1 Petrus
11 Pano di ingkänna tau ang napillei Puang Alataala, ang tisembu’ pano di Poropensi Pontus, Galatia, Kapadokia, Asia anna Bitinia, ang tohho sihapang to sule di alla’-alla’na tau ang dake’ ungnginsang Puang Alataala. Hao mai di Petrus, rasulna Puang Yesus Kristus. 2 Situhu’ pahtuyunna Puang Alataala mengkalao dolu lambi’ napilleikoa’, anna napatanikoa’ mendahi petauanna ungngolai pengkähänganna Inaha Masero, lambi’ untuhu’imokoa’ Puang Yesus Kristus anna napamaseromokoa’ yaling di hahana. Ke la malai tuhtuangkoa’ untahimbo behe anna kamasahkeang yaho mai di Puang Alataala. 3 Tapudii Puang Alataala, Ambena Dehatanta Puang Yesus Kristus! Aka’ pa’kalemunna ang käyyäng lambi’ puhamingkea’ nabea katuhoang bakahu. Inde katuhoang bakahu tatahimbo ungngolai katuhoanna sumule Puang Yesus di hoi’ mai di kamateang. Dianto anna matoto’mi panghannuanta. 4 Tahannuang la untahimboingkea’ dako’ yato mana’ ang puha napatoka lohpo’ingkea’ Puang Alataala pano di ingkänna änä’-änä’na. Yato mana’ nabe’beiingkoa’ yaho di suruka dai mala la karake anna bosi bahtu’ pa’da. 5 Anna la nadakaikoa’ Puang Alataala ungngolai kakuasaanna ang käyyäng lambi’ la napasalama’koa’ di allo katämpä’anna aka’ mampetahpa’koa’ dai’. 6 Dianto anna kahsikoa’ solasohong. Moinnakato anna mapi’di’ inahakoa’ dinoa aka’ mai’di kamadahhaang ang manghoakoa’, ampo’ la umpamahasa inahammu aka’ inde kamadahhaang sämpäi’ supu. 7 Nasuhung anna ahai inde kamadahhaang dianto anna malai umpatandaang kamatoto’anna kapampetahpa’ammua’. Sinnoa bulahang, si disändä’i ditunu tama di api anna malai diinsang dioatee bulahang si’daraka, daraka. Ampo’ kapampetahpa’ammua’ masuli’ puhaete’ nei’ andana bulahang, aka’ inde bulahang daine’ la lambi’ sapano-panona. Dahi, sinnoa bulahang ang disändä’i ungngolai api, ya’ noa tuntone’ kapampetahpa’ammu disändä’i ungngolai kamadahhaang. Dahi ponna ke maleso liung dioatee mampetahpa’ si’damokoa’, la napudikoa’ Puang Yesus Kristus sibaha napakeangka’koa’ anna napamatandekoa’ ke sumuleng tama inde di lino. 8 Inde Puang Yesus Kristus, moinnakato anna dake’ aha ungngitaa’ dolu, ampo’ ungkalemuia’. Noa tunne’ moinnakato anna dake’ aha ungngita dinoa, ampo’ mampetahpa’koa’ pano, lambi’ yato kakahsiammua’ dakalei diinsang ditula’ tandana mahasa. 9 Pamahasaia’ inahammu aka’ halimokoa’ untahimbo boana kapampetahpa’ammu, dianto kasalama’ang. 10 - 11 Yato senabiang dolu untula’ lohpo’ inde kasalama’ang ang halingnga’ untahimbo dinoa. Sika naoatee la aha tempona nasalama’koa’ Puang Alataala. Inahanna Kristus mengkähäng yaling di inahannaii lambi’ sika napainsangngi Puang Alataala didiona kamadahhaang ang la unghoa Kristus, sibaha kamatandeang ang la natahimbo ke puhang yatoo. Ampo’ yato senabiang dolu dake’ nainsang umba la noa la dahi ingkänna indee. Dianto anna sika umpeängngi lalang anna malai sika nainsang pihhang anna umba noa la dahi yato ingkänna ang puha natula’ lohpo’. 