Tito
11 Mahal ko a Tito, Hikán iye ti Pablo a alipin nu Diyos sakay apostol ni Jesu-Cristo. Piniliyák na para patatagán u pánnampalataya nu pinile na hide a tolay sakay palawakán u pákkatukoy de tu tatahoden a tungkul tu kakkabiyag a ayun tu kaluuban nu Diyos. 2 U pánnampalataya sakay pakkaunawa a iye u mangatád tu pag-asa tam a matanggap tam u biyag a awan ti kahád a inpananto nu Diyos bagu na a linalang i munduwáy. Siya u Diyos a awan mágbule-bule. 3 Sakay tu netakda a panahun ay nepakapospos na dán u upos na. Iye ay nepagkatiwala nikán nu Diyos a Tagapagligtas tam para itoldu ayun tu utus na. 4 Magsulaták niko, Tito, a tunay ko a anak ti pánnampalataya. Magkahod kam nakwa ti págpapala sakay kapayapaan a gábwat tu Diyos a Ama sakay ti Jesu-Cristo a Tagapagligtas tam. 5 Kanya inwahak taka ti Creta ay para tapusan mo u gawain hide a awan palla natapos sakay para mangpili ka ti puno hide tu simbaan nu kada banuwan konna tu inyutus ko niko. 6 U pinuno a dapat mo a idátton ay kailangan a awan ti kapintasan, essa la ti kabanga, mánnámpalataya u aanak de, sakay awan hide mágkagulo oni maigát ti págguluwan. 7 Dipo u tungkulin nu essa a pinuno nu simbaan ay para tu Diyos, dapat a awan siya ti kapintasan. Dapat a awan siya hambug oni alisto a maiyamut sakay dapat be a awan siya máglasing, awan mággagolo oni hupa ni pilak. 8 Nan masaya a magpatulos, magággustuwán tu mágkaganda gimet, mahinahun, matapat siya a mákpággagum tu kapareho na, sumássunud tu Diyos sakay te págpugad ti sadile. 9 Kailangan a sumássunud tu adal tungkul ni Jesu-Cristo a ayun tu netoldu nikuna para metoldu na tu agum u maganda a adal sakay metama na u kamaliyan nu kumontra hide tu tama a toldu. 10 Dipo makpal a tolay lalu dán u sumássunud hide tu kaugaliyan nu Judio hide, u mangkontara ti adalan iye. Dáddayaán de u agum tu pamamag-itan nu toldu hide a awan ti kabuluhan. 11 Kailangan a pugáddán mo hide ti gággimitán diyan iye, dipo sássidaán de u bawat pamilya tu pamamag-itan nu itattoldu de a awan dapat a itoldu. Gággimitán di iye para la a magkahod hide ti pilak. 12 Kinagi mismo nu essa a kákkagiyán de a prupeta a taga-Creta, “U taga-Creta hide ay mágkabule, kumán a hayup u ugali de, tamad sakay mágkaunas hide.” 13 Tama u kinagi na, kanya pagkagiyan mo hide ti mahigpit tánni mabiyag hide ti tama ayun tu pánnampalataya de, 14 sakay dyan dán hide mágsaneg tu bida nu Judio hide a awan ti pinagseserbiyan oni tu toldu nu tolay hide a immadág tu tatahoden. 15 Malinis u atanan a bagay tu tehhod a malinis a isip, pero tu mágkadukás sakay tu awan mánnampalataya ay awan ti bagay a malinis dipo madangát u konsensiya sakay u pággisipan de hide. 16 Kákkagiyán de a tukoy de u Diyos, pero awan labe ketan tu gimet de. Awan hide ti pinagseserbiyan a tolay sakay masássuwayán hide, kaya awan de tukoy a maggimet ti maganda.
