1 Tosolonika

Akaka a Iyain a̱ Bulusu a kubana wa

Aza o Tosolonika

Ukuna u katagarda ka nam pa

Bulusu ɗa u ɗanai akaka a nam pa, ɗa kpamu a kubana megeshe ɗa u ɗanai kpamu akaka o yoku a kubana wa aza o Kutoni a na i a̱ likuci i Tosolonika. Tosolonika likuci i gbayin i ɗa a̱ ka̱kina̱ ka mala n kuden ku gbayin. Ta ɗe kpamu uma n a̱bunda̱i o tsu tono a̱ma̱li. Bulusu u banai o Tosolonika ɗa u piꞋisakai uma ukuna u Yesu. Ayin a na wi ishi ɗe u yaꞋansa ta̱ ulinga u kuyaꞋan afalaka adama a na u ciya̱ ikebe. Aza o kutono a̱ma̱li n a̱bunda̱i o okpoi aza o Kutoni. Ayahuda a na i punu a̱ likuci ya feu o okpoi aza o Kutoni.

A kubana kelime, aza e kelime punu a̱ likuci ya a yaꞋin cisheꞋe, ɗa o lokoi Bulusu a̱ likuci i nan lo. A kubana megeshe, Bulusu u suki ka̱ɓa̱nki ka̱ ni Timoti u tuka̱ n kadanshi ku ukuna wa aza o Kutoni a na u ka̱sa̱kpa̱i na ɗe o Tosolonika. Timoti u bonokoi Bulusu n ukuna wa arabali e cisheꞋe a, ana u kotsoi kupana kadanshi ku ukuna u nan lo ɗaɗa ayin a na wi a kuɗana akaka a nam pa.

Kuyotsongusu ku gbayin punu a akaka a nam pa ɗaɗa uteku u na ili i kuyaꞋan a ayin a na Yesu Kishi u kubono kpamu a aduniyan a nam pa. Ili n a̱bunda̱i yi ta̱ a kuyaꞋan a ayin a nan lo. Ci yeve mayun kanna ka na ili i nan lo i kuyaꞋan ba, adama a nannai u gaꞋan ta̱ ci yongo mayin uteku u na Ka̱shile ka cigai a na ci a kuvana ayin a na Yesu Kishi u kubono. Bulusu u dansai ili i nam pa ra̱ka̱ hawun punu a akaka a nam pa.

Ili i na yi punu udariki a katagarda ka nam pa

1. Kuɓa̱yuwa̱ (1:1-3)

2. Uneki wa̱ a̱ɗu wa aza o Tosolonika koɓolo n agisana (1:4—3:13)

3. Wuma u na u ci neke Ka̱shile ma̱za̱nga̱ (4:1-12)

4. Yi ɗa̱i tsa kindana Vuzagbayin u bono baci (4:13—5:11)

5. Kadanshi ku uɓarangi ku ukocishi n ikya̱shi (5:12-28)

Kuɓa̱yuwa̱

¹A̱tsu anan Bulusu n Sila koɓolo n Timoti tsu ɗana ta̱ akaka a nam pa a kubana wa aza o Kutoni a na i o Tosolonika. Akaka a, adama a uma a̱ Ka̱shile n Vuzagbayin Yesu Kristi Kishi a na i ɗe a̱ ubuta̱ wa. N yaꞋan ta̱ kavasa ɗa n folonoi Ka̱shile ko yotsongu ɗa̱ kasingai ka̱ ni ka̱ta̱ u zuwaka ɗa̱ una̱singai m ma̱ta̱na̱!

