2 Biturusu

Akaka e Ire a̱

Biturusu

Ukuna u katagarda ka nam pa

Akaka e ire a̱ Biturusu a ɗa na a kubana wa aza o Kutoni a na i o kuyongo a̱ ubuta̱ kakau.

Punu a akaka a nam pa Biturusu u dana ta̱ aza a na e kukece va Ka̱shile ko tono ta̱ n uma a na a ɗanai Katagarda ka Ciɗa, adama a nannai vuza vu Kutoni dem u gaꞋan ta̱ u yeve Katagarda ka Ciɗa mayin. U doku u danai nlum ma aꞋuwa mi ta̱ lo, ɗa u yotsongi uteku u na e kuyeve ili i na yi mayun ko ya aꞋuwa. A ukocishi, u danai a zuwa a̱pa̱Ꞌa̱ a kanna ka na Kishi ko kubono.

Nlum ma aꞋuwa mi ta̱ lo n a̱bunda̱i koɓolo n kuyotsongusu ka aꞋuwa anana. Adama a nannai, u gaꞋan ta̱ aza o Kutoni e yeve Katagarda ka Ciɗa mayin. Tsu la̱na̱ baci Katagarda ka Ciɗa, ci ta̱ e kene Kishi Vuzagbayin wi ta̱ o kubono, i ɗaɗa i zuwai ɗa ci n a̱pa̱Ꞌa̱ a na i a kulaza ba.

Ili i na yi punu udariki a katagarda ka nam pa

1. Kuɓa̱yuwa̱ (1:1-2)

2. Uteku u na aza o kutono Kishi a gaꞋin o yongo (1:3-15)

3. Tsugbayin ci Kishi (1:16-21)

4. Eneki a aꞋuwa nu nlum ma aꞋuwa (2:1-22)

5. Kubono ku Vuzagbayin mayun ɗa ki (3:1-18)

Kuɓa̱yuwa̱

¹Mpa ɗa Sima Biturusu. Mpa ɗa kagbashi ke Yesu Kirisiti Kishi mpa kpamu vuzavusuki vi ni ɗa. N ɗanaka ɗa̱ ta̱ akaka a nam pa ra̱ka̱ vu ɗa̱, a̱ɗa̱ vu na yi n uneki wa̱ a̱ɗu tsu tsu. Uneki u ka̱ɗu u nan lo u singai u ɗa, ɗa kpamu Yesu Kishi u nekei tsu u ɗa. A̱yi Ka̱shile kaꞋa n Kishi ka̱ tsu, u bonoko tsu ta̱ tso okpo aza a̱ usuɓi a̱ ubuta̱ u Ka̱shile.

²N ciga ta̱ Ka̱shile ko yotsongu ɗa̱ kasingai m ma̱ta̱na̱ ma̱ ni ka̱u i ciya̱ i yeve Yesu mayin adama a na a̱yi ɗa Ka̱shile n Vuzagbayin vu tsu.

Ili i na i zuwai ɗa tsa kuyaꞋan n a̱pa̱Ꞌa̱

³Tsu na kpamu ci e kuyeve Yesu mayin, ɗa wi o kuyotsongu utsura u gbayin u ni adama a na u neke tsu ili ra̱ka̱ i na ci cigai adama a na ci yongo a uye u na Ka̱shile ka cigai. U ɗeke tsu ta̱, adama a na ci ciya̱ tsugbayin ci ni n kasingai ka̱ ni kpamu. ⁴A̱ ubuta̱ wu utsura u gbayin u nan lo kpamu, ɗa u nekei tsu uzuwakpani u gbagbaꞋin u singai u ni. U yaꞋan ta̱ ɗe uzuwakpani u na i kulaka a̱ ubuta̱ wi ili i gbani-gbani i na yi ɗevu n a̱ɗa̱. Kusheshe ku kavama ku ɗa ku tsu tuka̱ n ili i nan lo ya. U yaꞋanka ɗa̱ ta̱ feu uzuwakpani u na i kokpo ta̱ tsu Ka̱shile.

