2 Korintiya

Akaka e Ire a̱ Bulusu a kubana wa

Aza o Korintiya

Ukuna u katagarda ka nam pa

Bulusu u ɗanai akaka e ire a nam pa a kubana wa aza o Kutoni a na i o Korintiya uma o yoku ɗe ta na nu nsata adama a̱ Bulusu a. Bulusu u suki ka̱ɓa̱nki ka̱ ni Taitu u bana u dana uma ili i mayun. Ana Taitu u bonoi u danai uma n a̱bunda̱i a̱ ushuku ta̱ m Bulusu va, amma aza o yoku a buwa ta̱ a kuꞋiwan yi. Punu a akaka a nam pa Bulusu u yaꞋankai a̱ɓa̱nki a̱ ni ogodiya, ɗa kpamu u yaꞋin kadanshi ka aza a na a iwain ni.

Bulusu u danai uma hawun tsu na wi ishi u cigai u yaꞋan, n ili i na i sa̱nka̱i ni kuyaꞋan ili i na u cigai kuyaꞋan va. Kelime kpamu punu ɗa u yaꞋin kadanshi ku uteku u na a kucikpa Ka̱shile mayun. U dansai kpamu uteku u na aza o Kutoni a̱ kuɓa̱nka̱na̱i. A ukocishi u yotsongi le a na a̱yi vuzavusuki vi Kishi ɗa.

Katagarda ka nam pa ki ta̱ a kudana tsu na aza o Kutoni a kuyaꞋan ulinga koɓolo anana, n tsu na a̱ kuɓa̱nka̱ aza e kelime a mayun koɓolo nu nlum n na mi a kuyaꞋanka Kishi ulinga anana. U yaꞋan ta̱ kadanshi uteku u na e kuneke ikebe n ili i singai adama a ulinga u Ka̱shile. U yotsongu tsu ta̱ u danai vuza vi kelime vu mayun ayin tutu u ci yaꞋan ta̱ ulinga adama a aza a na a buwai dem. A yaꞋan baci ili i yoku babu punu utsura n ucigi u Yesu, na lo gbani ɗa, amma ili i na a yaꞋin n utsura n ucigi u Yesu, Ka̱shile ka tsu pana ta̱ uyoꞋo n ili i nan lo ka̱ta̱ kpamu i ɗa i yaꞋan n utsura u mayun punu a aduniyan a nam pa.

Ili i na yi punu udariki a katagarda ka nam pa

1. Bulusu u yaꞋankai Ka̱shile ogodiya (1:1-11)

2. Ulinga u vuzavusuki adama a uma a̱ Ka̱shile (1:12—2:17)

3. Kutono ku ucigi u Kishi (3:1—7:16)

4. KuneꞋe adama a aza a unambi (8:1—9:15)

5. Bulusu vuzavusuki ɗa vu mayun (10:1—13:10)

6. Ikya̱shi yu ukocishi (13:11-13)

Bulusu u kya̱sa̱i aza o Kutoni a na i Korintiya

¹Mpa ɗa Bulusu. Ka̱shile ka zagbai mu mo okpo vuzavusuki vi Yesu Kirisiti Kishi. Timoti wi ta̱ koɓolo nu mpa a ayin a na n ɗanai katagarda ka akaka ka nam pa.

Mi ta̱ a kuɗanaka ɗa̱, a̱ɗa̱ na yi punu wa aza o kutoni a̱ Ka̱shile a̱ likuci i Korintiya, koɓolo n uma a̱ Ka̱shile ra̱ka̱ a na i a uɓon u Akataya:

²Ka̱sa̱kpa̱ Ka̱shile Dada vu tsu n Vuzagbayin Yesu Kirisiti Kishi e neke ɗa̱ kasingai m ma̱ta̱na̱.

Bulusu u yaꞋankai Ka̱shile ogodiya

³Cikpai Ka̱shile a̱yi na wi Esheku a Vuzagbayin vi Yesu Kirisiti Kishi vu tsu! Ka̱shile a̱yi ɗa Dada vu na wi n asuvayali n a̱bunda̱i n kadanshi ka kuvaꞋanka ka̱ɗu ra̱ka̱. ⁴Ci baci n una̱mgbuka̱tsuma̱, u ci neke tsu ta̱ kadanshi ka kuvaꞋanka ka̱ɗu, adama a na ci neke feu uma kadanshi ka kuvaꞋanka ka̱ɗu. Ayin a na baci aza o yoku i n una̱mgbuka̱tsuma̱, ka̱ta̱ tsu fuɗa ci neke le kadanshi ka kuvaꞋanka ka̱ɗu uteku u na Ka̱shile ke nekei tsu.⁵Mayun ɗa tsu soꞋo atakaci ka̱u adama a̱ Kirisiti Kishi. Mayun ɗa kpamu ci isa kadanshi ka kuvaꞋanka ka̱ɗu ka̱u adama a̱ Kirisiti Kishi. ⁶Ayin a na baci tsu soꞋi atakaci, ci ta̱ e kukeɗe a̱pa̱Ꞌa̱ u Ka̱shile ke neke ɗa̱ kadanshi ka kuvaꞋanka ka̱ɗu n wishi adama a atakaci a̱ tsu. Ka̱shile ke neke tsu baci kadanshi ka kuvaꞋanka ka̱ɗu, ɗaɗa ciya̱ a̱tsu tsu fuɗa ci neke ɗa̱ kadanshi ka kuvaꞋanka ka̱ɗu. Ta feu nannai ya kufuɗa ya̱ lulukpa̱ n icuꞋu yi ili i te i na a̱tsu tsu soꞋi atakaci a. ⁷Ci ta̱ n a̱ɗu a utsura adama a na ci yeve ta̱ ayin a na baci i soꞋi atakaci tsu na a̱tsu tsu soꞋi, yi ta̱ feu a̱ kuciya̱ kadanshi ka kuvaꞋanka ka̱ɗu tsu na a̱tsu ci ciya̱i.

⁸Uma a̱ va̱, ci ciga ta̱ i yeve tsu na tsu soꞋi atakaci a iɗika i Asiya. A zuwakai tsu a̱miki a na a laꞋi utsura u tsu, ali ci sheshei tsa kulaꞋa ba. ⁹Mayun ɗa, tsu dana ta̱ ci ta̱ a̱ kukuwa̱. Amma ili i nam pa i zuwa tsu ta̱ ci gita̱ kuneke a̱ɗu a̱ tsu u Ka̱shile, n ka̱ci ka̱ tsu ka ba, adama a na a̱yi ɗa vuza na u tsu ɗengusa̱ a̱kpisa̱. ¹⁰Ka̱shile ki isai tsu a ayin a na ci ishi ɗevu n kukuwa̱, ci yeve ta̱ wi ta̱ a kulyaꞋa kelime n kisa tsu. ¹¹Wi ta̱ a kisa tsu adama a na yi ta̱ a̱ kuɓa̱nka̱ tsu a ayin a na i ci yaꞋansa avasa adama a̱ tsu. Adama a nannai, Ka̱shile ki ta̱ a kushuku n avasa a̱ ɗa̱ n a̱bunda̱i. Wi ta̱ a kuzuwaka tsu una̱singai, ka̱ta̱ uma n a̱bunda̱i a cikpa kula ku ni adama a ili i na u yaꞋankai tsu.

Bulusu u dokongu ta̱ nwalu n ni

¹²Ci ciɓa baci n ili i na ci yaꞋin, ci yaꞋan ta̱ ma̱za̱nga̱ a na a̱ɗu a̱ tsu i n kadanshi ba. Ayin tutu ci yongo ta̱ m ma̱riki, ka̱ta̱ kpamu tsu saꞋwa kusokongu ɗa̱ ili ba. Kasingai ka̱ Ka̱shile kaꞋa ka zuwai tsu ci yaꞋan tsu nan lo, ugboji wa aduniyan u nam pa u ɗa ba. Ci yongo ta̱ mayin a̱ ubuta̱ u na tsu banai dem, n a̱ɗa̱ ɗa biꞋi ta na u laꞋi. ¹³Ana tsu ɗanakai ɗa̱, tsu dana ɗa̱ ta̱ magaba, tsu sokonku ɗa̱ ili punu a akaka a na tsu ɗanakai ɗa̱ ba. Adama a nannai, yi ta̱ a kufuɗa kuyeve ili i na tsu ɗanai dem. ¹⁴Gogo na i panaka tsu ta̱ nannai, amma a̱pa̱Ꞌa̱ a̱ tsu a ɗa i ta̱wa̱ i yeve ili i na ci ciya̱i gbende, adama a kanna ka Vuzagbayin Yesu Kishi vu tsu i fuɗa i yaꞋan ma̱za̱nga̱ adama a̱ tsu, a̱tsu kpamu ci yaꞋan ma̱za̱nga̱ adama a̱ ɗa̱.

¹⁵N yeve ta̱ nannai mayin, adama a nannai, mi ishi ta̱ n sheshe ɗe kuta̱wa̱ kene ɗa̱ biꞋi. Nannai ɗa Ka̱shile ka kuzuwaka ɗa̱ una̱singai, adama a na mi ta̱ a̱ kuta̱wa̱ wa̱ ɗa̱ ali kure. ¹⁶Mi ishi ta̱ n ciga n uwa n kya̱sa̱ ɗa̱, mi baci a kubana a Makidoniya ali n kubono dem. Ka̱ta̱ i ɓa̱nka̱ mu n ka̱na̱ uye a kubana a uɓon u Yahuda. ¹⁷I kece ta̱ yi ɗa̱i i zuwai ɗa m kpa̱ɗa̱i kuyaꞋan tsu na mi ishi n zuwai. Mi a kuyaꞋan kadanshi ka kavama a ayin a nan lo ba. Mpa mi ta̱ tsa uma a aduniyan a nam pa, a na e ci sheshe ukuna ka̱ta̱ megeshe a yaꞋansaka a̱ɗu a̱ ka̱tsuma̱ ka ayin e te?

¹⁸Amma i zuwaka baci Ka̱shile utsura, i kuzuwaka ta̱ utsura n ili i na tsu danai ɗa̱, “E” ɗa, n “A̱Ꞌa̱” a ayin e te ba. ¹⁹Na va ɗaɗa adama a na Maku ma̱ Ka̱shile, Yesu Kirisiti Kishi u tsu ushuku ka̱ta̱ u doku u iwan a ayin e te ba. Ayin tutu u tsu ushuku ta̱ n ka̱ɗu ke te. A̱yi ɗa vuza na mpa, koɓolo n Sila n Timoti ci yaꞋankai ɗa̱ kadanshi ka̱ ni. ²⁰Adama a na a̱yi ɗa̱ vuza na u tsu shatangu uzuwakpani u Ka̱shile ra̱ka̱. I ɗaɗa i zuwai a̱tsu tsu dana, “Ta nannai”† ayin a na baci ci nekei Ka̱shile tsugbayin a̱ ubuta̱ kula ku Kirisiti Kishi.

²¹Ciɓai, Ka̱shile a̱yi ɗa vuza na u zuwai a̱tsu n a̱ɗa̱ dem ci yaꞋan utsura u Kirisiti Kishi. Ka̱shile, a̱yi ɗa kpamu u zagbai tsu. ²²Ɗa u zuwakai tsu urotu u na a̱tsu uma a̱ ni a ɗa ci koci. U nekei tsu kpamu Ayinviki a̱ Ka̱shile a̱ a̱ɗu a̱ tsu an uzuwi u kaguta u na u yotsongu tsu ili i yoku i na yi lo a̱ kuta̱wa̱.