Uma o Tosolonika i ta̱ n uneki wa̱ a̱ɗu

²Ci cikpa ta̱ Ka̱shile ayin tutu adama a̱ ɗa̱ ra̱ka̱. Ayin dem ci baci a kuyaꞋan avasa, ci ci yaꞋan ta̱ a ɗa kpamu adama a̱ ɗa̱. ³Ci yaꞋan baci kadanshi adama a̱ ɗa̱ a̱ ubuta̱ u Ka̱shile Esheku a̱ tsu, tsu tsu dansa ta̱ ili i na i ci yaꞋansa adama a̱ uneki wa̱ a̱ɗu u ɗa̱, ci yaꞋan ta̱ kpamu kadanshi adama a uteku u na i ci yaꞋan ulinga ka̱u, adama a na yi ta̱ a kuciga uma, ci ci yaꞋan ta̱ kpamu kadanshi uteku u na yi a kulyaꞋa kelime n kinda Vuzagbayin Yesu Kishi yi baci a̱ ka̱tsuma̱ ka atakaci.

⁴A̱ja̱Ꞌa̱ a̱ va̱, Ka̱shile ki ta̱ a kuciga ɗa̱, a̱tsu feu ci yeve ta̱ u zagba ɗa̱ ta̱ adama a na yo okpo uma a̱ ni. ⁵Ana tsu danai ɗa̱ Arabali a Singai, n una̱ u ɗa koci ba, amma koɓolo n utsura kpamu, adama a na Ayinviki a̱ Ka̱shile e neke ɗa̱ ta̱ kuyeve gbende a na ili i na tsu dansai mayun ɗa. Ana ci ida̱shi koɓolo n a̱ɗa̱, ɗa ye enei tsu na ci o kuyongo adama a na tsu ɓa̱nka̱ ɗa̱ n ukuna kakau ra̱ka̱. ⁶Ta nannai ɗa i piꞋisai kuyongo tsu na ci o kuyongo koɓolo kpamu n tsu na Vuzagbayin u yongoi. Ali a̱ ka̱tsuma̱ ka atakaci a̱ a̱bunda̱i ɗa yi isai akaka a, ɗa Ayinviki a̱ Ka̱shile a zuwai ɗa̱ kpamu i yongo m ma̱za̱nga̱.

⁷Ta kpamu nannai ɗa yo okpoi agisana a uma ra̱ka̱ a na o tonoi Vuzagbayin a Makidoniya n Akataya. ⁸Adama a̱ ɗa̱, akaka a Vuzagbayin a̱ ka̱ra̱Ꞌa̱ ta̱ a̱ ubuta̱ dem a ukambu u nan lo, ali a lazai a̱ ubuta̱ u nan lo wa dem. Uneki wa̱ a̱ɗu u ɗa̱ u Ka̱shile uma e yeve ta̱ u ɗa a̱ ubuta̱ kakau. Adama a nannai sai kpamu ci yaꞋan biꞋi kadanshi ka̱ ni ba. ⁹Uma a̱ ka̱ci ke le o yongoi a kadanshi uteku u na i rabasai tsu mayin. O doku a yaꞋin kpamu kadanshi tsu na i ka̱sa̱kpa̱i a̱ma̱li ɗa i bonoi kutono Ka̱shile ka mayun n ka wuma. ¹⁰A yaꞋin kpamu kadanshi tsu na yi a kuvana kubono ku Maku ma̱ ni Yesu ma na mi a̱ kuta̱ gaɗi a̱ Ka̱shile. Ka̱shile ka̱ ɗengusa̱i Yesu n wuma, gogo na Yesu vu nan lo va wi ta̱ a kisa tsu a̱ ubuta̱ wa atakaci n afada a na i a̱ kuta̱wa̱.

Ulinga u Bulusu o Tosolonika

¹Uma a̱ va̱, i yeve ta̱ tsu ta̱wa̱ kene ɗa̱ gbani ba. ²Tsu na i yevei, ta ci ishi a̱ Filibi kafu tsu ta̱wa̱ na wa̱ ɗa̱. E neke tsu ta̱ ɗe atakaci, ɗa kpamu a yaꞋankai tsu kugoyi. Amma Ka̱shile ka̱ tsu ke neke tsu ta̱ ugbawansuvu adama a na tsu dana ɗa̱ ukuna wa Arabali a Singai a e keteshe, ko a na uma n a̱bunda̱i i a̱ kusa̱nka̱ tsu. ³Tsu tuka̱ ɗa̱ n akaka a aꞋuwa ba. Tsu tuka̱ ɗa̱ n a ɗa adama a na ci ta̱ a kuciga kuyaꞋanka ɗa̱ ugboji ba. Ci a kuciga tsu doro ɗa̱ ba. Ta nannai ba, ko kenu!

