2 Timotius

¹ - ² Pano di Timotius, änä’ku ang kupakamaya. Hao mai di Paulus, to napillei Puang Alataala mendahi rasulna Kristus Yesus. Nasuoä’ umpepainsangnging katuhoang ang puha nadandi Puang Alataala pano di tau ang ma’mesa yaling di Kristus Yesus. Ke la malai ullambi’o behe, pa’kalemu anna kamasahkeang yaho mai di Ambe’ Puang Alataala anna Kristus Yesus, To Pepasalama’ta. ³ Ma’kuhhu’sumanga’ä’ dai’ di Puang Alataala ang kupengkähängnging sibaha inaha bahahsi sinnoa ang puha nababe neneku dolu. Daliu lengka’ kusambayangngi touo dio allo bengi ke ma’sambayang bumä’. ⁴ Kukalehai liu kamakarohhengammu sitonda uhai matammu naonge sisähä’ingke. Dianto anna pemala liumä’ sitammu boingke anna malai sahing masannang liuingke. ⁵ Ma’kuhhu’sumanga’ touä’ aka’ kukalehai kapampetahpa’ammu ang si’da-si’da dai’ di Puang Yesus Kristus sinnoa kapampetahpa’anna nenemu Lois anna indomu Eunike. Kusanga noa tunto dio kapampetahpa’ammu. ⁶ Dianto anna kupakalehamo anna malai tuhtuang ungkähäng manahpa yato pengkähängang sinnoa api ang meleä’-leä’ ang puha nabeao Puang Alataala naonge kusahpao tanda dilanti’. ⁷ Aka’ monna ke ahai kamahea’ang yaling di inahanta, daete’ sule yaho mai di Puang Alataala. Aka’ puha nabeaingkea’ Puang Alataala Inaha Maserona anna malai tau matoho umpembabeing pengkähänganna, ungkalemui tau para-paranta sibaha matahhing inaha. ⁸ Dahi daummasili unsa’bii Puang Yesus anna daumpengkasiliingkä’ moi yalingngä’ di tahungkung aka’ kusa’bii. Ampo’ pahalluo ungngolai kamasuhsaang sinnoa kodi’ aka’ Kaheba Mapia. Puang Alataalarang la mambeao kamatohoang ungngolai yato kamasuhsaang. ⁹ Dianto ang mampasalama’ingkea’ anna mantambaiingkea’ yaling di kamaseroang, tadia aka’ pembabe kalaeta, ampo’ aka’ pa’elo’na toboe’ anna mana’ pa’kalemunna. Aka’ dake’ aha lino, inang ahang pa’elo’na Puang Alataala umpalanda’ mana’ pa’kalemunna pano di kita’ yaling di Kristus Yesus. ¹⁰ Dinoa mane tainsangngia’ pole’ mana’ pa’kalemunna aka’ dipalanda’mi yaling di kasuleanna Kristus Yesus, To Pepasalama’ta. Dianto ang untalo kamateang, bahtuanna moi mateingkea’, la napatuho toi sumule anna malaingkea’ tuho lambi’ sapano-panona ang dipalanda’ yaling di Kaheba Mapia. ¹¹ Dianto inde suhunna anna dipilleimä’ mendahi rasul anna malai umpopepainsangnging anna umpopepakuhuing Kaheba Mapia. ¹² Dianto suhunna anna masuhsamä’ dinoa. Ampo’ moinnakato noa, tontong toi dä’ masili, aka’ kuinsang Ang kupetahpa’ anna kuinsang kuoatee Dianto ang ma’kuasa undakai pengkähängang ang puha napetahpa’ pano di kalaeku lambi’ allo kasuleanna Dehata. ¹³ Tuhu’i manahpai ingkänna ang puha unghingngi di hao mai di kodi’ sihapang pepakuhu ang tahpa’. Pentokei loloi kapampetahpa’ang anna pa’kalemu ang inang taampuang aka’ ma’mesa tau yaling di Kristus Yesus. ¹⁴ Dakai liui yato aka ang puha napetahpa’ pano di kalaemu. La naposolairakote’ Inaha Masero. ¹⁵ Ungnginsammi ingkänna tau ang luilau’ mai di Poropensi Asia le’ba’ asammi nakebo’iä’. Dang aha moi poro la mesa sule mangngo’de’iä’, moi ta Figelus anna ta Hermogenes. ¹⁶ Ampo’ supung ta Onesiforus ang si sule mampasuhakaä’. Daine’ aha mahea’na, moi yalingngä’ di tahungkung. Puang Alataalarang ang la mambehe yaling di hapunna. ¹⁷ Naonge dinneke’ di Roma, napeäng lelengngä’ lambi’ nalambi’ä’. ¹⁸ Anna ungnginsang tung dio umba noa naonge naduluiä’ diting di Efesus. Umbato ke la untahimboi pa’kalemu yaho mai di Puang Yesus Kristus ke lambi’mi Allo Panghohto’ang.

