Efesus

Efesus

¹ Pano di ingkänna petauanna Puang Alataala diting di Efesus ang tontong lolo mampetahpa’ yaling di Kristus Yesus. Hao mai di kodi’ Paulus, mesa touä’ kodi’ rasulna Kristus Yesus aka’ pangngelo’na Puang Alataala. ² Kuhannuang ke la malai Puang Alataala Ambetaa’ sibaha Puang Yesus Kristus Dehatanta la umbehekoa’ anna namana’koa’ kamasahkeang sibaha kamasannangang. ³ Dipudi sanganna Puang Alataala, Ambena Dehatanta Puang Yesus Kristus. Puhang nabeaingkea’ ingkänna pebehe mendehatanna yaho di suruka aka’ sangkalebumingkea’ Kristus. ⁴ Aka’ dake’ aha dipadahi inde lino anna puhamingkea’ napillei la mesa sibaha Puang Yesus Kristus anna malaingkea’ mendahi petauanna ang masero, lambi’ dang la aha kasalaanta. Aka’ pa’kalemunna Puang Alataala, ⁵ lambi’ puha napama’tantu mengkalao dolu naangka’ingkea’ mendahi änä’ Kalaena ungngolai pengkähänganna Puang Yesus Kristus aka’ ahana inang la nababe. ⁶ Dipudi Puang Alataala aka’ mana’ pa’kalemunna ang matande, dianto nakalemui liuingkea’ ungngolai pengkähänganna Änä’na ang napakamaya. ⁷ Aka’ titollo hahana Puang Yesus Kristus lambi’ nalahpa’ingkea’ Puang Alataala, bahtu’ dioatee ingkänna dosanta naampungngi. Nababe yatoo aka’ nakalemui si’da-si’daingkea’, ⁸ anna napapunnoi toingkea’ne’ kamanähängang anna kakeaka’ang. ⁹ Aka’ pangngelo’na Puang Alataala lambi’ napainsangngiingkea’ pahtuyu membuninna. Yato pahtuyu puhang nabohtu la napasundung yaling di pengkähänganna Kristus. ¹⁰ Ihsinna yato pahtuyunna dianto: ingkänna-ingkänna siamo, moi ang yaho di suruka anna moi ang yaling di lino, la napamesa yaling di Kapahentaanna Kristus. Kaha-kaha yatoo la napasundung Puang Alataala ke lambi’mi tempona. ¹¹ Ingkänna-ingkänna siamo nakähäng Puang Alataala situhu’ pahtuyunna. Dianto anna mengkalaoke’ dolu inang napilleimang situhu’ pangngelo’na la mendahi petauanna aka’ la sangkalebu tau yaling di Puang Yesus Kristus. ¹² Kami’ to Yahudi ang handang uhuna hannu pano di Puang Yesus Kristus, napilleiang anna malaang umpudi Puang Alataala ang matande. ¹³ Anna dioa’ ang tadia to Yahudi dipamesa tumokoa’ dio sibaha Puang Yesus Kristus naonge anna unghingngiia’ yato kaheba katahpa’ang, bahtu’ dioatee Kaheba Mapia ang mebaha pano di lalang kasalama’ang. Tahpana mampetahpa’mokoa’ pano di Puang Yesus Kristus, ya’ nabeamokoa’ Puang Alataala Inaha Maserona ang puha nadandiingkoa’. Yato Inaha Masero ang nabeakoa’, ya’ mendahi tanda yaling di kalaemu lambi’ diinsang dioatee mendahi tumokoa’ dio petauanna Puang Alataala. ¹⁴ Maleso toi dioatee dai mala tala tatahimbo asangnga’ aka-aka ang puha nadandiingkea’ Puang Alataala, aka’ kita’a’ petauanna nabeamingkea’ Inaha Maserona ang la mamposolaiingkea’ lambi’ tempona la napabeba’ingkea’ di hao mai di kakarakeang. Dahi la sihatangngingkea’ umpudi Puang Alataala ang matande. ¹⁵ Mengkalao donetoo anna kupelelei didiona kapampetahpa’ammua’ pano di Puang Yesus Dehatanta anna pa’kalemummua’ pano di ingkänna petauanna Puang Alataala, ¹⁶ ya’ ma’kuhhu’sumanga’ lolomä’ dai’ di Puang Alataala aka’ dioa’. Anna si kukalehai lolokoa’ yaling di sambayangku ke ma’sambayang bumä’, ¹⁷ aka’ kupalau anna malai Puang Alataala, Dehatanna Puang Yesus Kristus, bahtu’ dioatee Ambetaa’ To Handang Matande, la umbeakoa’ inaha ang punno kakeaka’ang anna kapainsangang didiona Kalaena lambi’ la ungkaleso manahpaa’ menna setonganna Puang Alataala. ¹⁸ Anna si kupalau tuke’ dai’ di Puang Alataala anna malai napamalesoingkoa’ yaling di pihki’mu, lambi’ la umpähäng manahpaa’ yato pebehe ang unghannuang la nabeakoa’, aka’ natambaimokoa’ mendahi petauanna. Anna la ungnginsang tuke’a’ ungngoatee yato pebehe ahana inang napatokaing Puang Alataala pano di petauanna; ¹⁹ anna la umpähäng toia’ ungngoatee, dai aha ang nasinnoaing kakuasaanna