Yakubu

Akaka a

Yakubu

Ukuna u katagarda ka nam pa

Yakubu, vangu vi Yesu Kishi ɗa, a̱yi ɗa u ɗanai katagarda ka nam pa. U ɗanai akaka a kubana wa aza o Kutoni a na e pecuki a iɗika kakau adama a atakaci a na i o kusoꞋo adama o kutono Yesu.

Ana atakaci a a yaꞋin usuɗukpi, ɗa a sumai upecukushi. I ɗaɗa i zuwai ɗa Yakubu u ɗanakai le akaka a nam pa adama a na u ciga ta̱ e reme a̱ɗu ka̱ta̱ a̱ lulukpa̱ a̱ ubuta̱ u Kutoni u le. I ɗaɗa i zuwai ɗa katagarda ka nam pa ka yaꞋin kadanshi ka atakaci, n kadama, n uremi u ka̱ɗu, n kavasa, n kuyongo mayin a̱ ubuta̱ u Kutoni ku Yesu.

Aza o Kutoni n a̱bunda̱i anana i o kusoꞋo atakaci a̱ ubuta̱ wa aza a na e yevei Kishi ba. N nannai dem u gaꞋan ta̱ tsu tono yi mayin. Katagarda ka nam pa ko yotsongu tsu ta̱ a na kutono Kishi ɗaɗa kuyongo a uye u singai ayin tutu.

Ili i na yi punu udariki a katagarda ka nam pa

1. Kuɓa̱yuwa̱ (1:1)

2. Wuma wu uneki u ka̱ɗu n ugboji (1:2-18)

3. Kupana n kutono akaka a̱ Ka̱shile (1:19-27)

4. Ka̱ta̱ vu laꞋa n kuciga aza a uciyi n utsura ba (2:1-13)

5. Uneki u ka̱ɗu n ulinga (2:14-26)

6. Ugboji n kadanshi (3:1-18)

7. Uɓarangi adama a kulyaꞋa cija̱Ꞌa̱ n aduniyan (4:1—5:6)

8. Uremi u ka̱ɗu, ma̱riki, n kavasa (5:7-20)

Kuɓa̱yuwa̱

¹Mpa ɗa Yakubu kagbashi ka̱ Ka̱shile n ke Yesu Vuzagbayin Kishi.

Mi ta̱ a kuɗanaka uma a̱ Ka̱shile a na e nekei a̱ɗu ɗa i ida̱shi uvishuwi a̱ ubuta̱ kakau.

Mi ta̱ a̱ kusuku ikya̱shi i va̱ a kubana wa̱ ɗa̱.

Atakaci n kukondo

²A̱ja̱Ꞌa̱ a̱ va̱, yaꞋin ma̱za̱nga̱ ra̱ka̱ vu ɗa̱ ayin a na baci kukondo kakau ku ta̱wa̱i wa̱ ɗa̱. ³I yeve ta̱ i ili i nan lo yi ta̱ o kukondo uneki wa̱ a̱ɗu u ɗa̱. Kukondo ku nan lo ka ku ɗa ka kuzuwa ɗa̱ i lulukpa̱. ⁴Lulukpa̱i ali kukondo ku ɗa̱ ku laza. Ayin a na baci ku lazai, ka̱ta̱ yo okpo uma a na i derere. Ayin a nan lo, ili i na baci i nambai yi ta̱ a̱ kuciya̱ i ɗa.

⁵Vuza yoku a̱ ka̱tsuma̱ ka̱ ɗa̱ u namba baci ugboji, u folono a̱ ubuta̱ u Ka̱shile, a̱yi Ka̱shile u ci yaꞋan ta̱ kuneꞋe ku ni a kubana u yaba dem ba̱ri. U ci neke ta̱ u vuza na u folonoi ni dem, u tsu dansuka vuza kafu u neke yi ba. ⁶Amma i folono baci ili, u gaꞋan ta̱ i neke a̱ɗu ka̱ta̱ i yongo a̱ munla̱i ba, ko i kuciya̱ ta̱ ili i nan lo ba. Amma i yaꞋan baci munla̱i, yi ta̱ o kokpo an aɓau a na wunla̱i u tsu tuka̱ ka̱ta̱ u zuwa mini kulete kelime n ka̱ca̱pa̱. ⁷Vuma vu na ka̱ɗu ka̱ ni ki nannai, ka̱ta̱ u keɗe a̱pa̱Ꞌa̱ wi ta̱ a̱ kuciya̱ ili i na u folonoi ba. ⁸A̱yi vuma vu nan lo u tsu fuɗa u sheshe mayin ili i na wi a kuciga wa yaꞋan n ka̱ɗu ka̱ ni ba.

