Akaka a Iyain a
Yahaya
Ukuna u katagarda ka nam pa
Yahaya u ɗanai akaka a wawaꞋa a tatsu a kubana u uma kakau. Akaka a nam pa, a iyain, u ɗekei aza e kukece a muku n ni. A na wo okpoi Yahaya vuzavusuki ɗa n vuza vi kelime va aza o Kutoni a ayin a nan lo, na va ɗaɗa akaka a u ɗana ta̱ a ɗa adama a aza o Kutoni ra̱ka̱.
Punu a akaka a nam pa Yahaya u dansai uteku u na vuma u kuyawa ɗevu n Ka̱shile (kuyongo a̱ cija̱Ꞌa̱ n Ka̱shile). U dansai ukuna u kuyongo ɗevu n Ka̱shile ali uye u re. Uye u iyain u ɗaɗa kushamgba a kutashi ku Ka̱shile. U ire u ɗaɗa kushamgba a ucigi u Ka̱shile.
Katagarda ka nam pa ka dana tsu ta̱ kushamgba a̱ ubuta̱ u kutashi ɗaɗa kuyongo tsu na Ka̱shile ka cigai, nannai babu ili i na i kubuwa usokongi a̱ ubuta̱ u uma ko u Ka̱shile. Katagarda ka danai kpamu kushamgba a̱ ubuta̱ wu ucigi u Ka̱shile ɗaɗa i ciganai punu aduniyan a nam pa anana. Ukocishi, ka̱ tsu ka ko okpoi ci ciya̱ ulyaꞋi u gbayin ayin a na ci koɓolo n Kishi.
Ili i na yi punu udariki a katagarda ka nam pa
1. Udani u na u ci neke wuma (1:1-4)
2. Ka̱shile kutashi ku ɗa, Kishi kaꞋa agisana a̱ tsu (1:5—2:6)
3. Wila̱ u savu (2:7-17)
4. Irala i Kishi koɓolo n i muku n Ka̱shile (2:18—3:10)
5. Ucigi u Ka̱shile n ucigi u tsu (3:11—4:21)
6. UlyaꞋi a̱ ubuta̱ wa aduniyan ra̱ka̱ (5:1-21)
1Akaka a wuma
1Vuza na wi lo a ayin a̱ ugiti, a̱yi ɗa tsu panakai ɗa ce enei. Ce ene yi ta̱ n a̱shi a̱ tsu, ɗa kpamu tsu saꞋwai ni n ekiye a̱ tsu. A̱yi ɗa Yesu Kirisiti Kishi, akaka a wuma. 2Vuza na u ci neke wuma u ta̱wa̱ ta̱ wa̱ a̱tsu! Ce ene yi ta̱, a̱tsu ɗa kpamu ngan mi ili i na ce enei. Gogo na ci ta̱ a kudana ɗa̱ ukuna u wuma u babu uteku u nam pa u na wi ishi we esheku a̱ tsu ɗa u ta̱wa̱i wa̱ a̱tsu. 3Ci ta̱ a kudana ɗa̱ ili i na ce enei ɗa tsu panai, adama a na i ciya̱ feu wuma wa koɓolo n a̱tsu. A̱tsu kpamu ci ta̱ n u ɗa koɓolo n Esheku a̱ tsu m Maku ma̱ ni Yesu Kirisiti Kishi. 4Tsu ɗanaka ɗa̱ ta̱ adama a na i yaꞋan ma̱za̱nga̱ mayin n a̱tsu.
Ka̱shile kutashi ku ɗa
5Na ɗa akaka a na tsu panai a̱ ubuta̱ u Kishi ɗa tsu salakai ɗa̱ gogo na: Ka̱shile kutashi ku ɗa, a̱yi ta na wi n ka̱yimbi ba, ko kenu. 6Tsu dana baci ci ta̱ o kuyongo n wuma u te n Ka̱shile, amma ɗa ci lyaꞋi kelime n kuyongo a̱ ka̱yimbi, a̱tsu aza a aꞋuwa a ɗa, ci kpamu o kutono ili i mayun ba. 7Amma ci baci o kuyongo n kutashi, uteku u na Ka̱shile ki o kuyongo n kutashi, ci ta̱ o kuyongo n wuma a̱ ka̱tsuma̱ ka̱ tsu. Mpasa m Maku ma̱ ni Yesu mi ta̱ a̱ kuza̱Ꞌa̱ unushi u tsu ra̱ka̱.