Puang Alataala ang mengkähäng yaling di kalaeta, ingkännaingkea’ to mampetahpa’. Yato kakuasaang ang mengkähäng yaling di kalaeta, dia tunto nei’ ang napake ²⁰ naonge umpatuhoi sumule Kristus di hoi’ mai di alla’na to mate, mane napaohko’i yaho di suruka di tando kuananna, dianto ongeang kakeangka’ang. ²¹ Kamatandeanna Puang Yesus Kristus matande puha nei’ andana kamatandeanna ingkänna to ma’pahenta, tomaraya anna ingkänna to ma’kuasa senga’. Anna noa toi kakuasaanna matande puha nei’ andana ingkänna kakuasaang ang mala ditula’, moi ang ahang dinoa, noa toi ang mane la aha di allo ang la sule. ²² Puang Alataala umpapatalo Puang Yesus Kristus yaling di ingkänna siamo. Anna naängkä’ la umpahenta ingkänna ang aha. Napanoa anna malai ungkalemui yato kakalebuanna to mampetahpa’. ²³ Kakalebuanna ingkänna to mampetahpa’ sihapang bätäng kalaena Puang Yesus Kristus. Anna yato bätäng kalae sangkalebung sibaha bää’ lambi’ sundung, anna Puang Yesus Kristusmitoo ang umpasundungngi ingkänna siamo.

¹ Dolu matekoa’ di mendehatanna aka’ madosakoa’ anna umbali Puang Alataala. ² Dianto ang si umbabea’ naonge anna si untuhu’ikangkoa’ kakarakeanna lino anna Pongkahana setang. Yato Pongkahana setang si ungkuasai ingkänna setang yaho di langi’ anna tontong lolo tuke’ dinoa ungkuasai inahanna ingkänna tau ang dai untuhu’i Puang Alataala. ³ Noa sia tumang kami’ dolu, si membabe touang kami’ situhu’ pampemala karakeki’ lambi’ moi aka la kibabe ahsala’ masannangngi inahangki’ anna bätäng puntingki’. Donetoo setonganna la sihatang touang kami’ napahoai aha’ käyyänna Puang Alataala, sinnoa yato tau senga’ ang dai mampetahpa’. ⁴ Ampo’ dai aha ullondoi pa’kalemunna Puang Alataala! Anna sundung yato pa’kalemunna pano di kita’ ⁵ lambi’ napatuhoingkea’ sumule sibaha Kristus moinnakato anna matekingkea’ di mendehatanna donetoo aka’ daingkea’ tuhu’-tuhu’ang. Pa’kalemunnantoo Puang Alataala lambi’ napasalama’mingkea’. ⁶ Anna kasikenteanta Kristus lambi’ napatuhoingkea’ sumule Puang Alataala sibaha Kristus Yesus di hoi’ mai di alla’na to mate anna napaohko’ingkea’ sibaha yaho di suruka yato di ongeang kamatandeang. ⁷ Napanoanto Puang Alataala anna malai di allo ang la sule la tandaang pa’kalemunna pano di kita’a’ yaling di kamapiaang inahanna aka’ kasikenteanta Kristus Yesus. ⁸ - ⁹ Aka’ pa’kalemunnanto Puang Alataala lambi’ napasalama’mokoa’ aka’ mampetahpa’koa’ pano di Puang Yesus Kristus. Tadia aka’ pembabe mapiammu lambi’ napasalama’koa’, ampo’ aka’ mana’ pa’kalemunna. Dahi dai aha mesa tau ang la mala mangngoatee, "Pembabekuntoo anna malaä’ salama’." ¹⁰ Aka’ kita’ indee dianto pampadahinna Puang Alataala. Ungngolai kasikenteanta Kristus Yesus lambi’ malaingkea’ umpembabeing ingkänna yato pembabe mapia ang puhaingkea’ napatoka lohpo’ing. ¹¹ Ingkämmua’ solasohongku ang inang tadia to Yahudi, naonge anna dakangkoa’ mampetahpa’ si naita-ita naungkoa’ to Yahudi, nasangaikoa’ "to taditille," bahtu’ dioatee "tadia petauanna Puang Alataala," aka’ sika unsangane’ kalaena "to ditille," aka’ dianto tanda ang nakähäng hupatau di hao kale di kalaena. Pahallua’ ungkalehai ungngoatee ¹² donetoo dakangkoa’ sikente Kristus, anna disangaikangkoa’ "tau senga’," tadia to Israel, petauanna Puang Alataala. Daia’ dio aha tahamu yaling yato di pa’dandiang ang nadandi Puang Alataala pano di petauanna. Daia’ dio la unghannuang anna dai aha kasikenteammua’ Puang Alataala, ampo’ tuho kalekoa’ dio yaling inde di lino. ¹³ Ampo’ dinoa, sikente tumokoa’ dio Kristus Yesus. Moinnakato dolunna anna sikahaoangkoa’ Puang Alataala, ampo’ dinoa sirungku’mokoa’ aka’ hahana Kristus ang titollo. ¹⁴ Aka’ Puang Yesus Kristusmitoo ang umpakapiaii alla’na to Yahudi anna tau ang tadia to Yahudi lambi’ ma’mesang pole’. Moinnakato anna