Yakobus

Yakobus

¹ Pano di ingkämmua’ peänä’anna yato ang sampulo derua änä’na Israel, ang tisembu’ pano di bohto senga’. Hao mai di Yakobus, sabua’na Puang Alataala anna Puang Yesus Kristus, Dehatanta. Salama’kua’ mating. ² Ingkämmua’ solasohongku, ke nalambi’koa’ ma’kahupa-hupa pesändä’, pasihapangngi mesa kakehongko’ang käyyäng, ³ aka’ ungnginsammia’ ungngoatee yatoo mendahi pesändä’ pano di kapampetahpa’ammua’ anna malai umpakende’ kamatohoang inaha yaling di kalaemua’. ⁴ Pamatoto’ loloi yato kamatohoang inaha yaling di kalaemu lambi’ keboa mapia, anna malai umpasundung anna umpamatoto’ kapampetahpa’ammua’ lambi’ dang aha la ungkakuhangngia’. ⁵ Ponna aha tau yaling di alla’-alla’mua’ ang dai nainsang aka ang la nababe ungngoloi pesändä’, ya’ la umpalau kakeaka’ang dai’ di olona Puang Alataala, ang si mebea sibaha kamarota’ang sitonda unnä’ inahanna, anna nabeai yato ang napalau. ⁶ Ampo’ mampetahpa’ liu menge napalau, dai la bata-bata inahanna, aka’ tau ang bata-bata inahanna sihapanne’ bombang ang nabuhhu’ lusau lutama pepahi. ⁷ - ⁸ Aka’ yato tau ang ma’derua inaha anna dai tontong pembabena dai la napemitai la untahimbo aka-aka yaho mai di Dehata. ⁹ Ingkämmua’, solasohongku ang memase-mase, sipäto’koa’ la masannang lolo aka’ napaohko’mokoa’ Puang Alataala yaho di ongeang matande. ¹⁰ - ¹¹ Anna dioa’ dio to makaka, la kahsi tumokoa’. Noakoa’ dio bunga-bunga la malahso tomande’, aka’ ponna mapana’mi allo, la ullahso lohpo lambi’ dondongngi bunganna, ya’ pa’da tubunne’ kamalekeanna. Noa tuntone’ pano di to makaka lella’ke’ umpakende’ katomakakaanna, pihsananna pa’da asang tomande’. Dahi pano di dioa’ to makaka, la kahsimokoa’ aka’ dipamahempo’mingkoa’ inahammu. ¹² Kahsine’ tau ang matoho ungngoloi pesändä’, aka’ ke patalong yaling yato di pesändä’, ya’ la untahimbong tanda kapataloang, dianto katuhoang ang lambi’ sapano-panona, ang puha nadandi Puang Alataala pano di tau ang mangkalemui. ¹³ Ke ahai tau nahoa pesändä’ dai mala la naoatee, "Nasändä’iä’ Puang Alataala." Aka’ Puang Alataala dai mala nasändä’i kakarakeang, anna datoi aha la sule yaho mai pesändä’ pano di hupatau. ¹⁴ Ampo’ simesa-mesa tau nasändä’i toboe’ pampemalanna ang karake ang manse’de’ umbabe kakarakeang. ¹⁵ Ya’ ponna patalong yato pampemalanna ang karake, ungkeboaming dosa. Pihsananna tuhtuang matamang yato dosa ungkeboaming kamateang. ¹⁶ Ingkämmua’ solasohongku ang kukalemui, daungngakuia’ nabulitu’ pihki’ ang naoatee: yato pesändä’ yaho mai di Puang Alataala. ¹⁷ Aka’ ingkänna pebea ang mapia anna sundung sule yaho mai di Puang Alataala ang umpaaha kamabayaang yaho di langi’. Dianto ang tontong lolo, dai noa kalihayo ang tirende leleng. ¹⁸ Aka’ pa’elo’na lambi’ naängkä’ingkea’ mendahi änä’-änä’na ungngolai yato bahtakara katahpa’ang, lambi’ malaingkea’ mendahi tau ang handang napakäyyäng yaling di alla’-alla’na pampadahinna. ¹⁹ Ingkämmua’ solasohongku ang kukalemui, pengkakalehai manahpaia’ ungngoate pano di simesa-mesa tau pahallu si’da-si’da tau bansa’ ma’pehingngi, la undakai tula’na anna datoi la maromi’ keaha’. ²⁰ Aka’ yato tau ang si keaha’, ya’ dai si maroho pembabena situhu’ pa’elo’na Puang Alataala. ²¹ Dianto anna pahallui ditibe ingkänna kakarakeang, yato ang mai’di liu yaling di kalaeta. Anna tatahimboi sibaha inaha malunä’ Bahtakara Dehata ang napatitanang yaling di inahanta, aka’ dianto ang ma’kuasa umpasalama’ingkea’. ²² Anna pahallukoa’ bansa’ umpembabeing aka ang tiuki’ yaling di Suha’ Masero, dai bansa’ supu ma’pehingngi. Aka’ ke bansa’koa’ supu ma’pehingngi, umpasalanduangkoa’ kalaemu. ²³ Pano di tau ang bansa’ supu umpehingngii Bahtakara Dehata ampo’ dai napembabeing, dipasihapang tau ang ungkalimpängngi lindona puhanna modahammeng. ²⁴ Puhai umpahandang kalaena, le’ba’mi. Ya’ nakalimpängngi siarang umba noa hupanna. ²⁵ Ampo’ menna-menna bansa’ umpellaya’i manahpa atohang ang setonganna, bahtu’ ang dioatee Kaheba Mapia, anna dai nakalimpängngi yato ang puha napehingngii ampo’ napembabe loloing, ya’ la nabehe Puang Alataala yaling di ingkänna pembabena. Atohang yatoo dai aha kakuhanganna anna ma’kuasa ullahpa’ hupatau yaling mai di kakuasaanna dosa. ²⁶ Ponna aha tau unsangai kalaena mesa tau ang tuhu’-tuhu’ang yaling di peada’ang, ampo’ dai undakai tula’na, tau yatoo umpasalanduang kalaena, aka’ labu’ yato lupunna tama di kapeada’ang. ²⁷ Ponna ke ungkalemuiingke änä’ biung sibaha balu bahine yaling di kamasuhsaanna, anna undakaiingkea’ kalaeta andana nakärähko’ingkea’ lino, dianto kapeada’ang ang masero anna dai aha kakuhanganna di hao di olona Puang Alataala Ambeta.

¹ Ingkämmua’ solasohongku, aka’ to mampetahpa’koa’ dai’ di Puang Yesus Kristus Dehatanta ang matande, daa unse’la-se’laang tau yaling di inahammu. ² Ponna ke ahai sule tau mentama di pa’himpungammua’ mesinsing bulahang anna meporeha mapia, mane sule toine’ mesa to pemase-mase meporeha tahuhu, ³ anna umpa’käyyängngii yato ang meporeha mapia lambi’ ungngoaingnga’tee, "Ohko’ingke done inde di ongeang mapia," ampo’ ungngoainne’te yato to pemase-mase, "Ke’de’o di hipe done," bahtu’ ungngoaintee, "Ohko’o di hoi’ inde di pengngindä’angku," ⁴ daraka umpasisenga’mi yaling di inahammu anna daraka umpadahimokoa’ kalaemu to pambohtu kaha-kaha ang ma’pihki’ karake? ⁵ Pehingngiia’, ingkämmua’ solasohongku ang kukalemui! To pemase-mase yaling inde di lino napilleine’ Puang Alataala mendahi to makaka yaling di kapampetahpa’ang, anna dianto sihatang ungngala taha yaling di Kapahentaanna Puang Alataala yato ang puha nadandiing pano di tau ang mangkalemui. ⁶ Ampo’ dioa’ dio ungngita-ita naungkoa’ dio to pemase-mase. Anna setonganna yatore’ to makaka umpakauho-uhokoa’ anna nahendengkoa’ pano di olona to pambohtu kaha-kaha. ⁷ Anna daraka tau yatoo ang untula’ tahuhu sanga ang handang matande, ang umpolalammia’ mendahi petauanna? ⁸ Ampo’ ponnatoo ke untuhu’i si’da-si’dakoa’ pungngu’ tannunna yato atohanna Tomarayanta, noa ang tiuki’ yaling di Suha’ Maserona naoatee, "Kalemuikoa’ parammu hupatau noa ungkalemui kalaemu," ya’ membabe