2 Petrus

¹ Pano di dioa’ ang tadia to Yahudi, ang mampetahpa’ pano di Puang Yesus Kristus sinnoa kami’ to Yahudi. Hao mai di Simon Petrus, sabua’na anna rasulna Puang Yesus Kristus. Kalaena Puang Yesus Kristus, To Pepasalama’, Dehata ang tapenombai, ang mampopampetahpa’koa’ sinnoaingkea’ aka’ maroho pembabena anna dai mampasise’la-se’la. ² Ke la malai tuhtuangkoa’ untahimbo behe anna kamasahkeang aka’ ungnginsammokoa’ Puang Alataala sibaha Puang Yesus, Dehatanta. ³ Puang Alataala matande anna mapia inahanna. Mengkalao di kamatandeanna anna kamapiaang inahanna natambaiingkea’ lambi’ aha kasikenteanta sibaha. Anna mengkalao di kakuasaanna ang käyyäng, ya’ halimingkea’ nabea yato ingkänna aka-aka ang tapahallu yaling di katuhoanta anna yaling untindo’ pengkerona. ⁴ Mengkalao di kamatandeanna anna kamapiaang inahanna, nabeaingkea’ pebehe ang käyyäng anna kealli si’da-si’da ang puha medandiing. Nasuhung mebeai yato pebehe, anna malakoa’ umpensinnoai pengkerona Puang Alataala anna damokoa’ la untuhu’i pampemala karakemu. Aka’ yato pampemala karake si ungkarakei katuhoanna tau ang dai ungnginsang Puang Alataala. ⁵ Dahi, solasohong, aka’ puhamokoa’ nakalemui, ya’ tuhtuang hängngängngike’a’ pengkero mapia pano yato di kapampetahpa’ammu. Anna pano yato di pengkero mapiammu, ya’ hängngängngike’ kakeaka’ang. ⁶ Tahhi’na, ya’ la pahalluke’ unghängngängngi pengkero ang noa indee: dianto ungkuasai tau kalae, sa’bara’ yaling di kamasuhsaang, tuhu’-tuhu’ang tau dai’ di Puang Alataala ⁷ anna ungkalemui tau solata to mampetahpa’. Ampo’ dai la solata supu to mampetahpa’ dikalemui, ampo’ pahallu toe’ tau ungkalemui tau senga’. ⁸ Aka’ tuhtuang umpanoa, ya’ la tuhtuang toe’ maleso dioatee kekuna si’da katuhoammu mengkalao di kapainsangammua’ didiona Puang Yesus Kristus Dehatanta. ⁹ Ampo’ ingkänna tau ang dai noa yatoo pembabena, ya’ sinnoa to buta. Aka’ sinnoa mesa to buta dai maleso pennenne’na, ya’ noa tunne’ pano di tau ang noa yatoo: dai maleso pihki’na aka’ dai nakalehai naoatee haling dibasei di hao mai di dosanna. ¹⁰ Dahi, solasohong, pengkabela-belaii untuhu’i Puang Alataala, anna malaia’ ungnginsang ungngoatee puhamokoa’ napillei sibaha natambai. Ponna ke umpanoai, ya’ inang dakoa’ la manaho. ¹¹ Anna di allo ang la sule la nabuhkeingkoa’ baba Puang Alataala ang lutama di suruka; la natahimbokoa’ tama di Katomarayaanna Puang Yesus Kristus, dianto To Pepasalama’ anna Dehata ang tapenombai. Anna yato Katomarayaanna inang dai aha kapuhaanna. ¹² Dahia’, solasohong, moinnakato anna ungnginsammi ingkänna indee, anna moinnakato matohomokoa’ untindo’ pepakuhu ang tahpa’, ampo’ la kupakaleha lolokangkoa’. ¹³ Kuangka’ sihatang ke kuuki’ingkoa’ suha’ pepakaleha didiona ingkänna indee sumbana tuhokä’, ¹⁴ aka’ puha napakalesoingkä’ Dehatanta Puang Yesus Kristus naoatee dang masae anna la matemä’. ¹⁵ Dianto anna mengkähäng si’da-si’damä’ anna malaia’ ungkalehai ingkänna indee ke matemä’. ¹⁶ Naonge anna kipaturukoa’ kioatee ma’kuasa Puang Yesus Kristus anna la sumule bou tama inde di lino, ya’ tadiaete’ tohodolu kale sinnoa ang napihki’ hupatau. Anna nasuhung kiinsang kioate tahpa’, aka’ matangki’ tobou kami’ paita unsa’bii kamatandeanna. ¹⁷ Dolu yahoang di mesa tanete anna kiitai Puang Yesus mesilo napobua’ kamatandeang anna kakeangka’ang ang natahimbo yaho mai di Puang Alataala, Ambena. Donetoo kahingngiang kamahanna Puang Alataala To Handang Matande naoatee, "Dianto inde Änä’ku ang kupakamaya, ang umpamasannang inahangku." ¹⁸ Kalaeki’ ang unghingngi inde kamaha yaho mai di suruka naonge sibaha-bahaang yaho yato di tanete masero. ¹⁹ Dahi, aka’ yato ang kisa’bii, lambi’ kiinsang kioatee tahpa’ yato ang natula’ senabiang dolu. Ya’ mahasa ke umpehingngiia’ yato tula’naii, aka’ sihapang ballo ang mesilo yaling di kamalillingang. Dahi pehingngiia’ yato tula’na senabiang lambi’ sumule sala Puang Yesus tama inde di lino. Kasuleanna la sinnoa lelle’na allo, bahtu’ sohonna bintäng pambaha allo. ²⁰ Ang handang pahallu ungnginsang, dianto dai aha moi poro la mesa tau ang la mala umpekaleso bahtuanna tula’na nabi yaling di Suha’ Masero situhu’ pihki’na toboe’. ²¹ Aka’ senabiang dolu umpepainsangnging tula’na Puang Alataala, dai situhu’ pa’elo’na hupatau, ampo’ situhu’ petehtena Inaha Masero lambi’ mala sika untula’ Bahtakaranna Puang Alataala.