12 Sika napainsangngi Puang Alataala naoatee yato ang sika natula’ lohpo’, tadiaete’ kalaenaii ang la napahoai, ampo’ setonganna diorea’te’ ang la nahoa. Dinoa, yato ang natula’ lohpo’ senabiang dolu, dipamalesoingkoa’ mating, aka’ aha tau ang mampainsangngikoa’ Kaheba Mapia yaling di kamatohoanna Inaha Masero. Noa tunne’ moi semalaeka’ang pemala liu sika ungnginsang yato kasalama’ang ang halingnga’ untahimbo. 13 Dahi, solasohong, inang aha inde panghannuang. Dianto anna kuoaite mating: pakekunaia’ pihki’mu, madaka lolokoa’ anna hannu liuo pano di behe ang la untahimbo ke sumuleng Puang Yesus Kristus. 14 Naangka’koa’ Puang Alataala änä’-änä’na, dahi tuhu’ia’ atohanna. Daumpemala lolo untuhu’i pampemala kalaemua’, sinnoa ang si umbabe dolu naonge yalingkangkoa’ di kamalillingang. 15 Pahallukoa’ masero yaling di ingkänna siamo, aka’ inang masero Puang Alataala, anna Dianto ang untambaikoa’ mendahi änä’-änä’na. 16 Aka’ aha tiuki’ yaling di Suha’ Masero dolu naoatee, "Pahallu toukoa’ dio masero, aka’ Kodi’ maseroä’." 17 Oa’ solasohong, yalingkoa’ inde di lino sihapangkoa’ supu to lempäng. Anna ke ma’sambayangkoa’ dai’ di Puang Alataala, ya’ si untambai ungngoatee, "O Ambe." Dianto anna pahallumokoa’ tuhu’-tuhu’ang dai’ akinna tohhokangkoa’ yaling inde di lino. Aka’ inde Puang Alataala ang umpoambe, dianto to Pambohtu ang umbohtu kaha-kahanna ingkänna tau situhu’ pembabenaii, dai mampasise’la-se’la. 18 Tuhu’-tuhu’ammokoa’ dai’ di Puang Alataala, aka’ ungnginsammia’ yato ang nabaya’ Puang Alataala anna malakoa’ beba’ di hao mai yato di pengkeromu ang dolu. Yato pengkeromua’ ang dolu, ang namana’ingkoa’ tobaha’mu, setonganna dai kekuna. Ampo’ napabeba’mokoa’ Puang Alataala di hao mai, anna yato pebaya’na dai umpake aka-aka ang dai la lambi’ sapano-panona, hapanganna bulahang bahtu’ pera’, 19 ampo’ yato pebaya’na masuli’ puha nei’, dianto hahana Kristus. Aka’ Puang Yesus Kristus dipasihapang änä’ domba ang dai aha bila’na bahtu’ kärähko’na, ang dipatei unsulängngikoa’. 20 Naonge anna dake’ dipadahi inde lino, inde Puang Yesus inang puha napama’tantu Puang Alataala la mendahi to Pesuläng. Anna yaling inde di tempo ang sidungku’ allo katämpä’, puha tunne’ kende’ umbaya’ dosammu. 21 Ungngolai inde Puang Yesus lambi’ mampetahpa’koa’ dai’ di Puang Alataala. Napatuhong sumule Puang Alataala sibaha napamatande, lambi’ mampetahpa’koa’ anna hannu dai’. 22 Dinoa malamokoa’ sikalemu-lemui sihapang to sisolasohong yaling di pa’kalemu ang tahpa’, aka’ puhamokoa’ dibasei di hao mai di dosa naonge anna umpetahpa’ia’ yato pepaturu ang tahpa’. Dianto anna kupakaenga’koa’ kuoatee sikalemuikoa’ mesa anna mesa sitonda sangkalebu inaha. 23 Aka’ puhamokoa’ untahimbo katuhoang bakahu ang dai sule di hao mai di tau ang la mate. Ampo’ yato katuhoammua’ sule yahoete’ mai di Puang Alataala ang dai aha matena. Untahimboa’ inde katuhoang aka’ umpetahpa’ Bahtakaranna Puang Alataala ang tuho anna tontong lambi’ sapano-panona. 24 Sinnoa ang tiuki’ yaling di Suha’ Masero dolu naoatee, "Katuhoanna hupatau sämpäi’ sinnoa lohpo, anna kamalekeanna sämpäi’ sinnoa bunga lohpo. Moinnakato la malahso yato lohpo anna la dondong bunganna, 25 ampo’ Bahtakaranna Dehata la tontonne’ lambi’ sapano-panona." Yato Bahtakaranna Dehata dianto Kaheba Mapia ang dipainsangngikoa’.
