Kolose

Kolose

¹ - ² Pano di ingkänna solasohongku ang masero diting di Kolose, ang tontong mampetahpa’ pano di Kristus. Hao mai di Paulus ang naängkä’ Puang Alataala mendahi rasulna Kristus Yesus. Anna di hao toi mai di ta Timotius, solasohonta. Ambetarang Puang Alataala ang la mambehekoa’ anna mampamasahkekoa’. ³ - ⁴ Puha kihingngi umba noa kapampetahpa’ammua’ pano di Kristus Yesus anna pa’kalemummu pano di solata to mampetahpa’. Dianto anna naonge si kisambayangngikoa’, ya’ si ma’kuhhu’sumanga’ loloang dai’ di Puang Alataala, Ambena Puang Yesus Kristus ang tapodehata. ⁵ Malakoa’ mampetahpa’ anna ma’kalemu aka’ unghannuang yato ang napatokaingkoa’ Puang Alataala yaho di suruka. Puhangnga’ unghingngi didiona yatoo naonge dipainsangngikoa’ yato Kaheba Mapia ang tahpa’. ⁶ Inde Kaheba Mapia puha dipepainsangnging pano di siku-sikunna lino lambi’ tuhtuang mai’di tau mampetahpa’ pano di Puang Yesus anna membabe mapia. Noa tumokoa’ dio, solasohong. Tahpana unghingngi yato Kaheba Mapia, ya’ umpetahpa’mokoa’ Puang Yesus lambi’ unsa’ding si’da-si’dakoa’ mana’ pa’kalemunna Puang Alataala. ⁷ Kaheba yatoo puhangnga’ unghingngi di hao mai di ta Epafras, solaki’ mengkähäng ang kikalemui. Dianto mesa sabua’na Kristus ang mala dipetahpa’ yaling di pengkähänganna aka’ kapahalluammua’. ⁸ Dianto ang mampainsangngiang naoatee, ungkalemuikoa’ solata to mampetahpa’ aka’ kakuasaanna Inaha Masero yaling di kalaemua’. ⁹ Dianto anna si kisambayangngi lolokoa’, tahpana kihingngi didiomua’. Kipalau dai’ di Puang Alataala anna malai nabeakoa’ kapainsangang ang sundung lambi’ mala ungnginsang si’da-si’da aka pangngelo’na. ¹⁰ Ponna noang, malamokoa’to tuho situhu’ pangngelo’na Puang Alataala anna umpamasannang lolo Inahanna, yaling umbabe ma’kahupa-hupa kamapiaang anna la tuhtuang kehängngäng kapainsangammua’ dai’ di Puang Alataala. ¹¹ Kipalau anna malai Puang Alataala umpamatoho inahammu umpake kakuasaanna ang matande lambi’ malakoa’ tontong lolo sa’bara’ ungngolai moi aka ang manghoakoa’. ¹² Ma’sambayangngang anna malai inahammua’ tontong lolo ma’kuhhu’sumanga’ dai’ di Ambeta Puang Alataala. Aka’ Diaete’ ang mampasihatangngikoa’ untahimbo mana’ yaling di kapahentaanna sibaha ingkänna solamu to pentindo’na ang tuho yaling di kamabayaang. ¹³ Puhamingkea’ nalahpa’ yaling mai di kakuasaanna kamalillingang anna naparendeingkea’ tama di kapahentaanna Änä’ samboana ang napakamaya. ¹⁴ Ungngolai yato Änä’na malaingkea’ nasulängngi anna ungngampungngi dosanta. ¹⁵ Puang Alataala dai landa’. Ampo’ yaling di pengkerona anna kakuasaanna Änä’na, ya’ taita tou nei’ pengkerona anna kakuasaanna Puang Alataala. Inde Änä’na mala disangai Änä’ Ulua, aka’ mayahoang di ingkänna siamo ang puha napadahi Puang Alataala. ¹⁶ Aka’ Dianto ang napake Puang Alataala umpadahi samai ang aha, noa yaho di suruka, noa inde di lino; noa ingkänna ang landa’, noa ang dai landa’; moi setomarayaang ang