Filipi

Filipi

¹ Pano di ingkänna petauanna Puang Alataala ang mampetahpa’ pano di Kristus Yesus diting di Bohto Mahoa’ Filipi. Noa toi ingkänna pebulle ada’ ang mendahi to pangkambi’ yaling di jumaa’ anna ang si undului tau yaling di jumaa’. Hao mai di kodi’ Paulus, sibahaang ta Timotius, ang sahing sabua’naang Kristus Yesus. ² Kuhannuang ke la malai Puang Alataala Ambetaa’ sibaha Puang Yesus Kristus Dehatanta la umbehekoa’ anna namana’koa’ kamasahkeang sibaha kamasannangang. ³ Ponna ke kukalehai bumokoa’, ya’ ma’kuhhu’sumanga’ bumä’ dai’ di Puang Alataala ang kupenombai. ⁴ Ma’sambayang bouä’too, ya’ kupa’sambayang tumingkoa’ dio sitonda kakahsiang, ⁵ aka’ mesa inaha loloingkea’ umpepainsangnging sau tama yato Kaheba Mapia mengkalao anna umpahandu’ia’ mampetahpa’ lambi’ dinoa. ⁶ Inde pengkähängang mapia puhang napahandu’ Puang Alataala yaling di inahammua’. Anna kuhannuang liu kuoatee la napatahhi’ lolo Puang Alataala lambi’ napasundung yato di allo kasuleanna Kristus Yesus kapendoanna. ⁷ Ahana sihatang kusa’ding ma’pihki’ noa indee aka’ tontong lolokoa’ yaling di inahangku anna aka’ mangngala taha tumokoa’ dio yaling yato di pengkähängang ang namana’ingkä’ Puang Alataala. Tontong lolokoa’ unduluiä’, noa dinoa lella’ä’ ditahungkung, noa tunne’ yato naonge anna kupakaleso manahpaing pano di hupatau ang umbahoi yato Kaheba Mapia. ⁸ Nainsang Puang Alataala umba noa kukarohhengngi anna kupakamayakoa’ sinnoa pepakamayanna Kristus Yesus di dioa’. ⁹ Anna dianto indee ihsinna sambayangku: kupa’sambayangngingkoa’ anna malai tuhtuang napunnoikoa’ pa’kalemu sibaha kapainsangang anna kakeaka’ang. ¹⁰ Kupalau yatoo anna malakoa’ ungnginsang umpasise’la aka ang handang mapia la dibabe anna malai masero katuhoammua’ anna dai aha ang mansallakoa’ lambi’ kasuleanna Kristus kapendoanna. ¹¹ Anna la punnoa’ yaling di salu katuhoammu ingkänna pembabe maroho aka’ pengkähänganna Puang Yesus Kristus, lambi’ la dipa’käyyängngi anna dipamatande Puang Alataala. ¹² Oa’ ingkämmu solasohongku, masannang liuä’ ke la malai ungnginsangnga’ ungngoatee inde yalingngä’ di tahungkung dinoa, bilang diang napolalang tuhtuang tisembu’ sau tama yato Kaheba Mapia. ¹³ Lambi’ ingkänna tau ang si undakai dasanna tomaraya anna ingkänna tau senga’ ang yaling inde di bohto mahoa’, sika nainsang asammi suhunna anna ditahungkungngä’ aka’ umpepainsangngingkä’ Kristus. ¹⁴ Mane ahai, mai’di solasohonta to mampetahpa’ yaling inde di bohto mahoa’ tuhtuang hannu dai’ di Dehata, aka’ nainsang naoatee naduluiä’ yaling inde di tahungkung dinoa, lambi’ tuhtuang sika bahani umpepainsangnging Bahtakaranna Puang Alataala. ¹⁵ Aha toe’ sangngaka-sangngaka tau ang pemala sika umpepainsangnging kahebana Kristus aka’ naolanna kale timbuhu anna ma’kasuehe di kodi’. Ampo’ aha toe’ tau senga’ ang umpepainsangnging kahebana Kristus aka’ mopahtuyu mapia. ¹⁶ Inde mai tau ang mopahtuyu mapia membabe noa aka’ nakalemuiä’. Aka’ nainsammi naoate nasuoä’ Puang Alataala sule dinne umpakaleso manahpaing yato Kaheba Mapia