2 Timoti

Akaka e Ire a̱ Bulusu a kubana u

Timoti

Ukuna u katagarda ka nam pa

A ayin a na Bulusu u ɗanakai Timoti akaka a nam pa, a̱yi a̱ kunu ku ugbashi. Akaka a nam pa o yotso ta̱ akaka a na dada u tsu ɗanaka maku ma̱ ni ma na u cigai. Bulusu u dana ta̱ Timoti u ta̱wa̱ we ene yi punu a̱ ubuta̱ wu ugbashi.

Bulusu u dana ta̱ Timoti uteku u na u kuka̱na̱ ka̱ci ka̱ ni mayin, ka̱ta̱ u suma kawuya. U yongo tsa agisana tsu na u gaꞋin vuza vu Kutoni vi Yesu Kishi u yongo. U dana ta̱ Timoti u lyaꞋa kelime n kuyotsongusu ku ni adama a uma e Yesu Kishi.

Anana feu aza o Kutoni i ta̱ mpolo n ukuna u kukondo kakau. Akaka a nam pa i ta̱ a̱ kuɓa̱nka̱ uma ciya̱ a̱ kpa̱ɗa̱ kuyikpa̱ a̱ ubuta̱ wu ukuna u kukondo u nan lo. Kadanshi ka̱ Bulusu a kubana u Timoti, ili i te i ɗa a kubana wa aza o Kutoni a anana a nam pa.

Ili i na yi punu udariki a katagarda ka nam pa

1. Kuɓa̱yuwa̱ (1:1-2)

2. Ka̱ta̱ vuza u pana wono n Vuzagbayin ba (1:3-18)

3. Uteku u na vuma u kokpo kosoji ka singai ka̱ Kishi (2:1-26)

4. Uteku u na uma o kokpo a kanna ku ukocishi (3:1-9)

5. KulyaꞋa ku kelime adama a kuyaꞋan ili i mayun (3:10—4:8)

6. Kadanshi ku uteku n ikya̱shi yu ukocishi (4:9-22)

Kuɓa̱yuwa̱

¹Mpa ɗa Bulusu, vuzavusuki vu na Yesu Kirisiti Kishi u suki, adama a na ta Ka̱shile ka cigai wo okpo nannai. U yaꞋan ta̱ nannai adama a na n dana uma dem a na Ka̱shile ka yaꞋin uzuwakpani u kuneke wuma a̱ ubuta̱ u Yesu.

²Mi ta̱ a kuɗanaka wu Timoti, avu vu na vi maku mu ucigi ka̱u.

Ka̱shile Esheku a̱ tsu a ɗa, Yesu Kishi kpamu a̱yi ɗa Vuzagbayin vu tsu. Kusheshe ku va̱ ku ɗaɗa o yotsongu wu kasingai n asuvayali e le, ka̱ta̱ kpamu e neke wu wuma u ma̱ta̱na̱.

LyaꞋa kelime n kuneke ka̱ɗu

³N ci ciɓa wu ta̱ ayin tutu kanna n kayin dem mi baci a kuyaꞋan kavasa. Mi baci a kavasa n ci cikpa ta̱ Ka̱shile adama a̱ nu. Ka̱shile ka nam pa ka ɗaɗa mi a kuyaꞋanka tsugbashi n asuvu a singai uteku u na ikaya i va̱ i yaꞋin. ⁴N ciga ta̱ kudoku kene wu kpamu ka̱u, adama a na n ciɓa ta̱ a na vu shika̱i n kujilya ayin a na tsu pecemgbenei. Tsu gasa baci koɓolo kpamu mi ta̱ a kuyaꞋan ma̱za̱nga̱ ka̱u. ⁵N yeve ta̱ a na vu nekei ka̱ɗu mayun u Vuzagbayin, adama a na vu neke ta̱ ka̱ɗu uteku u na a̱na̱vu Afiniki u nekei ka̱ɗu, n uteku u na kpamu akaya a̱ nu vuka Losu u nekei ka̱ɗu feu. ⁶Adama a nannai n dana wu, yaꞋan ulinga ka̱u adama a na kuneꞋe ku na Ka̱shile ke nekei ku tsurakpa, ana n zuwakai nu ekiye. ⁷Adama a na Ka̱shile ka yaꞋan a̱ɗu a̱ tsu a pana wovon u uma ba, amma u neke tsu ta̱ a̱ɗu a utsura a na i tukpa nu ucigi, ɗa kpamu wi a̱ kuɓa̱nka̱ tsu tsu fuɗa tsu ka̱na̱ ka̱ci ka̱ tsu.