⁹Aza o Kutoni a na i n unambi, o yotso ta̱ a yaꞋan ma̱za̱nga̱ adama a na Ka̱shile ko bonoko le ta̱ uma ɗa u ɗengusa̱i le. ¹⁰Aza o Kutoni a na i n uciyi u gaꞋan ta̱ a yaꞋan ma̱za̱nga̱ adama a na Ka̱shile ko yotsongu le ta̱ uteku u na o kugoyo ka̱ci ke le. Vuma vu uciyi wi ta̱ an mita̱ ma na mo tsu gbonguro a kakamba ka̱ta̱ a kubana megeshe ma̱ kula̱. ¹¹Kanna ka̱ tsu uta̱ ta̱ n usuɗukpi ka̱u, ka̱ta̱ u ɗekpetengu mita̱ ma, ka̱ta̱ a̱pa̱lu a̱ yikpa̱, ka̱ta̱ ugaꞋin u ni u kotso. Ta kpamu vuza vu uciyi u kukuwa̱ nannai a̱ ka̱tsuma̱ ka ayin a na wi a kataci ku ulinga u ni.

¹²Ka̱shile ke ci neke ta̱ ma̱za̱nga̱ a̱ ubuta̱ u uma a na a̱ lulukpa̱i ɗa kpamu e remei a̱ɗu a ayin o kukondo. A ayin a na baci kukondo ka ku kotsoi, Ka̱shile ki ta̱ e kuneke oroliko a wuma a na i babu uteku a̱ ubuta̱ u vuza na u laꞋi utsura u kukondo wa. Ka̱shile ka yaꞋan ta̱ uzuwakpani nannai a̱ ubuta̱ wa aza a na a cigai ni.

¹³Vuza wi baci a kuciga kuyaꞋan unushi, ka̱ta̱ u dana Ka̱shile kaꞋa ki a kuyaꞋanka yi ugboji u yaꞋan unushi ba. Ka̱shile ka ci ciga kuyaꞋan ku kavama ba. Ta kpamu nannai Ka̱shile ka tsu zuwa vuza u yaꞋan ili i kavama ba. ¹⁴A̱shawuya a̱ tsu a ɗa ubuta̱ yoku a̱ ci ya̱nsa̱ tsu ci yaꞋan ili i kavama. ¹⁵A̱shawuya a yaꞋan baci ka̱tsuma̱ ka̱ta̱ a matsa unushi. Ka̱ta̱ unushi u gbonguro ka̱u, ali ka̱ta̱ u matsa ukpa̱ wa̱ nu.

¹⁶Ncigi n va̱ ka̱u, ka̱ta̱ i ka̱sa̱kpa̱ a̱ ya̱nsa̱ ɗa̱ n aꞋuwa ba. ¹⁷Ili i na i gaꞋin dem n i na yi derere, kuneꞋe ku ɗa ku na ku uta̱i gaɗi a̱ ubuta̱ u Ka̱shile. Ili i nam pa dem Ka̱shile ka na ka yaꞋin kutashi ku na ki gaɗi a̱yi ɗa u nekei tsu i ɗa. A̱yi wi an kululu ba, kululu ku tsu sabaꞋa ta̱ kanna ka sabaꞋa baci, a̱yi wi a kusabaꞋa ba. ¹⁸U ciga tsu ta̱ tso okpo ncigi n ni, i ɗaɗa i zuwai ɗa u suki akaka a mayun a̱ ni wa̱ tsu. Ɗa akaka a a matsai tsu tso okpo an ngaji n ni.

Kupana n kuyaꞋan ili i na vu panai va

¹⁹Ncigi n va̱, u yotso ta̱ yo okpo aza a kupana gogoꞋo, amma yo okpo aza a kudansa sawu, ka̱ta̱ kpamu yo okpo aza a kuyaꞋan wupa gogoꞋo ba. ²⁰I yaꞋan baci wupa, ya kufuɗa ya yaꞋan ili i singai i na Ka̱shile ki a kuciga i yaꞋan ba. ²¹Mayun ɗa i ka̱sa̱kpa̱ kuyaꞋan tsugbani n kavama. Ana ya yaꞋan nannai, i kucikpa i goyo ka̱ci ka̱ ɗa̱, ka̱ta̱ yi isa kadanshi ka na a̱ ca̱Ꞌi a̱ a̱ɗu a̱ ɗa̱. Kadanshi ka nam pa ka ki ta̱ n utsura u kisa ɗa̱.

