Aza a Ibrahim

Akaka a kubana wa

Aza a Ibrahim

Ukuna u katagarda ka nam pa

Tsu fuɗa ci yeve mayin vuza na u ɗanai akaka a kubana wa aza a Ibrahim ba. U gaꞋan ba Bulusu ɗa. Ci yeve ta̱ a ɗa i ta̱ punu a̱ ka̱tsuma̱ ka Katagarda ka Ciɗa adama a kuyotsongusu ku na ki punu. Nannai kpamu, aza e kelime a na o yongoi n ayin a ɗe a zuwa ta̱ a ɗa punu a ka̱tsuma̱ ka Katagarda ka Ciɗa. Kaɗani ka dansai hawun tsu na uma a Ayahuda a ci cikpa ali ɗa wo okpoi agisana a kucikpa ku mayun ku na ki a̱ ubuta̱ u Kishi.

Kaɗani ka danai aza e kukece tsu na Yesu wi n ugaꞋin. Yesu u laꞋa ta̱ alingata a̱ Ka̱shile a na a buwai dem n tsugbayin. U laꞋa ta̱ eneki dem, u laꞋa ta̱ kpamu Musa. A̱yi ɗa Mogono ma Gbayin ma̱ A̱Ꞌisa̱ ma singai adama a na u saꞋwa kuyaꞋan unushi ba. U nekei tsu wuma u ni tsa alyuka a singai kute adama a unushi u tsu, ɗa ta na a ɗikai ayin a na a buwai ra̱ka̱. Ana u kuwa̱i ɗa u ɗenga̱i n wuma ɗa ta na u ɓa̱yuwa̱i uye adama a na yaba dem u ta̱wa̱ u Ka̱shile.

Adama a na uma e yeve ukuna wa alyuka a̱ ubuta̱ u Kutoni anana, akaka a kubana wa Aza a i Ibrahim i ta̱ n kuyotsongusu ku utsura adama a ukuna u nan lo. Yesu u bonoko ta̱ alyuka dem o okpoi ukuna u gbani. Gogo na uneki u ka̱ɗu wa̱ ni u ɗaɗa u ɓa̱yuwa̱i uye adama a na uma a̱ ta̱wa̱ ɗevu n Ka̱shile.

Ili i na yi punu udariki a katagarda ka nam pa

1. Tsugbayin tsu maku ma̱ Ka̱shile (1:1-4)

2. Yesu u laꞋa ta̱ alingata n tsugbayin (1:5—2:18)

3. Yesu u laꞋa ta̱ Musa n Joshuwa n tsugbayin (3:1—4:13)

4. Yesu ɗa Mogono ma anan ganu (4:14—7:28)

5. Yesu u tuka̱i n uzuwakpani u singai (8:1—9:22)

6. Alyuka e Yesu kute ku ɗa ali ta na a kubana uteku (9:23—10:31)

7. Uma a̱ Ka̱shile o yoku a na i n uneki u ka̱ɗu u gbayin (11:1-40)

8. Tonoi agisana e Yesu (12:1—13:19)

9. Kavasa ku ukocishi n ikya̱shi (13:20-25)

Yesu Kirisiti Kishi Maku ma̱ Ka̱shile maꞋa

¹N ayin a ɗe, Ka̱shile ka yaꞋansa ta̱ kadanshi n ikaya i tsu a̱ ubuta̱ u eneki a uye kakau n a̱bunda̱i. ²Amma gogo na a ayin a ukocishi, Ka̱shile ka yaꞋanka tsu ta̱ ɗe kadanshi a̱ ubuta̱ u Maku ma̱ ni. Ka̱shile ka yaꞋin aduniyan n ili i na yi punu dem a̱ ubuta̱ u ni. A̱yi ɗa Ka̱shile ka zagbai wo okpo vuza vi ili ra̱ka̱. ³Maku ma tsa akana ta̱ adama a tsugbayin tsu Ka̱shile, u yotso ta̱ ta na feu Ka̱shile derere. U tsu zuwa ta̱ ili i lyaꞋa kelime n utsura wa akaka a̱ ni. Ana Maku ma mo bonokoi uma ciɗa a̱ ubuta̱ wu unushi u le, ɗa u da̱sa̱ngi e kukiye ku usingai ku Ka̱shile, Uba̱nga̱ri.

Kishi ka laꞋa ta̱ alingata

⁴Maku ma̱ ciya̱i tsugbayin ka̱u u laꞋi alingata, ɗa kpamu Ka̱shile ke nekei ni kula ku na ku laꞋi ula e le.

⁵Ili i na i zuwai i ɗaɗa Ka̱shile ka saꞋwa kudana alingata ili i na u danai Maku ma̱ ni ba,

“Avu ɗa Maku ma̱ va̱.

Anana mo okpo ta̱ Eshevu.”1:5 Ishp. 2:7.

Ɗa u danai kpamu,

“Mi ta̱ o kokpo Esheku a̱ ni,

ka̱ta̱ a̱yi wo okpo Maku ma̱ va̱.”1:5 2 Sam. 7:14.

⁶Ɗa ayin a na Ka̱shile ka cigai kusuku magaji ma̱ ni a aduniyan, ɗa u danai,

“Alingata a̱ Ka̱shile ra̱ka̱ sai a yaꞋanka yi tsugbashi.”1:6 K.Wil. 32:43.

⁷Ili i na Ka̱shile ka danai adama a alingata i ɗa na,

“N zuwai alingata a̱ va̱ o okpoi tsu wunla̱i.

N zuwai agbashi a̱ va̱ o okpoi tsu nlentsu ma akina.”1:7 Ishp. 104:4.

⁸Amma Ka̱shile ka dansai ili i nam pa adama a Maku ma̱ ni,

“Avu ɗa Ka̱shile, tsugono tsu nu ci ta̱ a kulyaꞋa kelime babu uteku.

Vi ta̱ a kulyaꞋa tsugono n afada a na a gaꞋin derere.

⁹Vi ci ciga ta̱ ili i na yi derere,

ka̱ta̱ vi iwan i na i kpa̱ɗa̱i kugaꞋan.

I ɗaɗa i zuwai Ka̱shile, Ka̱shile ka̱ nu,

u zagbai nu ɗa u nekei nu tsugbayin tsu na ci nekei nu ma̱za̱nga̱.

Tsugbayin tsu nam pa tsu laꞋa ta̱ tsu na u nekei aza a na a buwai.”1:9 Ishp. 45:6-7.

¹⁰U danai kpamu,

“Vuzagbayin, n ayin a̱ ugiti vi yaꞋin aduniyan,

ɗa ekiye a̱ nu a yaꞋin gaɗi.

¹¹Ayin i ta̱ lo a̱ kuta̱wa̱ babu vuza na u kudoku we kene le,

amma a̱ɗa̱ yi ta̱ lo.

I ta̱ o koꞋo ra̱ka̱ tsu na aminya o tsu kotso.

¹²Yi ta̱ a̱ kuka̱ta̱la̱ le tsu mayaga ma̱ kuku.

I ta̱ a kusabaꞋa tsa aminya a̱ kuku.

Amma a̱ɗa̱ yi ta̱ tsu na yi ayin tutu,

wuma u ɗa̱ kpamu wi o kukotso ba.”1:12 Ishp. 102:25-27.

¹³Ka̱shile ka saꞋwa kudana alingata a̱ ni ili i na u danai Maku ma̱ ni ba,

“Da̱sa̱ngu na e kukiye ku usingai ku va̱

sai ayin a na n zuwai irala i nu

yo okpo ɗaka vi idasakpatsu i nu.”1:13 Ishp. 110:1.

¹⁴Alingata† ra̱ka̱ a na a ci yaꞋanka Ka̱shile tsugbashi ayinviki a ɗa i, ɗa u suki le a̱ ɓa̱nka̱ aza a na a̱ kuciya̱ wishi.†

Wishi u tsu ili i mereve i ɗa

¹Tsu bonoko aci a̱ tsu a̱ ubuta̱ u te adama a na tsu tono ili i mayun i na o yotsongushi tsu. Ci yaꞋan baci nannai, ci a̱ kupuwa̱nka̱ ba. ²O yotsongu ta̱ a na akaka a i mayun, a na Ka̱shile ke nekei alingata e neke ikaya i tsu. Vuza na baci u iwain kupana ɗa kpamu u iwain kutono a ɗa, wi ta̱ a̱ kuciya̱ atakaci a na untsai ili i na u yaꞋin. ³Tsu bonoko baci aci a̱ tsu mayin a̱ ubuta̱ u wishi u gbayin u nam pa ba, yi ɗa̱i i tsu zuwa tsu ci sheshe ci ta̱ a kufuɗa kuwere? Vuzagbayin a̱ ka̱ci ka̱ ni a̱yi ɗa u gita̱i kusala ukuna u wishi u nam pa. Aza a na a panakai ni o yotsongi tsu a na ili ya yi mayun. ⁴Ka̱shile a̱ ka̱ci ka̱ ni u yotsongi a na akaka a̱ ni i mayun, ana u yaꞋin ili i mereve kakau dem. U nekei kpamu Ayinviki a̱ ni wa aza a na u zagbai.

Uye u kubana a̱ ubuta̱ u wishi

⁵Ka̱shile ka zagba alingata a lyaꞋa tsugono tsa aduniyan a savu a na i lo a̱ kuta̱wa̱ va ba, ɗaɗa ta na ili i na ci lo a kudansa va. ⁶Tsu na a ɗanai a̱ ubuta̱ u yoku a Katagarda ka Ciɗa,

“Yi ɗa̱i i tsu zuwa wu vi keɓece n uma?

Yi ɗa̱i i burai nu m maku ma vuma?

⁷Megeshe kenu ɗa vu bonokoi ni

adama a na utsura u ni u doku u yawa wa alingata ba,

ɗa va alai ni oroliko n tsugbayin n kucikpa.

⁸Vu zuwai ni u lyaꞋa tsugono ci ili ra̱ka̱.”2:8 Ishp. 8:4-6.

Ana Ka̱shile ka zuwai ni mogono mi ili dem, babu ili i na i buwai i na u kpa̱ɗa̱i kulyaꞋaka i ɗa tsugono. Amma ka̱ta̱ ce ene i ɗa ra̱ka̱ i yaꞋin ba. ⁹Ili i na ce enei i ɗaɗa, Yesu vuza na wi n utsura u na u yawai wa alingata ba, a̱ ka̱tsuma̱ ke megeshe kenu. Gogo na a ala yi ta̱ oroliko n tsugbayin n kucikpa adama a na u soꞋo ta̱ atakaci a̱ ukpa̱ adama a ugaꞋin u tsu. E, adama a kasingai ka̱ Ka̱shile kaꞋa, Yesu u kuwa̱i adama a yaba dem a aduniyan ra̱ka̱.

¹⁰Ka̱shile kaꞋa vuza na u yaꞋin ili dem, ɗa ili ya ra̱ka̱ yi n wuma adama a na i neke yi tsugbayin. U ciga ta̱ muku n a̱bunda̱i n uwa a̱ ubuta̱ u tsugbayin u ni. Adama a nan lo a ɗa u zuwai Yesu u soꞋo atakaci, ɗa ta na nannai wo okpoi vuza na wu untsai o tono a kubana a̱ ubuta̱ u wishi. ¹¹Adama a nannai, Yesu n aza a na u bonokoi ciɗa, Esheku e le o okpo ta̱ e te. I ɗaɗa i zuwai ɗa u tsu pana wono u kuɗeke le amgbu a̱ ni ba. ¹²U dana ta̱ Ka̱shile,

“Mi ta̱ a kudana uma a̱ va̱ ili i na vi yaꞋin.

Mi ta̱ a kucikpa wu a ayin a na baci o ɓolongi

adama a na a yaꞋanka wu tsugbashi.”2:12 Ishp. 22:22.

¹³Ɗa kpamu u danai,

“Mi ta̱ a̱ kushuku n Ka̱shile.”

Ɗaɗa u danai,

“Mi ta̱ na koɓolo m muku n na Ka̱shile ke nekei mu.”2:13 Ish. 8:17-18.

¹⁴Muku n Ka̱shile uma a ɗa a na i n ikyamba koɓolo nu mpasa, adama a nan lo Yesu a̱ ka̱ci ka̱ ni wo okpoi ci le. U yaꞋan ta̱ nannai, adama a̱ ukpa̱ u ni, wi ta̱ a kufuɗa kuna Kalijani vuza na wi n utsura wu ukpa̱. ¹⁵Nannai ɗa wi isai aza a na ishi agbashi a ayin a wuma u le dem adama o wovon wu ukpa̱ u le. ¹⁶A̱tsu ra̱ka̱ ci yeve ta̱ a na Yesu u ta̱wa̱i adama a na u ɓa̱nka̱ ntsukaya mi Ibrahim, amma alingata ba. ¹⁷Adama a nannai Ka̱shile ka zuwai Yesu u yotso uma a̱ ni a ili dem, adama a na wo okpo mogono ma anan ganu† me le, vuza na u tsu yotsongu asuvayali, ɗa kpamu Ka̱shile kushuki n a̱yi. Nannai ɗa, Yesu u kuyaꞋan alyuka a kubana u Ka̱shile adama a na Ka̱shile ka cinukpaka uma unushi u le. ¹⁸A̱yi a̱ ka̱ci ka̱ ni u soꞋo ta̱ atakaci, ɗa Kalijani ka dakakai adama a na u zuwa yi u yaꞋan kawuya. Adama a nannai gogo na wi ta̱ a kufuɗa wa̱ ɓa̱nka̱ aza a na kalijani ki a kudakaka kuzuwa a yaꞋan unushi.