⁸Vu dana uma o yoku ukuna u Vuzagbayin ka̱ta̱ vu pana wovon wi ili i na uma a kudana adama a nan lo ba. Ka̱ta̱ feu vu pana wono u va̱ e keteshe a̱ ubuta̱ u uma adama a na a̱ ka̱na̱i mu adama a̱ Kishi ba. Amma n utsura u na Ka̱shile ke nekei nu, kucikpa vu soꞋo atakaci koɓolo nu mpa adama a Arabali a Singai. ⁹Ka̱shile ki isa tsu ta̱ ɗa u zagbai tsu ci yongo n wuma u ciɗa. M mani-mani kafu aduniyan a̱ gita̱ ɗa u sheshei kuyaꞋan nannai. U ciga ta̱ wo yotsongu ucigi u ni n kasingai wa̱ tsu a̱ ubuta̱ u Yesu Kishi. U zagba tsu adama a na ci yaꞋan ta̱ ili i ma̱riki i na i yawai u zagba tsu ba.

¹⁰Ka̱shile ka zuwa ta̱ ili i na mi a kadanshi yo okpoi uɓa̱yuwi e keteshe a ayin a na Yesu Kishi u ta̱wa̱i ɗa u koɗoi utsura wu ukpa̱, ɗa u yotsongi tsu uye u wuma u na wi babu uteku. A̱yi ɗa Kishi ka̱ tsu, ɗa kpamu Arabali a Singai a. ¹¹Gogo na kpamu Ka̱shile ka zagba mu ta̱ n dana ili i nam pa. U zagba mu ta̱ mo okpo vuzavusuki, ɗa kpamu u zuwai mu mo okpo malum ma Arabali a Singai a nam pa. ¹²Adama a nannai ɗaɗa mi o kusoꞋo atakaci a̱ ubuta̱ wu ugbashi. Amma m pana wono ba, adama a na n yeve ta̱ vuza na n nekei ka̱ɗu, n yeve ta̱ kpamu wi ta̱ a kufuɗa wo foɓo ili i na n nekei ni, wi ta̱ kpamu o kufoɓo i ɗa ali sai kanna ka na u kubono.1:12 Uye u yoku u kuyeve ili i na Bulusu u ɗanai u ɗaɗa “wi ta̱ a kufuɗa kula̱na̱ ili i na u nekei mu”. Na va ɗaɗa Kishi ke neke ta̱ Bulusu aza a na a isai Yesu usavu koɓolo n ulinga u Ka̱shile, gogo na a na Bulusu wi a ukuna u kukuwa̱, u neke ta̱ ka̱ɗu n ulinga u na u gita̱i u kulyaꞋa ta̱ kelime adama a na Kishi ka̱ kula̱na̱ ta̱ u ɗa.

¹³Reme gbam-gbam ili i na n yotsongushi nu, i ɗa yo okpo agisana o kuyotsongusu ku singai. Ka̱ta̱ kpamu vi ciɓa vi neke ka̱ɗu u Yesu Kishi ka̱ta̱ vi ciga uma adama a̱ ni. ¹⁴Ka̱ta̱ vi inda ili i na u nekei nu. Ayinviki a̱ Ka̱shile i ta̱ ida̱shi n a̱tsu, wi ta̱ a̱ kuɓa̱nka̱ wu vi yaꞋan ili i nam pa.

