2 Tesalonika

¹ Pano di jumaa’ di hao di Tesalonika ang mendahi petauanna Ambeta Puang Alataala anna Puang Yesus Kristus. Hao mai di kodi’, Paulus, sibahaang ta Silas anna ta Timotius. ² Ke la malai Ambeta Puang Alataala sibaha Puang Yesus Kristus umbehekoa’ kamasahkeang sibaha kamalinoang. ³ Kisa’ding pahalluang la umbaha lolo pa’kuhhu’sumanga’ang dai’ di olona Puang Alataala aka’ dioa’, ingkämmua’ solasohongki’. Anna sihatang kipanoa aka’ tuhtuang umpetahpa’koa’ Puang Yesus anna tuhtuang sikalemu-lemuikoa’. ⁴ Diantoo anna yaling di ingkänna jumaa’na Puang Alataala kipokale’de lolokoa’ umba umpanoa umpatontong kapampetahpa’ammu yaling di kamadahhaang anna pesändä’ yato ang unsa’dingnga’. ⁵ Dianto naongei tandaang anna maleso dioatee Puang Alataala unghohto’ ma’hupatau napapara-para lambi’ naangka’koa’ sihatang la tama di kapahentaanna aka’ puhamokoa’ unsa’ding yato kamadahhaang aka’ untuhu’ikoa’ Puang Alataala. ⁶ Puang Alataala la membabe situhu’ kamarohoanna lambi’ la umbala’ kamadahhaang pano di ingkänna tau ang mandahhakoa’ ⁷ anna la nalahpa’ingkea’ kita’ di hao mai di ingkänna kamadahhaang. La napanoantoo ke suleng Puang Yesus yaho mai di suruka umpalanda’ kamatandeanna yaling di api ang meleä’-leä’ sibaha mai’di malaeka’na ang ma’kuasa. ⁸ Ingkänna ang dai ungnginsang Puang Alataala anna dai naaku tuho situhu’ Kaheba Mapia didiona Dehatanta Puang Yesus, la ditahungkung nei’. ⁹ Tau yatoo la natahungkung napasa’dingngi kamadahhaang masuhsa ang dai aha kapuhaanna. La dipapensähä’ lambi’ sapano-panona yaling mai di olona Dehata ang punno kamatandeang anna kakuasaang. ¹⁰ Ke lambi’mi yato allo kasuleanna, la naongei napa’käyyängngi anna napamatande ingkänna to mampetahpa’, bahtu’ dioatee ingkänna petauanna ang puha napasähä’. Anna nahekeng toukoa’ dio aka’ umpetahpa’mi yato ang puha kipepainsangnging yaling di alla’-alla’mua’. ¹¹ Dianto anna kipa’sambayang lolomingkoa’ umba ke malakoa’ napasihatangngi Dehatanta la nasangai to puha natambai. Kihannuang Puang Alataala sibaha kakuasaanna la umpasundung pampemalammua’ umbabe kamapiaang anna umpasundung ingkänna pembabemua’ ang puha umbabe aka’ kapampetahpa’ammua’. ¹² Noantoo sambayangki’ anna malai sanganna Dehatanta Puang Yesus dipa’käyyängngi aka’ dioa’, anna napa’käyyängngi toukoa’ Puang Yesus. La napanoa indee aka’ Ambeta Puang Alataala anna Puang Yesus Kristus ma’kalemu si’da-si’da.

