Afisu

Akaka a̱ Bulusu a kubana wa

Aza a Afisu

Ukuna u katagarda ka nam pa

Bulusu u ɗana ta̱ katagarda ka nam pa a kubana wa aza o Kutoni a na i Afisu ayin a na wi a ugbashi. Bulusu u yongo ta̱ a Afisu ali a̱ya̱ a tatsu o kuyotsongusu uma ukuna u Yesu. Ka̱ma̱li Aritima ki ta̱ n a̱Ꞌisa̱ a gbayin punu a̱ likuci ya. Aza a ulinga we ekiye a yaꞋan ta̱ kuden adama e kudenge a̱ma̱li a wawaꞋa. Kadanshi ke Yesu ka na Bulusu u yongoi a kudana le ka̱ sa̱nka̱ ta̱ uma kutsula a̱ma̱li a. Nannai ɗa ta na aza a ulinga we ekiye u nan lo a yaꞋin wupa m Bulusu.

Ayin o yoku a ɗa, ana ka nan lo ka lazai ɗa Bulusu u ɗanai katagarda ka nam pa. Punu a akaka a u danai aza o Kutoni a̱ likuci ya Afisu ili i singai n a̱bunda̱i ra̱ka̱ i na a̱ ciya̱i adama a na i ta̱ koɓolo n Kishi. Na va ili ya aduniyan i ɗa ba, amma ili i gaɗi i ɗa, i ɗa kpamu i laꞋa ili ya aduniyan i nam pa. U danai le aza o Kutoni ra̱ka̱ i ta̱ vi te a̱ ubuta̱ u Kishi, ili i bura umaci ba. Ɗa kpamu u yaꞋin kuyotsongusu uteku u na vali n vuka o kuyongo o yotso aza o Kutoni. U yotsongushi muku nu mmaci, ɗa u yaꞋin kpamu nannai n agbashi n aza e kelime e le.

Ili ra̱ka̱ i na Bulusu u danai aza a Afisu derere i ɗa yi ali a kubana wa aza o Kutoni o gono na. Ra̱ka̱ vu tsu ci ta̱ n ili i singai i Ka̱shile adama a na ci ta̱ u Kishi. Nannai feu, u laꞋa ta̱ n kugaꞋan ci yongo uteku u na katagarda ka nam pa ko yotsongi tsu.

Ili i na yi punu udariki a katagarda ka nam pa

1. Ikya̱shi (1:1-2)

2. Kishi ka̱ tuka̱ ta̱ n ili i ka̱ɗu ka singai (1:3—3:21)

3. Wuma u savu koɓolo n Kishi (4:1—6:20)

4. Ikya̱shi yu ukocishi (6:21-24)

Ikya̱shi a̱ ubuta̱ u Bulusu

¹Mpa Bulusu mi ta̱ a kuɗana akaka a nam pa. Mpa feu vuzavusuki vi Yesu Kirisiti Kishi ɗa, adama a na Ka̱shile kaꞋa ka zagbai mu mo okpo nannai. Mi ta̱ a kuɗanaka aza a ciɗa a̱ Ka̱shile a na i a Afisu aza a na i o kutono Yesu Kishi ayin tutu.

²YaꞋan Ka̱shile Esheku a̱ tsu n Vuzagbayin Yesu Kishi u yaꞋanka ɗa̱ kasingai ka̱ta̱ u neke ɗa̱ ma̱ta̱na̱.

Una̱singai adama a̱ Kishi

³Ci neke ucikpi a kubana u Ka̱shile n Esheku a Vuzagbayin a̱ tsu Yesu Kishi. A̱yi ɗa vuza na u zuwakai tsu una̱singai a̱ ubuta̱ u na u nekei tsu ili i singai ra̱ka̱ i na yu uta̱i gaɗi adama a na i ɓa̱nka̱ wuma u tsu a̱ ubuta̱ wi ida̱shi wa ayinviki a singai. U yaꞋan ta̱ nannai ana u ɓolongi tsu n Kishi. ⁴Kafu Ka̱shile ka yaꞋan aduniyan, u zagba tsu ta̱ tso okpo uma a̱ ni a̱ ubuta̱ u na u ɓolongi tsu n Kishi. U yaꞋan ta̱ nannai adama a na tso okpo ciɗa a kubana wa̱ ni, a̱ kuciya̱ kpamu ili i gbani-gbani wa̱ tsu i na u kutaɗaka tsu ba. ⁵Adama a na Ka̱shile ki ta̱ a kuciga tsu, a̱yi u sheshe ta̱ ili i na u kuyaꞋanka tsu m megeshe ma ɗe wi ta̱ o kubonoko tsu muku n ni a̱ ubuta̱ wi ili i na Yesu Kishi u yaꞋin. Ka̱shile ka yaꞋan ta̱ nannai adama a na ta u gaꞋin ni nannai, ta kpamu u cigai kuyaꞋan nannai.

⁶Ci cikpa yi ta̱ adama a ili i gbagbaꞋin i singai i na u yaꞋankai tsu. U nekei tsu kasingai ka nan lo gbani, a̱ ubuta̱ u Kishi vuza na u cigai. ⁷A̱ ubuta̱ u Yesu Kishi ɗa tso okpoi ba̱ri adama a̱ ubuta̱ wu mpasa mu ukpa̱ u ni, i ɗaɗa i zuwai ɗa a cinukpakai tsu unushi u tsu. Nahannai ɗa Ka̱shile ko yotsongi tsu a na kasingai ka̱ ni ki gba̱ra̱, ɗa u yotsongi tsu kaꞋa n a̱bunda̱i. ⁸Adama a na Ka̱shile ki ta̱ n ugboji, u yeve ta̱ kpamu ili ra̱ka̱, u yaꞋan ta̱ ili i na u cigai kuyaꞋan.

⁹U yotsongu tsu ta̱ ili i na yi ishi usokongi, i na u foɓusoi kuyaꞋan a̱ ubuta̱ u Kishi. ¹⁰A ayin a na a gaꞋin a yawa baci, kusheshe ku ni ku ɗa u ɓolongu ili ra̱ka̱ i na yi gaɗi n iɗika a̱ ubuta̱ u te m mogono me te, a̱yi ɗa ta na Kishi.

¹¹Ka̱shile ka zagba tsu ta̱ tso okpo uma a̱ ni a̱ ubuta̱ u na u ɓolongi tsu n Kishi. U yaꞋan ta̱ nannai adama a na u sheshe ta̱ ɗe m makyan ma ɗe, ɗa u zuwai kpamu ili i yaꞋan nannai uteku u na wi a kuciga i ɗa dem.

