Filibiya

Akaka a̱ Bulusu a kubana wa

Aza a Filibiya

Ukuna u katagarda ka nam pa

A̱yi Bulusu a ugbashi ayin a na u ɗanakai aza o Kutoni a na i a̱ likuci i Filibi akaka a nam pa. U ɗanai a ɗa adama a na u yaꞋanka le ogodiya a̱ uɓa̱nki u na a yaꞋankai ni a̱yi a̱ kunu ku ugbashi, ka̱ta̱ kpamu u yotsongusu le uteku u na o kuyongo adama a̱ Kishi.

Bulusu u danai aza o Kutoni o yongo ci Kishi ayin tutu. U yotsongi le uteku u na o kuyongo m ma̱za̱nga̱ ko i baci a̱ ka̱tsuma̱ ka atakaci. U danai le kpamu u laꞋa ta̱ n kugaꞋan a yaꞋan ulinga koɓolo.

Aza e Yesu a anana e kece baci akaka a nam pa, a ci yaꞋan ta̱ mereve adama a na akaka a ɗa a na i tukpa m ma̱za̱nga̱ a ɗanai a ɗa feu ta na a̱ kunu ku ugbashi. Utsura u na u bonokoi a ɗa nannai utsura wu uyevi u Kishi u ɗa u yaꞋin kaꞋa. Aza e Yesu ra̱ka̱ i ta̱ feu n utsura wa anana tsu na u ɗa wi a ayin a̱ Bulusu koɓolo n aza o Kutoni a̱ Filibi.

Ili i na yi punu udariki a katagarda ka nam pa

1. Kuɓa̱yuwa̱ (1:1-11)

2. Yi ɗa̱i ugaꞋin u na wi punu a wuma u Bulusu (1:12-30)

3. Agisana a̱ Kishi a̱ ubuta̱ u kuyongo ku ma̱ta̱na̱ (2:1-18)

4. Arabali a̱ a̱ja̱Ꞌa̱ a̱ Bulusu (2:19-30)

5. Vi ciya̱ wishi u Kishi (3:1—4:9)

6. Bulusu u yaꞋankai aza a̱ Filibi ogodiya (4:10-20)

7. Ikya̱shi yi ukocishi (4:21-23)

Kuɓa̱yuwa̱

¹Mpa ɗa Bulusu. Timoti wi ta̱ na koɓolo nu mpa. A̱tsu agbashi a ɗa e Yesu Kirisiti Kishi.

Mi ta̱ a kuɗanaka nkoshi m gba̱ra̱-gba̱ra̱ n a̱ɓa̱nki† n uma ra̱ka̱ a Filibi aza a na Ka̱shile ka zagbai.

²Ka̱sa̱kpa̱ Ka̱shile Esheku a̱ tsu n Vuzagbayin Yesu Kishi u yotsongu ɗa̱ kasingai ka̱ ni ka̱ta̱ u neke ɗa̱ ma̱ta̱na̱.

Bulusu u yaꞋin kavasa ko ogodiya

³N ci cikpa ta̱ Ka̱shile ayin dem a na n ciɓai n a̱ɗa̱. ⁴N ci shana ta̱ m ma̱za̱nga̱ mi baci a kuyaꞋan kavasa adama a̱ ɗa̱ ⁵adama a na a̱ɗa̱ ɗa i ɓa̱nka̱i mu a̱ ubuta̱ u kuka̱ra̱Ꞌa̱ka̱ n Arabali a Singai adama a̱ Kishi. I gita̱ ta̱ kuyaꞋan nannai a ayin a na i panai arabali a nam pa, ɗa i lyaꞋi kelime n kuyaꞋan nannai ali n gogo na. ⁶Ka̱shile kaꞋa vuza na u gita̱i ulinga u singai u nam pa wa̱ ɗa̱, n yeve ta̱ kpamu mayun wi a̱ kuka̱sa̱kpa̱ ba, sai ulinga u nam pa u kotso cika a kanna ka na Yesu Kishi u kubono.

⁷Derere ɗa m pana nahannai adama a̱ ɗa̱ ra̱ka̱. Yi ta̱ n ubuta̱ u singai punu a̱ ka̱ɗu ka̱ va̱ adama a na ci ciya̱ ta̱ ɗe una̱singai u Ka̱shile koɓolo. Ci yaꞋan ta̱ nannai a ayin a na mi a ugbashi n ayin a na mi uba̱ruwi, ɗa mi a kudakaka adama a na n dansa ili i mayun adama a Arabali a Singai. ⁸Ka̱shile ke yeve ta̱ tsu na n cigai ɗa̱ ka̱u n ucigi u Kishi. U yeve ta̱ kpamu tsu na n cigai n yongo n a̱ɗa̱ ka̱u.

