Kene

Kene ku Yahaya

Ukuna u katagarda ka nam pa

Vuzavusuki Yahaya u ɗanai katagarda ka nam pa. U dana ta̱ ili i na we enei tsalatani yi ukuna u kusheshe ku Ka̱shile n ili i na i kuta̱wa̱ a kubana kukotso ka aduniyan ku nam pa.

Akaka a i ta̱ ugboku u tatsu wu utsura. U danai utsura u ka̱yimbi wi ta̱ lo a ulinga punu a aduniyan a, aza o Kutoni o kusoꞋo ta̱ atakaci ka̱ta̱ a̱ kuwa̱. A dansa ta̱ kpamu ukuna u Ma̱giri ma̱ Ka̱shile, vuza vi Yesu. Wi ta̱ a kulyaꞋa utsura u uma a gbani-gbani dem n utsura u ka̱yimbi u na wi a tsurala n Ka̱shile. A ukocishi, Ka̱shile ki ta̱ n katsupu ka singai n a̱bunda̱i ka na u kuneke uma a na a lyaꞋi kelime n kuneke a̱ɗu e le n Kishi. Akaka a na i punu a kapashi dem a ɗaɗa Ka̱shile ki ta̱ ciɗa n utsura u na u lyaꞋa kuvon dem.

Katagarda ka nam pa tsalatani tsu ɗa tsu na vuma wi a kufuɗa kene n a̱shi ba. Yahaya u yaꞋan ta̱ ulinga n kadanshi ku una̱ adama a na u yaꞋan muntsa mi ili i na yi ɗe gaɗi va. Uye wi ta̱ lo kakau u kuyeve ili i na yi punu a katagarda ka nam pa, amma akaka a gbayin a i ta̱ hawun a tsu sabaꞋa feu ba. Akaka a gbayin a a ɗaɗa na: Yesu Kishi u lyaꞋa ta̱ utsura u kawuya a̱ ubuta̱ dem. Kanna ki ta̱ lo a̱ kuta̱wa̱ ana MalyaꞋi n kawuya kakau dem a kuzuwa le a mala ma akina, ka̱ta̱ gaɗi vu savu n iɗika i savu i ta̱wa̱ yeve aza a na i o kutono Yesu o yongo a̱ ubuta̱ u te n a̱yi m ma̱ta̱na̱ ma singai gbaga.

Ili i na yi punu udariki a katagarda ka nam pa

1. Kene ku na ku uta̱i u Yahaya (1:1-8)

2. Tsalatani tsu Ka̱shile ka wuma (1:9-20)

3. Akaka kakau a kubana wa̱ A̱Ꞌisa̱ e cindere (2:1—3:22)

4. Tsalatani a kuyaꞋan kucikpa na ɗe gaɗi (4:1-11)

5. Katagarda n urotu u cirupa̱ u cindere (5:1—6:17)

6. KuyaꞋan kucikpa e kelime ka kakuba ko tsugono tsu Ka̱shile (7:1-17)

7. Avana e cindere (8:1—11:19)

8. Vungu vu gbayin n a̱di e re (12:1—13:18)

9. Tsalatani tsa afada a̱ Ka̱shile n kisa (14:1—15:8)

10. Akpanu e cindere a wupa u Ka̱shile (16:1-21)

11. A lyaꞋi irala i Ka̱shile utsura (17:1—20:10)

12. Afada a ukocishi (20:11-15)

13. Gaɗi vu savu n iɗika i savu (21:1-8)

14. Urishelima vu savu (21:9—22:5)

15. Kishi ki ta̱ o kubono babu megeshe (22:6-21)

Yahaya u yaꞋin kadanshi ka katagarda ka nam pa

¹Na va ɗaɗa ili i na Ka̱shile ko yotsongi Vuzagbayin Yesu Kirisiti, adama a na u dana agbashi a̱ ni ili i na Ka̱shile ka kuzuwa i yaꞋan, babu megeshe. Ɗa Yesu u suki kalingata ka̱ ni u yotsongu kagbashi ka̱ ni Yahaya. ²Ɗa Yahaya u danai ili ra̱ka̱ i na we enei adama a akaka a̱ Ka̱shile n ukuna u na Yesu Kirisiti u dansai ɗa u yaꞋin kpamu. ³Ka̱shile ki ta̱ a kuzuwaka yaba dem vu na u kecekei aza o yoku kadanshi ka akaka a nam pa a una̱singai, ka̱ta̱ kpamu u zuwaka yaba dem vu na u panai una̱singai ɗa u tonoi kaꞋa. Ayin a buwa m megeshe ba ana ili i nam pa ya̱ gita̱.

Yahaya u kya̱sa̱i a̱Ꞌisa̱ a aza o Kutoni e cindere

⁴Akaka a na Yahaya u ɗanakai a̱Ꞌisa̱ a aza o Kutoni e cindere a Asiya1:4 “Asiya” punu a iɗika i Roma uɓon u ni u yoku u ɗa gogo na uɓon u Tokuyo. a ɗa na:

N vasa ta̱ Ka̱shile ko yotsongu ɗa̱ kasingai ka̱ ni m ma̱ta̱na̱. Ka̱shile ka na ki ali n ugiti, n gogo na, n vuza na kpamu wi lo a̱ kuta̱wa̱. Ayinviki e cindere a̱ Ka̱shile feu a na i e kelime ka kakuba ko tsugono i ta̱ a kuyaꞋanka ɗa̱ nannai. ⁵Yesu Kirisiti kpamu, vuza na wi ngan mi ili i mayun adama ka mayun ka̱ Ka̱shile. A̱yi ɗa feu vuza vi iyain vu na u ɗenga̱i a kasaun. A̱yi ɗa vuza na u ci lyaꞋa tsugono tsu ngono ma aduniyan.

A̱yi ɗa vuza na u cigai tsu, n vuza na u zuwai ɗa tsu laꞋakai a̱ ubuta̱ wu utsura wu unushi u tsu ana u tsuwa̱in mpasa n ni ɗa u kuwa̱i adama a̱ tsu. ⁶Adama a nan lo ɗa tso okpoi umaci u anan ganu vi ni aza a na a kucikpa Ka̱shile Esheku a̱ ni. Ka̱sa̱kpa̱ Yesu Kirisiti u ciya̱ tsugbayin n utsura ko wanai! Ta nannai.

⁷Indai, wi ta̱ lo a̱ kuta̱wa̱ zuva ve eleshu!

Yaba dem wi ta̱ e kene yi, ali n aza na a zuwai a sapa yi m masara.

Umaci wa aduniyan ra̱ka̱ kpamu wi ta̱ a̱ kushika̱ ka̱u adama a̱ ni.

E, ta ki o kokpo nannai! Ta nannai.

⁸Vuzavaguɗu Ka̱shile u danai, “Mpa ɗa Alfa n Omega.† Ɗaɗa feu, mpa ɗa Ugiti n Ukocishi. Ka̱shile ka na ki ali n ugiti, n gogo na, n vuza na kpamu wi lo a̱ kuta̱wa̱. Mpa ɗa Ka̱shile MalaꞋimili.”

Kene ku Yahaya adama e Yesu

⁹Mpa ɗa Yahaya, mpa ɗa toku ɗa̱ a̱ ubuta̱ wu uneki u ka̱ɗu n Kirisiti, a takacika mu ta̱ kpamu tsu ɗa̱. Mi ta̱ a̱ ka̱tsuma̱ ku uye u Ka̱shile tsu ɗa̱, mayun ɗa kpamu n lulukpa̱ n atakaci a̱ va̱ tsu na yi a̱ kululukpa̱. A banka mu ta̱ o kotogu ka Patamosu ɗa a̱ ka̱sa̱kpa̱i mu ɗe adama a na n dana ta̱ kadanshi ka̱ Ka̱shile n ili i mayun i na Yesu u yotsongi. ¹⁰A kanna ka Vuzavaguɗu, Ayinviki a̱ Ka̱shile† a shanai punu a̱ ka̱ɗu ka̱ va̱, ɗa m panai ka̱la̱ka̱tsu ka gbayin an kavana ka na ko orukpoi a̱ kucina̱ ku va̱. ¹¹Ɗa ka̱la̱ka̱tsu ka ka danai, “Ɗana punu a katagarda ili i na ve enei ka̱ta̱ vu suꞋuku kaꞋa a̱ a̱Ꞌisa̱ a aza o Kutoni e cindere a na i punu a̱ likuci i cindere i nam pa: Afisu, n Simina, m Birigama, n Tayatira, n Sadisu, n Filadafiya, n Ladukiya.”

¹²M kpatalai adama a na me ene vuza na wi a kadanshi nu mpa, ɗa me enei ashamkpatsu a̱ nkuni e cindere a na a yaꞋin n azanariya.¹³E mere ma ashamkpatsu a vuza u shamgbai punu kashani an vuma. U ukai kuminya ku gbayin ali sai e ene, koɓolo n kakashi ka kuminya ka azanariya ulapangi a̱ ma̱ka̱nga̱ ma̱ ni. ¹⁴Ka̱nji ka̱ ni wa̱ri pushe-pushe an tsugbere, n a̱shi kpamu a kutasa tsa akina. ¹⁵Ene a̱ ni a kutasa an viyum vi shili vu na o gboroi. Ka̱la̱ka̱tsu ka̱ ni ki ta̱ n kacaꞋa an mini ma na me ci yene n kurara. ¹⁶U ɓa̱na̱i azangata e cindere e kukiye ku usingai ku ni, koɓolo n kotokobi ka na e temgbei una̱ u re dem alyu a̱ kuta̱ a̱ una̱ u ni. A̱shi a̱ ni a kutasa ka̱u uteku u na kanna ka tsu tasa ka yawa baci a kaci.

¹⁷Ana me enei ni, ɗa n yikpa̱i ma̱kpa̱ɓa̱ n za̱lika̱i bini. U kiyangi kukiye ku usingai ku ni wa̱ va̱ ɗa u danai, “Ka̱ta̱ vu pana wovon ba. Mpa ɗa Ugiti n Ukocishi. ¹⁸Mpa ɗa vuza na u ci neke wuma. Mi ishi ta̱ n kuwa̱, amma gogo na mi ta̱ wuma u babu uteku. Mi ta̱ n agbaguratsu a na e nekei mu utsura m ɓa̱yuwa̱ ko m ɓa̱ya̱ngu ubuta̱ u na a̱kpisa̱ i, ka̱ta̱ m bonoko le n wuma kpamu.

¹⁹“Ɗana a katagarda ili i na vi e kene gogo na ra̱ka̱, koɓolo n ili i na i kuta̱wa̱ na kelime. ²⁰Na va ɗaɗa kadanshi ku usokongi ka azangata e cindere a na ve enei e kukiye ku usingai ku va̱, koɓolo n ashamkpatsu a̱ nkuni a azanariya e cindere a: Ashamkpatsu e cindere a ɗaɗa a̱Ꞌisa̱ a aza o Kutoni e cindere, azangata e cindere tamkpamu a ɗaɗa alingata a na a kinda a̱Ꞌisa̱ a aza o Kutoni e cindere a.”

Akaka a kubana a Afisu

¹Ɗa u danai mu, “Ɗana katagarda ka akaka ka nam pa. Vuza na wi uka̱ni n azangata e cindere e kukiye ku usingai ku ni, ɗa kpamu wi a nwalu e mere ma ashamkpatsu a̱ nkuni e cindere u suꞋuku ta̱ akaka a nam pa a kubana u kalingata ka̱ Ka̱shile† ka̱ a̱Ꞌisa̱ a aza o Kutoni† a̱ likuci i Afisu:

²N yeve ta̱ ulinga u nu ra̱ka̱. Me ene ta̱ ulinga u ma̱riki u nu n ka̱lulu ka̱ nu. N yeve ta̱ a na vi iwain ɗe uma a kavama. Vu kondo ta̱ ɗe aza a na a danai ele azusuki a ɗa, amma ashe mayun ɗa ba, ɗa vi cinai ele aza a aꞋuwa a ɗa. ³Vu lulukpa̱ ta̱ a̱ ubuta̱ wa atakaci adama a̱ va̱, ka̱ɗu ka̱ nu kpamu kokpo ta̱ n utsura tsu na vi o kutono mu.

⁴Amma mayun ɗa n dansuka wu n ko yoku. Vu buwa n ucigi uteku u na vi ishi vi ci yaꞋan a ayin a na vi gita̱i kuneke ka̱ɗu nu mpa ba. ⁵Ka̱ta̱ vi cinukpa uteku u na vi yikpa̱i a̱ ubuta̱ wu unushi ba! Mayun ɗa, vu ka̱sa̱kpa̱ kuyaꞋan unushi ka̱ta̱ vi yongo uteku u na vi ishi ana vu gita̱i kuneke ka̱ɗu nu mpa. Vi lyaꞋa baci kelime n kuyaꞋan unushi, mi ta̱ a̱ kuta̱wa̱ wa̱ nu ka̱ta̱ n takacika wu ali n takpa kashamkpatsu ka̱ ma̱kuni ma̱ nu a̱ ubuta̱ u na ma mi. ⁶Amma ili i singai i na vi a kuyaꞋan i ɗa na. Vi iwan ta̱ ulinga u na otoni a Nikala2:6 Aza o kutoni a Nikala nlum ma aꞋuwa n ɗa, aza a na i a kuciga uma o tono a̱ma̱li ka̱ta̱ a yaꞋan unushi u tsugbani. i a kuyaꞋan, uteku u na mpa n iwain ili i na i a kuyaꞋan feu.

⁷Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau! Mi ta̱ a̱ kuka̱sa̱kpa̱ aza a na a lyaꞋi, a lyaꞋa a̱ ubuta̱ u maɗanga ma na me ci neke wuma ma na mo tsu gbonguro ɗe a kashina ka̱ Ka̱shile na ɗe gaɗi.”

Akaka a kubana a Simina

⁸Ɗa u danai mu, “Ɗana katagarda ka akaka ka nam pa. Vuza na wi vuza vi Iyain n vuza vu Ukocishi, vuza na u kuwa̱i ɗa kpamu wi n wuma, u suꞋuku ta̱ akaka a nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Simina:

⁹N yeve ta̱ ukuna wa atakaci a̱ nu n unambi u nu, amma vi ta̱ n uciyi! N yeve ta̱ ukuna u kavama u na uma o yoku i a kudansa adama a̱ nu. A danai ele uma a̱ Ka̱shile a ɗa, amma ta i nannai mayun ba. Ele ushiga u MalyaꞋi† u ɗa. ¹⁰Ka̱ta̱ vu pana wovon ba, vi ciɓa baci n uteku u na va̱ kuta̱wa̱ va takacika. N dana wu, Kalijani ki ta̱ a kuzuwa le a zuwa a̱ɗa̱ vi yoku a ugbashi adama a na o kondo ɗa̱, ka̱ta̱ i soꞋo atakaci ali ayin kupa. LyaꞋa kelime n kutono magaba, ko i a kuna wu, ka̱ta̱ mpa ta na n neke wu wuma u babu uteku wo okpo katsupu ka̱ nu tso oroliko.†

¹¹Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni! Aza a na a lyaꞋi utsura u kawuya, i a kutakacika a̱ ubuta̱ wu ukpa̱ u ire ba.”

Akaka a kubana a Birigama

¹²Ɗa u danai mu, “Ɗana katagarda ka akaka ka nam pa. Vuza na wi n kotokobi ka na e temgbei una̱ u re dem alyu, u suꞋuku ta̱ akaka a nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Birigama.2:12 A̱ likuci i Birigama a̱Ꞌisa̱ i ta̱ punu a̱ ubuta̱ u na uma a ci cikpa mogono ma Roma adanshi a̱yi Ka̱shile kaꞋa. Ɗevu n a̱yi katalikalyuka ki ta̱ punu a̱ ubuta̱ u na a ci cikpa ka̱ma̱li Zafasa. Birigama ɗa wi ishi likuci i gbayin i tsugono tsu MalyaꞋi a aduniyan.

¹³N yeve ta̱ a na vi ida̱shi a̱ ubuta̱ u na MalyaꞋi mi a kulyaꞋa tsugono. Avu ɗa vuza vu Kutoni† vu mayun a̱ va̱, vu ka̱sa̱kpa̱ kpamu kuneke ka̱ɗu nu mpa ba. Vi neke ta̱ ka̱ɗu ko a ayin a na a zuwai Antiba u kuwa̱ ɗe a̱ likuci i nu, a̱ ubuta̱ u na MalyaꞋi mi a kulyaꞋa tsugono. Antiba u yotsongu ta̱ uma ayin tutu a̱ ubuta̱ u kadanshi ka̱ ni n ulinga u ni a na a̱yi vuza vu kutono vu va̱ ɗa wi.

¹⁴Amma mayun ɗa n dansuka wu n ko yoku. Aza o yoku a̱ ka̱tsuma̱ ka̱ ɗa̱ i ta̱ o kutono kuyotsongusu ku Balam,2:14 Mkc. 25:1.† vuza na u yotsongi Balaku uteku u na u kuzuwa aza a Israila a yaꞋan unushi. U piyai le a takuma inyama yi nnama n na uma a lyukai ana i a kucikpa a̱ma̱li. Ɗa feu u zuwai le a yaꞋan tsugbani. ¹⁵Ana uma a̱ ɗa̱ o yoku a̱ ushuki n kuyotsongusu ka aza o kutono Nikala, ɗa a yaꞋin unushi tsu na aza a Israila a yaꞋin. ¹⁶Gogo na shika̱ unushi u nu! Vi yaꞋan baci nannai ba, mi ta̱ lo a̱ kuta̱wa̱ wa̱ nu babu megeshe ka̱ta̱ n shilika̱ n uma a nan lo n kotokobi ka na ki a̱ kuta̱ a̱ una̱ u va̱.

¹⁷Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau! Aza a na a lyaꞋi ɗa n kuneke a̱ ka̱tsuma̱ ka mana† vu na o sokongi.2:17 Ayahuda a̱ ushuku ta̱ keneki Irimiya u sokongu ta̱ mogbodo ma mana ma na ishi a zuwai a Akpati vu Uzuwakpani. A kubana uteku, i ta̱ e kene maꞋa ka̱ta̱ uma a lyaꞋa punu kpamu. Mi ta̱ feu e kuneke yaba dem vi le katali ka̱ a̱ri ka na a ɗanai kula ku savu gaɗi kaꞋa. Vuza na wi isai katali ka nam pa ɗa koci u kuyeve kula ku nam pa.”

Akaka a kubana a Tayatira

¹⁸Ɗa u danai mu, “Ɗana katagarda ka akaka ka nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Tayatira. Maku ma̱ Ka̱shile, vuza na a̱shi a̱ ni a kutasa tsa akina, vuza na kpamu ene a̱ ni i an viyum vi shili vu na o gboroi, u suꞋuku wu ta̱ akaka a nam pa:

¹⁹N yeve ta̱ ili i na vi a kuyaꞋan ra̱ka̱. N yeve ta̱ a na vi a kuciga aza a̱ nu aza o Kutoni ɗa kpamu vi kotoni ka̱ va̱ ka mayun. N yeve ta̱ uteku u na vu ɓa̱nka̱i aza o Kutoni o yoku, n yeve ta̱ kpamu a na vu lulukpa̱i. N yeve ta̱ an gogo na ulinga u nu u laꞋa ta̱ tsu na vi ishi cau ana vo okpoi kotoni ka̱ va̱ n ugiti.