⁴Ka̱shile ku ushuku ta̱ n a̱tsu, ɗaɗa u nekei tsu Arabali a Singai a̱ ni adama a na tsu dana uma. Ili i na ci cigai i ɗaɗa ci neke Ka̱shile ma̱za̱nga̱, adama a na a̱yi ɗa vuza na u tsu kondo a̱ɗu a̱ tsu. Ci keɓece n ili i na uma a kudana ba. ⁵I yeve ta̱ mayun a na ci a kucikpa ɗa̱ n aꞋuwa ba, Ka̱shile a̱ ka̱ci ka̱ ni wi ta̱ o kuyotsongu ɗa̱ a na ili i na ci yaꞋin ci yaꞋan i ɗa adama a kalyaꞋa ba. ⁶Ci yaꞋan ili adama a na ci ciya̱ ucikpi wa̱ ɗa̱, ko wa aza o yoku ba.

⁷Adama a na, a̱tsu azusuki a̱ Kishi a ɗa, ci ta̱ a kufuɗa tsa kece ɗa̱ ili i na ci a kuciga dem. Amma ci yaꞋan nannai ba, tsu kucikpa, tso okpoi yuwu a̱ ka̱tsuma̱ ka̱ ɗa̱ tsu na ka̱na̱ku ka na ki e kuneꞋe mani n kula̱na̱ muku n ni. ⁸Ci ciga ɗa̱ ta̱ n a̱bunda̱i, ɗa ci a̱ ma̱za̱nga̱ ma kudana ɗa̱ Arabali a Singai a̱ Ka̱shile, tsu doku ci yaꞋin kpamu ma̱za̱nga̱ adama a na tsu ɓa̱nka̱ ɗa̱ a ili kakau adama a na yo okpo ta̱ uma a na ci cigai ka̱u.

⁹Uma a̱ va̱, i ciɓa tsu na ci yaꞋin ulinga ka̱u a ayin a na ci koɓolo n a̱ɗa̱. A ayin a na ci koɓolo n a̱ɗa̱ a kusala Arabali a Singai a̱ Ka̱shile, kanna n kayin ci ta̱ a kataci adama a na ci ciya̱ ikebe ka̱ta̱ tsu fuɗa tsu tsula ili i na ci cigai ta lo ce neke ɗa̱ a̱miki. ¹⁰A̱ɗa̱ ɗa ngan n tsu, Ka̱shile feu magan ma̱ tsu maꞋa, a danai ci ta̱ ciɗa m mayun babu kpamu vuza na u kudansuka tsu tsu na ci yaꞋin n a̱ɗa̱, a̱ɗa̱ na i nekei a̱ɗu a̱ ɗa̱ n Vuzagbayin. ¹¹A̱ɗa̱ feu i yeve ta̱ a na ci yaꞋankai yaba dem vu ɗa̱ mayin tsu na kesheku ka ci yaꞋanka muku n ni mayin. ¹²Tsu folono ɗa̱ ta̱, tsu dokusu ɗa̱ ta̱ utsura wa̱ a̱ɗu, ɗa kpamu tsu kushangi yaba dem vu ɗa̱ u yongo tsu na Ka̱shile ka kupana uyoꞋo adama a na u ɗeke ɗa̱ ta̱ i uwa o tsugono ci ni ka̱ta̱ i pece tsugbayin koɓolo n a̱yi.

¹³A̱tsu ayin tutu ci cikpa ta̱ Ka̱shile adama a̱ ɗa̱ a na i nekei a̱ɗu n akaka a na tsu dansai. I dana kpamu kadanshi ka̱ tsu kadanshi ka uma kaꞋa koci ba. A̱ɗa̱ yu ushuki ta̱ n akaka a tsu na a ɗa i mayun: akaka a̱ Ka̱shile a ɗa. Akaka a nam pa i ta̱ a kulyaꞋa kelime n kuyaꞋan ulinga wa̱ ɗa̱, a̱ɗa̱ vu na i nekei a̱ɗu.