²³N yaꞋan baci aꞋuwa, ana n danai ɗa̱ n iwan ta̱ kubono o Korintiya, ta lo me neke ɗa̱ atakaci, ka̱sa̱kpa̱ Ka̱shile ke neke mu atakaci. ²⁴Ci a kudana ɗa̱ ili i na sai i neke a̱ɗu ba. Ci yeve ta̱ yi ta̱ n uneki wa̱ a̱ɗu wu utsura, ta kpamu nannai a̱ɗa̱ feu i shamgba n utsura. Ci ciga ta̱ ci yaꞋan ulinga koɓolo n a̱ɗa̱ adama a na a̱ɗu a̱ ɗa̱ a shana m ma̱za̱nga̱.

¹Ɗa n danai ka̱ci ka̱ va̱, “Mi o kudoku ma bana we le ba, adama na a ayin a na n gita̱i kubana we le, gbende vi le a̱ na̱mgba̱ ta̱ ka̱tsuma̱.” ²Mi baci a̱ kula̱nga̱sa̱ ɗa̱ a̱ɗu, yayi tamkpamu u kuneke mu ma̱za̱nga̱? A̱ɗa̱ ɗa koci vu na i kuneke mu ma̱za̱nga̱, amma ta na n la̱nga̱sa̱ ɗa̱ ta̱ ɗe a̱ɗu. ³I ɗaɗa i zuwai ɗa n ɗanai nannai punu a akaka a na n suki ɗe a kubana wa̱ ɗa̱ wa. N ciga m bana me ene ɗa̱ ba, adama a na kubana kene ɗa̱ ki ta̱ a̱ kula̱nga̱sa̱ mu ka̱ɗu. A̱ɗa̱ ɗa ta na uma a na i e kuneke mu ma̱za̱nga̱. Ili i na i zuwai ɗa n cigai n yongo m ma̱za̱nga̱ i ɗaɗa, adama a na n zuwa ɗa̱ i yongo m ma̱za̱nga̱ feu. ⁴Ana n ɗanakai ɗa̱ n ayin a ɗe, mi ishi m ma̱ta̱na̱ koɓolo m ma̱za̱nga̱ a̱ ka̱ɗu ka̱ va̱ ba, ɗa n ɗanai n i shika̱i. N ɗana adama a na n la̱nga̱sa̱ ɗa̱ a̱ɗu ba, amma n ɗana ta̱ adama a na i yeve n ciga ɗa̱ ta̱ ka̱u.

Cinukpakai vuza na u yaꞋin unushi

⁵Vuza yoku lo a̱ ka̱tsuma̱ ka̱ ɗa̱ u zuwa ta̱ ra̱ka̱ vu ɗa̱ una̱mgbuka̱tsuma̱, mpa ɗa koci ba. N dana ɗa̱ u zuwa ta̱ aza a̱ Kutoni una̱mgbuka̱tsuma̱ nannai. Ali n doku n ciga kuyaꞋan kadanshi ka nam pa ka̱u ba. ⁶A̱ɗa̱ vi yoku n a̱bunda̱i i ɓolongi ka̱ci ka̱ ɗa̱, ɗa i nekei ni atakaci a na a untsai ni. Atakaci a nan lo a yawa yi ta̱. ⁷Amma gogo na i cinukpaka yi unushi u ni, ka̱ta̱ i neke yi kadanshi ka kuvaꞋanka ka̱ɗu, adama a na i sa̱nka̱ ka̱ɗu ka̱ ni kuna̱mgba̱ n a̱bunda̱i, ali u ka̱sa̱kpa̱ uye u kutoni ba. ⁸N folono ɗa̱ ta̱, yotsongi a na i cigai ni. ⁹N ɗana ta̱ adama a na n kondo ɗa̱, ka̱ta̱ kpamu n yeve ko i tono kuyotsongusu ku va̱. ¹⁰Ayin a na baci i cinukpakai vuma vu nam pa, mpa n cinukpaka yi ta̱ feu. Ayin a na baci n cinukpakai ni (unushi wi ishi baci lo), n yaꞋan ta̱ adama a na n yaꞋanka ɗa̱ kasingai adanshi mi ta̱ kelime ka̱ Kirisiti Kishi. ¹¹N yaꞋan ta̱ nannai adama a na MalyaꞋi† mo doro tsu ba. Adama a na ci yeve ta̱ mayin ili i na MalyaꞋi mi n i ɗa ufoɓi a̱ ka̱ɗu.

Bulusu a Taruwasa

¹²Ana n yawai a Taruwasa kudana uma Arabali a Singai† a ukuna u Kirisiti Kishi, ɗa n cinai wana ɗai Vuzagbayin u ɓa̱yuwa̱ uye adama a ulinga ɗe. ¹³Amma m pana uyoꞋo a̱ ka̱ɗu ba, adama a na me ene Taitu vuza tsu ba. Ɗa n danai uma a na i ɗe va, “Sai kpamu ayin o yoku.” Ɗa n lazai m banai a Makidoniya.

UlyaꞋi adama a̱ Kishi

¹⁴Ci cikpa ta̱ Ka̱shile n a̱bunda̱i! A̱yi ɗa vuza na u bonokoi tsu agbashi a̱ ni, ɗa u dasakai tsu kelime adama a na Kirisiti Kishi ɗa u lyaꞋi. Ka̱shile kpamu ka̱ ɓa̱nka̱ tsu ta̱ tsu pecuki uyevi wu ukuna u Kishi a̱ ubuta̱ dem an maniꞋin ma̱ ma̱gula̱ni. ¹⁵Wuma u tsu wi ta̱ an maniꞋin ma̱ ma̱gula̱ni ma na Kirisiti Kishi u nekei Ka̱shile, ali ɗa ma̱ ka̱ra̱Ꞌi sai a̱ ubuta̱ u uma a na wi isai, n aza a na i a̱ kukuwa̱. ¹⁶Aza a na i a̱ kukuwa̱, ma̱gula̱ni ma̱ tsu mi ta̱ an ushami wu ukpa̱, amma aza a na i n wuma, ma̱gula̱ni ma̱ tsu ma wuma maꞋa. Yayi u kufuɗa kuyaꞋan ulinga tsu nan lo? ¹⁷Ci tsu uma n a̱bunda̱i a na a tsu dana uma kadanshi ka̱ Ka̱shile, adama a na a tsupa le ikebe ba. A̱Ꞌa̱, ta nannai ba. Amma mayun ɗa ci an aza a na Ka̱shile ka̱ suki n utsura u Kirisiti Kishi, tsu dana uma akaka a̱ tsu n ka̱ɗu ke te e kelime ka̱ Ka̱shile.

Uzuwakpani u savu u Ka̱shile

¹Ci ta̱ a̱ kugita̱ kuyaꞋan a̱ra̱ɗi adama a̱ ka̱ci ka̱ tsu kpamu? Uma o yoku a yawai n akaka a kucikpa le, ko o folonoi ɗa̱ i ɗanaka le akaka adama a̱ ka̱ci ke le. U gaꞋan ta̱ ci ciya̱ akaka tsu nan lo? ²Amma a̱ɗa̱ ɗa akaka a̱ tsu, ta punu yi a̱ a̱ɗu a̱ tsu, adama a na yaba dem u kece ka̱ta̱ u yeve ili i na u kecei. ³I yotsongu ta̱ a na a̱ɗa̱ ɗa akaka a na Kirisiti Kishi u ɗanai, ɗa a̱tsu ci nekei a ɗa. Ayinviki a̱ Ka̱shile a na e ci neke wuma, a ɗana ɗa̱ ta̱ punu a̱ a̱ɗu a̱ tsu, amma e kepepa ko e meshemberu ma katali ba.

⁴Ci ta̱ a kudana nannai adama a utsura wu uneki u ka̱ɗu u na ci n u ɗa e kelime ka̱ Ka̱shile adama a̱ Kirisiti Kishi. ⁵Tsu dana ci ta̱ a kufuɗa kuyaꞋan ulinga u nam pa wa n ka̱ci ka̱ tsu ba. Ka̱shile kaꞋa ka zuwai tsu fuɗai ci yaꞋin ili i na ci yaꞋin ra̱ka̱. ⁶U zuwai tsu fuɗai tso okpoi agbashi a uzuwakpani u savu u na wu uta̱i a̱ ubuta̱ wa Ayinviki a̱ Ka̱shile. Uzuwakpani u nam pa Wila̱ u na a ɗanai u ɗa ba, adama a na Wila̱ u tsu tuka̱ ta̱ n ukpa̱, amma Ayinviki a̱ Ka̱shile e ci neke ta̱ wuma.

⁷Wila̱ u cau a ɗana ta̱ u ɗa a atali, u ɗaɗa u tuka̱i n ukpa̱. N nannai dem, ɗa ta na e enei tsugbayin tsu Ka̱shile. Tsugbayin tsu na tsu uta̱i a̱ ubuta̱ u Wila̱ tsu zuwai a̱shi a Musa kutasa ka̱u, uma a Israila e geshe ele a kinda Musa va ba, ko a na kutashi ku nam pa ku geshei ba.3:7 Kut. 34:29.⁸Tsugbayin tsu na tsu uta̱i a̱ ubuta̱ wa Ayinviki a̱ Ka̱shile tsu laꞋa ta̱ tsu na tsu uta̱i a̱ ubuta̱ u Wila̱. Mayun ɗa ili ya ba? ⁹Ulinga u na u ci neke a̱ ilukpa̱ uma tutu wi baci n tsugbayin, ulinga u na u tsu zuwa uma o okpo aza a̱ usuɓi a̱ ubuta̱ u Ka̱shile wi ta̱ a kuyaꞋan n tsugbayin tsu na tsu laꞋi nannai. ¹⁰Mayun ɗa, tsugbayin tsu uzuwakpani u kuku tso okpo gbani, adama a na kutashi ku tsugbayin tsu savu tsu laꞋa yi ta̱. ¹¹Wila̱ wi ta̱ n tsugbayin tsu na tsu kporoi ɗe. Amma tsugbayin tsu uzuwakpani u savu tsu laꞋa ta̱ m gbayin ka̱u, tsu ɗa ci o kukporo ba.

¹²Ci ta̱ a kufuɗa kuyaꞋan kadanshi babu wovon, adama a na ci ta̱ n a̱pa̱Ꞌa̱ tsu nam pa. ¹³A̱tsu ci tsu Musa ba. A̱shi a̱ ni o yongo ta̱ a kutasa ka̱u, amma ɗa u palai a ɗa adama a na uma a Israila a̱ kpa̱ɗa̱ kene uteku u na kutashi ka ki o kugboro.3:13 Kut. 34:33.¹⁴Uma a o yongo ta̱ n ugbamukaci, ɗa kpamu ili i kpadai le kene ili i mayun a ayin a na baci e kecei Wila̱ wa. Kishi ɗa koci u kufuɗa kutakpa ili i na i zuwai le a̱ kpa̱ɗa̱i kene. ¹⁵Ali n anana, e kece baci Wila̱ u Musa, ili yi ta̱ punu i na i palai a̱ɗu e le. ¹⁶Amma vuza na baci u banai u Vuzagbayin, wi ta̱ a kutakpa ili i na i palai ni va.3:16 Kut. 34:34.¹⁷Gogo na, Vuzagbayin va a̱yi ɗa Ayinviki a, ubuta̱ u na baci ta na Ayinviki a Vuzavaguɗu i, u tsu neke ta̱ uba̱ruwi. ¹⁸Adama a nannai a̱shi a̱ tsu i upali ba, adama a na ci yotsongu tsugbayin tsu Vuzavaguɗu. Ayin a na baci Ayinviki a Vuzavaguɗu i a kuyaꞋan ulinga n a̱tsu, ci ta̱ a̱ kuta̱wa̱ tso kokpo ci ni, ci ta̱ kpamu o kuyotsongu tsugbayin ci ni n a̱bunda̱i ka̱u.