²⁰Amma mayun ɗa n dansuka wu n ko yoku. Vi iwan vuka vu nan lo Zazabe ba, vuza na u yaꞋin aꞋuwa ana u danai a̱yi keneki ka̱ Ka̱shile kaꞋa. Wi baci a kuyaꞋan kuyotsongusu u ci ya̱nsa̱ ta̱ agbashi a̱ va̱ adama a na a yaꞋan tsugbani ka̱ta̱ feu a takuma inyama i na a lyukai a̱ma̱li. ²¹N neke yi ta̱ ayin u shika̱ unushi u ni, amma ɗa u iwain kuka̱sa̱kpa̱ tsugbani. ²²Adama a nannai, mi ta̱ a kuzuwa yi u yaꞋan mɓa̱la̱. Mi ta̱ a kuzuwa aza a na a yaꞋin tsugbani koɓolo n a̱yi a takacika ka̱u. Mi ta̱ a kuyaꞋan ili i nam pa gogo na, sai a̱ shika̱ kagbani-gbani ka na a yaꞋin. ²³Ali ma kuna otoni a̱ ni, ka̱ta̱ aza a a̱Ꞌisa̱ a aza o Kutoni ra̱ka̱ e ene a na n yevei kusheshe ku yaba dem n ili i na a cigai. Mi ta̱ a kutakacika yaba dem vi le uteku u na a̱miki u unushi a̱ ni i. ²⁴Amma a̱ɗa̱ vi yoku a Tayatira i tono kuyotsongusu ku ni ba. Ka̱ta̱ i yeve ili i na otoni a̱ ni e ci ɗeke ‘Ili yu usokongi i gbayin i MalyaꞋi’ ba. Mi a kudana ɗa̱ i yaꞋan ili i yoku kpamu ba, ²⁵saidei i lyaꞋa kelime n kutono mu mayin ali n ta̱wa̱.

^26-28Mi ta̱ a̱ kuka̱sa̱kpa̱ vuza na u lyaꞋi u ciya̱ utsura tsu na Esheku a̱ va̱ e nekei mu ɗe. Mi ta̱ a kuyaꞋan nannai adama a vuza na u lyaꞋi kelime n kuyaꞋan ili i na n danai ni u yaꞋan, ali a ayin uteku wa aduniyan. Mi ta̱ a̱ kuka̱sa̱kpa̱ yi u ciya̱ utsura u na u lyaꞋa tsugono ce elentsu ra̱ka̱.

‘Wi baci a kulyaꞋa tsugono tsu nam pa, wi a kucana ba, ka̱ta̱ a ɓasangu yi miri-miri uteku u na uma o tsu ɓoso mgbodo ma̱ ciꞋin.’2:26-28 Ishp. 2:9.

Mi ta̱ feu e kuneke yi tsugono tsu kazangata ka na ka tsu tasa n usana2:26-28 Kazangata ku usana: Adama a na uma n a̱bunda̱i a ayin a nan lo a̱ ushuku ta̱ azangata a tsu zuwa ta̱ ili i yaꞋan a wuma u le, ka̱ta̱ e neke a ɗa utsura gaɗi va azangata a na a buwai ka̱ta̱ a lyaꞋa tsugono n Yesu gaɗi vi ili dem. ka̱lika̱li wo okpo urotu u na u lyaꞋi. ²⁹Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau.”

Akaka a kubana a Sadisu

¹Ɗa u danai mu, “Ɗana katagarda ka akaka ka nam pa. Vuza na wi o tsugono tsa ayinviki e cindere a na i a kuyaꞋanka Ka̱shile tsugbashi, vuza na kpamu wi uka̱ni n azangata e cindere, u suꞋuku ta̱ akaka a nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Sadisu.

N yeve ta̱ ili i na vi a kuyaꞋan. Uma a danai vi ta̱ n wuma, amma mayun vi ta̱ ukpa̱. ²Jimgba! Vu buwa n utsura ka̱u ba, u ɗa kpamu u gita̱ ta̱ kukotso. Adama a nannai, zuwa ili i na i buwai nu i doku i gbama ka̱u. Me ene ta̱ ili i na vi a kuyaꞋan i yawa ili i na Ka̱shile ka̱ va̱ ka cigai vi yaꞋan ba. ³Adama a nannai ka̱ta̱ vu cinukpa n ili i na vi isai n ili i na kpamu vu panai ba. Tono i ɗa, ka̱ta̱ vu shika̱ unushi u nu. Vu jimgba baci ba, mi ta̱ a̱ kuta̱wa̱ a ayin a na vu sheshei ba, uteku u na koboki ka̱ tsu ta̱wa̱. ⁴A̱ɗa̱ vi yoku punu a Sadisu i kapanika ntogu n ɗa̱ n unushi ba. Uma a nam pa i ta̱ a kuꞋuka ntogu ma̱ a̱ri ka̱ta̱ a wala koɓolo nu mpa, adama a na a yawa ta̱ a yaꞋan nannai. ⁵Vuza na de dem u lyaꞋi utsura wi ili i kavama wi ta̱ a kuꞋuka motogu ma̱ a̱ri uteku u na uma a nam pa a ukai. Mi o kugboro kula ku vuza nan lo ku na a ɗanai a Katagarda ka Aza a Wuma ba. N shamgba baci e kelime ke Esheku a̱ va̱ n alingata a̱ Ka̱shile a na i a kuyaꞋanka yi tsugbashi, mi ta̱ a kudana gogo va lo a na n yevei vuma vu nam pa.

⁶Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau!”

Akaka a kubana a Filadafiya

⁷Ɗa u danai mu, “Ɗana katagarda ka akaka ka nam pa. Vuza na wi ciɗa m mayun kpamu ɗa wi feu uka̱ni n kagbaguratsu ko tsugono ka Dawuda.3:7 Kagbaguratsu ka Dawuda ɗaɗa utsura u na u kulyaꞋa tsugono. U ɓa̱yuwa̱ baci utsutsu, vuza wi lo a̱ kuɓa̱ya̱ngu u ɗa ba. U ɓa̱ya̱ngu baci kpamu u ɗa, vuza wi lo a̱ kuɓa̱yuwa̱ u ɗa ba. U suꞋuku ta̱ akaka a nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Filadafiya.

⁸N yeve ta̱ ili i na yi a kuyaꞋan. N yeve ta̱ uma a ɗika ɗa̱ azagbagbaꞋin ba. Vu tono ta̱ kuyotsongusu ku va̱, vu saꞋwa ta na feu kudana, ‘N nana ta̱ Yesu,’ ba. M ɓa̱yuwa̱ ta̱ utsutsu e kelime ka̱ nu vuza u kufuɗa wa̱ ɓa̱ya̱ngu ba. ⁹Gogo na ve kene ta̱ ili i na n kuyaꞋan n uma a na i ushiga u MalyaꞋi. A danai ele uma a̱ Ka̱shile a ɗa, amma aza a aꞋuwa a ɗa i. Mi ta̱ a kuzuwa le a̱ ta̱wa̱ a̱ kuɗa̱nku wu. Ayin a na baci a yaꞋin nannai ka̱ta̱ e yeve a na mi a kuciga wu. ¹⁰Vu lulukpa̱ ta̱ uteku u na n danai nu vi yaꞋan. Adama a nannai, mi ta̱ a kukanza wu a ayin a na n kukondo uma a aduniyan ra̱ka̱, ka̱ta̱ n zuwa le a pana atakaci n a̱bunda̱i. ¹¹Mi ta̱ a̱ kuta̱wa̱ gogoꞋo. LyaꞋa kelime n kutsurakpa a̱ ubuta̱ wu uneki u ka̱ɗu u nu, ta lo vuza wa̱ fa̱ba̱na̱ oroliko a na va̱ kuciya̱ adama a na vi lyaꞋi. ¹²Mi ta̱ a kuzuwa vuza na u lyaꞋi utsura wi ili i kavama, wo okpo ma̱shukpu mo yoku ma na ma̱ ka̱na̱i a̱Ꞌisa̱ a̱ Ka̱shile a̱ va̱. Vuma vu nam pa u kuyongo ta̱ lo ayin tutu. Mi ta̱ a kuɗana ula e re gaɗi vu kuca̱n ku ni: kula ku Ka̱shile ka̱ va̱, n kula ku Urishelima† vu Savu, na va ɗaɗa kula ku ubirini u Ka̱shile ka̱ va̱, ku na ku uta̱i a̱ Ka̱shile gaɗi. Mi ta̱ kpamu a kuɗana gaɗi vi ni kula ku savu ku va̱.

¹³Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau.”

Akaka a kubana a Ladukiya

¹⁴Ɗaɗa u danai mu, “Ɗana katagarda ka akaka ka nam pa. Na va ɗaɗa kadanshi ka Vuza na Wi Nannai.† A̱yi ɗa feu ngan n na a̱ kushuku n a̱yi n vuza na kpamu u tsu dansa ili i mayun ayin tutu. A̱yi ɗa vuza na Ka̱shile ka yaꞋin ili dem a̱ ubuta̱ u ni. U suꞋuku ta̱ akaka a nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Ladukiya:

¹⁵N yeve ta̱ ili i na vi a kuyaꞋan, avu kpamu vi ta̱ku ko usuɗukpi3:15 A̱ ubuta̱ u nam pa “usuɗukpi” wi ta̱ a kadanshi ku uneki wa aci adama a ulinga u Kishi, “uta̱ni” ɗaɗa ukpa̱ɗi u kuneke kaci n ulinga. ba. U kulaꞋa ta̱ n kugaꞋan vi yaꞋan ke te. ¹⁶Mi ta̱ a kuꞋiwan wu adama a na vi ta̱ e mere mi ili i nan lo ya. ¹⁷Vu danai, ‘Mi ta̱ n uciyi, m ɓolonku ta̱ kpamu ka̱ci ka̱ va̱ ili n a̱bunda̱i. Mi a kuciga ili i yoku ba, ko kenu.’ Amma vi yeve uteku u na vi mayun ba: Ili ya asuvayali i ɗa vi; vu namba ta̱ ili dem; ka̱yimba̱ kaꞋa vi; vi ta̱ kpamu koshomboɗi. ¹⁸Adama a nam pa, n yaꞋanka wu ta̱ odoki, vu tsula azanariya a na mi e kudenge. Na va ɗaɗa azanariya a na e derekpei ɗe, ɗa o okpoi ciɗa. Tsula a ɗa adama a na vo okpo vuza vu uciyi. Mayun ɗa feu vu tsula ntogu ma̱ a̱ri n na mi e kudenge ka̱ta̱ vu ukaka ka̱ci ka̱ nu, adama a na vi ciya̱ vu kpa̱ɗa̱ kupana wono u na uma i e kene wu koshomboɗi. Mayun ɗa feu vu tsula maniꞋin ma̱ a̱guma̱ ma na mi e kudenge vi ciya̱ vu tsunku a̱shi a̱ nu, adama a na vu fuɗa ve ene.

¹⁹N tsu ɓarangu ta̱ aza a na n cigai ka̱ta̱ n takacika le. Dakaka vi yaꞋan uteku u na va kufuɗa kuyaꞋan ra̱ka̱, ka̱ta̱ vu shika̱ unushi u nu. ²⁰Zuwa atsuvu! Mi ta̱ a kashani a̱ utsutsu a kudana, ‘AzakpaꞋa!’ Vuza na de dem u panakai mu, ɗa u danai mu n uwa, n kuꞋuwa ta̱ a kpaꞋa ka ka̱ta̱ n lyaꞋa ilikulyaꞋa n a̱yi.

²¹Aza a na a lyaꞋi utsura wi ili i kavama, i ta̱ a̱ kuda̱sa̱ngu nu mpa a kakuba ko tsugono ka̱ va̱, uteku u na n lyaꞋi utsura, ɗa n da̱sa̱ngi n e Esheku a̱ va̱ a kakuba ko tsugono ka̱ ni.

²²Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau!”

Yahaya we enei ili i na yi ɗe gaɗi

¹A ayin a na me enei ili i nam pa ra̱ka̱, me enei kpamu ili i yoku, me enei utsutsu uɓa̱yuwi gaɗi. Ɗa vuza na wi n ka̱la̱ka̱tsu an kavana u yaꞋin kadanshi nu mpa, u danai, “Livanku na ka̱ta̱ n yotsongu wu ili i na i kuta̱wa̱ ya yaꞋan, ka nam pa ko kotso baci.” ²Gogo lo ɗa Ayinviki a̱ Ka̱shile o tonoi nu mpa, ɗa me enei ɗe gaɗi vuza a̱ ida̱shi a kakuba ko tsugono. ³Vuza na wi ɗe ida̱shi ya a kutasa langu-langu an akina a na i ushili koɓolo m mini ma̱ a̱vuku tsa atali a ikebe.† A uka̱ra̱Ꞌi u kakuba wa vukamba vi ta̱ lo vu na vi a kutasa langu-langu. ⁴Me enei kpamu makpata ma akuba o tsugono kamanga n a̱ na̱shi. Nkoshi m gba̱ra̱-gba̱ra̱ kamanga n aza a̱ na̱shi a̱ da̱sa̱ngi punu a akuba a nam pa a. Kakuba ka gbayin ko tsugono tamkpamu punu e mere me le. A ukai aminya a̱ a̱ri ɗa a alai oroliko a azanariya a aci e le. ⁵Ili i nam pa ya i gita̱i kuta̱ punu a kakuba ko tsugono ka gbayin ka: kutashi n ulaɗi maru-maru, n kacaꞋa, n akpanga a gbagbaꞋin. A̱va̱sa̱ a akina e cindere, a̱ kukula̱ e kelime ka kakuba ko tsugono ka, ele ɗa ta na ayinviki e cindere a̱ Ka̱shile. ⁶A̱ ubuta̱ u na e kpetei kpamu e kelime ka kakuba ko tsugono ka wo okpoi an mala a kutasa an mindatsu ma na a urai ferere e kene ugboku u re dem.

Ili i wuma i na̱shi i shamgbai i ka̱ra̱Ꞌi kakuba ko tsugono ka, yaba dem a̱ iga̱Ꞌin i te i kakuba ya. Ili i wuma i nam pa yi ta̱ n a̱shi udariki kucina̱ n asuvu a ikyamba i le dem.

⁷Vuza iyain wi ta̱ n kaci an kawu. Vuza ire wi ta̱ n kaci an kobomburon. Vuza tatsu wi ta̱ n a̱shi an vuma. Vuza na̱shi wi ta̱ an kajimba ka na ki a kuyaꞋan ciꞋimkpi. ⁸Ili i wuma i na̱shi i nam pa yi ta̱ n evelyu a̱ ta̱li, n a̱shi kpamu udariki a̱ ubuta̱ dem, ali n ɗaka ve evelyu va. Kanna n kayin dem a̱ tsu ka̱sa̱kpa̱ kuyaꞋan ishipa ba:

“Vuzavaguɗu wi ta̱ ciɗa. Wi ta̱ ciɗa. Wi ta̱ ciɗa.

A̱yi ɗa Ka̱shile Uba̱nga̱ri.

A̱yi ɗa wi n wuma gogo na, vuza na kpamu wi lo n wuma ali n ayin a ɗe, vuza na wi lo a̱ kuta̱wa̱.”

⁹Ili i wuma i nam pa i lyaꞋi kelime n kucikpa vuza na wi ida̱shi a kakuba ko tsugono ka. E nekei ni kpamu tsugbayin ɗa o doku a cikpai ni. A̱yi ɗa vuza na wi n wuma u babu uteku. ¹⁰A ayin a nan lo a ɗa feu nkoshi m gbagbaꞋin ma ele uma kamanga n aza a̱ na̱shi a a̱ kuɗa̱nki vuza na wi ida̱shi a kakuba ko tsugono ka. Ana a cikpai vuza na wi n wuma u babu uteku, ɗa a zuwai oroliko o tsugono e le kelime ka kakuba ko tsugono ka ɗa a danai,

¹¹“Vuzavaguɗu vu tsu n Ka̱shile ka̱ tsu,

u gaꞋan ta̱ vi isa tsugbayin,

n kucikpa, n utsura adama a na avu ɗa vi yawai.

Avu ɗa vi yaꞋin ili ra̱ka̱,

ɗa vu zuwai le n wuma tsu na i,

adama a na ta vi cigai i ɗa nannai.”

Ma̱giri ma̱ ɓa̱yuwa̱i katagarda

¹Ili i na me enei kpamu a tsalatani tsu va̱ i ɗaɗa vuza a̱ ida̱shi a kakuba ko tsu tsugono ɗa wi uka̱ni kpamu n katagarda ka na ki an kepepa ku ugaɗi ka na ki n iɗani punu a ukambu dem.5:1 Katagarda ka na a yaꞋin n ukpan: N ayin a cau a ci yaꞋan ta̱ atagarda ugaɗi ka̱ta̱ a̱ ka̱ta̱la̱ an kajiba amma m macaka e mere. Ɗa Ka̱shile ka̱ ka̱ta̱la̱i kaꞋa mayin ɗa u paɗarai kaꞋa kpan-kpaꞋan n urotu u ka̱ta̱mba̱ri† u cirupa̱ u cindere.5:1 N ayin a cau a tsu paɗara ta̱ katagarda ka akaka n “makangulu” ka̱ta̱ a zuwa urotu adama a na o yotsongu ko ka yayi. A̱ ɓa̱yuwa̱ baci kaꞋa, makangulu ma mi ta̱ o kuɓoso babu vuza na u kufuɗa kuɓa̱ya̱ngu ka̱ta̱ u bono adanshi ka̱ta̱ a saꞋwa kuɓa̱yuwa̱ kaꞋa ba. Vuza vi ili ɗa koci wi n utsura u kuɓoso makangulu ma nan lo.²Ɗa me enei kalingata ku utsura, vuza na u salai n ka̱la̱ka̱tsu ku utsura: “Yayi u yawai a na wa kulukpa urotu u cirupa̱ u katagarda ka nam pa ka̱ta̱ u ɓa̱yuwa̱ kaꞋa?” ³Amma babu vuza gaɗi ko a aduniyan ko ɗaka vi iɗika i nam pa vu na u yawai u ɓa̱yuwa̱ kaꞋa ka̱ta̱ u kece kaꞋa.

⁴Ɗa n shika̱i ka̱u, adama a na vuza u yawa u ɓa̱yuwa̱ ka̱ta̱ u kece kaꞋa ba. ⁵Ɗaɗa mokoshi ma̱ gba̱ra̱† mo yoku ma danai mu, “Ka̱sa̱kpa̱ ma̱shi! Inda, vuza wi ta̱ lo vu na u lyaꞋi ɗe utsura. E ci ɗeke yi ta̱ Kawu, mogono ma gbayin mu umaci u Yahuza.† A̱yi ɗa matsukaya mo Mogono Dawuda. A̱yi ɗa vuza na u kufuɗa wa kulukpa urotu u cirupa̱ u cindere wa ka̱ta̱ u ɓa̱yuwa̱ katagarda ka.”

