Kolosiya

Akaka a̱ Bulusu a kubana wa

Aza o Kolosiya

Ukuna u katagarda ka nam pa

Bulusu u ɗana ta̱ akaka a nam pa a kubana wa aza o Kutoni a Kolosiya a ayin a na wi a ugbashi. Bulusu ɗa u gita̱ngi a̱Ꞌisa̱ a nan lo a ba. Ka̱ta̱ u saꞋwa kubana ɗe ba. U yeve ta̱ ukuna wa aza o Kutoni wa, adama a na Abafa u tonoko yi ta̱. Abafa vuza vu Kutoni ɗa vu na vu uta̱i o Kolosiya ɗa u yongoi m Bulusu a̱ ubuta̱ wu ugbashi.

Aza o Kutoni a na i o Kolosiya a̱ gita̱ ta̱ kutono kuyotsongusu ku gbani-gbani. O tonoi wila̱ u yoku u na wi derere ba, ɗa kpamu a cigai kucikpa alingata n wunla̱i u gbagbaꞋin u yoku. Bulusu u ɗanai adama a na u dana le ili i nan lo ya i gaꞋan ba. U ciga le ta̱ e yeve a na Kishi ke nekei le ili ra̱ka̱ i na a cigai. U danai le hawun uteku u na Ka̱shile n Kishi a̱ tsu ɓa̱nka̱ aza o Kutoni.

Anana kpamu, Kishi ka̱ tuka̱ ta̱ n ili dem i na vuma u cigai adama a na u cikpa Ka̱shile tsu na u gaꞋin. Katagarda ka nam pa ka dansa ta̱ ukuna u nam pa hawun e keteshe.

Ili i na yi punu udariki a katagarda ka nam pa

1. Kuɓa̱yuwa̱ (1:1-2)

2. Kavasa ko ogodiya (1:3-8)

3. Vuza n ulinga u Kishi (1:9—2:19)

4. Wuma u savu a̱ ubuta̱ u Yesu (2:20—4:6)

5. Ikya̱shi yi ukocishi (4:7-18)

Kuɓa̱yuwa̱

¹Mpa ɗa Bulusu. Ka̱shile ka zagba mu ta̱ mo okpo vuzavusuki vi Yesu Kirisiti Kishi. Timoti wi ta̱ na koɓolo nu mpa, a̱yi kpamu vuza tsu ɗa.

²Mi ta̱ a kuɗanaka uma a̱ Ka̱shile a na i o Kolosiya. Aza a̱ tsu a ɗa, i ta̱ kpamu o kutono Kishi mayin.

YaꞋan Ka̱shile ko yotsongu ɗa̱ kasingai ka̱ ni m ma̱ta̱na̱ ma̱ ni.

Kavasa ko ogodiya

³Ci ci yongo ta̱ a kuyaꞋan kavasa adama a̱ ɗa̱ ayin tutu, ka̱ta̱ ci cikpa Ka̱shile, vuza na wi Esheku a Vuzagbayin vu tsu Yesu Kishi. ⁴Ili i na i zuwai i ɗaɗa tsu pana ta̱ yu ushuku ta̱ n Yesu Kishi, ɗa kpamu tsu panai a dana i ciga ta̱ uma a̱ Ka̱shile ra̱ka̱. ⁵Yi ta̱ n uneki wa̱ a̱ɗu n ucigi u nam pa adama a̱ a̱pa̱Ꞌa̱ a̱ ɗa̱. Ka̱shile ta na ka zuwaka ta̱ ɗe ili i na i keɗekei a̱pa̱Ꞌa̱ a na ɗe gaɗi, a̱ ubuta̱ u na i kene i ɗa gogo na ba. A̱ɗa̱ i pana ta̱ ukuna u kukeɗe wa̱ a̱pa̱Ꞌa̱ u nam pa a ayin a na i panai akaka a mayun, Arabali a Singai a na a danai ɗa̱. ⁶Arabali a Singai a nam pa a sabaꞋa ta̱ wuma u ɗa̱ a kanna ka na i gita̱i kupana mayin ili i mayun i kasingai ka na Ka̱shile ko yotsongi aza a unushi. Arabali a Singai a nan lo ta na i ta̱ a̱ kuka̱ra̱Ꞌa̱ aduniyan ra̱ka̱. I ta̱ a kumatsa ili a sabaꞋa baci wuma u uma a̱ ubuta̱ dem tsu na a yaꞋin n a̱ɗa̱.