¹²U yaꞋan ta̱ nannai adama a na a̱tsu, aza a na e keɗei a̱pa̱Ꞌa̱ n cau u Kishi, tsu zuwa uma a cikpa Ka̱shile adama a na a̱yi wi ta̱ n tsugbayin. ¹³Ili i te i ɗa kpamu yi mayun a̱ kuta̱wa̱ wa̱ ɗa̱. I pana ta̱ Arabali a Singai a ɗa kpamu akaka a mayun ɗa ta na Ka̱shile ka isai ɗa̱. I neke ta̱ a̱ɗu a̱ ɗa̱ u Kishi, ɗa o ɓolongi ɗa̱ n a̱yi. Adama a nannai Ka̱shile ke nekei ɗa̱ Ayinviki a̱ ni a na u yaꞋankai uma a̱ ni uzuwakpani. Ayinviki a̱ ni i ta̱ tsu urotu u na wi o kuyotsongu a na yi uma a̱ Ka̱shile. ¹⁴Adama a na a̱tsu ci isa ta̱ Ayinviki a̱ Ka̱shile, a̱tsu kpamu ci ta̱ e kuyeve babu munla̱i a na Ka̱shile ki e kuneke tsu ili i singai i na u yaꞋin uzuwakpani. Ci yeve ta̱ kpamu Ka̱shile ki ta̱ e kuneke tsu ida̱shi i ba̱ri mayin a kubana wa aza a na i uma a̱ ni. Ili i nam pa ya yi ta̱ a kuzuwa uma a cikpa Ka̱shile adama a na wi ta̱ n tsugbayin.

Kavasa ka̱ Bulusu

¹⁵Adama a na Ka̱shile ka zuwaka tsu ta̱ una̱singai nahannai, mi ta̱ a kuyaꞋan kavasa a kubana wa̱ ni adama a̱ ɗa̱. Ali ayin a na m panai a na yu ushuki n Vuzagbayin Yesu, ɗa kpamu i cigai uma a̱ Ka̱shile ra̱ka̱, ¹⁶n ci yongo ta̱ a kucikpa Ka̱shile adama a̱ ɗa̱ ayin dem. Ayin a na baci de dem mi a kuyaꞋan kavasa, n tsu vasa ta̱ adama a̱ ɗa̱. ¹⁷Mi ta̱ a kuyaꞋan kavasa a kubana we Esheku a̱ tsu vuza na wi n tsugbayin n a̱bunda̱i. A̱yi ɗa Ka̱shile ka Vuzagbayin vu tsu Yesu Kishi. N folono yi ta̱ u neke ɗa̱ ugboji, ka̱ta̱ u yotsongu ka̱ci ka̱ ni a kubana wa̱ ɗa̱, adama a na i doku i yevesheke yi mayin. ¹⁸Mi ta̱ a kuyaꞋan kavasa kpamu adama a na u zuwa ɗa̱ i yeve mayin, ka̱ta̱ i yeve ili i singai i na wi n i ɗa adama a̱ ɗa̱. Yi ta̱ a kuvana yi isa ili i singai i nam pa, adama a na u ɗeke ɗa̱ ta̱ yo okpo muku n ni. N yaꞋan ta̱ kpamu kavasa i yeve feu mgbayin mu una̱singai n na u yaꞋin uzuwakpani u kuneke uma a̱ ni.

¹⁹Mi ta̱ kpamu a kuyaꞋan kavasa adama a na a̱ɗa̱ i yeve utsura u ni u na u lazai ili ra̱ka̱, u na kpamu wi a̱ kuɓa̱nka̱ tsu a̱tsu na ci nekei a̱ɗu. Ɗaɗa utsura u gbayin u te ta na ²⁰u na u yaꞋankai ulinga ana u zuwai Kishi ka̱ ɗenga̱ n wuma kpamu, ɗa u zuwai ni u da̱sa̱ngu a̱ ubuta̱ u tsugbayin e kukiye ku usingai ku ni ɗe gaɗi.†

²¹Kishi wi ta̱ a kulyaꞋa tsugono a̱ ubuta̱ wu utsura kakau u gbagbaꞋin ra̱ka̱ aza a na i ɗe ko a na i n utsura ka̱u. Kula ku ni ku laꞋa ta̱ kula ku ngono n na mi a kulyaꞋa tsugono ra̱ka̱. Na va mayun ɗa gogo na, wi ta̱ kpamu a kuyaꞋan mayun ayin a na i lo a̱ kuta̱wa̱. ²²Ka̱shile ke nekei Kishi tsugono ci ili ra̱ka̱, ɗa u zuwai ni wo okpo kaci ka̱ a̱Ꞌisa̱ a aza o Kutoni, ²³ɗaɗa ikyamba i ciɗa. A̱Ꞌisa̱ a a ci isa ta̱ utsura u ni ra̱ka̱ a̱ ubuta̱ u Kishi, a̱yi ɗa kpamu vuza na wi e kuneke wuma wi ili i dem a̱ ubuta̱ dem.

Gogo na ci ta̱ n wuma

¹N ci cau yi ishi ta̱ an keven ki ikyamba, adama a na i iwan ta̱ kupanaka Ka̱shile ɗa i yaꞋansai unushi. ²I ci yongo ta̱ tsu uma a aduniyan a nam pa. I panakai MalyaꞋi, vuza na wi mogono ma̱ wunla̱i u gbani-gbani u na u ci yongo a̱ a̱da̱nga̱shile. MalyaꞋi a̱yi ɗa wunla̱i u na gogo na wi a kuyaꞋan ulinga adama a na u tono n uma a na a iwain kutono Ka̱shile. ³Ra̱ka̱ vu tsu ci ishi ta̱ a kuyaꞋan nwalu ci le. Ci ishi ta̱ a kuyaꞋansa ili i gbani-gbani i na ci cigai dem. Tsu tono ta̱ ili i na a̱shawuya n kusheshe ku wuya a tsu dana tsu ci yaꞋan. Adama a na ci yaꞋan ta̱ kagbani-gbani, Ka̱shile ka yaꞋan ta̱ mayin u takacika tsu baci, uteku u na u kutakacika aza a na a buwai.

⁴Amma asuvayali a̱ Ka̱shile i ta̱ n a̱bunda̱i, wi ta̱ kpamu a kuciga tsu n a̱bunda̱i. ⁵A̱yi ɗa u ɓolongi tsu n Kishi, ɗa u nekei tsu wuma u savu. U yaꞋan ta̱ nannai ko a na a ayin a nan lo ci tsa̱ a̱kpisa̱ adama a unushi u tsu. Adama a kasingai ka̱ Ka̱shile koci i ɗaɗa i zuwai ɗa wi isai ɗa̱.