21 Dahi, solasohong, pakahaoi ingkänna hupanna kakarakeang sibaha ingkänna kara pa’bulitu’ anna kakalasiang. Daumpa’kasuehe anna dauntula’-tula’ tahuhu tau senga’. 2 Sinnoa mesa änä’ malea-leake’ unnaha-naha uhai susunna indona, ya’ la noa tumokoa’to dio pahallu unnaha-naha uhai susu mendehatanna, ang dai aha hau-haunna, dianto Bahtakaranna Dehata, lambi’ mengkalao yato di Bahtakaranna Dehata, la sundung yato katuhoanna sungnga’mu lambi’ salama’. 3 Dahi patontong loloi unnaha-naha Bahtakaranna Dehata aka’ puhangnga’ unsändä’ anna ungnginsammia’ ungngoatee mapia liu Dehata. 4 Anna dioa’, solasohong, maikoa’ lumba Dehata, ang dipasihapang batu ang tuho. Inde batu natibe hupatau aka’ sika nasanga dai kekuna. Ampo’ napillei anna napakeangka’ Puang Alataala mendahi batu esengang matoto’ yaling di dasanna. 5 Anna mala toukoa’ dio napadahi batu ang tuho ang la napake umpake’de’ dasang di mendehatanna. Yaling yato di dasang la mendahikoa’ imang masero ang la menomba dai’ di Puang Alataala yaling di mendehatanna. Anna inde penombaammu la natahimbo Puang Alataala aka’ sikentemokoa’ Puang Yesus Kristus. 6 Yaling di Suha’ Masero dolu yato To Pepasalama’ ang la sule dipasihapang batu ang napillei Puang Alataala, ang naoatee, "Pehingngii! Puha kupillei mesa batu masuli’. Kupatoko yaho di Tanete Sion mendahi batu esengang yaling di dasangku. Menna-menna ang mampetahpa’ pano yato di batu dai la manaho inahanna." 7 Yato To Pepasalama’ sinnoa mesa batu ang inang masuli’ pano di dioa’ ang mampetahpa’ pano. Ampo’ ingkänna tau ang dai mampetahpa’ pano inang la ditahungkung, lambi’ la sundung yato ang tiuki’ yaling di Suha’ Masero dolu ang naoatee, "Yato batu natibe to pedasang. Ampo’ setonganna yato batu mendahing batu esengang yaling yato di dasang." Anna 8 "Yato batu mendahing batu ang naonge sika titero bahtu’ batu ang sika napengkanahoi." Sika titero aka’ dai naaku umpetahpa’ Bahtakaranna Dehata, lambi’ ditahungkung situhu’ yato pahtuyunna Puang Alataala pano diii. 9 Ampo’ dioa’ solasohong, puhakoa’ napillei Puang Alataala. Napadahikoa’ imang ang si umbabe pengkähänganna Tomarayanta. Puhamokoa’ napatani mendahi petauanna ang masero lambi’ naampui tubumokoa’ dio. Napanoa anna malakoa’ umpainsangngi ingkänna tau didiona pembabena ang ma’kuasa, aka’ puhamokoa’ natambai yaling mai di kamalillingang, mentama di kamabayaanna. 10 Dolu dakangkoa’ naampui, ampo’ dinoa naampuimokoa’. Dolu dake’a’ ungnginsang pa’kalemunna, ampo’ dinoa ungnginsammia’. 