⁹N vasa ta̱ maciganai ma̱ ɗa̱ ma yimkpa ka̱u ali ma laꞋa nannai. N vasa ta̱ i lyaꞋa kelime n kugbonguro a̱ ubuta̱ u kuyeve n ugboji. ¹⁰N vasa ta̱ tsu nam pa adama a na n ciga ta̱ i yeve ili i na i gaꞋin mayun, ka̱ta̱ i ciya̱ i yongo n wuma u ciɗa n u babu ishikushi ali Kishi ko bono. ¹¹Ka̱ta̱ kpamu wuma u ɗa̱ u shana n icuꞋu yi ili i na Ka̱shile ku ushuki n i ɗa ka̱ta̱ ta na i tuka̱ n tsugbayin ka̱u n ucikpi u Ka̱shile. Ili i singai ya i ɗaɗa ili i na Yesu Kirisiti Kishi u zuwai a wuma u ɗa̱.

Arabali a Singai a̱ ubuta̱ wu ugbashi

¹²Uma a̱ va̱, n ciga ta̱ i yeve ili i na a yaꞋankai mu i zuwa ta̱ Arabali a Singai a lyaꞋi kelime. ¹³Gogo na yaba dem punu na u yeve ta̱ a na a shiyai mu n ikani adama a na mi a kuyaꞋanka Kishi tsugbashi. Ko osoji a na i a kindi e kefeku e yeve ta̱ a na mi a kuyaꞋanka Kirisiti Kishi tsugbashi.¹⁴Adama a ugbashi u va̱ ta na, aza o Kutoni n a̱bunda̱i punu na a̱ ciya̱ ta̱ utsura u ka̱ɗu ɗa gogo na i a kudana aza o yoku ukuna u Kishi babu wovon.

^15-16Uma o yoku i ta̱ lo a na a tsu dansa kadanshi ka̱ Ka̱shile adama a na a cigai mu, ɗa kpamu i a kuciga kuyaꞋan ili i na yi derere. Uma a nam pa a tsu dansa ta̱ kadanshi ka̱ Ka̱shile adama a na e yeve ta̱ Vuzagbayin u tuka̱ mu ta̱ na, adama a na m gbagbala kudansa ili i mayun ya Arabali a Singai. ¹⁷Amma mayun ɗa feu, uma o yoku i a kudansa kadanshi ka̱ Ka̱shile n kusheshe ku na ki derere ba. A tsu dansa ta̱ kadanshi ka̱ Ka̱shile n kusheshe ku ucigi u ka̱ci ke le adama a na a cikpa le. I a kuyaꞋan ili i makara ba. A ciga ta̱ kudoku mɓa̱la̱ mi ikani i va̱.

¹⁸Amma ko a̱ɗu e le i ciɗa ko babu, i ta̱ a kudansa akaka adama a̱ Kishi. Adama a ili i nam pa, mi ta̱ a̱ ma̱za̱nga̱. Mi ta̱ kpamu a kulyaꞋa kelime n kuyaꞋan ma̱za̱nga̱ ¹⁹adama a na n yeve ta̱ avasa a̱ ɗa̱ n kuɓa̱nka̱ ku na ku tsu uta̱ wa Ayinviki e Yesu Kishi, i ta̱ a̱ kuta̱ka̱ mu.

²⁰N ciga ta̱ n yongo ayin tutu tsu na n kukpa̱ɗa̱ kuyaꞋan ili i na i kuzuwa mu m pana wono, amma n kucikpa n yaꞋanka Kishi tsugbashi babu wovon ayin tutu. Mi n wovon n ayin a na a lazai ɗe ba, n ciga ta̱ kpamu n yaꞋan n utsura gogo na n kelime feu adama a na n neke Kishi tsugbashi ayin tutu, ko mi n wuma ko n kuwa̱.

²¹Mi baci n wuma, adama a̱ Kirisiti Kishi a ɗa, n kuwa̱ baci ta na, mi ta̱ a̱ kuciya̱ katsupu ka̱ a̱bunda̱i. ²²Amma n lyaꞋa baci kelime n kuyongo n wuma wi ikyamba i nam pa, mi ta̱ a kufuɗa kulyaꞋa kelime n ulinga u Kirisiti Kishi. N yeve ili i na n kuzagba ba. ²³Ugboku u re dem wi ta̱ a kusaꞋwa mu ka̱ɗu ka̱u. Kataci ka̱ va̱ kaꞋa m bana n da̱sa̱ngu koɓolo n Kishi, adama a na nannai ɗa u laꞋi n kugaꞋan ka̱u, ²⁴amma mpa n yeve ta̱ yi ta̱ a kunamba ili i yoku, i ɗa i zuwai ɗa n kudoku mo yongo n a̱ɗa̱.

