Taitu

Akaka a̱ Bulusu a kubana u

Taitu

Ukuna u katagarda ka nam pa

Taitu a̱yi ɗa vuza na u ɓa̱nka̱i vuzavusuki Bulusu n ulinga. Bulusu u ɗana ta̱ akaka a nam pa a kubana u Taitu adama a na Taitu va wo okpo ta̱ a̱ likuci i Karate a̱yi Bulusu tamkpamu u lyaꞋi kelime nu nwalu.

Bulusu u dansai uteku u na u gaꞋin aza o Kutoni ra̱ka̱ o yongo. U doku u yaꞋin kadanshi n ugboku dem punu a̱ a̱Ꞌisa̱ a.

Vuza kelime ɗa baci vi a̱ a̱Ꞌisa̱, ko mokoshi, ko ma̱ma̱ci, ko kolobo, ko mekere, vi ta̱ a̱ kuciya̱ kuyotsongusu ku singai punu a katagarda ka nam pa.

Ili i na yi punu udariki a katagarda ka nam pa

1. Kuɓa̱yuwa̱ (1:1-4)

2. Kadanshi ko kutono adama a aza e kelime a̱ A̱Ꞌisa̱ (1:5-16)

3. Kadanshi ko kutono adama a aza o Kutoni (2:1—3:11)

4. Odoki a kubana u Taitu n ikya̱shi yi ukocishi (3:12-15)

Kuɓa̱yuwa̱

¹Mpa ɗa Bulusu. Mpa kagbashi ka̱ Ka̱shile kaꞋa, mpa kpamu vuzavusuki ɗa vi Yesu Kirisiti Kishi. Ka̱shile ka̱ suku mu ta̱ n tuka̱ n kuneke ku ka̱ɗu wa aza a na u zagbai. Ɗa kpamu u suki mu n yotsongusu le e yeve ili i mayun i na i kuyotsongu le uteku u na o kuyongo, ka̱ta̱ Ka̱shile ka pana uyoꞋo u le. ²Ili i mayun i nam pa i neke le ta̱ a̱ɗu a̱ ida̱shi a wuma u babu uteku, u na Ka̱shile ka yaꞋankai le uzuwakpani kafu kugita̱ ka aduniyan. Ka̱shile ta na ka ci yaꞋan aꞋuwa ba. ³Gogo na ana ayin a shanai, ɗa wu uta̱ka̱i Arabali a Singai a nam pa e keteshe, ɗa a̱tsu ci a kusala a ɗa u yaba dem. N kadanshi ka̱ Ka̱shile Kishi ka̱ tsu, ɗaɗa u zuwai mu n yaꞋanka yi ulinga u nam pa.

⁴Taitu, mi ta̱ a kuɗanaka wu katagarda ka nam pa. Avu maku ma mayun maꞋa a̱ ubuta̱ wu uneki u ka̱ɗu u tsu.

Ka̱sa̱kpa̱ Ka̱shile Esheku a̱ tsu n Yesu Kirisiti Kishi, e neke wu kasingai† m ma̱ta̱na̱.

