1 Timoti

Akaka a Iyain a̱ Bulusu a kubana u

Timoti

Ukuna u katagarda ka nam pa

Bulusu u ɗanakai Timoti akaka a nam pa. Timoti u yongo ta̱ o kutono Bulusu a̱ ubuta̱ u na u banai dem adama a ulinga u kudana uma ukuna u Yesu. A ayin akaka a nam pa, Timoti u yongo ta̱ a kuyaꞋan ulinga a uɓon wi likuci i Afisu.

Bulusu u ɗanakai Timoti adama a na u ɓa̱nka̱ yi ulinga u kutono n uma a na i aza o Kutoni a̱ ubuta̱ wa̱. Adama a nannai akaka a i ta̱ tukpa n kadanshi ku ukuna wu uteku u na a kuzagba aza e kelime, koɓolo n uteku u na aza o Kutoni o kuɓolongu ka̱ci ke le adama a na a yaꞋanka Yesu ulinga.

A̱Ꞌisa̱ kakau a̱ tsu anana ubuta̱ u ɗa u na aza o Kutoni a kupiꞋisa ukuna u mayun u Ka̱shile koɓolo n kuyaꞋan ulinga koɓolo n adama a na a̱ ɓa̱nka̱na̱i ali n uma a na a cigai uɓa̱nki feu. Akaka a nam pa i ta̱ n kuyotsongusu adama a aza e kelime a̱ a̱Ꞌisa̱ ka̱ta̱ kpamu e neke agisana a singai a kubana wa aza o Kutoni ra̱ka̱.

Ili i na yi punu udariki a katagarda ka nam pa

1. Kuɓa̱yuwa̱ (1:1-2)

2. Kadanshi adama a uteku u na aza o Kutoni o kuyongo (1:3—3:13)

3. Ukuna wa atakaci u kutoni u tsu (3:14—4:5)

4. Kadanshi ko odoki ka̱ Bulusu a kubana u Timoti (4:6—6:21)

Kuɓa̱yuwa̱

¹Mpa ɗa Bulusu n ka̱ci ka̱ va̱, vuza na u ɗanakai nu akaka a nam pa. Mpa vuzavusuki vi Kirisiti Kishi adama a na Ka̱shile n Yesu ɗa a zuwai mu mo okpoi nannai. Ka̱shile a̱yi ɗa vuza na wi isai tsu, Yesu Kishi a̱yi ɗa a̱pa̱Ꞌa̱ a̱ tsu.

²Mpa ɗa mi a kuɗanaka wu, avu Timoti, maku ma̱ va̱ adama a na vi neke ka̱ɗu ka̱ nu wa̱ ni.

N ciga wu ta̱ vi yeve kasingai† ka̱ Ka̱shile Esheku a̱ tsu n Yesu Kishi Vuzagbayin vu tsu. N ciga ta̱ kpamu vi yeve asuvayali m ma̱ta̱na̱ me le.

YaꞋin mayin nu nlum ma aꞋuwa

³Ayin a na m banai a iɗika i Makidoniya, n dana wu ta̱ vi shamgba a̱ likuci ya Afisu. N ciga ta̱ vu ɓarangu nlum n yoku n na mi a kuyaꞋan kuyotsongusu ka aꞋuwa a̱ ciya̱ a̱ ka̱sa̱kpa̱ kuyaꞋan nannai. ⁴Ka̱ta̱ i tono iteꞋe ba, ka̱ta̱ kpamu i la̱nga̱sa̱ ayin e kukece tsukaya ba. Ili i nam pa yi ta̱ a̱ kutuka̱ n kanananai ali uma a̱ kpa̱ɗa̱ kuyaꞋan ida̱shi i le uteku u na Ka̱shile ke sheshei. ⁵Ili i na i zuwai ɗa u gaꞋin vu dana le nannai i ɗaɗa adama a na a ciganai. Ucigi u nam pa wu uta̱ ta̱ a̱ ubuta̱ u ka̱ɗu ka ciɗa, n asuvu a singai, koɓolo n kuneke ka̱ɗu ka mayun. ⁶Amma uma n a̱bunda̱i o bonoko ɗe a̱ɗu e le ba, sai a̱ ubuta̱ u kadanshi ka ukuna u ketepu. ⁷A ciga ta̱ o okpo nlum n Wila̱ u Ka̱shile, amma ta na e yeve kadanshi ka̱ Ka̱shile ka mayun ba, ko n nannai ɗa i a̱ra̱ɗi e kuyeve kaꞋa.