²⁵Adama a na n yeve ta̱ ili i nam pa, n kushamgba ta̱ ciya̱ i gbonguro a uneki wa̱ a̱ɗu u ɗa̱ ka̱ta̱ tsu nan lo kpamu yi isa ma̱za̱nga̱ ma na mi punu. ²⁶Nannai, n ta̱wa̱ baci wa̱ a̱ɗa̱ kpamu, yi ta̱ a kuyaꞋan ma̱za̱nga̱ adama a ili i na i ciya̱i mu ka̱ta̱ kpamu i ciya̱ ili n a̱bunda̱i i na i kudana Yesu Kirisiti Kishi u gaꞋan ta̱.

²⁷Amma ili i na baci i ta̱wa̱i dem, mayun ɗa i yongo tsu na u kutuka̱ tsugbayin a̱ ubuta̱ wa Arabali a Singai adama a̱ Kishi. Ko n ta̱wa̱ me ene ɗa̱ kpamu ko m pana baci uteku u na yi ɗe koci, mi ta̱ e kuyeve a na yi kashani koɓolo, a kugbagbala adama a na i ciya̱ aza o yoku e neke a̱ɗu n Arabali a Singai a. ²⁸Ka̱ta̱ i pana wovon adama a irala i ɗa̱ ba. Nannai ɗa u kokpo urotu we le a na Ka̱shile n ka̱ci ka̱ ni wi ta̱ a kuna le ka̱ta̱ wi isa ɗa̱. ²⁹Adama e Yesu Kishi, Ka̱shile ke neke ta̱ ili i singai i kuneke ka̱ɗu n a̱yi, ɗa feu u nekei ɗa̱ ili i singai ya atakaci adama a̱ ni. ³⁰I yeve ta̱ tsu na a takacikai mu ɗa gogo na i panai ta a ɗa a buwai nannai. A̱ɗa̱ feu i yeve ta̱ atakaci a nan lo a.

Okpoi ci Yesu

¹Yi ta̱ n utsura u ka̱ɗu adama a na yi ta̱ koɓolo n Kirisiti Kishi? Yi ta̱ n ida̱shi i yuwu a̱ ka̱tsuma̱ ka̱ ɗa̱ adama a ucigi u ni? Ayinviki a̱ Ka̱shile o ɓolongu ɗa̱ ta̱ koɓolo? I tsu pana ta̱ asuvayali ɗa yi kpamu o motononoi sawu? ²Adama a na n yeve ta̱ ta ki nannai, n ciga ta̱ i zuwa mu m pana ma̱za̱nga̱ n a̱bunda̱i. Ili i na i kuyaꞋan i ɗa na: i panakpanai mayin, i ciganai kpamu, ka̱ta̱ i yaꞋan ulinga koɓolo n kusheshe ku te n kuyaꞋan ili i te.

³Ka̱ta̱ i yaꞋan ili adama e cisheꞋe ba, ka̱ta̱ kpamu i yaꞋan ili adama a̱ a̱ra̱ɗi ba. Amma i goyo ka̱ci ka̱ ɗa̱ yi baci a kuyaꞋan ili, ka̱ta̱ vi sheshe adanshi tovu u laꞋa wu ta̱. ⁴Ka̱ta̱ vi sheshe adama a ukuna u ka̱ci ka̱ nu koci ba, amma yongo m mali n uma o yoku n ili i na i a kuyaꞋan dem.

⁵A wuma u ɗa̱, u gaꞋan ta̱ i sheshe ka̱ta̱ i yaꞋan ili uteku u na Yesu Kishi u sheshei ɗa u yaꞋin ili kpamu.

⁶Yesu wi ta̱ derere n Ka̱shile ayin tutu.

Amma ko n nannai a̱yi u sheshe u ka̱na̱ tsugbayin derere n Ka̱shile ba.

⁷Ɗa u kucikpa u kpa̱ɗa̱i kubonoko ka̱ci ka̱ ni ili.

Ɗa wo okpoi derere n kagbashi.

Ɗa a matsai ni tsu vuma,

⁸ɗa u yongoi tsu vuma.