ma’pahenta, moi ma’kahupa-hupa malaeka’ ang ma’kuasa. Ingkänna yatoo napapia ungngolai Änä’na, anna yato ang napapia supung napapiaing Änä’na. ¹⁷ Dolu naonge dake’ aha aka-aka, ya’ inang ahanne’ Puang Yesus. Anna ingkänna ang aha dinoa naäto’ anna nadakai yaling di kakuasaanna. ¹⁸ Kita’ ang mampetahpa’ mala dipasihapang mesa kalae anna Puang Yesus dipasihapang bää’na. Sinnoa bää’ ungkapalai kalae, noa tuntone’ Puang Yesus ungkapalai ingkänna to pentindo’na. Dianto Änä’ Ulua, bahtuanna: ang handang dolu tuho di hoi’ mai di alla’na to mate, lambi’ ungkapalaing ingkänna siamo. ¹⁹ Aka’ Puang Alataala toboe’ mambohtu anna malai samai pengkerona anna kakuasaanna la sundung toe’ yaling yato di Änä’na. ²⁰ Anna ungngolai inde Änä’na nabohtu Puang Alataala umpasikapiai sumule Kalaena anna ingkänna ang napadahi, noa ang yaling di lino, noa toi ang yaho di suruka. Napanoa indee ungngolai hahana Änä’na ang titoke’ yaho di kayu sitambeng. ²¹ Dolu sikahaoangkoa’ Puang Alataala, umpa’bali aka’ pembabe anna pihki’ karakemua’. ²² Ampo’ dinoa aka’ kamateanna Kristus, lambi’ mala mapia sumule kasikenteammua’ sibaha Puang Alataala. Dinoa napamarohomokoa’ lambi’ maserokoa’ anna dang aha kasalaammu di hao di olona. ²³ Ampo’ pahallu la tontong lolokoa’ umpamatoho kapampetahpa’ammua’. Daa-daa ungkebo’i sumule panghannuammua’ ang puha untahimbo naonge anna unghingngii Kaheba Mapianna Puang Alataala. Yato kaheba puhang dipepainsangnging lambi’ pano di siku-sikunna lino. Anna Kodi’ Paulus puhamä’ ko napadahi mesa sabua’na ang la mampalele sau tama. ²⁴ Dinoa masannangngä’ umbulle kamasuhsaang aka’ kuduluikoa’. Aka’ inang ahake’ kamasuhsaang ang la pahallu kuolai yaling di pengkähänna Kristus. Anna yato kamasuhsaang ang menge kuolai dinoa, kuolai aka’ umpengkähängngingkä’ ingkänna tau ang mampetahpa’ pano di Puang Yesus Kristus, dianto ingkännaingkea’ ang dipasihapang bätäng kalaena. ²⁵ Nasuoä’ Puang Alataala mendahi sabua’ pano di petauanna anna malai kupepainsangnging ingkänna bahtakaranna mating di dioa’. ²⁶ Dianto kaheba ang masae liung dai napabei Puang Alataala la nainsang tau bahtuanna, ampo’ dinoa napakalesoming pano di petauanna. ²⁷ Nasuhung napanoa Puang Alataala anna mala toukoa’ dio ang tadia to Yahudi ungnginsang pole’ umba noa kamapiaanna anna kamatandeanna inde kaheba ang masaeng dai dipepainsangnging bahtuanna. Yato kaheba dianto indee: Kristus tuho yaling di kalaemua’ lambi’ ungnginsang ungngoatee inang la ullambi’ katuhoang matande sibaha Puang Alataala lambi’ sapano-panona. ²⁸ Dahi Puang Yesusmitoo ang kipepainsangnging pano di ingkänna tau sitonda kakeaka’ang. Kipakaleha anna kipakuhu ingkänna tau anna malai yatoii kipadiolona Puang Alataala sihapang tau ang sundung kapampetahpa’anna anna tuho yaling di Kristus. ²⁹ Dianto anna kupengkabela-belaii mengkähäng umpake kamatohoang ang nabeaä’, aka’ inang matoho yato kakuasaanna yaling di katuhoangku.