¹⁴Uma a̱ va̱, ayin a na yi isai ili i na tsu danai, uma a̱ ɗa̱ e nekei ɗa̱ atakaci. Nannai ɗa yo okpoi derere n aza o Kutoni a̱ Ka̱shile n a̱bunda̱i na ɗe a Yahuda. Uma a nan lo e neke ta̱ a̱ɗu u Yesu Kishi, amma aza e le, Ayahuda e neke le ta̱ feu atakaci. ¹⁵Ayahuda a nan lo a una ta̱ eneki e le, aza o yoku tamkpamu ali a unai Vuzagbayin Yesu. Gogo na e neke tsu ta̱ atakaci ali ɗa o lokoi tsu. Uma a nam pa a yaꞋan i na Ka̱shile ka panai uyoꞋo ba, ɗa o okpoi irala i uma ra̱ka̱. ¹⁶A̱ sa̱nka̱i tsu kuyaꞋanka Aza̱ka̱yimbi kadanshi adama a na ta lo a̱ ciya̱ wishi. A yaꞋin nannai ɗa a lyaꞋi kelime n kudoku unushi u le. Gogo na Ka̱shile ka yaꞋan ta̱ wupa ali u nekei le atakaci.

Bulusu u ciga ta̱ u bana we ene le

¹⁷Uma a̱ va̱, ana o lokoi tsu wa̱ ɗa̱, ci yaꞋan megeshe ba ɗa tsu doku ci yaꞋin kataci adama a na tsu bono kpamu. Ko kenu tsu ka̱sa̱kpa̱ kuciɓa n a̱ɗa̱ ba, ɗa kpamu ci cigai ka̱u ce ene ɗa̱. ¹⁸Mayun ɗa ci cigai ce ene ɗa̱, mpa Bulusu, n dakakai ayin n a̱bunda̱i adama a na n ta̱wa̱ wa̱ ɗa̱, amma MalyaꞋi ma̱ sa̱nka̱ tsu ta̱. ¹⁹Ili i na i zuwai ɗa n cigai kene ɗa̱ i ɗaɗa i tuka̱ tsu ta̱ n a̱pa̱Ꞌa̱, koɓolo m ma̱za̱nga̱, a̱ɗa̱ ɗa ta na urotu u na ci lyaꞋi. Yi ta̱ a kuzuwa tsu ci yaꞋan ma̱za̱nga̱ e kelime ka Vuzagbayin Yesu a ayin a na baci u bonoi. ²⁰Mayun, a̱ɗa̱ ɗa tsugbayin tsu tsu m ma̱za̱nga̱ ma̱ tsu.

¹Adama a nannai, ana ci a kufuɗa kuyongo babu tsu pana arabali a̱ ɗa̱ ba, ci sheshe ta̱ uteku u tsu ci yongo a Atina, ²ɗa tsu suki Timoti a kubana wa̱ ɗa̱. Wi ta̱ ulinga n a̱tsu tsu kagbashi ka̱ Ka̱shile a kudana kpamu kadanshi ka Arabali a Singai a̱ Kirisiti Kishi. Tsu suku yi ta̱ adama a na u zuwa ɗa̱ i yaꞋan utsura ka̱ta̱ u dokusu ɗa̱ utsura a̱ ubuta̱ wu uneki wa̱ a̱ɗu. ³Ci ciga a̱ɗu a̱ ɗa̱ a̱ muɗa̱ adama a atakaci a na yi o kusoꞋo ba. Ko n nannai, i yeve ta̱ ɗe a zagba tsu ta̱ adama a atakaci a nam pa.