²²U gaꞋan ta̱ yo okpo aza a na a kuyaꞋan ili i na kadanshi ka̱ Ka̱shile ka danai i yaꞋan. Ka̱ta̱ yo okpo aza a kupana n atsuvu koci ba. Yi baci nannai, yi ta̱ a̱ kuya̱nsa̱ ka̱ci ka̱ ɗa̱. ²³Vuma u pana baci kadanshi ka na Ka̱shile ka danai, amma u yaꞋan ili i na ka danai a yaꞋan ba, vuma vu nan lo wi ta̱ an vuma vu na vi ci inda ka̱ci ka̱ ni a mindatsu, ²⁴amma u laza baci ka̱ta̱ u cinukpa n uteku u na ka̱ci ka̱ ni ki gogo lo. ²⁵Amma vuma wi inda baci wila̱ u Ka̱shile u na wi derere, ɗa u yaꞋin ili i na u danai, vuma vu nan lo wi ta̱ a̱ kuciya̱ una̱singai, wi ta̱ kpamu o kuyongo ba̱ri tsu na wila̱ u Ka̱shile u ci neke. Amma vuma vu na u ci inda Wila̱ ka̱ta̱ u kpa̱ɗa̱ kucinukpa, u ci yongo ta̱ ba̱ri.

²⁶Vuza na baci we enei adanshi wi ta̱ o kutono Ka̱shile, amma vuma vu nan lo u fuɗa u goso kelentsu ka̱ ni ba, wi ta̱ a̱ kuya̱nsa̱ ka̱ci ka̱ ni, kutoni ku ni kpamu ko okpo ta̱ gbani. ²⁷Uye u mayun n u derere u na o kutono Ka̱shile Esheku a̱ tsu u ɗaɗa tsu la̱na̱ mkpaꞋan n agapa. Ka̱ta̱ kpamu tso okpo n a̱shinda̱ n ili ya aduniyan ba.

Inda uma derere

¹Uma a̱ va̱, Vuzagbayin Yesu Kishi vuma vu gbayin ɗa. Ka̱ta̱ i cikpa vuza yoku u laꞋa vuza yoku ba, adama a na i neke ta̱ a̱ɗu a̱ ɗa̱ u Kishi. ²Agisana, vuza u ta̱wa̱ baci a̱ ubuta̱ u koɓolo u ɗa̱, nu ntogu n singai nu nkawani mi ikebe ma azanariya u uꞋuki. Ɗa vuma vi yoku vu unambi u uwai a̱ ubuta̱ u koɓolo, u ukai akashi nu ntogu n na mo oꞋoi ɗe.³Ɗa i bonokoi a̱shi a̱ ɗa̱ a̱ ubuta̱ u vuza na u ukai a̱kumbula̱, ɗa i danai ni, “Ili yi ida̱shi i ɗa na.” Ɗa i danai vuza vu unambi, “Shamgba na ɗe,” ko “Da̱sa̱ngu a iɗika a uɓon wa̱ a̱civa̱ e ene a̱ va̱.” ⁴I yaꞋan baci nannai, yi ta̱ e kupece uma, yi ta̱ kpamu a kuyaꞋan uteku u na eyevafada a na i n kusheshe ku kavama a ci yaꞋan.

⁵Uma a̱ va̱, kasai atsuvu a̱ ɗa̱ mayin, Ka̱shile ka zagba ta̱ aza a unambi a aduniyan o okpo aza a̱ uciyi a̱ ubuta̱ u kuneke wa̱ a̱ɗu. A zagba le ta̱ adama a na o okpo aza a na a̱ kuciya̱ tsugono tsu na a yaꞋin uzuwakpani u kuneke aza a na a cigai ni. ⁶N nannai dem, ɗa yi a kushika aza a unambi. Amma aza a̱ uciyi ele ɗa aza a na a tsu takacika ɗa̱, ka̱ta̱ o rono ɗa̱ a kubana a̱ ubuta̱ wa afada ba? ⁷Ele ɗa kpamu a tsu dansa ili i kavama adama a kula ku singai ku Yesu, kula ku na i ci yongo n ku ɗa feu ba?

⁸Yi ta̱ a kuyaꞋan ili i na i gaꞋin, i tono baci wila̱ u na wu uta̱i o tsugono u na wi punu a Katagarda ka Ciɗa tsu na u danai, “Ciga vuza nu vu na vi ida̱shi ɗevu n avu uteku u na vi cigai ka̱ci ka̱ nu.” ⁹I ci yaꞋanka baci uma uteku u na i ce ene le pulai, i yaꞋan ta̱ unushi, adama a na wila̱ u dana a yaꞋan nannai ba. ¹⁰Vuza u tono baci Wila̱ u Ka̱shile dem, ɗa u nusai u te, u yaꞋan ta̱ unushi u na u koɗoi u ɗa ra̱ka̱. ¹¹Ka̱shile ka na ka danai, “Ka̱ta̱ vi yaꞋan tsugbani ba.” A̱yi ɗa feu u danai, “Ka̱ta̱ vu una vuza ba.” Ko an vi yaꞋin tsugbani ba, amma vu una baci vuza, vo okpo ta̱ kokoɗi ka̱ Wila̱ ra̱ka̱.