⁶Ɗa me enei Ma̱giri a kashani ɗevu n kakuba ko tsugono ka, ili i wuma i na̱shi nu nkoshi m gba̱ra̱-gba̱ra̱ ma n kanzai ni. Ikyamba i ni yi ta̱ n usa̱n adanshi uma a una yi ta̱ tsa alyuka. Wi ta̱ n avana e cindere n a̱shi e cindere, ɗaɗa ayinviki e cindere a na Ka̱shile ka̱ suki a ukambu dem wa aduniyan. ⁷Ɗaɗa Ma̱giri ma banai ma ɗikai katagarda ka na vuza na wi ida̱shi a kakuba ka wi a̱ kuɓa̱na̱ e kukiye ku usingai ku ni. ⁸Ana wi a kuyaꞋan nannai, ili i wuma i na̱shi ya nu nkoshi m gba̱ra̱-gba̱ra̱ kamanga n na̱shi a lyaꞋi kayala wa̱ ni. Yaba dem a̱ ubuta̱ u nan lo u ka̱na̱i umolu n kakpanu ka na a̱ luwa̱i n azanariya. Kakpanu ka ki ta̱ tukpa n ili i ma̱gula̱ni† i na yi kavasa ka uma a na a ci yaꞋanka Ka̱shile tsugbashi. ⁹Ra̱ka̱ vi le a canana ta̱ vishipa vu savu vu nam pa:

“Vi yawa ta̱ vi ɗika katagarda ka

ka̱ta̱ vu kulukpa urotu u cirupa̱ u ni ka̱ta̱ vu ɓa̱yuwa̱ u ɗa.

Ili i na i zuwai i ɗaɗa uma a una wu ta̱,

ɗa mpasa n nu mo okpoi katsupu

a na vu uta̱ka̱i uma a iɗika dem, n umaci, n elentsu, n ka̱tsura̱ feu,

ɗa gogo na o okpoi uma a̱ Ka̱shile.

¹⁰Vu zuwa le ta̱ o okpo umaci u ni

aza a na i anan ganu vu na a kucikpa Ka̱shile.

Ele kpamu i ta̱ a kulyaꞋa tsugono tsa aduniyan.”

¹¹Ɗa n la̱na̱i kpamu, ɗa m panai alingata a ishipa. Ele i ta̱ mbana mbana n a̱bunda̱i ka̱u. A kanzai kakuba ko tsugono ka n ili wuma nu nkoshi m gba̱ra̱-gba̱ra̱ ma. ¹²Ɗa a yaꞋin vishipa n ka̱la̱ka̱tsu ka̱u:

“Ci cikpai Ma̱giri ma na a unai va,

adama a utsura u gbayin,

n uciyi, n kuyeve, n katsura ka̱ ni.

Wi isa tsugbayin n tsugono n a̱bunda̱i!”

¹³Ɗaɗa n panai ili i wuma dem a kuyaꞋan vishipa, ili i na yi gaɗi, n aduniyan, n ɗaka vi iɗika, m mala. Vishipa vi le vu ɗa na:

“Vuza na wi ida̱shi a kakuba koɓolo m Ma̱giri ma

i ta̱ n tsugbayin ka̱u, n kucikpa, n utsura n tsugono tsu ayin a babu uteku.”

¹⁴Ɗa ili i wuma i na̱shi ya yu ushuki, “Ta nannai.” Ɗa nkoshi m gba̱ra̱-gba̱ra̱ ma n kuɗa̱ngi ɗa a cikpai ni.

Ma̱giri ma kulukpai urotu u cirupa̱

¹Ɗaɗa me enei Ma̱giri ma kulukpai urotu u cirupa̱ u iyain a̱ ka̱tsuma̱ ku u cindere, ɗa m panai ili i wuma i te a̱ ka̱tsuma̱ ki ili i na̱shi i nan lo a kudana n ka̱la̱ka̱tsu gba̱ra̱ an kakpanga, “Ta̱wa̱!” ²Mi indanai, ɗa me enei kodoku ka̱ a̱ri. Vuza na u kumbai kaꞋa a̱ kuɓa̱na̱ utan, ɗa wi isai oroliko o tsugono. Wu uta̱i pulai an vuza na u lyaꞋi ɗe kuvon n a̱bunda̱i, ɗa kpamu wi o kudoku kulyaꞋa.

³Ɗa Ma̱giri ma kulukpai urotu u cirupa̱ u i re, ɗa m panai ili i wuma i ire i danai, “Ta̱wa̱!” ⁴Ɗaɗa kodoku ko yoku ka na ki ushili tsa akina ku uta̱i. Vuza na u kumbai kaꞋa ɗa wi isai utsura u na u kuzuwa uma a yaꞋan vishili uteku u le punu na aduniyan, adama a na a unanai a̱ ubuta̱ u kuvon. Kakumbi ka ka isai kotokobi ka gbayin.

⁵Ɗa Ma̱giri ma kulukpai urotu u cirupa̱ u tatsu. Ɗa m panai ili i wuma i tatsu i danai, “Ta̱wa̱!” Mi indai, ɗa me enei kodoku ka̱ lima̱. Vuza na u kumbai kaꞋa u ɓa̱na̱i ili i kugisanku a̱miki e kukiye ku ni.⁶Ɗa m panai ili yu ura̱i an ka̱la̱ka̱tsu a̱ kuta̱wa̱ punu e mere mi ili i wuma i na̱shi ya. Ka̱la̱ka̱tsu ka danai, “Ikebe6:6 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Dinari” a̱ Ubuta̱ wi ili i Kuyeve. i na vuza u kuciya̱ u liva̱ baci ulinga i ɗa a kutsupa kakpanu ke te ko ki itabi.† Ta kpamu a tsu tsupa kakpanu kutatsu ki ilya nannai. Ka̱ta̱ vu la̱nga̱sa̱ maniꞋin ko ma̱kya̱n† ma ba!”

⁷Ɗa Ma̱giri ma kulukpai urotu u cirupa̱ u na̱shi. Ɗa m panai ili i wuma i na̱shi i danai, “Ta̱wa̱!” ⁸Mi indai ɗa me enei kodoku kparasha. Vuza na wi ukumbi a kaꞋa wi ta̱ n kula Ukpa̱, ɗa ili i wuma i yoku yi n kula Ubuta̱ wu Ukpisa̱ o kutono ɗevu n a̱yi. Ka̱shile ke pecei aduniyan ali ugboku u na̱shi. Ukpa̱ n Ubuta̱ wu Ukpisa̱ wi isai utsura adama a na wu una ugboku u te a̱ ka̱tsuma̱ ku ugboku u na̱shi n kuvon, n kambulu, m ma̱dukpa̱ kakau, nu nnama n kakamba.

⁹Ɗa Ma̱giri ma kulukpai urotu u cirupa̱ u tawun. Ɗa me enei a̱kpisa̱ o yoku lo a̱ kumiꞋi ku katalikalyuka. Uma a nan lo a ele ɗa aza a na irala i le yu unai adama a na a dansa ta̱ ukuna u kadanshi ka̱ Ka̱shile mayun. ¹⁰A̱kpisa̱ a nam pa o orukpoi n ka̱la̱ka̱tsu ka̱u a danai, “Ka̱shile MalaꞋimili, vi ta̱ ciɗa m mayun kpamu! Tsu folono wu ta̱, ka̱ta̱ vi shamgba kula̱nga̱sa̱ ayin ba, yaꞋanka uma a aduniyan a na a unai tsu afada n atakaci.” ¹¹Ka̱shile ke nekei a̱kpisa̱ a dem aminya a̱ a̱ri ɗa u danai le ka̱ta̱ e reme a̱ɗu kpamu ayin kenu. A yaꞋan ili i nam pa ali sai ayin a na irala i le i nan lo yu unai itoku i le agbashi ra̱ka̱ n aza e le tsu na a unai le, ali a shatangu ka̱bunda̱i ka na Ka̱shile ka zuwai.

¹²Ɗa Ma̱giri ma kulukpai urotu u cirupa̱ u ta̱li. Ɗa iɗika i gba̱ɗa̱i n utsura. Ɗa kanna ka̱ kpa̱ɗa̱i kudoku ka akana, ɗa ka̱yimbi ka̱ kimba̱i a̱ ubuta̱ dem. Ɗa kpamu wotoi u bonoi ushili an mpasa. ¹³Azangata a̱ uta̱i gaɗi ɗa a̱ yikpa̱i a iɗika tsa agbawa a̱ ma̱biri a ayin a na baci wunla̱i u gba̱ɗa̱sa̱i maɗanga ma. ¹⁴Gaɗi u puwa̱nka̱i tsu na a̱ tsu ka̱ta̱la̱ kajiba ka̱ta̱ a lazaka. Nsasan n wawaꞋa nu m gbagbaꞋin dem n otogu a yaꞋansakai adama uteku u na iɗika i gba̱ɗa̱i.

¹⁵Ɗaɗa uma ra̱ka̱ ali nu ngono, a̱ ka̱na̱i kusokongu ka̱ci ke le a aɓatsu ko e mere ma atali a gbagbaꞋin a na i a kusan kakau. Uma a nam pa a feu a̱ ka̱na̱i kusokongu: aza a̱ gba̱ra̱-gba̱ra̱ o tsugono, anan kovonshi,† aza a ikebe, aza a utsura, n uma o yoku a na a buwai ra̱ka̱, ko agbashi ko aza a na i agbashi ba. ¹⁶E ɗekei nsasan n akpanlai, a danai, “Tsu folono ɗa̱ ta̱, yikpa̱i ka̱ta̱ i pala tsu adama a na vuza na wi ida̱shi a kakuba ko tsugono tsa wa̱ kukpa̱ɗa̱ kene tsu, Ma̱giri ma feu wa kufuɗa we neke tsu atakaci ba. ¹⁷Mayun ɗa a Kanna ka na Ka̱shile m Ma̱giri e kuneke uma atakaci a yawa baci, babu vuza na u kulaꞋa a kanna ka atakaci ka nan lo.”

Uma 144,000 a Israila

¹Ana ka nam pa ka yaꞋin, ɗa me enei alingata a̱ na̱shi kashani a ngon n na̱shi ma aduniyan, uka̱ni n wunla̱i u na̱shi adama a na ka̱ta̱ ko wunla̱i u lapa a aduniyan ko a mala ko a maɗanga mo yoku ba. ²Ɗa me enei kalingata ko yoku kau a̱ kuta̱ a kasana, ɗa kpamu u ɗikai ili i na i kuzuwa urotu u Ka̱shile ka wuma. Ɗa wo orukpoi alingata a̱ na̱shi a na e nekei utsura a yaꞋanka iɗika m mala muna. ³Ɗa u danai kpamu, “Ka̱ta̱ vu ka̱sa̱kpa̱ wunla̱i wa u la̱nga̱sa̱ iɗika, ko mala ko nɗanga ba, sai tsu zuwa urotu a̱ a̱ca̱n a agbashi a̱ Ka̱shile ka̱ tsu.” ⁴M panai ka̱la̱ka̱tsu ke ɗekei ka̱bunda̱i ka uma a nan lo aza a na alingata a a zuwakai urotu u Ka̱shile a̱ a̱ca̱n e le. Urotu wa u ɗaɗa a̱kpa̱n amangatawun n a̱kpa̱n amangere n a̱kpa̱n a̱ na̱shi (144,000.) Uma a nam pa ele ɗa ntsukaya mu umaci kupa n u re ma aza a Israila. Aza a na alingata a zuwakai urotu ele ɗa na:

^5-8A zuwakai uma a̱kpa̱n kupa n e re (12,000) a umaci u Yahuza† urotu, ɗa kpamu a zuwakai uma a̱kpa̱n kupa n e re (12,000) a umaci u Ruben urotu.

A zuwakai uma a̱kpa̱n kupa n e re (12,000) a umaci u Gad urotu, ɗa kpamu a zuwakai uma a̱kpa̱n kupa n e re (12,000) a umaci u Asha urotu.

A zuwakai uma a̱kpa̱n kupa n e re (12,000) a umaci u Nafutali urotu, ɗa kpamu a zuwakai uma a̱kpa̱n kupa n e re (12,000) a umaci u Manasa urotu.

A zuwakai uma a̱kpa̱n kupa n e re (12,000) a umaci u Saminu urotu, ɗa kpamu a zuwakai uma a̱kpa̱n kupa n e re (12,000) a umaci u Levi† urotu.

A zuwakai uma a̱kpa̱n kupa n e re (12,000) a umaci u Isaka urotu, ɗa kpamu a zuwakai uma a̱kpa̱n kupa n e re (12,000) a umaci u Zabalun urotu.

A zuwakai uma a̱kpa̱n kupa n e re (12,000) a umaci u Isuhu† urotu, ɗa kpamu a zuwakai uma a̱kpa̱n kupa n e re (12,000) a umaci u Bayami urotu.

Ra̱ka̱ ra̱ka̱ a zuwakai uma a̱kpa̱n amangatawun n a̱kpa̱n amangere n a̱kpa̱n a̱ na̱shi (144,000) urotu.

Ka̱bunda̱i ka uma ka gbayin ka cikpai Ka̱shile

⁹Ana ka nam pa ko kotsoi, ɗa n la̱na̱i ɗa me enei ɗe ka̱bunda̱i ka uma ka na ka lazai tsu na vuza u kufuɗa we kece le ra̱ka̱. A̱ uta̱ ta̱ a iɗika dem, n umaci, n elentsu, n ka̱tsura̱ feu, ɗa a shamgbai e kelime ka kakuba ka m Ma̱giri ma. A ukai ntogu ma̱ a̱ri, yaba dem vi le u ka̱na̱i kacaka ke kekeme e kukiye ku ni. ¹⁰Ɗa a salai n ka̱la̱ka̱tsu ka̱u,

“Ka̱shile ka̱ tsu kaꞋa m Ma̱giri ma ele ɗa a isai tsu,

Ka̱shile ka̱ tsu vuza na wi ida̱shi a kakuba.”

¹¹Alingata a ra̱ka̱ i ta̱ kashani a uɓon u kakuba ko tsugono ka koɓolo nu nkoshi m gba̱ra̱-gba̱ra̱ n ili i wuma i na̱shi ya. Dem vi le ɗa a̱ kuɗa̱ngi n a̱shi e le a uɓon u kakuba wa ɗa a cikpai Ka̱shile. ¹²A̱ ka̱na̱i kudana,

“Tsu sala ta̱ a na Ka̱shile ka̱ tsu ki ta̱ n ugbonguri,

n utsura n tsugbayin, n ugboji, n tsugono.

YaꞋan ci cikpa yi

ka̱ta̱ tsu ci yaꞋanka yi ogodiya ko wanai.

Ta nannai!”

¹³Ɗa mokoshi mo yoku punu me ecei mu, “Anan yayi uma a nam pa a na a ukai aminya a̱ a̱ri a? Te ɗai a̱ uta̱?”

¹⁴Ɗa mu ushuki, “Vuzagbayin n yeve ba, amma vi yeve ta̱.”

U danai mu, “Na va ele ɗaɗa uma a na o soꞋi atakaci a gbayin ɗa a̱ kpa̱ɗa̱i kukuwa̱. A̱ za̱Ꞌa̱ ta̱ aminya e le nu mpasa m Ma̱giri adama a na o okpo wa̱ a̱ri.

¹⁵“Adama a nam pa, i ta̱ kashani e kelime ka kakuba ko tsugono tsu Ka̱shile.† I ta̱ a kucikpa yi kanna n kayin a̱ a̱Ꞌisa̱ a̱ ni. Ka̱ta̱ vuza na u da̱sa̱ngi gaɗi vu kakuba ka wi ta̱ o kuyongo n ele ka̱ta̱ wi inda le.

¹⁶“Uma a nan lo o kudoku a pana kambulu kpamu ba, i kpamu o kudoku a pana kakuli ba. Kanna ka kutakacika le ba, usuɗukpi kpamu u kusongu le ba, ¹⁷adama a na Ma̱giri ma na mi ɗevu n kakuba ka wi ta̱ o kokpo maguɓi me le. Wi ta̱ o kutono n ele a kubana a̱ ubuta̱ u na mini ma na me ci neke wuma mi a̱ kuta̱. Ka̱shile kpamu ki ta̱ a kura kujilya ku le ra̱ka̱.”

Urotu u cirupa̱ wu ukocishi

¹Ana Ma̱giri ma kulukpai urotu u cirupa̱ u cindere wu ukocishi wa, ɗa a paɗai bini ɗe gaɗi, ali kagimi ka̱ viyum vi te.

²Ɗa me enei alingata a gbagbaꞋin e cindere aza a na i kashani e kelime ka̱ Ka̱shile ka, ɗa yaba dem vi le wi isai kavana.

³Kalingata ko yoku kau ku uta̱i ɗa ka shamgbai a katalikalyuka.† Wi ta̱ a̱ kuɓa̱na̱ kakpanu ka azanariya, a̱ ubuta̱ u na o tsu songu ili i ma̱gula̱ni. Wi isai ili i ma̱gula̱ni i nam pa n a̱bunda̱i i na u ci yaꞋanka alyuka koɓolo n kavasa ka uma a̱ Ka̱shile ra̱ka̱. Kalingata ka ka zuwai alyuka a nam pa a katalikalyuka ka na a yaꞋin n azanariya ka na ki e kelime ka kakuba ko tsugono ka. ⁴Ili i ma̱gula̱ni ya a̱ kukula̱ punu a kakpanu ka na kalingata ka ki a̱ kuɓa̱na̱, ɗa ka̱nga̱ ka̱ ni koɓolo n avasa a uma a̱ Ka̱shile a kubana gaɗi u Ka̱shile. ⁵Ɗa kalingata ka ka ɗikai cikina tsa akina a̱ ubuta̱ u katalikalyuka ɗa u shatangi kakpanu ka. Ɗa u ɓasangi kaꞋa a aduniyan: kutashi n ulaɗi maru-maru, n kacaꞋa, n akpanga a gbagbaꞋin, ɗa iɗika kpamu i gba̱ɗa̱i ka̱u.

Alingata a̱ na̱shi a̱ ugiti a̱ lika̱i avana e le

⁶Ɗaɗa alingata e cindere a na i a̱ kuɓa̱na̱ avana e cindere o foɓusoi kulika̱ le.

⁷Ana kalingata ka iyain ka̱ lika̱i kavana ka̱ ni, ɗa alingata a taɗuki mini ma atali n akina usatari nu mpasa a aduniyan. Akina a o songi ugboku u te a̱ ka̱tsuma̱ ku ugboku u tatsu a aduniyan gbende, ɗa a̱ la̱nga̱sa̱i nɗanga ra̱ka̱ n yutishi yu ukambu ya. Ɗa ugboku u re a aduniyan o okpoi.

⁸Ɗa kalingata ke ire ka̱ lika̱i kavana ka̱ ni. Ɗa a taɗuki punu a mala ma ili tsu kusan ku gbayin ku na ki a̱ kukula̱. Ɗa ugboku u te a̱ ka̱tsuma̱ ku ugboku u tatsu a̱ mini ma mala ɗa u bonoi mpasa. ⁹Ɗaɗa ili ra̱ka̱ a̱ ka̱tsuma̱ ki ili i tatsu i na yi o kuyongo punu a mala ma nan lo i kuwa̱i, ɗa kpamu antsu a na i punu a ugboku u mala u nan lo wa a̱ ciya̱i muna ra̱ka̱.

¹⁰Ɗaɗa kalingata ka tatsu ka̱ lika̱i kavana ka̱ ni, ɗa kazangata ka gbayin ka na ki a̱ kukula̱ an ka̱va̱sa̱, ku uta̱i gaɗi ɗa ka̱ yikpa̱i. Kazangata ka ka̱ yikpa̱i o kuɗolu ku te a̱ ka̱tsuma̱ ko nɗolu n tatsu, ɗa kpamu ka̱ yikpa̱i a̱ ka̱shi ka̱ mini ke te a̱ ka̱tsuma̱ ka tatsu. ¹¹Kula ku kazangata ka ku ɗaɗa A̱guma̱ o Okono, ɗa ukambu u te a̱ ka̱tsuma̱ ku ukambu u tatsu u mini wa u bonoi okono. Ɗa uma n a̱bunda̱i a̱ kuwa̱i adama a na mini ma mi ta̱ n okono.