¹ Dolu inang aha toe’ nabi ang si ma’loseng-loseng yaling di alla’-alla’na tau ang untuhu’i Puang Alataala. Noa tunne’ dinoa inang la aha to pampakuhu ada’ ang si ma’loseng-loseng yaling di alla’-alla’mua’. Sika la umbaha pepakuhu ang dai tahpa’ ang la untilakai tau, anna sika la umbahoi Dehata ang mansulängngi. Lambi’ kalemba’anna yatoo la sika baha’ untilakai kalaenaii. ² Ampo’ moinnakato noa, mai’di tau la untindo’i yato lalang karakenaii, lambi’ la aha tau senga’ ang untula’ tahuhu pepakuhunna Puang Yesus ang tahpa’. ³ Aka’ napobua’ kamailuanna pano di doi’, lambi’ la sika untula’ tohodolu kalosengang mengkalao di pihki’na toboe’ anna malai sika ungngala yato doi’mua’. Ampo’ inang masaeng napatokaing Puang Alataala yato tahungkunna ang la sika manghoa ang tokang dinoa. ⁴ Moi semalaeka’ang ang madosa dolu, inang dai aha sika nalahpa’ Puang Alataala, ampo’ napatama di nahaka anna natahungkungngi tama di kahoäng malilling lambi’ tempona allo panghohto’ang. ⁵ Noa tunne’ tau karake dolu, dai sika nalahpa’ Puang Alataala di hao mai di tahungkunna. Ihsinna inde lino dolu ang dai untuhu’i Puang Alataala natallangngi ungngolai sompo’na le’bo’. Supung Nabi Nuh sibaha pitu tau senga’ nakalemui lambi’ dai mate, aka’ inde Nuh umpepainsangnging lalang kamarohoang situhu’ pa’elo’na Puang Alataala. ⁶ Noa tunne’ ihsinna Bohto Sodom anna Bohto Gomora naämpu’i apinna Puang Alataala napobua’ pembabe karakenaii. Lambi’ inde tahungkunnaii mendahi pengkakalehaang pano di ingkänna tau ang dai naaku tuhu’-tuhu’ang dai’. ⁷ Ampo’ donetoo aha mesa tau ang disanga Lot natehtene’ sohong lambi’ salama’ aka’ maroho nei’ anna mapi’di’ lolo inahanna ungngita pembabe karakena yato to Sodom. ⁸ Alloboi anna alloboi madahha ungngita anna unghingngi lolo yato pembabenaii ang untehkai atohanna Puang Alataala. ⁹ Dahi, mengkalao inde di pohapangang, maleso taitaa’ kakuasaanna Puang Alataala ungkalemui tau ang tuhu’-tuhu’ang dai’, lambi’ dai sika manaho ke ungngoloii pesändä’. Anna ungngita toingkea’ne’ kakuasaanna untahungkung tau karake lambi’ di Allo Panghohto’ang, ¹⁰ londonang pano yato di ingkänna tau ang naangka’i untuhu’i pampemala karakenaii anna unte’le-te’le kakuasaanna Puang Alataala. Yato to pampakuhu ang ma’loseng-loseng bahani si’da-si’da anna malängkä’ inahannaii lambi’ dai sika mahea’ untula’ tahuhu ingkänna to ma’kuasa ang matande. ¹¹ Aka’ moi semalaeka’ang, ang matoho anna ma’kuasa puha nei’ andana yato to pampakuhu kalosengang, datoi sika bahani untula’ tahuhu bahtu’ unsalla yato ingkänna to ma’kuasa ang matande di olona Puang Alataala. ¹² Ampo’ inde to pampakuhu ang ma’loseng-loseng, dai ma’pihki’ seha’. Sika