⁴A ayin a na ci ishi koɓolo n a̱ɗa̱ tsu kushe ɗa̱ ta̱ tsu danai atakaci i ta̱ lo a̱ kuta̱wa̱ ɗa̱. I yeve ta̱ kpamu mayun a na a ɗa a̱ ta̱wa̱ ta̱ ɗe. ⁵N yeve ta̱ atakaci a̱ ɗa̱, mi a kufuɗa mo yongo babu na m panai adama a̱ ɗa̱ ba. I ɗaɗa i zuwai ɗa n suki Timoti wa̱ ɗa̱. N suku yi ta̱ u ta̱wa̱ u kondo ko uneki u ka̱ɗu u ɗa̱ u buwa ta̱ n utsura. M pana ta̱ wovon ko vuza vu kukondo u lyaꞋa ɗa̱ utsura, ɗa kpamu ulinga u tsu ra̱ka̱ wo okpoi gbani.

Timoti u danai ili i na we enei

⁶Gogo na ɗa Timoti wu uta̱i nwalu ma ɗa u yawai. U bonoko tsu ta̱ n arabali a singai a uneki wa̱ a̱ɗu u ɗa̱ koɓolo n ucigi feu. U dana tsu ta̱ i ci ciɓa tsu ta̱ m ma̱za̱nga̱ ali i cigai ye ene tsu tsu na a̱tsu feu ci cigai ce ene ɗa̱.

⁷Uma a̱ va̱, a̱tsu a̱ ka̱ci ka̱ tsu ci ta̱ n atakaci n a̱bunda̱i ali ɗa i e kuneke tsu atakaci ka̱u, amma ci ciya̱ ta̱ udoki u ka̱ɗu ka̱u, adama a na a̱ɗa̱ i buwa ta̱ n uneki wa̱ a̱ɗu wu utsura. ⁸Gogo na ci yeve ta̱ i shamgba ta̱ n utsura u Vuzagbayin, na lo ta na u ci neke tsu ta̱ katsura ka savu.

⁹Ci cikpa ta̱ Ka̱shile ka̱u adama a̱ ɗa̱! Adama a̱ ɗa̱ a ɗaɗa ci ciya̱i ma̱za̱nga̱ ma gbayin u Ka̱shile ka̱ tsu. ¹⁰Kanna n kayin dem ci yongoso ta̱ a kuyaꞋan kavasa n ugbami adama a̱ ɗa̱. Tsu tsu folonoso ta̱ Ka̱shile ka̱ ka̱sa̱kpa̱ tsu ce ene ɗa̱ kpamu adama a na i namba baci ili a̱ ubuta̱ wu uneki u ka̱ɗu u ɗa̱, ci ciya̱ tsu ɓa̱nka̱ ɗa̱.

¹¹Ci yaꞋan ta̱ kavasa u Ka̱shile Esheku a̱ tsu n Vuzagbayin Yesu u ka̱sa̱kpa̱ tsu bana ce ene ɗa̱. ¹²Ci ciga ta̱ Vuzagbayin u zuwa ucigi u ɗa̱ u gbonguro ka̱ta̱ u saꞋwa ɗa̱ biꞋi a̱ ka̱tsuma̱ ka̱ ɗa̱ koɓolo n yaba dem kpamu, uteku u na ucigi u tsu u tsu saꞋwa ɗa̱. ¹³A ayin a na baci Vuzagbayin Yesu u bonoi n aza a ciɗa-ciɗa a̱ ni, avasa a̱ tsu a ɗa u zuwa a̱ɗu a̱ ɗa̱ a tsurakpa adama a na i yongo ciɗa a ayin a na i kushamgba e kelime ka̱ Ka̱shile Esheku a̱ tsu babu ta na vuza na u kushika ɗa̱.

Kuyongo mayin n Ka̱shile

¹A ukocishi nahannai, uma a̱ va̱, n kula ku Vuzagbayin Yesu tsu folono ɗa̱ ta̱ i yongo tsu na Ka̱shile ka kupana uyoꞋo. Tsu piꞋisaka ɗa̱ ta̱ ɗe i yaꞋan nannai, ko ali n gogo na yi ta̱ a kuyaꞋan nannai. Ci yaꞋanka ɗa̱ ta̱ odoki i doku i yaꞋan nannai ²adama a na i ciɓa ta̱ n i na tsu piꞋisakai ɗa̱ n kula ku Vuzagbayin Yesu.