Ɗa u panakai Ka̱shile ali ɗa u goyoi ka̱ci ka̱ ni kaca-kaca,

ɗa u nekei ka̱ci ka̱ ni u kuwa̱ a maɗanga ma atakaci.

⁹Adama a nannai, ɗa Ka̱shile ka̱ ɗengusa̱i ni a̱ ubuta̱ u tsugbayin

u na u laꞋi n tsugbayin dem,

ɗa Ka̱shile ke nekei ni kula ku na ku laꞋi ku yaba dem.

¹⁰Adama a nannai kpamu, yaba dem wi ta̱ a̱ kukuɗa̱ngu

u pana baci kula ku Yesu.

Yaba dem vu na wi na a aduniyan n gaɗi wi ta̱ a kuyaꞋan nannai.

¹¹Ta kpamu nannai, kelentsu dem ki ta̱ a kudansa e keteshe

a na Yesu Kishi Vuzagbayin ɗa,

na va ta na wi ta̱ e kuneke tsugbayin u Ka̱shile Dada.

Akanai tsa azangata

¹²A̱ja̱Ꞌa̱ a̱ va̱ a ucigi, i panaka ta̱ Ka̱shile ayin tutu ayin a na mi ishi n a̱ɗa̱. Gogo na a na mi lo n a̱ɗa̱ ba, u gaꞋan ta̱ i laꞋa n kupanaka yi. LyaꞋi kelime n kuyaꞋan ulinga u na u kuyotsongu a na a isai ɗa̱, ka̱ta̱ i yaꞋan nannai n kucikpa ili n kupana ku wovon kpamu. ¹³Ka̱shile ki ta̱ a kuyaꞋan ulinga wa̱ ɗa̱, u kuzuwa ɗa̱ ta̱ i ciga kupanaka yi, ɗa wi e kuneke ɗa̱ utsura u na i yaꞋan ili i na i yokpoi ni.

¹⁴Ka̱ta̱ i yaꞋan mololo, ko kanananai yi baci a kuyaꞋan ili ba. ¹⁵Tsu nan lo tsa babu vuza na u kudansuka ɗa̱ adama a ili i yoku ko kenu. I yongo ciɗa, n wuma u babu ili yi ishikushi tsu muku n Ka̱shile. I yongo n wuma u kutashi tsa azangata punu a aduniyan a̱ ka̱yimbi a na i tukpa n uma a na i n kawuya, aza a na a ci yaꞋansa unushi ayin tutu.

¹⁶Ka̱na̱i kpan-kpaꞋan, kadanshi ka wuma, adama a na Kishi u bono baci n fuɗa n dana mpa n lyaꞋa ta̱ malamanai ma, ulinga u va̱ kpamu wo okpo gbani ba. ¹⁷Uneki u ka̱ɗu u ɗa̱ u Vuzagbayin n tsu na yi o kutono yi, wi ta̱ tsa alyuka wa̱ ni. Gogo na n kuwa̱ baci kpamu u kokpo ta̱ adanshi a̱ tsuwa̱n ta̱ mpasa n va̱ ɗa o doki n ɗa a̱ ubuta̱ wa alyuka a̱ ɗa̱. Ta baci nannai mi ta̱ a kupana ma̱za̱nga̱, mi ta̱ kpamu o kuɓolongu n a̱ɗa̱ adama a na m pana uyoꞋo. ¹⁸U gaꞋan ta̱ feu i pana uyoꞋo adama a ukuna u nam pa, ka̱ta̱ i yaꞋan ma̱za̱nga̱ koɓolo nu mpa.

Bulusu u suki ili i kuɓa̱nka̱

¹⁹Vuzagbayin Yesu wu ushuku baci, n sheshe ta̱ kusuꞋuku ɗa̱ Timoti gogo na. U bono baci wa̱ va̱, mi ta̱ a kupana ma̱za̱nga̱ adama a arabali a̱ ɗa̱. ²⁰Mi n vuza ci ni ba, u tsu pana ta̱ asuvayali adama a̱ ɗa̱ a na a laꞋi a yaba dem vu na wi na. ²¹N dansa ta̱ nahannai adama a na yaba dem wi ta̱ e kusheshe adama a ili i na a̱yi a̱ ka̱ci ka̱ ni u cigai koci, a na we sheshe adama a ukuna u na Yesu Kishi u cigai. ²²Amma i yeve ta̱ tsu na Timoti u yotsongi ɗe ka̱ci ka̱ ni mayin wo okpo an maku n esheku a̱ ni. U ɓa̱nka̱ mu ta̱ n kudana uma Arabali a Singai. ²³Adama a nannai, ɗa baci n ta̱wa̱ n yevei ili i na a kuyaꞋanka mu, n sheshe ta̱ n suku yi wa̱ ɗa̱. ²⁴Mpa feu n keɗe ta̱ a̱pa̱Ꞌa̱ Vuzagbayin wi ta̱ a̱ kuka̱sa̱kpa̱ mu n ta̱wa̱ wa̱ ɗa̱ babu megeshe.