Uciyi o mgbodo n ciꞋin

¹Ka̱shile, n asuvayali a̱ ni, u nekei tsu ulinga u nam pa ci yaꞋan. I ɗaɗa i zuwai ɗa tsu kpa̱ɗa̱i koꞋo. ²Ci iwain kuyaꞋan ili i wono ko yi usokongi. Tsu ya̱nsa̱ vuza ba, tsu sabaꞋa kuyotsongusu ku Ka̱shile ba. Tsu dansa ta̱ mayun e kelime ka̱ Ka̱shile, adama a na aza a na a buwai e yeve a na ci aza a̱ ma̱riki.

³Uma o yoku e yeve baci Arabali a Singai a na tsu danai le va ba, na lo wo okpo ta̱ urotu an uma a nan lo i ta̱ a̱ kukuwa̱. ⁴Vuza vu gbani-gbani wi ta̱ lo, vuza na wi a kulyaꞋa tsugono tsa aduniyan a nam pa. MalyaꞋi maꞋa. Ɗa u palai a̱ɗu a aza o yoku ɗa okpoi a̱yimba̱. Uma a nam pa a̱ kpa̱ɗa̱i kuneke a̱ɗu, adama a nannai e kene tsugbayin tsu kutashi ka Arabali a Singai ku na ki a kakana le ba. A kufuɗa e yeve akaka a na tsu danai le a ukuna u tsugbayin tsu Kirisiti Kishi ba, vuza na u yotsoi Ka̱shile derere.

⁵Ana tsu banai a̱ kuka̱ra̱Ꞌa̱ kudana uma Arabali a Singai, ka̱ci ka̱ tsu kaꞋa ci a kuyaꞋanka ba, amma ci ta̱ a kudana uma, Yesu Kishi Vuzagbayin ɗa. Ili i na tsu fuɗai tsu danai adama a̱ ka̱ci ka̱ tsu koci i ɗaɗa a̱tsu ɗa agbashi a̱ ɗa̱, adama a ili i na Yesu u yaꞋin adama a̱ tsu. ⁶Ka̱shile kaꞋa ka danai, “Ka̱sa̱kpa̱ kutashi kakana a̱ ka̱yimbi!” U yotsongu tsu ta̱ ɗe a na kutashi ku nam pa ka ku ɗaɗa wakani punu a̱ a̱ɗu a̱ tsu adama a na ci yeve tsugbayin tsu Ka̱shile tsu na a̱shi e Yesu Kishi o ci yotsongu.4:6 Ugi. 1:3.

⁷Ci ta̱ n uciyi u nam pa a̱ ubuta̱ u Ka̱shile, amma a̱tsu na ci a̱ kuɓa̱na̱ uciyi wa ci ta̱ an mgbodo n na a maꞋi n ciꞋin. Na va u yotsongu ta̱ a na utsura u gbayin wa ta wi u Ka̱shile, a̱tsu ɗa ba. ⁸A zuwai tsu a̱ ka̱tsuma̱ ka atakaci ka̱u, amma a minjarangu tsu ba. Ko an ci yevei ili i na tsa kuyaꞋan ba, tsu ka̱sa̱kpa̱ ba. ⁹E nekei tsu atakaci, amma Ka̱shile ka̱ ka̱sa̱kpa̱ tsu ba. Ayin o yoku a ɓasangu tsu ta̱ a iɗika, amma a una tsu ba. ¹⁰Tsu soꞋo baci atakaci nannai, ayin tutu ikyamba i tsu i ci yotsongu ta̱ tsu na Yesu u soꞋi atakaci ana u kuwa̱i, adama a na uma a fuɗa e ene wuma u Yesu a ikyamba i tsu. ¹¹E, i ta̱ a kufuɗa kuna tsu a ayin a na e sheshei dem, adama a na ci ta̱ a kuyaꞋanka Yesu tsugbashi. Nannai ɗa uma a̱ kuciya̱ kene wuma u Yesu a ikyamba i tsu i na i kufuɗa kukuwa̱. ¹²Tsu ushuku ta̱ kuyaꞋan kataci nannai ali a̱ ukpa̱, adama a na i ciya̱ wuma.

¹³A ɗana ta̱ a Katagarda ka Ciɗa, “N yaꞋan ta̱ kadanshi adama a na n neke ta̱ ka̱ɗu.”4:13 Ishp. 116:10. Ci ta̱ n uneki u ka̱ɗu icuꞋu i te, ci yaꞋan ta̱ kpamu kadanshi adama a na ci neke ta̱ a̱ɗu. ¹⁴Ka̱shile ka̱ ɗengusa̱i Vuzagbayin Yesu n wuma, ci yeve ta̱ kpamu Ka̱shile ki ta̱ a̱ kuɗengusa̱ tsu koɓolo n Yesu. Ka̱shile ki ta̱ a kuɗika tsu, koɓolo n avu, ka̱ta̱ ci shamgba e kelime ka̱ ni. ¹⁵Ili i nam pa ra̱ka̱ adama a̱ ɗa̱ a ɗa. Tsu na uma n a̱bunda̱i a̱ ciya̱i kasingai ka̱ Ka̱shile, a kulaꞋa ta̱ n kuneke ogodiya ayin dem ka̱ta̱ kpamu Ka̱shile ka̱ ciya̱ tsugbayin n a̱bunda̱i.

Kuneke ku ka̱ɗu u Vuzagbayin

¹⁶I ɗaɗa i zuwai ɗa tsu kpa̱ɗa̱i kuka̱sa̱kpa̱. Ko a na ikyamba i tsu yi a̱ kukuwa̱, ayinviki a̱ tsu i ta̱ a̱ kuciya̱ utsura u savu kanna dem. ¹⁷Atakaci a na ci n a ɗa gogo na i gbayin ba, i kpamu e kugeshe ba. Amma i ta̱ a̱ kuɓa̱nka̱ tsu, adama a na ci ciya̱ tsugbayin tsu na tsu laꞋi atakaci a̱ tsu ka̱u, tsugbayin tsu nan lo ta na tso kukotso ba. ¹⁸Tsu zuwa a̱shi a̱ tsu a̱ ubuta̱ wi ili i na ce enei ba, amma a̱ ubuta̱ wi ili i na tsu kpa̱ɗa̱i kene. Ili i na ci e kene ye kugeshe ba, amma i na ci a̱ kukpa̱ɗa̱ kene yi o kukotso ba.

¹Gogo na ci yeve ta̱ a talukpa baci ka̱pa̱m ka̱ tsu a̱ ubuta̱ u na ci o kuyongo: ɗaɗa, ayin a na baci tsu kuwa̱i ɗa tsu ka̱sa̱kpa̱i ikyamba i nam pa, Ka̱shile ki ta̱ o kufoɓusoko tsu kpaꞋa adama a na ci yongo ɗe. Ubuta̱ u na a̱yi a̱ ka̱ci ka̱ ni u yaꞋin, u na u kukotso ba. ²Tso oꞋo ta̱ ɗe n ikyamba i na ci n i ɗa gogo na, ci ciga ta̱ kanna ka nan lo ka̱u ka na tsa kuꞋuka ikyamba i savu i tsu na ɗe gaɗi tsa aminya a savu. ³A ayin a nan lo tso kokpo oshomboɗi ba, adama a na tsu uka ta̱ ɗe ikyamba i savu na ɗe gaɗi. ⁴Ayin a na ci o kuyongo n ikyamba i nam pa, ci ta̱ n a̱miki, ɗa kpamu tsu soꞋi atakaci. Amma ci ciga ku ka̱sa̱kpa̱ ikyamba i kukuwa̱ i nam pa adama o woꞋi wi ikyamba u nam pa ba. Ci ciga ta̱ tsu sabaꞋa i ɗa ka̱ta̱ ci ɗika i na i kukuwa̱ ba. ⁵Ka̱shile a̱ ka̱ci ka̱ ni u foɓuso tsu ta̱ ɗe adama a nam pa, u neke tsu ta̱ Ayinviki a̱ Ka̱shile tsu uzuwi u kaguta u na u kuyotsongu a na wuma u savu u nam pa wa ili i mayun i ɗa.

⁶Adama a nannai, ayin tutu ci ta̱ n ka̱ɗu uvaꞋanki. Ci yeve ta̱ ci baci n wuma a ikyamba i nam pa, ci a kpaꞋa a̱ ubuta̱ u te n Vuzagbayin ba. ⁷Wi ta̱ nannai adama a na ci ta̱ o kutono ili i na ci nekei a̱ɗu, amma ci o kutono ili i na ci e kene ba. ⁸I ɗaɗa ci yeve ta̱ ci ta̱ n utsura u ka̱ɗu. Tsu laꞋa ta̱ n kuciga tsu ka̱sa̱kpa̱ ikyamba i nam pa ya adama a na tsu bana a kpaꞋa ku te u Vuzagbayin. ⁹Ci baci n wuma punu a ikyamba i nam pa, ko ci baci n wuma ba, uteku u na ci cigai u ɗaɗa ci yaꞋan ili i na u kupana uyoꞋo, u laꞋa ta̱ ili i na i buwai dem. ¹⁰Ili i na i zuwai i ɗaɗa, kanna ke te, ra̱ka̱ vu tsu ci ta̱ a kushamgba e kelime ka̱ Kirisiti Kishi ka̱ta̱ u yaꞋanka tsu afada. Yaba dem vu tsu wi ta̱ a kisa katsupu ka na ka gaꞋin adama a ili i na ci yaꞋin a ayin a na ci n wuma wi ikyamba i nam pa, ko i singai i ɗa ko i gbani-gbani.

Kutuka̱ n uma u Ka̱shile

¹¹Adama a na ci yeve ta̱ tsu pana ta̱ wovon u Vuzagbayin, ɗaɗa tsu dakakai adama a na uma o bono o tono yi. Ka̱shile ke yeve ta̱ tsu na ci mayun. Ci ciga ta̱ i yeve icuꞋu i uma i na ci. ¹²Ci a kuyaꞋanka ɗa̱ a̱ra̱ɗi ba, amma ci ta̱ a kudana ɗa̱ ukuna u ka̱ci ka̱ tsu ka̱ta̱ i ciya̱ i yaꞋan ma̱za̱nga̱ adama a̱ tsu. Tsu dana ta̱ ili i nam pa ka̱ta̱ i ciya̱ ili i na i kudana, yi baci koɓolo n aza a na i n ukuna u mayun ba, ɗa kpamu i a̱ra̱ɗi a̱ ubuta̱ wa aza o yoku. ¹³Ci yaꞋan baci adanshi ci ta̱ a kujara, adama a na e neke Ka̱shile tsugbayin ɗa. Ci baci n aci a̱ tsu mayin, adama a na tsu ɓa̱nka̱ ɗa̱ ɗa.

¹⁴Ili i na baci ci yaꞋin dem, ci yaꞋan ta̱ i ɗa adama a na ucigi u Kirisiti Kishi u ɗa wi o kutono n a̱tsu. Ci neke ta̱ kpamu a̱ɗu a na vuma vi te Kirisiti Kishi u kuwa̱i adama a yaba dem, adama a nannai, tsu ushuku ta̱ a na a̱tsu tsu kuwa̱i ra̱ka̱. ¹⁵U kuwa̱ ta̱ u ciya̱ wi isa yaba dem, adama a aza a na a̱ ciya̱i wuma u savu adama a̱ ni o doku o yongo tsu na a̱ kuɓa̱nka̱ ka̱ci ke le koci ba. Amma a kucikpa, o yongo tsu na Kirisiti Kishi u kupana uyoꞋo, vuza na u kuwa̱i ɗa u ɗenga̱i n wuma adama a na wi isa le.