¹ Pemalaä’ ke malai ungnginsangnga’ umba noa kupengkabela-belai kupengkähängngingkoa’ to Kolose anna to Laodikia, moi ingkänna ang dakä’ mangnginsang. ² Pahtuyungku anna malai sika matoho inahanna anna sikalemu-lemui lambi’ matoto’ kamesaanna. Ang kupemala, dianto la keaka’ liukoa’ lambi’ umpebahtuang pahtuyunna Puang Alataala ang dai kainsangang dolu, dianto la ungnginsang si’da-si’da Kristus. ³ Aka’ Puang Yesusmitoo ang umbuhkeiingkea’ ingkänna kakeaka’anna anna kapainsanganna Puang Alataala yato ang tibuni dolu. ⁴ Indee kutula’ mating anna malai dai aha ang mambulitu’koa’ moi ang mammi’ tula’na. ⁵ Aka’ moinnakatoo sikahaoangngingkea’, ampo’ yaling di inahangku sinnoa ang ahaä’ yaling di alla’mu. Anna masannangngä’ kuhingngi mesa inahakoa’ anna tontong lolo kapampetahpa’ammua’ yaling di Kristus. ⁶ Dahi solasohong, aka’ puhamokoa’ untahimbo Kristus Yesus mendahi Dehatammu, lambi’ samai pembabemu pahallu sihatang yaling di kasikenteammua’ Kristus. ⁷ Pamatamai inahammu yaling di Puang Yesus, sinnoa poang kayu ang manaung uhaka’na. Noa toi pahallu umpasande’ samai katuhoammu pano, sinnoa dasang ang dipake’de’ matoto’. Tuhtuang pampetahpa’koa’ situhu’ yato aka ang puha dipakuhuingkoa’. Anna yaling di inahammu pa’kuhhu’sumanga’ lolokoa’. ⁸ Madakakoa’ anna dakoa’ nabulitu’ tau umpake kamanähänganna ang dai kekuna lambi’ napasähsä’ lalangkoa’. Yato kamanähänganna daete’ sule yaho mai di Kristus, ampo’ suleete’ di hao mai di pihki’na hupatau anna di hao mai di dehata lino bahtu’ setang. ⁹ Aka’ ingkänna kau’na anna kakuasaanna Puang Alataala tohho asang yaling di Kalaena Kristus. ¹⁰ Anna napasundungngi toukoa’ dio ungngolai kasikenteammu sibaha Kristus, ang ma’kuasa puha nei’ andana samai ang ma’kuasa anna ma’pahenta. ¹¹ Naonge anna mampetahpa’koa’, ya’ mala dioatee, "Ditillemokoa’." Ampo’ tadia tille mentolinona ang nababe hupatau, ampo’ tille mendehatanna ang nababene’ Kristus anna malai sipa’ dosammu dipa’dai. ¹² Anna naonge anna ditero’koa’ yaling di sanganna Puang Yesus Kristus, ya’ mala dioatee, "Matemokoa’ anna dilamung tumokoa’tee’ sibaha." Noa toi mala dioatee, "Puhamokoa’ tuho sumule sibaha," aka’ umpetahpa’ kakuasaanna Puang Alataala ang umpatuho sumule Puang Yesus di hoi’ mai di kamateang. ¹³ Dolu puhamokoa’ diangka’ mate aka’ yato sipa’ dosammu dake’ dialai sihapang motille. Pihsananna napatuhomokoa’ Puang Alataala yaling di Kristus anna naampungngiingkoa’ ingkänna dosammu. ¹⁴ Ingkännaingkea’ puha untehkai atohang, ampo’ puha napa’dai kasalaanta naonge anna untehkaiingkea’ yato mai’di atohang ang mampa’baliingke, sinnoanna napäso’ asang dai’ di kayu sitambeng ang naonge Puang Yesus mate unsulängngiingkea’. ¹⁵ Yaho di kayu sitambeng, Puang Yesus untalo yato samai setang ang ma’kuasa anna ma’pahenta lambi’ masili. Anna donetoo sika nahele asang ingkänna ang napapia Puang Alataala. ¹⁶ Dahi daumpehingngiia’ ke ahai tau ang mansallakoa’ aka’ yato ang ungngande anna ang