11 Oa’ solasohong ang kukalemui, katuhoanta yaling inde di lino sihapangngingkea’ to sule, bahtu’ tau ang lempäng kale, aka’ tohhoingkea’ di alla’-alla’na tau ang dake’ ungnginsang Dehata. Dianto anna kupakaenga’koa’ kuoatee: dauntuhu’i pampemala karakena inahammu, aka’ yato pampemala karake umpa’bali katuhoammu di mendehatanna. 12 Aha tau ang dai ungnginsang Dehata anna dianto yato ang si mampakauho-uhokoa’ anna ang si mantanda’koa’ naoatee karake babemu. Dianto anna pahallukoa’ madaka yaling di pembabemu anna malai sika naita lolo kamapiaammu. Katämpä’anna la sika naita yato pembabe mapiammu lambi’ sika la umpudi Puang Alataala di allo kasuleanna. 13 Tuhu’-tuhu’angkoa’ pano di ingkänna to ma’pahenta di mentolinona, aka’ dianto pa’elo’na Dehata. Tuhu’-tuhu’angkoa’ pano di tomaraya, dianto pongkaha ang handang mayahoang di alla’-alla’na hupatau. 14 Tuhu’-tuhu’angkoa’ pano di tuambahsa’, aka’ dianto ang napake tomaraya untahungkung to pembabe karake anna umpudi tau ang membabe mapia. 15 Aka’ dianto indee pa’elo’na Puang Alataala, lambi’ mengkalao di pembabe mapiammu damokoa’ la natanda’ tau ang dai ungnginsang Puang Alataala. 16 Setonganna kita’a’ to Sahani damingkea’ naposabua’ dosa. Bahtuanna, beba’mingkea’ aka’ puhamingkea’ nalahpa’ Puang Alataala di hao mai di kakuasaanna dosa. Ampo’ daa yato kabeba’ammu diang la umpolalang umbabe kakarakeang. Ampo’ diare’ tuhu’i pa’elo’na Puang Alataala, aka’ inang sabua’nakoa’. 17 Pakeangka’koa’ ingkänna tau, kalemuikoa’ solamu to mampetahpa’, tuhu’-tuhu’angkoa’ dai’ di Puang Alataala anna pakeangka’koa’ tomaraya. 18 Oa’ ingkämmu sabua’, tuhu’i anna pakeangka’koa’ pongkahamu, daa ang mapia supu pengkerona anna marota’. Ampo’ moi pongkaha ang makahha’ pengkerona pahallua’ untuhu’i. 19 Ponna ke ahai di alla’-alla’mu ang nadahha pongkahamu, moinnakato anna dai aha kasalaanna, anna ke natähängngi ungngolai yato kamadahhaang aka’ umpihki’ lolo pa’elo’na Dehata, ya’ la umpamasannang Puang Alataala. 20 Daumpihki’i ungngoatee la napudikoa’ Puang Alataala ke sa’bara’koa’ ungngolai kamadahhaang aka’ pembabemu ang karake. Ampo’ ang la umpamasannang Puang Alataala, dianto ke sa’bara’koa’ ungngolai kamadahhaang aka’ pembabemu ang mapia. 21 Aka’ dianto suhunna lambi’ natambaikoa’ Puang Alataala: anna malai mapiaa’ pembabemu moinnakato anna ungngolaikoa’ kamadahhaang. Aka’ Kristus hali ungngolai kamadahhaang aka’ dioa’ anna Dianto yatoo ang mendahi pohapangang ang pahallu untindo’i. 22 "Dai aha umbabe dosa moi poro la pihsang anna dai aha ma’loseng-loseng." 23 Sika natändoi ampo’ dai nabala’. Sika nadahha, ampo’ daine’ aha nabala’ napakahea’i. Supung umbeho katuhoanna dai’ di Puang Alataala ang si umbohtu kaha-kaha anna dai si mampasise’la-se’la. 24 Kalaena Puang Yesus ang umbulle tahungkunna dosanta yaling di Kalaena naonge anna dipateii yaho di kayu sitambeng, lambi’ dipabeba’ingkea’ di hao mai di kakuasaanna dosa anna tuhoingkea’ untuhu’i pa’elo’na Puang Alataala. Anna dianto yato bila’na ang mampabono’koa’. 25 Dolu sinnoakoa’ domba ang sähsä’ lalang. Ampo’ dinoa sumulemokoa’ pano di to Pangkambi’ ang mandakai sungnga’mu.