⁷Abafa ka̱ja̱Ꞌa̱ ka̱ tsu kaꞋa ku ulinga, ci ciga yi ta̱ ta na ka̱u. A̱yi ɗa vuza na u tuka̱i ɗa̱ n Arabali a Singai a. U yaꞋanka ta̱ Kishi tsugbashi mayin tsu kalingata ka̱ tsu wa̱ ɗa̱. ⁸A̱yi ɗa vuza na u danai tsu tsu na Ayinviki a̱ Ka̱shile e nekei ɗa̱ ucigi u gbayin a kubana wa aza o yoku.

⁹Adama a nannai, ci ta̱ a kuyaꞋan kavasa ayin tutu adama a̱ ɗa̱. Ci yaꞋan ta̱ nannai ana tsu panai ukuna u ɗa̱, tsu ka̱sa̱kpa̱ ta na kuyaꞋan avasa ba. Tsu folonoi Ka̱shile ke neke ɗa̱ kuyeve mayin ki ili i na u cigai ɗa̱ i yaꞋan, ɗa tsu folonoi ni kpamu u neke ɗa̱ ugboji wu ukuna u ciɗa. ¹⁰Nannai kpamu tsu na i kuyongo wi ta̱ e kuneke Vuzagbayin tsugbayin ayin tutu, ka̱ta̱ u pana ma̱za̱nga̱ n a̱ɗa̱. Ayin tutu i matsa ili i singai adama a ulinga u singai u ɗa̱, ka̱ta̱ a̱ɗa̱ kpamu ayin tutu i yotsongu ucigi a kubana wa aza o yoku. I yaꞋan baci nannai, yi ta̱ a kuyaꞋan utsura ka̱ta̱ i gbonguro n kuyeve ku Ka̱shile ayin dem.

¹¹Kavasa ka̱ tsu kaꞋa Vuzagbayin u neke ɗa̱ utsura u na wi tsu utsura u tsugbayin u ni adama a na i ciya̱ uremi u ka̱ɗu n ka̱lulu, adama a na yo oꞋo ba. Ka̱sa̱kpa̱ a̱yi u shatangu ɗa̱ m ma̱za̱nga̱. ¹²Ci ciga ɗa̱ ta̱ ayin tutu i cikpa Dada. U zuwa ɗa̱ ta̱ i ciya̱ upecu wi ili i na yi i uma a̱ ni na ɗe o tsugono tsu kutashi. ¹³Ka̱shile ki isa tsu ta̱ a̱ ubuta̱ u vuza na wi a kulyaꞋa tsugono tsu ka̱yimbi. Ka̱shile kpamu ka̱ tuka̱ tsu ta̱ o tsugono tsu Maku ma̱ ni ma na u cigai ka̱u. ¹⁴Ka̱shile ka tsupaka tsu ta̱ uba̱ruwi a̱ ubuta̱ wu mpasa m Maku ma̱ ni, nannai ɗa u cinukpakai tsu unushi u tsu ra̱ka̱.

Kishi ka laꞋa ta̱ uma ra̱ka̱

¹⁵Yesu Kirisiti Kishi wi ta̱ derere n Ka̱shile, uma a kufuɗa kene Ka̱shile n a̱shi e le ba. A̱yi ɗa Magaji ma̱ Ka̱shile, wi ta̱ ta na n tsugono ci ili dem i na Ka̱shile ka yaꞋin. ¹⁶Ili i na i zuwai i ɗaɗa Ka̱shile ka yaꞋan ta̱ ili ra̱ka̱ wa̱ ni. Yesu u yaꞋan ta̱ ili ra̱ka̱ i na yi gaɗi n ili ra̱ka̱ i na yi a iɗika na feu. U yaꞋin ili ra̱ka̱ i na ci e kene, ɗa u yaꞋin kpamu ili ra̱ka̱ i na ci a̱ kukpa̱ɗa̱ kene. U yaꞋin icuꞋu i tsugono ra̱ka̱ nu utsura kakau ra̱ka̱ a̱ a̱da̱nga̱shile. Mayun ɗa Maku ma̱ Ka̱shile ma yaꞋin ili ra̱ka̱ adama a na ili ya ra̱ka̱ i neke yi tsugbayin. ¹⁷Wi ta̱ lo kafu ili i na i buwai, a̱yi ɗa vuza na u tsu zuwa ili ra̱ka̱ yo okpo derere koɓolo mayin.