⁶U ɗengusa̱i tsu a̱ ubuta̱ wu ukpa̱ n Kishi, ɗa u zuwai tsu gaɗi a̱ ubuta̱ u Ka̱shile adama a na tsu da̱sa̱ngu n Kishi ka̱ta̱ kpamu ci lyaꞋa tsugono n a̱yi. Ka̱shile ka yaꞋan ta̱ nannai a̱ ubuta̱ u na u ɓolongi tsu n Yesu Kishi. ⁷U yotsongi tsu kasingai ka̱ ni a uye u nam pa a̱ ubuta̱ u Yesu Kishi, adama a na a̱ya̱ a na a̱ kuta̱wa̱ uma a fuɗa e ene uteku u na mgbayin n kasingai ka̱ ni ki ɗa kpamu ka laꞋi ili dem.

⁸Adama a kasingai† ka na Ka̱shile ko yotsongi ɗa̱ ka ɗaɗa koci, ɗa wi isai ɗa̱ a̱ ubuta̱ u na yu ushuki n Kishi. Wi isa ɗa̱ adama ulinga u singai u na i yaꞋin ba. Na va kuneꞋe ku Ka̱shile ku ɗa a kubana wa̱ ɗa̱, adama a ili i na i yaꞋin ba. ⁹I ɗa i zuwai babu vuza na u kuyaꞋan a̱ra̱ɗi adama a̱ ka̱ci ka̱ ni. ¹⁰Ka̱shile ko bonoko tsu ta̱ ili i na ci. A̱ ubuta̱ u Yesu Kishi, Ka̱shile ka yaꞋan tsu ta̱ ciya̱ ci yaꞋan ulinga u singai. Na va ɗaɗa uye u na u foɓusoi ɗe n ayin a ɗe, uteku u na u gaꞋin ci yongo.

Kishi ko ɓolongi tsu a̱ ubuta̱ u te

¹¹A matsa ɗa̱ Ayahuda ba. A̱ɗa̱ ɗa uma a na Ayahuda e ci ɗeke “aza a na a̱ kpa̱ɗa̱i kukiɗa avaja” ka̱ta̱ kpamu e ɗeke ka̱ci ke le, “aza a ukiɗi wa avaja.” (Ukiɗi wa avaja u le ili ɗa koci i na ele a̱ ka̱ci ke le a yaꞋin a ikyamba i le.) ¹²Ciɓai a ayin a nan lo, i yeve Kirisiti Kishi ba, a̱ɗa̱ uma a iɗika a Israila a ɗa ba. Ka̱shile ka yaꞋin uzuwakpani wu una̱ n ele, amma n a̱ɗa̱ ɗa ba. Ɗa u yaꞋankai le uzuwakpani wi ili n a̱bunda̱i, amma n a̱ɗa̱ kpamu ba. Yi ta̱ ida̱shi a aduniyan a nam pa, amma yi n ili i na i keɗei a̱pa̱Ꞌa̱ ba, i yeve kpamu Ka̱shile ba. ¹³N ci cau yi ta̱ daꞋin, amma gogo na a na i ɓolongi ka̱ci ka̱ ɗa̱ n Kirisiti Kishi, ɗa Ka̱shile kpamu ka̱ tuka̱i ɗa̱ ɗevu n ka̱ci ka̱ ni a̱ ubuta̱ wu mpasa n Kirisiti Kishi.

¹⁴Kishi a̱ ka̱ci ka̱ ni u tuka̱ tsu ta̱ m ma̱ta̱na̱. N ci cau, maꞋiwanai ma Ayahuda n Aza̱ka̱yimbi mi ta̱ tsu mashilya. U takpa ta̱ ɗe maꞋiwanai ma nam pa, ɗa u bonokoi yaba dem uma e te. ¹⁵Wila̱ wa Ayahuda wi ta̱ n ili n a̱bunda̱i i na i gaꞋin uma o tono, amma gogo na Kishi ko bonoko le ta̱ ukuna u gbani a̱ ubuta̱ wu ukpa̱ u ni. U yaꞋan ta̱ nannai adama a na u ɓolongu Aza̱ka̱yimbi n Ayahuda a kubana wa̱ ni adama a na u bonoko le ugboku u te. N nannai, ɗa u tuka̱i m ma̱ta̱na̱ we le dem. ¹⁶Kusheshe ku Kishi ku ɗa feu wu una maꞋiwanai a̱ ubuta̱ wu ugboku u re wa, ka̱ta̱ o bonoko le ikyamba i te, ka̱ta̱ u bonoko le kpamu u Ka̱shile. Yesu u yaꞋan ta̱ nannai dem a̱ ubuta̱ wu ukpa̱ u ni a maɗanga ma atakaci.

¹⁷Kirisiti† Kishi u ta̱wa̱ ta̱ aduniyan a nam pa, ɗa u yaꞋin kadanshi ka Arabali a Singai a na i a kadanshi ka̱ ma̱ta̱na̱. U dana ɗa̱ ta̱ Aza̱ka̱yimbi kadanshi ka nam pa, a̱ɗa̱ na yi ishi daꞋin, koɓolo n a̱tsu Ayahuda a̱tsu vu na ci ɗevu. ¹⁸Gogo na ra̱ka̱ vu tsu Ayahuda n Aza̱ka̱yimbi ci ta̱ a kufuɗa tsa̱ ta̱wa̱ u Dada a̱ ubuta̱ wa Ayinviki a̱ Ka̱shile e te adama a ili i na Kishi ka yaꞋankai tsu.

¹⁹Adama a nannai, a̱ɗa̱ Aza̱ka̱yimbi† aza a pulai ko omoci a ɗa yi ba. I kucikpa ta̱ yo okpo uma e te a na i ciɗa u Ka̱shile. A̱ɗa̱ ɗa uma a kpaꞋa ku Ka̱shile. ²⁰Yi ta̱ ci iputa̱ i na a tsu maꞋaka kpaꞋa. Azusuki n eneki i ta̱ tsa agisana a̱ kumiꞋi ku kpaꞋa ku nan lo, Yesu Kishi a̱yi ɗa kenene ko mogon ka gbayin. ²¹A̱yi ɗa vuza na u ka̱na̱i kumaꞋa ka ra̱ka̱ a̱ ubuta̱ u te. Wi ta̱ a kuzuwa ku ɗa ku gbonguro ka̱ta̱ kpamu u bonoko ku ɗa a̱Ꞌisa̱ a ciɗa a u Vuzavaguɗu. ²²Adama a na yi a uɓolongi n Kishi, u ɓolongu ɗa̱ ta̱ n aza o Kutoni a na a buwai, adama a na a̱ɗa̱ yo okpo kpaꞋa ku nam pa, ubuta̱ u na Ka̱shile ki o kuyongo n utsura wa Ayinviki a̱ Ka̱shile.