⁸Ci yeve ta̱ Wila̱ u Musa u gaꞋan ta̱. Vuma u tono baci u ɗa tsu na Ka̱shile ka danai. ⁹Ka̱shile ka zuwa Wila̱ adama a aza a̱ usuɓi ba. U zuwa ta̱ u ɗa adama a aza a na o koɗoi Wila̱, n ubuta̱ wa aza a na a ci yaꞋansa ili yi ugbamukaci ayin tutu. U yaꞋan ta̱ feu nannai adama a aza a na i a kuꞋiwan kuyeve Ka̱shile, n ubuta̱ wa aza a na a kuyaꞋansa unushi. U zuwa u ɗa adama a aza a na i ciɗa ba. Ka̱shile ka zuwa ta̱ Wila̱ wa adama a aza a na a̱ tsu kpa̱ɗa̱ kuneke yi tsugbayin feu. Wila̱ wa wi ta̱ adama a aza a na a tsu una isheku i le n ina̱ku i le. Ɗa kpamu u yaꞋin u ɗa adama a aza a munaka. ¹⁰Ɗa kpamu u zuwai Wila̱ wa adama a aza a na i a kuyaꞋan tsugbani, n aza a kuyaꞋan unushi u tsugbani kakau u na u buwai. U zuwa ta̱ feu u ɗa a̱ ubuta̱ wa aza a na a tsu tsula uma n e dengei tsa agbashi. Ta kpamu nannai, u zuwa ta̱ u ɗa wa aza a na a ci yaꞋan aꞋuwa, n koɓolo n wa aza a na a ci yaꞋan kadanshi ka aꞋuwa a̱ ubuta̱ wa afada. Aza a na i a kuyaꞋan ili i na Wila̱ u Ka̱shile u sa̱nka̱i, ele ɗa u zuwakai Wila̱ u nan lo wa. ¹¹Kuyotsongusu ku mayun ra̱ka̱ ki ta̱ o kuyotso kuyotsongusu ku na mi a kuyaꞋanka uma adama a̱ Ka̱shile ka singai. Na ɗaɗa akaka a na Ka̱shile ke nekei mu adama a na n dana uma dem.

Vuzagbayin Yesu u yaꞋankai Bulusu kasingai

¹²N cikpa ta̱ Yesu Kishi vuza na wi Vuzagbayin vu tsu, u neke mu ta̱ utsura. Wu ushuku ta̱ nu mpa ɗa u nekei mu ulinga u singai adama a na n yaꞋanka yi. ¹³Ili i mereve i ɗa a kubana wa̱ va̱ ana u yaꞋin ili i nam pa, adama a na n ci yongo ta̱ a kushika kula ku Kishi. N yongoi a kutamba uma a̱ ni adama a na n foro le n uye u na n kufuɗa dem. Amma Ka̱shile ka ciga mu ta̱ ko a na n yaꞋin ili i nan lo babu na n yevei ili i mayun, babu na kpamu n nekei ka̱ɗu. ¹⁴A̱yi Vuzagbayin u ciga mu ta̱ ka̱u. Adama a kasingai ka̱ ni u tuka̱i mu a̱ ubuta̱ wu uneki u ka̱ɗu, ɗa kpamu u nekei mu ucigi u na Yesu Kishi u ci yotsongu uma.

¹⁵Yesu Kishi u ta̱wa̱ ta̱ a aduniyan adama a na wi isa aza a̱ unushi. Mayun ɗa yaba dem wu ushuku. Mpa ɗa feu mi ishi n laꞋi nu unushi, a̱ ka̱tsuma̱ ka uma. ¹⁶Adama a nannai, ɗa Ka̱shile ka panai asuvayali a̱ va̱, ɗa u zuwai mu mo okpo agisana e kureme ku ka̱ɗu ku babu uteku n Yesu Kishi. U yaꞋan ta̱ nannai adama a aza a na a buwai a zuwa uneki wa̱ a̱ɗu u le u Kishi ka̱ta̱ a̱ ciya̱ wuma u na u kukpa̱ɗa̱ kukotso. ¹⁷Ka̱sa̱kpa̱ ci cikpa Ka̱shile ka̱ta̱ tsu tono yi kpamu. Ci yaꞋan nannai ali sai ayin a babu uteku n kukotso n kula. A̱yi ɗa mogono ma ayin ra̱ka̱, vuza na wi kene ba, wi kpamu a̱ kukuwa̱ ba. A̱yi ɗa Ka̱shile endeꞋen. Ta nannai.

¹⁸Kafu a ayin a nam pa, uma o yoku a yaꞋan ta̱ kadanshi ke kene ki ili i na vu kuyaꞋan. Maku ma̱ va̱, Timoti, odoki a̱ va̱ a ɗa na a na o tonoi kadanshi ka nan lo. N ciga ta̱ kadanshi ka nam pa ke neke wu utsura adama a na vi yaꞋan vishili adama a kasingai. ¹⁹A ayin a na baci vi a̱ vishili va, vu ka̱na̱ kpamu uneki u ka̱ɗu ka̱ta̱ kpamu vu zuwa asuvu a̱ nu o yongo m ma̱ta̱na̱. Uma o yoku a iwan ta̱ kuka̱sa̱kpa̱ uneki wa̱ a̱ɗu u le u tono asuvu e le, ta kpamu nannai ɗa uneki wa̱ a̱ɗu u le u na̱mgba̱i tsu na wunla̱i u gbayin u tsu ɓoso kpantsu. ²⁰Aza o yoku a̱ ka̱tsuma̱ ke le a na a yaꞋin nannai va ele ɗa Hamanaya n Isakandari. N neke ta̱ uma a nan lo a e ekiye a MalyaꞋi,† adama a na a piꞋisa, ta lo a̱ kutuka̱ n ili i wono a̱ ubuta̱ u Ka̱shile.