²⁵I suku ta̱ Abafaroda tsu kalingata ka̱ ɗa̱, u ɓa̱nka̱ mu ta̱ n i na mi a kuciga. A̱yi vuza va̱ ɗa a̱ ka̱tsuma̱ ka̱ Kishi, u yaꞋan ta̱ ulinga koɓolo nu mpa, ɗa kpamu wo okpoi an kosoji koɓolo nu mpa. Gogo na, me ene ta̱ u gaꞋan ta̱ n ka̱sa̱kpa̱ yi u bono wa̱ ɗa̱. ²⁶Ili i na i zuwai i ɗaɗa u ciga ta̱ u yongo n a̱ɗa̱ ka̱u. U pana uyoꞋo ba, ana i panai u ka̱na̱ ta̱ mɓa̱la̱. ²⁷Mayun ɗa u yaꞋan ta̱ mbanaki. Kenu ɗa wi ishi a̱ kukuwa̱. Amma Ka̱shile ka panai asuvayali a̱ ni, ana u potsokpoi ni, ɗa kpamu u sa̱nka̱i mu ma̱shi adama a una̱mgbi u ka̱ɗu wa̱ a̱bunda̱i. ²⁸Ili i na nam pa i ɗaɗa i zuwai ɗa n laꞋi n kuciga n suꞋuku ɗa̱ a̱yi. A ayin a na baci ye ene ni kpamu yi ta̱ a kupana ma̱za̱nga̱ tsu nan lo tsu ɗa ta na una̱mgbi u ka̱ɗu u va̱ u kujebe. ²⁹Kya̱sa̱i ni n uye u Vuzagbayin ka̱ta̱ i pana ma̱za̱nga̱ ka̱u. Nekei ni tsugbayin tsu na i kuneke uma a na i ci ni. ³⁰YaꞋin nannai adama a na kenu ɗa wi ishi a̱ kukuwa̱ adama a ulinga u Kishi. U ta̱wa̱ ta̱ u ɓa̱nka̱ mu n ulinga u na a̱ɗa̱ a̱ ka̱ci ka̱ ɗa̱ i kpa̱ɗa̱i kufuɗa kuyaꞋan.

Uteku u na va̱ kuciya̱ ili i mayun

¹Gogo na, uma a̱ va̱, yaꞋin ma̱za̱nga̱ adama a Vuzagbayin! N yaꞋan ta̱ ma̱za̱nga̱ adama a na n ɗanaka ɗa̱ ta̱ ili i te n i na n danai ɗa̱ ɗe. Ili ya yi ta̱ feu o kodoku ya̱ sa̱nka̱ ili i gbani-gbani i na i kusaꞋwa ɗa̱.

²Ka̱ta̱ i ka̱sa̱kpa̱ uma a kavama a nan lo a̱ ya̱nsa̱ ɗa̱ ba. Ele ɗa aza a na a̱ tsu la̱nsa̱ kukiɗa ka avaja wasasa, i ta̱ ana nsheꞋe mu unata. ³A̱tsu ci ta̱ n ukiɗi wa avaja u mayun adama a na ci ta̱ a kucikpa Ka̱shile a̱ ubuta̱ wa Ayinviki a̱ ni. Tsugbayin tsu tsu ci ta̱ a̱ ubuta̱ u Yesu Kishi ci kpamu a kuzuwa katsura n ili yi ikyamba i tsu ba.

⁴Amma u gaꞋan ba, mpa mi ta̱ a kufuɗa kuyaꞋan a̱ra̱ɗi n ili yi ikyamba i va̱. Vuza na baci u danai a̱yi wi ta̱ n i na u kuyaꞋan adama a na u lyaꞋaka ka̱ci ka̱ ni kelime n ili i nam pa, mi ta̱ a kulaꞋa yi n ili i nam pa dem. ⁵A kiɗa mu ta̱ kavaja a kanna ka̱ kunla̱i ana a matsai mu. Mpa vuza va aza a Israila ɗa. Mpa umaci u Bayami† u ɗa. Na va u yotsongu ta̱ mayun mpa umaci wi Ibrahim u ɗa. Ci baci a kadanshi ka̱ Wila̱, mpa Kafarishi kaꞋa. ⁶Mpa vuza vu kataci ɗa, n tuka̱ ta̱ n atakaci a̱ ubuta̱ wa aza e Yesu. Babu vuza na u dansukai mu a na n koɗoi Wila̱, ko kenu.