Ulinga u Bulusu

¹Mpa Bulusu mi ta̱ a̱ kunu ku ugbashi adama a ulinga u na Yesu Kishi u zuwai mu n yaꞋanka ɗa̱ a̱ɗa̱ Aza̱ka̱yimbi. ²I yeve ta̱ ɗe a na Ka̱shile a̱ ubuta̱ u kasingai ka̱ ni u neke mu ta̱ ulinga u nam pa n yaꞋan adama a na m ɓa̱nka̱ ɗa̱. ³Ka̱shile ka zuwai mu n yeve kusheshe ku na wi ishi u sokongi. Mi ishi ta̱ ɗe n ɗanaka wu kenu adama a ili i nam pa. ⁴A ayin a na baci vi kecei ili i na n ɗanai, yi ta̱ e kene ili i na n yevei adama e kusheshe ku nam pa ku na ki adama a̱ Kishi. ⁵Ka̱shile ko yotsongu kusheshe ku nam pa u uma a cau ba. Amma gogo na u yotsongu ta̱ ku ɗa a̱ ubuta̱ wa Ayinviki a̱ Ka̱shile. U yotsongu ta̱ ku ɗa u uma a na u zagbai o okpo azusuki a̱ ni n eneki.

⁶Ili i na Ka̱shile ke sheshei i ɗa na: A̱ɗa̱ Aza̱ka̱yimbi yi ta̱ a kisa una̱singai ra̱ka̱ u na Ka̱shile ke ci neke, derere tsu na Ayahuda feu a isai u ɗa. Aza̱ka̱yimbi n Ayahuda o okpo ta̱ ili i te. A̱ɗa̱ Aza̱ka̱yimbi yi ta̱ a kisa ili i na Ka̱shile ka yaꞋankai uma a̱ ni uzuwakpani adama a na yi ta̱ uɓolongi n Yesu Kishi. Ili i na Arabali a Singai a danai i ɗaɗa. ⁷Na va ɗaɗa Arabali a Singai a na mi a kudansa. Adama a na Ka̱shile ki ta̱ n kasingai, u nekei mu ulinga u nam pa u kudana yaba dem Arabali a Singai a nam pa, u tsu ɓa̱nka̱ mu ta̱ n yaꞋan na va n utsura u na u nekei mu.

⁸Mpa ɗa vuza na n laꞋi n kenu a̱ ka̱tsuma̱ ka uma a̱ Ka̱shile dem, amma ko n nannai, Ka̱shile ke nekei mu ulinga u nam pa u kudana Aza̱ka̱yimbi ukuna wi ili i singai i na Kishi ke ci neke. Ili i singai i nam pa i laꞋa ta̱ uteku u na uma e kuyeve. ⁹Ka̱shile, vuza na u yaꞋin ili dem, u nekei mu ulinga u kudana uma ra̱ka̱ ukuna u kusheshe u ni u na wi ishi u sokongi n ayin a̱ ugiti.

¹⁰U yaꞋin ili i nam pa nannai adama a na u yotsongu ngono n utsura kakau gaɗi uteku u na a̱yi wi n ugboji dem a̱ ubuta̱ wi ili dem i na u ci yaꞋan. Ka̱shile ko yotsongu ta̱ ili i nam pa a̱ ubuta̱ wi ili i na u yaꞋankai aza o Kutoni a̱ ni. ¹¹Ka̱shile ke sheshe ta̱ kuyaꞋan ili i nam pa n ayin a ɗe, ali kafu u yaꞋan aduniyan, gogo na u zuwai a ɗa a̱ gita̱ adama a ili i na Yesu Kishi Vuzagbayin vu tsu u yaꞋin.

¹²Adama a na ci neke ta̱ a̱ɗu wa̱ ni, ɗa kpamu ci uɓolongi n a̱yi, gogo na ci ta̱ a kufuɗa tsa bana u Ka̱shile n uba̱ruwi babu kpamu wovon. ¹³Ye ene mu baci o kusoꞋo atakaci adama a̱ ɗa̱, mi ta̱ o kufolono ɗa̱ ka̱ta̱ utsura u ka̱ɗu u ɗa̱ u jebe ba. Atakaci a nam pa i ta̱ a̱ kutuka̱ ɗa̱ n tsugbayin.

Kishi ka ciga tsu ta̱

¹⁴Adama a nannai, n tsu kuɗa̱ngu ta̱ kelime ke Esheku a̱ tsu, ka̱ta̱ n vasa adama a̱ ɗa̱. ¹⁵A̱yi ɗa Esheku a mayun a umaci ra̱ka̱, a aza a na i gaɗi n aza a na i a aduniyan dem. ¹⁶Ka̱shile ki ta̱ a kufuɗa ka zuwaka ɗa̱ una̱singai n a̱bunda̱i. Adama a nannai n folono yi ta̱ adama a na Ayinviki a̱ ni e neke ɗa̱ utsura, ka̱ta̱ a̱ɗu a̱ ɗa̱ a tsurakpa. ¹⁷N folono ta̱ kpamu Kishi ko yongo a̱ a̱ɗu a̱ ɗa̱, adama a na a̱ɗa̱ i neke ta̱ a̱ɗu n a̱yi. Mi ta̱ kpamu a kuyaꞋan kavasa i yongo a kuciga Ka̱shile, ka̱ta̱ i ciganai feu ayin tutu. I yaꞋan baci nannai, yi ta̱ o kokpo an megele ma na aralu a̱ ni a uwai a iɗika, n kpaꞋa ku na kpamu ku ciya̱i kumiꞋi ku singai. ¹⁸Nannai ɗa, a̱ɗa̱ n uma a̱ Ka̱shile ra̱ka̱, i kuyeve uteku u na Kishi ka cigai tsu. Wi ta̱ a kuciga tsu n a̱bunda̱i ali tsu na u lazai kugisanku. ¹⁹Ko a na vuza wi a kufuɗa we yeve ra̱ka̱ uteku u na Kishi ki a kuciga tsu ba, n folono ta̱ Ka̱shile adama a na i yeve, ka̱ta̱ i ciya̱ yo okpo tsu na u yotsoi, ɗaɗa tsu na Ka̱shile ki.

²⁰Ka̱shile ki ta̱ n utsura u na u yaꞋan ili i na i laꞋi ka̱bunda̱i ki ili i na tsu folonoi ni, ko ili i na tsa kufuɗa tsa sheshe dem. U ci yaꞋan ta̱ i ɗa n utsura u ni u na wi a kuyaꞋanka ulinga punu a̱ a̱ɗu a̱ tsu. ²¹YaꞋan ci cikpa yi ko wanai n ko wanai, adama a tsugbayin tsu na u yotsongi a̱ ubuta̱ wi ili i na wi a kuyaꞋan a̱ ubuta̱ wa̱ a̱Ꞌisa̱ a aza o Kutoni n ubuta̱ u Yesu Kishi kpamu! Ta nannai.