Kuyotsongusu ku na a kucikpa Ka̱shile

¹Ili i iyain, n dana wu ta̱ vu vasaka yaba dem. Vi baci a kuyaꞋan ufolu, folono asuvayali a̱ Ka̱shile a kubana we le, avu ka̱ta̱ vi cikpa Ka̱shile vi yaꞋanka yi ogodiya. ²Vasa nahannai adama a ngono n aza a na i o tsugono. Vi yaꞋan nannai adama a na ci yongo m ma̱ta̱na̱ n ka̱bini. YaꞋan nannai adama a na ci yongo uteku u na Ka̱shile ki a kuciga kpamu ka̱ta̱ ci ciya̱ ma̱riki a̱ ubuta̱ u uma. ³KuyaꞋan kavasa nannai u gaꞋan ta̱, ci yaꞋan baci nannai Ka̱shile feu ka kupana ta̱ uyoꞋo u tsu. ⁴Ka̱shile a̱yi ɗa vuza na wi a kisa tsu, u ciga ta̱ wi isa uma ra̱ka̱. U ciga ta̱ uma ra̱ka̱ e yeve ili i mayun. ⁵Ka̱shile ke te kaꞋa. Vuma vi te wi ta̱ lo kpamu vuza na wi e mere ma̱ Ka̱shile n uma. Vuma vu nan lo va a̱yi ɗa Yesu Kishi. ⁶A̱yi Yesu endeꞋen a̱yi ɗa vuza na u tsulai kuyongo ku ba̱ri ku uma dem a ayin a na u nekei ka̱ci ka̱ ni adama a na a una yi. Ka̱shile ke nekei aduniyan akaka a nam pa a a ayin a na a laꞋi n kugaꞋan.2:6 Uye kakau u kudana ili i te u ɗa na: Ukpa̱ u Yesu u na wi tsa alyuka, urotu u ɗa u na wi o kuyotsongu a na Ka̱shile ka cigai kisa uma ra̱ka̱. Urotu u nan lo u ta̱wa̱ ta̱ a ayin a singai a na u gaꞋin u ta̱wa̱.⁷N ci yaꞋan ta̱ kadanshi ka mayun derere ana n danai Ka̱shile kaꞋa ka zagbai mu mo okpo vuzavusuki n vuza kudana uma kadanshi ka̱ Ka̱shile. Ka̱ta̱ n yotsongusu Aza̱ka̱yimbi kuneke ku ka̱ɗu ku mayun.

⁸Adama a nannai, a ayin a na baci i ɓolongi ka̱ci ka̱ ɗa̱ kuyaꞋan kavasa dem n ciga ta̱ ali a̱ ɗengusa̱ ekiye e le i baci a kuyaꞋan kavasa, n ciga ta̱ kpamu ekiye a nan lo a yaꞋan ciɗa. Mawansa ma yaꞋan a̱ ubuta̱ wa aza a na i a kuyaꞋan kavasa ba.

^9-10N ciga ta̱ feu a̱ma̱ci a pala aci e le, ka̱ta̱ a shiya nyaga tsu na u gaꞋin ta lo a kuzuwa uma kuta̱ɗa̱tsa̱, ka̱ta̱ kpamu a shiya mayin n na n yotsoi. UgaꞋin u le wi ta̱ a̱ kuta̱ a̱ ubuta̱ wi ili i na a kuyaꞋan. UgaꞋin u le ta wi a̱ ubuta̱ u kucaꞋa ka̱nji ba, ko ili i kuꞋuka yi ikebe ka̱u ba. U ɗa wi a̱ ubuta̱ wi itali yi ikebe ko nyaga mi ikebe ba. A̱ ka̱sa̱kpa̱ ili i nan lo.

¹¹A̱ma̱ci a pana mayin ka̱ta̱ a piꞋisa tsu na u yotsoi, ka̱ta̱ kpamu a panaka uma. ¹²Mu ushuku a̱ma̱ci o yotsongusu ali ba, mu ushuku kpamu a yaꞋan kelime ka ali ba. A̱ma̱ci a pana mayin tsu na u yotsoi. ¹³Ili i na i zuwai ɗa wo okpoi nannai ɗaɗa Ka̱shile ka yaꞋan ta̱ A̱da̱mu a cau, ɗa u yevei u tonoi n Hawa.† ¹⁴Ɗa Kalijani feu ka̱ ya̱nsa̱i vuka va, ɗa unushi u gita̱i. Kalijani ka̱ ya̱nsa̱ A̱da̱mu ba. ¹⁵Adama a nannai, Ka̱shile ki ta̱ a kisa a̱ma̱ci i baci a kumatsa muku, amma a lyaꞋa kelime n kokpo aza a uneki wa̱ a̱ɗu, o yotsongu ucigi ka̱ta̱ o yongo uteku u na Ka̱shile ka cigai. Ka̱ta̱ o yongo m ma̱riki ma singai.

Wila̱ wa aza e kelime

¹Udani u nam pa wa mayun ɗa, vuza na baci u cigai wo okpo mokoshi ma gbayin† ma aza o Kutoni, u ciga ta̱ u yaꞋan ili i na i gaꞋin a yaꞋan. ²Mokoshi ma gbayin mayun ka̱ta̱ wo okpo vuza vi ili yi ishikushi i uma ba. U yaꞋan n vuka vi te, wo okpo vuza singai a̱ ubuta̱ u vuka vi ni. Wo okpo kpamu vuza na u kuka̱na̱ ka̱ci ka̱ ni n ugboji mayin. U yaꞋan kpamu vuza na uma a kudana wi ta̱ m ma̱riki. Wo okpo vuza na u kurabasa uma mayin n omoci a kpaꞋa ku ni, u yaꞋan n uyevi u kuyotsongusu mayin. ³Wo okpo kosoꞋi ka̱ ma̱ra̱ ba, n vuza ma lapaka gogoꞋo ba. Wo okpo vuma vu ka̱ɗu vu singai, n vuza na u kuciga ida̱shi i ma̱ta̱na̱. Ka̱ta̱ kpamu wo okpo vuza na u kuciga ikebe n a̱bunda̱i ba. ⁴Mayun ɗa u la̱na̱ kpaꞋa ku ni mayin, u yotsongusu muku n ni kpamu a cikpa yi ka̱ta̱ a panaka yi. ⁵U yeve baci kufoɓongu kpaꞋa ku ni ba, nini ɗai u kula̱na̱ aza o Kutoni a̱ Ka̱shile? ⁶Ka̱ta̱ wo okpo vuza vu Kutoni vu savu ba, ta lo wo kokpo yi ili ya̱ a̱ra̱ɗi a na e nekei ni tsugbayin gogoꞋo, tsu nan lo Ka̱shile ka yaꞋanka yi afada tsu na u kuyaꞋanka Kalijani. ⁷Uma a na kpamu i aza o Kutoni ba, a dansa kasingai adama a̱ ni. N tsu nannai kpamu i a kudansa kawuya adama a̱ ni ba, Kalijani kpamu ka kufuɗa kuka̱na̱ yi ba.