¹²Ɗa kalingata ka̱ na̱shi ka̱ lika̱i kavana ka̱ ni. Ɗa ili i lapai ɗa i la̱nga̱sa̱i ukambu u te a̱ ka̱tsuma̱ ku ukambu u tatsu u kanna, n wotoi n azangata. Ɗa ayin a kutashi ku kanna e jebei, ɗa ka̱yimbi ka̱ kimba̱i ukambu u te a̱ ka̱tsuma̱ ku ukambu u tatsu u ayin a kutashi. Ɗa wotoi n azangata a̱ kpa̱ɗa̱i kudoku kuneke kutashi a ukambu u te a̱ ka̱tsuma̱ ku ukambu u tatsu.8:12 Kanna ki ishi ta̱ ka tsu akana a agisana a̱ iyum kupa n ire, amma n ayin a kabaꞋin ka nam pa ka tsu akana ta̱ a̱ iyum kunla̱i koci. Ili i te i ɗa kpamu n wotoi n azangata; i ta̱ a kakana a̱ iyum kunla̱i koci. Ayin a na i a kuyaꞋan kutashi ba, ubuta̱ u tsu okpo ta̱ n ka̱yimbi.

¹³Ɗaɗa n la̱nuki ɗa me enei kajimba a ciꞋimkpi gaɗi zuva, o yoroli n kacaꞋa a kudana, “Ili ya atakaci! Ili ya atakaci! Ili ya atakaci yi ta̱ a kucina uma a aduniyan ra̱ka̱ a ayin a na baci alingata a tatsu a na a buwai a̱ kulika̱ avana e le.”

¹Ɗaɗa kalingata ka tawun ka̱ lika̱i kavana ka̱ ni. Ɗa me enei ili an kazangata ka na ka̱ yikpa̱i a iɗika. Ɗa kazangata ki isai kagbaguratsu adama a na u ɓa̱yuwa̱ kpenle ku zururu. ²Ana u ɓa̱yuwa̱i ku ɗa, ɗa ka̱nga̱ ku uta̱i a kpaꞋa ka akina ku na ki n usuɗukpi ka̱u. Ka̱nga̱ ka ka̱ ɗenga̱i ɗa ka shanai gaɗi ali kaꞋa ka palai kutashi ku kanna, ɗa ubuta̱ wo okpoi n ka̱yimbi.

³Ɗa akyuꞋun n a̱bunda̱i a̱ uta̱i ɗe a̱ ka̱nga̱ ka, ɗa a̱ cipa̱i a iɗika, ɗa e nekei le utsura u na a taɗa uma tsa adyaɓu. ⁴Ɗa a danai le, “U gaꞋan ta̱ i taɗa aza a na i babu urotu u Ka̱shile a̱ a̱ca̱n e le. Amma ka̱ta̱ i taɗa nɗanga ko ica̱Ꞌa̱shi ba.” ⁵Ka̱shile ka zuwai le e neke uma mɓa̱la̱ ka̱u n a̱bunda̱i n na n laꞋi n na m buwai, ali wotoi u tawun, amma u ka̱sa̱kpa̱ a una le ba. Mɓa̱la̱ n na a kupana n yotso ta̱ uteku u na kudyaɓu ku tsu taɗa vuza ka̱ta̱ u ɓa̱la̱. ⁶A̱ ka̱tsuma̱ ka ayin a nan lo, uma i ta̱ a̱ kula̱nsa̱ ukpa̱, amma a̱ kuciya̱ u ɗa ba. A kuciga ta̱ a̱ kuwa̱, amma a kufuɗa ba.

⁷AkyuꞋun a nam pa i ta̱ an tsa odoku a na i ufoɓushi adama a na a bana kuvon. I ta̱ n oroliko o tsugono a azanariya a aci e le, n ukambu u a̱shi tsu uma. ⁸A̱nji e le kpamu ugaɗi ugaɗi an ka̱nji ka vuka, anga e le an anga a ikawu. ⁹A ukai ntogu mi iyum a̱ nka̱nga̱ n le. KacaꞋa ka na evelyu e le a yaꞋin ki ta̱ tsu na odoku o kuvon n a̱bunda̱i a ci yaꞋan moloko a kubana a̱ ubuta̱ u kuvon. ¹⁰Nu ntaɗatsu a winja n na n kuneke le utsura u kuzuwa uma o soꞋo atakaci ali wotoi u tawun. ¹¹Mogono me le a̱yi ɗa kalingata ka na ki a kulyaꞋa tsugono e kpenle ku zururu. Kula ku ni ku ɗa MalyaꞋi. (N ci Ciyahuda ɗaɗa Abadon, n Cihelene† ɗaɗa Afoliyon).

¹²Atakaci a iyain o kotso ta̱. Amma atakaci e re a buwa ta̱ a na a̱ ta̱wa̱.

¹³Ɗa kalingata ka̱ ta̱li ka̱ lika̱i kavana ka̱ ni. M panai ka̱la̱ka̱tsu a kadanshi a̱ kuta̱ punu e mere ma avana a katalikalyuka ka azanariya ka na ki e kelime ka̱ Ka̱shile.9:13 Katalikalyuka ka ki ta̱ n avana a azanariya a̱ na̱shi o mogon dem. Ka̱la̱ka̱tsu ka ta punu ku uta̱i e mere me le.

¹⁴Ka̱la̱ka̱tsu ka danai kalingata ka̱ ta̱li ka na ki a̱ kuɓa̱na̱ kavana ka, “Shikpa alingata a̱ na̱shi a na Ka̱shile ka shiyai o kuɗolu ku gbayin ku Yufiriti ka.” ¹⁵Ɗaɗa kalingata ka̱ ta̱li ka ka shikpai alingata a̱ na̱shi a nan lo a na a̱ uta̱i kuna vuza te te a̱ ka̱tsuma̱ ka uma a tatsu a na i a aduniyan a. Ka̱shile ko foɓuso le ta̱ ɗe a yaꞋan nannai a̱ ka̱tsuma̱ ka ayin a nam pa a. ¹⁶Alingata a a ukai osoji a na a kumbai odoku a kelime. M pana ta̱ a danai i ta̱ lo ali uma mbana amangatawenre (200,000,000).

¹⁷I na me enei tsalatani kpamu, me enei odoku n aza a na a kumbai le. A ukai ntogu mi iyum a̱ nka̱nga̱ n le n na mi ushili tsa akina, m bulu tsu kokocilili, koɓolo m mini mo tsuloꞋo. Aci o odoku a an aci a ikawu, n akina kpamu n ka̱nga̱ n farinwuta a̱ kuta̱ a̱ una̱ u le. ¹⁸Ndukpa̱ n tatsu n nam pa ma, (n ɗaɗa akina n ka̱nga̱ n farinwuta a̱ kuta̱ a̱ una̱ wo odoku wa) a una ta̱ vuza te te a̱ ka̱tsuma̱ ka uma a tatsu a na i a aduniyan. ¹⁹A̱ una̱ wo odoku u ɗa koci ba, amma ali n winja u le dem o kuforo uma. Winja u le wi ta̱ an oko n aci a kuluma uma.

²⁰Amma uma a na a̱ kpa̱ɗa̱i kukuwa̱ nu ndukpa̱ n nan lo ali n gogo na a̱ ka̱sa̱kpa̱ ulinga u gbani-gbani u le ba. A lyaꞋi kelime n kucikpa wunla̱i u gbani-gbani n a̱ma̱li a na a̱ luwa̱i n azurufa n azanariya, n iyum i shili. Ɗa kpamu e sheꞋwei o yoku n atali, nu nɗanga. A̱ma̱li a nam pa e ce ene ko a pana ko a wala ba! ²¹Uma a nam pa a̱ ka̱sa̱kpa̱ munanai, ko kuyaꞋan nkunu n na n laꞋi m gbani-gbani, ko tsugbani, ko uboki ba.

Kalingata n katagarda ke kenu

¹Ɗa kpamu me enei kene, ɗa me enei kalingata ku utsura a̱ kuta̱ gaɗi. U shiyai keleshu u ka̱ra̱Ꞌa̱ka̱i ka̱ci ka̱ ni an mayaga, n vukamba kpamu a kaci ka̱ ni. Ɗa a̱shi a̱ ni a akanai an kanna, ene a̱ ni kpamu an akina a na a̱ ɗenga̱i tsu nshukpu. ²U ka̱na̱i katagarda ke kenu ka na ki uɓa̱yuwi. U shamgbai n kune ku usingai ku ni a mala, n kune ku ugula̱ ku ni kpamu a iɗika. ³Ɗa wo orukpoi n ka̱la̱ka̱tsu n kacaꞋa ka na ki ci izumgbi i ikawu. Ana wo orukpoi, ɗa akpanga e cindere a̱ ushuki. ⁴Ana akpanga e cindere a yaꞋin kadanshi, ɗa n gita̱i kuɗana. Amma ɗa m panai ka̱la̱ka̱tsu gaɗi ka danai, “Sokongu mayin ili i na akpanga e cindere a a danai, ka̱ta̱ vu ɗana i ɗa ba.”

⁵Kalingata ka na ka shamgbai a mala koɓolo n iɗika ya ka̱ ɗengusa̱i kukiye ku usingai ku ni a kubana gaɗi. ⁶Ɗa u kucinai n kula ku Ka̱shile, vuza na u tsu kuwa̱ ba, n vuza na u yaꞋin gaɗi n iɗika m mala n ili i na yi punu dem, a na wi a kudansa ili i mayun. U danai, “Ka̱shile ko kudoku ka vana ka̱ta̱ u yeve u yaꞋan ili i na u sheshei ba. ⁷Amma kalingata ke cindere ka̱ lika̱ baci kavana ka̱ ni, Ka̱shile ki ta̱ a kuyaꞋan ili i na yi ishi lo usokongi ali gogo na, uteku u na u danai agbashi a̱ ni, eneki.”

⁸Ɗa ka̱la̱ka̱tsu ka na ki gaɗi va ko doku ke ɗekei mu kpamu: “Bana vi isa katagarda ka na a̱ ɓa̱yuwa̱i va, ka na Kalingata ka na ka shamgbai a mala koɓolo n iɗika ki a̱ kuɓa̱na̱ va.”

⁹Ɗa m banai u kalingata ka, ɗa n danai ni u neke mu katagarda ke kenu ka. Ɗa u danai mu, “Ɗika katagarda ka ka̱ta̱ vu takuma kaꞋa. A̱ una̱ u nu ki ta̱ o kuyokpo ci ishigi, amma ki ta̱ a kuyaꞋan okono a̱ ka̱tsuma̱ ka̱ nu.” ¹⁰N ɗikai katagarda ka na wi a̱ kuɓa̱na̱ va, ɗa n takumai kaꞋa. Ɗa ko yokpoi ci ishigi a̱ una̱ u va̱, amma ana n soɗongi kaꞋa, ɗa ka kukucikpa ko bonoi okono a̱ ka̱tsuma̱ ka̱ va̱. ¹¹Ɗaɗa a danai mu, “Mayun ɗa vu sala kpamu gogo na ili i na Ka̱shile ke sheshei kuyaꞋanka uma a iɗika n a̱bunda̱i n umaci, aza a na i a kudansa kelentsu kakau, nu ngono ra̱ka̱.”

Ngan n re

¹Ɗaɗa mi isai kalangu ka kugisanku, ɗa Ka̱shile ka danai mu, “Bana vi gisangu A̱Ꞌisa̱ a Gbayin a̱ Ka̱shile n katalikalyuka, ka̱ta̱ vi kece uma a na i a kucikpa Ka̱shile punu. ²Amma ka̱ta̱ vi gisangu ulanga u na wi lo pulai va̱ a̱Ꞌisa̱ va ba, adama a na n neke ta̱ na lo va wa aza a na a̱ kpa̱ɗa̱i kuneke a̱ɗu nu mpa. I ta̱ a kulyaꞋa tsugono a̱ likuci i va̱ ali wotoi amangere n u re.11:2 Wotoi amangere n u re ili i te i ɗa n ayin 1,260. La̱na̱ kpamu 12:14.³Mi ta̱ a̱ kusuku ngan n re n va̱, aza a na a kudana kadanshi ka̱ va̱ ka mayun u uma. I ta̱ a kuꞋuka aminya a na a ukai adama a̱ una̱mgbuka̱tsuma̱, ka̱ta̱ a̱ ka̱na̱ kudana uma kadanshi ka̱ va̱ a̱ ka̱tsuma̱ ka ayin ka̱kpa̱n ke te n amangatawenre n amangatatsu (1,260).”

⁴Ngan n re n na mi a kusala ukuna u kadanshi ka̱ Ka̱shile i ta̱ kashani e kelime ka Vuzavaguɗu, vuza na wi a kulyaꞋa tsugono tsa aduniyan a nam pa ra̱ka̱. Ele ɗa o okpoi a na nɗanga n zaitun n re n ashamkpatsu a̱ nkuni e re ɗe. ⁵Vuza na baci u cigai kuforo le, akina i ta̱ a̱ kuta̱ punu a̱ una̱ u le ka̱ta̱ a una irala i le. Nannai ɗa Ka̱shile ka kuna yaba dem vu na baci u cigai kuneke le usa̱n. ⁶A̱ ka̱tsuma̱ ka ayin a na i a kudana uma kadanshi ka̱ Ka̱shile, wi ta̱ e kuneke le utsura u na a̱ sa̱nka̱ mini ma̱ Ka̱shile. A̱ ciya̱ ta̱ kpamu utsura u na a kufuɗa kubonoko mini mo okpo mpasa, ka̱ta̱ a zuwa ma̱dukpa̱ ma na baci a cigai dem ma̱ ka̱na̱ kuneke uma a iɗika usa̱n. I ta̱ a kufuɗa kuyaꞋan ili i nam pa a ayin a na baci de dem a cikalai.

⁷Ayin a na ngan n re ma o kotsoi kudana akaka e le, ka̱di ka na ku uta̱i e kpenle ku zururu ka ki ta̱ a kuyaꞋan kuvon n ele. Wi ta̱ a kulyaꞋa le ali ka̱ta̱ wu una le. ⁸I ta̱ a kuvakangu even a ikyamba i le a uye u gbayin u likuci a̱ ubuta̱ u na a kutangi Vuzagbayin vi le ikusa a maɗanga ma atakaci.† Uɗeki u na e ɗekei likuci i nan lo “Sodom”† ko “Masar” u yaꞋan ta̱ an kansa.⁹Uma a iɗika dem, n umaci, n elentsu, n ka̱tsura̱ feu i ta̱ e kene even a ikyamba i nan lo. A̱ kuka̱sa̱kpa̱ vuza u ciɗa̱ngu le ba, sai a yaꞋan ayin a tatsu n kagimi. ¹⁰Uma a aduniyan ra̱ka̱ i ta̱ a kuyaꞋan ma̱za̱nga̱ adama a na uma e re a nam pa a̱ kuwa̱ ta̱. I ta̱ a kuyaꞋan ka̱ɗiva̱ ka̱ta̱ a tsula kuneꞋe e nekenei, adama a na eneki e re a nam pa a zuwa ta̱ uma o soꞋi atakaci n a̱bunda̱i.

¹¹Amma ana ayin a tatsu n kagimi a lazai, ɗa Ka̱shile ka̱ tsuwa̱nka̱i eneki e re a nan lo ayinviki a wuma kpamu. Ɗa a̱ ɗenga̱i a shamgbai kashani n ene e le, ɗa yaba dem vu na we enei le u panai wovon ka̱u. ¹²Ɗa eneki e re a a panai ka̱la̱ka̱tsu ku utsura ku uta̱i gaɗi a kudana, “Ta̱wa̱i gaɗi na!” Ɗaɗa a̱ ɗenga̱i a kubana a̱ Ka̱shile punu a asuvu e eleshu, irala i le tamkpamu a iɗika a kinda le.

¹³Gogo va lo ɗa iɗika i gba̱ɗa̱i n utsura ɗa kasaka ke te a̱ ka̱tsuma̱ ka asaka kupa dem punu a̱ likuci ya a̱ yikpa̱i. Uma a̱kpa̱n e cindere a̱ kuwa̱i adama a̱ kugba̱ɗa̱ ki iɗika ku nan lo. Aza a na a buwai n wuma a panai wovon ka̱u ɗa e nekei Ka̱shile ka na ki a̱ ida̱shi na ɗe gaɗi tsugbayin. ¹⁴Atakaci e ire o kotso ta̱, amma a tatsu a yawa ta̱ ɗevu n kuta̱wa̱.

Kavana ke cindere

¹⁵Ɗa kalingata ke cindere ka̱ lika̱i kavana ka̱ ni, ɗa m panai alingata na ɗe gaɗi a kuyaꞋan kadanshi n kacaꞋa a kudana,

“Ka̱shile ka̱ tsu n vuza na u zagbai adama a na wo okpo Kishi, wi ta̱ n utsura u na u lyaꞋa tsugono a iɗika dem,

Ka̱shile ki ta̱ a kulyaꞋa tsugono ali ayin a babu uteku.”

¹⁶Ɗa nkoshi m gba̱ra̱-gba̱ra̱ ele uma kamanga n aza a̱ na̱shi a, ele na i ida̱shi a akuba o tsugono a̱ ubuta̱ u te n Ka̱shile, a̱ kuɗa̱ngi ali a lyaꞋi kayala ɗa a cikpai ni. ¹⁷A danai,

“Vuzavaguɗu Ka̱shile Uba̱nga̱ri,

vuza na wi n wuma gogo na, n ayin a ɗe,

ci cikpa wu ta̱ a na vi o kuyotsongu utsura u gbayin u nu.

Vi gita̱ ta̱ ɗe feu kulyaꞋa tsugono.

¹⁸Uma a aduniyan i ta̱ a wupa n avu,

amma gogo na ayin a wupa a̱ nu a yawa ta̱.

Ayin a ɗa a na va kuyaꞋanka a̱kpisa̱ afada,

ka̱ta̱ vu tsupa agbashi a̱ nu.

Vi ta̱ a kutsupa eneki a̱ nu n uma a ciɗa† a̱ nu,

vi ta̱ a kutsupa aza a na a panai wovon u kula ku nu ra̱ka̱,

u gita̱ a vuza na u laꞋi n kenu ali a kubana u vuza na u laꞋi m gbayin.

Ka̱ta̱ vu una ra̱ka̱ aza a na a̱ tuka̱i n koli a iɗika.”

¹⁹A̱Ꞌisa̱ a̱ Ka̱shile na ɗe gaɗi a̱ ɓa̱yuwa̱i, ɗa a fuɗai e enei Akpati vu Uzuwakpani† punu a asuvu. Ɗa ulaɗi u ka̱na̱i kuyaꞋan maru-maru n cigiriwi n kacaꞋa ka akpanga, n kugba̱ɗa̱ ki iɗika, m mini ma atali n a̱bunda̱i.

