Bintäng dondongngi yaho mai di langi’ sinnoa boa kayu ara ang dake’ matua anna dondongnging di tempona nahoa pepahi käyyäng. ¹⁴ Langi’ tilolong sinnoa ale mane mengkapa’dai, anna ingkänna tanete anna kalantanang masihki’ diparende di ongeanna. ¹⁵ Pihsananna setomarayaang di lino, to keangka’, to pambahananna setantaraang, to makaka anna to ma’kuasa, anna tau senga’, moi sabua’, moi to beba’, le’ba’ asang membuni tama di leäng anna tama di sihping-sihping batu yaho di tanete. ¹⁶ Yaling yato di pembunianna sika koha naoatee, "O tanete! O batu! Kahompoiang mai. Buniang indo di hao mai di Tau ang mohko’ yaho di ohko’ang tomaraya anna kakeaha’anna indo Änä’ Domba! ¹⁷ Aka’ tempo kakeaha’ang suleng. Dinoa sika umpalanda’mi kakeaha’annaii, anna dai aha moi poro la mesa tau ang mantähäng di olona."

¹ Puhanna yatoo, ungngitamä’ uhpa’ malaeka’ ke’de’ di uhpa’ kasuleanna pepahi di lino. Sika untähäng pepahi di lino anna malai dai tisau di haho tampo, di le’bo’ anna di poang-poang kayu. ² Mane ungngitaä’ mesa malaeka’ senga’ lemba’ yaling mai di katimbinganna mata allo umbaha ang la dipake untandai sabua’na Dehata, dianto Dehata ang inang aha. Anna ma’karai napekäyyängngi pano di uhpa’ malaeka’ ang dibea kuasa la untallangngi kalantanang anna le’bo’ ³ naoatee, "Daungkarakei sängkäi kalantanang bahtu’ le’bo’ sibaha poang-poang kayu ke dake’ puha kupadehke’ tanda pano di kandinna sabua’na Dehatanta!" ⁴ Ang kuhingngi yato ang la dibea tanda, sangngatu’ uhpa’pulo uhpa’ sa’bu mai’dinna. Tau yatoo diala yaling mai di sampulo derua peänä’anna Israel. ⁵ - ⁸ Mesa boito bohto sampulo derua sa’bu bung tau. Dianto: to Yehuda, to Ruben, to Gad, to Asyer, to Naftali, to Manasye, to Simeon, to Lewi, to Isakhar, to Zebulon, to Yusuf anna to Benyamin. ⁹ Tahpana yatoo, ungngita bumä’ hupatau mai’di si’da-si’da, dai aha ang mala mangngihsa’ tandana mai’di. Yato tau sule di hao mai di ingkänna bohto di lino. Sika meporeha mabusa anna untokei palapa kelala’ tandana mampudi. Sika ke’de’ mengngolo pano di ohko’ang tomaraya anna pano yato di Änä’ Domba. ¹⁰ Sika koha napekäyyängngi naoatee, "Dehatanta dianto ang mepasalama’, ang mohko’ yaho di ohko’ang tomaraya anna yaho mai di Änä’ Domba!" ¹¹ Ingkänna yato malaeka’ sibaha to dipakeangka’ anna yato uhpa’ hupanna ang menanaha ke’de’ nakulimboi. Sangka’ malimuntu’ di olona yato ohko’ang tomaraya menomba di Puang Alataala ¹² anna ma’karai naoatee, "Aming! Sihatang dipudi, dipamatande, dipakeangka’, dipenanu-naui Dehatanta aka’ kakeaka’anna, kakuasaanna, anna kamatohoanna lambi’ sapano-panona! Aming." ¹³ Pihsananna ahang mesa yato to dipakeangka’ nakutanaiä’ naoatee, "Menna inde mai tau ang mekaya’ mabusa anna umba sika nasule?" ¹⁴ Kutimba’mi kuoaintee, "Dai kuinsang, Tuang. Tuang tubure’ ang mangnginsang." Ya’ naoantee, "Dianto inde tau ang puha salama’ naonge ungngolaii kamadahhaang käyyäng. Sika puhang untahpa’ pakeanna napamabuhsa’ umpake hahana yato Änä’ Domba. ¹⁵ Dianto suhunna anna sika ke’de’mi di olona ohko’ang katomarayanna Puang Alataala, sibaha menomba allo-bengi yaling di Dasang Ada’na. Anna yato ang mohko’ yaho di ohko’ang tomaraya la mandakai. ¹⁶ Danne’ la sika manono anna mahähäng, anna dang la napandasa maluhsunna mata allo. ¹⁷ Aka’ yato Änä’ Domba ang sitehe ohko’ang tomaraya ang la sika mambahanang sinnoa mesa to pangkambi’. Sika naposolai pano di kasuleanna uhai ang mebea katuhoang. Puang Alataala ang la mampahsiiing uhai matannaii."

¹ Tahpana ullohka’i katahpena suha’ kapitunna yato Änä’ Domba, mahulla-hulla siang yaho di suruka umbai setangnga tehte’ masaena. ² Ungngitamä’ pitu malaeka’ ang ke’de’ di hao di olona Puang Alataala, sika dibea pitu terompe’. ³ Tahpa ahang sule mesa malaeka’ senga’ umbaha kahti bulahang ang si dipaongei kayu-kayu bomammi’ anna ke’de’i di olona yato pantunuang penombaang. Dibea mai’di liu kayu-kayu bomammi’ ang la dipopenomba sibaha sambayanna samai petauanna Puang Alataala di hao di ongeang pantunuang bulahang ang aha di olona ohko’ang tomaraya. ⁴ Sibaha sambayanna petauanna Puang Alataala, hambunna yato kayu-kayu bomammi’ ang menge meleä’-leä’, mapulu’ ludai’ mengkalao di kahti ang natokei malaeka’ di olona Puang Alataala. ⁵ Pihsananna naalang inde paongeang bulahang yato malaeka’, anna napangngihsii api ang naala di hao mai di pantunuang penombaang mane napentibeing tama di lino. Ya’ tahpa mellihpä’ siang kundäng, sibaha kila’ anna lino’. ⁶ Pitu malaeka’ ang untokei pitu terompe’ sadiang la mamponi. ⁷ Malaeka’ ang uhuna umponi terompe’, tahpa kene’ batu siang anna api masahhu’ sihau haha. Ingkänna indee dipentibeing tama di lino. Sambahe tallunna lino mämpu’, lambi’ sambahe tallunna poang-poang kayu anna lohpo mämpu’ toe’. ⁸ Malaeka’ kaderuanna umponi terompe’, tahpa kaitaang siang mesa ang käyyäng noa tanete ang meleä’-leä’ dipentibeiing tama di le’bo’. Sambahe tallunna le’bo’ mendahi haha. ⁹ Ya’ mateng sambahe tallunna ingkänna ihsi le’bo’ ang tuho anna sambahe tallunna kahpala’ tallang. ¹⁰ Malaeka’ katallunna umponi terompe’, tahpa dondong siang mesa bintäng käyyäng ang meleä’-leä’ sinnoa ballo yaho mai di langi’ anna unghoai sambahe tallunna salu uhai sibaha timbu. ¹¹ Yato bintäng disanga ’Apsintus’ ang bahtuanna: mapäi’. Ya’ mapäi’mi sambahe tallunna yato uhai, lambi’ mai’di tau mate napobua’ yato uhai ang mapäi’. ¹² Malaeka’ kauhpa’na umponi terompe’, tahpa tisampung siang sambahe tallunna mata allo, lambi’ malilling sambahe tallunna lino. Noa toi di bengi, bulang anna bintäng tisampung sambahe tallunna lambi’ dai mesilo pano di sambahe tallunna lino. ¹³ Kupahandammi, ya’ kuitang mesa sahebaki molo’ yaho di nähäng mane kuhingngii mekoha naoatee, "Tilaka! Tilaka! Tilaka ingkänna to lino, ke kahingngiammi tallu malaeka’ senga’na umponi terompe’na!"