³Ka̱shile ka ciga ɗa̱ ta̱ i yongo ciɗa, adama a na i suma unushi u tsugbani. ⁴Ka̱ta̱ yaba dem vu ɗa̱ u ka̱na̱ ka̱ci ka̱ ni, ka̱ta̱ kpamu u yongo ciɗa tsu na uma a kucikpa yi. ⁵Nannai vo kuyongo n a̱shawuya a gbani-gbani tsu na aza a̱ ka̱yimbi a ci yaꞋan ba. E yeve Ka̱shile n uye u ni ba.

⁶Ka̱ta̱ vu doro vuza nu vuza vu Kutoni ba, vi ɗika vuka vi ni a̱ ubuta̱ u kakuna ka nam pa ba, adama a na Ka̱shile ki ta̱ a̱ kutuka̱ n atakaci wa aza a icuꞋu yu unushi tsu nan lo ra̱ka̱. Tsu kushe ɗa̱ ta̱ ɗe mayin. ⁷Ka̱shile ke ɗeke tsu ta̱ ci yongo ciɗa, u ɗeke tsu tsu yongo wuma u tsu n a̱shinda̱ ba. ⁸Yaba dem vu na baci u iwain kutono wila̱ u nam pa, wila̱ u vuma u ɗa wi a̱ kukpa̱ɗa̱ kutono ba, amma Ka̱shile kaꞋa wi a kuꞋiwan, vuza na u nekei ɗa̱ Ayinviki a̱ ni.

⁹Ka̱shile n ka̱ci ka̱ ni u yotsongusu ɗa̱ ta̱ i ciganai, adama a nannai babu ili i na i kuzuwa mu n ɗanaka ɗa̱ ukuna wu ucigi wa aza o Kutoni u na u gaꞋin i yotsonku uma a̱ Ka̱shile. ¹⁰Mayun ɗa, ko n gogo na yi ta̱ n ucigi n a̱bunda̱i wa aza o Kutoni ra̱ka̱ a na i uɓon u Makidoniya. Uma a̱ va̱, ko a na wi nannai, tsu folono ɗa̱ ta̱ i doku ucigi a kubana we le ka̱u.

¹¹Ili i na i gaꞋin vi cikala ka̱u i ɗaɗa: vi yongo n wuma u yuwu, yaꞋansa kusheshe ku ulinga u nu koci, ka̱ta̱ vi yaꞋansa ulinga dem n ekiye a̱ nu, tsu na tsu danai ɗa̱ n ayin a ɗe. ¹²Nannai, uma a na i aza o Kutoni ba, ele feu i ta̱ a kucikpa tsu na yi o kuyongo, yi kpamu o kudoku kuzuwa a̱shi wa aza o yoku adama a na e neke ɗa̱ ikebe ba.

Tsu na Vuzagbayin u kuta̱wa̱

¹³Uma a̱ va̱, n ciga ta̱ i yeve ili i na i kuciya̱ aza o Kutoni a na a̱ kuwa̱i ɗe, yi kpamu a̱ kuna̱mgba̱ ka̱tsuma̱ ka̱u tsa aza a na i babu a̱pa̱Ꞌa̱ ba. ¹⁴Ci neke ta̱ a̱ɗu a na Yesu u kuwa̱i ɗa u ɗenga̱i n wuma. Ci neke ta̱ a̱ɗu a ayin a na baci Ka̱shile ko bonokoi Yesu na kpamu, wi ta̱ o kubono n aza a na e nekei a̱ɗu n Yesu kafu a̱ kuwa̱.