Ikyamba i te

¹Mi ta̱ a ugbashi adama a na mi ta̱ a kuyaꞋanka Vuzagbayin tsugbashi, n folono ɗa̱ ta̱, i yongo m ma̱riki a uye u na u yotsoi u na Ka̱shile ke ɗekei ɗa̱ i yongo. ²A̱ ubuta̱ wi ili i na yi a kuyaꞋan dem, yaꞋin babu a̱ra̱ɗi ka̱ta̱ yi indana uma a na a buwai n asuvu a̱ yuwu. Adama a na i ciga uma, remei a̱ɗu, ka̱ta̱ kpamu i yaꞋan wupa a ayin a na baci a yaꞋin ili i gbani-gbani ba. ³Ayinviki a̱ Ka̱shile o bonoko ɗa̱ ta̱ vi te, dakakai i yongo a̱ ubuta̱ u te m ma̱ta̱na̱, adama a na i lyaꞋa kelime n kokpo vi te. ⁴Ra̱ka̱ vu tsu ukambu wi ikyamba i te i ɗa ci. Ayinviki a̱ Ka̱shile e te a ɗa i lo koci. Ka̱shile kpamu ke nekei tsu a̱pa̱Ꞌa̱ e te kpamu a ayin a na u zagbai ɗa̱ yo okpo uma a̱ ni. ⁵Ra̱ka̱ vu tsu Vuzagbayin vi te ɗa tsu. Ci ta̱ kpamu o kutono kuyotsongusu ku te. Ci isa ta̱ kpamu kusumbu ka akucina ku te. ⁶Ra̱ka̱ vu tsu ci ta̱ o kutono Ka̱shile ke te, a̱yi ɗa kpamu Esheku a̱ tsu ra̱ka̱. A̱yi ɗa kpamu wi a kulyaꞋa tsugono ci ili dem, wi ta̱ kpamu a̱ ubuta̱ dem, ɗa wi punu kpamu u yaba dem vu tsu.

⁷Kishi ke neke ta̱ kpamu yaba dem vu tsu kuneꞋe adama a na ci yaꞋan ulinga u ni. U yaꞋan ta̱ nannai adama a kasingai ka gbayin ka̱ ni. ⁸Uteku u na Katagarda ka Ciɗa ka danai,

“Ana u banai a̱ ubuta̱ u na u laꞋi n gaɗi ka̱u,

u tonoi n agbashi n a̱bunda̱i a na u ka̱na̱i,

ɗa u nekei uma kuneꞋe kakau.”4:8 Ishp. 68:18.

⁹(Gogo na mi ta̱ a kuciga i la̱na̱ kadanshi ka nam pa, “U bana ta̱ a̱ ubuta̱ u gaɗi ka̱u.” ¹⁰U bana baci a̱ ubuta̱ u gaɗi ka̱u, ili i na wi a kudana i ɗaɗa, wi ishi ta̱ u ta̱wa̱ a̱ ubuta̱ u ɗaka, ɗaɗa aduniyan a nam pa. Vuza na wu uta̱i gaɗi ɗa u ta̱wa̱i iɗika i nam pa, vuza te ɗa n vuza na u banai a̱ ubuta̱ u na u laꞋi n gaɗi ka̱u ra̱ka̱, adama a na u zuwa ili dem yo okpo tsu na i gaꞋin.)

¹¹A̱yi ɗa vuza na u nekei kuneꞋe kakau ku nam pa ka wa aza o Kutoni: u zagbai aza o yoku o okpo azusuki, u zagbai uma o yoku o okpo eneki, aza o yoku kpamu aza a kudana uma kadanshi ka̱ Ka̱shile. Ɗa u zagbai uma o yoku kpamu a̱ la̱na̱ aza o Kutoni, ka̱ta̱ kpamu o yotsongusu le. ¹²U yaꞋan ta̱ nannai, adama a na uma a nam pa, o foɓuso uma a̱ Ka̱shile a yaꞋanka yi tsugbashi, ka̱ta̱ a aza o Kutoni a na i ikyamba i Kishi, o doku o gbonguro n utsura. ¹³A uye u nam pa, ra̱ka̱ vu tsu ci ta̱ o kuɓolongu tsu vuza te n tsu na tsu ushuki n Ka̱shile ɗa kpamu ci yevei Maku ma̱ ni, ra̱ka̱ vu tsu kpamu ci ta̱ o kokpo aza a na a lyaꞋi kelime. Ɗaɗa, ci ta̱ o kokpo ci Kishi mayin, vuza na wi derere tsu na u gaꞋin.

¹⁴Tso kudoku tsa buwa tsu muku kpamu ba. Ci kpamu o kokpo an kpantsu ku na aɓau a ci ɗika a kubanka a̱ ubuta̱ u na a cikalai ba. Tsa kuzuwa a̱ɗu a̱ tsu a̱ ubuta̱ wa aza a na i a kugbagbala kuya̱nsa̱ tsu n kuyotsongusu ka aꞋuwa ba. ¹⁵Tsu kucikpa tsu dansa ili i mayun, ka̱ta̱ ci ciga itoku i tsu, adama a na tsu gbonguro ka̱ta̱ tso okpo vi te n Kishi mayin, vuza na wi kaci ka̱ a̱Ꞌisa̱ a aza o Kutoni. ¹⁶Kishi ko ɓolongu ta̱ uma a̱ ni dem a̱ ubuta̱ u te, uteku u na akawa o tsu ɓolongu ukambu wi ikyamba i vuma ra̱ka̱. A ayin a na baci ukambu dem u yaꞋin ulinga u ni, u tsu ɓa̱nka̱ ta̱ akambu o yoku o gbonguro, adama a na ikyamba ya dem i yaꞋan m ma̱ta̱na̱ o kugbonguro n ucigi mayin.

Wuma u savu

¹⁷Adama a nannai, mi ta̱ a kudana ɗa̱, mi ta̱ a kudansuka ɗa̱ kpamu a̱ ka̱tsuma̱ ka kula ku Yesu, ka̱sa̱kpa̱i kuyongo tsa aza a na e yevei Ka̱shile ba. Uye u na a ci yaꞋan kusheshe, ukuna u gbani u ɗa. ¹⁸Ele i ta̱ a̱ ka̱yimbi, e yeve kpamu ili ba, adama a na a iwan ta̱ kupana. Tsu nan lo a̱ kuciya̱ wuma u na Ka̱shile ke ci neke ba. ¹⁹A yaꞋan baci kagbani-gbani, o tsu doku a pana wono ba. E neke ta̱ ka̱ci ke le a̱ ubuta̱ u kuyaꞋan ili i na ikyamba i cigai, a ci yaꞋan ta̱ unushi u tsugbani kakau dem, i kpamu a kufuɗa a̱ ka̱sa̱kpa̱ kuyaꞋan ili i nam pa ba.

