Ibrani

Ibrani

¹ Dolu pemmai’di ma’tula’ Puang Alataala pano di neneta nalombung senabiang, anna mai’di lalanna ang napake ma’tula’ pano. ² Ampo’ tempo dinoa ang marungku’mi allo katämpä’anna, napa’tula’iingkea’ yaling di Änä’ Kalaena. Ungngolai inde Änä’na, langi’ anna lino natampa Puang Alataala. Anna nadandi pano yato di Änä’na ingkänna aka-akanna la namana’ing. ³ Dianto ang mampalanda’ingkea’ kamatandeanna Puang Alataala. Pengkerona anna kakuasaanna sinnoa siang pengkerona anna kakuasaanna Puang Alataala. Dianto ang ungkuasai anna undakai ingkänna-ingkänna siamo ungngolai bahtakaranna ang ma’kuasa. Puhanna umbasei hupatau di hao mai di dosannaii, ya’ le’ba’mi dai’ anna mohko’i yaho di tando kuananna Puang Alataala yaho di suruka. ⁴ Ohko’ang ang natahimbo yato Änä’na malängkä’ puha nei’ andana ohko’anna ingkänna malaeka’, aka’ yato sanga ang nabea Puang Alataala londo puha andana yato sanga ang nabea pano diii. ⁵ Dai aha natula’ Puang Alataala pano di moi poro la mesa malaeka’ sinnoa yato ang natula’ pano di Änä’na naoatee, "Dionto Änä’ku. Mengkalao dinoa umpoambemä’." Datuke’ aha natula’ Puang Alataala didiona malaeka’ sinnoa yato ang natula’ didiona Änä’na naoatee, "Kodi’ la napoambe anna Dia nei’ la kupoänä’." ⁶ Anna tahpana Puang Alataala unsuo Änä’ uluana mentama inde di lino, ma’tula’mi naoatee, "Ingkänna malaeka’ku pahallu umpenombai yato Änä’ku." ⁷ Yatone’ malaeka’ nasangai nei’ Puang Alataala, "Pesuoku ang madihhi’ noa pepahi, bahtu’ sabua’ku ang meahha noa api." ⁸ Ampo’ panone’ di Änä’na naoatee, "O Dehata, Dionto Tomaraya lambi’ sapano-panona. Umpahenta sitonda kamarohoang. ⁹ Ungkärä’i pengkero maroho ampo’ ungkahiri’ nei’ pengkero karake. Dianto anna napakeangka’o Puang Alataala, Dehatammu, londo puha andana ingkänna solamu. Naminnä’io tandana napakeangka’o anna malai mahasa inahammu." ¹⁰ Naoa toe’tee Puang Alataala pano di Änä’na, "O Puang, Dionto ang umpadahi lino mengkalao dolu, teyyemuntoo ang umpadahi langi’. ¹¹ Ingkänna yatoo inang la ditallangngi, ampo’ Dio nei’ dao la tirende. Langi’ anna lino la mendahi sinnoa kaya’ malullu’. ¹² La ulluhpi’ mane umbala’ii ang bakahu. Ampo’ Dio, la tontong loloo. Dai la aha kapuhaanna katuhoammu." ¹³ Dake’ aha natula’ Puang Alataala pano di mesa malaeka’ sinnoa yato ang puha natula’ pano di Änä’na naoatee, "Ohko’o done di tando kuanangku lambi’ ingkänna balimmu kupadihoi’ingko di pengngindä’ammu." ¹⁴ Ampo’ semalaeka’ang nei’, dianto sabua’na Puang Alataala ang nasuo undului ingkänna tau ang la dipasalama’.

¹ Dahi, aka’ Puang Yesus londo puhane’ andana malaeka’, pahallu liu tatokei yato kaheba ang hali tahingngi, andana tuhtuang sikahaoangngingkea’ kapampetahpa’anta. ² Aka’ yato bahtakara, ang napapebaha Puang Alataala pano di neneta ang napalambi’ malaeka’, tontong tahpa’, anna ingkänna tau ang mantehkai, bahtu’ dai umpetahpa’ yatoo, ditahungkung situhu’ yato pembabena. ³ Dahi la matingngi puha nei’ yato tahungkunna Puang Alataala pano di tau ang dai umpehingngii yato kaheba kasalama’ang ang natula’ Änä’ Kalaena pano di kita’! Aka’ mahasa puha yato kaheba andana yato tula’na malaeka’. Dahi ke daingkea’ umpehingngii yato kaheba kasalama’ang, ya’ inang daingkea’ la lahpa’ di hao mai di tahungkung! Kalaena Puang Yesus ang handang dolu umpepainsangnging inde kaheba. Anna kalaena toe’ yato tau ang manghingngi donetoo, dianto ang mampainsangngiang lambi’ kiinsang kioatee tahpa’. ⁴ Anna napamatoho Puang Alataala yato kasa’biannaii ungngolai kakuasaang ang nabea pano, lambi’ mala sika umbabe ma’kahupa-hupa tanda ang mepusa’-pusa’. Anna umbea toi kakuasaang Inaha Maserona pano di simesa-mesa yato pahsikolana situhu’ pangngelo’na. ⁵ Tadia malaeka’ ang la umpahenta yato lino bakahu dako’ ang tatula’ dinoa, ampo’ kita’ hupatau. ⁶ Aka’ yaling di Suha’ Masero aha tiuki’, "Aka turakae’ne’ hupatau lambi’ ungkalemui? Umba turakae’ne’ noa to lino anna umpemapiaing? ⁷ Ampo’ puha umpadahi sämpäi’ napadihoi’ang malaeka’, mane umpadurungngi kamatandeang anna kakeangka’ang. ⁸ Umpopa’kuasa pano di ingkänna ang puha umpadahi yaling inde di lino." Dahi yato ang mane tabata ang naoatee, "ingkänna ang puha umpadahi yaling inde di lino," bahtuanna dai aha disehalii. Pano di ingkänna asang yatoo napopa’kuasaingkea’ Puang Alataala. Ampo’ lambi’ dinoa dake’ taitaa’ yato kakuasaanta ang noa. ⁹ Ampo’ taita Puang Yesus, ang sämpäi’ supu dipadihoi’ang puha andana semalaeka’ang naonge anna dinneke’ di lino, anna dinoa dipadurungnging kamatandeang anna kakeangka’ang aka’ madahha anna mate aka’ kita’. Tahpa’etee’, aka’ mana’ pa’kalemunna Puang Alataala lambi’ nabohtu naoatee Puang Yesus la ungngolai kamateang aka’ yato kamateanna la unsulängngi ingkänna hupatau. ¹⁰ Puang Alataala umpapia asang ingkänna yato ang aha, anna ingkänna yatoo untuhu’i asang pangngelo’na. Pahtuyunna anna malai nabea taha yaling di kamatandeanna pano yato di mai’di tau ang mendahi änä’-änä’na. Dianto anna nabohtui naoatee pahallu Puang Yesus ungngolai kamadahhaang lambi’ mate. Sihatammite’ inde napanoa, aka’ ungngolai kamadahhaanna Puang Yesus, ya’ mendahing To Pesuläng ang sundung ang sihatang untehteingkea’ pano di kasalama’ang. ¹¹ Puang Yesus, ang mampamaseroingkea’ di hao mai di dosanta, anna kita’ ang napamasero, mesa siang Ambetaa’ sibaha. Dianto anna dai masili Puang Yesus nasangaiingkea’ solasohonna. ¹² Ma’tula’mi Puang Yesus dai’ di Puang Alataala naoatee, "La kupamatande sangammu pano di solasohongku. La kupudio di alla’na ingkänna petauammu." ¹³ Naoa toe’tee, "Ang kuhannuang supung Puang Alataala." Mane nalombungngii naoatee, "Dinnemä’, sibahaang ingkänna änä’ ang nabeaä’ Puang Alataala." ¹⁴ Yato ingkänna tau ang nasangai "änä’" dianto hupatau ang kekalae biasa ang la mate. Dahi dianto Puang Yesus anna mentolinoi anna tuhoi sinnoa siangnga’ kita’ hupatau, anna malai yaling di kamateanna umpa’dai kakuasaanna Pongkahana setang, yato ang ma’pahenta di hoi’ di ongeanna to mate. ¹⁵ Yato kamateanna Puang Yesus dianto ang napolalang nalahpa’ingkea’ di hao mai di kamateang. Aka’ dolu tuhoingkea’ sihapang sabua’ aka’ mahea’ingkea’ pano yato di kamateang. ¹⁶ Dahi tainsang taoatee tadia malaeka’ ang nakalemui, ampo’ kita’rea’te’ peänä’anna Abraham ang nakalemui. ¹⁷ Dianto Puang Yesus anna pahallui mentolino anna napensinnoaiingkea’ inde solasohonna, anna malai mendahi Handang Pongkahana Imang ang ma’kalemu anna tontong lolo ungkähäng yato kähängang ang nabea Puang Alataala anna malai umbaya’ yato dosanna ingkänna tau. ¹⁸ Puang Yesus madahha liu naonge disändä’i, dianto anna nainsangngi ungkalemui tau ang lella’ disändä’i, aka’ puha toe’ nasa’ding Kalaena.