¹⁸Kirisiti Kishi a̱yi ɗa Kaci ka kpaꞋa ka aza o Kutoni a̱ ni, ele ɗa ikyamba i ni. A̱yi ɗa vuza na wi ira̱i kpaꞋa ko otoni ka, a̱yi ɗa kpamu vuza iyain vu na Ka̱shile ka̱ ɗengusa̱i a kasaun ɗa u bonokoi ni n wuma kpamu. Adama a nannai, u laꞋa ta̱ ili dem. ¹⁹Ka̱shile ke enei u gaꞋan ta̱ ili dem adama a̱ ni i yaꞋan feu punu a̱ ubuta̱ u Kirisiti Kishi. ²⁰Ɗa Ka̱shile ke sheshei u danai Kishi feu wo okpo uye u na u zagbai ɗa u bonokoi ili i gaɗi n yi iɗika yo okpo ciɗa a̱ ubuta̱ u ni. Mpasa n Yesu n ɗa n tuka̱i m ma̱ta̱na̱ ma̱ Ka̱shile ana n ɗa n loloi a̱yi gaɗi a maɗanga ma atakaci.

²¹Kafu ili i nam pa, yi ishi ta̱ daꞋin n Ka̱shile. Yi ishi ta̱ irala i ni, ɗa kusheshe ku gbani-gbani n ulinga u gbani-gbani u ɗa̱ u pecei ɗa̱ n a̱yi. ²²Amma gogo na u bonoko ɗa̱ ta̱ wa̱ ni tsa a̱ja̱Ꞌa̱ a̱ ni. U yaꞋan ta̱ ili i nam pa n ikyamba i vuma i Maku ma̱ ni Yesu, vuza na u kuwa̱i a maɗanga ma atakaci. Adama a nannai, Yesu Kishi u bonoko ɗa̱ ta̱ u Ka̱shile, ɗa i bonoi ciɗa babu unushi ko u te, tsu na babu vuza na u kushika ɗa̱ i shamgba baci e kelime ka̱ ni. ²³Amma i lyaꞋa kelime n kushuku a na ili ya mayun ɗa, ka̱ta̱ i shamgba punu n utsura. Ka̱ta̱ i ka̱sa̱kpa̱ a̱pa̱Ꞌa̱ a na yi isai a ayin a na i panai Arabali a Singai ba. Arabali a Singai a nam pa a̱ ka̱ra̱Ꞌa̱ka̱ ta̱ a ɗa a aduniyan ra̱ka̱, mpa Bulusu mo okpo ta̱ kagbashi ka kuɗika akaka a nam pa.

Ulinga u Bulusu

²⁴N tsu pana ta̱ ma̱za̱nga̱ e neke mu baci atakaci adama a̱ ɗa̱. Mi ta̱ o kusoꞋo atakaci adama a ili i na i ta̱wa̱i dem, ko n soꞋo a yawa a na Kishi u soꞋi ba. Atakaci a nam pa a̱ tsu tuka̱ ta̱ n ili i na i kuɓa̱nka̱ ikyamba i ni, ɗaɗa kpaꞋa ka aza o Kutoni. ²⁵Mpa gogo na kagbashi ka kpaꞋa ka aza o Kutoni kaꞋa adama a na Ka̱shile ka zuwa mu ta̱ n dana ɗa̱ akaka a̱ Ka̱shile ra̱ka̱ n tsu na i mayun. ²⁶Ka̱shile ko sokongu ta̱ akaka a nam pa wa aza a cacau, amma gogo na a ayin a nam pa u yotsongu ta̱ a ɗa u uma a̱ ni. ²⁷Ka̱shile ko yotsongi akaka a̱ ni adama a na u ciga ta̱ a̱ɗa̱ Aza̱ka̱yimbi i yeve ili i singai i nam pa n ukuna u tsugbayin. Ili i na yi ishi usokongi n ayin a ɗe, ɗa gogo na a̱ ɓa̱yuwa̱i i ɗa e keteshe i ɗaɗa: Kishi wi ta̱ punu n a̱ɗa̱, nannai ɗa i yevei a na ya kufuɗa kuꞋuwa tsugbayin ci ni n a̱yi.

²⁸Adama a nannai ci ta̱ a kudana yaba dem ukuna u Kirisiti Kishi a̱ ubuta̱ dem u na baci tsu banai. Tsu kushe le ta̱ ɗa kpamu ci yotsongushi le. Ci yaꞋan ta̱ ulinga n kuyeve ku na Ka̱shile ke nekei tsu ra̱ka̱, adama a na ci ciga ta̱ aza a na i n Kirisiti Kishi o okpo tsu na u gaꞋin o okpo ayin a na baci a banai u Ka̱shile. ²⁹N dakaka ta̱ ka̱u adama a na ili i nam pa i yaꞋan, ɗaɗa n shamgbai n utsura u gbayin u Kishi u na wi a kuyaꞋan ulinga nu mpa.