sipa’balii dolu sihapang naalla’i hala batu, ampo’ puhang napa’dai Puang Yesus Kristus yaling di kamateanna. ¹⁵ Kamateannantoo lambi’ dang tau pahallu la untuhu’i yato ingkänna atohang anna pepaturu yaling di peada’anna to Yahudi. Napanoa anna malai to Yahudi sibaha tau ang tadia to Yahudi la mendahi mesa tau bakahu ang sangkalebu sibaha. Dianto lalang ang napake umpaaha kasikenteang mapia. ¹⁶ Kamateanna Puang Yesus Kristus yaho di kayu sitambeng umpamesa to Yahudi anna tau ang tadia to Yahudi, anna umpakapiai sumule kasikenteanna hupatau anna Puang Alataala lambi’ mapia liu. ¹⁷ Dianto anna suleng Puang Yesus Kristus napepainsangnging naoatee la mala dipakapiai sumule kasikenteanna hupatau anna Puang Alataala. Yatoo napainsangngi pano di dioa’ ang tadia to Yahudi, ang dolu diangka’ sikahaoang Puang Alataala, noa toi to Yahudi, ang diangka’ sirungku’ne’ Puang Alataala. ¹⁸ Aka’ supung ungngolai pengkähänganna Puang Yesus Kristus lambi’ malaingkea’ mengngolo di Ambeta, moi to Yahudi, moi tau ang tadia to Yahudi. Malaingkea’ sule di hao di olona ungngolai mesa Inaha Masero. ¹⁹ Dahi tadiamokoa’ pole’ tau senga’ bahtu’ to sule. Ampo’ dinoa mendahi asammokoa’ petauanna Puang Alataala, anna sanghapumokoa’ sibaha Puang Alataala. ²⁰ Kasikenteantaa’ to mampetahpa’ sihapang mesa dasang ang napake’de’ Puang Alataala di hahona ingkänna rasul sibaha nabi. Aka’ rasul sibaha nabi sihapang busung. Anna Kristus Yesus nei’, sihapang lapohki’. ²¹ Aka’ kasikenteanta Puang Yesus Kristus, lambi’ sangkalebumingkea’ sihapang dasang ang napake’de’ ang la mendahi ongeang maserona Puang Alataala. ²² Aka’ sikentekoa’ Puang Yesus Kristus dahi menge toukoa’ dio dipapia la mendahi ongeang ang la naonge tohho Inaha Maserona Puang Alataala.

¹ Aka’ ingkänna yato ang puha nababeingkoa’ Puang Alataala, lambi’ kodi’ Paulus, ang ditahungkung aka’ ungkähängngä’ pengkähänganna Kristus Yesus yaling kuduluikoa’ ingkämmu ang tadia to Yahudi, kusambayangngi lolokoa’. ² Tantunte’ anna ungnginsammia’ ungngoatee nakalemuiä’ Puang Alataala lambi’ nabeaä’ inde pengkähängang anna malakoa’ kudului. ³ Aka’ napalosaiä’ pahtuyu membuninna Puang Alataala, lambi’ kuinsang. Anna didiona inde kaha-kaha, ya’ puhang kuuki’ sai’di’. ⁴ Ponna ke umbatangnga’, ya’ la ungnginsammia’ pole’ ungngoatee kukalesong anna kupähämmi yato kara membuninna didiona Kristus. ⁵ Dolu yato pahtuyu nabunike’, dake’ aha napepainsangnging pano di hupatau. Ampo’ dinoa napepainsamming pole’ Inaha Maserona Puang Alataala pano di ingkänna to napama’tantu mendahi rasulna sibaha nabinna. ⁶ Yato ang dioainte kara membuni, bahtuanna: moi tau ang tadia to Yahudi, noa tunne’ to Yahudi, mendahi mesang anna para-para la untahimbo yato mana’na Puang Alataala, ang inang puha nadandi aka’ pengkähänganna Kristus Yesus. Ingkänna yatoo mala dahi aka’ umpetahpa’ tau Kaheba Mapia. ⁷ Mana’ pa’kalemunnanto Puang Alataala anna malamä’ nasuo umpepainsangnging yato Kaheba Mapia. Anna mala kutahimbo yato pengkähängang aka’ kakuasaanna. ⁸ Di alla’na ingkänna petauanna Puang Alataala kodi’mito ang handang madihoi’ang. Ampo’ moinnakato noa, nabea touä’ kodi’ Puang Alataala mana’ pa’kalemunna la umpepainsangnging Kaheba Mapia didiona pa’kalemunna Kristus ang dai aha puhanna pano di ingkänna tau ang tadia to Yahudi. ⁹ Anna kupakaleso toinne’ pano di ingkänna tau umba napanoa Puang Alataala ang umpadahi ingkänna aka-aka umpembabeing yato pahtuyunna ang tibuni mengkalao dolu. ¹⁰ Yato pahtuyunna Puang Alataala la umpamesa ingkänna to mampetahpa’ anna malai nainsang pole’ ingkänna malaeka’ anna kakuasaang senga’ yaho di langi’ naoatee, "Ingkänna aka-aka nainsang asang Puang Alataala." ¹¹ Dianto yato pahtuyunna Puang Alataala mengkalao dolu ang la nakähäng yaling di Kristus