¹ Oa’ solasohong, petauanna Puang Alataala ang natambai la dai’ di suruka, padiinahammui Puang Yesus, dianto pesuona Puang Alataala ang mendahing Handang Pongkahana Imang yaling di kapampetahpa’ang ang taakui. ² Tontong lolo tuhu’-tuhu’ang dai’ di Puang Alataala, ungkähäng yato pengkähängang ang nasuo nababe, sinnoa Nabi Musa dolu ang tuhu’-tuhu’ang ungkähäng pengkähänganna, dianto undakai manahpa Dasanna Puang Alataala. ³ Padiinahammui Puang Yesus, aka’ sihatang dipakeangka’ puha andana Nabi Musa, sinnoa tau ang umpake’de’ mesa dasang sihatang dipakeangka’ puha andana yato dasang ang napake’de’. ⁴ Ingkänna dasang, ya’ inang aha ang mampake’de’. Ampo’ ang umpapia asang ingkänna siamo, dianto Puang Alataala. ⁵ Nabi Musa tuhu’-tuhu’ang ungkähäng pengkähänganna, dianto undakai Dasanna Puang Alataala, sinnoa mesa sabua’ ang tuhu’-tuhu’ang yaling di dasanna pongkahana. Yato ang nababe Musa mesa pohapanganna ingkänna ang la napalanda’ ke dako’mi Puang Alataala. ⁶ Ampo’ Kristus nei’ tadia sabua’ ampo’ inang Änä’na Puang Alataala, ang tuhu’-tuhu’ang lolo umpongkahai Dasanna Puang Alataala. Ihsinna yato Dasanna, dianto kita’a’ ingkännaingke, solasohong, ponna inahantaa’ tontong lolo unghannuang supu Puang Yesus, anna daingkea’ bata-bata. ⁷ Dahi, solasohong, pehingngii pepakaenga’na Inaha Masero ang tiuki’ dolu naoatee, "Allo dinoa pahallua’ umpehingngii kamahanna. ⁸ Daumpamakahha’ inahammu dai’, sinnoa ang nababe peneneammua’ to Israel dolu naonge dai tuhu’-tuhu’ang di hao di ongeang makä’däng anna sika unsändä’i kasa’bara’anna Puang Alataala. ⁹ Naoate Puang Alataala, ’Dianto ang naongei peneneammu unsändä’i kasa’bara’angku moinnakatoo anna sika ungngita asangngi ingkänna ang kupembabeing yaling di uhpa’ pulo pahiamanna. ¹⁰ Dianto anna kukeaha’i aka’ daloloi tuhu’-tuhu’ang; daloloi sika untuhu’i yato aka ang kupahentaing. ¹¹ Dahi yaling di kakeaha’angku mopindaä’, kuoatee: Daliui la kupabei sika mentama yato di ongeang kapehileang ang kupatokaing.’ " ¹² Oa’ solasohong, dakaii andana meinaha karakekoa’ sinnoa yatoii, lambi’ ungkebo’ikoa’ Puang Alataala ang tuho. ¹³ Selama ahake’ tempo pahallukoa’ sipakaleha lolo solamu allo-allo, anna malai dakoa’ nabulitu’ dosa lambi’ meinaha kahha’koa’ dai’ di Puang Alataala. ¹⁴ Ponna ke tontong loloingkea’ untokei yato kapampetahpa’anta lambi’ kapuhaanna, sinnoa mengkalao dolu, ya’ la aha kasikenteanta yaling di Kristus. ¹⁵ Daungkalimpängngii pepakaenga’ ang tiuki’ naoatee, "Allo dinoa pahallua’ umpehingngii kamahanna. Daumpamakahha’i inahammu sinnoa ang nababe peneneammua’ to Israel dolu naonge dai tuhu’-tuhu’ang." ¹⁶ Inde to Israel, ang nabahanang Nabi Musa umpellei Mesir dolu, unghingnging kamahanna Puang Alataala, ampo’ katämpä’anna dai sika natuhu’i. ¹⁷ Dianto anna keaha’i pano yaling yato di uhpa’ pulo pahiamanna, lambi’ mate asang di hao di ongeang makä’däng aka’ akatoo yato dosannaii. ¹⁸ To Israelmitoo ang nalahe’ tula’na Puang Alataala naonge ma’tula’i naoatee, "Daliui la kupabei sika mentama yato di ongeang kapehileang ang kupatokaing." Dai napabei sika mentama yato di ongeang kapehileang, aka’ dai sika untuhu’i pahentana. ¹⁹ Dahi malesong tainsang taoatee dai sika mentama yato di pehileanna Puang Alataala aka’ dai mampetahpa’.

¹ Tontong loloke’ pa’dandianna Puang Alataala la mala tau ullambi’ yato pehileanna, dahi pahallu tadakai andana ahai di alla’-alla’ta ang daine’ la nalambi’. ² Aka’ yato Kaheba Mapia napainsangngi toingkea’ kita’, sinnoa ang napainsangngi toe’ pano di to Israel dolu. Ampo’ yato Kaheba Mapia dai umbaha behe pano diii, aka’ sika nahingngi supu, dai sika mampetahpa’. ³ Supung kita’ ang mampetahpa’ ang la ullambi’ yato pehileang sibaha Puang Alataala. Pano di tau ang dai mampetahpa’, naoane’tee Puang Alataala, "Yaling di kakeaha’angku mopindaä’, kuoatee, ’Daliui la kupabei sika mentama yato di ongeang kapehileang ang kupatokaing.’ " Ma’tula’ noa, moinnakato anna yato ongeang kapehileanna puha napatokaing mengkalao anna dipapiai inde lino. ⁴ Tainsammi taoatee tokang aka’ aha tiuki’ didiona allo katohhoang yaling di Suha’ Masero naoatee, "Pihsananna di allo kapitunna mehileng aka’ puhang pengkähänganna." ⁵ Anna yato tula’na Puang Alataala ang tahingngia’ di langngena’ naoatee, "Daliui la kupabei sika mentama yato di ongeang kapehileang ang kupatokaing." ⁶ Dai sika ullambi’ kapehileang sibaha Puang Alataala aka’ dai sika untuhu’i pahentana. Ampo’ situhu’ pahtuyunna Puang Alataala pahallu aha tau ang la ullambi’ yato kapehileang. ⁷ Dianto anna napilleing Puang Alataala tempo ang senga’ ang naonge mala tau ullambi’ yato kapehileanna, dianto allo dinoa. Indee napepainsangnging Puang Alataala ungngolai Tomaraya Daud, masaeng puhanna naonge anna tuhoi Nabi Musa, umpake yato tula’ ang tahingngi langngena’ naoatee, "Allo dinoa pahallukoa’ umpehingngii kamahanna. Daumpamakahha’i inahammu dai’." ⁸ Dolu Yosua umbahanang to Israel mentama di Bohto Kanaan, ampo’ tadia yatoo ang disangai "kapehileang" dinne. Ponna ke dianto supu yatoo ang mendahi kapehileang sibaha Puang Alataala, ya’ dai la ma’tula’ Puang Alataala didiona allo ang senga’na. ⁹ Dahi ahake’ kapehileang sibaha Puang Alataala pano di petauanna. Kapehileang yatoo sinnoa kapehileanna di allo kapitunna. ¹⁰ Aka’ ingkänna tau ang mentama yato di kapehileanna Puang Alataala la mehile di hao mai di pengkähängannaii, sinnoa Puang Alataala mehileng puhanna pengkähänganna dianto untampa lino. ¹¹ Dahi, solasohong, la tapengkabela-belaia’ anna malaingkea’ ullambi’ yato kapehileang, andana ahai di alla’-alla’ta ang umpellei kapampetahpa’anna sinnoa yato to Israel dolu. ¹² Aka’ Bahtakaranna Puang Alataala tuho anna ma’kuasa, pahela puha nei’ andana pa’dang ang pahe’la’ sibali. Aka’ noanna mesa pa’dang ullosa kasitammuang buku, moi lambi’ tama di eti’na buku, ya’ noa tunne’ Bahtakaranna Puang Alataala ullosa pihki’ta anna ihsi inahanta. Yaling inde di Bahtakaranna, Puang Alataala umpalanda’mi umba noa kalaeta ang setonganna. ¹³ Dai aha ang tibuni di hao mai di matanna. Dia asanna yatoo landa’ anna maleso di olona. Di olonantoo la pahallu taakui asang ingkänna pembabeta. ¹⁴ Dahi aha Handang Pongkahana Imang ang tahannuang ang käyyäng si’da-si’da, dianto Puang Yesus, Änä’na Puang Alataala, ang hali dai’ di suruka mengngolo pano di Ambena. Dianto anna pahallui tatokei mahha’ kapampetahpa’anta pano, sibaha taakui lolo taoatee Puang Yesus dianto Dehatanta. ¹⁵ Aka’ inde Handang Pongkahana Imang ang tahannuang, ungnginsang kamalammaanta aka’ hali nasa’ding ingkänna pesändä’ ang tasa’ding, ampo’ daine’ umbabe dosa. ¹⁶ Dahi mala tapengkabahanii undungku’i ohko’ang kamatandeanna Puang Alataala ang punno pa’kalemu. Aka’ yaho di olona la talambi’ mana’ pa’kalemunna ang la mekalemui ke ahai kapahalluanta.

¹ Ingkänna ang mendahi handang pongkahana imang dipillei di alla’-alla’na solana hupatau la umbabe pengkähänganna Puang Alataala. Mengngolo pano di Puang Alataala umpa’tula’ing yato ingkänna tau anna untunu patuhoang ang la umbaya’ dosanna tau sibaha umbaha penombaang senga’. ² Aka’ mesa handang pongkahana imang dianto hupatau biasa, ya’ si aha kamalammaanna. Dianto anna sika ungkalemui to madosa ang dake’ ungnginsang lalang ang tahpa’, aka’ nainsang umba noa kamalammaanna. ³ Dahi, aka’ malamma toe’, dianto anna pahallui umpopenomba penombaang umbaya’ dosa kalaena. Dai la umbaya’ supu dosanna hupatau senga’, ampo’ moi dosa kalaena. ⁴ Anna dai aha ang ungngängkä’ kalaena mendahi handang pongkahana imang, pahallu napillei anna naängkä’ Puang Alataala la ungkähäng inde pengkähängang, sinnoa ang dahi pano di ta Harun dolu. ⁵ Noa tunne’ Kristus, dai ungngängkä’ Kalaena mendahi Handang Pongkahana Imang, ampo’ Kalaena Puang Alataala ang mangngängkä’ naoaintee, "Dionto Änä’ku. Mengkalao dinoa umpoambemä’." ⁶ Yaling di sallaoang ang senga’ naoainte Puang Alataala, "Dionto Imang lambi’ sapano-panona, sinnoa siang Melkisedek dolu." ⁷ Naonge Puang Yesus anna tohhoi yaling done inde di lino ma’sambayammi anna mehumala’i sitonda dumuseng malau dai’ di Puang Alataala. Nainsammi naoatee Puang Alataala ma’kuasa anna mala nalahpa’ di hao mai di kamateang, ampo’ dai naaku untuhu’i pampemala Kalaena, untuhu’i nei’ pangngelo’na Puang Alataala. Dianto anna napehingngiing Puang Alataala palaunna. ⁸ Moinnakato anna inang Änä’nai Puang Alataala, ampo’ napellaya’i untuhu’i pangngelo’na Puang Alataala yaling di kamadahhaang sinnoa siang hupatau. ⁹ Napanoanto Puang Alataala umpasihatangngi Puang Yesus mendahi Handang Pongkahana Imang ang sundung anna mendahi toi pengkalaoanna kasalama’ang pano di ingkänna tau ang mantuhu’i. ¹⁰ Anna naängkä’ Puang Alataala mendahi Handang Pongkahana Imang sinnoa Melkisedek. ¹¹ Oa’ solasohong, yaling inde di kaha-kaha mai’dike’ ang pemala kutula’ mating, ampo’ masuhsa kupakalesoingkoa’ aka’ tengkongkoa’ ma’pehingngi. ¹² Masaemokoa’ untindo’i Puang Yesus. Dahi dinoa setonganna malamokoa’ umpakuhu tau senga’. Ampo’ aka’ pahallukangkoa’ dipakuhu sala, dahi dake’ mala, aka’ dake’ ungnginsangnga’ moi pepakuhunna kasahaniang ang uhuna. Sinnoakoa’ änä’ malea ang supung sumusuke’ aka’ dake’ mala ungngande andeang kahha’. ¹³ Aka’ tau ang sumusuke’, ya’ maänä’-änä’ke’. Bahtuanna dake’ matoho yaling di kasahaniang anna dake’ nainsang umpasise’la aka ang mapia anna aka ang tahuhu. ¹⁴ Ampo’ andeang makahha’ nei’ andeannane’ tau ang lobo’mi, bahtuanna tau ang untuhu’i pepakuhu ang tahpa’ aka’ nainsammi umpasise’la yato aka ang tahpa’ anna yato aka ang karake.