31 Noa tumokoa’ dio bahine, tuhu’-tuhu’angkoa’ pano di muanemu, lambi’ ke ahai muanemu ang dake’ mampetahpa’ pano di Bahtakaranna Dehata, ya’ mala napetahpa’ aka’ pembabemua’. Dai pahallu untula’ing aka-aka pano, 2 aka’ ke naitai pembabemu ang masero sibaha katuhu’-tuhu’ammu, ya’ yato pembabemu la mendahi pepakuhu lambi’ la mampetahpa’ dai’ di Dehata. 3 Ponna pemalakoa’ maleke, ya’ daa ang di aneanna supu kalaemu umpamaleke, hapanganna umpamahasakoa’ beluhä’mu bahtu’ umbelo-beloikoa’ kalaemu umpake bulahang anna kaya’ masuli’. 4 Aka’ yato kamalekeang ang tahpa’ sohong yaling mai di inaha, hapanganna mesa bahine ang malunä’ anna marota’. Dianto yatoo kamalekeang ang tontong lolo anna ang masuli’ allinna di olona Puang Alataala. 5 Aka’ noanto indee yato pengkerona mai’di bahine dolu ang masero anna mampetahpa’ dai’ di Puang Alataala. Bahine yatoo umpamaleke kalaena ungngolai tuhu’-tuhu’ang pano di muanena. 6 Sinnoanna Sara untuhu’i pahentana Abraham, muanena, anna nasangai "pongkahana." Anna dioa’, solasohong, mala disangai "änä’na Sara" ke untindo’ia’ pengkerona ang mahasa anna dakoa’ mahea’ pano di aka-aka siamo. 7 Noa tumokoa’ dio muane, pahallukoa’ tuho sikarota’i bahinemu. Pihki’ liui umba la umpanoa undului, aka’ kamatohoannaii dai sinnoa kamatohoanna muane. Ampo’ moinnakato noa, bahineta sinnoa siamingkea’ kita’ di olona Puang Alataala, aka’ sika nabea toe’ Puang Alataala katuhoang ang lambi’ sapano-panona sinnoa ang nabeaingkea’. Dianto anna pahalluia’ umpakeangka’ sinnoa ang sihatang. Aka’ ponna ke dakoa’ tuho sikarota’i bahinemu, ya’ yato sambayammu dai la nahingngi Puang Alataala. 8 Katämpä’anna, ingkämmua’ solasohong, tuhokoa’ sikapiai mesa anna mesa, mesa kara anna mesa inahakoa’. Sikalemuikoa’ sihapang to sisolasohong. Sikarota’ikoa’ mesa anna mesa anna mahempo’ inahakoa’ pano di ingkänna tau. 9 Ponna ke ahai tau ang membabe karake mating, ya’ daumbala’i kakarakeang. Noa tunne’ ke ahai tau ang mantändokoa’, ya’ daumbala’i petändo. Ampo’ diare’ bala’ia’ yato pembabe karakenaii umpalauing behe dai’ di Puang Alataala, aka’ nasuhung natambaikoa’ Puang Alataala mendahi to pentindo’na anna malakoa’ untahimbo behe yaho mai. 10 Yaling di Suha’ Masero aha tiuki’ naoatee, "Menna-menna ang pemala masannang anna mahasa katuhoanna pahallu undakai pa’karanna anna dai la umpasohong tula’ karake bahtu’ tula’ bulitu’. 11 Pahallu naboli membabe karake ampo’ diare’ membabe mapia. Pahallu napengkabela-belai tuho sikapiai tau senga’. 12 Aka’ Puang Alataala si undakai ingkänna tau ang tuhu’-tuhu’ang pano di pa’elo’na, anna si nahingngi lolo sambayannaii. Ampo’ tau ang si membabe karake, ya’ napa’bali nei’." 13 Menna ang la membabe karake mating di dioa’ ke membabe mapia lolokoa’? 14 Ampo’ hapanganna ke la ungngolaikoa’ kamadahhaang aka’ pembabe mapiammu, ya’ setonganna yatoo kehongko’koa’. Dahi daummahea’ pano diii bahtu’ la bata-bata inahammu. 