¹N ciga ta̱ i yeve uteku u na n dakakai adama a̱ ɗa̱, n adama a aza o Kutoni a na i Ladukiya, n aza o Kutoni a na ka̱ta̱ tsu saꞋwai kuyevenei ba. ²N yaꞋan ta̱ ili i nam pa adama a na n dokusu le utsura u ka̱ɗu ka̱ta̱ m ɓolongu le n ucigi. Na wi ta̱ a kuzuwa le a̱ ciya̱ ili i singai n a̱bunda̱i, ka̱ta̱ e yeve mayin ili i na yi usokongi i Ka̱shile. Mi ta̱ a kuyaꞋan kadanshi ka̱ Kirisiti Kishi. ³A̱yi ɗa vuza na wi a̱ kuɓa̱na̱ uciyi wu ugboji ra̱ka̱ n kuyeve ku na ci a̱ kukpa̱ɗa̱ kene. ⁴N dana ɗa̱ ta̱ ili i nam pa adama a na ka̱ta̱ vuza u fuɗa u ya̱nsa̱ ɗa̱ n ugboji ko kanananai n a̱ɗa̱ ba. ⁵Ko a na mi daꞋin n a̱ɗa̱, ka̱ɗu ka̱ va̱ ki ta̱ lo n a̱ɗa̱. Mi ta̱ a̱ ma̱za̱nga̱ a na yi o kuyongo tsu na u gaꞋin adama a na yi ta̱ n uneki wa̱ a̱ɗu wu ugbami n Kishi.

Kirisiti Kishi u tsu tuka̱ ta̱ wuma u mayun

⁶Tsu na gogo na yi isai Yesu Kishi wo okpoi Vuzavaguɗu vu ɗa̱, lyaꞋi kelime n kutono yi. ⁷Zuwai aralu a̱ ɗa̱ wa̱ ni ka̱ta̱ i gbonguro n a ɗa. Nannai ɗa uneki wa̱ a̱ɗu u ɗa̱ u kuciya̱ kumiꞋi ku utsura, derere tsu na o yotsongushi ɗa̱. Ta kpamu nannai i kufuɗa kuneke ogodiya n a̱bunda̱i.

⁸Ka̱ta̱ i ka̱sa̱kpa̱ vuza u bonoko ɗa̱ agbashi a̱ ubuta̱ u kanananai ka wasasa ba. Kanananai ka ki ta̱ a kuyaꞋan adanshi ki ta̱ n ugaꞋin, amma kuyotsongusu ku vuma ku ɗa koci. Ku uta̱ ta̱ a̱ ubuta̱ wu utsura wa aduniyan u nam pa, amma u Kirisiti Kishi u ɗa ba. ⁹Ili i Ka̱shile ra̱ka̱ ta punu yi a ikyamba i Kirisiti Kishi. ¹⁰A̱ɗa̱ yi ta̱ koɓolo n a̱yi. Nannai ili i nam pa ra̱ka̱ ta punu yi n a̱ɗa̱, ɗa wi a kulyaꞋa tsugono n utsura kakau n uma a gbagbaꞋin dem.

¹¹Ana i ta̱wa̱i u Kishi u kiɗa ɗa̱ ta̱ avaja amma punu a̱ a̱ɗu. Vuma ɗa u kiɗai ikyamba i mayun i ɗa̱ ba. Ili i na Kishi u yaꞋin i ɗaɗa u kiɗai ili yu unushi wa̱ ɗa̱. ¹²A yaꞋanka ɗa̱ baci kusumbu ka akucina, a̱ ciɗa̱ngu ɗa̱ ta̱ n Kishi. Ɗa a̱ ɗengusa̱i ɗa̱ n wuma adama a na i neke ta̱ a̱ɗu n utsura u Ka̱shile, vuza na u ɗengusa̱i Kishi n wuma a̱ ubuta̱ wu ukpa̱. ¹³Yi ishi ta̱ ukpa̱ adama a̱ unushi u ɗa̱ adama a na kpamu yi ishi ta̱ n a̱ɗu a unushi. Amma Ka̱shile ka zuwai ɗa̱ i yaꞋan wuma u Kishi. U cinukpakai tsu unushi u tsu ra̱ka̱.

