2 Tosolonika

Akaka e Ire a̱ Bulusu a kubana wa

Aza o Tosolonika

Ukuna u katagarda ka nam pa

Bulusu u ɗana ta̱ akaka a nam pa a kubana wa aza o Kutoni a na i o Tosolonika. Akaka e ire a̱ ni a ɗa a kubana wa aza o Kutoni ɗe e kuden ku gbayin ku likuci ka a̱ ka̱kina̱ ka mala ka. U ɗanai akaka a nam pa adama a na uma o yoku i ta̱ ɗe a kuyaꞋan kuyotsongusu ka aꞋuwa ku ukuna u kanna ka na Yesu u kubono. Aza o yoku e le a danai a̱ ciya̱ ta̱ akaka a̱ ubuta̱ u Bulusu, amma nan lo va aꞋuwa a ɗa.

Punu a akaka a nam pa Bulusu u yotsongushi ili i mayun yu ukuna u kanna ka na Yesu u kubono. I doki punu a kakuna ka na u saꞋwai kuɗana ɗe ku ukuna u nam pa. Bulusu u yaꞋin kadanshi ki ili i gbagbaꞋin i singai i tatsu punu a akaka a nam pa. U danai le ukuna u kanna ka na Yesu u kubono. U danai le kpamu atakaci a na i o kusoꞋo ta a̱ uta̱i a̱ ubuta̱ u Ka̱shile koci. Atakaci a nam pa i ta̱ o kukotso ka̱ta̱ ayin a kuvuka a̱ ta̱wa̱. A ukocishi, u danai a yaꞋan ulinga n utsura a ayin a na i biꞋi a kuvana Yesu u bono.

Ili i nam pa ra̱ka̱ mayun ɗa a kubana wa̱ a̱tsu anana, uteku u na i ɗa yi o Tosolonika a ayin a na Bulusu u ɗanai akaka a nam pa.

Ili i na yi punu udariki a katagarda ka nam pa

1. Kuɓa̱yuwa̱ (1:1-2)

2. Kubono ku Vuzagbayin ki ta̱ a̱ kutuka̱ n uba̱ruwi (1:3-12)

3. Ka̱ta̱ Vuzagbayin u bono ba (2:1-12)

4. Nekei a̱ɗu (2:13-17)

5. Vasai ka̱ta̱ i yaꞋan ulinga (3:1-15)

6. Kavasa ku ukocishi (3:16-18)

Kuɓa̱yuwa̱

¹A̱tsu anan Bulusu n Sila koɓolo n Timoti a̱tsu ɗa tsu ɗanai akaka a nam pa a kubana wa aza o Kutoni a na i o Tosolonika u uma a̱ Ka̱shile Dada vu tsu koɓolo n aza a na i aza a Vuzagbayin Yesu Kirisiti Kishi.

²N yaꞋin kavasa ɗa n folonoi Dada Ka̱shile n Vuzagbayin Yesu Kishi u yotsongu kasingai ka̱ ni a kubana wa̱ ɗa̱, ka̱ta̱ u zuwaka ɗa̱ una̱singai m ma̱ta̱na̱!

Kavasa ko ogodiya

³Uma a̱ va̱, u gaꞋan ta̱ ayin tutu ci cikpa Ka̱shile adama a̱ ɗa̱, a̱tsu ci cikpa ta̱ Ka̱shile adama a na uneki wa̱ a̱ɗu u ɗa̱ wi ta̱ o kugbonguro n utsura, yaba dem feu u doku ta̱ ucigi a kubana wa aza a̱ ni. ⁴Ana ci yaꞋin kadanshi adama a̱ ɗa̱ a̱ ubuta̱ wa aza o Kutoni a̱ Ka̱shile a̱ ubuta̱ kakau, ci yaꞋan ta̱ ma̱za̱nga̱ tsu na i lulukpa̱i, ali ɗa i buwai n uneki wa̱ a̱ɗu ko a na yi o kusoꞋo atakaci n kawuya kakau.

⁵Atakaci a nam pa o yotsongu ta̱ a na Ka̱shile ki a kuyaꞋanka yaba dem afada derere. Adama a nannai Ka̱shile ki ta̱ e kukece ɗa̱ a̱ ka̱tsuma̱ ka aza a̱ ma̱riki adama a na i uwa o tsugono ci ni, ɗa i ta na a kutakacika ɗa̱ gogo na adama o tsugono tsu nan lo tsa. ⁶Ka̱shile ayin tutu u ci yaꞋan ta̱ ili i na yi derere. Wi ta̱ a kutakacika aza a na a tsu zamaka ɗa̱ kadama. Wi ta̱ kpamu e kuneke ɗa̱ kuvuka ka atakaci a̱ ɗa̱. ^7-8A ayin a na baci Vuzagbayin Yesu wu uta̱i gaɗi n alingata a utsura a̱ ni m melentsu ma akina, wi ta̱ a̱ kutuka̱ tsu n wuvuki kpamu.