8Tsu dana baci ci n unushi ba, ci ta̱ a̱ kuya̱nsa̱ ka̱ci ka̱ tsu, ci iwan ta̱ kpamu ili i mayun. 9Amma ci shika̱ baci unushi u tsu, wi ta̱ a kucinukpaka tsu u ɗa, adama a na Ka̱shile ki ta̱ a kuyaꞋan ili i na u danai u kuyaꞋan, ɗa wi kpamu a kuyaꞋan ili i na yi derere. A̱yi wi ta̱ a̱ kuza̱Ꞌa̱ unushi u na ci yaꞋin ra̱ka̱. 10Tsu dana baci ci ta̱ babu unushi, ci ta̱ o kubonoko Ka̱shile vuza va aꞋuwa, ɗa kpamu ci o kuyotsongu a na akaka a̱ ni i babu ubuta̱ punu a̱ a̱ɗu a̱ tsu.
2Yesu ɗa ka̱ɓa̱nki ka̱ tsu
1Muku mu ucigi n va̱, mi ta̱ a kuɗana ili i nam pa adama a na i yaꞋan unushi ba. Amma ali i yaꞋan baci unushi, Yesu Kishi vuza na wi ciɗa, wi ta̱ ta na o kufolono Dada adama a̱ tsu. 2A̱yi ɗa alyuka a na a takpai unushi u tsu. Unushi u tsu u ɗa u takpai koci ba, amma n unushi u uma a aduniyan ra̱ka̱.
3Ci ta̱ e kuyeve a na ci yevei Ka̱shile mayun tsu tono baci ili i na u danai ci yaꞋan. 4Vuza na baci dem u danai, “N yeve ta̱ Ka̱shile,” amma u tono ili i na Ka̱shile ka danai ba, vuma vu nan lo vuza va aꞋuwa ɗa, ili i mayun kpamu yi punu wa̱ ni ba. 5Amma ci yaꞋan baci ili i na Ka̱shile ka danai, ucigi u Ka̱shile wi a kunamba ili i yoku a̱ ka̱tsuma̱ ka̱ tsu ba, nannai ɗa ce kuyeve a na ci koɓolo n a̱yi. 6Tsu dana baci a̱tsu uma a̱ ni a ɗa ci, u yotso ta̱ ci yongo uteku u na Yesu u yongoi.
Ka̱shile ka danai ci ciga aza o yoku
7A̱ja̱Ꞌa̱ a̱ va̱ a ucigi, mi a kuɗanaka ɗa̱ adama a na n neke ɗa̱ wila̱ u savu ba. U te u ɗa n u na e nekei ɗa̱ ɗe, akaka ɗa kpamu a na i panai ɗe. 8Amma u savu u ɗa feu. Kirisiti Kishi u yotsongu ta̱ a na wila̱ u nam pa wa mayun ɗa, ɗa a̱ɗa̱ feu i yotsongi a na mayun ɗa. Yi ta̱ e kene ka̱yimbi a kulaza, kutashi ku mayun kpamu ku gita̱i ɗe kakana.
9Vuza na baci dem u danai, “Mpa mi ta̱ o kuyongo a kutashi,” amma ɗa u iwain vuza a̱ ni, vuma vu nan lo u buwa ta̱ biꞋi o kuyongo a̱ ka̱yimbi. 10Vuza na baci dem u cigai aza a̱ ni wi ta̱ o kuyongo a kutashi, wi kpamu a kuzuwa ko vuza u ta̱ɗa̱tsa̱ ba. 11Ci iwan baci a aza o yoku, ci ta̱ o kuyongo ɗa ci kpamu a nwalu a̱ ka̱yimbi. Ci yeve ubuta̱ u na ci a kubana ba, adama a na ci e kene a̱ ka̱yimbi ba.