Yesus, Dehatanta. ¹² Aka’ kapampetahpa’anta anna kasikenteanta Puang Yesus Kristus, lambi’ damingkea’ la mahea’ anna bata-bata mengngolo dai’ di Puang Alataala. ¹³ Dianto anna kupalauia’ mating kuoatee, dakoa’ la kuhang inaha didiona kamasuhsaangku mengeä’ yaling di tahungkung aka’ dianto ang la mambahaingkoa’ kamapiaang. ¹⁴ - ¹⁵ Aka’ yato ingkänna ang puha nababeingkoa’, dianto anna menombaä’ anna ma’sambayangngä’ dai’ di Ambeta Puang Alataala, to napoambe ingkänna kasanghapuang, noa ang yaho di suruka, noa ang yaling di lino. ¹⁶ Kupalau dai’ anna malai kakuasaanna, ang dai aha mantondong kamatandeanna, la umpamatohoa’ inahammu ungngolai pengkähänganna Inaha Maserona, ¹⁷ anna malai tohho lolo Kristus yaling di bätäng sungnga’mua’ aka’ kapampetahpa’ammua’. Anna ma’sambayang touä’ anna malai ingkänna pembabemua’ la mengnguhaka’ anna menumpu yaling di pa’kalemu, ¹⁸ lambi’ malakoa’, ingkämmu petauanna Puang Alataala, para-para umpähäng manahpa umba noa malua’na, kalambe’na, malängkä’na, anna matamanna pa’kalemunna Kristus. ¹⁹ Moinnakato anna dai mala nalosa lahpa’ pihki’na hupatau, ampo’ kupalauke’ dai’ di olona Puang Alataala anna malai unsa’dingnga’ yato pa’kalemunna lambi’ malakoa’ napunnoi sipa’na Puang Alataala. ²⁰ Yato kakuasaanna Puang Alataala yaling di kalaetaa’, dianto ang mengkähäng lambi’ nabeaingkea’ pampemalanta la’bi puha nei’ andana yato ang tapalau, moi yato ang dake’ nalambi’ pihki’ta. ²¹ Dahi sihatang pano di ingkännaingkea’ to mampetahpa’ la umpa’käyyängngi Puang Alataala ungngolai Kristus Yesus mengkalao dinoa lambi’ sapano-panona! Aming.

¹ Aka’ yato kaha-kaha ang puha kutula’ langngena’, dianto suhunna anna kupalauia’ mating. Lella’ä’ ditahungkung aka’ umbabeä’ pengkähänganna Dehata, pemalaä’ ke la malai yaling di katuhoammu anna pembabemua’ la umbabe aka ang sihatang, aka’ puhamokoa’ natambai Dehata la mendahi petauanna. ² La pahallukoa’ punno kamahempo’ang inaha anna kamalunä’ang inaha. La sisa’bara’angkoa’ mesa anna mesa anna sikalemuikoa’. ³ Peäng si’da-si’daia’ lalang anna malakoa’ tontong lolo mesa inaha. Aka’ puhamokoa’ napamesa inaha Inaha Masero anna la tontong lolokoa’ sangkalebu ke mesa inahakoa’. ⁴ Ingkännaingkea’ to mampetahpa’, sangkalebumingkea’ sihapang mesa bätäng kalae, anna supung aha mesa Inaha Masero. Noa tuntone’ supung aha mesa panghannuang ang dibeaingkea’ naonge ditambaiingkea’. ⁵ Supung aha mesa Dehata, mesa kapampetahpa’ang, mesa pantero’ang ⁶ anna mesa Puang Alataala ang tapoambe ingkännaingkea’ hupatau. Dianto ang ungkuasai anna ang mengkähäng yaling di ingkänna siamo. Anna tohho toi yaling di kalaetaa’. ⁷ Ampo’ pantangngingkea’ namana’ pengkähängang di mendehatanna situhu’ aka ang mebea Kristus. ⁸ Aka’ yaling di Bahtakara Dehata aha tiuki’ naoatee, "Tahpana dai’ di ongeang ang matande mai’di to natalo ang nabaha anna ma’kahupa-hupa pebeana ang nasusa pano di hupatau." ⁹ Nasuhung anna dioaitee, "dai’ di ongeang ang handang matande," aka’ haling tuhung mentama inde di lino, bahtu’ mala dioate ongeang ang handang madihoi’ang. ¹⁰ Anna Yato ang hali tuhung, Dia sia tunto nei’ ang hali dai’ di ongeang ang handang matande anna handang mayahoang andana langi’, anna malai umpasundung ingkänna siamo. ¹¹ Dia sia tunto nei’ ang umbeaingkea’ yato pengkähängang. Sinnoanna aha ang nabea pengkähängang mendahi rasulna, aha ang nabea pengkähängang mendahi nabi, anna aha toi ang nasuo umpepainsangnging yato Kaheba Mapia. Senga’na mendahi to pangkambi’ anna to pampakuhu yaling di jumaa’. ¹² Nabeaingkea’ yato pengkähängang anna malai ingkänna petauanna Puang Alataala dipaturu manahpa lambi’ mala asang mengkähäng yaling di bela’na Dehata, anna malai umpamatoho kakalebuanna to mampetahpa’ ang dipasihapang bätäng kalaena Kristus. ¹³ Lambi’ mesa