Vuzagbayin vu tsu Yesu wi ta̱ a kutakacika yaba dem vu na u kpa̱ɗa̱i kuyeve Ka̱shile koɓolo n uma ra̱ka̱ a na a iwain kutono Arabali a Singai a Vuzagbayin vu tsu Yesu.⁹Atakaci a na a kisa a ɗaɗa a ukpa̱ u babu uteku. I ta̱ e kupece le n Vuzagbayin koɓolo kpamu n tsugbayin tsu utsura ci ni tsu na ci babu uteku. ¹⁰Ili i nam pa yi ta̱ a̱ kuta̱wa̱ a kanna ka na Vuzagbayin u kuta̱wa̱ kisa ucikpi n tsugbayin wa aza a na i n uneki wa̱ a̱ɗu a kubana wa̱ ni ra̱ka̱ ɗa i kpamu uma a̱ ni. N a̱ɗa̱ ɗa dem adama a na i neke ta̱ a̱ɗu n ili i na tsu danai.

¹¹Ka̱shile ka zagba ɗa̱ ta̱, ɗa ci lyaꞋi kelime n kuyaꞋan kavasa Ka̱shile ko bonoko ɗa̱ mayun a̱ ubuta̱ wi ili dem tsu na i yawa kokpo uma a̱ ni. Ci yaꞋan ta̱ kavasa adama a na utsura u Ka̱shile u ɓa̱nka̱ ɗa̱ i yaꞋan ili i singai i na i cigai kuyaꞋan ra̱ka̱. Uneki wa̱ a̱ɗu u ɗa̱ u ɗa u zuwai i ciga ili i nam pa. ¹²Tsu nam pa feu yaba dem u kuneke ta̱ tsugbayin u kula ku Vuzagbayin vu tsu Yesu adama a̱ ɗa̱, ka̱ta̱ e neke ɗa̱ tsugbayin koɓolo n a̱yi. Ka̱shile ka̱ tsu n Vuzagbayin vu tsu Yesu Kishi wi ta̱ a kuzuwa ili i nam pa ra̱ka̱ i yaꞋan, adama a kasingai ke le.

Vuza vu kawuya

¹Uma a̱ va̱, ci ta̱ a kudana ɗa̱ tsu na Vuzagbayin vu tsu Yesu Kristi Kishi u kubono, koɓolo kpamu n tsu na o kuɓolongu tsu adama a na tsu gasa n a̱yi. ²Ka̱ta̱ i na̱mgba̱ a̱ɗu gogoꞋo ko uma a gbandarasa ɗa̱, a kudana kanna ko kubono ka Vuzagbayin ka yawa ta̱ ɗe ba. U gaꞋan ba i ta̱ a kudana a pana ta̱ ili i nam pa a̱ ubuta̱ u kadanshi ke kene, ko a̱ ubuta̱ wa akaka a na tsu dansai ko a na tsu ɗanai. ³Ka̱ta̱ i ka̱sa̱kpa̱ a yaꞋanka ɗa̱ ugboji n ili i na i a kudansa ba.

Ili i mayun i ɗaɗa, kanna ka nan lo ka̱ kuta̱wa̱ ba, sai vishili vi ɗenga̱ a̱ Ka̱shile, ɗa kpamu o yotsongi tsu Vuza vu Kawuya va, vuza na mayun ɗa e kuneke yi ukpa̱ u babu uteku. ⁴Wi ta̱ e kuneke ka̱ci ka̱ ni tsugbayin u la̱nga̱sa̱ a̱ma̱li dem ka̱ta̱ u ɓososo ili i na uma i o kutono ra̱ka̱. Wi ta̱ a kuzuwa ka̱ci ka̱ ni a̱ A̱Ꞌisa̱ a Gbayin a̱ Ka̱shile, a kudana e keteshe a̱yi Ka̱shile kaꞋa feu wi.