⁷N ayin ɗe, mpa n sheshe ta̱ ili i nam pa ya i singai i ɗa, amma gogo na m bonoko le ta̱ ili i gbani adama a ili i na Kishi u yaꞋin. ⁸Ili i na i laꞋi i nan lo i ɗaɗa, me ene ta̱ ili ra̱ka̱ tsu ukuna u gbani n gisanku baci i ɗa n tsu na n yevei Yesu Kishi. Uyevi u na n yevei Yesu Kishi Vuzagbayin vu va̱ u laꞋa ta̱ ili i nan lo ra̱ka̱, na lo va ta na mayun ɗa. Adama a̱ ni a ɗa n nambai ili ra̱ka̱, amma ele ka̱viri kaꞋa ka na a̱ kuka̱sa̱kpa̱ ka̱ca̱pa̱ adama a na n ciya̱ mo okpo vuza vu Kishi cika, ⁹ka̱ta̱ feu mo okpo koɓolo n a̱yi cika. N doku n neke katsura n kasingai ka̱ va̱ ko utsura u kutono Wila̱ ba, amma n neke ta̱ katsura n Kirisiti Kishi wi isa mu. N yaꞋan ta̱ nannai adama a na uye u na Ka̱shile ka tsu bonoko tsu aza a̱ usuɓi n a̱yi u ɗaɗa ubuta̱ wu uneki u ka̱ɗu. ¹⁰N ciga ta̱ n yeve Kirisiti Kishi, n ciga ta̱ kpamu n yeve utsura u na u ɗengusa̱i ni a̱ ubuta̱ wu ukpa̱. N ciga ta̱ m ɓolongu n a̱yi n ciga ta̱ kpamu n yeve atakaci a̱ ni. N ciga ta̱ m ɓolongu n a̱yi a̱ ubuta̱ wu ukpa̱ u ni. ¹¹Nannai kpamu mi ta̱ n a̱pa̱Ꞌa̱ a na mpa feu a̱ kuɗengusa̱ mu a̱ ubuta̱ wu ukpa̱!

LyaꞋa kelime n kataci

¹²Ka̱ta̱ n yaꞋan ili nam pa ya ra̱ka̱ ba, ka̱ta̱ kpamu a zuwa mu mo okpo vuza na u shatangi ukuna cika ba. Amma mi ta̱ a kulyaꞋa kelime n ulinga ali a kubana ukocishi ka̱ta̱ a zuwa mu mo okpo ili i na Yesu Kirisiti Kishi u cigai mo okpo. ¹³Uma a̱ va̱, mpa n dana n ciya̱ ta̱ ɗe ili ya ra̱ka̱ ba, amma ili i na mi a kuyaꞋan i ɗaɗa: ili i bura mu n ili i na i lazai ɗe ba, mi ta̱ o kutono n utsura adama a na n reme ili i na yi kelime. ¹⁴Mi ta̱ a kulyaꞋa kelime adama a na n yawa a uteku ana e kuneke mu katsupu ka singai, ayin a na Ka̱shile ke kuɗeke mu a kubana gaɗi adama e Yesu Kishi.

¹⁵Yaba dem vu tsu vu na u kutsai a̱ ubuta̱ wu uneki u ka̱ɗu u sheshe tsu nam pa. Ili yi baci lo i na i kpa̱ɗa̱i kushuku n i ɗa, Ka̱shile ki ta̱ a kuzuwa ɗa̱ ye ene ili i na yi derere. ¹⁶Ili i na i laꞋi ili dem i ɗaɗa na: ci lyaꞋi kelime n kutono ili i mayun i na ci yevei.

¹⁷Uma a̱ va̱, yongoi uteku u na n yongoi, ka̱ta̱ i piꞋisa a̱ ubuta̱ u kinda uma a na o yongoi tsa agisana a na ci nekei ɗa̱. ¹⁸I yongo tsu nam pa adama a na uma i ta̱ lo n a̱bunda̱i a na i o kuyongo a uye u na u kuyotsongu uma ele irala i maɗanga ma atakaci me Yesu i ɗa. N dana ɗa̱ ta̱ ɗe ili i nam pa ya, ko n gogo kpamu mi ta̱ a̱ ma̱shi n kujilya adama a na ili ya mayun ɗa. ¹⁹Uma a nam pa i ta̱ a kuyawa uteku, ka̱ta̱ a cina ukpa̱ u babu uteku. Ili i na i a kuyaꞋanka tsugbashi i ɗaɗa ili i na ele a̱ ka̱ci ke le a cigakai ikyamba i le koci. Ele a̱ ci ciya̱ ta̱ tsugbayin a̱ ubuta̱ wi ili i wono i na a ci yaꞋan. A zuwa ta̱ a̱ɗu e le ra̱ka̱ a̱ ubuta̱ wi ili ya aduniyan i nam pa.