¹ Pihsananna umponing terompe’na yato malaeka’ kalimanna. Ya’ ungngita bumä’ mesa bintäng dondong yaho mai di langi’. Yato bintäng dibea pekilinna kahoäng ang lunaung di ongeanna to mate. ² Umbuhkeing kahoäng yato bintäng, ya’ sohommi hambu di hoi’ mai sinnoa hambu to pesohe. Malilling siang mata allo anna nähäng napobua’ yato hambu. ³ Yato hambu naongei sohongngi kakombäng tuhungngi naung di lino, anna dibeai kakuasaang sinnoa alipang. ⁴ Dai dipabei ungkarakei lohpo, bahtu’ poang-poang kayu anna pinamula. Supung mala ungkeki’ tau ang dai dipadehke’i kandinna tanda petauanna Puang Alataala. ⁵ Yato kakombäng dai dipabei umpatei yato tau, supung la nadahha lima bulanna masaena. Mapi’di’na yato ang napaaha kakombäng sinnoa mapi’di’na pekeki’na alipang. ⁶ Yaling yato di lima bulanna, pemala sika mengkamate, ampo’ dasiang mala, aka’ kahaoke’ kamateannaii. ⁷ Hupanna yato kakombäng sinnoa arahang ang la dibaha ma’tolla’. Yaho di bää’na aha sinnoa songko’ bulahang. Lindona sinnoa lindo tau. ⁸ Beluhä’na sinnoa beluhä’ bahine, anna isinna sinnoa isi singa. ⁹ Babuana ditutu’i noa hupanna kaya’ bahsi. Oninna pani’na sinnoa memuhhunna mai’di bendi ang nahui’ arahang ke le’ba’i ma’tolla’. ¹⁰ Aha okinna sinnoa okinna alipang. Di okinnantoo naongei petohse’na ang pabisa ang undahha tau yaling di lima bulanna. ¹¹ Aha toboe’ tomarayanna ang mampahenta. Yato tomaraya dianto malaeka’ ang untokei pekilinna kahoäng to mate. Sanganna yato malaeka’ yaling di basa Ibrani dianto ’Abadon’ anna yaling di basa Yunani disanga ’Apolion.’ Bahtuanna inde sanga dianto ’Pakarakeang.’ ¹² Katilakaang uhuna lehammi. La deruake’ katilakaang ang la sule. ¹³ Tahpana malaeka’ kaunnunna umponi terompe’na, ya’ kuhingnging kamaha sule di hao mai di uhpa’ sikunna pantunuang penombaang bulahang di olona Puang Alataala. ¹⁴ Yato kamaha ma’kara pano di malaeka’ kaunnunna naoatee, "Lahpa’i yato uhpa’ malaeka’ ang tisangke’ di hoi’ di Bone Efrat!" ¹⁵ Ya’ dilahpa’ siang yato uhpa’ malaeka’ ang supung dipatokaing tehte’ indee, allo dinoa, bulang dinoa, anna pahiama indee la umpatei sambahe tallunna hupatau. ¹⁶ Kuhingnging dongngatu’ juta mai’dinna yato tantara ang moarahang. ¹⁷ Kuitang yato arahang anna ang mampensakei. Yato to pensake umpake kaya’ bahsi pähä’lä’, mamahta’, anna makuni’. Bää’na yato arahang sinnoa bää’ singa anna di suana sohong api, hambu anna ang masae puhpu noanna dama’. ¹⁸ Sambahe tallunna hupatau napatei inde tallu hupanna kamadahhaang, dianto api, hambu anna noanna dama’ ang sohong yaling mai di suana yato arahang. ¹⁹ Kamatohoanna yato arahang di hao di suana anna di okinna. Okinna kanoaang bää’ ile dianto ang ungkarakei hupatau. ²⁰ Ampo’ la’binna hupatau ang dai napatei yato kamadahhaang, dasiang mengkatoba’ di hao mai di pembabe kalaena, diantoo: dasiang natohhoi umpenombai dehata-dehata lino anna tasanda-sanda ang nababe umpake bulahang, pera’, tembaga, batu sibaha kayu ang dai mala paita, pahingngi anna mellao. ²¹ Datoi sika naboli umbabe kakarakeang, noanna papateang, ihsang-ihsang, ungngindä’-indä’ pa’bannetauang anna maboko.

¹ Tahpana yatoo kuitang mesa malaeka’ matoho tuhung yaho mai di suruka nasapu’ salehu’, anna haho bää’na nalikoi tahauhe. Lindona pansillo’ sinnoa mata allo, anna bihti’na sinnoa api meleä’-leä’. ² Di teyyena aha mesa lolongang suha’ saohko’ ang tibuhke. Bihti’ kuananna mengngindä’ di le’bo’ anna bihti’ kaihinna mengngindä’ di kalantanang. ³ Mekoha napekäyyängngi sinnoa oninna singa. Puhanna mekoha yato malaeka’, natimba’ing pempitu kundäng sikäyyäng poduru-durunna. ⁴ Puhanna yato kundäng, pemalamä’ kuuki’, ampo’ tahpa unghingngiä’ kamaha yaho mai di suruka naoatee, "Padiinahammui supu samai ang natula’ indo kundäng. Damong ungnguki’i!" ⁵ Pihsananna yato malaeka’ ang di le’bo’ anna di kalantanang ungngängkä’ teyye kuananna dai’ di langi’. ⁶ - ⁷ Mopinda umpake sanganna Puang Alataala ang tuho lambi’ sapano-panona, ang umpadahi langi’ anna lino sibaha le’bo’ anna ingkänna ihsinna. Naoate yato malaeka’, "Ponna umponi terompe’na malaeka’ kapitunna, la umpembabeminto pahtuyunna Puang Alataala ang dake’ aha mangnginsang, sinnoa ang puha napainsangngi pano di ingkänna nabi, sabua’na. Tempona dang la tirende!" ⁸ Tahpana yatoo kuhingngi bumi kamaha ang puha kuhingngi yaho mai di suruka naoaingkä’tee, "Laoo do alai indo lolongang suha’ ang tibuhke pano di teyyena malaeka’ ang simesaang bihti’na di le’bo’ anna di kalantanang." ⁹ Ya’ mao siamä’ do kupalau yato lolongang suha’ saohko’ anna malai nabeaä’. Lambi’ku pano naoantee, "Alai anna ungngandei indee. Yaling di suamu la unsa’ding matänning sinnoa duho uhani ampo’ yaling di kompemmu la unsa’ding mapäi’." ¹⁰ Kukandoing yato lolongang suha’ saohko’ mane kuandei. Di sua noa tora’ mammi’na duho uhani, ampo’ tahpana kubilling, yalinna di kompeng mapäi’mi. ¹¹ Puhai yatoo, napahentamä’ naoatee, "Pepainsang buking pepasanna Puang Alataala didiona kamadahhaanna ingkänna bohto anna setomarayaang."

¹ Puhanna yatoo dibeamä’ sambose’ kayu sinnoa hupanna huntung pepansi, mane naoaingkä’tee, "Laoo do mete’i Dasang Ada’na Puang Alataala sibaha pantunuang penombaang. Ihsa’i sangngaka mai’dinna tau ang menomba yaling. ² Ampo’ dane’ ummete’i tähämpä’na, aka’ puhane’ dibehoing pano di tau ang dai ungnginsang Puang Alataala. Yato tau la sika ungngindä’-indä’ bohto mahoa’ ang masero yaling di uhpa’pulo derua bulanna, bahtu’ tallu setangnga pahiamanna. ³ La unsuoä’ derua sa’bingku ang mekaya’ ma’tomate, sika umpepainsangnging kahebaku yaling di sansa’bu dongngatu’ unnumpulo allona, bahtu’ tallu setangnga pahiamanna." ⁴ Yato derua sa’bi dianto derua bätänna poang zaitun anna derua pampatokoang lampu ang aha di olona Puang Alataala To umpuängang lino. ⁵ Ponna aha tau nasändä’ la mangkarakei, ya’ la aha api sohong yaling mai di suana ungngämpu’i samai balinnaii. Napanoanto indee umpatei ingkänna tau ang la mekarakei. ⁶ Aha kakuasaanna anna malai dai kene’ yaling di tempona umpepainsangnging kaheba ang sule yaho mai Puang Alataala. Ma’kuasa toi umpopendahi haha samai pengkalaoanna uhai. Mala toi umpaaha ma’kahupa-hupa kamasuhsaang yaling di lino diamo naonge sihatang napambabei. ⁷ Puhanna sika umpepainsangnging yato kaheba, ya’ sohommi olo’-olo’ di hoi’ mai di kahoäng to mate anna sika natolla’i napetaloi lambi’ mate. ⁸ Bahkenaii la sikalampa’ pano di lalang käyyäng yaling di bohto mahoa’, ang naonge Dehatanna ditoke’ yaho di kayu sitambeng. Sanganna yato bohto dipakonai Sodom bahtu’ Mesir tandana membabe karake pano di petauanna Puang Alataala. ⁹ Tau di hao mai di ingkänna bohto di lino la umpahandang yato bahke yaling di tallu setangnga allona, anna dai sika napabei diku’bu’. ¹⁰ Ingkänna to lino sika kahsi didiona kamateanna yato derua sa’bi. Sika ma’mahoa’-hoa’ anna sipakatu sandahupa, aka’ yato derua sa’bi puha umpaaha mai’di kamadahhaang pano di ingkänna tau di lino. ¹¹ Ampo’ puhanna yato tallu setangnga allona, ya’ napapenanahang Puang Alataala yato derua sa’bi lambi’ tuho sumule. Sika ke’de’ siang, lambi’ yato tau ang mangngita sika mahea’ liu. ¹² Pihsananna yato derua sa’bi unghingnging kamaha napekäyyängngi yaho mai di suruka sika ditambai dioaintee, "Maikoa’ done indee!" Tahpa sika dai’ siang di suruka nasapu’ salehu’ naita yato balinnaii. ¹³ Donetoo dahi siang lino’ käyyäng. Bahe sampulona yato bohto mahoa’ sitale-tale, anna pitunsa’bu tau mate napobua’ yato lino’. Ingkänna tau senga’ sika mahea’, lambi’ sika umpudi Puang Alataala ang ma’pahenta yaho di suruka. ¹⁴ Katilakaang kaderuanna puhang. Ampo’ itai! Katilakaang katallunna la baha’ dahi sia bumi. ¹⁵ Pihsananna yato malaeka’ kapitunna umponi terompe’na, ya’ ahang kamaha napekäyyängngi yaho di suruka naoatee, "Kakuasaang umpahenta to lino ahang dinoa di teyyena Dehatanta sibaha To Nalanti’ la Mepasalama’. Dianto ang la ma’pahenta lambi’ sapano-panona!" ¹⁶ Pihsananna malimuntu’mi yato dompulo uhpa’ to dipakeangka’ ang mohko’ di ohko’annaii di olona Puang Alataala anna menombai. ¹⁷ Sika naoantee, "O Puang Alataala, To Handang Ma’kuasa, ang aha anna ang inang ahang! Menau-nauang mating aka’ puhamo umpake kakuasaammu ang käyyäng anna umpahandu’mi ma’pahenta! ¹⁸ Ingkänna tau ang dao mangnginsang sika keaha’, ampo’ lambi’mi tempona umpepaitaing kakeaha’ammu. Lambi’ tung tempona umpahehsao ang nababe to mate naonge tuhoke’. Dianto inde tempona la umbea saho sabua’mu, samai nabi, anna pano di petauammu ang mampenombaio, moi memase-mase, moi dipakeangka’. Tempona toi untallangngi tau ang ungkarakei to lino!" ¹⁹ Puhanna yatoo tibuhke siang Dasang Ada’na Puang Alataala ang yaho di suruka anna landa’i yato Pahti Pa’dandiang yaling di huänna. Tahpa kila’ siang anna kundäng käyyäng sibaha lino’ anna kene’ batu ang makambang.