¹²Adama a nannai, a̱ ka̱tsuma̱ ka kadanshi ka̱ nu n ili i na vi a kuyaꞋan, yaꞋan adanshi i ta̱ a kuyaꞋanka wu afada gogo va lo n wila̱ u na wi a kuzuwa wu vi yongo ba̱ri. ¹³Vu tsu pana baci asuvayali a uma o yoku ba, a kupana asuvayali a̱ nu ba. Amma vu tsu pana baci asuvayali, ayin a nan lo a ɗaɗa asuvayali a̱ Ka̱shile a kulyaꞋa utsura wa afada a na i ishi a kuyaꞋanka wu.

Kuneke ku ka̱ɗu babu ulinga gbani ɗa

¹⁴Uma a̱ va̱, te ɗai ariba i dana baci yi ta̱ n uneki u ka̱ɗu, amma yi n ulinga u na i yaꞋin ka̱ta̱ i yotsongu a̱ ubuta̱ wi ili i na i yaꞋin ba? Uneki u ka̱ɗu wi baci nannai wa kisa vuza ba. ¹⁵Ve ene baci vuza na wi a kuciga motogu ko ilikulyaꞋa, ¹⁶ɗa vu danai, “Kya̱sa̱ wu,” ɗa kpamu vu danai, “Ka̱shile ka zuwaka wu una̱singai, vu da̱sa̱ngu m ma̱ta̱na̱ ka̱ta̱ vi lyaꞋa mayin,” amma vi neke vuza nan lo ilikulyaꞋa ba, ko motogu ba. Te ɗai ugaꞋin u kadanshi u nan lo wi? ¹⁷Ta baci vi nannai, vi nekei ka̱ɗu koci, amma vi yaꞋan ulinga ba, uneki u ka̱ɗu u nan lo wi ta̱ ukpa̱.

¹⁸Vuza yoku we ece mu baci, “Vi ta̱ n uneki u ka̱ɗu?” Mi ta̱ a̱ kushuku yi, “Mpa mi ta̱ n ulinga u na n yaꞋin.” Ka̱ta̱ n dana yi feu, “Nini ɗai vo kuyotsongu mu uneki u ka̱ɗu u nu, amma vi yaꞋan ili i singai ba? N kuyotsongu wu ta̱ uneki u ka̱ɗu u va̱ n ili i singai i na n yaꞋin.”

¹⁹Vu ushuku ta̱ an Ka̱shile ke te kaꞋa. U gaꞋan ta̱. Wunla̱i u gbani-gbani feu wu ushuku ta̱ nannai. U tsu zuwa le ta̱ kpamu kujeꞋeke ikyamba n wovon.

²⁰Avu kalau ka vuma, vi ciga ta̱ vuza yoku u yotsongu wu uneki u ka̱ɗu babu ulinga u singai, vi yeve a na nannai ili i gbani i ɗa ba? ²¹Panai ili i nam pa, akaya a̱ tsu Ibrahim u saꞋa ta̱ Ka̱shile ka̱ɗu ana u zuwai maku mo kolobo ma̱ ni Ishaku a katalikalyuka adama a na u yaꞋan alyuka n a̱yi. ²²Gogo na ye ene ta̱ uteku u na uneki u ka̱ɗu wi Ibrahim wi koɓolo n ili i na u yaꞋin. U yotsongu ta̱ uneki u ka̱ɗu u ni mayun ɗa, a̱ ubuta̱ wi ili i na u yaꞋin. ²³Ili i na Katagarda ka Ciɗa ka̱ ciya̱i i ɗa na, ana ka danai, “Ibrahim wi ta̱ n uneki u ka̱ɗu n Ka̱shile, ɗa wo okpoi vuza vu usuɓi a̱ ubuta̱ u Ka̱shile.” Ta Ibrahim wo okpoi ka̱ja̱Ꞌa̱ ka̱ Ka̱shile nannai. ²⁴Gogo na ye ene ta̱ tso okpo ta̱ uma a ciɗa a̱ ubuta̱ u Ka̱shile n ubuta̱ wi ili i na ci a kuyaꞋan, amma uneki u ka̱ɗu u ɗa koci ba.

²⁵Agisana, Rahapu† kashakanlai kaꞋa. Amma u saꞋa ta̱ Ka̱shile ka̱ɗu ana u foɓoi aza a kasaka ki iɗika, ana wu uta̱ka̱i le ɗa o tonoi a uye u yoku o kubono a kpaꞋa. ²⁶Ikyamba yi baci babu ayinviki, ikyamba i nan lo yi ta̱ ukpa̱, ta kpamu nannai uneki u ka̱ɗu u na wi babu ulinga wi ta̱ ukpa̱.