Ulinga u Taitu a Karita

⁵N ka̱sa̱kpa̱ wu ta̱ o kotogu ka Karita adama a na vu kotso ulinga u na ci yaꞋin ɗe, ka̱ta̱ vu zagba nkoshi m gba̱ra̱-gba̱ra̱† ma̱ A̱Ꞌisa̱ a aza o Kutoni a̱ likuci dem uteku u na n danai nu vi yaꞋan.⁶Mokoshi ma̱ gba̱ra̱ u yotso ta̱ wo okpo babu ili i na a kushikaka yi, adama a na u yongo ta̱ ɗe mayin. U yaꞋan vuza vu vuka vi te, ka̱ta̱ kpamu u shamgba n vuka vi ni endeꞋen. Muku n ni feu, n yaꞋan aza o Kutoni a na a iwain ili i kavama, ɗa i a kuyongo n wuma u singai ɗa i kpamu babu ugbawansuvu. ⁷Mokoshi ma̱ gba̱ra̱ a̱yi ɗa vuza vi kelime vu ulinga u Ka̱shile. U yaꞋan babu ili i na a kushikaka yi adama a nannai ka̱ta̱ u yaꞋan vuza va̱ a̱ra̱ɗi ba, ka̱ta̱ kpamu u yaꞋan vuza vu wupa gogoꞋo ba. U yaꞋan kosoꞋi ka̱ ma̱ra̱ ka̱u ba.1:7 A ayin a nan lo, Ayahuda o tsu soꞋo ta̱ ma̱ra̱ kenu mo okpo le tsa̱ a̱guma̱ i baci nu mɓa̱la̱. Ka̱ta̱ kpamu o soꞋo kenu i baci a kulyaꞋa ilikulyaꞋa. Amma a ayin a̱ tsu a nam pa tsa kufuɗa tso soꞋo kenu ka̱ta̱ tsu ka̱sa̱kpa̱ ba, adama a nannai ka̱ta̱ tsu soꞋo ba ko kenu. U yaꞋan vuza vu vishili ba, ka̱ta̱ kpamu u yaꞋan vuza vu ucigi vi ikebe ka̱u ba.

⁸Wo okpo vuza na u kuciga omoci a kpaꞋa ku ni, ka̱ta̱ u ciga kakuna ka singai ayin dem. U yongo n ugboji, ka̱ta̱ u yaꞋan ili derere. U yaꞋan kpamu n wuma u ciɗa u na Ka̱shile ka cigai, ka̱ta̱ u fuɗa kadana ka̱ci ka̱ ni mayin. ⁹U ka̱na̱ n utsura kuyotsongusu ku mayun ku kadanshi ka̱ Ka̱shile. Ka̱ta̱ u yaꞋan ulinga n kuyotsongusu ku singai ku nam pa, u yaꞋanka uma kadanshi ko odoki, ka̱ta̱ u ɓarangu aza a na i a̱ vishili n kadanshi ka̱ Ka̱shile.

¹⁰U yaꞋan nannai, adama a na uma i ta̱ lo n a̱bunda̱i a na o goyoi kuyotsongusu ku mayun. Uma a nam pa a ci yaꞋan ta̱ kadanshi ka kavama ayin tutu n a̱ ya̱nsa̱i uma. A̱ ka̱tsuma̱ ka nlum n nam pa, aza a̱ a̱bunda̱i e le a tsu kpakalaka ta̱ kudana uma ra̱ka̱ a kiɗa avaja. Uma a nam pa a laꞋa ta̱ aza a na a buwai n kawasasa. ¹¹U yotso ta̱ vu sa̱nka̱ le kuyaꞋan kadanshi. A zuwa ta̱ ɗe iꞋuwa i uma i ka̱sa̱kpa̱ uye u mayun n kuyotsongusu ka aꞋuwa ku le. A ci yaꞋan ta̱ nannai adama a na a yaꞋan ikebe n uye u gbani-gbani. ¹²Vuma vi yoku, keneki kaꞋa o kotogu ka Karita u yaꞋan ta̱ kadanshi ka uma a nam pa, u danai, “Uma a Karita ra̱ka̱ aza a aꞋuwa a ɗa. Nnama m gbani-gbani n ɗa, a ciga ulinga ba, sai kulyaꞋa n a̱bunda̱i.” ¹³Na va mayun ɗa. Vu ɓarangusu le n utsura, adama a na vu zuwa le o okpo aza a utsura a̱ ubuta̱ wu uneki u ka̱ɗu u le. ¹⁴Ka̱ta̱ kpamu a̱ ka̱sa̱kpa̱ kupana iteꞋe ya Ayahuda, ka̱ta̱ kpamu a̱ ka̱sa̱kpa̱ kutono wila̱ u uma a na a̱ shirikpa̱i kadanshi ka mayun kucina̱.