¹⁵Tsu na vi yevei, uma a̱ tsu a na i ɗe a iɗika i Asiya a̱ shirikpa̱ mu ta̱ kucina̱ ɗa a iwain kuɓa̱nka̱ mu, ali Fijala n Hamajana dem a yaꞋin nannai.

¹⁶N ciga ta̱ Ka̱shile ko yotsongu asuvayali a̱ ni a kubana u Unifara koɓolo n limata i ni ra̱ka̱, adama a na u tsu ta̱wa̱ ta̱ we ene mu ka̱ta̱ u doku mu utsura u ka̱ɗu. U pana wono ba ko a na mi ugbashi.¹⁷Ana u ta̱wa̱i Roma,† u la̱nsa̱ ta̱ ubuta̱ dem sai ana we enei mu. ¹⁸Adama a nannai n ciga ta̱ Vuzagbayin u yotsongu yi asuvayali a kanna ka na Kishi u kubono. Avu feu vi yeve ta̱ a na Unifara u ɓa̱nka̱i mu a Afisu n a̱bunda̱i.

Kosoji ka singai ke Yesu Kishi

¹Gogo na avu maku ma̱ va̱, shamgba n utsura a̱ ubuta̱ u kasingai u Yesu Kirisiti Kishi. ²Vu pana ta̱ akaka a̱ va̱, akaka a nan lo ta na uma n a̱bunda̱i o okpo ta̱ ngan ma a ɗa. Gogo na neke akaka a na pa a u uma a mayun a̱ ubuta̱ wi ili dem aza a na a kufuɗa a piꞋisaka uma o yoku feu.

³Reme ka̱ɗu vi yaꞋan atakaci koɓolo nu mpa, nannai ɗa vo kokpo kosoji ka singai ke Yesu Kirisiti Kishi. ⁴Vuza na baci wi a kuyaꞋan ulinga an kosoji u tsu ɓolongu u ɗa n ulinga u yoku kau ba. Ili i nam pa ya i tsu zuwa ta̱ kovonshi vi ni u pana uyoꞋo. ⁵Vuza u uwa baci ugulani u malazanai wi a kulyaꞋa kelime ali ka̱ta̱ u ciya̱ kuneꞋe ba, sai biꞋi u tono wila̱ wu ugulani wa. ⁶Kacimbi ka na ka yaꞋin ulinga ka̱u, u yotso ta̱ u ciya̱ u lyaꞋa mele ma̱ ni a cau. ⁷A̱ ubuta̱ u kusheshe ku ɗa̱ vu ka̱na̱ ili i na mi a kudansa. Vuzavaguɗu wi ta̱ a̱ kuɓa̱nka̱ wu vi yeve ili i nam pa ra̱ka̱.

⁸Ciɓa n Yesu Kishi ayin tutu. A matsa yi ta̱ e kefeku ko tsugono ka Dawuda ɗa kpamu u ɗenga̱i a kasaun. Na va ɗaɗa Arabali a Singai a na mi a kudana uma. ⁹Adama a na kpamu mi a kudana Arabali a Singai a nam pa, ɗa mi o kusoꞋo atakaci ali ɗa a shiyai mu n ikani an vuza vu unushi. Amma a kufuɗa a shiya kadanshi ka̱ Ka̱shile n ikani ba. ¹⁰Mpa n foɓuso ta̱ kululukpa̱ n ili dem i ɗa yi baci a̱ kuta̱ka̱ n wishi a̱ ubuta̱ u uma a na Ka̱shile ka zagbai o okpo uma a̱ ni, ka̱ta̱ kpamu a̱ ciya̱ tsugbayin tsu babu uteku a̱ ubuta̱ u Yesu Kirisiti Kishi.