¹⁶Tsu ka̱sa̱kpa̱ ta̱ kuyaꞋanka uma afada tsu na aduniyan a ci yaꞋan. Ci ishi ta̱ ci sheshe ukuna u Kirisiti Kishi tsu na uma a aduniyan e ci sheshe, amma gogo na tsu doku ci yaꞋan nannai ba. ¹⁷Vuza na baci u ɓolongi ka̱ci ka̱ ni n Kirisiti Kishi, Ka̱shile ko bonoko yi ta̱ vuma vu savu. Ili i kuku i ni i kotso ta̱ ɗa i lazai. Ka̱shile ko bonoko ta̱ ili ra̱ka̱ i bonoi usavu.

¹⁸Ka̱shile kaꞋa ka yaꞋin ili i nam pa ra̱ka̱. U tuka̱i tsu ɗevu n a̱yi adama a ili i na Kirisiti Kishi u yaꞋin. U nekei tsu ulinga u kutuka̱ n uma ɗevu n a̱yi feu. ¹⁹Akaka a̱ tsu a ɗaɗa Ka̱shile ko yongo ta̱ a̱ kutuka̱ n uma ra̱ka̱ ɗevu n ka̱ci ka̱ ni a̱ ubuta̱ u Kirisiti Kishi. Ka̱shile ka ci ciɓasa n unushi u le ba. Ɗa u nekei tsu akaka a nam pa a̱ ma̱ta̱na̱.

²⁰Ka̱shile ka̱ suki tsu tso okpo anan taji vu kusala ukuna u Kirisiti Kishi, wi ta̱ kpamu o kufolono ɗa̱ i pana akaka a̱ tsu. Ci yaꞋan ta̱ kadanshi adama a̱ Kishi, tsu folono ɗa̱ ta̱ i ka̱sa̱kpa̱ Ka̱shile ka̱ tuka̱ ɗa̱ ɗevu n a̱yi. ²¹Kishi u saꞋwa kuyaꞋan unushi ba! Amma Ka̱shile ko bonokoi ni vuza vu unushi, adama a na Kirisiti Kishi u zuwai tso okpoi aza a̱ usuɓi u Ka̱shile.

¹Ci ta̱ ulinga koɓolo n Ka̱shile, tsu folono ɗa̱ ta̱ kpamu ka̱ta̱ i iwan kasingai ka̱ Ka̱shile ba. ²Ka̱shile ka dana ta̱ a Katagarda ka Ciɗa ka̱ ni,

“Ana ayin a na n zagbai a yawai,

M pana ta̱ avasa a̱ ɗa̱.

M ɓa̱nka̱ ɗa̱ ta̱ a kanna ka wishi.”6:2 Ish. 49:8.†

Mayun ɗa, Ka̱shile ki ta̱ ufoɓushi adama a na u ɓa̱nka̱ ɗa̱ gogo na. Anana ɗa kanna ka wishi.

Atakaci a̱ Bulusu

³Ci ciga uma a yaꞋan kadanshi ka̱ kula̱nga̱su adama a ulinga wa ba, adama a na ili i na ci yaꞋin dem i zuwa uma kuta̱ɗa̱tsa̱ ba. ⁴Ili i na baci ci yaꞋin dem, ci yotsongu ta̱ a na a̱tsu agbashi a mayun a ɗa ci a̱ Ka̱shile. Ɗa tsu gbamai asuvu n atakaci a na i lo dem. ⁵A tsu lapa tsu ta̱ ayin o yoku. Ka̱ta̱ a zuwa tsu a̱ kunu ku ugbashi. Ka̱bunda̱i ka uma ka ci yaꞋan ta̱ wupa n a̱tsu, ka̱ta̱ a̱ ka̱na̱ vishili vu ka̱bunda̱i. Ci yaꞋansa ta̱ ulinga ali tso oꞋoi n a̱bunda̱i. Kayin kakau tsu tsu lata ba. Ubuta̱ u yoku tsu namba tsuwaꞋa. ⁶Ci yotsongu ta̱ ka̱ci ka̱ tsu a na a̱tsu agbashi a̱ Ka̱shile a ɗa, adama a na ci reme ta̱ ka̱ci ka̱ tsu ɗa ci ciɗa, ci ta̱ kpamu n kuyeve ku na Ka̱shile ke ci neke. Ci yaꞋan mololo ba. Ci yaꞋanka ta̱ uma kasingai. Ci ta̱ n utsura wa Ayinviki a̱ Ka̱shile, mayun ɗa kpamu ci cigai uma. ⁷Tsu dana ta̱ uma akaka a̱ Ka̱shile a mayun, u ci neke tsu ta̱ kpamu utsura. Ci ta̱ n ciɗa vu na vo okpoi an kotokobi ka̱ tsu m ma̱ra̱ga̱ ma na ci cigai adama o kuvon. ⁸Ci yaꞋanka ta̱ Ka̱shile tsugbashi ko uma e neke tsu tsugbayin, ko o goyo tsu. Ci yaꞋanka ta̱ Ka̱shile tsugbashi ko uma a cikpa tsu, ko e ɗeke tsu n kula ku gbani-gbani. Uma a bankai nsata n tsu a dana a̱tsu aza a aꞋuwa a ɗa, amma ayin tutu tsu dansa ta̱ ili i mayun. ⁹Yaba dem u yeve tsu ta̱, amma a yaꞋankai tsu adanshi e yeve tsu kpamu ba. Ci yongo ta̱ adanshi ukpa̱ wi ta̱ lo ɗevu, amma a̱tsu ɗa na, tsu buwai n wuma. Tsu soꞋo ta̱ atakaci n a̱bunda̱i, amma a una tsu ba. ¹⁰Ayin tutu ci yongo ta̱ a̱ ma̱za̱nga̱, ali n ayin a na ci o kusoꞋo atakaci. Aza a unambi a ɗa ci, amma ci ta̱ a kuzuwa uma n a̱bunda̱i o kokpo aza a uciyi a̱ ubuta̱ wu uneki wa̱ a̱ɗu. Ci n ili ba, amma mayun ɗa a na ci n ili dem.

¹¹A̱ɗa̱ uma o Korintiya, ci yaꞋanka ɗa̱ ta̱ kadanshi magaba. A̱ɗu a̱ tsu a shana ta̱ n ucigi a kubana wa̱ ɗa̱. ¹²Tsu ka̱sa̱kpa̱ kuciga ɗa̱ ba, amma a̱ɗa̱ i bula̱ ta̱ kuciga tsu. ¹³Mi ta̱ a kuyaꞋanka ɗa̱ kadanshi gogo na tsu na n kudansuka muku n va̱. Cigai tsu derere tsu na ci cigai ɗa̱.

A̱Ꞌisa̱ a̱ Ka̱shile vuza wuma

¹⁴Ka̱ta̱ i yongo ili i te koɓolo n aza a na a̱ kpa̱ɗa̱i kuneke a̱ɗu n Kishi ba. Kasingai n kagbani-gbani o ci yongo a̱ ubuta̱ u te ba. Kutashi n ka̱yimbi a ci shamgba a̱ ubuta̱ u te ba. ¹⁵Nini ɗai Kirisiti Kishi m MalyaꞋi a kulyaꞋa cija̱Ꞌa̱? Nini ɗai vuza na u nekei ka̱ɗu n vuza na u kpa̱ɗa̱i kuneke ka̱ɗu o kokpo vuza n vutoku? ¹⁶A̱Ꞌisa̱ a̱ Ka̱shile o kuyongo a̱ ubuta̱ u te n a̱ma̱li ba. A̱tsu ɗa ta na a̱Ꞌisa̱ a̱ Ka̱shile vuza vu wuma. Ka̱shile ka danai, “Mi ta̱ a̱ kuda̱sa̱ngu n ele ka̱ta̱ n wala koɓolo n ele. Mi ta̱ o kokpo Ka̱shile ke le, ele tamkpamu o okpo uma a̱ va̱.”6:16 A.Gan. 26:12; Ij. 37:27.

¹⁷Adama a nannai, Vuzavaguɗu u danai,

“Uta̱i punu we le ka̱ta̱ i ɓolongu n ele ba.

Ka̱ta̱ i saꞋwa ili yu unata i na Wila̱ u sa̱nka̱i ba,

nannai ɗa n kisa ɗa̱.”6:17 Ish. 52:11; Ij. 20:34.

¹⁸Vuzavaguɗu MalaꞋimili u danai,

“Mi ta̱ o kokpo Esheku a̱ ɗa̱,

ka̱ta̱ a̱ɗa̱ tamkpamu yo okpo muku n va̱.”6:18 2 Sam. 7:14.

¹A̱ja̱Ꞌa̱ a̱ va̱, Ka̱shile ka yaꞋanka tsu ta̱ uzuwakpani n a̱bunda̱i u nam pa. Adama a nannai ci yaꞋin daꞋin n ili ra̱ka̱ i na i kuzuwa ikyamba i tsu n a̱ɗu a̱ tsu a natukpa. U gaꞋan ta̱ ci neke Ka̱shile tsugbayin ka̱ta̱ tsu dakaka adama a na tsu okpo ci ni gbende.

Ma̱za̱nga̱ ma̱ Bulusu

²Ɓa̱yuwa̱ka̱i tsu ubuta̱ punu a̱ a̱ɗu a̱ ɗa̱. Ci yaꞋanka vuza kagbani-gbani ba. Tsu la̱nga̱sa̱ uneki u ka̱ɗu u vuza ba. Tsu doro kpamu vuza ba. ³N dansa ili i nam pa adama a na n ciga mi ilukpa̱ ɗa̱ ba. N dana ɗa̱ ta̱ ɗe ayin tutu ci yongo ta̱ a kuciɓasa ko yi ɗa̱i i kuta̱wa̱. ⁴N soɗongu ta̱ ma̱tsa̱n n a̱ɗa̱ mayin. N ci yongo ta̱ a̱ ma̱za̱nga̱ ayin tutu adama a̱ ɗa̱. I yaꞋanka mu ta̱ kadanshi ku utsura u ka̱ɗu ka̱u. Ko a na mi n atakaci ka̱u, i zuwa mu ta̱ mo okpoi m ma̱za̱nga̱ ka̱u.

⁵Ana ci yawai a iɗika i Makidoniya, ci ciya̱ kuvuka ba. Ci cinai kadama a̱ ubuta̱ dem a kuvana tsu. Ci yaꞋan ta̱ kanananai n irala i tsu, ɗa ci yongoi a kupana wovon punu a̱ a̱ɗu a̱ tsu. ⁶Amma Ka̱shile, a̱yi na u tsu neke uma kadanshi ka kuvaꞋanka a̱ɗu, ayin a na baci a̱ɗu e le a̱ na̱mgba̱i, u yaꞋankai tsu kadanshi ka kuvaꞋanka ka̱ɗu a ayin a na Taitu u yawai. ⁷Mayun, ci ta̱ m ma̱za̱nga̱ ma na ce ene yi. Amma ili i na i nekei tsu ma̱za̱nga̱ mayun i ɗaɗa tsu na i nekei ni kadanshi ka utsura u ka̱ɗu. U dana tsu ta̱ uteku u na yi a kuciga ye ene mu, ɗa u danai tsu i shika̱ ta̱ unushi kpamu adama a ili i na i yaꞋin. U doku u danai mu tsu na i cigai kuɓa̱nka̱ mu ka̱u. Ana m panai ili i nam pa, ɗa m panai ma̱za̱nga̱ ka̱u.