⁵Adama a nannai dakakai ka̱ta̱ i doku ugaꞋin a̱ ubuta̱ wu uneki u ka̱ɗu u ɗa̱. Wuma wu ugaꞋin u tsu zuwa ta̱ vi yevesheke Ka̱shile mayin. ⁶Kuyeve ku Ka̱shile ku tsu zuwa ta̱ i yaꞋan n kureme ku ka̱ci ka̱ ɗa̱. Kureme ku ka̱ci ka̱ ɗa̱ kpamu ku tsu zuwa ta̱ i yaꞋan n ka̱lulu, ka̱lulu kpamu ka tsu zuwa ɗa̱ ta̱ i yaꞋan n ida̱shi i wuma i ɗa̱ adama a̱ Ka̱shile ra̱ka̱. ⁷I yongo baci nannai, yi ta̱ a kuciga itoku i ɗa̱. A ukocishi kpamu yi ta̱ a kuyaꞋan n ucigi u mayun a kubana u yaba dem. ⁸I lyaꞋa baci kelime n kuyaꞋan ili i singai i nam pa ya, yi ta̱ a̱ kusa̱nka̱ ɗa̱ kokpo ili i gbani, ka̱ta̱ i zuwa ɗa̱ i yaꞋan ili n a̱bunda̱i adama e kuyeve ku ɗa̱ ku Vuzagbayin vu tsu Yesu Kirisiti Kishi. ⁹Amma uma a nan lo a na a iwain kugbonguro a̱ ubuta̱ wi ili i singai i nam pa, a̱yimba̱ a ɗa, ko e kene mayin ba. A cinukpa ta̱ ɗe a na Ka̱shile ka̱ za̱Ꞌi le a̱ ubuta̱ u wuma u kuku u le.

¹⁰Uma a̱ va̱, adama a nannai, ka̱ta̱ i doku i gbagbala kuyaꞋan ulinga adama a na i yotsongu yaba dem an Ka̱shile ke ɗekei ɗa̱ mayun, ka̱ta̱ i yotsongu le a na u zagbai ɗa̱ yo okpo uma a̱ ni. YaꞋin nannai ka̱ta̱ i ciya̱ i kpa̱ɗa̱ kuta̱ɗa̱tsa̱ ka̱ta̱ feu i kpa̱ɗa̱ kuyikpa̱. ¹¹Nannai ɗa ta na Ka̱shile ka kurabasa ɗa̱ ka̱ta̱ wi isa ɗa̱ mayin o tsugono tsu Vuzagbayin vu tsu Yesu Kirisiti Kishi.

Zuwa atsuvu a̱ ubuta̱ wa akaka a̱ Ka̱shile

¹²I yeve ta̱ ɗe ili i nam pa, ɗa yi kpamu a kashani a̱ ubuta̱ wi ili i mayun n utsura. Ko n nannai, n sheshe ta̱ kulyaꞋa kelime n kuciɓaka ɗa̱ n ili i nam pa ya. ¹³U gaꞋan ta̱ n lyaꞋa kelime n kuciɓaka ɗa̱ n ili i nam pa ya, ali sai kanna ka na n kuwa̱i. ¹⁴Vuzagbayin Yesu Kishi kpamu u yotsongu mu ta̱ ɗe a na mi a̱ kukuwa̱ babu megeshe. ¹⁵Adama a nannai, mi ta̱ a kudakaka ulinga adama a na n zuwa ili i nam pa yo okpo hawun wa̱ ɗa̱. N ciga ta̱ i ciɓasa i ɗa ayin n a̱bunda̱i ko n kuwa̱ baci.