15 Ampo’ diare’ behoi katuhoammu pano di Kristus, anna pakeangka’ia’ situhu’ ang inang sihatang pano di Dehata. Patoka lohpo’i pentimba’mu ang la untimba’ing ke ahai tau ang mangkutanaikoa’ didiona panghannuammu dai’ di Puang Alataala. Ampo’ yaling yato di pentimba’mu pahallukoa’ umpake kara ang malunä’ sibaha mahempo’ inaha. 16 Noa tunne’ pembabemua’ pahallu mapia liu, lambi’ ke ahai tau ang unsalla pembabe mapiammu aka’ to pentindo’nakoa’ Kristus, katämpä’anna la masili. 17 Setonganna ke naelo’i Puang Alataala, mahasa puha nei’ ungngolaiingkea’ kamadahhaang aka’ pembabe mapianta andana ungngolaiingkea’ kamadahhaang aka’ pembabe karaketa. 18 Aka’ Kristus puhang ungngolai kamadahhaang moinnakato anna dai aha kasalaanna. Pihsang supu mate aka’ dosanna hupatau, dai pahallu dipa’sule-sulei. Daine’ kekasalaang, ampo’ kita’ indee ang kekasalaang ang nabala’i anna malaingkea’ nabaha dai’ di Puang Alataala. Dipatei di mentolinona ampo’ napatuho sumule Inaha Masero. 19 Donetoo le’ba’mi natehte Inaha Masero umpepainsangnging kaheba kapataloanna pano di sungnga’na ingkänna tau ang yaling di tahungkung. 20 Sika ditahungkung aka’ umbali Puang Alataala dolu naonge anna tuhoke’ Nabi Nuh. Donetoo Puang Alataala masae mangngempe anna sa’bara’ yaling di pa’kalemunna anna malai tau mengkatoba’, naonge lella’i Nuh umpapia kahpala’na. Ampo’ tahpana sompo’ le’bo’ untallangngi lino, ya’ supung kahua tau ang mentama yato di kahpala’na lambi’ salama’. 21 Yato uhai ang untallangngi lino donetoo dianto ang umpatandaang lohpo’ ada’ kasahaniang, dianto yatoo pantero’ang ang mendahing tanda kasalama’ammu. Yato ada’ pantero’ang daete’ dioatee anna malai umbasei bätäng kalaeta di hao mai di kakärähko’anta, ampo’ la mendahi tanda pa’dandianta dai’ di Puang Alataala mengkalao di unnä’ inahanta ang mapia. Inde ada’ mepasalama’ aka’ mampetahpa’ingkea’ pano di kakuasaanna Puang Alataala ang umpatuho sumule Puang Yesus Kristus. 22 Puhanna yatoo, dai’mi di suruka anna mohko’i yaho di tando kuananna Puang Alataala, dianto ongeang kakeangka’ang. Dinoa semalaeka’ang sibaha ingkänna to pa’kuasa senga’ pahallu tuhu’-tuhu’ang pano.
41 Dahi Kristus ungngolai kamadahhaang naonge tuhoi yaling inde di lino. Dianto anna pahallu toukoa’ dio umpamatoho inahammu lambi’ sadia tumokoa’ dio ungngolai kamadahhaang. Aka’ menna-menna naaku madahha aka’ Puang Yesus Kristus, ya’ bahtuanna naboling umbabe dosa. 2 Dahi, akinna tuhokangkoa’ yaling inde di lino, damong untuhu’i lolo pampemalanna hupatau, ampo’ diare’ tuhu’i pa’elo’na Puang Alataala. 3 Aka’ samangnga’ allona si umbabe sinnoa ang nababe tau ang dake’ ungnginsang Dehata. Donetoo tasampa’a’ keromu, si untuhu’ikoa’ pampemala kalaemu, si ma’malango-langokoa’, si ma’rame-rame lolokoa’, si samangkamahoinnakoa’ anna si menombakoa’ pano di dehata lino. 4 Ampo’ dinoa nakapusa’imokoa’ yato solamu aka’ dangnga’ si umposolai yaling umbabe ingkänna yatoo ang tasampa’. Dianto anna sika napakauho-uhokoa’. 