12Mi ta̱ a kuɗanaka ɗa̱, muku mu ucigi n va̱,
adama a na Ka̱shile ka cinukpaka ɗa̱ ta̱ unushi u ɗa̱ adama e Yesu.
13Mi ta̱ a kuɗanaka ɗa̱ mmaci,
adama a na i yeve ta̱ Kishi, vuza na wi lo a ayin a̱ ugiti.
Mi ta̱ a kuɗanaka ɗa̱, ushan u wawaꞋa,
adama a na i lyaꞋa ta̱ utsura u vuza vu gbani-gbani.
N ɗanaka ɗa̱ ta̱, muku,
adama a na i yeve ta̱ Dada va.
14N ɗanaka ɗa̱ ta̱, mmaci,
adama a na i yeve ta̱ Kishi, vuza na wi lo a ayin a̱ ugiti.
N ɗanaka ɗa̱ ta̱, ushan u wawaꞋa,
adama a na yi ta̱ n utsura.
Akaka a̱ Ka̱shile i ta̱ o kuyongo wa̱ ɗa̱,
ɗa i lyaꞋi ɗe utsura u vuza vu gbani-gbani.
15Ka̱ta̱ i ciga aduniyan ko ili i na yi a aduniyan ba. I ciga baci aduniyan, ucigi u Dada wi punu wa̱ ɗa̱ ba. 16Na va ɗaɗa uye wa aduniyan: ucigi u kupana uyoꞋo wu unushi u ka̱ci ka̱ tsu, n a̱shawuya, n kuyaꞋan n ka̱ a̱ra̱ɗi n ili i na ci n i ɗa. Ko ili i te i nam pa yu uta̱ u Dada ba, amma i ɗa ra̱ka̱ yu uta̱ ta̱ a aduniyan. 17Aduniyan n i na yi punu ra̱ka̱ i na uma a cikalai, yi ta̱ a kulaza, amma vuza na baci u yaꞋin ili i na Ka̱shile ki a kuciga, wi ta̱ o kuyongo ko wanai.
Vurala vi Kirisiti Kishi
18Muku mu ucigi n va̱, na va ɗaɗa ayin a ukocishi. I pana ta̱ vurala vu Kishi vi ta̱ lo a̱ kuta̱wa̱, gogo ta na irala i Kishi yi ta̱ lo n a̱bunda̱i punu na. Tsu nam pa tsu ɗa ci yevei ayin a ukocishi a ɗaɗa na. 19Uma a nam pa a̱ ka̱sa̱kpa̱ ta̱ A̱Ꞌisa̱ a aza o Kutoni, adama a na i koɓolo n a̱tsu mayun ba. I baci i n a̱tsu, ishi a kushamgba n a̱tsu. Ana a̱ ka̱sa̱kpa̱i tsu, u yotsongu ta̱ a na ele i n a̱tsu ba.
20Yi ta̱ n kuneꞋe ku na Vuza vu Ciɗa u nekei ɗa̱, adama a nannai ra̱ka̱ vu ɗa̱ i yeve ta̱ ili i mayun. 21U gaꞋan n ɗanaka ɗa̱ kpamu adama a ili i mayun ba, adama a na i yeve ta̱ ɗe i ɗa. I yeve ta̱ feu a na aza a aꞋuwa a tsu dansa ukuna u mayun ba. 22Yayi vuza va aꞋuwa? Vuza na dem u nanai a na Yesu Kirisiti Kishi kaꞋa, vuza va aꞋuwa ɗa wi. Vuza na dem u danai nannai vurala vu Kishi ɗa, u iwan ta̱ kpamu Dada m Maku ma. 23Vuza na baci dem u iwain Maku ma, vuma vu nan lo u iwan ta̱ feu Dada. Amma tsu dana baci cu ushuku ta̱ m Maku ma, ci ta̱ n Dada va feu.