¹ - ² Dahi, solasohong, dotanne’ tabolii untula’ lolo pepakuhu ang uhuna didiona Kristus ang sihatanne’ pano di tau ang mane mendahi to Sahani. Tau ang noa inang pahallu dipakuhu mengkatoba’ di hao mai di pembabena ang takekuna anna mampetahpa’i dai’ di Puang Alataala. Pahallu sika dipakuhu aka suhunna ditero’ yaling di sanganna Puang Yesus. Pahallu dipakuhu umba noa mesa pebulle ada’ umpake teyyena umpalauing behe hupatau. Pahallu dipakuhu aka ang la dahi di allo ang la sule, dianto Puang Alataala la umpatuho sumule ingkänna to mate. Anna la untahungkung ingkänna tau ang membabe karake lolo. Ingkänna inde pepakuhu sihatang pano di tau ang mane mendahi to Sahani, ampo’ daia’ mangki’ tapa’sule-sulei, dotanne’ tatula’i pepakuhu ang matama puha. ³ Anna, ke naelo’i Puang Alataala, ya’ dianto ang la tababe. ⁴ Tau ang naangka’i umpellei kapampetahpa’anna, dang mala ditehte sumule mengkatoba’ di hao mai di dosannaii. Aka’ dolu sika yaling di kamabayaang, sika unsa’ding pebehena Puang Alataala yaling di katuhoannaii anna untahimbo Inaha Masero sinnoa tau senga’. ⁵ Nainsang naoatee mapia Bahtakaranna Puang Alataala anna sika unsa’ding kakuasaanna Puang Alataala ang sule yaling mai di kapahentaanna. ⁶ Ampo’ puhanna yatoo, ponna sika naangka’i umpellei kapampetahpa’anna, ya’ dang mala ditehte sumule mengkatoba’ di hao mai di dosannaii. Aka’ mala dioatee sika umpäso’ sumule Änä’na Puang Alataala dai’ di kayu sitambeng anna napakauho-uhoi di olona tau mai’di. ⁷ Ponna aha tampo ang si nakene’i, ya’ pinamula yatoo la mai’di boana anna la kekuna pano di puänna, lambi’ tampo yatoo mala dioatee nabehe Puang Alataala. ⁸ Ampo’ ponna yato tampo ke nakatuhoii supu päräng, balimbano sibaha lohpo kedui senga’nake’, ya’ dai kekuna anna la ditändo. Katämpä’anna la disohe lambi’ mämpu’. ⁹ Ampo’ dioa’, solasohong ang kikalemui, moinnakato anna noai inde tula’ki’, ampo’ kihannuang dakoa’ la sinnoa yato tampo ang ditändo. Kiinsang kioatee mahasa puha boamu, dianto kapampetahpa’ammu sibaha pembabemu ang sihatang pano di tau ang napasalama’ Puang Alataala. ¹⁰ Aka’ Puang Alataala ke mambohtui maroho lolo. Dai la nakalimpängngi pengkähängammu ang umbabeing, bahtu’ pa’kalemummu ang umpepaitaing yaling ungkalemui solamu to mampetahpa’, noa ang inang si umbabe lolo. ¹¹ Pemala liuang, solasohong, anna indee ang si umbabea’ la umpatontong lolo lambi’ kapuhaanna katuhoammu anna malai ullambi’ si’da-si’da yato ang unghannuang yaho mai di Puang Alataala. ¹² Daumpabeii ke la ahai di alla’-alla’mua’ ang la tengkong ma’pehingngi. Ampo’ diare’ tindo’i pohapanganna tau ang umpetahpa’ Puang Alataala sitonda kasa’bara’ang, aka’ inang tau ang noa la untahimbo yato ang nadandiing Puang Alataala. ¹³ Naonge anna ma’dandii Puang Alataala pano di Abraham, mopinda umpake sanga Kalaena anna malai matoto’ yato pa’dandinna. Napanoa aka’ dai aha ang londo puha. ¹⁴ Naoaintee, "La kubehe loloo anna la kupamai’diingko peänä’ammu." ¹⁵ Tontong lolo Abraham umpetahpa’ Puang Alataala lambi’ untahimbo yato ang nadandiing pano di kalaena. ¹⁶ Ponna ke mopindai mesa tau, ya’ biasa umpake sanganna mesa ang londo puha nei’ andana kalaena. Yato popindana umpamatoto’ tula’na lambi’ dai aha ang bahani la sibehta-behta. ¹⁷ Noa tunne’ Puang Alataala. Naonge ma’dandii pano di Abraham sibaha peänä’anna, pemala umpamatoho inahannaii lambi’ sika la nainsang naoatee inang la dahi yato ang nabohtu. Dianto anna mopindang naola umpamatoto’ tula’na. ¹⁸ Dahi puha nabeaingkea’ Puang Alataala pa’dandinna anna popindaanna. Inde derua hupanna tula’ sahing dai mala dibala’i, aka’ inang daine’ aha ma’loseng-loseng Puang Alataala. Dahi kita’ ang hali ullambi’ pentu’dungang yaling di Puang Alataala tontong hannu anna mampetahpa’ la nabeaingkea’ yato kasalama’ang ang nadandi. ¹⁹ Inde panghannuanta sihapang ahhi ang umpamatoto’ inahantaa’ anna malai dai pahoro kapampetahpa’anta. Anna inde panghannuanta natehteingkea’ umpellosai sapa’na suruka lambi’ tama di olona Puang Alataala. ²⁰ Mendolune’ Puang Yesus tama do nabuhkeiingkea’ lalang. Mendahing Handang Pongkahana Imang ang mambahanangngingkea’ sapano-panona, sinnoa Melkisedek dolu.

¹ Indee Melkisedek dianto tomaraya Bohto Salem dolu anna imanna Dehata ang Handang Malängkä’. Tahpana sumule Abraham di hao mai di pa’tolla’ang naonge untaloi sangngaka-sangngaka tomaraya, ya’ suleng inde Melkisedek natammui anna nabehei. ² Puhai yatoo, naalang Abraham bahe sampulona ingkänna aka-aka ang nahampa’i yaling di pa’tolla’ang anna nabeai pano di Melkisedek. Sanganna inde Melkisedek bahtuanna: ’Tomaraya ang Maroho.’ Anna, aka’ untomarayai Bohto Salem ang bahtuanna: ’Kamasahkeang,’ mala disangai: ’Tomaraya Kamasahkeang.’ ³ Ponna tabata tohodolunna, dai aha tiuki’ pengkalaoanna didiona ambena, indona, bahtu’ peneneanna. Datoi aha tiuki’ didiona pampahandu’anna bahtu’ katämpä’anna katuhoanna. Mala dioatee indee Melkisedek sinnoa Änä’na Puang Alataala aka’ tontong mendahi imang lambi’ sapano-panona. ⁴ Yaling inde di tohodolunna taita umba noa kamalängkä’anna Melkisedek. Panone’ di Abraham, ya’ malängkä’ toe’ aka’ naponene ingkänna to Israel. Ampo’ moinnakato noa, Abraham umpakeangka’ Melkisedek lambi’ umbea bahe sampulona ingkänna aka-aka ang nahampa’i yaling di pa’tolla’ang. ⁵ Situhu’ atohanna ada’ Yahudi, peänä’anna Lewi ang mendahi imang pahallu untahimbo bahe sampulona aka-aka di hao mai di solana to Israel moinnakato anna peampoanna asangngi Abraham. ⁶ Indene’ Melkisedek, tadia peänä’anna Lewi, ampo’ moinnakatoo noa untahimbo toe’ bahe sampulona di hao mai di Abraham. Dia tuke’, moinnakato anna halii Abraham untahimbo pa’dandinna Puang Alataala, ampo’ tadia Abraham ang umbehe Melkisedek, ampo’ Melkisedek-ete’ ang umbehe Abraham. ⁷ Anna maleso tainsang taoatee tau ang dibehe madihoi’ang nei’ andana tau ang mambehe. Dahi Melkisedek malängkä’ puha nei’ andana Abraham. ⁸ Panone’ di ingkänna seimangang, si untahimbo toe’ bahe sampulona di hao mai di solana to Israel. Ampo’ si mate asang toe’ sinnoa ingkänna hupatau. Ampo’ indene’ Melkisedek untahimbone’ bahe sampulona di hao mai di Abraham anna dai aha tiuki’ kamateanna, mala dioatee tuho loloke’. ⁹ Dia tuke’, mala dioatee seimangang, bahtu’ peänä’anna