1 Yohanes

¹ Yaling inde di suha’ kuuki’ didiona To inang ahang di tempona dake’ aha lino. Puhang kiita sibaha matangki’ anna kihingngi sibaha talingangki’ tula’na Yatoo. Puha tung kianti sibaha teyyeki’ anna kiitang pembabena. Diantoo Bahtakara ang Mepatuho. ² Puhang dipepaitaing anna kiitang kami’. Ya’ kisa’biing anna kipakahebai Yato ang Mepatuho ang la tontong lolo lambi’ sapano-panona. To Mepatuho indee inang ahang sibaha Ambeta mengkalao dolu, anna puhamang kami’ dipaitai. ³ Aka ang puha kiita anna kihingngi dianto kipakahebaiingkoa’, anna malaingkea’ mesa yaling di kakalebuang. Dia tuke’ kami’-kami’ tohhomang yaling di Ambeta anna Puang Yesus Kristus Änä’na. ⁴ Kitula’ingkoa’ indee, anna malai sundung kakahsiangki’. ⁵ Dianto inde kaheba ang kihingngi di hao mai di Puang Yesus kipakahebaiingkoa’: Puang Alataala dianto kamabayaang bahtu’ dioatee kamapiaang, anna dai aha kamalillingang bahtu’ dioatee kakarakeang yaling di Kalaena. ⁶ Ponna taoatee, "Tohhomingkea’ yaling di Puang Alataala," ampo’ tuhoingkea’ yaling di kamalillingang, ya’ losendingkea’te’ disanga aka’ daingkea’ membabe situhu’ katahpa’anna Puang Alataala. ⁷ Ampo’ ke tuhoingkea’ yaling di kamabayaang, noa kamabayaanna Puang Alataala, ya’ sangkalebumingkea’too anna ingkänna dosanta nabaseiingkea’ haha titollona Puang Yesus, Änä’na. ⁸ Ponna taoatee, "Dai aha dosanta," ya’ umpasähsä’ lalangngingkea’ kalaeta anna dai tapadiinaha katahpa’anna Puang Alataala. ⁹ Ampo’ ponna ungngakuiingkea’ dosanta dai’ di Puang Alataala, la tontonne’ umpasulepano pa’dandinna anna membabe situhu’ katahpa’anna lambi’ la naampungngiingkea’ dosanta anna nabaseiingkea’ ingkänna pembabe karaketa. ¹⁰ Ampo’ ponna taoatee, "Daingkea’ aha madosa," ya’ dianto disanga unsangaiingkea’ Puang Alataala to pa’loseng-loseng anna dai tapadiinaha yato bahtakaranna, ang unsangai ingkänna tau: ’to madosa.’

¹ O ingkämmua’ änä’ku, tula’ yatoo kupayalingngingkoa’ inde di suha’ anna malai dakoa’ umbabe dosa. Ampo’ ke ahai tau umbabe dosa, dai la mahea’ aka’ aha Puang Yesus Kristus To Tahpa’ ang la mampa’tula’ingkea’ di hao di olona Ambeta. ² Anna Dianto umbala’iingkea’ dipatei lambi’ mala naampungngiingkea’ dosanta Puang Alataala. Anna dai supung dosanta, ampo’ dosanna toe’ ingkänna hupatau yaling inde di lino. ³ La malesong dioatee ungnginsang si’daingkea’ Puang Alataala ke dituhu’i loloi ingkänna pahentana. ⁴ Ke ahai tau mangngoatee, "Kuinsang si’da Puang Alataala," ampo’ dai si natuhu’i pahentana, maleso tau yatoo to pa’loseng-loseng anna dai umpadiinaha katahpa’anna Puang Alataala. ⁵ - ⁶ Ampo’ menna-menna si untuhu’i si’da-si’da pahentana, tau yatoo sundummi pa’kalemunna pano di Puang Alataala. Menna-menna mangngoatee, "Ungnginsangngä’ Puang Alataala," pahallu membabe sinnoa Puang Yesus. Noantoo la dipangnginsangngi dioatee tohhoingkea’ yaling di Puang Alataala. ⁷ Oa’ solasohongku ang kukalemui, inde kuuki’ingkoa’ tadia pahenta ang mane dianna ditula’, ampo’ pahenta ang masaeng