⁵I ciɓa baci a ayin a na mi ishi koɓolo n a̱ɗa̱ n dana ɗa̱ ta̱ ili i nam pa ya. ⁶Gogo na i yeve ta̱ ili i na i shamkpai ni, adama a na i ta̱ o kuyotsongu yi koci ayin a̱ ni a yawa baci. ⁷Utsura u kawuya u na wi a tsurala n Ka̱shile u gita̱ ta̱ ɗe ulinga u ni usokongi, amma vuza na u kpadai ni u kulyaꞋa ta̱ kelime n kukpada yi, ali sai kanna ka na a takpai vuza na u kpadai ni va. ⁸Ka̱ta̱ Vuza vu Kawuya va u yotsongu ka̱ci ka̱ ni e keteshe, a̱yi ɗa vuza na Vuzagbayin Yesu u kuna n ayinviki a̱ una̱ a̱ ni. A̱yi ɗa vuza na Vuzagbayin Yesu u kuniꞋwa̱nta̱ngu a ayin a na u bonoi n tsugbayin ci ni.

⁹Vuza vu Kawuya vu nam pa wi ta̱ a̱ kuta̱wa̱ kuyaꞋan ulinga u MalyaꞋi n utsura wa aꞋuwa koɓolo kpamu n urotu wa aꞋuwa n ili i mereve ya aꞋuwa. ¹⁰A̱yi u kuyaꞋan ta̱ kpamu ulinga n ugboji n kawuya kakau adama a na u ya̱nsa̱ uma a̱ ciya̱ a̱ niꞋwa̱n. I ta̱ a̱ kuniꞋwa̱nta̱ngu le adama a na a iwan ta̱ kuciga ili i mayun ɗa kpamu a iwain wishi u na wu uta̱i a̱ ubuta̱ u Ka̱shile. ¹¹Adama a nannai ɗa Ka̱shile ka̱ suꞋuki le ili yu utsura i na i kuya̱nsa̱ le ka̱ta̱ i zuwa le a̱ ushuku n aꞋuwa a. ¹²Ta ta na nannai a̱ kilukpa̱ le adama a na i ta̱ a kupana uyoꞋo wi ili i gbani-gbani i na i a kuyaꞋan ali ɗa a̱ kpa̱ɗa̱i kuneke a̱ɗu e le wi ili i mayun.

I yongo n utsura

¹³Uma a̱ va̱, ci cikpa ta̱ Ka̱shile adama a̱ ɗa̱. Vuzagbayin Yesu u ciga ɗa̱ ta̱ ɗa Ka̱shile ka zagbai ɗa̱ ali n ayin a ɗe n ugiti, u dana wi ta̱ a kisa ɗa̱. Wishi u nam pa u ta̱wa̱ ta̱ adama a na Ayinviki a̱ Ka̱shile a zuwa ɗa̱ ta̱ yo okpo ciɗa, a̱ ta̱wa̱ ta̱ tsu na i nekei a̱ɗu n akaka a mayun. ¹⁴U ɗeke ɗa̱ ta̱ a kubana a̱ ubuta̱ u wishi a ayin a na tsu danai ɗa̱ Arabali a Singai. Gogo na yi ta̱ a kuꞋuwa a tsugbayin ci te n Vuzagbayin vu tsu Yesu Kishi.

¹⁵Uma a̱ va̱, adama a ili i nam pa u gaꞋan ta̱ i shamgba mayin, i ɓa̱na̱ kuyotsongusu ku na ci yaꞋankai ɗa̱ n una̱ ɗa kpamu tsu ɗanakai ɗa̱.

¹⁶Ka̱shile Dada vu tsu u ciga tsu ta̱. Adama a kasingai ka̱ ni ɗa u nekei tsu utsura u ka̱ɗu u na wi babu uteku n a̱pa̱Ꞌa̱ a singai. ¹⁷Kavasa ka̱ tsu kaꞋa Vuzagbayin Yesu Kishi n Ka̱shile Dada vu tsu u zuwa a̱ɗu a̱ ɗa̱ a tsurakpa. Ci yaꞋan ta̱ kavasa adama a na e neke ɗa̱ utsura u kuyaꞋan ili i singai koɓolo n kudansa ili i singai feu.

YaꞋin kavasa adama a̱ tsu

¹Uma a̱ va̱, na ɗa uteku wa akaka wa, ɗa n folonoi ɗa̱ i yaꞋan kavasa adama a̱ tsu. Ili i iyain, yaꞋin kavasa adama a na akaka a Vuzagbayin a̱ ka̱ra̱Ꞌa̱ n utsura ka̱ta̱ kpamu a cikpa a ɗa a̱ ubuta̱ u na a yawai dem, derere n tsu na i yaꞋin a ayin a na akaka a a̱ ta̱wa̱i wa̱ ɗa̱. ²YaꞋin kavasa kpamu a isa tsu a̱ ubuta̱ u uma a gbani-gbani n uma a kawuya, adama a na yaba dem ɗa u nekei ka̱ɗu n Vuzagbayin ba. ³Amma Vuzagbayin mayun ɗa wi a̱ ubuta̱ wi ili dem, wi ta̱ a kuzuwa ɗa̱ i tsurakpa ka̱ta̱ wi inda ɗa̱ a̱ ubuta̱ u vuma vu gbani-gbani.