¹⁴Ubuta̱ wi ishi ta̱ lo u na a ɗanai unushi u tsu, ɗa ili i na a ɗanai va i shamgbai a tsurala n a̱tsu. Amma ɗa Ka̱shile ko gboroi ubuta̱ u na ishi a ɗanai unushi u tsu wa. U ɗikai u ɗa, wu unai u ɗa a maɗanga ma atakaci ma̱ Kirisiti Kishi. ¹⁵N tsu nam pa, Ka̱shile ka takpai utsura a̱ ubuta̱ wu utsura kakau n uma a gbagbaꞋin dem. U nekei le wono e keteshe a̱ ubuta̱ u na u lyaꞋi le utsura a maɗanga ma atakaci ma̱ Kishi.

¹⁶Adama a nannai, ka̱ta̱ i ka̱sa̱kpa̱ vuza wi ilukpa̱ ɗa̱ adama a ili i na i kulyaꞋa ko i kusoꞋo ba. Ka̱ta̱ i ka̱sa̱kpa̱ a̱ ilukpa̱ ɗa̱ adama a na i kpa̱ɗa̱i kuyaꞋan ka̱ɗiva̱ ka ayin a ciɗa o yoku, ko ka̱ɗiva̱ ko Wotoi u Savu, ko kutono wila̱ u kanna ka Ashibi ba. ¹⁷Adama a na wila̱ u nam pa iyoci i ɗa yi ili i mayun. Kishi a̱ ka̱ci ka̱ ni ɗa ili i mayun ya. ¹⁸Uma i ta̱ lo a na a tsu pana uyoꞋo n kugoyo ku ka̱ci ke le ka aꞋuwa ka̱ta̱ a cikpa alingata. Ka̱ta̱ i ka̱sa̱kpa̱ uma a nan lo a̱ ilukpa̱ ɗa̱ adama a na i iwain kuyaꞋan tsu na a yaꞋin ba. Vuma na wi tsu nan lo u tsu dansa ta̱ ili gbende i na we enei, ka̱ta̱ unambi u ka̱ɗu u ciɗa u ni u zuwa yi kuyaꞋan a̱ra̱ɗi n ukuna u tsulau u na wi n u ɗa. ¹⁹Uma a nam pa a buwa o kutono Kishi ba, vuza na wi Kaci ki ikyamba. A̱tsu ci ta̱ uɓolongi n ikyamba i ni n akawa a utsura a̱ ni, ci ta̱ a kufuɗa kugbonguro ci ciya̱ baci tsuwaꞋa tsu tsu n utsura a̱ ubuta̱ u Ka̱shile.

²⁰I kuwa̱ ta̱ n Kirisiti Kishi, ɗa u nekei ɗa̱ uba̱ruwi a̱ ubuta̱ wi ili yu utsura ya aduniyan i nam pa. Yi ɗa̱i ɗa i buwai o kutono wila̱ wa aduniyan u nam pa, adanshi a̱ɗa̱ yi ta̱ a kulyaꞋa kelime n kokpo aza a aduniyan a nam pa? ²¹Wila̱ u nam pa u danai, “Ka̱ta̱ i reme ili i nam pa ba,” ko “I lyaꞋa ili i nam pa ba,” ko kpamu “I saꞋwa i ɗa ba.” ²²Wila̱ u nam pa wi ta̱ a kadanshi ki ili i na yi a kuyaꞋan megeshe ba. Ayin a na baci ci yaꞋin ulinga n ili i nam pa tsu kotsoi, ka̱ta̱ yo okpo gbani. Ta nannai kpamu n wila̱ u na uma a zuwai. ²³Wila̱ u nam pa wi ta̱ a kuyaꞋan adanshi u gaꞋan ta̱ adama a na wi ta̱ a kuzuwa uma a dakaka a yaꞋan i na Ka̱shile ka kupana uyoꞋo, ko u zuwa uma a̱ kpa̱ɗa̱ kuyongo n a̱ra̱ɗi. Na lo va aꞋuwa ɗa, i ta̱ kpamu a kuzuwa uma a takacika ka̱ci ke le adama a na a yaꞋan ili i na Ka̱shile ka kupana uyoꞋo. Amma wila̱ u nam pa wi a̱ kuɓa̱nka̱ vuza na wi a kuciga kuka̱sa̱kpa̱ kusheshe ku gbani-gbani ko a̱shawuya ba.