¹¹Kadanshi ka nam pa mayun ɗa:

Tsu kuwa̱ baci koɓolo n a̱yi,

ci ta̱ feu o kuyongo n wuma koɓolo n a̱yi.

¹²Tsu lulukpa̱ baci a̱ ubuta̱ wa atakaci,

ci ta̱ a kulyaꞋa tsugono n a̱yi.

Tsu nana yi baci,

wi ta̱ a kunana tsu feu.

¹³Ko ci shirikpa̱ka̱ yi baci kucina̱,

a̱yi wi a̱ kushirikpa̱ka̱ tsu ba,

adama a na u kunana ka̱ci ka̱ ni ba.

Vuza vu ulinga vu na Ka̱shile ku ushuki n a̱yi

¹⁴Ciɓaka yaba dem n ili i nam pa, ka̱ta̱ vu ɓarangu le n kula ku Ka̱shile a̱ ka̱sa̱kpa̱ kanananai a̱ ubuta̱ u kadanshi. Kanananai ka nan lo ka gaꞋan ba, adama a na ki ta̱ a kuvakangu aza a na a panai kaꞋa. ¹⁵YaꞋan ulinga ka̱u adama a na Ka̱shile ku ushuku n avu. Okpo vuza vu ulinga u singai, vuza vu na u kupana wono ba, vuza vu na kpamu u kupecuku kadanshi ka mayun ka̱ Ka̱shile derere. ¹⁶YaꞋan daꞋin n kadanshi ka kavama ka na ki a kucikpa Ka̱shile ba. Ili i nam pa i tsu zuwa ta̱ uma o goyo Ka̱shile. ¹⁷IcuꞋu i kadanshi i nam pa i tsu ka̱ra̱Ꞌa̱ ta̱ an kajakata ka na ka ci lyaꞋa ikyamba. Hamanaya n Filita o okpo ta̱ agisana a̱ icuꞋu i kadanshi i nam pa. ¹⁸Ele ɗa a̱ ka̱sa̱kpa̱i uye u mayun. Uma a nam pa a danai Ka̱shile ka̱ ɗengusa̱ tsu ta̱ ɗe a kasaun a̱tsu aza a na ci nekei a̱ɗu, nannai ɗa ta na ali ɗa a̱ la̱nga̱sa̱i uneki u ka̱ɗu u uma o yoku. ¹⁹Amma ili i mayun i Ka̱shile i tsu shamgba ta̱ n utsura an kenene ka katali n iɗani i nam pa: “Vuzavaguɗu u yeve ta̱ uma a na i a̱ ni,” ɗa kpamu a ɗanai, “Aza a na e yevei i ta̱ e kuɗeke kula ku Ka̱shile a̱ ka̱sa̱kpa̱ uye u kavama u le.”

²⁰Punu a kpaꞋa ku gbayin, akpanu i ta̱ punu kakau, o yoku a yaꞋan ta̱ a ɗa n azanariya o yoku n azurufa, akpanu o yoku tamkpamu a yaꞋan ta̱ a ɗa nu nɗanga n ciꞋin. Akpanu a ikebe a ci yaꞋan ta̱ ulinga n a ɗa a ayin a̱ ka̱ɗiva̱ ku uzagbi, a na i babu ikebe a ci yaꞋanka ta̱ a ɗa ulinga u kupura̱ ka̱viri. ²¹Vu takpa baci ili i kavama a̱ ubuta̱ u wuma u nu, vi ta̱ o kokpo kakpanu ka na Ka̱shile ka kuyaꞋanka ulinga tsu na u cigai. Wuma u nu wi ta̱ o kokpo ciɗa, vi ta̱ kpamu o kokpo ufoɓushi mayin adama a na VuzakpaꞋa u yaꞋan ulinga n avu a̱ ubuta̱ wu ulinga u singai.