⁸Ta kpamu nannai, a̱ɓa̱nki† a aza o Kutoni3:8 Azu. 6:1-7. o okpo aza a na uma a cikpai ɗa i n usuɓi kpamu. Ele kpamu o okpo osoꞋi a̱ ma̱ra̱ ba, ka̱ta̱ o okpo aza a na a kuciga kuciya̱ ikebe n a̱bunda̱i ba. ⁹Mayun ɗa o tono ili i mayun i gbayin i na Ka̱shile ko yotsongi tsu adama a ukuna wu uneki u ka̱ɗu wa aza o Kutoni. O yongo kpamu mayin n asuvu a̱ ka̱ɗu a singai. ¹⁰Kafu uma a zagba le o okpo a̱ɓa̱nki a aza o Kutoni, sai a yaꞋan biꞋi ulinga u yoku punu u uma wa u na u kokpo kukondo ku ma̱riki n kuyeve ku le. A yaꞋan baci ulinga wa mayin, i ta̱ a kufuɗa kuyaꞋan ulinga wa̱ a̱ɓa̱nki wa aza o Kutoni.

¹¹Ta kpamu nannai, vuka vu ka̱ɓa̱nki dem wo okpo vuza na a cikpai, ka̱ta̱ u dansa i wuya u uma o yoku ba. Wo okpo vuka vu na u kuka̱na̱ ka̱ci ka̱ ni m mayun a̱ ubuta̱ wi ili dem mayin.

¹²Ka̱ɓa̱nki u yaꞋan n vuka vu te, ka̱ta̱ kpamu u yongo n a̱yi mayin. U yongo kpamu m muku n ni mayin n aza a kpaꞋa a̱ ni n tsuloboi. ¹³Aza a na a yaꞋin ulinga wa̱ a̱ɓa̱nki mayin i ta̱ a̱ kuciya̱ katsupu ka na uma a kucikpa le ka̱ta̱ o doku a̱ ciya̱ a̱ɗu ida̱shi a̱ ubuta̱ wu uneki wa̱ a̱ɗu n Yesu Kishi.

^14-15N zuwa ta̱ kuta̱wa̱ wa̱ nu wa babu megeshe, amma yoku ba n kuyaꞋan ta̱ megeshe kenu. I ɗaɗa i zuwai ɗa n ɗanakai nu gogo na. Gogo na vu kuyeve ta̱ tsu na u yotsoi uma o yongo punu a kpaꞋa ku Ka̱shile. Uma a na i punu a kpaꞋa ku nam pa ele ɗa uma a na e nekei a̱ɗu n Kishi ɗa i uma a̱ Ka̱shile ka wuma. Na va ɗaɗa kpaꞋa ka aza o Kutoni, ku ɗa nshukpu n kumiꞋi ki ili i mayun.

¹⁶Na va ɗaɗa uneki u ka̱ɗu u gbayin u tsu u mayun u na Ka̱shile ki ishi ko sokongi ali gogo na:

Kishi ka̱ ta̱wa̱ ta̱ tsu vuma.

Ayinviki a̱ Ka̱shile o yotsongu ta̱ a̱yi ɗa Vuza vu ciɗa va.3:16 Rom. 1:4.

Alingata e ene yi ta̱,

a danai umaci u uma dem.

Uma a̱ ubuta̱ kakau a aduniyan e neke ta̱ a̱ɗu n a̱yi,

ɗa Ka̱shile ka ɗika ni a kubana gaɗi.

A dansukai nlum ma aꞋuwa

¹Amma Ayinviki a̱ Ka̱shile a dana tsu ta̱ hawun a ayin o ukocishi uma o yoku i ta̱ a̱ kuka̱sa̱kpa̱ kuneke a̱ɗu e le a̱ ubuta̱ wi ili i mayun. I ta̱ a kukucikpa kutono wunla̱i u gbani-gbani u na u ci ya̱nsa̱ ka̱ta̱ u yaꞋan aꞋuwa. Ka̱ta̱ kpamu o tono kuyotsongusu ka alingata a Kalijani. ²Uma a na o ci yotsongu ili i te ka̱ta̱ a yaꞋan ili i yoku kau, ele ɗa i a̱ kutuka̱ n kuyotsongusu ku wunla̱i u gbani-gbani ku nam pa. Asuvu a uma a nam pa i ta̱ ukpa̱, an ukpan wi ikyamba u na o songi n viyum vu usuɗukpi. ³Nlum n nam pa ma n dana ta̱ u gaꞋan a yaꞋan yolo ba, ɗa kpamu e nekei uma wila̱ u kulyaꞋa ilikulyaꞋa i yoku. Amma Ka̱shile ka yaꞋan ta̱ ili i kulyaꞋa i nam pa adama a uma a na e yeve ili i mayun ɗa kpamu e nekei a̱ɗu n ili i mayun, a lyaꞋa i ɗa ka̱ta̱ a cikpa Ka̱shile. ⁴Adama a na ili i na Ka̱shile ka yaꞋin dem i singai i ɗa, ka̱ta̱ ci iwan ko ili i te ba. U yotso ta̱ ci isa i ɗa m ma̱za̱nga̱, n a̱ɗu a kucikpa Ka̱shile. ⁵Ci yeve ta̱ ili ya yo okpo ta̱ ciɗa a̱ ubuta̱ u kadanshi ka̱ Ka̱shile n avasa.