21 Pero hiko Tito, ay itoldu mo u adal a neayun tu tama a toldu. 2 Tolduwan mo u lállakay hide a magin mahinahun, kagalang-galang, mapagpugád ti sadile, matatag ti pánnampalataya, págmahal sakay matiyaga. 3 Kagiyán mu be tu bábbekás a mabiyag hide a tehhod a kabanalan, awan mametmet, sakay awan makánlasingán nan hide u dapat a magtoldu tu maganda a ugale. 4 Tánni matolduwan u anak palla hide a bábbey ate kabanga a mahalán u kákkabanga de sakay tu anak de. 5 Matolduwan nakwa hide a magin mahinahun, tanni u maganda la u gimitán de sakay isipán, sakay magin masipag tu gággimitán tu bilay, mabait, matapat sakay mágpasakup tu kákkabanga de. Tánni konna hod ay awan ti magkagi ti madukás kontara tu upos nu Diyos. 6 Tolduwan mu be u aolito hide a magpugád tu sadile de tu atanan a bagay. 7 Sakay hiko a mismo u mángpeta ti maganda tu atanan a gimitán mo tánni magin halimbawa ka tu atanan. Ipeta mo u katapatan tu págtoldu mo tánni ketan de a tatahoden u págserbi mo ni Cristo. 8 Gamitán mo u mágkalinis hide a pággupos tánni awan ti makamansa tu kákkagiyán mo. Ni konna hod ay mapasanike u kadima tam hide dipo awan hide ti makagi a madukás kontara nikitam. 9 Tolduwan mo be u alipin hide a sumunud tu amo de hide tánni masaya nide u amo de. Sakay dyan de hide tábbeg-tabbegán, 10 sakay diyan dibe hide pagtakawan, nan ipeta de a tapat hide tu atanan a bagay. Tánni mepeta de u kagandaan nu toldu hide a gábwat tu Diyos a Tagapagligtas tam. 11 Dipo impeta dán nu Diyos u kagbi na a makapangatád ti kaligtasan tu atanan a tolay. 12 U kagbi na u nangtoldu nikitam tánni adággen tamon u kákkabiyag a makamundu sakay u kagustuwan nu pilas tánni mabiyag kitamon nadid a tehhod a págpugad ti sadile, banal sakay karapat-dapat tu Diyos, 13 mentras a maguhay kitam tu dakila a aldew a áasaan tam. Iye u kássole nu dakila tam a Diyos sakay Tagapagligtas a ti Jesu-Cristo. 14 Inyatád na u biyag na tánni tubusán na kitam tu atanan a kadukássan tam. Sakay lininisan na kitam tánni magin kao na a tolay a magággustuwán a maggimet ti maganda. 15 Itoldu mo iye hide a atanan sakay kagiyan mo hide a sunudán di iye. Te kapangyariyan ka a pagkagiyan hide ni kailangan kaya dyan mo pabayan a tehhod a mángmemenos niko.
31 Ipaala-ala mo tu mánnampalataya hide hina a magpasakup tu gubiyerno. sakay magin masássunudán hide sakay pirme a handa a maggimet ti mágkaganda. 2 Pagkagiyan mo hide a dyan magupos ti madukás tungkul tu agum. Sakay tolduwan mo hide a magin mahinahun sakay maaunawaan sakay mapagpakumbaba tu balang essa. 3 Dipo tu itod ay awan kitam be ti tukoy. Hikitam be tu itod ay masássuwayán sakay maigát ti págguluwan. Nalinlang kitam sakay naalipin kitam tu atanan a kalase nu kadukássan sakay mágkadangát a gimet, nabiyag kitam tu kadukássan sakay kassene. Kaiyamutan kitam nu agum sakay kaiyamutan tam be hide. 4 Pero nikuna nehayag dán nikitam u págmahal sakay kagbi nu Diyos a tagapagligtas tam, 5 ay inligtas na kitam, bakán a dipo tu mágkaganda tam hide a gimet nan tu kagbi na la nikitam. Inligtas kitamon nu Diyos a kuman a neenak kitam a huway tu pamamag-itan nu Banal a Ispirito, dipo siya u nanglinis sakay nangatád ti bigu a biyag nikitam. 6 Inyatád na nikitam u Banal na a Ispirito tu pamamag-itan ni Jesu-Cristo a tagapagligtas tam. U Banal a Ispirito u mangatád nikitam tu atanan a kailangan tam tu pánnampalataya tam tu Diyos. 7 Sakay nadid ay imbilang kitamon nu Diyos a matuwid tu pamamag-itan nu kagbi na, tánni hikitam u magin tagapagmana sigun tu inpananto na a biyag a awan ti kahád a áasaan tam. 8 Tatahoden i adalan iye, kaya buo mo iye a tiyaga a itoldu tu mánnampalataya hide tu Diyos para ilaan de u sadile de tu pággimet ti maganda. I bagayan hidenye ay tunay a maganda sakay dakál a pakinabang para tu tolay. 9 Pero umadeyo ka tu awan hide ti kabuluhan a uhunan, konna tu pángsaysay tu atakdug a listaan nu nunu hide, u pamágdibate sakay pamágdadema tungkul tu Kautusan. Dipo i konna ay he a uhunan ay awan ti meatád a maganda. 10 Nite tolay a paggábwatan nu pamágkampe-kampe, Pagkagiyan mo ti pumensan pero ni awan siya umimang ay pagkagiyan mo a huway ti kapenduwa pero ni awan pade siya mágsaneg ay adeyuwan mo dán siya. 11 Dipo tukoy mu dán a ina a tolay ay madukás sakay makasalanan. U kasalanan na i mangpatunayay a dapat siya a maparusaan. 12 Paangayán ku hina niko ti Artemas ati Tiquiko u essa na a ngahan. Káddemat na hina ay pilitán mo a makaangay ti Nikopolis. Dipo he dákhod a mangamiyan. 13 Gimitán moy u makaya moy para matulungan di Apolos sakay ti Senas a abugadu tánni makapaghektat hide ti mabilis. Siguraduwán mo a awan hide magkulang tu atanan a kailangan de. 14 Sakay tolduwan mo u kákkapatkákka tam hide a Kristiyano hina a ilaan de u sadile de tu pággimet ti maganda a makatulung tu ánya man a kailangan para u biyag de ay te pagserbiyan. 15 Kumusta ka hina kagi nu kákkapatkákka tam hide he ti Creta a Kristiyano. Ikumustaák mo be tu atanan a kákkapatkákka tam hina ti pánnampalataya. Págpalaan kam nakwa nu Diyos a atanan.