¹ O Timotius änä’ku, pamatohoi inahammu umpake kamatohoang ang tatahimbo yaling di Kristus Yesus aka’ mana’ pa’kalemunna Puang Alataala. ² Pepakuhu ang puha unghingngi di kodi’ naonge nasa’bii mai’di tau pahallu umbea toe’ pano di tau ang umpetahpa’ ang manähäng mampakuhu. ³ Pengkatähängngii ungngolai kamasuhsaang sihapang mesa tantarana Kristus Yesus ang sa’bara’. ⁴ Mesa tantara ang lella’ mengkähäng daete’ aha umpihki’ kapahalluang kalaena aka’ pemala umpamasannang inahanna pongkahana. ⁵ Noa toi ke ahai tau ang ma’silumba ampo’ dai untuhu’i atohang pa’silumbaang, ya’ daete’ la ullambi’ piala. ⁶ Noa tuntone’ mesa to pobela’, bahtu’ to pangnguma ang mengkähäng kahha’, inang dia tubunte’ ang handang dolu sihatang umpeuhaii pengkähänna. ⁷ Pihki’ manahpai inde samai ang kuoaingko. Dehatarang ang la mambeao kapainsangang anna malai ungnginsang asang ingkänna siamo. ⁸ Kalehai loloi Puang Yesus Kristus, peänä’anna Tomaraya Daud, ang tuho di hoi’ mai di alla’na to mate situhu’ Kaheba Mapia ang kupopepainsangnging. ⁹ Pengkatähängngii ungngolai kamasuhsaang aka’ moinnakato anna nahoamä’ aka’ kupopepainsangnging inde Kaheba Mapia lambi’ dipungoä’ sinnoa mesa to karake, ampo’ Bahtakara Dehata daine’ tipungo. ¹⁰ Dianto anna kusa’bara’ammi kutahimbo asang. Kupanoa anna malai ingkänna hupatau ang napillei Puang Alataala mala salama’ yaling di Kristus Yesus anna tuho di kamatandeang lambi’ sapano-panona. ¹¹ Tula’ indee tahpa’ si’da-si’da dianto: Monna ke tapetahpa’ia’ Puang Yesus mate aka’ kita’, aka’ puha talahpa’ katuhoantaa’ ang dolu sibaha pembabe ang tahuhu, sinnoa mate toingkea’ kita’ sibaha. Monna noa, la tuho toingkea’ kita’ sibaha. ¹² Monna ke ungngolaikingkea’ kamasuhsaang sitonda kasa’bara’ang, ya’ la ma’pahenta toingkea’ kita’ sibaha. Monna ke tapengkasiliing, ya’ la napengkasilii toingkea’ kita’. ¹³ Monna ke daingkea’ mala dipetahpa’, tontonne’ mala dipetahpa’ aka’ daine’ mala umbahoi pengkerona toboe’. ¹⁴ Pahallu la umpakaleha asangnging indee pano di jumaa’. Di olona Puang Alataala pakalehai anna malai dai sika unsiba’di-ba’dii kara, ang dai ma’bahtuang. Aka’ katämpä’anna la untallangngi tau ang mampehingngii. ¹⁵ Pengkalambi’-lambi’i liui anna malai naangka’ mapiao Puang Alataala