²²YaꞋan daꞋin n ili i na i kutuka̱ n kusheshe ku a̱shawuya ku yakpa, amma vu tono ili i na i kuzuwa wu kuyaꞋan ili derere. Tono kuneke ku ka̱ɗu n ucigi m ma̱ta̱na̱, ka̱ta̱ vu pana uyoꞋo wa aza a na i e kuɗeke kula ku Vuzavaguɗu n a̱ɗu a ciɗa. ²³N doku ta̱ kpamu n dana, ka̱ta̱ vu uwa a kuyaꞋan kanananai ka kavama ba, ka̱ta̱ kpamu a cina wu a kuyaꞋan kanananai n aza a na a̱ kpa̱ɗa̱i kuyeve ili ba. Adama a na ili i nam pa ya i tsu tuka̱ ta̱ n vishili. ²⁴Ka̱ta̱ agbashi a Vuzavaguɗu a yaꞋan kanananai ba, amma o yongo m ma̱riki u uma dem. Ka̱ta̱ a fuɗa kuyotsongusu uma o yoku mayin, ka̱ta̱ kpamu e reme a̱ɗu a̱ ubuta̱ u uma a na i babu ma̱riki. ²⁵O yotsongusu aza a na a iwain kadanshi ka mayun n ka̱ɗu ka̱ yuwu. U gaꞋan ba, Ka̱shile ki ta̱ a kusabaꞋa a̱ɗu a uma a nan lo, ka̱ta̱ ta na e neke a̱ɗu a̱ ubuta̱ u kadanshi ka mayun. ²⁶Ayin a na lo, uma a i ta̱ a̱ kugita̱ kusheshe mayin ka̱ta̱ a laꞋaka a̱ ubuta̱ u maza ma Kalijani. Adama a na ali n gogo na Kalijani ka̱ ka̱na̱ le ta̱ an agbashi, wi ta̱ kpamu a kuzuwa le a yaꞋan ili i na u cigai dem.

Ayin a ukocishi

¹Zuwa atsuvu vu pana. A ayin a ukocishi atakaci i ta̱ a kuyaꞋan n a̱bunda̱i. ²Ili i na i zuwai i ɗaɗa uma i ta̱ a kuciga ka̱ci ke le koci, ka̱ta̱ kpamu a ciga ikebe i le. I ta̱ o kokpo tukpa n kadanshi ka̱ a̱ra̱ɗi, ka̱ta̱ o okpo aza a ugbami u kaci. Ayin tutu o tso okpo ta̱ aza a kushika Ka̱shile. I ta̱ o kugoyo mmaci n le, ka̱ta̱ kpamu a iwan kuyaꞋan ogodiya a ili. I ta̱ a kuꞋiwan kucikpa ili i Ka̱shile. ³I ta̱ o kokpo babu maciganai, ka̱ta̱ kpamu a iwan kucinukpaka uma unushi. I ta̱ a kuyaꞋan aꞋuwa a kubana u uma, ka̱ta̱ a̱ kpa̱ɗa̱ kufuɗa kuka̱na̱ kaci. I ta̱ o kokpo aza a babu asuvayali, ka̱ta̱ a iwan ili i singai. ⁴I ta̱ e kudenge a̱ja̱Ꞌa̱ e le. I ta̱ o kokpo aza a kuyaꞋan moloko mi ili babu kusheshe mayin, ka̱ta̱ a shana tukpa n a̱ra̱ɗi a̱ ka̱ci ke le. I ta̱ a kuciga ili i na a̱ɗu e le a panai uyoꞋo a na a ciga Ka̱shile. ⁵I ta̱ a kuyaꞋan adanshi i ta̱ a kuyaꞋan i na Ka̱shile ki a kuciga, amma a̱ kuka̱sa̱kpa̱ utsura u ni u sabaꞋa le ba. YaꞋin daꞋin n icuꞋu i uma i nan lo.