Yesu u laꞋa ta̱ Musa

¹Uma a̱ va̱, Ka̱shile ka zagba ɗa̱ ta̱ yo okpo uma a ciɗa a̱ ni. Sheshei tsu na Yesu wi vuzavusuki vu Ka̱shile koɓolo m mogono ma anan ganu mu uneki u ka̱ɗu u tsu. ²U yaꞋin ili ra̱ka̱ i na Ka̱shile ka danai ni u yaꞋan. Ka̱shile ka zagba yi ta̱ u yaꞋan ulinga u nam pa, tsu na Musa u yaꞋin i na Ka̱shile ka danai ni u yaꞋan a kpaꞋa ku Ka̱shile ra̱ka̱. ³Tsugbayin tsu na Yesu u ci ciya̱ tsu laꞋa ta̱ tsu Musa, uteku u na kamaꞋi ka̱ ci ciya̱ tsugbayin u laꞋa kumaꞋa ka. ⁴Mayun ɗa vuza yoku u tsu maꞋa kpaꞋa dem, amma Ka̱shile kaꞋa kamaꞋi ki ili dem. ⁵Musa kagbashi kaꞋa ka na Ka̱shile ku ushuki n a̱yi m kpaꞋa ku ni dem, ulinga u ni agisana a ɗa a ili i na Ka̱shile ko kuyotsongu uma na kelime. ⁶Amma Kishi Maku ma̱ Ka̱shile maꞋa, a̱yi ɗa kpamu Ka̱shile ku ushuki n a̱yi wi inda kpaꞋa ku ni. A̱tsu ɗa kpaꞋa ku ni, ci lyaꞋa baci kelime n kuneke a̱ɗu babu kuka̱sa̱kpa̱ adama a ili i na ci keɗei a̱pa̱Ꞌa̱.

U gaꞋan ta̱ ci lyaꞋa kelime n kutono Ka̱shile

⁷Ta nannai tsu na Ayinviki a̱ Ka̱shile a danai,

“Vu pana baci ka̱la̱ka̱tsu ka̱ Ka̱shile anana,

⁸ka̱ta̱ vi yaꞋan ugbawansuvu ba,

tsu na ikaya i ɗa̱ i yaꞋin

a ayin a na a̱ ka̱sa̱kpa̱i kutono Ka̱shile,

ana o kondoi Ka̱shile na ɗe a kakamba.”

⁹Ka̱shile ka danai,

“O kondoi mu ka̱u

adama a na e ene ili i na n kuyaꞋan,

ko a na e enei ɗe ili i na n yaꞋin a̱ ka̱tsuma̱ ka̱ a̱ya̱ amangere.

¹⁰Ɗa n yaꞋin wupa n ele, ɗa n danai:

‘A̱ɗu e le ayin tutu a̱ tsu ka̱sa̱kpa̱ mu ta̱.

A iwain kuyaꞋan ili i na n danai le.’

¹¹N yaꞋin wupa ɗa n kucinai,

‘A̱ kuciya̱ kuvuka ku va̱ ba, ko kenu.’ ”3:11 Ishp. 95:7-11.

¹²Uma a̱ va̱, yaꞋin mayin ka̱ta̱ vuza yoku vu ɗa̱ u yaꞋan n ka̱ɗu ka gbani-gbani ka na u iwan kuneke ka̱ɗu ba. Ka̱ɗu ka na ki nannai ka tsu zuwa ɗa̱ ta̱ i iwan Ka̱shile ka wuma.

¹³I nekenei kadanshi ku utsura u ka̱ɗu a kanna dem. I lyaꞋa kelime nannai a na ayin a buwai lo biꞋi e kuɗeke “Anana.” I yaꞋan baci nannai ba, unushi wi ta̱ a̱ kuya̱nsa̱ aza o yoku a̱ ɗa̱ ka̱ta̱ u zuwa le a yaꞋan n ugbawansuvu. ¹⁴Ci baci n uneki wa̱ a̱ɗu ali a kubana a uteku, a kuzuwaka Ka̱shile utsura tsu na ci gita̱i ɗe, ci ta̱ a̱ kuciya̱ ili ra̱ka̱ i na yi i Kishi. ¹⁵Katagarda ka Ciɗa ka danai,

“Vu pana baci ka̱la̱ka̱tsu ka̱ Ka̱shile anana,

ka̱ta̱ vi yaꞋan ugbawansuvu ba,

tsu na ikaya i ɗa̱ i yaꞋin

a ayin a na a̱ ka̱sa̱kpa̱i kutono Ka̱shile.”

¹⁶Anan yayi a panai ka̱la̱ka̱tsu ka̱ Ka̱shile ɗa a̱ kpa̱ɗa̱i kutono yi? Aza a na Musa wu uta̱ka̱i a iɗika i Masar ra̱ka̱. ¹⁷Anan yayi a zuwai Ka̱shile wupa ali a̱ya̱ amangere? Wi ta̱ a wupa n aza a na a yaꞋin unushi, aza a na a̱ kuwa̱i ɗe a kakamba. ¹⁸Anan yayi Ka̱shile ki a kuyaꞋan kadanshi n ele ana u kucinai u danai a̱ kuciya̱ kuvuka ku ni ba, ko kenu? U yaꞋan ta̱ kadanshi n aza a na a̱ kpa̱ɗa̱i kupanaka yi. ¹⁹Tsu ta̱wa̱ ta̱ ci yeve a fuɗa a uwa a kuvuka ku ni ba, adama a na a iwan ta̱ kuneke a̱ɗu.

Ka̱shile ke nekei kuvuka

¹Ka̱shile ka yaꞋankai tsu uzuwakpani ci ta̱ a kufuɗa kuꞋuwa a kuvuka ku ni. Adama a nannai, tsu zuka ka̱ta̱ vuza yoku vu tsu u kpa̱ɗa̱ kufuɗa kuꞋuwa ɗe ba. ²Tsu pana ta̱ akaka a, tsu na aza a Israila a panai va. Amma a iwain kuneke a̱ɗu n ili i na a panai va, ɗa akaka a a̱ kpa̱ɗa̱i kuɓa̱nka̱ le. ³A̱tsu ɗa koci aza a na ci nekei a̱ɗu tsa kufuɗa kuꞋuwa a kuvuka ku ni. Uteku u na Ka̱shile ka danai,

“N yaꞋin wupa ɗa n kucinai,

‘A̱ kuciya̱ kuvuka ku va̱ ba, ko kenu.’ ”4:3 Ishp. 95:11.

U dana ta̱ nannai ko a na kuvuka ku ni ku yaꞋin ɗe ulapuli kafu u yaꞋan aduniyan. ⁴A Katagarda ka Ciɗa u dansa ta̱ ukuna u kanna ke cindere a̱ ka̱tsuma̱ ke kuden ku te: “A kanna ke cindere ɗa Ka̱shile ku uvukai n ulinga u na wi ishi a kuyaꞋan ra̱ka̱.”4:4 Ugi. 2:2.⁵Ci kece ta̱ kpamu a ayin o yoku u danai, “Uma a nam pa a kuꞋuwa a kuvuka ku va̱ ba!”4:5 Ishp. 95:11.

⁶Aza a na a̱ gita̱i kupana Arabali a Singai a a̱ ciya̱ kuvuka ku nan lo ba, adama a na o tono Ka̱shile ba. Amma ali n gogo na mayun ɗa uma o yoku a kuꞋuwa a kuvuka ka. ⁷Ɗa Ka̱shile ka zuwai kanna ko yoku ka na uma a kuꞋuwa a kuvuka ku ni, kanna ka nan lo ka ɗa u ci ɗeke, “Anana.” A Katagarda ka Ciɗa ka na a yaꞋin kadanshi ukuna u ni, Ka̱shile ka danai u Mogono Dawuda,†

“Vu pana baci ka̱la̱ka̱tsu ka̱ Ka̱shile anana,

ka̱ta̱ vi yaꞋan ugbawansuvu ba.”

⁸Iɗika i KanaꞋana† a̱ ubuta̱ u na Joshuwa† u bankai le, u ɗaɗa ubuta̱ u savu u kuvuka u nam pa wa ba. Ishi baci ta nannai, Ka̱shile ki ishi a kuyaꞋan kadanshi kpamu adama a kanna ka kuvuka ko yoku ba. ⁹Na va u dana tsu ta̱ a na ayin a kuvuka a uma a̱ Ka̱shile ka̱ta̱ a yawa ba. Ayin a kuvuka a nam pa i ta̱ an kanna ke cindere ka na Ka̱shile ku uvukai. ¹⁰Vuza na baci de dem u uwai a kuvuka ku Ka̱shile, wi ta̱ a kuvuka n ulinga u ni, tsu na Ka̱shile ku uvukai ana u kotsoi kuyaꞋan aduniyan. ¹¹YaꞋan tsu dakaka tsu na tsa kufuɗa adama a na tsu uwa a̱ ubuta̱ u kuvuka u ni, adama a na ka̱ta̱ vuza te vu tsu u kpa̱ɗa̱ ba, tsu na a yaꞋin adama a uteku u na a iwain kutono Ka̱shile.

¹²Akaka a̱ Ka̱shile i ta̱ ci ili i wuma i na kpamu yi n utsura. A laꞋa ta̱ kotokobi ka na e temgbei una̱ u re dem alyu. Ka tsu ɓatsa ta̱ ka̱u ali u uwa punu asuvu a̱ tsu, u pece ayinviki n kululu ku tsu. U tsu ɓatsa ta̱ kpamu e mere ma atyangi n ungu e etele. U tsu yotsongu ta̱ e keteshe ili i na ci a kuciga kusokongu punu, ɗaɗa, ili i na ci sheshei koɓolo n i na ci cikalai. ¹³Babu vuza na u kusokongu ili punu a aduniyan i na Ka̱shile ka̱ kukpa̱ɗa̱ kene. U ce ene ta̱ ili ra̱ka̱ tsu na yi. A̱yi ɗa Ka̱shile vuza na tsa kudana hawun ili ra̱ka̱ i na ci yaꞋin.

Mogono ma anan ganu ma̱ tsu

¹⁴Ci lyaꞋa kelime n kugbaɓarangu ili i na tsu danai ci neke ta̱ a̱ɗu. Ci yaꞋan nannai adama a na ci ta̱ m mogono ma anan ganu, Yesu Maku ma̱ Ka̱shile, vuza na u bonoi gaɗi a̱ Ka̱shile. ¹⁵U fuɗai u yevei a na ci babu utsura. Kalijani ka dakakai uteku u na u kufuɗa adama a na u zuwa yi u yaꞋan unushi, amma a̱yi Kishi u saꞋwa kuyaꞋan unushi ba, ko kenu. ¹⁶YaꞋan ci yawa ɗevu n Ka̱shile babu wovon. A̱yi ɗa vuza na wi o kuyotsongu uma kasingai. Ci yawa baci ɗevu nannai, wi ta̱ a kuyaꞋanka tsu kasingai ka̱ta̱ u ɓa̱nka̱ tsu ayin a na baci ci a kuciga.

¹Ka̱shile ka tsu zagba ta̱ mogono ma anan ganu dem a̱ ubuta̱ wa aza a̱ ni, ka̱ta̱ u neke le ulinga u kutono n uma e le a̱ ubuta̱ u Ka̱shile adama a na a yaꞋan alyuka n kuneꞋe adama a̱ unushi. ²Mogono ma anan ganu ma feu ma tsu namba ta̱ utsura tsu uma a na a buwai. I ɗaɗa i zuwai ɗa u fuɗai u tonoi sawu n aza a na a yaꞋansai unushi adama a na i n uyevi wi ili i singai ba. ³Adama a na wi ta̱ n unambi wu utsura, mayun ɗa u yaꞋan alyuka adama a̱ unushi u ni koɓolo n unushi u uma.

⁴Babu vuza na u kufuɗa kuzagbaka ka̱ci ka̱ ni tsugbayin tsu na wo okpo mogono ma anan ganu. Vuma u tsu fuɗa ta̱ wo okpo mogono ma anan ganu koci adama a na Ka̱shile kaꞋa ke ɗekei ni, tsu na u ɗekei Haruna.† ⁵Ta feu ki nannai u Kishi. Wo okpoi mogono ma anan ganu, amma u zagba ka̱ci ka̱ ni adama a na u ciya̱ tsugbayin ba. Ka̱shile kaꞋa ka danai ni,

“Avu ɗa Maku ma̱ va̱.

Anana mo okpo ta̱ Eshevu.”5:5 Ishp. 2:7.