¹⁶Ana tsu danai ɗa̱ uteku u na Vuzagbayin vu tsu Yesu Kishi u kubono n utsura, ci a kudana ɗa̱ arabali o ugboji a na vuza yoku u ɓatsai ba. Ta nannai ba! Amma ce ene ta̱ tsugbayin tsu mayun ci ni n a̱shi a̱ tsu. ¹⁷Ka̱shile Dada u nekei ni tsugbayin a na u yaꞋin meɗevile n ka̱la̱ka̱tsu ku utsura n ka singai a̱ Ubuta̱ u Tsugbayin, u danai, “Na va maku mu ucigi ma̱ va̱ maꞋa, mi ta̱ a kupana uyoꞋo u ni ka̱u.” ¹⁸A̱tsu a̱ ka̱ci ka̱ tsu ci ta̱ ɗe koɓolo n Yesu a kusan ku ciɗa ka, ɗa tsu panai ka̱la̱ka̱tsu ka ku uta̱i gaɗi.

¹⁹Ili i nam pa ya ra̱ka̱ i zuwa tsu ta̱ ɗa tsu doku tsu ushuki a na ili i na eneki a danai mayun ɗa. Adama a nannai i zuwa atsuvu mayin a̱ ubuta̱ wa akaka e le, uteku u na va kuyaꞋan m ma̱kuni ma na mi e kuneke kutashi a̱ ubuta̱ u ka̱yimbi u yoku. LyaꞋi kelime n kuyaꞋan nannai ali sai a kanna ka na Kirisiti Kishi u kubono ka̱ta̱ kutashi ku hawun ku ni ka akana a̱ɗu a̱ ɗa̱.1:19 Udani u nam pa n ci Helene u ɗaɗa, “sai kanna ko kotso ka̱ta̱ kazangata ku usana ku uta̱ a̱ a̱ɗu a̱ ɗa̱”.²⁰Ili i na i laꞋi i ɗaɗa, ka̱ta̱ i yeve a na kene ki lo a Katagarda ka Ciɗa ku na ku uta̱i a̱ ubuta̱ u eneki n ka̱ci ke le ba.1:20 Uye u yoku u na ve kuyeve udani n ci Helene u ɗa na, “U gaꞋan ta̱ i yeve babu vuza na u kuyeve akaka e eneki n ka̱ci ka̱ ni”.²¹Eneki a a yaꞋan kadanshi adama a na ele a̱ ka̱ci ke le a cigai kuyaꞋan kadanshi ba. A̱Ꞌa̱, ta nannai ba! Ayinviki a̱ Ka̱shile a ɗa a zuwai le a dansa akaka a̱ Ka̱shile.

Nlum ma aꞋuwa

¹A ayin a na a lazai ɗe, eneki a aꞋuwa i ta̱ lo a na a yaꞋankai aza a Israila kadanshi, ta kpamu nannai i ta̱ a̱ kuciya̱ nlum ma aꞋuwa a̱ ka̱tsuma̱ ka̱ ɗa̱. I ta̱ a kuyaꞋan ulinga n ugboji ka̱ta̱ a̱ tuka̱ n aꞋuwa a̱ ubuta̱ u kakuna ka̱ Ka̱shile ka̱ta̱ a zuwa kula̱nga̱su. I ta̱ o kubono kuyaꞋan tsurala n Vuzagbayin vi le, vuza a na u wawai le. Ele a̱ ka̱ci ke le i ta̱ a̱ kula̱nsa̱ ukpa̱ u le gogoꞋo. ²Uma n a̱bunda̱i i ta̱ o kutono kuyotsongusu ku kavama ku le, ka̱ta̱ o tono kpamu ili i wono i na a yaꞋin. Adama e le, uma i ta̱ a kuyaꞋan kadanshi ki ishikushi† u Kishi n uye u mayun u ni. ³Nlum ma aꞋuwa n nam pa i ta̱ n kutsa̱n ka̱u, ɗa i kpamu a kuyaꞋan ulinga n ugboji n aꞋuwa adama a na o doro ɗa̱. Amma Ka̱shile ko kotso ta̱ ɗe n ele mani-mani, i ta na a kulaꞋaka ba.