⁶Vi yotsongu aza o Kutoni ili i nam pa. Vi yaꞋan baci nannai, vi ta̱ o kokpo kagbashi ka singai ke Yesu Kishi. Avu kpamu n ka̱ci ka̱ nu, vi ta̱ o kugbonguro n utsura a̱ ubuta̱ u kadanshi ka mayun ka na ci nekei a̱ɗu n kuyotsongusu ku singai ku na vi o kutono. ⁷Ka̱ta̱ vu zuwa atsuvu a̱ nu a̱ ubuta̱ wa arabali a aꞋuwa ba, a na a kuzuwa wu vi cinukpa n Ka̱shile, ko iteꞋe i kavama i na yi babu kaci. Ili i na va kuyaꞋan i ɗa na: dakaka ka̱u adama a na vi yaꞋan utsura a̱ ubuta̱ wu ulinga u singai uteku u na Ka̱shile ki n kasingai ka̱u. ⁸U gaꞋan ta̱ vi yaꞋan ulinga ka̱ta̱ vu zuwa ikyamba i nu i tsurakpa, amma vi yaꞋan baci wuma adama a na Ka̱shile ka pana uyoꞋo, u kutuka̱ wu ta̱ n ili i singai a̱ ubuta̱ wi ili dem. Wi ta̱ n ugaꞋin tsu na vi o kuyongo gogo na, wi ta̱ kpamu a kugaꞋan a wuma u na wi a̱ kuta̱wa̱ na kelime.

⁹Akaka a nam pa mayun ɗa, u yotso ta̱ kpamu yaba dem wu ushuku n kaꞋa. ¹⁰Ci ci yaꞋan ta̱ ulinga ka̱u n tsu soꞋi atakaci, adama a na uma e neke a̱ɗu a̱ ubuta̱ u kadanshi ka mayun. Ci yaꞋan ta̱ nannai adama a na a̱pa̱Ꞌa̱ a̱ tsu i ta̱ u Ka̱shile, vuza na wi n wuma. A̱yi ɗa Kishi ka uma ra̱ka̱, wi ta̱ a kudana tsu Ka̱shile ki ta̱ a kisa aza a na e nekei a̱ɗu dem.

¹¹Yotsongu ili i nam pa ka̱ta̱ vu zuwa yaba dem u piꞋisa i ɗa. ¹²Ka̱ta̱ vu ka̱sa̱kpa̱ vuza u goyo wu a na vi ushan u kenu ba. Amma vo okpo an agisana a singai a̱ ubuta̱ wa aza o Kutoni ra̱ka̱. Vo okpo agisana a̱ ubuta̱ u kadanshi, n ubuta̱ wi ida̱shi i ma̱riki i nu. Vo okpo agisana a ucigi n kuneke ku ka̱ɗu n ida̱shi i ciɗa a̱ ubuta̱ u yolo. ¹³LyaꞋa kelime n kukeceke uma Kadanshi ka̱ Ka̱shile, ka̱ta̱ vu dansa kaꞋa hawun ka̱ta̱ vu lyaꞋa kelime n kuyotsongusu le kaꞋa. YaꞋan ili i nam pa sapu n ta̱wa̱ wa̱ nu. ¹⁴Ka̱ta̱ vi iwan kuneꞋe ku singai ku na vi isai a̱ ubuta̱ u Ka̱shile ba, ana nkoshi m gba̱ra̱-gba̱ra̱ ma aza o Kutoni a kiyangi ekiye e le a̱ nu, ɗa a dansai kadanshi ka̱ Ka̱shile adama a̱ nu.

¹⁵YaꞋan ili i nam pa n utsura u nu ra̱ka̱. YaꞋan ulinga mayin adama a na yaba dem we ene kulyaꞋa ku kelime ku nu. ¹⁶Goɗumo ka̱ci ka̱ nu mayin ka̱ta̱ vu la̱na̱ kuyotsongusu ku nu mayin kpamu. YaꞋan mayin n ili i na yi derere, vi yaꞋan baci nannai Ka̱shile kpamu ki ta̱ a kisa wu, n aza a na a panakai nu.

Odoki a̱ ubuta̱ u kuyaꞋan kadanshi n uma o yoku

¹Ka̱ta̱ vi yaꞋanka vuza vu gba̱ra̱ kadanshi n wali ba, amma vu tono yi sawu adanshi eshevu a ɗa. YaꞋan kadanshi n ushan u wawaꞋa adanshi vi ta̱ a kuyaꞋan kadanshi n anan ambu. ²YaꞋanka a̱ma̱ci a̱ gba̱ra̱gba̱ra̱ tsu na va kuyaꞋan n a̱na̱vu, ka̱ta̱ kpamu vu ɓarangu nkere mayin adanshi atavu a ɗa.