⁶A̱ ubuta̱ u yoku, Ka̱shile ka danai,

“Avu ganu ɗa ko wanai,

tsu na Malikisada† wi ishi ganu.”5:6 Ishp. 110:4; Ugi. 14:17-24.

⁷A ayin a na Yesu wi ishi a aduniyan, u folono ta̱ Ka̱shile, vuza na wi n utsura wi isa yi a̱ ubuta̱ wu ukpa̱, u yaꞋan ta̱ nannai n kacaꞋa koɓolo n kujilya. Mayun ɗa u cikpai Ka̱shile, Ka̱shile kpamu ka panakai ni mayin ili i na u danai. ⁸Ko a na Yesu wi Maku ma̱ Ka̱shile, u piꞋisai uteku u na u kupanaka Ka̱shile adama a ili i na u takacikai. ⁹Ana u kotsoi kuyaꞋan ili i na i gaꞋin u yaꞋan, ɗa wo okpoi vuza na u kuzuwa uma a̱ ciya̱ wishi u babu uteku, aza a na a ci yaꞋansa ili i na u tsu dana le a yaꞋan. ¹⁰Ta nannai Ka̱shile ka zuwai Yesu wo okpo mogono ma anan ganu, tsu Malikisada.

Ka̱ta̱ i ka̱sa̱kpa̱ kutono Ka̱shile ba

¹¹Ci ta̱ n ili n a̱bunda̱i i kudansa adama a ukuna u nam pa, amma i cana kudansa e keteshe ba, adama a na i ci ɗika ukuna gogo ba. ¹²Yi isa ta̱ ɗe Yesu m megeshe ma ɗe, u gaꞋan ta̱ i ka̱na̱ kuyotsongusu uma o yoku. Kucikpa i cigai i ciya̱ vuza yoku u yotsongusu ɗa̱ kpamu kupiꞋisa ku iyain ka akaka a̱ Ka̱shile. Yi ta̱ tsu nreɓu n na m buwai a kapa mani ana u gaꞋin i gita̱ ɗe kulyaꞋa tsuwaꞋa. ¹³Vuza na baci ka̱ta̱ a kasai mani ba, u kuyeve ili i derere ko i gbani-gbani ba. ¹⁴Amma uma a̱ gba̱ra̱-gba̱ra̱ a ci lyaꞋa ta̱ tsuwaꞋa tsu na nreɓu mi a kufuɗa kulyaꞋa ba, a piꞋisa ta̱ ɗe tutu kpamu tsu na ili i singai yi kau n ili i gbani-gbani.

^1-3A̱ ugiti i piꞋisai kuyotsongusu kakau ku iyain, ku na ki ku nreɓu. Kuyotsongusu ku nam pa ku ɗaɗa ci shika̱ unushi u tsu u na u tsu tuka̱ n ukpa̱, ka̱ta̱ kpamu ci yaꞋan n uneki u ka̱ɗu n Ka̱shile. Kuyotsongusu ku ɗa kpamu ku kusumbu ka akucina n kuzuwaka ke ekiye. Kuyotsongusu ku ukuna u kuɗenga̱ a̱ ubuta̱ wu ukpa̱ koɓolo n ukuna wa afada a babu uteku. Ukuna u nam pa ra̱ka̱ wi ta̱ punu a̱ ubuta̱ u kuyotsongusu ku iyain ku nam pa. Amma i yeve ta̱ ɗe ukuna u nam pa. Adama a nannai tsa kudansa ukuna u le gogo na ba, amma Ka̱shile ku ushuku baci, tsa kulyaꞋa ta̱ kelime n kudansa ukuna u kuyotsongusu ka aza a̱ gba̱ra̱gba̱ra̱.

⁴Uma o yoku a̱ ka̱sa̱kpa̱ baci kuneke a̱ɗu n Kirisiti Kishi, babu vuza na u kuzuwa le kushika̱ unushi kpamu. N ayin a cau a ɗe, uma a nam pa a isa ta̱ kutashi ku Ka̱shile ɗa e peɗei kuneꞋe ku ni. Ele i ta̱ koɓolo n aza a na a isai Ayinviki a̱ Ka̱shile. ⁵E yeve ta̱ uteku u na akaka a̱ Ka̱shile i n ugaꞋin, ɗa kpamu e peɗei utsura u ayin a na a̱ kuta̱wa̱ ana Ka̱shile ka kulyaꞋa tsugono ka̱u. ⁶Ana a isai ili i nan lo ra̱ka̱, ɗaɗa a̱ shirikpa̱ka̱i Kirisiti Kishi kucina̱. Wi a kuyaꞋan o bonoko uma tsu nan lo a̱ shika̱ unushi kpamu ba, adama a na i ta̱ o kudoku kubapa Maku ma̱ Ka̱shile† a maɗanga ma atakaci† ana a iwain ni. I ta̱ e kuneke yi wono e kelime ka uma dem.

⁷Uma o yoku i ta̱ ci iɗika i na i ciya̱i mini ka̱u. Ka̱ta̱ i matsa mayin e ekiye a aza a na a yaꞋin ɗe vicimba. Ka̱shile ka tsu zuwaka ta̱ iɗika i nan lo una̱singai.⁸Uma o yoku i ta̱ ci iɗika i na i tsu matsa awana m mita̱ ma kavama, babu kumatsa ili i yoku. Ka̱shile ka ci yaꞋanka ta̱ iɗika i nan lo ya una̱, ka̱ta̱ akina o songu i ɗa gbende.

⁹Uma a̱ va̱ a na n cigai, ko ci yaꞋan baci kadanshi nannai, ci a̱ kumuɗa̱ ka̱ɗu n a̱ɗa̱ ba. Ci yeve ta̱ yi ta̱ a uye u singai, uye wu wishi. ¹⁰Ka̱shile ka ci yaꞋan ta̱ afada a̱ ni ayin tutu n uye derere u na u gaꞋin. Wi ta̱ a kuciɓa n ulinga u na i yaꞋin, ka̱ta̱ kpamu u ciɓa n ucigi u na i yotsongi a kubana wa̱ ni a ayin a na i ɓa̱nka̱i uma a̱ ni. Wi ta̱ kpamu a kuciɓa a na i buwai a̱ kuɓa̱nka̱ le ali n gogo na. ¹¹Ili i na tsu laꞋi n kuciga i ɗaɗa i lyaꞋa kelime n kuyaꞋan nannai ali a kubana a uteku, adama a na i yeve ili i na i zuwakai a̱pa̱Ꞌa̱ yi ta̱ a kuyaꞋan mayun. ¹²Ci ciga ɗa̱ yo okpo orogo ba. Kucikpa i tono agisana a aza a na i a kisa ili i na Ka̱shile ka yaꞋankai le uzuwakpani adama a uneki u ka̱ɗu n uremi u ka̱ɗu u le.

Ka̱shile ka ci yaꞋan ta̱ ili i na u yaꞋin uzuwakpani

¹³Ana Ka̱shile ka yaꞋankai Ibrahim† uzuwakpani, u kucina ta̱ kuyaꞋan ili i na u yaꞋankai uzuwakpani wa. U kucinai nannai n kula ku ni, adama a na babu vuza na kpamu u laꞋi Ka̱shile. ¹⁴U danai, “Mpa, Vuzavaguɗu, mi ta̱ a kuzuwaka wu una̱singai, ka̱ta̱ n neke wu ntsukaya n a̱bunda̱i!”6:14 Ugi. 22:17.¹⁵Ibrahim u remei ka̱ɗu ɗa u vanai ili i nam pa i ta̱wa̱, ɗa ta na u ciya̱i ili i na Ka̱shile ka yaꞋankai ni uzuwakpani wa.

¹⁶Uma i baci a kuyaꞋan akucina, a tsu kucina ta̱ n kula ku vuza na u laꞋi le m gbayin. Akucina o yotsongu ta̱ ili i na a danai va mayun ɗa, ka̱ta̱ kanananai ko kotso ta na ra̱ka̱. ¹⁷Ka̱shile feu ka yaꞋin akucina, adama a aza a na a̱ kuciya̱ uzuwakpani wa e yeve a na mayun ɗa u ɗa wi, wi ta na a kusabaꞋa u ɗa ba. ¹⁸Ili i re i nan lo ya kusabaꞋa ba: Ka̱shile ka yaꞋan baci uzuwakpani, wa kuyaꞋan aꞋuwa ba, u kucina baci kpamu, wa kuyaꞋan aꞋuwa ba. Ili i nam pa ya i tsu dokusu ta̱ utsura u ka̱ɗu, a̱tsu na tsu sumai tsu ta̱wa̱i u Ka̱shile adama a na wi isa tsu. E ci neke tsu ta̱ utsura adama a na tsu ɓa̱na̱ a̱pa̱Ꞌa̱ a na u nekei tsu. ^19-20A̱pa̱Ꞌa̱ a nan lo a gbama ta̱ punu a̱ a̱ɗu a̱ tsu uteku u na kashamkpatsu ki iyum ka ci shamkpa m kpantsu a̱ ubuta̱ u te. Vuza na tsu zuwai a̱pa̱Ꞌa̱ wa̱ ni a̱yi ɗa Yesu, vuza na u uwai n ubuta̱ u kakashi ka na a palakai utsutsu wa sai a̱ ubuta̱ u Mololo ma na ma LaꞋi n Ciɗa† gaɗi a̱ Ka̱shile. U yaꞋankai tsu nannai. Wo okpoi mogono ma anan ganu vu tsu ko wanai, tsu Malikisada.

Ganu Malikisada

¹Malikisada† vu nam pa mogono maꞋa a̱ likuci i Salem n ganu vu Ka̱shile MalaꞋimili. Ana Ibrahim wi o kubono a kpaꞋa a ayin a na u lyaꞋi ngono n na̱shi ma n kuvon, Malikisada wu uta̱i u gasai n a̱yi ɗa u zuwakai ni una̱singai.7:1 Ugi. 14:17-20.²Ɗa Ibrahim u nekei ni ili i te a̱ ka̱tsuma̱ ka kupa dem i na u bonokoi a̱ ubuta̱ u kuvon wa. Ili i iyain i na ci cigai kudansa adama a Malikisada i ɗaɗa, kula ka ku ɗaɗa, “mogono ma na ma ci yaꞋansa ili yu usuɓi.” A̱yi ɗa kpamu “mogono ma̱ ma̱ta̱na̱” adama a na Salem ɗaɗa “ma̱ta̱na̱.” ³Babu vuza na u yevei esheku ko a̱na̱ku a Malikisada, n ubuta̱ u na wu uta̱i, n ayin a na a matsai ni, ko ayin a na u kuwa̱i. Wi ta̱ tsu Maku ma̱ Ka̱shile wi ta̱ kpamu o kokpo ganu ko wanai.

⁴Zukai biꞋi n uteku u na Malikisada wi ishi n tsugbayin! Ko Ibrahim, akaya a gbayin a aza a Israila, e yeve ta̱ uteku u na Malikisada wi ishi n tsugbayin ana u nekei ni ili i te a̱ ka̱tsuma̱ ka kupa ki ili i na u ɗikai a̱ ubuta̱ u kuvon. ⁵Wila̱ u yotsongu tsu ta̱ u dana anan ganu ra̱ka̱ u gaꞋan ta̱ a̱ uta̱ e kelentsu ke Levi,† ntsukaya mi Ibrahim. Wila̱ kpamu u yotsongu tsu ta̱ u dana ntsukaya mi Ibrahim ra̱ka̱ sai e neke anan ganu ili i te a̱ ka̱tsuma̱ ka kupa a ili i na a̱ ciya̱i dem, ko a na anan ganu a nan lo i punu a̱ ka̱tsuma̱ ke kelentsu ke le. ⁶Malikisada a̱yi kelentsu ke Levi kaꞋa ba, amma ɗa wi isai ili i te a̱ ka̱tsuma̱ ka kupa a̱ ubuta̱ wi Ibrahim. Ɗa u zuwakai Ibrahim una̱singai, vuza na wi isai ɗe uzuwakpani u Ka̱shile. ⁷Yaba dem u yeve ta̱ a na vuza na wi n utsura u zuwaka vuza yoku una̱singai, u tsu laꞋa ta̱ vuza na wi isai una̱singai wa n tsugbayin. ⁸Anan ganu a ci isa ta̱ ili i te a̱ ka̱tsuma̱ ka kupa ki ili i na uma a̱ ciya̱i, ko a na i uma koci a na a̱ kukuwa̱. Amma Malikisada u laꞋa le ta̱ m gbayin, adama a na Katagarda ka Ciɗa ko yotsongusu ta̱ a na wi n wuma. ⁹Ci ta̱ feu a kufuɗa kudana a na ntsukaya n Levi, aza a na a ci isa ili i te a̱ ka̱tsuma̱ ka kupa, a tsupa ta̱ feu i ɗa ana Ibrahim u tsupai Malikisada ili i te a̱ ka̱tsuma̱ ka kupa. ¹⁰Babu na a matsai Levi, amma a̱yi biꞋi a ikyamba ya akaya a̱ ni Ibrahim ana Malikisada u gasai n a̱yi.