mapiamokoa’too. ⁹ Ampo’ monna ke unse’la-se’laang lolokoa’ tau situhu’ ang landa’ ungngita pano, ya’ umbabekoa’ dosa, anna donentoo naongei tandaang dioatee untehkaikoa’ atohang. ¹⁰ Menna-menna untuhu’i asang atohang ampo’ ahake’ mesa dai natuhu’i, diangka’ke’ne’ untehkai ingkänna atohang. ¹¹ Aka’ Kalaena mangngoatee, "Daa ungngindä’-indä’ pa’bannetauang," Dia sia tunne’ mangngoatee, "Daa umpapateangnga’." Dahi ke dakoa’ ungngindä’-indä’ pa’bannetauang ampo’ papateangkoa’ nei’, ya’ tontong siamokoa’te’ disanga untehkai atohang. ¹² Dahi la umpapiaa’ tula’mu sibaha pembabemu aka’ la napahehsakoa’ Puang Yesus situhu’ atohanna ang ma’kuasa ullahpa’ hupatau. ¹³ Aka’ yaling umpahehsa lino Puang Alataala, dai la ungkalemui tau ang dai pa’kalemu. Ampo’ tau ang pa’kalemu la napa’daiinne’ yato tahungkung pano di kalaena. ¹⁴ O ingkämmua’ solasohongku, akang kunanna ke ahai tau mangngoatee, "Kodi’ mesa to mampetahpa’," ampo’ dai aha tandaang pembabe mapia nababe? Malaraka napasalama’ kapampetahpa’ang ang noa? ¹⁵ Ponna hapang aha mesa solata, muaneraka bahtu’ bahineraka, ang dai aha porehana anna dai aha andeanna, ¹⁶ akang kunanna ke ahakoa’ ma’kara ungngoaintee, "Paela’i! Pekaya’ makambangngo anna pebohoii," ampo’ dai aha umbea yato ang napahallu pano di kalaena? ¹⁷ Noa tuntone’ tanda di kapampetahpa’ang: ke dai dipasitonda pembabe mapia, ya’ setonganna yato kapampetahpa’ang dai aha kunanna. ¹⁸ Ponna aha toe’ tau mangngoatee, "Aha tau ang supung unghannuang kapampetahpa’ang anna ahake’ tau senga’ ang supung unghannuang pembabe mapia." Ya’ la kutimba’i kuoatee, "Sändä’ paitaikä’ kapampetahpa’ammu dai sitonda pembabe, anna la kupaitaio dio kapampetahpa’angku sitonda pembabeku ang mampatandaang." ¹⁹ Umpetahpa’a’ ungngoatee supung mesa Puang Alataala, i? Mapia toe’ yatoo! Ampo’ ingkänna setang napetahpa’ toete’ noa yatoo, anna sika lalla’i mahea’. ²⁰ Oa’ to maho, mangki’dakakoa’to la dipaitai dioate kapampetahpa’ang ang dai sitonda pembabe dai aha kunanna? ²¹ Daraka Abraham ang taponene nasangai Puang Alataala to maroho aka’ pembabena tempona anna umpenombaing Ishak änä’na yaho di pantunuang penombaang? ²² Dahi maleso diita ahana inang pahallu dipasitonda kapampetahpa’ang anna pembabe. Anna yaling di pembabe naongei sundung kapampetahpa’ang. ²³ Ya’ sundummitoo yato aka ang puha tiuki’ yaling di Bahtakara Dehata naoatee, "Abraham nasangai Puang Alataala ’to maroho’ aka’ mampetahpa’." Dianto suhunna anna disangaii Abraham ’to napakamaya Puang Alataala.’ ²⁴ Dahi malesongnga’ ungnginsang ungngoatee hupatau disangai ’to maroho’ aka’ pembabena, tadia aka’ kapampetahpa’anna supu. ²⁵ Noa sia tuntone’ ta Rahab, dolunna mesa bahine pahsundala’, ampo’ nasangai toe’ to maroho Puang Alataala aka’ undului yato ang nasuo ta Yosua anna nabahai tama di dasanna, mane napaitaii lalang senga’ ungngalai kalaena. ²⁶ Aka’ ponna bätäng punti supu, dai aha sungnga’, ya’ mateetee’; noa sia tuntone’ kapampetahpa’ang ke dai sitonda pembabe, ya’ mateetee’, bahtu’ dai kekuna.