Koli ke kelentsu

¹Uma a̱ va̱, uma n a̱bunda̱i ɗa o kokpo nlum ba. I yeve ta̱ Ka̱shile ki ta̱ a kuyaꞋanka tsu afada ka̱u a na a laꞋi uma a na a buwai, adama a na a̱tsu nlum n ɗa.

²Tsu tsu nusa ta̱ ka̱u, amma aza a na a tsu fuɗa e reme elentsu e le i ta̱ kpamu a kufuɗa a̱ ka̱na̱ ka̱ci ke le a̱ ubuta̱ dem. ³Tsu tsu zuwa baci iryangama a̱ una̱ wo odoku adama a na a panaka tsu, ka̱ta̱ a yaꞋan ili i na ci a kuciga a yaꞋan.⁴Ta kpamu ki nannai a̱ ubuta̱ u antsu. I ta̱ n ugbonguri, wunla̱i u ci ɗika le ta̱. Ko n nannai vuza vu kpantsu u tsu uka ta̱ n katamatsu, ka̱ta̱ u pinda̱ra̱ kpantsu ku ni a kubana a̱ ubuta̱ u na wi a kuciga ku ɗa ku bana. ⁵Ta kpamu nannai kelentsu ili i kenu i ɗa a ikyamba i vuza, ki ta̱ a kufuɗa ka yaꞋan ili kakau i gbagbaꞋin. Kakamba ka gbayin ki ta̱ a kufuɗa kukula̱ adama a̱ ka̱ga̱ra̱wa̱shi ke te kenu. ⁶Kelentsu feu ki ta̱ an melentsu ma akina, ka ki ta̱ tukpa n ili i wuya. Ki ta̱ a̱ kula̱nga̱sa̱ wuma u nu ra̱ka̱, adama a na akina a nan lo a̱ uta̱ ta̱ a kpaꞋa ka akina, a ɗa i o kusongu ili dem.

⁷Uma a tsu zuwa ta̱ icuꞋu yi nnama kakau a panaka le, ali nu nnu, n oko, n adan. ⁸Amma vuza u kufuɗa wa zuwa kelentsu ka̱ ni ka panaka yi ba. Kelentsu ili i kavama i ɗa i na i canai kufoɓongu ba. Ka ki ta̱ n tsukono ka̱u.

⁹N elentsu a̱ tsu a ɗa tsa kucikpa Vuzagbayin n Esheku a̱ tsu. N kelentsu ke te ka nan lo kpamu ka ɗa ci yaꞋanka uma una̱ u wuya, a na Ka̱shile ka yaꞋin uteku ci ni kpamu. ¹⁰Kucikpa n una̱ u wuya i ta̱ kuta̱ a̱ ubuta̱ u te. Uma a̱ va̱, u yotso ili ya i yaꞋan nannai ba. ¹¹Ka̱shi ka̱ mini ka̱ tsu uwa̱ mini ma singai koɓolo m mo okono ba. ¹²Vi ta̱ a kutaꞋa umaci u ma̱biri a maɗanga ma̱ ma̱ɗimbi?† Ko umaci u ma̱ɗimbi a maɗanga me mepeshe? A̱Ꞌa̱! Ve kukenuku mini ma singai m mini mo okono a̱ ubuta̱ u te ba.

IcuꞋu yu ugboji i re

¹³A̱ ka̱tsuma̱ ka̱ ɗa̱ vuza wi ta̱ punu vuza na wi n ugboji n kuyeve ki ili i Ka̱shile? Uma a na i nannai i ta̱ o kuyotsongu uma a̱ ubuta̱ wi ida̱shi i ma̱riki n kuyaꞋanka vuza ili i na yi derere, n nannai dem u ci yaꞋan n a̱ra̱ɗi ba. ¹⁴Amma yi baci n tsurala n kusheshe ku ka̱ci ka̱ ɗa̱ koci adama a ili i vuza ɗa̱, ka̱ta̱ i dana a na yi n ugboji ba. Ka̱ta̱ i yaꞋan a̱ra̱ɗi ko aꞋuwa adama a ukuna u nan lo ba. ¹⁵Tsurala adama a ili i vuza ɗa̱ ta ɗe tsu uta̱i u Ka̱shile ba, ucigi u ka̱ci ka̱ ɗa̱ kpamu wu uta̱ a̱ ubuta̱ u Ka̱shile ba. Ili i nan lo ili ya aduniyan i ɗa, ili i Ka̱shile i ɗa ba. Kalijani† kaꞋa kpamu ka̱ tsu tuka̱ n i ɗa. ¹⁶Ubuta̱ u na ili i nam pa yi dem yi ta̱ a kucina punu vishili n ili i wuya kakau babu mapanakpanai.