¹⁵Ili dem yi ta̱ ciɗa a̱ ubuta̱ u uma a na a̱ɗu e le i ciɗa. Amma ili i ciɗa yi lo a̱ ubuta̱ u uma a na a̱ la̱nga̱sa̱i ka̱ci ke le, ɗa i babu uneki u ka̱ɗu ba, adama a na a̱ɗu e le n kusheshe ku le kpamu i ta̱ n a̱shinda̱. ¹⁶Uma a nan lo a ci ɗika ta̱ an e yevei Ka̱shile, amma o goyo yi ta̱ adama a uteku u na i o kuyongo. A tsu pana ba, una̱mgbi u le u tsu sa̱nka̱ le ta̱ kuyaꞋan ili i singai. Yaba dem u tsu goyo le ta̱.

Kuyotsongusu ku singai

¹Amma avu, dana aza o Kutoni a yaꞋan ida̱shi i na yi derere n kuyotsongusu ku mayun. ²Yotsongusu nkoshi m gba̱ra̱-gba̱ra̱ ma̱ A̱Ꞌisa̱ a aza o Kutoni n ka̱na̱ ka̱ci ke le, o okpo aza a na uma a kucikpa, ka̱ta̱ o yongo n ugboji. A yaꞋan n uneki u ka̱ɗu n utsura, a shana kpamu n ucigi n kureme ku ka̱ɗu.

³Tsu nan lo feu, yotsongusu a̱ma̱ci a̱ gba̱ra̱-gba̱ra̱ o yongo uteku u na u yotsoi vuma vu na vi a kuyaꞋanka Vuzagbayin tsugbashi. Ka̱ta̱ a̱ ka̱ra̱Ꞌa̱ n a yaꞋin kadanshi ka kavama ka uma ba, ka̱ta̱ kpamu o okpo aza a na o kusoꞋo ma̱ra̱ ba. Amma a kucikpa o okpo aza a na o kuyotsongusu ili i singai. ⁴A̱ma̱ci a̱ gba̱ra̱-gba̱ra̱ a nam pa o yotsongusu a̱ma̱ci a wawaꞋa a ciga ali e le m muku n le. ⁵O yotsongusu le o yongo n ugboji ka̱ta̱ o yongo kpamu ciɗa. Ka̱ta̱ kpamu o yotsongusu le a̱ la̱na̱ iꞋuwa i le ka̱ta̱ a yaꞋan ili i na i gaꞋin. Ka̱ta̱ o yotsongusu le a panaka ali e le. A yaꞋan baci nannai a̱ kutuka̱ n kugoyi a̱ ubuta̱ u Kadanshi ka̱ Ka̱shile ba.

⁶Tsu nan lo feu, dana olobo a utsura o yongo n ugboji a̱ ubuta̱ wi ili i na a kuyaꞋan dem. ⁷Ka̱ta̱ avu a̱ ka̱ci ka̱ nu vo okpo agisana we le a̱ ubuta̱ u kuyaꞋan ili i singai dem. Ka̱sa̱kpa̱ ili i na vi a kuyaꞋan dem i yotsongu ida̱shi i singai n asuvu a̱ yuwu a̱ ubuta̱ wi ili i na vi o kuyotsongusu. ⁸Ka̱sa̱kpa̱ kuyotsongusu ku nu ku yaꞋan derere, ta lo vuza wa dansuka wu a̱ ubuta̱ u kuyotsongusu u nu. Ka̱ta̱ aza a na baci i a kuciga kanananai n avu i ta̱ o kokpo n wono adama a na a̱ kuciya̱ ili i gbani-gbani i na a kudansuka wu ba.