unghingngi, yato ang puha ditula’ingkoa’ mengkalao pampahandu’anna mampetahpa’koa’ pano di Puang Yesus. ⁸ Moinnakato noa, inde pahenta mala toi dioatee bakahu, aka’ tandaang si’da-si’dang pole’ yaling di pembabena Puang Yesus anna yaling di kalaemua’. Aka’ tuhtuang umpelleimokoa’ kamalillingang anna mesilong pole’ kamabayaang yaling di pembabemua’. ⁹ Ponna aha tau mangngoatee, "Tuho yalimmä’ di kamabayaang; dai aha sallaanna pembabeku." ampo’ ungkahiri’ solana to mampetahpa’, ya’ tau yatoo tuho yalingke’te’ di kamalillingang. ¹⁰ Ampo’ menna-menna ungkalemui solana to mampetahpa’, tau yatoo tuho yalimmi di kamabayaang, anna dang aha katiteroanna la napolalang manaho tama di dosa. ¹¹ Ampo’ menna-menna ungkahiri’ solana, tau yatoo meinaha karake, dianto yaling loloke’ di kamalillingang, anna dai nainsang naoatee, "Umba la kuola?" aka’ dai nainsang umpasise’la kamapiaang anna kakarakeang. ¹² Oa’ änä’ku, kuuki’ingkoa’ yaling inde di suha’ aka’ diampungngimingkoa’ dosammu ungngolai pengkähänganna Puang Yesus. ¹³ Anna noa toi dioa’ to dipoambe, kuuki’ingkoa’ aka’ ungnginsammokoa’ Puang Yesus, To inang ahang di tempona dake’ aha lino. Anna ingkämmu toia’ änä’ muane, kuuki’ingkoa’ aka’ untalomokoa’ Pongkahana setang. ¹⁴ Ya’ kuuki’ingkoa’ yaling inde di suha’, änä’ku, aka’ ungnginsammokoa’ Ambeta. Anna kuoa salakingkoa’, to dipoambe, aka’ ungnginsammokoa’ Puang Yesus, To inang ahang di tempona dake’ aha lino. Noa toi ingkämmua’, änä’ muane, aka’ matoto’mia’ kapampetahpa’ammu anna umpayalimmia’ di inahammu karanna Puang Alataala, untalo tumokoa’ Pongkahana setang. ¹⁵ Daa umpalupano inahammu di ingkänna kakarakeang yaling inde di lino. Aka’ ponna umpanoa, maleso anna dai la lupano inahammu di Ambeta. ¹⁶ Aka’ yato sipa’ karakena hupatau yaling inde di lino, sinnoanna: membabe situhu’ pampemalanna, kamailuang, anna kaungngangka’-angka’ang kalae, dai sule yaho mai di Ambeta, ampo’ dahi yaling di lino. ¹⁷ Inde ihsinna lino sibaha ingkänna kamailuang karakena daete’ la tontong lolo. Ampo’ menna-menna umpembabeing pa’elo’na Puang Alataala dianto ang la tuho lolo lambi’ sapano-panona. ¹⁸ Oa’ änä’ku, tempo dinoa la ungngoloimingkea’ kapuhaanna lino. Puhamokoa’ dipainsangngi dioate la sule mesa to pambahananna tau ang la umpa’bali Puang Yesus Kristus. Anna mai’ding kende’ dinoa, dianto anna tainsammi taoatee dinoa la kapuhaannang lino. ¹⁹ Yato ingkänna tau ang umpa’bali Puang Yesus sule yaling siang mai di alla’-alla’taa’, ampo’ maleso anna tadiaia’ solata. Aka’ ke la solata si’da-si’daia’, la tontong loloingkea’ sibaha-baha. Ampo’ napelleiingkea’ anna malai tandaang dioatee ingkänna yato tau tadia solata. ²⁰ Ampo’ dioa’ dio puhamokoa’ dipatamai Inaha Masero ang napatuhung Puang Yesus Kristus lambi’ ungnginsang asammia’ pepakuhu ang tahpa’. ²¹ Yaling inde di suha’ kuuki’ingkoa’, dai kuoate dake’a’ ungnginsang yato kaheba katahpa’ang, ampo’ setonganna ungnginsammia’ yato kaheba katahpa’ang. Anna ungnginsang toia’ ungngoate dai aha kaheba ang dai tahpa’ la sule yaling mai. ²² Darakate’ tau ang dioaintee to pa’loseng-loseng dianto ang mangngoatee, "Puang Yesus tadia To Dilanti’ la Mepasalama’"? Tau yatoo dianto balinna Puang Yesus Kristus, anna dia tunto ang umbahoi Ambeta sibaha Änä’na. ²³ Menna-menna umbahoi yato Änä’, tau yatoo dai tohho yaling di Ambeta. Ampo’ menna-menna tontong lolo ungngakui Änä’, inang ungnginsang Ambeta. ²⁴ Dahi pahallu umpayaling loloa’ di inahammu yato Kaheba Mapia ang puha unghingngia’ mengkalao pampahandu’anna anna mampetahpa’koa’. Aka’ ponna ke umpanoangnga’, ya’ la tohho lolomokoa’too yaling di Ambeta anna Änä’na. ²⁵ Aka’ Kalaena Puang Yesus ma’dandi naoatee, "La kubeakoa’ katuhoang lambi’ sapano-panona." ²⁶ Ingkänna inde kuuki’ingkoa’ didiona tau ang la mampasähsä’ lalangkoa’. ²⁷ Ampo’ dioa’ dio puhamokoa’ nabea Puang Yesus Inaha Masero. Anna yato Inaha Masero tontong lolo tohho yaling di kalaemua’ lambi’ dang pahallu aha tau senga’ la umpakuhukoa’ pepakuhu ang bakahu. Aka’ napakuhu lolomokoa’ Inaha Masero ingkänna ang la pahallu; anna yatoo tahpa’, dai ditula’ kale. Dianto anna la umpatontong lolongnga’ kapampetahpa’ammu pano di Puang Yesus. ²⁸ Dahi, ingkämmua’ änä’ku, la umpatontong lolokoa’ kapampetahpa’ammu pano di Puang Yesus. Aka’ ke umpanoai, suleito umpepaitaing Kalaena, ya’ daingkea’ la mahea’ anna masili di hao di olona. ²⁹ Dahi aka’ ungnginsammia’, lambi’ ungnginsang toe’a’ ungngoate ingkänna tau ang membabe katahpa’ang disanga änä’-änä’na Puang Alataala.

¹ Pihki’mitoo, tandana käyyäng pa’kalemunna pano di kita’, lambi’ disangaiingkea’ änä’-änä’na. Anna inang änä’na si’damingkea’ Puang Alataala. Dianto anna damingkea’ nainsang to tamampetahpa’ yaling inde di lino, aka’ dai ungnginsang Dehata. ² Oa’ solasohongku ang kukalemui, dinoa änä’namingkea’ Puang Alataala, ampo’ dake’ nalambi’ pihki’ta la umbaingkea’ noa ke dako’mi. Moinnakato noa, tainsang taoatee la sinnoaingkea’ Puang Yesus ke umpepaitaming Kalaena, aka’ la taitang pole’ umba noa Kalaena ang setonganna. ³ Anna menna-menna ang hannu pano, la umpamasero pembabena yaling inde di lino, umba noa Puang Yesus masero. ⁴ Menna-menna umbabe dosa untehkai pahentana Puang Alataala, aka’ pembabe yatoo umpa’bali pahentana Puang Alataala. ⁵ Ungnginsammi ungngoatee sule Puang Yesus tama inde di lino anna malai umpa’dai dosanta. Anna ungnginsang toia’ ungngoatee daine’ madosa Puang Yesus. ⁶ Dahi menna-menna tohho lolo yaling di Puang Yesus dang la si umbabe dosa. Ampo’ menna-menna si umbabe dosa, tau yatoo daine’ ungnginsang Puang Yesus anna dake’ne’ la nakaleso pa’elo’na. ⁷ O ingkämmua’ änä’ku, daa umpabeia’ tau napasähsä’ lalangngo. Menna-menna umbabe pa’elo’na Puang Alataala, tau yatoo mesa to tahpa’ umba noa Puang Yesus tahpa’. ⁸ Ampo’ menna-menna si umbabe lolo dosa, tau yatoo änä’-änä’na Pongkahana setang, aka’ mengkalaoke’ anna dake’ aha lino anna inang madosanne’ Pongkahana setang. Diantoo anna mentamang di lino