Vuka n vungu

¹Ɗa me enei urotu u gbayin na ɗe gaɗi, u na u nekei yaba dem mereve. Vuka vi yoku ɗa vi lo, mayaga ma na u shiyai kpamu kanna kaꞋa. Ene a̱ ni i ta̱ ukiyangi a gaɗi vu wotoi. Wi ta̱ kpamu n oroliko n azangata kupa n e re a kaci ka̱ ni. ²Limata i yawa yi ta̱ ɗevu, mɓa̱la̱ n atakaci a̱ a̱ga̱nda̱ a limata kpamu a zuwa yi ta̱ ma̱shi. ³Gogo lo ɗa me enei urotu u yoku gaɗi. Me enei vungu vu gbayin vi shili n aci e cindere n avana kupa. Kaci dem ki ta̱ n oroliko e kenu.⁴Winja u ni u ronoi kazangata ke te a̱ ka̱tsuma̱ ka azangata a tatsu dem a gaɗi, ɗa u taɗuki le a aduniyan. U shamgbai e kelime ka vuka ka adama a na u soɗongu maku ma̱ ni gogo lo a ayin a na baci u matsai. ⁵Ɗa u matsai maku mo kolobo, ma na mi nu utsura ra̱ka̱ ma lyaꞋa tsugono n usuɗukpi a̱ ubuta̱ u uma a aduniyan ra̱ka̱. Amma ɗa kalingata ka kikpatsai maku ma, ɗa u bankai ni u Ka̱shile adama a na u da̱sa̱ngu a kakuba ko tsugono ka̱ ni. ⁶Vuka va vu sumai ɗa vu banai a kakamba a̱ ubuta̱ u na Ka̱shile ko foɓusokoi ni. I ta̱ a̱ kula̱na̱ yi ɗe ali ayin ka̱kpa̱n ke te n amangatawenre n amangatatsu (1,260).

⁷Gogo lo ɗa a̱ gita̱i kuvon gaɗi: kalingata ka gbayin MikaꞋilu n alingata a̱ ni a̱ shilika̱i n vungu, ɗa vungu va n aza a̱ ni feu a shamkpai vishili. ⁸Amma vungu va vi lyaꞋa utsura u le ba, i ta na feu a̱ kuka̱sa̱kpa̱ yi n aza a̱ ni o doku o yongo gaɗi ba. ⁹Ɗa MikaꞋilu n alingata a̱ ni a taɗuki vungu vu nan lo a kubana a iɗika n aza a̱ ni. Vungu vu nam pa a̱yi ɗa vuza na u yongoi ali n ayin a mani-mani, a̱yi ɗa vuza na feu e ci ɗeke Kalijani ko MalyaꞋi. A̱yi ɗa vuza na u tsu ya̱nsa̱ yaba dem ka̱ta̱ u yaꞋan unushi.

¹⁰Ɗaɗa m panai vuza yoku ɗe gaɗi u danai n ka̱la̱ka̱tsu ka gbayin:

“Gogo na Ka̱shile ka̱ tsu ki ta̱ a kisa uma a̱ ni!

Gogo na wi ta̱ a kuyaꞋan ulinga n utsura u ni,

ka̱ta̱ u lyaꞋa tsugono an mogono!

Gogo na Kishi ka̱ ni ki ta̱ o kuyotsongu utsura u ni wa aduniyan!

Adama a na Kalijani ko doku ka shamgba a̱ ubuta̱ u Ka̱shile u tsu ba,

u buwa a kusatangu itoku i tsu agbashi kanna n kayin ba.

A taɗuku ta̱ Kalijani pulai vu gaɗi!

¹¹Uma a̱ tsu a lyaꞋa ta̱ utsura u Kalijani

adama a mpasa m Ma̱giri ma,

n akaka a̱ Ka̱shile a na kpamu i a kudansa.

A pana wovon wu ukpa̱ ba.

¹²A̱ɗa̱ vu na yi gaɗi ra̱ka̱ yaꞋin ma̱za̱nga̱.

Amma a̱ɗa̱ vu na yi a iɗika n asuvu a mala yi ta̱ o kusoꞋo atakaci ka̱u.

Na va ɗaɗa adama a na Kalijani ka̱ cipa̱ ta̱ wa̱ ɗa̱,

u yaꞋan ta̱ kpamu wupa ka̱u

adama a na u yeve ta̱ ayin a̱ gusa̱ yi ta̱ an wa shamgba.”

¹³Ana vungu ve enei a taɗuki ni a iɗika, ɗa u gita̱i kuguva vuka vu na vu matsai maku mo kolobo ma. ¹⁴Vuka va vi isai evelyu a kajimba ka gbayin adama a na u ciya̱ u imkpa o kubono a̱ ubuta̱ u ni a kakamba. Adama a na ta ɗe a̱ kula̱na̱ yi ali a̱ya̱ a tatsu n kagimi, vungu ta na wa kufuɗa wa yaꞋanka yi muna ba. ¹⁵Ɗaɗa vungu vu cikpa̱i mini ɗa mo okpoi an kuɗolu ku na ka kulyaꞋa vuka va, adama a na ma laza n a̱yi. ¹⁶Amma ɗa iɗika i ɓa̱nka̱i vuka va: i ɓa̱yuwa̱i una̱ u ni ɗa i soɗongi mini ma na vungu u cikpa̱i va. ¹⁷Ɗa vungu va vi yaꞋin wupa n vuka va ka̱u, ɗa u ɗenga̱i kuyaꞋan kuvon m muku n ni n na m buwai ra̱ka̱. Muku n ni ma ele ɗa aza a na o tonoi wila̱ u Ka̱shile n aza na o tonoi akaka a na Yesu u yotsongushi.

¹⁸Ɗaɗa vungu va vi shamgbai a̱ ka̱kina̱ ka mala ka.12:18 Katagarda Ka Ciɗa ka zuwa ta̱ kabaꞋin ka nam pa ka a̱ ka̱tsuma̱ ka kabaꞋin ka 17, aza o yoku kpamu ka 18. Aza o yoku kpamu a zuwa ta̱ kaꞋa punu a masala ma 13 kabaꞋin ke 1.

Ka̱di ka na ku uta̱i a mala

¹A̱ ubuta̱ u kene u va̱, ɗa me enei ka̱di a̱ kuta̱ a mala. Wi ta̱ n aci e cindere n avana kupa. Kavana dem ki ta̱ n oroliko e kenu gaɗi vi ni. Kaci dem a ɗana ta̱ ɗe kula ki ishikushi i Ka̱shile ²Ka̱di ka nam pa ko yotso ta̱ kanama, amma ene a̱ ni an manama ma kakamba ma na e ci ɗeke biya.13:2 Ene a biya i ta̱ ugaɗi n cileme, wi ta̱ n a̱kutsulu a ugaɗi kpamu. Wi ta̱ feu n una̱ an u kawu. Vungu va vi nekei ka̱di ka utsura derere n u ni, n kakuba ko tsugono n tsugono kpamu.

³Kaci ke te ka̱ ka̱di ka an kalana ku usa̱n ka na ka yawai ku una yi, amma usa̱n wa u ta̱na̱ ta̱ ɗe. Yaba dem a aduniyan u yaꞋin mereve ma̱ ka̱di ma. ⁴Ra̱ka̱ vi le a cikpai vungu va, vuza na u nekei ka̱di ka utsura u ni. Ɗa feu a cikpai ka̱di ka ɗa a danai, “Vuza wi lo tsu ka̱di ka nam pa ba! Vuza wi lo a̱ kushilika̱ n a̱yi ka̱ta̱ u lyaꞋa yi utsura ba.”

⁵Ka̱shile ka̱ ka̱sa̱kpa̱i ka̱di ka ka yaꞋan a̱ra̱ɗi n utsura u ni ka̱ta̱ tsu nam pa u shika yi kpamu. Ka̱shile ka̱ ka̱sa̱kpa̱ yi ta̱ u ciya̱ utsura u tsugono ali wotoi amangere n u re. ⁶Ɗa u gita̱i kushika Ka̱shile. U shikai feu kula ku Ka̱shile, n ubuta̱ u na wi o kuyongo, n aza a na i gaɗi ra̱ka̱. ⁷Ka̱shile kpamu ka̱ ka̱sa̱kpa̱i ni u shilika̱ n uma a̱ ni ka̱ta̱ u lyaꞋa le utsura. E nekei ni feu utsura u na u laꞋi uma a iɗika dem, n umaci, n elentsu, n ka̱tsura̱ feu. ⁸Yaba dem a aduniyan wi ta̱ kucikpa yi, saidei aza a na a ɗanai ula e le a Katagarda ka Aza a Wuma kafu a yaꞋan aduniyan. Katagarda ka nan lo ka̱ Ma̱giri kaꞋa ka na a unai.

⁹Vuza na wi n atsuvu dem u pana.

¹⁰Vuza na dem Ka̱shile ke sheshei a̱ ka̱na̱, i ta̱ a̱ kuka̱na̱ yi.

Vuza na dem Ka̱shile ke sheshei a una n kotokobi,

i ta̱ a kuna yi.

Ili i nam pa ya uma a̱ Ka̱shile a̱ lulukpa̱,

ka̱ta̱ kpamu a yaꞋan n uneki u ka̱ɗu.

Ka̱di ke ire

¹¹Ɗaɗa me enei ka̱di ko yoku ku uta̱i a iɗika. Wi ta̱ n avana e re an a̱ ma̱giri, ɗa u yaꞋin kadanshi n ka̱la̱ka̱tsu ka̱ vungu. ¹²Ka̱di ka nam pa ka ka shamgbai a̱ ubuta̱ u ka̱di ka iyain ka, ɗa u yaꞋin ulinga n icuꞋu yu utsura u na ka̱di ka iyain ka ki n u ɗa. N utsura u nam pa u ɗa u tsu zuwa yaba dem vu na wi a aduniyan u cikpa ka̱di ka iyain ka, vuza na wi n usa̱n wu ukpa̱ u na u ta̱na̱i ɗe. ¹³Ka̱di ke ire ka ka yaꞋin ili i mereve i gbagbaꞋin. Ali u zuwai akina a̱ uta̱ gaɗi ka̱ta̱ a̱ ta̱wa̱ a aduniyan, uma e kene. ¹⁴Ka̱shile ka̱ ka̱sa̱kpa̱i ka̱di ke ire ka yaꞋan ili i mereve a̱ a̱shi a̱ ka̱di ka iyain. Adama a ili i mereve i nam pa ɗa u fuɗai u zuwai uma a aduniyan ra̱ka̱ a̱ puwa̱nka̱. U zuwai le a yaꞋan ka̱ma̱li ka̱ ka̱di ka iyain ka, vuza na a unai n kotokobi amma ko n nannai ɗa u bonoi n wuma. ¹⁵Ka̱shile ka̱ ka̱sa̱kpa̱i ka̱di ke ire ka zuwa ka̱ma̱li ka̱ ka̱di ka iyain ka ko okpo n wuma, adama a na ka yaꞋan kadanshi ka̱ta̱ ka zuwa le a una yaba dem vu na u iwain kutono yi. ¹⁶A gutsai uma ra̱ka̱ a zuwa urotu e ekiye a usingai e le ko a̱ a̱ca̱n, vuzagbayin ko vuza vi kenu, vuza vu uciyi ko vuza vu unambi, kagbashi ko vuza vi ida̱shi i ka̱ci ka̱ ni. ¹⁷Aza a na i n urotu u nam pa koci ele ɗa a kutsula ko e denge. Urotu u nam pa u ɗa kula ku ka̱di ka ko lamba vu kula va.

¹⁸Sai vi n kuyeve ka̱ta̱ vi yeve lamba vu ka̱di va! Amma vi baci n kuyeve gogo vi ta̱ e kuyeve ili i nam pa. Lamba vi ni vu ɗaɗa amangatawa̱nta̱li n amangatatsu n ta̱li (666), lamba va kpamu vuza ɗa.

Ma̱giri n uma a̱ ni

¹Ɗaɗa me enei Ma̱giri ma kashani a Kusan ku Sihiyona.† Uma a a̱kpa̱n amangatawun n a̱kpa̱n amangere n a̱kpa̱n a̱ na̱shi (144,000) a shamgbai koɓolo n a̱yi. Uma a nam pa a ele ɗa aza a na a ɗanai punu a̱ a̱ca̱n n e le ula a Ma̱giri a n Esheku a̱ ni. ²M panai vuza a kadanshi a̱ Ka̱shile. Ka̱la̱ka̱tsu ka̱ ni ki ta̱ tsu na mini me ci yene n a̱bunda̱i ko kakpanga ka gbayin. KacaꞋa ka uma n a̱bunda̱i kaꞋa a kuwaꞋa umolu kpamu.

³Ɗa uma a̱kpa̱n amangatawun n a̱kpa̱n amangere n a̱kpa̱n a̱ na̱shi (144,000) a shamgbai ɗevu n kakuba ko tsugono ka, koɓolo n ili i wuma i na̱shi, nu nkoshi m gba̱ra̱-gba̱ra̱ ma. I a kuyaꞋan vishipa vu savu, babu vuza na u kuyeve vu ɗa, sai ele koci. A̱ ka̱tsuma̱ ka uma a aduniyan ra̱ka̱, ele ɗa aza a na a̱ ciya̱i wishi. ⁴Ele ɗa ali a na a̱ ka̱na̱i ka̱ci ka̱ le a̱ kpa̱ɗa̱i kuyaꞋan tsugbani, adama a nannai i ta̱ ciɗa. O yongoi o kutono Ma̱giri ma a̱ ubuta̱ u na baci u banai dem. Ele aza a̱ Ka̱shile a ɗa kpamu n aza a̱ Ma̱giri; i ta̱ ci ili ya avaꞋinka i na e ci neke Ka̱shile. ⁵A ci yaꞋan aꞋuwa ba, i kpamu n unushi ba.

Alingata a tatsu

⁶Ɗaɗa me enei kalingata ko yoku kau a kuyaꞋan ciꞋimkpi gaɗi ka̱u. A̱yi a kubana kudana Arabali a Singai† a na i babu uteku wa aza a na i punu o kuyongo a aduniyan, koɓolo n uma a iɗika dem, n umaci, n elentsu, n ka̱tsura̱ feu. ⁷Ɗa u dansai n ka̱la̱ka̱tsu ka̱u u danai, “U gaꞋan ta̱ i neke Ka̱shile tsugbayin, ka̱ta̱ i dansa tsu na tsugbayin ci ni ci. Adama a na ayin a yawa yi ta̱ a na wa yaꞋanka uma a aduniyan afada. Nekei ni tsugbayin, adama a na a̱yi ɗa vuza na u yaꞋin gaɗi n iɗika, mala n ubuta̱ u na a̱shi a̱ mini i a̱ kuwa̱.”

⁸Ɗaɗa kalingata ke ire ka imkpai gaɗi ka̱u tsu ka iyain ka a kudana, “Likuci i gbayin i Babila† i yikpa̱ ta̱! Na ɗa likuci i na tsugbani ci le tsu zuwai iɗika ra̱ka̱ yo okpoi ni nshinda̱. I ta̱ adanshi u neke le ta̱ ujari u tsugbani u ni, na wi ta̱ ta na a kuzuwa Ka̱shile ke neke le atakaci.”

^9-10Ɗa kalingata ka tatsu ko tonoi le, a kusala, “Uma a na i ra̱ka̱ o kutono ka̱di n ka̱ma̱li ka̱ ni, i ta̱ a̱ kuciya̱ urotu u ka̱di wa a̱ a̱ca̱n e le ko e ekiye e le. Ka̱shile ki ta̱ a kuzuwa le ra̱ka̱ o soꞋo ma̱kya̱n ma wupa ma̱ ni. Ma̱kya̱n ma nam pa a satara maꞋa m mini ba, ɗa Ka̱shile a̱ ka̱ci ka̱ ni u tsuwa̱in maꞋa a mataꞋan ma atakaci ma̱ ni. Uma a nam pa i ta̱ o kusoꞋo atakaci a̱ kukula̱ an farinwuta ɗevu n alingata a ciɗa a̱ Ma̱giri. ¹¹Akina a na e kuneke le atakaci a kusaꞋwa kukima̱ ba. Ele na i a kucikpa ka̱di n ka̱ma̱li ka̱ ni ɗa kpamu i n urotu u kula ku ni, atakaci o kukotso we le ba, ko kenu.” ¹²Ili i na ili i nam pa yi a kudana i ɗaɗa uma a̱ Ka̱shile e reme a̱ɗu. Na ele ɗa uma a na o tonoi wila̱ u Ka̱shile ɗa o tonoi Yesu mayun.

¹³Ɗa m panai ka̱la̱ka̱tsu ka zuva a kudana, “Ɗana ili i nam pa: Aza a̱ ma̱za̱nga̱ a ɗa, aza a na a̱ kuwa̱i punu a̱ ubuta̱ u kutono Vuzagbayin gogo na ali a kubana a uteku.”

Ayinviki a̱ Ka̱shile a̱ ushuki, “E, i ta̱ a kuvuka adama a ulinga wa atakaci u le, ka̱ta̱ arabali a ulinga u singai u le u tono le.”

KukyaꞋa ki ili i vikyaꞋa a iɗika

¹⁴Ɗa mi indanai, ɗa me enei keleshu ka̱ a̱ri. Ili an vuma a̱ ida̱shi e keleshu ka. Wi ta̱ n oroliko o tsugono a azanariya wa alai a kaci ɗa u ka̱na̱i makaun ma alyu e kukiye ku ni. ¹⁵Ɗa kalingata ko yoku kpamu kau ku uta̱i a̱ A̱Ꞌisa̱ a Gbayin ɗa u salai n ka̱la̱ka̱tsu ka̱u u vuza na wi ida̱shi e keleshu ka, “Gita̱ kukana m makaun ma̱ nu. Ili i na va kukana a iɗika gogo na i geꞋwe ta̱, gogo na ayin o kuɓolongu le a yawa ta̱.” ¹⁶Ɗaɗa vuza na wi ida̱shi e keleshu u ukai makaun ma̱ ni ɗa u kanai ili i vikyaꞋa a iɗika ya.

¹⁷Ɗaɗa me enei kalingata ke ire ka ku uta̱i a̱ A̱Ꞌisa̱ a Gbayin na ɗe gaɗi, wi ta̱ feu m makaun ma alyu. ¹⁸Ɗa kpamu kalingata ka tatsu, ka na ki n utsura wa akina, wu uta̱i a̱ ubuta̱ u katalikalyuka. Kalingata ka nam pa ke ɗekei kalingata ke ire, ɗa u danai, “Ɗika makaun ma alyu ma̱ nu ka̱ta̱ vu kana umaci wu nɗanga wa punu a ashina a iɗika a, adama a na umaci u ni u geꞋwe ta̱.”

¹⁹Ɗa kalingata ka ka ukai makaun ma̱ ni punu a iɗika. U ɓolongi umaci wu nɗanga wa, ɗa u tsungi u ɗa a̱ ubuta̱ u gbayin u na a kupisha le. Na ɗa tsu na wupa u Ka̱shile wi a ayin a na baci u takacikai aza a unushi. ²⁰Umaci wa a tsu pisha ta̱ u ɗa pulai vi likuci, ɗa mpasa n tsuwa̱in a̱ ubuta̱ u kupisha wa n a̱bunda̱i an kuyene ku na ku yawai ugaɗi meli amangatawenre (200) n uga̱vi u na u yawai ɗevu n udashi u tawun.