pano di tau ang mambahoi. ¹⁷ Ampo’ yatone’ ang ma’kasuehe umpepainsang toinne’ Kristus aka’ pemala la dipa’käyyängngi. Sika napanoa anna malai tuhtuang masuhsaä’ yaling di tahungkung. ¹⁸ Ampo’ pabei tomande’i. Aka’ pano di tau ang umpepainsangnging Kaheba Mapia, moi mopahtuyu mapia, bahtu’ mopahtuyu karake, sahing umpepainsang siaming Kristus. Dahi yaling inde di kaha-kaha masannang loloä’. Anna la tontong loloä’ kahsi ¹⁹ aka’ kuinsang kuoatee pa’sambayammua’ anna petehtena Inaha Maserona Puang Yesus Kristus lambi’ la malaä’ dilahpa’. ²⁰ Aka’ kuhannuang si’da-si’da anna pemalaä’ anna dai la aha ang kuposili kubabe di hao di olona Kristus yaling inde di pengkähängangku. Ampo’ noa yato ang inang si kubabe, la bahani loloä’ umpainsangngi hupatau didiona Kristus anna malai, noa yaling di katuhoangku noa toi yaling di kamateangku, Kristus supu la dipamatande yaling di pengkähängangku. ²¹ Aka’ di kodi’na kodi’, tuhoä’ anna mate, ya’ sinnoa siang. Tuhoä’, umpasatutu inahangku dai’ di Kristus; noa tunne’ ke mateä’, ya’ la ullambi’ä’ kakehongko’ang. ²² Ampo’ dakaleng kuinsang kupillei, aka’ ponna ke tuhoä’ yaling inde di lino, ya’ malakä’ umbabe pengkähängang kekuna. Dianto anna dang kuinsang umba kahang ang la kuola. ²³ Aka’ nasialaiä’ inde derua kaha-kaha. Pemalaä’ la kupellei inde lino mao umpempakoi Kristus, aka’ ahana inang dianto ang handang mapia kusa’ding. ²⁴ Ampo’ aka’ pahallu burakoa’ la kudului, dahi dotante’ tohhokä’ yaling inde di lino. ²⁵ Aka’ kupetahpa’ kuoatee la mapia puha ke tohhokä’ yaling inde di lino, lambi’ kuinsang kuoatee la tuhokä’ anna la sibaha-bahakingkea’ anna malakoa’ kudului, lambi’ la tuhtuang matohoa’ kapampetahpa’ammu anna la tuhtuang käyyäng kakahsiammua’ yaling mampetahpa’ pano di Puang Yesus Kristus. ²⁶ Dahi ponna ke sumulemä’ mating, ya’ la tuhtuang masannang inahammu umpudi Kristus Yesus ang mandakaiä’. ²⁷ Ang handang pahallu, dianto yaling di ingkänna pembabemua’ la membabekoa’ situhu’ pembabena tau ang untuhu’i yato Kaheba Mapia didiona Kristus. Aka’ ponna ke umpanoaia’ yatoo, ya’ moi silambi’ingkea’ bahtu’ daingkea’ silambi’, la kuinsang lolo kuoatee tontongkoa’ mesa inaha anna mesa pahtuyu yaling di kakalebuang ang ke’de’ matoto’ anna matihta ungngoloi pa’tolla’ang. Kuhannuang la umpasatutu loloa’ inahammu pano yato di Kaheba Mapia anna malai tuhtuang kehängngäng to mampetahpa’. ²⁸ Anna moi aka ang la nababe ingkänna balimmu mating di dioa’, dakoa’ la mahea’. Aka’ ponna ke dakoa’ mahea’, ya’ tandaammi dioatee la sika ullambi’ne’ katallangang, ampo’ dioa’-dio la ullambi’koa’ kasalama’ang. Ingkänna yatoo Puang Alataala toboe’ mangkähäng. ²⁹ Aka’ puhamokoa’ namana’ Puang Alataala behe, anna malakoa’ dai supung mampetahpa’ pano di Kristus, ampo’ la ungngolai toukoa’ nei’ kamadahhaang yaling inde di lino aka’ mampetahpa’koa’ pano. ³⁰ Dinoa mangngala taha tumokoa’ dio yaling inde di pa’tolla’ang umba noa ang puhaa’ ungngita dolu yato ang kuoloi, anna ungnginsangngia’ ungngoatee tontong loloke’ kuoloi lambi’ dinoa.