anna dao pahallu masili didiona pengkähängammu. Pahalluo sitonda katahpa’ang umpopepakuhuing Bahtakara Dehata. ¹⁶ Kahaoii kasitula’-tula’ang ang dai ma’bahtuang anna ang dai mebahanang dai’ di Puang Alataala. Aka’ tau ang situla’-tula’ noa, tuhtuang ungkebo’i pa’elo’na Puang Alataala. ¹⁷ Pepakuhunnaii sinnoa korong kanker ang madihhi’ mokalao-lao yaling di kalaena tau. Di alla’naii dianto ta Himeneus anna ta Filetus. ¹⁸ Sika ungkebo’inne’ pepakuhu ang tahpa’ anna umpasähsä’ lalang kapampetahpa’anna sambaheang tau. Sika naoatee, "Katuhoanna hupatau di hoi’ mai di kamateang puhang dahi." Ampo’ setonganna la dahi di allo di hundinna. ¹⁹ Ampo’ katahpa’anna Puang Alataala dai maloyo, sinnoa batu ang untumpung busung tontong matoho. Di hao yato di batu aha tiuki’ naoatee, "Puang Alataala ungnginsang petauanna." anna, "Ingkänna tau ang ungnginsang kalaena petauanna Puang Alataala pahallu ungkahaoi pembabe ang tahuhu." ²⁰ Yaling di dasang ang handang käyyäng aha ma’kahupa-hupa poreha hapu: aha ang kebulahang anna kepera’; aha toi ang dibabe kayu bahtu’ tampo. Aha ang dipake ma’tosule; aha toi ang dipake allo-allo. ²¹ Ponna aha tau ang umbahahsii kalaena di hao mai di kakarakeang, la napopengkähänne’ Puang Alataala di kähängang ang keangka’. Mendahi tau ang napatani Puang sinnoa poreha ang kekuna liu. Dipatoka la umbabe ingkänna pengkähängang ang mapia. ²² Kahaoii pampemala karakena to mahäti’ anna malai maroho inahao. Petahpa’i pepakuhu ang setonganna sibaha ma’kalemu anna mesa inahao sibaha para-parammu ang mampetahpa’ dai’ di Puang Alataala sitonda inaha bahahsi. ²³ Daumpenghaui to unsiala-alai tula’ ang dai ma’bahtuang, aka’ ungnginsammi yatoo umpakende’ supu kasiba’di-ba’diang. ²⁴ Ampo’ sabua’na Puang Alataala daete’ mala ma’siba’di; pahalluete’ malunä’ pano di ingkänna tau, mala mampakuhu anna sa’bara’. ²⁵ Pahallu toi napaitai manahpa lalang sitonda kamahempo’ang inaha pano di ingkänna ang mampa’bali. Aka’ monna napanoa, yato tau umbai la mala mengkatoba’ lambi’ ungnginsang katahpa’ang. ²⁶ Pihsananna malang pole’ pa’kaleha sumule aka’ malaing di hao mai di kakuasaanna Pongkahana setang, ang puha mandahha nababeing pa’elo’na, sinnoa olo’-olo’ ang mengkalahsu’ di hao mai di sea’.