²⁰Amma avu, ana vi isai Kishi, ta a danai nu vi yongo nannai ba. ²¹N yeve ta̱ i pana ta̱ ukuna u ni, a̱ɗa̱ kpamu ta punu yi wa̱ ni, ɗa o yotsongi ɗa̱ ili i mayun i na yi punu a̱ ubuta̱ u Yesu. ²²O yotsongusu ɗa̱ ta̱ i ka̱sa̱kpa̱ uye u kuku u na yi ishi o kuyongo n ci cau. N ayin a nan lo, wuma u ɗa̱ wi ta̱ a̱ kuna̱mgba̱ adama a na i ci ciga ta̱ kuyaꞋan ili i gbani-gbani kakau dem. ²³Gogo na u gaꞋan ta̱ i ka̱sa̱kpa̱ Ka̱shile ka sabaꞋa wuma u ɗa̱ adama a na i gita̱ kuyaꞋan kusheshe ku savu. ²⁴Ka̱sa̱kpa̱i Ka̱shile ko bonoko ɗa̱ uma a savu. Ka̱shile ka zuwa ɗa̱ ta̱ yo okpo ci ni, adama a nannai yo okpo kpamu ciɗa n usuɓi a̱ ubuta̱ u mayun.

²⁵Ka̱sa̱kpa̱i kuyaꞋan aꞋuwa. Yaba dem vu ɗa̱ u dansa ili i mayun u vutoku vuza vu Kutoni, adama a na ci ta̱ tsu ukambu kakau wi ikyamba i te. ²⁶A ayin a na baci vi yaꞋin wupa, ka̱ta̱ vi yaꞋan unushi ba, ka̱ta̱ vu zuka vu ka̱sa̱kpa̱ kuyaꞋan wupa kafu kanna ka̱ yikpa̱. ²⁷Ka̱ta̱ i neke Kalijani uye u lyaꞋa utsura u ɗa̱ ba. ²⁸Vuza na wi ishi koboki u doku u yaꞋan uboki ba. A na wa yaꞋan nannai, u yaꞋan ulinga ka̱u adama a na u ciya̱ ili i na u kuɓa̱nka̱ aza a unambi.

²⁹Ka̱ta̱ vi ya yaꞋan kadanshi ka gbani-gbani ba, amma vu dansa ili i singai i na i kuzuwa uma a gbama. Dansa ili i na i gaꞋin adama a aza a na a kupanaka wu ka̱ta̱ ili i na vu dansai i gaꞋan le. ³⁰Ka̱ta̱ vu zuwa Ayinviki a̱ Ka̱shile a̱ na̱mgba̱ ka̱tsuma̱ ba. Adama a na Ayinviki a̱ Ka̱shile a ɗa o okpoi tsu urotu u na u yotsongi a na a̱ɗa̱ aza a̱ ni a ɗa. Ka̱shile ke neke ɗa̱ ta̱ Ayinviki adama a na u yotsongu Ka̱shile ki ta̱ a kuzuwa ɗa̱ i ba̱ruwa̱, kanna ku ukocishi ka yawa baci.

³¹Ka̱sa̱kpa̱i mokovonoi, n wupa, n kuna̱mgba̱ ka̱tsuma̱ n uma. Ka̱ta̱ i yaꞋan kanananai ko i shika uma, ko i yaꞋan ili i yoku i wupa i na i kutuka̱ n atakaci ba. ³²A na ya yaꞋan nannai, yaꞋankpanai kasingai, ka̱ta̱ i yotsongu asuvayali. Cinukpakai uma a ayin a na baci a nusakai ɗa̱, tsu na Ka̱shile a̱ ka̱ci ka̱ ni u cinukpakai ɗa̱ unushi u ɗa̱ adama a̱ Kishi.

Ida̱shi a̱ ubuta̱ u kutashi

¹Yongoi tsu na Ka̱shile ki, adama a na a̱ɗa̱ muku n ni n ɗa n na u cigai ka̱u. ²Ciga uma ayin tutu uteku u na Kishi ka cigai tsu, ali ɗa u kuwa̱i adama a̱ tsu. U nekei wuma u ni tsa alyuka u Ka̱shile, ɗaɗa wo okpoi ci ili i ma̱gula̱ni† a̱ ubuta̱ u Ka̱shile.

³Ka̱ta̱ i ka̱sa̱kpa̱ a cina unushi u tsugbani e mere ma̱ ɗa̱ ba, ko ili i yoku i wono, ko kuciga ili n a̱bunda̱i. IcuꞋu yu unushi i nan lo i kuciya̱ ubuta̱ wi ida̱shi e mere ma uma a̱ Ka̱shile ba. ⁴U gaꞋan kpamu i yaꞋan kadanshi ko wono e mere ma̱ ɗa̱, ko i yaꞋan kadanshi ka tsulau m ma̱ɗa̱ɗi ma wasasa ba. A na ya yaꞋan nannai, kucikpai i cikpa Ka̱shile adama a ili i na wi a kuyaꞋan adama a̱ ɗa̱. ⁵I yeve ta̱ ili i nam pa ya mayun ɗa: Vuza na baci wi a kuyaꞋansa unushi u tsugbani, ko kuyaꞋansa i gbani-gbani, ko kuciga ili n a̱bunda̱i, vuza nam pa u kuꞋuwa o tsugono ci Kishi n tsu Ka̱shile ba. Vuza na wi n ucigi wi ili n a̱bunda̱i wi ta̱ a kuyaꞋanka ka̱ma̱li tsugbashi. ⁶Ka̱ta̱ i ka̱sa̱kpa̱ vuza u ya̱nsa̱ ɗa̱ a̱ ubuta̱ u kudana ɗa̱ ili i na yi ya aꞋuwa ba. Megeshe ma buwa ka̱u ba, ana Ka̱shile ka kutakacika uma a na a̱ kpa̱ɗa̱i kupanaka yi, ɗa i a kuyaꞋan ili i gbani-gbani i nan lo. ⁷Ka̱ta̱ i ɓolongu ka̱ci ka̱ ɗa̱ n aza a na i a kuyaꞋan ili i gbani-gbani i nan lo ba.

⁸N ayin a cau, yi ta̱ a̱ ka̱yimbi, amma gogo na yi ta̱ uɓolongi n Vuzagbayin, ɗa i uwai kpamu a kutashi. Tsu nan lo i yongo an uma a na i a̱ ubuta̱ u kutashi. ⁹N dana ta̱ nannai adama a na kutashi ku tsu zuwa ta̱ uma a yaꞋan ili i singai, n i na yi derere, n i mayun.