5 Ampo’ la lambi’mi tempona la sika pahallu untimba’ pekutananna Puang Alataala didiona yato pembabe karakenaii. Aka’ tokang Puang Alataala la unghohto’ pembabena ingkänna tau, noa ang tuhoke’, noa ang mateng. 6 Dianto anna dipepainsangnging yato Kaheba Mapia pano di tau ang puha mate. Nasuhung anna dipanoai, aka’ moi sika mateng di mentolinona, sinnoa ang dahi pano di ingkänna tau, ampo’ la tuhoke’ di mendehatanna situhu’ pa’elo’na Puang Alataala. 7 La lambi’mi katämpä’anna lino sibaha ingkänna ihsinna. Dianto anna pahallukoa’ madaka sibaha matoho inaha anna malakoa’ ma’sambayang. 8 Ang handang pahallu, dianto sikalemuikoa’ mesa anna mesa sitonda sangkalebu inaha, aka’ ponna ke sikalemuiingkea’ solata, ya’ la tainsang toe’ siampungngi mesa anna mesa. 9 Sipotosulekoa’ mesa anna mesa anna daumpomämmäng. 10 Ingkännaingkea’ pantang untahimbo pebea ang sisenga’-senga’ yaho mai di Puang Alataala. Dahi mahasa ke tapake manahpai yato pebea yaling ungkalemui tau senga’, hapanganna: 11 menna-menna nabea pengkähängang ma’ho’ba, ya’ pahallu untula’ Bahtakaranna Puang Alataala. Anna menna-menna nabea pengkähängang ungkalemui tau senga’, ya’ pahallu napanoa umpake kamatohoang ang sule yaho mai di Puang Alataala. Lambi’ yaling di ingkänna siamo Puang Alataala la dipudi ungngolai Puang Yesus Kristus, aka’ Dianto ang ma’kuasa anna sihatang dipamatande lambi’ sapano-panona. Aming. 12 Oa’ solasohong ang kukalemui, mengekoa’ ungngolai kamadahhaang ang sinnoa maluhsunna api anna malaia’ disändä’i kamatohoanna kapampetahpa’ammu. Ampo’ daumpusa’a’ anna daumpihki’i ungngoatee, "Liba’ maho yato kamadahhaangki’ andana tau senga’." 13 Ampo’ diare’ pamasannangngia’ inahammu aka’ puhang untahimbo taha yaling di kamadahhaang ang puha naolai Kristus. Mengkalao yatoo la kahsi liukoa’ ke dipalanda’mi kamatandeanna. 14 Ponna ke napakauho-uhokoa’ tau aka’ untindo’koa’ Kristus, setonganna kehongko’koa’, aka’ bahtuanna puhamokoa’ untahimbo Inaha ang matande, dianto Inaha Maserona Puang Alataala. 15 Ampo’ daaa’ ahai di alla’-alla’mua’ ang la didahha aka’ papateang, bahtu’ maboko, bahtu’ ma’maho-maho, bahtu’ umpentamai ang tala napentamai. 16 Ampo’ ponna ke didahhakoa’ aka’ to Sahanikoa’, ya’ daummasili. Pa’kuhhu’sumanga’koa’ dai’ di Puang Alataala aka’ inang to pentindo’nakoa’ Puang Yesus Kristus. 17 La lambi’mi tempona kaha-kahanna ingkänna tau la nahohto’ Puang Alataala. Anna kita’mia’too ang la handang dolu nahohto’. Anna ponna ke kita’ia’ inde änä’-änä’na la nahohto’, ya’ londo puhaete’ne’ pano di tau ang dai umpetahpa’ yato Kaheba Mapia ang sule yaho mai di Puang Alataala. 18 Aka’ aha tiuki’ yaling di Suha’ Masero naoatee, "Moi tau ang maroho pengkerona masuhsang dipasalama’, ya’ la londoke’ne’ pano di to karake pembabena anna tau ang dai tuhu’-tuhu’ang dai’ di Puang Alataala!" 19 Dahia’, solasohong, ponna ke ahakoa’ madahha situhu’ pa’elo’na Puang Alataala, ya’ behoi katuhoammu dai’ di Puang Alataala To Metampa. Aka’ inang la napasundung yato pa’dandianna mating di dioa’. Anna daa ummali’-mali’angngia’ membabe mapia.