¹ Kalehaii indee: Di allo-allo di hundinna la mai’di kamasuhsaang. ² Hupatau la umpihki’ supu kalaena noanna: ungkailui doi’, ungngangka’-angka’ kalaena, pa’pesalaang, dai tuhu’-tuhu’ang di to baha’na, dai nainsang ma’kuhhu’sumanga’, dai ungkahea’ Dehata, ³ dai nainsang ungkalemui moi solasohonna, dai naaku ungngampungngi solana, si untula’-tula’ tahuhu solana, dai nainsang undakai kalaena, si masahhu’, dai ungkärä’i kamapiaang, ⁴ si mambulitu’, dai ma’pihki’ kalambe’, si ma’tomanähäng-nähäng, untuhu’i pampemalanna toboe’ andana pa’elo’na Puang Alataala. ⁵ Di mentolinona si kamba’ mampetahpa’, ampo’ di mendehatanna ungkebo’i kakuasaanna kapampetahpa’ang. Maleke diita ampo’ längko. Daumpenghauii yato tau ang noa. ⁶ Tau ang noa, ahang ang si mentama di dasanna tau senga’ anna umpakuhu sala-salai bahine ang maromi’ dise’de’ anna ang unsa’ding mai’di dosanna sibaha mai’di pampemalanna ang karake. ⁷ Yato bahine ang noa pemala loloke’ dipakuhu, ampo’ dasiang aha ungnginsang pepakuhu ang tahpa’ yaho mai di Puang Alataala. ⁸ Sinnoa ta Yanes anna ta Yambres naonge umbali-balii Nabi Musa, la noa tunte’ne’ yato tau ang umbali-bali pepakuhu ang tahpa’ yaho mai di Puang Alataala. Pampihki’naii karake si’da-si’dang anna kapeimänganna dai ditahimbo ke dipahehsai. ⁹ Ampo’ inang dannang la aha ullambi’ pahtuyu karakena, aka’ katomahoannaii la nainsang asang hupatau sinnoa yato ang puha naolai ta Yanes anna ta Yambres. ¹⁰ - ¹¹ Ampo’ dio Timotius, inang ungnginsammi pepakuhungku, pembabeku, pampemalaangku, kapampetahpa’angku, kasa’bara’angku, pa’kalemungku, umba noa kupengkatähängngi yaling di kamasuhsaang naonge dipakauho-uhoä’, sinnoa ang puha kuolai di hao di Antiokhia, di Ikonium anna di Listra. Ampo’ ingkänna yato kamasuhsaang nalahpa’ingkä’ Puang Yesus. ¹² Ingkänna tau ang pemala untuhu’i pa’elo’na Puang Alataala anna ma’mesa yaling di Kristus Yesus inang la ungngolaiete’ kamasuhsaang. ¹³ Ampo’ to umbulitu’ solana la tuhtuang mentokarake, aka’ lella’ mambulitu’, menge toe’ dibulitu’. ¹⁴ Ampo’ dio Timotius, pahallu tontong umpentokei si’da-si’da yato pepakuhu ang tahpa’ ang puha untahimbo anna umpetahpa’ liu aka’ ungnginsang menna yato ang mampakuhuo. ¹⁵ Kalehai toine’ naonge mengkalaokangko saohko’ anna inang untahimbomo Suha’ Masero. Yato Suha’ Masero mala nabeao kapainsangang nasuhung mala tau untahimbo kasalama’ang yaling di Kristus Yesus. ¹⁶ Ingkänna ang tiuki’ yaling di Suha’ Masero sohong yaling mai di Inahanna Puang Alataala anna kekuna mepakuhu katahpa’ang, ungkambahoing kasalaang anna mepatuhoi lalang ang tahpa’, anna umpakuhu hupatau anna malai tuho maroho. ¹⁷ Monna ke untuhu’i Suha’ Masero, ya’ sabua’na Puang Alataala mala dipasundung lambi’ umbabe ingkänna pengkähängang ang mapia.