¹ Didiona kasuleanna Dehatantaa’ Puang Yesus Kristus kapendoanna, anna didiona la dihimpungngingkea’ sibaha Puang Yesus, kipalau mating, ingkämmua’ solasohongki’, ² anna dakoa’ la maromi’ malaya’ anna kaängkä’-ängkä’ inaha ke ahai kaheba ang dai tahpa’ naoatee lambi’mi allo kasuleanna Dehata. Hapang ke ahai kaheba unghingngia’ boheng ang sule yaho mai di Inaha Masero, bahtu’raka pa’tula’na tau, bahtu’raka unsangaa’ kami’ ungnguki’i yaling di suha’ki’, dakoa’ la pusa’. ³ Moi la umba noa tula’na tau, daungngakuia’ la nabulingngi. Aka’ ahaete’ kaha-kaha ang la dahi dolu mane sulei allo yatoo, sinnoanna: la mai’di tau umbali Dehata anna la aha kende’ mesa tau karake ang si umbali pahentana Puang Alataala. Yato tau inang la natallangngi nei’ Dehata. ⁴ Yato tau karake la umbali ingkänna ang si napenombai hupatau anna la unsanga kalaena mayahoang puha nei’ andana ingkänna yatoo. Setonganna la tamake’too di Dasang Ada’na Puang Alataala anna mohko’i yaling naoatee, "Kodi’mitoo Puang Alataala." ⁵ Darangkaa’ dio ungkalehai yato anna sibaha-bahakingkea’ si kutula’ loloingkoa’ kaha-kaha yatoo? ⁶ Anna dinoa ungnginsammia’ aka ang ungkalapai yato tau karake nasuhung ungngempeike’ yato tempo ang napama’tantu Puang Alataala mane kende’i. ⁷ Aka’ yato ang umbabe kakarakeang napahandu’mi umpake kakuasaanna, lambi’ mai’di tau umpa’bali pahentana Puang Alataala, ampo’ dake’ tandaang yato kakuasaanna, aka’ ahake’ ang mangkalapai. Ampo’ ponnato ke dialaing yato ang mangkalapai ⁸ mane tandaangngi pole’ yato tau karake. Anna la matei yatoo ke nahoang penanahanna Puang Yesus anna la pa’dai ke nahoang kamakähhänganna. ⁹ - ¹⁰ Aka’ ungngolai pengkähänganna Pongkahana setang yato to karake la sule sibaha kakuasaang ang käyyäng, lambi’ umpadahi ma’kahupa-hupa tanda ang mepusa’-pusa’ ang la umbulingngi hupatau. La umpake ingkänna hupanna kakarakeang la umbulitu’ tau ang inang la ditallangngi aka’ dai naaku umpehingngii anna dai ungkärä’i kaheba ang tahpa’ didiona Puang Yesus ang la mala mepasalama’. ¹¹ Dianto anna la napakende’ming Puang Alataala kakuasaang ang mambulingngi anna malai sika umpetahpa’ kalosenganna yato to karake ¹² lambi’ ingkänna ang dai umpetahpa’ kaheba ang tahpa’, ampo’ nakärä’i puhane’ ke madosai, la ditahungkung. ¹³ Kisa’ding pahalluang ma’kuhhu’sumanga’ lolo dai’ di olona Puang Alataala aka’ dioa’, ingkämmu solasohongki’ ang nakalemui Dehata, aka’ mengkalaoke’ uhu-uhuna anna napilleimokoa’ la napasalama’. Napasalama’koa’ ungngolai pengkähänganna Inaha Masero anna malakoa’ masero ungngolai kapampetahpa’ammua’ pano di kaheba ang tahpa’. ¹⁴ Dianto pahtuyunna Puang Alataala anna natambaimokoa’ ungngolai Kaheba Mapia ang puha kipakahebaiingkoa’ anna mala toukoa’ dio mangngala taha yaling di kamatandeanna Dehatanta Puang Yesus Kristus. ¹⁵ Diantoo, ingkämmua’ solasohongki’, anna la tontong lolomokoa’ yaling di kapampetahpa’ammu anna la untokei manahpakoa’ kara pepaturu ang puha kipalambi’ingkoa’, noa yatoo ang kitula’ingkoa’, noa tunne’ yato ang kiuki’ yaling di suha’ki’. ¹⁶ - ¹⁷ Ke la malai Dehatanta Puang Yesus Kristus sibaha Ambeta Puang Alataala umpamatoho loloa’ inahammu anna napakatoto’, lambi’ mala mapia lolo, noa babemua’, noa tula’mu. Diaetoo ang ungkalemuiingkea’ anna umbeheingkea’ pepakahanga sapano-panona anna memana’ panghannuang ang mapia.