⁴Ka̱shile ka̱ kpa̱ɗa̱ kutakacika alingata a na a nusai ba. U taɗuki le a̱ ubuta̱ u na a kutakacika le, ɗa kpamu u zuwai le a aɓatsu a na i n ka̱yimbi ka̱u, ɗa i o kuyongo ɗe ali kanna ka afada. ⁵Ka̱shile kpamu ka̱ kpa̱ɗa̱ kutakacika uma a aduniyan a cau a ayin a̱ Nuhu† ba. Ɗa wi isai Nuhu koɓolo n limata i ni ele uma e cindere. Nuhu u ɓarangi uma a aduniyan a adama a afada a̱ Ka̱shile a ciɗa. Ɗaɗa Ka̱shile ku unai aduniyan ra̱ka̱ m mini ma gbayin ma na ma̱ ta̱wa̱i ɗa ma lyaꞋi aduniyan, n aza a na a̱ kpa̱ɗa̱i kuyeve Ka̱shile.

⁶U takacikai kpamu ubirini u Sodom n Gomora† a na u songi le sai kokomo. U zuwai le o okpoi agisana a ili i na i kucina uma a na a iwain kupanaka Ka̱shile. ⁷Amma ko n nannai, Ka̱shile ki isai Lotu.† Lotu vuma ɗa vu na vi yongoi n usuɓi ɗa kpamu u na̱mgba̱i ka̱ɗu adama a tsugbani n kavama ka na ka̱ ka̱ra̱Ꞌi ni ra̱ka̱. ⁸Adama a na a̱yi vuma ɗa vu na wi a kupanaka Ka̱shile, asuvu a̱ ni o yongo ta̱ a̱ kuna̱mgba̱sa̱ ayin tutu ana we enei ili i kavama n u panai ili i gbani-gbani kanna dem.

⁹Ili i nam pa i yotsongu ta̱ an Ka̱shile ki a kufuɗa kisa uma a na o tonoi ni derere a̱ ka̱tsuma̱ ka atakaci a na i o kusoꞋo. I ɗa i yotsongu ta̱ kpamu a na wi uka̱ni n aza a na a iwain kucikpa yi, ɗa wi kpamu a kutakacika le ayin tutu ali kanna ka na a kuyaꞋanka le afada.

¹⁰Ka̱shile ko tsu doku ta̱ atakaci a̱ ubuta̱ u uma a na i o kutono kusheshe ku gbani-gbani ki ikyamba ku le, ɗa kpamu a iwain utsura u tsugono. Uma a nam pa i ta̱ n ugbamukaci a tsu pana kpamu ba. Ali a ci shika ta̱ aza a tsugbayin a gaɗi, ka̱ta̱ ta na a̱ kpa̱ɗa̱ kumuɗa̱ ka̱ɗu a yaꞋan baci nannai va. ¹¹Amma alingata a a laꞋa ta̱ nlum ma aꞋuwa ma n utsura ka̱u, ko n nannai ta na a ci shika aza a tsugbayin a gaɗi a nam pa ba.