¹ Aka’ mesamokoa’ Kristus lambi’ matohoa’ inahammu anna aka’ pa’kalemunna lambi’ makahanga lolokoa’. Tontong lolokoa’ naposolai Inaha Maserona Puang Alataala, si umpoinahakoa’ kapahalluanna tau senga’ anna ma’kalemukoa’. ² Dahi pasundungngi kakahsiangku ungngolai mendahikoa’ mesa inaha, sikalemuikoa’ mesa anna mesa, anna mesa inahakoa’ yaling di pahtuyummu. ³ Yaling di ingkänna pembabemua’ dasi’da-si’dakoa’ la mala umpihki’ supu kalaemu, anna datoukoa’ la malängkä’ inaha. Ampo’ la mahempo’ inahakoa’ anna sipakeangka’koa’ mesa anna mesa la’bi andana kalaemu. ⁴ Pihki’ liu toia’ne’ kapahalluanna solamu, daa supung kalaemu la umpihki’. ⁵ Anna pengngoya’mua’ pahallu la sinnoa Kristus: ⁶ Aka’ moinnakato anna Puang Yesus Kristus inäng Puang Alataala, ampo’ datoete’ umpentokei sakali kadehataanna. ⁷ Ampo’ umpellei ingkänna ang aha di Kalaena, tama inde di lino menghupatau anna mendahii sinnoa siang mesa sabua’. ⁸ Tahpana mendahi hupatau, ya’ umpamadihoi’ammi Kalaena anna tuhoi untuhu’i pangngelo’na Puang Alataala lambi’ mate yaho di kayu sitambeng. ⁹ Dianto anna napamatandeng Puang Alataala anna nabeai kakuasaang ang la ungkuasai asang ingkänna kakuasaang senga’, ¹⁰ anna malai ingkänna aka-aka, noa ihsinna suruka, noa ihsinna inde lino, anna noa toi ang di hoi’ di apa’ tampo, la malimuntu’ asang di hao di olona Puang Yesus, ¹¹ anna la sika mangngaku naoatee, "Puang Yesus Kristus dianto Dehata ang setonganna," lambi’ dipamatande Puang Alataala Ambetaa’. ¹² Dahi ingkämmua’ solasohongku ang kukalemui, la tuhu’-tuhu’ang lolokoa’ di allo-allo ang la sule sinnoa ang si umpanoa tuhu’-tuhu’ang di allo-allo ang puha. Dai supung ke ditingngä’ sibahaingke, ampo’ la la’bi puha nei’ ke dä’ diting. Babe loloia’ yato aka ang la sihatang dibabe aka’ puha mepasalama’ Puang Alataala. Pembabeingnga’ yatoo sitonda mahea’ anna sikalalla’ di hao di olona. ¹³ Aka’ Kalaena Puang Alataala mengkähäng yaling di inahammua’, lambi’ aha kapemalaammua’ umbabe yato pangngelo’na anna umbela si’daa’ umbabe. ¹⁴ Yaling di ingkänna pembabemu dakoa’ la mala momämmäng anna datoukoa’ la mala sibehta-behta. ¹⁵ La umpanoaa’ yatoo anna malakoa’ masero, dai aha sallaammua’, anna tandaangngi dioatee änä’-änä’na si’damokoa’ Puang Alataala, dai aha sahsaimmu yaling di alla’-alla’na tau ang karake yaling di inahanna anna babena. La pahallukoa’ sihapang pesilona bintäng ang umballoi kamalillingang ¹⁶ ke umpa’tula’i bumokoa’ yato to karake babena didiona Bahtakara Dehata ang la mebaha pano di katuhoang. Aka’ ponna ke umpanoangnga’ yatoo, ya’ ahang ang la umpamahasa liu inahangku ke suleng Kristus