¹¹Ko a na Wila̱ u Musa u danai anan ganu sai a yaꞋan ntsukaya n Levi, anan ganu a nan lo a kufuɗa kuzuwa vuza te wo okpo vuza vu ma̱riki uteku u na u yotsoi ba. Adama nan lo sai a̱ ciya̱ ganu tsu Malikisada, amma a umaci u Haruna ba. ¹²Ayin a na baci kpamu ganu vi yoku kau u ta̱wa̱i, mayun ɗa a sabaꞋa Wila̱ wa feu. ¹³Ci ta̱ a kudansa ukuna u nam pa adama a̱ Kishi, vuza na wu uta̱i e kelentsu ko yoku kau. Babu vuza e kelentsu ka nan lo vu na u saꞋwai kuyaꞋan ulinga u tsuganu a katalikalyuka. ¹⁴Yaba dem u yeve ta̱ a na wu uta̱i e kelentsu ka Yahuza,† Musa ta na u dana a na anan ganu a̱ kuta̱ e kelentsu ka nan lo ba.

Kishi ki ta̱ tsu Malikisada

¹⁵Na va ta na wo okpo ta̱ kpamu teshe ana ce enei ganu vi yoku vu ta̱wa̱i, vuza na wi tsu Malikisada. ¹⁶Vuma vu nan lo e ɗeke yi ganu adama a ikaya i ni ko wila̱ ba, amma adama a utsura u wuma u ni u na wi o kukotso ba. ¹⁷Katagarda ka Ciɗa ka danai adama a̱ ni,

“Avu ganu ɗa ko wanai,

tsu na Malikisada wi ishi ganu.”7:17 Ishp. 110:4.

¹⁸Gogo na a zuwa ta̱ wila̱ u cau paki, adama a na u ɗa wi ta̱ babu utsura n wasasa kpamu. ¹⁹Wila̱ u Musa u fuɗa u zuwa ili yo okpo uteku u na u yotsoi ba. Amma gogo na Ka̱shile ke neke tsu ta̱ ili i na i laꞋi n kugaꞋan, ci keɗe a̱pa̱Ꞌa̱ n i ɗa. Tsu nan lo tsu ɗa ta na tsa kuyawa ɗevu n Ka̱shile.

²⁰Ka̱shile ka kucina ta̱ a na Kirisiti Kishi u kokpo ganu ayin tutu, amma u yaꞋanka ganu vi yoku lo tsu nam pa ba. ²¹Yesu koci ɗa u danakai:

“Mpa, Vuzavaguɗu, n kucina ta̱ n ili i nam pa,

mi ta na a kusabaꞋa ka̱ɗu ka̱ va̱ ba.

‘Avu ganu ɗa ko wanai.’ ”7:21 Ishp. 110:4.

²²Yesu ɗa vuza na u zuwai uzuwakpani wa wo okpo mayun, u na u laꞋi u na Ka̱shile ka yaꞋin m Musa a kugaꞋan.

²³N ayin a cau, ganu u kuwa̱ baci, wi a kulyaꞋa kelime n kokpo ganu ba. Ɗaɗa i zuwai ɗa anan ganu o yongoi lo n a̱bunda̱i. ²⁴Amma Yesu ganu ɗa wi ko wanai; tsuganu ci ni tso kukotso ba. ²⁵Adama a nannai, a̱yi ɗa wi gogo na, n ayin tutu, vuza na u kufuɗa wa kisa aza a na a̱ ta̱wa̱i u Ka̱shile n ubuta̱ u ni. Wi ta̱ n wuma ko wanai adama a na u folono Ka̱shile adama a ele.

²⁶Yesu ɗa mogono ma anan ganu ma na ci a kuciga, adama a na u tsu ɓa̱nka̱ tsu ta̱ a̱ uye dem. Ili i na u ci yaꞋan i ci yokpo ta̱ Ka̱shile. Wi ta̱ babu unushi. Ka̱shile keꞋwe yi ta̱ kau n aza a aduniyan a na a ci yaꞋan unushi. Ɗa u nekei ni ubuta̱ u na u laꞋi n tsugbayin na ɗe gaɗi. ²⁷A̱yi wi tsu anan ganu vu na vu buwai ba, aza a na sai a yaꞋan alyuka kanna dem, a ci lyuka ta̱ biꞋi adama a unushi u le, ka̱ta̱ e yeve a lyuka adama a unushi u uma. Amma Yesu u yaꞋan ta̱ ili i nam pa kute, ɗa ta na wu untsakai adama a ayin ra̱ka̱, ana u lyukai ka̱ci ka̱ ni a maɗanga ma atakaci. ²⁸Wila̱ u danai uma o okpo ta̱ ngono n anan ganu, ko a na a fuɗa a yaꞋin uteku u na u yotsoi a yaꞋan ba. A̱ ugiti biꞋi, Ka̱shile ke nekei Musa Wila̱ wa. Ana u kotsoi kuyaꞋan nannai, ɗa u yevei u zuwai Maku ma̱ ni mo okpo mogono ma anan ganu n akucina. A̱yi ɗa u fuɗai u yaꞋin ili ra̱ka̱ i na Ka̱shile ka cigai ni u yaꞋan.

Kishi kaꞋa mogono ma anan ganu ma̱ tsu

¹Ili i gbayin i na ci a kudansa i ɗaɗa na: Ci ta̱ m mogono ma anan ganu vuza na wi a̱ ida̱shi e kukiye ku usingai ku kakuba ko tsugono ka̱ Ka̱shile Mogono mi Ili Ra̱ka̱ na ɗe gaɗi. ²Mogono ma anan ganu ma̱ tsu wi ta̱ a tsugbashi o Mololo ma na ma LaꞋi n Ciɗa,† a̱ ubuta̱ u kucikpa u mayun u na Ka̱shile ka yaꞋin, amma a̱ ubuta̱ u na uma a yaꞋin ba.

³Mogono ma anan ganu dem mi ta̱ n ulinga u kunekeshe kuneꞋe n alyuka u Ka̱shile. Tsu nan lo mogono ma anan ganu ma̱ tsu u gaꞋan ta̱ u neke feu Ka̱shile ili.⁴Wi ishi baci punu na aduniyan, u kokpo ganu ba, ko kenu, adama a na anan ganu i ta̱ lo punu na, aza a na o tsu tono Wila̱ a̱ ubuta̱ u kuneke Ka̱shile kuneꞋe. ⁵Ulinga u na a ci yaꞋan tsu anan ganu iyoci i ɗa koci ko kululu ki ili i na yi ɗe gaɗi. Derere ɗa n tsu na ki ishi m Musa. Ana Musa wi o ofoɓuso adama a na u yaꞋan Ma̱va̱li ma̱ Ka̱shile, Ka̱shile ka danai ni, “Ciɓa n ayin a na vi a kusan ka, ɗa n danai nu uteku u na va kuyaꞋan maꞋa derere. Zuka mayin ka̱ta̱ vi yaꞋan Ma̱va̱li ma tsu nan lo tsa derere.”8:5 Kut. 25:40; 26:30.⁶Amma ulinga u tsuganu u na Ka̱shile ke nekei Yesu u laꞋa ta̱ ulinga u na e nekei anan ganu a na a buwai. Tsu nan lo tsu ɗa feu, uzuwakpani u savu u na Yesu wu uta̱ka̱i a̱ ubuta̱ u Ka̱shile ɗa u tuka̱i uma a̱ ni u laꞋa ta̱ u kuku wa. Na va ɗaɗa adama a na ayin a na Ka̱shile ka yaꞋin uzuwakpani u savu wa, ili i na u danai u kuyaꞋan i laꞋa ta̱ ili i na u danai u kuyaꞋan a uzuwakpani u kuku.

⁷Ishi baci uzuwakpani u iyain wa u fuɗa u yaꞋan ili dem i na wi ishi a na wa yaꞋan, ishi kpamu o kudoku a yaꞋan uzuwakpani u ire wa ba. ⁸Amma Ka̱shile a̱ ka̱ci ka̱ ni we ene ta̱ uma a fuɗa a yaꞋan tsu na u yotsoi a yaꞋan ba, ɗa u danai:

“N dana ɗa̱, ayin i ta̱ lo a̱ kuta̱wa̱,

a na n kuyaꞋan uzuwakpani u savu

n aza a kpaꞋa ki Israila koɓolo n aza a kpaꞋa ku Yahuza.

⁹Uzuwakpani u nam pa u kuyaꞋan tsu uzuwakpani

u na n yaꞋin n ikaya i le ba,

ana n ka̱na̱i le n ekiye ɗa mu uta̱ka̱i le a iɗika i Masar.†

Amma ɗa a iwain kutono u ɗa,

ɗa ta na n shirikpa̱ka̱i le kucina̱.

¹⁰Amma uzuwakpani u savu u na n kuyaꞋan

n uma a Israila a ayin a na a̱ kuta̱wa̱ a ɗa na:

Mi ta̱ a kuzuwa kuyotsongusu ku va̱ e kusheshe ku le,

ka̱ta̱ n ɗana ku ɗa punu a̱ a̱ɗu e le.

Mi ta̱ o kokpo Ka̱shile ke le,

ka̱ta̱ ele o okpo uma a̱ va̱.

¹¹Uma o kudoku kpamu o kuyotsongusu aza e le ba,

a dana, ‘Yevei Vuzavaguɗu,’

adama a na uma ra̱ka̱ i ta̱ e kuyeve mu,

a̱ kugita̱ a vuza na u laꞋi n kenu a kubana a vuza na u laꞋi m gbayin.

¹²Mi ta̱ a kucinukpaka le adama a kawuya ka na a yaꞋin,

mi kpamu o kudoku ma ciɓa n unushi u le kpamu ba.”8:12 Ir. 31:31-34.

¹³Ana Ka̱shile ki a kadanshi ku uzuwakpani u savu, na va u yotsongu ta̱ a na u zuwai ɗe u iyain wa wo okpoi gbani. Ili i na kpamu i kutsai ɗa yo oꞋoi yi ta̱ a̱ kupuwa̱nka̱ babu megeshe.

Wila̱ u kuku adama a kucikpa Ka̱shile

¹Punu a uzuwakpani† u iyain u nan lo u na Ka̱shile ka yaꞋin n aza a Israila, u dana ta̱ uma uteku u na a kuyaꞋan kucikpa derere, ɗa kpamu u danai le uteku u na a kuyaꞋan Ma̱va̱li ma̱ Ka̱shile, a̱ ubuta̱ u na a kucikpa yi. ²A yaꞋin Ma̱va̱li ma na e pecuki nlolo e re. Punu asuvu o mololo ma iyain a zuwai kashamkpatsu ka̱ ma̱kuni koɓolo n kirikpa m burodi vu na e nekei u Ka̱shile. E ɗeke ta̱ mololo ma nam pa ma Mololo ma Ciɗa. ³Kakashi ka na a palakai utsutsu wa ki ta̱ lo ka na ke pecei nlolo n re ma. E ɗeke ta̱ kunu ku ire ka Mololo ma na ma LaꞋi n Ciɗa. ⁴Punu asuvu o mololo ma nan lo ma ta punu katalikalyuka† ki ka na a paɗai n azanariya, a̱ ubuta̱ u na o tsu songu ili i ma̱gula̱ni.† Punu o mololo ma Akpati vu Uzuwakpani† vu maɗanga vi ta̱ punu, vu na a paɗai n azanariya a akambu ra̱ka̱. Punu asuvu a Akpati vu Uzuwakpani va ili i tatsu yi ta̱ punu: Ili i iyain i na yi punu i ɗaɗa ma̱diki ma azanariya ma na a shatangi m mana.† Ili i ire punu i ɗaɗa kalangu ka Haruna† ka na ko topoi. Ili i tatsu i na yi punu i ɗaɗa nshemberu ma atali n Wila̱ Kupa wa a uɗani gaɗi vi le. ⁵Gaɗi va Akpati va, ta ɗe a yimai ili i wuma i re ye evelyu i na i yotsongi a na Ka̱shile ki lo.9:5 A yima ta̱ ili ye evelyu i re i nam pa n azanariya. N Tsugana e ci ɗeke le ta̱ “kerobobi”. E petikpei evelyu e le gaɗi vu kapalatsu ka Akpati ka, a̱ ubuta̱ u na Ka̱shile ka cinukpakai n unushi. Amma tsa kufuɗa tsa dansa ili dem adama a ukuna u nam pa gogo na ba.

⁶Ayin a na baci o kotsoi kufoɓuso ili dem tsu nam pa tsa, anan ganu a tsu uwa ta̱ punu o mololo ma iyain a kanna dem adama a na a yaꞋan ulinga u le. ⁷Amma mogono ma anan ganu endeꞋen ma ɗa ma tsu uwa asuvu o mololo me ire ma, u ci yaꞋan ta̱ ta na feu nannai va kute a̱ ka̱ya̱ dem. U tsu uwa o Mololo ma na ma LaꞋi n Ciɗa va babu u ɗika mpasa a kuꞋuwa ba. U tsu lyuka ta̱ mpasa ma u Ka̱shile adama a unushi u ka̱ci ka̱ ni, n adama a unushi u na uma a yaꞋin babu e yeve ayin a na a yaꞋin u ɗa. ⁸Ayinviki a̱ Ka̱shile a yaꞋin ulinga n ili i nam pa adama a na i yotsongu a na Wila̱ koɓolo m Ma̱va̱li a buwa baci lo a kuyaꞋan ulinga u le, uye a kuꞋuwa o Mololo ma na ma LaꞋi n Ciɗa a̱ kuɓa̱yuwa̱ u ɗa ba.