¹ Pihsananna diitang yaho di langi’ mesa tanda ang mepusa’-pusa’ anna senga’-senga’. Mesa bahine ang nasapu’ mata allo salamang ang napekaya’, lella’ ungngindä’i bulang. Yaho di bää’na aha songko’ nadehke’i sampulo derua bintäng. ² Yato bahine kehähtäng anna lambi’mi tempona la keänä’, ya’ mohahaemmi aka’ mansa’ding. ³ Mane landa’ boi yaho di langi’ mesa tanda ang mepusa’-pusa’ dianto aha mesa saha malea ang käyyäng liu, pitu bää’na anna sampulo tandi’na. Mesa boi bää’na mesa bung songko’ tomaraya. ⁴ Yatoo okinna unghui’ sambahe tallunna bintäng yaho di langi’ mane napentibeing naung di lino. Inde saha di hao di olona yato bahine ang lella’ mansa’ding, ungngempei yato änä’ ang la sohong, pemala naande. ⁵ Keänä’mi inde bahine mesa muane-ane ang la umpahenta ingkänna bohto sitonda kamatohoang. Ampo’ yato änä’ tahpa dipensintoing anna dibahai dai’ di olona Puang Alataala di ohko’ang tomaraya. ⁶ Tahpa menanda siang inde bahine pano di ongeang makä’däng, ang inang napatokaing Puang Alataala. Dianto naongei didakai yaling di sansa’bu dongngatu’ unnumpulo allona, bahtu’ tallu setangnga pahiamanna. ⁷ Pihsananna tahpa dahi siang kasitolla’ang yaho di suruka. Mikhael, mesa pongkahana malaeka’, sibaha malaeka’na untolla’ yato saha, noa toi yato saha naposolai toe’ malaeka’na, umbali Mikhael. ⁸ - ⁹ Ampo’ yato saha käyyäng ditalo anna dilaba’i yaho mai di suruka. Dipentibeing tama di lino sibaha malaeka’na. Dianto ile ang handang dolu ang disangai ’Pongkahana setang’ bahtu’ ’inaha karake,’ ang umbulitu’ ingkänna to lino. ¹⁰ Mane unghingngiä’ kamaha yaho di suruka naoatee, "Dinoante’ tempona Puang Alataala umpalanda’ kasalama’ang. Dinoa Puang Alataala umpalanda’ kakuasaanna ma’pahenta. Dinoa yato To Dilanti’ la Mepasalama’ umpalanda’ toe’ kakuasaanna! Aka’ ang untanda’ tahuhu solata to mampetahpa’ allo-bengi di olona Puang Alataala puhang dipentibeing tama di lino. ¹¹ Puhang nataloii ungngolai yato hahana Änä’ Domba sibaha kaheba ang tahpa’ ang sika napepainsangnging. Sika nasahane’ umpebeaing sungnga’na lambi’ mate. ¹² Dahi kahsi liu suruka anna samai ihsinna ang ma’ongeang yaling! Ampo’ lino anna le’bo’ tilaka nei’, aka’ napentamang Pongkahana setang. Kakeaha’anna masahhu’, aka’ nainsang sämpäi’dang supu tempona." ¹³ Tahpana nainsang yato saha ditibe tama di lino, ya’ napahandu’ siang umpalola leleng yato bahine ang puha ungkeänä’ing mesa muane. ¹⁴ Ampo’ yato bahine puha dipapanoi pani’na sahebaki käyyäng, anna malai lumolo’ pano di ongeang makä’däng, dianto ang naonge didakai di hao mai inde di saha yaling di tallu setangnga pahiamanna. ¹⁵ Pihsananna yato saha umpembuhha’ming uhai salamang salu uhai yaling mai di suana pano yato di patunna bahine anna malai nalabu. ¹⁶ Ampo’ lino umposolai yato bahine. Yato lino umbuhkei suana anna unsuhhu’i yato uhai ang sohong yaling mai di suana yato saha. ¹⁷ Yato saha keaha’ si’da-si’da pano yato di bahine, lambi’ le’ba’ do natolla’ peänä’anna, dianto ingkänna ang untuhu’i pahentana Puang Alataala anna ang unsa’bii Puang Yesus. ¹⁸ Ya’ tohhong yato saha di hoi’ di behing le’bo’.

¹ Pihsananna ungngita bumä’ mesa olo’-olo’ sampulo tandi’na anna pitu bää’na, sohong di hoi’ mai di le’bo’. Yato tandi’na pantang kesongko’ tomaraya, anna di hao di bää’na pantang aha tiuki’ mesa sanga ang untula’ tahuhu Puang Alataala. ² Hupanna yato olo’-olo’ sinnoa tallu hupanna olo’-olo’ peande. Kalaena sinnoa singa anna bihti’na sinnoa bihti’ beruang kalambe’ kanukunna, anna suana sinnoa suana harimau. Inde olo’-olo’ nabea yato saha kamatohoanna ang käyyäng anna kakuasaanna ma’pahenta. ³ Kuitang mesa bää’na yato olo’-olo’ sinnoa ang bila’ käyyäng ang sai’di’ tala napobaha mate ampo’ bono’mi. Ingkänna ihsi lino pusa’ anna untuhu’i yato olo’-olo’. ⁴ Sika menomba pano yato di olo’-olo’ lella’ naoatee, "Dang aha ang sinnoa inde olo’-olo’! Dai aha ang bahani mambali!" Noa toi sika umpenombai yato saha aka’ dianto ang umbea kakuasaanna pano yato di olo’-olo’. ⁵ Yato olo’-olo’ dipabei tomande’ ungngangka’-angka’ kalaena sibaha untula’-tula’ tahuhu sanganna Puang Alataala. Dipabei toi ma’pahenta noa yaling di uhpa’pulo derua bulanna, bahtu’ tallu setangnga pahiamanna. ⁶ Ya’ napahandu’ siang untändoi Puang Alataala, noa toi ang naonge tohho anna ingkänna ang aha yaho di suruka. ⁷ Dipabei toe’ umpa’bali petauanna Puang Alataala anna nataloi. Dibea kakuasaang umpahenta ingkänna bohto di lino. ⁸ Yato olo’-olo’ la napenombai ingkänna to lino. Supure’ ang puhang tiuki’ sanganna yaling di suha’ pantekenganna to tuho lambi’ sapano-panona daine’ la mampenombai. Dake’ aha dipadahi inde lino inang aha tiuki’ sangannaii tama inde di suha’ ang naampui Änä’ Domba ang puha dikehe’. ⁹ Ponna ke pemalakoa’ ungnginsang manahpa, ya’ pehingngii si’da-si’dai: ¹⁰ Tau ang la ditahungkung inang la ditahungkunna. Ang la dipatei umpake pa’dang, inang la dipateinna. Dianto anna pahallui petauanna Puang Alataala sa’bara’ anna umpamatoto’ kapampetahpa’anna. ¹¹ Mane ungngita bouä’ mesa olo’-olo’ senga’ sohong di hoi’ mai di tampo, derua tandi’na sinnoa änä’ domba ampo’ kamahanna sinnoa oninna saha. ¹² Inde olo’-olo’ umpake kakuasaang ang käyyäng di olona yato olo’-olo’ ang uhuna, ang natahimbo siang di hao mai. Ingkänna ihsi lino napahsa umpenombai yato olo’-olo’ ang uhuna ang bono’mi bila’ käyyänna. ¹³ Olo’-olo’ inde ang kaderuanna umpaaha tanda ang mepusa’-pusa’ liu. Di olona ingkänna tau umpadahi api mengkalao yaho di langi’ tuhung naung di lino. ¹⁴ Ingkänna tau ang aha di lino nabulitu’ umpake tanda ang mepusa’-pusa’ ang dipabei nababe di olona yato olo’-olo’ ang uhuna. Anna sika disuo asang umpake’de’ tau-tau sinnoa hupanna yato olo’-olo’ ang puha nabila’i pa’dang ampo’ tontong tuho. ¹⁵ Yato olo’-olo’ kaderuanna dipabei umpapenanaha yato tau-tau, lambi’ mala ma’kara anna umpatei ingkänna tau ang dai mampenombai. ¹⁶ Lambi’ samai hupatau, keangka’ bahtu’ dai, to makaka bahtu’ to pemase-mase, sabua’ bahtu’ to beba’ napahsa toi yato olo’-olo’ untahimbo tanda di hao di teyye kuanannaii bahtu’ di hao di kandinna. ¹⁷ Nasuhung napanoa anna malai dai aha moi poro la mesa ang mala mangngalli bahtu’ ma’balu’ ke dai umpake tanda dianto sanganna siang yato olo’-olo’ ang uhuna bahtu’ hekenganna, ang sinnoa bahtuanna. ¹⁸ Done indee pahallu dipihki’. Tau ang manähäng malaete’ ungngihsa’ bahtuanna yato hekenganna olo’-olo’. Aka’ hekenganna dianto sanganna mesa tau ang diihsa’ unnungngatu’ unnumpulo unnung.