ungngenu’, bahtu’ ke dai si umpakahoa’ allo kamahoa’ang peada’anna to Yahudi, hapanganna pa’rame-rameang bulang bakahu anna allo katohhoang. ¹⁷ Ingkänna yato kabiasaang ang noa, hapang kaleete’ kalihayona yato aka ang puha nababe Kristus di tempo ang puha napama’tantu. ¹⁸ Dahi, ponna ke ahai tau ang mansallakoa’ aka’ dai untuhu’i pepakuhunna, ya’ daumpehingngii. Tau ang noa yatoo unsanga kalaena tau ang mai’di nainsang aka’ yato ang hali naita. Si naoatee dakoa’ la natahimbo Puang Alataala ke dakoa’ umpadihoi’ang liu kalaemu sibaha umpenombai semalaeka’ang. Si malängkä’ inaha napobua’ pihki’ mentolinona, moinnakato anna yato pihki’na mentomaho. ¹⁹ Lambi’ danne’ untokei pepakuhu ang umpakeangka’ liu nei’ Puang Yesus, ampo’ setonganna Puang Yesusmitoo ang tapasihapang bää’ anna kita’ tapasihapang bätäng kalaena. Sinnoa mesa kalae matoho aka’ kasitammuang bukunna anna ihsinna ang mampasikente-kente, noa tunne’ Puang Yesus umpamesaingkea’ anna umpamatohoingkea’ situhu’ pa’elo’na Puang Alataala. ²⁰ Kita’ ang mampetahpa’, mala dioatee, puhamingkea’ mate sibaha Kristus lambi’ beba’mingkea’ pole’ dinoa di hao mai di peada’anna anna atohanna to lino. Dahi akana umpihki’i ungngoatee pahallu tau untuhu’i pahentana to lino? ²¹ Hapanganna: "Dai mala ungnganti indee," "Dai mala ungngande indoo," anna "Dai mala untuli nee." ²² Samai inde atohang dai kekuna di mendehatanna, aka’ hupatau ang mampaaha, anna didiona andeang anna senga’nake’ ang la puha siang. ²³ Ponna dipihki’ inde atohang, ya’ disanga mahasa, aka’ yato ang mantuhu’i sinnoanna ang meada’, mahempo’ inaha anna undahha kalaena, ampo’ setonganna ingkänna indee daasangngi aha kunanna, aka’ dai mala untähäng pampemala karakena hupatau.

¹ Puhamokoa’ dipatuho sumule sibaha Kristus. Dahi pahallua’ umpayaling di inahammu aka ang dipatoka yaho di suruka, ang naonge Kristus mohko’ di tando kuananna Puang Alataala, ongeang kakeangka’ang. ² Pihki’ loloi kaha-kaha ang aha kasikenteanna suruka. Daumpihki’ loloi ang sikente inde lino. ³ Aka’ mala dioatee: puhamokoa’ mate naonge anna matei Kristus, anna dinoa dake’ tandaang katuhoammu ang la noa si’da, ampo’ tuhomokoa’ sikente Puang Alataala sinnoa Kristus. ⁴ Pengkalaoanna yato katuhoammu ang si’danna dianto Kristus. Ponna lambi’mi tempona la umpalanda’ Kalaena dako’, ya’ la landa’ tumokoa’ dio sibaha yaling di kamatandeanna. ⁵ Dahi aka’ puhamokoa’ dipatuho sumule sibaha Puang Yesus Kristus, dianto anna pahallumokoa’ umpa’dai yato pembabemu ang mentolinona sinnoanna: ungngindä’-indä’ pa’bannetauang, umbabe kamahoang, pemala samangkamahoinna, pampemala didiona kakarakeang ang senga’ anna kamailuang, aka’ tau ang mampanoa yatoo, ya’ hapang nei’ umpenombai yato aka ang napemala. ⁶ La keaha’ liu Puang Alataala pano di hupatau ang membabe tasampa’ sinnoa ingkänna inde kaha-kaha ang puha ditula’, lambi’ la sika natahungkung. ⁷ Dolu membabe noa toukoa’ dio, naonge anna untuhu’ikangkoa’ pampemala