⁹Na va agisana a ɗa adama a ayin o gogo na. U yotsongu ta̱ a na kuneꞋe n alyuka† a na a lyukai a̱ kukpa̱ɗa̱ kuzuwa ka̱ɗu ka vuza na u yaꞋin kucikpa ko okpo ciɗa tsu na u yotsoi. ¹⁰Wila̱ u nam pa adama a ukuna u kulyaꞋa n kusoꞋo n iza̱Ꞌa̱shi i ɗa koci. Wila̱ wi ikyamba u ɗa, ɗa Ka̱shile ka zuwai uma o tono u ɗa ali sai a ayin a na a yaꞋin uye u savu.

Mpasa n Kirisiti Kishi

¹¹Amma Kirisiti Kishi ɗa gogo na wo okpoi mogono ma anan ganu a̱ ubuta̱ wi ili i singai ra̱ka̱ i na i ta̱wa̱i ɗe. U uwa ta̱ ɗe a̱ ubuta̱ u gbayin u kucikpa na ɗe gaɗi u na u laꞋi n ugaꞋin. Ekiye a uma a ɗa a yaꞋin u ɗa ba, u ɗa wi punu a aduniyan a nam pa feu ba. ¹²Kute adama a ayin dem, u ɗikai alyuka a mpasa u ukai punu asuvu o Mololo ma na ma LaꞋi n Ciɗa ma nan lo, amma mpasa mu nlala nu ndendem n ɗa ba. U ɗikai mpasa n ni, ana u yaꞋin nannai kpamu, ɗa u ciya̱ka̱i tsu wishi u na u kukpa̱ɗa̱ kukotso.

¹³N ayin a cau, ana uma a nusai, ikyamba i le yo okpo ta̱ ciɗa ana anan ganu a zazakai le mpasa mu nlala m mo obomburon, ɗa a̱ bula̱ngi kpamu kokomo ka na e kenuki a̱ ubuta̱ u kusongu mashan ma kanaka. ¹⁴Amma Kishi u yaꞋan unushi ba, ko kenu, amma ɗa u nekei ka̱ci ka̱ ni tsa alyuka u Ka̱shile a̱ ubuta̱ wa Ayinviki a na i n wuma ko wanai. Ɗaɗa i zuwai mpasa n ni n laꞋi n utsura ka̱u ɗa n zuwai a̱ɗu a̱ tsu o okpoi ciɗa a̱ ubuta̱ wi ili i na i tsu tuka̱ n ukpa̱. Gogo na ci ta̱ a kufuɗa tsa yaꞋanka Ka̱shile ka wuma tsugbashi!

¹⁵Na va ɗaɗa ili i na i zuwai ɗa Kishi wo okpoi vuza na u foɓusoi uzuwakpani u savu, ka̱ta̱ aza a na Ka̱shile ke ɗekei a̱ ciya̱ a isa una̱singai u na u kukpa̱ɗa̱ kukotso, u na Ka̱shile ka yaꞋin uzuwakpani. I ta̱ a kufuɗa kuyaꞋan ili i nam pa adama a na Kishi u kuwa̱ ta̱ ɗa u nekei uma uba̱ruwi† adama a unushi u na a yaꞋin ele biꞋi o kutono uzuwakpani u iyain wa.

¹⁶Uzuwakpani tsu nam pa wi ta̱ tsu vuma vu na u ɗanai e kepepa uteku u na u cigai e pecuku udukuyan u ni ayin a na baci u kuwa̱i. Amma i ta̱ a kufuɗa kupecuku ucanuku wa koci a ayin a na baci yaba dem u yevei vuma u kuwa̱ ta̱. ¹⁷Kepepa ka ki ta̱ n utsura koci a ayin a na baci vuza na u ɗanai kaꞋa u kuwa̱i. Ko vuza wa kufuɗa wa kisa ili i yoku ba, vuza wi baci n wuma biꞋi. ¹⁸I ɗaɗa i zuwai ko uzuwakpani u iyain wa u gita̱ ba, sai nu mpasa koci n na n kuyotsongu ukpa̱.

¹⁹A̱ ugiti, Musa u danai uma ra̱ka̱ kadanshi ku utsura dem ka na ki punu a̱ Wila̱. Ɗaɗa u tonoi n kuɗika mpasa mu ndendem nu nlala ɗa u satarai n ɗa m mini. Ɗa u ɗikai cileme tsu mokyon tsu na ci urumbuki ushili m menju ma mashanaka† adama a na u zaza n ɗa a katagarda ka̱ Wila̱ ka n uma ra̱ka̱. ²⁰U danai, “Na va ɗaɗa mpasa n na n yaꞋankai uzuwakpani u na Ka̱shile ke nekei ɗa̱ kadanshi ku utsura i tono.” ²¹Tsu nan lo tsu ɗa feu, Musa u zazai mpasa a̱ Ma̱va̱li ma̱ Ka̱shile† n ili ra̱ka̱ i na a ci yaꞋanka ulinga a̱ ubuta̱ u kucikpa. ²²Wila̱ u dana ta̱ ili ra̱ka̱ sai a zazaka i ɗa nu mpasa ka̱ta̱ i ɗa i ciya̱ yo okpo ciɗa. Ka̱shile feu ki a kucinukpaka n unushi babu mpasa n na n kuyotsongu ukpa̱ ba.

Ukpa̱ u Kishi u tsu takpa ta̱ unushi

²³Ili i nan lo ya i ɗa i zuwai le a takpa nshinda̱ m Ma̱va̱li ma̱ Ka̱shile n ili i na yi punu dem nu mpasa mu nnama. Ili i nam pa ya iyoci ɗa koci yi ili i na yi ɗe gaɗi. Amma alyuka a na a takpai nshinda̱ mi ili i mayun i na yi ɗe gaɗi a laꞋa ta̱ alyuka a nnama. ²⁴Kishi u uwa asuvu o Mololo ma na ma LaꞋi n Ciɗa ma na uma a yaꞋin ba, adama a na iyoci i ɗa koci i mololo ma mayun. U uwai punu asuvu a gaɗi a, wi ta̱ ɗe kpamu n Ka̱shile gogo na adama a na u ɓa̱nka̱ tsu. ²⁵U uwa kpamu gaɗi adama a na u doku u lyukasa ka̱ci ka̱ ni kpamu ba, tsu mogono ma anan ganu ma aduniyan ma na ma tsu uwa o Mololo ma na ma LaꞋi n Ciɗa a̱ ka̱ya̱ dem adama a na u lyuka mpasa m manama. ²⁶Ishi baci u lyuka ka̱ci ka̱ ni ka̱ya̱ dem, wi ishi ta̱ a kutakacika a ayin n a̱bunda̱i ali n ayin a na a yaꞋin aduniyan. Amma gogo na ɗevu n uteku, ɗa u kucikpa u ta̱wa̱i kute adama a ayin dem, adama a na u takpa utsura wu unushi ko wanai ana u kuwa̱i tsa alyuka adama a̱ tsu. ²⁷Mayun ɗa yaba dem u kuwa̱ kute, ka nan lo ka yaꞋan baci ka̱ta̱ Ka̱shile ka yaꞋanka le afada. ²⁸Adama a nannai Kishi u kuwa̱i kute koci adama a na u takpa unushi u uma n a̱bunda̱i. Amma u ta̱wa̱ baci kpamu, adama a kutakpa unushi a ɗa kpamu ba. Wi ta̱ a̱ kuta̱wa̱ adama a na wi isa yaba dem vu na wi a kuvana yi.

Alyuka i lo kpamu ba

¹Wila̱ u Musa wi ta̱ ci iyoci yi ili i singai i na i kuta̱wa̱. Iyoci i nam pa ya i ɗaɗa ili i mayun ya ba, adama a na i ɗa ya kufuɗa kuzuwa uma a yaꞋansa tsu na wu untsai ba, ko ishi a yaꞋan alyuka ka̱ya̱ dem. ²Wila̱ wa u fuɗa baci u zuwa le o okpo ciɗa uteku u na u yotsoi a yaꞋan, ishi ta̱ a̱ kuka̱sa̱kpa̱ kuyaꞋan alyuka a. Ka̱shile ki ishi ta̱ a̱ kuza̱Ꞌa̱ unushi wa aza a na i a kuyaꞋan kucikpa kute adama a ayin dem, ka̱ta̱ ta na a̱ɗu e le o okpo babu wono. ³Amma ta nannai ba! Alyuka a nam pa a tsu zuwa le ta̱ a ciɓa n unushi u le ka̱ya̱ dem. ⁴Ili i na i zuwai i ɗaɗa mpasa mo obomburon nu nlala mi a kufuɗa ma takpa unushi ba.

⁵I ɗaɗa i zuwai ana Kirisiti Kishi u ta̱wa̱i a aduniyan, u danai Ka̱shile,

“Vi a kuciga alyuka a nnama n e kuneꞋe ki ica̱Ꞌa̱shi ba.

Amma vi neke mu ta̱ ikyamba adama a na m panaka wu.

⁶Nnama n na o songi a katalikalyuka

n alyuka adama a unushi o yokpo wu ba.

⁷Ɗa n danai Ka̱shile, ‘Mpa ɗa na,

n ta̱wa̱ ta̱ adama a na n yaꞋan ili i na vi cigai,

uteku u na a ɗanai adama a̱ va̱ a Katagarda ka Ciɗa.’ ”10:7 Ishp. 40:6.

⁸Punu a Katagarda ka Ciɗa ka nam pa u dana ta̱ a̱ ugiti biꞋi, “Vi a kuciga alyuka n kuneꞋe ba. Vi a kuciga alyuka o kusongu n kuneꞋe ku na ka kutakpa unushi ba. Ili i nan lo i yokpo wu ba.” (Ko a na ili i nam pa i ɗaɗa alyuka a na Wila̱ u danai u gaꞋin a yaꞋan.) ⁹Ɗa u danai, “Mpa ɗa na, Ka̱shile, n ta̱wa̱ ta̱ adama a na n yaꞋan ili i na vi cigai.” Ɗa Ka̱shile ko gboroi alyuka a̱ kuku a ra̱ka̱, ɗa u zuwai alyuka a̱ Kishi a̱ una̱ u wa a ɗa. ¹⁰Adama a na Yesu Kirisiti Kishi u yaꞋin ili i na Ka̱shile ka cigai ni u yaꞋan, ɗaɗa ci ciya̱i tso okpoi ciɗa ra̱ka̱ a̱ ubuta̱ wu unushi, adama a na u yaꞋan ta̱ alyuka a n ikyamba i ni kute n adama a ayin dem.

¹¹N ayin a cau, anan ganu a yaꞋansa ta̱ ulinga u le a kanna dem, ɗa a lyaꞋi kelime n kulyuka alyuka a na a kufuɗa kutakpa unushi ba. ¹²Amma Kishi ke neke ta̱ ka̱ci ka̱ ni tsa alyuka a na a untsakai ko wanai. Gogo na wi ta̱ ɗe a̱ ida̱shi e kukiye ku usingai ku Ka̱shile. ¹³Wi ta̱ kpamu o kuyongo ɗe ali Ka̱shile ka zuwa irala i ni ɗaka vu utsura u ni. ¹⁴N alyuka e te a nan lo, u bonokoi uma ciɗa uteku u na u gaꞋin o yongo ko wanai, aza a na Ka̱shile ka zuwai o okpo aza a̱ ni.

¹⁵Ayinviki a̱ Ka̱shile kpamu a dana tsu ta̱ ukuna u nam pa. A̱ ugiti biꞋi u danai:

¹⁶“Vuzavaguɗu u danai,

‘Uzuwakpani u na n kuyaꞋan u ɗa na n ele a ayin a nan lo.

Mi ta̱ a kuzuwa kuyotsongusu ku va̱ a̱ a̱ɗu e le,

ka̱ta̱ n ɗana ku ɗa punu e kusheshe ku le.’ ”

¹⁷Ɗa u danai kpamu:

“Mi o kudoku ma ciɓa kpamu n unushi u le

n ili i gbani-gbani i na a yaꞋin ba.”10:17 Ir. 31:33-34.

¹⁸Ana Ka̱shile ka cinukpakai tsu unushi, ukuna u bura tsu kpamu n kudoku kuyaꞋan alyuka ba.