inahaingkea’ yaling di kapampetahpa’anta anna kapainsanganta didiona Änä’na Puang Alataala. Anna yato lalang kapampetahpa’anta la mendahi kabiasaang lambi’ sundungngingkea’ sinnoa Kristus. ¹⁴ Ponna ke noamingkea’ yatoo, ya’ damingkea’to la noa änä’-änä’ ang mala dipakamaho-maho, bahtu’ sihapang lopi ang napalusau-lutama bombang. Aka’ ingkänna tau ang mala dipakamaho-maho napalupano luihao mai ma’kahupa-hupa pepakuhunna ingkänna to pampasähsä’ lalang. Dahi damingkea’ kita’ la napasähsä’ lalang to pa’bulitu’ ang la mebulingngi. ¹⁵ Ampo’ kita’a’-kita’, la umpembabe si’da-si’daingkea’ kita’ katahpa’ang sitonda punno pa’kalemu anna malai yaling di ingkänna kaha-kaha tuhtuang masae tuhtuang malaingkea’ umpensinnoai Puang Yesus Kristus. Anna Kristusmitoo ang ungkapalai kakalebuanna to mampetahpa’ sihapang bää’ ungkapalai kalae. ¹⁶ Yaling di kakuasaanna, yato kalaena sikente-kente mapia. Sanghupa boitoo, pantang tubunne’ umbabe kähängang ang sihatang nababe. Anna yaling inde di pengkähänganna mala sidului, ya’ tuhtuammi lobo’, lambi’ sanghupa boitoo yato di kalae la tuho masahke anna punno pa’kalemu. ¹⁷ Dahi yaling di sanganna Dehata la kutula’ingkoa’. Aha ang pahallu la umpehingngii manahpaa’, dianto: Damokoa’ la tuho anna membabe sinnoa tau ang dake’ ungnginsang Puang Alataala, ang supung nainsang ma’pihki’ takekuna. ¹⁸ Yato tau ang noa, dai kepihki’. Dai ungngampuang yato katuhoang ang mebea Puang Alataala, aka’ dai ungnginsang Puang Alataala. Nasuhung sika noa aka’ makahha’ bää’ asang. ¹⁹ Dai sika ungnginsang sili, supung untuhu’i ihsi inahanna, tuho beba’ supu ungngindä’-indä’ pa’bannetauang. ²⁰ Ampo’ ingkänna yatoo dai noa yato ang dipaturuingkoa’ didiona Kristus. ²¹ Aka’ puhangnga’ unghingngi didiona Kalaena. Anna yaling di kasikenteammua’ Puang Yesus Kristus puhamokoa’ dipaturu didiona yato kara katahpa’ang ang dilambi’ yaling di Puang Yesus. ²² Dahi la umpellei asammokoa’ yato sipa’ karakemu ang dolu yato naonge anna dakangkoa’ umpetahpa’ Puang Yesus Kristus. Yato kalaemu nakarakei kamailuammua’ ang mampasähsä’ lalangkoa’. ²³ Dianto anna la pahallui, noa inahammu, noa toi pihki’mu, la nabakahui Inaha Masero, ²⁴ anna la umpabala’ia’ sipa’ bakahu ang napadahi Puang Alataala napasinnoa sipa’ Kalaena, dianto sipa’ ang tahpa’ si’da-si’da anna masero. ²⁵ Dahi la umpelleia’ yato kalosengammu anna la untula’koa’ katahpa’ang pano di solamu mesa anna mesa. Aka’ kita’a’-kita’ tama asammingkea’ di kakalebuanna to mampetahpa’. ²⁶ Ponna ke keaha’koa’, ya’ la undakai manahpa andana nabahakoa’ yato aha’mu pano di dosa. Anna daumpabeii yato aha’mu tontong yaling di kalaemu lambi’ tempu’ allo, ²⁷ andana mengkähängngi Pongkahana setang yaling di inahammu. ²⁸ Noa tunne’ tau ang si biasa maboko dang mala la si maboko. Ampo’ diare’ la untanang sikunna mengkähäng anna malai la aha toe’ pallollonganna ang la napake undului solana ang kakuhangang. ²⁹ Dia tuke’ dakoa’ mala umpasohong tula’-tula’ karake. Ampo’ pa’tula’ mapiakoa’ anna malai kekuna yato tula’mu pano di tau ang manghingngi, aka’ dianto ang la umbaha hupatau pano di lalang mapia ang la sihatang diola. ³⁰ Datoukoa’ la mala umpi’di’-pi’di’ Inaha Maserona Puang Alataala. Dianto ang puha napatamaiingkoa’ di kalaemu mendahi tanda pano di dioa’ dioatee petauannamokoa’ Puang Alataala ang la nalahpa’ yaling mai inde di lino ang punno kakarakeang ke lambi’mi allo katämpä’anna. ³¹ Pa’daiia’ ingkänna pi’di’ inahammu sibaha kakeaha’ang anna pahtuyu karake pano di solamu. Datoukoa’ la siba’di-ba’di anna si untula’ tahuhu solamu. Anna datumokoa’ la sikahiri’-hiri’ mesa anna mesa. ³² Ampo’ la pahallukoa’ mapia inaha anna sikalemui mesa anna mesa anna siampungngi, umba noa Puang Alataala puhamokoa’ naampungngi aka’ pengkähänganna Kristus.