³Aza o Kutoni a̱ la̱na̱ agapa a̱ a̱ma̱ci de dem a na ali e le a̱ kuwa̱i, ɗa i babu aza a na a̱ kuɓa̱nka̱ le. ⁴Amma wi baci m muku ko ntsukaya, i ta̱ n ulinga u singai u na a kuyaꞋan ka̱ta̱ o yotsongu ugaꞋin u Ka̱shile punu a iꞋuwa i le a̱ la̱na̱ baci mmaci n le. Nahannai ɗaɗa a kufuɗa a tsupa mmaci n le, adama a uteku u na a̱ la̱na̱i muku n le. Nahannai va feu ili i ɗa i na Ka̱shile ka panai uyoꞋo ka̱u.

⁵Gogo na vuka vu na vi kagapa mayun, vuza na wi endeꞋen a aduniyan a nam pa, vuka vu nan lo u keɗe ta̱ a̱pa̱Ꞌa̱ a̱ ni a̱ ubuta̱ u Ka̱shile. U tsu folono ta̱ Ka̱shile ka̱ ɓa̱nka̱ yi kanna n kayin dem. U ci yaꞋan ta̱ kavasa ayin dem. ⁶Amma kagapa ka na ki o kuyongo adama a na u pana uyoꞋo koci wi ta̱ ukpa̱ a̱ ka̱ɗu ka̱ ni ko an wi n wuma. ⁷Avu neke kadanshi ka nam pa wa aza o Kutoni ra̱ka̱, adama a na o okpo ciɗa a̱ ubuta̱ u uma. ⁸Amma uma a na a iwain kuɓa̱na̱ mmaci n le, ali n limata i kpaꞋa i le, a nana ta̱ ili i na ci nekei ka̱ɗu. Uma a nan lo kpamu a laꞋa ta̱ biꞋi Aza̱ka̱yimbi n kuna̱mgba̱.

⁹Agapa a na a kufuɗa kuɓa̱nka̱ sai a yawa a̱ya̱ amangatatsu, sai kpamu o yongo m ma̱riki nu ngasa n ali e le. ¹⁰Sai kpamu yaba dem u cikpa le adama a ili i singai i na a yaꞋin. Ili i singai tsu nam pa: A̱ ɗengusa̱ ta̱ muku n le mayin? A yaꞋanka ta̱ omoci ili i singai? A yaꞋanka ta̱ aza o Kutoni tsugbashi babu a̱ra̱ɗi? A̱ ɓa̱nka̱ ta̱ aza a na a uwai a kadama? O foɓuso ta̱ kuyaꞋan ili i singai ayin tutu?

¹¹Ka̱ta̱ aza o Kutoni a̱ ɓa̱nka̱ agapa a wawaꞋa nannai ba. Ili i na i zuwai i ɗaɗa ucigi u kupana uyoꞋo wi ikyamba wa agapa a wawaꞋa wi ta̱ a kulaꞋa ucigi u na a yaꞋankai Kishi ka̱ta̱ a cikala kuyaꞋan yolo kpamu. ¹²Ka̱ta̱ ta na a̱ tuka̱ ka̱ci ke le afada adama a na o koɗo ta̱ uzuwakpani u le n Kishi.5:12 “Kukoɗo uzuwakpani u le n Kishi” m mani-mani ɗe, kafu a̱ ɓa̱nka̱ kagapa ka vuka ka̱u ka na vali vi ni vu kuwa̱i, sai u yaꞋan uzuwakpani n a̱Ꞌisa̱ wi o kudoku kuyaꞋan yolo ba, adama a na u yaꞋanka Kishi tsugbashi.¹³I ta̱ feu a kufuɗa kokpo orogo, ka̱ta̱ a̱ gita̱ kutono kpaꞋa kpaꞋa n a yaꞋin kuyun. I ta̱ a kupana uyoꞋo u kuꞋuwa kadanshi ka uma ka na ka burai le ba, ka̱ta̱ a dansa ili i na i yotsoi a dansa ba. ¹⁴Adama a nannai, mi ta̱ a kuyaꞋanka agapa a wawaꞋa a nam pa odoki a yaꞋan yolo kpamu. A matsa muku, ka̱ta̱ kpamu a̱ la̱na̱ iꞋuwa i le mayin. Nannai ɗa vurala vu le va̱ kukpa̱ɗa̱ kufuɗa kudansuka le. ¹⁵Ele vi yoku a̱ puwa̱nka̱ ta̱ ɗe, ɗa o bonoi kutono MalyaꞋi gogo na.

¹⁶Vuka vu na vi vuza vu Kutoni vi baci n aza a̱ ni a na i agapa, u la̱na̱ le ka̱ta̱ u ka̱sa̱kpa̱ka̱ aza o Kutoni a ɗika a̱miki a̱ kuɓa̱na̱ le ba. Aza o Kutoni tamkpamu a̱ ɓa̱na̱ agapa a na i endeꞋen le mayun.

¹⁷Nkoshi m gba̱ra̱gba̱ra̱ n na a yaꞋin ulinga u le mayin a yawa ta̱ e neke le tsugbayin mayin n katsupu derere. Na va mayun ɗa ali a̱ ubuta̱ wa aza a na i a kudansa kadanshi ka̱ Ka̱shile, ɗa i o kuyotsongusu ili i mayun i Ka̱shile. ¹⁸Ili i na a ɗanai a Kadanshi ka̱ Ka̱shile i ɗa na: “Ka̱ta̱ vu zuwaka kanaka mojibo a ayin a na wi a ulinga a̱ ubuta̱ wi ilya ba,” ɗa kpamu o doku a ɗanai, “U gaꞋan ta̱ vuza vu ulinga u ciya̱ katsupu ka̱ ni.”