LyaꞋi kelime n kushuku n Ka̱shile

¹⁹Adama a nannai uma a̱ va̱, ci ta̱ a kufuɗa tsa uwa o Mololo ma na ma LaꞋi n Ciɗa† babu wovon adama a mpasa n Yesu.10:19 Kalaba ka na ke pecei Mololo ma Ciɗa a̱ ma̱va̱li n A̱Ꞌisa̱ a Gbayin. Ka kara ta̱ ayin a na Yesu u kuwa̱i adama a na u yotsongu uma i ta̱ a kufuɗa a̱ ta̱wa̱ u Yesu magaba.²⁰U nekei ikyamba i ni adama a na u ɓa̱yuwa̱ka̱ tsu uye u savu u na u tonoi a kubana a̱ ubuta̱ u wuma! Uye u nam pa ta na u ɗika tsu ta̱ a kuꞋuwa a̱ ubuta̱ u kakashi ka na a palakai utsutsu. ²¹Ci ta̱ m mogono ma anan ganu vuza na wi a kulyaꞋa tsugono a kpaꞋa ku Ka̱shile na ɗe gaɗi.

²²Adama a nannai, ci ta̱ a kufuɗa ci yawa ɗevu n Ka̱shile. Ka̱sa̱kpa̱ ci yaꞋan nannai n a̱ɗu a singai a na i babu munla̱i. Mpasa n Kishi n tsu za̱Ꞌa̱ ta̱ a̱ɗu a̱ tsu, a̱ɗu a nan lo a na a ci ciɓasa n ili i gbani-gbani i na ci yaꞋin, ɗa tso okpoi adanshi a̱ za̱Ꞌa̱ tsu ta̱ ciɗa m mini ma ciɗa. ²³Mayun ɗa tsu ka̱na̱ kpan-kpaꞋan a̱pa̱Ꞌa̱ a na tsu danai a̱ tsu a ɗa, adama a na tsu ushuku ta̱ n Ka̱shile ki ta̱ a kufuɗa kuyaꞋan ili i na u yaꞋin uzuwakpani. ²⁴YaꞋan ili i bura tsu n itoku i tsu, ka̱ta̱ kpamu tsu ɓa̱nka̱na̱i n tsu na tso kuyotsongu ucigi, ka̱ta̱ ci yaꞋan ili i singai. ²⁵Uma o yoku a tsu gasa adama a na a yaꞋan kucikpa ayin tutu ba, amma ka̱ta̱ ci yaꞋan ci le ba. Ci lyaꞋa kelime n kuyaꞋankpanai kadanshi ko kudokusu utsura u ka̱ɗu, ali tsu na i yevei kanna ko kubono ka Vuzagbayin ka yawa ta̱ ɗevu.

²⁶Alyuka i lo o kudoku kuyaꞋan adama a unushi u tsu ba, ci lyaꞋa baci kelime n kuyaꞋan unushi wana ɗai ci yeve ili i mayun. ²⁷Amma, ili i na yo okpoi i ɗaɗa tsu vana n wovon afada a na i lo a̱ kuta̱wa̱ koɓolo n akina a usuɗukpi ka̱u a na o kusongu aza a na i irala i Ka̱shile! ²⁸Ngan n re ko n tatsu n tuka̱ baci nu nsata n vuza yoku adama a na u iwain kutono Wila̱ u Musa, i ta̱ a kutakacika vuma vu nan lo ali a kubana ukpa̱ babu asuvayali.

²⁹Vuza yoku u iwan baci kuneke Maku ma̱ Ka̱shile tsugbayin, u laꞋa ta̱ uteku u na vuza u kuꞋiwan Wila̱ u Musa m gbani-gbani. Vuza yoku kpamu, u tuka̱ baci n wono a̱ ubuta̱ wu mpasa mu uzuwakpani n na n tsu bonoko tsu ciɗa,† u laꞋa ta̱ uteku u na vuza u kuꞋiwan Wila̱ u Musa m gbani-gbani. Nannai kpamu, vuza yoku u shika baci Ayinviki a̱ Ka̱shile, vuza na u tsu yotsongu tsu kasingai ka̱ ni, kagbani-gbani ka nan lo ke te kaꞋa n ka na ka buwai dem. ³⁰Ci yeve ta̱ a na Ka̱shile ka danai, “N kutakacika ta̱ aza na a ci yaꞋan kawuya. Mi ta̱ a kutsupa le.” Ɗa feu u danai, “Vuzavaguɗu wi ta̱ a kuyaꞋanka uma a̱ ni afada.”10:30 K.Wil. 32:35-36.³¹Ili i wovon i ɗa ka̱u vuma u yikpa̱ e ekiye a̱ Ka̱shile ka wuma.

³²Ciɓai n ayin a cau a ɗe, ana i piꞋisai ili i mayun yu ukuna u Ka̱shile a̱ ugiti. I yaꞋan ta̱ kataci ka̱u n atakaci n a̱bunda̱i, amma ɗa i lyaꞋi kelime n utsura. ³³Ayin o yoku a uka ɗa̱ ta̱ muna, ɗa a shikai ɗa̱ a̱ a̱shi a̱ ka̱bunda̱i ka uma. Ayin o yoku i ɓa̱nka̱ ta̱ aza a na i kusoꞋo atakaci a ili i te n a̱ɗa̱. ³⁴I yaꞋan ta̱ kasingai a kubana wa aza a na a zuwai a̱ kunu ku ugbashi. Ana a̱ fa̱ba̱na̱i ili i na yi n i ɗa ra̱ka̱, i lulukpa̱ ta̱ m ma̱za̱nga̱, adama a na i yeve ta̱ yi ta̱ n ili i na i laꞋi n kugaꞋan a kuvana ɗa̱, i na kpamu i kuyongo ko wanai.

³⁵Adama a nannai, ka̱ta̱ i ka̱sa̱kpa̱ kuneke a̱ɗu sakaɗi u Vuzagbayin ba, ko yi ɗa̱i i cinai ɗa̱, adama a na i lyaꞋa baci kelime n kutsurakpa ka̱ɗu, yi ta̱ a̱ kuciya̱ katsupu ka gbayin. ³⁶PiꞋisai uteku u na i kuyongo n ka̱lulu gogo na, adama a na i fuɗa i yaꞋan ili i na Ka̱shile ka cigai, ka̱ta̱ i ciya̱ kpamu ili i na u yaꞋin uzuwakpani. ³⁷Uteku u na Katagarda ka Ciɗa ka danai,

“Babu megeshe vuza na wi lo a̱ kuta̱wa̱ u kuta̱wa̱ ta̱.

U kudokongusu ba.

³⁸Aza a na Ka̱shile ku ushuki n ele o kuyongo ta̱ n wuma

adama a uneki u ka̱ɗu u le.

Amma wi a kupana uyoꞋo n vuza na dem

u bonoi n ka̱ca̱pa̱ ba.”10:38 Hab. 2:3-4.

³⁹Amma ci a̱ ka̱tsuma̱ ka aza a na o kubono n ka̱ca̱pa̱ ka̱ta̱ a̱ na̱mgba̱ ba. Tsu ushuku ta̱ n Ka̱shile, adama a nan lo ta na, ɗa wi isai tsu.

Uneki u ka̱ɗu

¹Aza a na e nekei a̱ɗu n Ka̱shile a̱ ushuku ta̱ mayun a na u kuneke le ili i na e keɗekei a̱pa̱Ꞌa̱. A̱ ushuku ta̱ mayun ɗa n ili i na ka̱ta̱ a saꞋwai kene ba. ²Ka̱shile ku ushuku ta̱ n uma a mani-mani adama a uneki wa̱ a̱ɗu u le.

³Ci ta̱ n uneki u ka̱ɗu, i ɗaɗa i zuwai ɗa ci yevei a na Ka̱shile ka yaꞋin kadanshi, n uye u nam pa u ɗa u yaꞋin aduniyan n ili i na yi punu dem. Ana u yaꞋin nannai, u yaꞋan ta̱ ulinga n ili i na vuma u kene ba, adama a na u yaꞋan ili i na ce kene.

⁴Habila† wi ta̱ n uneki u ka̱ɗu, i ɗaɗa i zuwai ɗa u yaꞋin alyuka u Ka̱shile a uye u na u laꞋi alyuka a na Kayinu† u yaꞋin n kugaꞋan. Ka̱shile ka danai ka pana ta̱ uyoꞋo n kuneꞋe ku na u lyukai, ɗa u ɗekei ni vuma vu usuɓi. Ko a na wo okpoi ɗe magasa mani-mani, ukuna u ni u buwa ta̱ a kuyaꞋan kadanshi n a̱tsu adama a uneki u ka̱ɗu u ni.

⁵Anuhu wi ta̱ n uneki u ka̱ɗu, i ɗaɗa i zuwai ɗa Ka̱shile ka ɗikai ni a kubana gaɗi u ciya̱ u kuwa̱ ba. E ene ikyamba i ni ba, adama a na Ka̱shile ka ɗika yi ta̱ ɗe. Katagarda ka Ciɗa ka danai kafu Ka̱shile ka ɗika yi a kubana gaɗi, u zuwa ta̱ ɗe Ka̱shile ka panai uyoꞋo n a̱yi. ⁶Uneki u ka̱ɗu wi baci lo ba, vuza wa kufuɗa wa zuwa Ka̱shile ka pana uyoꞋo u ni ba. Vuza na baci de dem u ta̱wa̱i u Ka̱shile, mayun ɗa wu ushuku a na Ka̱shile ki n wuma, a̱yi ɗa kpamu u tsu tsupa aza a na i a̱ kula̱nsa̱ yi mayun.

⁷Nuhu† wi ta̱ n uneki u ka̱ɗu, i ɗaɗa i zuwai ɗa u panai ana Ka̱shile ka danai ni ukuna wi ili i na ka̱ta̱ u saꞋwai kene ba. U panakai Ka̱shile ɗa u sheꞋwei kpantsu ku gbayin adama a na wi isa kpaꞋa ku ni. A̱ ubuta̱ wu uneki u ka̱ɗu u ni u ɗa, u yotsongi a na aduniyan a nusai, ɗa wo okpoi vuza te a̱ ka̱tsuma̱ ka aza a na o bonokoi n usuɓi n Ka̱shile a̱ ubuta̱ wu uneki u ka̱ɗu u ni.

⁸Ibrahim wi ta̱ n uneki u ka̱ɗu, i ɗaɗa i zuwai ɗa u panakai Ka̱shile ana u ɗekei ni u bana a̱ ubuta̱ u yoku u na u yaꞋin uzuwakpani u kuneke yi. U ka̱sa̱kpa̱i iɗika i ni, u yeve ta na ubuta̱ u na u gaꞋin u bana ba. ⁹Adama a na Ibrahim wi n uneki u ka̱ɗu, u yongoi tsu komoci a iɗika yu uzuwakpani. U yongoi ɗe a̱ ka̱pa̱m, ta feu ntsukaya n ni, Ishaku n Yakubu a yaꞋin nannai. Ɗa Ka̱shile ke nekei le feu uzuwakpani u te. ¹⁰Ibrahim u yaꞋan ta̱ ili i nam pa, adama a na wi ta̱ a kuvana a na wa uwa a̱ ubirini u na Ka̱shile ka̱ ira̱i ɗa ka maꞋi, u na i kuyongo ko wanai.

¹¹Saratu† koɓolo n Ibrahim i ta̱ n uneki u ka̱ɗu, i ɗaɗa i zuwai ɗa a fuɗai a matsai maku, ko a na a kutsai ka̱u ɗa Saratu kpamu wi madari. Ibrahim u neke ta̱ ka̱ɗu a na Ka̱shile ki a kuyaꞋan ili i na u yaꞋin uzuwakpani. ¹²Vuma vu nam pa u kutsa ta̱ ka̱u ali ɗevu n ukpa̱, amma ko n nannai wo okpoi akaya a uma n a̱bunda̱i. Mayun, uma a nam pa i ta̱ lo n a̱bunda̱i a laꞋi kukece, tsu na azangata a gaɗi i, ko kayala a̱ ka̱kina̱ ka mala.

¹³Uma a nam pa ta a̱ kuwa̱i nannai ra̱ka̱ n uneki wa̱ a̱ɗu u le babu na a̱ ciya̱ ili i na Ka̱shile ka yaꞋankai le uzuwakpani. A yaꞋan ta̱ ma̱za̱nga̱ a na e enei ili i nam pa a̱ kuta̱wa̱, ko a na i ɗa yi daꞋin. A danai ele omoci a ɗa n a̱ta̱wa̱shi a aduniyan a nam pa. ¹⁴Uma a dansa baci ili tsu nam pa, o yotsongu ta̱ a na i a̱ kula̱nsa̱ iɗika i na i kokpo i le. ¹⁵Ishi baci i lo a kuciɓasa n iɗika i na a̱ ka̱sa̱kpa̱i, babu ili i na i kusa̱nka̱ le kubono a̱ ubuta̱ u na ishi. ¹⁶Amma i ta̱ a̱ kula̱nsa̱ ubuta̱ u na u laꞋi n ugaꞋin. Ta ɗe wi gaɗi. I ɗaɗa i zuwai ɗa Ka̱shile ka̱ kukpa̱ɗa̱ kupana wono, e ɗeke yi baci Ka̱shile ke le, adama a na u foɓuso ta̱ ɗe ubirini adama e ele.