¹ Dinoa aka’ mendahimokoa’ änä’ pakamayanna Puang Alataala, dahi la pahallua’ umpensinnoai pembabena. ² Ingkänna pembabemua’ la umbabe sitonda punno pa’kalemu pano di solamu situhu’ pa’kalemunna Kristus pano di kita’. Puhang umbeho Kalaena dipatei mendahi mesa penombaang bomammi’ di olona Puang Alataala aka’ kita’a’. ³ Dioa’ dio petauannamokoa’ Puang Alataala ang napamasero. Dahi ingkänna pembabe karake noanna: ungngindä’-indä’ pa’bannetauang, ma’kahupa-hupa pembabe tasampa’ anna kamailuang, dasi’da-si’dai la sihatang ditula’, londonang la umbabe yaling di alla’-alla’mua’. ⁴ Noa tunne’ dakoa’ la sihatang umpasohong tula’ tahuhu, tula’ takekuna anna ingkänna tula’ tasampa’. Ampo’ ang pahallua’ untula’ dianto pa’kuhhu’sumanga’ang dai’ di olona Puang Alataala. ⁵ Pehingngii liuia’ indee: ang ungngindä’-indä’ pa’bannetauang, ang membabe tasampa’ anna ang mailu di doi’, tau ang si membabe noa lolo yatoo dai la ungngala taha yaling di Kapahentaanna Kristus anna Puang Alataala. Aka’ yato ang umpihki’ supu kalaena supung umpenombai kaha-kaha di lino. ⁶ Madaka manahpakoa’ andana nabulingngikoa’ tula’na tau ang si ma’tula’ takekuna. Aka’ ingkänna pembabe ang noa yatoo umpakende’ aha’ käyyänna Puang Alataala pano di tau ang dai mantuhu’i pahentana. ⁷ Dahi dasi’da-si’daia’ la mala umbea inaha yato ingkänna tau ang noa. ⁸ Aka’ dolu yaling toukoa’ dio di kamalillingang bahtu’ mala dioatee napunnoikoa’ kakarakeang, ampo’ dinoa yalimmokoa’ di kamabayaang aka’ kasikenteammua’ Dehatanta. Dahi la membabekoa’ umba noa ang sihatang nababe to yalimmi di kamabayaang. ⁹ Aka’ kamabayaang dianto naongei kende’ supung ang mapia, maroho anna tahpa’. ¹⁰ Anna la umpeäng toia’ lalang anna malai ungnginsang manahpa umba kahang pembabe ang la umpamasannang inahanna Dehata. ¹¹ Daa untuhu’ia’ pembabe takekuna sinnoa ang si nababe to malilling, ampo’ diare’ la pahallua’ umbelängngi kakarakeanna yato pembabe ang noa. ¹² Aka’ yato pembabe, ang si biasa nababe membuni tau karake, moi ditula’ kale mepakasiling. ¹³ Ampo’ ingkänna yato pembabe karake la malesong pole’ diita ke napatandaammi pembabe mapianna tau ang yaling di kamabayaang. ¹⁴ Aka’ kamabayaammitoo ang mala umpatandaang ingkänna-ingkänna siamo. Dianto bahtuanna tula’ ang naoatee, "Kalehamokoa’ ingkämmu to hahe, tuhokoa’ sumule di hoi’ mai di kamateang! Anna naballoiingkoa’ inahammu Kristus." ¹⁵ Dahi dakai manahpakoa’ pembabemu. Daumpensinnoaia’ yato babena to maho, ampo’ diare’ pengkakeaka’koa’ dio. ¹⁶ Pakekuna manahpaia’ tempomu umbabe kamapiaang aka’ mengeke’ dinoa kende’ kakarakeang. ¹⁷ Dakoa’ mala mentomaho-maho ampo’ la umpeäng manahparea’ne’ lalang anna malai ungnginsangnga’ umbabe pangngelo’na Dehata. ¹⁸ Dakoa’ mala la nalango angkoro’ aka’ la nabahakoa’ pano di kakarakeang. Ampo’ diare’ la tontong lolokoa’ napunnoi Inaha Masero ¹⁹ lambi’ tontong lolokoa’ sipakatoto’ umpakende’ pampudiang anna penaniang mendehatanna. Popenanikoa’ yato pampudiang sitonda kakahsiang anna sangkalebu inaha dai’ di olona Dehata. ²⁰ Moi aka ang manghoakoa’, la tontong lolokoa’ ma’kuhhu’sumanga’ dai’ di olona Puang Alataala Ambeta yaling di sanganna Puang Yesus Kristus, Dehatantaa’. ²¹ La pahallukoa’ situhu’i manahpa, aka’ umpakeangka’koa’ anna umpa’käyyängngi Kristus. ²² Ingkämmua’ to