¹⁵Tsu na kadanshi ka Vuzagbayin Yesu ki a̱ ka̱ci ka̱ ni, a̱tsu na ci n wuma a ayin a nan lo Vuzagbayin Yesu u ta̱wa̱ baci, tsa kulaꞋa aza a na a̱ kuwa̱i ɗe n kelime ba, ko kenu. ¹⁶Vuzagbayin a̱ ka̱ci ka̱ ni wi ta̱ a̱ kuta̱ gaɗi. A ayin a nan lo a ɗa uma a kupana kadanshi ku utsura n kacaꞋa ka̱u ka Vuzagbayin, ka̱ta̱ a pana yoroli yu ugbami i vuza vu kelime va alingata, ka̱ta̱ a panaka le a̱ kulika̱ kavana ka̱ Ka̱shile. N nannai, aza a na a̱ kuwa̱i ɗe n Yesu ele ɗa a̱ kuɗenga̱ biꞋi a cau.¹⁷Ka̱ta̱ a̱tsu na ci biꞋi n wuma na a iɗika wi ta̱ a kushaɗa tsu a kubanka e eleshu koɓolo n ele, ka̱ta̱ ra̱ka̱ vu tsu ci cina Vuzagbayin gaɗi ka̱ta̱ ci shamgba n a̱yi ayin a babu uteku. ¹⁸Nannai ɗa i kudokusu ka̱ci ka̱ ɗa̱ utsura wa̱ a̱ɗu n kadanshi ka nam pa.

¹Uma a̱ va̱, babu ili i na i kuzuwa mu n ɗanaka ɗa̱ nini ɗai n wana ɗai ili i nam pa ra̱ka̱ i kuyaꞋan, ²adama a na i yeve ta̱ mayin a na kanna ko kubono ka Vuzagbayin vu tsu ki ta̱ a̱ kuta̱wa̱ tsu koboki n kayin. ³A ayin a na uma i a kudana, “Kakuna ki lo ba; ili ra̱ka̱ yi ta̱ m ma̱ta̱na̱ m babu i na i kusaꞋwa le,” ka̱ta̱ ma̱dukpa̱ ma̱ ta̱wa̱ le babu uzuki, tsu na mɓa̱la̱ n limata n vuka n ci gita̱ a ayin a kumatsa maku a̱ ni a yawa baci ɗevu. Babu tsu na vuza u kufa̱ta̱tsa̱ atakaci a nan lo.

⁴Uma a̱ va̱, yi n ka̱yimbi n ukuna u nam pa ba, yi kpamu a kuyaꞋan mereve a kanna ka na Vuzagbayin u kuta̱wa̱ an koboki ba. ⁵Ili i na i zuwai i ɗaɗa adama a na a̱ɗa̱ muku n kutashi n ɗa ra̱ka̱ koɓolo m muku n kanna kpamu. A̱tsu aza a̱ ka̱yimbi a ɗa ba, ci kpamu aza a kayin ba. ⁶Indanai mayin, ka̱ta̱ i lata tsa aza o yoku ba. Yongoi ufoɓushi a kindi kpamu. ⁷N kayin kaꞋa uma a tsu lata ka̱ta̱ kpamu a yaꞋan isoshi. ⁸Amma a̱tsu na ci a̱ ubuta̱ u kutashi tsu ka̱na̱ ka̱ci ka̱ tsu. Uteku u na kosoji ka ci isa ka̱ci ka̱ ni u shiya baci ma̱ra̱ga̱ ma̱ viyum u palai ma̱ka̱nga̱ ma̱ ni, mayun ɗa ci isa ka̱ci ka̱ tsu Kalijani ka lapa tsu baci ka̱ta̱ ci lyaꞋa kelime n kuneke a̱ɗu u Yesu n kuciga aza o yoku. Uteku u na kosoji ka ci isa ka̱ci ka̱ ni u uka baci ma̱kuꞋun mo kuvon, ce kukeɗe ta̱ a̱pa̱Ꞌa̱ n ka̱ɗu ida̱shi a na Yesu wi a kisa tsu.