¹⁷Amma ugboji u na wu uta̱i gaɗi vu Ka̱shile u ɗa wi ta̱ ciɗa. Wi ta̱ kpamu a kuciga ida̱shi i singai m ma̱ta̱na̱. U ɗa wi ta̱ m ma̱riki, ayin dem u ɗa wi ta̱ n kusheshe ku singai a̱ ubuta̱ wo otoku. U ɗa wi ta̱ kpamu tukpa n asuvayali n kuyaꞋan ki ili i singai. U ci yotsongu ucigi u ni a̱ ubuta̱ kakau ba. U ci ɗika ta̱ kpamu ili i na yi i mayun, mayun. ¹⁸Aza a na i kpamu a kutuka̱ m ma̱ta̱na̱ i ta̱ a̱ kuca̱Ꞌa̱ icuꞋu i ma̱ta̱na̱, ka̱ta̱ a kyaꞋa ili i singai.

Cija̱Ꞌa̱ n aduniyan

¹Yi ɗa̱i i zuwai ɗa yi o kuyongo a̱ vishili n kanananai uteku u ɗa̱ a̱ ubuta̱ wi ida̱shi i ɗa̱? Ili i na i tsu zuwa ɗa̱ nannai i ɗaɗa kusheshe ku kavama ku na ki o kuvon punu a̱ a̱ɗu a̱ ɗa̱. ²I ci ciga ta̱ ili, i ciya̱ i ɗa ba, ka̱ta̱ i gita̱ kusheshi ku na i ku unanai. Yi ta̱ a maꞋiwanai adama a na aza o yoku i ta̱ n ili i na i kpa̱ɗa̱i kuciya̱, ya̱ kuciya̱ka̱ ka̱ci ka̱ ɗa̱ ili ya ba, ka̱ta̱ i ka̱na̱ vishili n kukpa̱ɗa̱ mapanakpanai adama a na yi isa ili ye ekiye ya aza a na i n i ɗa. Amma ili i na i zuwai ɗa i kpa̱ɗa̱i kuciya̱ ili i na i cigai va i ɗaɗa adama a na i folono Ka̱shile ili ya ba. ³Ko feu i folono i ci ciya̱ ba, adama a na a̱ɗu a̱ ɗa̱ a gaꞋan ba, i ci ciga ta̱ ili i na i kuneke ɗa̱ uyoꞋo koci.

⁴A̱ɗa̱ uma a na i kpa̱ɗa̱i kutono Ka̱shile, i yeve a na i ciga baci ukuna u kawasasa u nam pa, an yi o kokpo irala i Ka̱shile ba? ⁵I neke a̱ɗu a̱ ɗa̱ a̱ ubuta̱ wa akaka a Katagarda ka Ciɗa ba, ana u danai Ayinviki a̱ ni i ta̱ asuvu a̱ ɗa̱, a ɗa kpamu i ta̱ a kuꞋiwan ili i nan lo n utsura ka̱u. ⁶U yotsongu tsu ta̱ ugaꞋin u ni ka̱u. Indana ili i na Katagarda ka Ciɗa ka danai,

“Ka̱shile ki ta̱ a kuꞋiwan aza a ugbawansuvu,

amma u tsu yotsongu ta̱ ugaꞋin u ni wa aza a na o goyoi ka̱ci ke le.”

⁷Adama a nannai, ka̱sa̱kpa̱i Ka̱shile ko tono n a̱ɗa̱, lokoi Kalijani, wi ta̱ a kusuma u ka̱sa̱kpa̱ ɗa̱. ⁸Yawai ɗevu n Ka̱shile ayin tutu, wi ta̱ a kuyawa ɗevu n a̱ɗa̱. SaꞋi ekiye a̱ ɗa̱ adama a na a̱ɗa̱ aza a̱ unushi a ɗa, za̱Ꞌi kpamu a̱ɗu a̱ ɗa̱ adama a na a̱ɗa̱ aza a kapalaka̱shi a ɗa. ⁹Shika̱i n kujilya adama a̱ unushi u na i yaꞋin, na̱mgba̱i a̱tsuma̱ fon i ka̱sa̱kpa̱ izoshi yaꞋan una̱mgbuka̱tsuma̱ u loko ma̱za̱nga̱ ma̱ ɗa̱. ¹⁰Goyoi ka̱ci ka̱ ɗa̱ a̱ ubuta̱ u Ka̱shile, wi ta̱ a̱ kuɗengusa̱ ɗa̱.

¹¹Uma a̱ va̱, ka̱ta̱ i dansakpanai n kagbani-gbani ba. I dansakpanai baci uteku u na toku vu ɗa̱ vi yaꞋin kagbani-gbani, ɗa kpamu yi a kuyaꞋankpanai afada, yi ta̱ a kushika Wila̱ u Ka̱shile. Amma eyevafada a ɗa yi ba, vuza na u kusheshe Wila̱ u Ka̱shile u na wi derere ko u na wi u gbani-gbani, ulinga u ɗa̱ u ɗaɗa i tono u ɗa. ¹²Ka̱shile kaꞋa ka yaꞋin Wila̱ wa, a̱yi ɗa endeꞋen kpamu vuza na u kuyaꞋanka tsu afada derere. A̱yi ɗa kpamu wi n utsura u na u kisa uma ko wu una. Yayi u nekei ɗa̱ utsura u na i yaꞋanka vuza ɗa̱ afada?