kapendoanna. Aka’ la tandaang dioatee yato pengkähängangku dai labu’ kale ampo’ la keboa. ¹⁷ Mampetahpa’mokoa’ nei’ dai’ di Puang Alataala anna yato kapampetahpa’ammu mendahing mesa penombaang yaho di olona ang tandaang yaling di ingkänna pembabemua’. Ponna ke dipateiä’ aka’ inde pengkähängangku yaling umpaturukoa’ lalang kasalama’ang, ya’ yato hahaku sihapangngete’ la ditollo di hahona penombaammua’ bahtu’ dioatee kapampetahpa’ammua’. Ponna ke ahanai inang la noang, ya’ la ma’kuhhu’sumanga’ä’ anna ingkännaingkea’ la masannang anna kahsi. ¹⁸ Noa sia tungnga’ dio la pahallukoa’ ma’kuhhu’sumanga’, anna la masannang asangngingkea’ sitonda kakahsiang. ¹⁹ Oa’ ingkämmu solasohongku, aha pahtuyungku ke naelo’i Dehatanta Puang Yesus, dianto pemalaä’ la baha’ unsuo mating ta Timotius napellambi’ikoa’ anna malai tiala inahangku ke sumuleng natula’ingkä’ kahebamua’. ²⁰ Aka’ ta Timotius supu ang kusitamaing anna si napihki’ si’da-si’daingkoa’ kamasannangammu. ²¹ Ingkänna inde mai tau senga’ supunne’ nainsang umpihki’ pengkähängang kalaena anna umpa’sele-seleiine’ pangngelo’na Puang Yesus Kristus. ²² Ampo’ inde nei’ ta Timotius, ungnginsammia’ne’ ungngoatee inang mala dipetahpa’. Puhamang mengkähäng kahha’ sibaha-baha, sihapangngang to sipoänä’, umpepainsangnging Kaheba Mapia. ²³ Dahi bohtuke’ inde kaha-kahangku mane kusuoi mating. ²⁴ Anna hannu liuä’ dai’ di Dehata kuoate la nabuhkeingkä’ lalang anna malai baha’ mating touä’ koo kupellambi’ikoa’. ²⁵ Didionane’ solasohongku ta Epafroditus, yato ang unsuoa’ sule naduluiä’, ya’ sibaha lolomanne’ yaling di pengkähängangku anna dai lengka’ di behingku naduluiä’ yaling umbali pengkähänganna setang. Ampo’ pahallu la kusuong sumule mating ²⁶ aka’ nakarohhengngi liukoa’, la’bi-la’binna dai masannang inahanna tahpana nainsang naoate umpelelengnga’ mating makorong. ²⁷ Moinnakato anna tahpa’ si’dai makorong anna sai’di’i tala mate, ampo’ aka’ pa’kalemunna Puang Alataala lambi’ bono’mi. Dai dia supu nakalemui Puang Alataala, ampo’ nakalemui touä’ kodi’ anna malai dai tuhtuang masuhsa inahangku. ²⁸ Dianto anna kuoaite yaling di inahangku, "Mapia ke baha’ sumulei mating." Kutula’ingkoa’ noa anna malakoa’ kahsi ke silambi’mokoa’, dia tuke’ anna malai kuhang kamasuhsaangku ke damokoa’ unnaha-naha ta Epafroditus. ²⁹ Dahi tammuiia’ sibaha punno kakahsiang sihapangkoa’ untammui solasohonta ang mampetahpa’ dai’ di Dehata. Pakeangka’ia’ ingkänna tau ang sinnoa ta Epafroditus ³⁰ aka’ sai’di’ tala mate ungkähäng yato pengkähängang ang nabea Kristus. Napentuyoi liu anna malai naduluiä’ ungkähäng yato ang daia’ mala ungkähäng aka’ makahaokoa’.