untula’ tahuhu aka-aka ang dai sika napähäng. Kau’na sinnoa olo’-olo’ mahaila ang dai umpihki’ pembabena, bahtu’ sinnoa olo’-olo’ ang tuho supung anna malai napatei to poasu. Ya’ la sika sinnoanto yato olo’-olo’ mahaila yatoii, sika la tallang toe’. ¹³ Yato tahungkung ang la natahimbo sihatang pano yato di pembabe karakenaii. Aka’ moi di tängngä allo sika untuhu’i lolong pampemala kalaena. Sika ma’toso’bäng-so’bäng ke lella’koa’ mande sibaha-baha yaling di pa’himpungammu, lambi’ masilikoa’ anna nakoa’-koa’ atekoa’ ungngita. ¹⁴ Anna ponna ke ahai bahine naita, ya’ tahhi’ sika pemala nakamahoi. Dai aha namali’-mali’ang umbabe dosa. Tau ang malamma kapampetahpa’anna si nabulitu’ lambi’ manaho tama di dosa. Si mailu lolo pano di aka-akanna tau senga’. Tilaka tau ang noa yatoo! ¹⁵ Sika ungkebo’i yato lalang ang tahpa’ anna untindo’i lalang ang karake. Sika untindo’i lalang ang natindo’ dolu Nabi Bileam, änä’na Beor, ang si umpihki’ supu doi’ ang la natahimbo ke membabe karakei. ¹⁶ Pahtuyunna inde Bileam nakalapai Puang Alataala umpake keledai kalaena Bileam. Napopa’kara yato keledai anna malai ungkambahoing inde nabi aka’ katomahoanna. ¹⁷ Didionane’ yato to pampakuhu kalosengang, puha napatokaing Puang Alataala ongeang ang mapähtäng. Sika sinnoa timbu ang mahti’ bahtu’ sinnoa salehu’ ang nasau pepahi ampo’ dai undondong kene’. ¹⁸ Malängkä’ inahannaii untula’ ingkänna pembabena ampo’ dai kekuna samai yato ang natula’. Sika si umpake pampemala karake anna malai napolalang unse’de’ tau ang mane umpellei lalang karake, lambi’ sumule yato tau pano yato di lalang ang mane puha napellei. ¹⁹ Si naoatee yato to pampakuhu ang ma’loseng-loseng, "Ponna ke untuhu’i pepakuhungki’, ya’ damokoa’ne’ pahallu untuhu’i yato atohang, la beba’koa’!" Ampo’ setonganna yatoii dia siang ang sihapang sabua’, aka’ nakuasai pengkero ang unnahoang hupatau. Aka’ ponna ke nakuasaiingke yato pampemala, ya’ naposabua’ringkea’te’ disanga yato pampemala. ²⁰ Ponna ke sika ungnginsammi Puang Yesus Kristus, To Pepasalama’ ang tapodehata anna lahpa’mi di hao mai di pembabe karake ang aha yaling inde di lino, pihsananna sika nakuasai sala bou yato pembabe karake, ya’ setonganna tahuhu puhaete’ nei’ yato katuhoanna ang bakahu andana yato ang dolu. ²¹ Pano di tau ang noa yatoo, ya’ mahasa puhane’ ke dake’ ungnginsang dolu yato lalang ang tahpa’, andana ke nainsammi ampo’ dasiang natuhu’i yato pahentana Puang Alataala ang haling natahimbo. ²² Ponna noa yatoo, ya’ yato tau nahoane’ yato pohapangang ang naoatee, "Asu ang hali tiloa sumule sala ungngande yato tiloana." Noa toi "Bahi ang hali didio’ sumule mentumbäng naung di hehsä’."