dipoindo, tuhu’ikoa’ muanemu sinnoa untuhu’i Dehata. ²³ Aka’ to dipoambe inang la ungkapalai bahinena sihapang bää’ ungkapalai kalae. La pahallu napanoa to dipoambe, sinnoa Kristus ungkapalai ingkänna bätäng kalaena bahtu’ dioatee kakalebuanna ingkänna to mampetahpa’. Anna Dia sia tunne’ ang mendahi To Pepasalama’na. ²⁴ Dahi sinnoa kakalebuanna ingkänna to mampetahpa’ untuhu’i Kristus, la noa sia tuntone’ to dipoindo pahallu untuhu’i muanena yaling di ingkänna kaha-kaha. ²⁵ Ingkämmua’ to dipoambe, pakamayakoa’ bahinemu sinnoa Kristus umpakamaya kakalebuanna ingkänna to mampetahpa’, lambi’ umpebeaing Kalaena dipatei anna malaingkea’ salama’. ²⁶ Nasuhung anna napanoai Puang Yesus Kristus dianto anna ahai napolalang umpasähä’ kakalebuanna ingkänna to mampetahpa’ mendahi petauanna. Nabaseiingkea’ aka’ tapetahpa’ kara pepaturunna anna aka’ ditero’ingkea’ ang mendahi tanda dioatee mampetahpa’ingkea’. ²⁷ Napanoa anna malai sika mahasa anna bahahsi, dai aha kakarakeanna anna sallaanna naonge anna napapengngolo di Kalaena. ²⁸ La noa tuntone’ to dipoambe la pahallu umpakamaya bahinena sinnoa undama manahpa bätäng kalaena. Menna-menna umpakamaya bahinena sihapang sia tunne’ umpakamaya kalaena. ²⁹ Aka’ daete’ aha tau ang la ungkahiri’ bätäng kalaena, ampo’ nadama anna nadakai manahpa sinnoa Kristus undama anna undakai manahpa kakalebuanna ingkänna to mampetahpa’. ³⁰ Nasuhung napanoa aka’ sihapammingkea’ bätäng kalaena Puang Yesus Kristus. ³¹ Yaling di Bahtakara Dehata aha tiuki’ naoatee, "Dianto anna pahallui muane la umpellei tobaha’na anna sikolungngi bahinena, lambi’ la mendahi mesang sibaha." ³² Bahtakara yatoo matama bahtuanna lambi’ masuhsa dipähäng, ampo’ kupasihapang kasikenteanna Kristus anna kakalebuanna ingkänna to mampetahpa’. ³³ Ampo’ yato bahtakara nahoa toukoa’ dio. Dahi la pahallu ingkänna to dipoambe umpakamaya bahinena sinnoa ungkalemui kalaena anna la pahallu toe’ ingkänna to dipoindo la umpakeangka’ muanena.

¹ Ingkämmua’ to dipoänä’, tuhu’ikoa’ to baha’mu aka’ dianto pembabe ang sihatang nababe tau ang mampetahpa’mi dai’ di Dehata. ² La umpakeangka’koa’ to baha’mu. Dianto atohanna Puang Alataala ang uhuna ang napasitonda pa’dandiang naoatee, ³ "Anna malakoa’ kehongko’ anna mahendeng tuho yaling inde di lino." ⁴ Ingkämmua’ solasohongku to dipotobaha’, daa ummaromi’ umpamapalla änä’mu. Ampo’ paturu manahpai umpake pepaturu anna pepakaenga’ ang tiuki’ yaling di Bahtakara Dehata. ⁵ Ingkämmua’ to diposabua’, tuhu’i manahpakoa’ pahentana pongkahamu yaling inde di lino. Dia tuke’ pakeangka’i anna pa’käyyängngii. Pembabeing ingkänna pahentana sitonda unnä’ inaha sihapang Kristus ang mampopengkähängkoa’. ⁶ Daa supung ke naitakoa’ anna la tuhu’-tuhu’angngo, aka’ ungngoaa’te yaling di inahammu, "Anna malaä’ napudi pongkahaku," ampo’ aka’ sabua’namokoa’ Kristus dahi la untuhu’ikoa’ pangngelo’na Puang Alataala sitonda sangkalebu inahammu. ⁷ La umpembabe manahpaingkoa’ kähängammu sihapang Dehata ang umpengkähängnging, tadia hupatau. ⁸ Aka’ ungnginsammia’ ungngoatee ingkänna hupatau, moi sabua’, noa tunne’ ang tadia sabua’, la nabea asang Dehata sahona situhu’ pembabe mapia ang puha nababe. ⁹ Anna ingkämmua’ to dipopongkaha, la membabe mapia toukoa’ dio ke ungngoloi bumokoa’ sabua’mu. Anna daia’ mala la si umpakahea’-hea’, ampo’ la ungkalehaia’ ungngoatee, "Moi kalaeku moi sabua’ku aha mesa Pongkahaki’ yaho di suruka ang dai mampasise’la-se’la." ¹⁰ Katämpä’anna, la pahallukoa’ matoho umpake kamatohoang ang sule yaho mai di Dehata yaling di kakuasaanna ang dai aha mallondo. ¹¹ Pakeia’ yato ingkänna pangkahka’ pa’tolla’ang di mendehatanna, yato ang puha nabeakoa’ Puang Alataala. Aka’ ponna ke diangnga’ umpake, ya’ la tontong lolokoa’ matoho umbali pa’bulitu’na Pongkahana setang. ¹² Nasuhung la umpakea’ yatoo aka’ tadia hupatau ang tabali, ampo’ umbaliingkea’ ingkänna setang ang ma’kuasa yaling inde di lino kamalillingang bahtu’ dioatee lino kakarakeang. Anna umbali toingkea’ne’ kakuasaanna ingkänna dehata karake ang ungkuasai lino. ¹³ Dianto anna la umpake asammia’ yato ingkänna pangkahka’na Puang Alataala ma’tolla’ anna malakoa’ matoho umbali balimmu ke lambi’mi yato tempona kakarakeang. Lambi’, ponna ke puhamokoa’ ma’tolla’, la tontong lolokangkoa’ matoho anna matihta. ¹⁴ Sadia lolokoa’ ke’de’ mangngempe anna pamatohoia’ kapampetahpa’ammu pano di katahpa’ang ang sihapang salipi ang napantoke’i pangkahka’na to pa’tolla’. Anna pembabe marohokoa’ anna malai yato kamarohoammu la sihapang kaya’ pa’tolla’ang ang la umpake anna dao nalosa pangkahka’na balimmu. ¹⁵ Pahallukoa’ sadia lolo umpepainsangnging Kaheba Mapia ang la umpakapiai sumule kasikenteanna hupatau anna Puang Alataala, anna malai yato kasadiaammu la sihapang sapatu ang napake to pa’tolla’ ke sadia bumi la mao ma’tolla’. ¹⁶ Anna pake loloia’ yato kapampetahpa’ammu dai’ di Puang Alataala dianto pekalapaimmu, bahtu’ sihapang untamu, aka’ supung kapampetahpa’ammu ang la mala untihpa’ anna umpi’dei batu sapingka’na Pongkahana setang ang sitonda api. ¹⁷ Hannuangngia’ kasalama’ammu sihapang songko’ bahsi yaho di bää’mu, anna pakeia’ yato Bahtakaranna Puang Alataala ang puha nabeakoa’ Inaha Masero sihapang pa’dammu. ¹⁸ Yaling di ingkänna yatoo, pa’sambayangkoa’ anna umpalaui dai’ di Puang Alataala anna naduluikoa’. Pa’sambayang lolokoa’ situhu’ pengkähänganna Inaha Maserona Puang Alataala. Madaka lolokoa’ anna pa’sambayang lolo toingnga’ne’ ingkänna petauanna Puang Alataala. ¹⁹ Pa’sambayang toingkä’ kodi’ anna malai ke ma’tula’ bumä’ nabeaä’ tula’ Puang Alataala, lambi’ bahaniä’ umpepainsangnging Kaheba Mapia, yato ang tibuni lambi’ dinoa. ²⁰ Dinoa mengeä’ ditahungkung aka’ umpepainsangngingkä’ yato Kaheba Mapia, aka’ pesuonaä’ Puang Alataala. Dahi pa’sambayangngingkä’ anna malaä’ bahani ma’kara, aka’ ahana inang la sihatang kubabe yatoo. ²¹ La napainsangngikoa’ ta Tikhikus, solasohontaa’ ang tapakamaya, ingkänna siamo didiona kalaeku anna malaia’ ungnginsang didiona kalaeku noa tunne’ pengkähängangku. Inde ta Tikhikus dianto solaku mengkähäng ang tontong mendahi sabua’na Dehata. ²² Kusuo mating dinoa aka’ kuoatee anna malakoa’ ungnginsang kahebaki’ lambi’ matohoa’ inahammu. ²³ Ke la malai Puang Alataala Ambetaa’ anna Puang Yesus Kristus Dehatanta la umpamesa inahanna ingkänna to mampetahpa’ anna la tuhtuang umpakende’ pa’kalemummu pano di solamu mesa anna mesa sibaha kapampetahpa’ammu pano di Puang Yesus Kristus. ²⁴ Ke la malai Puang Alataala la umbehe ingkänna tau ang dai aha naboli ma’kalemu pano di Dehatantaa’ Puang Yesus Kristus.