24U gaꞋan ta̱ i lyaꞋa kelime n kutono kuyotsongusu ku na i panai a cau. I lyaꞋa baci kelime n kutono ili i na i panai n a cau, yi ta̱ a̱ kuda̱sa̱ngu koɓolo m Maku ma a asuvu a Dada a kpamu. 25Na ɗaɗa ili i na Kishi n ka̱ci ka̱ ni u yaꞋin uzuwakpani u kuneke tsu: wuma u babu uteku.
26Mi ta̱ a kuɗana adama a na n rono ɗa̱ atsuvu adama a uma a nan lo a na i a kugbagbala kukparasa ɗa̱. 27Amma a̱ɗa̱, Kirisiti Kishi u tsunku ɗa̱ ta̱ Ayinviki a̱ ni. Ayinviki a̱ ni i baci n a̱ɗa̱, ya kuciga vuza u yotsongusu ɗa̱ ba. Adama a na Ayinviki a̱ ni i ta̱ o kuyotsongusu ɗa̱ ukuna dem, ili i na kpamu wi o kuyotsongusu mayun ɗa, aꞋuwa a ɗa ba. Tonoi kuyotsongusu ka Ayinviki ka, ka̱ta̱ i lyaꞋa kelime punu ugbaɓi n Kishi.
28E, muku mu ucigi n va̱, lyaꞋi kelime n kokpo vi te n Kishi, adama a na u bono baci ci yongo babu wovon ka̱ta̱ kpamu tsu kpa̱ɗa̱ kupana wono a̱ a̱shi a̱ ni. 29I yeve ta̱ a na Kishi wi ciɗa: U yotso ta̱ i yeve feu yaba dem vu na wi a kuyaꞋan ili yu usuɓi maku ma̱ Ka̱shile maꞋa.
3A̱tsu muku n Ka̱shile n ɗa
1Dada u ciga tsu ta̱ n a̱bunda̱i, adama a nan lo i ɗaɗa i zuwai ɗa e ci ɗeke tsu muku n Ka̱shile. Mayun ɗa kpamu ci muku n ni. Adama a nan lo kpamu aduniyan e yeve Dada va ba, i ɗaɗa i zuwai ɗa a̱ kpa̱ɗa̱i kuyeve tsu. 2A̱ja̱Ꞌa̱ a̱ va̱ a na n cigai, gogo na a̱tsu muku n Ka̱shile n ɗa, ka̱ta̱ u yotsongu tsu ili i na tso kokpo a ayin a na Kishi u kubono ba. Amma ci yeve ta̱ a ayin a na baci Kishi u ta̱wa̱i kpamu, ci ta̱ o kokpo ci ni, adama a na ci ta̱ e kene yi tsu na wi mayun. 3Aza a na kpamu ra̱ka̱ a̱ ushuki n ili i nam pa i ta̱ o kuyongo ciɗa, tsu na Kirisiti Kishi wi ciɗa.
4Yaba dem vu na wi a kuyaꞋan unushi u iwan ta̱ wila̱ u Ka̱shile, adama a na unushi ili i te i ɗa nu ngoyomadama u Ka̱shile n Wila̱. 5I yeve ta̱ Kishi u ta̱wa̱ ta̱ adama a na u takpa unushi, amma a̱yi wi n unushi ba. 6Adama a nan lo vuza na baci wi ida̱shi koɓolo n Kishi wa kulyaꞋa kelime n kuyaꞋan unushi ba. Amma vuza na baci u lyaꞋi kelime n kuyaꞋan unushi ka̱ta̱ u saꞋwa kene yi ko u yeve yi ba.