⁸Ko akaka a̱ va̱ a̱ la̱nga̱sa̱ ɗa̱ baci a̱ɗu, na lo u ɓa̱la̱ mu ba. N ugiti u ɓa̱la̱ mu ta̱ kenu, adama a na a̱ɗu a̱ ɗa̱ a̱ na̱mgba̱i, amma una̱mgbuka̱tsuma̱ u ɗa̱ u yaꞋan makyan ba. ⁹Amma gogo na mi ta̱ m ma̱za̱nga̱. N yaꞋan ma̱za̱nga̱ adama a na n neke ɗa̱ ta̱ una̱mgbuka̱tsuma̱ ba, amma adama a na una̱mgbuka̱tsuma̱ u ɗa̱ u zuwa ɗa̱ ta̱ i sabaꞋi ma̱riki ma̱ ɗa̱. Ci yaꞋanka ɗa̱ iforotoi ba, ko kenu. ¹⁰Ka̱shile ka ci yaꞋan ta̱ ulinga n una̱mgbuka̱tsuma̱ a wuma u tsu adama a na u ɓa̱nka̱ tsu tsu ka̱sa̱kpa̱ unushi u tsu ka̱ta̱ ci ciya̱ wishi. Na lo u ɓa̱la̱ tsu adama a icuꞋu yi una̱mgbuka̱tsuma̱ u nan lo ba. Amma vuza wi baci n una̱mgbuka̱tsuma̱, ɗa u bonoi u Ka̱shile ba, wi ta̱ a̱ kukuwa̱, wi a̱ kuciya̱ wishi ba.

¹¹Zukai n ili na una̱mgbuka̱tsuma̱ u na Ka̱shile ka cigai i pana u tuka̱i ɗa̱. U zuwa ɗa̱ ta̱ i ka̱na̱i kaci. U zuwa ɗa̱ ta̱ i yotsongu a na i yaꞋin unushi ba. U zuwa ɗa̱ ta̱ i yaꞋin wupa ɗa i panai wovon. U zuwa ɗa̱ ta̱ i cigai kene mu. U zuwa ɗa̱ ta̱ i ɓa̱nka̱i uma. U zuwa ɗa̱ ta̱ i ciya̱ mali ma na a takacika vuma vu na u nusai. U zuwa ɗa̱ ta̱ i yotsongi a na a̱ɗa̱ i yaꞋin ili i na yi derere. ¹²N ɗana ta̱ akaka a nan lo a adama a na ye ene, e kelime ka̱ Ka̱shile, tsu na i la̱na̱i tsu mayin. N ɗana a ɗa adama a vuza na u nusai, ko vuza na a nusakai ba. ¹³I ɗaɗa i zuwai ɗa ci ciya̱i utsura u ka̱ɗu.

Ko a na ci ciya̱i utsura u ka̱ɗu, tsu laꞋa ta̱ n kuyaꞋan ma̱za̱nga̱ adama a na ce ene Taitu wi ta̱ a̱ ma̱za̱nga̱, adama a na i zuwa ta̱ ka̱ɗu ka̱ ni ida̱shi. ¹⁴Tsu dana yi ta̱ tsu na ci m ma̱za̱nga̱ ka̱u adama a̱ ɗa̱, ɗa ta na i yotsongi a na mayun ɗa mu. Ili ra̱ka̱ i na tsu danai ɗa̱ mayun ɗa, a̱ɗa̱ kpamu i yotsongu ta̱ a na ili i na tsu danai Taitu adama a̱ ɗa̱ mayun ɗa. ¹⁵Adama a nannai ucigi u ni a kubana wa̱ ɗa̱ u tsurakpa, ayin a na baci u ciɓai tsu na ra̱ka̱ vu ɗa̱ yi ufoɓushi adama a na i pana kadanshi ka̱ ni, koɓolo kpamu n tsu na i ka̱na̱i ni n wovon n kujeꞋeke ki ikamba. ¹⁶Mi ta̱ m ma̱za̱nga̱ ka̱u uteku u na mi a kufuɗa kusoɗongu ma̱tsa̱n n a̱ɗa̱ mayin.

Aza o Kutoni e neke ikebe

¹A̱ja̱Ꞌa̱ a̱ va̱, ci ciga ɗa̱ ta̱ i yeve tsu na Ka̱shile ko yotsongi kasingai ka̱ ni wa aza o Kutoni a̱ ubuta̱ kakau u na wi iɗika i Makidoniya. ²O soꞋi atakaci ka̱u ɗa kpamu i babu ili, amma ma̱za̱nga̱ me le mo kotso ba, ali ɗa e nekei ɗa i ɓarakpai. ³YaꞋan n dana ɗa̱ e neke ta̱ n a̱bunda̱i uteku u na a kufuɗa ali a pasukpai. Babu vuza na u danai le a yaꞋan nannai.⁴Amma ɗa o yongoi o kufolono tsu tsu ka̱sa̱kpa̱ le a̱ ɓa̱nka̱ uma a̱ Ka̱shile a na i a Urishelima. ⁵Ci sheshe i a kufuɗa kuneke ali nannai ba! Ili i na a̱ gita̱i kuyaꞋan i ɗaɗa e nekei biꞋi ka̱ci ke le u Vuzagbayin ɗa e yevei e nekei ka̱ci ke le wa̱ a̱tsu. Ili i nam pa i ɗa Ka̱shile ka cigai. ⁶Taitu ɗa vuza na u gita̱i kuyotsongu ɗa̱ uteku u na i kuneke, ɗa tsu folonoi ni u bono u ɓa̱nka̱ ɗa̱ i kotso ulinga u kuneꞋe wa u na i gita̱ va. ⁷I yaꞋin ili ra̱ka̱ mayin, ali i lazakai: A̱ɗa̱ na yi n uneki u ka̱ɗu ka̱u. Ɗa i ci yaꞋan n kadanshi mayin. A̱ɗa̱ na yi n kuyeve. Ɗa yi kpamu a kuciga kuɓa̱nka̱ uma. Ɗa kpamu i cigai tsu ka̱u. Ci ciga ɗa̱ ta̱ i yaꞋan mayin mayun a ukuna u kuneke u nam pa babu mogogu.

⁸Mi a kugutsaka ɗa̱ sai i neke ba, ko a na aza o Kutoni a̱ ubuta̱ kakau a cigai kuyaꞋan nannai ka̱u. Nan lo va ɗaɗa uye u yoku u na wi o kuyotsongu a na ucigi u ɗa̱ mayun ɗa wi. ⁹I yeve ta̱ kasingai ka Vuzagbayin vu tsu Yesu Kishi. I yeve ta̱ a na Kishi wi ishi n uciyi, amma wo okpoi n unambi adama a̱ ɗa̱, ɗa u zuwai ɗa̱ yo okpo n uciyi adama a unambi u ni.

¹⁰Odoki a̱ va̱ a ɗa na: Ɓalu a̱ɗa̱ ɗa i gita̱i kuciga kuneke, a̱ɗa̱ ɗa ta na i gita̱i kuyaꞋan kuneke ka. ¹¹Gogo na kotsosoi ulinga u na i gita̱i kuyaꞋan. Yotsongi a na yi a kufuɗa kukotso ulinga wa m mali tsu na i gita̱i u ɗa. Nekei a̱ ka̱tsuma̱ ki ili i na yi n i ɗa. ¹²I ciga baci i yaꞋan neke, ka̱ta̱ i keɓece ko nini ɗai kuneꞋe ku nu ki ba. Ka̱shile ka ciga ta̱ i neke a̱ ka̱tsuma̱ ki ili i na yi n i ɗa, amma i neke i na i kpa̱ɗa̱i kuyaꞋan n i ɗa ba.

¹³N ciga i neke ka̱u ali aza o yoku a pana uyoꞋo ka̱ta̱ a̱ɗa̱ tamkpamu i soꞋo atakaci n ili kenu i na yo okpoi ɗa̱ ba. N ciga ta̱ ili i yaꞋan derere adama a yaba dem vu na wi punu a̱ ka̱tsuma̱. ¹⁴Gogo na nahannai yi ta̱ n ili n a̱bunda̱i. Ili i na yi n i ɗa yi ta̱ a̱ kuɓa̱nka̱ aza a na a nambai ka̱ta̱ megeshe a̱ ciya̱ baci ka̱u e yeve a̱ ɓa̱nka̱ ɗa̱ i namba baci, ka̱ta̱ ili dem yo okpo derere. ¹⁵Katagarda ka Ciɗa ka danai, “Vuza na u ɓolongi ka̱u, i ɗa i ɓarakpa ba. Vuza na u ɓolongi kenu, u namba ili ba.”8:15 Kut. 16:18.

Taitu n a̱ja̱Ꞌa̱ a̱ ni

¹⁶N cikpa ta̱ Ka̱shile a na u zuwai Taitu u ciga ɗa̱ tsu na mpa n cigai ɗa̱. ¹⁷Taitu wu ushuku ta̱ kuyaꞋan ili i na tsu danai ni u yaꞋan. U ciga ta̱ ka̱u u bana wa̱ ɗa̱, ali kafu tsu dana yi u bana. ¹⁸Ci ta̱ a̱ kusuku yi koɓolo n vuza tsu, vuza na a̱Ꞌisa̱ a aza o Kutoni ra̱ka̱ a cikpai adama a tsugbashi ci ni a ayin a na u danai uma Arabali a Singai. ¹⁹A̱Ꞌisa̱ a aza o Kutoni kakau a zagba yi ta̱ u bana n a̱tsu a̱ ubuta̱ u kuneke ikebe i nam pa. Ci ta̱ a kuyaꞋan tsugbashi tsu nam pa adama a na ci neke Vuzagbayin tsugbayin, ka̱ta̱ kpamu tsu yotsongu a na mayun ɗa ci cigai kuɓa̱nka̱.

²⁰Nannai ɗaɗa ci ciga vuza u ciya̱ tsu n unushi adama e kuneꞋe ka̱ a̱bunda̱i ku nam pa ba. ²¹Amma a̱tsu ci ciga ta̱ ci yaꞋan ili i na Vuzagbayin u kupana uyoꞋo ali n uma feu.

²²Ci ta̱ kpamu a̱ kusuku vuma vi yoku koɓolo n uma e re a nan lo a. Vuma vu nam pa ayin tutu wi ta̱ ufoɓushi adama a na u ɓa̱nka̱. U yaꞋanka tsu ta̱ ɗe nannai a uye kakau n a̱bunda̱i, u doku ta̱ kpamu u ciga kuɓa̱nka̱ gogo na ka̱u, adama a na wu ushuku ka̱u n a̱ɗa̱. ²³Vuza na baci we ecei ukuna u Taitu, danai vuza nan lo, wi ta̱ ulinga nu mpa adama a na tsu ɓa̱nka̱ ɗa̱. A̱Ꞌisa̱ a aza o Kutoni a ɗa feu a̱ suki uma e re a nam pa a kubana wa̱ ɗa̱, ɗa e nekei Kishi tsugbayin. ²⁴Yotsongi le ucigi u ɗa̱, adama a na a̱Ꞌisa̱ a aza o Kutoni a̱ ciya̱ e yeve a na ci yaꞋin derere a ayin a na ci m ma̱za̱nga̱ adama a̱ ɗa̱.

Ikebe adama aza a na a nambai

¹Me ene ugaꞋin u na wi punu n ɗanaka ɗa̱ adama a ukuna wi ikebe i na i foɓusoi kuneke uma a̱ Ka̱shile ba. ²N yeve ta̱ i ciga ta̱ kuɓa̱nka̱. Mi ta̱ a̱ ma̱za̱nga̱ adama a ukuna u nan lo, n gita̱ ta̱ ɗe kudana uma a Makidoniya uteku u na a̱ɗa̱ aza a Akataya yi ɗe ufoɓushi adama a na i neke ali ɓalu. Adama a na i cikala ta̱ kuneke ɗa ta na u zuwai ele vi yoku n a̱bunda̱i a ciga feu kuneke.