¹ Dia tuke’, ingkämmua’ solasohongku, sihatang la kahsikoa’ aka’ sangkalebumokoa’ Dehata. Dai maaka ke kusulei salai yato ang puha kutula’ingkoa’, aka’ kudakai andana napasähsä’ lalangkoa’ pepakuhu ang senga’. ² Dakai manahpaia’ yato ang si unghängngängngi atohang yaling di peada’ang, aka’ babe ang noa yatoo sihatang disangai "pembabena asu" aka’ mepasähsä’ lalang. Daa umpehingngii tula’na yato to pembabe karake ang si naoatee, "Dai tau mala tala ditille ke pemalai tau mendahi petauanna Puang Alataala." ³ Aka’ kita’rea’ne’ ang mala disangai "to puha ditille si’da-si’da" aka’ mendahimingkea’ kita’ petauanna Puang Alataala. Malaingkea’ kita’ umpenombai Puang Alataala aka’ petehtena Inaha Maserona, anna kahsiingkea’ umpudi Dehata aka’ yalimmingkea’ di Kristus Yesus. Tadia tumingkea’ kita’ ang la unghannuang pembabe kalaeta. ⁴ Ke la ahai kunanna yatoo, setonganna kodi’e’ la mala unghannuang pembabe kalaeku. Aka’ ponna ke ahai tau ang la ungngangka’ kalaena sihatang unghannuang pembabe kalaena, ya’ londonang kodi’. ⁵ Aka’ kodi’-kodi’, mane pitu benginna sohongku anna ditillemä’ situhu’ Atohanna Musa. Anna inang to Israelä’ mengkalao dahingku, aka’ peänä’annaä’ Benyamin, dahi inang to Ibraniä’. Dia tuke’, ponna ke ma’tula’i tau didiona menna ang untuhu’i ingkänna atohanna peada’anna to Yahudi, ya’ kodi’ mesaä’ to Farisi ang untuhu’i si’da-si’da ingkänna yato atohang. ⁶ Kodi’ ang handang bansa’ yaling di peada’anna to Yahudi lambi’ si undahhaä’ kakalebuanna to mampetahpa’. Ponna ke ma’tula’i tau didiona katuhu’ang pano di Atohanna Musa, ya’ kodi’mi mesa ang dai aha sallaangku. ⁷ Ingkänna yatoo kuangka’ mapia dolu, ampo’ dang dinoa, aka’ kuoatee mehukiang kale aka’ sikentemä’ Kristus. ⁸ Dai yato supu, ampo’ ingkänna siamo yaling inde di lino kuangka’ asang mehukiang kale, ke kupasiitai ungnginsang si’da-si’da Kristus Yesus Dehatangku. Ingkänna yato ang aha di lino kuangka’ oyo kalane. Anna kupellei asammi anna malaä’ mendahi to pentindo’na Kristus ⁹ lambi’ malaang sangkalebu. Dai mala dioatee nasuhung anna malaä’ maroho di olona Puang Alataala aka’ pembabe kalaeku untuhu’i Atohanna Musa. Ampo’ nasuhung anna naangka’ marohoä’ Puang Alataala, dianto aka’ mampetahpa’ä’ pano di Kristus. Dahi kamarohoangku sule yaho mai di Puang Alataala aka’ umpetahpa’ä’ Kristus. ¹⁰ Ang handang kupemala ke la malaä’ ungnginsang manahpa Kristus anna kusa’ding toe’ yato kakuasaanna ang mampatuho sumule di hoi’ mai di kamateang. Kupokahsi ke didahha touä’ kodi’ sinnoa ang nasa’ding anna mate touä’ kodi’ sinnoa matena. ¹¹ Anna kuhannuang la ullambi’ touä’ kodi’ katuhoang sumule di hoi’ mai di kamateang. ¹² Dai kuoatee umpensinnoaimä’ Puang Yesus, bahtu’raka la kuoatee sundummä’ koo. Ampo’ la tontong lolo kupengkabela-belai umpellambi’i yato pebea ang napasadiaingkä’ Kristus Yesus. Aka’ dianto suhunna anna napellambi’imä’ napillei mendahi petauanna. ¹³ Oa’ ingkämmu solasohongku, setonganna dai aha kuoatee kulambi’mi yato pebea ang napasadiaingkä’ Puang Yesus Kristus. Ampo’ ang kubabe diantoo: kupellei asammi ingkänna yato pembabeku ang puha kubabe dolu anna kupengkabela-belaii kupellambi’i yato aka ang kuhannuang. ¹⁴ Sihapangngä’ mesa to silumba lumumpa’. Noa tuntone’ pembabeku, dä’ mensaile pano di kuanangku bahtu’ kaihingku anna malaä’ ullambi’ kapataloang, dianto katuhoang lambi’ sapano-panona yaho di suruka, aka’ dianto suhunna anna natambaimä’ Puang Alataala ungngolai yato aka ang nababe Kristus Yesus. ¹⁵ Dahi kita’ ang matohong kapampetahpa’anta pahallu ma’pihki’ noa yatoo. Ampo’ ke ahai yaling di alla’-alla’mua’ ang dai ma’pihki’ noa, supung senga’nane’ napihki’, ya’ Kalaena Puang Alataala la mampakalesoing. ¹⁶ Ampo’ supung yato ang inang tainsammi, dianto ang pahallu tatuhu’i. ¹⁷ Oa’ ingkämmu solasohongku, kupalau anna malai untindo’ia’ pembabeku. Noa tunne’ ita manahpaia’ ne mating ingkänna tau ang untindo’i pembabeki’ anna umpensinnoaii. Si membabe mapiaang aka’ kioatee anna malaia’ ungnginsang aka ang la sihatang dibabe. ¹⁸ Setonganna pemmai’ding kupainsangngikoa’ dolu, ampo’ dinoa la kusulei sala bou kupasitonda uhai matangku kuoatee, mai’di tau yaling di salu katuhoanna si membabe karake sihapang dai umpakekuna kamateanna Kristus yaho di kayu sitambeng. ¹⁹ Tau ang noa yatoo katämpä’anna la lutamane’ di nahaka aka’ dai naaku untuhu’i pangngelo’na Dehata, ampo’ nakuasai puha nei’ kamailuang bätäng kalaena. Yato ingkänna pembabe kalaena, ang setonganna diposili, bilang diane’ sika napokale’de. Anna supunne’ kaha-kaha yaling inde di lino ang si napihki’. ²⁰ Ampo’ daingkea’ kita’ la membabe noa, aka’ ihsinnaingkea’ kita’ suruka. Dianto la naongei sule Dehatantaa’ Puang Yesus Kristus, To Pepasalama’ta ang tapemitai lolo. ²¹ Ke donentoo mane la napapia salai pole’ inde kalaetaa’ ang mai’di sallaanna, la napadahi sinnoa Kalaena ang daine’ aha sallaanna. Ingkänna yatoo la nakähäng asang aka’ Dianto ang ungngampuang kakuasaang di ingkänna siamo.

¹ Ingkämmua’ ang kukalemui, diongnga’too ang mampamasannangngä’ lambi’ kupokale’dekoa’. Dahi, ingkämmua’ solasohongku ang kukalemui anna kukarohhengngi, la noa indee: yaling di salu katuhoammua’ la tontong lolokoa’ umpamatoho kapampetahpa’ammu dai’ di Dehatanta. ² Kupalau si’da-si’da pano di solasohongku ta Euodia anna ta Sintike anna malai sika tuho mesa inaha sinnoa ang sihatang nababe tau ang mampetahpa’ dai’ di Dehata. ³ Anna kupalau toe’ mating di dioa’ sampengkähängku ang mala dipetahpa’, ke la malai umpasikapiai sumule inde derua bahine. Inde to deruai sahing si naduluiä’ mengkähäng kahha’ di allo-allo ang puha, umpepainsangnging Kaheba Mapia. Noa tunne’ ta Klemen anna ingkänna tau senga’ ang mamposolaiä’ mengkähäng. Tiuki’ asammi sanganna yaling di Suha’ Katuhoang yaho di suruka. ⁴ Kahsi lolomokoa’ aka’ sangkalebumokoa’ Dehata. Kusulei sala bou kuoatee la tontong lolokoa’too kahsi! ⁵ Anna mapia toe’ ke nainsang asangngi tau naoate malunä’ inahakoa’, aka’ marungku’mi kasuleanna Dehata. ⁶ Dakoa’ la malaya’ ungngoloi aka siamo. Ampo’ yaling di ingkänna kaha-kaha la tontong lolokoa’ ma’sambayang malau dai’ di Puang Alataala. Samai kapahalluammua’, palau tomande’i dai’ di Puang Alataala sitonda ma’kuhhu’sumanga’. ⁷ Ponna ke umpanoaia’ yatoo, ya’ la unsa’ding kamasahkeang ang nabea Puang Alataala. La nadakai loloa’ inahammu anna pihki’mu