⁹Agbashi a panaka azagbagbaꞋin e le, ka̱ta̱ a yaꞋan tsu na u yotsoi adama a na a̱ɗu a azagbagbaꞋin e le a pana uyoꞋo. Ka̱ta̱ a yaꞋanka le ugbawansuvu, ko a yaꞋan uboki ba. ¹⁰Amma o okpo aza a na uma a̱ kushuku n ele, ka̱ta̱ kpamu o yongo mayin. A yaꞋan baci nannai a kuzuwa ta̱ kuyotsongusu ku Ka̱shile Kishi ko okpo ili i na uma a i a kuciga a̱ ubuta̱ wi ili dem.

¹¹Ta u yotsoi ili i yaꞋan nannai, adama a na Ka̱shile ko yotsongu ta̱ ugaꞋin u ni u uma ra̱ka̱, adama a na a̱ ciya̱ wishi. ¹²UgaꞋin u Ka̱shile u yotsongusu tsu ta̱ tsu ka̱sa̱kpa̱ kuyongo babu Ka̱shile, ka̱ta̱ tsu ka̱sa̱kpa̱ kupana uyoꞋo wi ili yu unushi. Aduniyan a nam pa a̱ na̱mgba̱ ta̱, amma ci yongo punu n kuka̱na̱ ku ka̱ci ka̱ tsu. U yotso ta̱ feu ci yongo m ma̱riki ka̱ta̱ Ka̱shile ka pana uyoꞋo. ¹³A̱ ka̱tsuma̱ ka ayin a nam pa a, ci ta̱ feu a kinda kelime ayin tutu a̱ ubuta̱ u kanna ke mereve ku Uba̱nga̱ri Ka̱shile n Kishi, a̱yi Yesu Kirisiti. A kanna ka nan lo, Yesu Kishi wi ta̱ o kubono n tsugbayin ci ni ra̱ka̱. ¹⁴U neke ta̱ wuma u ni adama a na wi isa tsu a̱ ubuta̱ wu unushi dem, ka̱ta̱ feu u za̱Ꞌa̱ tsu ciɗa. Ɗa u nekei wuma u ni adama a na u zuwa tsu tso okpo uma a̱ ni, adama a na ci neke ka̱ci ka̱ tsu ra̱ka̱ a̱ ubuta̱ u kuyaꞋan ili i singai.

¹⁵Ka̱ta̱ vi yotsongusu ili i nam pa, ka̱ta̱ vu dana uma a̱ nu a yaꞋan i ɗa. Ka̱ta̱ vu lapulaka le ayin a na baci de dem u yotsoi vu lapulaka le. Vi ta̱ n utsura vi yaꞋan nannai, adama a nannai ka̱ta̱ vu ka̱sa̱kpa̱ vuza u goyo wu ba, ka̱ta̱ kpamu vu ka̱sa̱kpa̱ o goyo ili i na vu danai ba.

YaꞋan ili i na i gaꞋin

¹Dana uma a̱ nu kpamu a panaka ngono n aza a̱ gba̱ra̱-gba̱ra̱ o tsugono. Uma a̱ nu a pana kadanshi ka̱ta̱ o yongo ufoɓushi ayin tutu adama a na a yaꞋan ili i na i gaꞋin. ²Ka̱ta̱ a ula vuza n kawuya ba, ka̱ta̱ kpamu a iwan kanananai. O okpo aza a̱ a̱ɗu a̱ yuwu ka̱ta̱ a yaꞋan aza a babu a̱ra̱ɗi u yaba dem.

³A ayin a mani-mani a ɗe, a̱tsu feu ci yongo ta̱ n tsulau n ukpa̱ɗi u kupana kadama tsu nan lo. Uma o yoku a̱ ya̱nsa̱i tsu, ɗa tso okpoi agbashi a̱ ubuta̱ u kuciga ili i kavama n a̱bunda̱i, ɗa tso okpoi agbashi a kupana uyoꞋo wi ili i gbani-gbani. Wuma u tsu wi ta̱ tukpa n kavama n tsurala. Ci iwan ta̱ uma o yoku, ɗa ele feu a iwain tsu.