³Amma mi ta̱ a̱ kusuku aza a̱ tsu a nam pa a kubana wa̱ ɗa̱ adama a na kadanshi ka̱ tsu ukuna u ɗa̱ ko okpo gbani ba. N ciga ta̱ i yongo ufoɓushi, adama a na n dana ta̱ ɗe yi ta̱ a kuyaꞋan nannai. ⁴Mi ta̱ a kupana wono, ka̱ta̱ a̱ɗa̱ feu i pana wono, aza o yoku a na e nekei a̱ɗu a Makidoniya a̱ ta̱wa̱ baci na nu mpa, ɗa ci cinai ɗa̱ babu na i foɓusoi wana ɗai ta na n dana le ukuna dem! ⁵Me enei u kulaꞋa ta̱ n kugaꞋan n suku baci aza a̱ tsu a nam pa a wala kelime ka̱ va̱ adama a na e yeve ko kuneꞋe ku na i yaꞋin uzuwakpani i foɓuso ta̱ ɗe ku ɗa. Na lo va u kuyotsongu ta̱ a na i nekei adama a na i ciga ta̱, wi adama a na n gutsakai ɗa̱ i neke ba.

⁶Ciɓai vuza na u ca̱Ꞌi kenu, wi ta̱ feu a kukyaꞋa kenu. Vuza na u ca̱Ꞌi n a̱bunda̱i, wi ta̱ a kukyaꞋa n a̱bunda̱i feu.⁷Yaba dem vu ɗa̱ u sheshe n ka̱ci ka̱ ni ko yain ɗai u kuneke. Ka̱ɗu ka̱ nu ki baci dakaka a̱ ubuta̱ u kuneke wa, ka̱ta̱ vi neke ba. Ve ene baci i ta̱ a kugutsaka wu, ka̱ta̱ vi neke feu ba. Adama a na Ka̱shile ka laꞋa ta̱ n kuciga vuza u ci neke m ma̱za̱nga̱ a̱ ka̱ɗu ka̱ ni. ⁸Ka̱shile ki ta̱ a kufuɗa kuneke wu una̱singai u na u laꞋi i na vu nambai. Ka̱ta̱ ayin tutu vi yongo n ili n a̱bunda̱i, ali vi ciya̱ i yawa wu ka̱ta̱ kpamu vi neke adama a ulinga u singai dem. ⁹Katagarda ka Ciɗa ka danai:

“E ci neke ta̱ aza a unambi kuneꞋe ku le n ekiye e re,

ka̱ta̱ usuɓi u le u yongo a kuyaꞋan ili i na i gaꞋin ali a kubana a uteku.”9:9 Ishp. 112:9.

¹⁰Adama a na Ka̱shile kaꞋa vuza na u ci neke acimbi icuꞋu, ka̱ta̱ kpamu u neke ilikulyaꞋa. Wi ta̱ o kudoku ɗa̱ ili i na yi n i ɗa, i tono baci kasingai adama a na i fuɗa i doku i neꞋe aza a na a nambai. ¹¹Wi ta̱ a kuzuwa ɗa̱ i yaꞋan n uciyi wi ili dem adama a na i fuɗa i neꞋe uma n ekiye e re. Ka̱ta̱ uma n a̱bunda̱i a cikpa Ka̱shile a ayin a na tsu bankai n kuneꞋe ku ɗa̱.

¹²Tsugbashi tsu na yi a kuyaꞋan na adama a na ci neke uma a̱ Ka̱shile ili i na a nambai ɗa koci ba, amma ci ta̱ kpamu a kuzuwa le a laꞋa n kucikpa Ka̱shile. ¹³Yi ta̱ e kuneke Ka̱shile tsugbayin adama a na i fuɗai i nekei n ekiye e re. I neke ta̱ a̱ɗu n akaka a̱ Kirisiti Kishi, ɗa i tonoi a ɗa ana i nekei uma a̱ Ka̱shile n ekiye e re koɓolo n aza a na a buwai. ¹⁴Gogo na i ta̱ a kavasa adama a̱ ɗa̱, ali ɗa a cigai ɗa̱, adama a kasingai ka na Ka̱shile ka yaꞋin e ekiye a̱ ɗa̱. ¹⁵Ci cikpai Ka̱shile adama e kuneꞋe ku gbayin ku nam pa.

Bulusu u danai ulinga u ni

¹Mpa Bulusu, mi ta̱ o kufolono ɗa̱ n usuɓi koɓolo n kasingai ka̱ Kishi. Uma o yoku a danai mi baci koɓolo n a̱ɗa̱ n tsu gajarakpa ba, amma mi baci lo koɓolo n a̱ɗa̱ ba, n tsu dansuka ta̱ ka̱u. ²N ta̱wa̱ baci kpamu kene ɗa̱, n yeve ta̱ n kuzuwa ta̱ usuɗukpi ka̱u wa aza a na e ci sheshe ci ta̱ o kutono ukuna wa aduniyan. N ciga i zuwa mu n takacika ɗa̱ nannai ba.

³Ci ta̱ o kuyongo a aduniyan, amma a̱tsu ci yaꞋan kuvon tsu na uma a aduniyan a ci yaꞋan ba. ⁴Yunatsu i na a̱tsu ci ci yaꞋanka kuvon, kau ɗa yi n i na aduniyan a ci yaꞋanka. Yunatsu i tsu yi ta̱ n utsura a̱ ubuta̱ u Ka̱shile uteku u na i kuna ubuta̱ wi ida̱shi yu utsura kakau u vurala vu tsu. ⁵A̱tsu tsu una ta̱ kanananai koɓolo n a̱ra̱ɗi dem a na a kufuɗa kusa̱nka̱ vuma kuyeve Ka̱shile. Tsu la̱nga̱sa̱ ta̱ kusheshe ku kugoyi ku na ki punu a̱ a̱ɗu a uma ɗa tsu zuwai le a panaka Kishi. ⁶I yotsongu baci i kotso a na i panakai Kishi mayin, ci ta̱ o kufoɓuso adama a na tsu takacika yaba dem vu na u iwain kupana.

⁷Yi ta̱ a kinda ili i na a̱shi i a kufuɗa kene koci. I ciɓa a na a̱tsu aza a̱ Kishi a ɗa n derere n tsa aza a na a tsu dansa n a̱ra̱ɗi ele feu aza a̱ Kishi a ɗa. ⁸Mayun ɗa tsu dansa ka̱u n a̱ra̱ɗi adama a ukuna wu utsura u na Vuzagbayin u nekei tsu tsu ɓa̱nka̱ ɗa̱, amma adama a na tsu takacika ɗa̱ ba. Amma m pana wono adama a ili i nam pa ba.

⁹N ɗanaka ɗa̱ baci de dem, n ciga i sheshe mi ta̱ e kuneke ɗa̱ wovon ba. ¹⁰Uma o yoku a danai, “Atagarda a akaka kakau a̱ Bulusu i ta̱ n utsura koɓolo n ugaꞋin u kupana, amma ayin a na wi n a̱tsu, u zaza ba. Kadanshi ka na ka̱ uta̱i a̱ una̱ u ni ka makara kaꞋa ba.” ¹¹U gaꞋan ta̱ e yeve ili i nam pa: Ci ɗe koɓolo n a̱ɗa̱ gogo na ba, i ɗaɗa i zuwai ɗa tsu dansai ili i nam pa a atagarda a akaka. Amma ayin a na baci ci ɗe koɓolo n a̱ɗa̱, ci ta̱ o kuyotsongu ɗa̱ utsura wa derere n tsu na tso kuyotsongu a̱ ubuta̱ wa akaka a̱ tsu.

¹²A̱tsu tsu kaꞋwan kuntsukpa ka̱ci ka̱ tsu n aza a na a tsu dana ele a laꞋa ta̱ n kugaꞋan ba. A ci inda ta̱ ka̱ci ke le ka̱ta̱ a yaꞋan uye u kagisamkpatsu u le, ɗa gisanki ka̱ci ke le n u ɗa. Ka̱ta̱ a yaꞋanka ka̱ci ke le afada tsu na nwalu n le mi. Na va u yotsongu ta̱ a na a̱ kpa̱ɗa̱i kuyeve ili.

¹³Amma a̱tsu tsa kuyaꞋan a̱ra̱ɗi n ili i na yi pulai a ulinga u na Ka̱shile ka̱ suki tsu ci yaꞋan ba. Ci ta̱ a kuyaꞋan a̱ra̱ɗi koci n ulinga u na Ka̱shile ka̱ suki tsu ci yaꞋan, a̱ɗa̱ va ta punu feu yi a̱ ubuta̱ wu ulinga wa. ¹⁴Ci a kuyaꞋan a̱ra̱ɗi a ulami ba. Yevei, a̱tsu ɗa tsu gita̱i kutuka̱ ɗa̱ n Arabali a Singai a ukuna u Kirisiti Kishi.

¹⁵Ci yaꞋan a̱ra̱ɗi adama a ili i na uma o yoku a yaꞋin ba, adanshi tsu kucikpa ta̱ ci yaꞋan ili i nan lo ya n ka̱ci ka̱ tsu. Tsu kucikpa ta̱ ci keɗe a̱pa̱Ꞌa̱ adama a na uneki u ka̱ɗu u ɗa̱ u gbonguro ka̱ta̱ kpamu ulinga u tsu wa̱ ɗa̱ u lyaꞋa kelime ka̱u. ¹⁶Ci ciga ta̱ tsu bana tsu dana Arabali a Singai a̱ ubuta̱ u na wi daꞋin. Ci ciga ci yaꞋan a̱ra̱ɗi adama a ulinga u na uma o yoku a yaꞋin ɗe a̱ ubuta̱ u le ba. ¹⁷Katagarda ka Ciɗa ka danai, “Vi ciga baci vi yaꞋan a̱ra̱ɗi, yaꞋan a ɗa adama a ili i na Vuzavaguɗu u yaꞋin.”10:17 Ir. 9:24.

¹⁸Vuza na u cikpai ka̱ci ka̱ ni u kuciya̱ ucikpi u mayun ba. Amma ayin a na baci Vuzavaguɗu u zagbai vuza, vuma vu nan lo wi ta̱ ta na a̱ kuciya̱ ucikpi u mayun.

Bulusu n azusuki a aꞋuwa

¹N tsulau ci kenu tsu va̱ dem n yeve ta̱ ve kureme ta̱ ka̱ɗu nu mpa. E, n folono wu ta̱ vi reme ka̱ɗu nu mpa. ²Ili i bura mu ta̱ n a̱ɗa̱ uteku u na kpamu Ka̱shile ili i burai ni n a̱ɗa̱. Yi ta̱ an mekere ma na me yevei vali ba, ɗa n yaꞋankai ni uzuwakpani u na wo olo vali vi te koci, a̱yi ɗa ta na Kishi a̱ ka̱ci ka̱ ni. ³Amma gogo na mi ta̱ a kupana wovon ta lo a̱ ta̱wa̱ a̱ puwa̱nka̱ n a̱ɗu a̱ ɗa̱ adama a na i ka̱sa̱kpa̱ kutono Kishi m mayun koɓolo n ka̱ɗu ka ciɗa, tsu na koko ka̱ ya̱nsa̱i Hawa† n ugboji u gbani-gbani u ni. ⁴Tsu dana ɗa̱ ta̱ ukuna u Yesu, ɗa i ciya̱i Ayinviki a̱ Ka̱shile, ɗa yi isai akaka a̱ tsu. Amma ɗa i ka̱sa̱kpa̱i uma o yoku a danai ɗa̱ ili i yoku kau yu ukuna u Yesu. Gogo na yi ta̱ ufoɓushi adama a na yi isa ayinviki o yoku kau koɓolo kpamu n akaka o yoku.