Änä’na Puang Alataala aka’ la umpa’dai pengkähänganna Pongkahana setang. ⁹ Menna-menna mendahing änä’-änä’na Puang Alataala, tau yatoo dang la si umbabe dosa aka’ sipa’na Puang Alataala yalimmi di kalaena, dia tuke’ aka’ Puang Alataala mendahing Ambena. ¹⁰ Dahi maleso anna sisenga’angngi diita änä’-änä’na Puang Alataala anna änä’-änä’na Pongkahana setang. Aka’ menna-menna dai umbabe katahpa’ang bahtu’raka dai ungkalemui to mampetahpa’, tau yatoo tadia änä’-änä’na Puang Alataala. ¹¹ Dianto inde kaheba ang puha unghingngia’ mengkalao pampahandu’anna mampetahpa’koa’: la sikalemuiingkea’ mesa anna mesa. ¹² Daingkea’ la membabe sinnoa ta Kain, aka’ yato ta Kain mendahing änä’na To handang karake babe lambi’ umpatei arinna. Akana umpatei arinna? Aka’ si membabe karakene’ ta Kain anna si membabe mapiane’ arinna. ¹³ O solasohongku, daa ungkapusa’i ke nakahiri’koa’ to tamampetahpa’ yaling inde di lino. ¹⁴ Tainsammia’ taoatee lahpa’mingkea’ di hao mai di kamateang lutama di katuhoang. Tandana umpelleimingkea’ kamateang, ya’ si ungkalemuimingkea’ solata to mampetahpa’. Ampo’ menna-menna dai ma’kalemu, tontong loloke’ne’ yaling di kamateang. ¹⁵ Anna menna-menna ungkahiri’ solana to mampetahpa’, tau yatoo sihapang papateang anna maleso dioatee yato to papateang daine’ aha katuhoang sapano-panona yaling di kalaena. ¹⁶ Puang Yesus Kristus puha umpapepatei Kalaena aka’ nakalemuiingkea’. Diantoo tapohapangangnga’ ma’kalemu. Dahi la tapalla’ang toua’ kita’ umbeho kalaeta la unsa’ding ma’kahupa-hupa kamasuhsaang aka’ ungkalemuiingkea’ solata to mampetahpa’. ¹⁷ Ampo’ mesa tau ang sundummi katuhoanna, ke dai ma’kalemu ungngita solana ang dai sundung kapahalluanna, ya’ dai ma’kalemu sinnoa Puang Alataala. ¹⁸ Oa’ ingkämmu änä’ku, yato ang dioaintee pa’kalemu si’da-si’da dai di hao supu di sua, ampo’ la pahallu mengkalao yaling di unnä’ inaha lemba’ di pembabe. ¹⁹ Ponna si ungkalemui si’da-si’daingkea’ solata to mampetahpa’, tainsammia’too taoatee änä’-änä’na si’damingkea’ Puang Alataala. Anna la masannammi inahanta aka’ daingkea’ la bata-bata di hao di olona. ²⁰ Aka’ moinnakato ma’tula’-tula’ inahanta naoatee, "Umbai damä’ aha la salama’ aka’ karake pembabeku," ampo’ dai la dipehingngii aka’ käyyäng puhane’ kakuasaanna Puang Alataala andana inahanta, aka’ Dianto ang ullosa ihsi inahanta. ²¹ Oa’ solasohongku ang kukalemui, ponnato dang bata-bata inahanta, damingkea’to la mahea’ di hao di olona Puang Alataala. ²² Anna la nahingnging ingkänna palaunta, aka’ si tapembabeming pahentana anna si tapembabeming pampemalanna. ²³ Inderanne’ pahentana Puang Alataala pano di kita’: La umpetahpa’ingkea’ sanganna Puang Yesus Kristus, Änä’na, anna la sikalemuiingkea’ mesa anna mesa umba noa ang puha napahentaingkea’. ²⁴ Menna-menna si umpembabeing yato pahentana, tau yatoo tohho yaling di Puang Alataala anna Puang Alataala tohho yaling di kalaena. Anna tainsammi taoatee tohhong yaling di kalaeta aka’ puhamingkea’ napatamai Inaha Maserona.