¹ Katämpä’anna, ingkämmua’ solasohongki’, pa’sambayang loloingkang anna malai kara Dehata madihhi’ tisembu’ anna dipa’käyyängngi, noa ang puha dahi yaling di alla’-alla’mua’. ² Pa’sambayang toingkang umba ke malaang lahpa’ di hao mai di tau karake, aka’ dai mampetahpa’ asang ingkänna tau. ³ Ampo’ Dehata ang mala dipetahpa’ la umpakatoto’koa’ anna ungkambi’koa’ ungngoloi yato tau karake. ⁴ Nabeaang Dehata kapampetahpa’ang lambi’ kioatee si umbabe lolongnga’, anna tontong la umpanoa lolo yato ang puha kisuoingkoa’. ⁵ Ke la malai Kalaena Dehata umpatehtekoa’ anna mala tuhtuang ungnginsangnga’ ungngoatee Puang Alataala mekalemui anna la nabeakoa’ kasa’bara’ang Kristus sinnoa ang puha nasa’ding ungngolai kamadahhaang. ⁶ Ingkämmua’ solasohongki’, kisuokoa’ yaling di sanganna Puang Yesus Kristus dakoa’ la umponialai ingkänna santosahaninta ang tengkong bosi mengkähäng anna ang dai naaku untuhu’i yato pepaturu ang puha kipaturuingkoa’. ⁷ Aka’ ungnginsang tubungnga’ dio umba la umpanoa pahallu umponialaiang. Aka’ daang kami’ tengkong mengkähäng yato anna sibaha-bahakingkea’ ⁸ anna dakang aha si ungngande andeanna tau ke dai kibaya’ dolu, ampo’ untanangngang sikungki’ mengkähäng allo bengi andana ahakoa’ manii kisuhsai ke untahiaiang. ⁹ Yato kipanoa dai kioatee dai sihatang ke kisuokoa’ untahiaiang aka’ pesuonaang Puang Yesus, ampo’ kipanoa anna malai umpohapangangngang. ¹⁰ Aka’ si kipakaenga’ siamokoa’ yato anna sibahakingkea’ kioatee, "Pano di to tengkong bosi mengkähäng, dai mala dibea andeang." ¹¹ Kitula’ noa indee aka’ kipelele aha yaling di alla’-alla’mua’ ang tengkong bosi mengkähäng. Yato tau dai naaku mengkähäng, supung nainsang kalao-lao leleng lupano luihao mai umpenghaui uhu’anna tau senga’. ¹² Tau ang noa yatoo kipakaleha anna kipaturu yaling di sanganna Puang Yesus Kristus kioatee, la hapa’ anna mengkabansa’ mengkähäng anna malai aha toe’ naande ang napeäng kalaena. ¹³ Ampo’ dioa’ dio, ingkämmua’ solasohongki’, daummali’-mali’angngi membabe mapia. ¹⁴ Ke ahai tau ang dai naaku untuhu’i tula’ki’ yaling inde di suha’, tandaii nei’, anna daunsibahaing anna malai masili. ¹⁵ Ampo’ dai la ungngangka’a’ sinnoa balimmu, diare’ la umpa’karaia’ sihapang solasohommu. ¹⁶ Kalaena Dehatantaa’, dianto kasuleanna kamasahkeang anna kamalinoang, la tontong lolo umbehekoa’ kamasahkeang anna kamalinoang yaling di ingkänna kaha-kaha. Kihannuang la naposolai lolokoa’. ¹⁷ - ¹⁸ Salama’ku mating. Kalaeku ungnguki’ inde kara salama’ku, aka’ diantoo ang mendahi tanda yaling di ingkänna suha’ku. Noantoo indee pangnguki’ku. Ke la malai Dehatanta Puang Yesus Kristus umbehekoa’.