²⁰Amma a̱tsu uma a gaɗi a ɗa, ubuta̱ u na Vuzagbayin Yesu Kishi wi o kuyongo. Ci ta̱ kpamu a kuvana yi m moloko u bono an Kishi ka̱ tsu. ²¹Wi ta̱ a kuɗika ikyamba i tsu i nam pa ya aduniyan i na yi babu utsura, ka̱ta̱ u sabaꞋa i ɗa yo okpo ikyamba i tsugbayin ci ni, a̱yi wi ta̱ a kuyaꞋan nannai n utsura u gbayin u na wi n u ɗa u na u tsu zuwa ili dem i panaka yi.

¹Uma a̱ va̱, n ciga ɗa̱ ta̱ ɗa n cigai me ene ɗa̱ kpamu. I zuwa mu ta̱ n yaꞋan ma̱za̱nga̱ a̱ɗa̱ ɗa kpamu oroliko a na e nekei mu. Adama a nan lo, i shamgba n utsura a̱ ubuta̱ u kutono Vuzagbayin.

Uteku u na i kuyongo mayin

²N folono ta̱ Afodiya koɓolo n Sitinka, a̱ma̱ci e re a nam pa a panakpanai mayin adama a Vuzagbayin. ³Avu toku vu ulinga vu va̱ ɗa vu mayun, n folono wu ta̱ vu ɓa̱nka̱ le. A dakaka ta̱ ulinga ka̱u koɓolo nu mpa adama a na a dana aza o yoku Arabali a Singai. A yaꞋan ta̱ kpamu ulinga koɓolo n Kilementu n a̱ja̱Ꞌa̱ a ulinga a̱ va̱ a na a buwai. Ka̱shile ka ɗana ta̱ ula a uma a nam pa ra̱ka̱ a katagarda ka uma a na i n wuma u babu uteku.

⁴YaꞋin ma̱za̱nga̱ adama a Vuzagbayin ayin tutu. Mi ta̱ kpamu o kudoku ma dana, yaꞋin ma̱za̱nga̱! ⁵Yongoi n asuvu a̱ yuwu u uma ra̱ka̱. Ciɓai a na kuta̱wa̱ ku Vuzagbayin ku yawai ɗevu.

⁶Ka̱ta̱ i muɗa̱ a̱ɗu adama a ili i yoku ba. Amma vasai ka̱ta̱ i folono Ka̱shile ka̱ ɓa̱nka̱ ɗa̱ a̱ ubuta̱ wi ili ra̱ka̱. YaꞋin ogodiya, ka̱ta̱ i dana Ka̱shile ili i na i nambai. ⁷I yaꞋan baci nannai, i yeve ta̱ Ka̱shile ki ta̱ a kuzuwa a̱ɗu a̱ ɗa̱ o okpo m ma̱ta̱na̱. Na va ɗaɗa ili i singai, i ɗa i laꞋi ili i na ka̱ɗu ka vuma ke kuyeve. Nannai ɗa Ka̱shile ka kinda a̱ɗu a̱ ɗa̱ n kusheshe ku ɗa̱ uteku u na yi o kuyongo a̱ ka̱tsuma̱ ka̱ Yesu Kirisiti Kishi.

⁸Aza a̱ va̱, a uteku n dana ta̱: zuwai kusheshe ku ɗa̱ a ili i mayun n ili i tsugbayin n ili i na yi derere. Sheshei ukuna wi ili i na yi ciɗa n ili yu ucigi n ili i na yi n tsuloboi. Sheshei ukuna wi ili i na yi n ugaꞋin ka̱u ɗa kpamu i yawai a cikpa vuza. ⁹Ka̱na̱i kuyaꞋan ili i na i piꞋisai a̱ va̱ ra̱ka̱. Ka̱ta̱ kpamu i ka̱na̱ kuyaꞋan ili i na i panai n dansai ra̱ka̱. Ka̱ta̱ kpamu i ka̱na̱ kuyaꞋan ili i na ye enei mu n yaꞋin ra̱ka̱. Yi baci a kuyaꞋan ili i nam pa, Ka̱shile ka̱ ma̱ta̱na̱ ki ta̱ o kuyongo n a̱ɗa̱.