¹⁹Ka̱ta̱ vu ushuku n kadanshi ka na ka̱ kula̱nga̱sa̱ mokoshi ma̱ gba̱ra̱ ba, sai vi ciya̱ ngan n re ko n tatsu n na mu ushuki a na kadanshi ka mayun ɗa. ²⁰Ɓarangu mokoshi ma̱ gba̱ra̱ ma na ma nusai, dansuka yi lo e kelime ka aza o Kutoni lo dem e kene ra̱ka̱. YaꞋan nannai adama a aza a na o okpoi a pana wovon u kuyaꞋan unushi.5:20 Mat. 18:15-17.

²¹N dana wu ta̱ kadanshi ka nam pa a̱ ubuta̱ u Ka̱shile, n ubuta̱ u Yesu Kishi, n ubuta̱ wa alingata a na Ka̱shile ka zagbai. Ka̱ta̱ vu tono wila̱ u nam pa derere babu kuꞋiwan aza o yoku ko kaɗamgba.

²²Ka̱ta̱ vi yaꞋan moloko ba, vi baci a kuzagba aza e kelime n kuzuwaka le ekiye. Ka̱ta̱ vu ɓolongu ka̱ci ka̱ nu n uma a̱ ubuta̱ u kuyaꞋan u unushi ba, amma vi yongo ciɗa.

²³N yeve ta̱ ubuta̱ u yoku vu tsu vaku ta̱ mɓa̱la̱. Adama a nannai ka̱ta̱ vu soꞋo mini koci ba, amma vu satara m ma̱ra̱ kenu. Wi ta̱ a kuyaꞋan wu tsa̱ a̱guma̱.

²⁴Ciɓa a na uma o yoku o tsu tono unushi, yaba dem u yeve ta̱ unushi wa kafu a yaꞋanka le afada. Amma uma o yoku i ta̱ lo a na a ci yaꞋan unushi, unushi u le kpamu wi ta̱ a̱ kuta̱ e keteshe a kubana megeshe. ²⁵Ta kpamu nannai, uma o yoku i ta̱ lo a na a ci yaꞋan ili i singai, yaba dem kpamu u yeve ta̱ i ɗa. Amma uma o yoku i ta̱ lo feu a na a ci yaꞋan ili i singai amma vuza u ci yeve i ɗa ba, sai a kubana ayin o yoku.

¹Aza o Kutoni e Yesu a na i agbashi e neke aza a gbayin e le tsugbayin. A yaꞋan nannai ta lo uma a shika kula ku Ka̱shile n kuyotsongusu ku ni. ²Aza o Kutoni a na i agbashi n azagbagbaꞋin a na feu i aza o Kutoni, ka̱ta̱ na lo u zuwa kagbashi ka ka iwan kucikpa vuzagbayin vi ni ba. Amma u kucikpa, u yaꞋan ulinga ka̱u adama a na vuza na u kuciya̱ ugaꞋin wu ulinga wa vuza ni ɗa feu, vuza na kagbashi ka ka cigai kpamu. Ili i nam pa ya i ɗaɗa vo kuyotsongusu ka̱ta̱ vu dana aza o Kutoni a a yaꞋan.

Uciyi u mayun

³Nlum ma aꞋuwa n yoku mi ta̱ a kufuɗa ma nana kuyotsongusu ku nam pa, amma kuyotsongusu ku nam pa ku utsura ku ɗa ku mayun ku Vuzagbayin Yesu Kishi, ɗaɗa kumiꞋi ku na ku tsu zuwa vuza u yaꞋan ida̱shi i na Ka̱shile ka cigai. ⁴Vuza na de dem u yaꞋin kuyotsongusu ku yoku kau wi ta̱ n ugbamukaci ka̱u. Wi feu n kuyeve ku mayun ba. Vuma vu nan lo u ci yaꞋan ta̱ ma̱za̱nga̱ ma kavama n kadanshi ka kanananai ka na a yaꞋin dem. U yaꞋan baci nannai, ka̱ta̱ u gita̱ kanananai ka na ka kuzuwa uma maꞋiwanai n vishili. U tsu zuwa le ta̱ feu a dansa kadanshi ka na ka̱ kula̱nga̱sa̱ uma, ka̱ta̱ kpamu u zuwa le o yongo a mindanai n kusheshe ku kavama. ⁵Uma a nam pa a ci yaꞋan ta̱ kadama ayin tutu. A̱ɗu e le a i ta̱ n unata, a tsu dansa kpamu kadanshi ka mayun ba. A ci yaꞋan ta̱ kutoni adama a na a̱ ciya̱ uciyi koci.