¹⁰Adama a nannai, piꞋisai ili i na i yokpoi Vuzagbayin ka̱ta̱ i yaꞋan i ɗa. ¹¹Ka̱ta̱ i ɓolongu ka̱ci ka̱ ɗa̱ a kuyaꞋan ili n uma a na i a̱ ka̱yimbi ba. Ili i nan lo ya i wasasa i ɗa. A na ya yaꞋan nannai, zuwai uma e yeve a na ili i nam pa i gbani-gbani i ɗa. ¹²Ili i wono i ɗa vuza u dansa ili i na uma a nan lo i a kuyaꞋan a usokongi. ¹³Amma ayin a na baci kutashi ka akanai le, yaba dem wi ta̱ e kene uteku u na ili ya i yotsoi, ¹⁴adama a na kutashi ku tsu yotsongu ta̱ ili dem. Ɗaɗa i zuwai ɗa a danai,

“A̱ɗa̱ vu na yi alavu, jimgbai!

Ɗenga̱i a̱ ukpa̱,

Kishi ki ta̱ a kakana ɗa̱.”

¹⁵Adama a nannai, zukai n uteku u na yi o kuyongo. Ka̱ta̱ i yongo tsa alau ba, amma yongoi n ugboji. ¹⁶YaꞋin ulinga n ayin a na i ciya̱i dem adama a kuyaꞋan ulinga u singai, adama a na uma a ci yaꞋan ta̱ kagbani-gbani a ayin a nam pa a. ¹⁷Ka̱ta̱ yo okpo alau ba, amma piꞋisai ili i na Vuzagbayin wi a kuciga i yaꞋan. ¹⁸Ka̱ta̱ i soꞋo ali ma maka ɗa̱ ba, adama a na ili i nan lo i ɗaɗa i kula̱nga̱sa̱ ɗa̱. A na ya yaꞋan nannai, ka̱sa̱kpa̱i Ayinviki a̱ Ka̱shile a shana punu wa̱ ɗa̱. ¹⁹Cananai ishipa i kucikpa Ka̱shile kakau dem adama a na i nekenei katsura ka̱ a̱ɗu. YaꞋin ishipa i na i kucikpa Vuzagbayin n a̱ɗu a̱ ɗa̱ dem. ²⁰Nekei Ka̱shile Esheku a̱ tsu tsugbayin ayin tutu, adama a Vuzagbayin vu tsu Yesu Kishi.

A̱ma̱ci n ali

²¹Panakpanai, adama a na i neke Kishi tsugbayin.

²²A̱ɗa̱ a̱ma̱ci, panakai ali a̱ ɗa̱ uteku u na yi a kupanaka Vuzagbayin, ²³adama a na vali a̱yi ɗa kaci ka vuka, tsu na Kishi wi kaci ka̱ a̱Ꞌisa̱ a aza o Kutoni, ɗaɗa ta na ikyamba i ni. A̱yi ɗa kpamu vuza na wi a kisa i ɗa. ²⁴Adama a nannai vuka dem u panaka vali vi ni a̱ ubuta̱ wi ili dem, uteku u na aza o Kutoni i a kupanaka Kishi.

²⁵A̱ɗa̱ ali a na i yaꞋin yolo, yaba dem u ciga vuka vi ni, uteku u na Kishi ka cigai a̱Ꞌisa̱ a aza o Kutoni ali u kuwa̱i adama a ɗa, ²⁶ciya̱ u bonoko a ɗa ciɗa. U tsu za̱Ꞌa̱ le ta̱ m mini n kadanshi ka̱ ni feu. ²⁷U yaꞋan ta̱ nannai adama a na u bonoko aza a̱ a̱Ꞌisa̱ a̱ ni an vuka vu savu n tsuloboi, ka̱ta̱ u tuka̱ yi wa̱ ni tsu vuma vu na wi babu ikpa̱vici ko a̱shinda̱ ko unata u yoku kenu. U kucikpa u yongo ciɗa babu unushi. ²⁸Ta kpamu nannai, vali u ciga vuka vi ni, uteku u na u cigai ikyamba i ni. Vali vu na baci vi cigai vuka vi ni wi ta̱ a kuciga ka̱ci ka̱ ni. ²⁹Babu vuza na u saꞋwai kuꞋiwan ikyamba i ni, amma u ci lyaꞋatangu ta̱ i ɗa ka̱ta̱ kpamu u la̱na̱ i ɗa kpamu mayin. Ili i nan lo i ɗa Kishi ka yaꞋankai a̱Ꞌisa̱ a aza o Kutoni a̱ ni, ³⁰adama a na a̱ tsu ugboku u ɗa kakau wi ikyamba i ni.

³¹Uteku u na Katagarda ka Ciɗa ka danai, “Vuza u ka̱sa̱kpa̱ esheku a̱ ni n a̱na̱ku a̱ ni ka̱ta̱ u yaꞋan yolo, ele aza e re e le o okpo vi te.”5:31 Ugi. 2:24.³²Ili i mayun yi ta̱ punu i na yi usokongi punu a̱ ubuta̱ u kuyotsongusu u nam pa wa. Mi ta̱ a kadanshi ka̱ Kishi n a̱Ꞌisa̱ a aza o Kutoni. ³³Amma ili i nam pa ya feu mayun ɗa wa̱ ɗa̱: mayun ɗa vali dem u ciga vuka vi ni tsu na u cigai ka̱ci ka̱ ni, vuka kpamu dem u neke vali vi ni tsugbayin.

Muku nu mmaci n le

¹A̱ɗa̱ muku, panakai mmaci n ɗa̱, adama a na a̱ɗa̱ uma a Vuzagbayin ɗa, adama a na ili i singai i ɗa i na i gaꞋin i yaꞋan. ²Punu a̱ Wila̱ Kupa, ili i iyain i na i koɓolo n uzuwakpani i ɗa na: “Cikpa eshevu n a̱na̱vu.” ³Na va ɗaɗa uzuwakpani wa: “Vi cikpa baci eshevu n a̱na̱vu, ili dem yi ta̱ a kuwala wu mayin, vi ta̱ kpamu o kuyongo m megeshe a aduniyan a nam pa.”

⁴Mmaci, ka̱ta̱ i zuwa muku n ɗa̱ n yaꞋan wupa ba. I kucikpa i la̱na̱ le mayin, yaꞋankai le odoki ka̱ta̱ i yotsongu le a uye u na Vuzagbayin u cigai.

Agbashi n azagbagbaꞋin

⁵A̱ɗa̱ vu na yi agbashi, panakai azagbagbaꞋin a̱ ɗa̱ na a aduniyan. Panai wovon u le, i cikpa le ka̱ta̱ i yaꞋanka le tsugbashi tsu mayun uteku u na i kuyaꞋanka Kishi. ⁶YaꞋin ulinga ka̱u a ayin dem, amma adama a na i cigai azagbagbaꞋin a̱ ɗa̱ a pana uyoꞋo u ɗa̱ koci i baci a kinda ɗa̱ ba. Amma ili i na i laꞋi n kugaꞋan i ɗaɗa i yaꞋan ulinga u ɗa̱ n a̱ɗu a̱ ɗa̱ ra̱ka̱, uteku u na Ka̱shile ka ci ciga, adama a na a̱ɗa̱ agbashi a̱ Ka̱shile a ɗa. ⁷YaꞋin ulinga u ɗa̱ m ma̱za̱nga̱, adanshi Vuzagbayin ɗa yi a kuyaꞋanka u ɗa, amma adama a uma koci ba. ⁸Ciɓai Ka̱shile ki ta̱ a kutsupa ulinga u singai u na vuza dem u yaꞋin, ko wi kagbashi ko wi kagbashi ba.