⁴Amma Ka̱shile, a̱yi na wi Kishi ka̱ tsu, u yotsongi tsu ma̱riki ma̱ ni n ucigi u ni. ⁵Wi isa tsu ta̱ adama a asuvayali a̱ ni. Adama a̱ usuɓi a̱ tsu a ɗa ba. U za̱Ꞌa̱ ta̱ unushi u tsu, ɗa u nekei tsu wuma u savu a̱ ubuta̱ wa Ayinviki a̱ Ka̱shile. ⁶Ka̱shile ka̱ tsuwa̱nka̱i tsu Ayinviki a̱ ni gbani adama a ili i na Yesu Kishi ka̱ tsu u yaꞋin. ⁷Ka̱shile ka zuwa ta̱ tso okpo babu unushi adama a̱ kasingai ka̱ a̱bunda̱i ka̱ ni. Gogo na ci yeve ta̱ ci ta̱ a̱ kuciya̱ wuma u babu uteku. ⁸Ili i nam pa ra̱ka̱ i na n danai ɗa̱ mayun ɗa. N ciga ta̱ vu gbagbala uma a yaꞋan i ɗa, adama a na yaba dem vu na wu ushuki n Ka̱shile u zuka n kuyaꞋan ulinga u ma̱riki ayin dem. Ili i nam pa ya i gaꞋan ta̱, i ɗa yi ta̱ kpamu a̱ kutuka̱ n katsupu ka singai u yaba dem.

⁹Ka̱ta̱ a cina wu a kadanshi ka tsulau a ukuna wi ili ya aza a cau a̱ tsu ba. Ka̱ta̱ a cina wu feu a kanananai n vishili a̱ ubuta̱ u kutono Wila̱ wa Ayahuda ba. IcuꞋu yi ili i kavama i nam pa i ɗa i tsu la̱nga̱sa̱ ayin wasasa. ¹⁰Vuza wi baci a̱ kutuka̱ n kadanshi ka mawansa a̱ ka̱tsuma̱ ka̱ ɗa̱ adama a na u pece ɗa̱, ka̱ta̱ vu ɓarangu yi kute ka̱ta̱ kpamu vu ɓarangu yi ire. U pana baci ba, ka̱ta̱ i doku i yongo n a̱yi ba. ¹¹Adama a na icuꞋu i uma i nan lo i iwan ta̱ kadanshi ka mayun. Uma a nan lo i ta̱ a kuyaꞋan unushi, ta kpamu i a̱ kula̱nga̱sa̱ ka̱ci ke le nannai.

Ikya̱shi yu ukocishi i Bulusu

¹²N sheshe ta̱ kusuku Atima ko Tikiku wa̱ nu. Vuza te vi le u yawa baci, ka̱ta̱ vu dakaka vu cina mu a Nikofoli gogoꞋo. Ili i na i zuwai i ɗaɗa ta ɗe n sheshei kushamgba ali ayin a̱ uta̱ni gbende. ¹³Dakaka adama a na vi ciya̱ vu ɓa̱nka̱ Zina keyevika̱wila̱ n Apolosu a̱ ubuta̱ wu nwalu n le. Ɓa̱nka̱ le a̱ ciya̱ ili ra̱ka̱ i na a cigai. ¹⁴Aza o Kutoni a piꞋisa kuyaꞋan ili i singai ka̱ta̱ feu a̱ ɓa̱nka̱ aza a na i a kuciga uɓa̱nki. Ili i na i zuwai i ɗaɗa u yotso ta̱ uma a̱ tsu a yaꞋan ulinga u ma̱riki n wuma u le.

¹⁵Yaba dem wi ta̱ a̱ kukya̱sa̱ wu. N folono wu ta̱ vi kya̱sa̱ka̱ mu aza o Kutoni ra̱ka̱ a na i a kuciga tsu.

Ka̱sa̱kpa̱ kasingai ka̱ Ka̱shile ko yongo n a̱ɗa̱ ra̱ka̱.