⁶IcuꞋu i uma a nam pa i tsu uwa ta̱ iꞋuwa n ka̱bini, ka̱ta̱ a̱ ya̱nsa̱ a̱ma̱ci a na a̱ kpa̱ɗa̱i kushiya kaci, aza a na ucanuku wu unushi u poloi ɗa kpamu kusheshe ku kavama ku lyaꞋi utsura u le. ⁷A̱ma̱ci a nam pa, o tsu tono ta̱ kuyotsongusu ku savu, amma e yeve kadanshi ka mayun ba. ⁸Nlum n nam pa kpamu n tsu shilika̱ ta̱ n kadanshi ka mayun uteku u na Jenesu n Jambaru3:8 “Jenesu n Jambaru”, arabali a aza a Yahuda a danai Jenesu n vuza ni Jambaru oboci a ɗa a FiriꞋauna aza na a zuwai Musa kelime a Katagarda ka̱ Kuta̱ 7:11. Ula e le i kuciya̱ mayin a Uzuwakpani u Kuku ba. a̱ shilika̱i m Musa. A̱ɗu e le a̱ na̱mgba̱ ta̱, uneki wa̱ a̱ɗu u le kpamu u mayun u ɗa ba. ⁹Amma a kubana daꞋin ba, adama a na yaba dem u kene ta̱ tsulau ci le. Ta ka yaꞋin nannai n Jenesu koɓolo n Jambaru.

Bulusu u danai Timoti ili i kuyaꞋan

¹⁰Amma avu Timoti, vi yeve ta̱ ili i na mi o kuyotsongusu, vi yeve ta̱ kpamu tsu na wuma u va̱ wi. Vi yeve ta̱ ili i na mi a̱ kula̱nsa̱ n wuma u va̱. Vi yeve ta̱ uneki u ka̱ɗu u va̱, vi yeve ta̱ kpamu uteku u na n soꞋi atakaci. Vi yeve ta̱ ucigi u va̱, vi yeve ta̱ kpamu tsu na n lulukpa̱i n uremi u ka̱ɗu u va̱. ¹¹Vi yeve ta̱ icuꞋu ya atakaci i na i ciya̱i mu, vi yeve ta̱ kpamu tsu na n lulukpa̱i adama a nan lo. Vi yeve ta̱ ra̱ka̱ uteku u na a takacikai mu a Antakiya, n Ikaniya koɓolo n Lisitira,3:11 Azu. 14:1-28. amma ɗa Vuzavaguɗu wu uta̱ka̱i mu a̱ ubuta̱ wi ili i nam pa ra̱ka̱. ¹²Kadanshi ka nam pa ka mayun ɗa: vuza na baci de dem u cigai kuyaꞋan ida̱shi n Yesu Kirisiti Kishi uteku u na Ka̱shile ka kupana uyoꞋo u ni, u kusoꞋo ta̱ atakaci. ¹³Amma uma a gbani-gbani n aza a̱ a̱da̱bu i ta̱ a kulyaꞋa kelime n ka na i a kuyaꞋan. I ta̱ a kuya̱nsa̱ aza o yoku, aza o yoku kpamu a̱ kuya̱nsa̱ le ta̱. ¹⁴Amma avu, lyaꞋa kelime n kuneke ka̱ɗu a̱ ubuta̱ wi ili i na nlum n nu n yotsongushi nu. Vi yeve ta̱ kuyotsongusu ka mayun ɗa, adama a na vi yeve ta̱ nlum n nu. ¹⁵Ali ayin a na vi maku me kenu, o yotsongusu wu ta̱ Katagarda ka̱ Ka̱shile, ili i nam pa kpamu i ɓa̱nka̱ wu ta̱ ɗa vi ciya̱i ugboji, ali ɗa vi ciya̱i wishi u na u tsu uta̱ a̱ ubuta̱ u kuneke ka̱ɗu u Yesu Kirisiti Kishi. ¹⁶Iɗani ra̱ka̱ i na yi a Katagarda ka̱ Ka̱shile yu uta̱ ta̱ a̱ una̱ u Ka̱shile. Kadanshi ka nam pa kpamu ki ta̱ n ugaꞋin adama a na ko yotsongusu tsu ili i na yi mayun, ka̱ta̱ kpamu ka zuwa tsu kuyeve ili i na i na̱mgba̱i a̱ ubuta̱ u wuma u tsu. Kadanshi ka̱ Ka̱shile ka nam pa ka tsu lapula ta̱ ida̱shi i gbani-gbani i tsu, ka̱ta̱ ko yotsongusu tsu kuyaꞋan ili i na yi derere. ¹⁷Nannai ɗa Ka̱shile ko tsu foɓuso tsu adama a ili dem, adama a na ci ciya̱ ili dem i na ci cigai ka̱ta̱ ci yaꞋan ili i singai i na Ka̱shile ka cigai ci yaꞋan.