¹⁷Ibrahim wi ta̱ n uneki u ka̱ɗu, i ɗaɗa i zuwai ɗa u nekei Ishaku tsa alyuka ana Ka̱shile ko kondoi ni. Ibrahim ɗa vuza na Ka̱shile ka yaꞋankai uzuwakpani wa, amma u foɓusoi adama a na u neke maku me te ma̱ ni koci tsa alyuka. ¹⁸N ayin a cau, Ka̱shile ka dana yi ta̱ ɗe, “Ntsukaya n na n yaꞋankai nu uzuwakpani i ta̱ a̱ kuta̱ wi Ishaku.”11:18 Ugi. 21:12.¹⁹Ibrahim u sheshe ta̱ Ishaku u kuwa̱ baci, Ka̱shile ki ta̱ a kufuɗa ka̱ ɗengusa̱ yi kpamu. Wi ta̱ adanshi Ibrahim wi isa ta̱ kpamu maku ma̱ ni a̱ ubuta̱ wu ukpa̱.

²⁰Ishaku† wi ta̱ n uneki u ka̱ɗu, i ɗaɗa i zuwai ɗa u zuwakai muku n re n ni una̱singai, Yakubu† n Isuwa.† U yeve ta̱ a na Ka̱shile ka kuyaꞋanka le ili i singai na kelime.

²¹Yakubu wi ta̱ n uneki u ka̱ɗu, i ɗaɗa i zuwai ko a na wi a̱ kukuwa̱, u telekpe ka̱ci ka̱ ni a kalangu ka̱ ni ɗaɗa u cikpai Ka̱shile. Ɗa u zuwakai yaba dem vu muku n Isuhu† una̱singai.

²²Isuhu wi ta̱ n uneki u ka̱ɗu, i ɗaɗa i zuwai ɗa ana wi a̱ kukuwa̱, ɗa u yaꞋin kadanshi adama a ayin a na aza a Israila a̱ kuka̱sa̱kpa̱ iɗika i Masar. Ɗa u danai le a̱ pura̱ etele a̱ ni koɓolo n ele i baci a kulaza.

²³Esheku a Musa n a̱na̱ku a̱ ni i ta̱ n uneki u ka̱ɗu, i ɗaɗa i zuwai ɗa o sokongi ni ali wotoi u tatsu. E ene ta̱ Musa mereɓu mo tsuloboi maꞋa, a pana kpamu wovon a iwan kutono wila̱ u mogono ba.

²⁴Musa wi ta̱ n uneki u ka̱ɗu, i ɗaɗa i zuwai ana u gbonguroi, ɗa u iwain kushuku e ɗeke yi maku me mekere mo mogono ma Masar. ²⁵U cikalai kusoꞋo atakaci koɓolo n uma a̱ Ka̱shile, a na wa pana uyoꞋo wu unushi u ayin kenu. ²⁶We ene ta̱ u laꞋa ta̱ n kugaꞋan u takacika adama a̱ Kirisiti Kishi, a na wa̱ ciya̱ uciyi u Masar ra̱ka̱, adama a na wi ta̱ a kindana katsupu ka̱ Ka̱shile ka na ki lo a̱ kuta̱wa̱. ²⁷Adama a uneki u ka̱ɗu u ni, Musa u ka̱sa̱kpa̱i Masar, ɗa u kpa̱ɗa̱i kupana wovon u wupa u mogono. Musa u lyaꞋi kelime nannai adanshi wi ta̱ e kene Ka̱shile ka na vuza wa kufuɗa we kene ba. ²⁸Adama a uneki u ka̱ɗu u ni, u foɓusoi Ka̱ɗiva̱ ka Kupasamgbanai† ɗa u zazai mpasa a̱ utsutsu gaɗi n akambu dem adama a na vuza na u kutuka̱ n ukpa̱ u kpa̱ɗa̱ kuna ngaji mi Israila.

²⁹Uma i ta̱ n uneki u ka̱ɗu, i ɗaɗa i zuwai ɗa a pasai Mala ma Shili† adanshi iɗika i ɗekpu i ɗa. Amma ana aza a Masar o tonoi, ɗa a̱ kuwa̱i punu a mala ma ra̱ka̱.

³⁰Uma a̱ Ka̱shile i ta̱ n uneki u ka̱ɗu. Ana a walai ɗa a̱ ka̱ra̱Ꞌi likuci i Jeriko ali ayin e cindere, ɗa mashilya ma̱ ni ma̱ yikpa̱i.

³¹Rahapu† kashakanlai kaꞋa, wi ta̱ n uneki u ka̱ɗu, i ɗaɗa i zuwai ɗa u rabasai aza a kasaka a Yahuda. Ɗaɗa i zuwai ɗa a̱ kpa̱ɗa̱i kuna yi, ana a unai aza a na a iwain kupanaka Ka̱shile.

³²N doku n neke agisana o yoku? Mi n ayin a na n kudana ɗa̱ ukuna u Gidiyon,† m Baraka, n Sonson,† n Jefata, n Dawuda, n SamaꞋila,† n eneki ba. ³³Uneki u ka̱ɗu u le u ɓa̱nka̱ le ta̱ a lyaꞋi utsura wi iɗika kakau. A yaꞋan ta̱ ili i na yi derere, ɗa a̱ ciya̱i ili i na Ka̱shile ka yaꞋin uzuwakpani. A̱ ɓa̱ya̱ngi una̱ wi ikawu.11:33 Dan. 6:1-28.³⁴A̱ kima̱sa̱i akina a usuɗukpi ka̱u. A laꞋakai a̱ ubuta̱ wa aza a na a cigai kuna le n otokobi. Ko a na a nambai katsura, ɗa o doku a̱ ciya̱i katsura. A̱ ciya̱ ta̱ utsura ka̱u a̱ ubuta̱ u kuvon, ɗa a lyaꞋi utsura wo osoji a na i omoci. ³⁵A̱ma̱ci o yoku o doku a isai aza e le, aza a na ishi a̱ kuwa̱i ɗe ɗa o bonoi n wuma. Uma o yoku a ɗa a takacikai le n a̱bunda̱i adama a uneki wa̱ a̱ɗu u le, ɗa uma a nan lo a danai, “Ci a̱ kushuku tso okpo ba̱ri ba.” A yaꞋin nannai adama a na Ka̱shile ka̱ ɗengusa̱ le a̱ ubuta̱ wu ukpa̱ a kubana a wuma u singai.

³⁶A yaꞋankai aza a na a̱ ushuki n Ka̱shile ulami, ɗa kpamu a fabai le. Ɗa a shiyai aza o yoku kau n ikani ɗa a zuwai a ugbashi. ³⁷Aza o yoku a kuwa̱i adama a na a vara le ta̱ n atali. Aza o yoku a gbatyai le agimi e re e re. A unai aza o yoku n otokobi. Aza o yoku a buwa n ili ba, sai ukpan wu nlala adama a na a uka. O okpoi aza a unambi, ɗa a takacikai le ka̱u. ³⁸Uma a nam pa uma a singai a ɗa ali ɗa aduniyan a̱ kpa̱ɗa̱i kuntsa n ele. A tambalukpai a kakamba nu nsasan, ɗa o sokongi a aɓatsu n enle a iɗika.

³⁹Uma a nam pa ra̱ka̱ Ka̱shile ka pana ta̱ uyoꞋo u le adama a uneki u ka̱ɗu u le! Amma ko n nannai, ɗa a̱ kuwa̱i babu na a̱ ciya̱i ili i na u yaꞋankai le uzuwakpani. ⁴⁰Ka̱shile ke sheshe ta̱ kuyaꞋan ili i na i kulaꞋa biꞋi n kugaꞋan adama a̱ tsu, ka̱ta̱ a̱ ciya̱ o okpo ciɗa uteku u na u yotsoi o yongo koɓolo n a̱tsu.

Ka̱shile Esheku a̱ tsu a ɗa

¹Ci ta̱ n uma n a̱bunda̱i uka̱ra̱Ꞌi n a̱tsu aza a na i agisana a ili i na uneki u ka̱ɗu wi. Tsu nan lo yaꞋan ci yaꞋan ilaɗi i malamanai ma na mi kelime ka̱ tsu ka̱ta̱ tsu ka̱sa̱kpa̱ ba. Tsu takpa a̱ ubuta̱ u wuma u tsu ili dem i na i kukpada tsu kuyaꞋan ili i na i gaꞋin ci yaꞋan; ɗaɗa unushi u na u kubonoko tsu ka̱ca̱pa̱ gogoꞋo. ²Mayun ɗa tsu zuwa a̱shi a̱ tsu u Yesu, vuza na wi ka̱giti ku uneki u ka̱ɗu u tsu n vuza na kpamu u kuzuwa u ɗa wo okpo uteku u na u gaꞋin. U takacika ta̱ ɗa u kuwa̱i a maɗanga ma atakaci. Amma ɗa wu ushuki n wono wa adanshi ili i ɗa ba, adama a̱ ma̱za̱nga̱ ma na u kuciya̱ a kubana megeshe. Gogo na kpamu wi ta̱ ɗe a̱ ida̱shi e kukiye ku usingai ku kakuba ko tsugono tsu Ka̱shile.† ³Ciɓai biꞋi n Yesu tsa agisana. U lulukpa̱i ana uma a gbani-gbani i a kuyaꞋanka yi ili i gbani-gbani. Adama a nannai ka̱ta̱ yo oꞋo ali i ka̱sa̱kpa̱ kudakaka ba.

⁴Yi ta̱ a kataci n unushi, amma ka̱ta̱ kataci ka̱ ɗa̱ ka zuwa le a una ɗa̱ ba. ⁵Amma i cinukpa ta̱ a na Katagarda ka Ciɗa ka danai muku n Ka̱shile adama a na u dokusu le utsura u ka̱ɗu:

“Maku ma̱ va̱, Vuzavaguɗu u lapulaka wu baci, vu zuka mayin,

u ɓarangu wu baci kpamu ka̱ta̱ vu namba katsura ka̱ ka̱ɗu ba,

⁶Adama a na Vuzavaguɗu u tsu lapulaka ta̱ yaba dem vu na u cigai,

ka̱ta̱ kpamu u ɓarangu yaba dem vu na Vuzavaguɗu wu ushuki n a̱yi, tsu maku ma̱ ni.”12:6 An. 3:11-12.

⁷Lulukpa̱i n ili i na yi a kutakacika, adama a na yi ta̱ tsu na atakaci a̱ tsu uta̱ u kesheku. Babu maku ma na ma saꞋwai kunamba atakaci a̱ ubuta̱ we esheku a̱ ni. Ka̱shile ki ta̱ a kuyaꞋan n a̱ɗa̱ tsu muku n ni. ⁸Ka̱shile ka tsu lapulaka ta̱ muku n ni ra̱ka̱, u kpa̱ɗa̱ baci kulapulaka ɗa̱, ashe a̱ɗa̱ uma a pulai ɗa, yi kpamu uma a̱ ni mayun ba. ⁹Ra̱ka̱ vu tsu ci yongo ta̱ n isheku i tsu punu a aduniyan aza a na a lapulakai tsu, ɗa ta na ci cikpai le. To u kulaꞋa tsu panaka esheku a̱ tsu a na i gaɗi ka̱ta̱ ciya̱ ci yongo n wuma ba? ¹⁰Isheku i tsu a aduniyan a lapulaka tsu ta̱ a uye u na e enei u ɗa u laꞋi n kugaꞋan a ayin kenu a yakpa. Amma Ka̱shile ka tsu lapulaka tsu ta̱ adama a na u ɓa̱nka̱ tsu, ka̱ta̱ ci ciya̱ tso okpo ciɗa uteku u na a̱yi wi ciɗa. ¹¹Kulapulu ili i ɗa i na i ci yokpo uma a ayin a na a lapulakai le ba, ki ta̱ nu mɓa̱la̱! A ayin a na baci Ka̱shile ka takacikai le, ɗaɗa adama a na u yotsongu le ili i na a yaꞋin derere ba, ka̱ta̱ a piꞋisa ili punu a̱ ubuta̱ u nam pa wa ka̱ta̱ a yaꞋan ili yu usuɓi, ka̱ta̱ o yongo m ma̱ta̱na̱ kpamu.

¹²Yo okpo ta̱ babu katsura, amma doki i yaꞋan katsura kpamu. ¹³Lapulai uye u bono mejege, ka̱ta̱ aza a na i o kutono u ɗa, ko i babu katsura ko i nkutsuma̱, a̱ kpa̱ɗa̱ kuta̱ɗa̱tsa̱ ali a̱ yikpa̱ amma a̱ ciya̱ katsura.

Panakai Ka̱shile

¹⁴Gbagbalai adama a na i yongo m ma̱ta̱na̱ n uma ra̱ka̱, ka̱ta̱ kpamu i gbagbala i yongo a uye u ciɗa. Vuza na dem wuma u ni wi ciɗa ba, we kene Vuzavaguɗu ba. ¹⁵Zukai mayin adama a na ka̱ta̱ vuza te vu ɗa̱ u kpa̱ɗa̱ kuciya̱ kasingai ka̱ Ka̱shile ba. Zukai ka̱ta̱ ili i kusheshe yo okono i gbonguro adama a na i takacika ɗa̱ a̱ kula̱nga̱sa̱ uma n a̱bunda̱i ba. ¹⁶Ka̱ta̱ i zuka mayin ta lo vuza wa yaꞋan tsugbani, ko u iwan kutono Ka̱shile uteku u na Isuwa u yaꞋin. Isuwa a̱yi ɗa magaji mi Ishaku, wi ishi ta̱ kpamu a̱ kuciya̱ ili i ra̱ka̱ i na esheku i n i ɗa, amma ɗa u dengei ili i nan lo ra̱ka̱ adama a kapara ka tsuwaꞋa ke te koci. ¹⁷I ciɓa ta̱ ana Isuwa u yaꞋin ili i nam pa ya, ɗa u cigai esheku a̱ ni a zuwaka yi una̱singai, amma ɗa esheku a̱ ni a iwain. Amma babu ili i na u kuyaꞋan adama a na u sabaꞋa ukuna wa, ko a na u folonoi esheku n u shika̱i.