Alingata nu ndukpa̱ mu ukocishi

¹Ɗa me enei urotu u gbayin u yoku na ɗe gaɗi u na u nekei yaba dem ili i mereve. Alingata e cindere a̱ kuɓa̱na̱ ndukpa̱ n cindere mu ukocishi. A ayin a na baci Ka̱shile ko kotsoi kutakacika uma nu ndukpa̱ n cindere ma, wi ta̱ a̱ kuka̱sa̱kpa̱ kuyaꞋan wupa. ²Ɗaɗa me enei ili i na yi an mala a kutasa an mindatsu ma na a urai ferere usatari n akina. Ɗa kpamu me enei aza a na a lyaꞋi utsura u ka̱di, vuza na a ɗanai kula ku ni n lamba, n ka̱ma̱li ka̱ ni. Ele kashani a uɓon u mala ma mindatsu, a̱ kuɓa̱na̱ umolu u na Ka̱shile ke nekei le. ³Ɗa a yaꞋin vishipa vu na Musa kagbashi ka̱ Ka̱shile, u yaꞋin n vishipa vu na Ma̱giri ma yaꞋin, a danai,

“Avu, Ka̱shile Uba̱nga̱ri,

vi yaꞋan ta̱ ulinga u gbagbaꞋin u mereve.

Vi ta̱ o tsugono a iɗika ra̱ka̱.

Ili i na vi yaꞋin dem i mayun i ɗa n yu ugaꞋin kpamu.

⁴Yaba dem u kuneke wu ta̱ tsugbayin, Vuzavaguɗu!

Uma dem a kudana ta̱, ‘Vi ta̱ n tsugbayin n utsura.

Vuza ciɗa wi lo ba, sai avu.

Uma a aduniyan ra̱ka̱ a̱ kuta̱wa̱ ta̱ ka̱ta̱ a cikpa wu.

Yaba dem we ene ta̱ ili i yu usuɓi i na vi yaꞋin.’ ”

^5-6Ɗaɗa me enei ɗe gaɗi, alingata e cindere a na i a̱ kuɓa̱na̱ ndukpa̱ n cindere ma a̱ kuta̱ punu asuvu o Mololo ma Ciɗa† punu a̱ Ma̱va̱li ma̱ Ka̱shile. Yaba dem u ukai ntogu ma̱ a̱ri n na mi a kutasa, koɓolo n kakashi ka kuminya ka azanariya ulapangi a̱ ma̱ka̱nga̱ ma̱ ni. ⁷Vuza te a̱ ka̱tsuma̱ ki ili i wuma i na̱shi ya i nekei kalingata dem kakpanu ka azanariya ka na ki tukpa n atakaci a gbayin a̱ Ka̱shile, vuza vu wuma ko wanai n ko wanai, a na a̱ kutsungu a aduniyan. ⁸Ɗa Mololo ma Ciɗa ma, ma shanai n ka̱nga̱ ka na ku uta̱i a̱ ubuta̱ u tsugbayin n utsura u Ka̱shile. Vuza wi lo u fuɗai u uwai a̱ Ma̱va̱li ma̱ Ka̱shile ma ba, sai a ayin a na ndukpa̱ n cindere n na alingata e cindere a̱ tuka̱i va n kotsoi.

Akpanu a wupa u Ka̱shile

¹Ɗaɗa m panai ka̱la̱ka̱tsu ka̱u a̱ A̱Ꞌisa̱ a Gbayin a kudana alingata e cindere a, “Banai i tsuwa̱n akpanu e cindere a wupa u Ka̱shile a aduniyan.”²Kalingata ka iyain ka banai ɗa ka̱ tsuwa̱in a aduniyan ili i na yi punu a kakpanu ka̱ ni. Ajakata a gbani-gbani a na i nu mɓa̱la̱ a̱ ka̱na̱i uma a na i n urotu u ka̱di wa, ɗa kpamu a cikpai ka̱ma̱li ka̱ ni.

³Kalingata ke ire ka̱ tsuwa̱in ili i na yi punu a kakpanu ka̱ ni a mala, ɗa mini ma mo okpoi ana mpasa n vuza na u kuwa̱i, ɗaɗa ili i wuma i na yi punu a̱ mala ma dem i kuwa̱i.

⁴Ɗa kalingata ka tatsu ka̱ tsuwa̱in ili i na yi a kakpanu ka̱ ni o nɗolu koɓolo n a̱shi a̱ mini, ɗa o bonoi tsu mpasa. ⁵Ɗa m panai kalingata ka na ki a̱ kula̱na̱ mini ka danai,

“Avu ɗa Ka̱shile ka Ciɗa.

Avu ɗa Ka̱shile ka na ki n wuma gogo na n ayin a ɗe!

U gaꞋan ta̱ vi yaꞋanka aduniyan afada tsu nam pa.

⁶Uma a gbani-gbani a̱ tsuwa̱n ta̱ mpasa n uma a̱ nu n eneki a̱ nu.

Adama a nannai vi nekei le mpasa o soꞋo.

I ta̱ a̱ kuciya̱ ili i na i gaꞋin a̱ ciya̱!”

⁷Ɗa m panai ka̱la̱ka̱tsu ka̱ uta̱i a̱ ubuta̱ u katalikalyuka a kudana:

“E, Vuzavaguɗu Ka̱shile MalaꞋimili,

tsu na vu ci neke uma a gbani-gbani atakaci mayun ɗa n derere kpamu.”

⁸Ɗaɗa kpamu kalingata ka̱ na̱shi ka̱ tsuwa̱in kakpanu ka̱ ni a kanna, ɗa u ka̱sa̱kpa̱i kanna ka̱ kpa̱ra̱i uma a aduniyan n usuɗukpi u ni. ⁹Ɗa usuɗukpi wa̱ a̱bunda̱i wa u bakulai yaba dem, ɗa a shikai kula ku Ka̱shile, vuza na u suki ndukpa̱ n nan lo ra̱ka̱. Amma a iwain kuka̱sa̱kpa̱ unushi u le koɓolo n kucikpa tsugbayin tsu Ka̱shile.

^10-11Kalingata ka tawun ka̱ tsuwa̱in kakpanu ka̱ ni a kakuba ko tsugono ka̱ ka̱di ka, ɗa iɗika i na wi a kulyaꞋa tsugono tsa yo okpoi n ka̱yimbi. Uma a̱ ka̱na̱i kuluma a̱jivu e le n a kapatsai adama a ajakata a na i n a ɗa va, mɓa̱la̱ n le ma n laꞋa ta̱ kadanshi. Amma a yaꞋankai Ka̱shile ka zuva una̱ u gbani-gbani ɗa a̱ kpa̱ɗa̱i kuka̱sa̱kpa̱ kuyaꞋan ku unushi.

¹²Kalingata ka̱ ta̱li ka̱ tsuwa̱in ili i na yi punu a kakpanu ka̱ ni e kuyene ku gbayin ku Yufiriti adama a na mini ma na mi punu me ɗekpe gbende. Ili i nan lo i yaꞋan baci, ka̱ta̱ ngono n kasana n ciya̱ ubuta̱ u na a uwa n osoji e le. ¹³Ɗa me enei wunla̱i u gbani-gbani u tatsu tso opoɗo a̱ kuta̱ a̱ una̱ u vungu va, una̱ u ka̱di ka iyain, koɓolo n una̱ u ka̱di ke ire, vuza na wi keneki ka aꞋuwa. ¹⁴Wunla̱i u gbani-gbani† u nam pa wi ta̱ n utsura u na a kuyaꞋan ili i mereve. A banai wu ngono dem ma aduniyan, u ɓolongi le a yaꞋan kuvon n Ka̱shile MalaꞋimili a kanna ka gbayin ka na u kuyaꞋanka uma afada.

¹⁵Vuzavaguɗu u danai, “Zukai mayin! Mi ta̱ lo a̱ kuta̱wa̱ tsu na koboki ka̱ tsu ta̱wa̱ babu uyevi. Ka̱shile ki ta̱ a kuzuwaka vuza na u foɓusoi ntogu n ni a kuvana mayin una̱singai, adama a na u wala a̱ ubuta̱ u uma babu vuza kene ciyampa ci ni ka̱ta̱ wo okpo n wono.”

¹⁶Ɗaɗa wunla̱i u gbani-gbani wa u ɓolongi ngono ma a̱ ubuta̱ u te u na e ci ɗeke Aramagedon n Ciyahuda.

¹⁷Ɗa kalingata ke cindere ka̱ tsuwa̱in ili i na yi punu a kakpanu ka̱ ni na ɗe zuva. Ka̱shile ka yaꞋin kadanshi n ka̱la̱ka̱tsu ka̱u a kakuba ko tsugono ka̱ ni a̱ A̱Ꞌisa̱ a Gbayin, u danai, “N kotso ta̱ ili ra̱ka̱.” ¹⁸Ɗa ulaɗi u ka̱na̱i kuyaꞋan maru-maru n cigiriwi n kacaꞋa ka akpanga, n kugba̱ɗa̱ ki iɗika n utsura ali u laꞋi uteku u na iɗika yi ishi i tsu gba̱ɗa̱ a ayin a na uma i a aduniyan. ¹⁹Kugba̱ɗa̱ ki iɗika ka ku ɓatsai likuci i gbayin i Babila yo okpoi ugboku u tatsu. Likuci i yoku n a̱bunda̱i punu a aduniyan yo okpoi agali gbende-gbende. Ka̱shile ka ciɓai n unushi u Babila ra̱ka̱, ɗa u gutsakai ni u soꞋo ma̱kya̱n punu a mataꞋan ma na wupa u gbagbaꞋin u ni wi. ²⁰Ana iɗika i gba̱ɗa̱i nannai, ɗa otogu nu nsasan dem n niꞋwa̱in. ²¹Mini ma atali a gbagbaꞋin a̱ ka̱na̱i kuvara uma. Katali dem ki ta̱ n a̱miki a na a yawai mudu amangatawun.16:21 A̱miki a katali ka̱ mini dem a laza ta̱ a̱miki a̱ ka̱bufu ka̱ ka̱didi. Amma adama a na Ka̱shile ke neke le ta̱ atakaci n a̱bunda̱i ana u tsuwa̱nka̱i le mini ma atali, ɗa a yaꞋankai ni una̱ u gbani-gbani.

Kashakanlai n ka̱di

¹Ɗa vuza te a̱ ka̱tsuma̱ ka alingata e cindere a na i n akpanu e cindere a u ta̱wa̱i wa̱ va̱ ɗa u danai, “Ta̱wa̱ ka̱ta̱ n yotsonku wu uteku u na a kutakacika kashakanlai ka na yaba dem u yevei, na va ɗaɗa likuci i gbayin i na a maꞋi ɗevu nu nɗolu ma̱ a̱bunda̱i. ²Ngono ma aduniyan n yaꞋan ta̱ tsugbani n a̱yi, ulinga u wono u ni kpamu wi ta̱ an ma̱kya̱n ma na ma makai yaba dem a aduniyan.”

³A̱ ubuta̱ u kene kpamu Ayinviki a zuwai me enei, ɗa kalingata ka ɗikai mu a kubana a kakamba. Ta ɗe me enei vuka a̱ ida̱shi gaɗi vu ka̱di ka shili ka̱ɗa̱ɗa̱. A ɗana ta̱ ɗe ili yi ishikushi i Ka̱shile a ikyamba i ka̱di ya ra̱ka̱, wi ta̱ kpamu n aci e cindere n avana kupa. ⁴Vuka va vu ukai ntogu n tsugono n na mi n ulima̱ u kuyene n ushili ka̱ɗa̱ɗa̱. Ɗa u ukai feu ili i tsuzogu ya azanariya, n atali i ikebe ka̱u kakau nu nwaru mi ikebe.† E kukiye ku usingai ku ni wi ta̱ uka̱ni m mataꞋan ma azanariya ma na mi tukpa m ma̱kya̱n, na va ɗaɗa idabu n ulinga u kavama u tsugbani ci ni. ⁵A ɗana ta̱ ɗe kula ku na ki ili yi usokongi a̱ kuca̱n ku ni. Kula ku danai,

“Mpa ɗa Babila vu utsura, a̱na̱ku a ashakanlai ra̱ka̱ n vuza na u gita̱i ulinga wi idabu ra̱ka̱ a aduniyan.”

⁶Ɗa me enei ashe vuka va vu soꞋo ta̱ mpasa n uma a̱ Ka̱shile, aza na a unai adama a na a yaꞋan ta̱ ma̱riki n Yesu. Ili i nam pa ya i zuwa yi ta̱ wo okpoi vuza na ma̱kya̱n ma makai.

Ana me enei ni ɗa n yaꞋin mereve. ⁷Ɗa kalingata ka ke ecei mu, “Yi ɗa̱i i zuwai ɗa vi yaꞋin mereve? Mi ta̱ a kudana wu ili yu usokongi i vuka vu nam pa n ka̱di ka na u livanki, vuza na wi n aci e cindere n avana kupa. ⁸Ka̱di ka na ve enei gogo na va ki ishi ta̱ n wuma, amma wi ta̱ ukpa̱ gogo na. U yaꞋan ta̱ ɗevu an wa̱ kuta̱ e kpenle ku zururu ka̱ta̱ u bana a̱ ubuta̱ u na a̱ kula̱nga̱sa̱ yi. Uma a na i ida̱shi a aduniyan, aza a na Ka̱shile ka̱ kpa̱ɗa̱i kuɗana ula e le a Katagarda ka Aza a Wuma kafu a yaꞋan a aduniyan, i ta̱ a kuyaꞋan mereve ra̱ka̱ e ene baci ka̱di ka. Wi ishi ta̱ n wuma, gogo na wi ta̱ ukpa̱, amma wi ta̱ o kubono kpamu.

⁹“U gaꞋan ta̱ vi yaꞋan n ka̱ɗu ku ugboji ka̱ta̱ vi yeve ili i nam pa. Aci e cindere a a ɗaɗa nsasan n cindere n na vuka va vi ida̱shi. Aci a feu ngono n cindere n ɗa. ¹⁰Ngono n tawun n yikpa̱ ta̱ ɗe, vuza ta̱li ɗa wi o tsugono gogo na, vuza cindere tamkpamu ka̱ta̱ u ta̱wa̱ ba, amma tsugono ci ni tsa kuyaꞋan megeshe ka̱u ba. ¹¹Ka̱di ka na ki ishi n wuma, amma ɗa gogo na ki ukpa̱, a̱yi feu mogono maꞋa ma̱ kunla̱i. Wi ta̱ a̱ ka̱tsuma̱ ko ngono n cindere ma, wi ta̱ ta na a kubana a̱ ubuta̱ wu ukpa̱.

¹²“Avana kupa a na ve enei va, ngono kupa ɗa n na ka̱ta̱ n gita̱i kulyaꞋa tsugono ba, amma i ta̱ a̱ kuciya̱ utsura u na a kulyaꞋa tsugono koɓolo n ka̱di ka, viyum vi te koci. ¹³Dem vi le i ta̱ a̱ kushuku kuneke utsura u le n tsugono u ka̱di wa. ¹⁴I ta̱ kuyaꞋan kuvon m Ma̱giri ma, amma wi ta̱ a kulyaꞋa utsura u le adama a na a̱yi ɗa Vuzagbayin va azagbagbaꞋin ra̱ka̱ m Mogono mo ngono. Uma a̱ ni ele ɗa aza a na u ɗekei, n aza a na u zagbai, ɗa i o kutono yi tutu.”

¹⁵Ɗaɗa kalingata ka danai mu, “Nɗolu n na ve enei a̱ ubuta̱ u na kashakanlai ki ida̱shi ya iɗika i ɗa, n umaci u uma n elentsu. ¹⁶Avana kupa n ka̱di ka na ve enei i ta̱ a kuꞋiwan kashakanlai ka. I ta̱ a kuɗika ili i na wi n i ɗa ra̱ka̱ ka̱ta̱ a̱ ka̱sa̱kpa̱ yi koshomboɗi. I ta̱ a kuwazala ikyamba i ni ka̱ta̱ akina o songu ili i na yo okpoi ni ra̱ka̱. ¹⁷Ngono kupa ma mi ta̱ a kuyaꞋan nannai adama a na Ka̱shile ka zuwa le ta̱ e sheshe kuyaꞋan ili i na u cigai le a yaꞋan. Adama a nannai ra̱ka̱ vi le i ta̱ a̱ kushuku kuneke ka̱di ka utsura u le ka̱ta̱ u lyaꞋa tsugono. I ta̱ o kutono ka̱di ka sai a ayin a na Ka̱shile ka zuwai kusheshe ku ni ra̱ka̱ ku shana cika. ¹⁸Vuka vu na ve enei va vu ɗa likuci yu utsura i na mogono ma̱ ni mi a kulyaꞋa tsugono tsu ngono ma aduniyan ra̱ka̱.”

Unai Babila

¹Ana kene ku ukuna u vuka vu na vu kumbai ka̱di ka ku lazai, ɗa me enei kalingata ko yoku a̱ kucipa̱. Wi ta̱ kpamu n utsura n kutashi ka̱ a̱bunda̱i a̱ kuta̱ punu wa̱ ni, ɗa ka akanai aduniyan. ²Ɗa u salai n utsura:

“Likuci i gbayin i Babila i yikpa̱ ta̱.

Uma a buwa punu a̱ ida̱shi ba,

saidei wunla̱i u gbani-gbani u ɗa wi punu kakau.

Koɓolo nu nnu mu unata kakau n ɗa mi punu o kuyongo.

³Aduniyan ra̱ka̱ o soꞋo ta̱ ma̱kya̱n ma̱ ni ɗa ma makai le,

ma̱kya̱n ma, ma ɗaɗa kuciga kuyaꞋan tsugbani n a̱yi.

Ngono ma aduniyan dem n yaꞋan ta̱ tsugbani n a̱yi,

ɗa aza a tsulaga dem a̱ ciya̱i ikebe n a̱bunda̱i

adama a na wi ta̱ a kuciga ili n a̱bunda̱i.”

⁴Ɗa kpamu m panai ka̱la̱ka̱tsu ko yoku gaɗi a kudana:

“Uta̱i punu a̱ likuci i nan lo ya, uma a̱ va̱,

adama a na yo okpo aza a unushi uteku ci ni ba,

adama a na ta lo ya kisa atakaci a na e kuneke yi.

⁵Unushi u ni wo okpo ta̱ an kaginda ka gbayin

ka na ka yawai ugaɗi ali a̱ Ka̱shile.

Ka̱shile kpamu ka cinukpa n unushi u na u yaꞋansai ba.

⁶I yaꞋanka Babila atakaci

uteku u na u yaꞋankai uma a na a buwai.

Mayun sai a tsupa yi nannai ali kure tsu na u yaꞋin.

Sai i tsuwa̱nka̱ yi m ma̱kya̱n a mataꞋan ma̱ ni

ma na ma yawai kure utsura tsu na u nekei uma.

⁷U neke ta̱ ka̱ci ka̱ ni tsugbayin

ɗa u ciya̱i ili i na wi a kuciga dem.

Nekei ni atakaci n a̱bunda̱i koɓolo n una̱mgbuka̱tsuma̱.

Ɗa kpamu u cikpai ka̱ci ka̱ ni u danai,

‘N da̱sa̱ngu ta̱ na,

mpa vuka ɗa mi a kulyaꞋa tsugono.

Mi n vali vu na va̱ kukuwa̱ mu ba,

adama a nannai mi kushika̱ adama a̱ ni ba.’

⁸Adama a na vuka va vi yaꞋan ta̱ a̱ra̱ɗi tsu nam pa,

u buwa m megeshe ba, a na e kuneke yi atakaci nu mɓa̱la̱,

n ukpa̱ u uma a̱ ni, n kambulu ka gbayin.