¹ Ingkämmua’ solasohongku, daa mai’dii di alla’mua’ pemala mendahi tuangkuhu, aka’ ungnginsammia’ ungngoatee kami’ ang mampakuhu la masuhsa puha durungangki’ di hao di olona pampahehsaanna Puang Alataala ke dako’i! ² Aka’ mai’di kaha-kaha taongei umbabe kasalaang. Ampo’ menna-menna nabela lolo undakai lilana andana satula’-tula’nai, tau yatoo sundung kamapiaanna, aka’ la nabelang ungkuasai kalaena. ³ Hapanganna mesa ngangnga’, moinnakato saohko’, ke tapatamai di suana arahang mala umpahe’ yato arahang, lambi’ mala takuasai asang kalaena. ⁴ Taala pohapangang toe’ mesa kahpala’, moi umba noa käyyänna ke nasaui pepahi käyyäng mala nakoling pebosena, moinnakato saohko’, situhu’ pa’elo’na tau ang mampalao. ⁵ Noa tuntone’ lila, mesa pangkahka’ saohko’ yaling di kalaeta, ampo’ mala umpakende’ kaha-kaha käyyäng. Taita toe’ pano di api, moinnakato anna saohko’i ampo’ mala toe’ ungngämpu’i pangngala’ malohäng. ⁶ Lilana tau sihapang api, pembanuaanna kakarakeang ma’ongeang yaling di kalaeta anna paleleang pano di ingkänna aka ang aha yaling di kalaeta. Lila ma’nala-nala lolo noa api la ungngämpu’i lalang katuhoanta napapuhpu pengkähänganna setang. ⁷ Ingkänna olo’-olo’ mahaila ang uhpa’ bihti’na, sedansiang, olo’-olo’ meme’ sibaha olo’-olo’ yaling di le’bo’ mala dipakanähäng anna ahang napakanähäng hupatau. ⁸ Ampo’ lila nei’, dake’ aha mesa tau la ungkuasaii lambi’ mala napakanähäng. Lila punno kakarakeang, dai mala dipahe’ anna mepatei noa ile balu pekeki’na. ⁹ Lila tapake umpudi Dehata ang tapoambe, anna dia siang tapake untändo paranta hupatau ang natampa Puang Alataala sinnoa hupanna. ¹⁰ Yaling mai di sua naongei lemba’ pa’kuhhu’sumanga’ang anna petändo. Ingkämmua’ solasohongku, dai sihatang tapake lilata tapanoa. ¹¹ Aka’ la aharakae’ mesa timbu naongei uhai mapia anna la dia siang naongei uhai karake? ¹² Ingkämmua’ solasohongku, noa tunne’ aharakae’ poang ara la ungkeboaing boa zaitun, bahtu’raka poang angkoro’ la ungkeboaing boa ara? Ya’ datoete’ la aha timbu uhai karake la umpasohong uhai mapia. ¹³ Ke ahakoa’ to keaka’ anna to manähäng, pahallu umpatandaang kakeaka’aammu anna kamanähängammu yaling di katuhoammua’ ungngolai kero mapia anna kamahempo’ang inaha ang lemba’ di hao mai di kakeaka’ang. ¹⁴ Ampo’ ke ahai yaling di kalaemua’ inaha pa’kasueheang sitonda ma’sihiate anna umpihki’ supu kalaena, ya’ daa umbaha kahsiia’ yatoo anna ungngangka’ kakeaka’ang aka’ setonganna yato ang umbabea’ dai situhu’ katahpa’ang. ¹⁵ Aka’ yato ang unsanga kakeaka’ang dai sule yaho mai di Puang Alataala ampo’ yaling mai di lino, di hao mai di nahsunna hupatau anna di hao mai di setang. ¹⁶ Aka’ umba naongei aha inaha pa’kasueheang anna umpihki’ supu kalaena, di hao tunto nei’ naonge kende’ kasiba’diang anna ingkänna pembabe karake. ¹⁷ Aka’ kakeaka’ang ang sule yaho mai di Puang Alataala umpakende’ inaha bahahsi, dai ungkärä’i kasiba’diang, marota’ pano di solana, tuhu’-tuhu’ang, si ma’kalemu lolo, anna membabe mapia. Dai mampille-pillei anna umba noa yaling di inahanna, noanto napasohong. ¹⁸ Anna pano di tau ang ungkärä’i kasikapiaiang, la ungngambo’ banne kasikapiaiang anna la ungkeboaing kamarohoang.