Uteku u na vuza u kuyongo ciɗa

¹Tsu na a̱ ɗengusa̱i ɗa̱ n wuma a̱ ubuta̱ wu ukpa̱ koɓolo n Kirisiti Kishi, mayun ɗa i zuwa a̱ɗu a̱ ɗa̱ a̱ ubuta̱ wi ili i na yi gaɗi, a̱ ubuta̱ u na Kirisiti Kishi wi a̱ ida̱shi e kukiye ku usingai ku Ka̱shile. ²Zuwai a̱ɗu a̱ ɗa̱ i sheshe ili i na yi gaɗi, ka̱ta̱ i sheshe ili ya aduniyan ba. ³YaꞋin ili i nam pa adama a na i kuwa̱ ta̱ ana Kishi ka̱ kuwa̱i, gogo na Kirisiti Kishi u sokongu ta̱ wuma u ɗa̱ adama a na wi isa u ɗa mayun u Ka̱shile. ⁴Kishi kaꞋa wuma u mayun u ɗa̱, wu uta̱ baci aduniyan ra̱ka̱, yi ta̱ feu a̱ kuta̱ n a̱yi ka̱ta̱ i uwa a tsugbayin ci ni ra̱ka̱.

⁵Vakangi ili i nam pa i na yi punu a ikyamba i ɗa̱, agisana: kuyaꞋan ku tsugbani ko kuyaꞋan ku unushi u tsugbani u babu wono. Nannai kpamu n kucikala ili i nan lo n utsura, i ka̱sa̱kpa̱ kusheshe ki ili i wuya dem, koɓolo n kuciga ki ikebe ka̱u ili i na yi derere n kucikpa a̱ma̱li. ⁶Atakaci a̱ Ka̱shile i ta̱ lo a̱ kuta̱wa̱ wa aza a na i a kuyaꞋan ili i nam pa ya.

⁷Yi ishi ta̱ feu a kuyaꞋansa nannai a ayin a cau. ⁸Amma gogo na takpai ili i nan lo punu wa̱ ɗa̱. Lokoi wupa n kuyongo ku mokovonoi n kuyaꞋan ili i na a iwain. Lokoi kula̱nga̱su n kadanshi ka wuya, lokoi kpamu kadanshi ka gbani-gbani ka na ka̱ kuta̱ a̱ una̱ u ɗa̱ feu. ⁹Ka̱ta̱ i yaꞋankpanai aꞋuwa ba, ana gogo na i ka̱sa̱kpa̱i ɗe wuma u cau u na yi ishi o kuyongo. ¹⁰Gogo na yo okpo ta̱ uma a savu, vuza na u yaꞋin wuma u savu u nan lo u kulyaꞋa ta̱ kelime n kuneke ɗa̱ kuyeve koɓolo n kuzuwa ɗa̱ yo okpo ci ni. ¹¹A wuma u savu u nam pa, wi n kakuna ba ko avu Kayahuda kaꞋa ko Vuza̱ka̱yimbi ɗa. Wi n kakuna ba ko vi n ukiɗi u kavaja ko vi n u ɗa ba. Wi n kakuna kpamu ba ko avu komoci kaꞋa daꞋin ko umaci u yoku u ɗa vi u na u canai ba. Wi n kakuna ba ko avu kagbashi kaꞋa ko vuza vu uba̱ruwi ɗa vi. Ili i na i laꞋi n kugaꞋan koci i ɗaɗa Kirisiti Kishi, wi ta̱ punu o kuyongo wa̱ tsu ra̱ka̱.

¹²Adama a ili i nam pa, koɓolo kpamu n adama a na Ka̱shile ka zagba ɗa̱ ta̱ yo okpo uma a̱ ni, ɗa u bonokoi ɗa̱ ciɗa, n adama a na u ciga ɗa̱ ta̱ kpamu, i yaꞋan n asuvayali, n ugaꞋin, ka̱ta̱ i yaꞋan m ma̱riki n kureme ku ka̱ɗu. Ili i nam pa yi ta̱ tsu ntogu n na i tsu uka. ¹³Ka̱ta̱ i yaꞋankpanai wupa uteku u ɗa̱ ba. Unushi wi baci lo, i cinukpaka itoku i ɗa̱. Vuzagbayin u cinukpaka ɗa̱ ta̱, adama a nan lo, i cinukpaka uma feu nannai. ¹⁴Ntogu n na n laꞋi n kugaꞋan i uka n ɗaɗa ucigi. Ucigi wi ta̱ o kuɓolongu tsu ra̱ka̱ ka̱ta̱ u zuwa tsu ci yongo koɓolo mayin.