¹ Oa’ solasohongku ang kukalemui, dakoa’ la si madihhi’ umpetahpa’ tau moi la naoatee, "Nakuasaimä’ Inaha Masero." Aka’ mai’ding ang unsanga kalaena nabi, ampo’ setonganna tadia, kende’ anna mao mampakuhu tama inde di lino. Dahi la pahallua’ umpemalesoi dolu bahtu’ la Inaha Maserona si’daraka Puang Alataala ungkuasaii menge mampakuhu, bahtu’ la tadiaare. ² La malesongnga’ ungngita tau ang nakuasaing Inaha Masero ke naakui naoatee, "Puang Yesus To Dilanti’ la Mepasalama’ tamang inde di lino menghupatau." ³ Ampo’ menna-menna ang dai mangngakui, tau yatoo dai napentamai Inaha Maserona Puang Alataala, ampo’ napentamaine’ inahanna setang bahtu’ dioatee balinna Puang Yesus Kristus. Puhangnga’ unghingngi la sule inaha yatoo anna ahana suleng yaling inde di lino. ⁴ Oa’ änä’ku, dioa’ dio änä’-änä’namokoa’ Puang Alataala anna puhamokoa’ untalo ingkänna ang unsanga kalaena nabi ampo’ setonganna tadia, aka’ ma’kuasa puhane’ Inaha Masero ungkuasaikoa’ andana yato inaha ang ungkuasai to tamampetahpa’. ⁵ Yato ingkänna ang unsanga kalaena nabi ampo’ setonganna tadia, yaling mai di alla’-alla’na to tamampetahpa’ lambi’ tula’na situhu’ pampemalanna solana anna napehingngii. ⁶ Kami’mitoo änä’-änä’na Puang Alataala. Dahi menna-menna ungnginsammi Puang Alataala, tau yatoo la umpehingngii pepakuhungki’. Ampo’ menna-menna tadia änä’-änä’na Puang Alataala, tau yatoo daine’ umpehingngii pepakuhungki’. Noantoo tapangnginsangngi alla’na pepakuhu tahpa’na Inaha Masero anna pepakuhunna inaha ang la mepasähsä’ lalang. ⁷ Ingkämmua’ solasohongku ang kukalemui, la sikalemuiingkea’ mesa anna mesa aka’ yato pa’kalemu yaho mai di Puang Alataala. Anna menna-menna ang si ma’kalemu, tau yatoo maleso anna änä’-änä’nai Puang Alataala anna ungnginsammi Puang Alataala. ⁸ Aka’ sipa’na Puang Alataala ma’kalemu. Dahi menna-menna ang dai ungkalemui solana, tau yatoo maleso daine’ ungnginsang Puang Alataala. ⁹ Puang Alataala puha unsuo Änä’ samboana mentama di lino anna malai nabeaingkea’ katuhoang lambi’ sapano-panona. Noantoo napaitaiingkea’ pa’kalemunna pano di kita’. ¹⁰ Aka’ ang dioainte pa’kalemu tadia kita’ ang ungkalemui