mentolinona. ⁸ Ampo’ dinoa, pahallu umpa’dai ingkänna yato kaha-kaha. Daumpa’keaha’ang, daunsipaonge-ongei inaha, daumpakahiri’, dauntula’ tahuhu solamu anna daumpa’kara tahuhu. ⁹ Damong si umpa’loseng-loseng pano di solamu, aka’ samai kau’mu ang dolu puhangnga’ umpa’dai. ¹⁰ Dinoa untahimbomokoa’ katuhoang bakahu yaho mai di Puang Alataala, To Metampa. Nabakahui lolo inahammu anna malaia’ tuhtuang ungnginsang si’da-si’da lambi’ la umpensinnoia’ pengkerona. ¹¹ Dahi dang aha aka-aka ang mampasisenga’ di alla’na to Yahudi anna ang tadia to Yahudi, ang si disangai tau ang motille anna ang dai motille; noa toi tau ang mahsikola malängkä’ anna tau ang dai mahsikola; noa toi sabua’ anna to beba’, aka’ Kristus ang handang pahallu anna Dianto ang tuho yaling di ingkänna kalaetaa’. ¹² Aka’ napakamayakoa’ Puang Alataala anna puhamokoa’ napillei anna napatani mendahi petauanna, dahi pepaitaing pa’kalemu, kamarota’ang, kamahempo’ang inaha, kamalunä’ang inaha, anna kasa’bara’ang. ¹³ Sa’bara’koa’ pano di solamu, daunsipaonge-ongei inaha, ampo’ siampungngikoa’ mesa anna mesa umba noa naampungngi toukoa’ dio Puang Alataala. ¹⁴ Anna ang handang pahallu dianto pa’kalemu, aka’ mala mepopa’mesa anna umpasundung ingkänna yato kaha-kaha mapia. ¹⁵ Natambaimokoa’ Puang Alataala mendahi sihapang mesa bätäng kalae yaling di kasikenteammua’ sibaha Puang Yesus. Dahi patontongngia’ kamesaammu anna kamasahkeammu ang nabeakoa’ Kristus. Anna pa’kuhhu’sumanga’ toukoa’ nei’. ¹⁶ Bahtakaranna Kristus pahallu la umpatama di inahammu lambi’ umpunnoi pihki’mu. Pahallu sipakuhu lolokoa’ anna sikambahoingkoa’ mesa anna mesa situhu’ kakeaka’ang ang sundung. Popenanii pampudiang anna penaniang ang napaturuingkoa’ Inaha Masero. Penaniing sitonda ma’kuhhu’sumanga’ dai’ di Puang Alataala. ¹⁷ Samai tula’ anna pembabemua’ dipembabeing yaling di sanganna Puang Yesus. Anna penau-naukoa’ dai’ di Puang Alataala, Ambeta, aka’ Puang Yesus. ¹⁸ Oa’ ingkämmu bahine, tuhu’ikoa’ muanemu, aka’ inang sihatang pano di bahine ang to pentindo’na Puang Yesus. ¹⁹ Oa’ ingkämmu muane, pakamayakoa’ sangkolummu anna daa ungkamasahhu’i. ²⁰ Oa’ ingkämmu änä’, tuhu’i pahentana to baha’mu di ingkänna siamo, aka’ dianto ang umpamasannang Puang Alataala. ²¹ Oa’ ingkämmu to dipoambe, daumpamapi’di’i inahanna änä’mu andana manahoi inahanna. ²² Oa’ ingkämmu ang diposabua’, tuhu’ii pongkahamu yaling inde di lino. Daa la supung membabe mapiao ke di olonai aka’ pemalao napudi. Ampo’ diare’ tuhu’ii sitonda unnä’ inahammu sibaha umpakeangka’koa’ Puang Alataala. ²³ Dia siamo ang umbabea’, pahallu ungkähäng sitonda unnä’ inaha sihapang Puang Alataala ang umpengkähängngingnga’, tadia hupatau. ²⁴ Aka’ ungnginsang, la untahimbo mana’ ang la mendahi sahomu dako’ yaho mai di Puang Alataala. Aka’ Kristus, Dehatammu, Dianto pongkahamu ang setonganna. ²⁵ Menna-menna ang umbabe kasalaang, dia toboe’ ang la untahimbo tahungkunna, aka’ Puang Alataala dai mampasise’la-se’la.