¹⁵Ka̱sa̱kpa̱ ma̱ta̱na̱ ma̱ Kishi ma lyaꞋa tsugono punu a̱ a̱ɗu a̱ ɗa̱. YaꞋin ili i nam pa adama a na a̱ɗa̱ ɗa ikyamba i te, ɗa kpamu Ka̱shile ke ɗekei ɗa̱ i yongo m ma̱ta̱na̱. Ka̱ta̱ kpamu i cikpa Ka̱shile ayin tutu. ¹⁶Ka̱sa̱kpa̱i akaka a̱ Kirisiti Kishi o yongo a̱ a̱ɗu a̱ ɗa̱ ka̱u ka̱ta̱ e neke ɗa̱ ugboji. YaꞋin ulinga n kadanshi ka̱ ni i yaꞋankpanai kuyotsongusu ka̱ta̱ i nekenei kpamu odoki a singai. I yaꞋan n ogodiya punu a̱ a̱ɗu a̱ ɗa̱ n kuyaꞋansa ishipa kakau i singai a kubana u Ka̱shile. ¹⁷Ili i na baci i yaꞋin dem ko i dansai, ka̱sa̱kpa̱i i ɗa i yotso i na yu uta̱i u Vuzagbayin Yesu. A ayin a na yi a kuyaꞋan ili i nam pa, ayin tutu yaꞋin ogodiya adama a̱ ni a kubana u Ka̱shile Dada.

Uteku u na i kushamgba a iꞋuwa i ɗa̱

¹⁸A̱ma̱ci, cikpai ali a̱ ɗa̱, ɗaɗa ili i singai yi baci o kutono Vuzagbayin.

¹⁹Ali, cigai a̱ma̱ci a̱ ɗa̱ ka̱ta̱ i bonoko le tsa agbashi ba.

²⁰Muku, cikpai mmaci n ɗa̱ a ili dem, nannai ɗa Vuzagbayin u kupana uyoꞋo.

²¹Anan Dada, ka̱ta̱ i ɓongo muku n ɗa̱ kete ba, ɗababa a kupana uyoꞋo u wuma u le ba.

²²Agbashi, i cikpa aza e kelime a̱ ɗa̱ ayin tutu punu na a aduniyan. Dakakai ayin tutu i yaꞋanka le i na a cigai. Yi baci a kuyaꞋan ele a kinda ɗa̱ koci u yawa ba. YaꞋin ili i nam pa ra̱ka̱ n a̱ɗu a̱ ɗa̱ ali n ayin a na i a kinda ɗa̱ ba. Nannai ɗa i kuneke Vuzagbayin tsugbayin. ^23-24Yi ta̱ a kuyaꞋanka Vuzagbayin Yesu ulinga ayin tutu. Uma a ɗa yi a kuyaꞋanka ulinga mayun ba. Vuzagbayin ɗa u kuneke ɗa̱ agadu o okpo tsu katsupu ki ili i na i yaꞋin. Adama a nannai, dakakai ulinga uteku u na i kufuɗa dem. ²⁵I yeve ta̱ feu i yaꞋan baci ili i na i kpa̱ɗa̱i kugaꞋan, ta a kutsupa ɗa̱ feu nannai adama a kawuya ka na i yaꞋin. Adama a na Ka̱shile ki n aza a na u laꞋi n kuciga a na u tsu ka̱sa̱kpa̱ a yaꞋan kagbani-gbani ba.

¹AzagbagbaꞋin, la̱na̱i agbashi a̱ ɗa̱ ka̱ta̱ yi inda yaba dem vi le mayin. YaꞋan nannai adama a na i yeve yi ta̱ feu yi ta̱ n Vuzagbayin na ɗe gaɗi.

YaꞋin avasa

²LyaꞋi kelime n kavasa ayin tutu n a̱ɗu a̱ ɗa̱ a ufoɓushi n ogodiya a̱ a̱ɗu. ³Ka̱ta̱ feu i yaꞋan avasa adama a̱ tsu. YaꞋin avasa Ka̱shile ka̱ ɓa̱yuwa̱ uye adama a akaka a̱ tsu, adama a na tsu dana uma ili yu usokongi i Kirisiti Kishi, ili i na i zuwai ɗa mi ushiyi n ikani. ⁴YaꞋin avasa adama a na n dansa akaka a nam pa e keteshe, tsu na u gaꞋin. ⁵Yongoi n ugboji yi baci koɓolo n aza a na i aza o Kutoni ba. YaꞋin ulinga n ayin a̱ ɗa̱ mayin. ⁶Dansai ili i singai ka̱ta̱ i zuwa kadanshi ka̱ ɗa̱ uma a̱ cuwa̱ n kaꞋa mayin, tsu na kusaꞋan ki nu mkpaɗi. Ɗaɗa u kuɓa̱nka̱ ɗa̱ i yeve uteku u na i kuneke wushuki u yaba dem vu na baci we ecei ɗa̱ kakuna.