¹ Umba nakasulei kasiba’diang anna kasikallaang yaling di alla’-alla’mua’? Daraka yatoo sule yaling mai di inaha manahsummua’ ang sitolla’ yaling di kalaemu? ² Mailukoa’ pano di aka-aka ampo’ dai mala ullambi’, ya’ umpolalammia’ papateang. Anna ma’sihiatekoa’ ampo’ dasiang aha ullambi’ pampemalammua’, diang nasuhung umpolalang siteläng-teläng anna sikalla-kalla. Ampo’ nasuhung anna dakoa’ mala ullolongang aka-aka, aka’ dakoa’ aha si malau dai’ di Puang Alataala yaling di sambayang. ³ Bahtu’ malau siamokoa’ ampo’ dai mapia lalang inahammu lambi’ dasiangnga’ aha ullolongang, aka’ yato palaummua’ pemalakoa’ supu umpakekuna situhu’ pampemalammu. ⁴ Oa’ ingkämmu tau ang dai mesa inahammu dai’ di Puang Alataala, darakaa’ dio ungnginsang ungngoatee tau ang untuhu’i lino sipa’bali Puang Alataala? Dahi menna-menna untuhu’i lino sipa’baline’ Puang Alataala. ⁵ Pahallua’ ungnginsang ungngoatee ahaete’ suhunna anna diuki’i bahtakara masero naoatee, "Yato inaha ang yaling di kalaeta, ang napatamaingkea’ Puang Alataala, mai’di pampemalanna ang matoho si’da-si’da." ⁶ Ampo’ mana’ pa’kalemunna ang nabeaingkea’ matoho puhane’ andana yato pampemalantaa’. Dianto anna naoantee, "Puang Alataala umpa’bali to malängkä’ inaha, ampo’ umbehene’ to mahempo’ inaha." ⁷ Dahi malimuntu’koa’ di hao di olona Puang Alataala. Balii Pongkahana setang anna la le’ba’ nakahaoikoa’. ⁸ Pengkarungku’koa’ pano di Puang Alataala anna narungku’i toukoa’ nei’. Oa’ ingkämmu to madosa, bahahsiia’ teyyemu, anna dioa’ ingkämmu ang ma’derua inaha, pamaseroii inahammu. ⁹ Sohsokoa’ babemu anna dusengkoa’ anna manahoi inahammu. Daa ungkahsia’ anna metaha, ampo’ la dumusengkoa’ anna manaho inaha. ¹⁰ Pamahempo’ia’ inahammu di hao di olona Dehata anna la napakeangka’koa’. ¹¹ Oa’ ingkämmu solasohongku, daa ungkekara-kara bu’bu’ pano di solamu! Aka’ menna-menna untula’-tula’ karake solana anna unghohto’ tomande’ solana, tau yatoo umpasala atohang. Ponna umpasalakoa’ atohang, tadiakoa’ tau ang untuhu’ pahenta ampo’ tau ang unghohto’ karake Bahtakara Dehata. ¹² Aka’ supung Puang Alataala umbabe atohang anna Dia supu To Pampahehsa. Dia tunto ang untokei kakuasaang mepasalama’ anna metallangngi. Dahi dioa’ dio dakoa’ sipäto’ la umpahehsa tomande’ solamu. ¹³ Pehingngiia’ inde tula’ku pano di dioa’ ang si mangngoatee, "Allo dinoa bahtu’ marondong la panoang yato di bohto mahoa’ anna la di haoang sahtaung ma’bulele umpeäng kauntungang." ¹⁴ Si umpanoaa’ yatoo moinnakato dake’ ungnginsang yato aka ang la dahi marondong. Pihki’ke’a’ umba noa katuhoammu. Aka’ inde katuhoammu sihapang sahobo ang tandaang sämpäi’ ampo’ dai masae anna pa’da tomande’mi. ¹⁵ Setonganna la si ungngoarea’ne’tee anna mane, "Ponna naelo’ i Dehata, ya’ malaang tuho, anna la mala tukang ungkähäng ma’hupa-hupa kähängang." ¹⁶ Ampo’ dinoa unsanga-sangarakoa’ dio kalaemu aka’ kamalängkä’ang inahammu anna moi ke la dara babe noa yatoo karake. ¹⁷ Dahi pano di tau ang ungnginsang pembabe mapia ampo’ dai naaku napembabeing, tau yatoo madosa.