⁹A̱ɗa̱ vu na yi kpamu azagbagbaꞋin, yaꞋankai agbashi a̱ ɗa̱ mayin feu. Ka̱ta̱ i dana sai i takacika le ba. Ciɓai, azagbagbaꞋin n agbashi ra̱ka̱ vu ɗa̱ yi ta̱ n Vuzagbayin vi te na ɗe gaɗi. U ci yaꞋanka ta̱ uma dem derere.

Ili i kuvon i Ka̱shile

¹⁰Kadanshi ku ukocishi ka̱ va̱ a kubana wa̱ ɗa̱ ka ɗaɗa na: Tsurakpai n utsura u Vuzagbayin u na wi gba̱ra̱ ayin tutu, adama a na yi ta̱ uɓolongi n a̱yi. ¹¹Kosoji ko tsu foɓuso ta̱ ili i kuvon adama a na u yaꞋan vishili. N nannai kpamu, mayun ɗa i foɓuso ili ra̱ka̱ i na Ka̱shile ke nekei ɗa̱, adama a na ayin a na baci Kalijani† ki a kuciga kuya̱nsa̱ ɗa̱, i fuɗa i shamkpa vishili ka̱ta̱ i kpa̱ɗa̱ kuyikpa̱.¹²Ci a̱ vishili n uma tsu tsu ba, amma ci ta̱ a̱ vishili n wunla̱i u gbani-gbani n utsura kakau u na wi o tsugono punu a aduniyan a̱ tsu a na i n ka̱yimbi, ci ta̱ kpamu a̱ vishili n utsura u kavama u na wi ɗe gaɗi.

¹³Adama a ili i nam pa, ukai ili ra̱ka̱ i vishili i na Ka̱shile ke nekei ɗa̱. Ka̱ta̱ a ayin a gbani-gbani i kpa̱ɗa̱ kusuma. Yi ta̱ a kufuɗa ya̱ shilika̱ ali uteku, a̱ɗa̱ ta na ushamgbi kashani n utsura. ¹⁴Nannai feu foɓusoi ka̱ci ka̱ ɗa̱! Dansai ili i mayun ayin tutu. Ukuna u mayun wi ta̱ tsu kaɗambura ka na vuza u ci shiya a̱ kukyuꞋun ku ni adama a na u foɓuso ka̱ci ka̱ ni kuyaꞋan ulinga. YaꞋan i na yi derere, adama a na usuɓi wi ta̱ an motogu ma̱ viyum ma na ma̱ tsu sa̱nka̱ ili kuciya̱ wu. ¹⁵LyaꞋi kelime n kuneke a̱ɗu n Arabali a Singai a na e ci neke ma̱ta̱na̱. Wi ta̱ ta na o kokpo adanshi yi ta̱ n ataka e ene a̱ ɗa̱, ka̱ta̱ i foɓuso mayin. ¹⁶Ili i yoku i ɗaɗa na: lyaꞋi kelime n kushuku n Yesu Kishi. Uneki u ka̱ɗu u ɗa̱ wi ta̱ o kokpo an ma̱ra̱ga̱ ma na ma kukpada ayaꞋa a akina a na MalyaꞋi ma tsu tawaka ɗa̱. ¹⁷Ana i yevei Ka̱shile ki isa ɗa̱ ta̱ babu munla̱i, wi ta̱ tsu ma̱kuꞋun mo kuvon ma̱ ɗa̱ ma na ma̱ tsu sa̱nka̱ ili kuciya̱ aci a̱ ɗa̱. Ka̱ta̱ i yongo ufoɓushi adama a na i yaꞋan ulinga n Kadanshi ka̱ Ka̱shile. Wi ta̱ tsu kotokobi ka na Ayinviki a̱ Ka̱shile e ci neke ɗa̱.

¹⁸I yaꞋan baci ili i nam pa, yaꞋin kavasa ka̱ta̱ i folono Ka̱shile ka̱ ɓa̱nka̱ ɗa̱ a̱ ubuta̱ wi ili ra̱ka̱ a ayin dem uteku u na Ayinviki a̱ Ka̱shile o tonoi n a̱ɗa̱. Yi baci kpamu a kuyaꞋan kavasa yongoi utaɗukpi. LyaꞋi kelime n kuyaꞋan kavasa ayin tutu adama a uma a̱ Ka̱shile ra̱ka̱.

¹⁹YaꞋankai mu feu kavasa, adama a na Ka̱shile ke neꞋe mu ili i na yi derere i na n kudansa n gita̱ baci kadanshi, adama a na n yaꞋan kadanshi babu wovon ka̱ta̱ n dana uma akaka a na u yotsongi tsu gogo na a̱ ubuta̱ wa Arabali a Singai. ²⁰Yesu Kishi u zagba mu ta̱ mo okpo kalingata ka̱ ni, n dana Arabali a Singai a nam pa, i ɗaɗa i zuwai ɗa a shiyai mu n ikani a ugbashi gogo na. YaꞋankai mu kavasa adama a na ɗa baci n danai Arabali a Singai n yaꞋan kadanshi babu wovon, uteku u na u yotsoi n yaꞋan.

Ikya̱shi yu ukocishi

^21-22N ciga ta̱ i yeve uteku u na mi n i na mi kpamu a kuyaꞋan. I ɗa i zuwai ɗa mi a̱ kusuku Tikiku wa̱ ɗa̱, vuza tsu ɗa vu na ci cigai, ɗa wi feu a kuyaꞋanka Vuzagbayin tsugbashi mayin. Wi ta̱ a kudana ɗa̱ ili i na i ciya̱i tsu, ka̱ta̱ kpamu u doku ɗa̱ utsura u ka̱ɗu.

²³N yaꞋan ta̱ kavasa Ka̱shile Dada n Vuzagbayin Yesu Kishi, e neke ma̱ta̱na̱, n ucigi, n uneki u ka̱ɗu wa aza o Kutoni dem! ²⁴Ka̱sa̱kpa̱ Ka̱shile ko yotsongu kasingai ka̱ ni wa aza a na a cigai Vuzagbayin vu tsu Yesu Kirisiti Kishi ra̱ka̱ n ucigi u na u tsu kpa̱ɗa̱ kukotso.