⁵Aza a na e ci ɗeke ka̱ci ke le “azusuki a gbagbaꞋin” n sheshe a na a laꞋi mu ba. ⁶U gaꞋan ba mi a kufuɗa kuyaꞋan kadanshi mayin ci le ba, amma n yeve ta̱ ili i na mi a kudansa. Ci yotsongu ɗa̱ ta̱ ɗe ili i nam pa hawun a uye kakau dem.

⁷N zuwa ɗa̱ i tsupa mu adama a Arabali a Singai a na n danai ɗa̱ ba. N goyo ta̱ ka̱ci ka̱ va̱ ɗa n nekei ɗa̱ tsugbayin. Nannai va n nusa ta̱? ⁸Wi ta̱ adanshi uboki u ɗa mi a kuyaꞋan ana mi isai ikebe a̱Ꞌisa̱ a aza o Kutoni kakau ciya̱ m ɓa̱nka̱ ɗa̱ koci, adama a na n yaꞋanka ɗa̱ tsugbashi. ⁹Ayin a na mi koɓolo n a̱ɗa̱ n namba baci ili, n ce ece a̱ɗa̱ i ɓa̱nka̱ mu ba. Aza a̱ tsu a na a̱ uta̱i a Makidoniya ɗa a yawai ɗe e neꞋe mu ta̱ ili ra̱ka̱ i na n cigai. N saꞋwa kufolono ɗa̱ i ɓa̱nka̱ mu ba, mi ta na a kuyaꞋan feu ba. ¹⁰Babu vuza na u kuta̱ a iɗika i Akataya ka̱ta̱ u sa̱nka̱ mu kudansa ukuna u nan lo ka̱u. N dansa ta̱ ili i nam pa m mayun u Kirisiti Kishi a̱ ka̱ɗu ka̱ va̱. ¹¹Ana n dansai n ciga mo oꞋuso ɗa̱ ba, ɗaɗa m kpa̱ɗa̱i kuciga ɗa̱? A̱Ꞌa̱! Ka̱shile ke yeve ta̱ a na n cigai ɗa̱!

¹²Mi ta̱ a kulyaꞋa kelime n kuyaꞋan ili i na mi a kuyaꞋan gogo na, adama a na n ciga ta̱ n sa̱nka̱ uma a nan lo kuciya̱ uye u na a kuyaꞋanka a̱ra̱ɗi. I ta̱ a kuciga a dana ulinga u na i a kuyaꞋanka a̱ra̱ɗi a u te u ɗa n ulinga u tsu. ¹³Uma a nam pa a azusuki a aꞋuwa a ɗa. A ci yaꞋan ta̱ aꞋuwa adama a ulinga u na i a kuyaꞋan, ka̱ta̱ o bonoko ka̱ci ke le adama a na o yotso azusuki a mayun a̱ Kirisiti Kishi. ¹⁴Amma ili i mereve i ɗa wa̱ va̱ ba, adama a na Kalijani† feu u tsu bonoko ta̱ ka̱ci ka̱ ni adama a na u ciya̱ u yotso kalingata ka kutashi. ¹⁵Ili i mereve i ɗa wa̱ tsu ba, a na agbashi a MalyaꞋi feu o tsu bonoko ka̱ci ke le adama a na o yotso agbashi a na a ci yaꞋan ulinga u singai. Amma a kanna ku uteku, i ta̱ a̱ kuciya̱ atakaci derere a ili i na a yaꞋin.

Bulusu u yaꞋin kadanshi ka atakaci a̱ ni

¹⁶N dana ɗa̱ kpamu: Ka̱ta̱ vuza we ene mu an kalau ba. Amma i sheshe baci nannai, to, panakai mu, tsu na i kupanaka kalau, ayin a na feu mi a kuyaꞋan a̱ra̱ɗi kenu. ¹⁷Ayin a na baci mi a kucikpa ka̱ci ka̱ va̱ tsu nan lo, mi a kuyaꞋan kadanshi tsu na Vuzagbayin u tsu dansa ba, amma tsu na kalau ka tsu dansa. ¹⁸Uma n a̱bunda̱i i ta̱ a kuyaꞋan kadanshi ka̱ a̱ra̱ɗi adama a ili i na a yaꞋin punu a aduniyan. Mi ta̱ feu a kuyaꞋan nannai. ¹⁹A̱ɗa̱ na i danai yi ta̱ n ugboji, yi a kupana uyoꞋo u kupanaka alau! ²⁰Ali a̱ɗa̱ e kureme a̱ɗu n aza a na o bonokoi ɗa̱ agbashi e le. A̱ɗa̱ kpamu e kureme a̱ɗu n aza a na a kulyaꞋa ɗa̱, ko aza a na i a̱ kuya̱nsa̱ ɗa̱. Ali a̱ɗa̱ e kureme a̱ɗu n aza a na a ci ɗika ka̱ci ke le a laꞋa ɗa̱ ta̱, ko aza a na a tsu ɓasasa ɗa̱. ²¹M pana ta̱ wono ana n danai utsura u kuyongo u tsu u yawa u nan lo ba.

I baci a kufuɗa kuyaꞋan a̱ra̱ɗi, mpa n kuyaꞋan ta̱ feu, amma nannai va tsulau tsu ɗa. ²²A danai ele va Umaci wi Ibrahim u ɗa, ko? Mpa feu vuza vu Umaci wi Ibrahim u ɗa. Ele aza a Israila a ɗa? Mpa feu vuza vi Israila ɗa mi. Ele ntsukaya mi Ibrahim n ɗa i? Mpa feu ma ɗa mi. ²³Agbashi a̱ Kishi a ɗa i? Tsulau tsu ɗa mu ana n yaꞋin kadanshi tsu nam pa, amma n laꞋa le ta̱ a kuyaꞋanka yi tsugbashi. N laꞋa le ta̱ a kuyaꞋan ulinga ka̱u. A zuwa mu ta̱ ugbashi ayin tutu u laꞋi tsu na ele feu a yaꞋin ugbashi wa. Ulapi u na n soꞋi u laꞋa ta̱ u le n a̱bunda̱i. Ayin n a̱bunda̱i n ci yaꞋan ta̱ adanshi mi ta̱ a̱ kukuwa̱. ²⁴Ayahuda a fabai mu ali kamankupa n kuci m mashauri.11:24 A ayin a cau a faba baci vuza ali macaka amangere, wi ta̱ a̱ kukuwa̱. Amma ɗa a fabai ni ali kamankupa n kuci adama a na u ɓa̱la̱ yi ka̱u amma u kuwa̱ ba. A yaꞋan ta̱ nannai va ali kutawun. ²⁵Aza o Roma a lapai mu n alangu. A yaꞋanka mu ta̱ nannai ali kutatsu. Kute a varai mu adama a na a una mu. Mpa a nwalu a kpantsu ɗa ku ɓosoi eshere-eshere. Nannai u yaꞋan ta̱ ali kutatsu. Ɗa ta na n ta̱ɗukpa̱i a̱ mini n gita̱i n kulivi sai a na kpamu kulivi ku yoku ku bonoi.²⁶Ayin a na mi a nwalu n a̱bunda̱i, n soꞋo ta̱ atakaci ali ɗevu n kukuwa̱ adama a nyeneke n na n uwai m mini, koɓolo n oboki a yunatsu. N uwa ta̱ a̱ ka̱tsuma̱ ka atakaci adama a uma a̱ va̱, Ayahuda, koɓolo kpamu n adama a Aza̱ka̱yimbi. N yongo ta̱ o kusoꞋo atakaci punu a̱ likuci i gbagbaꞋin, na ɗe a kakamba, m punu kpamu a mala. N yongo ta̱ kpamu a̱ ka̱tsuma̱ ka atakaci adama a uma a na a danai ele aza o Kutoni a ɗa, ashe ta na ba. ²⁷N yaꞋan ta̱ ulinga ka̱u ali mo oꞋoi, ayin n a̱bunda̱i n nambai alavu. N yongo ta̱ a kupana kambulu n kakuli dem, n yongo ta̱ babu ilikulyaꞋa ayin n a̱bunda̱i. N ci yongo ta̱ kpamu a kupana uta̱ni adama a na ntogu n yawa mu ba. ²⁸N kudoku ta̱ kpamu nahannai, n ci yaꞋan ta̱ adanshi n ɗika ta̱ a̱miki a kaci ka̱ va̱ ayin tutu adama a uteku u na ili i burai mu n a̱Ꞌisa̱ a aza o Kutoni kakau ra̱ka̱. ²⁹Aza o yoku ikyamba i kuwa̱ le baci, mpa feu i kuwa̱ mu ta̱. Ko kenu ka̱ɗu ka̱ va̱ ka̱ da̱sa̱ngu ba, a ayin a na baci a̱ ya̱nsa̱i vuza adama a na u yaꞋan unushi.

³⁰Mi baci a kucikpa ka̱ci ka̱ va̱, mi ta̱ a kuyaꞋan nannai adama a ili i na i yotsongi a na ikyamba i va̱ i kuwa̱i. ³¹Ka̱shile ke yeve ta̱ aꞋuwa ɗa mu ba. A̱yi Ka̱shile kaꞋa n Dada vu Vuzagbayin Yesu Kirisiti Kishi, i ta̱ ta na a kucikpa yi ali ayin a babu uteku. ³²Ayin a na mi ishi a Dimaska, gomuna (vuza na Mogono Arita u zuwai) u cigai kuka̱na̱ mu, ɗa u zuwai aza a kindi a̱ likuci ya ra̱ka̱. ³³Amma a̱ja̱Ꞌa̱ a̱ va̱ o zorukpoi mu n katusu a mabana punu a mashilya ma̱ likuci ma. Nannai ɗa n fa̱ta̱tsa̱i e ekiye o gomuna.

Vuzagbayin u ta̱wa̱i u Bulusu tsalatani

¹U gaꞋan ta̱ n yaꞋan a̱ra̱ɗi. Babu ili i na vuza u kuciya̱ n a ɗa, amma yaꞋan n yaꞋan a̱ra̱ɗi adama a tsalatani n kene kakau ku na Vuzagbayin u yotsongi mu. ²A̱ya̱ kupa n a̱ na̱shi a na a lazai, Ka̱shile ka ɗikai vuma vi yoku vuza na wi o kutono Kishi u bankai ni gaɗi dunduꞋun a̱ Ka̱shile. N yeve ba, ko ikyamba i ni i ɗa i yaꞋin nwalu ma, ko ayinviki a̱ ni a ɗa koci, amma Ka̱shile ke yeve ta̱. ^3-4N doku ta̱ kpamu n dansa, n yeve ta̱ a ɗika ta̱ vuma vu nam pa a kubana a̱ ubuta̱ u kuvuka† a̱ Ka̱shile. N yeve ba, ko mayun ɗa ikyamba i ni i banai gaɗi ko ayinviki a̱ ni a ɗa koci a banai, amma Ka̱shile ke yeve ta̱. U panai ili u fuɗa ta na u dansa ukuna u le e keteshe ba, koɓolo n ili i na Ka̱shile ka̱ kpa̱ɗa̱i kuka̱sa̱kpa̱ vuza u dansa.

⁵Mi ta̱ a kuyaꞋan a̱ra̱ɗi adama a vuma vu nan lo, amma mi a kuyaꞋan a̱ra̱ɗi adama a̱ ka̱ci ka̱ va̱ ba, sai ili i na i yotsongi tsu na ikyamba i va̱ i kuwa̱i. ⁶Amma mi ishi baci n ciga n yaꞋan a̱ra̱ɗi adama a̱ ka̱ci ka̱ va̱, mi a kuyaꞋan tsulau ba, adama a na mi ta̱ a kudansa ili i na yi i mayun. Amma ma kuyaꞋan a̱ra̱ɗi adama a̱ ka̱ci ka̱ va̱ ba. N ciga uma e neke mu tsugbayin ali tsu laꞋa ili i na a̱ kpa̱ɗa̱i kene mu a kuyaꞋan ɗa kpamu n dansai ba.