⁴A̱tsu tsu ushuku ta̱ n Vuzagbayin yi ta̱ a kuyaꞋan ili i na tsu danai ɗa̱, ɗa tsu doku kpamu tsu ushuki yi ta̱ a kulyaꞋa kelime n kuyaꞋan nannai. ⁵Ka̱sa̱kpa̱ Vuzagbayin Yesu Kristi Kishi u yotsongu ɗa̱ uteku u na Ka̱shile ka cigai ɗa̱, ka̱ta̱ u yotsongu ɗa̱ feu tsu na i kululukpa̱ tsu na a̱yi u yaꞋin feu.

Ka̱ta̱ i yaꞋan tsurogo ba

⁶Gogo na uma a̱ va̱, tsu dana ɗa̱ ta̱ n kula ku Vuzagbayin Yesu Kishi: Shamgbai daꞋin u vuza na wi a̱ ka̱tsuma̱ ka̱ ɗa̱ ɗa wi korogo, ɗa kpamu u kpa̱ɗa̱i kuyongo n ili i na ci yotsongi ɗa̱. ⁷A̱ɗa̱ a̱ ka̱ci ka̱ ɗa̱ i yeve ta̱ u gaꞋan ta̱ i tono uteku u na ci yaꞋin. A̱tsu orogo a ɗa ci ba, a ayin a na ci koɓolo n a̱ɗa̱. ⁸Ci isa tsuwaꞋa u vuza gbani babu na tsu tsupai ba. Ci yaꞋan ta̱ ulinga ka̱u kanna n kayin adama a na ka̱ta̱ ci neke ko vuza te vu ɗa̱ a̱miki ba. ⁹Ci yaꞋan ta̱ nannai ko a na ci a kufuɗa tsa dana ɗa̱ i ɓa̱na̱ tsu, amma ci iwain kufolono adama a na ci ciga ta̱ i ciya̱ agisana a singai a na i kutono. ¹⁰A ayin a na ci ishi koɓolo n a̱ɗa̱, ci neke ɗa̱ ta̱ wila̱ u nam pa: “Vuza na baci de dem u yaꞋin ulinga ba, u kulyaꞋa feu ba.”

¹¹Gogo na tsu pana ta̱ a dana a̱ɗa̱ vi yoku i tsu da̱sa̱ngu ta̱ gbani ka̱ta̱ uma a nan lo a iwan kuyaꞋan ulinga, ko kenu. Ulinga wa aza o yoku u ɗa koci a̱ tsu sa̱nka̱. ¹²Adama a nannai, n kula ku Vuzagbayin vu tsu Yesu Kristi Kishi, tsu folono ta̱ uma a nam pa, ali tsu zuwai le, a̱ gita̱ kuyaꞋan ulinga ka̱ta̱ a̱ ciya̱ ilikulyaꞋa i le ka̱ta̱ kpamu o yongo m ma̱riki.

¹³Uma a̱ va̱, ka̱ta̱ yo oꞋo n ulinga u singai ba.

¹⁴Zukai n aza a na a̱ kpa̱ɗa̱i kutono ili i na tsu ɗanai a akaka a nam pa. I shamgba daꞋin n ele, adama a na o okpo n wono. ¹⁵Ka̱ta̱ yi inda le adanshi irala i ɗa̱ i ɗa i ba, amma yaꞋin kadanshi n ele tsu na va kuyaꞋanka vuza nu a kpaꞋa ku te, vuza na u gaꞋin a dana yi a na wi a kuyaꞋan ili i na i gaꞋin ba.

Ikya̱shi yu uteku

¹⁶Ka̱sa̱kpa̱ ayin tutu Vuzagbayin vu ma̱ta̱na̱ n ka̱ci ka̱ ni u neke ɗa̱ ma̱ta̱na̱ ma̱ ni ko yi ɗa̱i baci yi lo. Vuzagbayin u yongo n a̱ɗa̱ ra̱ka̱.

¹⁷Gogo na ikya̱shi i va̱ i ɗa na, n ɗana ta̱ i ɗa n kukiye ku va̱. Mpa, Bulusu, n ci yaꞋan ta̱ ili i nam pa a uteku wa akaka a̱ va̱ ra̱ka̱, adama a na yaba dem u yeve a na a̱ uta̱i a̱ va̱ mayun.

¹⁸YaꞋan kasingai ka Vuzagbayin vu tsu Yesu Kristi Kishi ko yongo n a̱ɗa̱ ra̱ka̱.