¹ Pihsananna kupahandang anna kuita yato Änä’ Domba ke’de’ yaho di Tanete Sion sibaha-baha sangngatu’ uhpa’pulo uhpa’ sa’bu tau sangka’ tiuki’ sanga Änä’ Domba anna sanganna Ambena di hao di kandinnaii. ² Mane unghingngiä’ mesa kamaha memuhhung yaho di suruka sinnoa oninna salänsäng malängkä’ anna sinnoa kundäng balu. Yato kamaha maleke dihingngi sinnoa oninna katapi. ³ Di olona yato ohko’ang tomaraya anna yato uhpa’ hupanna ang menanaha anna to dipakeangka’, yato sangngatu’ uhpa’pulo uhpa’ sa’bu tau sangka’ sika umpopenani penaniang bakahu. Penaniang indee dai mala napellaya’i tau senga’, ke dai sika dia toboe’ ang puha disulängngi yaling mai di lino. ⁴ Katuhoannaii masero. Sihapang tau ang dai aha ungngindä’-indä’ pa’bannetauang, dai aha sika umpenombai ang senga’ supung Änä’ Domba. Diamo naola yato Änä’ Domba, dia tunne’ sika naola. Puhang sika disulängngi di alla’na ingkänna tau di lino. Sinnoanna boa pengkähäng ang uhuna dipopenomba, noa tunne’ inde mai tau dipopenomba dai’ di Puang Alataala anna dai’ di Änä’ Domba. ⁵ Daliu aha sika loseng anna dai aha sallaanna moi poro la sai’di’. ⁶ Mane kuita boi aha mesa malaeka’ lella’ lumolo’ yaho di nähäng. Yato malaeka’ umbaha Kaheba Mapia ang dai aha puhanna, la napepainsangnging pano di hupatau ang aha yaling di lino dianto pano di ingkänna bohto. ⁷ Yato malaeka’ ma’kara napekäyyängngi naoatee, "Penombakoa’ dai’ di Puang Alataala anna pamatandei! Aka’ temponang Puang Alataala la umpahehsa hupatau. Penombaii yato ang umpadahi langi’, kalantanang, le’bo’ anna ingkänna timbu!" ⁸ Mentindo’ siang malaeka’ kaderuanna anna ma’karai napekäyyängngi naoatee, "Puhang sitale-tale! Bohto Mahoa’ Babel ang käyyäng puhang sitale! To Babelmito indee ang umpadahi katasampa’ang lambi’ samai bohto mamponialai untindo’ pampemalanna ang tasampa’! Sinnoanna napaenu’ ang mepamalango." ⁹ Mentindo’ bumi malaeka’ katallunna anna ma’karai napekäyyängngi naoatee, "Tau ang umpenombai yato olo’-olo’ anna tau-tau ang nababe, anna ang ketanda di hao di kandinna bahtu’ teyyena, ¹⁰ dianto tau ang la pahallu ungngenu’ angkoro’na Puang Alataala. Angkoro’ yatoo dianto kakeaha’anna Puang Alataala ang puha napatoka la dienu’, dai aha kuhang masahhu’na moi poro sai’di’. Ingkänna yato tau la didahha tama di api handang maluhsu’ di olona semalaeka’ang ang masero anna yato di Änä’ Domba. ¹¹ Hambunna yato api ang la sika dipandahhai la mapulu’ lolo lambi’ sapano-panona. Allo-bengi dai aha tohhona sika didahha yato ang sika umpenombai olo’-olo’ anna tau-taunna, anna ang ketanda di hao di kandinna bahtu’ di teyyena." ¹² Dahi petauanna Puang Alataala ang mampehingngii pahentana, anna matoto’ kapampetahpa’anna dai’ di Puang Yesus, pahallu sa’bara’. ¹³ Puhai yatoo, unghingngimä’ kamaha yaho mai di suruka naoatee, "Uki’i indee: mengkalao dinoa, tau ang mampetahpa’ dai’ di Puang Yesus lambi’ mate, dianto ang la ullambi’ kamasannangang yaho mai di Puang Alataala!" Mentimba’mi Inaha Maserona Puang Alataala naoatee, "Inang tahpa’na. Sika la natohhoing mengkähäng kahha’ aka’ boana pengkähängannaii dianto la mamposolai dai’ di suruka." ¹⁴ Ma’pahandang bouä’, ya’ kuitang mesa ang sinnoa hupatau mohko’ di salehu’ mabusa. Mesongko’ bulahang anna untokei mesa kandao pahe’la’. ¹⁵ Pihsananna sohong bumi mesa malaeka’ yaling mai di Dasang Ada’na Puang Alataala yaho di suruka anna umpa’karaii yato tau ang mohko’ yaho di salehu’ napekäyyängngi naoaintee, "Pakeng ne kandaomu dinoa, aka’ lambi’mi tempona pepaheang. Matuang lino malang dipepahe!" ¹⁶ Tahpa ungngängkä’ siang kandaona yato tau naung di lino, ya’ dikandaong lino. ¹⁷ Mane ungngita bouä’ mesa malaeka’ senga’ sohong yaling mai di Dasang Ada’na Puang Alataala yaho di suruka ang untokei toe’ kandao pahe’la’. ¹⁸ Tahpana yatoo, suleng mesa malaeka’ senga’ ang ma’kuasa didiona api yaling mai di pantunuang penombaang. Umpa’karai yato ang untokei kandao pahe’la’ napekäyyängngi naoaintee, "Pakeng ne kandaomu naung di lino anna ungngalai asangngi boana angkoro’, aka’ matuang!" ¹⁹ Ungkandao siang boa angkoro’ di hao mai di bätänna mane napensaleba’ing tama di landaang käyyäng, dianto kakeaha’anna Puang Alataala. Dianto inde pohapangang didiona ang la napanoa Puang Alataala pano di to karake. ²⁰ Landaang yatoo di aneanna bohto mahoa’. Mesalu siang haha sinnoa angkoro’ ungngola sahuhang yato di pampihsä’ang salamang salu uhai. Tallungngatu’ kilo makahaona anna malimbenna sai’di’ tala dommete’.

¹ Pihsananna kuitang yaho di suruka mesake’ tanda ang mepusa’-pusa’ anna senga’-senga’. Aha pitu malaeka’ umbaha pitu kamadahhaang tamahamu’. Dianto inde ang katämpä’na kakeaha’anna Puang Alataala. ² Mane ahai kuita sinnoa le’bo’ mahändäng mala dipodahammeng sihau api. Kuita toi mai’di tau ke’de’ di hao di behinna le’bo’ lella’ siang sika untokei katapi ang nabea Puang Alataala. Dianto ingkänna tau ang puha untalo yato olo’-olo’ ang sanganna napotanda hekengang, sibaha tau-taunna. ³ Sika umpopenani penanianna Musa, dianto pesuona Puang Alataala, anna penanianna Änä’ Domba. Yato penaniang noa inde oninna, "O Puang Alataala To Handang Ma’kuasa, mepusa’-pusa’ anna senga’-senga’ samai ang umbabe! O Tomarayanna ingkänna bohto, mannahsa tahpa’ anna para-para pa’elo’mu! ⁴ Mennakake’ ang dai mahea’ mating di olomu, Puang? Mennake’ ang dai naaku umpamatande sangammu? Supunte’ Dio ang masero. Hupatau di hao mai di ingkänna bohto la sule menomba di olomu, aka’ kaitaang pembabemu ang dai mampasisenga’-senga’." ⁵ Puhanna yatoo kuitang yaho di suruka Tambing Handang Masero tibuhke yaling di Bansuli ang si naongei Puang Alataala umpellambi’i petauanna. ⁶ Mane naolai sohong yato pitu malaeka’ umbaha pitu yato kamadahhaang tamahamu’. Sika mekaya’ mabusa ang mabahahsi anna pansillo’. Sika mesalempäng bulahang. ⁷ Mesa yato di alla’na uhpa’ hupanna ang menanaha umbea yato pitu malaeka’ napopantang mesa kahti bulahang ang punno angkoro’ sihapang kakeaha’anna Puang Alataala ang tuho lambi’ sapano-panona. ⁸ Yato Dasang Ada’na Puang Alataala napunnoi hambu tanda yalimmi Puang Alataala ang ma’kuasa anna matande. Lambi’ dai aha moi poro la mesa tau mala mentama yato di Dasang ke dake’ puha yato pitu kamadahhaang tamahamu’ ang nabaha pitu malaeka’.