Ka̱ta̱ vi yaꞋan kadanshi ka mkpaꞋa ba

¹³Panai ili na! I tsu dana ta̱, “Anana ko mkpaꞋa, ci ta̱ a kubana a̱ likuci i yoku ka̱ta̱ tsu da̱sa̱ngu ɗe ali ka̱ya̱ ke te ka̱ta̱ ci yaꞋan tsulaga ka̱ta̱ ci ciya̱ ikebe.” ¹⁴I tsu dana ta̱ nahannai, amma i yeve ili i na i kuciya̱ ɗa̱ mkpaꞋa ba, adama a na wuma u ɗa̱ wi ta̱ an egele a usana. A̱ tsu ta̱wa̱ ta̱ n usana ka̱ta̱ a laza kanna ka yaꞋan baci. ¹⁵Ana ya dana nannai va, kucikpa i dana, “Ka̱shile ku ushuku baci ci n wuma, tsa kuyaꞋan ta̱ ili i nam pa ya n i nan ɗe.” ¹⁶I ci yaꞋan ta̱ a̱ra̱ɗi adama a ukuna u ka̱ci ka̱ ɗa̱, a̱ra̱ɗi ta na ili i kavama i ɗa. ¹⁷Ciɓa a na vuma u yeve baci ili i singai i na i gaꞋin u yaꞋan, ɗa u kpa̱ɗa̱i kuyaꞋan i ɗa, unushi u ɗa.

A ɓarangi aza a̱ uciyi

¹A̱ɗa̱ aza a̱ uciyi, zuwai atsuvu a̱ ɗa̱ mayin. Yi ta̱ a kuluma a̱jivu n i kapatsai n i shika̱i adama a atakaci a na i lo a̱ kuta̱wa̱. ²Uciyi u ɗa̱ agifa a ɗa, kayaꞋan ka lyaꞋa ta̱ ɗe a̱kumbula̱ a̱ ɗa̱. ³Gogo na azanariya a̱ ɗa̱ n azurufa a̱ ɗa̱ a yaꞋan ta̱ matsafu. Ili yu uciyi i na yi a kulapa ma̱ka̱nga̱ n i ɗa, i ɗa i kutakuma ikyamba i ɗa̱ tsa akina. Uciyi u ɗa̱ u na i ɓolongi u ɗa u kushamgba, ka̱ta̱ u yaꞋan tsurala n a̱ɗa̱ a kanna ka afada, ko n nannai dem ɗa yi atakaci o kuɓolongu ili ya aduniyan a ayin o ukocishi a nam pa. ⁴Gogo na panai ma̱shi ma aza a zamalinga aza a na i doroi, ɗa i iwain kutsupa le ikebe i na a cimbakai ɗa̱ ashina. I iwain kutsupa le gogo na ali ikebe ya feu a kuyaꞋan yoroli n utsura n tsurala n a̱ɗa̱. Ka̱shile MalaꞋimili ma pana ta̱ ma̱shi m malapa mu una̱ ma aza a zamalinga a nam pa.⁵I yongo ta̱ a aduniyan a kuyaꞋan aꞋiluwa, amma ko nannai i pana ta̱ uyoꞋo wi ili dem i na ka̱ɗu ke sheshei. I ɓa̱na̱ ta̱ ka̱ci ka̱ ɗa̱ mayin, ali ɗa i yaꞋin ikyamba an ka̱giri ka̱ ka̱ɗiva̱ ka na ka kutsai. Gogo na i foɓongu ta̱ ka̱ci ka̱ ɗa̱ adama a kanna ka na a kuna ɗa̱. ⁶I yaꞋanka ta̱ uma a singai afada ɗa i nekei le unushi, ɗa yu unai le, ele feu e sheshe a̱ shilika̱ n a̱ɗa̱ a̱ ɓa̱nka̱ ka̱ci ke le ba.