7Muku n va̱, ka̱ta̱ i ka̱sa̱kpa̱ vuza u ya̱nsa̱ ɗa̱ adama a ili i nam pa ya ba. Uma i baci o kuyongo mayin, ɗaɗa adama a na i ta̱ ciɗa, tsu na Kishi wi ciɗa. 8Kalijani† ka̱ ka̱na̱i kuyaꞋan unushi ali n ayin a̱ ugiti, yaba dem vu na u lyaꞋi kelime n kuyaꞋan unushi a̱yi vuza vu Kalijani ɗa. Amma Maku ma̱ Ka̱shile† ma̱ ta̱wa̱ ta̱ adama a na u la̱nga̱sa̱ ulinga u Kalijani u nam pa. 9Aza a na i muku n Ka̱shile a ci lyaꞋa kelime n kuyaꞋan unushi ba, adama a na u neke le ta̱ wuma u savu. Adama a na Ka̱shile Esheku e le a ɗa, ele a kufuɗa kulyaꞋa kelime n kuyaꞋan unushi ba. 10Adama a nan lo ci ta̱ e kene ko yayi maku ma̱ Ka̱shile ko kpamu yayi maku ma Kalijani. Vuza na baci u yaꞋin i na i gaꞋin ba, a̱yi maku ma̱ Ka̱shile ma ba, vuza na baci kpamu dem u kpa̱ɗa̱i kuciga vuza a̱ ni, maku ma̱ Ka̱shile ma wi ba.
I ciganai
11Na va ɗaɗa akaka e te n a na i panai ɗe: a̱tsu ci ciganai. 12Ka̱ta̱ yo okpo an Kayinu† vuza na u ɓolongi ka̱ci ka̱ ni n Kalijani ɗa wu unai vangu vi ni ba. Yi ɗa̱i i zuwai ɗa wu unai ni? Adama a na ili i na u yaꞋin i gbani-gbani i ɗa, ili i na vuza a̱ ni u yaꞋin i singai i ɗa. 13A̱ja̱Ꞌa̱ a̱ va̱, uma a aduniyan a nam pa a yaꞋanka ɗa̱ baci cisheꞋe, ka̱ta̱ i yaꞋan mereve ba. 14Maciganai ma̱ tsu mo yotsongu tsu ta̱ tsu pasa ta̱ ukpa̱ a kubana a̱ ubuta̱ u wuma. Vuza na baci u kpa̱ɗa̱i kuciga vutoku nannai, u buwa ta̱ a̱ ubuta̱ wu ukpa̱. 15Vuza na baci dem u iwain vuza a̱ ni, vuza vu munaka ɗa, i yeve ta̱ aza a munaka i n wuma u babu uteku ba.
16Na va u yawa ta̱ ci yeve tsu na ucigi wi: Kishi u neke ta̱ wuma u ni adama a̱ tsu. Adama a nannai u gaꞋan ta̱ a̱tsu feu ci neke wuma u tsu adama a aza a na a buwai! 17Vuza wi baci n uciyi ɗa we enei vuza a̱ ni vu na vu nambai ili, amma u ɓa̱nka̱ yi ba, ucigi u Ka̱shile wi punu a vuma vu nan lo va ba. 18Muku n va̱, ci yotsongu ucigi wa aza o yoku a̱ ubuta̱ u kuɓa̱nka̱ le mayun, amma a̱ ubuta̱ u kuyaꞋan kadanshi ki ili ya koci ba. 19Ci ciganai baci, ci yeve ta̱ ci ta̱ a̱ ubuta̱ u mayun, ka̱ta̱ kpamu asuvu a̱ tsu a̱ da̱sa̱ngu e kelime ka̱ Ka̱shile. 20Amma ko asuvu a̱ tsu a̱ da̱sa̱ngu ba, adama o wono, Ka̱shile ka laꞋa ta̱ asuvu a̱ tsu, u yeve ta̱ kpamu ili dem.
21A̱ja̱Ꞌa̱ a̱ va̱, asuvu a̱ tsu a̱ da̱sa̱ngu baci ci ta̱ a kufuɗa kushamgba a̱ ubuta̱ u Ka̱shile babu wovon. 22Wi ta̱ e kuneke tsu ili dem i na tsu folonoi, adama a na tsu tono yi ta̱, ɗa ci yaꞋin ili i na u panai uyoꞋo. 23Na va ɗaɗa ili i na Ka̱shile ka danai: Ci neke a̱ɗu m Maku ma̱ ni, Yesu Kirisiti Kishi, ka̱ta̱ kpamu ci ciganai. Na va ɗaɗa feu ili i na Yesu u yotsongushi tsu ci yaꞋan. 24Aza a na o tonoi wila̱ u Ka̱shile, i ta̱ o kuyongo n Ka̱shile, Ka̱shile kpamu ki ta̱ o kuyongo n ele. Ci yeve ta̱ a na Ka̱shile ki o kuyongo n a̱tsu adama a Ayinviki a na u nekei tsu.