⁷Amma u gaꞋan n yaꞋan a̱ra̱ɗi ka̱u adama a ili i mereve i na Ka̱shile ko yotsongi mu ba. I ɗaɗa i zuwai ɗa u nekei mu mɓa̱la̱ n yoku n na n soꞋo atakaci, tsu na kawana ka tsu sapa vuza a ikyamba. Wi ta̱ adanshi kalingata ka MalyaꞋi ka ciga mu ta̱ n soꞋo atakaci, ka̱ta̱ kpamu u sa̱nka̱ mu kuyaꞋan a̱ra̱ɗi. ⁸N folonoi Vuzagbayin ali kutatsu u takpaka mu atakaci a. ⁹Amma ɗa u danai mu, “Kasingai ka̱ va̱ ka yawa wu ta̱. Ayin a na baci ikyamba i nu i kpa̱ɗa̱i kutsurakpa, utsura u va̱ wi ta̱ a kokpo utsura u nu ka̱u.” Gogo na mi ta̱ a̱ ma̱za̱nga̱ adama a na n yaꞋan a̱ra̱ɗi n ukpa̱ɗi u kutsurakpa u va̱, adama a na utsura u Kirisiti Kishi u yaꞋan ulinga wa̱ va̱. ¹⁰Adama a ugaꞋin u Kishi u ɗa baci, m pana ta̱ uyoꞋo a ayin a na n nambai utsura. Mi ta̱ a kupana uyoꞋo uma a shika mu baci. Mi ta̱ a kupana ma̱za̱nga̱ n namba baci ili. N kupana ta̱ kpamu uyoꞋo uma a takacika mu baci, ko ayin a na n soꞋi atakaci. Ayin a na baci dem m panai atakaci a yoku ra̱ka̱, mi ta̱ a kupana ma̱za̱nga̱ koɓolo n ugaꞋin u Kishi. Ta nannai adama a na a ayin a na ikyamba i va̱ i kuwa̱i ɗaɗa ayin a na mi n utsura.

Bulusu wi ta̱ a kuciga aza o Korintiya

¹¹N yongo ta̱ a kuyaꞋan kadanshi an kalau, amma a̱ɗa̱ ɗa i zuwai mu kokpo nannai. A̱ɗa̱ ɗa i gaꞋin i dansa ukuna u singai adama a̱ va̱. Ko mpa mi baci ili ba, aza a na a danai ele ɗa “azusuki a gbagbaꞋin” a laꞋa mu biꞋi ba. ¹²Ayin a na mi ishi koɓolo n a̱ɗa̱, n ka̱na̱ ta̱ ka̱ɗu ɗa n yaꞋin ulinga wu utsura n urotu n ili i na i tsu zuwa uma a̱ ka̱na̱ mereve, tsu na vuzavusuki vu mayun u ci yaꞋan. ¹³Ta i ciya̱i ili dem uteku u na a̱Ꞌisa̱ a aza o Kutoni kakau a̱ ciya̱i. Ili i te i ɗa koci yi kau: M bonoko ka̱ci ka̱ va̱ a̱miki a kubana wa̱ ɗa̱ ba. Adama a nam pa, cinukpakai mu!

¹⁴N foɓuso ta̱ adama a na n ta̱wa̱ me ene ɗa̱ tatsu. Amma ali n gogo na n ciga n zuwaka ka̱ci ka̱ va̱ a̱miki a kubana wa̱ ɗa̱ ba. A̱ɗa̱ ɗa n cigai, ikebe i ɗa̱ i ɗa n cigai ba. U gaꞋan muku n zuwasa ikebe a̱ ma̱diki mu ulyopi adama a na a̱ ciya̱ ili i na a̱ kuɓa̱nka̱ isheku i le ba. Ta nannai ba! Isheku i ɗaɗa i tsu la̱na̱ muku n le. ¹⁵Mi ta̱ m ma̱za̱nga̱ adama a na n neke ɗa̱ ili dem i na mi n i ɗa ra̱ka̱, ali n ka̱ci ka̱ va̱ dem. I kujebe ta̱ ucigi u na yi a kuyaꞋanka mu adama a na ucigi u na mpa n yaꞋankai ɗa̱ u laꞋi n a̱bunda̱i?

¹⁶A̱ɗa̱ vi yoku yu ushuku ta̱ a na m kpa̱ɗa̱i kuneke ɗa̱ a̱miki. Amma e sheshe ta̱ ugboji u ɗa n yaꞋankai le, n dansai aꞋuwa adama a na ma aza ɗa̱. ¹⁷A̱ ka̱tsuma̱ ka uma a na n suki wa̱ ɗa̱, vuza te vi le u saꞋwa ta̱ kudoro ɗa̱? ¹⁸N folono ta̱ Taitu u bana wa̱ ɗa̱, ɗa kpamu n suki vuza vu Kutoni vi yoku koɓolo n a̱yi. Amma a̱yi u doro ɗa̱ ba. I yeve ta̱ a na Taitu nu mpa ci ta̱ a kuyaꞋan ili i te, ka̱ɗu kpamu ke te kaꞋa tsu.

¹⁹U gaꞋan ba i sheshe ta̱ ci ta̱ a kudansa ili i nam pa ya adama a na ci yotsongu a na ci yaꞋin derere. Ta nannai ba. Tsu dansa ta̱ uteku u na Kirisiti Kishi u kuciga tsu dansa e kelime ka̱ Ka̱shile. A̱ɗa̱ a̱ja̱Ꞌa̱ a̱ tsu a ɗa yi, ili i na baci ci yaꞋin dem ci yaꞋan ta̱ i ɗa adama a na i gbama ka̱u. ²⁰Mi ta̱ a kupana wovon a ayin a na baci n ta̱wa̱i kene ɗa̱, ka̱ta̱ ida̱shi i ɗa̱ i kpa̱ɗa̱ kuyokpo mu. Adama a nannai yi a kupana uyoꞋo nu mpa ba. M pana ta̱ wovon u na n kucina ɗa̱ a kanananai, ko e cisheꞋe adama a ili i na uma i n i ɗa. Ɗa kpamu mi a kupana wovon yi a kushita adama a wupa, ko yi a kuciga ili dem i yaꞋan i ɗa̱. M pana ta̱ wovon a na yi kpamu a kudansa ili i gbani-gbani adama a uma, ali ɗa yi kpamu a kuyaꞋan kuyun. M pana ta̱ wovon a na yi a kuyaꞋan a̱ra̱ɗi, ɗa kpamu yi o kuyongo n wuma u kavama babu kutono uye u te. ²¹E, wovon u ka̱na̱ mu ta̱ adama a ayin a na baci n ta̱wa̱i, Ka̱shile ki ta̱ o kudoku ko bonoko mu kenu kpamu adama a̱ ɗa̱. Ka̱ta̱ n shika̱ adama a uma a na a yaꞋin ɗe unushi ɗa a̱ kpa̱ɗa̱i kuka̱sa̱kpa̱ kuyaꞋan ku kavama, n tsugbani, koɓolo n ili i wono.

Bulusu u kotso ta̱ kuyaꞋan odoki a̱ ni

¹Mi ta̱ a̱ kuta̱wa̱ wa̱ ɗa̱ a̱ uta̱wi u tatsu. Katagarda ka Ciɗa ka danai, “U gaꞋan ta̱ ngan n re ko n tatsu a̱ ushuku nu nsata ma mayun ɗa.”13:1 K.Wil. 19:15.²Ayin a na mi ishi n a̱ɗa̱ a̱ uta̱wi u ire, n dansuka ta̱ aza a na ishi a kuyaꞋan unushi. An mi daꞋin na n kuyaꞋan ta̱ kadanshi ka̱ ni kpamu: Kanna ka na baci n doku n ta̱wa̱i, babu vuza na u kusula atakaci a.

³Mi ta̱ o kuyotsongu ɗa̱ a na Kirisiti Kishi ɗa wi a kuyaꞋan kadanshi a̱ ubuta̱ u va̱. Ayin a na baci u yaꞋin ulinga wa̱ ɗa̱, utsura u ni wi e kujebe ba, amma wi ta̱ a kushana derere. ⁴Ikyamba i ni yo okpo ta̱ babu utsura a ayin a na a unai ni a maɗanga ma atakaci, amma wi ta̱ n wuma gogo na adama a utsura u Ka̱shile. Ikyamba i tsu yi n utsura ba, tsu na Kirisiti Kishi wi ishi. Amma yi ta̱ e kene a na ci o kuyongo n wuma adama a utsura u Ka̱shile, tsu na Kishi u ci yaꞋan.

⁵Indai ka̱ci ka̱ ɗa̱ mayin. Kondoi ka̱ci ka̱ ɗa̱ adama a na ye ene ko i buwa ta̱ a̱ kuɓa̱na̱ ili i na i nekei a̱ɗu a. I yeve baci a na Yesu Kirisiti Kishi wi n a̱ɗa̱ ba, i yikpa̱ ta̱ kukondo ka. ⁶Amma n zuwa ta̱ a̱pa̱Ꞌa̱ yi ta̱ e kene uteku u na a̱tsu a̱ ka̱ci ka̱ tsu tsu kpa̱ɗa̱i kuyikpa̱ kukondo ka.

⁷Ci yaꞋin avasa u Ka̱shile adama a na ka̱ta̱ i yaꞋan ili i gbani-gbani ba. Ci yaꞋan kavasa ka nannai adama a na uma e ene tsu lapula ta̱ ka̱ci ka̱ tsu ba, amma adama a na i yaꞋan ili i na i gaꞋin, ko u yotso baci adanshi a̱tsu ci yikpa̱ ta̱. ⁸Ili i na tsa kuyaꞋan i ɗaɗa tsu zuwa ili i mayun i lyaꞋa kelime. Tsa kuyaꞋan ili i na i kusa̱nka̱ kulyaꞋa kelime ba. ⁹Ko uma e ene tsu baci adanshi ci n utsura ba, ci yaꞋan ta̱ ma̱za̱nga̱ a na a̱ɗa̱ yi n utsura. Avasa a̱ tsu a ɗa, i bono tsu na yi ishi i tsurakpa derere. ¹⁰Mi ta̱ a kuɗanaka ɗa̱ ili i nam pa kafu ayin a na n kuyawa. Nannai ɗa n kukpa̱ɗa̱ kuɓarangu ɗa̱ n wali a ayin a na baci n dansai n utsura u na Vuzagbayin u nekei mu. U neke mu ta̱ utsura u nam pa, adama a na m ɓa̱nka̱ ɗa̱, amma adama a na mu una ɗa̱ ba.

Ikya̱shi yu ukocishi

¹¹Gogo na uma a̱ va̱, mi ta̱ o kukotso akaka a nam pa. N danai ɗa̱: YaꞋin ma̱za̱nga̱! SabaꞋi kuyongo ku ɗa̱. Zukai n ili i na n danai ɗa̱. Yongoi koɓolo n ka̱ɗu ke te. I yongo koɓolo m ma̱ta̱na̱. Ka̱ta̱ Ka̱shile ku ucigi m ma̱ta̱na̱ ko yongo n a̱ɗa̱.

¹²Kya̱sa̱na̱i n ucigi wa aza o Kutoni. ¹³Aza o Kutoni a na i na ra̱ka̱ i ta̱ e kukya̱sa̱ ɗa̱.

¹⁴YaꞋan kasingai ka Vuzagbayin Yesu Kirisiti Kishi, n ucigi u Ka̱shile, n koɓolo ka Ayinviki a̱ Ka̱shile o yongo koɓolo n a̱ɗa̱ dem.