Puang Alataala, ampo’ Puang Alataala ungkalemuiingkea’ anna unsuo Änä’na umbala’iingkea’ dipatei lambi’ mala diampungngi dosanta. ¹¹ Oa’ solasohongku ang kukalemui, aka’ noa yato pa’kalemunna Puang Alataala pano di kita’, dahi pahallu touingkea’ kita’ sikalemui mesa anna mesa. ¹² Moinnakato dake’ aha tau moi poro la mesa ungngita Puang Alataala, ampo’ ponna sikalemuimingkea’ mesa anna mesa, ya’ keboanto pa’kalemunna Puang Alataala yaling di kita’, anna tontong lolo Puang Alataala tohho yaling di kalaeta. ¹³ Aka’ nasuhung tainsangnga’ taoatee tohhomingkea’ yaling di Puang Alataala anna tohho toi yaling di kalaeta, aka’ puhamingkea’ napatamai Inaha Maserona. ¹⁴ Anna puhang kami’ kiita anna kisa’biing kioatee Ambeta unsuo Änä’na mentama di lino mendahi To Pepasalama’. ¹⁵ Menna-menna mangngakui naoatee, "Puang Yesus Dianto Änä’na Puang Alataala," tau yatoo tohhong yaling di Puang Alataala anna Puang Alataala tohho yaling di kalaena. ¹⁶ Anna tainsammi sibaha tapetahpa’ taoatee pa’kalemunna Puang Alataala mentama di kalaeta. Sipa’na Puang Alataala ma’kalemu. Menna-menna ungkalemui lolo solana, tau yatoo tohhong yaling di Puang Alataala anna Puang Alataala tohho yaling di kalaena. ¹⁷ Dipasundung pa’kalemu yaling di kalaeta anna malai daingkea’ mahea’ di hao di olona Puang Alataala ke lambi’mi Allo Panghohto’ang. Daingkea’ la mahea’ aka’ sinnoang pembabeta Puang Yesus. ¹⁸ Ke ahai pa’kalemu yaling di kalae, daingkea’ la mahea’. Aka’ ponna sundummi pa’kalemu yaling di kalae, dianto ang la umpa’dai kamahea’ang. Aka’ daingkea’ la nahoa pantahungkungang yato ang si napihki’ hupatau. Dahi menna-menna mahea’, tau yatoo dake’ sundung pa’kalemunna yaling di kalaena. ¹⁹ Dianto anna si ma’kalemumingkea’ aka’ dolu puhane’ Puang Alataala ungkalemuiingkea’. ²⁰ Ponna aha tau mangngoatee, "Ungkalemuiä’ Puang Alataala," ampo’ ungkahiri’ solana to mampetahpa’, tau yatoo ma’loseng-loseng. Aka’ solana ang naita anna dai nakalemui, londonanne’ Puang Alataala ang dai naita. ²¹ Anna Diae’ ang umbeaingkea’ inde pahenta naoatee, "Menna-menna ungkalemui Puang Alataala pahallu toi la ungkalemui to mampetahpa’."