¹ Mane unghingngi bouä’ kamaha käyyäng yaling mai di Dasang Ada’na Puang Alataala ma’kara pano di pitu malaeka’ naoatee, "Laoo do umpentolloing yato pitu kahti kakeaha’anna Puang Alataala naung di lino!" ² Le’ba’mi inde malaeka’ ang uhuna anna napentolloing. Ya’ tahpa dahi siang hae ang tamahamu’ anna malala pano di ingkänna tau ang umpotanda yato olo’-olo’ anna napenombai. ³ Puhai yatoo, le’ba’ bung malaeka’ kaderuanna umpentolloing yato kahti naung di le’bo’. Ya’ tahpa mendahi haha siang yato uhai sinnoa hahana to dipatei. Matei siang yato samai ihsi le’bo’. ⁴ Pihsananna malaeka’ katallunna umpentolloing yato kahti pano di samai timbu anna salu uhai, ya’ mendahi siang haha yato samai uhai. ⁵ Kuhingnging yato malaeka’ ang ungkuasai uhai naoatee, "O Puang Alataala ang aha anna inang aha, To Handang Masero, sihatang kamadahhaang ang umpaaha! ⁶ Aka’ puhang sika umbollo hahana petauammu anna nabimmu. Dinoa sika umbala’mi umpaenu’ uhai ang menghaha. Inang sihatang sika noa!" ⁷ Kuhingnging kamaha yato di ongeang pantunuang naoatee, "Io, Puang Alataala To Handang Ma’kuasa, tahpa’ anna para-para ingkänna panghohto’mu!" ⁸ Malaeka’ kauhpa’na umpentolloing yato kahti tama di mata allo, ya’ mapana’ liung allo anna dipabei undä’däng hupatau. ⁹ Madahha yato hupatau napobua’ mapana’na allo, lambi’ sika untula’-tula’ tahuhu sanganna Puang Alataala ang ma’kuasa didiona yato kamadahhaang. Moinnakato noa, dasiang sika mengkatoba’ di hao mai di dosannaii anna dai naaku umpamatande Puang Alataala. ¹⁰ Tahpana malaeka’ kalimanna umpentolloing yato kahti naung di ongeang kakuasaanna yato olo’-olo’, ya’ tahpa malilling siang anna samai ihsinna ungkeki’ lilana napobua’ kamapi’di’anna. ¹¹ Lambi’ sika untula’-tula’ tahuhu sanganna Puang Alataala ang umpahenta suruka aka’ sika mapi’di’ sibaha pehae. Ampo’ dasia tunne’ naaku sika mengkatoba’ di hao mai di pembabe karakena. ¹² Mane malaeka’ kaunnunnai umpentolloing yato kahti pano di Bone Efrat ang käyyäng . Yato bone mahti’ lambi’ la mala naola setomarayaang ang sule yaling mai di katimbingang allo. ¹³ Pihsananna ungngitamä’ tallu inaha karake sinnoa bahebe hupanna, pantang sohong yaling mai di suana saha, olo’-olo’ anna yato ang boheng unsanga kalaena nabi. ¹⁴ Yato tallu inaha karake ang umbabe ang mepusa’-pusa’ mao pano di setomarayaang di lino anna malai sika ma’mesa la ma’tolla’ di allo ang dipa’käyyängngi, dianto allo ang naonge Puang Alataala To Handang Ma’kuasa la umpahehsa tau. ¹⁵ Kalehaii ang natula’ Puang Yesus naoatee, "Sinnoa to paboko daia’ la ungnginsang kasuleangku! Tau ang tontong madaka, dianto ang la ullambi’ kamasannangang yaho mai di Puang Alataala. Tau ang noa la undakai porehana anna malai dai mohobeläng mellao sibaha dai masili di olona tau kambang!" ¹⁶ Pihsananna yato tallu inaha karake umpopa’mesa setomarayaang di mesa ongeang ang yaling di basa Ibrani disanga ’Harmagedon.’ ¹⁷ Puhai yatoo, malaeka’ kapitunna umpentolloing yato kahti yaho di nähäng. Ya’ kahingngiammi kamaha napekäyyängngi yaho mai di ohko’anna tomaraya di Dasang Ada’na Puang Alataala naoatee, "Puhang dipembabeing kakeaha’anna Puang Alataala!" ¹⁸ Tahpa kila’ siang anna noa toi kundäng mokaliamba moduru-duru sibaha lino’ käyyäng. Dake’ aha dahi lino’ noa suka’na dahi hupatau. Dianto inde lino’ ang dai aha mantondong! ¹⁹ Yato Bohto Mahoa’ Babel ang käyyäng tiperetallu, noa toi samai bohto mahoa’ di lino titale-tale asang. Nakalehaing Puang Alataala dosanna to Babel anna nadahhai lambi’ puha yato kakeaha’anna ang napaenu’ sinnoa angkoro’ masahhu’ yaling mai di kahti. ²⁰ Ingkänna kalantanang masihki’ anna tanete pa’da asang. ²¹ Kene’ batu käyyäng ang silimampulo kilo matingnginna, dondongngi yaho mai di langi’ ungkanahoi hupatau. Ya’ sika untändoing Puang Alataala napobua’ yato kene’ batu ang masahhu’.

¹ Puhanna yatoo, suleng mesa malaeka’ di alla’na yato to pitu ang umpentolloing kahti naoaingkä’tee, "Maio anna kupaitaio ang la dipanoa untahungkung yato pahsundala’ kainsangang, ang mohko’ di behinna sangngaka-sangngaka uhai. ² Setomarayaang di lino sibaha inde mai pahsundala’ umbabe katasampa’ang, anna tau di lino malango napobua’ katasampa’anna ang naenu’ sinnoa angkoro’." ³ Nakuasai siamä’ Inaha Maserona Puang Alataala anna nabahaä’ yato malaeka’ ang di langngena’ pano di ongeang makä’däng. Di haoi kuita mesa bahine mensake di mesa olo’-olo’ malea ang samai kalaena tiuki’ untuna-tunai sanganna Puang Alataala. Yato olo’-olo’ pitu bää’na anna sampulo tandi’na. ⁴ Yatoo bahine mekaya’ malahtu anna malea anna umpake belo-belo bulahang, anna ma’kahupa-hupa belo-belo masuli’ noanna mutiara. Untokei mesa enu’ang bulahang ang punno ang dipasihapang kamahiri’ang anna kärähko’, boana katasampa’anna. ⁵ Hao di kandinna aha mesa sanga ang dake’ diinsang bahtuanna. Dianto: |scBabel ang käyyäng, Indona ingkänna pahsundala’ anna ingkänna katasampa’ang di lino.|r ⁶ Pihsananna kuitang yato bahine malango napobua’ hahana petauanna Puang Alataala dianto tau ang dipatei aka’ unsa’bii Puang Yesus. Kuitanna yato bahine pihsa’ pusa’ liumä’. ⁷ Ya’ naoamingkä’te yato malaeka’, "Aka boi anna pusa’ liuo? Mapianto anna kupainsangngio kalemba’anna yato bahine anna olo’-olo’ ang pitu bää’na anna sampulo tandi’na. ⁸ Yato olo’-olo’ inang ahaete’ dolu tuho ampo’ dinoa hopuing. Dako’ke’ mane sohongngi di hoi’ mai di kahoäng kamateang anna la tallangngi lambi’ sapano-panona. Ingkänna tau ang mengkalao di papianna inde lino dai tiuki’ sanganna tama di suha’ pantekenganna to tuho sapano-panona, la sika pusa’ asang. Aka’ la ungngita yato olo’-olo’ ang inang aha dolu anna dinoa hopuing ampo’ la aha bou sule dako’. ⁹ Dahi pahallu dipihki’ anna diinsang. Pitu yato bää’ donghupa bahtuanna, dianto pitu tanete ang naonge mohko’ yato bahine anna ang kaderuanna dianto pitu tomaraya. ¹⁰ Lima di alla’naii dang ma’pahenta. Mesa lella’ke’ ma’pahenta anna mesake’ mane la sule. Ponna ke suleng, la sämpäi’ supu ma’pahenta. ¹¹ Yato olo’-olo’ ang dolu aha ampo’ dinoa mateng, dianto tomaraya kakahuanna. Dia tuntone’ mesa di alla’na yato pitu tomaraya ang la mane tallang dinoa. ¹² Sampulo tandi’ yato ang ungngita, dianto sampulo tomaraya ang dake’ napahandu’ ma’pahenta. Ampo’ la sika dibea kakuasaang ma’pahenta sibaha yato olo’-olo’ yaling di mesa supu tehte’ masaena. ¹³ Sampulo inde tomaraya sinnoa-noa siang pahtuyunna. Sika umbeho asang kamatohoanna anna kakuasaanna pano yato di olo’-olo’. ¹⁴ Sika la ma’tolla’ umbali yato Änä’ Domba. Ampo’ yato Änä’ Domba anna samai to pentindo’na la sika patalo. Aka’ inde Änä’ Domba dianto Dehata ang umpadihoi’ang ingkänna sedehataang. Dia tunne’ tomaraya ang umpadihoi’ang ingkänna setomarayaang. To pentindo’na mala dipetahpa’, dianto tau ang puha natambai anna napillei." ¹⁵ Naoa toingkä’te yato malaeka’, "Yato sangngaka-sangngaka uhai ang ungngita ang naonge mohko’ pahsundala’, dianto ingkänna bohto di lino. ¹⁶ Yato olo’-olo’ sibaha sampulo tandi’ ang ungngita la ungkahiri’ yato pahsundala’. Sika la nahampa’i samai ang aha di kalaena lambi’ mohobeläng. Sika la naande balena anna napemämpu’i tama di api. ¹⁷ Aka’ sika napatibuhke inahanna Puang Alataala anna malai samai pahtuyunna napalao mapia. Sika napamesa inaha Puang Alataala umbeho kakuasaannaii pano yato di olo’-olo’, anna malai dia ma’pahenta lambi’ dahi yato ang natula’ Puang Alataala. ¹⁸ Yato bahine ang ungngita dianto bohto mahoa’ ang käyyäng ang umpahenta setomarayaang di lino."