¹²Uma a nam pa a i ta̱ an nnama n kakamba n na n tsu kpa̱ɗa̱ kuyaꞋan n kusheshe. A matsai le ta̱ adama a na uma a̱ ka̱na̱ le ka̱ta̱ a una le. Uma a nam pa a a ci yaꞋan ta̱ ishikushi a̱ ubuta̱ wu ukuna wu utsura wi ili i na a̱ kpa̱ɗa̱i kuyeve. Kuyongo ku wuya ku le ki ta̱ a̱ kutuka̱ le n ukpa̱. ¹³I ta̱ a̱ kuciya̱ ukpa̱ u na u kokpo an katsupu ke le, adama a muna ma na a yaꞋankai uma. A tsu pana ta̱ ma̱za̱nga̱ a yaꞋan baci ili i kavama dem e keteshe n kanna. I ta̱ a̱ kutuka̱ n wono wa̱ ɗa̱, ɗa i kpamu a kuzuwa ɗa̱ yo okpo n a̱shinda̱. I ta̱ a kulyaꞋa kelime n kuyaꞋan aꞋuwa a nam pa ko a ayin a na i a kulyaꞋa ili n a̱ɗa̱ a̱ ubuta̱ u ka̱ɗiva̱. ¹⁴Ele a ci yaꞋan ta̱ tsugbani n a̱shi e le, ko n nannai ta na a̱ ci cuwa̱ ba. A ci yaꞋan ta̱ ukuna u na o rono uma a na a shamgbai n utsura ba a̱ ubuta̱ wu unushi. O tsu yotsongusu ta̱ ka̱ci ke le kusheshe ku kuciga ili babu kucuwa̱ n kula; uma a nam pa ele ɗa ka̱kuma̱ ka uma ka na a yaꞋankai una̱. ¹⁵A̱ ka̱sa̱kpa̱ ta̱ ɗe uye u mayun, ɗa o tonoi uye u keneki Balam,2:15 Punu a arabali a Balam a katagarda ku Uteku u na Musa u Yongoi (Mkc. 22:1—23:12) ce ene ta̱ Balam u danai mogono Balaku ili i na Vuzavaguɗu u danai ni u dansa. Na va ɗaɗa uteku wa arabali a Balam ba. Ayin o yoku, Balam u ci isa ta̱ ikebe u Balaku ka̱ta̱ u tono n aza a Israila a̱ ubuta̱ u kucikpa a̱ma̱li (Mkc. 31:16). Arabali a nam pa a i punu a̱ ubuta̱ wi ili i na tsu zagbai a̱ ubuta̱, Uteku u na Musa u Yongoi ba.† maku ma Beyuru. A̱yi ɗa vuza na u cigai u ciya̱ ikebe adama a kuyaꞋan ili i na yi derere ba. ¹⁶Amma ɗa majaki ma ɓarangi Balam. Manama ma na ma ci yaꞋan kadanshi ba, ma dansai tsu vuma ɗa ma̱ sa̱nka̱i ni kuyaꞋan ujari u ni.

¹⁷Uma a nam pa i ta̱ an a̱shi a̱ mini a na e ɗekpei. I ta̱ an eleshu a na a tsu wala a gaɗi a̱ wunla̱i. Ili i nam pa ya i ci yaꞋan ta̱ uzuwakpani u kasingai n a̱bunda̱i, amma a tsu fuɗa a yaꞋan ili ba, ko kenu. Mayun Ka̱shile ki ta̱ a kuzuwa uma a na i nannai a̱ ubuta̱ u na u laꞋi n ka̱yimbi. ¹⁸Uma a nam pa a ci yaꞋan ta̱ a̱ra̱ɗi n kadanshi ka na ko yotsoi ke ketepu. Ayin a na baci vuma u gita̱i kuta̱ a̱ ubuta̱ wu uye u na wi derere ba, uma a nam pa i ta̱ a kuyaꞋan ulinga n kusheshe ku unushi ku vuma vu nan lo adama a na o rono yi a̱ ubuta̱ wi ili i na yi derere kpamu ba.