¹ Oa’ solasohong ang kukalemui, dianto indee suha’ku ang kaderuanna ang kuuki’ mating. Inde derua suha’ kuuki’ anna malakoa’ ma’pihki’ maleso anna masero sibaha kupakalehakoa’ didiona yato pepakuhu ang tahpa’. ² Noa tunne’ anna malaia’ ungkalehai yato ang natula’ dolu ingkänna nabi ang masero sibaha pahentana Dehatanta, To Pepasalama’, ang nabea ungngolai rasulna. ³ Ampo’ ang handang pahallu ungkalehaia’, dianto indee: di allo-allo ang la sule la kende’ tau ang nakuasai pampemala karakenaii. ⁴ La sika naoaitee, "Puang Yesus ma’dandi are’ naoate la sumule dako’. Ya’ umbang naongei? Dai kami’ kipetahpa’ aka’ mengkalao di peneneanta ang mate dolu dai aha aka-aka senga’na. Tontong lolo ingkänna ang aha mengkalao anna dipadahi inde lino lambi’ dinoa." ⁵ Yato tau ang ma’tula’ noa naangka’i untutu’i matanna. Bahtuanna, dai sika naaku ungkalehai umba napanoa Puang Alataala umpadahi langi’ dolu umpake supu bahtakaranna. Anna umpapia lino sibaha uhai lambi’ aha tunne’ kalantanang di alla’na uhai. ⁶ Anna yato uhai napake toe’ Puang Alataala untallangngi lino ang dolu. ⁷ Anna langi’ anna lino ang aha dinoa nadakai toe’ umpake supu bahtakaranna, lambi’ di tempona Allo Panghohto’ang. Ke donentoo inde langi’ anna lino la natallangngi umpake api, anna ingkänna tau ang dai tuhu’-tuhu’ang dai’ la natahungkung. ⁸ - ⁹ Ampo’ dioa’, solasohong ang kukalemui, daungkalimpängngi indee: Aha tau ang mangngoatee, "Masae liung ampo’ daloloke’ sule Dehata." Ampo’ di olona Puang Alataala sansa’bu pahiamanna sinnoa siang sangngallo supu, anna sangngallo sinnoa siang sansa’bu pahiamanna. Daete’ dioatee napoela’ Puang Alataala umpasundungngi yato pa’dandianna. Ampo’ nasuhung anna dake’ sule, aka’ sa’bara’ pano di dioa’. Dai naaku moi poro la mesa tau la ditahungkung. Aka’ ang naelo’i dianto anna malai ingkänna tau aha tempona mengkatoba’. ¹⁰ Ampo’ inang la sule Dehata! Anna yato kasuleanna la mepusa’-pusa’, sihapang kasuleanna to paboko. Donetoo la pa’da langi’ sitonda oni käyyäng ang moduru-duru, ingkänna aka-aka ang landa’ yaho la pa’da, naande api. Noa tunne’ inde lino sibaha ingkänna ihsinna la mämpu’. ¹¹ Dahia’, solasohong, ponna ke inang la ditallangngi ingkänna aka-aka ang aha, ya’ umbangnga’ne’ noa pano di kita’? Pahalluingkea’ umpamasero pembabeta anna untuhu’i Puang Alataala. ¹² Aka’ lella’ingkea’ ungngempei Allo Panghohto’anna Puang Alataala. Ya’ mahasa ke tapengkabela-belaii untuhu’i Dehata anna malai baha’ sule yato Allo Panghohto’ang. Anna ke donentoo yato di allo, la mämpu’ langi’ anna ingkänna ang aha la naande asang api, lambi’ loleng napobua’ luhsunna. ¹³ Ampo’ la taempei yato ang hali nadandi Puang Alataala: dianto langi’ bakahu sibaha lino bakahu ang la naongei tuho to maroho. ¹⁴ Dahi, solasohong ang kukalemui, lella’ ungngempei yato allo, pengkabela-belaii membabe mapia anna malai mahasa kasikenteammu sibaha Puang Alataala, lambi’ dakoa’ sala bahtu’ masili ke lambi’mokoa’ dai’ di olona. ¹⁵ Kalehaii indee: kasa’bara’anna Dehata umbea tempo pano di tau anna malai sika salama’. Dia tuntone’ inde ihsinna suha’na Paulus, solasohong ang takalemui, ang nauki’ pano di dioa’ yaling di kakeaka’ang ang nabea Dehata. ¹⁶ Yaling di ingkänna suha’na nauki’ noa yatoo ke mampakuhu bumi didiona inde kaha-kaha. Aha di alla’na pepakuhunna ang mapahhi’ dipähäng. Anna aha toi tau, ang si dai maroho pihki’na anna dai matoho kapampetahpa’anna, ang si umputa’ pepakuhunna Paulus sibaha ihsinna Suha’ Masero. Ya’ yatoii la sika ullambi’ tahungkung napobua’ inde pembabenaii. ¹⁷ Ampo’ dioa’, solasohong ang kukalemui, ungnginsammi ingkänna indee. Dahi madakakoa’ anna dakoa’ napasähsä’ lalang kasalaanna to karake, lambi’ la manahokoa’ yaho mai di ohko’ammu ang matoto’. ¹⁸ Ampo’ diare’ la tuhtuangnga’ unghängngängngi kapainsangammu didiona Puang Yesus Kristus, Dehatanta ang mepasalama’, anna malai tuhtuang unsa’ding mana’ pa’kalemunna. Pudii mengkalao dinoa lambi’ sapano-panona. Aming.