¹ Puhanna yatoo, ungngita bumä’ mesa malaeka’ senga’ tuhung yaho mai di suruka. Aha kakuasaang käyyäng di kalaena lambi’ lino mendahi mabaya si’da-si’da napobua’ kamatandeanna. ² Mekoha napekäyyängngi naoatee, "Sitale-taleng! Bohto käyyäng Babel sitaleng! Dinoa mendahing ongeanna setang anna inaha karake. Naongei tuho sedansiang ang si ungngande bahke, sedansiang ang nakahi’di’ hupatau. ³ Aka’ tau di ingkänna bohto puha asammi umbabe katasampa’anna Bohto Babel. Pampemalanna mepamalango sinnoa tau ang ungngenu’ maho angkoro’. Setomarayaang di lino membabe tasampa’ sibaha anna setopa’buleleang di lino mendahi to makaka napobua’ yato pampemalanna ang liba’ maho." ⁴ Mane unghingngiä’ kamaha senga’ yaho di suruka naoatee, "Oa’ petauangku, sohongkoa’ yaling mai! Laokoa’ pelleii! Daumponialaii pembabena andana nahoa toukoa’ dio kamasuhsaang tamahamu’ sinnoa ang nasa’ding! ⁵ Aka’ dosannaii ma’toro’-toro’mi lambi’ dai’ di langi’ tandana mai’di, anna nainsammi Puang Alataala pembabe karakenaii. ⁶ Babe toinne’ sinnoa ang puha nababe. Bala’ine’ pendoang luhpi’ samai ang puha nababe. Pangngihsiing ang masahhu’ enu’anna, pendoang luhpi’ kamasahhu’anna yato ang puha napatokaing tau senga’ naenu’. ⁷ Padahiing kamadahhaang sibaha kamasuhsaang ang sinsamaang mai’dinna kamatandeang anna kasuki’ang ang napaaha toboe’. Aka’ si naoate didiona kalaena, ’Kodi’ inde tomaraya bahine ang ma’pahenta. Tadiaä’ balu bahine; dä’ la ungngolai kamasuhsaang!’ ⁸ Dianto suhunna anna la sangngalloi supu napihsangngi nahoa inde kamadahhaang, dianto kamasuhsaang, kabuhohangang anna kamateang. Kalaena la naämpu’i api, aka’ ang la mampahehsa dianto Puang Alataala ang ma’kuasa." ⁹ Setomarayaang di lino umbabe katasampa’ang sibaha anna tuho taumpuha aka-akanna. Dinoa la sika ungngumbuing yato bohto mahoa’ ke ungngitang hambu mapulu’ ang mengkalao yato di api ang mangngämpu’i. ¹⁰ La sika nakahaoi aka’ mahea’ nahoa kamadahhaanna. Sika naoatee, "Bendo’ bulangngete’ indo bohto ang kainsangang, Bohto Mahoa’ Babel ang matoho. Pake yaling supu di mesa tehte’ anna tallang tubung nei’!" ¹¹ Setopa’buleleang di lino mumbu asang toe’ anna ma’tomate napobua’ yato bahine, aka’ dang aha ang la mangngalli balu’naii. ¹² Dang aha mangngalli ang nabalu’ noanna: bulahang, pera’, belo-belo masuli’ ang malehke’ noanna mutiara; noa toi kaing balatung, kaing malahtu, kaing pahuhellu’, anna kaing malea; ma’kahupa-hupa kayu ang dai sadilambi’na, kayu bomammi’ ang masuli’, ma’kahupa-hupa ang toha masuli’ dipapia, ma’kahupa-hupa ang tembaga anna bahsi ditampa anna batu pahuhellu’ ang mabusa hupanna; ¹³ koli’na kayu bomammi’, rampa-rampa, lohpo-lohpo bomammi’ noanna mur anna kemenyang, angkoro’, minnä’, tahpung mainnä’ anna gandum, saping, domba, arahang, bendi, sabua’ anna to disahka. ¹⁴ Ingkänna to pa’balu’ ungngoainte yato bahine, "Samai ang umpemala ungngala dante’ aha, anna ingkänna ang keangka’ anna ang maleke pa’da asammi di kalaemu anna dang aha la dilambi’ salake’." ¹⁵ Ingkänna to pa’balu’ ang suki’mi, aka’ ma’balu’ yato di bohto mahoa’, la le’ba’ makahao aka’ sika mahea’ nahoa kamadahhaanna. Sika mangngumbui, ¹⁶ laona siang ma’kara naoatee, "Bendo’ bulangngete’ katallanganna indo bohto mahoa’ ang kainsangang! Si mekaya’ palansinang, kaing malahtu anna malea. Si napunnoi belo-belo bulahang ang kebelo masuli’ anna malehke’ noanna mutiara. ¹⁷ Ampo’ yaling supu di mesa tehte’ anna pihsa’ pa’dang katomakakaanna." Ingkänna to pampalao kahpala’ le’bo’ sibaha to pa’bulele anna samai tau ang aha yaling mangkahaoi asang. ¹⁸ Tahpana ungngita hambu mapulu’ sohong di hoi’ mai di api ang ungngämpu’i yato bohto mahoa’, sika kohang naoatee, "Daete’ aha bohto mahoa’ senga’ ang nasinnoaing indo bohto." ¹⁹ Tahpa sika umpensahu’ming bunging dai’ di bää’na anna sika mangngumbuii laona siang naoatee, "Bendo’ bulangngete’ indo bohto ang kainsangang! Kasuki’anna tapotomakakangnga’ samaingkea’ ang kekahpala’ le’bo’! Pake yaling supu di mesa tehte’ anna tallang tubung nei’!" ²⁰ O ingkänna ang aha di suruka, penau-naukoa’ ungngita indo bohto mahoa’! Oa’ ingkänna petauanna Puang Alataala, rasul anna nabi penau-naukoa’ aka’ natallangnging Puang Alataala bala’na yato ang puha nababeingkoa’! ²¹ Puhanna yatoo, ahang mesa malaeka’ ang matoho ungngängkä’ mesa batu käyyäng liu mane napensaleba’ing tama di le’bo’ anna naoaitee, "Dipanoanto inde dipentibeing Bohto Mahoa’ Babel ang kainsangang anna malai dang aha diita, pa’da liung. ²² Dang aha la kahingngiang yaling oninna to pokatapi sibaha to penani, to posuling anna ang umponi terompe’! Datung aha dilambi’ to manähäng kababe-babe anna datoi aha kahingngiang kilingang pahe. ²³ Dang aha la diita pansillo’na lampu yaling, anna datung aha kahingngiang pa’rame-rameanna to kabeng. To pa’bulelemu dianto ang handang keangka’ di lino, anna to pa’ihsammuntoo umpasähsä’ lalang ingkänna bohto di lino! ²⁴ Bohto Babel ditallangngi aka’ mai’ding yaling haha titähhä’, dianto hahana nabinna Puang Alataala, hahana petauanna, poko’na hahana ingkänna tau ang dipatei di lino."

¹ Puhanna yatoo ahang kamaha kuhingngi sinnoa ang mai’di tau bongnga’ yaho mai di suruka naoatee, "Pudii Puang Alataala! Dehatanta dianto ang mepasalama’, To Handang Ma’kuasa anna matande! ² Panghohto’na tahpa’ anna para-para! Puhang untahungkung yato pahsundala’ ang kainsangang ang ungkarakei lino napobua’ katasampa’anna. Natallangnging Puang Alataala aka’ puha umpatei petauanna!" ³ Ma’kara bumi naoatee, "Pudii Puang Alataala! Hambu ang mengkalao di api ang ungngämpu’i yato bohto mahoa’ daliu aha la natohhoi lambi’ sapano-panona!" ⁴ Ya’ malimuntu’mi yato dompulo uhpa’ to dipakeangka’ anna yato uhpa’ hupanna ang menanaha menomba di olona Puang Alataala ang mohko’ di ohko’ang tomaraya. Sika naoatee, "Tahpa’ liunte’! Pudii Puang Alataala!" ⁵ Mane ahai kahingngiang kamaha yaho mai di ohko’ang tomaraya naoatee, "O ingkämmua’ petauanna ang mampenombai, moi sepongkahaang moi sabua’, pudii Dehatanta!" ⁶ Puhai yatoo kuhingngi bumi ang umbai kamahanna tau kambang ang sinnoa oninna salänsäng malängkä’ anna sinnoa kundäng balu naoatee, "Pudii Puang Alataala, aka’ Dianto Dehatanta To Handang Ma’kuasa ang ma’pahenta! ⁷ Lambi’mi allo kakabenganna yato ang disangai Änä’ Domba anna umpasadiang kalaena ang la napobahine. Dahi tapa’rame-rame anna kahsiingkea’, tapamatande sanganna! ⁸ Yato bahine, puhang dipakei kaya’ mabahahsi anna palansinäng." (Kaya’ ang noa yatoo dipasihapang pembabe mapia ang napengngoya’ing petauanna Puang Alataala.) ⁹ Mane napa’karaiä’ yato malaeka’ naoatee, "Uki’i indee: tau ang dibahai pano di pa’rame-rameang kakabenganna Änä’ Domba dianto ang la ullambi’ kamasannangang yaho mai di Puang Alataala." Ya’ nahängngängngike’ tula’na yato malaeka’ naoatee, "Tahpa’ liuete’ inde ang natula’ Puang Alataala." ¹⁰ Tahpa malimuntu’mä’ di olona yato malaeka’ la menomba, ampo’ nasängkäiä’ naoatee, "Daa! Daumpenombaiä’! Penombaio Puang Alataala! Aka’ sabua’ turä’to koo; sinnoa siamingke anna ingkänna solasohommu ang unsa’bii Puang Yesus! Aka’ ang handang poko’ ang natula’ ingkänna nabi dianto unsa’bii Puang Yesus." ¹¹ Pihsananna ungngitamä’ langi’ tibilläng, ya’ landa’mi mesa arahang mabusa. Ang mampensakei disangai To Tahpa’ ang mala Dipetahpa’. Mampapara-para yaling di pambohtuang kaha-kaha anna naonge untolla’i balinna. ¹² Matanna sinnoa api meleä’-leä’. Yaho di bää’na mai’di songko’ tomaraya anna di hao di Kalaena tiuki’ mesa sanga ang supung Kalaena toboe’ ang mangnginsang. ¹³ Disanga toe’ "Bahtakaranna Puang Alataala." Kaya’ kalambe’ ang napake puha ditonäng naung di haha. ¹⁴ Ingkänna to pa’tolla’ yaho di suruka mentindo’ asang, umpensakei arahang mabusa sibaha umpake kaya’ mabusa ang bahahsi. ¹⁵ Suana naongei sohong mesa pa’dang pahe’la’ ang la napake untalo ingkänna bohto. La sundung kakuasaanna umpahentaii. La ullanda angkoro’ yaho di landaang ang dipasihapang kakeaha’anna Puang Alataala To Handang Ma’kuasa. ¹⁶ Di hao di kaya’ kalambe’na anna di hao di paanna naongei tiuki’ mesa sanga dianto, |scTomaraya ang umpadihoi’ang ingkänna setomarayaang, anna Dehata ang umpadihoi’ang ingkänna sedehataang.|r ¹⁷ Mane ungngitaä’ mesa malaeka’ ke’de’ yaho di mata allo umpa’karai sedansiang ang sika lolo’ napekäyyängngi naoaintee, "Maikoa’ done inde tihimpung umpakahoa’ pa’rame-rameang käyyäng ang napaaha Puang Alataala, ¹⁸ anna malai ungngandekoa’ balena setomarayaang, setantaraang, to pa’tolla’, to poarahang sibaha arahanna anna ingkänna hupatau, moi to keangka’, moi to pemase-mase; moi sepongkahaang, moi sabua’." ¹⁹ Pihsananna kuitang yato olo’-olo’, anna setomarayaang di lino sibaha setantaraannaii tihimpung. La sika untolla’ yato ang umpensakei arahang mabusa sibaha ingkänna änä’ buana. ²⁰ Ya’ disahkang yato olo’-olo’ sibaha yato ang boheng unsanga kalaena nabi ang puha umbabe tanda ang mepusa’-pusa’ di olona yato olo’-olo’. (Napanoa inde nabi anna malai umbulitu’ tau ang umpotanda yato olo’-olo’ anna umpenombai tau-taunna.) Dipentibeming yato derua to pampasähsä’ lalang tama di api handang maluhsu’ ang malua’ noa le’bo’. ²¹ Ingkänna petauanna dipatei umpake pa’dang ang sohong yaling mai di suana yato Tau ang umpensakei arahang mabusa. Samai sedansiang sule asang ungngande yato balenaii lambi’ boho.