Lewi ang si untahimbo bahe sampulona, puha umbaya’ bahe sampulona pano di Melkisedek ungngolai Abraham peneneannaii. ¹⁰ Aka’ Lewi ampo kuntu’na Abraham, dahi naonge Abraham anna umbeai yato bahe sampulona pano di Melkisedek, ya’ yalingke’ di kalaena inde ta Lewi ampona. ¹¹ Puang Alataala ungngängkä’ sangngaka-sangngaka di alla’na peänä’anna Lewi mendahi imang ang la umbahanang to Israel yaling untuhu’i atohanna. Ampo’ hupatau dai mala mendahi maroho ungngolai pengkähänna yato seimangang. Dianto anna pahallung kende’ imang senga’, dianto mesa imang ang sinnoa Melkisedek, tadia mesa peänä’anna Lewi hapanganna Harun. ¹² Dahi, ke dibala’i seimangang ang peänä’anna Lewi anna malai aha imang senga’, ya’ pahallu toe’ dibala’i atohanna ada’ Yahudi. ¹³ Ang ditula’ dinoa dianto Dehatanta Puang Yesus ang sule di hao mai di peneneang senga’. Dai aha di alla’na solasohonna ang mendahi imang. ¹⁴ Tainsang taoatee Puang Yesus umponene Yehuda, dai umponene Lewi. Anna dai aha kasikenteanna Yehuda anna seimangang situhu’ atohanna ada’ Yahudi ang nauki’ Nabi Musa. ¹⁵ Anna maleso puha nei’ ke taitaia’ anna taoaitee kende’mi mesa Imang senga’, ang sinnoa Melkisedek. ¹⁶ Tadia aka’ atohang ang mangngoatee: supung peänä’anna Lewi ang mala mendahi imang, ampo’ inde Imang senga’ diängkä’mi aka’ kakuasaanna anna katuhoanna ang dai aha kapuhaanna. ¹⁷ Aka’ aha tiuki’ yaling di Suha’ Masero naoatee, "Dionto imang lambi’ sapano-panona, sinnoa siang Melkisedek dolu." ¹⁸ Dahi yato atohang ang masae dang dipake aka’ malamma anna dai kekuna. ¹⁹ Aka’ dai nabela yato atohanna ada’ Yahudi umpamaroho tau. Ampo’ dinoa Puang Yesus mebea panghannuang ang mahasa puha, anna yaling yatoo mala tadungku’i Puang Alataala. ²⁰ Dia tuke’, Puang Yesus mendahi imang aka’ popindaanna Puang Alataala. ²¹ Dai aha imang senga’ ang tiängkä’ noa. Ampo’ tahpana Puang Yesus diängkä’ mendahi imang, mopindang Puang Alataala naoatee, "Kodi’ Puang Alataala kupopindai anna dai la tirende tula’ku: Dionto imang lambi’ sapano-panona." ²² Aka’ inde popindaang maleso tainsang taoatee Puang Yesus umpamatoto’ mesa pa’dandiang ang mahasa puha andana yato pa’dandiang ang dolu. ²³ Ahake’ bou mesa: seimangang ang peänä’anna Lewi mai’di, anna tau biasa asang. Ponna mateng mesa, ya’ pahallu aha ang mambala’i. ²⁴ Ampo’ tuhone’ Puang Yesus lambi’ sapano-panona, anna pengkähänganna tontong lolo, mendahi imang, dai aha ang mambala’i. ²⁵ Dianto anna ma’kuasai lambi’ sapano-panona umpasalama’ingkea’ ang mendungku’ pano di Puang Alataala yaling di sanganna. Aka’ tuho lolo anna tontong napehumala’ingkea’ dai’ di Puang Alataala. ²⁶ Dahi Puang Yesus dianto Handang Pongkahana Imang ang tapahallu, aka’ masero, dai aha kasalaanna bahtu’ dosanna. Dinoa dipasähä’mi di hao mai di to madosa anna dipadai’i di ongeang ang handang malängkä’ yaho di suruka. ²⁷ Dai sinnoa imang biasa ang pahallu umpopenomba penombaang allo-allo: ang napadolu dianto aka’ dosanna toboe’, mane dosannai tau senga’. Ampo’ indene’ Puang Yesus pihsang supu umpopenomba penombaang dai’ di Puang Alataala naonge umbehoi Kalaena dipatei. Yato penombaanna dai pahallu dipa’sule-sulei. ²⁸ Tau ang mendahi handang pongkahana imang yaling di atohanna ada’ Yahudi malamma aka’ hupatau biasa. Ampo’ puhanna atohang ada’ Yahudi dibea ungngolai Nabi Musa, Puang Alataala mopinda aka’ la ungngängkä’ Änä’na mendahi Handang Pongkahana Imang. Anna inde Änä’na dianto To Pepasalama’ ang sundung lambi’ sapano-panona.

¹ Dianto indee pungngu’ tannunna karangku: Aha kita’a’ mesa Handang Pongkahana Imang ang inang noa ang mohko’mi di tando kuananna Puang Alataala To Matande yaho di suruka. ² Yahontoo ungkähäng pengkähänganna yaling di Tambing Handang Masero yaling di Bansuli Masero. Inde bansuli dianto Bansuli Masero ang setonganna yaho di suruka, ang napake’de’ Puang Alataala, tadia hupatau. ³ Ang dioaintee handang pongkahana imang pahallu si umpopenombaing penombaanna petauanna Dehata sibaha penombaang ang senga’. Noa tunne’ Handang Pongkahana Imang ang tahannuang pahallu toe’ umpopenomba penombaang, dianto Kalaena. ⁴ Naonge anna dinnei di lino Puang Yesus, ya’ daine’ mendahi imang aka’ inang ahake’ imang ang si umpopenomba penombaang ang situhu’ atohang ada’ Yahudi ang nauki’ Nabi Musa. ⁵ Sika mengkähäng yaling di mesa ongeang menomba ang mala dioatee sihapang "kalihayona supu" yato Bansuli Masero ang setonganna yaho di suruka. Aka’ dolu Musa, naonge mengei umpasadia aka-aka ang la napake umbabe Bansuli Masero, ya’ ma’tula’mi Puang Alataala naoaintee, "Kalehaii inde tula’ku: la pahalluo umpapia ingkänna aka-aka sinnoa siang yato kambara’ ang kupaitaio done inde di tanete." ⁶ Ampo’ pengkähänganna Puang Yesus londo puha nei’ andana pengkähänganna seimangang ang aha done di lino, aka’ Dianto ang umpamatoto’ pa’dandianna Puang Alataala pano di kita’. Anna inde pa’dandiang bakahu mahasa puha nei’ andana yato ang masae, aka’ mahasa puha nei’ yato ang la talambi’ situhu’ yato ang nadandiing. ⁷ Ke la sundummine’ yato pa’dandiang ang uhuna, ya’ dante’ pahallu la aha pa’dandiang sala bou ang la mambala’i. ⁸ Ampo’ Kalaena Puang Alataala mangnginsang pahallu la nabala’i aka’ kasalaanna petauanna, lambi’ naoatee, "La aha tempona la kuonge umpapia pa’dandiang bakahu pano di ingkänna to Yahudi, noa peänä’anna Yehuda, noa toi to Israel ang senga’nake’. ⁹ Inde pa’dandiang dai la sinnoa yato ang kupapia sibaha peneneanna dolu naonge kutehtei yaling mai di Bohto Mesir. Dai sika tontong untuhu’i yato pa’dandiangku, dahi kupengkebo’ing. ¹⁰ Ampo’ dianto indee pa’dandiang ang la kupapia sibaha petauangku to Israel di allo ang la sule: Atohangku la kupatama di pihki’naii, la kuuki’ asang tama di inahanna. La mendahiä’ Dehatannaii anna sika la mendahi petauangku. ¹¹ Anna dai la pahallu sika umpakuhu solana, datunne’ la pahallu umpakuhu solasohonna, naoatee, ’Pahalluo ungnginsang Puang Alataala,’ aka’ inang sika la nainsangngä’, moi ang saohko’, moi ang käyyäng. ¹² Donetoo la kuampungngi kasalaannaii, anna ingkänna dosanna dang la kukalehai." Noantoo Bahtakara Dehata. ¹³ Dahi, solasohong, ke natula’mi Puang Alataala mesa pa’dandiang bakahu, bahtuanna yato ang masae dang la kekuna, lambi’ dang dipake aka’ masaeng.