Ikya̱shi yu uteku

⁷Tikiku wi ta̱ a kudana ɗa̱ ukuna u va̱. N ciga yi ta̱ ka̱u. Ka̱ɓa̱nki kaꞋa ka na ki mayun a̱ ubuta̱ wi ili dem, ɗa wi a kuyaꞋanka Vuzagbayin tsugbashi nu mpa. ⁸N suku yi ta̱ a nwalu n singai n nam pa a kubana wa̱ ɗa̱ adama a na u dana ɗa̱ tsu na ci punu ka̱ta̱ kpamu u dokusu ɗa̱ utsura u ka̱ɗu. ⁹Mi ta̱ feu a̱ kusuku Unisima. A̱yi feu wi ta̱ n uneki u ka̱ɗu n vuza na n cigai kpamu ka̱u. A̱yi vuza ɗa̱ ɗa. I ta̱ a kudana ɗa̱ ra̱ka̱ ili i na yi punu na dem.

¹⁰Arisataka wi ta̱ a ugbashi na nu mpa. Wi ta̱ a̱ kukya̱sa̱ ɗa̱ feu, koɓolo m Marukusu, Baranaba vangu amma vi isheku kakau. Tsu dana ɗa̱ ta̱ n ayin a ɗe i rabasa Marukusu ayin a na baci u ta̱wa̱i wa̱ ɗa̱. ¹¹Yesu vi yoku, vuza na e ci ɗeke feu Yusutu, wi ta̱ e kukya̱sa̱ ɗa̱. Ele na ɗa a̱ ka̱tsuma̱ ka Ayahuda a na i o kutono Vuzagbayin Yesu aza a na ci koɓolo koci. I ta̱ a kuyaꞋan ulinga nu mpa na adama o tsugono tsu Ka̱shile kpamu, i ta̱ e kuneke mu kadanshi ku uremi u ka̱ɗu ka̱u.

¹²Abafa ta wu uta̱i a̱ likuci i ɗa̱, a̱yi feu kagbashi ke Yesu Kirisiti Kishi kaꞋa. Wi ta̱ a̱ kukya̱sa̱ ɗa̱. U ci yaꞋan ta̱ kavasa adama a̱ ɗa̱ n utsura. U tsu folono ta̱ Ka̱shile ke neke ɗa̱ utsura derere, adama a na i shamgba n utsura a̱ ubuta̱ wi ili i na Ka̱shile ka cigai ra̱ka̱. ¹³Mpa a̱ ka̱ci ka̱ va̱ mi ta̱ a kudansa ukuna u ni tsu na u dakakai adama a̱ ɗa̱ n aza o Kutoni a na i a̱ likuci i Ladukiya n Harofoli.

¹⁴Ka̱ja̱Ꞌa̱ ka̱ tsu ku usuɓi Luka, vuza va̱ a̱guma̱, wi ta̱ a̱ kukya̱sa̱ ɗa̱, n Dima dem. ¹⁵Adama a̱ Ka̱shile, kya̱sa̱ka̱i mu aza o Kutoni a na i a Ladukiya, koɓolo n vuka vu na e ci ɗeke Nifa n aza a na a tsu bana n a gasai a kpaꞋa ku ni.

¹⁶Ayin a na baci i kotsoi kukece akaka a nam pa, i neke aza o Kutoni a na i Ladukiya adama a na e kece feu. Ka̱ta̱ a̱ɗa̱ i kece akaka a na n ɗanakai le.¹⁷Danai Arikibu kadanshi ka nam pa, “Ka̱ta̱ vi yaꞋan ulinga u na Vuzagbayin u nekei nu gbende ali vu kotso.”

¹⁸Mpa Bulusu, n ɗanai ikya̱shi i nam pa n ekiye a̱ va̱.

Ciɓai n ikani i va̱.

YaꞋan kasingai ka̱ Ka̱shile ko yongo n a̱ɗa̱.