¹Vi yeve ta̱ Yesu Kirisiti Kishi wi ta̱ a kuyaꞋanka aza a wuma ra̱ka̱ afada kanna ko yoku, ka̱ta̱ feu u yaꞋanka a̱kpisa̱ afada. Ili i nam pa, yi ta̱ a kuyaꞋan nannai ayin a na baci Yesu u ta̱wa̱i kulyaꞋa tsugono ci ni. Adama a nannai gogo na n shamgba ta̱ u Ka̱shile n Yesu Kirisiti Kishi, n dana wu n ciga ta̱ ²vu dana uma Arabali a Singai a kadanshi ka̱ Ka̱shile. LyaꞋa kelime n kuyaꞋan nannai ko vi n ka̱ba̱nga̱ ko babu ka̱ba̱nga̱. Ka̱ta̱ vi reme ka̱ɗu ayin a na baci vi a kudansuka ko kulapulaka uma a̱ ubuta̱ u kuyotsongusu. Kuyotsongusu ku nam pa ku yotsongu le unushi u le, ka̱ta̱ kpamu ku doku le utsura u ka̱ɗu. ³YaꞋan nannai adama a na ayin i ta̱ lo a̱ kuta̱wa̱ a na uma a kuꞋiwan kupana kuyotsongusu ku na ki derere. I ta̱ o kutono ili i na a cigakai ka̱ci ke le koci, i ta̱ kpamu a̱ kula̱nsa̱ka̱ ka̱ci ke le nlum n na n kudana le ili i na i a kuciga kupana. ⁴Uma a nam pa i ta̱ a kuꞋiwan kadanshi ka mayun, ka̱ta̱ o bono o tono arabali a aꞋuwa. ⁵Amma, sheshe mayin a̱ ubuta̱ wi ili dem. Ka̱ta̱ vu pana wovon u kusoꞋo atakaci adama a Vuzagbayin ba. YaꞋan ulinga u kutuka̱ n uma a̱ ubuta̱ u Yesu Kirisiti Kishi, nannai ɗa va kushatangu ulinga u na Ka̱shile ke nekei nu.

Kadanshi ka̱ Bulusu ku ukocishi

⁶Amma mpa, wuma u va̱ u yaꞋan ta̱ ɗe utsuwin tsa alyuka u Ka̱shile. Ayin a̱ ukpa̱ a̱ va̱ a yawa ta̱ ɗevu.4:6 Mkc. 28:7.⁷N yaꞋan ta̱ ɗe vishili adama a kasingai, n kotso ta̱ ɗe ilaɗi i malamanai i va̱, ali n gogo na mo okpo ta̱ kpamu n uneki u ka̱ɗu. ⁸Gogo na kpamu mi ta̱ ɗevu n kuciya̱ katsupu. Vuzagbayin wi ta̱ e kuneke mu oroliko† a na o kuyotsongu a na n yongoi n usuɓi. Vuzagbayin ɗa keyevikafada ka singai wi ta̱ kpamu e kuneke mu oroliko a nan lo a kanna ka gbayin ko kubono ka̱ ni. Katsupu ka nam pa kpamu adama a̱ va̱ a ɗa koci ba, amma adama a uma ra̱ka̱ a na i a kuvana kubono ku ni m ma̱za̱nga̱.