¹⁹A yaꞋan ta̱ uzuwakpani wi ida̱shi i na yaba dem u ba̱ruwa̱. Amma ele a̱ ka̱ci ke le agbashi a ɗa mayun a̱ ida̱shi yu unushi, adama a na vuma kagbashi kaꞋa a̱ ubuta̱ wi ili i na i lyaꞋi utsura u ni. ²⁰Uma a laꞋaka ta̱ ɗe a̱ ubuta̱ wi ili ya aduniyan i na i la̱nga̱sa̱i le, ana e yevei Vuzagbayin vu tsu n Yesu Kirisiti Kishi. Amma ɗa baci kpamu ili ya aduniyan i ka̱na̱i uma a nan lo, ɗa ili ya i lyaꞋi utsura u le, nam pa atakaci e le i ta̱ a kulaꞋa a cau. ²¹U kulaꞋa ta̱ n kugaꞋan u uma a nan lo ishi baci e yeve uye u kutono Ka̱shile ba, ko kenu. U laꞋa ta̱ n kuna̱mgba̱ vuza u yeve baci uye u mayun, ɗaɗa u iwain wila̱ u singai u ciɗa u na Ka̱shile ke nekei le. ²²Ili i na yi i mayun a̱ ubuta̱ u ansa a nam pa mayun ɗa feu yi a̱ ubuta̱ u uma tsu nan lo: “MesheꞋe mo tsu bono ta̱ ma lyaꞋa ashama a̱ ni ayin tutu.” A danai kpamu, “A̱ sumba̱ baci ma̱gurusunu, mo tsu bono ta̱ a̱ ubuta̱ wu unata kpamu.”

Yesu wi ta̱ o kubono kpamu

¹Uma a ucigi a̱ va̱, n ɗanaka ɗa̱ ta̱ atagarda a akaka e re. Punu a atagarda a m gbagbala ta̱ adama a na n zuwa ɗa̱ i sheshe mayin ka̱ta̱ i ciɓa mayin kpamu. ²N ciga ta̱ i ciɓa ka̱ta̱ i yeve akaka e eneki a ciɗa† a ayin a cau. N ciga ta̱ kpamu i ciɓa ka̱ta̱ i yeve ili i na Vuzagbayin vu tsu n Kishi u zuwai azusuki a̱ ɗa̱ a dana ɗa̱ i yaꞋan.

³U gaꞋan ta̱ ka̱u i yeve a na a ukocishi u ayin i ta̱ a̱ kuciya̱ aza a ulami, aza a na o kuzoꞋoso ili i mayun ka̱ta̱ a yaꞋan ili i kavama dem i na a cikalai kuyaꞋan. ⁴Ka̱ta̱ a dana, “Te ɗai kuta̱wa̱ ku na u yaꞋin uzuwakpani wa ki? Aza e kelime a̱ tsu a̱ kuwa̱ ta̱ ɗe ra̱ka̱, ɗa ta na ili dem yo okpoi uteku u na i ɗa yi a ugiti wa aduniyan.”

⁵Amma uma a nam pa a kucikpa ta̱ a cinukpa a na m mani-mani va ɗe kadanshi ka̱ Ka̱shile ka ɗa ka yaꞋin gaɗi, ɗa ku uta̱ka̱i n iɗika punu a asuvu a̱ mini, ɗa ka zuwai mini uka̱ra̱Ꞌi wi iɗika. ⁶Ana ayin a yaꞋin kenu, ɗa Ka̱shile ka zuwai mini ma mu unai uma a aduniyan. ⁷Amma Ka̱shile ka zuwa ta̱ gaɗi n iɗika i gogo na i yongo ali sai a kanna ka afada. Ka̱ta̱ akina a̱ ta̱wa̱ we le, ka̱ta̱ aza a na e yevei Ka̱shile ba a̱ kuwa̱.