⁶Gogo na mayun ɗa uneki u ka̱ɗu u tsu ili i singai i ɗa ka̱u, adama a na vuza wi baci n uneki u ka̱ɗu u nan lo wa wi ta̱ o kuyongo n ka̱ɗu ida̱shi mayun. ⁷A ayin a na a matsai tsu, tsu ta̱wa̱ n ili a aduniyan a nam pa ba. Ta kpamu nannai a ayin a na baci tsu kuwa̱i, ci a kuɗika ili ba. ⁸Adama a nannai ci baci n ilikulyaꞋa nu ntogu n kuꞋuka, u yotso ta̱ u yawa tsu nannai. ⁹Amma uma o yoku a ciga ta̱ a̱ ciya̱ ili n a̱bunda̱i adama a na o okpo aza a̱ uciyi, ka̱ta̱ ta na a̱ yikpa̱ a̱ ubuta̱ u kukondo ka̱ta̱ ta na a aza ka̱ci ke le adama a na a ciga ta̱ ili ya n umici ali ka̱ta̱ a uka ka̱ci ka̱ le a maza n kadama ka̱ta̱ a̱ la̱nga̱sa̱ ka̱ci ke le n uma a na a buwai. ¹⁰Ili i na i zuwai i ɗaɗa ucigi wi ikebe u ɗaɗa ugiti wu unushi ra̱ka̱. Uma o yoku kpamu a̱ puwa̱nka̱ ta̱ a̱ ubuta̱ wu uneki u ka̱ɗu, ɗa ta na a̱ tuka̱i ka̱ci ka̱ le m ma̱shi adama a na a ciga ta̱ ikebe ka̱u.

Bulusu u yaꞋankai Timoti odoki

¹¹Amma Timoti, avu vuza vu Ka̱shile ɗa. Adama a nannai, ka̱ta̱ vi yaꞋan daꞋin n ili i kavama i nam pa, ka̱ta̱ kpamu vu tono ili i na yi derere ka̱ta̱ vi yaꞋan ili i singai. YaꞋan ida̱shi adama a na Ka̱shile ka pana uyoꞋo u nu. Yotsongu uneki u ka̱ɗu, ka̱ta̱ kpamu vi yotsongu ucigi. LyaꞋa kelime n kuyaꞋan ulinga, ka̱ta̱ kpamu vi yaꞋan ulinga u nu n ka̱ɗu ida̱shi. ¹²YaꞋan vishili adama a kasingai ku uneki u ka̱ɗu u tsu. Reme n utsura, wuma u babu uteku u na Ka̱shile ke nekei nu. Vi yaꞋanka ta̱ ɗe uma n a̱bunda̱i kadanshi ka wuma u nam pa n utsura.

¹³Mi ta̱ a kudana wu n utsura a̱ ubuta̱ u Ka̱shile, vuza na u ci neke uma ra̱ka̱ wuma, n dansuka wu ta̱ feu a̱ ubuta̱ u Yesu Kishi, vuza na u nekei kadanshi ka mayun u Binutu Bilatu. ¹⁴Ka̱ta̱ vu tono wila̱ u ni babu a̱shinda̱ ta lo vuza wa a shika wu. Vi yaꞋan baci nannai vuza u kuciya̱ unushi a̱ nu ba, sapu Vuzagbayin vu tsu Yesu Kishi u bono. ¹⁵A ayin a yaꞋan baci derere Ka̱shile ki ta̱ o kuyotsongu Kishi gaɗi. Ka̱shile endeꞋen a̱yi ɗa vuza na u yawai a cikpa yi, a̱yi ɗa Uba̱nga̱ri Mogono. A̱yi ɗa Mogono mo ngono a̱yi ɗa kpamu Vuzagbayin va azagbagbaꞋin. ¹⁶A̱yi endeꞋen wi a̱ kukuwa̱ ba, wi ta̱ kpamu ida̱shi a̱ ubuta̱ u kutashi ka̱u ali vuma wi lo vuza na u kuyawa ɗevu n a̱yi ba. Vuza wi lo u saꞋwai kene yi ba, wi kpamu e kene yi ba. Ci neke yi tsugbayin n utsura ko wanai. Ta nannai.

¹⁷Dana aza a na i n uciyi a aduniyan a nam pa ka̱ta̱ a yaꞋan a̱ra̱ɗi ba, ka̱ta̱ kpamu a zuwa utsura a̱ ubuta̱ wi ikebe i le ba. Ikebe i nan lo yi ta̱ a̱ kuta̱wa̱ ya laza babu megeshe. Amma e neke a̱ɗu e le u Ka̱shile vuza na wi n wuma vuza na kpamu u ci neke tsu n a̱bunda̱i adama a na ci ciya̱ ili i na ci a kuciga ka̱ta̱ ci yaꞋan ma̱za̱nga̱. ¹⁸Dana le a yaꞋan ulinga n ikebe i le a yaꞋan kasingai. A yaꞋan kawalatsu a̱ ubuta̱ wu ulinga u singai ka̱ta̱ kpamu e neke babu mogogu a̱ ubuta̱ wa aza a unambi. Ayin tutu o yongo ufoɓushi adama a na e pece n aza o yoku ili i na Ka̱shile ke nekei le dem. ¹⁹A yaꞋan baci nannai, i ta̱ a kuzuwaka ka̱ci ke le uciyi gaɗi vu Ka̱shile. Wi ta̱ o kokpo tsu kumiꞋi ku singai na kelime, i ta̱ feu a kufuɗa kuciya̱ wuma u mayun gogo na.

²⁰Timoti, vo okpo vuza vu kindi vi ili i na Ka̱shile ke nekei nu vu la̱na̱. Iwan kuyongo ku kavama n aza a na i a̱ vishili n avu n kuyeve ku na a danai i n ku ɗa. Kuyongo ku na lo ku ci cikpa Ka̱shile ba.

²¹Uma o yoku a̱ puwa̱nka̱ ta̱ a uye u Ka̱shile adama o kutono kuyongo ku kavama ku nan lo.

Ka̱sa̱kpa̱ ugaꞋin u Ka̱shile u yongo n avu n aza o Kutoni a na i ɗe feu.