⁹N folono wu ta̱ yaꞋan gogoꞋo vu ta̱wa̱ ka̱ta̱ vi geshe ba. ¹⁰Dima u laza ta̱ ɗa u ka̱sa̱kpa̱i mu endeꞋen adama a na u ciga ta̱ ili ya aduniyan i nam pa. U bana ta̱ Tosolonika. Karisika u bana ta̱ Galatiya, Taitu kpamu u bana ta̱ Damatiya. ¹¹Luka ɗa wi na nu mpa koci. Vi baci a̱ kuta̱wa̱ vi ɗika Marukusu i ta̱wa̱ koɓolo adama a na wi ta̱ a̱ kuɓa̱nka̱ mu. ¹²N suku ta̱ Tikiku a Afisu. ¹³Vi baci a̱ kuta̱wa̱, vu tuka̱ mu n ogbodo a na n ka̱sa̱kpa̱i u ka̱ja̱Ꞌa̱ ka̱ va̱ Kabu a̱ likuci i Taruwasa. Ka̱ta̱ feu vu tuka̱ mu n atagarda a̱ va̱, amma kpamu ka̱ta̱ vu kpa̱ɗa̱ kutuka̱ mu n epepa a̱ va̱ ba.

¹⁴Vuza wi ta̱ lo e ci ɗeke Isakandari kawakana. Vuma vu nam pa u yaꞋanka mu ta̱ iforotoi n a̱bunda̱i, amma Vuzagbayin wi ta̱ a kuyaꞋanka yi afada adama a ili i na u yaꞋankai mu. ¹⁵Ka̱ta̱ i yaꞋan mayin n a̱yi adama a na wi ta̱ a tsurala n ili i na tsu danai dem.

¹⁶Ko vuza te wi nu mpa a ayin a na a̱ gita̱i kubanka mu a̱ ubuta̱ wa afada ba. Yaba dem u ka̱sa̱kpa̱i mu. Ka̱ta̱ e keceke le unushi u nan lo ba. ¹⁷Amma ɗa Vuzagbayin u shamgbai nu mpa ɗa u nekei mu utsura, adama a na n dana Arabali a Singai a̱ ubuta̱ u na Aza̱ka̱yimbi a kupana. Ɗa Vuzagbayin wi isai mu a̱ ubuta̱ wu ukpa̱ u yoku. ¹⁸Mayun, Vuzagbayin wi ta̱ a kisa mu a̱ ubuta̱ u gbani-gbani n kavama dem, ka̱ta̱ u banka mu m ma̱ta̱na̱ o tsugono tsu gaɗi ci ni. Ka̱sa̱kpa̱ tsugbayin ci yongo tsu Ka̱shile, ko wanai. Ta nannai.

Ikya̱shi i Bulusu yu ukocishi

¹⁹Mi ta̱ a̱ kukya̱sa̱ Pirisila n Akila n aza a na i ida̱shi a kpaꞋa ku Unifara. ²⁰Arasata wi ta̱ ɗe o Korintiya. Ana kpamu n lazai, n ka̱sa̱kpa̱ ta̱ Tarafima nu mɓa̱la̱ a̱ likuci i Militasu.

²¹YaꞋan gogoꞋo adama a na vi ciya̱ vi yawa punu na babu uta̱ni u yawa. Abulu wi ta̱ a̱ kukya̱sa̱ ɗa̱, ta kpamu nannai Budi, n Lainusu, n Kalodiya n aza a̱ tsu ra̱ka̱ i ta̱ ikya̱shi i ɗa̱.

²²YaꞋan Vuzagbayin u tono n wuma u nu. Kasingai ka̱ Ka̱shile ko yongo n a̱ɗa̱ ra̱ka̱.