¹⁸A̱ɗa̱ yi tsa aza a Israila ba, aza a na a yawai a Kusan ku Sinai,† a̱ ubuta̱ u na a kufuɗa e kene ka̱ta̱ kpamu a saꞋwa. Ku ɗa ki ta̱ n akina, ka̱yimbi n ka̱nga̱ ka̱ lima̱ kpamu ka palai ku ɗa, koɓolo n kabatalikpau. ¹⁹A panai izumgbi i kavana n ka̱la̱ka̱tsu. Ana uma a panai ka̱la̱ka̱tsu ka, ɗa o folonoi Ka̱shile ka̱ ka̱sa̱kpa̱ kuyaꞋan kadanshi, ²⁰adama a na u laꞋa ta̱ utsura u na a fuɗa o tono ana u danai, “Ko manama ma saꞋwa baci kusan ka, mayun ɗa a una maꞋa n atali.”12:20 Kut. 19:13.²¹Musa a̱ ka̱ci ka̱ ni u pana ta̱ wovon ka̱u n ili i na we enei ali ɗa u danai, “M pana ta̱ wovon ka̱u ali ɗa mi e kujeꞋeke ikyamba.”12:21 K.Wil. 9:19.

²²Amma a̱ɗa̱ gogo na i ta̱wa̱ ta̱ a Kusan ku Sihiyona n Urishelima vu na vi gaɗi. Na va ɗaɗa ubirini u Ka̱shile ka wuma, a̱ ubuta̱ u na alingata a̱kpa̱n a̱kpa̱n n a̱bunda̱i o ɓolongi a̱ ubuta̱ u te adama a na a yaꞋan ma̱za̱nga̱. ²³I ta̱wa̱ ta̱ a̱ ubuta̱ u koɓolo ka̱ muku n Ka̱shile adanshi ra̱ka̱ vi le ngaji n Ka̱shile n ɗa. A ɗana ta̱ ɗe ula e le ra̱ka̱ gaɗi. I ta̱wa̱ ta̱ u Ka̱shile a̱ ka̱ci ka̱ ni, vuza na wi keyevikafada ka uma ra̱ka̱. I ta̱wa̱ ta̱ kpamu wa̱ a̱kpisa̱ a̱ usuɓi, Ka̱shile ka zuwa le ta̱ o okpo uteku u na u cigai o okpo. ²⁴I ta̱wa̱ ta̱ u Yesu, vuza na u tuka̱i n uzuwakpani† u savu a̱ Ka̱shile a kubana u uma a̱ ni. Ɗaɗa mpasa n Yesu n na a zazai tsa alyuka n na mi n akaka a na a laꞋi mpasa n Habila.12:24 A ayin a na Kayinu wu unai Habila, ɗa Ka̱shile ka danai ni, “Mpasa n ambu n na mi utsuwin a iɗika mi ta̱ e kuɗeke mu.” Mpasa n Yesu n tuka̱ ta̱ n kucinukpa ku unushi n a̱bunda̱i, Amma mpasa n Habila n tuka̱ ta̱ n atakaci adama a̱ ma̱ga̱la̱ka̱ ma̱ ni. Ugi. 4:10.

²⁵Adama a nannai ka̱ta̱ i iwan vuza na wi a kuyaꞋanka ɗa̱ kadanshi ba. Uma a Israila a iwain Musa ana u ɓarangi le a ayin a na i a aduniyan, a laꞋaka ta na ba. Adama a nannai wi ta̱ a kulaꞋa n kuna̱mgba̱ wa̱ tsu ci iwan baci vuza na wi gaɗi ayin a na baci u ɓarangi tsu. ²⁶N ayin a cau ana u yaꞋin kadanshi, ka̱la̱ka̱tsu ka̱ ni ka̱ gba̱ɗa̱sa̱i iɗika, amma gogo na u yaꞋan ta̱ ɗe uzuwakpani, “Mi ta̱ o kudoku kugba̱ɗa̱sa̱ aduniyan kute amma u nam pa ali n gaɗi feu.” ²⁷Ana u danai ili i nam pa, wi ta̱ a kadanshi ka na u kuniꞋwa̱nta̱ngu ili i na u yaꞋin dem. Ili i na a̱ kukpa̱ɗa̱ kufuɗa kugba̱ɗa̱sa̱ koci i ɗa i kokpo.

²⁸I ɗaɗa i zuwai ɗa tsa kuyaꞋan ogodiya a na ci ciya̱i tsugono tsu na ili ya kufuɗa ya̱ gba̱ɗa̱sa̱ ba. Ci cikpa Ka̱shile tsu na u kuyokpo yi, ka̱ta̱ ci neke yi tsugbayin n kupana wovon u ni kpamu, ²⁹adama a na Ka̱shile ka̱ tsu ki ta̱ tsa akina a usuɗukpi a na o tsu songu ili.

Uteku u na Ka̱shile ka kupana uyoꞋo

¹LyaꞋi kelime m maciganai n ucigi u Kirisiti Kishi. ²Ka̱ta̱ i rabasa omoci a iꞋuwa i ɗa̱. Uma o yoku a yaꞋan ta̱ nannai, ɗa ta na a rabasai alingata a̱ Ka̱shile babu na e yevei. ³Ka̱ta̱ i cinukpa n aza a na i a ugbashi ba. SoꞋi atakaci n ele adanshi yi ta̱ ɗe n ka̱ci ka̱ ɗa̱. Ciɓai n aza a na i a kuyaꞋanka kawuya adanshi yi ta̱ ɗe feu a kutakacika n ele.

⁴Ka̱ta̱ i cikpa yolo. Ali n a̱ma̱ci o yongo n ukuna u mayun a kuka̱na̱ ka̱ci ke le ayin tutu, adama a na Ka̱shile ki ta̱ a kutakacika vuza na de dem u yaꞋin tsugbani ko u kpa̱ɗa̱i kuyongo n ukuna u mayun a̱ ubuta̱ u yolo. ⁵Sa̱nka̱i ka̱ci ka̱ ɗa̱ n ukuna u kuciga ki ikebe. I cuwa̱ n ili i na yi n i ɗa. Ka̱shile ka danai,

“Mi a̱ kuka̱sa̱kpa̱ wu ba, ko kenu.

Mi kpamu a̱ kushirikpa̱ka̱ wu kucina̱ ba.”13:5 K.Wil. 31:6, 8.

⁶Adama a nannai, ci ta̱ a kufuɗa kudana sakaɗi,

“Mi a kupana wovon ba,

adama a na Vuzavaguɗu ɗa ka̱ɓa̱nki ka̱ va̱.

Uma a kufuɗa a yaꞋanka mu ili ba.”13:6 Ishp. 118:6.

⁷Ciɓai n aza e kelime a̱ ɗa̱ a na o yotsongushi ɗa̱ kadanshi ka̱ Ka̱shile a̱ ugiti. Ciɓai n ili i singai i na o yongoi a kuyaꞋansa a wuma u le ra̱ka̱, ka̱ta̱ yu ushuku n Ka̱shile ci le. ⁸Yesu Kishi u tsu sabaꞋa ba, ko kenu! A̱yi ɗa vi te na̱yin, n anana, n ko wanai.

⁹Ka̱ta̱ i ka̱sa̱kpa̱ a̱ ya̱nsa̱ ɗa̱ ali i ka̱sa̱kpa̱ kuyotsongusu kakau ku zuwa ɗa̱ i katsukpa uye u singai ba. Kasingai ka̱ Ka̱shile kaꞋa ke kuneke a̱ɗu a̱ ɗa̱ katsura, amma kutono ku wila̱ adama a ilikulyaꞋa ba, ili i nam pa ya i tsu ɓa̱nka̱ aza a na i o kutono u ɗa ba. ¹⁰Ci ta̱ n katalikalyuka, anan ganu† a na i aza a Yahuda i n utsura u na a lyaꞋa alyuka a na a lyukai a katalikalyuka ka ba.

¹¹Mogono ma anan ganu ma ci ɗika ta̱ mpasa mu nnama u uka asuvu o Mololo ma na ma LaꞋi n Ciɗa, ta ɗe u tsu lyuka mpasa n nam pa adama a unushi. Amma o tsu songu ta̱ ikyamba yi nnama ya pulai va̱ a̱pa̱m. ¹²I ɗaɗa i zuwai ɗa Yesu u soꞋi atakaci pulai vu ubirini, adama a na u ciya̱ u bonoko uma a̱ ni ciɗa nu mpasa n ni. ¹³Adama a nannai yaꞋan tsu bana ɗe wa̱ ni pulai va̱ a̱pa̱m va, ka̱ta̱ tsu pana icuꞋu i wono i na a̱yi u panai. ¹⁴Ci n ubirini u na u kuyongo ko wanai punu a iɗika na ba, amma ci ta̱ a kuvana ubirini tsu nan lo.

¹⁵Ka̱sa̱kpa̱ ci lyaꞋa kelime n kuyaꞋan alyuka a kucikpa Ka̱shile a̱ ka̱tsuma̱ ka kula ku Yesu, ɗaɗa kucikpa ka aza a na e kuɗeke kula ku ni. ¹⁶Ka̱ta̱ i cinukpa kuyaꞋan kasingai ba, ka̱ta̱ kpamu i ɓa̱nka̱na̱i, adama a na ɗaɗa alyuka a na o yokpoi Ka̱shile. ¹⁷Panakai aza e kelime a̱ ɗa̱, ka̱ta̱ i yaꞋan ili i na a danai ɗa̱ i yaꞋan. I ta̱ a̱ kula̱na̱ wuma u ɗa̱ babu kuvuka, adama a na e yeve ta̱ mayun i ta̱ a kudana Ka̱shile uteku u na ele a̱ ɓa̱nka̱i ɗa̱. I panaka le baci, i ta̱ a kuyaꞋan ulinga u le m ma̱za̱nga̱. I panaka le baci ba, i ta̱ a kuyaꞋan u ɗa n una̱mgbuka̱tsuma̱, na lo va ta na u kuɓa̱nka̱ ɗa̱ ba.

¹⁸Ka̱ta̱ i ka̱sa̱kpa̱ kuyaꞋan kavasa adama a̱ tsu ba. Ci yeve ta̱ a na a̱ɗu a̱ tsu i ciɗa, ci ciga ta̱ feu kuyaꞋan ili i na yi derere ayin tutu. ¹⁹N folono ɗa̱ ta̱ n utsura u na mi n u ɗa ra̱ka̱ adama a na i yaꞋan kavasa, ka̱ta̱ Ka̱shile ka̱ suku mu m bono wa̱ ɗa̱ babu megeshe.

Avasa a ukocishi

^20-21N yaꞋan ta̱ kavasa adama a na Ka̱shile ka̱ ma̱ta̱na̱ ke neke ɗa̱ ili i singai dem i na i nambai, adama a na i yaꞋan ili i na u cigai. U ɗengusa̱i Vuzagbayin vu tsu Yesu Kishi a̱ ukpa̱. Gogo na Yesu wi ta̱ tsu Maguɓi ma Gbayin, vuza na mpasa n ni n ɗa a yaꞋankai uzuwakpani u Ka̱shile nu nkyon n ni. Uzuwakpani u nam pa wi a̱ kukotso ba. N vasa ta̱ adama a na Ka̱shile ka yaꞋan punu wa̱ tsu ili i na i yokpoi ni, a̱ ubuta̱ u Yesu Kirisiti Kishi. A̱yi ɗa e kuneke tsugbayin ko wanai n ko wanai. Ta nannai.

²²Uma a̱ va̱, n folono ɗa̱ ta̱ i zuka mayin n akaka o kudokusu katsura a nam pa. Akaka a kenu a ɗa koci.

²³N ciga ta̱ i yeve a na a shikpai ɗe vuza tsu Timoti a̱ ubuta̱ wu ugbashi. U yawa baci gogoꞋo, dem vu tsu ci ta̱ a̱ kuta̱wa̱ ce kene ɗa̱.

²⁴Kya̱sa̱i aza e kelime a̱ ɗa̱ ra̱ka̱ n uma a̱ Ka̱shile ra̱ka̱.

Aza o Kutoni a na i Italiya i a nwalu nu mpa, i ta̱ feu ikya̱shi i ɗa̱.

²⁵Ka̱sa̱kpa̱ kasingai ka̱ Ka̱shile ko yongo n a̱ɗa̱ ra̱ka̱.