Lulukpa̱i a ayin a atakaci

⁷Uma a̱ va̱, remei a̱ɗu adama a ayin a atakaci ali sai ayin a na Vuzagbayin u kubono. Indanai biꞋi acimbi, a tsu zuwa ta̱ a̱ɗu ka̱ta̱ a vana ili i kashina i le. A̱ ciya̱ baci mini ma̱ vica̱Ꞌa̱ a̱ ci keɗe ta̱ a̱pa̱Ꞌa̱ kpamu, ali a yaꞋan vikyaꞋa. ⁸Tsu nan lo tsu ɗa kpamu i kureme a̱ɗu. Shamgbai n utsura adama a na megeshe ma buwa ba, Vuzagbayin wi ta̱ lo a̱ kuta̱wa̱. ⁹Aza a̱ va̱, ka̱ta̱ i yaꞋankpanai mololo ba. I yaꞋan baci mololo n Ka̱shile wi ta̱ a kuyaꞋanka ɗa̱ afada. Indanai mayin Keyevikafada ka gbayin ki ta̱ lo a̱ kuta̱wa̱, a̱yi ɗa lo kashani a̱ utsutsu.

¹⁰Aza a̱ va̱, indanai biꞋi eneki, aza a na a yaꞋin kadanshi ka̱ Ka̱shile n utsura u kula ku ni, ele ɗa agisana a uteku u na vuza u kululukpa̱ n atakaci a. ¹¹Ci neke ta̱ tsugbayin ka̱u a̱ ubuta̱ wa aza a na e remei a̱ɗu a ayin a atakaci. Ayuba wi ta̱ a̱ ka̱tsuma̱ ka agisana adama a na u reme ta̱ ka̱ɗu n ili i na a yaꞋankai ni. A̱ ubuta̱ u ni ci cinai uteku u na Ka̱shile ke sheshei, ɗa o kukotsoso ɗa u yaꞋankai ni ili i singai. Adama a na Ka̱shile ki ta̱ n asuvayali n kasingai.

¹²Aza a̱ va̱, u laꞋa ta̱ n kugaꞋan vuma u kpa̱ɗa̱ kukucina n gaɗi ko n iɗika ko n ili i yoku kau. Ili i na va kuyaꞋan i ɗaɗa dana “E” ko “A̱Ꞌa̱” koci, ta lo va nusa ka̱ta̱ a yaꞋanka wu afada adama a akucina a na vi yaꞋin.

Avasa a uneki u ka̱ɗu

¹³Vuza yoku wi ta̱ punu a̱ ka̱tsuma̱ ka̱ ɗa̱ n kadama? Vuma vu nan lo u gbagbala kuyaꞋan avasa. Vuza yoku wi ta̱ lo m ma̱za̱nga̱? Vuma vu nan lo u yaꞋan ishipa i kucikpa Ka̱shile. ¹⁴Vuza yoku wi ta̱ lo a̱ ka̱tsuma̱ ka̱ ɗa̱ nu mɓa̱la̱? Vuma vu nan lo u ɗeke nkoshi m gba̱ra̱-gba̱ra̱† n Kutoni a yaꞋanka yi avasa, ka̱ta̱ a sukumaka yi m maniꞋin, a̱ ka̱tsuma̱ ka kula ka Vuzagbayin Yesu. ¹⁵Nkoshi m gba̱ra̱-gba̱ra̱ a yaꞋan kavasa ku uneki u ka̱ɗu, kavasa ka nan lo ka ki ta̱ o kupotsokpo yi. Ka̱shile ki ta̱ a̱ kuɗengusa̱ yi. Vuza vu mɓa̱la̱ va u yaꞋan baci kpamu unushi, Ka̱shile ki ta̱ kpamu a kucinukpaka yi n u ɗa. ¹⁶Adama a nannai, shika̱i unushi u ɗa̱ a̱ ubuta̱ wi itoku a̱ ɗa̱, ka̱ta̱ i yaꞋan kavasa adama a na Ka̱shile ko potsokpo ɗa̱. Kavasa ka vuma vu na Ka̱shile ka tsu pana uyoꞋo u ni ka ki ta̱ n utsura ka̱u, ka tsu matsa ta̱ kpamu ili i singai.

¹⁷Iliya† vuma vu ɗa tsu tsu. U yaꞋan ta̱ kavasa n utsura ɗa u danai ka̱ta̱ Ka̱shile ko yoꞋo ba, ɗa ta na Ka̱shile ka panakai ni u kpa̱ɗa̱i kuyoꞋo ali a̱ya̱ a tatsu n kagimi. ¹⁸Ɗa u doku u yaꞋin kavasa, ɗa Ka̱shile ko yoꞋi, ɗa iɗika i matsai ilikulyaꞋa.

¹⁹Aza a̱ va̱, vuma vi yoku a̱ ka̱tsuma̱ ka̱ ɗa̱ u ka̱sa̱kpa̱ baci Kutoni, vuza yoku u bonoko yi a uye. ²⁰Ciɓa mayin, vuza na baci u bonokoi vuza vu unushi a kubana a̱ ubuta̱ u Kutoni, vuza nam pa wi ta̱ a kisa yi a̱ ubuta̱ wu ukpa̱. Adama a nannai Ka̱shile ki ta̱ a kucinukpa n unushi n a̱bunda̱i.