Akina a ɗa o kusongu yi ra̱ka̱

adama a̱ Ka̱shile ka na ka kuyaꞋanka yi afada,

ki ta̱ n utsura wi ili dem.”

⁹“Ngono ma aduniyan n na n yaꞋin tsugbani n a̱yi, ɗa kpamu a̱ ciya̱i uciyi adama a̱ ni, i ta̱ e kene ka̱nga̱ ku ulalau ka na ki o kulyaꞋa Babila ka̱ta̱ a̱ shika̱ n a̱ na̱mgba̱i kpamu a̱tsuma̱ adama a ili i nan lo. ¹⁰A shamgba ta̱ daꞋin adama o wovon ta lo o soꞋo atakaci a na wi o kusoꞋo. I ta̱ a kudana,

‘Ili ya yi ta̱ n atakaci!

Ili ya atakaci i ɗa wa̱ nu likuci i gbayin,

likuci yu utsura i Babila,

adama a na atakaci a̱ nu a̱ ta̱wa̱ ta̱ a̱ ka̱tsuma̱ ka̱ viyum vi te.’

¹¹“Aza a tsulaga tsa aduniyan dem i ta̱ a̱ kushika̱ ka̱ta̱ a̱ na̱mgba̱ a̱tsuma̱ adama a̱ ni, adama a na gogo na vuza wi lo a kutsula ili i na i e kudenge ba. ¹²Ili i nam pa ya i ɗaɗa: azanariya, n azurufa, n atali a ikebe,† nu nwaru mi ikebe,† n a̱kumbula̱ kakau a na a gaꞋin, icuꞋu ya aminya a na i n ulima̱ u kuyene n ushili ka̱ɗa̱ɗa̱, n ili i na a yaꞋin nu nɗanga n na mi m ma̱gula̱ni, koɓolo n anga a agiwa a na e sheꞋwei, nu nɗanga mi ikebe, n iyum i shili, n iyum, n atali a kumaꞋa a ikebe ka̱u, ¹³n ili i ma̱gula̱ni18:13 La̱na̱ udani “Furankinsen” ko “Mur” a̱ Ubuta̱ wi ili i Kuyeve. i na a ci yaꞋanka kusaꞋan, n i na o tsu songu a katalikalyuka, n i na yi i kusukuya̱ a ikyamba, m ma̱kya̱n, m maniꞋin, n kiya, n ilya, n anaka, nu nlala, n odoku n ekeke a ucanuku u le, n agbashi, n aza a na e remei a̱ ubuta̱ u kuvon.

¹⁴“Ɗa aza a tsulaga a danai vuka va,

‘Ili i singai i na vi a̱ kutsa̱n ki ɗa dem i ɗa i kotso ta̱,

ili i na yi e kuneke wu tsuloboi dem i ɗa i puwa̱nka̱ ta̱,

vi o kudoku va̱ ciya̱ i ɗa ba!’

¹⁵“Aza a tsulaga a na a yaꞋin uciyi n a̱yi adama ili i ni i na i e kudenge i ta̱ a kushamgba daꞋin, adama a na i ta̱ a kupana wovon ta lo o soꞋo atakaci tsu na a̱yi wi o kusoꞋo. I ta̱ a̱ kushika̱ ka̱ta̱ a̱ na̱mgba̱ a̱tsuma̱. ¹⁶I ta̱ a kudana:

‘Ili ya atakaci i ɗa

ili i ya atakaci i ɗa a kubana a̱ likuci i gbayin!

U ci yongo ta̱ a kuꞋuka a̱kumbula̱ a̱ ni

a na i buza̱ n ulima̱ u kuyene n ushili ka̱ɗa̱ɗa̱.

U uka ta̱ ili i tsuzogu ya azanariya,

n atali a ikebe nu nwaru kakau.

¹⁷A̱ ka̱tsuma̱ ka̱ viyum vi te ɗa a̱ la̱nga̱sa̱i uciyi u ni ra̱ka̱!’

“Jagaba vu kpantsu ku gbayin n aza a ulinga a̱ ni dem i ta̱ a kushamgba daꞋin, koɓolo n yaba dem vu na wi punu a nwalu a mala ma n aza a tsulaga ci ili i na a tsulai punu a kpantsu ka. ¹⁸I ta̱ a̱ kushika̱ ka̱u ana enei ka̱nga̱ ku ulalau ka na ki o kusongu yi, ‘Likuci i yoku yi lo yu utsura uteku u nan lo ba!’

¹⁹“I ta̱ a̱ kubukula̱ ka̱ci ke le n kayala adama a na o yotsongu una̱mgbuka̱tsuma̱ u le. Ka̱ta̱ a dana:

‘Ili ya atakaci i ɗa,

ili ya atakaci i ɗa a kubana a̱ likuci i gbayin!

Uciyi u ni u zuwa tsu ta̱ ra̱ka̱

tso okpoi aza a uciyi.

Gogo na a̱ ka̱tsuma̱ ka̱ viyum vi te ɗa ili i nan lo dem i lazai.’

²⁰A̱ɗa̱ vu na yi o kuyongo gaɗi vu Ka̱shile,

yaꞋin ma̱za̱nga̱ n a̱bunda̱i

adama a na Ka̱shile ko yokumo ta̱ Babila ra̱ka̱.

Uma a̱ Ka̱shile n azusuki

n aza a na i eneki

a yaꞋan ma̱za̱nga̱.

Adama a na Ka̱shile ka yaꞋanka yi ta̱ ɗe afada

adama a ili i gbani-gbani i na u yaꞋankai ɗa̱.”

²¹Ɗa kalingata ku utsura ko yoku ka ɗikai katali ka gbayin ko yoku, an kutali ku kiya, ɗa u vakangi kaꞋa a mala, ɗa u salai:

“Babila likuci i gbayin,

ta Ka̱shile ka kuna wu nannai

uteku u na n vakangi katali ka!

Uma o kudoku e kene likuci ya ba.

²²Vuza wo kudoku wa pana uma a kuwaꞋa umolu ba,

ko nzuɓi n aza a̱ ilikushi,

vuza wo kudoku wa yaꞋan ulinga punu wa̱ nu ba.

Vuza wo kudoku wa pana izumgbi i kiya ba.

²³Vuza wo kudoku we kene kutashi ku ma̱kuni ku nu ba.

Vuza wo kudoku wa pana ka̱la̱ka̱tsu ka vuka n vali

a kuyaꞋan yolo ba.

Aza a tsulaga a̱ likuci i nam pa ele ɗa ishi azagbagbaꞋin

a laꞋi uma a aduniyan n utsura dem.

Tsuboci ci likuci i nam pa tsu doro ta̱ uma a aduniyan ra̱ka̱.

²⁴Ka̱shile ka takacika ta̱ Babila

adama a na a una ta̱ uma a na i a kudansa kadanshi ka̱ Ka̱shile,

n aza a na i ra̱ka̱ uma a̱ Ka̱shile.

E, ta nannai Babila, wu una ta̱ uma a aduniyan n a̱bunda̱i.”

Uma a na i gaɗi a cikpai Ka̱shile

¹A ayin a na kalingata ku utsura ko kotsoi kuyaꞋan kadanshi, ɗa m panai kacaꞋa ka uma n a̱bunda̱i na ɗe gaɗi a̱ ka̱na̱i kusala:

“Cikpai Ka̱shile!

Wishi, n tsugbayin, n utsura u Ka̱shile ka̱ tsu u ɗa!

²Tsu na u ci neke uma a gbani-gbani atakaci mayun ɗa n derere kpamu.

U sheshe ta̱ ɗe tsu na u kuneke kashakanlai ka gbani-gbani atakaci,

vuza na u zuwai uma a aduniyan a yaꞋan unushi a̱ ubuta̱ u kuyaꞋan tsugbani n a̱yi.

Ka̱shile ka tsupa yi ta̱ adama a na wu una yi ta̱ agbashi.”

³Ɗa kpamu a salai:

“Cikpai Ka̱shile!

Ka̱nga̱ ku ulalau u na u songi likuci i gbayin ya

ka̱ ɗenga̱i a kubana gaɗi ali uteku n uteku!”

⁴Nkoshi m gba̱ra̱-gba̱ra̱ kamanga n aza a̱ na̱shi a nan lo koɓolo n ili i wuma i na̱shi ya a̱ kuɗa̱ngi kucikpa Ka̱shile, vuza na wi a̱ ida̱shi a kakuba ko tsugono. A danai, “Ta nannai! Cikpai Ka̱shile!”

Ka̱ɗiva̱ ko yolo i Ma̱giri

⁵Ɗa m panai vuma vi yoku e meɗevile a kakuba ko tsugono ka, a kudana:

“A̱ɗa̱ uma ra̱ka̱,

azagbagbaꞋin m muku dem,

a̱ɗa̱ na yi a kucikpa Ka̱shile ra̱ka̱ danai ni,

‘Ci neke wu ta̱ tsugbayin.’ ”

⁶Ɗa m panai izumgbi i ka̱bunda̱i ka uma ka gbangam na ɗe gaɗi o yoroli n kacaꞋa an mini ma na me ci yene n kurara n kakpanga ka gbayin. M panakai le a danai:

“Cikpai Ka̱shile!

Adama a na Vuzavaguɗu, Ka̱shile ka̱ tsu Uba̱nga̱ri, a̱yi ɗa Mogono!

⁷Ka̱sa̱kpa̱i ci yaꞋin ma̱za̱nga̱ n a̱bunda̱i.

YaꞋan ci cikpa tsugbayin ci ni!

Adama a na kanna ka yawa ta̱

ka na a kuyaꞋan yolo i Ma̱giri.

Vuka vu savu vi ni vu foɓuso ta̱ ɗe ka̱ci ka̱ ni adama a kaꞋa.

⁸Ka̱shile ke neke ta̱ ɗe vuka vu nan lo va a̱kumbula̱,

a ɗa i ta̱ ciɗa, a kutasa langu-langu.”

(A̱kumbula̱ a ɗaɗa ili i singai i na uma a̱ Ka̱shile a ci yaꞋan.)

⁹Ɗaɗa kalingata ka ka danai mu, “Ɗana ili i nam pa: Ka̱shile ki ta̱ e kuneke una̱singai wa aza a na a̱ ciya̱i a banuki le a̱ ubuta̱ u ka̱ɗiva̱ ko yolo i Ma̱giri.” Kalingata ka kpamu ka danai, “Ili i na Ka̱shile ka danai na mayun ɗa.”

¹⁰Ɗa n kuɗa̱ngi e kelime ka kalingata ka adama a na n cikpa yi, amma ɗa u danai mu, “A̱Ꞌa̱! Ka̱ta̱ vi cikpa mu ba! Mpa kagbashi kaꞋa tsu nu n tsa aza a na e nekei a̱ɗu e le kpamu, aza a na i o kutono mayun ra̱ka̱ i na Yesu wu uta̱ka̱i e keteshe. Cikpa Ka̱shile!”

Ili i mayun i na Yesu wu uta̱ka̱i e keteshe i ɗaɗa i zuwai uma a fuɗai a danai uma kadanshi ka̱ Ka̱shile.

Vuza na u kumbai kodoku ka̱ a̱ri

¹¹Ɗa me enei gaɗi u ɓa̱yuwa̱i, kodoku ka̱ a̱ri ɗe kashani. Vuza na u kumbai kodoku ka e neꞋi ta̱ kula Ma̱riki m Mayun. U ci yaꞋan ta̱ afada a̱ ni mejege n kuvon kpamu nannai. ¹²A̱shi a̱ ni a kakana a̱ ubuta̱ tsa akina, a kaci ka̱ ni u ukai oroliko o tsugono n a̱bunda̱i. A ɗana ta̱ ɗe kula a ikyamba i ni, amma a̱yi ɗa koci vuza na u yevei ili i na kula ka ki a kudana. ¹³U ukai a̱kumbula̱ a na a̱ rumbuki nu mpasa. Kula ku ni ku ɗa “Kadanshi ka̱ Ka̱shile.” ¹⁴Osoji a̱ Ka̱shile a kumbai odoku a̱ a̱ri o kutono yi. A ukai a̱kumbula̱ a̱ a̱ri, ciɗa-ciɗa. ¹⁵Kotokobi ka alyu ka̱ uta̱i a̱ una̱ u ni, wi ta̱ a kuyaꞋan ulinga n kaꞋa adama a na u lyaꞋa iɗika kakau n kuvon. Wi ta̱ a kulyaꞋa tsugono we le n kalangu ka̱ viyum. Wi ta̱ o kuyotsongu le wupa u gbayin u Ka̱shile Uba̱nga̱ri a̱ ubuta̱ u kupisha umaci wu nɗanga a̱ ubuta̱ u na a ci yaꞋan ma̱kya̱n. ¹⁶Punu a kuminya ku na a palai ma̱kuta̱ ma̱ ni a ɗana ta̱:

MOGONO MO NGONO N VUZAVAGUƊU VA AZAGBAGBAꞋIN.

¹⁷Ɗa me enei kalingata kashani a kanna. Wo orukpoi n ka̱la̱ka̱tsu ka̱u adama a asakali a na i a ciꞋimkpi gaɗi: “Ta̱wa̱i! Gasai i lyaꞋa ilikulyaꞋa ya̱ a̱bunda̱i i ka̱ɗiva̱ i na Ka̱shile ki a̱ kula̱nsa̱ka̱ ɗa̱! ¹⁸Ta̱wa̱i! Takumai even a ikyamba yi ngono, n i na anan jagaba a gbagbaꞋin, koɓolo n osoji, koɓolo kpamu n odoku ali n aza a na a kumbai a ɗa. Ta̱wa̱i! Takumai ikyamba i uma ra̱ka̱: agbashi koɓolo n aza a na i agbashi ba, uma a na i azagbagbaꞋin n aza a na i azagbagbaꞋin ba!”

¹⁹Ɗa me enei ka̱di ka koɓolo nu ngono ma aduniyan ra̱ka̱, koɓolo n osoji e le, o ɓolongi adama a na a yaꞋan vishili n vuza na u kumbai kodoku ka n osoji a̱ ni. ²⁰Ɗa a̱ ka̱na̱i ka̱di ka, koɓolo n keneki ka aꞋuwa vuza vu na u yaꞋankai ni ili i mereve. (U yaꞋan ta̱ ili i mereve i nan lo adama a na u ya̱nsa̱ aza a na i n urotu u ka̱di wa, ɗa kpamu a cikpai ka̱ma̱li ka̱ ni.) Ka̱di ka n keneki ka aꞋuwa ka, dem vi le a vakangi le n wuma a mala ma akina a na a̱ tsu kula̱ n farinwuta dem. ²¹Vuza na u kumbai kodoku ka ɗa wu unai osoji e le ra̱ka̱ n kotokobi ka na ka̱ uta̱i a̱ una̱ u ni. Ɗa asakali a ra̱ka̱ a takumai even a ikyamba ya ali a̱tsuma̱ e le a̱ cuwa̱i ɗa o okpoi ba̱fa̱-ba̱fa̱.

A̱ya̱ ka̱kpa̱n ke te

¹A ayin a na vuza na wi ukumbi o kodoku ka̱ a̱ri ka u lyaꞋi utsura u ka̱di wa, n keneki ka aꞋuwa ka, n osoji e le, ɗa me enei kalingata a̱ kuta̱ gaɗi, wi ta̱ a̱ kuɓa̱na̱ vukani va̱ a̱miki e kukiye ku ni, n ka̱ɓa̱yuwa̱tsu ke kpenle ku zururu. ^2-3Kalingata ka̱ ka̱na̱i vungu vu gbayin va, koko ka mani-mani ka nan lo ka na feu e ci ɗeke Kalijani ko MalyaꞋi. U ɗikai vukani va ɗa u shiyai Kalijani ka kpan-kpaꞋan. Ɗaɗa u taɗuki ni e kpenle ku zururu. U gbagurai utsutsu u kpenle wa n ka̱ɓa̱yuwa̱tsu ka na wi a̱ kuɓa̱na̱ va, ɗa u zuwai urotu u cirupa̱ a̱ utsutsu wa ta lo vuza wa̱ ɓa̱yuwa̱ u ɗa. Mayun ɗa Kalijani ko yongo ɗe ali a̱ya̱ ka̱kpa̱n ke te (1,000), adama a na u fuɗa u ya̱nsa̱ uma a aduniyan ba. A ayin a na baci a̱ya̱ ka̱kpa̱n ke te a shanai, kalingata ka ki ta̱ a kushikpa yi u yaꞋan ayin ukeci kpamu.

⁴Ɗa me enei akuba o tsugono, aza a na kpamu i ida̱shi ɗe ele ɗa aza a na Ka̱shile ke nekei utsura a lyaꞋa tsugono. Ele ɗa a̱kpisa̱ a na irala i le a gbatyai aci adama a na a dansa ta̱ akaka e Yesu n kadanshi ka̱ Ka̱shile. Uma a nam pa a cikpa ka̱di ko ka̱ma̱li ka̱ ni ba, a isa kpamu urotu u ni a̱ a̱ca̱n e le ko e ekiye e le ba. O doku o bonoi n wuma ɗa a̱ da̱sa̱ngi a akuba o tsugono, ɗa a lyaꞋi tsugono koɓolo n Yesu ali a̱ya̱ ka̱kpa̱n ke te. ⁵Na va ɗaɗa ugiti u na Ka̱shile ka̱ ɗengusa̱i a̱kpisa̱. (A̱kpisa̱ a na a buwai a̱ ɗenga̱ ba, sai a ayin a na a̱ya̱ ka̱kpa̱n ke te ka o kotsoi.) ⁶Aza a na Ka̱shile ka̱ ɗengusa̱i ukpisa̱ a ayin a nam pa i ta̱ a̱ ma̱za̱nga̱ mayun; ele uma a̱ ni a ɗa. I a kuna le a mala ma akina a na a̱ tsu kula̱ n ka̱nga̱ ka̱ farinwuta ba, ɗaɗa ukpa̱ u ire. Amma i ta̱ a kuyaꞋanka Ka̱shile tsugbashi n Kishi ku Uzagbi ka̱ ni an anan ganu, ka̱ta̱ a lyaꞋa tsugono n a̱yi ali a̱ya̱ ka̱kpa̱n ke te (1,000).

Ka̱shile ka lyaꞋi utsura u MalyaꞋi

^7-8A̱ya̱ ka̱kpa̱n ke te a o kotso baci, kalingata ka ki ta̱ a̱ kuka̱sa̱kpa̱ MalyaꞋi mu uta̱ a̱ ubuta̱ u na wi ushiyi, ka̱ta̱ wu uta̱ u ya̱nsa̱ uma a na i uvishuwi a aduniyan kpa̱kuru. Iɗika i nam pa i ɗa e ci ɗeke Gogu m Mogogu. MalyaꞋi mi ta̱ o kuɓolongu le ra̱ka̱ a̱ ubuta̱ u na a kuyaꞋan kuvon. I ta̱ a kuyimkpa n a̱bunda̱i ali vuza wa kufuɗa we kece le ba. ⁹E pecuki vishuwi a aduniyan ɗa a kambuki ubuta̱ u uma a̱ Ka̱shile, ɗaɗa likuci i na u cigai. Amma ɗa akina uta̱i gaɗi ɗa a unai le. ¹⁰Ɗa a vakangi ɗe ka̱di n keneki ka aꞋuwa ka a mala ma akina a na a̱ tsu kula̱ n ka̱nga̱ ka̱ farinwuta, ɗa a vakangi kpamu Kalijani,† vuza na u ya̱nsa̱i uma a nam pa ra̱ka̱. Akina a i ta̱ a kuzuwa dem vi le a takacika kanna n kayin ko wanai.