⁸Uma a ucigi a̱ va̱, ka̱ta̱ i cinukpa ba, a na Vuzavaguɗu wi e kene kanna ke te derere n a̱ya̱ ka̱kpa̱n ke te (1,000), wi ta̱ kpamu e kene a̱ya̱ ka̱kpa̱n ke te derere n kanna ke te. ⁹Uma o yoku i ta̱ e kusheshe Vuzagbayin wi ta̱ a kushamgba ali ayin ka̱u sapu u shatangu uzuwakpani u ni, amma Vuzagbayin u kushamgba ka̱u uteku u na uma a nan lo a zuwai ba. U reme ta̱ ka̱ɗu n a̱ɗa̱. U ciga ko vuza te u kuwa̱ ba, amma u laꞋa ta̱ n kuciga yaba dem u shika̱ unushi† u ni. ¹⁰Kanna ka Vuzagbayin ki ta̱ a kuyawa babu uzuki, uteku u na koboki ka ci yawa. Gaɗi wi ta̱ o kukotso n kacaꞋa ku utsura, ka̱ta̱ akina a̱ la̱nga̱sa̱ ili dem. Wi ta̱ o kuyotsongu e keteshe uteku u na aduniyan i, n ili i na yi punu dem.3:10 Epepa a cacau a katagarda ka nam pa o kotsoso ta̱ kabaꞋin ka nam pa n udani tsu nam pa, “Ili ya aduniyan yi ta̱ e kuderekpe adama a̱ usuɗukpi wa̱ a̱bunda̱i”.

¹¹Adama a na ili dem yi a̱ kuna̱mgba̱, icuꞋu i uma ye ne i ɗa̱i i gaꞋin yo okpo? Adama a nannai yaꞋankai Ka̱shile tsugbashi a̱ ubuta̱ wu uye u na yi o kuyongo. ¹²Zuwai a̱shi a̱ ɗa̱ a kanna ka nan lo ka̱ta̱ i ɓa̱nka̱ kaꞋa adama a na ka̱ ta̱wa̱ babu megeshe. A ayin a nan lo i ta̱ a̱ kula̱nga̱sa̱ gaɗi n akina, ka̱ta̱ ili dem i derekpe punu a̱ ubuta̱ wu usuɗukpi. ¹³Amma ci ta̱ a kinda kelime an ce kene gaɗi vu savu n iɗika i savu i na Ka̱shile ka yaꞋin uzuwakpani u kuyaꞋan, ubuta̱ u na yaba dem u kuyaꞋan ili i na Ka̱shile ka danai i ɗa yi derere.

Ikya̱shi yu ukocishi

¹⁴Uma a ucigi a̱ va̱, adama a nannai i yongo m ma̱ta̱na̱ n Ka̱shile ka̱ta̱ i dakaka kpamu i yongo ciɗa babu unushi a ayin a na yi a kuvana ili i nam pa ya i yaꞋan.

¹⁵Ciɓai, Vuzagbayin wi ta̱ a kuvana adama a na uma a̱ ciya̱ ayin a na a̱ ciya̱ wishi. Na va ɗaɗa uteku u na vuza vu ucigi vu tsu Bulusu u ɗanakai ɗa̱ n kuyeve ku na Ka̱shile ke nekei ni. ¹⁶Bulusu u yaꞋan ta̱ kadanshi ki ili i nam pa ya a atagarda akaka a̱ ni ra̱ka̱, amma ili i yoku i na u danai, yi ta̱ n atakaci e kuyeve. Uma o yoku a na i babu kuyeve n aza a na a̱ kpa̱ɗa̱i kushamgba mayin a sabaꞋa ta̱ kadanshi ka̱ ni adama a na ko okpo ili i yoku kau n i na u sheshei. A yaꞋan ta̱ nannai feu n ubuta̱ u na u buwai a Katagarda ka Ciɗa. Nannai ɗa i a̱ kutuka̱ n ukpa̱ u le.

¹⁷A̱ja̱Ꞌa̱ a̱ va̱ a ucigi, a ɓarangu ɗa̱ ta̱ ɗe n ayin a ɗe! YaꞋin kindi mayin ka̱ta̱ a̱ ripula̱ ɗa̱ n aꞋuwa a uma a kavama a nam pa ba. Ka̱ta̱ i ka̱sa̱kpa̱ uneki u ka̱ɗu wu utsura u ɗa̱ ba. ¹⁸I lyaꞋa kelime n kudoku kasingai n kuyeve ku Vuzagbayin Yesu Kirisiti Kishi.

Tsugbayin n tsugono ci ni tsu ɗa, gogo na n ayin tutu. Ta nannai.