Bulusu u yaꞋin ogodiya

¹⁰N ayin a na a lazai ɗe i ɓa̱nka̱ mu ta̱, ko a na yi a kuciga kuyaꞋan nannai ɗa ili i yoku i kpadai ali megeshe i doku i ciya̱ ka̱ba̱nga̱ ba. Amma gogo na kpamu i ciya̱ ta̱ ka̱ba̱nga̱ ka na i kuɓa̱nka̱ mu kpamu, mi ta̱ a̱ ma̱za̱nga̱. ¹¹N dansa ili i nam pa adama a na n nambai ili ba. N yeve ta̱ uteku u na n kucuwa̱ n ili i na i ciya̱i mu dem. ¹²N yeve ta̱ uteku u na vuza u ci yaꞋan, u namba baci ili. N yeve ta̱ kpamu tsu na vuza u ci yaꞋan, u ciya̱ baci ili n a̱bunda̱i. N yeve ta̱ tsu na a ci yaꞋan ma̱za̱nga̱ ayin dem. N yeve ta̱ tsu na o ci yongo m ma̱za̱nga̱ n ilikulyaꞋa n a̱bunda̱i n tsu na o ci yongo m ma̱za̱nga̱ n kambulu kpamu. N yeve ta̱ tsu na vuza u ci yongo m ma̱za̱nga̱ wi baci n ili n a̱bunda̱i ko babu ili. ¹³Mi ta̱ a kufuɗa ma yaꞋan ili ra̱ka̱ adama a̱ ubuta̱ wu utsura u na Yesu Kirisiti Kishi u ci neke mu.

¹⁴Amma ko n nannai, i yaꞋan ta̱ kataci mayin adama a na i shamgba nu mpa a atakaci a na mi o kusoꞋo gogo na. ¹⁵A̱ɗa̱ aza a̱ Filibiya, i yeve ta̱ ɗe a̱ɗa̱ ɗa koci aza a na e nekei mu ikebe adama a na i ɓa̱nka̱ mu ana n tuka̱i ɗa̱ n Arabali a Singai ɗa n lazai a̱ kuta̱ o uɓon u Makidoniya. Aza o Kutoni o yoku i lo a yaꞋin nannai ba. ¹⁶Ko ayin a na mi ishi ɗe a Tosolonika i neke ta̱ ikebe u lazai kute.

¹⁷Mi a kudansa ili i nam pa adama a na n doku mi isa kuneꞋe ku yoku wa̱ ɗa̱ ba. Amma ili i na n cigai i ɗaɗa yi isa katsupu ka na ko yotsoi adama a kasingai ka na i yaꞋankai mu. ¹⁸Gogo na nahannai n ciya̱ ta̱ ili i na n cigai ra̱ka̱. Ali n ciya̱ ta̱ ili i na i laꞋi i na n cigai. I suku ta̱ Abafaroda n kuneꞋe n a̱bunda̱i u tuka̱ mu, mi isa ta̱ ku ɗa. Alyuka a ɗa a̱ ma̱gula̱ni mayin, Ka̱shile kpamu ki isa ta̱ a ɗa, ɗa kpamu u panai uyoꞋo n a ɗa. ¹⁹Ka̱shile ka̱ va̱ kpamu, vuza na wi a̱ kula̱na̱ mu, wi ta̱ feu e kuneke ɗa̱ ili i na yi a kuciga ra̱ka̱ n uciyi u tsugbayin u ni. Uciyi u ni u ɗaɗa ili i na u nekei tsu a̱ ubuta̱ u Yesu Kirisiti Kishi. ²⁰Adama a ili i nam pa ra̱ka̱, nekei tsugbayin u Ka̱shile Esheku a̱ tsu ko wanai. Ta nannai.

Ikya̱shi yu ukocishi

²¹Kya̱sa̱i aza o Kutoni e Yesu a Filibiya ra̱ka̱. Aza a̱ va̱ a na i na i ta̱ ikya̱shi i ɗa̱. ²²Aza o Kutoni ra̱ka̱ a na a buwai feu i ta̱ ikya̱shi i ɗa̱. Aza Kutoni a na i ulinga e kefeku ka Kaisa† i ta̱ ikya̱shi i ɗa̱ kpamu mayin.

²³YaꞋan kasingai† ka Vuzagbayin Yesu Kirisiti Kishi ko yongo n ayinviki a̱ ɗa̱.