¹ Yaling di pa’dandianna Puang Alataala ang dolu pano di to Israel, aha atohang menomba anna aha toe’ ongeang menomba ang nababe to lino. ² Ongeang menomba disangai "Bansuli Masero." Yaling aha derua tambing. Ang uhuna sihapang kale yaling di mesa dasang, disangai "Tambing Masero." Dianto naonge aha pampaongeang lampu sibaha meja ang si dipampaongei roti masero. ³ Ang kaderuanna disangai "Tambing Handang Masero." Di alla’na yato derua tambing aha samping disapa’iing. ⁴ Yaling di Tambing Handang Masero aha pantunuang penombaang, bulahang dibabe naongei si dipantunui kayu-kayu bomammi’. Aha toe’ pahti ang kayu dipapia mane dilapi’i bulahang, disanga "Pahti Pa’dandiang." Yaling yatoo aha dehpa ’manna’ ang puha dipatama di mesa paongeang bulahang, huntunna ta Harun ang mentahe’mi anna yato derua batu lohpä’ ang dipangnguki’i yato Sampulo Atohanna Puang Alataala. ⁵ Yaho di tutu’na Pahti Pa’dandiang aha derua kerub ang bulahang dibabe. Pani’na untu’dungngi ang disanga "Ohko’ang Pa’kalemunna Puang Alataala" yaho di tutu’na. Ampo’ ingkänna indee dake’ mala dipakaleso asang dinoa. ⁶ Noanto umba noa diäto’ dolu yaling yato di Bansuli Masero. Pihsananna allo-allo si mentamang imang biasa yato di tambing ang uhuna la mengkähäng yaling. ⁷ Ampo’ mesa supu ang la mala mentama di tambing kaderuanna, dianto handang pongkahana imang. Pihsang supu sahtaung si napentama anna dai mala mentama ke dai umbaha haha. Haha yatoo dianto hahana patuhoang ang natunu umbaya’ dosa kalaena sibaha dosanna tau ang dai sika naangka’i. ⁸ Ungngolai inde ada’ napakuhuingkea’ Inaha Masero naoatee dake’ tibuhke lalang lutama di Tambing Handang Masero ponna ke tontongke’ yato tambing ang uhuna di hao di olona. ⁹ Ingkänna yatoo mesa bou pohapangang pano di kita’ ang tuho dinoa. Bahtuanna daingkea’ mala umpamasero inahanta di olona Puang Alataala aka’ untunu patuhoang sibaha popenombaang senga’. ¹⁰ Aka’ ingkänna yato peada’ang ang noa unghoa supu bätäng puntinta, noanna pemali pano di enu’ anna andeang, bahtu’ atohang pano di mendeä’ anna mambase. Anna supung la tontong lambi’ tempona Puang Alataala mebea pa’dandiang bakahu. ¹¹ Ampo’ suleng pole’ Kristus sihapang Handang Pongkahana Imang ang mebahaing yato kamasahkeang ang ahang dinoa. Mentamang di Bansuli Masero ang aha yaho di suruka, ang mahasa anna masero puha andana yato ang napake’de’ Nabi Musa dolu. Aka’ yato ang napentamang dinoa Kristus tadia pampapianna hupatau, bahtuanna dai yaling mai inde di lino. ¹² Mentamang di Tambing Handang Masero tahhi’ lambi’ pano di olona Puang Alataala. Anna yato haha ang nabaha, tadiane’ hahana beke bahtu’ änä’ saping, ampo’ umbahane’ haha Kalaena. Anna pihsanne’ supu mentama, dai pahallu napa’sule-sulei, aka’ ungngolai yato hahana ang nabaha, ya’ nasulängngimingkea’ di hao mai di dosanta lambi’ sapano-panona. ¹³ Situhu’ Atohanna Nabi Musa, tau ang diangka’ kekasalaang pahallu dipamasero ungngolai popenombaang. Natahpi’ hahana beke bahtu’ saping laki, mane napalolaii täi hapunna änä’ saping ang puha ditunu. Puhai yatoo, ya’ diangka’mi masero situhu’ peada’ang mentolinona. ¹⁴ Dahi, ponna yato hahana patuhoang mala umpamasero tau, ya’ la’bi puhake’ne’ hahana Kristus! Yaling yato di hahana mala napamaseroingkea’ di hao mai di pembabe karaketa ang mebaha pano di kamateang, anna malai menombaingkea’ dai’ di Puang Alataala ang tuho. Aka’ ungngolai Inaha Masero ang ma’kuasa sapano-panona, umbehong Kalaena Puang Yesus dai’ di Puang Alataala mendahi popenombaang ang sundung umbaya’ dosantaa’. ¹⁵ Naonge anna tontongke’ pa’dandiang ang uhuna, ya’ natehkai hupatau yato atohang. Dianto Kristus anna matei unsulängngi hupatau di hao mai di pantehkainna anna mendahi to dialla’ ang mebahaing mesa pa’dandiang ang bakahu di alla’na Puang Alataala anna hupatau. Napanoa anna malai ingkänna tau ang natambai Puang Alataala ullambi’ mana’na ang lambi’ sapano-panona ang nadandiing Puang Alataala pano. ¹⁶ Ponna ke la ahai mana’, ya’ pahallu toe’ aha buhtinna ang naoatee matente’ yato tau ang mammana’. ¹⁷ Aka’ suha’ mana’ dake’ kekuna ke tuhoke’ yato tau ang mambabe; supung kekuna ke mateng yato tau. ¹⁸ Noa tunne’ yato pa’dandiang ang uhuna ang nabaha Nabi Musa napamatoto’ toe’ umpake hahana patuhoang ang dipopenomba. Noa indee lalanna: ¹⁹ Puhanna napepainsanging Nabi Musa yato ingkänna pahenta ang aha tiuki’ yaling di Atohang, ya’ ungngalang hahana änä’ saping anna hahana beke laki, mane napasihau-haui uhai. Pihsananna ungngalang lohpo hisop ang hali naba’ba’ bulu domba ang namaleai, mane natomme’i naung yato di haha anna natahpi’ing yato suha’ Atohang anna ingkänna tau. ²⁰ Lella’ yato nababe naoantee, "Dianto indee haha ang umpamatoto’ pa’dandianna Puang Alataala pano di dioa’ ang pahallu la untuhu’i." ²¹ Noa tung nei’ Musa untahpi’ Bansuli Masero sibaha ingkänna pangkahka’ maserona umpake yato haha. ²² Mala dioatee, situhu’ Atohanna Musa, sai’di’ tala dipamasero asang umpake haha. Ponna ke dai aha haha titollo, ya’ dai mala la diampungngi dosa. ²³ Yato Bansuli Masero ang dolu di lino, sibaha ingkänna pangkahka’na, dianto pohapanganna supu ingkänna aka-aka ang aha yaho di suruka. Pahallu dipamasero umpake hahana patuhoang ang dipopenomba. Ampo’ yatone’ ingkänna aka-aka ang yaho di suruka pahallu aha popenombaang ang mahasa puha. ²⁴ Aka’ Kristus dai mentama di Bansuli Masero ang napapia hupatau, ang napasihapang supu Bansuli Masero ang si’danna. Dai, ampo’ mentamane’ di suruka anna dinoa napa’tula’mingkea’ di olona Puang Alataala. ²⁵ Yaling di peada’anna to Yahudi yato handang pongkahana imang si mentama yato di Tambing Handang Masero pihsang sahtaung umbaha hahana patuhoang. Ampo’ Puang Yesus Kristus daine’ napa’sule-sulei mentama umpopenomba Kalaena. ²⁶ Aka’ ponna noa, ya’ mengkalao di pampahandu’anna lino pemmai’ding ungngola kamadahhaang lambi’ mate. Ampo’ dinoa, yaling di tempo ang madungku’mi pano di Allo Pampahehsaang, umpalanda’mi Kalaena Kristus pihsang supu anna malai dosanna hupatau napa’dai aka’ umbeho Kalaena dipatei. ²⁷ Puha napama’tantu Puang Alataala naoatee ingkänna tau pihsang supu mate mane napahehsai. ²⁸ Noa tunne’ Kristus, pihsang supu mate mendahi popenombaang ang la umpa’dai dosanna tau mai’di. La sumule bou tama inde di lino, tadia aka’ dosanta, ampo’ anna malai umbaha kasalama’ang pano di tau ang mangngempei kasuleanna.

¹ Yato Atohang ang napepainsangnging Nabi Musa noa supu kambara’na bahtu’ kalihayona ingkänna kamasahkeang ang la sule aka’ Puang Yesus. Situhu’ yato Atohanna Musa taung boitoo ingkänna tau ang pemala undungku’i Puang Alataala umbaha popenombaang ang noa lolo, ampo’ dasiang mala mendahi maroho ungngolai yato popenombaannaii. ² Yato ingkänna tau, ponna ke malai mendahi maroho noa, ya’ inang la naboling umbaha yato popenombaannaii. Aka’ la nainsang naoatee ingkänna dosanna puhang diampungngi, lambi’ sika la nasa’ding tama di inahanna naoatee dang kekasalaang. ³ Ampo’ setonganna daete’ noa. Aka’ mengkalao yato penombaannaii taung boi anna taung boi nakalehai lolo naoatee, "To madosaä’." ⁴ Aka’ hahana saping anna beke inang dai mala umpa’dai dosa. ⁵ Dianto anna Kristus, naonge anna mentamai inde di lino, ma’kara dai’ di Puang Alataala naoatee, "Dai ungkärä’i ma’kahupa-hupa penombaang, ampo’ moinnakato noa, umpatoka bätäng puntingku ang la mendahi penombaang. ⁶ Dai ungkärä’i penombaang metunu bahtu’ penombaang hahana patuhoang ang la umbaya’ kasalaang, ⁷ Dahi kuoatee, ’Suleä’ umpembabeing pa’elo’mu, O Dehatangku, sinnoa ang tiuki’ lohpo’ didiona Kalaeku yaling di Suha’ Masero.’ " ⁸ Naoante Puang Yesus, "Dai ungkärä’i ma’kahupa-hupa penombaang. Dai ungkärä’i penombaang metunu bahtu’ penombaang hahana patuhoang ang la umbaya’ kasalaang," moinnakato anna ingkänna yatoo pahallu situhu’ Atohanna Musa. ⁹ Pihsananna naoa buntee, "Suleä’ umpembabeing pa’elo’mu, O Dehatangku." Dahi napa’dai Puang Alataala yato ingkänna penombaang masae, anna nabala’i pole’ penombaanna Puang Yesus. ¹⁰ Anna inang Puang Yesus Kristus umpembabeming pa’elo’na Puang Alataala lambi’ umpopenomba pihsang Kalaena anna malaingkea’ masero lambi’ sapano-panona. ¹¹ Yaling di peada’anna to Yahudi, allo-allo si ke’de’ imang anna umbabe popenombaang napa’sule-sulei ang inang dai mala umpa’dai dosa. ¹² Ampo’ Puang Yesus, ang mendahi Handang Pongkahana Imang, umpopenomba Kalaena aka’ dosanta, ang pihsang liu supu nababe anna sihoang lambi’ sapano-panona. Puhai yatoo, dai’mi di suruka anna mohko’i yaho di tando kuananna Puang Alataala. ¹³ Dinoa lella’mi mangngempe lambi’ ingkänna balinna dipadihoi’ing di pengngindä’anna. ¹⁴ Dahi aka’ yato mesa popenombaang, napamaseromingkea’ di hao mai di dosanta anna napamarohoingkea’ di olona Puang Alataala, lambi’ dang aha takalala’i lambi’ sapano-panona. ¹⁵ Anna nasa’bii toe’ Inaha Masero didiona inde kaha-kaha, naoatee, ¹⁶ "Dianto indee pa’dandiang bakahu ang la kubabe sibaha petauangku di allo ang la sule: Atohangku la kupatama di pihki’naii, la kuuki’ asang tama di inahanna." Noantoo Bahtakaranna Puang Alataala. ¹⁷ Mane naoaitee, "Kasalaannaii anna ingkänna dosanna dang la kukalehai." ¹⁸ Dahi ponna ke inang diampungnging dosanta anna kasalaanta, ya’ dang pahallu la aha penombaang senga’na. ¹⁹ Oa’ solasohong, sinnoa mesa handang pongkahana imang mala mentama di Tambing Handang Masero aka’ yato haha ang nabaha, noa tunne’ kita’ malang pole’ beba’ undungku’i Puang Alataala aka’ hahana Puang Yesus ang titollo naonge matei. ²⁰ Dianto indee lalang bakahu ang mepatuho ang nabuhkei Puang Yesus Kristus! Dinoa tibuhkeng pole’ pesapa’na Tambing Handang Masero yaho di suruka ang la diola tama. Aka’ yato pesapa’ mesa tunne’ pohapanganna Kalaena Puang Yesus. ²¹ Dianto ang mendahi Handang Pongkahana Imang ang umpahenta ingkänna petauanna Puang Alataala. ²² Dahi maimokoa’ mendungku’ pano di Puang Alataala sitonda unnä’ inaha anna kapampetahpa’ang matoto’, aka’ Puang Yesus puha umpamasero inahanta umpake hahana lambi’ tainsang taoatee dang aha kasalaanta. Anna haliingke nadio’ uhai ang mendahi tanda kabahahsianta. ²³ La hannu loloingkea’ pano di Puang Yesus, anna daingkea’ mahea’ taakui taoatee dianto Dehatanta, aka’ inang Puang Alataala la umpasundung pa’dandianna pano di kita’a’. ²⁴ Pahallu umpihki’ toingkea’ne’ solata anna sidulu-duluiingkea’ mesa anna mesa umpalanda’ pa’kalemu anna pembabe mapia. ²⁵ Daa tabolii ma’himpung sibaha-baha, sinnoa ang nababe piha tau. Ampo’ diare’ pahalluingkea’ tontong sipakaenga’ mesa anna mesa. Anna tuhtuang la tapanoa lolo aka’ tuhtuang madungku’mi allo kasuleanna Puang. ²⁶ Oa’ solasohong, ponna ke taangka’i umbabe lolo dosa puhanna tatahimbo anna tainsang yato kaheba katahpa’ang, ya’ dang la aha popenombaang ang la mala mansulängngiingkea’ di hao mai di dosa. ²⁷ Ponna ke noai pengkerota, ya’ inang la mahea’ingkea’ ungngempei pampahehsaanna Puang Alataala, aka’ tahungkung ang la nalambi’ balinna Puang Alataala dianto api ang meleä’-leä’. ²⁸ Dolu tau ang dai naaku untuhu’i Atohanna Musa tahpa ditahungkung mate ahsala’ ahai deruaraka bahtu’ talluraka ang mantanda’. ²⁹ Londo puhane’ la makahha’ tahungkunna pano di tau ang hali umpellei kapampetahpa’anna pano di Puang Yesus! Aka’ tau ang noa yatoo sinnoa nei’ untehkai Änä’na Puang Alataala. Sika nasanga dai kekuna yato hahana Puang Yesus, ang setonganna umpamatoto’ pa’dandianna Puang Alataala anna mepamasero! Sika ungkebo’i Inaha Masero ang nabeaingkea’ Puang Alataala aka’ mana’ pa’kalemunna. ³⁰ Dahi solasohong, daumpellei kapampetahpa’ammu, aka’ tainsang yato karanna Puang Alataala ang naoatee, "Kodi’mito ang mambala’! Kodi’mito ang mantahungkung!" Anna naoa toe’tee, "Puang Alataala la umpahehsa petauanna." ³¹ Tau ang noa kasalaanna la mahea’ liu ke la napahehsang Puang Alataala ang tuho lolo. ³² Daungkalimpängngii naonge anna mane untahimbokoa’ kaheba katahpa’ang ang umballoi katuhoammu. Donetoo mai’di kamadahhaang ang manghoakoa’, ampo’ moinnakato noa umpatontongnga’ kapampetahpa’ammu. ³³ Si aha tempona dipakauho-uhokoa’ di olona tau mai’di, anna aha toi tempona si unduluikoa’ solamu ang madahha noa. ³⁴ Si ungkarota’ia’ tau ang ditahungkung aka’ kapampetahpa’anna, anna naonge dihampa’ikoa’ ingkänna aka-akammu, ya’ daia’ unsa’ding maaka aka’ ungnginsangnga’ ungngoatee ungngampui ang mahasa puha ang la tontong lambi’ sapano-panona. ³⁵ Dahi daumpabeii pa’da yato kapampetahpa’ammu dolu ang matoto’ si’da-si’da. Aka’ ponna ke tontongkoa’ mampetahpa’, la ullolongangkoa’ ang mahahsa’. ³⁶ Pahallua’ tontong lolo umpembabeing pangngelo’na Puang Alataala sitonda kasa’bara’ang anna malai untahimbokoa’ yato ang nadandiingkoa’ mating. ³⁷ Aka’ sämpäi’dang supu anna dahing aka ang tiuki’ yaling di Suha’ Masero naoatee, "Dianto ang la sule inang la sule, dang aha ang la mangkalapai kasuleanna. ³⁸ Tau ang maroho di oloku la tuho mapia aka’ kapampetahpa’anna, ampo’ daliune’ kukärä’i tau ang ungkebo’i kapampetahpa’anna." ³⁹ Ampo’ kita’, solasohong, tadiaingkea’ tau ang ungkebo’i kapampetahpa’anta lambi’ ditahungkung. Kita’mia’too ang mampetahpa’ lambi’ dipasalama’.

¹ Aka ang dioaintee kapampetahpa’ang? Bahtuanna: yato ang tahannuang yaho mai di Puang Alataala, tapetahpa’ taoatee inang la dahi. Moinnakato anna dake’ taita yato ang taempei, ampo’ matohong yaling di inahanta taoatee inang ahang. ² Aka’ kapampetahpa’anna, sangngaka-sangngaka peneneanna to Yahudi dolu umpamasannang Puang Alataala. ³ Aka’ kapampetahpa’anta, lambi’ tainsang taoatee naonge Puang Alataala umpapia langi’ anna lino, ya’ ma’kara supu anna dahing. Dahi ingkänna ang taita dinoa napapia mengkalao yato ang dai mala diita. ⁴ Aka’ kapampetahpa’anna ta Habel, lambi’ umpopenomba mesa penombaang ang mahasa puha andana penombaanna kakana, dianto ta Kain. Tainsammi taoatee mampetahpa’, aka’ natahimbong Puang Alataala yato penombaanna ta Habel, anna aka’ yato kapampetahpa’anna lambi’ naangka’ marohong Puang Alataala. Mateng pole’ ta Habel, ampo’ yato kapampetahpa’anna napakalehakingkea’ lambi’ dinoa. ⁵ Aka’ kapampetahpa’anna ta Henokh daine’ mate, bilang tahpa tiängkä’ yaling mai di lino. Dai aha tau mallambi’ aka’ naängkä’ Puang Alataala yaling mai di lino. Aka’ naonge anna dake’ tiängkä’, ya’ dipakeangka’mi sihapang mesa ang umpamasannang Puang Alataala. ⁶ Anna ke dai aha kapampetahpa’ang, ya’ dai tau mala umpamasannang Puang Alataala. Aka’ ingkänna tau ang pemala mendungku’ pano, pahallu napetahpa’ naoatee Puang Alataala inang ahang, anna inang umbehe tau dia siamo ang mampeäng sitonda sangkalebu inahanna. ⁷ Aka’ kapampetahpa’anna Nabi Nuh, lambi’ untuhu’i pahentana Puang Alataala. Aka’ inang puha napa’karai Puang Alataala pano naoaintee: la aha sompo’ le’bo’ ang la untallangngi lino. Dahi moinnakato anna dake’ aha naita yato ang la dahi, ampo’ untuhu’i pahentana Puang Alataala lambi’ umpapia kahpala’ käyyäng anna dai mala limmi’ sanghapunna. Aka’ yato kapampetahpa’anna lambi’ maroho nei’ di olona Puang Alataala, ampo’ yato ingkänna tau di lino ditahungkung nei’. ⁸ Aka’ kapampetahpa’anna Abraham lambi’ untuhu’i toe’ pahentana Puang Alataala. Natambai Puang Alataala anna nasuoi le’ba’ pano di bohto makahao ang la natahimbo dako’ mendahi mana’na. Dahi moinnakato anna dake’ nainsang yato ongeang ang la naongei, ampo’ untuhu’i tomande’ nei’ pahentana Puang Alataala. ⁹ Aka’ kapampetahpa’anna lambi’ mebansuli leleng sihapang to sule yato di bohto ang nadandiing Puang Alataala. Noa tunne’ Ishak änä’na anna Yakub ampona ang untahimbo toe’ yato pa’dandianna Puang Alataala sinnoa Abraham. ¹⁰ Mebansuli Abraham aka’ ungngempei bohto ang la napahtuyu anna napake’de’ing Puang Alataala, mesa bohto ang dibatui matoto’ anna la lambi’ sapano-panona. ¹¹ Aka’ kapampetahpa’annaii lambi’ Abraham anna Sara mala umpadahi mesa änä’, moinnakato anna matuang Abraham anna Sara tamänäng toe’. Mala aka’ nainsang naoatee Puang Alataala ang puha ma’dandi mala dipetahpa’. ¹² Donetoo bätäng puntinna Abraham matua liung, noa