4Nlum ma aꞋuwa
1A̱ja̱Ꞌa̱ a̱ va̱ a na n cigai, ka̱ta̱ yu ushuku n yaba dem vu na u danai wi ta̱ n Ayinviki a̱ Ka̱shile ba. Kondoi le ra̱ka̱ i ciya̱ i yeve ko mayun ɗa a̱ uta̱i u Ka̱shile. Eneki a aꞋuwa n a̱bunda̱i a̱ uta̱ ta̱ ɗe a̱ kuka̱ra̱Ꞌa̱ a aduniyan. 2Na va ɗaɗa tsu na ve kuyeve Ayinviki a̱ Ka̱shile: vuza na dem u danai Yesu Kirisiti Kishi u ta̱wa̱ ta̱ a aduniyan tsu vuma, a̱yi vuza vu Ka̱shile ɗa. 3Amma vuza na dem u nanai ili i nam pa adama e Yesu, wi n Ayinviki a̱ Ka̱shile ba. Ayinviki a na vuza nan lo wi n a ɗa a̱ uta̱ ta̱ a̱ ubuta̱ u vurala vu Kishi. I yeve ta̱ ɗe a na vurala vu nam pa vi a̱ kuta̱wa̱ a aduniyan, gogo na ta na u yawa ta̱ ɗe.
4Muku n va̱, a̱ɗa̱ aza a̱ Ka̱shile a ɗa, i lyaꞋa ta̱ kpamu irala i nam pa ya. Ayinviki a̱ Ka̱shile i ta̱ wa̱ ɗa̱, a laꞋa ta̱ ta na vuza na wi a aduniyan n utsura. 5Irala i nam pa i ci yaꞋan ta̱ kadanshi ki ili ya aduniyan, ka̱ta̱ ta na uma a aduniyan a panaka le adama a na ele aza a aduniyan a ɗa. 6Amma a̱tsu aza a̱ Ka̱shile a ɗa; i ɗaɗa i zuwai ɗa aza a na e yevei Ka̱shile i a kupanaka tsu. I baci uma a̱ Ka̱shile ba, i a kupanaka tsu feu ba. Nannai ɗa ce kuyeve ko vuza wi n ayinviki a mayun ko a aꞋuwa.
Ucigi wu uta̱ ta̱ a̱ Ka̱shile
7A̱ja̱Ꞌa̱ a̱ va̱, yaꞋan ci ciganai, adama a na ucigi wu uta̱ ta̱ a̱ Ka̱shile. Vuza na baci dem wi n ucigi maku ma̱ Ka̱shile maꞋa, u yeve ta̱ kpamu Ka̱shile. 8Vuza na baci wi n ucigi ba u yeve Ka̱shile ba, adama a na Ka̱shile ucigi u ɗa. 9Ka̱shile ko yotsongu ta̱ ucigi u ni wa̱ tsu ana u suki Maku ma̱ ni me te a aduniyan u neke tsu wuma. 10Na va ɗaɗa ucigi u mayun. A̱tsu ɗa ci cigai Ka̱shile ba, amma a̱yi ɗa u cigai tsu ɗa u suki Maku ma̱ ni mo okpo alyuka a na a takpai unushi u tsu. 11A̱ja̱Ꞌa̱ a̱ va̱, uteku u na Ka̱shile ka cigai tsu nannai, a̱tsu feu ci ciganai. 12Vuza wi lo u saꞋwai kene Ka̱shile ba, amma ci ciganai baci, Ka̱shile ki ta̱ o kuyongo n a̱tsu, ka̱ta̱ ucigi u ni u shana mayin wa̱ tsu.