¹ Oa’ ingkämmu pongkaha, beai pano di sabua’mu yato aka ang mahasa anna sihatang. Kalehaii aha tou dio Pongkahamu yaho di suruka. ² Pahallukoa’ ma’sambayang lolo anna madaka, laona siamokoa’ ma’kuhhu’sumanga’ dai’ di Puang Alataala. ³ Sambayangngi touang kami’ anna malai nabuhkeiingkang Puang Alataala mesa lalang ang la kiongei umpepainsangnging Kaheba Mapianna Kristus ang masaeng dai kainsangang. Aka’ dianto indee nasuhung yalingngä’ di tahungkung. ⁴ Sambayangngiä’ anna malai kupamaleso si’da-si’da umba noa ang la pahallunna. ⁵ Ponna ke sitammukoa’ tau ang dai mampetahpa’, ya’ pahallukoa’ keaka’ yaling di pembabemu pano, anna pakekunai yato tempomu membabe mapia, andana labu’ kalei. ⁶ Samai tula’ ang sohong yaling mai di suamua’, pahallu mepamasannang anna mala toe’ tama di ahkalang. Anna pahallu toine’ ungnginsang mentimba’ pano di tau ang mangkutanaikoa’. ⁷ - ⁸ Oa’ solasohong, kusuoingkoa’ mating ta Tikhikus ang la mampainsangngikoa’ kahebaku. Dianto mesa solasohonta ang kikalemui liu, si tontong lolo mengkähäng anna si sibahaang untahiai Puang Alataala. Kusuo mating anna malai napakahangakoa’ ke ungnginsammi umba noa kahebaki’. ⁹ La mating sibaha ta Onesimus, mesa toune’ solasohonta ang takalemui, ang sule yaling mai di alla’-alla’mua’. Sika la napainsangngikoa’ ingkänna ang dahi dinne. ¹⁰ Salama’na ta Aristarkhus ang kusibahaing dinne di tahungkung. Noa toi ta Markus sampona ta Barnabas. (Didiona inde ta Markus puhang kupalau mating di dioa’ la untammui manahpa ke matimmi.) ¹¹ Salama’na toi ta Yesus ang disangai toe’ ta Yustus. Dianto inde supu tallu to Yahudi di alla’na solaku to mampetahpa’ ang umpengkähängnging Kapahentaanna Puang Alataala. Sika napengkalambi’-lambi’i liu tora’ napakahangaä’. ¹² Salama’na ta Epafras, mesa sabua’na Kristus Yesus ang sule toe’ yaling mai di alla’mua’. Si nasambayangngi lolokoa’ sitonda sangkalebu inahanna. Napalau dai’ di Puang Alataala anna malai kapampetahpa’ammua’ tontong matoho, noa toi la keaka’koa’ yaling di ingkänna siamo lambi’ mala umpembabe si’da-si’daing pa’elo’na Puang Alataala. ¹³ Kusa’bii tung kodi’ umba noa mengkähäng kahha’ aka’ dioa’ sibaha to Laodikia anna to Hieropolis. ¹⁴ Salama’na toe’ are’ Tuandohto’ Lukas, ang takalemui, anna ta Demas. ¹⁵ Palambi’ingkang salama’ki’ mating di santosahaninta to Laodikia. Noa toi pano di ta Nimfa anna samai to mampetahpa’ ang si ma’himpung di hao di dasanna. ¹⁶ Ponna ke puhang umbata inde suha’ tama di alla’-alla’mua’, poinaha toine’ papebahaing tama di to mampetahpa’ yaling di Laodikia anna malai sika nabata. Noa tunne’ suha’ ang la napapebaha mating to Laodikia, pahallu umbata toe’. ¹⁷ Oaintee ta Arkhipus, "Papuhai kähängammu ang nabeao Puang Alataala!" ¹⁸ Salama’ku mating di dioa’. Teyyeku tobou kodi’ ang kupake ungnguki’ inde salama’ mating. Anna kalehaiä’a’ aka’ yalingkä’ di tahungkung. Pa’kalemunnarang Puang Alataala ang la mambehekoa’.