¹ O ingkämmua’ to makaka, pehingngiia’: dusengkoa’ anna sikakillakoa’ aka’ la nalambi’koa’ kamadahhaang. ² Aka’ ingkänna kullemua’ bosi tomande’ anna porehamu kebu’bi’mi. ³ Bulahang anna pera’mu naandeng tähkä’. Anna yato tähkä’na la umpatandaang kakarakeammu, dianto kadindingbosiammu. Aka’ puhamokoa’ untombong tomande’ kulle yaling inde di tempo diongei ungngempei kapuhaanna lino, dianto anna la naämpu’ikoa’ sinnoa api. ⁴ Sika koha napekäyyängngi yato ingkänna tau ang umpopengkähäng umpupuingkoa’ ihsi bela’mu dai aha unsahoi. Nahingnging Puang Alataala Dehata ang handang ma’kuasa yato pekohanaii. ⁵ Puhamokoa’ dio unsa’ding katuhoang masannang anna dangnga’ aha aka ungkalala’i yaling inde di lino. Sihapangkoa’ patuhoang ang dipelompoi aka’ la ditunu. ⁶ Puhamokoa’ untahungkung anna umpatei tau ang dai aha kasalaanna, datomande’koa’ nabali. ⁷ Ingkämmua’ solasohongku, inang la nalambi’koa’ kamadahhaang. Dahi dianto anna la sa’bara’mokoa’ ungngempei kasuleanna sumule Dehatanta Puang Yesus sinnoa mesa to pangnguma sa’bara’ ungngempei boa pengkähänna la kende’ mapia. Aka’ nasa’bara’ang ungngempei tempona uhangngallo ke la mangngambo’i anna tempona uhangngallo ke la mantanammi. ⁸ Pamatoho toia’ne’ inahammu punnokoa’ kasa’bara’ang, aka’ marungku’mi kasuleanna Dehatanta. ⁹ Ingkämmua’ solasohongku daumpomämmäng pano di solamu andana ditahungkungkoa’. Aka’ setonganna dang masae anna suleng To Pambohtu kaha-kaha. ¹⁰ Ingkämmua’ solasohongku ala pohapangangngia’ kasa’bara’anna ingkänna nabi yaling di kamadahhaanna umpalambi’ Bahtakara Dehata. ¹¹ Setonganna taangka’ kahsine’ tau ang tähäng yaling di kamadahhaang. Unghingngi tungnga’ yato kasa’bara’anna Ayub, anna ungnginsang toia’ umba napanoa nabehe Dehata katämpä’anna. Aka’ Dehata ang marota’ anna sundung pa’kalemu. ¹² Ang handang poko’, ingkämmua’ solasohongku, daumpopindaa’, sinnoanna umpopindai suruka, lino bahtu’ senga’nake’. Ampo’ diare’, ponna inang io, ya’ oaia’te, "Io." Ke dai, ya’ oaia’te, "Dai," andana nalambi’koa’ tahungkunna Puang Alataala. ¹³ Ke ahai tau yaling di alla’-alla’mua’ nalambi’ kamadahhaang, mapia ke ma’sambayangngi. Ke ahai tau ullambi’ kamasannangang, mapia ke umpenanii penaniang pampudiang. ¹⁴ Ponna aha ang makorong yaling di alla’-alla’mua’ pahallu la untambai pebulle ada’ yaling di jumaa’ anna malai sika napa’sambayangnging anna nasuhsu’i minnä’ peuhu’ yaling di sanganna Dehata. ¹⁵ Aka’ ponna dipenumpui ma’sambayang anna sule yaling mai di kapampetahpa’ang, umpabono’ yato to makorong, anna Dehata la umpamakahsingngi sumule. Noa tunne’ ke ahai umbabe dosa la naampungngiing. ¹⁶ Dahi la sipangngakuikoa’ anna sipa’sambayangngingkoa’ anna malakoa’ napabono’ Puang Alataala. Sambayanna mesa tau ang maroho di hao di olona Puang Alataala käyyäng kuasanna. ¹⁷ Elia mesa hupatau biasa sinnoa siamingkea’, ampo’ ma’sambayang sibaha sangkalebu inahanna anna malai dai kene’. Lambi’ dasi’dai aha kene’ yaling di tallu setangnga taung. ¹⁸ Pihsananna ma’sambayang bumi umpalau kene’, ya’ tuhung si’da bumi kene’ lambi’ keboa pinamula. ¹⁹ Ingkämmua’ solasohongku, ke ahai solamua’ ang sähsä’ lalang di hao mai di katahpa’ang anna ahakoa’ mesa mamposola sumule pano di olona Puang Alataala, ²⁰ pengnginsangngiia’ ungngoatee menna-menna ang umpasumule to madosa di hao mai di lalang kabulingang, ya’ umpasalama’ sungnga’na yato to madosa, anna mai’di dosa ang la diampungngi.