ang la mateng. Ampo’ mengkalao inde mesa tau, mai’di liu peänä’anna, noa bintäng yaho di langi’ bahtu’ sama mai’dinna bunging di behing le’bo’. ¹³ Ingkänna yato tau tontong mampetahpa’ lambi’ matena. Donetoo dake’ sika ullambi’ yato ang didandiing, supung nainsang naoatee la masae mane dipasundungngii. Mala dioatee sika naita makahao anna masannang naoate la dipasundung dako’, aka’ unghekeng supu to sule kalaenaii ang lempäng sämpäi’ done inde di lino. ¹⁴ Tau ang ma’pihki’ noa yatoo maleso anna umpeängngi bohto ang la mala naongei tohho. ¹⁵ Tadia bohto ang puha napengkalaoi napeäng, aka’ ponna ke noai, ya’ mala sika sumule. ¹⁶ Ampo’ yato ang napeäng dianto suruka, mesa bohto ang mahasa puha nei’. Dianto Puang Alataala anna dai masili sika nasangai Dehatanna, aka’ umpapiaing mesa bohto ang la naonge sika tohho yaho di suruka. ¹⁷ - ¹⁸ Aka’ kapampetahpa’anna Abraham lambi’ la umpopenomba Ishak änä’na, naonge anna nasändä’i Puang Alataala kapampetahpa’anna. Naoamintee Puang Alataala, "Mengkalao yato di änä’mu la aha mai’di liu peänä’ammu sinnoa yato ang puha kudandiingko." Ampo’ moinnakato noa, ya’ sadiake’ Abraham la umbeho yato änä’ samboana la ditunu. ¹⁹ Aka’ naoate inahanna Abraham, ma’kuasa Puang Alataala lambi’ mala la umpatuho sumule Ishak di hoi’ mai di kamateang. Ampo’ setonganna malang dioatee, sinnoa ang ungngalang sumule änä’na di hoi’ mai di kamateang. ²⁰ Aka’ kapampetahpa’anna Ishak lambi’ umbehe yato derua änä’na, Yakub anna Esau anna untula’ lohpo’ yato ang la dahi di allo ang la sule. ²¹ Aka’ kapampetahpa’anna Yakub naonge anna la mateng, lambi’ umbehe yato derua ampona, änä’na Yusuf, anna menomba dai’ di Puang Alataala mengngohho’ pano di huntunna aka’ matua liung. ²² Aka’ kapampetahpa’anna Yusuf naonge anna la pohsu’i penanahanna, lambi’ untula’ lohpo’ kamalaianna to Israel yaling mai di Mesir. Tandana nainsang naoatee la dahi si’da, ya’ nasuo sika umbaha bukunna ke la sika malaing. ²³ Aka’ kapampetahpa’anna to baha’na Musa, lambi’ umbuni yato änä’na tallu bulanna puhanna dahi. Naita naoatee tadia änä’ biasa anna dai sika mahea’ untehkai pahentana tomaraya Mesir. ²⁴ Aka’ kapampetahpa’anna Nabi Musa tahpana lobo’, lambi’ dai naaku disangai ampona tomaraya Mesir. ²⁵ Naaku puhane’ madahha sibaha petauanna Puang Alataala andana tuho masannang sängkä yaling di kamadosaang. ²⁶ Nasanga dotanne’ dipakauho-uho aka’ mampetahpa’ pano di To Dilanti’ la Mepasalama’ ang la sule, andana untombong kulle di hao di Mesir, aka’ napemitai yato ang la natahimbo dako’ aka’ kapampetahpa’anna. ²⁷ Aka’ kapampetahpa’anna, lambi’ inde Musa malai yaling mai di Mesir, dai ungkahea’ kakeaha’anna tomaraya. Napatahhi’ pellaoanna, dai unsaile kebo’na, aka’ sinnoang ang ungngitang Puang Alataala ang dai landa’. ²⁸ Aka’ kapampetahpa’anna Musa lambi’ umpahentang to Israel umpaaha pa’rame-rameang Paska. Pahallu sika untahpi’ haha babana dasannaii anna malai änä’ uluanaii dai napatei yato malaeka’ ang umbaha kamateang. ²⁹ Aka’ kapampetahpa’anna to Israel dolu, lambi’ sika ullambang Le’bo’ Malea sihapang mellao di kalantanang, ampo’ tahpana nasändä’ toe’ to Mesir, ya’ limmi’ nei’. ³⁰ Aka’ kapampetahpa’anna lambi’ inde to Israel ungkulilingngi Bohto Yerikho pitu allona, lambi’ ingkänna hala tembo’na yato bohto pihsa’ titale-tale. ³¹ Aka’ kapampetahpa’anna ta Rahab, mesa pahsundala’ di hao di Yerikho, lambi’ daine’ dipatei naonge anna tallangngi ingkänna sola bohtona. Aka’ supung inde ta Rahab ang tuhu’-tuhu’ang dai’ di Puang Alataala, lambi’ untosule manahpa mata-matanna to Israel. ³² Akake’ ang pahallu kuoa? Aka’ la masae maho ke la kutula’ toinne’ tohodolunna kapampetahpa’anna ta Gideon, ta Barak, ta Simson, ta Yefta, Tomaraya Daud, Nabi Samuel anna senabiang senga’nake’. ³³ Aka’ kapampetahpa’anna, lambi’: Sika untalo sangngaka-sangngaka bohto ang ketomaraya. Sika ma’pahenta maroho, lambi’ sika untahimbo aka yato ang nadandiing Puang Alataala. Sika natutu’ing Puang Alataala suana yato singa. ³⁴ Dai sika mate naonge anna dipatamai di api. Dai sika mate naonge anna nalolai to popa’dang. Moi malamma ampo’ mendahi matoho. Sika bahani yaling di pa’tolla’ang. Sika untalo tantarana balinna. ³⁵ Aka’ kapampetahpa’anna, lambi’ aha bahine ang dang masuhsa, aka’ yato solasohonna ang hali mate dipatuhong sumule. Ampo’ ahane’ tau ang naaku didahha lambi’ mate aka’ kapampetahpa’anna. Tau ang noa yatoo hannu la untahimbo katuhoang ang mahasa puha nei’ naonge ke dipatuhong sumule. ³⁶ Aha piha ang dipakauho-uho anna dipohetong, aha toi ang disangke’ anna dipatamai di tahungkung. ³⁷ Ahake’ piha ang disaleba’i batu lambi’ mate; aha ang disasa’ diperedua; aha toi ang dipatei umpake pa’dang. Sika mekaya’ lollo’ olo’-olo’ tandana memase-mase anna didahhai unsamba kalane. ³⁸ Sika mengkaala pano di ongeang makä’däng, dai’ di tanete, membuni tama di leäng anna naung di kahoäng. Setonganna inde lino ongeang ang dai sihatang pano diii. ³⁹ Ingkänna yato tau umpamasannang Puang Alataala aka’ kapampetahpa’annaii. Ampo’ dai tahhi’ sika untahimbo yato ingkänna ang nadandiing Puang Alataala. ⁴⁰ Ampo’ suhunna anna dai sika tahhi’ natahimbo, aka’ aha pahtuyunna Puang Alataala pano di kita’a’ sibaha-baha ang mahasa puha nei’. Pahtuyunna dianto supung la mala ke sibaha-bahamingkea’ mane tatahimboia’ yato kamapiaang ang sundung lambi’ sapano-panona.

¹ Oa’ solasohong, ingkänna yato ang mampetahpa’ dolu mendahi sa’bi di behinta umpamatoto’ kapampetahpa’anta. Dahi, aka’ kasa’biannaii, kupakaenga’koa’ kuoatee: Tatibei ingkänna aka-aka bahtu’ kaha-kaha ang mangkalapaiingkea’. Tatibei yato dosanta ang si yaling lolo di kalaeta. Anna pahalluingke tontong lolo yaling di lalang ang puha napama’tantuingkea’ Puang Alataala, sinnoa tau ang ma’silumba lumumpa’. ² Pahalluingkea’ untindo’ lolo Puang Yesus ang umpaaha anna umpasundung kapampetahpa’anta. Naaku ungngolai kamateang yaho di kayu sitambeng aka’ umpihki’ yato kakahsiang ang la nalambi’ ke dako’mi, moinnakato kamateang ang noa yatoo mepakasili. Dinoa nalambi’mi pole’ aka’ mohko’mi yaho di ongeang kakeangka’ang tando kuananna Puang Alataala yaho di suruka. ³ - ⁴ Masuhsa liu yato kamadahhaang ang naolai Puang Yesus naonge anna napa’balii mai’di to madosa. Didionaa’ dio solasohong, aha tungnga’ dio balimmu, ampo’ yaling untolla’ kamadosaang dakangkoa’ aha dipatei sinnoa Puang Yesus. Dahi pihki’ liui inde Puang Yesus anna daia’ malamma inahammu lambi’ umpelleikoa’ kapampetahpa’ammu. ⁵ Anna daungkalimpängngii pepakuhunna Suha’ Masero naonge anna napa’karaikoa’ Puang Alataala sihapang änä’na naoatee, "O änä’ku, padiinahammui pepakuhunna Dehata, anna daumpamasuhsai inahammu ke lella’i nakambahoingko, ⁶ aka’ nakambahoing Dehata ingkänna ang nakalemui, anna natahungkung ingkänna ang naangka’ änä’na." ⁷ Pahallukoa’ sa’bara’ ungngolai kamasuhsaang. Pasihapangngi pepakuhunna bahtu’ pebambana Ambemu yaho di suruka, aka’ nakambahoingkoa’ Puang Alataala sinnoa mesa ambe ungkambahoing änä’na. Aka’ daete’ aha änä’ ang dai nakambahoing bahtu’ nabamba ambena. ⁸ Ingkänna tau ang napoänä’ Puang Alataala nakambahoing. Dahi ponna ke dao nakambahoing Puang Alataala, bahtuanna tadiao änä’na si’da. ⁹ Moi ambeta yaling inde di lino mangkambahomingkea’ anna tapakeangka’ liu. Dahi londo puha nei’ Ambena sungnga’ta. Ponna ke nakambahoingkea’, ya’ la tuhu’-tuhu’angngingke anna malai tatahimbo katuhoang ang lambi’ sapano-panona. ¹⁰ Tobaha’ta done inde di lino nakambahoingkea’ yaling di sangngaka-sangngaka pahiama supu, situhu’ aka ang nasa’ding mahasa. Ampo’ Puang Alataala nei’ nakambahoingkea’ situhu’ ang nainsang ang la handang mahasa pano di kalaeta, anna malaingkea’ mendahi masero sinnoa Kalaena. ¹¹ Ponna ke lella’i nakambahoingkea’ anna tasa’dingngi pebambana, ya’ daliuingkea’ masannang anna mapi’di’ inahanta. Ampo’ ke masae-saeng, ya’ ungkeboaming kamarohoang anna kamasahkeang yaling di katuhoanta aka’ puha taolai. ¹² Dahi, dakoa’ la malamma. Ampo’ diare’ pamatohoi