13Ka̱shile ke neke tsu ta̱ Ayinviki a̱ ni. Nannai ɗa ci yevei a na a̱tsu ci o kuyongo n a̱yi, uteku u na a̱yi wi o kuyongo n a̱tsu. 14Ka̱shile ka̱ suki Maku ma̱ ni mo okpo Kishi ka aduniyan. Ce ene yi ta̱, ɗa ci a kudana aza o yoku ukuna u ni gogo na. 15Vuza na baci u dansai e keteshe a na Yesu Maku ma̱ Ka̱shile maꞋa, wi ta̱ o kuyongo n Ka̱shile, Ka̱shile kpamu wi ta̱ o kuyongo n a̱yi. 16Ci yeve ta̱ uteku u na Ka̱shile ka cigai tsu ka̱u, ɗa tsu zuwai kpamu uneki u ka̱ɗu u tsu wa̱ ni.
Ka̱shile ucigi u ɗa. Ci lyaꞋa baci kelime m maciganai, ci ta̱ o kuyongo n Ka̱shile, Ka̱shile kpamu o kuyongo n a̱tsu. 17Ci ciga baci aza o yoku mayun, ɗa ci yongoi tsu na Kishi u yongoi a aduniyan a nam pa, ci a kupana wovon a kanna ka afada ba. 18Wovon wi punu a̱ ubuta̱ wu ucigi ba; ucigi u mayun u tsu loko ta̱ wovon ra̱ka̱. Vuma wi baci n wovon, wi ta̱ e kusheshe adanshi a takacika yi ta̱ ɗe. Vuma u pana baci wovon, ucigi u Ka̱shile u shana mayin a̱ ka̱ɗu ka̱ ni ba.
19Ci ta̱ a kuyaꞋan ucigi adama a na Ka̱shile ka̱ gita̱ ta̱ kuciga tsu a cau. 20Uma a dana baci, “N ciga ta̱ Ka̱shile,” amma ɗa a iwain aza e le, ele aza a aꞋuwa a ɗa. Aza a na baci a cigai aza e le ba, aza a na e enei, a kuciga Ka̱shile ba, vuza na a saꞋwai kene ba. 21Ka̱shile ke neke tsu ta̱ wila̱ u nam pa: aza a na a cigai Ka̱shile mayun ɗa a ciga feu aza o yoku.
5Ci lyaꞋa ta̱ utsura wa aduniyan
1Yaba dem vu na baci wu ushuki a na Yesu ɗa Kirisiti Kishi, vuma vu nan lo maku ma̱ Ka̱shile ma wi. Vuza na baci de dem u cigai esheku, u ciga ta̱ feu muku n ni. 2Na va ɗaɗa tsu na ci yevei a na ci cigai muku n Ka̱shile: ci ciga baci Ka̱shile ɗa tsu tonoi wila̱ u ni. 3Ci yotsongu ta̱ ucigi u tsu u Ka̱shile, tsu tono baci wila̱ u ni, u ɗa ta na wi n atakaci o kutono ba. 4Maku ma̱ Ka̱shile dem ma lyaꞋa ta̱ utsura wa aduniyan, uneki u ka̱ɗu u tsu kpamu u ɗaɗa u nekei tsu ulyaꞋi wu utsura u nam pa. 5Yayi u kulyaꞋa utsura wa aduniyan? Sai vuma vu na wu ushuki koci a na Yesu Maku ma̱ Ka̱shile maꞋa.