¹ Puhanna yatoo, ungngitamä’ mesa malaeka’ tuhung yaho mai di suruka untokei pekilinna kahoäng lunaung di ongeanna to mate anna umbaha hante bahsi käyyäng. ² Mane unsahkai yato saha, dianto ile ang handang dolu, ang disangai ’Pongkahana setang’ bahtu’ ’inaha karake,’ mane napungoi yaling di sansa’bu pahiamanna masaena. ³ Napentibeming naung di kahoäng lunaung di ongeanna to mate, mane natana’i napamakapu’, anna malai yato saha dai umbulitu’ ingkänna bohto ke dake’ puha yato sansa’bu pahiamanna. Puhaitoo, ya’ la dilahpa’mi sämpäi’. ⁴ Pihsananna ungngitamä’ sangngaka-sangngaka ohko’ang anna yato ingkänna tau ang mohko’ yaho dibea kakuasaang umbohtu kaha-kaha. Kuita toi sungnga’na tau ang puha dipolengngi bää’na aka’ sika unsa’bii Puang Yesus anna umpepainsangnging Bahtakara Dehata. Yato tau dai umpenombai olo’-olo’ bahtu’ tau-taunna. Datoi aha sika untahimbo tanda olo’-olo’ ang dipapano di kanding bahtu’ di teyye. Sika dipatuhong sumule la ma’pahenta sibaha Kristus yaling di sansa’bu pahiamanna. ⁵ - ⁶ Di alla’na ingkänna to mate dianto inde kombongang tau ang uhuna la dipatuho sumule. Dianto to masero ang la ullambi’ kamasannangang yaho mai di Puang Alataala. Danne’ sika ungngolai kamateang kapendoanna, dianto dipatama di api nahaka. Sika la dipasinnoa imang untahiai Puang Alataala anna Kristus, anna sibaha-baha ma’pahenta yaling di sansa’bu pahiamanna. (Ampo’ to mate senga’ dake’ne’ dipatuho sumule yaling yato di tempo sansa’bu pahiamanna.) ⁷ Ponna ke puhang yato tempo sansa’bu pahiamanna, la dilahpa’mi Pongkahana setang yaling mai di pantahungkunganna, ⁸ anna le’ba’i umbulitu’ ang disangai ’Gog anna Magog,’ ang bahtuanna ihsi bohto di ingkänna lino. Lambi’ sika la tihimpung do ma’tolla’. Mai’dinna sinnoa bunging di behing le’bo’. ⁹ Ya’ sika le’ba’i siang titähhä’ tama di lino, anna ulleboi bansulinnaii petauanna Puang Alataala dianto bohto mahoa’ ang napakamaya Puang Alataala. Ampo’ sika naämpu’i api ang tuhung yaho mai di langi’. ¹⁰ Pihsananna yato Pongkahana setang ang sika mambulitu’ dipentibeing tama di api handang maluhsu’ ang malua’ noa le’bo’. Dianto ang naonge dipantibei yato olo’-olo’ sibaha yato ang boheng unsanga kalaena nabi. Sika didahha allo-bengi lambi’ sapano-panona. ¹¹ Puhai yatoo, ungngitamä’ mesa ohko’ang tomaraya ang käyyäng anna mabusa sibaha ang mohko’ yaho. Langi’ anna lino mengkapa’da di olona anna dang aha diita sala ongeanna. ¹² - ¹³ Aha toi kuita to mate, noa to dipakeangka’, noa tunne’ to pemase-mase, sika ke’de’ di olona yato ohko’ang. Ingkänna tau ang mate di le’bo’, noa tunne’ ang mate di kalantanang, poko’na ingkänna tau di hoi’ mai di ongeanna to mate sika ke’de’ di olona yato ohko’ang. Mane dihuhka’i mai’di suha’. Yaling yato di suha’ aha tiuki’ pembabenaii ingkänna to mate. Ya’ dipahehsang yato to mate situhu’ pembabenaii ang tiuki’. Dihuhka’ tunne’ mesa suha’ senga’, dianto suha’ pantekenganna to tuho lambi’ sapano-panona. ¹⁴ - ¹⁵ Tau ang dai aha tiuki’ sanganna yaling di suha’ to tuho, dipentibeing tama yato di api malua’. Puhai, ya’ dang aha kamateang, datunne’ aha ongeanna to mate aka’ ingkänna ang dai tiuki’ sanganna yaling di suha’ to tuho dipentibe asangnging tama yato di api malua’. Dianto ang disangai, ’kamateang kapendoanna’ ke didahhai tama inde di api.