aka’ mesamokoa’ Kristus Yesus. Yato kamasahkeang ang nabeakoa’ Puang Alataala la nakapusa’i hupatau anna daine’ mala napähäng. ⁸ Mane ahai, ingkämmua’ solasohongku, kupalau mating ke la malai supung ang mapia anna ang sihatang dipudi la umpayalingnga’ di inahammu, noanna: kara ang tahpa’, pembabe ang tahpa’, katahpa’ang, kamaseroang anna ang la mapia dipihki’. Noa tunne’ ke ahai aka-aka ang mahasa bahtu’raka sihatang la dipa’käyyängngi, dia tuntone’ ang la umpayalingnga’ di inahammu. ⁹ Ingkänna yato ang puha kupaturuingkoa’ pahallua’ la umpembabeing. Anna ingkänna pembabemu la situhu’ yato tula’ku ang puhaa’ unghingngi anna pembabeku ang puhaa’ ungngita. Ponna ke umpanoangnga’, ya’ la naposolai lolokoa’ Puang Alataala, ang nakasulei kamasahkeang. ¹⁰ Kahsi liuä’ kusa’ding dinoa lambi’ ma’kuhhu’sumanga’ä’ dai’ di Dehata aka’ mala boukoa’ unduluiä’ yaling di ma’kahupa-hupa ongkoso’ dinoa ang kupake yaling inde di kamasuhsaangku sinnoa yato ang dolu. Dai kuoatee ungkalimpängngimä’, ampo’ ahanaete’ dake’a’ aha tempomu umpembabeing. ¹¹ Dai aka’ kakuhangangku lambi’ ma’kara noaä’ yato langngena’, aka’ kuinsang kupengkaolaangnging katuhoangku situhu’ yato aka ang aha. ¹² Yaling di salu katuhoangku haling kusa’ding kakuhangang anna kabosa’ang. Kuinsang toe’ umpamasannang inahangku ungngoloi ingkänna kaha-kaha, noa bohoä’, noa manonoä’, noa kekulle mai’di, noa memase-maseä’. ¹³ Kubela ungngoloi ingkänna kaha-kaha ang manghoaä’ aka’ napamatoho inahangku Puang Yesus Kristus. ¹⁴ Ampo’ kupemapia toing nei’ yato naongei unduluiä’ yaling di kamasuhsaangku. ¹⁵ Oa’ ingkämmu solasohongku diting di jumaa’ Filipi, naonge la umpelleiä’ Poropensi Makedonia dolu, dianto ang naonge kupampahandu’i umpepainsangnging Kaheba Mapia diting, ungnginsammia’ ungngoatee dioa’ supu jumaa’ ang mambeaä’ ongkoso’. ¹⁶ Anna dai yatoo supu ampo’ pemmai’dike’ si umpakatuingkä’ yatoo naonge kakuhangangngä’ di hao di Tesalonika. ¹⁷ Dai aka’ pemalaä’ untahimbo pebea lambi’ ma’tula’ noaä’, ampo’ masannangngä’ ke tuhtuang kehängngängngi boana pembabe mapiammua’ yaho di suruka. ¹⁸ Mane ahai, yato ingkänna ang umbeaä’ puha asammi kutahimbo. Anna mala dioatee la’bi puha nei’ andana yato aka ang kupahallu. Dai aha kakuhangangku aka’ ingkänna yato ang umpapebahaingkä’ di ta Epafroditus, kutahimbo asammi. Ingkänna yato ang umbeaä’ sihapang tunuang bobahängngo’ ang dipopenomba di hao di olona Puang Alataala. Nakärä’i liu anna masannang inahanna natahimbo. ¹⁹ Anna Puang Alataala ang kupenombai la umpasundung ingkänna kapahalluammua’ situhu’ katomakakaanna ang dai aha mallondo, aka’ sikentemokoa’ Kristus Yesus. ²⁰ Dipamatande sanganna Puang Alataala Ambetaa’ mengkalao dinoa lambi’ sapano-panona! Aming. ²¹ Palambi’ingkä’ salama’ku pano di ingkänna to mampetahpa’ yaling di Kristus Yesus, dianto ang napasähä’ Puang Alataala. Anna salama’na toe’ are’ mating ingkänna solasohonta ang kusibahaing dinne. ²² Kupalambi’ asang toing mating salama’na ingkänna petauanna Puang Alataala ang tohho yaling inde di bohto mahoa’, la’bi-la’binna yato ang si tohho di hao di dasanna tomaraya. ²³ Ke la malai Dehatanta Puang Yesus Kristus umbehekoa’ para-para.