kapampetahpa’ammu. ¹³ Anna pamarohoi lalang ang la ungngolai untuhu’i Puang Yesus anna malai solamu ang bata-batake’ inahanna dai la manaho, ampo’ la tuhtuang matoho kapampetahpa’anna. ¹⁴ Yaling di katuhoammua’ pengkabela-belaii sikapiai ingkänna tau. Anna poinahai tuho masero, aka’ dai tau mala ungngita Puang Alataala ke dai tau masero. ¹⁵ Dakaii andana ahai di alla’-alla’mua’ ang umpengkebo’i mana’ pa’kalemunna Puang Alataala. Daumpabeii la aha di alla’-alla’mu tau ang umpaaha kasibehtaang ang la untehte mai’di solamu pano di dosa. Aka’ tau ang noa sinnoa lohpo kehasung sinnoanna lelating ang si unsohe ingkänna ang mangnganti. ¹⁶ Dakaii andana ahai di alla’-alla’mu ang samangkamahoinna hapanganna ungngindä’-indä’ pa’bannetauang. Dakaii andana ahai ang mengkero tahuhu sinnoa ta Esau, aka’ dai umpakeangka’ behena Puang Alataala. Yato mana’na ang la dimana’ing aka’ änä’ ulua, nasapi’ supu mesa piring andeang! ¹⁷ Puhai yatoo, pemalake’ untahimbo yato mana’ di hao mai di ambena, ampo’ danne’ mala aka’ moinnakato anna napalaui napa’sule-sulei sitonda dumuseng, ampo’ tontong dang aha lalang ang la naola umpapia sumule yato aka ang puha nababe. ¹⁸ Dakoa’ dio aha umpellambi’i mesa tanete mentolinona ang mala dianti sinnoa ang napellambi’i to Israel dolu, dianto Tanete Sinai ang naonge sika ungngita api ma’nala-nala, kamalillingang anna pepahi käyyäng. ¹⁹ Tahpana sika unghingngi oninna terompe’ anna kamaha ang sinnoa kundäng, ya’ napalaung anna malai dang sika napa’tula’i bou, ²⁰ aka’ dai sika nabela umbulle yato pahenta ang nasanga matingngi ang naoatee, "Menna-menna ang untuli inde tanete, noa hupatau, noa patuhoang, la disaleba’i batu lambi’ mate." ²¹ Yato ang sika mangngoloi napakahea’i si’da-si’da. Moi Nabi Musa ma’tula’ naoatee, "Sikalalla’ä’ mahea’." ²² Ampo’ dioa’ solasohong, umpellambi’imokoa’ Tanete Sion, dianto Bohto Mahoa’ Yerusalem yaho di suruka, ang naonge tohho Puang Alataala ang tuho, anna ang naonge ma’himpung masannang ma’sa’bu-sa’bu malaeka’na. ²³ Sulemokoa’ umpellambi’i pa’himpunganna ingkänna änä’na Puang Alataala ang tiuki’ sanganna yaho di suruka, dianto ang la sihatang ullambi’ mana’ sinnoa ang nalambi’ änä’ ulua. Dinoa mentingngayomokoa’ pano di Puang Alataala ang la mampahehsa pembabena ingkänna tau. Anna ungngoloimokoa’ sungnga’na to disulängngi ang puha dipamaroho di olona Puang Alataala. ²⁴ Dinoa mentingngayomokoa’ pano di Puang Yesus, To dialla’, ang umpamatoto’ing pa’dandiang bakahunna Puang Alataala pano di hupatau. Anna ungngoloimokoa’ hahana Puang Yesus ang londo puha andana hahana ta Habel dolu aka’ napalaune’ Puang Yesus ke la malai dosanta diampungngi, dai la dibala’. ²⁵ Dianto anna pahallukoa’ madaka anna umpehingngii manahpai Puang Alataala ang mampa’karaikoa’ dinoa. Aka’ ponna yato to Israel dolu ditahungkung ke dai umpehingngii Nabi Musa dinne di lino, ya’ la matingngi puhane’ tahungkuntaa’ ke daingkea’ umpehingngii Puang Alataala ang mampa’karaiingkea’ yaho mai di suruka. ²⁶ Naonge anna ma’karai Puang Alataala yaho mai di Tanete Sinai, padanta’ lino napobua’ kamahanna. Ampo’ dinoa ma’dandi naoatee, "Tadia supu lino ang la kudanta’, ampo’ suruka tuke’ nei’." ²⁷ Bahtuanna indee: ingkänna ang napapia la padanta’ lambi’ pa’da. Pihsananna yato ang la lambi’ sapano-panona ang dai mala padanta’ dianto supu ang la tontong. ²⁸ Dahi solasohong, aka’ la mangngalatahaingkea’ yaling di Kapahentaanna Puang Alataala ang dai mala padanta’, ya’ pahalluingkea’ ma’kuhhu’sumanga’ anna menomba dai’ di Puang Alataala sitonda mahea’ aka’ dianto ang la mampamatande, ²⁹ aka’ inde Puang Alataala ang tapenombai sinnoa api ang mangngämpu’i.

¹ Patontongngia’ sikalemu-lemui mesa anna mesa ang sihatang pano di to pentindo’na Puang Yesus Kristus. ² Daummali’-mali’angngi umpotosule tau ang dake’ unsiinsangnging. Aka’ aha ang mampanoa, aka’ si ungkalemui tau, ampo’ setonganna tadia tau ang napotosule ampo’ malaeka’etee’! ³ Daungkalimpängngi solamu ang yaling di tahungkung, ampo’ pihki’i sihapang ditahungkung toukoa’ dio sibaha-baha. Kalemuii tau ang didahha aka’ kapampetahpa’anna, anna pihki’i sihapang didahha toukoa’ dio. ⁴ Pakeangka’koa’ kasialaang anna dauntehkaii. Aka’ ingkänna ang ungngindä’-indä’ pa’bannetauang, bahtu’ samangkamahoinna la natahungkung Puang Alataala. ⁵ Pakahaoi kamailuang di doi’, ampo’ diare’ masannangkoa’ yaling yato di ingkänna aka-akammu ang inang ahang. Aka’ ma’kara Puang Alataala naoatee, "Dakoa’ la kupellei, dakoa’ la kupabei kalala’." ⁶ Dahi malaingkea’ bahani lambi’ ma’tula’ taoatee, "Puang Alataalantoo ang mangkalemuiä’, dahi dä’ la mahea’ pano di tau. Aka’ aka ang la mala nababe hupatau pano di kalaeku?" ⁷ Daungkalimpängngi to pambahanammu ang mampainsangngikoa’ Bahtakara Dehata dolu. Padiinahammui umba noa pengkerona naonge tuhoi anna di tempona la mate, anna tindo’i yato kapampetahpa’annaii. ⁸ Puang Yesus Kristus daine’ mokarende-rende, ampo’ tontong lolo mengkalao dolu, moi dinoa, lambi’ sapano-panona. ⁹ Dauntuhu’i pepakuhu ang umpasähsä’ lalang tau di hao mai di lalang tahpa’. Aka’ kamatohoang inaha tatahimbo yaling di mana’ pa’kalemunna Puang Alataala, tadia yaling untuhu’i atohang pano di andeang. Aka’ atohang ang noa dai aha kunanna pano di tau ang mantuhu’i. ¹⁰ Ampo’ kita’-kita’ aha mesa pantunuang penombaang, ang mala taongei mangngala taha, ang daine’ mala naonge mande moi imang ang sule yaling mai di Bansuli Masero. ¹¹ Situhu’ peada’ang Yahudi, yato handang pongkahana imang si umbaha hahana patuhoang tama yato di Tambing Handang Masero ang la mendahi popenombaang aka’ dosa. Ampo’ yatone’ bahkena patuhoang ditunu nei’ tama di aneanna pebansuliang. ¹² Noa tunne’ Puang Yesus mate di aneanna Bohto Mahoa’ Yerusalem anna malai umpamasero tau di hao mai di dosa yaling yato di haha Kalaena. ¹³ Dahi, solasohong, sinnoa Puang Yesus umpellei bohto anna dipakauho-uhoi, pahallu toingkea’ kita’ umpellei pepakuhu senga’ anna untindo’ingkea’ supu Puang Yesus, moinnakato anna napakauho-uhoingkea’ tau. ¹⁴ Aka’ yaling inde di lino dai aha bohtota ang la tontong. Ampo’ bohtota yahoete’ di suruka ang la talambi’ dako’. ¹⁵ Ungngolai Puang Yesus ang ma’kadialla’, la tapatontong menomba dai’ di Puang Alataala. Yato penombaanta dianto tula’ta umpudi Puang Alataala ang la umpamatande sanganna. ¹⁶ Daia’ la taboli membabe mapia anna umbea aka siamo pano di tau ang kalala’, aka’ dianto ang umpamasannang Puang Alataala sinnoa penombaang. ¹⁷ Tuhu’i to pambahanammu anna umpembabeing pahentana, aka’ sika undakai bätäng sungnga’mu anna pahallu sika unghahpo’ yato pandakainna dai’ di Puang Alataala. Dahi tuhu’i anna malai sika masannang mengkähäng. Aka’ ke umpamapi’di’i inahannaii, ya’ dakoa’ la ullambi’ behe. ¹⁸ Kipalau la tontong unsambayangngiang. Aka’ kiinsang kioatee bahahsi inahangki’ aka’ yaling di ingkänna siamo pemala loloang la tuho maroho. ¹⁹ Kupalau si’da-si’da la unsambayangngiä’ anna malaä’ baha’ sumule mating. ²⁰ - ²¹ Anna kusambayangngikoa’ anna malai Puang Alataala umbeakoa’ ingkänna ang mapia lambi’ malakoa’ umpasundung pangngelo’na. Dianto ang umpatuho sumule Puang Yesus di hoi’ mai di alla’na to mate, naonge anna titolloi hahana umpamatoto’ pa’dandianna ang tontong sapano-panona. Inde Puang Yesus mangkambi’ingkea’ aka’ sihapangngingkea’ dombana. Ke la malai Puang Alataala la mengkähäng yaling di katuhoanta umpaaha yato ang napomasannang, ungngolai Puang Yesus Kristus, ang la dipamatande lambi’ sapano-panona. Aming. ²² Oa’ solasohong, kuhannuang la sa’bara’koa’ umpehingngii inde pepakahanga ang kuuki’ mating, aka’ kapo’de’ supu inde suha’ku. ²³ Anna malaia’ ungnginsang, solasohonta ta Timotius lahpa’mi pole’ di hao mai di tahungkung. Ponna ke baha’ sulei dinne, ya’ la naposolaiä’ mating. ²⁴ Palambi’ingkang salama’ki’ pano di ingkänna to pambahanammu sibaha ingkänna petauanna Puang Alataala diting. Salama’ toi are’ di hao mai di to Italia ang mampetahpa’. ²⁵ Puang Alataalarang ang la mambehekoa’ para-para.