¹ Di olona Puang Alataala anna Kristus Yesus ang la unghohto’ tau ang puhang mate anna ang tuhoke’, anna aka’ la sule ma’pahenta sinnoa mesa tomaraya, kupalau si’da-si’da anna malai umbabe indee: ² Pepakahebai pepakuhu ang tahpa’, pahalluo umpatoka lolo kalaemu mampakuhu, moi dai aha ang mampehingngii, moi aha ang mampehingngii. Pamarohoi lalanna tau ang bengko’, kambahoing ang umbabe kasalaang, pakaenga’i tau sitonda kasa’bara’ang anna malai sika membabe maroho. ³ Aka’ la aha tempona naongei hupatau dai umpehingngii pepakuhu ang tahpa’. Ampo’ la sika untuhu’i toboe’ pahtuyu karakena anna unghimpung mai’di to pampakuhu salao-laona anna malai sika umpehingngii supu ang la mampamasannang. ⁴ La sika untimping talinganna di hao mai di katahpa’ang, ampo’ la untungka’i talinganna pano di tohodolu kalosengang. ⁵ Ampo’ dio Timotius, pahallu la undakai manahpa kalaemu di ingkänna sia. Sa’bara’o ungngolai kamasuhsaang. Popepainsangnging Kaheba Mapia anna umpatilao mapiai pengkähängammu ang nabeao Puang Alataala. ⁶ Ingkänna inde kupainsangngio aka’ dang masae anna la dipateimä’. Katuhoangku kubeho dai’ di Puang Alataala sinnoa penombaang. ⁷ Tontongngä’ tuhu’-tuhu’ang yaling di kapampetahpa’ang lambi’ dinoa. Sinnoa ang puhamä’ ma’silumba yaling di pa’silumbaang kamapiaang anna pataloä’. ⁸ Dinoa la ullambi’mä’ katuhoang sapano-panona aka’ kamarohoang inaha ang nabeaä’ Puang Yesus Kristus, To Panghohto’ ang dai mampasisenga’-senga’, ang la nabeaä’ di allo kasuleanna. Anna tadia kodi’ supu la nabea, ampo’ ingkänna toe’ tau ang unghannuang liu kasuleanna Puang Yesus Kristus tama di lino. ⁹ Pengkalambi’-lambi’i baha’ suleo ¹⁰ aka’ ta Demas le’ba’mi napelleiä’ sau di Tesalonika untuhu’i linona. Ta Kreskes le’ba’mine’ sau di Galatia anna ta Titus lupanone’ di Dalmatia. ¹¹ Ta Lukasdang supu ang kusibahaing dinne. Humbui ta Markus anna maikoa’ sibaha aka’ dipahallu liu yaling di pengkähängangku. ¹² Puhante’ne’ kusuo ta Tikhikus sau di Efesus. ¹³ Ponna ke maimo, bahaingkä’ yato ang si kupekumbäng ang kupatohho di Troas di dasanna ta Karpus. Baha toi yato suha’-suha’ku, londonang yato ang dipapia di lollo’. ¹⁴ Ta Aleksander yato pande puha umbabe kakarakeang ang makayang pano di kodi’. Puang Alataala tuburanne’ ang la mambala’ yato samai pembabe karakena. ¹⁵ Kahaoii inde tau aka’ inang umpa’bali si’da-si’da pepakuhunta. ¹⁶ Naonge uhunai umpebayaiä’ kalaeku, dai aha moi poro la mesa tau ang mamposolaiä’, sika le’ba’ asang napelleiä’. Umbato ke dai nasalla Puang Alataala yato pembabenaii. ¹⁷ Ampo’ donetoo Puang Yesus tontong di behingku. Nabea loloä’ kamatohoang nasuhung malaä’ bahani umpopepainsangnging yato samai ihsinna Kaheba Mapia anna malai napehingngii ingkänna tau ang tadia to Yahudi. Anna nalahpa’ä’ di hao mai di kakuasaanna to la mampateiä’. ¹⁸ Dianto anna la nalahpa’mä’ Puang Yesus di hao mai di ingkänna kakarakeang ang la manghoaä’ lambi’ napasalama’ä’ anna naposolaä’ dai’ di suruka, dianto ang naonge Puang Alataala ma’pahenta sinnoa tomaraya. Dipamatanderang lambi’ sapano-panona. Aming. ¹⁹ Salama’ku mating di ta Priska sibaha ta Akwila anna sanghapunna ta Onesiforus. ²⁰ Ta Erastus tohho di Korintus anna ta Trofimus kupellei di Miletus lella’ makorong. ²¹ Pengkalambi’-lambi’i mai akinna uhangngallo. Salama’na are’ ta Ebulus, ta Pudes, ta Linus, ta Klaudia anna ingkänna solasohonta. ²² Ke la malai Puang Yesus umposolai sungnga’mu. Puang Alataalarang ang la mambeheingkea’ para-para.