¹ Menna-menna mampetahpa’ naoatee, "Puang Yesus To Dilanti’ la Mepasalama’," tau yatoo änä’na Puang Alataala. Anna menna-menna ungkalemui Ambeta, tau yatoo ungkalemui toe’ änä’-änä’na Ambeta. ² Ponna ungkalemuiingkea’ Puang Alataala anna tatuhu’i pahentana, tainsammi taoatee ungkalemuiingkea’ änä’-änä’na Puang Alataala. ³ Aka’ ponna untuhu’ingke pahentana Puang Alataala, ya’ takalemui tunto nei’. Anna yato pahentana dai matingngi, ⁴ aka’ ingkänna änä’-änä’na Puang Alataala untalo ingkänna kakarakeang yaling di lino. Kapampetahpa’ammitoo pano di Puang Yesus anna malaingkea’ untalo kakarakeang. ⁵ Mennakae’ la mala untalo ingkänna kakarakeang yaling inde di lino, ke tadiai kita’a’ ingkänna ang mampetahpa’ dioatee, "Puang Yesus Dianto Änä’na Puang Alataala." ⁶ Puang Yesus Kristusmitoo ang puha sule ditero’ uhai anna umpatitollo hahana. Dai sule supung la ditero’ uhai, ampo’ ditero’ uhai sibaha umpatitollo hahana. Anna Inaha Maserontoo unsa’biii naoate Puang Yesus Dianto Änä’na Puang Alataala, aka’ ahana tahpa’ sipa’na Inaha Masero. ⁷ aka’ aha tallu ang unsa’bii didiona Puang Yesus Kristus: ⁸ Inaha Masero, uhai pantero’anna, anna haha titollona; inde tallu dai aha sisala kasa’bianna. ⁹ Aka’ kasa’bianna hupatau anna tapetahpa’, londoke’ne’ kasa’bianna Puang Alataala, aka’ Kalaena unsa’bii didiona Änä’na. ¹⁰ Menna-menna umpetahpa’ Änä’na Puang Alataala, tau yatoo umpayalimmi di inahanna yato kasa’biang. Ampo’ menna-menna dai umpetahpa’ Puang Alataala, tau yatoo unsangai Puang Alataala to pa’loseng-loseng, aka’ dai napetahpa’ kasa’bianna didiona Änä’na. ¹¹ Anna dianto inde kasa’bianna naoatee: Puhamingkea’ nabea Puang Alataala katuhoang sapano-panona, anna Änä’nantoo Dianto kasuleanna yato katuhoang. ¹² Menna-menna tohho yaling di Änä’na Puang Alataala, tau yatoo ullambi’mi katuhoang. Ampo’ menna-menna dai tohho yaling di Änä’na Puang Alataala, tau yatoo dai ullambi’ katuhoang. ¹³ Oa’ ingkämmu ang umpetahpa’mi sanganna Änä’na Puang Alataala, kuuki’ingkoa’ yaling inde di suha’ anna malai ungnginsang si’da-si’daa’ ungngoatee, "Ullambi’mang katuhoang sapano-panona." ¹⁴ Anna daingkea’ la bata-bata pano di olona Puang Alataala, aka’ la nahingngimingkea’ ke umpalauingkea’ aka-aka situhu’ pa’elo’na. ¹⁵ Aka’ tainsammia’ taoatee nahingnging ingkänna palaunta, dahi la tainsang toe’a’ taoatee taampuing yato palaunta. ¹⁶ Ponna ahakoa’ ungngita solamu to mampetahpa’ umbabe dosa, la umpa’sambayangngingnga’ dai’ di Puang Alataala, anna malai umpamasero sumule katuhoanna. Ampo’ dakoa’ kuoainte la pahallu umpa’sambayangnging yato tau ang umbabe dosa ang la mebaha pano di kamateang sapano-panona. Aka’ aha tau ang membabe noa yatoo. ¹⁷ Ingkänna babe karake dipomadosa. Ampo’ aha dosa dai la mebaha pano di kamateang sapano-panona. ¹⁸ Tainsang taoatee menna-menna mendahing änä’-änä’na Puang Alataala, tau yatoo dang la si umbabe dosa. Ampo’ pengkähänganna Pongkahana setang la nadakai lolo Änä’na Puang Alataala anna malai dai umpasähsä’ lalang änä’-änä’na. ¹⁹ Tainsang taoatee änä’-änä’naingkea’ Puang Alataala; anna tainsang toia’ taoatee ingkänna to tamampetahpa’ nakuasaine’ Pongkahana setang. ²⁰ Tainsang toia’ taoatee suleng Änä’na Puang Alataala anna nabuhkeiingkea’ inahanta anna malaingkea’ ungnginsang si’da-si’da Puang Alataala. Ya’ tohho si’da-si’damingkea’ yaling di Puang Alataala anna Puang Yesus Kristus Änä’na. Dianto Dehata ang setonganna anna Dianto Katuhoang lambi’ sapano-panona. ²¹ Oa’ änä’ku, la undakai manahpakoa’ kalaemu andana umpenombaikoa’ dehata ang tadia Dehata ang si’da.