⁹Sai ci yaꞋan ili i nam pa ya adama a na Ka̱shile ke sheshe ta̱ ka isa tsu a̱ ubuta̱ u Vuzagbayin Yesu Kishi ka̱ tsu. A̱yi u yaꞋan wupa u ni a kubana wa̱ tsu ba. ¹⁰Vuzagbayin Yesu u kuwa̱ ta̱ adama a̱ tsu ciya̱ ci yongo n a̱yi ali ayin a babu uteku. Na lo va mayun ɗa ko ci n wuma ko ukpa̱ a ayin o kubono a̱ ni. ¹¹Adama a ili i nam pa ra̱ka̱, dokushi utsura wa̱ a̱ɗu ka̱ta̱ i ɗengusa̱na̱i mayin, tsu na i gita̱i kuyaꞋan ɗe.

Kuyotsongusu ku uteku

¹²Uma a̱ va̱, nekei tsugbayin wa aza a na i aza e kelime a̱ ɗa̱ a̱ ubuta̱ wu ulinga u Vuzagbayin. A dakaka ta̱ kuyaꞋan ulinga a̱ ka̱tsuma̱ ka̱ ɗa̱, a danai ɗa̱ kpamu ili i na i kpa̱ɗa̱i kugaꞋan i yaꞋan. ¹³Nekei uma a nam pa tsugbayin ka̱u, ka̱ta̱ i ciga le adama a ulinga u le. A̱ɗa̱ kpamu n ka̱ci ka̱ ɗa̱ i yongo m ma̱ta̱na̱ uteku u ɗa̱.

¹⁴Uma a̱ va̱, i dansuka aza a na i orogo. I dokusu aza o wovon utsura. I tono sawu ka̱ta̱ yi inda aza a na utsura u le u gusa̱i. I reme a̱ɗu n yaba dem.

¹⁵I ka̱sa̱kpa̱ vuza u tsupa kawuya n kawuya ba, amma i dakaka kuyaꞋan kasingai wa aza a̱ ɗa̱ koɓolo n yaba dem.

¹⁶I yongo a̱ ma̱za̱nga̱ ayin tutu. ¹⁷LyaꞋi kelime n kuyaꞋan kavasa. ¹⁸Ko yi ɗa̱i i ciya̱i ɗa̱, ayin tutu yaꞋin ogodiya, adama a na i ɗaɗa i na Ka̱shile ka cigakai ɗa̱ a̱ɗa̱ vu na yi aza e Yesu Kishi.

¹⁹Ka̱ta̱ i kpada Ayinviki a̱ Ka̱shile ba. ²⁰Ka̱ta̱ i yaꞋanka kene ulami ba, ²¹amma i kondo ili dem i na a danai. Ka̱na̱i gbam-gbam i na i gaꞋin. ²²Sumai ili i na yi i gbani-gbani dem.

²³Ci yeve ta̱ a na Ka̱shile ke ci neke ma̱ta̱na̱. Kavasa ka̱ va̱ kaꞋa u kuzuwa ɗa̱ ta̱ yo okpo ciɗa n ili i na i buwai dem. Kavasa ka̱ va̱ kaꞋa u kusa̱nka̱ ta̱ wuma u ɗa̱ n a̱ɗu a̱ ɗa̱ ra̱ka̱ n ikyamba a̱ ubuta̱ u kuyaꞋan unushi, ali sai kanna ka na Vuzagbayin Yesu Kishi ka̱ tsu u kubono kpamu. ²⁴Vuza na u zagbai ɗa̱ va u yawa ta̱ a̱ ushuku n a̱yi, wi ta̱ a kuyaꞋan ili i nam pa.

²⁵Uma a̱ va̱, yaꞋin kavasa adama a̱ tsu.

²⁶Kya̱sa̱i aza o Kutoni a na i ɗe ra̱ka̱ m moɓongbonoi ma ciɗa.

²⁷N dana ɗa̱ n kula ku Vuzagbayin i kece akaka a nam pa u uma a na i a kpaꞋa ku Vuzagbayin ra̱ka̱.

²⁸N ciga ta̱ Vuzagbayin u yotsongu kasingai ka̱ ni a kubana wa̱ ɗa̱ ra̱ka̱.