Ngan mu ukuna u Yesu Kirisiti Kishi
6Yesu Kishi a̱yi ɗa vuza na u ta̱wa̱i m mini ma̱ kusumbu ka akucina ku ni koɓolo nu mpasa mu ukpa̱ n ni. U ta̱wa̱ m mini koci ba, amma koɓolo m mini nu mpasa. Ayinviki a̱ ka̱ci ka̱ ni a danai, a na mayun ɗa na va, adama a na Ayinviki a mayun ɗa i. 7Ngan n tatsu mi ta̱ lo n na n danai tsu ukuna u Yesu: 8Ele ɗa Ayinviki, m mini, nu mpasa, ɗa ele dem a yaꞋin kadanshi ke te. 9Tsu ushuku ta̱ n uma a dana baci ili yi ta̱ mayun. Amma ili i na Ka̱shile ka danai i laꞋa ta̱ n utsura, u dana tsu ta̱ ɗe ili i mayun adama a Maku ma̱ ni. 10Vuza na baci wu ushuki ɗe m Maku ma̱ Ka̱shile, vuma vu nan lo wu ushuku ta̱ n ili i na Ka̱shile ka danai adama a̱ ni mayun ɗa. Amma vuza na baci wu ushuki n ili i na Ka̱shile ka danai adama a̱ ni ba, wo okpo ta̱ derere n tsu na e ci ɗeke Ka̱shile vuza va aꞋuwa. 11Na va ɗaɗa ili i na Ka̱shile ka danai tsu: Ka̱shile ke neke tsu ta̱ ɗe wuma u babu uteku. Maku ma̱ ni a̱yi ɗa vuza na u zuwai wuma u nam pa u yaꞋan nannai. 12Vuza na baci dem wi m Maku ma wi ta̱ n wuma u nam pa; vuza na baci dem wi m Maku ma̱ Ka̱shile ba, wi n wuma ba.
Wuma u babu uteku
13N ɗanaka ɗa̱ ta̱ ili i nam pa, a̱ɗa̱ vu na yu ushuki m Maku ma̱ Ka̱shile, i ciya̱ i yeve yi ta̱ n wuma u babu uteku. 14Ci ta̱ a kufuɗa kuta̱wa̱ u Ka̱shile babu wovon, adama a na ci yeve ta̱ feu wi ta̱ a kupanaka tsu, tsu folono baci Ka̱shile ili dem i na yi derere n ili i na u cigai. 15U tsu panaka tsu ta̱ ayin a na baci dem tsu folonoi ni. Adama a na ci yeve ta̱ na va mayun ɗa, ci yeve ta̱ feu a na u tsu neke tsu ili i na tsu folonoi ni.
16Ye ene baci vuza vu Kutoni a kuyaꞋan unushi u na u kuzuwa yi ukpa̱ ba, ka̱ta̱ i yaꞋan avasa u Ka̱shile, a̱yi Ka̱shile ta na wi ta̱ e kuneke vuma vu nan lo wuma. Mi ta̱ a kadanshi ka uma a na unushi u le u kuzuwa le ukpa̱ ba.5:16 Unushi u na u kuzuwa ukpa̱ u ɗaɗa vuza u iwan kushuku n Yesu Kishi, n kuꞋiwan kuciga uma. Sai vuza vu unushi va u shika̱ unushi u ni ka̱ta̱ a cinukpaka yi u ɗa. Amma unushi wi ta̱ lo u na u tsu zuwa ukpa̱, ka̱ta̱ i zama kuyaꞋan kavasa u Ka̱shile adama a nan lo ba. 17Ayin dem a na vi yaꞋin ili i wuya, na lo va unushi u ɗa, amma unushi ra̱ka̱ ɗa u na u tsu zuwa ukpa̱ ba.
18Ci yeve ta̱ a na aza a na i muku n Ka̱shile a ci lyaꞋa kelime n kuyaꞋan unushi ba. Maku ma̱ Ka̱shile ma̱ tsu la̱na̱ le ta̱, vuza vu gbani-gbani kpamu u kusaꞋwa le ba.
19Ci yeve ta̱ a̱tsu aza a̱ Ka̱shile a ɗa, amma vuza vu gbani-gbani a̱yi ɗa wi a kulyaꞋa tsugono tsa aduniyan ra̱ka̱.
20Ci yeve ta̱ a na Yesu Kirisiti Kishi Maku ma̱ Ka̱shile u ta̱wa̱ ta̱ ɗe ɗa u yotsongi tsu Ka̱shile ka mayun. Ci ta̱ o kuyongo n Ka̱shile mayun, adama a na ci ta̱ o kuyongo m Maku ma̱ ni Yesu Kishi. A̱yi ɗa Ka̱shile ka mayun, vuza na u ci neke wuma u babu uteku.
21Muku n va̱, mayun ɗa i yaꞋan daꞋin n a̱ma̱li.