51 Oa’ ingkämmu pebulle ada’, aha ang pahallu kupalau mating. Kuuki’ noa indee aka’ puha tumä’ kodi’ mendahi pebulle ada’, anna puha tung kusa’bii kamadahhaang ang hali naolai Kristus dolu. Anna ke sumuleng dako’ umpalanda’ kamatandeanna, ya’ la mangngala taha touä’ koo yaling. 2 Kupalau la undakai manahpa yato ingkänna to mampetahpa’ ang ungkambi’ sihapang domba. La sika undakaia’ sitonda sangkalebu inaha situhu’ pa’elo’na Puang Alataala anna daia’ umbabe noa yatoo aka’ umpahsa. Sika kalemuii mengkalao di unnä’ inahammu; daumpihki’a’ supu saho. 3 Anna dauntomarayai yato ingkänna tau ang puha dibeakoa’ la undakai, ampo’ diare’ mendahikoa’ pohapangang pano diii. 4 Anna ke suleng yato ang Handang Pongkaha To Pekambi’, la nabeakoa’ kamatandeang ang la lambi’ sapano-panona ang sihapang songko’ malekena tomaraya. 5 Noa tumokoa’ dio ang mahäti’kangko, tuhu’-tuhu’angkoa’ pano di pebulle ada’. Mahempo’ inaha asangkoa’ anna sitahiaikoa’ mesa anna mesa. Aka’ "tau ang malängkä’ inaha napa’baline’ Puang Alataala, ampo’ tau ang mahempo’ inaha nakalemui nei’." 6 Dahia’, solasohong, mahempo’ inahakoa’ anna tuhu’-tuhu’angkoa’ dai’ di Puang Alataala ang ma’kuasa, anna malakoa’ napakeangka’ ke lambi’mi tempona. 7 Behoi dai’ di Puang Alataala ingkänna aka siamo ang mampabata-batakoa’ aka’ Dianto ang mandakai lolokoa’. 8 Madakakoa’ anna pa’kaleha loloo. Aka’ balimmu, dianto Pongkahana setang, si kalao-lao leleng sinnoa singa ang lella’ mengngehheng umpeäng tau ang la nahopängngi. 9 Balii umpake kapampetahpa’ammu ang matoho. Aka’ ungnginsammia’ ungngoatee ingkänna solasohommu to mampetahpa’ di umba-umba naongei di lino si ungngolai kamadahhaang sinnoa yato ang si ungngolaia’. 10 Anna ke puhang yato kamadahhaang ang sämpäi’ supu, ya’ la napasundummingkoa’ Puang Alataala ingkänna yato ang ungkalala’i. Bahtuanna: la napamatohokoa’, napakesumanga’koa’ sibaha napatontongkoa’. Aka’ Dianto pengkalaoanna ingkänna pa’kalemu. Dianto ang mantambaikoa’ yaling di Kristus, anna malakoa’ untahimbo taha yaling di kamatandeanna ang la lambi’ sapano-panona. 11 Pudii, aka’ Dianto ang ma’kuasa lambi’ sapano-panona. Aming! 12 Lella’ kuuki’ inde suha’ ang kapo’de’ mating, naduluiä’ ta Silwanus ang taangka’ mesa solasohonta ang mala dipetahpa’. Suhunna kuuki’ inde suha’ mating anna malakoa’ kupakesumanga’ sibaha kupainsangngikoa’ umba noa pa’kalemunna Puang Alataala pano di kita’. Pentokei loloia’ yato pa’kalemunna. 13 Salama’na are’ mating solasohommu to mampetahpa’ dinne di Bohto Babel. Noa toi ta Markus ang kupoänä’, salama’na toe’ are’ mating. 14 Sisalama’koa’ mesa anna mesa yaling di pa’kalemu. Anna kuhannuang la nabeakoa’ Puang Alataala kamasahkeang aka’ sikentekoa’ Kristus. Samantoo.