Afada a ukocishi

¹¹Ɗaɗa me enei kakuba ko tsugono ka̱ a̱ri ka na ki wanshi, ɗa me enei vuza na u da̱sa̱ngi a kaꞋa. Ana wu uta̱i, ɗa iɗika n gaɗi a lazai, babu vuza na u doku we enei le. ¹²Ɗa feu me enei a̱kpisa̱ ra̱ka̱ a kashani e kelime ka kakuba ka nan lo, azagbagbaꞋin n aza e kenkeꞋen. Ɗa a̱ ɓa̱yuwa̱i atagarda a̱ ubuta̱ u na a ɗanai ili ra̱ka̱ i na yaba dem u yaꞋin. Ɗa kpamu a̱ ɓa̱yuwa̱i katagarda ka aza wuma. A yaꞋankai a̱kpisa̱ ra̱ka̱ afada derere n ulinga u na a yaꞋin, uteku u na a ɗanai a atagarda a. ¹³Ɗa aza a na a̱ kuwa̱i a mala a banai ɗa a shamgbai e kelime ka kakuba ka adama a na Ka̱shile ka yaꞋanka le afada. Ukpa̱ n Ubuta̱ wu Ukpisa̱ a̱ uta̱ka̱i n a̱kpisa̱ a na i punu we ele, ɗa Ka̱shile ka yaꞋankai le afada derere n ulinga u na a yaꞋin. ¹⁴Ɗaɗa a vakangi Ukpa̱ n Ubuta̱ wu Ukpisa̱ a mala ma akina. (Mala ma akina ma ɗaɗa ukpa̱ u ire.) ¹⁵Vuza na baci de dem ka̱ta̱ a ɗanai kula ku ni a Katagarda ka Aza Wuma ba, a vakangi ni a mala ma akina.

Gaɗi vu savu n iɗika i savu

¹Ana kene ku Ka̱shile ku ukuna wa afada ku lazai, ɗa me enei gaɗi vu savu n iɗika i savu. Gaɗi vu cau n iɗika i cau a̱ puwa̱nka̱ ta̱, mala kpamu ma buwa lo ba. ²Ɗa me enei Likuci i Ciɗa i na Ka̱shile ka̱ suki i ɗaɗa Urishelima† vu savu, i ɗa a̱ kuta̱ gaɗi vu Ka̱shile a̱ kucipa̱ a iɗika. Likuci i savu ya yi ta̱ an vuka vu savu vu na a̱ ka̱ɓa̱nki amila e kujeꞋeke, u foɓuso ta̱ adama a na u cina vali vi ni vu na u kolo. ³Ɗa m panai vuza yoku e meɗevile ɗe gaɗi vu kakuba ko tsugono, a kudana, “Gogo na kpaꞋa ku Ka̱shile ku shana ta̱ n uma! Wi ta̱ a̱ kuda̱sa̱ngu n uma a̱ ni, ele kpamu i ta̱ o kokpo uma a̱ ni. Ka̱shile n ka̱ci ka̱ ni wi ta̱ o kuyongo n ele. Ka̱ta̱ kpamu wo okpo Ka̱shile ke le. ⁴Wi ta̱ kpamu a kura le kujilya ku na ki a̱ a̱shi e le dem. Vuza wi lo kpamu o kudoku wa̱ kuwa̱ ba. Vuza wi lo o kudoku wa yaꞋan una̱mgbuka̱tsuma̱ ba, ko ma̱shi a kupana mɓa̱la̱ n yoku ba. Ili i kuku dem i laza ta̱.”

⁵Vuza vi ida̱shi a gaɗi vu kakuba va u danai, “Inda! Mi ta̱ o kubonoko ili dem i savu!” Ɗa u danai mu, “Ɗana ili i nam pa ya, adama a na ili i nam pa ya mayun ɗa i ɗa i kuzuwaka utsura.”

⁶Ɗa u doku u danai, “N yaꞋan ta̱ ɗe ili i nam pa dem! Mpa ɗa Alfa n Omega.† Ɗaɗa feu, mpa ɗa Ugiti n Ukocishi. Mi ta̱ e kuneke yaba dem vu na wi n kakuli mini mo kusoꞋo ɗe a̱ ubuta̱ u na ka̱shi ka̱ mini ma wuma mi a̱ kuta̱. Ele a kutsupa ili ba. ⁷Aza a na a lyaꞋi i ta̱ a kisa ili i nam pa wa̱ va̱: Mi ta̱ o kokpo Ka̱shile ke le, ele tamkpamu o okpo muku n va̱. ⁸Amma uma a nam pa dem i ta̱ a kuꞋuwa a mala ma akina ma na ma̱ tsu kula̱ n ka̱nga̱ ka̱ farinwuta dem: Owovoni, n aza a na a̱ ka̱sa̱kpa̱i kutono mu, n aza a na o bonokoi ka̱ci ke le ili yu unata adama a̱ unushi u na a ci yaꞋansa, n aza a̱ ma̱ga̱la̱ka̱, n aza a tsugbani, n aza a̱ nkunu, n aza o kutono a̱ma̱li, n aza a aꞋuwa ra̱ka̱. Na va ɗaɗa ukpa̱ u ire.”

Urishelima vu savu

⁹Ɗa kalingata ka banai wa̱ va̱ ɗa ka danai mu, “Tono mu, mi ta̱ o kuyotsongu wu vuka vu savu vu Ma̱giri va.” (Kalingata ka nam pa a̱yi ɗa vuza te a̱ ka̱tsuma̱ ka aza e cindere a na a̱ ɓa̱na̱i akpanu e cindere a na i nu ndukpa̱ n cindere o ukocishi.) ¹⁰Ɗa Ayinviki a̱ Ka̱shile o tonoi nu mpa ɗa kalingata ka ɗikai mu a kubana a kusan ku na ku laꞋi n ugaɗi tile-tile. Ɗa u yotsongi mu Likuci i Ciɗa i na Ka̱shile ka̱ suki, i ɗaɗa Urishelima, a̱ kuta̱ gaɗi. ¹¹Ɗa likuci ya i shanai n tsugbayin tsu Ka̱shile ɗa ya akanai n kutashi ku ulaɗi ki ili yu ushili m mini ma̱ a̱vuku tsa atali a ikebe,† an mindatsu ma na a urai ferere e kene ugboku u re dem. ¹²Mashilya mu utsura n ugaɗi ka̱u a kanzakai i ɗa. Mi ta̱ n utsutsu kupa n u re, utsutsu dem wi ta̱ n kalingata† a kinda u ɗa. A utsutsu wa ɗa a ɗanai ɗe ula u umaci kupa n u re wa aza a Israila, kula ku te dem a utsutsu wa. ¹³Kakambu dem ki ta̱ n utsutsu u tatsu: U tatsu a kasana, u tatsu gaɗi, u tatsu ɗaka, u tatsu kpamu a̱ ka̱livi. ¹⁴A maꞋa ta̱ mashilya a̱ ubirini a gaɗi va atali a gbagbaꞋin kupa n e re. A katali dem a ɗana ta̱ kula ku vuza te a̱ ka̱tsuma̱ ka azusuki kupa n aza e re a̱ Ma̱giri a.

¹⁵Kalingata ka na ki a kadanshi nu mpa, ɗa u ka̱na̱i kalangu ka na a yaꞋin n azanariya, adama a na u gisanku likuci ya n kaꞋa, n utsutsu m mashilya ma̱ ni dem. ¹⁶Ana u gisanki, ɗa u cinai adanshi akpati ɗa. Ugaɗi wa akambu, n kashani, n wanshi u ni dem u te u ɗa: Ugisanki wa ra̱ka̱ meli ka̱kpa̱n ke te n amangatawantawun (1,500).21:16 Vuza u gita̱ baci a Agbara ɗa u banai Jos ɗa u yaꞋin nwalu mu ugaɗi nannai ali kutatsu, ta ugaɗi u mashilya me te ma̱ likuci ma mi nannai.¹⁷Ɗa kalingata ka ka gisanki mashilya ma, tsu na vuma u kugisanku wanshi, ɗaɗa udashi amangatawenre n kupa n u ta̱li (216). ¹⁸A maꞋa ta̱ mashilya ma n atali a na i a kutasa langu-langu adanshi akina a shili a ɗa koɓolo m mini ma̱ a̱vuku. Ili dem a̱ likuci ya a yaꞋan ta̱ i ɗa n azanariya mayin a na i ciɗa ali kutashi ku uta̱i adanshi akina a ɗa a kakana a mindatsu ma. ^19-20A maꞋakai n atali icuꞋu kakau kupa n e re,21:19-20 Atali kupa n e re kakau a nam pa dem vi le, i ta̱ n ula icuꞋu kakau, n Tsugana e ci ɗeke le ta̱ nahannai: ka iyain yasfa, ke ire saffir, ka tatsu agat, ka̱ na̱shi zumurrudu, ka tawun onis, ka̱ ta̱li yakutu, ke cindere kirisolat, ka̱ kunla̱i beril, ka̱ kuci tofaz, ka kupa kirisofaras, ka kupa n ke te yakinta, katali ka kupa n e re ametis. dem vi le atali a ikebe a ɗa. O yoku a shili, o yoku kpamu an mini mo tsuloꞋo, o yoku an mini ma̱ a̱vuku, o yoku kpamu bulu an kokocilili.

²¹A̱ɓa̱ya̱ntsu a̱ utsutsu kupa n e re a i ta̱ ana nwaru mi ikebe. Utsutsu dem a yaꞋan ta̱ u ɗa m mawaru me te koci. Baya vu na vi punu a asuvu a̱ likuci a a yaꞋan ta̱ vu ɗa n azanariya a na i n tsuloboi ali a kakana n kutashi langu-langu tsu na mindatsu mi.

²²Mpa n saꞋwa kene A̱Ꞌisa̱ a Gbayin a̱ likuci ba, adama a na Vuzavaguɗu Ka̱shile Uba̱nga̱ri m Ma̱giri ma o okpoi tsu A̱Ꞌisa̱ a Gbayin a nan lo. ²³Likuci i nan lo ya kuciga kanna ko wotoi adama a na ya akana ba, adama a na tsugbayin tsu Ka̱shile tsu akana ta̱ ɗe, ɗa kpamu Ma̱giri ma akanai tsu na ma̱kuni ma tsu akana. ²⁴Uma ra̱ka̱ a aduniyan i ta̱ o kuyongo n kutashi ku na ka kakana a̱ likuci ya. Ngono mi ta̱ a kubanka ɗe uciyi le. ²⁵A̱ɓa̱ya̱ntsu a̱ likuci a o ci yongo ta̱ uɓa̱yuwi ayin tutu. A̱ tsu ɓa̱ya̱ngu a ɗa ba, adama a na kayin ki ɗe a̱ ubuta̱ wa ba. ²⁶I ta̱ a̱ kutuka̱ n uciyi wa aduniyan koɓolo n ili i singai i uma a̱ likuci ya. ²⁷A̱ tsu ka̱sa̱kpa̱ ili i gbani-gbani i uwa punu, ko aza a na a ci yaꞋan ili i wono, ko aza a na a ci yaꞋan aꞋuwa a uwa ɗe ba. Amma aza a na ula e le i uɗani a Katagarda ka Aza a Wuma ka̱ Ma̱giri, ele ɗa a tsu uwa punu.

Kuyene ku na ku ci neke wuma

¹A ayin a na kalingata ka ko yotsongi mu likuci i savu, ɗa u yotsongi mu kuɗolu ku na ki m mini ma na me ci neke wuma. Ku ɗa a kutasa an mindatsu ma na a urai ferere e kene ugboku u re dem. Ku ɗa e kuyene a̱ kuta̱ a kakuba ko tsugono a̱ ubuta̱ u na Ka̱shile ki ida̱shi m Ma̱giri. ²Ku ɗa e kuyene kpamu e mere ma baya vi likuci va. Nɗanga n na n tsu matsa umaci n a̱bunda̱i u na u ci neke wuma m gbonguroi a apashi e re dem o kuɗolu ka. A tsu matsa ta̱ ali kupa n kure a̱ ka̱ya̱, na lo ɗaɗa kute dem o wotoi. Uma a aduniyan a ci yaꞋanka ta̱ a̱vuku e le a̱guma̱.³Babu ili i na Ka̱shile ka yaꞋankai una̱ u gbani-gbani i kufuɗa ya shamgba punu a̱ likuci ya. Kakuba ko tsugono a̱ ubuta̱ u na Ka̱shile ki ida̱shi m Ma̱giri ma ta punu ki a̱ likuci ya, ka̱ta̱ agbashi a̱ ni a yaꞋanka yi tsugbashi. ⁴I ta̱ e kene a̱shi a̱ Ka̱shile ka̱ta̱ u ɗana kula ku ni a̱ a̱ca̱n e le. ⁵Kayin ko kudoku ka yaꞋan kpamu ba. A kuciga kutashi ku ma̱kuni ko ku kanna ba, adama a na Vuzavaguɗu Ka̱shile wi ta̱ e kuneke le kutashi. Ka̱ta̱ a lyaꞋa tsugono ali ayin a babu uteku.

Kuta̱wa̱ ku Yesu

⁶Ɗa kalingata ka danai mu, “Kadanshi ka nam pa mayun ɗa ki ta̱ kpamu kuzuwaka utsura. Ɗa Vuzavaguɗu Ka̱shile, vuza na u ci neke eneki Ayinviki a̱ ni, u suku ta̱ ɗe kalingata ko yotsongu agbashi a̱ ni ili i na i kuta̱wa̱ babu megeshe.”

⁷Yesu† u danai, “A̱ɗa̱ panai! Mi ta̱ lo o kubono gogoꞋo.

“Katagarda ka nam pa ka dana tsu ta̱ ili n a̱bunda̱i adama a ili i na yi lo a̱ kuta̱wa̱ m megeshe ba. Ka̱shile ki ta̱ a kuzuwaka uma una̱singai aza a na o tonoi ili i nam pa ya.”

⁸Mpa ɗa Yahaya, vuza na u panai ɗa kpamu we enei ili i nam pa ya n a̱shi a̱ va̱. Ana n kotsoi kupana n kene le ra̱ka̱, ɗa n kuɗa̱ngi e kelime ka kalingata ka na ko yotsongi mu ili i nam pa ya adama a na n lyaꞋaka yi kayala. ⁹Amma ɗa u danai mu, “A̱Ꞌa̱! Ka̱ta̱ vu lyaꞋaka mu kayala ba! Mpa kagbashi kaꞋa tsu nu, n aza a̱ nu eneki, koɓolo n aza a na o tonoi kadanshi ka na ki punu a katagarda ka nam pa. Cikpa Ka̱shile!”

¹⁰Ɗa u danai mu, “Ka̱ta̱ i kpada uma kuyeve ili i na a danai a katagarda ka nam pa a ukuna wi ili i na i kuta̱wa̱ gogo na m megeshe kpamu ba. A ayin a na ili i nam pa i kuyaꞋan i ta̱ lo a̱ kuta̱wa̱ gogoꞋo. ¹¹Sai ayin a nan lo a yawai, uma a na i a kuyaꞋan kagbani-gbani i ta̱ a kulyaꞋa kelime n kuyaꞋan, uma a na kpamu i a kuyaꞋan ili i wono a lyaꞋa kelime n kuyaꞋan ili i nan lo. Aza a na kpamu i a kuyaꞋan kasingai a lyaꞋa kelime n kuyaꞋan, aza a na kpamu i ciɗa a suma kuyaꞋan kagbani-gbani.”

¹²Yesu u danai kpamu, “A̱ɗa̱ panai! Mi ta̱ o kubono babu megeshe. Mi ta̱ o kubono adama a na ko n neke uma dem katsupu ko n neke le atakaci adama a ili i na a yaꞋin. ¹³N zuwa ta̱ ili ra̱ka̱ i yaꞋan, ɗa n zuwai ili ra̱ka̱ a kubana uteku. Mpa ɗa Alfa n Omega.† Ɗaɗa feu, mpa ɗa Ugiti n Ukocishi.

¹⁴“Ka̱shile ki ta̱ a kuzuwaka aza a na a̱ za̱Ꞌi aminya e le ciɗa una̱singai, adama a nannai a fuɗa a lyaꞋa umaci wu nɗanga n na n ci neke wuma ka̱ta̱ a fuɗa a wala n utsutsu wa ali a uwa a̱ likuci ya. ¹⁵Amma i ta̱ a̱ kusa̱nka̱ uma a nam pa kuꞋuwa a̱ likuci ya: aza a na o bonokoi ka̱ci ke le ɗe ili yi nshinda̱ n unushi u na a yaꞋin, koɓolo n aza a na a yaꞋin nkunu, n aza a tsugbani, n aza a̱ ma̱ga̱la̱ka̱, n aza a na i o kutono a̱ma̱li, koɓolo n yaba dem vu na u tsu dansa aꞋuwa.

¹⁶“Mpa Yesu, n suku ta̱ kalingata ka̱ va̱ ke neke ɗa̱ akaka a kubana wa aza o Kutoni n a̱bunda̱i. Mpa ɗa akaya m matsukaya o Mogono Dawuda.† Mpa ɗa Kazangata ka na ka tsa akana m kpasani.”

¹⁷Ayinviki a̱ Ka̱shile n vuka vu savu va a danai, “Ta̱wa̱!” Vuza na u panai dem u dana, “Ta̱wa̱!” Vuza na dem wi n kakuli, ka̱sa̱kpa̱ u ta̱wa̱, vuza na kpamu u cigai ka̱sa̱kpa̱i ni u ɗika kuneꞋe ku gbani ku mini ma wuma.

Kukotsoso

¹⁸Mpa, Yahaya, n ronoi atsuvu a yaba dem n utsura, vuza na u panai akaka a ukuna wi ili i na yi a nwalu gogo na, koɓolo n i na kpamu yi lo a̱ kuta̱wa̱ tsu na n ɗanai a katagarda ka nam pa: Vuza na baci u doki punu ili a̱ ubuta̱ wa akaka a nam pa, Ka̱shile ki ta̱ o kudoku yi atakaci. Wi ta̱ a kuyaꞋanka yi atakaci nu ndukpa̱ n cindere n na n yaꞋin kadanshi ke le punu a katagarda ka nam pa. ¹⁹Vuza na baci u takpai ili punu a̱ ubuta̱ wa akaka a katagarda ka nam pa, Ka̱shile ki ta̱ a̱ kusa̱nka̱ yi kuciya̱ una̱singai u na a yaꞋin kadanshi punu a katagarda ka nam pa. Ka̱shile ki ta̱ feu a̱ kusa̱nka̱ yi kulyaꞋa umaci u maɗanga ma na me ci neke wuma, ka̱ta̱ a̱yi Ka̱shile u sa̱nka̱ vuma vu nan lo kuyongo a likuci i ciɗa ya.

²⁰Yesu, vuza na u danai ili i nam pa ya mayun ɗa, u danai, “E, kuta̱wa̱ ku va̱ ki m megeshe ba.”

Ta nannai. Ta̱wa̱ u Vuzagbayin Yesu!

²¹YaꞋan Vuzagbayin Yesu u yotsongu ɗa̱ ra̱ka̱ kasingai ka̱ ni ka gbayin. Ta nannai.