¹ Tahpana yatoo ungngitamä’ langi’ bakahu anna lino bakahu, aka’ langi’ anna lino ang uhuna pa’dang nei’, noa tunne’ le’bo’. ² Kuitang Bohto Mahoa’ Yerusalem Bakahu ang masero tuhung yaho mai di suruka mengkalao di Puang Alataala. Yato bohto puhang dipasadia sinnoa mesa bahine ang la kabeng dipapunnoi belo-belo untammui muanena. ³ Mane unghingngiä’ kamaha käyyäng yaho mai di ohko’ang tomaraya naoatee, "Dinoa Puang Alataala la tohho sibaha-baha hupatau; ongeanna dianto yaling di tängngä-tängngänaii anna la sika sibaha lolong! Sika la mendahi petauanna anna Puang Alataala toboe’ la mendahi Dehatanna. ⁴ Puang Alataala la umpahsii uhai mata ang aha di matannaii. Kamateang dang la aha sala. Kamasuhsaang, mangngumbui bahtu’ kamapi’di’ang datunne’ la aha, aka’ kaha-kaha ang dolu puha tubunne’ pa’da." ⁵ Pihsananna ma’karang Puang Alataala ang mohko’ yaho di ohko’ang tomaraya naoatee, "La kubabe ingkänna siamo mendahi bakahu! Dahi uki’i, aka’ tula’ indee tahpa’ liu anna mala dipetahpa’." ⁶ Mane naoa boitee, "Ingkänna dahi asammi! Kodi’mito indee Ang Handang Uhuna anna Ang Handang Katämpä’; Kodi’mito Dehata mengkalao di pampahtunganna lambi’ kapuhaanna. Diamo tau ang mahähäng, la kubea tomande’ uhai yaling mai di kasuleang uhai mepatuho sapano-panona. ⁷ Tau ang patalo dianto ang la mantahimbo ingkänna indee di hao mai di Kodi’. Kodi’ la mendahi Dehatanna anna sika mendahine’ änä’ku. ⁸ Ampo’ ingkänna tau ang pa’mahea’ang, dai mampetahpa’ si’da-si’da, ma’pihki’ tahuhu, to papateang, tau ang ungngindä’-indä’ pa’bannetauang, to pa’ihsang-ihsang, to umpenombai dehata lino anna ingkänna to pa’loseng-loseng, la dipentibe asangnging tama di api handang maluhsu’ ang malua’ noa le’bo’, dianto kamateang kapendoanna." ⁹ Pihsananna suleng mesa di alla’na yato pitu malaeka’ ang untokei dolu enu’ang bulahang ang napunnoi pitu kamadahhaang katampä’anna. Sule naoaingkä’tee, "Maio done indee! La kupaitaio ang la napobahine Änä’ Domba." ¹⁰ Ya’ nakuasai siamä’ Inaha Masero, anna nabahaä’ yato malaeka’ dai’ di hohong tanete ang handang malängkä’. Mane napaitaiä’ Bohto Mahoa’ Yerusalem, bohto masero ang sule yaho mai di suruka mengkalao di Puang Alataala. ¹¹ Bohto yatoo napunnoi kamatandeanna Puang Alataala. Pansillo’ sinnoa batu pangngillo’ ang mamata hupanna, melälähäng sinnoa ti’dona kene’. ¹² Tembo’na sitongko malängkä’ lipu’, anna sampulo derua babana sibaha pantang nadakai sampulo derua malaeka’. Di hao yato di baba pantang aha diuki’ sanga-sanganna sampulo derua bohtona änä’na Israel. ¹³ Tando di katimbingang allo aha tallu baba, noa tunne’ tando di katempu’ang allo. Tando di utara aha tallu baba, noa tunne’ tando di selatang. ¹⁴ Yato tembo’ dipaohko’ di hahona sampulo derua batu käyyäng ang pantang dipangnguki’i sanganna mesa rasulna Änä’ Domba. ¹⁵ Yato malaeka’ ang lella’ kusipa’karaing untokei huntung pepansi ang bulahang dipapia, anna ummete’i yato bohto mahoa’, babana anna tembo’na. ¹⁶ Bohto mahoa’ yatoo mosulapa, kalambe’na anna malua’na sinsamaang. Namete’ing yato malaeka’ umpake yato huntung bulahang, ya’ donsa’bu uhpa’atu’ kilomete’ kalambe’na, sama toi malua’na anna malängkä’na. ¹⁷ Tahpana ummete’i yato tembo’ malaeka’ ya’ unnumpulo lima mete’ makambanna. Ang napake malaeka’ mammete’i sinnoa siang ang napake hupatau. ¹⁸ Tembo’na yato bohto mahoa’ dipapia di hao mai di batu pangngillo’ ang mamata hupanna anna ingkänna ang aha yaling dipapiane’ di hao mai di bulahang ang dai aha mampenghaui, sinnoa dahammeng. ¹⁹ Yato sampulo derua batu käyyäng ang dipampake’de’i hala tembo’, batu masu’li’ asang. Ang uhuna, mesa batu pangngillo’ ang mamata hupanna. Kaderuanna, mesa batu melälähäng ang mamata hupanna noa le’bo’. Katallunna, mesa batu ang moalla’ hupanna: mabusa anna mahihi. Kauhpa’na, mesa batu melälähäng ang mamata hupanna noa lala’ upe. ²⁰ Kalimanna, mesa batu ang moalla’ hupanna: mabusa anna maloteng. Kaunnunna, mesa batu pangngillo’ ang malahtu hupanna. Kapitunna, mesa batu melälähäng ang mahihi hupanna noa uhai kuni’. Kakahuanna, mesa batu ang mamata hupanna noa bulu sehke’. Kakamehsanna, mesa batu melälähäng ang mahihi hupanna noa punti mahe. Kasampulona, mesa batu pangngillo’ ang mamata-mata hupanna noa lala’ punti mahäti’. Kasampulomesanna, mesa batu pangngillo’ ang noa langi’ hupanna ke kulla’i. Kasampuloderuanna, mesa batu melälähäng ang hupanna sinnoa hupanna tahauhe ang handang tanda naung. ²¹ Yato babana ang sampulo derua, mesa boitoo pantang dipapia di hao mai di kalubibing käyyäng ang pangngillo’ mabusa noa sihsi’ bau. Yato lalang yaling di bohto, bulahang dipapia ang dai aha mampenghaui, pansillo’ mala dipodahammeng. ²² Daine’ aha kuita Dasang Ada’na Puang Alataala yaling yato di bohto mahoa’, aka’ di umba-umba naongei yaling yatoo aha lolo dipenombai Puang Alataala To Handang Ma’kuasa sibaha yato Änä’ Domba. ²³ Yato bohto mahoa’ dai pahallu naballoi mata allo bahtu’ bulang, aka’ kamatandeanna Puang Alataala anna Änä’ Domba mendahi ballo. ²⁴ Ingkänna bohto di lino la naballoi anna setomarayaang la sika umbaha katomakakaanna tama yato di bohto mahoa’ la napake umpamatande Puang Alataala sibaha Änä’ Domba. ²⁵ Samai baba ang diola tama la tibuhke lolo; dai pahallu ditutu’i di bengi aka’ dang la aha kamalillingang. ²⁶ Kakäyyänganna anna katomakakaanna ingkänna bohto la dibaha asang tama. ²⁷ Ampo’ daine’ aha la dibaha tama moi poro mesa ang mehiri’-hiri’, bahtu’ tau ang mehiri’-hiri’ pembabena bahtu’ loseng. Supung ang la mala tama dianto tau ang aha tiuki’ sanganna yaling di suha’na Änä’ Domba ang dipantekengngi to tuho lambi’ sapano-panona.

¹ Pihsananna napatuhoimä’ yato malaeka’ salu uhai ang mepatuho uhainna. Yato salu uhai mahändäng sinnoa dahammeng, anna mesalu mengkalao yaho di ohko’ang katomarayaanna Puang Alataala anna yato Änä’ Domba ² yaling di tängngä-tängngäna lalang yato di bohto. Di behinna yato salu uhai, sibali-bali naongei poang kayu mepatuho, ang pensampulo derua keboa yaling di sampahiama dianto pihsang sambulang. Lala’na dipake umpakulii tau di hao mai di ingkänna bohto. ³ Yaling yato di bohto dai la aha ang nahoa petändona Puang Alataala sinnoa dolu. Ohko’ang katomarayaanna Puang Alataala anna Änä’ Domba la ma’ongeang yato yaling di bohto anna ingkänna petauanna la menomba pano. ⁴ Sika la ungngita lindona anna sanganna Puang Alataala la diuki’ pano di kandinnaii. ⁵ Kamalillingang dang la aha di hao. Dang umpahallu ballo sibaha pesilona mata allo, aka’ la sika naballoi Puang Alataala, anna sika la ma’pahenta sihapang tomaraya lambi’ sapano-panona. ⁶ Puhanna yatoo, napa’karai bumä’ yato malaeka’ naoatee, "Tula’ indee tahpa’ liu anna mala dipetahpa’. Puang Alataala ang umbea Inaha Maserona pano di ingkänna nabi, puhang unsuo malaeka’na umpaitai sabua’na didiona ang la pahallu baha’ dahi." ⁷ Naoate Puang Yesus, "Pehingngii manahpai! La baha’ sulemä’. Ingkänna tau ang untuhu’i tula’ pepakaenga’ yaling inde di suha’ didiona ang la baha’ dahi, dianto ang la ullambi’ kamasannangang yaho mai di Puang Alataala!" ⁸ Kodi’ ang disanga Yohanes, puhang kuhingngi anna kuita ingkänna yatoo. Puhanna kuita anna kuhingngi, ya’ malimuntu’ siamä’ di olona yato malaeka’ la menomba. ⁹ Ampo’ naoaingkä’tee, "Daa! Daumpenombaiä’! Penombaio Puang Alataala! Aka’ sabua’ turä’to koo; sinnoa siamingke anna sinnoa solasohommu ingkänna nabi, anna ingkänna tau ang untuhu’i pepakaenga’ yaling inde di suha’!" ¹⁰ Naoa sala buntee, "Daumpadiinahammu kalei inde ang yaling di suha’, aka’ dang masae anna la dahing. ¹¹ Tau ang maho-maho, pabei tubunne’ umbabe lolo kamahoang; tau ang kekasalaang, pabei tubunne’ umbabe lolo kasalaang; tau ang maroho inahanna, pabei tubunne’ membabe maroho lolo; anna tau ang umpatani kalaena supung di Puang Alataala, ya’ pabei tubunne’ napanoa." ¹² Naoa bunte Puang Yesus, "Pehingngii manahpai! Dang masae anna sulemä’ umbahaing sahona ang la dibea pano di tau situhu’ aka ang puha nababe. ¹³ Kodi’mito indee Ang Handang Uhuna anna Ang Handang Katämpä’; Kodi’mito Dehata mengkalao di pampahtunganna lambi’ kapuhaanna. ¹⁴ Tau ang untahpa’ kaya’na dianto ang la ullambi’ kamasannangang yaho mai di Puang Alataala, lambi’ sihatang ungngande boana poang kayu ang mepatuho anna beba’ mentama yato di bohto mahoa’ ungngola baba hala. ¹⁵ Ampo’ samai tau ang mehiri’-hiri’ pembabena, to ma’ihsang-ihsang, to umbabe katasampa’ang, to papateang, to umpenombai dehata lino anna to pa’loseng-loseng, moi tula’na, moi pembabena, ingkänna inde tau ang noa la tohhone’ di aneanna yato bohto mahoa’. ¹⁶ Kodi’ Puang Yesus, puhamä’ unsuo malaeka’ku mating di dioa’ anna malai umpepainsangnging kaha-kaha indee ang napokapahalluang jumaa’. Kodi’ indee Peänä’anna Tomaraya Daud. Kodi’mito indee Bintäng Pambaha Allo." ¹⁷ Ma’karang Inaha Masero sibaha yato bahine ang la napobahine Änä’ Domba naoatee, "Maimo!" Diamo ang manghingngi indee la naoa toe’te, "Maimo!" Menna ang mahähäng sule tomande’o anna unsengko’ tomande’i yato uhai ang mala mepatuho. ¹⁸ Pano di tau ang unghingngi tula’ yaling inde di suha’, pahallu kupakaenga’ dianto: Ponna aha tau ang unghängngängngi ihsinna inde suha’, ya’ la napahoai toinne’ Puang Alataala ingkänna kamadahhaang ang puha tiuki’ yaling inde di suha’. ¹⁹ Anna ponna aha ang mangngalai piha, ya’ dai la napabei Puang Alataala yato tau ungngande boana poang kayu ang mepatuho sibaha tohho yaling yato di bohto mahoa’ ang masero. ²⁰ Puang Yesus ang umpalambi’ samai inde kaheba naoatee, "Tahpa’, la baha’ sulemä’!" Ya’ Aming! Sulemote’ O Puang Yesus! ²¹ Pa’kalemunnarang Puang Yesus ang la umbehe ingkämmua’ petauanna. Aming.